Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 26 iюня 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 28-й де́нь.
Святы́я му́ченицы Параске́вы, [нарече́нныя Пя́тницы].

ВЕЧЕРЪ,
Блаже́нъ му́жъ, 1 антифо́нъ. На Го́споди, воззва́хъ: стихи́ры на 6, гла́съ 4. Подо́бенъ: Да́лъ еси́ зна́меніе.

Ри́мъ тя́ предлага́етъ,* я́ко огра́дъ, цвѣ́ты благово́нныя,* Параске́во многострада́льная,* вѣ́рныхъ смы́слы облагово́нствуя* воня́ми добродѣ́тельными,* и смра́дъ страстны́й отгоня́я,* благода́тію, сла́вная, всегда́,* му́чениковъ добро́та,* дѣ́въ похвале́ніе и чуде́съ пучи́на.

Яко сла́ва многоцѣ́нна всѣ́мъ да́стся* отъ Христа́ Бо́га на́шего,* въ Ри́мѣ пострада́вши* и въ не́мъ бы́вши, сла́вная му́ченице,* де́монская лука́вствія отъ человѣ́къ отгоня́ющи* заступле́ніемъ твои́мъ.* Тѣ́мъ тя́ вси́ блажи́мъ,* и свята́я твоя́ страда́нія дне́сь похваля́емъ,* Параске́во многострада́льная.

Соблюда́ема си́лою Христо́вою,* всесла́вная Параске́во,* болѣ́зней тѣле́сныхъ небрегла́ еси́,* къ подвиго́мъ вмѣсти́лася еси́,* му́жескимъ смы́сломъ,* же́нскую сла́бость отве́ргши,* упова́ніемъ укрѣпи́вшися,* воспрія́ла же еси́ съ пе́рвенствующими* озаре́ніе, прехва́льная.

Ины стихи́ры, гла́съ 6.

Вѣ́рніи, соше́дшеся,* хва́ляще тя́ любо́вію,* блажи́мъ по́двиги твоя́ и страда́нія,* му́ченице Параске́во.* Христа́, Жениха́ твоего́, умоли́* отъ бѣ́дъ и напа́стей изба́вити ны́* твои́ми моли́твами.

Отъ твои́хъ крове́й* трудолю́бно и́стинную ча́шу испила́ еси́,* жела́ющи по Христѣ́, Женисѣ́ твое́мъ,* во слѣ́дъ потещи́,* прехва́льная му́ченице Параске́во,* я́ко ла́стовица доброгла́сная,* пѣ́снь воспѣва́ющи* ко всѣ́хъ Творцу́, Христу́ Бо́гу,* о пра́зднующихъ па́мять твою́.

Твои́ роди́теліе* Христо́вы стра́сти почита́юще,* знамени́таго дне́ тезоимени́ту тя́ нареко́ша.* Воспита́на же бы́вше,* и на стра́сти дерзну́ла еси́,* и ра́ны претерпѣ́вши,* въ темни́цѣ, а́ки въ черто́зѣ свѣ́тлѣ,* лику́ющи, вопія́ла еси́:* никогда́же отлучу́ся Тебе́, Го́споди,* но посли́ ми по́мощь Твою́* и спаси́ мя вели́кія ра́ди Твоея́ ми́лости.

Сла́ва, гла́съ 6:

Одесну́ю Спа́са, я́коже пое́тъ Дави́дъ, предста́ Цари́ца, и твоя́ душа́, я́ко ря́снами испещре́на златы́ми. И же́ртву себе́ предста́вила еси́ Го́споду твоему́, я́ко кади́ло благово́нно, принесла́ еси́ кро́вь пло́ти твоея́, му́ченице прехва́льная Параске́во, моли́ся о на́съ Влады́цѣ Христу́ Бо́гу, да спасе́тъ ду́ши на́ша.

И ны́нѣ, богоро́диченъ: Кто́ Тебе́ не ублажи́тъ...
Вхо́дъ. Проки́менъ дне́. И чте́нія.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

На литíи стихи́ры, гла́съ 5. Подо́бенъ: Ра́дуйся.

Ра́дуйся, Госпо́дня а́гнице, уподо́бльшися честнѣ́й и блаже́ннѣй успѣ́шно стра́сти Безсме́ртнаго на Крестѣ́, мірскíя стра́сти разори́вшаго. Исто́чниче, источа́ющій, я́ко во́ды, чудеса́, иста́явшая сердца́ немощны́хъ дарова́ніемъ исцѣле́ній напая́ющи, страстоте́рпице пребога́тая. Де́рзость разруши́ла еси́ и́дольскую немощну́ю, небе́снаго черто́га наслѣ́довавши жили́ще. Христу́ моли́ся дарова́ти душа́мъ на́шимъ ми́ръ и ве́лію ми́лость.

Идѣ́же веселя́щихся е́сть жили́ще, идѣ́же свѣ́тъ невече́рній, въ дому́ Бо́га Жива́го, посредѣ́ ски́ніи ди́вныя, идѣ́же ли́къ пра́зднующихъ, честна́я, весе́ліемъ, свѣщу́ иму́щи свѣ́тлу, недрема́нну. Та́мо наслажда́ющися Вы́шняго Божества́ и отту́ду бога́тно сія́ющи свѣтлостьми́, Христу́ моли́ся дарова́ти душа́мъ на́шимъ ми́ръ и ве́лію ми́лость.

Ви́дяще си́лы небе́сныя, пло́тію стра́ждущую Содѣ́теля ра́ди Параске́ву, и Его́ си́лою крѣпя́щуся, глаго́лаху: се́, и дѣ́вы на земли́ просла́виша Го́спода. Человѣ́цы же, тре́петомъ одержи́ми, ужаса́хуся, и, уди́вльшеся, пѣ́сньми прославля́ху, глаго́люще: о́ле чудесе́! дѣ́ва врага́ побѣди́ и мо́лится Ми́лостивому Влады́цѣ за мíра спасе́ніе, да пода́стъ ми́ръ и ве́лію ми́лость.

Ра́дующися, предста́ла еси́ иге́мону, му́ченице до́бляя Параске́во, я́сно вѣ́ру проповѣ́дающи, строга́нія мно́га му́жески претерпѣ́ла еси́, мучи́теля посрами́вши, Христу́ уневѣ́стилася еси́. Ему́же предстоя́щи, моли́ся за честву́ющія тя́ и вѣ́рою творя́щія па́мять твою́.

Ра́дуйся, а́гнице вседо́бляя, Агнцу и Па́стырю прине́сшися же́ртва, огне́мъ всесожега́ема, я́ко огне́мъ любве́ разже́гшися по Христѣ́, Женисѣ́ твое́мъ. Пла́мень угаси́вши и́дольскаго су́етства, и свѣщу́ неуга́сну душе́вную соблю́дши, и чуде́сными свѣтлостьми́ тмы́ ополче́нія де́моновъ страда́льчески побѣди́вши, вошла́ еси́ со Христо́мъ въ черто́гъ небе́сный. Моли́ся о творя́щихъ па́мять твою́, дарова́ти на́мъ ми́ръ и ве́лію ми́лость.

Сла́ва, гла́съ 6:

Посрами́ся лука́вый вра́гъ, отъ дѣ́вы побѣжда́емь, я́ко прама́терь содѣ́я дерзнове́нну ко грѣху́. Отъ Дѣ́вы же роди́вшееся Сло́во Отчее непрело́жно и несказа́нно, я́коже вѣ́сть еди́нъ Са́мъ, кля́тву разруши́ Ада́ма и Евы Христо́съ Бо́гъ, вѣнча́вый досто́йно Параске́ву му́ченицу, и тоя́ ра́ди да́руетъ мíру очище́ніе и ве́лію ми́лость.

И ны́нѣ, богоро́диченъ, [гла́съ то́йже: Творе́цъ и Изба́витель мо́й...]

На стихо́внѣ стихи́ры, гла́съ 4. Подо́бенъ: Яко до́бля.

Обагре́ніи кро́вными* спасе́нія оде́жду* себѣ́, всехва́льная, обагри́вши* и убѣли́вшися Ду́хомъ,* Го́споду обручи́лася еси́, безсме́ртному Царю́,* соблюда́ющему тя́ непоро́чну* и нетлѣ́нну во вѣ́ки вѣко́въ* въ черто́зѣхъ небе́сныхъ,* я́ко дѣ́ву преудо́брену и нетлѣ́нну.

Сти́хъ: Святы́мъ, и́же су́ть на земли́ Его́,* удиви́ Госпо́дь, вся́ хотѣ́нія Своя́ въ ни́хъ.

Къ ра́намъ приобщи́вшися,* и со огне́мъ бра́вшися,* и плотска́я влаче́нія претерпѣ́вши,* и коно́бная врѣ́нія до́блественнѣ прене́сши,* непобѣжде́на бы́сть мы́слію,* и истука́ннымъ не пожре́,* но прекло́нши Бо́гу вы́ю,* ме́чнымъ усѣче́ніемъ,* вѣне́цъ нося́щи, на небеса́ взы́де.

Сти́хъ: Терпя́, потерпѣ́хъ Го́спода, и вня́тъ ми́,* и услы́ша моли́тву мою́.

Ка́плями кро́вными обагри́вшися,* возсія́ла еси́ проявле́нно, я́ко со́лнце,* и отгна́ла еси́, всехва́льная,* безбо́жія тму́ благода́тію,* му́ченице Параске́во,* и вѣ́рныя просвѣти́ла еси́,* чту́щія твоя́ до́блественныя по́двиги* и па́мять свѣ́тлую, и свѣтоно́сную,* и всеспаси́тельную.

Сла́ва, гла́съ 8:

Сія́ глаго́летъ Параске́ва къ мучи́телю: вра́же нечести́вый, иге́моне, что́ неи́стовствуеши на христіа́ны? Ни ца́рства у тебе́ отъя́хъ, ни гра́да твоего́ разори́хъ, но бу́ими словесы́ увѣща́ти мя́ помышля́еши? Азъ тебе́ небрегу́, ни твои́хъ безу́мныхъ глаго́лъ, пло́ти бо не щажду́ за Христа́ моего́, зане́ Онъ лю́битъ мя́ и Ца́рство мнѣ́ да́руетъ, къ Нему́ пойду́ и Того́ бу́ду невѣ́ста, и То́й мене́ спасе́тъ отъ ру́къ вра́гъ мои́хъ, и да́руетъ ми́ жи́знь вѣ́чную.

И ны́нѣ, богоро́диченъ, [гла́съ то́йже: Безневѣ́стная Дѣ́во...]

Тропа́рь, гла́съ 4:

Прему́драя и всехва́льная Христо́ва му́ченица Параске́ва, му́жескую крѣ́пость пріе́мши, же́нскую же не́мощь отве́ргши, діа́вола побѣди́ и мучи́теля посрами́, вопію́щи и глаго́лющи: пріиди́те, тѣ́ло мое́ мече́мъ ссѣцы́те и огне́мъ сожги́те, а́зъ бо, ра́дующися, иду́ ко Христу́, Жениху́ моему́. Тоя́ моли́твами, Христе́ Бо́же, спаси́ ду́ши на́ша.

Сла́ва, и ны́нѣ, богоро́диченъ, [гла́съ то́йже: Еже отъ вѣ́ка утае́нное...]



НА УТРЕНИ,
На Бо́гъ Госпо́дь: тропа́рь святѣ́й, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 4. Подо́бенъ: Ско́ро предвари́.

Жениха́ возлюби́вши, Творца́ и Бо́га, жениха́ тлѣ́ннаго оста́вила еси́, му́ченице честна́я Параске́во. И, ра́дующися, претерпѣ́ла еси́ му́ки и растерза́нія, и о́гненное томле́ніе. Тѣ́мже и вѣне́цъ нося́щи, къ Боже́ственному черто́гу возшла́ еси́, испроша́ющи всѣ́мъ грѣхо́въ оставле́нія. [Два́жды.]

Сла́ва, и ны́нѣ, богоро́диченъ:

Дѣ́во Всенепоро́чная, Яже Пресу́щнаго Бо́га ро́ждшая, со страстоте́рпицею Того́ непреста́нно моли́, оставле́ніе прегрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, еди́на Всепѣ́тая.

По 2-мъ стихосло́віи сѣда́ленъ, гла́съ 4. Подо́бенъ: Вознесы́йся.

Жениха́ твоего́, Христа́, возлюби́вши и свѣщу́ твою́ свѣ́тло украси́вши, добродѣ́тельми просія́ла еси́, сла́вная. Тѣ́мже возшла́ еси́ въ небе́сный черто́гъ, вѣне́цъ страда́нія пріи́мши. Отъ бѣ́дъ изба́ви на́съ, соверша́ющихъ, Параске́во, па́мять твою́. [Два́жды.]

Сла́ва, и ны́нѣ, богоро́диченъ:

По Бо́зѣ во Тво́й, Богоро́дице, покро́въ боже́ственный прибѣга́ю, смире́нный, и припа́дая, молю́ся: поми́луй, Пречи́стая, я́ко превзыдо́ша главу́ мою́ грѣси́, и бою́ся, Влады́чице, му́ки, и трепе́щу. Моле́ніе сотвори́, Чи́стая, къ Сы́ну Твоему́, отъ си́хъ изба́вити мя́.

По поліеле́и сѣда́ленъ, гла́съ 8. Подо́бенъ: Прему́дрости.

Уневѣ́стившися Го́споду благолѣ́пно, я́коже да́ръ, кро́вь и заколе́ніе Тому́ принесла́ еси́, страстоте́рпице отрокови́це Параске́во, и черто́гъ боже́ственный досто́йно улучи́ла еси́, просвѣще́нія неизрече́ннаго непреста́нно исполня́ема. Тѣ́мже святу́ю и честну́ю па́мять твою́ творя́ще духо́вно, Спа́са прославля́емъ и вѣ́рно взыва́емъ ти́: моли́ Христа́ Бо́га грѣхо́въ оставле́ніе пода́ти честву́ющимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко Дѣ́ву и еди́ну въ жена́хъ Тя́, безъ сѣ́мене ро́ждшую Бо́га пло́тію, вси́ ублажа́емъ ро́ди человѣ́честіи: Огнь бо всели́ся въ Тя́ Божества́, и я́ко Младе́нца дои́ши Зижди́теля и Го́спода. Тѣ́мъ а́нгельскій ли́къ досто́йно сла́витъ пресвято́е Рождество́ Твое́, и ро́дъ человѣ́ческій согла́сно вопіе́тъ Ти́: моли́ Христа́ Бо́га прегрѣше́ній оставле́ніе дарова́ти, покланя́ющимся вѣ́рою пресвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, [гла́съ 4]: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Вся́кое дыха́ніе... Ева́нгеліе Матѳе́я, зача́ло 62.

По 50-мъ псалмѣ́ стихи́ра, гла́съ 6:

Съ вы́шними чи́нми причта́лася еси́, сла́вная, мíръ оста́вльши и Христа́ возжелѣ́вши, Параске́во всечестна́я, проси́ на́мъ ми́ра и ве́лія ми́лости.

Кано́нъ Богоро́дицы со ирмосо́мъ, на 6, гла́съ 8: Во́ду проше́дъ, я́ко су́шу... И святы́я, два́ кано́на, на 8.

[Пе́рвый кано́нъ святы́я,] гла́съ 4.
Пѣ́снь 1.

Ирмо́съ: Отве́рзу уста́ моя́ и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Свѣ́томъ Боже́ственнымъ освѣти́вшися свы́ше, мра́къ отжени́ неразу́мія моего́ и пода́ждь ми́ моли́твами твои́ми, Параске́во, благода́ть, воспѣва́ти твои́хъ, му́ченице, чуде́съ мно́жества.

Со́лнца свѣтлѣ́йши, я́ко и́стинно возсія́ла еси́ у́тро, утвержде́ніе Це́ркве бы́вши Христо́вы, озари́ла еси́ луча́ми по́двиговъ, му́ченице Параске́во, твои́ми чудесы́ мíра концы́.

Жениха́, безсме́ртнаго Христа́, возлюби́вши, я́ко вѣ́рою Того́ стра́сти о́бщница показа́лася еси́ и воспрія́ла еси́ вѣ́чное Ца́рство и вѣне́цъ нетлѣ́нный, му́ченице Параске́во сла́вная.

Богоро́диченъ: Дѣ́во Всенепоро́чная, Христа́ роди́вшая, и Сего́ въ ложесна́хъ понесла́ еси́, истинноимени́тая, разрѣши́ мра́къ души́ моея́ и просвѣти́ мя́, да пою́ Тя.

Другíй кано́нъ, гла́съ 8.
Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Пои́мъ Го́сподеви, просла́вльшему па́мять му́ченицы, и приводя́щу земны́я ли́ки къ похвале́нію дне́сь.

Сла́ву презрѣ́ла еси́, о бога́тствѣ неради́вши, честна́я му́ченице Параске́во, на стра́сть себе́ вдала́ еси́.

Возжела́ Влады́ка твоея́ добро́ты, му́ченице, и въ небе́сный черто́гъ всели́ тя.

Богоро́диченъ: Ро́дъ Ада́мовъ па́че ума́ блаже́нства Тобо́ю, ра́й отве́рстъ, обрѣ́тше Богоро́дице, досто́йно хва́лимъ Тя́.

Катава́сія: Отве́рзу уста́ моя́...

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Па́лицами неми́лостивно біе́ма, ра́довашеся, лы́стомъ сокруша́емымъ и косте́мъ вку́пѣ, приснопа́мятная му́ченица Параске́ва, вопію́щи: ничто́же мя́ разлучи́тъ отъ любве́ Твоея́, Христе́.

Уста́ нечести́выхъ, глаго́лющая беззако́ніе на пра́веднаго, и язы́къ велерѣ́чивъ загради́шася, му́ченица Параске́ва вопія́ше, Спа́са проповѣ́дающи.

Крове́й твои́хъ кропле́ніи безбо́жія о́гнь погаси́ла еси́, многострада́льная му́ченице Параске́во, и вѣ́рныхъ ра́зумы просвѣти́ла еси́.

Богоро́диченъ: Глаго́лы благочести́вно исполня́ются Иса́іины: Дѣ́ва бо родила́ е́сть во пло́ти Жизнода́вца Христа́, Спа́са ду́шъ на́шихъ.

Инъ.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ и пое́тъ Тя́ ду́хъ мо́й.

Ты́ еси́ утвержде́ніе мое́, Го́споди, — глаго́лаше му́ченица, — Ты́ же и заступле́ніе, и къ Тебѣ́ прибѣго́хъ, Царю́ мíра.

Яви́лася еси́ на суди́щи, мужеу́мну ду́шу иму́щи, и врага́, я́ко нехра́бра су́ща, побѣди́ла еси́, всехва́льная.

Души́ моея́ зѣ́ницы исцѣли́, всехва́льная му́ченице, моли́твами твои́ми и у́мъ мо́й упра́ви.

Богоро́диченъ: Пода́ждь на́мъ по́мощь моли́твами Твои́ми, Пречи́стая, совѣ́ты отрѣва́ющи лю́тыхъ обстоя́ній.

Сѣда́ленъ, гла́съ 8. Подо́бенъ: Прему́дрости.

Крове́й твои́хъ струя́ми, му́ченице Христо́ва, пото́ки нече́стія изсуши́вши, всехва́льная Параске́во, одожде́ніемъ же благода́ти слове́сныя напая́еши бразды́, въ ни́хже прозяба́еши кла́съ вѣ́ры. Къ сему́ же, сла́вная, и по сме́рти яви́лася еси́, точа́щи жи́знь муче́нія ра́ди, страстоте́рпице всехва́льная. Моли́ Христа́ Бо́га дарова́ти душа́мъ на́шимъ ве́лію ми́лость.

Сла́ва, другíй сѣда́ленъ, гла́съ 4. Подо́бенъ: Ско́ро предвари́.

Посто́мъ украси́вши чистоту́ душе́вную, луча́ми страда́нія просвѣща́еши вѣ́рныя, му́ченице многострада́льная Параске́во. Тѣ́мъ тво́й святы́й и свѣтоно́сный де́нь вѣ́рою соверша́юще, благоче́стно вопіе́мъ: я́ко имѣ́я дерзнове́ніе ко Го́споду, моли́ спасти́ся на́мъ.

И ны́нѣ, богоро́диченъ:

Обнови́ла еси́, Чи́стая, Боже́ственнымъ Рождество́мъ Твои́мъ истлѣ́вшее во страстѣ́хъ земноро́дныхъ ме́ртвенное существо́, и воздви́гла еси́ вся́ отъ сме́рти къ жи́зни нетлѣ́нія. Тѣ́мже Тя́ по до́лгу блажи́мъ вси́, Дѣ́во Препросла́вленная, я́коже прорекла́ еси́.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́, во о́блацѣ ле́гцѣ пріи́де Іису́съ Пребоже́ственный нетлѣ́нною дла́нію и спасе́ зову́щія: сла́ва, Христе́, си́лѣ Твое́й.

Уязви́вшися любо́вію Христо́вою, ополче́нія мучи́тельская крѣ́постію твое́ю умертви́ла еси́, благода́ть источа́еши присноживо́тную, ю́же, страсте́й ра́ди, мздовоздая́ніе воспрія́ла еси́, Параске́во, му́ченицъ Христо́выхъ добро́та.

Превозше́дши вся́ любо́вію Христа́, Жениха́ твоего́, плотску́ю же любо́вь возненави́дѣвши, крѣ́пко болѣ́зненная страда́нія претерпѣ́ла еси́, му́ченице Параске́во, вопію́щи: не разлучи́ мене́, Христе́, отъ жела́нія Твоего́, муче́нія по́двигъ соверши́ти.

Отве́ргши мíра суету́ всю́, Бо́гу Еди́ному прилѣпи́лася еси́, Параске́во му́ченице, и болѣ́зни страда́нія претерпѣ́ла еси́, невѣ́сто Бо́жія, мужеу́мная.

Богоро́диченъ: Сни́де, я́ко до́ждь на руно́, во утро́бу Твою́ Госпо́дь, я́коже рече́ дре́вле проро́къ, Всенепоро́чная, Его́же во дву́хъ существа́хъ родила́ еси́, Ему́же взыва́емъ: сла́ва си́лѣ Твое́й, Го́споди.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Услы́шавши, Го́споди, му́ченица Параске́ва за́повѣди ева́нгельскія, просла́ви Твое́ Божество́.

Не принесла́ еси́ отню́дъ же́ртвы де́мономъ ме́рзскимъ, же́ртву жи́ву себе́ Го́споду вдала́ еси́.

Крѣ́пко на суди́щи ста́вши, вопія́ше му́ченица: со Христо́мъ, Женихо́мъ мои́мъ, распну́ся и возца́рствую съ Ни́мъ.

Богоро́диченъ: Очище́ніе на́шихъ да́руй согрѣше́ній, я́ко Безгрѣ́шенъ, и умири́ лю́ди Твоя́, я́ко Бла́гъ, моли́твами Ро́ждшія Тя́.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Свѣ́тъ незаходи́мый всели́ся въ души́ твое́й, да добродѣ́телію сія́еши, озаря́я тебе́ непреста́нно сла́вящія.

Струю́, му́ченице Параске́во, нечести́ваго безбо́жія изсуши́ла еси́, и тече́ніи кро́вными, непра́ведно пролива́емыми, о́гнь пре́лести погаси́ла еси́.

Умъ иму́щи прозра́ченъ, проро́ческаго да́ра сподо́билася еси́, и хотя́щая бы́ти всѣ́мъ я́вѣ предглаго́лала еси́, Параске́во многострада́льная.

Богоро́диченъ: Ма́ти Бо́жія, ду́шъ на́шихъ я́звы исцѣли́ла еси́, роди́вши Бо́га Сло́ва неизрече́нно. Сего́ ра́ди вси́ ро́ди блажа́тъ Тя́.

Инъ.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Утренюющи, му́ченица вопія́ше Параске́ва: ничто́же мя́ разлучи́тъ отъ любве́ Христо́вы.

Боже́ственную му́ченицу мнѣ́въ ослабѣ́ти, смѣ́хъ са́мъ яви́ся пронырли́вый.

Просвѣще́ніе пода́ждь мнѣ́, всехва́льная, и многомяте́жный мо́й у́мъ просвѣти́ моли́твами твои́ми.

Богоро́диченъ: Низложи́ непрестаю́щую бу́рю страсте́й, Христа́ Ро́ждшая, ко́рмчію и Го́спода.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Возсія́вши изъ Ри́ма, я́ко со́лнце свѣ́тлое, свята́я му́ченице, мра́къ де́монскій отъ человѣ́къ отгна́ла еси́ мольба́ми твои́ми, Параске́во многострада́льная.

Исцѣле́нія пріе́млютъ приходя́щіи прикоснове́ніемъ къ ра́цѣ моще́й твои́хъ: кровоточи́віи и прокаже́нніи очища́ются, и отбѣга́ютъ де́монскія полки́, призыва́ніемъ свята́го твоего́ и́мени.

Утреневала еси́ ко Христу́, невече́рнему Со́лнцу, и Того́ свѣтлостьми́ ду́шу, богому́драя, и се́рдце озари́ла еси́, Параске́во честна́я, и къ Свѣ́ту Тро́ическому, ра́дуяся, прешла́ еси́.

Богоро́диченъ: Исцѣли́ души́ моея́ стра́сти, Всенепоро́чная, безстра́стія ро́ждшая Исто́чникъ, и отжени́ томи́тельство, непреста́нно стужа́ющее се́рдцу моему́.

Инъ.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, многоми́лостиве Христе́ Бо́же на́шъ.

Ри́зою мя́ съ небесе́ приодѣ́й, Го́споди, вопія́ше Параске́ва, Иже о́блаками небеса́ одѣва́яй, Многоми́лостиве.

Якоже изъ ро́ва Даніи́ла услы́ша Госпо́дь, та́ко и тебѣ́, въ темни́цѣ моля́щейся, исцѣле́ніе подава́етъ.

Мучи́телеву го́рдость низложи́ла еси́, сама́ же, невреди́ма пребы́вши, на му́ки дерзну́ла еси́.

Богоро́диченъ: Сло́во Бо́жіе Тя́ земны́мъ показа́ небе́сную лѣ́ствицу: Тобо́ю бо къ на́мъ сни́де.

Конда́къ, гла́съ 3. Подо́бенъ: Дѣ́ва дне́сь.

Всесвято́е и непоро́чное муче́ніе прине́сши, я́ко вѣ́но пречестно́е, безсме́ртному Жениху́ Христу́, а́нгельское ликостоя́ніе возвесели́ла еси́ и побѣди́ла еси́ де́монскія ко́зни. Сего́ ра́ди тя́ че́стно вѣ́рою чти́мъ, му́ченице Параске́во многострада́льная.

Икосъ:

Кто́ изглаго́летъ си́лы Госпо́дня? Или́ кто́ повѣ́сть страда́нія твоя́ и добродѣ́тели, му́ченице? Или́ кíй язы́къ воспѣ́ти возмо́жетъ по досто́инству? Но а́зъ, недосто́йный, воспѣ́ти покуша́юся, хвали́ти же и сла́вити Влады́ку Жизнода́вца, да́вшаго тебѣ́ на три́знищи крѣ́пость мучи́телей не убоя́тися, исповѣ́дающей Истиннаго Бо́га. Сего́ ра́ди тя́ чти́мъ вѣ́рою и любо́вію, му́ченице Параске́во многострада́льная.

Пѣ́снь 7.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Голуби́це, кри́ла иму́щи злата́я и ору́жіемъ храни́ма кре́стнымъ, ага́ряны, въ нощи́ гра́ду твоему́ прибли́жившіяся, отгна́ла еси́, спа́сши вѣ́рныя отъ убíйства, му́ченице Параске́во, пою́щія: препѣ́тый оте́цъ на́шихъ Бо́же, благослове́нъ еси́.

Многообра́зныя болѣ́зни претерпѣ́вши Христа́ ра́ди, му́ченице Параске́во, неболѣ́зненный у Него́ обрѣла́ еси́ поко́й, и ра́дующися, взыва́еши: препѣ́тый оте́цъ на́шихъ Бо́же, благослове́нъ еси́.

Ко́ль непобѣди́мь тво́й ра́зумъ, Параске́во честна́я! Яко отъ нача́льниковъ ли́ка мучи́телей му́къ не убоя́лася еси́. Съ ни́миже бра́вшися, сконча́лася еси́, я́ко служи́тельница та́йны Боже́ственныя сла́вы, пою́щи: препѣ́тый оте́цъ на́шихъ Бо́же, благослове́нъ еси́.

Богоро́диченъ: Благослове́нъ Пло́дъ благослове́ннаго Твоего́ чре́ва, Его́же благословя́тъ небе́сныя си́лы и человѣ́честіи собо́ри восхваля́ютъ, на́съ изба́вльшаго кля́твы дре́внія, Благослове́нная, пою́щихъ: препѣ́тый оте́цъ на́шихъ Бо́же, благослове́нъ еси́.

Инъ.

Ирмо́съ: Отъ Іуде́и доше́дше о́троцы, въ Вавило́нѣ иногда́ вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Яви́шася па́че ума́ чудеса́ боже́ственныя му́ченицы, во ю́нотствѣ бо дѣ́вства, побѣди́ мучи́теля, зову́щи: оте́цъ на́шихъ Бо́же, благослове́нъ еси́.

Бу́ихъ [1] загради́ла еси́ богоме́рзская уста́, среди́ суди́ща ста́вши, Бо́га исповѣ́дала еси́, взыва́ющи: оте́цъ на́шихъ Бо́же, благослове́нъ еси́.

Забы́вши же́нскую не́мощь, му́жественно укрѣпи́вшися терпѣ́ніемъ, стра́ждущи, вопія́ла еси́: оте́цъ на́шихъ Бо́же, благослове́нъ еси́.

Богоро́диченъ: Изъ Дѣви́ческу боку́ вопло́щся, яви́лся еси́ на спасе́ніе на́ше. Тѣ́мъ Твою́ Ма́терь вѣ́дуще Богоро́дицу, благода́рно Ти́ взыва́емъ: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте дѣла́ и превозноси́те Его́ во вся́ вѣ́ки.

Боже́ственными свѣтлостьми́ Со́лнца мы́сленнаго просвѣти́вшися, му́ченице всехва́льная Параске́во, но́щь претекла́ еси́ безбо́жія, пою́щи единомы́сліемъ души́: Го́спода воспѣва́йте дѣла́ и превозноси́те Его́ во вѣ́ки.

Яко а́гница, я́ко нескве́рная ю́ница, я́ко боже́ственная голуби́ца, я́ко самово́льное заколе́ніе, привела́ся еси́, му́ченице Параске́во, Зижди́телю твоему́, и я́ко же́ртва непоро́чна, принесла́ся еси́, согла́сно пою́щи: Го́спода по́йте дѣла́ и превозноси́те Его́ во вѣ́ки.

Свѣ́тлу себѣ́ отъ крове́й ри́зу муче́ніемъ обложи́ла еси́, Параске́во, до́бляя му́ченице, совле́кшися и́стинно тлѣ́ннаго со грѣхи́ человѣ́ка, ра́достно воспѣва́ющи: Го́спода по́йте дѣла́ и превозноси́те Его́ во вѣ́ки.

Богоро́диченъ: Во слѣ́дъ Тебе́ теко́ша жены́, мѵ́ра сладково́ннаго вѣ́дуще, Всечи́стая Богоневѣ́сто, еди́на Неискусобра́чная, изъ утро́бы Твоея́ возсія́вшаго Единоро́днаго Сы́на, Христа́ Бо́га, и съ Тобо́ю ца́рствуютъ и́стинно, пѣсносло́вяще Его́ во вѣ́ки.

Инъ.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Царя́ Христа́ Бо́га, Его́же исповѣ́да дѣ́ва му́ченица Параске́ва, воспѣва́ющи: хвали́те и превозноси́те во вся́ вѣ́ки.

За любо́вь Боже́ственныя Тро́ицы о́гнь безбо́жія погаси́ла еси́, вопію́щи: превозноси́те Христа́ во вѣ́ки.

По́двиги, и́же къ Бо́гу, тмы́ нача́льника низложи́ла еси́, пою́щи: превозноси́те Христа́ во вѣ́ки.

Богоро́диченъ: Проти́вныхъ прило́га на ны́ угаси́ и́скры, Дѣ́во, я́ко да пое́мъ Го́спода и превозно́симъ Его́ во вѣ́ки.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Въ небе́сный черто́гъ все́льшися, дѣ́во Параске́во всечестна́я, и неви́димыхъ добро́тъ разу́мно наслади́вшися, воспріи́мши неизрече́нную свѣ́тлость, просвѣти́ пою́щія и велича́ющія тя́.

Вѣне́цъ воспрія́ла еси́ на главѣ́ твое́й, Параске́во доблеу́мная, я́ко сконча́вши тече́ніе и сохрани́вши вѣ́ру непоколеби́му, и пра́ведныхъ чи́ни ра́достно тя́ прія́ша. Тѣ́мъ ны́нѣ ублажа́емъ тя́.

Подае́ши исцѣле́ній ка́пли тре́бующимъ, я́ко отъ исто́чника, всебога́тая му́ченице Параске́во, уставля́ющи то́ки неду́говъ и страсте́й отгоня́щи зно́й, и сердца́ благочести́выхъ напая́ющи ко благопло́дію Боже́ственныхъ дѣя́ній.

Богоро́диченъ: Му́дрости Вмѣсти́лище, па́че ума́ лу́чшаго, яви́лася еси́, Отрокови́це Всенепоро́чная, одушевле́нъ же престо́лъ и две́рь. Тѣ́мъ я́ко Цари́цу Тя́ возлю́бльше дѣ́вы, во слѣ́дъ Тебе́ приведо́шася, Богоотрокови́це.

Инъ.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Вои́стинну тезоимени́та назва́лася еси́, Параске́во, подо́бящися страсте́мъ Христо́вымъ, съ небе́сными во́инствы лику́ющи.

Пости́гла еси́ коне́цъ муче́нія мно́гими страстьми́ и болѣ́зньми твои́ми, со а́нгелы Христа́ сла́вящи на небесѣ́хъ, всечестна́я.

Дерзнове́ніе иму́щи ко Спа́су и Влады́цѣ, моли́ за пою́щія твою́ па́мять, му́ченице сла́вная Параске́во.

Богоро́диченъ: Пѣ́сньми Тя́ пое́мъ, Богоблагода́тная, и немо́лчно Тебѣ́, ра́дуйся, прино́симъ, Ты́ бо источи́ла еси́ всѣ́мъ на́мъ весе́ліе.

Свѣти́ленъ. Подо́бенъ: Жены́, услы́шите.

Яко ши́покъ краснѣ́йшій отъ терно́внаго прозябла́ еси́ ко́рене, дѣ́во Параске́во, оброше́ніемъ, му́ченице, свяще́ннаго страда́нія обагри́вшися кро́вію. И ны́нѣ боже́ственную твою́ па́мять творя́щія любо́вію спаса́й ны́ отъ бѣ́дъ. [Два́жды.]

Сла́ва, и ны́нѣ, богоро́диченъ:

Стоя́ще о́крестъ Тебе́ дѣ́вы богому́дрыя, Богороди́тельнице Марíе, я́ко Цари́цѣ ро́домъ, Твоему́ Сы́ну приведо́шася невѣстолѣ́пно, Пречи́стая, я́ко Царю́ вся́ческихъ, Его́же, Ма́ти Дѣ́во Отрокови́це, о на́съ моли́.

На хвали́техъ стихи́ры [на 6], гла́съ 4. Подо́бенъ: Яко до́бля.

Дѣ́вство нетлѣ́нно,* муче́ніе всечу́дно,* Христу́ принесла́ еси́,* всечестна́я дѣ́во Параске́во,* низложи́ла еси́ шата́ніе пре́лести безбо́жныя,* си́лою кре́стною,* му́жественнымъ ра́зумомъ.* Тѣ́мже вся́ Христо́ва Це́рковь пра́зднуетъ* святу́ю твою́ па́мять.

Твоему́ страда́нію, дѣ́во му́драя,* и сопротивле́нію,* и неодолѣ́нію,* ли́цы а́нгельстіи, блаже́нная Параске́во,* я́вѣ удиви́шася,* ка́ко му́жественнымъ сплете́ніемъ* врага́ неви́димаго разрази́ла еси́* и побѣ́ды вѣне́цъ отъ руки́ Жизнода́вца* бога́тно прія́ла еси́.

Огне́мъ опаля́ема,* о́гненною му́дростію* пла́мень угаси́ла еси́ есте́ственный,* и свѣщу́ неугаси́му душе́вную соблю́дши,* вошла́ еси́ со Христо́мъ, Женихо́мъ твои́мъ,* въ черто́гъ небе́сный.* И чуде́сными и́скрами* стра́сти умертви́вши,* де́монскія полки́ страда́льчески побѣди́ла еси́.

Ины стихи́ры, гла́съ 1. Подо́бенъ: Небе́сныхъ чино́въ.

Въ небе́сныя дворы́* всели́лася еси́,* му́ченице Параске́во,* кровьми́ твои́хъ страда́ній,* въ видѣ́ніи ликостоя́ній причи́слилася еси́* ра́вно, всехва́льная.

Мучи́теля посрами́ла еси́,* о му́кахъ небре́гши,* и звѣре́й рыка́нія* не устраши́лася еси́,* иму́щи Христа́* Помо́щника твоего́,* всехва́льная.

Ра́дующися, текла́ еси́,* прехва́льная Параске́во,* тща́щися коне́цъ муче́нія* прія́ти, дѣ́во всехва́льная,* и Христу́ уневѣ́стившися та́мо,* помина́й ны́, всегда́ честву́ющія тя́.

Сла́ва, гла́съ 6:

Пѣ́сньми да почестви́тся Христо́ва му́ченица, подоба́етъ бо е́й вся́кое хвалосло́віе: хвала́ми бо испле́тши сво́й вѣне́цъ, то́й непрекло́ннѣй су́щи и тве́рдѣй, мно́гу мучи́телей зло́бу низложи́. Тѣ́мъ, въ болѣ́знехъ стра́ждущи, вопія́ше: Ты́ мнѣ́, Го́споди, бу́ди по́мощь, и не оста́ви мене́.

И ны́нѣ, богоро́диченъ: [Богоро́дице, Ты́ еси́ лоза́ и́стинная...]
Славосло́віе вели́кое. [Ектеніи́.] И отпу́стъ.



НА ЛИТУРГІИ,

Блаже́нна отъ кано́на пе́рваго, пѣ́снь 3-я, и втора́го кано́на, пѣ́снь 6-я. Проки́менъ, гла́съ 4: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Кори́нѳяномъ, зача́ло 181. Аллилу́ія, [гла́съ 1]: Терпя́ потерпѣ́хъ Го́спода, [и вня́тъ ми́ и услы́ша моли́тву мою́. Сти́хъ: Поста́ви на ка́мени но́зѣ мои́ и испра́ви стопы́ моя́]. Ева́нгеліе Матѳе́я, зача́ло 104. Прича́стенъ: Въ па́мять вѣ́чную...

Примѣчаніе:
[1] Исправлено по: «Минíа, мѣ́сяцъ Окто́врій. Кíевъ, 1893, л. 251». Въ изданіи 1745 года: «Бляду́щихъ...».

Источникъ: Анѳоло́гіонъ, сíесть Цвѣтосло́віе, или́ Трефоло́гіонъ, сíесть Словопита́ніе. — Кíевъ: Въ Тѵпогра́фіи Кіевопече́рской Ла́ѵры, 1745. — Л. 133 об. – 139.

/ Къ оглавленію раздѣла /


Наверхъ / Къ титульной страницѣ

0