Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 27-й де́нь.
Слу́жба преподо́бному Не́стору Лѣтопи́сцу, Пече́рскому.

ВЕЧЕРЪ,
На Го́споди воззва́хъ: стихи́ры, гла́съ 4. Подо́бенъ: Яко до́бля.

Словеси́ боже́ственныхъ писа́ній,* по́двиги а́нгельски пожи́вшихъ* въ кни́гу нелѣ́ностно напису́я,* написа́лъ еси́ въ кни́зѣ се́рдца твоего́* па́мять бу́дущаго воздая́нія,* тѣ́мъ и́мя твое́ и́маши напи́сано* въ кни́зѣ живо́тнѣй;* но, о блаже́ннѣйшій о́тче, моли́ о на́съ,* да и мы́ обря́щемся въ кни́зѣ живо́тнѣй напи́санни,* чту́щіи твоея́ любве́ воспомина́ніе.

Прему́дрости духо́вныя ра́зумъ* имѣ́ти хотя́, преподо́бне,* прише́лъ еси́ къ вели́кимъ отце́мъ,* отъ ни́хже научи́лся еси́ небе́сныхъ разумѣ́ній;* тѣ́мъ а́нгельски во пло́ти пожи́въ,* просія́лъ еси́, я́ко мы́сленное у́тро,* и ны́нѣ, сы́нъ дне́ и прича́стникъ свѣ́та су́щи,* не преста́й, прилѣ́жно моля́щи,* отъ тли́ и бѣ́дъ изба́витися,* вѣ́рою пою́щимъ* всечестну́ю па́мять твою́.

Сла́ва, гла́съ 6:

Скрижа́ль Ду́ху Свято́му угото́вавъ се́рдце твое́, Не́сторе о́тче на́шъ, ду́шу твою́ украси́лъ еси́ чистото́ю и смире́ніемъ, избра́ніемъ во́льныя нищеты́, бдѣ́ніемъ, и послуша́ніемъ, и моле́ніемъ непреста́ннымъ, и написа́лъ еси́ тро́стію цѣлому́дрія своего́, святолѣ́пная житія́ первонача́льныхъ оте́цъ Пече́рскихъ, непреста́нное жела́ніе имѣ́я къ Бо́гу, обрѣ́лъ еси́, Его́же иска́лъ. И ны́нѣ, я́ко сца́рствуя Безконе́чному Свѣ́ту, моли́ спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ.

На стихо́внѣ въ окто́ихѣ. Сла́ва, гла́съ 5:

Проро́ческое рече́ніе испо́лнилъ еси́, Не́сторе преподо́бне, возвѣща́я на́мъ писа́ніемъ дѣла́ Бо́жія, глаго́ля съ Дави́домъ въ псалмѣ́: помяну́хъ дѣла́ Госпо́дня и отъ нача́ла чудеса́ Твоя́, Бо́же, я́же въ нача́лѣ оби́тели Твоея́ Ма́тере ви́дѣвъ, почуди́хся, позна́нну творю́ послѣ́днему ро́ду въ преподо́бныхъ си́лу Твою́; сію́ мы́ отъ твои́хъ писа́ній, преблаже́нне, уви́дѣвше, лобыза́емъ труды́ твоя́, ублажа́емъ пѣ́сньми па́мять твою́, и въ вы́шнихъ Су́щему псало́мское пѣ́ніе прино́симъ: Ты́ еси́ Бо́гъ, творя́й чудеса́.

И ны́нѣ, богоро́диченъ по гла́су или́ крестобогоро́диченъ.



[НА УТРЕНИ,]
Кано́нъ свято́му, гла́съ 4.

Пѣ́снь 1.

Ирмо́съ: Ли́цы изра́ильтестіи, невла́жными стопа́ми по́нтъ Чермны́й и вла́жную глубину́ прогна́вше, вса́дники триста́ты враги́ ви́дяще въ не́й погруже́ны, съ весе́ліемъ поя́ху: пои́мъ Бо́гу на́шему, я́ко просла́вися.

Ли́цы и́ночестіи, въ лѣ́тней па́мяти богоно́снаго отца́ стеци́теся усе́рдно къ святѣ́й пеще́рѣ, и любо́вію кла́няющеся ра́цѣ моще́й Не́стора любому́драго, воспо́йте Бо́гу, я́ко во святы́хъ Свои́хъ сла́вно просла́вися.

Лико́мъ и́ноческимъ сочета́ющуся и въ дне́шній де́нь па́мять твою́ воспѣ́ти дерза́ющу, мнѣ́, па́че всѣ́хъ грубѣ́йшему, моли́твами твои́ми спосо́бствуй, Не́сторе свя́те, Бо́гъ бо въ тебѣ́ ди́вно просла́вися.

Лико́мъ а́нгельскимъ причте́нъ бы́ти хотя́й, лико́мъ равноа́нгельнымъ во пло́ти причта́лся еси́, о́тче, отъ ни́хже а́нгельскому житію́ научи́вся, возше́лъ еси́ къ у́мному жела́нію: тѣ́мже тя́ чти́мъ, я́ко Бо́гъ въ тебѣ́ ди́вно просла́вися.

Богоро́диченъ: Ли́ки святы́хъ и преподо́бныхъ оте́цъ съ ли́ки а́нгельскими предстоя́ще, сла́вите Ро́ждшую всѣ́хъ святы́хъ Святѣ́йшее Сло́во; сла́вити же дне́сь Бо́жію Ма́терь, и на́мъ земны́мъ помози́те, Та́ бо отъ всѣ́хъ ди́вно просла́вися.

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Предложе́ніе твоего́ ума́ бѣ́, а́ки лу́къ напряже́нъ, о́тче, живы́й бо во юдо́лѣ се́й плаче́вной, восхожде́ніе имѣ́лъ еси́ въ се́рдцѣ свое́мъ вы́ну къ Бо́гу; и мнѣ́ у́бо, жи́знь свою́ веду́щу вы́ну въ печа́лехъ, Не́сторе, помози́, моля́ся о мнѣ́, да возвесели́тся о Го́сподѣ се́рдце мое́.

Седмьнадесятолѣ́тенъ сы́й, мы́сленнѣ прія́лъ еси́ му́жа соверше́нна во́зрастъ: просія́лъ бо еси́, а́ки въ ста́рческихъ сѣди́нахъ, дѣ́лы благи́ми, сія́ и во мнѣ́ испра́ви, блаже́нне, и возвесели́тся о Го́сподѣ се́рдце мое́.

Чистоту́ и смире́ніе глубо́ко къ нищетѣ́ пріе́мь, возлетѣ́лъ еси́, свя́те, а́ки крило́ма, на го́ру и́ноческихъ добродѣ́телей; отню́дуже, усмотри́въ въ мгнове́ніи о́ка преходя́щъ мíра сего́ о́бразъ, и па́че въ любо́вь Бо́жію впери́лъ еси́ се́рдце твое́.

Богоро́диченъ: Са́дъ чистоты́ Ро́ждшая, плодо́мъ сего́, вѣ́рующихъ Тя́ бы́ти Ма́терь Бо́жію, напита́ла еси́ оби́льно; и мнѣ́ у́бо, вѣ́рою покланя́ющемуся Тебѣ́, Богоневѣ́стная Дѣ́во, да́ждь отъ сего́ плода́ поне́ ма́ло вкуси́ти, да печа́льное возвесели́тся се́рдце мое́.

Сѣда́ленъ, гла́съ 4:

Отъ вели́кихъ оте́цъ упра́вленъ въ благíя нра́вы и въ ю́ности ве́сь Бо́гови присоедини́вся, плотскíя по́хоти умертви́лъ еси́ поще́ніемъ крѣ́пкимъ, ду́хъ оживи́лъ еси́ наде́ждою бла́гъ вѣ́чныхъ; а́нгельски на земли́ пожи́въ, со а́нгелы ны́нѣ водворя́ешися, тѣ́мъ тя́ почита́емъ, Не́сторе блаже́нне.

Сла́ва, и ны́нѣ, богоро́диченъ:

Стра́шныхъ чуде́съ несказа́нный о́бразъ ви́жду въ Тебѣ́, Пречи́стая Дѣ́во, я́ко Бо́га зачала́ еси́ и Необыме́ннаго объя́ла еси́ утро́бою Твое́ю, но какова́ се́ бы́сть та́йна, не испыту́ю, па́че же вѣ́рую и со стра́хомъ ублажа́ю Тя́, пою́щи: ра́дуйся, Бо́га Невмѣсти́маго простра́нное селе́ніе.

Пѣ́снь 4.

Ирмо́съ: Услы́шахъ сла́вное смотре́ніе Твое́, Христе́ Бо́же, я́ко роди́лся еси́ отъ Дѣ́вы, да отъ ле́сти изба́виши зову́щія: сла́ва си́лѣ Твое́й, Го́споди.

Услы́шавъ сла́вная и преди́вная на горѣ́ Пече́рской, прише́лъ еси́ та́мо, преподо́бне, и ви́дѣвъ съ огне́мъ и росо́ю низходя́щую благода́ть Бо́жію въ нача́лѣ основа́нія це́ркве, ю́нъ еще́ сы́й, со ста́рцы воспѣ́лъ еси́: сла́ва си́лѣ Твое́й, Го́споди.

Бо́льшую и соверше́ннѣйшую въ души́ твое́й ски́нію творя́ Ду́ху Свято́му, любе́знымъ воспрія́тіемъ за́повѣди отъ богоно́сныхъ оте́цъ позлати́лъ еси́ о́ну, Не́сторе свя́те: тѣ́мъ, я́ко въ кра́сный черто́гъ, пріи́де и оби́тель въ тебѣ́ сотвори́ Оте́цъ съ Сы́номъ и Ду́хомъ.

Аки сла́дкое млеко́, уче́ніе оте́цъ богоно́сныхъ пріе́мь, сло́во дѣ́ломъ испо́лнилъ еси́, блаже́нне, и испо́лненъ бы́лъ еси́ вы́шнія Прему́дрости, ю́же и мы́ отъ писа́ній твои́хъ чту́ще, увеселя́емъ ду́ши на́ша вѣ́дѣніемъ на си́хъ гора́хъ бы́вшія Бо́жія благода́ти.

Богоро́диченъ: Сла́дкое млеко́ покая́нія и не́ктаръ небе́сный умиле́нія пѣ́сни любо́вію Тебѣ́ принося́щимъ, подае́ши, Чи́стая Отрокови́це, я́же и а́зъ, стра́хомъ одержи́мь, любо́вію же дви́жимь, приношу́ Ти, Влады́чице, и молю́: услади́ се́рдце мое́, Сла́дкаго Іису́са Христа́ моего́ ро́ждшая.

Пѣ́снь 5.

Ирмо́съ: Отъ свѣ́та пресѣкíй перворо́дный свѣ́тъ, я́ко во свѣ́тѣ дѣла́ пою́тъ Тя́, Христе́, Содѣ́теля, во свѣ́тѣ Твое́мъ пути́ на́ша напра́ви.

Отъ любве́ ле́стнаго мíра удали́вся, жела́ніемъ вожделѣ́лъ еси́, Не́сторе, вели́кихъ оте́цъ стопа́мъ, нра́вомъ и уче́ніямъ послѣ́довати: си́мъ да́ждь и на́мъ прилѣжа́ти, и во свѣ́тѣ дѣя́ній о́ныхъ, моли́твами твои́ми, пути́ на́ша напра́ви.

Глубо́кимъ смире́ніемъ огражде́нъ сы́й, преподо́бне, высото́ю тщесла́вія ходя́щаго врага́ низве́ргъ, нога́ми попра́лъ еси́; хода́тайствомъ твои́мъ къ Бо́гу, о́тче, да́ждь и на́мъ смире́ніе и во о́номъ стопы́ на́ша напра́ви.

Ангельски жи́знь свою́ упра́вльша, вси́ тя́, а́ки а́нгела Бо́жія, имѣ́яху; тѣ́мъ и на діа́конскій степе́нь взы́ти сподо́бился еси́, въ не́мже до́брѣ ше́ствіе свое́ упра́вивъ, и на́ша пути́ во святы́ни, Не́сторе, упра́ви.

Богоро́диченъ: Пу́ть ро́ждшая Жи́зни, Всесвята́я Дѣ́во, стезя́ми собла́знъ ходя́щихъ, я́ко Милосе́рдая, наставля́еши на стези́ пра́вды; и мене́, заблу́ждающаго, Влады́чице, не пре́зри, но я́ко ро́ждшая Наста́вника заблу́ждшимъ, во свѣ́тѣ Его́ пути́ моя́ напра́ви.

Пѣ́снь 6.

Ирмо́съ: Внегда́ скорбѣ́ти ми́, возопи́хъ ко Го́споду, и услы́ша мя́ Бо́гъ спасе́нія моего́.

Въ преподо́біи и пра́вдѣ чи́нъ сво́й управля́я, хра́мъ Ду́ху Свято́му ве́сь сотвори́лся еси́, и вше́дъ въ хра́мъ нерукотворе́нный, престо́лу Вы́шняго предстои́ши; и мнѣ́, хотя́щему бы́ти та́мо, моли́твами твои́ми, о́тче, помози́, молю́ тя, моли́твенника спасе́нія моего́.

Кра́снаго са́да Дѣ́лателя Небе́снаго кра́сное бы́лъ еси́ прозябе́ніе, кра́сными бо дѣ́лы укра́шенъ, благíя плоды́, и́хже ны́нѣ благоуха́ніе обоня́емъ, возрасти́лъ еси́; молю́ у́бо тя́, блаже́нне, пода́ждь сія́ въ да́ръ и мнѣ́ отъ Бо́га Спа́са моего́.

Отъ труда́ по́двиговъ твои́хъ, Не́сторе преподо́бне, мно́гія изли́въ по́ты, напои́лъ еси́ ни́ву души́ твоея́, и израсти́въ добродѣ́телей кла́сы, пожина́еши ны́нѣ рукоя́ти, живы́й во вѣ́ки въ небе́сныхъ кро́вѣхъ, въ ни́хже и мнѣ́ бы́ти моли́ Христа́ Спа́са моего́.

Богоро́диченъ: Насѣ́янная Ду́хомъ Отчимъ земле́ свята́я, ра́дуйся, я́ко прозябла́ еси́ на́мъ Дре́во благосѣнноли́ственное; зно́емъ мя́ страсте́й опале́нна подъ сѣ́нь о́наго приведи́, Влады́чице, молю́ Тя́ я́ко Хода́таицу спасе́нія моего́.

Конда́къ, гла́съ 2:

Яко сы́й богоно́снаго Ѳеодо́сія учени́къ и и́стинный житія́ того́ подража́тель, пе́рвый честны́хъ его́ моще́й самови́децъ бы́ти сподо́бился еси́, я́же съ про́чіими святолѣ́пно прене́съ, наслѣ́дилъ еси́ съ тѣ́мижде Ца́рство небе́сное, е́же получи́ти и на́мъ, чту́щимъ тя́, Го́сподеви моли́ся.

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Авраа́мовымъ стопа́мъ послѣ́дуя, свя́те, исполне́ніемъ за́повѣдей прине́слъ еси́, я́коже о́нъ Исаа́ка, чи́стъ у́мъ Влады́цѣ, сего́ ра́ди отъ жи́зни сея́ преше́лъ еси́ въ зе́млю, точа́щую безконе́чную сла́дость, идѣ́же и мнѣ́ моли́ бы́ти, Не́сторе, собесѣ́дниче богоно́сныхъ оте́цъ на́шихъ.

Отъ стра́стнаго мíра сего́ преста́влься, преше́лъ еси́ въ безстра́стный мíръ, идѣ́же въ ми́рѣ съ сына́ми ми́ра живы́й, и на́съ, въ мíрѣ се́мъ су́щихъ, не отступа́й, моля́ Творца́ своего́, да соприча́стницы тебѣ́ бу́демъ, пою́ще: Бо́же, благослове́нъ еси́.

Не уклони́лъ еси́ се́рдца своего́ въ словеса́ лука́вствія въ жи́зни се́й многомяте́жной, преподо́бне, тѣ́мъ и возду́шныхъ духо́въ лука́вствія безмяте́жно проше́дъ, къ небе́снымъ врато́мъ доспѣ́лъ еси́: я́же и на́мъ отве́рзти потщи́ся моли́твами твои́ми, я́ко благослове́нъ еси́.

Богоро́диченъ: Уклони́хся отъ стези́ пра́вды и не хожда́хъ нога́ма мои́ма на пути́ пра́вы, но на стремни́нахъ страсте́й заблужда́ющи, уязви́хъ плеснѣ́ мои́ те́рніемъ грѣха́, оба́че и храмля́я, притѣка́ю къ Твое́й бла́гости и молю́ся: Влады́чице, исцѣли́ мя, Ты́ бо еси́ души́ моея́ врачева́ніе.

Пѣ́снь 8.

Ирмо́съ: Въ Вавило́нѣ о́троцы, боже́ственною распала́еми ре́вностію, мучи́теля и пла́мене преще́ніе му́жески попра́ша, и посредѣ́ огня́ вве́ржени, ороша́еми, поя́ху: благослови́те, вся́ дѣла́ Госпо́дня, Го́спода.

Си́лою духо́вною укрѣпле́нъ, прелетѣ́лъ еси́, богому́дре, крило́ма твои́хъ добродѣ́телей къ го́рнимъ, и по лѣ́техъ си́хъ живе́ши ны́нѣ, идѣ́же лѣ́та не оскудѣва́ютъ, къ ни́мже и на́мъ доспѣ́ти моли́, пою́щимъ: благослови́те вся́ дѣла́ Госпо́дня Го́спода.

Отъ до́му Бо́жія Ма́тере преше́лъ еси́, Не́сторе, въ До́мъ Бо́жій, всесвѣтя́щійся Іерусали́мъ, и а́нгеломъ въ числѣ́ гра́жданъ небе́сныхъ сожи́тельствуя, хода́тайствуй и на́мъ тѣ́мжде причте́ннымъ бы́ти, въ па́мяти твое́й пою́щимъ пѣ́сньми Го́спода.

Тро́иченъ: Тро́ическое еди́но естество́: Отче, и Сы́не, и Ду́ше Святы́й, еди́но ца́рство, си́лу и вла́сть иму́щее, на́съ отъ вла́сти кня́зя тмы́ изба́ви, моли́твами богоно́сныхъ оте́цъ на́шихъ Пече́рскихъ, съ ни́миже и Не́стора приво́димъ Ти́ въ моли́тву дне́сь, благословя́ще Тя́ во вѣ́ки, Го́спода.

Богоро́диченъ: Тро́ическому предстоя́щи престо́лу, Ма́ти Дѣ́во, и сла́ву Тріѵпоста́снаго Божества́ вы́ну зря́щи, моли́ся за ны́ грѣ́шныя, да и мы́ небе́сныя сла́вы не лиши́мся, пѣ́сньми Тя́ сла́вяще и изъ Тебе́ ро́ждшагося Го́спода.

Пѣ́снь 9.

Ирмо́съ: Рождество́ Твое́ нетлѣ́нно яви́ся: Бо́гъ изъ боку́ Твое́ю про́йде, я́ко плотоно́сецъ яви́ся на земли́ и съ человѣ́ки поживе́. Тя́, Богоро́дице, тѣ́мъ вси́ велича́емъ.

Отше́лъ еси́ въ селе́нія пра́ведныхъ и ду́хомъ предстои́ши Присносу́щному Свѣ́ту; при́зри у́бо на ны́, живу́щія въ се́лѣхъ многомяте́жнаго мíра, и посо́бствуй су́щимъ во бра́нѣхъ, Не́сторе блаже́нне, я́ко пѣ́сньми тя́ ны́нѣ велича́емъ.

Съ ни́миже любо́вь стяжа́лъ еси́ живы́й тѣ́ломъ, съ си́ми, и ду́хомъ изше́дъ, сожи́тельствуеши не отлуче́нъ, я́коже показу́ютъ мо́щи твоя́, преподо́бне, со святы́ми въ пеще́рѣ лежа́щія, съ ни́миже предста́ни о на́съ моля́щися Бо́гу, па́мять твою́ велича́ющихъ.

Лю́битъ ми́лость и и́стину Госпо́дь, и ты́, преблаже́нне, подо́бяся Тому́, ми́лостивый бу́ди хода́тай о спасе́ніи на́шемъ, да тебе́ ра́ди и мы́, обрѣ́тше благода́ть, не отпаде́мъ вѣ́чныя сла́вы, я́ко успе́ніе твое́ свято́е пѣ́сньми велича́емъ.

Богоро́диченъ: Лю́битъ всѣ́хъ Влады́ка хода́тайство Твое́, Пречи́стая Дѣ́во, и моли́твы Твоя́ о человѣ́честѣмъ ро́дѣ пріе́млетъ; моли́ся у́бо и о на́съ, рабѣ́хъ Твои́хъ, Всецари́це, да улучи́мъ ми́лость въ де́нь Су́дный, вы́ну бо Тебе́ я́ко Хода́таицу, кла́няющеся, велича́емъ.

На стихо́внахъ въ окто́ихѣ. Сла́ва, гла́съ 2:

Предочи́стився и́ноческими дѣя́ніи, преподо́бне, сосу́дъ че́стенъ сотвори́лся еси́ Ду́ха Свята́го: отъ Него́же прія́лъ еси́ благода́ть неоску́дну, всѣ́мъ съ вѣ́рою къ тебѣ́ притѣка́ющимъ, посо́бствовати въ ско́рбехъ. И ны́нѣ у́бо на́мъ, къ ра́цѣ моще́й твои́хъ припа́дающимъ, помо́щникъ неотсту́пенъ бу́ди, посо́бствуя неви́димо на борю́щіяся съ на́ми, и моли́ Творца́ всѣ́хъ и Бо́га пода́ти на́мъ грѣхо́въ проще́ніе и ми́лость улучи́ти въ де́нь Су́дный, блажа́щимъ па́мять твою́, Не́сторе богому́дре.

И ны́нѣ, богоро́диченъ или́ крестобогоро́диченъ.

Источникъ: Слу́жбы Преподо́бнымъ отце́мъ Пече́рскимъ, и́хже мо́щы въ Бли́жной и Да́льной пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1785. — Л. 22 об. – 25 об.

/ Къ оглавленію раздѣла /


Наверхъ / Къ титульной страницѣ

0