Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 22 октября 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 24-й де́нь.
Свята́го му́ченика Аре́ѳы и и́же съ ни́мъ [4299 святы́хъ му́ченикъ].

[ВЕЧЕРЪ,]
На Го́споди воззва́хъ: стихи́ры, гла́съ 1. Подо́бенъ: Всехва́льніи му́ченицы.

Евре́йскому свирѣ́пству* твое́ му́жество противоположи́лъ еси́,* му́чениче Аре́ѳо всехва́льне,* и Боже́ственною благода́тію* побѣдоно́сецъ яви́лся еси́* и ли́къ приве́лъ еси́ му́чениковъ,* Христу́ во́инствующій,* отъ вся́каго, сла́вне, во́зраста совокупля́емь,* и отъ ро́да вся́каго составля́емь.

Аре́ѳо всесла́вне,* кра́сный ли́къ соста́вивъ* свяще́нныхъ сому́чениковъ твои́хъ,* съ ни́миже подвиза́лся еси́, до́брый по́двигъ* и тече́ніе соверши́въ* твоего́ му́жественнѣйшаго страда́нія.* Тѣ́мъ Христа́ моли́* дарова́ти душа́мъ на́шимъ* ми́ръ и ве́лію ми́лость.

Дѣ́вы, богому́дрыя му́ченицы,* Христо́вымъ раче́ніемъ распаля́еми,* не́мощи есте́ственныя забы́вше* и, си́лою Боже́ственною* я́вѣ укрѣпля́еми,* льще́ніе вра́жіе попра́ша,* не устраши́вшеся муче́нія болѣ́зней* и пе́щи о́гненныя не убоя́шася.

Сла́ва, гла́съ 4. Анато́лія:

Пѣ́сненно пастыренача́льника дне́сь, вѣ́рніи, единомы́сленно почти́мъ, Аре́ѳу сла́внѣйшаго съ су́щими его́: я́ко обличи́ царя́ пребеззако́нновавша и кро́вь излія́ за Христо́во исповѣ́даніе, отону́дуже и о́гненный о́блакъ попаля́ше на лицы́ земли́, облича́я пребеззако́нныхъ нече́стіе. Тѣ́мъ, Христе́ Бо́же, Твоя́ страстоте́рпцы укрѣпи́въ къ Твоему́ славосло́вію, и на́съ соблюди́, я́ко всѣ́хъ Влады́ка, отъ искуше́ній и скорбе́й моли́твами святы́хъ Твои́хъ.

И ны́нѣ, богоро́диченъ или́ крестобогоро́диченъ. Подо́бенъ: Яко до́бля.

Агнца и Па́стыря Тя́* на дре́вѣ я́ко ви́дѣ,* Агница ро́ждшая рыда́ше* и ма́терски Ти́ вѣща́ше:* Сы́не возжелѣ́нне, ка́ко на дре́вѣ кре́стнѣмъ повѣ́шенъ еси́, Долготерпѣли́ве?* Ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и Кро́вь Твою́ излія́лъ еси́, Влады́ко?

На стихо́внѣ окто́иха. Сла́ва, гла́съ 8:

Лука́вое и невѣ́рное злосовѣ́тіе евре́йское проразумѣ́вше, де́рзостію ду́ха за Христа́ пострада́ти подвиза́стеся. Яко бо дре́вле въ зако́нѣ, Иже отъ Еги́пта Спа́сшаго, въ пусты́ни прогнѣ́ваша и Того́ Кресту́ осуди́ша, та́ко ны́нѣ и въ ва́съ дѣ́ломъ сло́во преидо́ша, невѣ́рствіемъ неду́говавше, ва́съ огню́ осуди́ша. Вы́ же, купному́дреннѣ, му́жески терпѣ́ніемъ пострада́вше, стра́шни въ му́ченицѣхъ показа́стеся. Дерзнове́ніе иму́ще къ Бо́гу, моли́те отъ прегрѣше́ній лю́тыхъ изба́витися душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: О, пресла́внаго чудесе́!

Что́ зри́мое видѣ́ніе,* е́же Мои́ма очи́ма ви́дится, о Влады́ко?* Содержа́й всю́ тва́рь,* на дре́во воздви́женъ бы́въ,* и умира́еши, всѣ́мъ дая́й жи́знь, —* Богоро́дица, пла́чущи, глаго́лаше,* егда́ узрѣ́ на Крестѣ́ возноси́ма* изъ Нея́ неизрече́нно возсія́вшаго* Бо́га и Человѣ́ка.

Тропа́рь, гла́съ 1:

Болѣ́зньми святы́хъ, и́миже о Тебѣ́ пострада́ша, умоле́нъ бу́ди, Го́споди, и вся́ на́ша болѣ́зни исцѣли́, Человѣколю́бче, мо́лимся.

Сла́ва, и ны́нѣ, богоро́диченъ или́ крестобогоро́диченъ.



НА УТРЕНИ,
Оба кано́на окто́иха, и му́чениковъ, на 4, его́же краегране́сіе: Му́ченическій собо́ръ богокра́снѣ воспое́мъ пѣ́сньми. Творе́ніе Ѳеофа́ново. Гла́съ 8.

Пѣ́снь 1.

Ирмо́съ: Пѣ́снь возсле́мъ, лю́діе, чу́дному Бо́гу на́шему, свободи́вшему Изра́иля отъ рабо́ты, пѣ́снь побѣ́дную пою́ще и вопію́ще: пои́мъ Тебѣ́, еди́ному Влады́цѣ.

Му́чениче, страстоте́рпче Христо́въ, Аре́ѳо всеблаже́нне, моли́твами твои́ми и су́щихъ съ тобо́ю му́чениковъ у́мъ мо́й просвѣти́, я́ко да воспою́ ва́шу свѣтоно́сную и боже́ственную па́мять.

Вы́спрь житіе́ я́вѣ на небесѣ́хъ стяжа́въ, богоблаже́нне, Христо́вымъ подо́біемъ, себе́ пре́далъ еси́ жела́ніемъ муче́нія беззако́ннымъ евре́емъ, богому́дре.

Глаго́лъ преступи́въ Бо́жій, евре́инъ пребеззако́нный и непра́веднѣйшій богоизбра́нное ста́до Христо́во погуби́, оба́че воспрія́ше су́дъ пра́веднымъ и Боже́ственнымъ про́мысломъ.

Стезю́ ше́ствовавъ неукло́нно, къ небеси́ веду́щую, Христу́ приве́лъ еси́ му́ченическій собо́ръ, Аре́ѳо всехва́льне, вся́каго во́зраста и ро́да вся́каго со́бранный.

Богоро́диченъ: Пѣ́сньми Пресвяту́ю, вѣ́рніи, Марíю похва́лимъ, Богома́терь Обра́дованную, покро́въ боже́ственный, ти́хое приста́нище, всѣ́хъ вѣ́рныхъ Предста́тельницу.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Утвержде́нну зря́ще Креста́ благода́тію Твою́ Це́рковь, евре́йстіи о́троцы пребеззако́нніи, за́вистію та́юще, и ра́нами многообра́зными неща́дно му́чаху, еди́не Человѣколю́бче.

Ядоме́тный язы́къ зловѣ́рніи иму́ще и Тя́ ху́ляще, си́хъ прароди́тели Изба́вльшаго дре́вняго мучи́тельства, въ Тя́ вѣ́рующія, Спа́се, закла́ша.

Созда́вый наединѣ́ богодѣ́йственнымъ ма́ніемъ человѣ́ческая сердца́, кто́ про́мысла Твоего́ глубину́ возмо́жетъ пости́гнути? Яко ста́до, е́же, Христе́, собра́лъ еси́, волко́мъ пре́далъ еси́.

Богому́дрое твое́ ста́до, ва́рварскими мечи́ ссѣка́емо, усе́рдно призыва́ше Тя́: пріими́ ду́хи и ду́ши на́ша, Спа́се, и къ свѣ́ту наста́ви Ца́рствія Твоего́.

Богоро́диченъ: Умерщвле́на мя́ дре́вле, къ жи́зни, Пречи́стая, па́ки возвела́ еси́, еди́на Ѵпоста́сную Жи́знь ро́ждшая, Ейже прирази́вшися, расто́ржеся я́вѣ вражде́бнѣйшая сме́рть.

Сѣда́ленъ, гла́съ 8. Подо́бенъ: Прему́дрости.

Креста́ си́лою вооружи́вся и вѣ́рою огради́въ гра́дъ тво́й, дѣ́лы посрами́лъ еси́ мучи́телево свирѣ́пство, терпѣ́нія же о́бразъ боже́ственнаго бы́въ, приве́лъ еси́ Христу́ му́ченики. Тѣ́мъ, соше́дшеся, по до́лгу почти́мъ, Аре́ѳо прехва́льне, всепра́зднственную па́мять твою́, страстоно́сче всесла́вне, моли́ Христа́ Бо́га грѣхо́въ оставле́ніе пода́ти честву́ющимъ любо́вію святу́ю па́мять твою́.

Сла́ва и ны́нѣ, богоро́диченъ:

Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и, я́ко къ те́плому заступле́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, изъ Тебе́ Воплоще́нному безсѣ́менно, моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихтися, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти воспѣва́ющимъ досто́йно сла́ву Твою́.

Крестобогоро́диченъ:

Агнца и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе, вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Собо́ръ, укрѣпля́емь благода́тію, и ли́къ боже́ственный и пресвѣ́тлый, му́ченически мно́жество стражда́, во́инство побѣдоно́сное, Аре́ѳу иму́ще чинонача́льника, да пое́тся любо́вію че́стно пѣснопою́щими: си́лѣ Твое́й сла́ва, Человѣколю́бче.

Твои́мъ содержа́щся ра́зумомъ богому́дрый гра́дъ тво́й, пребога́те, сѣди́ною свѣтя́щася честно́ю, къ пребеззако́ннымъ му́жески подвиза́ся, и, побѣ́ду взе́мъ, пѣснопое́тъ Спа́су: си́лѣ Твое́й сла́ва, Человѣколю́бче.

Зако́номъ но́вымъ Животворя́щаго Ду́ха огражда́емь, зако́нъ пи́смене попира́я, благоче́стный гра́дъ преодолѣ́ душе́вною чистото́ю и нра́вомъ благоро́дія, Христу́ пѣснопоя́: си́лѣ Твое́й сла́ва, Человѣколю́бче.

Вои́стинну гра́дъ Бо́жій яви́лся еси́ пречестны́й и му́чениковъ боже́ственное жили́ще, и о тебѣ́ пою́тся свѣ́тло ны́нѣ пресла́вная, ве́лія же и ди́вная, ли́къ бо пою́щихъ Влады́цѣ приво́диши: си́лѣ Твое́й сла́ва, Человѣколю́бче.

Богоро́диченъ: Изъ Дави́дова ца́рскаго прозя́бши сро́дства, Всеца́рствующаго пре́жде вѣ́къ, изъ Отца́ Сло́ва неизрече́нно и па́че ума́ возсія́вшаго, родила́ еси́, Дѣ́во. Тѣ́мъ Тя́, Богоро́дицу, богому́дренно вѣ́рніи ублажа́емъ.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Богозва́нный собо́ръ и богоблаже́нный, подвиза́яся, и те́плѣ дру́гъ дру́га укрѣпля́юще, и спосо́бствующе, отъ беззако́нныхъ Христа́ ра́ди закла́тися, благосла́вно, добропобѣ́дніи, изво́лиша.

Укрѣ́пльшеся вѣ́рою и благоче́стія ре́вностію распаля́еми, уго́дницы Твои́, Христе́, пребеззако́нныхъ стра́ха не убоя́шася, и, Твое́ю любо́вію цѣлому́дренно свя́зани, са́ми во́лею преда́шася.

Бо́га Боже́ственнымъ промышле́ніемъ и неизбѣ́жнымъ про́мысла судьба́мъ всю́ жи́знь свою́ возложи́вше, собо́ръ боже́ственный, къ пребеззако́ннымъ евре́йскимъ скверноубíйствомъ благоде́рзостно, до́бліи, устреми́шася.

На Тя́ надѣ́ющеся и вѣ́ровавше ны́нѣ Воскресе́нію Твоему́, Твои́, Спа́се, му́ченицы, не ретя́щеся, ниже́ во́пляще, беззако́нными за Твое́ исповѣ́даніе убіе́ни бы́ша, до́блественнѣйшіи.

Богоро́диченъ: Бо́жіе Бо́гъ Сло́во, пре́жде вѣ́къ Отцу́ Соприсносу́щный, благоутро́бія бога́тствомъ во утро́бу Твою́ всели́вся, обнища́, и Человѣ́къ яви́ся на земли́, пло́ть бы́въ, Дѣ́во Богоро́дице Всепѣ́тая.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Кро́вію Христо́вою зна́менавшеся, святíи, кро́ви своя́ усе́рдно излія́ша, сла́вніи му́ченицы, и ны́нѣ ца́рствовати съ Ни́мъ сподо́бишася.

Ми́ръ проро́чески глаго́лаху язы́цы нѣмотству́ющіи, проповѣ́даху Христа́ младе́нцевъ нѣмова́нія, дѣ́вы богому́дрыя за благоче́стіе са́ми себе́ Бо́гу принесо́ша.

Отдѣли́ся тебѣ́ свѣ́тъ, возсія́ющь исцѣле́нія бога́тно отъ Христа́, Аре́ѳо богоглаго́ливе, къ Нему́же изше́лъ еси́, еще́ иска́пая по́ты страда́нія.

Мно́жество Тебѣ́ му́ченическое боже́ственно, Спа́се, приведе́ся: о́крестъ Тебе́ ли́цы святы́хъ, лику́юще, про́сятъ оставле́нія грѣхо́въ тѣ́хъ при́сно прославля́ющимъ.

Богоро́диченъ: Возсія́ отъ Сіо́на высоча́йшаго благолѣ́піе прія́тіемъ пло́ти по соедине́нію неизрече́нно изъ Тебе́, Неискусобра́чная, одѣ́янъ, и мíръ просвѣти́.

Конда́къ, гла́съ 4. Подо́бенъ: Яви́лся еси́ дне́сь.

Весе́лія хода́тай на́мъ наста́ свѣтоно́сный дне́сь страстоте́рпецъ пра́здникъ, его́же соверша́юще, сла́вимъ въ вы́шнихъ су́щаго Го́спода.

Икосъ:

Умъ мо́й просвѣти́, Христе́, заре́ю по́двиговъ Аре́ѳы до́бляго и всѣ́хъ святых́хъ, съ ни́мъ пострада́вшихъ: пе́рвый бо всѣ́хъ яви́ся вѣ́рный, му́жески ополчи́вся на отме́щущихъ воплоще́ніе, Тебе́, па́че естества́ вопло́щшагося и ро́ждшагося, да на́съ изба́виши отъ ле́сти и пока́жеши небла́зненно хотя́щимъ ше́ствовати пу́ть свидѣ́тельства, и́мже страда́льцы ходи́ша, Тя́ пою́ще въ вы́шнихъ су́щаго Го́спода.

Пѣ́снь 7.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.

Крове́й пото́цы страда́лецъ Твои́хъ источа́ютъ исцѣле́нія, вѣ́рою тѣ́хъ па́мять похваля́ющимъ, и Тебѣ́, Творцу́, усе́рдно зову́щимъ: благослове́нъ еси́, Бо́же оте́цъ на́шихъ.

Посрами́ша ве́сь, побѣдоно́сцы, беззако́нныхъ совѣ́тъ, я́ко боже́ственнымъ ра́зумомъ и остроу́міемъ украша́еми, и, веселя́щеся, закала́еми поя́ху: благослове́нъ еси́, Бо́же оте́цъ на́шихъ.

Ма́тери ще́дрыя, я́ко уя́звлени Твое́ю любо́вію, Христе́, не пощадѣ́ша дѣте́й, но въ пещи́ попаля́емыя, Тебѣ́, Влады́цѣ, взыва́юще поя́ху: благослове́нъ еси́, Бо́же оте́цъ на́шихъ.

Свѣщи́ страда́нія дѣ́вства свѣ́тло вже́гше, въ Бо́жіи черто́зѣ, богоно́сніи, веселя́щеся съ му́дрыми дѣ́вами, зову́тъ: благослове́нъ еси́, Бо́же оте́цъ на́шихъ.

Богоро́диченъ: Ду́шъ очище́ніе и спасе́нія Хода́таица еси́, вѣ́рою Тя́ и любо́вію, Бо́жію Ма́терь, возвѣща́ющимъ и Сы́ну Твоему́ согла́сно зову́щимъ: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Не въ зако́нѣ бы́сть я́вѣ соверше́ніе, но въ Христѣ́ спасе́ніе даде́ся, — вопія́ху му́ченицы, богоубíйцамъ глаго́люще. — Тѣ́мъ, ра́дующеся, закала́емся вси́ и умира́емъ усе́рдно, Тому́ пѣснопою́ще: лю́діе, превозноси́те Христа́ во вѣ́ки.

Тайнонауча́етъ младе́нецъ и учи́тъ безу́мныя къ Твоему́ о́бразу зрѣ́ти пречи́стому, Христе́, и вѣ́ру прія́ти прише́ствія Твоего́ на земли́, и утаи́вся пребеззако́нныхъ ру́къ, въ пла́мень вни́де съ ро́ждшею, поя́: лю́діе, превозноси́те Его́ во вѣ́ки.

На земли́ му́ченицы благоче́стно подвиза́вшеся, на небесѣ́хъ отъ Христа́ вѣнцы́ досто́йно прія́ша, ра́достно отше́дше, идѣ́же веселя́щихся жили́ще, вѣ́рою пѣснопою́щихъ и вопію́щихъ непреста́нно: лю́діе, превозноси́те Его́ во вѣ́ки.

Побѣди́вше, святíи, лю́таго міроде́ржца и служа́щія того́ хотѣ́ніемъ, ко Вседержи́телю и всѣ́хъ Го́споду со дерзнове́ніемъ и ра́достію неизрече́нною преидо́сте, вопію́ще: свяще́нницы, воспо́йте, лю́діе, превозноси́те Его́ во вѣ́ки.

Богоро́диченъ: За ны́ моли́ся Сы́ну Твоему́ и Го́споду, чи́сто и и́стинно пою́щія Тя́ и Тя́, Богома́терь, исповѣ́дающія, Пречи́стая, грѣхо́въ прося́щи разрѣше́нія, получи́ти же спасе́нія вѣ́рно пою́щимъ: свяще́нницы, благослови́те, лю́діе, превозноси́те Его́ во вѣ́ки.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Прича́стницы сла́вы Христо́вы, общева́вшеся сме́рти бы́сте, святíи му́ченицы, и Ца́рствія діади́мою украси́стеся свѣ́тло. Бо́гу же предстоите́, на́мъ прося́ще спасе́нія душе́внаго, достосла́вніи.

Зако́нніи яви́стеся Христо́ви во́ини и непобѣди́міи му́ченицы, Аре́ѳо всему́дре и со страда́вшими съ тобо́ю усе́рдно, со страстоте́рпицами жена́ми, дѣ́вы отрокови́цы, тѣ́мже мо́лимъ прилѣ́жно, о на́съ моли́теся.

Упра́ви, Сло́ве Бо́жій, жи́знь мою́ и окорми́, Влады́ко, уго́дниковъ Твои́хъ моле́ньми лю́бящихъ Тя́, и сподо́би тѣ́хъ соприча́стнику бы́ти, грѣхи́ моя́ презира́я я́ко Бла́гъ и Человѣколю́бецъ.

Богоро́диченъ: Селе́ніе была́ еси́ Бо́жіе, Невмѣсти́маго во чре́вѣ вмѣ́щшая и, пре́жде Безпло́тнаго, воплоще́нна на́мъ поро́ждшая. Его́же ны́нѣ умоли́, Чи́стая, прегрѣше́ній оставле́ніе всѣ́мъ дарова́ти, вѣ́рою Тя́ при́сно велича́ющимъ.

Свѣти́ленъ. Подо́бенъ: Жены́ услы́шите.

Аре́ѳина проро́чества Бо́гъ Испо́лнитель бы́сть, возста́вивъ на паде́ніе нечести́ваго Омири́та Елесвана́ му́жественнаго, гоня́ща и убива́юща нечести́выхъ полки́, Негра́нъ же вознося́ща и весе́лія исполня́юща.

Сла́ва, и ны́нѣ, богоро́диченъ:

Су́щую Богоро́дицу Тя́ исповѣ́даемъ, Влады́чице, спа́сшіися Тобо́ю: Бо́га бо неизрече́нно родила́ еси́, разруши́вшаго Кресто́мъ сме́рть, къ Себѣ́ же привле́кша му́чениковъ мно́жества, съ ни́миже Тя́ восхваля́емъ, Дѣ́во.


НА ЛИТУРГІИ,

Проки́менъ, гла́съ 4: Святы́мъ, и́же су́ть на земли́ Его́, [удиви́ Госпо́дь вся́ хотѣ́нія Своя́ въ ни́хъ]. Сти́хъ: Предзрѣ́хъ Го́спода предо мно́ю вы́ну, [я́ко одесну́ю мене́ е́сть, да не подви́жуся]. Апо́столъ ко Евре́емъ, зача́ло 330. Аллилу́ія, гла́съ 4: Воззва́ша пра́ведніи, и Госпо́дь услы́ша и́хъ, [и отъ всѣ́хъ скорбе́й и́хъ изба́ви и́хъ. Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь]. Ева́нгеліе Матѳе́я, зача́ло 38. Прича́стенъ: Ра́дуйтеся, пра́ведніи, о Го́сподѣ, [пра́вымъ подоба́етъ похвала́].

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 210 – 214 об.

/ Къ оглавленію раздѣла /


Наверхъ / Къ титульной страницѣ

0