Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 26 iюня 2017 г. Сейчасъ на порталѣ посѣтителей - 26.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 25-й де́нь.
Святы́хъ му́ченикъ и нотарíй Маркіа́на и Марти́рія.

[ВЕЧЕРЪ,]
На Го́споди воззва́хъ: стихи́ры, гла́съ 4. Подо́бенъ: Яко до́бля.

Тече́ніе соверши́вше* и вѣ́ру соблю́дше,* муче́нія вѣнце́мъ увязо́стеся,* Маркіа́не и Марти́ріе,* столпи́ непоколеби́міи Це́ркве,* сосцы́, млеко́ неле́стное источа́юще,* свѣ́тліи би́серы,* свѣти́льницы, и́же тва́рь свѣтлостьми́* благоче́стія просвѣща́юще.

Еди́нъ ра́зумъ внося́ще* и еди́но соглаша́юще,* дво́ица боже́ственная,* раздѣле́ніе Аріево разруши́ли есте́,* науча́юще чествова́ти соприсносу́щна Отцу́ Сы́на* и собезнача́льна, и Ду́ху,* во еди́ницѣ Тро́ицу* и Тро́ицу во еди́ницѣ,* еди́но естество́ треми́ ли́цы нераздѣ́льно.

Послѣ́дователіе и единонра́вніи,* подо́бницы и единоревни́теліе* священнопроповѣ́дника Па́вла яви́стеся,* и излія́ніемъ кро́ве* враги́ потопи́сте,* и лю́тыхъ ересе́й изсуши́сте пото́къ,* и яви́стеся рѣка́ благоче́стія,* напая́ющая Це́рковь Христо́ву,* Маркіа́не и Марти́ріе.

Сла́ва, гла́съ 1. Ге́рманово:

Ученицы́ и послѣ́дователіе бы́вше единосу́щныя Тро́ицы проповѣ́дника и исповѣ́дника, и съ ни́мъ за Ню́ гони́ми, блаже́нніи, ме́чную сме́рть ерети́ческихъ языкобо́лій предсуди́сте. Тѣ́мъ и му́ченическими вѣнцы́ украси́вшеся отъ Бо́га и дерзнове́ніе пріе́мше, моли́те изба́витися отъ бѣ́дъ чту́щимъ па́мять ва́шу.

И ны́нѣ, богоро́диченъ или́ крестобогоро́диченъ. Подо́бенъ: Всехва́льніи му́ченицы.

Агнца, Агница и всенепоро́чная Влады́чица,* на Крестѣ́ я́ко ви́дѣвши,* зра́ка не иму́ща, ни добро́ты,* увы́ Мнѣ́, пла́чущи глаго́лаше,* гдѣ́ добро́та Твоя́ за́йде, Сладча́йшій?* гдѣ́ благолѣ́піе?* гдѣ́ благода́ть сія́ющая* о́браза Твоего́,* Сы́не Мо́й любе́знѣйшій?

На стихо́внѣ окто́иха. Сла́ва, гла́съ 3:

Разу́мніи Це́ркве свѣти́льницы и Тро́ицѣ побо́рницы, Маркіа́нъ и Марти́рій, щито́мъ вѣ́ры е́реси низложи́вше, правосла́вія свѣ́томъ мíръ просвѣти́ша. Па́влу повину́ющеся, равноапо́столу, па́стырю и учи́телю и́стинно догма́товъ, Аріево и Несто́ріево низложи́ша раздѣле́ніе, Саве́лліево и Севи́рово сли́тіе отража́юще. Тро́ически богосло́вяще Еди́ницу, и отъ Дѣ́вы вопло́щшася Бо́га, во двою́ существу́ еди́наго Христа́, благоче́стно всѣ́мъ воспѣва́ти, всехва́льніи, проповѣ́даша. Тѣ́мъ вѣнцы́ побѣ́ды съ небесе́ пріе́мше, богоглаго́ливіи, про́сятъ на́мъ ве́лія ми́лости.

И ны́нѣ, богоро́диченъ или́ крестобогоро́диченъ:

Ору́жіе се́рдце Твое́ про́йде, Пречи́стая, егда́ Сы́на Твоего́ на Крестѣ́ ви́дѣла еси́ и вопія́ла еси́: не безча́дну Мя́ покажи́, Сы́не Мо́й и Бо́же Мо́й, соблюды́й Мя́ по Рождествѣ́ Дѣ́ву.

Тропа́рь, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости. Тѣ́хъ моли́твами спаси́ ду́ши на́ша.


НА УТРЕНИ,
Оба кано́на окто́иха, и святы́хъ кано́нъ на 4. Его́же краегране́сіе: Дву́мъ приношу́ му́ченикомъ пѣ́нія. Іо́сифъ. Гла́съ 4.

Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Превесьма́ свѣ́томъ Святы́я Тро́ицы осія́еми при́сно, свѣти́льницы непреле́стніи быва́ете, святíи, тѣ́мъ, вѣ́рою свѣтоно́сный пра́здникъ ва́шъ дне́сь соверша́юще, свѣ́тло весели́мся.

Ви́дѣти, на земли́ возсія́вшее Сло́во, изъ Дѣ́вы на́съ ра́ди жела́юще, страда́льцы, Отцу́ Единосу́щна Сего́ исповѣ́дающе, ну́жднѣйшую сме́рть, по́мысломъ крѣпча́йшимъ, пострада́сте.

Па́вла му́драго, богоглаго́льницы, я́вльшеся послѣ́дователе и ученицы́, единоче́стна Отцу́ Сы́на проповѣ́дасте, тѣ́мъ, мечи́ ссѣче́ни бы́вше, излія́ніемъ кро́ве, страстоте́рпцы, зе́млю освяти́сте.

Богоро́диченъ: Безнача́льнаго Сы́на Бо́жія заче́нши, воплоти́ла еси́, Чи́стая, быва́ема Человѣ́ка за ми́лость неизглаго́ланную, тѣ́мъ, Тому́ покланя́ющеся, благоче́стно Тя́ сла́вимъ, вину́ всѣ́хъ обоже́нія.

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́біе.

Правосла́вія просвѣща́еми Боже́ственнымъ Ду́хомъ, Аріево омраче́ніе отню́дъ прогна́сте, свидѣ́тели бы́вше Вседержи́теля.

Ра́вно Сло́во Отцу́ догма́тствующе, святíи, разсуди́сте умре́ти, Маркіа́не и Марти́ріе, и къ безконе́чнѣй Жи́зни преидо́сте.

Воинствосло́віемъ свяще́ннымъ а́нгеломъ сочисли́стеся и му́ченикъ лико́мъ пресвѣ́тло совокупи́стеся, тѣ́мъ честну́ю ва́шу па́мять похваля́емъ.

Богоро́диченъ: Упещре́на ря́сны златы́ми я́ко Цари́ца, Царя́ и Бо́га одесну́ю ны́нѣ предстои́ши, Влады́чице, моля́щи о рабѣ́хъ Твои́хъ.

Сѣда́ленъ, гла́съ 3. Подо́бенъ: Боже́ственныя вѣ́ры.

Повелѣ́ніе Боже́ственное исповѣ́дающе да́же до кро́ве, е́же о Не́мъ прія́сте, му́ченицы сла́вніи, зловѣ́рныхъ пре́лесть обличи́вше и правосла́вную вѣ́ру соблю́дше, но моли́теся Христу́ Бо́гу непреста́нно дарова́ти на́мъ ве́лію ми́лость.

Сла́ва, и ны́нѣ, богоро́диченъ:

Боже́ственнаго естества́ не отлу́чся, пло́ть бы́въ во чре́вѣ Твое́мъ, но Бо́гъ вочеловѣ́чся и пребы́сть, Иже по рождествѣ́, Ма́терь, Тя́ Дѣ́ву, я́ко пре́жде рождества́, сохрани́въ Всенепоро́чну еди́нъ Госпо́дь. Того́ прилѣ́жно моли́ дарова́ти на́мъ ве́лію ми́лость.

Крестобогоро́диченъ:

Нескве́рная Агница Сло́ва, Нетлѣ́нная Дѣ́ва Ма́ти, на Крестѣ́ зря́щи повѣ́шена изъ Нея́ безъ болѣ́зни Прозя́бшаго, ма́терски подо́бно, рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́, во о́блацѣ ле́гцѣ пріи́де Іису́съ Пребоже́ственный нетлѣ́нною дла́нію и спасе́ зову́щія: сла́ва, Христе́, си́лѣ Твое́й.

До́блимъ по́мысломъ и соверше́нною му́дростію правосла́вія, му́ченицы Госпо́дни, утверди́вшеся, му́ченически по́двигъ соверши́сте, ерети́ческую тму́ отгна́ли есте́.

Иже Сло́ва не проповѣ́давъ Отцу́ Единосу́щна, разгнѣ́вався несмы́сленно на му́ченики, удави́ся жи́лами свяще́нныхъ ва́шихъ по́двигъ и погрузи́ся кро́вными тече́ньми, Бо́жіею благода́тію.

Во́инствовавше Го́споду вѣ́рою, святíи, и пострада́вше, небе́снымъ во́инствомъ сочисли́стеся, тѣ́мъ ублажа́етеся, укрѣпле́ніе на́ше и просвѣще́ніе быва́юще.

Сосцы́ церко́вніи, млеко́ источа́ющіи правосла́вія, и благочести́выя пита́ющіи, Маркіа́нъ до́блій и Марти́рій, да похва́лятся ра́достными пѣснопѣ́ніи.

Богоро́диченъ: Свяще́нный дре́вле проро́къ го́ру Боже́ственную нарече́, добродѣ́тельми, Дѣ́во Пречи́стая, весьма́ осѣне́ну: изъ Нея́же Сло́во Спаси́тельное яви́ся, на обновле́ніе и просвѣще́ніе душа́мъ на́шимъ.

Пѣ́снь 5.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы Сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Прему́дрыхъ яви́стеся догма́товъ послѣ́дователи Па́вла, священнодѣ́теля боже́ственнаго, его́же нра́вы, му́ченицы, подража́вше, терпѣли́вно пострада́сте и зако́нно вѣнча́стеся.

Яко звѣ́зды сія́ете на высотѣ́ честны́я Це́ркве свѣ́тло, тму́ глубоча́йшую отгоня́юще Аріевы е́реси, му́ченицы до́блественнѣйшіи.

Удали́вшеся, святíи, житія́ красо́тъ, прибли́жистеся Христу́, малѣ́йшею же кро́вію недви́жимое Ца́рство, сла́вніи страстоте́рпцы, наслѣ́довасте.

Богоро́диченъ: Истинна родила́ еси́ Сы́на на земли́, единосу́щна Отцу́ и Боже́ственному Ду́ху, Богороди́тельнице, Его́же непреста́нно моли́ уще́дрити ду́ши на́ша.

Пѣ́снь 6.

Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.

Глаго́ломъ послѣ́дующе па́стыря, прему́драго Па́вла, правосла́вную вѣ́ру соблюдо́сте, и я́ко а́гнцы, кровопíицъ мечи́ закала́етеся, ра́дующеся.

Честна́ предъ Го́сподемъ, благосла́вніи, ва́ша сме́рть яви́ся, му́дріи ору́жницы, тѣ́мъ почестьми́ лѣ́тними, святíи, отъ всѣ́хъ ублажа́етеся.

Ва́съ, до́блія страстоте́рпцы, Маркіа́не всеблаже́нне и Марти́ріе, исто́чникъ чуде́съ Христо́ва Це́рковь иму́щи, вѣ́чно весели́тся.

Богоро́диченъ: Усты́ и язы́комъ Ма́терь Тя́ всеи́стинно, Дѣ́во, Бо́га на́шего исповѣ́дуемъ, Того́, Чи́стая, прилѣ́жно моли́ спасти́ся душа́мъ на́шимъ.

Конда́къ, гла́съ 4. Подо́бенъ: Вознесы́йся.

Подви́гшеся до́брѣ отъ младе́нства, Маркіа́не съ му́дрымъ Марти́ріемъ, отсту́пника Арія низложи́сте, невре́дно сохра́нше правосла́вную вѣ́ру, Па́влу послѣ́дующе, му́дрому учи́телю, тѣ́мже съ ни́мъ обрѣто́сте живо́тъ, я́ко Тро́ицы побо́рницы изря́днѣйшіи.

Икосъ:

Яко служи́теліе благоче́стія Бо́га Человѣколю́бца, дво́ице благослове́нная, предвари́те мя́ ско́ро и лю́тыхъ изба́вите, сло́во ми́ му́дрости подаю́ще, ва́ше похвали́ти страда́ніе, е́же за вѣ́ру, святíи, нра́вомъ несомнѣ́ннымъ пострада́вшіе, вѣнцы́ прія́сте небе́сныя. Лико́мъ страда́льцевъ, и апо́столовъ, и учи́телей, и честны́хъ архіере́евъ свесели́теся, я́ко проповѣ́дницы Бо́жія Сло́ва и Тро́ицы побо́рницы изря́днѣйшіи.

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Послѣ́дующе до́брѣ свяще́ннаго па́стыря, правосла́віемъ удобря́еми, рука́ми закла́ни бы́сте злосла́вныхъ всу́е, пресла́вніи ору́жницы.

Законоположе́ніе Бо́жіе невреди́мо вѣ́рно сохра́нше, му́ченицы боже́ственніи, зако́нно пострада́сте, отъ ру́къ беззако́нныхъ ку́пно закла́ни бы́вше.

По погребе́ніи свяще́ннѣмъ, приходя́щимъ съ вѣ́рою ко гро́бу ва́шему, неду́ги погреба́ете, святíи, е́же къ Жизнода́телю, святы́мъ хода́тайствомъ ва́шимъ.

Отъ исто́чниковъ та́инственно свяще́нныхъ почерпа́юще Боже́ственную благода́ть цѣле́ній, вѣ́рныя напоя́ете, неду́гъ вся́кое изсуша́юще умноже́ніе.

Богоро́диченъ: Изба́вленніи Твои́мъ Рождество́мъ, Богома́ти, вѣ́чнаго осужде́нія, — ра́дуйся, — зове́мъ Ти́, при́сно Благослове́нная и Обра́дованная.

Пѣ́снь 8.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Якоже два́ а́гнца, закала́етеся, Агнца Бо́жія, единосу́щна Отцу́ проповѣ́дающе, и трапе́зѣ вы́шнѣй принесе́ни бы́вше, страда́льцевъ собо́ру сочетава́етеся.

Укрѣпля́еми си́лою Ду́ха, искорени́сте пре́лести сверѣ́пство, и крѣ́пко пострада́вше, лю́тѣ осла́бленныя немощьми́, му́дріи исцѣля́ете му́ченицы.

Вра́чеве страсте́й бы́вше ду́шъ на́шихъ, святíи му́ченицы, лю́тыя неду́ги и привоста́нія проти́вная разрѣши́те боже́ственными моли́твами.

Воспѣва́емъ Отца́ нерожде́ннаго, и Сы́на, и Ду́ха Свята́го, еди́но существо́ несозда́нно и Божество́ еди́но, и вопіе́мъ согла́сно: вся́ дѣла́ благослови́те Госпо́дня Го́спода.

Богоро́диченъ: Умерщвле́нныя ны́ оживи́ла еси́, Жи́знь всѣ́хъ ро́ждшая, Богороди́тельнице Влады́чице, му́чениковъ сла́ва и пра́ведныхъ, и прегрѣше́ній те́плое очисти́лище.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Крѣ́постію вжиля́еми Боже́ственною, сме́рти, страстоте́рпцы, не убоя́стеся, но, усе́рдно подло́жше мече́мъ вы́и, испо́лнисте до́блественно по́двигъ боже́ственный, тѣ́мъ досто́йно блажите́ся.

Яко два́ свѣти́льника свѣ́тла, просвѣща́ете вселе́нныя исполне́нія Боже́ственными страда́ній свѣтлостьми́, Маркіа́не му́дре и Марти́ріе, тму́ мра́чныя е́реси Аріевы отгоня́ще.

Вѣнцы́ сла́вы отъ Бо́га, побѣди́вше слѣпоу́мнаго Македо́нія, прія́сте досто́йно; и престо́лу Влады́чню предстоя́ще, прегрѣше́ній на́мъ проси́те разрѣше́ніе соверше́нно, достосла́вніи.

Па́мять боже́ственная ва́ша возсія́ со́лнца свѣтлѣ́йши, всѣ́хъ просвѣща́ющи сердца́ сію́ соверша́ющихъ, блаже́нніи, въ не́йже умоли́те Го́спода, тмы́ согрѣше́ній на́съ изба́вити.

Богоро́диченъ: Свѣ́та жили́ще, Чи́стая, су́щи, души́ моея́ зѣ́ницы просвѣти́, очернѣ́вшія небреже́ніемъ и тмо́ю невѣ́дѣнія глубоча́йшею всегда́ одержи́мыя, Всенепоро́чная, я́ко да вѣ́рою ублажа́ю Тя́.

Свѣти́ленъ. Подо́бенъ: Ду́хомъ.

Па́вла всеблаже́ннаго послѣ́дователи бы́вше, тече́ніе соверши́сте, Христо́ва Ца́рствія и Сла́вы безсме́ртныя съ ни́мъ получи́сте со всѣ́ми святы́ми, и предстоите́ ку́пно Тро́ицѣ Честнѣ́й, славосло́вяще Ю досто́йно.

Сла́ва, и ны́нѣ, богоро́диченъ:

Похваля́ютъ Рождество́ Твое́ безпло́тныхъ чи́ни, ра́дости бо су́щія на земли́ Ты́ испо́лнила еси́ еди́на, тѣ́мъ Тя́, Пренепоро́чную, вѣ́рніи сла́вимъ, пѣ́сньми славосло́вяще: Свѣ́тъ бо су́щимъ во тмѣ́ возсія́ла еси́, я́ко у́тро возсіява́ющее де́нь.


НА ЛИТУРГІИ,

Проки́менъ, гла́съ 4: Ди́венъ Бо́гъ во святы́хъ Свои́хъ, Бо́гъ Изра́илевъ. [Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ.] Апо́столъ къ Ефесе́емъ, зача́ло 224, отъ полу́. Аллилу́ія, гла́съ 4: Воззва́ша пра́ведніи, [и Госпо́дь услы́ша и́хъ, и отъ всѣ́хъ скорбе́й и́хъ изба́ви и́хъ. Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь]. Ева́нгеліе Матѳе́я, зача́ло 34, отъ полу́. Ра́дуйтеся, пра́ведніи, [о Го́сподѣ, пра́вымъ подоба́етъ похвала́].

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 215 – 219.

/ Къ оглавленію раздѣла /


Наверхъ / Къ титульной страницѣ

0