Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 27 iюня 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 27-й де́нь.
Слу́жба преподо́бнаго отца́ на́шего Дими́трія Но́ваго, Басарбо́вскаго.

НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ.., стихи́ры на 8: преподо́бнаго на 5 и му́ченика на 3.
Стихи́ры преподо́бнаго, гла́съ 4. Подо́бенъ: Яко до́бля.

Послу́шавъ Влады́ку, ре́кшаго усты́ Свои́ми: и́же хо́щетъ по Мнѣ́ ити́, да отве́ржетъ всю́ свою́ во́лю плотску́ю, и во́зметъ кре́стъ сво́й и по Мнѣ́ гряде́тъ, — отве́рглся еси́ всея́ суеты́ мірскíя, и отъ ю́ности твоея́ послѣ́довалъ еси́ Тому́, преподо́бне Дими́тріе.

Глаго́летъ Па́велъ апо́столъ, сосу́дъ свя́тъ избра́нный: немощна́я и бу́яя избра́ Бо́гъ, да посрами́тъ крѣ́пкая мíра сего́, — е́же о тебѣ́ исповѣ́дуемъ, преподо́бне; зане́ па́стыря тя́ су́ща и простца́, и слугу́ въ человѣ́цехъ, я́ко отроча́ непоро́чно блаже́нство тя́ просла́ви.

Труды́ тѣле́сніи, воздержа́ніе похоте́й, бдѣ́ніе нощно́е, смире́ніе же ко всѣ́мъ, и кро́тость просла́ви тя́, и всѣ́мъ вѣ́рнымъ зна́ема тя́ показа́, о Дими́трие! Но, я́ко имѣ́яй дерзнове́ніе ве́ліе ко Влады́цѣ, моли́ спасти́ся всѣ́мъ на́мъ.

Яко звѣзда́ просвѣща́емь, луча́ми Со́лнца высо́каго и свѣ́тлаго — Іису́са Христа́, омраче́ннымъ на́мъ о́блакомъ страсте́й и лю́тыми прило́ги, просвѣти́ ду́ши на́ша, я́ко да сы́нове свѣ́та бу́демъ, со свѣти́льникомъ возже́ннымъ исходя́ще въ срѣ́теніе Жениху́ Влады́цѣ.

Изба́ви ны́, вѣ́рно блажа́щія тя́ и пра́зднующія похва́льными гла́сы твою́ па́мять, отъ вся́кія печа́ли и стра́сти, отъ внеза́пныхъ болѣ́зней, отъ напа́стей и бѣ́дъ, мо́лимъ тя́, я́ко да просла́вимъ дерзнове́ніе, е́же и́маши ко Влады́цѣ, я́ко ра́бъ вѣ́ренъ, преблаже́нне Дими́тріе.

Сла́ва, гла́съ 2:

Якоже иногда́ го́лубь извѣсти́ Но́еви преста́тіе пото́па и умоле́ніе Влады́ки, та́ко и святы́я мо́щи твоя́, блаже́нне, преста́тію на́шихъ всѣ́хъ скорбе́й вино́вни бы́ша; не то́чію ра́дости вѣ́стникъ показа́лся еси́, но и хода́тай бы́лъ еси́ ко Го́споду о утоле́ніи гнѣ́ва, пра́ведно на ны́ дви́жимаго, тѣ́мже вси́ единогла́сно блажи́мъ тя́, и съ вѣ́рою прибѣга́емъ къ мо́щи твое́й, я́ко да благопрія́тными твои́ми къ Бо́гу моли́твами, изба́вльшеся отъ вся́каго искуше́нія, прича́стницы бу́демъ вѣ́чнаго небе́снаго Ца́рствія.

И ны́нѣ, [богоро́диченъ:]

Пре́йде сѣ́нь [зако́нная, благода́ти прише́дши: я́коже бо купина́ не сгара́ше, опаля́ема, та́ко Дѣ́ва родила́ еси́ и Дѣ́ва пребыла́ еси́. Вмѣ́сто столпа́ о́гненнаго пра́ведное возсія́ Со́лнце, вмѣ́сто Моисе́я — Христо́съ, спасе́ніе ду́шъ на́шихъ].

Вхо́дъ, проки́менъ дне́ и паримíи обы́чни.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры [ищи́ въ мине́я].

На стихо́внѣ стихи́ры, гла́съ 1. Подо́бенъ: Прехва́льніи му́ченицы.

Отче Дими́тріе, отъ младе́нства по́хоти и сла́сти плотскíя обузда́лъ еси́, всю́ же во́лю твою́ отве́ргъ, до́блественно на змíя вооружи́лся еси́, посто́мъ и моли́твою, до́ндеже побѣди́лъ, сего́ ра́ди и вѣне́цъ трудо́въ отъ Бо́га прія́лъ еси́.

Сти́хъ: Честна́ предъ Го́сподемъ сме́рть преподо́бныхъ Его́.

Ни кро́вь, ни пло́ть побѣди́лъ еси́, треблаже́нне, но діа́вола врага́, изгна́вшаго Ада́ма и Еву и всѣ́хъ на́съ изъ рая́, злы́мъ и преле́стнымъ свои́мъ совѣ́томъ на заповѣ́данное дре́во, но я́ко да и па́ки получи́мъ вси́ блаже́нство, ко Го́споду моли́ся.

Сти́хъ: Блаже́нъ му́жъ, боя́йся Го́спода, въ за́повѣдехъ [Его́ восхо́щетъ зѣло́].

Всеотягче́нныя ны́ бре́менемъ похоте́й и искуше́ньми неду́говъ, не смѣ́ющія возвести́ очеса́ на́ша ко благосе́рдію Влады́ки, покры́й, свя́те, благода́тію твое́ю, и спаси́ на́съ отъ бѣ́дъ хода́тайствомъ твои́мъ, ко Го́споду Бо́гу моли́ся.

Сла́ва, гла́съ 5:

Преподо́бне о́тче, гла́съ Ева́нгелія Госпо́дня услы́шавъ, мíръ оста́вилъ еси́, бога́тство и сла́ву въ ничто́же вмѣни́въ, тѣ́мъ всѣ́мъ вопія́лъ еси́: возлюби́те Бо́га и обря́щете благода́ть вѣ́чную; ничто́же предпочти́те па́че любве́ Его́, да егда́ пріи́детъ во сла́вѣ Свое́й, обря́щете поко́й со всѣ́ми святы́ми. — Его́же моли́твами, Христе́, сохрани́ и спаси́ ду́ши на́ша.

И ны́нѣ, богоро́диченъ:

[Хра́мъ и Две́рь еси́, Пала́та и Престо́лъ Царе́въ, Дѣ́во всечестна́я, Еюже Изба́витель мо́й, Христо́съ Госпо́дь, во тмѣ́ спя́щимъ яви́ся, Со́лнце сы́й пра́вды, просвѣти́ти хотя́, я́же созда́ по о́бразу Своему́ руко́ю Свое́ю. Тѣ́мже, Всепѣ́тая, я́ко Ма́терне дерзнове́ніе къ Нему́ стяжа́вшая, непреста́нно моли́, спасти́ся душа́мъ на́шимъ.]

Тропа́рь, гла́съ 8:

Въ тебѣ́, о́тче, извѣ́стно спасе́ся, е́же по о́бразу: пріи́мъ бо кре́стъ, послѣ́довалъ еси́ Христу́, и дѣ́я, учи́лъ еси́ презира́ти у́бо пло́ть, прехо́дитъ бо, прилѣжа́ти же о души́, ве́щи безсме́ртнѣй; тѣ́мже и со а́нгелы сра́дуется, преподо́бне Дими́тріе, ду́хъ тво́й.

Сла́ва, и ны́нѣ, богоро́диченъ:

[Иже на́съ ра́ди рожде́йся отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя.]


НА УТРЕНИ,
[На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ.]

По 1-й каѳи́смѣ сѣда́ленъ, гла́съ 1. Подо́бенъ: Гро́бъ Тво́й, Спа́се.

Отъ неду́говъ и ну́ждъ болѣ́зней же и страсте́й, изба́ви ны́, чту́щія тя́, свя́те, ско́ро услы́шавъ, внегда́ взыва́емъ прилѣ́жно: о, Дими́тріе, преблаже́нне и благосты́нне, просте́ръ ру́цѣ твои́ ко Влады́цѣ, моли́ спасти́ся всѣ́мъ на́мъ.

Сла́ва: то́йже. И ны́нѣ, богоро́диченъ:

Впа́дшія ны́ во грѣхи́ скве́рныя, и рабы́ осужде́ни бы́вшія суро́ву мучи́тельству лука́ваго змíя и губи́теля ро́да человѣ́ческаго, Преми́лостивая Дѣ́во, не оста́ви на́съ, ниже́ пре́зри, мо́жеши бо спасти́.

По 2-й каѳи́смѣ сѣда́ленъ, гла́съ 4. Подо́бенъ: Удиви́ся Іо́сифъ.

На земли́ я́ко а́нгелъ пожи́лъ еси́, въ постѣ́ и моли́твахъ де́нь и но́щь пребыва́я, да увяди́ши стремле́ніе страсте́й, съ ни́миже бра́лся еси́, я́ко и́стинный во́инъ Христа́ Бо́га. Его́же во́лю отъ ю́ности испо́лнивъ, Дими́тріе, вся́ нивочто́же вмѣни́лъ еси́, сего́ ра́ди мы́ вѣ́рно хва́лимъ и прославля́емъ тя́.

Сла́ва: то́йже. И ны́нѣ, богоро́диченъ:

Удиви́лся Іо́сифъ, внима́я мы́слію, ка́ко во святѣ́й Твое́й утро́бѣ Христа́ зачала́ еси́, неискусобра́чна су́щи? Смотря́ющу же на дре́вняя чудеса́, купину́, огне́мъ неопали́мую, и же́злъ прозя́бшій, разрѣши́ся недоумѣ́ніе его́, и взыва́ше: Всепѣ́тая Невѣ́ста, Дѣ́ва ражда́етъ, и по рождествѣ́ па́ки Дѣ́вою пребыва́етъ.

По поліеле́и сѣда́ленъ, гла́съ 4. Подо́бенъ: Ско́ро предвари́.

Ско́ро изба́ви на́съ отъ бѣ́дъ, стяжа́вшихъ тя́ хода́тая въ ну́ждахъ, сла́вне Дими́тріе; заступи́, спаси́ вся́ лю́ди отъ неду́говъ, моли́ся прилѣ́жно, и уми́лостиви Влады́ку на́мъ, любо́вію пра́зднующимъ святу́ю па́мять твою́.

Сла́ва: то́йже. И ны́нѣ, богоро́диченъ:

Къ Тебѣ́ прибѣга́емъ мы́ вси́, одержи́міи внеза́пными неду́ги душе́вными и тѣле́сными, вопію́ще прилѣ́жно: Ма́ти Пресвята́я, изба́ви и заступи́ отъ ну́ждъ и скорбе́й достоя́ніе Твое́, на́съ недосто́йныхъ, мо́лимтися и благоговѣ́емъ.

Степе́нна, 4-го гла́са 1-й антифо́нъ. Проки́менъ, гласъ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Ева́нгеліе отъ Луки, зача́ло 24.

По 50-мъ псалмѣ́ стихи́ра, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ непоро́чно поревнова́лъ еси́. Дерзнове́ніе имѣ́я ко (Христу́) Бо́гу, ми́ръ испроси́ душа́мъ на́шимъ.

Кано́нъ Богоро́дицы со ирмосо́мъ на 6, и препо́добнаго на 4 и му́ченика на 4.

Кано́нъ преподо́бнаго, гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Свѣ́тлую луче́ю Свята́го Ду́ха, Дими́тріе, озаря́емь, озари́ восхваля́ющихъ тя́ любо́вію христіа́нскою въ пѣ́снехъ, мона́ховъ похвало́, преподо́бныхъ сла́во, басарбо́вская красото́ и вѣ́ры наказа́телю.

Препобѣжда́я кры́ющагося въ дре́вѣ врага́ попра́лъ еси́, и сѣ́ти его́ легко́ прете́клъ еси́ ору́жіи вѣ́ры, лику́я, о́тче Дими́тріе, и, ра́дуяся, жи́знь обыма́еши отъ дре́ва разумѣ́нія.

Осіява́емь свѣ́томъ благода́ти, во о́гнь вше́лъ еси́, я́коже тріе́ о́троцы пребы́въ несгара́емь, Бо́гу сохра́ньшу тя́, о́тче Дими́тріе, и показу́ющу всѣ́мъ послѣди́ иму́щее бы́ти успѣ́яніе твое́ и просія́ніе.

Богоро́диченъ: Стремле́ніи неудержа́нными разлива́ся бя́ше на ны́, но прибли́жшася Ро́ждшемуся изъ Тебе́ и прира́зшися, разруши́ся и низложи́ся, Богоро́дице Дѣ́во, присносу́щную бо Жи́знь вои́стинну воплоще́нно родила́ еси́.

Катава́сія: Отве́рзу уста́ моя́...

Пѣ́снь 3.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, Еди́не Человѣколю́бче.

Умъ ве́сь проти́ву страсте́мъ, преблаже́нне, положи́въ, и́стины послѣ́дователь показа́лся еси́, о́тче, тѣ́мже я́ко фи́никсъ въ пеще́рѣ процвѣ́лъ еси́.

Въ слѣ́дъ Христо́ва уче́нія ше́ствуя, изъ оте́ческаго мѣ́ста изше́лъ еси́, Дими́тріе, и въ пеще́ру все́лься, побѣ́ду на сопроти́внаго воздви́глъ еси́, Бо́жіей по́мощи укрѣпля́ющей тя́.

Тве́рдостію ра́зума, преблаже́нне, укрѣпля́емь, вра́жія ко́зни побѣди́лъ еси́, Дими́тріе, всѣ́мъ та́ откры́въ, вознесе́нную его́ бро́вь низложи́лъ еси́.

Богоро́диченъ: Спаси́тельнаго смотре́нія е́же о на́съ Бо́гъ Сло́во, свѣ́тлая две́рь Ты́, Ма́ти Дѣ́во, показа́лася еси́ вои́стинну, Ты́ бо ввела́ еси́ на́мъ разу́мную лучу́ превысо́каго Божества́.

Сѣда́ленъ, гла́съ 4. Подо́бенъ: Яви́лся еси́.

Госпо́дню нищету́ возлюби́въ, бога́тство преходя́щее возненави́дѣлъ еси́, сего́ ра́ди вѣ́чнующее Ца́рство стяжа́лъ еси́.

Сла́ва: му́ченика. И ны́нѣ, богоро́диченъ [та́мже].

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Души́ устрое́ніе очи́стивъ и разшири́въ Боже́ственными видѣ́ніи, вмѣсти́лище дарова́ній Боже́ственныхъ вои́стинну содѣ́лалъ еси́ ю́, богоблаже́нне, и прикоснове́ніемъ ру́къ твои́хъ неду́жныя исцѣля́лъ еси́, подража́тель Влады́цѣ бы́въ.

На тя́ лю́тѣ свирѣ́певшія, о́тче, поже́рты бы́ша, я́коже Даѳа́нъ окая́нный и Авиро́нъ поги́бше: неви́димо бо тя́ Боже́ственная благода́ть сохраня́ше, пеку́щися о мно́зѣхъ, и́же тобо́ю спасо́шася, послѣ́довавше уче́ніемъ твои́мъ.

Въ зако́нѣ Бо́жіи обуча́я чу́вства твоя́, боже́ственне, къ разумѣ́нію безпло́тныхъ разу́мную и преподо́бную твою́ мы́сль упра́вилъ еси́, непренемога́тельно преходя́ отъ сла́вы въ сла́ву, и отъ си́лы, о́тче, въ си́лу.

Богоро́диченъ: Новопроцвѣ́тшій и красе́нъ безсме́ртія ра́й яви́лася еси́ вои́стинну: Дре́во Жи́зни въ Тебѣ́ насажде́нное, превысоча́йшаго Божества́ си́лою, во чре́вѣ нося́щи и ро́ждши, е́же всѣ́мъ источа́етъ жизноно́сныя наде́жды, благоче́стно вѣ́дущимъ Тя́.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Мы́слію неукло́нною къ Жела́нному ти́ простира́яся, отъ Него́ изоби́льно дарова́ніе велича́йшихъ чуде́съ прія́лъ еси́, о́тче, и притека́ющія съ вѣ́рою къ ра́цѣ моще́й твои́хъ исцѣля́еши, о́тче Дими́тріе.

Бре́мя тя́жестей тѣле́сныхъ отве́ргъ, сосу́дъ богодухнове́ненъ избра́нія Свята́го Ду́ха бы́лъ еси́, блаже́нне, воздержа́ніемъ снѣ́дей и моли́твою, терпѣ́ніемъ и смиренному́дріемъ украша́яся.

Боже́ственнѣй благода́ти живу́щей въ тебѣ́, въ слу́хи всѣ́хъ разше́дшейся, и въ прису́тствіи наро́да сла́вно Боже́ственнымъ явле́ніемъ содѣва́ющимся, вся́ вѣ́рою притека́ющія къ святы́мъ твои́мъ моще́мъ исцѣля́еши, о́тче Дими́тріе.

Богоро́диченъ: Вѣ́рныхъ предста́тельнице, неруши́мая стѣно́ воспѣва́ющихъ Тя́, всѣму́ ро́ду человѣ́ческому спасе́ніе яви́лася еси́, Бо́га бо родила́ еси́ пло́тію я́вльшагося, ду́шу мою́ спаси́, Пречи́стая.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Любо́вь къ Бо́гу и бли́жнему стяжа́въ, Дими́тріе, писа́ніе зако́на и проро́ковъ исполня́я, вся́ добродѣ́тели соверши́лъ еси́.

Ревни́тель къ боже́ственнымъ бы́въ на земли́, равноа́нгельную жи́знь себѣ́ стяжа́лъ еси́, и Христо́съ че́сть тебѣ́ дарова́, и со святы́ми ли́ки твою́, преподо́бне, сочета́.

Пло́дъ прему́дрости себе́ показу́я, нача́ла прему́дрости — стра́ха Бо́жія вожделѣ́лъ еси́, и́мже наставля́яся въ о́но соверше́нство, ели́ко возмо́жно е́сть объя́ти человѣ́комъ, о́тче, дости́глъ еси́.

Богоро́диченъ: Спа́са и Изба́вителя, Бо́га вся́ческихъ и Го́спода, спожи́вшаго съ на́ми, ро́ждшая пло́тію, изба́ви отъ бѣ́дъ призыва́ющія Тя́, Пречи́стая Влады́чице.

Конда́къ, гла́съ 8. Подо́бенъ: Взбра́нной.

Яко же́ртва непоро́чная отъ младе́нства Бо́гу прине́слся еси́ добродѣ́телію, Дими́тріе блаже́нне, садодѣ́латель бы́въ благоче́стія, тѣ́мже бы́лъ еси́ преподо́бныхъ удобре́ніе и похвала́, и мона́ховъ чу́до, достохва́льне, сего́ ра́ди вопіе́мъ ти́: ра́дуйся, о́тче Дими́тріе.

Икосъ:

Иго Госпо́дне ле́гкое вседу́шно на ра́мена взе́мъ, послѣ́довалъ еси́ Ему́, преподо́бне, и молвы́ мірскíя возненави́дѣвъ, въ пеще́рѣ, блаже́нне, усе́рдно страда́лъ еси́, и вся́ концы́ а́ки со́лнце просвѣти́лъ еси́, тѣ́мже вѣ́рно къ тебѣ́ зове́мъ такова́я: ра́дуйся, кра́сная басарбо́вская сла́во; ра́дуйся, свѣти́льниче мíра пресвѣ́тлый; ра́дуйся, пеще́ры добрѣ́йшее прозябе́ніе; ра́дуйся, мона́шествующихъ пра́вило и исправле́ніе; ра́дуйся, неду́гующихъ ско́рое утѣше́ніе; ра́дуйся, здра́выхъ непоколеби́мое утвержде́ніе; ра́дуйся, я́ко на небеси́ со а́нгелы пребыва́еши; ра́дуйся, я́ко мно́гимъ терпѣ́ніемъ бы́лъ еси́ сосу́дъ Свята́го Ду́ха; ра́дуйся, Бо́жіихъ дѣ́телей и́стинный храни́телю; ра́дуйся, всѣ́хъ страсте́й отгна́ніе; ра́дуйся, те́плый на́шъ хода́таю; ра́дуйся, всѣ́хъ вѣ́рныхъ прибѣ́жище; ра́дуйся, о́тче Дими́тріе.

Пѣ́снь 7.

Ирмо́съ: Бо́жія снисхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Отве́рглъ еси́ вре́менная, и съ ли́ки небе́сными обита́еши, со а́нгелы лику́еши, я́ко а́нгельское житіе́ пожи́въ на земли́, съ ни́миже и воспѣ́лъ еси́: благослове́нъ Бо́гъ оте́цъ на́шихъ.

Воспѣва́ютъ благода́рственная вси́ окре́стныя страны́ Басарбо́вскія, иму́ще тя́ въ себѣ́ граждани́на, прему́дре, и хва́лящеся взыва́ютъ ко Го́споду: благослове́нъ Бо́гъ оте́цъ на́шихъ.

Непреста́нно моли́ся о на́съ, Дими́тріе богому́дре, и прилѣ́жно проси́, да всегда́ ревну́юще тебѣ́, плоды́ добродѣ́телей прино́симъ, и любо́вію зове́мъ: благослове́нъ Бо́гъ оте́цъ на́шихъ.

Богоро́диченъ: Дѣ́во Чи́стая, Неискусобра́чная, Свята́я, Благослове́нная, па́дшихъ исправле́ніе, согрѣша́ющихъ исправле́ніе, спаси́ мя блу́днаго, спаси́, Сы́ну Твоему́ зову́ща: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Со весе́ліемъ, преподо́бне, ли́ки святы́хъ пречи́стую твою́ ду́шу причто́ша въ мѣ́стѣ упокое́нія, иду́щу въ селе́нія свѣ́тлая, идѣ́же ли́ки пра́ведныхъ водворя́ются, съ ни́миже ны́нѣ пое́ши: свяще́нницы, благослови́те, лю́діе, превозноси́те Христа́ во вѣ́ки.

Самоизво́льно труда́ми порабо́тивъ себе́, посто́мъ и бдѣ́ніемъ тѣ́ло твое́ удруча́я, о преблаже́нне, я́ко да лука́ваго врага́ и губи́теля ро́да человѣ́ческаго во вся́ смири́ши, сего́ ра́ди вѣне́цъ побѣ́ды нося́, съ весе́ліемъ пое́ши: вся́ дѣла́ Го́спода по́йте и превозноси́те во вся́ вѣ́ки.

Ра́достно па́мять твою́ соверша́емъ, прехва́льне: въ добродѣ́тель бо радостотво́рну обле́клся еси́ и́стинно, въ ри́зу спасе́нія, и во оде́жду чи́сту и свѣ́тлу весе́лія, е́юже ны́нѣ красу́яся, пое́ши непреста́нно: лю́діе, превозноси́те Христа́ во вѣ́ки.

Богоро́диченъ: Неискусобра́чно родила́ еси́ и дѣ́вою пребыла́ еси́, и стра́ннымъ рождество́мъ Твои́мъ совокупи́ла еси́ вся́, дре́внюю вражду́ ро́да на́шего примиря́я, Христа́ мирода́вца носи́вшая во объя́тіихъ Твои́хъ, Его́же вѣ́рно благословя́ще, любо́вію пое́мъ Тя́, еди́ну Богоро́дицу.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Благоуха́етъ ра́ка твоя́ духо́внымъ благово́ніемъ изоби́льно, веселя́ ча́да твоя́, окружа́ющая тя́ со усе́рдіемъ, и́же прославля́ютъ а́нгелы житіе́ твое́, да́нную тебѣ́ свѣ́тлость, сла́ву же и красоту́ пребыва́ющую.

Свѣ́тъ святы́хъ на небесѣ́хъ тебѣ́, я́ко пра́веднику, возсія́, о́тче: Христа́ бо пра́вду и́стинну явле́ннѣйше возлюби́лъ еси́, Его́же испыту́я житіе́, послѣ́довалъ еси́, преблаже́нне, по возмо́жности твое́й, жизноно́сной Его́ святы́нѣ.

Мно́гимъ свѣ́томъ сія́я, богоно́се, и ли́ки а́нгелъ зря́ пресвѣ́тле, обходя́ща о́крестъ Тро́ичнаго Свѣ́та, и пріе́млюща благода́ть боговидѣ́нія, непреста́нно моля́ся дарова́ти оставле́ніе грѣхо́въ пою́щимъ тя́.

Богоро́диченъ: Яви́лася еси́, о Дѣ́во Ма́ти Бо́жія, па́че естества́ ро́ждши пло́тію Сло́во, Его́же отъ се́рдца Своего́ Оте́цъ позна́ пре́жде всѣ́хъ вѣ́къ, я́ко Бла́гъ, Его́же ны́нѣ и превы́шше пло́ти вѣ́мы, а́ще и въ пло́ть облече́ся.

Свѣти́ленъ. Подо́бенъ: Жены́ услы́шите.

Отъ руки́ Зижди́телевы воспрія́лъ еси́, преподо́бне, вѣне́цъ трудо́въ твои́хъ, и во оби́тели пра́ведныхъ водворя́ешися, Дими́тріе, зрѣ́нія лица́ Влады́чня, и трисвята́го а́нгельскаго пѣ́нія наслажда́яся.

Сла́ва: му́ченика. И ны́нѣ, богоро́диченъ:

Тебе́ проро́цы вси́, Дѣ́во, именова́ша ковче́гъ, ру́чку, купину́ и скрижа́ли, злату́ю кади́льницу, же́злъ, и трапе́зу, и свѣ́щникъ, и го́ру несѣко́му; мы́ же по достоя́нію, Богоро́дице, хва́лимъ Тя́, Блаже́нная.

На хвали́техъ стихи́ры на 4, гла́съ 1. Подо́бенъ: Небе́сныхъ чино́въ.

Бди́тель ни́жнихъ, и вы́шнихъ люби́тель, и пусты́нный граждани́нъ, Дими́трій прему́дрый всѣ́хъ на́съ собра́, да пра́зднуемъ вѣ́рно преставле́ніе его́ е́же къ Бо́гу, и спаси́тельный де́нь.

Внѣ́ тѣ́ла и мíра добродетѣ́льми бы́въ, и тѣ́ми прославля́я на земли́ житіе́мъ Го́спода Сла́вы, о́тче прему́дре, досто́йно просла́вился еси́, и яви́лся еси́ отъ Него́ боже́ственный исто́чникъ исцѣле́ній, Дими́тріе.

Смире́нъ, незло́бивъ, кро́токъ, неле́стенъ и ти́хъ бы́въ, о́тче, па́че человѣ́ка вои́стинну, въ тлѣ́нномъ тѣлеси́ нетлѣ́ненъ хра́мъ Бо́гу досто́инъ сотвори́лся еси́, отъ Него́ пріе́мля дарова́нія исцѣле́ній, и на́мъ подава́я при́сно.

Нача́ло до́брымъ испе́рва ви́дѣнъ бы́лъ еси́ и вино́вникъ спасе́нію, Дими́тріе о́тче: житіе́ бо изъ младе́нства обѣща́лъ еси́ Христу́ Бо́гу на́шему, Его́же моли́ дарова́ти на́мъ ми́ръ и ве́лію ми́лость.

Сла́ва, гла́съ 2:

Преподо́бне о́тче, изъ младе́нства добродѣ́тели прилѣ́жно обучи́вся, орга́нъ бы́лъ еси́ Свята́го Ду́ха, и отъ Него́ пріе́мъ чуде́съ дѣ́йство, увѣща́лъ еси́ человѣ́ки преоби́дѣти сла́дкая; ны́нѣ же, Боже́ственнымъ свѣ́томъ чистѣ́е осіява́емь, просвѣти́ и на́ша мы́сли, о́тче Дими́тріе.

И ны́нѣ, богоро́диченъ:

Все́ упова́ніе мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ.

Славосло́віе вели́кое, [ектеніи́] и отпу́стъ.



НА ЛИТУРГІИ,

Блаже́нна отъ кано́на [преподо́бнаго], 3-я и 6-я пѣ́снь. [Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́?] Апо́столъ, къ Гала́томъ, зача́ло 213. [Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе отъ Матѳе́я, зача́ло 43. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Коне́цъ и Бо́гу сла́ва.

Источникъ: Служби на българските светии. — Света Гора, Атон: Славянобългарски манастир «Св. Вмчк Георги Зограф», 2007. — Л. 511-521.

/ Къ оглавленію раздѣла /


Наверхъ / Къ титульной страницѣ

0