Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 27 апрѣля 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 24-й де́нь.
Слу́жба Бо́жіей Ма́тери, Всѣ́хъ скорбя́щихъ Ра́дости.

НА МАЛѢЙ ВЕЧЕРНИ,
На Го́споди воззва́хъ: стихи́ры [на 4], гла́съ 4:

Необори́мую стѣ́ну стяжа́вше, вѣ́рніи,* Богоро́дицу Марíю,* пріиди́те, поклони́мся и припаде́мъ къ Не́й,* дерзнове́ніе бо и́мать къ Ро́ждшемуся изъ Нея́* и мо́лится, и спаса́етъ* отъ гнѣ́ва и сме́рти ду́ши на́ша.

Ве́лія си́ла чуде́съ Твои́хъ, Чи́стая:* избавля́еши бо отъ бѣ́дъ,* и спаса́еши отъ сме́рти,* и восхища́еши отъ напа́стей неча́емыхъ,* и ско́рби разрѣша́еши,* и согрѣше́нія человѣ́ковъ отъе́млеши.

Тебе́ вѣ́рнымъ покро́въ показа́* Иже вся́ческихъ Бо́гъ,* вопло́щься отъ крове́й Твои́хъ, Пречи́стая,* и предста́тельницу и побо́рницу* су́щимъ въ ну́ждахъ и обстоя́ніихъ,* и въ бу́ри приста́нище благоути́шное.* Ты́ у́бо спаси́ отъ вся́кія ско́рби и туги́* вся́ притека́ющія къ боже́ственному покро́ву Твоему́.

Изба́ви на́съ отъ ну́ждъ на́шихъ,* Ма́ти Христа́ Бо́га,* ро́ждшая всѣ́хъ Творца́,* да вси́ вопіе́мъ Ти́:* ра́дуйся, еди́но предста́тельство ду́шъ на́шихъ.

Сла́ва, и ны́нѣ, гла́съ 5:

Святѣ́йшую херуви́мъ и вы́шшую серафи́мъ, Пречи́стая, Богоро́дицу Тя́ исповѣ́дающе, и́мамы, грѣ́шніи, засту́пницу, и обрѣта́емъ во вре́мя напа́стей спасе́ніе. Тѣ́мже не преста́й о на́съ моля́щи, держа́во и прибѣ́жище душа́мъ на́шимъ.

Свѣ́те Ти́хій... Проки́менъ дне́. Сподо́би, Го́споди...

На стихо́внѣ стихи́ры, гла́съ 5:

Те́плая предста́тельнице и непобѣди́мая,* упова́ніе извѣ́стное и непосты́дное,* стѣно́ и покро́ве,* и приста́нище прибѣга́ющимъ къ Тебѣ́,* Приснодѣ́во Чи́стая,* Сы́на Твоего́ и Бо́га моли́* умире́ніе да́ти мíрови,* и спасе́ніе, и ве́лію ми́лость.

Сти́хъ: Помяну́ и́мя Твое́* во вся́комъ ро́дѣ и ро́дѣ.

Ско́рый Тво́й покро́въ, и по́мощь,* и ми́лость покажи́ на рабы́ Твоя́,* и во́лны, Чи́стая, укроти́ су́етныхъ помысло́въ,* и па́дшую мою́ ду́шу возста́ви, Богоро́дице:* вѣ́мъ бо, вѣ́мъ, Дѣ́во,* я́ко мо́жеши, ели́ка хо́щеши.

Сти́хъ: Слы́ши, Дщи́, и ви́ждь,* и приклони́ у́хо Твое́.

Тебе́, чи́стую Дѣ́ву нескве́рную,* еди́ну и́мамъ стѣ́ну непреобори́му,* прибѣ́жище и покро́въ крѣ́покъ,* и ору́жіе спасе́нія,* да мя́ не пре́зриши отча́яннаго,* наде́ждо ненаде́жнымъ,* скорбя́щимъ ра́досте и заступле́ніе.

Сла́ва, и ны́нѣ, гла́съ то́йже:

Блажи́мъ Тя́, Богоро́дице Дѣ́во, и сла́вимъ Тя́, вѣ́рніи, по до́лгу, гра́дъ непоколеби́мый, стѣ́ну необори́мую, тве́рдую предста́тельницу и прибѣ́жище ду́шъ на́шихъ.

Тропа́рь, гла́съ 4:

Къ Богоро́дицѣ прилѣ́жно ны́нѣ притеце́мъ, грѣ́шніи и смире́нніи, и припаде́мъ, въ покая́ніи зову́ще изъ глубины́ души́: Влады́чице, помози́, на ны́ милосе́рдовавши, потщи́ся, погиба́емъ отъ мно́жества прегрѣше́ній, не отврати́ Твоя́ рабы́ тщи́, Тя́ бо и еди́ну наде́жду и́мамы.

Сла́ва, и ны́нѣ, и́нъ:

Не умолчи́мъ никогда́, Богоро́дице, си́лы Твоя́ глаго́лати, недосто́йніи. Аще бо Ты́ не бы́ предстоя́ла, моля́щи, кто́ бы на́съ изба́вилъ отъ толи́кихъ бѣ́дъ? Кто́ же бы сохрани́лъ до ны́нѣ свобо́дны? Не отсту́пимъ, Влады́чице, отъ Тебе́, Твоя́ бо рабы́ спаса́еши при́сно отъ вся́кихъ лю́тыхъ.

И отпу́стъ.



НА ВЕЛИЦѢЙ ВЕЧЕРНИ,
Блаже́нъ му́жъ, [1-й антифо́нъ]. На Го́споди воззва́хъ: стихи́ры на 8, гласъ 2:

Всѣ́мъ предста́тельствуеши, Блага́я,* прибѣга́ющимъ съ вѣ́рою въ держа́вный Тво́й покро́въ:* ино́го бо не и́мамы грѣ́шніи* къ Бо́гу въ бѣда́хъ и ско́рбехъ при́сно избавле́нія,* обремене́ни грѣхи́ мно́гими,* Ма́ти Бо́га Вы́шняго.* Тѣ́мже Ти́ припа́даемъ:* изба́ви отъ вся́каго обстоя́нія рабы́ Твоя́.

Всѣ́хъ скорбя́щихъ ра́досте,* и оби́димыхъ засту́пнице,* и а́лчущихъ пита́тельнице,* стра́нныхъ утѣше́ніе,* обурева́емыхъ приста́нище,* больны́хъ посѣще́ніе,* немощны́хъ покро́ве и засту́пнице,* же́зле ста́рости,* Ма́ти Бо́га Вы́шняго* Ты́ еси́, Пречи́стая:* потщи́ся, мо́лимся, спасти́ся рабо́мъ Твои́мъ.

Гла́съ 4:

Ра́дуйся, Богома́ти Пречи́стая;* ра́дуйся, вѣ́рнымъ наде́ждо;* ра́дуйся, мíру очище́ніе;* ра́дуйся, избавля́ющая вся́кихъ скорбе́й рабы́ Твоя́;* ра́дуйся, приста́нище обурева́емымъ;* ра́дуйся, всемíрный свѣ́те;* ра́дуйся, утѣ́шительнице и засту́пнице христіа́нъ;* ра́дуйся, прибѣ́жище и спасе́ніе* всѣ́хъ блажа́щихъ Тя́, Богоневѣ́сто.

Ра́дуйся, добро́то Іа́ковля,* Юже избра́ Бо́гъ, Юже возлюби́,* две́рь спаса́емыхъ, кля́твы разрѣше́ніе,* Всеблагослове́нная,* чре́во боговмѣсти́мое,* па́дшихъ возведе́ніе,* святѣ́йшая херуви́мъ и тва́рей преиму́щая,* огнезра́чный престо́ле Влады́чній,* всемíрная ра́досте и сла́во,* колесни́це Сло́ва,* о́блаче, изъ него́же возсія́ Со́лнце,* су́щимъ во тьмѣ́ подая́ ве́лію ми́лость.

Гла́съ 8:

Ра́дуйся, а́нгеловъ ра́досте;* ра́дуйся, человѣ́ковъ сла́во;* ра́дуйся, вѣ́рныхъ наде́ждо и предста́тельство,* стѣно́ и заступле́ніе,* Влады́чице Богома́ти Пречи́стая,* Яже Бо́га пло́тію неискусому́жно ро́ждшая,* Изба́вителя мíру;* не пре́зри рабы́ Твоя́,* но мольба́ми Твои́ми* отъ одержа́щихъ на́съ изба́ви искуше́ній,* и бѣ́дъ, и обстоя́ній,* всѣ́хъ скорбя́щихъ ра́досте,* еди́на христіа́нъ прибѣ́жище.

Ра́дуйся, Богоро́дице Всепѣ́тая;* ра́дуйся, исто́чниче,* живо́тъ вѣ́рнымъ источа́яй;* ра́дуйся, всѣ́хъ Влады́чице* и Госпоже́ тва́ри, Благослове́нная;* ра́дуйся, Всенепоро́чная, Препросла́вленная;* ра́дуйся, Всепречи́стая;* ра́дуйся, купино́ неопали́мая;* ра́дуйся, горо́ свята́я;* ра́дуйся, са́де живоно́сный,* ра́дуйся, раю́ одушевле́нный;* ра́дуйся, Ма́ти Дѣ́во;* ра́дуйся, Богоневѣ́сто.

Ра́дуйся, Богоро́дице, Ма́ти Христо́ва;* ра́дуйся, еди́на наде́ждо,* человѣ́ковъ заступле́ніе;* ра́дуйся, свѣ́щниче Свѣ́та пресвѣ́тлый;* ра́дуйся, свѣще́ освяще́нная;* ра́дуйся, огнезра́чный черто́же Сло́ва;* ра́дуйся, Боже́ственное селе́ніе;* ра́дуйся, ра́дости исто́чниче,* источа́яй во́ды благода́ти притека́ющимъ къ Тебѣ́.

Ра́дуйся, вселе́нныя похвало́;* ра́дуйся, хра́ме Госпо́день,* ра́дуйся, горо́ пріосѣне́нная;* ра́дуйся, всѣ́хъ прибѣ́жище,* ра́дуйся, свѣ́щниче златы́й;* ра́дуйся, сла́во правосла́вныхъ честна́я;* ра́дуйся, Марíе,* Ма́ти Христа́ Бо́га;* ра́дуйся, раю́; ра́дуйся, Боже́ственная трапе́зо;* ра́дуйся, сѣ́не; ра́дуйся, ста́мно всезлата́я;* ра́дуйся, всѣ́хъ упова́ніе.

Сла́ва, и ны́нѣ, гла́съ 6:

Пріиди́те, празднолю́бныхъ собо́ри, Пресвяту́ю Дѣ́ву Богоотрокови́цу ублажи́мъ, ра́дости бо и спасе́нія хода́таица бы́сть мíрови, я́ко ро́ждшая Христа́ Бо́га. Сію́ бо Оте́цъ Пребезнача́льный, отъ всѣ́хъ родо́въ еди́ну избра́нную, Дще́рь Себѣ́ именова́; Сы́нъ Собезнача́льный и Соприсносу́щный въ Ма́терь избра́; Ду́хъ же Святы́й я́ко Пречи́стую Невѣ́сту Себѣ́ Боголѣ́пно сочета́. Сію́ я́ко Богоизбра́нную и Благослове́нную въ жена́хъ вы́шнія си́лы немо́лчными пѣ́сньми велича́ютъ, Гавріи́ла иму́ща чинонача́льника: Благода́тная, ра́дуйся, съ Тобо́ю Госпо́дь. Сію́ патріа́рси, проро́цы и вси́ святíи со проро́комъ Дави́домъ ра́достными гла́сы вѣнчава́ютъ: предста́ Цари́ца одесну́ю Тебе́, Влады́ко, ря́сны златы́ми одѣ́яна и преукраше́на Боже́ственными благолѣ́потами. Сію́, я́ко держа́вную Засту́пницу ро́да на́шего, и мы́, недосто́йніи, воспои́мъ, глаго́люще: ра́дуйся, Це́ркве чу́дное украше́ніе и всему́ мíру преди́вный покро́ве; ра́дуйся, вѣ́рнымъ царе́мъ посо́біе на бране́хъ и во́иномъ крѣ́посте; ра́дуйся, покро́ве, похвало́ и ра́досте всѣ́хъ земноро́дныхъ; ра́дуйся, боже́ственное утѣше́ніе всѣ́хъ скорбя́щихъ и оби́димыхъ; ра́дуйся, обра́дованная, съ Тобо́ю Госпо́дь, подая́й мíрови Тобо́ю ве́лію ми́лость.

Вхо́дъ. Проки́менъ дне́, и чте́нія три́.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Главы́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ры, гла́съ 8:

Предста́тельнице вѣ́рныхъ, Богороди́тельнице, скорбя́щихъ ра́досте и пла́чущихъ вели́кое утѣше́ніе, моли́ Сы́на Твоего́, Христа́ Бо́га на́шего, со а́нгелы, и апо́столы, и всѣ́ми святы́ми изба́вити на́съ въ ча́съ испыта́нія лю́таго осужде́нія, да Тобо́ю спасе́ніе улучи́вше, во вѣ́ки сла́вимъ Тя́, Преблагослове́нную.

Вѣ́рою притека́ю къ покро́ву Твоему́, Богороди́тельнице Пречи́стая: отъ напа́стей, и бѣ́дъ, и страсте́й томле́нія, и бѣсо́вскаго озлобле́нія спаси́ мя, я́ко ми́лости иму́щи пучи́ну и спасе́нія я́вльшися Хода́таица, Влады́чице, Яже Бо́га ро́ждши Ми́лостиваго, еди́наго Всеще́драго и Многоблагоутро́бнаго.

Кра́сную Тя́, Всечи́стая, еди́ну отъ вѣ́ка обрѣ́тъ добро́ту Іа́ковлю Пребезнача́льное Сло́во, и всели́вся въ Тя́ благоутро́бія ра́ди, обнови́ человѣ́ческое естество́. Его́же моли́ непреста́нно отъ вся́кихъ бѣ́дъ и скорбе́й изба́витися на́мъ, Тя́ ра́дость и спасе́ніе мíра почита́ющимъ.

Небе́сную две́рь и киво́тъ, всесвяту́ю го́ру, свѣтоза́рный о́блакъ воспои́мъ, небе́сную лѣ́ствицу, слове́сный ра́й, Евино избавле́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíрови и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ Сы́на Твоего́ и Бо́га, прегрѣше́ній оставле́ніе дарова́ти благоче́стно покланя́ющимся Тебѣ́ и съ весе́ліемъ торжеству́ющимъ Тво́й всечестны́й пра́здникъ, сла́во и ра́досте на́ша, Богома́ти Благослове́нная.

Сла́ва, и ны́нѣ, гла́съ 5:

Воструби́мъ трубо́ю пѣ́сней: прекло́нши бо ся свы́ше, Всецари́ца Ма́ти Дѣ́ва благослове́ньми увѣнчава́етъ воспѣва́ющія Ю. Ца́ріе и кня́зи да стеку́тся и Цари́цѣ да воспле́щутъ въ пѣ́снехъ, Царя́ ро́ждшей, сме́ртію одержи́мыя пе́рвѣе, разрѣши́ти человѣколю́бно благоволи́вшаго. Па́стыріе и учи́теліе, До́браго Па́стыря Пречи́стую Ма́терь, соше́дшеся, восхва́лимъ, небе́съ простра́ннѣйшую, одушевле́нный Госпо́день киво́тъ, огнезра́чный Влады́чень престо́лъ, маннопріе́мную злату́ю ста́мну, заключе́нную Сло́ва две́рь, всѣ́хъ христіа́нъ прибѣ́жище. И вси́ лю́діе, пѣ́сньми благоглаго́ливыми похваля́юще Ю, си́це рце́мъ: Ма́ти Сло́ва Бо́жія, сподо́би смире́нныя ны́ небе́снаго Ца́рствія, ничто́же бо невозмо́жно хода́тайству Твоему́.

На стихо́внѣ стихи́ры, гла́съ 2:

Яко всѣ́хъ вы́шшу су́щую небе́сныхъ и земны́хъ,* херуви́мъ сла́внѣйшую* и всея́ тва́ри честнѣ́йшую,* Тебе́, засту́пницу и покро́въ держа́венъ,* христіа́нскому ро́ду Христо́съ дарова́,* покрыва́ти и спаса́ти лю́ди согрѣ́шшія,* къ Тебѣ́ прибѣга́ющія;* тѣ́мже прибѣ́жище всѣ́мъ* Тебе́ воспѣва́емъ, Влады́чице,* и честны́й и благознамени́тый Тво́й пра́здникъ,* обра́дованная ра́досте всѣ́хъ, пра́зднуемъ свѣ́тло,* Христа́ моля́ще дарова́ти на́мъ* Тобо́ю ве́лію ми́лость.

Гла́съ 5. Сти́хъ: Слы́ши, Дщи́, и ви́ждь,* и приклони́ у́хо Твое́.

Воспои́мъ, лю́діе,* свѣ́тло Дави́дскую пѣ́снь* Отрокови́цѣ Богоневѣ́стѣ,* Ма́тери всѣ́хъ Царя́ Христа́:* предста́ Цари́ца одесну́ю Тебе́, Влады́ко,* ря́сны златы́ми одѣ́яна* и преукраше́на боже́ственными лѣ́потами.* Сію́ бо, избра́нную въ жена́хъ,* па́че всего́ мíра удобри́въ,* благоизво́ли роди́тися изъ Нея́* вели́кія ра́ди ми́лости,* и Сію́ Помо́щницу* лю́демъ Свои́мъ дарова́* стро́ити и покрыва́ти* отъ всѣ́хъ бѣ́дъ рабы́ Своя́,* еди́ну Благослове́нную.

Гла́съ 7. Сти́хъ: Лицу́ Твоему́ помо́лятся* бога́тіи лю́дстіи.

Гора́ еси́ вели́ка и пресла́вна,* па́че горы́ Сина́йскія, Богоро́дице:* та́я бо, не терпя́щи сни́тія Сла́вы Бо́жія* во о́бразѣхъ и сѣ́нехъ,* огне́мъ возгара́шеся,* и гро́ми, и мо́лнія та́мо бы́ша.* Ты́ же во чре́вѣ Твое́мъ Бо́жіе Сло́во,* ве́сь Боже́ственный Огнь су́щее,* неопа́льно носи́ла еси́,* ма́ніемъ Нося́щаго вся́.* Тѣ́мже не преста́й, Влады́чице,* рабы́ Твоя́ при́сно ми́лостію посѣща́ти:* прія́ла бо еси́ отъ Сы́на Твоего́ и Бо́га да́ръ* стро́ити и покрыва́ти* христоимени́тое ста́до Твое́.

Сла́ва, и ны́нѣ, гла́съ 4:

При́зри на моле́нія Твои́хъ ра́бъ, Всенепоро́чная, утоля́ющи лю́тая на ны́ воста́нія, вся́кія ско́рби на́съ измѣня́ющи: Тя́ бо еди́ну, тве́рдое и извѣ́стное утвержде́ніе и́мамы, и Твое́ предста́тельство стяжа́хомъ, да не постыди́мся, Влады́чице, Тя́ призыва́ющіи. Потщи́ся на умоле́ніе Тебѣ́ вѣ́рно вопію́щихъ: ра́дуйся, Влады́чице, всѣ́хъ по́моще, ра́досте и покро́ве, и спасе́ніе ду́шъ на́шихъ.

Тропа́рь, гла́съ 8: Къ Богоро́дицѣ прилѣ́жно ны́нѣ притеце́мъ... два́жды, и другíй: Не умолчи́мъ никогда́, Богоро́дице... еди́ножды. [Пи́саны на ма́лѣй вече́рни.]


НА УТРЕНИ,
На Бо́гъ Госпо́дь: пе́рвый тропа́рь два́жды. Сла́ва, и ны́нѣ, вторы́й тропа́рь.

По 1-мъ стихосло́віи сѣда́ленъ, гла́съ 5:

Утоли́ болѣ́зни многовоздыха́ющія души́ моея́, утоли́вшая вся́ку сле́зу отъ лица́ земли́, Ты́ бо человѣ́ковъ болѣ́зни отгоня́еши и грѣ́шныхъ ско́рби разрѣша́еши, Тебе́ бо вси́ стяжа́хомъ наде́жду и утвержде́ніе, Пресвята́я Ма́ти Дѣ́во.

Сла́ва, и ны́нѣ, то́йже.

По 2-мъ стихосло́віи сѣда́ленъ, гла́съ 6:

Упова́ніе мíра, блага́я Богоро́дице Дѣ́во, Твое́ и еди́ное стра́шное предста́тельство про́симъ: умилосе́рдися на лю́ди безпомо́щныя и моли́ Ми́лостиваго Бо́га изба́витися душа́мъ на́шимъ отъ вся́каго преще́нія, еди́на Благослове́нная.

Сла́ва, и ны́нѣ, то́йже.

На поліеле́и велича́ніе:

Досто́йно е́сть велича́ти Тя́, Богоро́дице, честнѣ́йшую херуви́мъ и сла́внѣйшую безъ сравне́нія серафи́мъ.

[Псало́мъ избра́нный: Помяни́, Го́споди, Дави́да и всю́ кро́тость его́...]

По поліеле́и сѣда́ленъ, гла́съ 6:

Преложе́ніе скорбя́щихъ, премѣне́ніе боля́щихъ еси́, Богоро́дице Всепѣ́тая: спаси́ гра́дъ Тво́й и лю́ди, бори́мыхъ умире́ніе, обурева́емыхъ тишино́, еди́на Предста́тельнице вѣ́рныхъ.

Сла́ва, и ны́нѣ, то́йже.

Та́же, степе́нна, 1-й антифо́нъ 4-го гла́са. Проки́менъ, гла́съ 4: Помяну́ и́мя Твое́* во вся́комъ ро́дѣ и ро́дѣ. Сти́хъ: Слы́ши, Дщи́, и ви́ждь, и приклони́ у́хо Твое́. Вся́кое дыха́ніе... Ева́нгеліе отъ Луки́, зача́ло 4: Во дни́ о́ны, воста́вши Маріа́мъ... Псало́мъ 50-й. Сла́ва: Моли́твами Богоро́дицы... И ны́нѣ: то́йже. Поми́луй мя́, Бо́же...

И стихи́ра, гла́съ 6:

Арха́нгельски воспои́мъ, вѣ́рніи, небе́сный черто́гъ и две́рь запеча́тану вои́стину: ра́дуйся, Ея́же ра́ди отрасте́ на́мъ Спа́съ всѣ́хъ Христо́съ, Жизнода́вецъ и Бо́гъ; низложи́, Влады́чице, мучи́тели, безбо́жныя враги́ на́ша, руко́ю Твое́ю, Пречи́стая, упова́ніе христіа́нъ.

Кано́на два́. Пе́рвый кано́нъ, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Ку́ю Ти́ досто́йную пѣ́снь принесе́тъ на́ше неможе́ніе? то́чію обра́довательную, е́йже на́съ Гавріи́лъ та́йно научи́лъ е́сть: ра́дуйся, Богоро́дице Дѣ́во, Ма́ти Неневѣ́стная.

Ра́дуйся, благода́ти исто́чниче; ра́дуйся, лѣ́ствице и две́рь небе́сная; ра́дуйся, свѣ́щниче, и ста́мно злата́я, и горо́ несѣко́мая, Яже Жизнода́вца Христа́ мíрови ро́ждшая.

Всея́ моея́ жи́зни предста́тельнице, отъ бѣ́дъ мно́гихъ изба́ви мя́, да благода́рственный гла́съ воспѣва́ю Ти́, Богоневѣ́сто Пречи́стая, и бу́дущія мя́ исхити́ му́ки.

Яже всѣ́мъ удо́бь послу́шная въ ско́рби и въ печа́ли помога́ющая, Богоро́дице блага́я, благода́ть пода́ждь пѣ́ти Тя́ дерза́ющимъ, Влады́чице, скорбя́щихъ ра́досте.

Многобога́тную благода́ть стяжа́вши, Влады́чице, дерзнове́нною Твое́ю моли́твою пресла́вно изми́ мя отъ напа́стей, убо́гаго раба́ Твоего́, скорбя́щихъ ра́досте.

Яже еди́на въ напа́стехъ и ско́рбехъ защища́ющая, подъ кро́въ Тво́й, Пречи́стая, прибѣга́ющихъ те́плѣ, пріими́ я́ко Преблага́я, я́же отъ се́рдца моле́нія.

Инъ кано́нъ, гла́съ 8.
Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Мо́ря жите́йскаго волна́ми потопля́емь и напа́стьми лю́тыми одержи́мь, ко приста́нищу устреми́хся невла́емому — покро́ву Твоему́: тѣ́мже мя́ изба́ви, Богоро́дице, отъ лю́тыхъ.

Положи́ Тя приста́нище су́щимъ въ бѣда́хъ, Чи́стая, Бо́гъ, Иже отъ Тебе́ благоволи́вый воспрія́ти пло́ть. Тѣ́мже Ти́, припа́дающе, взыва́емъ: да́руй по́мощь Твою́ рабо́мъ Твои́мъ.

Еди́на Благослове́нная и Богора́дованная, Яже Ра́дость человѣ́комъ ро́ждши неизрече́нную, печа́ли отыми́ души́ моея́, молю́ся, и возвесели́ се́рдце мое́.

Изба́ви мя́, Пречи́стая, бѣсо́вскія пре́лести, озлобле́нія же, и вре́да, и искуше́нія, да вѣ́рою Тя́ сла́влю, су́щую по Бо́зѣ засту́пницу и покро́въ мо́й.

Яже ненадѣ́ющихся наде́жда, па́дшихъ исправле́ніе, печа́льныхъ утѣше́ніе, Свѣ́тъ Боже́ственный ро́ждшая, ду́шу мою́, су́щую во тьмѣ́, просвѣти́.

Яко Гавріи́лъ Дѣ́вѣ, пріиди́те, вѣ́рніи, и мы́ вопіе́мъ благоговѣ́йно: вои́стинну укра́шена еси́, Чи́стая, ро́ждшая Ра́дость; ра́дуйся, Благослове́нная.

Катава́сія: Отве́рзу уста́ моя́...

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Утвержде́ніе бу́ди, и прибѣ́жище, и покро́въ, Дѣ́во Богороди́тельнице, вѣ́рою къ Тебѣ́ прибѣга́ющимъ и Бо́жію Тя́ Ма́терь исповѣ́дающимъ.

Крѣ́пость моя́, и ра́дость, и весе́ліе, и стѣна́ тве́рдая, и предста́тельница Ты́ еси́, Всенепоро́чная, искуше́ній и бѣ́дъ избавля́ющи мя́.

Ми́лостивнымъ и кро́ткимъ Твои́мъ о́комъ, Богороди́тельнице, зря́щи мя́ во обстоя́ніи и ско́рби одержи́ма, вско́рѣ свободи́: Тя́ бо призыва́ю на по́мощь.

Кропи́ши исцѣле́ній струи́ боля́щимъ, Дѣ́во, всю́ду, Тя́ бо исто́чника показа́ милосе́рдія, Влады́чице, Иже ми́лости Госпо́дь, изъ Тебе́ рожде́йся па́че ума́.

Исто́чникъ ми́лости, подая́й скорбя́щимъ утѣше́ніе, Ты́ еси́, тѣ́мже, Влады́чице, и мнѣ́ моли́твенныхъ Твои́хъ во́дъ исто́чникъ источи́, и угаси́ страсте́й пе́щь.

Отча́явся по́мощи вся́кія, къ Тебѣ́, Пренепоро́чная, держа́внѣй храни́тельницѣ и покро́ву, притеко́хъ: не отри́ни у́бо мене́ отъ боже́ственнаго покро́ва Твоего́.

Инъ.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ и пое́тъ Тя́ ду́хъ мо́й.

Ты́ еси́ земноро́дныхъ упова́ніе, и по́мощь, и ра́дость, покро́въ и прибѣ́жище, Влады́чице, Ма́ти Живота́. Тѣ́мже Тя́ мо́лимъ: Твою́ по́мощь низпосли́ всѣ́мъ пою́щимъ Тя́, Пречи́стая.

Иже Тобо́ю изба́вльшеся отъ бѣ́дъ и Тебе́ ра́ди ра́дость получи́вше, Ма́ти Безневѣ́стная, я́ко пода́тельницу благу́ю и засту́пницу благохва́льну вси́ прославля́емъ.

Благослове́нъ Пло́дъ чре́ва Твоего́, Дѣ́во Богоро́дице, всѣ́хъ ра́досте, Ра́дость бо всему́ мíру родила́ еси́ и весе́ліе, разгоня́ющее печа́ль грѣхо́вную, Богоневѣ́сто.

Тя́ храни́тельницу, Пресвята́я, въ напа́стехъ стяжа́хъ; Тебе́ по Бо́зѣ мою́ предста́тельницу и́мамъ неусы́пну, Тебе́ да обря́щу, Пречи́стая, избавля́ющую мя́ въ де́нь Суда́ вся́каго осужде́нія.

Возвели́чи ми́лость и заступле́ніе, Пречи́стая, Твои́хъ моли́твъ на мнѣ́ и изба́ви мя́ отъ напа́стей и скорбе́й, Ра́дость мíру ро́ждшая.

Яже ра́дости пріе́мшая исполне́ніе, пріими́ отъ на́съ, ра́бъ Твои́хъ, цѣлова́ніе арха́нгелово: ра́дуйся, Ра́дость ро́ждшая мíру; ра́дуйся, ста́мно, изъ нея́же ма́нна небе́сная всѣ́мъ вѣ́рнымъ дарова́ся; ра́дуйся, Благослове́нная.

Сѣда́ленъ, гла́съ 7:

Ра́дуйся, Со́лнца о́блаче мы́сленнаго и неизрече́ннаго, Влады́чице; ра́дуйся, всесвѣ́тлая свѣще́; ра́дуйся, свѣ́щниче всезлаты́й; Тобо́ю, Пресвята́я, Ева изба́вися отъ кля́твы. Но я́ко иму́щая дерзнове́ніе ко Благопремѣ́нному Сы́ну Твоему́ и Бо́гу, ма́тернею моли́твою не оскудѣ́й о на́съ моли́тися, Пречи́стая.

Сла́ва, и ны́нѣ, то́йже.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Наде́ждо ненаде́жныхъ, помо́щнице ни́щихъ, пла́чущихъ утѣше́ніе, согрѣша́ющихъ очище́ніе, руководи́тельнице заблу́дшихъ, боля́щихъ цѣле́бнице и исправле́ніе па́дающихъ, Влады́чице, спаси́ рабы́ Твоя́.

Не неприча́стни есмы́, Влады́чице, Твоего́ заступле́нія въ ско́рбехъ; тѣ́мже и ны́нѣ на́мъ помози́ вско́рѣ, лю́тѣ обурева́емымъ, ру́ку простира́ющи, Чи́стая; бу́ди ми́лостива болѣ́знемъ на́шимъ, Ма́ти Бо́жія, ра́дость ско́рую подаю́щи.

Вся́ блага́я и те́плая засту́пница су́щи грѣ́шникомъ и смире́ннымъ, Богороди́тельнице Пречи́стая Влады́чице, отъ бѣ́дъ и скорбе́й, и грѣхо́въ спаса́й рабы́ Твоя́.

Пресла́вную Твою́ Ма́терь, Христе́, пріими́ моля́щуюся о мíрѣ, ми́лостивно Тебѣ́ зову́щую: Сы́не Мо́й, пріими́ мольбу́ Мою́ и ути́ши гнѣ́въ, належа́щій земли́.

Кро́въ и заступле́ніе, и прибѣ́жище бу́ди ми́, Дѣ́во, рабу́ Твоему́, и изба́ви мя́ отъ безмѣ́рныхъ зо́лъ, воспѣва́ти Тя́, Пречи́стая: сла́ва неизрече́нному Рождеству́ Твоему́.

Наде́жда и щи́тъ, и утвержде́ніе Ты́ мнѣ́ еси́, Блага́я, и лю́тыхъ избавле́ніе, и просвѣще́ніе души́ мое́й, и хвала́, и стѣна́, и держа́ва.

Инъ.

Ирмо́съ: Изъ горы́ приосѣне́нныя, Сло́ве, проро́къ, еди́ныя Богоро́дицы, хотя́ща воплоти́тся богови́дно усмотри́ и со стра́хомъ славосло́вяше си́лу Твою́.

Отъ вели́кихъ и разли́чныхъ прегрѣше́ній же и напа́стей всегда́ спаса́еши мя́, тѣ́мже Тя́ я́ко ро́ждшую Го́спода молю́ и къ Тебѣ́ прибѣга́ю, непобѣди́мѣй по́мощи скорбя́щимъ: отъ бѣ́дъ изведи́ мольба́ми Твои́ми.

Бо́же мо́й Милосе́рде, Бо́же Человѣколю́бче, Воли́телю ми́лости, ны́нѣ на мя́ излíй Твою́ ми́лость: мо́литъ Тя́ наде́жда и засту́пница моя́, Ма́ти Твоя́.

Ми́лость Твою́ и милосе́рдіе на рабы́ Твоя́, Чи́стая, простри́, при́сно моля́щія Тя́, вся́кія ско́рби и му́ки избавля́ющи моли́твами Твои́ми.

Ра́дуйся, кра́сная пала́то Сло́ва, дѣ́вственный черто́же Царя́; ра́дуйся, похвало́ всѣ́хъ безпло́тныхъ; ра́дуйся, человѣ́ковъ ра́досте и по́моще и упова́ніе.

Спасе́ніе пода́ждь ми́ душе́вное и тѣле́сное, Пренепоро́чная, и неду́гующему да́руй цѣльбу́ и лю́тыхъ избавле́ніе.

О содѣ́яніихъ мои́хъ лука́выхъ и прегрѣше́ніихъ мно́гихъ кто́ возмо́жетъ умоли́ти Судію́, а́ще не Ты́, Чи́стая, еди́на согрѣша́ющихъ засту́пнице?

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Ты́ крѣ́пость моя́, Ты́ похвала́, и ра́дованіе, и храни́тельница ми́ еси́, и заступле́ніе, и прибѣ́жище, и предста́тельница непобѣди́ма, Пресвята́я Богоро́дице Дѣ́во, тѣ́мже спаси́ раба́ Твоего́.

Спаси́ мя, Влады́чице, изъ глубины́ напа́стей, и скорбе́й, и печа́лей, и страсте́й тѣле́сныхъ и въ тишинѣ́ боже́ственнѣй сохрани́ ду́шу мою́.

Моли́твеннице нело́жная, упова́ніе христіа́нъ, Обра́дованная, пріими́ мольбы́ отъ на́съ, прилѣ́жно призыва́ющихъ и моля́щихся Тебѣ́.

Покро́въ мо́й еси́ Ты́ и при́сное хвале́ніе, о Влады́чице Богоро́дице, ника́коже бо презира́еши къ Тебѣ́ прибѣга́ющихъ.

До́мъ Тя́ сла́вы, го́ру Бо́жію святу́ю, Чи́стая, невѣ́сту, черто́гъ, хра́мъ освяще́нія Сы́нъ Бо́жій, въ Тя́ всели́выйся, и ра́й сла́дости присносу́щныя на́мъ содѣ́ла.

Стѣ́ну необори́му, Чи́стая, моли́тву Твою́ стяжа́вше, вопіе́мъ Ти́: умилосе́рдися, о Влады́чице, и ви́димыя и неви́димыя враги́ прожени́.

Инъ.

Ирмо́съ: Мра́къ души́ моея́ разжени́, Свѣтода́вче Христе́ Бо́же, началоро́дную тму́ изгна́въ бе́здны, и да́руй ми́ свѣ́тъ повелѣ́ній Твои́хъ, Сло́ве, да у́тренюя, сла́влю Тя́.

Добро́ту Тя́ Іа́ковлю возлюби́ Бо́гъ, Дѣ́во Отрокови́це, украша́я вся́ Тобо́ю, омрачи́вшіяся преступле́ніемъ пе́рвѣе.

Ду́шу мою́ сохрани́, я́ко зѣ́ницу о́ка, подъ кро́вомъ крилу́ Твое́ю, Блага́я Пречи́стая, и отъ духо́въ лука́выхъ томле́нія и муче́нія изба́ви.

Изба́вльшеся Тобо́ю прама́тернія печа́ли, Богороди́тельнице, утѣше́нія испо́лнени бы́хомъ, Весе́ліе всѣ́мъ ро́ждшая и всемíрную Ра́дость, тѣ́мже, Всепѣ́тая, Твоя́ пѣсносло́вцы отъ бѣ́дъ Твои́ми моли́твами соблюди́.

Благодари́мъ Тя́, изба́вльшеся Тобо́ю грѣхо́въ мно́гихъ, и не́мощей, и болѣ́зней, и неду́гъ лю́тыхъ, Пречи́стая Влады́чице: наде́жда бо еси́ тверда́ Твои́мъ вѣ́рнымъ рабо́мъ.

Съ боже́ственнымъ соше́дшеся Гавріи́ломъ, возопіи́мъ Богоро́дицѣ вѣ́рно: ра́дуйся, Дѣ́во Свята́я, Благода́тная, Госпо́дь съ Тобо́ю, Иже Тебе́ ра́ди, потреби́въ печа́ль, подаде́ мíру ра́дованіе.

Боля́щую ду́шу мою́ исцѣли́, ро́ждшая всѣ́хъ Взе́млющаго неду́ги, Пречи́стая Влады́чице.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Боля́щихъ цѣли́тельницу, па́дающихъ воста́ніе, согрѣша́ющихъ очище́ніе, Богоро́дице, Тебе́ молю́, со слеза́ми припа́даю и зову́ Ти: я́ко сильна́ Сама́ мя спаси́, погиба́ющаго.

Ты́ еси́ стѣна́ неруши́ма, Ты́ еси́ покро́въ тве́рдъ, Богоро́дице Блага́я, Ты́ еси́ предста́тельница крѣпка́ рабу́ Твоему́: сего́ ра́ди призыва́ю Тя́ при́сно и притека́ю къ покро́ву Твоему́.

Мíрови ра́дость су́щи, Богоро́дице Чи́стая, ра́дуйся, Тебѣ́, Дѣ́во, зове́мъ со а́нгеломъ вѣ́рно: Твоея́ ра́дости сподо́би ны́, и печа́ль на́шу разори́.

Сла́дость а́нгеловъ, скорбя́щихъ ра́дость, христіа́нъ предста́тельница Ты́ еси́, Дѣ́во Ма́ти Госпо́дня: заступи́ на́съ и изба́ви вѣ́чныхъ му́къ.

Въ де́нь печа́ли, егда́ и́мамъ тѣле́сныхъ соу́зъ разрѣши́тся, предста́ни ми́, Богороди́тельнице, и обдержа́нія бѣсо́вскаго исхити́.

При́зри, Влады́чице, на мя́, смире́ннаго, и па́че наде́жды спаси́ мя: Ты́ бо еси́ упова́ніе и покро́въ ми́, жи́знь и свѣ́тъ се́рдцу моему́, Богоро́дице, и утвержде́ніе.

Инъ.

Ирмо́съ: Содержи́ма мя́, пріими́, Человѣколю́бче, грѣхи́ мно́гими, и припа́дающа щедро́тамъ Твои́мъ, я́ко проро́ка, Го́споди, и спаси́ мя.

Въ нощи́ и во дни́, я́вѣ и вта́й подъ Тво́й прибѣга́емъ кро́въ, Пречи́стая Дѣ́во, и́же Тя́ вѣ́рно славосло́вящіи.

Въ напа́стехъ засту́пницу Тя́ и́мамы тве́рду, въ ско́рбехъ крѣ́пкое спасе́ніе, поко́й въ печа́лехъ, въ бѣда́хъ по́мощь, Приснодѣ́во.

Добро́та честны́хъ святы́хъ а́нгелъ, ра́дованіе человѣ́къ всѣ́хъ Ты́ еси́, Богоро́дице Дѣ́во: Ты́ мя къ животу́ наста́ви.

Пала́та Царя́ Сла́вы и огнезра́чный была́ еси́ престо́лъ, Дѣ́во, херуви́мъ превы́шши и серафи́мъ, тѣ́мже Тя́ вся́кое дыха́ніе сла́витъ, я́ко Ма́терь Зижди́теля.

Ра́дуйся, клеще́ Угля Боже́ственнаго; ра́дуйся, проро́ковъ печа́ть и апо́столовъ похвало́, Пречи́стая Богоро́дице, Ея́же ра́ди отъ нетлѣ́нія свободи́хомся.

Бе́здну щедро́тъ ро́ждши, Богоро́дице Дѣ́во, ско́рбныхъ житія́ ду́шу мою́ спаси́ и ра́дости духо́вныя две́ри отве́рзи ми́: на Тя́ бо еди́ну наде́жду возложи́хъ.

Конда́къ, гла́съ 6:

Не и́мамы ины́я по́мощи, не и́мамы ины́я наде́жды, ра́звѣ Тебе́, Влады́чице, Ты́ на́мъ помози́, на Тебе́ надѣ́емся и Тобо́ю хва́лимся, Твои́ бо есмы́ раби́, да не постыди́мся.

Икосъ:

Простри́ дла́ни Твоя́, и́миже всѣ́хъ Влады́ку я́ко младе́нца прія́ла еси́, за мно́жество бла́гости; не оста́ви на́съ, всегда́ надѣ́ющихся на Тя́, бо́дренною Твое́ю моли́твою и неисче́тною просты́нею уще́дри на́съ, и пода́ждь душа́мъ на́шимъ милосе́рдіе Твое́, во вѣ́ки источа́ющи: Тебе́ бо и́мамы, грѣ́шніи, Засту́пницу отъ находя́щихъ на ны́ бѣ́дъ и зо́лъ. Но, я́ко иму́щи милосе́рдія щедро́ты, ускори́ на моли́тву, и потщи́ся на умоле́ніе, предста́тельствующи при́сно, Богоро́дице, чту́щихъ Тя́.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Страстьми́ престарѣ́вся и неосла́бными напа́стьми, и скорбьми́, и доспѣ́въ къ за́падомъ житія́ моего́, добродѣ́телей неприча́стенъ, лѣ́ностію снѣде́нъ бы́въ, вопію́ Ти, Влады́чице: утѣше́ніе земны́мъ, поми́луй мя́.

Ра́дуйся, исто́чниче присноживо́тныя воды́; ра́дуйся, раю́ пи́щный; ра́дуйся, стѣно́ вѣ́рныхъ; ра́дуйся, Неискусобра́чная; ра́дуйся, всемíрная ра́досте, Еюже на́мъ возсія́ хвали́мый отце́въ Бо́гъ и препросла́вленъ.

Всѣ́мъ, су́щимъ въ мíрѣ, засту́пница еси́ и стѣна́ христіа́номъ, и прибѣ́жище непосты́дно, Чи́стая Марíе. Тѣ́мже вѣ́рою Тя́ чту́ще, вопіе́мъ Христу́: оте́цъ на́шихъ Бо́же, благослове́нъ еси́.

О, благоутро́бія Твоего́, Дѣ́во Чи́стая! Рѣши́ши бо безмѣ́рныя печа́ли и напа́сти, призыва́ющимъ въ ну́ждѣ и обстоя́ніи: тѣ́мже и ны́нѣ помози́, Благослове́нная, Тя́ восхваля́ющимъ.

Еди́но упова́ніе и по́мощь вѣ́рнымъ су́щи, Богороди́тельнице, потщи́ся помощи́ рабо́мъ Твои́мъ, погружа́емымъ скорбьми́ и въ болѣ́знехъ су́щимъ, и прибѣга́ющимъ къ Тебѣ́ съ любо́вію души́.

Ра́дованіе благода́рственное Тебѣ́ прино́симъ, Ма́ти Бо́жія, я́ко вои́стинну Тобо́ю изба́влени вся́каго зла́го начина́нія, и согла́сно Тебѣ́ пое́мъ: благослове́на еси́.

Инъ.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́. Сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще, поя́ху: благослове́нъ еси́, Бо́же оте́цъ на́шихъ.

Водвори́хомся въ ве́черъ въ пла́чи печа́лей и ча́яніи злы́хъ, но Твои́мъ боголѣ́пнымъ кро́вомъ, Дѣ́во, обоже́ни бы́вше, обрѣто́хомъ ра́дость зау́тра: Ты́ бо спасла́ еси́ на́съ.

Яко боже́ственное прибѣ́жище покро́въ Тво́й, Влады́чице, вси́ стяжа́вше къ Бо́гу, въ напа́стехъ и гоне́ніихъ, и грѣсѣ́хъ къ Тебѣ́ прибѣга́емъ и Тобо́ю измѣне́ніе пріе́млемъ, Пречи́стая.

Грѣ́шниковъ прибѣ́жище, низве́рженныхъ исправле́ніе Ты́ еси́, Влады́чице: сего́ ра́ди притека́ю къ покро́ву Твоему́, спаси́ мя, Богоневѣ́сто.

Въ недоумѣ́ніи и печа́ли сы́й и въ бѣда́хъ, Пречи́стая, Тя́ призыва́ю те́плѣ отъ се́рдца моего́: предвари́, и изба́ви мя, и пода́ждь, Чи́стая, мнѣ́ утѣше́ніе.

Благослове́нная Дѣ́во, ра́досте скорбя́щихъ всѣ́хъ вѣ́рныхъ, отъ вся́каго искуше́нія и печа́ли, и зло́бы зави́дящихъ мнѣ́ изми́ и отъ грѣ́хъ и разли́чныхъ неду́гъ мя́ изба́ви.

Вся́ еси́ свѣтоно́сна, Свѣ́тъ незаходи́мый, Дѣ́во, пріе́мши и просвѣща́ющи, Чи́стая, вѣ́рою Тебѣ́ вопію́щія: Благослове́нъ, Пречи́стая, Пло́дъ Твоего́ чре́ва.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Ра́дуйся, престо́ле сла́вный Бо́жій; ра́дуйся, вѣ́рныхъ стѣно́, Еюже су́щимъ во тьмѣ́ возсія́ Свѣ́тъ — Христо́съ, Тебе́ блажа́щимъ и вопію́щимъ: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Пое́мъ Тя́, Пречи́стая и Ма́ти Бо́жія, и кто́ не сла́витъ Тя́, вои́стинну Благу́ю, су́щую наде́жду ду́шъ на́шихъ? тѣ́мже, Пречи́стая, и мою́ мольбу́ пріими́.

Ты́ еси́ спасе́ніе всѣ́хъ человѣ́къ, Яже Бо́га ро́ждшая неизрече́нно; Ты́ еси́ вѣ́рныхъ спаси́тельница, Богоро́дице, и слѣпы́хъ наста́вница, и па́дающихъ исправле́ніе, Тѣ́мже Тя́ восхваля́юще, Христу́ зове́мъ: благослови́те вся́ дѣла́ Го́спода, по́йте и превозноси́те Его́ во вся́ вѣ́ки.

Струи́ исцѣле́ній на́мъ всегда́, вѣ́рнымъ, Чи́стая, источа́еши: тѣ́мже незави́стную благода́ть взе́млюще, воспѣва́емъ Рождество́ Твое́, Чи́стая, и превозно́симъ во вся́ вѣ́ки.

На Тя́ возложи́хъ, Влады́чице, се́рдце, и ду́шу, и тѣ́ло: не и́мамъ бо ины́я наде́жды, ра́звѣ Тебе́, е́юже получу́ ми́лость. Тѣ́мже пода́ждь ми́ бога́тую Твою́ благода́ть.

На мольбу́ мою́ ны́нѣ умилосе́рдися и ра́дость въ печа́ли мѣ́сто да́руй ми́, да пою́ Тя, Влады́чице, и вопію́ Сы́ну Твоему́: благослови́те, вся́ дѣла́ Госпо́дня, Го́спода.

Инъ.

Ирмо́съ: На горѣ́ святѣ́й просла́вльшася и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Вся́ еси́ Чи́стая и Боже́ственныя сла́вы испо́лнена, Бли́жняя Моя́, — рече́ Ду́хъ Бо́жій, Тя́ провозвѣща́я, Пречи́стая. Юже пѣ́сньми воспѣва́емъ, пою́ще: тебѣ́ подоба́етъ ра́доватися, Бо́га Человѣ́ка ро́ждшей.

Ангеловъ похвало́ и человѣ́ковъ спасе́ніе, и спору́чница бу́ди ми́, Ма́ти Бо́жія: я́ко да обращу́ся и пріиму́ разрѣше́ніе пре́жде согрѣше́нныхъ въ вѣ́дѣніи и не въ вѣ́дѣніи.

Тя́ по Бо́зѣ упова́ніе спасе́нія въ напа́стехъ иму́ще, вѣ́рніи, взыва́емъ: вся́ дѣла́ Госпо́дня, Го́спода по́йте и превозноси́те Его́ во вѣ́ки.

Пріими́ пѣ́снь отъ худы́хъ усте́нъ, Дѣ́во Всепѣ́тая, вопію́щихъ Ти́: ра́дуйся, боля́щимъ тѣлесе́мъ врачевство́ и отча́яннымъ душа́мъ спасе́ніе.

Въ болѣ́знехъ и напа́стехъ одержи́мыя не пре́зри, Блага́я, но мольбу́ худу́ю услы́шавши, свободи́ на́съ отъ скорбе́й вели́кихъ, да вѣ́рно Твою́ ми́лость и заступле́ніе, Чи́стая, воспѣва́емъ.

Стоя́щихъ утвержде́ніе еси́ и па́дшихъ исправле́ніе, Дѣ́во, тѣ́мже мя́, па́дшаго, возста́ви, да Тя́ сла́влю, Благослове́нную и Обра́дованную.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Ра́дуйся, Марíе, вели́кое всея́ тва́ри чу́до; ра́дуйся, Дщи́ у́бо Дави́дова, Госпо́дня же Ма́ти; ра́дуйся, пѣ́ніе Гавріи́лово; ра́дуйся, прибѣ́жище и утвержде́ніе, и по́мощь всѣ́мъ, Пресвята́я, су́щимъ на земли́ грѣ́шникомъ.

Юже изво́лилъ еси́, Влады́ко, пріими́ ми́лостивно Моли́твенницу — Ма́терь Твою́, о на́съ, и Твоея́ бла́гости вся́ческая испо́лнятся: да Тя́ вси́ я́ко Благодѣ́теля велича́емъ.

О, Дѣ́во Блага́я! О, мíра ра́досте и прибѣ́жище! О, храни́лище вѣ́рныхъ и избавле́ніе скорбе́й! Ты́ предста́ни ми́ въ ча́съ сме́рти и изба́ви отъ бѣсо́въ, и́щущихъ поглоти́ти мя́.

Ты́ еси́ а́нгеловъ ра́дость, Ты́ еси́ пра́ведниковъ добро́та, Ты́ еси́ вѣ́рныхъ наде́жда, Ты́ еси́ соблюде́ніе на́ше, Ты́ еси́ мо́стъ, къ жи́зни нестарѣ́ющейся преводя́й вѣ́рою и любо́вію Тя́ велича́ющія.

О, Ма́ти вся́ческихъ Творца́, всесвѣ́тлая печа́льныхъ утѣ́хо, оскорбля́емыхъ предста́тельнице и немощны́хъ засту́пнице, сохрани́ мя, Блага́я, отъ бѣ́дъ и прило́гъ вра́жіихъ.

Еди́на боля́щихъ посѣще́ніе, еди́на па́дшихъ исправле́ніе, Влады́чице, еди́на къ Бо́гу руководи́тельнице и вхо́де, еди́на хода́таице вѣ́чныхъ бла́гъ, поми́луй мя́ еди́наго, па́че всѣ́хъ согрѣши́вшаго.

Инъ.

Ирмо́съ: Благослове́нъ Госпо́дь Бо́гъ Изра́илевъ, воздви́гнувый ро́гъ спасе́нія на́мъ въ дому́ Дави́довѣ, Отрока Своего́, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра.

Ра́дости на́мъ вѣ́чныя и жи́зни яви́лася еси́ преесте́ственнѣ, Богороди́тельнице, Хода́таица, Чи́стая, Спа́са всѣ́хъ ро́ждшая, отъ лица́ земна́го вся́ку сле́зу я́вѣ отъе́мшаго и всѣ́мъ ра́дость пода́вшаго.

Ра́дость и весе́ліе, и ра́дованіе боже́ственное, Дѣ́во неискусому́жная, на́мъ умно́жися Бо́жіе: се́ бо, пла́чущіися лю́тѣ, ра́дуемся моли́твами Твои́ми.

Подъ Твое́ милосе́рдіе прибѣга́ющіи вѣ́рою избавля́ются ско́рбныхъ бѣ́дъ житія́: тѣ́мже и а́зъ ко Твоему́ покро́ву прибѣго́хъ, Богоро́дице.

Псалмы́ Тя́ воспѣва́емъ, Благода́тная, и немо́лчно, е́же ра́дуйся, прино́симъ: Ты́ бо источи́ла еси́ всѣ́мъ ра́дость.

Иска́пающая боже́ственную сла́дость, всѣ́хъ Сла́дость ро́ждшая, ду́шу мою́ услади́, я́домъ зміи́нымъ огорче́нную, отчужда́ющи мя́ го́рькаго вре́да всегда́ хода́тайствомъ Твои́мъ, предста́тельнице и ра́досте вѣ́рныхъ, Влады́чице.

Благословя́, благословлю́ Тя, Пречи́стая, и велича́ю те́плѣ: благослови́ мя у́бо, Твоего́ пѣвца́, и вся́ческихъ ну́ждныхъ и печа́льныхъ изба́ви, и сохрани́ Твои́ми дла́ньми непобѣди́ма.

Свѣти́ленъ. Подо́бенъ: Черто́гъ Тво́й.

Подъ кро́въ Тво́й, Дѣ́во Госпоже́, прибѣга́емъ вси́ ро́ди человѣ́честіи: просвѣти́ ны свѣ́томъ Рождества́ Твоего́, грѣ́шныя рабы́ Твоя́, моля́щіяся прилѣ́жно и покланя́ющіяся Тебѣ́, и прося́щія умире́нія мíрови и душа́мъ на́шимъ ве́лія ми́лости. [Три́жды.]

На хвали́техъ стихи́ры на 4, гла́съ 2:

Пріиди́те, возра́дуемся держа́внѣй засту́пницѣ ро́да на́шего,* Цари́цѣ Богоро́дицѣ,* пріиди́те къ ти́хому и чу́дному Ея́ покро́ву, веселя́щеся.* Да́руетъ бо Богоро́дица вѣ́рнымъ* оби́льныя да́ры цѣле́бныя* отъ неистощи́маго исто́чника ми́лости:* тьмы́ избавля́етъ на́съ искуше́ній и бѣ́дъ, и обстоя́ній,* благоче́стно и богопрія́тно прославля́ющихъ и чту́щихъ Ю,* я́ко Всеблагослове́нную* и Пречи́стую Ма́терь Христа́ Бо́га.* Тѣ́мже ра́достно къ Не́й воззове́мъ:* ра́дуйся, пала́то Сло́ва;* ра́дуйся, Невѣ́сто неневѣ́стная;* ра́дуйся, ра́досте на́ша;* ра́дуйся, Ма́ти Живота́,* благослове́нъ Пло́дъ чре́ва Твоего́.

Ра́дуйся, Всеблагослове́нная Марíе,* Ма́ти Христо́ва;* ра́дуйся, су́щая ра́досте всего́ мíра;* ра́дуйся, Всеблага́я христіа́номъ помо́щнице;* ра́дуйся, оби́димыхъ засту́пнице;* ра́дуйся, неду́гующимъ ско́рое и извѣ́стное прибѣ́жище;* ра́дуйся, си́рымъ и вдови́цамъ боже́ственное утѣше́ніе;* ра́дуйся, всѣ́хъ а́лчущихъ покро́ве и пита́тельнице;* ра́дуйся, всѣ́мъ су́щимъ въ бѣда́хъ ско́рое избавле́ніе;* ра́дуйся, Богоневѣ́сто Влады́чице,* упова́ніе христіа́нъ.

Ра́дуйся, всѣ́хъ христіа́нъ наде́ждо и покро́ве,* Богома́ти Всенепоро́чная,* всея́ тва́ри честнѣ́йшая,* небе́сныхъ и земны́хъ сла́внѣйшая:* всѣ́хъ бо родила́ еси́ Творца́ и Бо́га.* Но́, о Влады́чице,* пріими́ ми́лостивно моле́нія на́ша* и спаса́й на́съ всегда́ я́ко Блага́я и Ми́лостивая:* да съ весе́ліемъ лобыза́емъ пресвяту́ю Твою́ ико́ну* и при́сно, ра́дующеся,* восхваля́емъ и велича́емъ Тя́,* обра́дованная ра́досте вѣ́рныхъ ра́бъ Твои́хъ. [Два́жды.]

Сла́ва, и ны́нѣ, гла́съ 6:

Дне́сь собо́ри вѣ́рныхъ, соше́дшеся, духо́вно да торжеству́емъ, и Богоотрокови́цу Дѣ́ву и Богоро́дицу пѣ́сньми благохва́льными ублажи́мъ, глаго́люще: ра́дуйся, еди́на избра́нная отъ всѣ́хъ родо́въ въ Ма́терь Превѣ́чнаго Сло́ва; ра́дуйся, вмѣсти́лище Невмѣсти́маго всѣ́ми; ра́дуйся, а́нгеловъ и серафи́мовъ ра́досте; ра́дуйся, проро́ковъ проповѣ́даніе и похвало́; ра́дуйся, апо́столовъ и святи́телей удобре́ніе; ра́дуйся, му́чениковъ крѣ́посте и всѣ́хъ пра́ведныхъ сла́во; ра́дуйся, держа́вный покро́ве вѣ́рныхъ; ра́дуйся, скорбя́щихъ боже́ственное утѣше́ніе; ра́дуйся, въ бѣда́хъ и напа́стехъ су́щимъ ско́рое избавле́ніе; ра́дуйся, грѣ́шниковъ всѣ́хъ прибѣ́жище и блага́я засту́пнице; ра́дуйся, Благода́тная и Обра́дованная, съ Тобо́ю Госпо́дь, подая́й мíрови Тобо́ю ве́лію ми́лость.

Славосло́віе вели́кое. [Ектеніи́.] И отпу́стъ.



НА ЛИТУРГІИ,
Слу́жба Богоро́дицы.

[Блаже́нна отъ кано́новъ, пѣ́снь 3-я и 6-я. Проки́менъ, гла́съ 3, пѣ́снь Богоро́дицы: Вели́читъ душа́ Моя́ Го́спода, и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отны́нѣ ублажа́тъ Мя́ вси́ ро́ди. Апо́столъ къ Филипписíемъ, зача́ло 240. Аллилу́ія, гла́съ 8: Слы́ши Дщи́ и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. Ева́нгеліе Луки́, зача́ло 54. Прича́стенъ: Ча́шу спасе́нія пріиму́, и и́мя Госпо́дне призову́.]

Источникъ: Минíя дополни́тельная. — СПб.: С.-Петербургская Сѵнодальная Типографія, 1909. — Л. 115-123 об.

/ Къ оглавленію раздѣла /


Наверхъ / Къ титульной страницѣ

0