Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 6.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 27-й де́нь.
Свята́го му́ченика Не́стора [Солу́нскаго].

[ВЕЧЕРЪ,]
На Го́споди воззва́хъ: стихи́ры, гла́съ 8. Подо́бенъ: О, пресла́внаго чудесе́!

Не́сторе, страда́льче чу́дне,* всеору́жіемъ Христо́вымъ* себе́ обложи́лъ еси́,* чу́вственнѣ у́бо Лíю спле́тся,* того́ погуби́лъ еси́,* неви́димыми же неви́димаго стрѣла́ми* веліа́ра ты́ запя́лъ еси́ и умертви́лъ еси́.* Тѣ́мже побѣ́ды вѣнце́мъ твою́ главу́ вѣнча́* Великодарови́тый.

Словесы́ боже́ственными укрѣпля́емь,* Не́сторе му́дре, и́стинно* Дими́трія му́ченика,* го́рдаго мучи́теля му́жески умертви́лъ еси́,* и уме́ршаго и а́дъ разо́ршаго* исповѣ́давъ Бо́га безсме́ртна,* сме́рть непра́ведну подъя́лъ еси́, сла́вне.* Тѣ́мже жи́знь, ра́дуяся,* неконча́емую наслѣ́довалъ еси́.

Боже́ственный ю́ноша бы́лъ еси́,* тѣлесе́ красото́ю, му́дре, сія́я* и благода́тію боже́ственною укра́шенъ,* и си́лою удобре́нъ.* Тѣ́мже Лíеву разори́въ си́лу* си́лою Вседержи́теля,* ра́дуяся, пострада́лъ еси́* и лико́мъ счи́слился еси́ страда́льцевъ,* съ ни́миже, ра́дуяся, на́съ помина́й.

Сла́ва, и ны́нѣ, богоро́диченъ:

Тя́ мо́лимъ, Пречи́стая,* Предста́тельницу на́шу:* смуща́емыя въ печа́лехъ не пре́зри до конца́* поги́бнути рабы́ Твоя́,* но ускори́ изъя́ти ны́* настоя́щаго гнѣ́ва и печа́ли,* о Богора́дованная, Пресвята́я Чи́стая,* Ты́ бо на́ша еси́ стѣна́* и по́мощь необори́мая.

Крестобогоро́диченъ:

Тя́ ви́дящи, пригвожда́ема* на Крестѣ́, Іису́се,* и стра́сти пріе́млюща во́лею,* Дѣ́ва и Ма́ти Твоя́, Влады́ко,* увы́ Мнѣ́, вопія́ше,* Ча́до Сла́дкое!* Ра́ны непра́ведно ка́ко терпи́ши,* Врачу́, исцѣли́вый человѣ́ческое неможе́ніе* и отъ тли́ вся́ изба́вивый милосе́рдіемъ Твои́мъ?

Тропа́рь, гла́съ 4:

Му́ченикъ Тво́й, Го́споди, Не́сторъ во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.


НА УТРЕНИ,
Кано́нъ на 4, гла́съ 4.

Пѣ́снь 1.

Ирмо́съ: Колесни́цы фарао́новы и си́лу его́ вве́рже въ мо́ре Крѣ́пкій во бра́нехъ, воспое́мъ пѣ́снь но́вую, я́ко просла́вися.

На колесни́цу пла́менную твое́ю кро́вію, му́дре, ра́дуяся, всѣ́лъ еси́ и къ небе́снѣй высотѣ́, идѣ́же Іису́съ Безлѣ́тный Свѣ́тъ, съ ра́достію возше́лъ еси́.

Броня́ми мы́сленными вѣ́ры тебе́, Не́сторе, обложи́въ, и кре́стъ, я́ко копіе́, имѣ́я въ рука́хъ, вра́жія крѣ́пко ссѣ́клъ еси́ полки́.

Теплото́ю Христо́вы укрѣпля́емь любве́, вну́трь вскочи́лъ еси́ въ три́знище и вся́ разори́лъ еси́ Лíевы ко́зни, и побѣ́ду побѣди́тельну поста́вилъ еси́.

Богоро́диченъ: Зачала́ еси́ во чре́вѣ Собезнача́льнаго Отцу́ и родила́ еси́, Неискусому́жная, па́че естества́ пло́тію, пребы́вши Дѣ́ва и́стинно, Чи́стая: тѣ́мже Тя́ вси́ почита́емъ.

Пѣ́снь 3.

Ирмо́съ: Утвержда́яй гро́мъ и созида́яй ду́хъ, утверди́ мене́, Го́споди, да Тя́ пою́ и́стинно и творю́ во́лю Твою́, я́ко нѣ́сть свя́тъ, я́ко Ты́, Бо́же на́шъ.

Укрѣпи́вся держа́вою крѣ́пости вереи́ Сокруши́вшаго и а́дова врата́, со тща́ніемъ въ три́знище вше́лъ еси́ и крѣ́пцѣ сокруши́лъ еси́ вра́жія ко́зни.

Ве́тхій пре́лести нача́льникъ подъ нога́ми твои́ми простре́ся, ю́ношески бо къ посѣче́нію просте́рлся еси́ меча́, Не́сторе, му́чениковъ похвало́: тѣ́мже восхваля́емъ тя́.

Предразруши́въ горды́ню пребеззако́нниковъ, Бо́гу поже́рлъ еси́, му́чениче, же́ртву, кро́вь твою́ возме́здіе свяще́нную Тому́ подая́: тѣ́мже ти́ возмзди́ бога́тыми дарова́ньми.

Богоро́диченъ: Еже отъ Ада́ма ро́да безобра́зіе, внесе́нное снѣ́дію, во чре́вѣ Твое́мъ носи́мый Іису́съ, Богоро́дице, преесте́ственно назда́въ, пе́рвую добро́ту подаде́ на́мъ.

Сѣда́ленъ, гла́съ 4. Подо́бенъ: Вознесы́йся.

Не устраши́вся враго́въ томи́тельства, ни ужа́сся плотски́хъ ра́нъ, но безбоя́зненно поте́клъ еси́ къ боре́нію, му́дре, нося́ непобѣди́мое Креста́ боже́ственное ору́жіе. Тѣ́мже, внеза́пу льсти́ваго умертви́въ, умерщвле́нъ бы́лъ еси́, Не́сторе, и жи́зни сподо́бился еси́, Христу́ предстоя́.

Сла́ва, и ны́нѣ, богоро́диченъ:

Грѣхолюби́въ сы́й, молю́ Тя, безгрѣ́шнаго Бо́га ро́ждшую, взе́млющаго грѣхи́ мíра, Пречи́стая: многогрѣ́шную ду́шу мою́ уще́дрити и грѣхи́ моя́ мно́гія очи́стити, грѣ́шныхъ бо Ты́ еси́ очище́ніе и спасе́ніе вѣ́рныхъ, и заступле́ніе.

Крестобогоро́диченъ:

Отъ Безнача́льнаго Отца́ Рожде́ннаго, напослѣ́докъ Тя́ пло́тію Ро́ждшая, на Крестѣ́ ви́сяща зря́щи, Христе́, увы́ Мнѣ́, любе́знѣйшій Іису́се, вопія́ше, ка́ко сла́вимый я́ко Бо́гъ отъ а́нгелъ, отъ беззако́нныхъ ны́нѣ человѣ́къ, Сы́не, хотя́, распина́ешися? пою́ Тя, Долготерпѣли́ве.

Пѣ́снь 4.

Ирмо́съ: Услы́шахъ, Бо́же, слу́хъ Тво́й и убоя́хся, разумѣ́хъ дѣла́ Твоя́ и ужасо́хся, Го́споди, я́ко Твоего́ хвале́нія испо́лнь земля́.

Дими́тріевыми озари́вся свѣтолу́чными уче́ніи, е́ллинскія суеты́ мра́ка отбѣ́глъ еси́, и муче́нія свѣ́томъ облиста́лся еси́.

Невѣ́рія сла́ное возмути́лъ еси́ мо́ре сла́достію твоея́, му́чениче, благíя вѣ́ры, нечести́выхъ во́инства глубино́ю твои́хъ крове́й потопи́лъ еси́.

Воздвиза́емо къ жи́зни яви́лся еси́ дре́во, благопло́діемъ пита́я по́двигъ твои́хъ вѣ́рныхъ полноту́, Не́сторе Христо́въ, му́чениковъ хвала́.

Богоро́диченъ: Очисти́лище мнѣ́ бу́ди грѣхо́въ и да́ждь мнѣ́ ру́ку по́мощи, бѣ́дствующему, Всесвята́я Влады́чице, христіа́нъ тве́рдое заступле́ніе.

Пѣ́снь 5.

Ирмо́съ: Утро свѣ́тлое на́мъ посли́ я́ко Бла́гъ и наста́ви ны́ въ стра́хъ Тво́й, Влады́ко.

Словесы́ боже́ственнаго ра́зума по́мыслъ напои́въ, муче́нія кла́съ зрѣ́лъ, сла́вне Не́сторе, израсти́лъ еси́.

Исцѣле́ніемъ слове́съ твои́хъ, о Дими́тріе, му́чениче Христо́въ, безбо́жія беззако́ніе вели́кое Не́сторъ уста́вилъ е́сть.

Ко врагу́ ви́димому спле́тся, Бо́жію неви́димо по́мощь стяжа́лъ еси́, Не́сторе сла́вне.

Богоро́диченъ: Ра́дуйся, Ро́ждшая Бо́га на́шего безъ сѣ́мене; ра́дуйся, еди́на Богома́ти Пречи́стая; ра́дуйся, Невѣ́сто неневѣ́стная.

Пѣ́снь 6.

Ирмо́съ: Бу́ря мя́ помышле́ній пости́гши, во глубину́ низвлачи́тъ мя́ безмѣ́рныхъ грѣхо́въ, но Ты́, Упра́вителю Благíй, предвари́въ, упра́ви, я́ко проро́ка, и спаси́ мя.

Печа́тію назна́менавъ твое́ се́рдце, до́блественно уязви́лъ еси́ му́жества твоего́ копіе́мъ, се́рдце Лíево, страда́льче. И, ра́дуяся, умерщвля́ешися за всѣ́хъ Жи́знь, Іису́са.

Яко жени́хъ, отъ черто́га пло́ти твоея́, му́дре, изше́лъ еси́, оде́ждами, истка́нными отъ крове́й твои́хъ, му́чениче, свяще́нныхъ, я́сно украша́емь, и Влады́цѣ предста́лъ еси́ Христу́.

Возвы́сивъ на ка́мени твоя́ но́ги благоче́стія, поста́ви Христо́съ Жи́зни ка́мень и напра́ви, Не́сторе, къ Себѣ́ стопы́ твоя́ и враги́ твоя́ посрами́.

Богоро́диченъ: Расто́ргни плени́цы мои́хъ прегрѣше́ній, Яже Бо́га ро́ждшая, взе́млющаго мíра грѣ́хъ, Дѣ́во Марíе, на Тя́ бо наде́жду спасе́нія возложи́хъ.

Конда́къ, гла́съ 2. Подо́бенъ: Вы́шнихъ ища́.

Страда́льчествовавъ до́брѣ, безсме́ртную сла́ву наслѣ́довалъ еси́ ны́нѣ, я́ко во́инъ изря́дный Влады́ки бы́лъ еси́, моли́твами Дими́трія му́ченика: съ ни́мъ у́бо, Не́сторе му́дре, моля́ не преста́й о всѣ́хъ на́съ.

Икосъ:

Въ пу́ть Госпо́день отъ младе́нства ше́ствовалъ еси́, треблаже́нне, и Того́ благоче́стно свидѣ́тельствъ возжелѣ́лъ еси́, и кре́стъ на ра́мена, Не́сторе богому́дре, усе́рдно взе́мъ, пре́лесть лю́тую идолонеи́стовства разори́лъ еси́, сокруши́въ и сте́ръ Лíевы ко́зни и ловле́нія. Тѣ́мже вѣ́рою притека́емъ въ тво́й кро́въ, вопію́ще: пребога́те, моли́ Христа́ Бо́га о всѣ́хъ на́съ.

Пѣ́снь 7.

Ирмо́съ: Глаго́лавый на горѣ́ съ Моисе́омъ и о́бразъ дѣ́вства явле́й въ купинѣ́, благослове́нъ еси́, Бо́же оте́цъ на́шихъ.

Озари́вый вѣ́рныхъ сердца́ заре́ю подвиго́въ страстоте́рпца, благослове́нъ еси́, Го́споди, Бо́же оте́цъ на́шихъ.

Нече́стія угаси́въ пла́мень росо́ю крове́й твои́хъ, боже́ственный му́чениче Не́сторе, пое́ши: благослове́нъ еси́, Го́споди, Бо́же оте́цъ на́шихъ.

Же́ртву жи́ву въ воню́ благово́нія Го́споду прине́съ, му́чениче Не́сторе, благослове́нъ еси́, взыва́лъ еси́, Го́споди, Бо́же оте́цъ на́шихъ.

Богоро́диченъ: Святѣ́йши херуви́мъ яви́лася еси́, ро́ждшая Пресвято́е Бо́га Сло́во, Всесвята́я Влады́чице, на́съ освяща́ющаго.

Пѣ́снь 8.

Ирмо́съ: Земля́ и вся́, я́же на не́й, мо́ре и вси́ исто́чницы, небеса́ небе́съ, свѣ́тъ и тма́, мра́зъ и зно́й, сы́нове человѣ́честіи, свяще́нницы, благослови́те Го́спода и превозноси́те Его́ во вѣ́ки.

Земля́ кро́вь твою́ честну́ю прія́тъ, пролія́вшуюся за Христа́, небеса́ же ду́шу, я́коже невѣ́сту укра́шену, му́чениковъ же ли́цы и пра́ведныхъ всѣ́хъ ду́си ра́достію срѣто́ша тя́, му́чениче.

О, души́ твоея́ боголюби́выя, сме́рть привре́менную въ ничто́же вмѣни́вшія, но е́же жи́ти въ Го́сподѣ избра́вшія! О, боже́ственнаго му́жества, нему́жества враго́въ крѣпча́йша! Не исповѣ́дающихъ бо Христа́ обличи́лъ еси́.

По́двигомъ твои́мъ до́брымъ подвиза́вся, тече́ніе и́стинно, му́чениче, сконча́лъ еси́, му́дре, и соблю́лъ еси́ твою́ вѣ́ру; про́чее тебѣ́ вѣне́цъ пра́вды лежи́тъ, его́же тебѣ́ пода́стъ Христо́съ во вѣ́ки.

Богоро́диченъ: Не убою́ся враго́въ ловле́ній, Тя́ имѣ́я по́мощь, не убою́ся злы́хъ, къ Тебѣ́ прите́къ, Богороди́тельнице, въ Тебѣ́ бо хвалю́ся и въ Тебѣ́ пре́йду, Чи́стая, стѣ́ну грѣха́, спа́сся моли́твами Твои́ми.

Пѣ́снь 9.

Ирмо́съ: Яко сотвори́ Мнѣ́ вели́чія Си́льный и свя́то и́мя Его́, и ми́лость Его́ въ ро́дъ и ро́дъ боя́щимся Его́.

Багряни́цу, отъ кро́ве твоея́ очервле́ну, свяще́нно одѣ́ялъ еси́, и держа́ въ десни́цѣ, я́коже ски́птръ, кре́стъ, ца́рствуеши со Христо́мъ, Не́сторе блаже́нне.

Зрѣ́лъ гро́здъ яви́лся еси́ лозы́ мы́сленныя, точи́лы же муче́нія изгнѣ́тся, умиле́нія на́мъ вино́ источи́лъ еси́, при́сно хва́лящимъ тя́.

Лику́я со а́нгелы предъ лице́мъ Іису́совымъ и сла́вы насыща́яся Того́, творя́щихъ твою́ вѣ́рно, Не́сторе, па́мять честну́ю при́сно помина́й.

Богоро́диченъ: Свѣ́та яви́лася еси́ прія́телище, разори́вшаго мглу́ дре́вняго неразу́мія и́стинно, свяще́нія хра́мъ, златы́й свѣти́льникъ, небе́съ вы́шши, Чи́стая.

Свѣти́ленъ. Подо́бенъ: Жены́, услы́шите.

Безбо́жнаго велича́ніе и вра́жію горды́ню Креста́ си́лою и моли́твами Дими́трія, сла́внаго му́ченика, низложи́лъ еси́, пе́рвѣе, Не́сторе, стра́сти побѣди́въ, и му́ченикъ изря́денъ яви́лся еси́ Христо́въ, му́дре страда́льче.

Сла́ва, и ны́нѣ, богоро́диченъ:

Яко ору́жіе непобѣди́мое и стѣ́ну необори́му, и сто́лпъ вся́кія крѣ́пости, и спасе́нія приста́нище, и боже́ственное основа́ніе вои́стинну, и мо́стъ, преводя́й отъ земли́ къ небе́снымъ, пое́мъ Тя́, Богоро́дице, Тобо́ю спаса́еміи.


НА ЛИТУРГІИ,

Проки́менъ, гла́съ 4: Святы́мъ, и́же су́ть на земли́ Его́, удиви́ Госпо́дь вся́ хотѣ́нія Своя́ въ ни́хъ. Сти́хъ: Предзрѣ́хъ Го́спода предо мно́ю вы́ну, [я́ко одесну́ю менé éсть, да не подви́жуся]. Апо́столъ къ Ефесе́омъ, зача́ло 233. Аллилу́ія, гласъ 4: Воззва́ша пра́ведніи, и Госпо́дь услы́ша и́хъ, [и отъ всѣ́хъ скорбе́й и́хъ изба́ви и́хъ]. Сти́хъ: Мно́ги ско́рби пра́веднымъ, [и отъ всѣ́хъ и́хъ изба́витъ я́ Госпо́дь]. Ева́нгеліе Луки́, зача́ло 106. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 227 – 230.

/ Къ оглавленію раздѣла /


Наверхъ / Къ титульной страницѣ

0