Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 6.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 27-й де́нь.
Слу́жба свято́му благовѣ́рному кня́зю Андре́ю Смоле́нскому, Переясла́вскому чудотво́рцу.

НА МАЛѢЙ ВЕЧЕРНИ,
[На Го́споди воззва́хъ:] стихи́ры на 4, гла́съ 8:

Богоблаже́нне кня́же Андре́е, возненави́дѣвъ вре́менная ца́рствія ра́ди небе́снаго, плотскíя стра́сти умертви́лъ еси́ ду́хомъ. Богоуго́дно же подвиза́вся и вра́жія ко́зни попра́въ, на высоту́ добродѣ́телей восте́клъ еси́ и отъ земли́ къ Бо́гу преста́вился еси́, побѣ́ды вѣне́цъ отъ Него́ воспріи́мъ: Ему́же съ ли́ки пра́ведныхъ предстоя́, моли́ спасти́ся душа́мъ на́шимъ.

Богодухнове́нне кня́же Андре́е, потща́вся побѣди́ти сѣ́ти лука́ваго, вводя́щія въ невѣ́ріе и сла́бости всѣ́хъ пре́лестей мíра сего́, дарова́ніе Свята́го Ду́ха воспрія́лъ еси́: показа́вся же юро́дъ бы́ти мíру, подвиза́лся еси́ Ца́рствія ра́ди небе́снаго, е́же и дости́глъ еси́. И ны́нѣ со а́нгелы ликовству́я, Спа́су моли́ся спасти́ся душа́мъ на́шимъ.

Сла́ва, гла́съ 8:

Возлюби́въ небе́сная и возненави́дѣвъ земна́я, за уме́ты та́ вмѣни́лъ еси́, тѣ́снымъ и ско́рбнымъ ше́ствуя путе́мъ, побѣди́лъ еси́ стра́сти мíра сего́, въ терпѣ́ніи и страда́ніи хра́бръ во́инъ яви́вся, разори́лъ еси́ вся́ хитроплете́нныя ко́зни вра́жія, поче́рпъ же жела́ніе отъ исто́чника благода́тнаго и всесоверше́нно Бо́жіей во́ли себе́ предложи́въ, возымѣ́лъ еси́, кня́же Андре́е, дерзнове́ніе ко Христу́ Бо́гу, Его́же моли́ поми́ловати ду́ши на́ша.

И ны́нѣ, богоро́диченъ:

Небе́сная пою́тъ Тя́, Обра́дованная Ма́ти Безневѣ́стная, и мы́ славосло́вимъ неизслѣ́дованное Рождество́ Твое́, Богоро́дице Дѣ́во, моли́ спасти́ся душа́мъ на́шимъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ чистоты́, досточу́дне Андре́е, бы́лъ еси́, пи́щи мно́гія тѣле́снаго добролю́бія отъ младе́нства возненави́дѣвъ, бу́дущія ра́ди жи́зни.

Сти́хъ: Пра́ведникъ, я́ко фи́никсъ процвѣте́тъ и я́ко ке́дръ, и́же въ Лива́нѣ, умно́жится.

До́мъ Ду́ха Свята́го бы́лъ еси́, свя́те кня́же Андре́е, до́мъ бо роди́телей оста́вивъ, жили́ща небе́сная получи́лъ еси́, идѣ́же со а́нгелы ликовству́еши.

Сти́хъ: Насажде́ни въ дому́ Госпо́дни, во дво́рѣхъ Бо́га на́шего процвѣту́тъ.

До́мъ Христо́ва благодая́нія, богодухнове́нне, бы́лъ еси́, бога́тство бо сокрове́нно въ души́ имѣ́лъ еси́. Сего́ ра́ди лучи́ свѣ́тлыя благода́ти возсіява́еши душа́мъ на́шимъ.

Сла́ва, гла́съ 5:

Приклони́лъ еси́ главу́ твою́ отъ ю́ности твоея́ къ боже́ственному зва́нію, преблаже́нне кня́же Андре́е, и, взе́мъ кре́стъ, послѣ́довалъ еси́ Христу́: расто́ргнувъ сѣ́ти вра́жія и попра́въ всю́ горды́ню его́, ра́зумъ пра́въ стяжа́лъ еси́, посредѣ́ же мо́лвъ живы́й и съ до́льними ходя́й пло́тію, ду́хомъ всегда́ го́рняя ви́дѣти жела́лъ еси́ и ско́ро восте́клъ еси́ къ вѣнцу́ вы́шняго зва́нія: моли́ спасти́ся душа́мъ на́шимъ.

И ны́нѣ, богоро́диченъ:

Блажи́мъ Тя́, Богоро́дице Дѣ́во, и сла́вимъ Тя́ вѣ́рніи по до́лгу: гра́дъ непоколеби́мый, стѣ́ну необори́мую, тве́рдую предста́тельницу и помо́щницу, и прибѣ́жище ду́шъ на́шихъ.

Та́же: Ны́нѣ отпуща́еши... Трисвято́е, и по Отче на́шъ... Тропари́ свята́го, пи́саны на благослове́ніи хлѣ́бовъ.



НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: пое́мъ стихо́въ 8, гла́съ 1. Подо́бенъ: Небе́сныхъ чино́въ ра́дованіе.

Ра́йскія добро́ты сматря́я, земны́я добро́ты возгнуша́лся еси́, блаже́нне кня́же Андре́е, возжела́въ житія́ небе́снаго, е́же и получи́лъ еси́: моли́ спасти́ся душа́мъ на́шимъ.

Ра́зумомъ богому́дрымъ оте́чество твое́ оста́вилъ еси́, стра́нствуя тѣ́ломъ на земли́, небе́сная ду́хомъ взира́лъ еси́, и́хже и дости́глъ еси́, моли́ спасти́ся душа́мъ на́шимъ.

Земна́го черто́га лише́нъ бы́лъ еси́, получи́въ житіе́ черто́га небе́снаго, съ вы́шними ли́ки Тро́ицѣ предстои́ши, Юже о на́съ моли́, кня́же Андре́е богоблаже́нне, твою́ святу́ю па́мять почита́ющихъ.

Въ дому́ чу́днаго Никола́я стра́нно водвори́вся, Боже́ственному престо́лу непоро́чно послужи́лъ еси́, и небе́снаго Престо́ла стоя́ніе получи́въ, невече́рнимъ Свѣ́томъ обогати́лся еси́, просвѣти́ у́бо на́съ, творя́щихъ святу́ю па́мять твою́.

Ины стихи́ры, гла́съ 8. Самоподо́бенъ:

Преподо́бенъ и пра́веденъ, че́стенъ же и боже́ственъ свѣти́льникъ яви́ся въ Россíйстѣй странѣ́: сія́я бо въ богоспаса́емомъ гра́дѣ Переясла́влѣ чудесы́, мно́гія стра́сти и неду́ги отгоня́я, всѣ́хъ вѣ́рныхъ исцѣля́етъ богому́дрый Андре́й и мо́лится Го́сподеви поми́ловатися душа́мъ на́шимъ. [Два́жды.]

Иго Госпо́дне отъ ю́ности взе́мь и кре́стъ терпѣ́нія на себе́ возложи́въ, ева́нгельски Христу́ послѣ́довалъ еси́ и, въ мíрѣ жи́тельствуя, боже́ственная во сто́ трудо́въ уплодоноси́лъ еси́. И бы́лъ еси́ свѣти́льникъ, сія́я гра́ду твоему́ чудесы́, его́же отъ вра́гъ ви́димыхъ и неви́димыхъ невреди́мь сохраня́й и моли́ся Го́сподеви поми́ловатися душа́мъ на́шимъ.

Богому́дренно преше́лъ еси́ тѣле́сную тѣсноту́ съ кро́тостію ду́ха и смире́ннымъ терпѣ́ніемъ, ны́нѣ же сія́еши мно́гими чудесы́, пресла́вная всѣ́мъ вѣ́рнымъ подая́ исцѣле́нія, предстои́ши бо Престо́лу Влады́чню, блаже́нне кня́же Андре́е, и мо́лишися поми́ловатися душа́мъ на́шимъ.

Сла́ва, гла́съ 8:

Пріиди́те, гра́ждане, и вси́ окре́стніи вѣ́рніи христіа́не, согла́сно ублажи́мъ и досто́йно почти́мъ блаже́ннаго Андре́я, богому́драго кня́зя, и́же бо изъ мла́да подвиза́вся, добродѣ́тели прилѣжа́, яви́лся сосу́дъ Пресвята́го Ду́ха, и ны́нѣ то́читъ на́мъ непреста́нно мно́гая исцѣле́нія; тѣ́мже съ вѣ́рою вси́ приходя́ще чи́стѣ облобыза́емъ цѣле́бныхъ моще́й его́ ра́ку, и похва́льная вопію́ще, си́це глаго́лемъ: ра́дуйся, земны́й а́нгеле и небе́сный человѣ́че; ра́дуйся, свѣти́льниче пресвѣ́тлый, осіява́яй гра́дъ Переясла́вль чудесы́ твои́ми. Тѣ́мже мо́лимъ тя́: не преста́й моли́ти Христа́ Бо́га о соверша́ющихъ и чту́щихъ вѣ́рою и любо́вію приснора́достную и всепра́зднественную па́мять твою́.

И ны́нѣ: богоро́диченъ:

Ца́рь Небе́сный за человѣколю́біе [на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ].

Та́же [вхо́дъ,] проки́менъ дне́. Чте́нія три́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 2:

Те́снымъ и приско́рбнымъ ше́ствовавъ путе́мъ, дости́глъ еси́ ра́йскія широты́, ны́нѣ же наслажда́ешися небе́сныя пи́щи, и вѣнце́мъ страда́нія вѣнча́ешися отъ руки́ Вседержи́теля. Его́же моли́, блаже́нне кня́же Андре́е, о е́же сохрани́тися гра́ду твоему́ отъ вра́гъ ненавѣ́тну и душа́мъ на́шимъ дарова́ти ве́лію ми́лость.

Ле́гкостію кри́лъ прелетѣ́въ отъ многомяте́жнаго мíра, въ небу́рное и ти́хое приста́нище дости́глъ еси́, заступа́я отъ напа́стей вся́ призыва́ющія тя́ вѣ́рно: покрыва́й у́бо и на́съ, притека́ющихъ въ хра́мъ тво́й, преблаже́нне кня́же Андре́е, и спаси́ ста́до твое́, ко Го́споду моли́твами твои́ми.

Яко со́лнце свѣтоза́рное, добродѣ́тельнаго ра́ди твоего́ житія́ всю́ду просія́лъ еси́: хра́мъ у́бо, идѣ́же лежа́тъ честны́я твоя́ мо́щи, я́коже ца́рскую у́тварь, гра́дъ же, я́ко влады́ку, трубы́ велегла́снѣе вопіе́тъ, проповѣ́дуя, иму́щи тя́ въ себѣ́ процвѣ́тша чуде́съ исто́чника неисчерпа́емаго и изоби́льно всѣ́мъ подаю́ща разли́чна дарова́нія чуде́съ. Тѣ́мже мо́лимъ тя́, преблаже́нне и чудоно́сче кня́же Андре́е, испроси́ моли́твами твои́ми у Христа́ Бо́га, е́же дарова́ти Импера́тору на́шему [и́мярекъ] посо́біе на ва́рвары, и на́мъ, и́же твое́ успе́ніе че́стно пра́зднующимъ, очище́ніе и спасе́ніе ду́шъ на́шихъ.

Сла́ва, гла́съ 8:

Добродѣ́телей твои́хъ, богому́дре, исправле́нія уясни́ша вѣ́рныхъ сердца́, кто́ бо слы́шавъ безмѣ́рное твое́ смире́ніе, терпѣ́нію не удиви́тся, е́же ко всѣ́мъ кро́тость и беззло́біе, къ скорбя́щимъ ми́лованіе, къ су́щимъ въ бѣда́хъ ско́рое поможе́ніе, къ путьше́ствующимъ благо́е поспѣше́ніе и къ пла́вающимъ немяте́жное оти́шіе. Всѣ́хъ во все́мъ предваря́еши, досточу́дне Андре́е, и ны́нѣ неувяда́емымъ вѣнце́мъ вѣнча́лся еси́ отъ руки́ Вседержи́теля Бо́га, Его́же моли́ поми́ловатися душа́мъ на́шимъ.

И ны́нѣ, богоро́диченъ:

Влады́чице, пріими́ моли́твы ра́бъ Твои́хъ, и изба́ви на́съ отъ вся́кія ну́жды и печа́ли, Тебе́ велича́ющихъ.

На стихо́внѣ стихи́ры, гла́съ 4. Подо́бенъ: Яко до́бля.

Яко до́мъ душе́вный яви́лся еси́ во гра́дѣ Переясла́влѣ, свѣтя́щійся благода́тію, и чуде́сными дѣя́ніи просвѣща́я всѣ́хъ, и сохраня́я невреди́мь сво́й гра́дъ отъ всѣ́хъ навѣ́тъ вра́жіихъ, спаса́я же вѣ́рныхъ ко Го́споду моли́твами твои́ми.

Сти́хъ: Честна́ предъ Го́сподемъ сме́рть преподо́бныхъ Его́.

Добродѣ́тельнымъ твои́мъ житіе́мъ мíръ презрѣ́лъ еси́, чу́вственныя стра́сти и тѣле́сныя побѣди́лъ еси́, воздержа́нія брозда́ми вся́ плотска́я жела́нія ду́ху повину́лъ еси́ и прія́лъ еси́ наслѣ́діе вѣ́чнаго блаже́нства, богому́дре кня́же Андре́е пребога́те, моли́твенниче о душа́хъ на́шихъ.

Сти́хъ: Что́ возда́мъ Го́сподеви о всѣ́хъ, я́же воздаде́ ми?

Исцѣле́ній дарова́нія источа́ютъ, сла́вне, твоя́ мо́щи честву́ющимъ тя́ усе́рдно, потопля́юще стра́сти и врачу́юще неду́ги, Андре́е, и разоря́юще лука́выхъ де́моновъ толпы́, напая́ютъ же вѣ́рныхъ сердца́, и́же прозяба́ютъ добродѣ́телей плоды́ боже́ственныя и благоче́стія разумѣ́нія: моли́ спасти́ся на́мъ.

Сла́ва, гла́съ 6:

Пріиди́те, христолюби́віи лю́діе, до́брый по́двигъ и праводу́шіе созерца́емъ въ благовѣ́ріи кня́жескомъ: на́съ бо ра́ди обнища́вшему Христу́ пострада́ пло́тію, кре́стъ терпѣ́нія воспріи́мъ, побѣ́ду на всю́ си́лу де́монскую содѣ́ла, свобожда́я и на́съ отъ страсте́й, тѣ́мже сла́вяще его́, похва́льная сія́ принесе́мъ: ра́дуйся, воздержа́нія наста́вниче, терпѣ́нія тве́рдый сто́лпе, простоты́ сокро́вище, молча́нія храни́телю и смире́нія учи́телю, усе́рдно дне́сь въ па́мяти твое́й про́симъ: свя́те Андре́е, вели́кій кня́же, моли́ся вы́ну о утвержде́ніи благочести́выя держа́вы Благовѣ́рнаго Импера́тора на́шего [и́мярекъ], мíру же ми́ръ дарова́ти и душа́мъ на́шимъ ве́лію ми́лость.

И ны́нѣ, богоро́диченъ:

Творе́цъ и Изба́витель мо́й, [Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ].

Та́же: Ны́нѣ отпуща́еши раба́ Твоего́, Влады́ко... Трисвято́е, и по Отче на́шъ...

Тропа́рь, гла́съ 8:

Блаже́нство ева́нгельское возлюби́въ, богому́дре кня́же Андре́е, чистоту́ се́рдца дѣ́вствомъ почти́лъ еси́ и, суету́ мíра сего́ презрѣ́въ, устреми́лся еси́ зрѣ́ти Бо́га, Иже тя́ просла́ви чудесы́ во врачева́ніи разли́чнѣ стра́ждущихъ. Сего́ ра́ди мо́лимъ тя́: проси́ на́мъ у Христа́ Го́спода, вся́кихъ скорбе́й избавле́нія и получе́ніе Ца́рства небе́снаго.

Инъ [тропа́рь], гла́съ 2:

Гра́дъ тво́й Смоле́нскъ я́ко чу́ждь имѣ́я, водвори́лся еси́ во гра́дъ Переясла́вль, и въ дому́ святи́теля Никола́я жесто́кимъ житіе́мъ вре́менную жи́знь соверши́въ, восте́клъ еси́ въ го́рняя предстоя́ти Христу́, Его́же моли́ о творя́щихъ па́мять твою́, да вси́ вопіе́мъ ти́: ра́дуйся, свя́те кня́же Андре́е, а́нгеломъ собесѣ́дниче и человѣ́комъ помо́щниче.

Та́же: Богоро́дице Дѣ́во, ра́дуйся.., [еди́ножды.]

Посе́мъ: Благослове́ніе хлѣ́бовъ. Бу́ди и́мя Госпо́дне... и псало́мъ 33-й: Благословлю́ Го́спода на вся́кое вре́мя...



НА УТРЕНИ,
На Бо́гъ Госпо́дь: Пое́мъ тропари́ свята́го, о́ба по еди́ножды. Сла́ва, и ны́нѣ: богоро́диченъ: Вся́ па́че смы́сла...

По 1-й стихоло́гіи сѣда́ленъ, гла́съ 4:

Все́ плотско́е мудрова́ніе умертви́лъ еси́, блаже́нне кня́же Андре́е, и ху́дшее покори́лъ еси́ лу́чшему, и вся́, я́же въ мíрѣ злострада́нія, претерпѣ́лъ еси́ усе́рдно, возсія́въ я́ко со́лнце луча́ми добродѣ́тельными, полки́ же бѣсо́вскія му́жески побѣди́лъ еси́. Тѣ́мъ твою́ па́мять при́сно восхваля́емъ вѣ́рно. [Два́жды.]

Сла́ва, и ны́нѣ, богоро́диченъ:

Обнови́ла еси́, Чи́стая, Боже́ственнымъ Рождество́мъ Твои́мъ, истлѣ́вшее страстьми́ земноро́дныхъ ме́ртвенное существо́, и воздви́гла еси́ вся́ отъ сме́рти къ жи́зни нетлѣ́нія: тѣ́мже тя́ по до́лгу блажи́мъ вси́, Дѣ́во Препросла́вленная, я́коже прорекла́ еси́.

По 2-й стихоло́гіи сѣда́ленъ, гла́съ 8:

Тве́рдаго адама́нта и столпа́, непоколеби́маго вра́жіими прило́ги, богоно́снаго и блаже́ннаго кня́зя Андре́я пѣ́сньми почти́мъ, терпѣ́ніемъ бо вои́стинну посрами́лъ е́сть сопроти́внаго врага́ и безъ вѣ́сти его́ сотвори́лъ е́сть. И ны́нѣ мо́лимъ: да изба́витъ вѣ́рою чту́щихъ па́мять его́, моля́ся о спасе́ніи ду́шъ на́шихъ. [Два́жды.]

Сла́ва, и ны́нѣ, богоро́диченъ:

Ужа́сно чу́до зача́тія и несказа́ненъ о́бразъ рождества́ въ Тебѣ́ позна́ся, Чи́стая Приснодѣ́во, ужаса́етъ мо́й у́мъ и удивля́етъ по́мыслъ, сла́ва Твоя́, Богоро́дице, всѣ́мъ распростре́ся во спасе́ніе ду́шъ на́шихъ.

По Хвали́те и́мя Госпо́дне...

Пое́мъ припѣ́въ свято́му: Ублажа́емъ тя́, благовѣ́рный вели́кій кня́же Андре́е, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный: Терпя́ потерпѣ́хъ Го́спода...

По поліеле́и сѣда́ленъ, гла́съ 1:

Погре́блъ еси́ страсте́й все́ воста́ніе умерщвле́ніемъ пло́ти, преблаже́нне кня́же Андре́е, жи́знь безконе́чную по сме́рти прія́лъ еси́: тѣ́мже дне́сь Христо́ва Це́рковь ве́село пра́зднуетъ твою́ досточу́дную па́мять, вѣ́рныхъ украше́ніе. [Два́жды.]

Сла́ва, и ны́нѣ, богоро́диченъ:

Наста́ви ны́ на пу́ть покая́нія, уклоня́ющіяся всегда́ къ злы́мъ безпу́тіемъ, и Преблага́го прогнѣ́вающія Го́спода, Неискусобра́чная Благослове́нная Марíе, прибѣ́жище отча́янныхъ человѣ́ковъ, Бо́жіе селе́ніе.

Степе́нна, 1-й антифо́нъ, 4-го гла́са. Проки́менъ, гла́съ 4: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Та́же: Вся́кое дыха́ніе да хва́литъ Го́спода. Сти́хъ: Хвали́те Бо́га во святы́хъ Его́, хвали́те Его́ во утвержде́ніи си́лы Его́. Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Человѣ́че Бо́жій и кня́же чу́дный! Ты́, возше́дъ на лѣ́ствицу добродѣ́телей, возше́лъ еси́ по не́й къ Го́рнему Іерусали́му и та́мо узрѣ́лъ еси́ жела́емаго Христа́, Его́же ра́ди пло́ть твою́ изнури́лъ еси́ и тѣ́ло ме́ртвенное на безсме́ртную жи́знь измѣни́лъ еси́, о на́съ непреста́нно моли́ся, дарова́ти душа́мъ на́шимъ ми́ръ и ве́лію ми́лость.

Кано́нъ Богоро́дицѣ, со ирмосо́мъ на 6, и свята́го два́ кано́на на 8.

[Кано́нъ пе́рвый,] ему́же краегране́сіе сицево́: Моли́твами твои́ми пода́ждь ми́ Христа́ благоувѣ́тлива бы́ти, блаже́нне. Гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Припѣ́въ Сладча́йшему Іису́су: Ми́лостиве Го́споди, услы́ши моли́тву ра́бъ Твои́хъ, моля́щихся Тебѣ́.

Пріими́ пѣ́снь усте́нъ мои́хъ, Человѣколю́бче Го́споди, и пода́ждь отверзе́ніе усто́мъ мои́мъ и уму́ просвѣще́ніе, да возмогу́ воспѣ́ти уго́дника Твоего́, кня́зя Андре́я преди́внаго.

Припѣ́въ свято́му: Святы́й благовѣ́рный кня́же Андре́е, моли́ Бо́га о на́съ.

Отъ Смоле́нска гра́да возсія́въ, я́ко со́лнце, доше́лъ еси́ гра́да Переясла́вля, грѣхми́ омраче́нную мою́ ду́шу плодоно́сну яви́ Влады́цѣ, Ему́же моли́ся прилѣ́жно о вѣ́рно почита́ющихъ твое́ успе́ніе, свя́те кня́же Андре́е, и тя́ воспѣва́ющихъ.

Жите́йскую и вре́менную сла́ву возненави́дѣвъ и по у́зкому пути́ вожделѣ́въ ходи́ти, устрани́лся еси́ во́лею мíра сего́ и вѣ́чное Ца́рствіе прія́лъ еси́, блаже́нне кня́же Андре́е. Тѣ́мже въ вы́шнихъ, ра́дуяся, пое́ши Го́сподеви: сла́вно бо просла́вися.

Ни бога́тство, ни сла́ва, ни сла́дость жите́йская, ни тѣле́сная красота́, я́коже Па́велъ напису́етъ, разлучи́ша тебе́, свя́те кня́же Андре́е, отъ любве́ Бо́жія, въ не́йже ны́нѣ моля́ся за ны́ Влады́цѣ, пое́ши: сла́вно бо просла́вися.

Богоро́диченъ: Восто́ка восто́ковъ поне́сши, омраче́нна мя́ су́ща грѣхо́вными страстьми́ просвѣти́, Влады́чице, и Це́ркви соедини́, пода́й же ми́ръ моли́твами Твои́ми и пѣвцы́ Твоя́ сохрани́.

Инъ кано́нъ, гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Высоко́ житіе́ имѣ́я и восхожде́ніи Боже́ственными ве́сь свѣ́телъ бы́въ, просвѣще́ніе ми́ испроси́, похваля́ющу честны́я твоя́ по́двиги, и́миже до́брѣ пожи́въ, получи́лъ, и́хже надѣ́ялся еси́, блаже́нне кня́же Андре́е.

Мѵроуха́нная любя́ уче́нія и во чте́ніи святы́хъ Писа́ній упражня́яся, сласте́й уклони́лся еси́, блаже́нне, смра́дныхъ и безче́стныхъ, и облагово́нился еси́, Боже́ственными дарова́ньми удобря́яся.

Дрема́ніе вѣ́ждома отъ души́, блаже́нне, отгна́лъ еси́, бдя́, и Бо́гу присоединя́яся всено́щными стоя́ніи, непрекло́ненъ ну́ждами есте́ственными. Тѣ́мже ко дню́ невече́рнему преше́лъ еси́.

Богоро́диченъ: Яко черто́гъ одушевле́нный Бо́жій, кади́льницу разу́мнаго и свѣтоно́снаго Угля, Приснора́дованную блажи́мъ Богоро́дицу, зову́ще: ра́дуйся, всего́ мíра воззва́ніе.

Катава́сія: Отве́рзу уста́ моя́...

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Небе́снаго житія́ Превѣ́чнаго Христа́ сла́ву возлюби́въ, блаже́нне, и бы́въ соверше́нъ добродѣ́телію, свя́те Андре́е, Христо́вою любо́вію разжига́емь, му́дре, мірска́я вся́ возненави́дѣлъ еси́. Ны́нѣ предстоя́ Христу́, пое́ши: нѣ́сть свя́тъ, па́че Тебе́, Го́споди.

Иностра́ненъ я́влься я́ко со́лнце во гра́дѣ Переясла́влѣ, и въ дому́ святи́теля и чудотво́рца Никола́я мно́ги сле́зы и по́ты пролія́въ, живы́й во пло́ти пѣ́лъ еси́: нѣ́сть свя́тъ, па́че Тебе́, Го́споди.

Утаи́вся сро́дства своего́ и кня́жества, стра́нствовавъ, прише́лъ еси́ во гра́дъ Переясла́вль, Бо́гу та́ко изво́лившу, Иже у́мна тебе́ помо́щника и благода́тію чуде́съ обогати́ тя, я́ко Своего́ уго́дника, Ему́же пое́ши: нѣ́сть свя́тъ, па́че Тебе́, Го́споди.

Богоро́диченъ: Марíе Влады́чице, Творца́ вся́ческихъ неизрече́нно и па́че естества́ Христа́ ро́ждшая, уя́звленную страстьми́ ду́шу мою́ исцѣли́, молю́ Тя, еди́ну Пречи́стую, я́ко да воспѣва́ю Тя́.

Инъ.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Глаго́ломъ живото́чнымъ внима́я, испи́лъ еси́ во́ду спасе́нія, возгнуша́вся го́рькаго грѣха́, и поя́ глаго́лалъ еси́ Бо́гу, кня́же Андре́е: я́ко нѣ́сть свя́тъ, па́че Тебе́, Го́споди.

Ми́лованіе стяжа́лъ еси́ христоподо́бно, разда́лъ еси́ бога́тство тре́бующимъ, небе́снаго бога́тства восхотѣ́въ, е́же и получи́лъ еси́, вопія́, кня́же Андре́е: я́ко нѣ́сть свя́тъ, па́че Тебе́, Го́споди.

Присво́ився Зижди́телю, любо́вію Боже́ственною прія́лъ еси́ небе́сное наслѣ́діе, дре́ва Живо́тнаго получи́ти сподо́бился еси́, блаже́нне, благотворе́ніемъ обожа́яся и поя́: я́ко нѣ́сть свя́тъ, па́че Тебе́, Го́споди.

Богоро́диченъ: Су́щи а́нгелъ честнѣ́йшая, Зижди́теля бо а́нгеловъ во Твою́ боку́ носи́ла еси́ и родила́ еси́, Богома́ти, на избавле́ніе человѣ́комъ, пою́щимъ Тя́: я́ко нѣ́сть Пречи́стыя, ра́звѣ Тебе́, Влады́чице.

Сѣда́ленъ, гла́съ 8:

Удиви́ся въ мíрѣ житіе́ твое́, преблаже́нне свя́те кня́же Андре́е, страсте́мъ бо поревнова́въ Спа́са своего́, распя́лся еси́ мíру, презря́ всю́ земну́ю сла́дость и сла́ву. Тѣ́мъ и вѣне́цъ сугу́бъ прія́лъ еси́ отъ Подвигополо́жника Христа́ Бо́га, Его́же моли́ о на́съ, творя́щихъ пречестну́ю па́мять твою́. [Два́жды.]

Сла́ва, и ны́нѣ, богоро́диченъ:

Се́ Тебе́ ро́ди родо́въ славосло́вятъ, я́коже прорекла́ еси́, Отрокови́це, Созда́теля бо всѣ́хъ была́ Боже́ственный хра́мъ и пала́та, въ Не́йже всели́ся Вы́шній и обложи́ся пло́тію, да спасе́тъ на́съ.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Ты́ на зе́млю снизше́дъ неизрече́нно, Ми́лостиве, земны́я на не́бо возве́лъ еси́ о́бразомъ нищелю́бія и воздержа́нія, и́мже препоя́сався уго́дникъ Тво́й, благовѣ́рный кня́зь Андре́й, послѣ́дова по стопа́мъ Твои́мъ, Христе́ Бо́же на́шъ, и вопія́: си́лѣ Твое́й сла́ва, Человѣколю́бче.

Тве́рдымъ умо́мъ ста́лъ еси́ на правотѣ́ богозна́нія, богому́дре блаже́нне кня́же Андре́е, тѣ́мже утвержда́й ду́ши на́ша въ Го́сподѣ наде́жду во все́мъ полага́ти и вопи́ти: си́лѣ Твое́й сла́ва, Человѣколю́бче.

По́хоть пло́ти, по́хоть оче́й и го́рдость жите́йскую презрѣ́въ, утверди́лся еси́ въ любви́ Іису́сове, блаже́нне кня́же Андре́е, та́ко и на́мъ въ то́ежде помо́щникъ бу́ди.

Богоро́диченъ: Ма́ти Бо́гу, Ты́ еди́на въ жена́хъ Пренепоро́чная Дѣ́во, молю́ся Ти́: ны́нѣ возведи́ отъ ро́ва грѣхо́въ мои́хъ, Пречи́стая, и умоли́ Твоего́ Сы́на, я́ко да поми́луетъ мя́ окая́ннаго.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Пресели́вся, блаже́нне, отъ оте́чества твоего́ во гра́дъ Переясла́вль, въ не́мже пребыва́я, пло́ть твою́ злострада́ніемъ изнури́лъ еси́ и вре́менную жи́знь на безсме́ртную премѣни́лъ еси́, идѣ́же ны́нѣ со а́нгелы ликовству́еши.

Краснѣ́йшъ процвѣ́лъ еси́, блаже́нне, я́ко кри́нъ, добродѣ́тельми въ дому́ Бо́жіи, напо́лнилъ еси́ сво́й гра́дъ чудесы́ и яви́лся еси́ хода́тай на́шъ, свя́те, ко Го́споду моли́твами твои́ми.

Содѣ́ла тя́ Госпо́дь хра́мъ Пресвято́му Ду́ху, ду́шу бо твою́ чи́сту соблюде́ и добро́тою украси́въ въ дому́ чу́днаго святи́теля Никола́я, съ ни́мже, свя́те, о на́съ при́сно моли́ся.

Богоро́диченъ: Сѣдя́й на Престо́лѣ превознесе́ннѣ, я́ко Престо́лъ Тя́ имѣ́я, Пречи́стая Дѣ́во, Марíе, Богоневѣ́сто Влады́чице; херуви́мовъ бо честнѣ́йшая и серафи́мъ сла́внѣйшая яви́лася еси́, Чи́стая, на руку́ бо Твое́ю почи́ препросла́вленный Бо́гъ на́шъ.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Невеще́ственнымъ житіе́мъ возсія́въ па́че со́лнца, бога́тство тлѣ́емое расточи́лъ еси́ убо́гимъ, по глаго́лу Псалмопѣ́вца, пра́вдою обогати́вся. Тѣ́мже во Ца́рствіи Христо́вѣ съ ли́ки святы́хъ весели́шися.

Поще́ніемъ изря́дно стра́сти плотскíя умертви́лъ еси́, свя́те кня́же Андре́е, терпѣ́ніемъ бо твои́мъ въ мѣ́ру во́зраста соверше́ннаго ра́зума житіе́ дости́же, въ не́мже ны́нѣ Христу́ предстоя́, о на́съ всегда́ моли́ся.

Душе́ моя́, почто́ не ревну́еши святы́хъ житію́, но во грѣсѣ́хъ все́ житіе́ изнури́ла еси́? Воспряни́ и припади́ ко Творцу́ твоему́, въ покая́ніи вопію́щи: Бо́же, мольба́ми уго́дника Твоего́, свята́го кня́зя Андре́я, очи́сти ду́ши и тѣлеса́ на́ша.

Богоро́диченъ: Во страсте́хъ все́ мое́ житіе́ а́зъ, окая́нный, изнури́въ, уми́льно вопію́ Ти́, Богома́ти: спаси́ мя́, окая́ннаго, спаси́, къ Тебѣ́ бо прибѣго́хъ, Спасе́нію ро́да человѣ́ческаго.

Инъ.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Уподо́бился еси́ распе́ншемуся во́лею на дре́вѣ Христу́ Бо́гу на́шему, всече́стнѣ, сраспе́нся Ему́ вся́кимъ воздержа́ніемъ и мно́гими добродѣя́нми.

Уподо́бился еси́ купцу́, и́щущему до́браго би́сера, и́же обрѣ́тъ еди́нъ многоцѣ́ненъ, ше́дъ, не скры́лъ еси́ въ песцѣ́ житія́ сего́, но умно́живъ, тмо́ю тала́нтъ возрасти́лъ еси́, отъ него́же подае́ши дина́рь благода́ти неоску́дно.

Возше́лъ еси́, богому́дре, на не́бо, я́коже Илія́ на колесни́цѣ, добродѣ́тельми твои́ми, Ду́хомъ облегчава́емь, ны́нѣ вѣ́рныхъ сохрани́ отъ вся́каго искуше́нія.

Богоро́диченъ: Исцѣли́, Чи́стая, неду́гующаго ума́ моего́ омраче́ніе, пра́веднаго сего́ моли́твами, Ты́ бо, Пренепоро́чная Влады́чице, породила́ еси́ Христа́ на спасе́ніе вѣ́рныхъ.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Во́лею на́съ ра́ди обнища́вшему Христу́ послѣ́довалъ еси́, Его́же ны́нѣ нището́ю обогати́вся, свя́те кня́же Андре́е, оста́вилъ еси́ житіе́ вре́дное и, сла́ву мíра сего́ презрѣ́въ, въ мíръ небе́сный ра́дуяся преше́лъ еси́.

Человѣ́че Бо́жій, Андре́е чу́дне, твори́ши бо чудеса́ съ вѣ́рою къ ра́цѣ моще́й твои́хъ приходя́щимъ, и тебе́ те́плѣ призыва́ющимъ: исцѣля́еши бо стра́сти и врачу́еши болѣ́зни, и мо́лишися о душа́хъ на́шихъ.

Да́же до конца́, кня́же Андре́е, подвиза́лся еси́, идѣ́же святы́я твоя́ имѣ́ются мо́щи, и́хже преподо́бный Даніи́лъ богоно́сный цѣ́лы обрѣ́тъ, престарѣ́лыма свои́ма рука́ма благоговѣ́йно осяза́, благоуха́ніе испуща́ющихъ и болѣ́зни цѣля́щихъ.

Богоро́диченъ: Недоумѣ́ніе предлежи́тъ ми́ отъ обыше́дшихъ мя́ зо́лъ, Пречи́стая, тѣ́мже изба́ви мя́ отъ ни́хъ ско́ро, къ Тебѣ́ бо еди́нѣй прибѣго́хъ, Богома́ти, богоразу́мія свѣ́томъ одѣва́ющей.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Непреткнове́нно ше́ствуя стезя́ми Боже́ственнаго ра́зума, богому́дре, свы́ше наставля́емь, я́ко изъ купины́ тебѣ́ возгласи́ Госпо́дь въ мы́сли твое́й, и а́біе получи́лъ еси́ страсте́й свобожде́ніе си́лою Ду́ха.

Немо́кренно преплы́лъ еси́ житія́ сего́ свирѣ́пую пучи́ну, въ не́йже погрузи́лъ еси́ главу́ па́губнаго змíя, тво́й же, блаже́нне, кора́бль направля́емь руко́ю Держа́щаго вся́, Иже у́читъ человѣ́ки не уклоня́тися къ паде́нію Ада́мля зла́го нра́ва грѣхо́вна.

Исто́чникъ приснотеку́щій яви́лся еси́, блаже́нне, чуде́сную благода́ть источа́ющь и неду́ги отъ человѣ́къ отгоня́ющь, держа́ву вра́жію и си́лу низложи́лъ еси́, и по́чести побѣ́ды вѣне́цъ отъ руки́ Бо́жія прія́лъ еси́, пребога́те.

Богоро́диченъ: Госпо́дь си́лъ съ Тобо́ю, Пречи́стая, я́коже изво́лилъ е́сть, бы́въ Отрокови́це, всѣ́хъ на́съ отъ о́бласти льсти́ваго хода́тайствомъ Твои́мъ изба́вилъ е́сть: тѣ́мже Тя́ по до́лгу ро́дове родо́въ при́сно ублажа́ютъ.

Конда́къ, гла́съ 8:

Насажде́нъ во дво́рѣхъ Госпо́днихъ, свои́ми преподо́бными дѣ́тельми въ дому́ свята́го чудотво́рца Никола́я кра́сно процвѣ́лъ еси́, мíра красоту́ и сла́ву сего́ свѣ́та ни во что́ вмѣни́въ, еди́наго Христа́ возлюби́лъ еси́; сле́зъ твои́хъ тече́ніемъ напая́емь, уязви́лся еси́ жела́ніемъ бу́дущихъ даро́въ. Тѣ́мже зове́мъ ти́: ра́дуйся, свя́те кня́же Андре́е, гра́ду Переясла́влю похвала́ и все́й Россíйстѣй земли́ вели́кое утвержде́ніе.

Икосъ:

Человѣ́къ у́бо бы́сть естество́мъ, но яви́ся сограждани́нъ и собесѣ́дникъ а́нгеломъ, на земли́ я́ко безпло́тенъ пожи́въ, плотско́е все́ помышле́ніе отве́рглъ еси́, тѣ́мже и мы́, земнíи, зове́мъ ти́, глаго́люще: ра́дуйся, отца́ благочести́ваго сы́не; ра́дуйся, отъ ма́тере роди́выйся благовѣ́рныя; ра́дуйся, я́ко отъ ю́ности послѣ́довалъ еси́ Христо́ви; ра́дуйся, я́ко увяди́лъ еси́ вся́ плотскíя стра́сти; ра́дуйся, я́ко прише́ствіемъ твои́мъ гра́дъ Переясла́вль освяти́вый; ра́дуйся, я́ко въ не́мъ житіе́мъ твои́мъ пу́ть на́мъ ко спасе́нію показа́вый; ра́дуйся, я́ко чудесы́ твои́ми вся́ лю́ди удивля́еши; ра́дуйся, я́ко отъ честна́го гро́ба твоего́ то́ки цѣле́бъ излива́еши; ра́дуйся, благочести́вѣйшимъ Царе́мъ и Вели́кимъ Князе́мъ похвала́ и блюсти́телю; ра́дуйся, те́плый на́шъ предста́телю и отъ вся́кія ско́рби изба́вителю; ра́дуйся, свя́те Андре́е, вели́кій кня́же, гра́ду Переясла́влю и все́й Россíйстѣй земли́ похвало́ и вели́кое утвержде́ніе.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Себе́ потаи́въ и ники́мже зна́емь, гра́дъ Переясла́вль вельми́ возлюби́лъ еси́, его́же прише́ствіемъ твои́мъ освяти́лъ еси́, въ не́мже пребыва́я и пло́ть твою́ изнуря́я, пѣ́лъ еси́: оте́цъ на́шихъ Бо́же, благослове́нъ еси́.

Тридесятолѣ́тное по́прище на земли́ житія́ твоего́ соверша́я и при хра́мѣ Боже́ственнаго престо́ла пребыва́я, плоды́ досто́йны Христу́ сотвори́лъ еси́, богому́дре кня́же Андре́е, отню́дуже всели́вся въ вѣ́чныя кро́вы, земны́мъ ми́ръ подае́ши, идѣ́же зри́ши Тро́ицы свѣ́тъ нераздѣ́льный.

Изъ мла́да прилѣжа́въ Вседержи́телю и воззрѣ́въ неукло́нно на высоту́ ра́зума, пости́глъ еси́ му́дрости глубину́, и дарова́ніемъ чуде́съ обогати́лся еси́, богому́дре кня́же Андре́е: тѣ́мже избавля́й на́съ отъ бѣ́дъ ко Го́споду моли́твами твои́ми.

Богоро́диченъ: Его́же родила́ еси́ Го́спода, Влады́чице Чи́стая, не преста́й моля́щи Сы́на Твоего́, изъя́ти мя́ при́сно отъ вра́гъ оскорбля́ющихъ, и тя́жкое бре́мя грѣхо́въ мои́хъ расточи́, Богоневѣ́сто, я́ко да, ра́дуяся, вопію́: благослове́нъ, Пречи́стая, Пло́дъ чре́ва Твоего́.

Инъ.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Проше́лъ еси́ му́жественно плотско́е мудрова́ніе посто́мъ крѣ́пкимъ и умо́мъ смиренному́дрымъ, кре́стнымъ ору́жіемъ побѣди́лъ еси́ го́рдаго змíя лука́ваго, кня́же Андре́е пребога́те, на него́же и на́мъ бу́ди помо́щникъ.

Якоже просла́вилъ еси́ Го́спода дѣ́лы благи́ми, непоро́чно соблю́дъ боже́ственная Его́ повелѣ́нія, та́ко и Онъ просла́ви и упоко́и тя́ въ нѣ́дрѣхъ Авраа́млихъ, идѣ́же на́съ, чту́щихъ тя́, помина́й.

Ра́дуйтеся, Россíйстіи кня́зи, и вси́ христолюби́віи лю́діе ве́село ликовству́йте, свяще́нніи собо́ри собери́теся во святы́й хра́мъ, идѣ́же лежа́тъ многоцѣле́бныя мо́щи на́шего засту́пника, богоно́снаго кня́зя Андре́я Смоле́нскаго, моля́ще его́, я́ко да бу́детъ на́мъ помо́щникъ въ се́мъ житіи́ и въ де́нь Су́дный.

Богоро́диченъ: Преукра́шена боже́ственною сла́вою Ты́ еси́, Пречи́стая, еди́на бо отъ вѣ́ка Сло́во Бо́жіе, заче́нши, родила́ еси́ и яви́лася еси́ Ма́ти и Дѣ́ва, благослове́нна въ жена́хъ Всенепоро́чная Марíе Влады́чице.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Кто́ изочте́тъ страда́нія твоя́, а́лчбу, наготу́ и жа́жду, и́миже украша́лся еси́? Па́че бо со́лнечныхъ свѣ́тлостей просія́въ, свя́те кня́же Андре́е, ны́нѣ на небесѣ́хъ со а́нгелы предстои́ши, о на́съ непреста́нно Христу́ Бо́гу моля́ся и пѣ́ти повелѣва́я: о́троцы, благослови́те, свяще́нницы, воспо́йте, лю́діе, превозноси́те Христа́ во вѣ́ки.

Вы́шнихъ ища́, на земли́ пре́лести возненави́дѣлъ еси́, богоблаже́нне, тѣ́мже съ преподо́бными въ любви́ духо́вной соедини́вся, съ ни́ми воспрія́лъ еси́ побѣ́ды вѣне́цъ на небесѣ́хъ, отню́дуже моля́щимъ тя́ сла́дцѣ зове́ши: о́троцы, благослови́те, свяще́нницы, воспо́йте, лю́діе, превозноси́те Христа́ во вѣ́ки.

Кíй язы́къ, блаже́нне кня́же Андре́е, твое́ житіе́ и страда́ніе мо́жетъ исчести́ и досто́йно восхвали́ти? Ты́ бо яви́лся еси́ на земли́ я́ко безпло́тенъ, земну́ю жи́знь и сла́ву мíра сего́ возненави́дѣвъ, Христа́ еди́наго возлюби́лъ еси́, при́сно воспѣва́я: о́троцы, благослови́те, свяще́нницы, воспо́йте, лю́діе, превозноси́те Христа́ во вѣ́ки.

Богоро́диченъ: Влады́чице Дѣ́во Чи́стая, Препросла́вленная Ма́ти Марíе, моли́ся Сы́ну Твоему́ прилѣ́жно, изба́витися отъ вся́кія ну́жды и напа́сти, и вся́каго зла́го обстоя́нія Тебе́, Госпоже́, блажа́щимъ, пою́щимъ и превознося́щимъ во вся́ вѣ́ки.

Инъ.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Всѣ́мъ се́рдцемъ Святѣ́й Тро́ицѣ приложи́вся, блаже́нне кня́же Андре́е, и отъ Нея́ лучи́ боголѣ́пно пріи́мъ, свѣтови́дѣнъ бы́лъ еси́, и со а́нгелы лику́еши и пое́ши: благослови́те вся́ дѣла́ Госпо́дня Го́спода.

Невозвра́тно ше́ствовалъ еси́ къ небеси́, блаже́нне, боже́ственными стезя́ми, отъ злѣ́ же веду́щихъ до конца́ уклони́лся еси́ умерщвле́ніемъ пло́ти, преподо́бне, къ Бо́гу взыва́я: благослови́те вся́ дѣла́ Госпо́дня Го́спода.

Все́льшаяся благода́ть въ ду́шу твою́, свя́те, сотвори́ тя бѣсо́мъ стра́шна, живу́щіи бо въ человѣ́цѣхъ нечи́стіи ду́си моли́твами твои́ми прогони́мы быва́ютъ, вси́ же притека́ющіи къ тебѣ́ вѣ́рно спаса́ются и пою́тъ: благослови́те вся́ дѣла́ Госпо́дня Го́спода.

Богоро́диченъ: Вода́ еси́ неисчерпа́емая, Ты́ еси́, Богоро́дице Влады́чице, отъ Тебе́ бо пію́щіи вси́ благода́ти исполня́ются, душа́ми и тѣлесы́ освяща́ются и вопію́тъ: благослови́те вся́ дѣла́ Госпо́дня Го́спода.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Крило́ма духо́вныма у́мъ тво́й впери́въ къ Сіо́ну вы́шнему, его́же и наслѣ́довалъ еси́, бы́сть единокро́вникъ съ ли́ки святы́хъ, всегда́ веселя́щихся и пою́щихъ въ свѣ́тлости неизрече́ннѣй Го́сподеви. Его́же моли́ о творя́щихъ па́мять твою́, да досто́йно тебе́ велича́емъ.

Всезри́тель Бо́гъ, ви́дѣвъ твое́ усе́рдіе, свя́те кня́же Андре́е, и соверше́нную вѣ́ру къ Нему́, просла́ви тя́ сла́вою вѣ́чною, облагодѣ́тельствовавъ тя́ чудесы́, Его́же моли́ къ по́льзѣ уще́дрити ны́, богому́дре, да тебе́, досто́йно воспѣва́юще, велича́емъ.

Спаси́ моли́твами твои́ми, свя́те кня́же Андре́е, вѣ́рою творя́щихъ па́мять твою́ и отъ всѣ́хъ бѣ́дъ сохрани́ гра́дъ Переясла́вль, и вся́кій гра́дъ, и страну́, и хра́мъ тво́й невреди́мы отъ нахожде́нія иновѣ́рныхъ и междоусо́бныя бра́ни, и отъ вся́каго зла́, тебе́ воспѣва́ющихъ и велича́ющихъ.

Богоро́диченъ: Марíе Пречи́стая Влады́чице, омраче́нную мою́ ду́шу и се́рдце просвѣти́, и жи́зни вѣ́чныя сподо́би мя́, Госпоже́, не помина́ющи безчи́сленныхъ мои́хъ зо́лъ и моля́щи Сы́на Твоего́ и Бо́га на́шего за мя́, окая́ннаго.

Инъ.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Источа́ютъ, сла́вне, твоя́ мо́щи исцѣле́нія, и стра́сти отгоня́ютъ отъ приходя́щихъ къ тебѣ́ съ вѣ́рою, прогони́ми бо быва́ютъ ду́хи лю́тыя: ты́ воздвиза́еши вѣ́рныя восхвали́ти свѣ́тлыя твоя́ по́двиги.

Яко вели́кое со́лнце, возсія́лъ еси́ вели́чіемъ по́двигъ твои́хъ и озари́лъ еси́ вся́ Ру́сскія страны́, свобожда́я вся́кихъ напа́стей, душе́вныхъ и тѣле́сныхъ, моля́щи со проро́ки и апо́столы, съ му́ченики и преподо́бными и богоно́снымъ Даніи́ломъ, и всѣ́ми святы́ми Христа́ Бо́га о всѣ́хъ на́съ.

На́мъ, чту́щимъ тя́ и похваля́ющимъ по́двиги твоя́, испроси́, блаже́нне, моли́твами твои́ми у Христа́ Бо́га ны́нѣ и во исхо́дѣ ду́шъ на́шихъ, и на Стра́шнѣмъ Суди́щи получи́ти ми́лость, я́ко и мы́ со всѣ́ми вопіе́мъ ти́: ра́дуйся, вели́кій кня́же Андре́е, а́нгеловъ собесѣ́дниче и человѣ́ковъ помо́щниче.

Богоро́диченъ: Вели́кій во́инъ невеще́ственныхъ си́лъ а́нгельскихъ Тебѣ́, Всечи́стая Влады́чице, благовѣсти́, ре́къ: ра́дуйся, Благода́тная, Госпо́дь съ Тобо́ю. Тѣ́мже и мы́ Тебѣ́ вопіе́мъ, Всесвята́я: ра́дуйся, Сы́на Бо́жія воплоще́ніе, всего́ мíра свобожде́ніе.

Свѣти́ленъ:

Треблаже́нне кня́же Андре́е, предстоя́ со а́нгелы Христо́ву ны́нѣ Престо́лу и свѣ́та отту́ду исполня́яся, мíру ми́ръ исхода́тайствуй и на́мъ спасе́ніе, благоче́стно и благопрія́тно па́мять твою́ соверша́ющимъ, и въ ско́рбехъ къ тебѣ́ притека́ющимъ. [Два́жды.]

Сла́ва, и ны́нѣ, богоро́диченъ:

Тя́ немо́лчными пѣ́сньми блажи́мъ, Богоро́дице Дѣ́во, я́ко родила́ еси́ Еди́наго отъ Тро́ицы, и на руку́ Твое́ю носи́ла еси́ Христа́ Жизнода́вца на спасе́ніе всего́ мíра и обновле́ніе.

На хвали́техъ, стихи́ры свята́го [на 4], гла́съ 1:

Позна́хомъ тя́ су́ща человѣ́ка Бо́жія бы́ти, блаже́нне кня́же Андре́е: стра́нствовавъ бо на земли́, нищету́ во́льную и кро́тость смиренному́друю стяжа́лъ еси́, терпѣ́ніемъ бо твои́мъ въ добродѣ́телехъ соверше́нство воспрія́лъ еси́, и чудесы́ твои́ми вся́ вѣ́рныя удиви́лъ еси́, моли́твенниче о душа́хъ на́шихъ. [Два́жды.]

Любо́вію Христо́вою ороша́емь, блаже́нне кня́же Андре́е, мірскíя ле́сти вся́ возненави́дѣлъ еси́, кня́жескую же че́сть и сла́ву нището́ю почти́лъ еси́ и а́нгеловъ житіе́ наслѣ́довалъ еси́, съ ни́ми же моли́ся Го́сподеви дарова́ти душа́мъ на́шимъ ми́ръ и ве́лію ми́лость.

Послужи́лъ еси́, богому́дре, усе́рдно во хра́мѣ Госпо́дни, въ дому́ чу́днаго святи́теля Никола́я, отону́дуже и въ го́рняя вше́лъ еси́, послѣди́ же всѣ́ми позна́лся еси́, рукописа́ніе бо твое́ лю́демъ показа́лъ еси́, и чуде́съ то́ки испусти́лъ еси́, свя́те кня́же Андре́е, моли́твенниче о душа́хъ на́шихъ.

Сла́ва, гла́съ 6:

Егда́ благоизво́ли Бо́гъ сугу́бо тя́ просла́вити и лю́демъ въ по́льзу показа́ти мо́щи твоя́, тогда́ бы́сть преподо́бному Даніи́лу открове́ніе о тебѣ́, о́нъ же возвѣсти́ Самодержа́вному Госуда́рю Царю́ Іоа́нну и первопресто́льному святи́телю Іоаса́фу о се́мъ: они́ же повелѣ́ша честно́е тѣ́ло твое́ изъ земны́хъ нѣ́дръ изъя́ти, и поста́вити я́ко свѣти́льника на свѣ́щницѣ, да свѣ́титъ всему́ мíру и гра́ду твоему́ чудесы́. Преподо́бный же оте́цъ на́шъ Даніи́лъ со освяще́ннымъ собо́ромъ и всенаро́днымъ мно́жествомъ обрѣто́ша е́ и я́вственно ви́дѣша, я́ко нетлѣ́нно су́щее и благоуха́ніе испущаю́щее, тогда́ мно́гая чудеса́ отъ моще́й твои́хъ содѣ́ялъ еси́, вся́кія болѣ́зни отъ человѣ́къ отгна́лъ еси́, и о тебѣ́ невѣ́рствующихъ наказа́лъ еси́. Мы́ же ви́дяще сицева́я, я́ко изво́лилъ еси́ тѣ́ломъ съ на́ми пребыва́ти, си́це спребыва́й съ на́ми и ду́хомъ неотсту́пно, тя́ мо́лимъ, уго́дниче Христо́въ, блаже́нне кня́же Андре́е, отъ Него́же мíру ми́ръ испроси́, и на́мъ, твое́ успе́ніе пра́зднующимъ, и всѣ́мъ, къ тебѣ́ прибѣга́ющимъ, спасе́ніе душа́мъ и ве́лію ми́лость.

И ны́нѣ, богоро́диченъ:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

Та́же: Славосло́віе вели́кое, ектеніи́ и отпу́стъ.



НА ЛИТУРГІИ,

Блаже́нны отъ пе́рваго кано́на свята́го, пѣ́снь 3-я на 4, и втора́го, пѣ́снь 6-я на 4. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Матѳе́я, зача́ло 10. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Слу́жба и житіе́ свято́му благовѣ́рному кня́зю Андре́ю Смоле́нскому и Переясла́вскому чудотво́рцу. Его́же па́мять 27-го Окто́врія.. — М.: Въ Сѵнода́льной тѵпогра́фіи, 1889. — Л. 1 – 16.

/ Къ оглавленію раздѣла /


Наверхъ / Къ титульной страницѣ

0