Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 1 мая 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 26-й де́нь.
Свята́го и сла́внаго великому́ченика Дими́трія Мѵрото́чца
и воспомина́ніе вели́каго и стра́шнаго трясе́нія.

Аще хо́щетъ настоя́тель, твори́тъ бдѣ́ніе.

НА МАЛѢЙ ВЕЧЕРНИ,
Стихи́ры на 4, гла́съ 1. Подо́бенъ: Небе́сныхъ чино́въ.

Иже основа́нія всея́ земли́ колеба́яй Бо́гъ,* стряса́яй Еди́нъ морско́е ло́же,* я́ко Созда́тель всѣ́хъ* изба́ви ны́ пра́веднаго гнѣ́ва трясе́нія* Твои́мъ милосе́рдіемъ, Человѣколю́бче,* при́сно умоля́емъ. [Два́жды.]

Ѳессалони́ка лику́етъ о па́мяти твое́й* и созыва́етъ вся́ окре́стныя гра́ды,* Дими́тріе треблаже́нне,* соверши́ти твое́ свѣтоно́сное торжество́.* Съ ни́миже, соше́дшеся, и мы́* пѣ́сненно похваля́емъ по́двиги твоя́.

Пріиди́те, вѣ́рніи, соше́дшеся,* похва́лимъ Христо́ва ору́жника* и до́бляго свѣти́льника Дими́трія,* все́ вра́жіе наси́ліе попра́вша,* сему́ вопію́ще вѣ́рою:* о на́съ Христу́, му́чениче, моли́ся.

Сла́ва, гла́съ 6:

Дне́сь вселе́нная вся́ страстоно́сца просвѣща́ется заря́ми и Бо́жія Це́рковь, цвѣты́ украша́ема, Дими́тріе, вопіе́тъ ти́: уго́дниче Христо́въ и предста́телю теплѣ́йшій, не преста́й моли́ти о рабѣ́хъ твои́хъ.

И ны́нѣ, богоро́диченъ: Богоро́дице, Ты́ еси́ лоза́ и́стинная...

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Имамы тя́ мно́гихъ* да́теля дарова́ній,* уго́дниче Госпо́день,* исполня́еши бо проше́нія,* я́же и́мамы всегда́.

Сти́хъ: Пра́ведникъ, я́ко фи́никсъ, процвѣте́тъ,* я́ко ке́дръ, и́же въ Лива́нѣ, умно́жится.

Пѣ́нія сла́дкая,* страсте́й похвале́нія,* благода́тей возда́нія,* предложе́нія, блаже́нне,* пріими́, Дими́тріе.

Сти́хъ: Насажде́ни въ дому́ Госпо́дни,* во дво́рѣхъ Бо́га на́шего процвѣту́тъ.

Добро́та страда́льцевъ,* благолѣ́піе му́чениковъ,* царе́й храни́телю,* пріими́ ны́нѣ похвалу́* любо́вію сла́вящихъ тя́.

Сла́ва, и ны́нѣ, богоро́диченъ, гла́съ то́йже:

Дѣ́ло боголѣ́пно:* Дѣ́ва по рождествѣ́,* Рожде́нное — Бо́гъ Сло́во,* человѣ́чо естество́ имѣ́я* и явля́я веще́ственная.

Тропа́рь, гла́съ 3:

Вели́ка обрѣ́те въ бѣда́хъ тя́ побо́рника вселе́нная, страстоте́рпче, язы́ки побѣжда́юща. Якоже у́бо Лíеву низложи́лъ еси́ горды́ню, и на по́двигъ дерзнове́нна сотвори́въ Не́стора, та́ко, свя́те Дими́тріе, Христу́ Бо́гу моли́ся дарова́ти на́мъ ве́лію ми́лость.

Сла́ва, и ны́нѣ, трясе́нія, гла́съ 8:

Призира́яй на зе́млю и творя́й ю́ трясти́ся, изба́ви ны́ стра́шнаго тру́са преще́нія, Христе́ Бо́же на́шъ, и низпосли́ на́мъ бога́тыя ми́лости Твоя́ моли́твами Богоро́дицы, и спаси́ ны.


НА ВЕЛИЦѢЙ ВЕЧЕРНИ,
Пое́мъ: Блаже́нъ му́жъ, 1-й антифо́нъ. На Го́споди воззва́хъ: стихи́ры на 8, гла́съ 2. Подо́бенъ: Егда́ отъ дре́ва.

Свѣ́тиши оте́честву твоему́ всегда́, сла́вный Дими́тріе му́чениче, я́коже звѣзда́ свѣ́тлая, покрыва́еши бо при́сно сіе́ отъ па́губы враго́въ и избавля́еши озлобле́нія и бу́ри вся́кія; тѣ́мже ра́достно прино́ситъ, лѣ́тнюю па́мять, блаже́нне, соверша́я, вѣ́рою же и любо́вію поя́ Го́спода, тя́ просла́вльшаго. [Два́жды.]

Му́чениче страстоте́рпче Христо́въ, чудесы́ свѣ́тиши мíру, я́коже со́лнце, свя́те Дими́тріе. Тѣ́мже въ па́мяти твое́й наслажда́емся вси́ твои́хъ чуде́съ, блаже́нне, изря́дная торжеству́юще вѣ́рою. Дерзнове́ніе у́бо имѣ́я, моли́ся ко Го́споду спасти́ отъ тли́ и скорбе́й рабы́ твоя́.

Ко́піями прободе́нъ въ ре́бра, пробо́дшаго ра́ди Спа́са на Крестѣ́ ре́бра; Того́ бо уязвле́ніемъ любо́вію поревнова́лъ еси́, страстоте́рпче Дими́тріе, явля́я всѣ́мъ непобѣди́мое свидѣ́тельства твоего́. Тѣ́мже и уя́звленъ гони́тель низпаде́, пріе́мъ твоего́ иску́съ исповѣ́данія, страда́льче Христо́въ.

Ины стихи́ры, гла́съ 8. Подо́бенъ: О, пресла́внаго чудесе́!

О, пресла́внаго чудесе́!* на небеси́ и на земли́ ра́дость* дне́сь въ па́мяти возсія́ Дими́трія му́ченика.* Отъ а́нгелъ хвала́ми вѣнча́ется* и отъ человѣ́къ пѣ́нія пріе́млетъ.* О, ка́ко пострада́!* Ка́ко до́брѣ подвиза́ся!* Имже вра́гъ паде́ лука́вый,* Христу́ побѣ́ждшу того́. [Два́жды.]

О, пресла́внаго чудесе́!* чуде́съ свѣтлостьми́, со́лнца свѣтлѣ́йше,* при́сно Дими́трій свѣ́титъ конце́мъ,* отъ невече́рняго Свѣ́та облиста́емый* и въ незаходи́мѣмъ Свѣ́тѣ красу́яся.* Его́же сія́ньми о́блацы отгна́ни бы́ша ва́рварстіи,* неду́зи прогна́шася* и де́мони побѣди́шася.

О, пресла́внаго чудесе́!* Христа́ ра́ди прободе́нъ* треблаже́нный Дими́трій,* ко враго́мъ всегда́ яви́ся ору́жіе обоюдуо́строе,* пожина́я враго́въ выше́нія* и низлага́я де́монская сверѣ́пства.* Ему́же возопіи́мъ:* святы́й Дими́тріе, покры́й ны́,* вѣ́рно почита́ющія тя́ отъ любве́ всегда́.

Сла́ва, гла́съ 6. Византíево:

Дне́сь созыва́етъ на́съ страстоте́рпца всемíрное торжество́. Пріиди́те у́бо, празднолю́бцы, свѣ́тло пра́зднуимъ па́мять его́, глаго́люще: ра́дуйся, и́же ри́зу нече́стія раздра́въ вѣ́рою, му́жествомъ же Ду́ха себе́ обложи́въ; ра́дуйся, упраздни́вый кознодѣ́йства чужда́го, крѣ́постію, да́нною тебѣ́ отъ Еди́наго Бо́га; ра́дуйся, и́же прободе́нными удесы́, блаже́нную стра́сть Христо́ву, духо́внѣ на́мъ возживописа́въ. Его́же моли́, страда́льцевъ удобре́ніе Дими́тріе, изба́витися на́мъ ви́димыхъ и неви́димыхъ вра́гъ и спасти́ся душа́мъ на́шимъ.

И ны́нѣ, богоро́диченъ: Кто́ Тебе́ не ублажи́тъ...
Вхо́дъ. Проки́менъ дне́. [И чте́нія три́.]

Проро́чества Иса́іина чте́ніе. [Главы́ 63, 64.]

Обрати́ся отъ небесе́, Го́споди, и ви́ждь отъ до́му свята́го Твоего́ и сла́вы Твоея́: гдѣ́ е́сть ре́вность Твоя́ и крѣ́пость Твоя́? гдѣ́ е́сть мно́жество ми́лости Твоея́ и щедро́тъ Твои́хъ, я́ко терпѣ́лъ еси́ на́мъ, Го́споди? Ты́ бо еси́ Оте́цъ на́шъ, я́ко Авраа́мъ не увѣ́дѣ на́съ, и Изра́иль не позна́ на́съ, но Ты́, Го́споди, Оте́цъ на́шъ, изба́ви ны́, я́ко изнача́ла и́мя Твое́ на на́съ е́сть. Почто́ уклони́лъ еси́ на́съ, Го́споди, заблуди́ти отъ пути́ Твоего́? Ожесточи́лъ еси́ сердца́ на́ша, е́же не боя́тися Тебе́? Обрати́ся ра́бъ Твои́хъ ра́ди, племе́нъ ра́ди наслѣ́дія Твоего́. Да пома́лѣ наслѣ́дствимъ го́ру святу́ю Твою́. Проти́вницы на́ши попра́ша святы́ню Твою́. Бы́хомъ я́ко отъ нача́ла, егда́ не владѣ́лъ еси́ на́ми, ниже́ назва́ся и́мя Твое́ на на́съ. Аще отве́рзеши не́бо, тре́петъ пріи́мутъ отъ Тебе́ го́ры и раста́ются, я́ко во́скъ отъ лица́ огня́ та́етъ. И попали́тъ о́гнь супоста́ты Твоя́, и явле́но бу́детъ и́мя Твое́ проти́внымъ Твои́мъ. Отъ лица́ Твоего́ язы́цы возмяту́тся. Егда́ сотвори́ши сла́вная, тре́петъ пріи́мутъ отъ Тебе́ го́ры. Отъ вѣ́ка не слы́шахомъ, ниже́ о́чи на́ши ви́дѣша Бо́га, ра́звѣ Тебе́, и дѣла́ Твоя́ и́стинна, и сотвори́ши терпя́щимъ Тя́ ми́лость. Сря́щетъ бо ми́лость творя́щія пра́вду, и пути́ Твои́ помя́нутъ. И ны́нѣ, Го́споди, Оте́цъ на́шъ Ты́ еси́, мы́ же бре́ніе; и Ты́ Созда́тель на́шъ, и дѣла́ ру́къ Твои́хъ вси́ мы́. Не прогнѣ́вайся на ны́, Го́споди, зѣло́, и да не помяне́ши во вре́мя грѣхо́въ на́шихъ; и ны́нѣ при́зри, Го́споди, я́ко лю́діе Твои́ вси́ мы́.

Проро́чества Іеремíина чте́ніе. [Глава́ 2.]

Сія́ глаго́летъ Госпо́дь: помяну́хъ ми́лость ю́ности твоея́ и любо́вь соверше́нства твоего́, е́же послѣ́довати тебѣ́ Свято́му Изра́илеву; глаго́летъ Госпо́дь Святы́й Изра́илевъ: Го́споду нача́токъ рожде́ній его́, вси́ снѣда́ющіи его́ прегрѣша́тъ, зла́я пріи́дутъ на ты́я, глаго́летъ Госпо́дь: услы́шите сло́во Госпо́дне, до́ме Іа́ковль и все́ оте́чество до́му Изра́илева. Сія́ глаго́летъ Госпо́дь: ко́е обрѣто́ша отцы́ ва́ши во Мнѣ́ прегрѣше́ніе, я́ко отступи́ша дале́че отъ Мене́, и ходи́ша въ слѣ́дъ су́етныхъ и осуети́шася? И не реко́ша: гдѣ́ е́сть Госпо́дь, возведы́й на́съ изъ земли́ Еги́петскія и путеводи́вый на́съ въ пусты́ни, въ земли́ сухо́й и нехо́днѣй, въ земли́ безво́днѣй и непло́днѣй, и въ сѣ́ни сме́ртнѣй, въ земли́, по не́йже не про́йде когда́ му́жъ, ниже́ всели́ся сы́нъ человѣ́чь та́мо. И возведо́хъ вы́ на Карми́ль, е́же я́сти ва́мъ плоды́ его́ и блага́я его́; и внидо́сте и оскверни́сте зе́млю Мою́ и наслѣ́діе Мое́ положи́сте въ ме́рзость. Іере́е не рѣ́ша: гдѣ́ е́сть Госпо́дь? и держа́щіися зако́на не вѣ́дѣша Мя́; и па́стыріе нече́ствоваху въ Мя́; и проро́цы проро́чествоваху Ваа́ломъ и въ слѣ́дъ неполе́зныхъ ходи́ша. Сего́ ра́ди еще́ возсужду́ся къ ва́мъ, глаго́летъ Госпо́дь, и къ сыно́мъ сыно́въ ва́шихъ возсужду́ся. Прейди́те во о́стровы Хеттіи́мъ, и уви́дите, и въ Кида́ръ посли́те, и уразумѣ́йте вельми́, и уви́дите, а́ще бя́ху такова́я. Аще измѣня́тъ язы́цы бо́ги своя́, и сíи не су́ть бо́зи. Лю́діе же Мои́ премѣни́ша сла́ву его́, отъ нея́же не пріи́мутъ по́льзы. Ужасе́ся не́бо о се́мъ и вострепета́ на мно́зѣ зѣло́, глаго́летъ Госпо́дь.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма и свята́го стихи́ры самогла́сны, гла́съ 1. Гео́ргія Сикеліо́та:

Весели́ся въ Го́сподѣ, гра́де Ѳессалони́ки, ра́дуйся и лику́й вѣ́рою свѣтлоодѣ́явся, Дими́трія всесла́внаго страда́льца и свидѣ́теля Истины въ нѣ́дрѣхъ имѣ́я, я́ко сокро́вище; наслади́ся чуде́съ, исцѣле́нія зря́, и ви́ждь низлага́юща иноплеме́нниковъ де́рзости, и благода́рно Спа́су возопíй: Го́споди, сла́ва Тебѣ́.

Анато́лія:

Пѣ́сней красото́ю настоя́щій уясни́мъ де́нь и возгласи́мъ му́ченика по́двиги: предлежи́тъ бо на́мъ во благохвале́ніе вели́кій Дими́трій. Ибо де́монская нахожде́нія му́жески погуби́въ, къ три́знищу усе́рдно пріи́де, и побѣди́тельная сла́вно отне́съ, Спа́су мо́лится спасти́ся душа́мъ на́шимъ.

Гла́съ 2. Ге́рманово:

Въ премíрная селе́нія ду́хъ тво́й, Дими́тріе му́чениче му́дре, Христо́съ Бо́гъ положи́ непоро́чно. Ты́ бо Тро́́ицы бы́лъ еси́ побо́рникъ и въ три́знищи му́жески пострада́лъ еси́, я́ко адама́нтъ тве́рдый. Прободе́нъ же бы́въ въ ре́бра нетлѣ́нная твоя́, всече́стне, подо́бяся на дре́вѣ Прободе́нному на спасе́ніе всего́ мíра, чуде́съ прія́лъ еси́ дѣ́йство, человѣ́комъ подая́ исцѣле́нія оби́льно. Тѣ́мже твое́ дне́сь успе́ніе пра́зднуемъ по достоя́нію, сла́вяще тя́ просла́вльшаго Го́спода.

Сла́ва, гла́съ 5. Подо́бенъ: Востру́бимъ.

Стеце́мся вѣ́рою и любо́вію, возопіи́мъ пра́зднственная и воспле́щемъ рука́ми вси́ въ настоя́щее торжество́ первонача́льника на́шего. Во́инства небе́сная да веселя́тся, и пробо́дшагося за Прободе́ннаго копіе́мъ Царя́ Го́спода, и горды́ню Лíеву низложи́вшаго де́рзостнѣ. Да чудя́тся земля́ же и мо́ре свѣ́тлаго свѣти́льника пресла́внымъ зна́меніемъ, по до́лгу да восхва́лятъ: ю́ніи — ю́ности обузда́теля, въ ста́рости — же́злъ, въ бѣда́хъ — предста́теля, ни́щіи — обогати́теля, во благоше́ствіи — строи́теля, спобо́рника — во́ини и въ пучи́нѣ — спла́вателя, со всѣ́ми своего́ тве́рдаго побо́рника, гра́де Ѳессалони́ки, моля́щеся си́це, рце́мъ: пресла́вне Дими́тріе, предвари́ и изми́ ны отъ вся́кія ну́жды и спаси́ рабы́ твоя́ моли́твами твои́ми.

И ны́нѣ, богоро́диченъ, гла́съ то́йже. Творе́ніе Ге́рмана патріа́рха:

Востру́бимъ трубо́ю пѣ́сней, прекло́ншися бо свы́ше, Всецари́ца Ма́ти Дѣ́ва благослове́ньми вѣнчава́етъ воспѣва́ющія Ю. Ца́ріе и кня́зи да стеку́тся, и Цари́цѣ да воспле́щутъ въ пѣ́снехъ, Царя́ ро́ждшей, сме́ртію одержи́мыя пе́рвѣе разрѣши́ти человѣколю́бно Благоволи́вшаго. Па́стыріе и учи́теліе, до́браго Па́стыря, Пречи́стую Ма́терь, соше́дшеся, восхва́лимъ: свѣ́щникъ златоза́рный, свѣтоно́сный о́блакъ, небе́съ Простра́ннѣйшую, одушевле́нный киво́тъ, огнезра́чный Влады́чень престо́лъ, маннопріе́мную злату́ю ста́мну, заключе́нную Сло́ва две́рь, всѣ́хъ христіа́нъ прибѣ́жище, пѣ́сньми богоглаго́ливыми похваля́юще, си́це рце́мъ: пала́то Сло́ва, сподо́би смире́нныя ны́ небе́снаго Ца́рствія, ничто́же бо невозмо́жно хода́тайству Твоему́.

На стихо́внѣ стихи́ры самогла́сны, трясе́нія, гла́съ 2. Симео́на Дивного́рца.

Земли́ смуща́емѣй гнѣ́ва Твоего́ стра́хомъ, хо́лми и го́ры трясу́тся, Го́споди, но благоутро́бія о́комъ на ны́ призрѣ́въ, не я́ростію Твое́ю прогнѣ́вайся на ны́, но умилосе́рдився на дѣла́ ру́къ Твои́хъ, стра́шнаго ны́ преще́нія тру́са свободи́, я́ко Бла́гъ и Человѣколю́бецъ.

Гла́съ 6. Сти́хъ: Призира́яй на зе́млю и творя́й ю́ трясти́ся.

Стра́шенъ еси́, Го́споди, и кто́ стерпи́тъ пра́веднаго Твоего́ гнѣ́ва, или́ кто́ Тя умо́литъ, или́ кто́ укроти́тъ, Благíй, о лю́дехъ согрѣши́вшихъ и отча́явшихся? Небе́сніи чи́ни, а́нгели, нача́ла и вла́сти, престо́ли, госпо́дства, херуви́ми и серафи́ми о на́съ Тебѣ́ вопію́тъ: Свя́тъ, Свя́тъ, Свя́тъ еси́, Го́споди, дѣ́лъ ру́къ Твои́хъ не пре́зри, Бла́же, за утро́бы ми́лости спаси́ гра́дъ бѣ́дствующій.

Сти́хъ: Стря́слъ еси́ зе́млю и смути́лъ еси́ ю́.

Ниневи́тяне согрѣше́ній ра́ди, тру́сомъ преще́нія, поги́бель слы́шаху, въ сре́дственномъ же зна́меніи ки́та, чрезъ воста́ніе Іо́ны, покая́ніе умоля́етъ. Но я́ко о́ныя, во́пль люде́й Твои́хъ со младе́нцы и скоты́, уще́дривъ, прія́лъ еси́, и на́съ, наказу́емыя, тридне́внаго ра́ди Воста́нія пощади́ и поми́луй.

Сла́ва, гла́съ 8. Анато́лія:

Имѣ́етъ у́бо боже́ственнѣйшая твоя́ душа́ и непоро́чная, приснопа́мятне Дими́тріе, Небе́сный Іерусали́мъ жили́ще, его́же стѣ́ны пречи́стыми рука́ми Неви́димаго Бо́га живописа́шася. Имать же всечестно́е, и многострада́льнѣйшее твое́ тѣ́ло преизря́дный се́й хра́мъ на земли́, сокро́вище некра́домое чуде́съ и неду́говъ врачевство́, идѣ́же притека́юще, цѣльбы́ почерпа́емъ. Соблюди́, всехва́льне, тя́ велича́ющій гра́дъ отъ проти́вныхъ прираже́ній, дерзнове́ніе я́ко имѣ́я ко Христу́, тя́ просла́вльшему.

И ны́нѣ, богоро́диченъ: Безневѣ́стная Дѣ́во...

На благослове́ніи хлѣ́бовъ: тропа́рь Дими́трія два́жды и Богоро́дице Дѣ́во... еди́ножды.



НА УТРЕНИ,
На Бо́гъ Госпо́дь: тропа́рь трясе́нія, два́жды. Сла́ва: Дими́трія. И ны́нѣ: трясе́нія.

По 1-мъ стихосло́віи сѣда́ленъ, гла́съ 4. Подо́бенъ: Яви́лся еси́ дне́сь.

Дими́трія дне́сь страстоте́рпца пра́здникъ соверша́емъ благочестивому́дренно, я́ко Христу́ непреста́нно моля́щася всѣ́мъ да́ти ми́ръ и ми́лость. [Два́жды.]

Сла́ва, и ны́нѣ, богоро́диченъ:

Те́плое заступле́ніе су́щимъ въ бѣда́хъ и помо́щницу на́шу, и къ Бо́гу премѣне́ніе, Еюже тли́ изба́вихомся, Богоро́дицу вѣ́рніи ублажа́емъ.

По 2-мъ стихосло́віи сѣда́ленъ, гла́съ 4. Подо́бенъ: Ско́ро предвари́.

Па́мять твоя́, сла́вне му́чениче Дими́тріе, уясни́ дне́сь Це́рковь Христо́ву и вся́ собра́ пѣ́сньми досто́йно восхвали́ти тя́, богому́дре, я́ко и́стинно во́ина и враго́въ потреби́теля. Тѣ́мже мольба́ми твои́ми изба́ви ны́ отъ искуше́ній. [Два́жды.]

Сла́ва, и ны́нѣ, богоро́диченъ:

Пое́мъ Тя́, Богоневѣ́сто, Ма́ти Христа́ Бо́га, сла́вяще Рождество́ Твое́ непости́жное, и́мже изба́вихомся отъ ле́сти діа́воли и вся́ческихъ бѣ́дъ, Влады́чице Богоро́дице, и вѣ́рно взыва́емъ: поми́луй ста́до Твое́, еди́на Всепѣ́тая.

По поліеле́и сѣда́ленъ, гла́съ 8. Подо́бенъ: Прему́дрости.

Сія́нія чуде́съ, я́ко лучи́, облиста́еши и вся́ просвѣща́еши мíра концы́, я́ко звѣзда́ пресвѣ́тлая, и ве́село благово́нствуеши, я́коже другíй ра́й, и ду́ши весели́ши, и уставля́еши неду́ги, тѣ́мже тя́, всеблаже́нне, по до́лгу пое́мъ, и любо́вію почита́емъ честну́ю па́мять твою́, страстоте́рпче Дими́тріе, моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко Дѣ́ву и еди́ну въ жена́хъ, Тя́ безсѣ́менно ро́ждшую Бо́га пло́тію, вси́ блажи́мъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца дои́ши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́, и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти, покланя́ющимся вѣ́рою пресвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, гла́съ 4: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Святы́мъ, и́же су́ть на земли́ Его́, [удиви́ Госпо́дь вся́ хотѣ́нія Своя́ въ ни́хъ]. Вся́кое дыха́ніе... Ева́нгеліе Матѳе́я, зача́ло 36.

По 50-мъ псалмѣ́ стихи́ра, гла́съ 6:

Дне́сь созыва́етъ на́съ страстоте́рпца всемíрное торжество́. Пріиди́те у́бо, празднолю́бцы, свѣ́тло пра́зднуимъ па́мять его́, глаго́люще: ра́дуйся, ри́зу нече́стія раздра́въ вѣ́рою, му́жествомъ же Ду́ха себе́ обложи́въ; ра́дуйся, упраздни́вый кознодѣ́йства чужда́го, крѣ́постію да́нною тебѣ́ отъ Еди́наго Бо́га; ра́дуйся, и́же прободе́нными удесы́ блаже́нную стра́сть Христо́ву духо́внѣ на́мъ возживописа́въ. Его́же моли́, страда́льцевъ удобре́ніе Дими́тріе, изба́витися на́мъ ви́димыхъ и неви́димыхъ вра́гъ и спасти́ся душа́мъ на́шимъ.

Кано́нъ трясе́нія, со ирмосо́мъ на 6, гла́съ 6, его́же краегране́сіе: О, Христе́, земли́ колеба́ніе уста́ви вско́рѣ. Іо́сифъ.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Яко стра́шенъ гнѣ́въ Тво́й, отъ него́же на́съ изба́вилъ еси́, Го́споди, не погре́бъ въ земли́ все́ движе́ніе на́ше, тѣ́мъ благода́рственно Тя́ при́сно сла́вимъ.

Ра́дуяся на́шему всегда́ всеконе́чному исправле́нію, Влады́ко, я́коже ли́стъ ху́дъ, коле́блеши всю́ зе́млю, въ стра́хъ Тво́й вѣ́рныя утвержда́я, Го́споди.

Изба́ви тру́са тяжча́йшаго вся́ ны́ и не да́ждь, Го́споди, поги́бнути всеконе́чно наслѣ́дію Твоему́, мно́гими прогнѣ́вавшему злы́ми Твое́ долготерпѣ́ніе.

Богоро́диченъ: Ра́бски Тебѣ́ вопіе́мъ, Ма́ти Бо́жія, обы́чныя ми́лости Твоя́ на гра́дъ и лю́ди ми́лостивно показу́ющи, тру́са тяжча́йшаго и тли́ на́съ измѣни́.

И свята́го два́ кано́на, на 8. Пе́рвый кано́нъ, гла́съ 4, его́же краегране́сіе: Добропобѣ́дному приглаго́лю Дими́трію. Ѳеофа́ново.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Боже́ственнымъ муче́нія вѣнце́мъ увязе́нъ, при Бо́зѣ лику́еши, блиста́ніи отону́дными сія́я и просвѣще́нія исполня́емь, великому́чениче досточу́дне.

Яко су́ща Истины свидѣ́теля, и да́же до кро́ве подви́гшася, блаже́нне, терпѣли́вно, тве́рдо же противле́ніе къ мучи́телемъ показа́вша, тя́ Влады́ка прія́тъ.

Зло́бы обрѣта́теля низложи́лъ еси́ на зе́млю, Дими́тріе, му́ченическимъ твои́мъ копіе́мъ уби́въ, Боже́ственною бла́гостію, па́че ума́ си́лою, на сіе́, блаже́нне, укрѣпля́емь.

Богоро́диченъ: Безма́теренъ я́коже Бо́гъ пе́рвѣе Сы́й, бы́сть е́же по на́мъ безо́тчій изъ Тебе́, Богоро́дице Всепѣ́тая, пло́ть пріе́мь по едине́нію, е́же па́че сло́ва и ра́зума.

Другíй кано́нъ, гла́съ 8, его́же краегране́сіе: Мѵ́ра честву́ю благода́ть Дими́трія. Гео́ргій Ски́лица.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Мѵ́ра благово́нна и че́стна, Дими́тріе, отве́рзеный исто́чниче, страсте́й скве́рны се́рдце мое́ омы́й, и добродѣ́телей дѣя́ніемъ благово́ніе мя́ показа́въ Христо́во, у́мъ мо́й облагода́тстви, благода́ти твоя́ боже́ственныя пѣ́ти.

Воды́ живы́я рѣ́ки истека́ти отъ чре́ва вѣ́рныхъ, Сло́во Бо́жіе глаго́летъ. Тѣ́мже твоего́ пролива́ются мѵ́ра исто́чницы приснотеку́щіи, и́хже струи́ веселя́тъ Бо́жій гра́дъ, сла́вящій му́ченическое дерзнове́ніе твое́.

Же́злъ у́бо дре́вле Моисе́евъ, уда́ривъ ка́мень въ земли́ пусты́ннѣй, отве́рзе струи́ рѣ́къ многоте́чныя; тѣ́ло же твое́, Дими́тріе, прободе́нное копіе́мъ, мѵ́ра исто́чникъ показа́, но́ваго Изра́иля прохлажда́ющее.

Яже у́бо и́маши воздая́нія, Дими́тріе, му́ченическихъ твои́хъ я́звъ, ниже́ о́ко ви́дѣ, ниже́ у́хо слы́ша; ны́нѣ же мѵ́ра мо́ре, воздая́нія чистоты́ пролива́еши мíра конце́мъ, стра́сти ду́шъ очища́ющее.

Богородиченъ: Пренескве́рно прія́телище, Всечи́стая, Сло́во обрѣ́тъ Тя́ Бо́жіе, въ Твоя́ всели́ся ложесна́: и е́же изъ Тебе́ прія́тіе пома́завъ Свои́мъ Божество́мъ, Еди́нъ про́йде отъ двою́, и истоще́нное мѵ́ро нарече́ся, Христо́съ бо Бо́гъ же и Человѣ́къ.

Катава́сія: Отве́рзу уста́ моя́...

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Земля́ уязвля́ется, на́мъ злѣ́ залежа́щимъ, и при́сно гнѣ́въ Тво́й сподвиза́ющимъ на ны́, Ще́дре Всецарю́, но пощади́, Влады́ко, рабы́ Твоя́.

Стря́съ, Го́споди, зе́млю, утверди́лъ еси́ па́ки, наказу́я и обраща́я не́мощь на́шу, утвержда́тися Твои́мъ Боже́ственнымъ стра́хомъ хотя́, Преблагíй.

Ро́ждшаго сме́рть го́рькую, и тру́сы тяжча́йшія, и я́звы нестерпи́мыя, грѣха́, бра́тіе, убѣжи́мъ и Бо́гу покая́нія о́бразы угоди́мъ.

Богоро́диченъ: Еди́на су́щи Блага́я, Преблаго́е Сло́во умоли́ прилѣ́жно, настоя́щаго тру́са всѣ́мъ изба́витися и гнѣ́ва, Богоро́дице Чи́стая, мо́лимся.

Инъ.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Вмѣни́ся въ ничто́же мучи́телей отъ тебе́ повелѣ́ніе, сло́во бо Бо́жіе па́че всѣ́хъ, страстоте́рпче, предче́ствовалъ еси́.

Свѣ́щникъ свѣтови́дѣнъ муче́нія въ ски́ніи бы́лъ еси́, Боже́ственнымъ Свѣ́томъ сія́ющъ, му́чениче страстоте́рпче Дими́тріе.

Врачева́ній тя́ исто́чникъ свяще́нный и ди́вный, гра́дъ тво́й и сокро́вище некра́домо стяжа́въ, вся́кимъ весе́ліемъ обогати́ся.

Богоро́диченъ: Врачу́я о́бразъ истлѣ́вшій земны́хъ, Пречи́стая, си́мъ изъ Тебе́ облачи́тся, пребы́въ я́коже бѣ́ Человѣколю́бецъ.

Инъ.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Роди́вся съ небе́съ отъ Бо́га, бы́лъ еси́ Боже́ственныхъ бла́гъ наслѣ́дникъ, сы́нъ нарица́емь, снаслѣ́дникъ Христо́въ, ца́рствуеши же съ Ни́мъ, мѵ́ро бо о́бразъ сего́, Дими́тріе.

Вкорени́вся, я́коже дре́во Дави́дски, сла́вне, при исхо́дищахъ во́дъ, вели́къ возда́лъ еси́ муче́нія пло́дъ и ны́нѣ исто́чникъ показа́лся еси́ мѵ́ра, проходя́щъ, земли́ концы́.

Поче́рпъ благода́ть Христо́ву, ребра́ съ Кро́вію источи́вшаго во́ду, кро́вь излія́лъ еси́ твою́, Его́ ра́ди пробо́дся; и ны́нѣ, я́ко во́ду, пролива́еши сердца́мъ благово́нное мѵ́ро, Дими́тріе.

Богоро́диченъ: Свяще́нніи Твои́ сосу́ди душе́вніи, Пречи́стая, по́лны арома́тъ и мѵ́ра Боже́ственнаго Ду́ха, наше́дшаго на Тя́, и́бо Бо́га ро́ждши, вѣ́рныя измѣни́ла еси́ отъ злово́нія страсте́й.

Конда́къ трясе́нія, гла́съ 6. Подо́бенъ: Еже о на́съ.

Изба́ви тру́са тя́жкаго всѣ́хъ на́съ, Го́споди, и я́звы нестерпи́мыя грѣ́хъ ра́ди на́шихъ. Пощади́, Го́споди, Правосла́внаго Импера́тора на́шего, и лю́ди Твоя́, я́же стяжа́лъ еси́ Твое́ю Кро́вію, Влады́ко; и гра́дъ не преда́ждь въ поги́бель тру́сомъ стра́шнымъ, ино́го бо, ра́звѣ Тебе́, Бо́га не вѣ́мы. И воззови́ пою́щимъ: Азъ е́смь съ ва́ми, и никто́же на вы́.

Сѣда́ленъ му́ченика, гла́съ 4. Подо́бенъ: Удиви́ся Іо́сифъ.

Яко до́блему страда́льцу и во́ину крѣ́пку всецарю́ющаго Христа́, взыва́емъ псало́мски: ра́дуйся, му́чениковъ украше́ніе и лѣ́пота; ра́дуйся, свѣ́тлая Це́ркве звѣздо́ и стѣно́, и приста́нище прибѣга́ющихъ къ тебѣ́, великому́чениче сла́вне Дими́тріе, тя́ пою́щія спаса́й отъ вся́каго вре́да чужда́го и озлобле́нія вся́. [Два́жды.]

Сла́ва, и ны́нѣ, трясе́нія, гла́съ то́йже. Подо́бенъ: Вознесы́йся.

Согрѣши́вшія Тебѣ́ мно́го не презрѣ́лъ еси́, но, наказа́въ, ми́лостивно испра́вилъ еси́: Боже́ственнымъ призира́ніемъ Твои́мъ потря́съ зе́млю, Влады́ко долготерпѣли́ве, ника́коже повреди́въ вся́ рабы́ Твоя́ за милосе́рдіе мно́гое. Тѣ́мъ благода́рственными Тя́ гла́сы славосло́вимъ и со стра́хомъ сла́вимъ.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Коле́блеши, Го́споди, зе́млю, хотя́й стра́хомъ и́стиннымъ всѣ́мъ на́мъ, Влады́ко, утвержда́тися, коле́блемымъ прило́ги льсти́ваго борца́.

Боже́ственнымъ манове́ніемъ Твои́мъ коле́блеши вся́ческая и ужаса́еши сердца́ на земли́ живу́щихъ, Влады́ко; пра́веднаго у́бо Твоего́ гнѣ́ва осла́би, Го́споди, во́лны.

Ника́коже иму́щія во умѣ́ стра́ха Твоего́, устраша́еши двиза́ніемъ всея́ земли́, еди́не Ми́лостиве, но обы́чно на на́съ ми́лости Твоя́ удиви́.

Богоро́диченъ: Хра́мъ Тя́, Влады́чице, Бо́жій вѣ́дяще, во святѣ́мъ хра́мѣ Твое́мъ ру́ки уми́льныя подно́симъ на моле́ніе: ви́ждь озлобле́ніе на́ше и пода́ждь по́мощь.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Побѣди́вшаго лжу́ нече́стія, Бо́жіе Всевысоча́йшее ви́дѣвъ Сло́во, сла́вою вѣнча́ тя, Дими́тріе, пою́ща: сла́ва си́лѣ Твое́й, Го́споди.

На ле́сть побѣ́ду возста́вивъ, побѣди́тельный вѣне́цъ пра́вды прія́лъ еси́, Дими́тріе, зовя́ Зижди́телю твоему́: сла́ва си́лѣ Твое́й, Го́споди.

Направля́емь дла́нію жизноно́сною, къ приста́нищемъ дости́глъ еси́ тиша́йшимъ, идѣ́же, ны́нѣ ра́дуяся, зове́ши, Дими́тріе: сла́ва си́лѣ Твое́й, Го́споди.

Богоро́диченъ: Яко тва́рей всѣ́хъ свяще́ннѣйшая, Ма́ти Бо́га бы́ти Еди́на сподо́билася еси́, Сего́ бо ро́ждши, мíръ благода́тію богозна́нія просвѣти́ла еси́.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Скве́рну вся́ку отве́ргъ рожде́нія, ба́нею порожде́нія, чистоту́, яви́лся еси́, соблюда́я да́же до кончи́ны. Тѣ́мже Христо́съ тебѣ́, Дими́тріе, есте́ственную вла́гу претворя́етъ въ мѵ́ро, я́коже и во́ду въ вино́ преложи́.

Якоже огня́ естество́ всему́ преподае́тся, цѣ́лу спаса́ющъ си́лу, та́ко твое́ мѵ́ро, страда́льче, всѣ́ми у́бо почерпа́ется, оба́че же пребыва́етъ неума́лено. Тѣ́мже ны́нѣ благоче́ствующіи, покланя́ющеся, пое́мъ Бо́га, Иже благода́ть тебѣ́ даде́.

Кто́ слы́шаны Твоя́ хвалы́ сотвори́тъ, Христе́ Сло́ве, ви́дя Твоя́ благода́ти, я́же страда́льцемъ Твои́мъ по́далъ еси́? Дими́трія бо се́ мѵ́ро му́ченика, я́ко исто́чникъ, у́бо истека́етъ, благово́ніе же ды́шетъ и разоря́етъ зо́лъ омраче́ніе.

Напая́ше у́бо исто́чникъ, отъ земли́ восходя́щій, пе́рвѣе, не́же одожди́ти все́ сея́ лице́, ты́ же сокры́вся, му́чениче, подъ зе́млю, исто́чникъ яви́лся еси́ благово́нна мѵ́ра, Дими́тріе; ко́пій бо мно́жество отверзо́ша жи́лы и ны́нѣ мíра напоя́еши концы́.

Богоро́диченъ: Невѣ́сту Бо́жію Тя́ и Ма́терь вѣ́мы, Богоро́дице, Тебе́ бо, я́ко мѵродохнове́нный ши́покъ, обрѣ́тъ Сло́во Бо́жіе, цвѣту́щъ во удо́лѣ смире́ннѣмъ человѣ́чествѣ, возжелѣ́ Твоея́ добро́ты, изъ Тебе́ Плотоно́сецъ проше́дъ, вѣ́рныя облагово́нствоваше.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

И ты́, се́рдце, поколе́блися ны́нѣ, ви́дя Бо́жіе преще́ніе належа́щее, и возопíй: пощади́ лю́ди Твоя́, Влады́ко Го́споди, и уста́ви пра́ведный гнѣ́въ Тво́й, Благоутро́бне.

Лю́ди и гра́дъ, я́же Твое́ю кро́вію стяжа́лъ еси́, Іису́се, не преда́ждь въ поги́бель, во е́же смуща́тися земли́ тру́сомъ стра́шнымъ: ли́къ апо́столъ мо́литъ Тя́.

Отъ путе́й Твои́хъ, Влады́ко, пра́выхъ нра́вомъ укло́ншеся развраще́ннымъ, въ негодова́ніе преложи́хомъ Тя́, ми́лостиваго и непамятозло́бнаго, но ми́лостивъ и ще́дръ бу́ди Твои́мъ рабо́мъ.

Богоро́диченъ: Ны́нѣ по́мощи пріи́де вре́мя, ны́нѣ премѣне́нію потре́ба, Чи́стая, къ Сы́ну Твоему́ и Го́споду, я́ко да уще́дритъ согрѣ́шшія ны́ и належа́щаго гнѣ́ва изба́витъ.

Инъ.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Огнь любве́ Боже́ственныя въ се́рдцы пріе́мъ, о́гнь угаси́лъ еси́ безбо́жнаго идолонеи́стовства, сла́вне Дими́тріе.

Избавля́я ны́ отъ бѣ́дъ, яви́ся, Дими́тріе, моли́твами твои́ми покрыва́я вѣ́рою и любо́вію восхваля́ющія тя́.

Иже вѣ́рою къ твоему́ усе́рдно притека́юще хра́му, Дими́тріе, неду́говъ и страсте́й душетлѣ́нныхъ вско́рѣ избавля́ются.

Богоро́диченъ: Сло́во Бо́жіе, Отцу́ единосу́щное, Тво́й быва́етъ, Богома́ти, па́че ума́ же и сло́ва, Сы́нъ, Тебѣ́ единосу́щенъ.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Бы́лъ еси́ прія́телище съ небе́съ Снизше́дшаго за ми́лость, я́коже дождя́ или́ ка́пли, ка́плющія кро́тко, упои́лъ еси́ та́инственными дарова́ніи и ны́нѣ изъ гро́ба мѵ́ра исто́чникъ то́чиши, Дими́тріе.

Страда́льцемъ, я́коже зако́нъ, вся́кія мірскíя обнажи́вся любве́, упита́лся еси́, му́чениче, еле́емъ благода́тей Ду́ха. Побѣди́въ же тмы́ нача́ла, мзду́ прія́лъ еси́ точи́ти мѵ́ро сладково́нное, Дими́тріе.

Ши́покъ яви́лся еси́, процвѣты́й вну́трь злачника́ Госпо́дня, Дими́тріе, обагре́нъ кро́вію муче́нія и ра́нами сѣче́ній, и болѣ́зньми страда́льческими, и разжже́ніемъ пе́щи, и ны́нѣ мѵ́ро источа́еши приснотеку́щее.

Се́ па́ки зри́тся боже́ственный ковче́гъ — хра́мъ му́ченика, идѣ́же свѣ́щникъ вну́трь — гро́бъ, нося́й мѵ́ро и еле́й, его́же о́крестъ взыгра́имъ духо́вно, и лику́юще, восхва́лимъ вели́каго Дими́трія.

Но́вый я́коже Илія́, ре́вностію уя́звленъ Христо́вы любве́, царя́ облича́еши и тебе́ сама́го предае́ши на сме́рть. Оба́че живе́ши, и еще́ мѵ́ра исто́чникъ показа́въ гро́бъ, я́коже скуде́льникъ еле́я неистоще́нъ.

Богоро́диченъ: Напису́етъ Твое́, Дѣ́во, дре́вле та́инство, поя́ пра́отецъ Тво́й: Царе́вы Дще́ре сла́ва вся́ внутрьу́ду. Иже и Тя́ просла́вивъ, я́ко Блаже́нную человѣ́комъ. Ра́дуйся, мíра всего́ воззва́ніе.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Не иму́ще, Влады́ко, дерзнове́нія моли́тися, смире́нніи, высотѣ́ Твое́й, избра́нныя а́нгелы Твоя́ въ те́плую подвиза́емъ моли́тву; тѣ́хъ ра́ди гнѣ́ва Твоего́ изми́ ны.

Ны́нѣ позна́хомъ, Го́споди, я́ко восхотѣ́лъ еси́ на́съ, и ника́коже покры́лъ еси́ подъ зе́млю съ согрѣше́ніи лю́тыми многосогрѣши́вшія; тѣ́мъ Тя́ благода́рно сла́вимъ.

Повелѣва́еши колеба́тися основа́ніемъ земли́, я́ко да мы́ преста́немъ, смире́нніи, колеба́тися добродѣ́телей лу́чшаго стоя́нія и стра́хомъ Твои́мъ, Сло́ве, утверди́мся.

Богоро́диченъ: Свята́я Богоневѣ́сто, недоумѣ́нныя ны́нѣ лю́ди уще́дри и ма́терними Твои́ми моли́твами, е́же на ны́ Бо́жіе негодова́ніе претвори́ вско́рѣ, мо́лимъ Тя́.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Согла́сно соше́дшеся, пое́мъ сла́вную и свѣтоно́сную твою́ па́мять, и чуде́съ по́лную, и дарова́ній Свята́го и Честна́го, всеблаже́нне, Ду́ха.

Разрѣши́ моя́ плени́цы согрѣше́ній моли́твами твои́ми, я́ко бо непобѣди́мь му́ченикъ дерзнове́ніе и́маши ко Влады́цѣ, и бу́ди ми́ прибѣ́жище и покро́въ, Дими́тріе.

Богоро́диченъ: Чи́сту Тя́ посредѣ́ те́рнія обрѣ́тъ, я́ко чистѣ́йшій кри́нъ и удо́льный цвѣ́тъ, о Богома́ти, Жени́хъ во утро́бу Твою́ Сло́во всели́ся.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Процвѣ́лъ еси́ духо́вно, я́коже ма́слина плодови́тая, и копіено́сными рука́ми ну́ждно изгнете́ся. Вѣ́рныхъ же утѣша́еши, мѵ́ро ны́нѣ точа́ изъ боже́ственнаго гро́ба твоего́, Дими́тріе.

Пчелы́ о́бразомъ тебе́ сама́го дѣ́лателя вся́кія показа́лъ еси́ боготво́рныя добродѣ́тели, ду́шу, блаже́нне, непоро́чну, я́ко со́тову тѣлеси́, соблюда́я, и мѵ́ро ны́нѣ источа́еши, услажда́ющее ду́ши.

Возлюби́лъ еси́ отъ души́ Христа́, и Сему́ послѣ́довалъ еси́ къ мѵ́ру благово́нія, и Сего́ причасти́лся еси́ срастворе́ніемъ лу́чшимъ. И ны́нѣ мѵ́ра струи́ то́чиши непреста́нныя, Дими́тріе.

Ка́пли страда́льческихъ на зе́млю крове́й твои́хъ ка́плюще, благово́нія исто́чникъ мѵ́ра ту́ю содѣ́лаша. И ны́нѣ сіе́ непреста́нно почерпа́ющимъ источа́еши, Дими́тріе.

По́томъ твои́хъ, му́дре, крове́й облія́нъ, я́коже и́нъ но́вый исто́чникъ рѣ́чно, тре́бующимъ бога́тно подае́ши во исцѣле́ніе твое́ мѵ́ро, блаже́нне, усе́рдно приходя́щимъ.

Богоро́диченъ: Зря́ще златови́дный свѣ́та Свѣ́щникъ неугаси́мый, мно́жествомъ грѣхо́въ ду́ши омрачи́вшіи, присту́пимъ: дае́тъ бо просвѣще́ніе и вся́кое отгоня́етъ омраче́ніе.

Конда́къ му́ченика, гла́съ 2:

Крове́й твои́хъ струя́ми, Дими́тріе, Це́рковь Бо́гъ обагри́, да́вый тебѣ́ крѣ́пость непобѣди́мую и соблюда́я гра́дъ тво́й невреди́мь: того́ бо еси́ утвержде́ніе.

Икосъ:

Сего́ вели́каго вси́ воспои́мъ, соше́дшеся вѣ́рою, я́ко ору́жника Христо́ва и му́ченика, Дими́трія, въ пѣ́снехъ и пѣ́ніихъ совзыва́юще Влады́цѣ и Зижди́телю вселе́нныя: изба́ви ны́ тру́са и ну́жды, Человѣколю́бче, моли́твами Богоро́дицы и всѣ́хъ святы́хъ му́чениковъ Твои́хъ. На Тя́ бо вси́ надѣ́емся изба́витися бѣ́дъ и скорбе́й: Ты́ бо еси́ на́ше утвержде́ніе.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Препѣ́тъ еси́, Го́споди долготерпѣли́ве, я́ко не умори́лъ еси́ рабо́въ Твои́хъ тру́сомъ и колеба́ніемъ стра́шнымъ земли́, но устраши́лъ еси́, ища́й обрати́тися отъ зо́лъ, и жи́ти всѣ́мъ на́мъ.

Стена́ніе отъ се́рдца воспу́стимъ и сле́зы проліе́мъ, я́ко да ми́лостива Влады́ку обря́щемъ Христа́, сокруши́ти тру́сомъ вся́ ны́, за умноже́ніе грѣхо́въ претя́ща на́мъ.

Увы́, воззове́мъ, и ру́цѣ воспростре́мъ къ Бо́гу Высоча́йшему, и преста́немъ про́чее твори́ти зло́е: се́ Спа́съ, негоду́я, коле́блетъ всю́ зе́млю, утверди́ти хотя́ ны́.

Богоро́диченъ: При́зри, Чи́стая, и спаси́ вся́ пою́щія Тя́, потреби́тися иму́щія во гнѣ́вѣ Бо́жіи, и я́ростію вели́кою и стра́шною ны́нѣ наше́дшаго преще́нія, за мно́жества мно́гихъ грѣхо́въ на́шихъ.

Инъ.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Преукра́шенъ Боже́ственною сла́вою и благода́тію, му́чениче страстоте́рпче, сія́еши свѣтови́дно и просвѣща́еши зову́щія: благослове́нъ еси́ въ хра́мѣ сла́вы Твоея́, Го́споди.

Яко багряни́цею, укра́шенъ твое́ю кро́вію, имѣ́я вмѣ́сто ски́птра, сла́вне, кре́стъ; со Христо́мъ ца́рствуеши ны́нѣ, му́чениче Дими́тріе, благослове́нъ еси́, зовы́й, въ хра́мѣ сла́вы Твоея́, Го́споди.

Богоро́диченъ: Препросла́вленная, просвѣще́нная, Ма́ти Дѣ́во, вся́, чту́щія Тя́ всеи́стинную Богоро́дицу, огради́; благослове́на Ты́ въ жена́хъ Всенепоро́чная Влады́чице.

Инъ.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Во́ду почерпсти́ Иса́ія жа́ждущимъ, Дими́тріе, предповелѣва́етъ. Аще бы ви́дѣлъ тво́й гро́бъ, возопи́лъ бы вся́ко: мѵ́ра исто́чнику приходи́те и почерпи́те спасе́ніе.

Земли́ у́бо поро́дъ бы́лъ еси́, всели́лся же еси́ въ земли́ кро́ткихъ, идѣ́же вода́ сла́дости; ея́же напи́вся въ сы́тость, мѵ́ра исто́чникъ при́сный ны́нѣ, Дими́тріе, пролива́еши.

Возра́слъ еси́, я́ко розга́ въ виногра́дѣ, пребыва́я неотсѣ́ченъ Бо́гу и совокупле́нъ. И Сего́ испо́лнився ту́ка неизрече́ннаго, мѵ́ро, я́ко струи́, всѣ́мъ ны́нѣ, Дими́тріе, то́чиши.

О, но́выхъ твои́хъ боре́ній! О, стра́нныхъ му́ченическихъ страда́ній! Твоя́ бо по́ты, за Него́ пролія́нныя, блаже́нне, Христо́съ пріи́мъ, исто́чникъ мѵ́ра тя́ показу́етъ.

Струю́ мѵ́ра твоего́ пролива́я, ве́лію пучи́ну просте́рлъ еси́ чуде́съ, и ду́шъ и тѣле́съ неду́ги потопля́еши, и напа́стей, Дими́тріе, вся́ку бу́рю успову́я.

Богоро́диченъ: Млеко́мъ пита́ла еси́, Дѣ́во, Плотоно́сца, Твоего́ Бо́га рожде́ннаго, я́ко да болѣ́знь Ада́мову су́щую во а́дѣ облегчи́тъ, отъ дре́ва снѣ́дша зна́нія, и за́повѣди преслу́шавша.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Пра́ведному Твоему́ сему́ гнѣ́ву, Человѣколю́бче, наше́дшу внеза́пно, смути́хомся и отча́яніемъ всеконе́чнымъ объя́хомся, негодова́вша на ны́ зря́ще Тебе́.

Возпростре́мъ ру́ки, вѣ́рніи, и о́чи къ еди́ному Влады́цѣ, спаса́ти могу́щему, зову́ще: Христе́, я́рость Твою́ отврати́ отъ на́съ вско́рѣ, Человѣколю́бецъ сы́й.

Ты́сящи а́нгелъ, му́чениковъ сосло́віе, проро́къ и апо́столовъ, преподо́бныхъ, іера́рховъ святы́й ли́къ мо́литъ Тя́, Влады́ко: пощади́ лю́ди Твоя́ смире́нныя.

Вѣ́дый, Ще́дре, не́мощь на́шу, и удобопоползнове́нное всѣ́хъ и неиспра́вленное, о́слаби гнѣ́въ, и смуще́ніе ути́ши, Твое́ю ми́лостію уще́дри мíръ.

Богоро́диченъ: Ми́лостивая Богоро́дице, Ми́лостиваго ро́ждшая Спа́са, ви́ждь озлобле́ніе и стена́ніе люде́й Твои́хъ, и ускори́ умоли́ти, е́же уще́дрити ны́.

Инъ.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Омрачи́лъ еси́ ве́сь вра́жій гнѣ́въ, сла́вне, и боре́нія неотъе́млемою си́лою Христа́ облече́нъ и побѣдоно́сецъ бы́въ, му́чениче Дими́тріе, вопія́лъ еси́: благослови́те вся́ дѣла́ Госпо́дня Го́спода.

Му́чениковъ благостоя́ніе показа́въ, му́чениковъ благозва́ніе, му́чениче, наслѣ́довалъ еси́, ба́нею омы́вся свято́ю, я́же вторы́ми не оскверня́ется грѣхо́вными прило́ги, копіе́мъ пробода́емь, и зовы́й: благослови́те вся́ дѣла́ Госпо́дня Го́спода.

Чуде́съ твои́хъ мно́жество, па́че ума́ дарова́ній, и́хже тебѣ́ подаде́ Христо́съ, всѣ́мъ показу́етъ, сла́вне, и благода́ть исцѣле́ній, я́же па́че сло́ва, я́вѣ твою́ благода́ть проповѣ́даетъ на́мъ, вопію́щимъ: благослови́те вся́ дѣла́ Госпо́дня Го́спода.

Богоро́диченъ: Еди́ну во всѣ́хъ родѣ́хъ, Дѣ́ву Ма́терь и Богоро́дицу Чи́стую, пѣсносло́вимъ, Та́ бо спасе́нія на́шего Хода́таица, я́ко мíра Изба́вителя, Сло́во ро́ждшая, Ему́же вопіе́мъ: благослови́те вся́ дѣла́ Госпо́дня Го́спода.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Да Бо́гъ явле́нна сотвори́тъ тя́ су́щимъ въ мíрѣ, Дими́тріе, негаси́му свѣщу́ душе́вную сохра́нша, еле́емъ дѣя́ній умаще́ну всегда́, и я́ко черто́га, тебѣ́ отверзо́шася две́ри, приснотеку́щъ исто́чникъ тя́ мѵ́ра боже́ственнаго показу́етъ, возме́здіе чистоты́ сію́ дая́ благода́ть.

Не изъ крове́й, я́коже рече́ честно́е Ева́нгеліе, ниже́ изъ по́хоти пло́ти, Дими́тріе, Бо́гомъ же роди́лся еси́, Воплоще́ннаго почита́я Бо́га: кро́вь же усе́рдно Того́ ра́ди твою́ истощи́въ, воспрія́лъ еси́ свы́ше чуде́сную благода́ть, источа́еши боже́ственное мѵ́ро, ду́ши благоуха́яй.

Ты́ лѣ́ствица яви́лся еси́ одушевле́нная, на земли́ у́бо утвержде́нная стопа́ми пло́ти, до небе́съ же дося́жущая, Бо́гомъ бо обогати́лся еси́, утвержде́ннымъ, му́чениче, въ тебѣ́. Сто́лпъ же яви́вся, пома́занъ еле́емъ по́двиговъ муче́нія, и ны́нѣ источа́еши вѣ́рою приступа́ющимъ исто́чникъ боже́ственнаго мѵ́ра.

Тя́ рѣку́ прописа́ Бо́жію наводне́ну, поя́ Дави́дъ проро́чески, Дими́тріе: се́ бо неистоща́емо прихожде́ніе мѵ́ра твоего́. Тѣ́мъ и мно́жество рѣ́къ, наводня́ющеся, гла́сы своя́ возвыша́ютъ, рука́ми же пле́щутъ въ сла́ву си́ми всѣ́ми просла́вльшаго тя́ Бо́га.

Госпо́дь Еди́нъ Трисвяты́й, Ты́, Бо́же Всемо́щнѣйше, Его́же богосло́вствуяй страда́лецъ Дими́трій въ темни́цѣ заключа́ется, и съ скорпíею чу́вственною змíя умори́въ мы́сленнаго, и горды́ню Лíеву низложи́въ чрезъ Не́стора боже́ственнаго, копіе́мъ пробода́ется, и мѵ́ро ны́нѣ изъ гро́ба то́читъ.

Богоро́диченъ: За Ада́ма — Госпо́дь, за Еву — Ты́, Всечи́стая, Гавріи́лъ же — за льсти́внаго змíя, Кре́стъ же — за дре́во, вертогра́дъ гро́ба — вмѣ́сто Еде́ма, ра́дуйся — вмѣ́сто печа́ли, копіе́ — вмѣ́сто пла́меннаго ору́жія, и багряни́ца — вмѣ́сто смоко́внаго ли́ствія: Тя́ у́бо пое́мъ, Отрокови́це, я́ко всѣ́хъ вино́вну.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Се́ вси́ мы́ согрѣши́хомъ, и стра́шно у́бо земля́, не согрѣ́шши, му́чится: наказу́я бо на́съ, Человѣколю́бецъ всю́ ту́ю коле́блетъ; пріи́мемъ чу́вство и о спасе́ніи свое́мъ попеце́мся.

Часо́въ и лѣ́тъ сы́й Госпо́дь, въ еди́номъ мгнове́ніи о́ка восхотѣ́въ сте́рти рабы́ Твоя́, отъ мно́гаго же благоутро́бія Твоего́, Влады́ко, возбрани́лся еси́. Благодари́мъ Тебѣ́, безотвѣ́тніи мы́, еди́не Человѣколю́бче.

Тру́са, меча́, го́рькаго плѣне́нія, и язы́ческаго, Христе́, наше́ствія, паде́нія, и гла́да, па́губы, и озлобле́нія вся́каго ина́го, Ще́дре, изба́ви гра́дъ Тво́й и вся́ку страну́, вѣ́рно пѣсносло́вящую Тя́.

Земля́ безъязы́чнѣ вопіе́тъ, стеня́щи: почто́ мя злы́ми оскверня́ете мно́гими, вси́ человѣ́цы? ва́съ бо Влады́ка щадя́, еди́ну мене́ уязвля́етъ. Пріими́те чу́вство и покая́ніемъ Бо́га уми́лостивите.

Богоро́диченъ: Тли́ въ рождествѣ́ не пріи́мши, тлѣ́нія, Дѣ́во, измѣни́ вся́ ны́, и тру́са тяжча́йшаго, и ско́рби, утоля́ющи Влады́чнее негодова́ніе Твои́мъ ма́тернимъ премѣне́ніемъ, Богора́дованная.

Инъ.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Раздери́ у́зы прегрѣше́ній тя́ пою́щихъ, страстоте́рпче, уста́ви страсте́й прило́ги, молву́ разори́ ересе́й и напа́стей ути́ши бу́рю моли́твами твои́ми.

Напра́ви къ стезя́мъ пра́вымъ небе́снаго Ца́рствія свяще́ннѣйшую твою́ па́ству, вѣнцено́сче му́чениче Дими́тріе, на па́жить спаси́тельную, на мѣ́сто вѣ́чное.

Да вѣнце́въ сла́вы и небе́снаго Ца́рствія получе́нія пою́щимъ тя́ сего́ улучи́ти моли́, му́чениче Дими́тріе, Жизнода́вца Го́спода и Царя́ си́лъ.

Богоро́диченъ: Яко ко́рень, исто́чникъ и вину́ нетлѣ́нія Тя́, Дѣ́во, вси́ вѣ́рніи, надѣ́ющеся, хвала́ми почита́емъ: Ты́ бо Ѵпоста́сное на́мъ Безсме́ртіе источи́ла еси́.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Пріе́мъ тво́й алава́стръ душе́вный, добродѣ́телей боже́ственнаго мѵ́ра испо́лненъ, имѣ́я же Христа́, прекло́нша тебѣ́, му́чениче, главу́, я́ко упоко́ившася житія́ твоего́ свѣ́тлостію чистоты́. Тѣ́мъ ублажи́лся еси́ и благода́ти испо́лнился еси́, мѵроточи́ти мíра конце́мъ.

Се́ ожида́ющихъ тя́ воздая́ній неизрече́нныхъ свѣ́тлая проображе́нія, се́ исто́чникъ мѵ́ра приснотеку́щаго, о страда́льче! Бо́гу у́бо предстоя́ со дерзнове́ніемъ му́ченическимъ, Импера́тору на́шему испроси́ на враги́ побѣ́ду, и ца́рства коне́цъ неотъе́млемь.

Образомъ Креста́ Побѣдотво́рца побѣди́лъ еси́ Лíево суровство́, и побѣди́теля Не́стора, и сострада́льца поста́вивъ. И ны́нѣ вся́къ язы́къ ва́рварскій рабо́тенъ покори́ Импера́тору на́шему, содѣ́йствуя, сво́инствуя, укрѣпля́я, велича́яй земны́я концы́ Дими́тріе.

Те́плою отъ се́рдца любо́вію къ твоему́ честно́му ковче́гу прибѣга́ющія, му́чениче Христо́въ, мѵ́ро пролива́ющему рѣка́ми, твои́ми моли́твами изба́ви дѣ́лъ душетлѣ́нныхъ и пото́па страсте́й злосмра́дія; обоня́нія же покажи́ сія́ Го́споду благово́ннѣйша.

Де́нь ра́дости духо́вныя соверша́емъ, Дими́тріе, ви́дяще мѵ́ра твоего́ непреста́нно точа́щъ исто́чникъ. Ты́ же страсте́й омраче́ніе разоря́я, я́ко боже́ственнаго испо́лненъ свѣ́та, я́ко во дни́ дава́й ходи́ти благообра́зно, Бо́жій же ви́дѣти Свѣ́тъ непристу́пный.

Богоро́диченъ: Ты́, Всечи́стая, злата́я голуби́ца еси́, я́ко суче́цъ ма́сличный, нося́щая Сло́во Бо́жіе, пома́завшее пло́ть Свою́ еле́емъ Божества́. Его́же въ се́рдцы, я́ко ковче́гъ, пріе́мъ страда́лецъ, изъ гро́ба мѵ́ро то́читъ, и умаща́етъ вѣ́рныхъ ли́ца.

Свѣти́ленъ. Подо́бенъ: Свѣ́те неизмѣ́нный.

Кресто́мъ вооружи́лъ еси́ Не́стора, чрезъ о́наго Лíеву разори́въ горды́ню, Дими́тріе, на три́знищи, я́коже Христо́съ, отверза́еши копіе́мъ ре́бра твоя́, и́миже ста́до твое́ храни́. [Два́жды.]

Сла́ва, и ны́нѣ:

Го́споди, призира́яй на зе́млю съ небесе́ и творя́й всю́ трясти́ся, изба́ви ны́ отъ тру́са, Богоро́дицы моли́твами, Юже дарова́лъ еси́ христіа́номъ предста́тельницу.

На хвали́техъ стихи́ры му́ченика, на 6, гла́съ 4. Подо́бенъ: Яко до́бля.

Прободе́нъ бы́въ,* борца́ твои́ми ко́піями уязви́лъ еси́* и ме́ртва сотвори́лъ еси́, и недѣ́йственна,* его́же зло́бы, Дими́тріе, на́съ изба́ви,* крѣ́пки на стра́сти му́чащія* всегда́ содѣва́я* свяще́нными твои́ми моли́твами,* Боже́ственнымъ стра́хомъ умиля́я сердца́* и ду́ши на́ша, свя́те.

Рѣку́ тя, испо́лнену во́дъ духо́вныхъ, вѣ́дяще, свя́те,* мо́лимъ, иста́явшія ду́ши на́ша* страсте́й преступле́ньми* ми́лостію твое́ю мно́гою* свяще́нно ороси́,* и омы́й су́щія въ скве́рнѣ,* и премно́гихъ изба́ви бѣ́дъ* и вѣ́чнаго муче́нія.

Яко звѣзда́ свѣтлѣ́йшая,* на земли́ показа́лся еси́,* чуде́съ сія́ньми* подсо́лнечную просвѣща́еши всегда́,* Дими́тріе сла́вне,* мглы́ омраче́нія отгоня́ моли́твами твои́ми ду́шъ на́шихъ,* и неду́ги исцѣли́* отъ любве́ соверша́ющихъ твою́ па́мять,* сла́ва му́чениковъ и похвала́.

Ины стихи́ры, гла́съ 5. Подо́бенъ: Ра́дуйся, по́стниковъ.

Пріиди́, му́чениче Христо́въ, къ на́мъ, твоего́ тре́бующимъ ми́лостивнаго посѣще́нія, и изба́ви озло́бленныя мучи́тельскими преще́ніи и лю́таго неи́стовства ерети́ческаго. Отъ ни́хже, я́ко плѣ́нницы и на́зи, гони́ми есмы́, отъ мѣ́ста на мѣ́сто ча́сто преходя́ще, и заблужда́юще въ верте́пѣхъ и гора́хъ. Уще́дри у́бо, прехва́льне, и да́ждь на́мъ осла́бу, утоли́ бу́рю и угаси́, е́же на ны́, негодова́ніе, Бо́га моля́, подаю́щаго мíру ве́лію ми́лость.

Стѣна́ тве́рдая на́мъ, плѣне́нія вра́жія не убоя́вся, да́нъ еси́, ва́рварская наше́ствія упражня́я и неду́ги утоля́я, степе́нь неразруши́мый, и основа́ніе необори́мое, и градоде́ржецъ, насели́тель и побо́рникъ бы́лъ еси́ твоему́ гра́ду, Дими́тріе; его́же и ны́нѣ, всеблаже́нне, лю́тѣ бѣ́дствующаго и обтяже́нна окая́ннѣ, твои́ми моли́твами спаси́, Христа́ моля́, подаю́щаго мíру ве́лію ми́лость.

Вся́ку добродѣ́тель воспріи́мъ, страстоте́рпческій ли́къ яви́ся, отону́дуже нетлѣ́нныя и блаже́нныя жи́зни наслажде́ніе досто́йнѣ наслѣ́дова. Въ не́мже досточу́дне украша́емь, Дими́тріе, и подража́ніемъ Христо́вымъ почита́яся, и хваля́ся ра́венствомъ копія́, проси́ прилѣ́жнѣе на́съ, почита́ющихъ тя́, изба́вити отъ страсте́й и лю́тыхъ обстоя́ній, те́плѣ моля́ Подаю́щаго мíру ве́лію ми́лость.

Сла́ва, гла́съ 4. Самогла́сенъ. Андре́я Іеросолими́та:

Ко́піями наслѣ́довавшаго Спа́совыхъ ре́бръ благода́ть, прободе́нныхъ копіе́мъ, изъ ни́хже на́мъ источа́етъ Спа́съ жи́зни и нетлѣ́нія во́ды, Дими́трія почти́мъ, прему́драго во уче́ніихъ и вѣне́чника въ му́ченицѣхъ, кро́вію сконча́вшаго страда́нія тече́ніе и чудесы́ просія́вша все́й вселе́ннѣй, ревни́теля Влады́чня и ми́лостива нищелю́бца, во мно́гихъ и мно́гащи бѣда́хъ лю́тыхъ ѳессало́няномъ предста́теля. Его́же и лѣ́тнюю па́мять почита́юще, сла́вимъ Христа́ Бо́га, дѣ́йствующа его́ ра́ди всѣ́мъ исцѣле́нія.

И ны́нѣ, богоро́диченъ:

Изба́ви ны́ отъ ну́ждъ на́шихъ, Ма́ти Христа́ Бо́га, ро́ждшая всѣ́хъ Творца́, да вси́ зове́мъ Ти́: ра́дуйся, еди́но предста́тельство ду́шъ на́шихъ.

Славосло́віе вели́кое. [Ектеніи́.] И отпу́стъ.



НА ЛИТУРГІИ,

Блаже́нна отъ кано́на трясе́нія, пѣ́снь 3-я на 4, и свята́го пѣ́снь 6-я на 4. Проки́менъ, гла́съ 6: Спаси́, Го́споди, лю́ди Твоя́ и благослови́ достоя́ніе Твое́. Сти́хъ: Къ Тебѣ́, Го́споди, воззову́, Бо́же мо́й, [да не премолчи́ши отъ мене́]. И свята́го, гласъ 7: Возвесели́тся пра́ведникъ о Го́сподѣ и упова́етъ на Него́. Апо́столъ трясе́нія, къ Евре́емъ, зача́ло 331, отъ полу́: Бра́тіе, его́же лю́битъ Госпо́дь, наказу́етъ... И свята́го апо́столъ, къ Тимоѳе́ю, зача́ло 292. Аллилу́ія, гла́съ 4: Бо́же, отри́нулъ ны́ еси́ [и низложи́лъ еси́ на́съ, разгнѣ́вался еси́, и уще́дрилъ еси́ на́съ]. Сти́хъ: Стря́слъ еси́ зе́млю и смути́лъ еси́ ю́, [исцѣли́ сокруше́ніе ея́, я́ко подви́жеся]. И свята́го: Пра́ведникъ, я́ко фи́никсъ, процвѣте́тъ, [я́ко ке́дръ, и́же въ Лива́нѣ, умно́жится]. Ева́нгеліе трясе́нія, Матѳе́я зача́ло 27. И свята́го, Іоа́нна, зача́ло 52. Прича́стенъ: Хвали́те Го́спода съ небе́съ, [хвали́те Его́ въ вы́шнихъ]. Другíй: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].


(Мрк.) Подоба́етъ вѣ́дати: а́ще случи́тся великому́ченика Дими́трія Селу́нскаго и трясе́нія въ недѣ́лю.

Въ суббо́ту ве́чера на ма́лѣй вече́рни стихи́ры воскре́сны и Богоро́дицы, по обы́чаю.

На вели́цѣй вече́рни по обы́чной каѳи́смѣ на Го́споди воззва́хъ: стихи́ры воскре́сны 3, и трясе́нія 3 [пи́саны на вели́цѣй вече́рни, на стихо́внѣ], и Дими́трія 4. Сла́ва: Дими́трія. И ны́нѣ: богоро́диченъ 1-й, гла́са. Проки́менъ дне́. Чте́нія три́. На литíи стихи́ра хра́ма и самогла́сны стихи́ры свята́го. Сла́ва: свята́го. И ны́нѣ: богоро́диченъ. На стихо́внѣ стихи́ры воскре́сны. Сла́ва: Дими́трія. И ны́нѣ: богоро́диченъ по гла́су свята́го. На благослове́ніи хлѣ́бовъ тропа́рь: Богоро́дице Дѣ́во... два́жды и Дими́трія, еди́ножды. [Аще же нѣ́сть бдѣ́нія: По Отче на́шъ... тропа́рь воскре́сенъ. Сла́ва: Дими́трія. И ны́нѣ: трясе́нія.

На повече́ріи по Досто́йнѣ и по трисвято́мъ, конда́къ Дими́трія. Сла́ва, и ны́нѣ: трясе́нія.]

На у́трени, на Бо́гъ Госпо́дь: тропа́рь, воскре́сенъ, два́жды. Сла́ва: Дими́трія. И ны́нѣ: трясе́нія. По каѳи́смахъ сѣда́льны воскре́сны и богоро́дичны и́хъ. Та́же поліеле́й, и тропари́: Ангельскій собо́ръ... Ипакои́ гла́са, и сѣда́льны Дими́трія, о́ба по еди́ножды безъ богоро́дичновъ. Сла́ва: сѣда́ленъ, и́же по поліеле́и. И ны́нѣ: богоро́диченъ его́. Степе́нна и проки́менъ гла́са. Ева́нгеліе воскре́сно. Воскресе́ніе Христо́во... Псало́мъ 50-й, стихи́ра воскре́сна. Кано́нъ воскре́сенъ со ирмосо́мъ на 4, и трясе́нія на 4, и Дими́трія на 6. Катава́сія: Отве́рзу уста́ моя́... По 3-й пѣ́сни конда́къ Дими́трія, и и́косъ, и сѣда́ленъ. По 6-й пѣ́сни конда́къ и и́косъ воскре́сенъ. Свѣти́ленъ воскре́сенъ. Сла́ва: свята́го. И ны́нѣ: трясе́нія. На хвали́техъ стихи́ры воскре́сны 4, и Дими́трія со сла́внымъ 4, съ припѣ́вы его́. Сла́ва: стихи́ра ева́нгельская. И ны́нѣ: Преблагослове́нна еси́... Славосло́віе вели́кое. По трисвято́мъ тропа́рь воскре́сенъ то́чію. Ектеніи́, и отпу́стъ, и ча́съ 1-й.

На 1-мъ часѣ́ тропа́рь воскре́сенъ. Сла́ва: трясе́нія. И ны́нѣ: богоро́диченъ часо́въ. По Отче на́шъ... конда́къ трясе́нія. Си́це и на про́чихъ часѣ́хъ тропари́ и кондаки́, премѣня́юще, глаго́лемъ, то́чію воскре́сенъ тропа́рь непремѣ́нно.

На литургíи, блаже́нна гла́са на 4 и трясе́нія пѣ́снь 3-я, на 4, и Дими́трія пѣ́снь 6-я, на 4. По вхо́дѣ тропа́рь воскре́сенъ, и трясе́нія, и хра́ма Богоро́дицы, а́ще е́сть, и Дими́трія. Та́же конда́къ воскре́сенъ и трясе́нія. Сла́ва: Дими́трія. И ны́нѣ: Богоро́дицы. Аще же нѣ́сть хра́ма Богоро́дицы, И ны́нѣ: трясе́нія. Проки́менъ трясе́нія и свята́го. Апо́столъ трясе́нія и Дими́трія. Аллилу́ія, гла́съ 4: Бо́же, отри́нулъ ны́ еси́... Сти́хъ: Стря́слъ еси́ зе́млю... И свята́го: Пра́ведникъ, я́ко фи́никсъ, процвѣте́тъ... Ева́нгеліе трясе́нія и Дими́трія. Прича́стенъ: Хвали́те Го́спода съ небе́съ... И свята́го: Въ па́мять вѣ́чную... Ря́дъ же Апо́столъ и Ева́нгеліе чте́мъ подъ зача́ло.

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 219 – 226 об.

/ Къ оглавленію раздѣла /


Наверхъ / Къ титульной страницѣ

0