Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 26 сентября 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 23-й де́нь.
Слу́жба на пренесе́ніе моще́й свята́го Іа́кова Борови́чскаго, чудотво́рца.

ВЕЧЕРЪ,
Блаже́нъ му́жъ.., [1-й антифо́нъ.] На Го́споди воззва́хъ: стихи́ры [на 8], гла́съ 5. Подо́бенъ: Ра́дуйся.

Ра́дуйся, богому́дре о́тче Іа́кове, твоя́ бо мо́щи всечестны́я и святы́я оби́льно всегда́ источа́ютъ исцѣле́нія вѣ́рно приходя́щимъ, благоуха́нія всѣ́хъ исполня́юще духо́внаго и тму́ де́монскую дале́че отгоня́юще. Тѣ́мже мо́лимъ тя́, [раби́ твои́,] вся́каго навѣ́та вра́жія на́съ изба́вити, я́ко да ра́достною душе́ю и чи́стымъ се́рдцемъ, свято́е твое́ пренесе́ніе духо́вно пра́зднующе, мо́лимся дарова́ти душа́мъ на́шимъ ми́ръ и ве́лію ми́лость. [Три́жды.]

Ра́дуйся, прему́дре о́тче Іа́кове, а́нгельское на земли́ житіе́ пожи́лъ еси́, ду́хови пло́ть повину́лъ еси́, поще́ніемъ же и воздержа́ніемъ свѣ́тъ мíрови яви́лся еси́, украси́лся бо еси́, блаже́нне, и Святѣ́й Тро́ицѣ оби́тель себе́ содѣ́лалъ еси́, и дарова́нія чуде́съ отъ Нея́ сподо́бися исцѣля́ти разли́чныя неду́ги приходя́щимъ съ вѣ́рою къ ра́цѣ моще́й твои́хъ, и пра́зднующимъ свято́е пренесе́ніе. Моли́ дарова́ти душа́мъ на́шимъ ми́ръ и ве́лію ми́лость. [Два́жды.]

Сла́ва, гла́съ 4:

Преблаже́нне о́тче на́шъ Іа́кове, благода́тію Боже́ственнаго Ду́ха оби́льно всегда́ источа́еши исцѣле́нія съ вѣ́рою приходя́щимъ къ ра́цѣ моще́й твои́хъ, ю́же прія́лъ еси́ отъ всѣ́хъ Царя́ Христа́ Бо́га. Его́же дѣ́телію ду́хи лука́выя отъ человѣ́къ отгоня́еши, исцѣля́еши стра́сти неисцѣ́льныя и просвѣща́еши вѣ́рныхъ сердца́ блиста́ніемъ чуде́съ твои́хъ. Съ вы́шними же ли́ки ны́нѣ на небесѣ́хъ водворя́ешися, богому́дре, и ра́дости неизрече́нныя сопричаща́ешися. Тѣ́мже дне́сь пра́зднующе пренесе́ніе твое́, моли́, мо́лимъ тя́, моли́твами твои́ми дарова́ти христолюби́вому Импера́тору посо́біе на враги́ и ми́ръ мíрови испроси́, належа́щихъ на́мъ скорбе́й душе́вныхъ и тѣле́сныхъ страсте́й свободи́ моли́твами твои́ми.

И ны́нѣ, богоро́диченъ:

Иже Тебе́ ра́ди [богооте́цъ проро́къ Дави́дъ пѣ́сненно о Тебѣ́ провозгласи́, вели́чія тебѣ́ Сотво́ршему: предста́ Цари́ца одесну́ю Тебе́. Тя́ бо Ма́терь, Хода́таицу живота́ показа́, безъ отца́ изъ Тебе́ вочеловѣ́читися благоволи́вый Бо́гъ, да Сво́й па́ки обнови́тъ о́бразъ, истлѣ́вшій страстьми́, и заблу́ждшее горохи́щное обрѣ́тъ овча́, на ра́мо воспріи́мъ, къ Отцу́ принесе́тъ, и Своему́ хотѣ́нію, съ небе́сными соедини́тъ си́лами, и спасе́тъ, Богоро́дице, мíръ, Христо́съ имѣ́яй ве́лію и бога́тую ми́лость].

Вхо́дъ. Проки́менъ дне́. И чте́нія три́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведныхъ же ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ же, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́, или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 4. Самогла́сны:

Пріиди́те, вѣ́рніи, хвала́ми, соше́дшеся, ны́нѣ соста́вимъ торжество́ въ честнѣ́мъ пра́здницѣ честна́го пренесе́нія блаже́ннаго Іа́кова, духо́вно пра́зднующе, къ нему́ возопіе́мъ: моли́, мо́лимся, вѣ́рному Импера́тору на́шему побѣди́тельная на враги́ дарова́ти, тебе́ бо моли́твенника ко Влады́цѣ те́пла стяжа́хомъ, подаю́щаго мíрови ве́лію ми́лость.

Возсія́ дне́сь пресвѣ́тлая па́мять твоя́, богому́дре Іа́кове, созыва́ющи ны́ празднолю́бцы къ похвале́нію и сла́вѣ Христа́ Бо́га на́шего. Тѣ́мъ, притека́юще къ ра́цѣ моще́й твои́хъ, исцѣле́нія да́ръ пріе́млемъ, и тебе́, просла́вльшаго Спа́са Христа́, воспѣва́емъ во вѣ́ки, непреста́нно сла́вяще.

Отче преблаже́нне Іа́кове, дне́сь любо́вію соше́дшеся къ честнѣ́й и чудотво́рнѣй ти́ ра́цѣ, свѣ́тло торжеству́юще гла́сы пѣ́сненными, псало́мски вопію́ще, глаго́лемъ: блаже́нъ му́жъ, боя́йся Го́спода, непоро́чно бо въ за́повѣдехъ Госпо́днихъ ходи́лъ еси́, тѣ́мже ны́нѣ съ пра́ведными на небесѣ́хъ водворя́ешися, съ ни́миже моли́ся Го́сподеви спасти́ся душа́мъ на́шимъ.

Сла́ва, гла́съ 4:

Духо́вною благода́тію отъе́млеши неду́ги страсте́й и отго́ниши ду́хи лука́выя, и исцѣля́еши стра́сти неисцѣ́льныя, Іа́кове всесла́вне, и просвѣща́еши сердца́ вѣ́рныхъ блиста́ніи чуде́съ твои́хъ. Тѣ́мже дне́сь гла́сы немо́лчными воспѣва́емъ пресвѣ́тлую и свѣтоно́сную па́мять твою́.

И ны́нѣ, богоро́диченъ:

При́зри на моле́нія [Твои́хъ ра́бъ, Всенепоро́чная, утоля́ющи лю́тая на ны́ воста́нія, вся́кія ско́рби на́съ измѣня́ющи, Тя́ бо еди́ну тве́рдое и извѣ́стное утвержде́ніе и́мамы, и Твое́ предста́тельство стяжа́хомъ, да не постыди́мся, Влады́чице, Тя́ призыва́ющіи, потщи́ся на умоле́ніе Тебѣ́ вѣ́рно вопію́щихъ: ра́дуйся, Влады́чице, всѣ́хъ по́моще, ра́досте и покро́ве, и спасе́ніе ду́шъ на́шихъ].

На стихо́внѣ стихи́ры, гла́съ 8. Подо́бенъ: О, пресла́внаго чудесе́!

О, пресла́вное чу́до!* Бо́жіимъ манове́ніемъ ра́ка твоя́, блаже́нне,* на крѣ́ [1] прише́дши, ста́ недви́жимо.* Вѣ́рніи же лю́діе, обрѣ́тше тя́,* ра́достію и любо́вію пріе́мляху.* Моли́твами Твоего́ уго́дника,* Христе́ Бо́же,* спаси́ ду́ши на́ша я́ко Милосе́рдъ.

Сти́хъ: Честна́ предъ Го́сподемъ* сме́рть преподо́бныхъ Его́.

О, пресла́вное чу́до!* Сія́ніемъ Ду́ха Пресвята́го* просвѣща́еши ве́сь мíръ,* притека́ющихъ къ ра́цѣ моще́й твои́хъ,* богому́дре Іа́кове.* Тѣ́мже, вѣ́рніи, соше́дшеся* въ твое́ пренесе́ніе,* Го́сподеви вопію́тъ:* Іису́се Царю́,* спаси́ ду́ши на́ша я́ко Милосе́рдъ.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

О, пресла́вная и́стинная чудеса́ блаже́ннаго Іа́кова,* ка́ко возмо́жемъ похвали́ти* или́ я́сно изглаго́лати?* Подае́тъ бо разли́чная исцѣле́нія* не то́кмо притека́ющимъ къ ра́цѣ моще́й его́,* но и вездѣ́ призыва́ющимъ и́мя его́,* никогда́ же ску́дны свои́хъ чуде́съ оставля́етъ.* И ны́нѣ моли́ся, блаже́нне Іа́кове,* дарова́ти на́мъ ве́лію ми́лость.

Сла́ва, гла́съ 6:

Возсія́ дне́сь пресвѣ́тлое торжество́, о́тче богому́дре Іа́кове, ты́ бо отъ младе́нства Бо́гу прилѣпи́лся и Того́ стопа́мъ послѣ́довалъ еси́, мірскíй мяте́жъ, а́ки ну́ждное волне́ніе, преплы́лъ еси́, и ны́нѣ на небесѣ́хъ живе́ши. Мы́ же, покланя́ющеся моще́мъ твои́мъ, вѣ́рно отъ души́ Христа́ славосло́вимъ, да́вшаго на́мъ тебе́, те́пла моли́твенника къ Бо́гу. Къ Нему́же о на́съ моли́ся, чту́щихъ и вѣ́рно пра́зднующихъ твое́ пренесе́ніе, спасти́ся душа́мъ на́шимъ.

И ны́нѣ, богоро́диченъ:

Творе́цъ и Изба́витель [мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ].

Тропа́рь, гла́съ 1:

Боже́ственною благода́тію просвѣти́вся, и по сме́рти да́руеши исцѣле́ніе притека́ющимъ къ ра́цѣ моще́й твои́хъ, прему́дре Іа́кове: тѣ́мже и мы́ ны́нѣ чти́мъ честны́хъ моще́й твои́хъ пренесе́ніе, веселя́ще вку́пѣ ду́ши и тѣлеса́. Тѣ́мъ вси́ вопіе́мъ: сла́ва Да́вшему ти́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія!

Сла́ва, и ны́нѣ, богоро́диченъ:

Гавріи́лу вѣща́вшу [Тебѣ́, Дѣ́во, ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ].


НА УТРЕНИ,
[На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ.]

По 1-мъ стихосло́віи сѣда́ленъ, гла́съ 4. Подо́бенъ: Яви́лся еси́.

Пресвѣ́тлую твою́ па́мять дне́сь торжеству́юще, Спа́са и Го́спода моли́ти прилѣ́жно тя́ мо́лимъ, о́тче Іа́кове, всѣ́мъ пода́ти согрѣше́ній проще́ніе. [Два́жды.]

Сла́ва, и ны́нѣ, богоро́диченъ:

Те́плое заступле́ніе су́щимъ въ бѣда́хъ, и Помо́щницу на́шу, и къ Бо́гу премѣне́ніе, Еюже тли́ изба́вихомся, Богоро́дицу, вѣ́рніи, ублажа́емъ.

По 2-мъ стихосло́віи сѣда́ленъ, гла́съ 1. Подо́бенъ: Ли́къ а́нгельскій.

Житіе́ на земли́ благоче́стно сконча́въ, прія́телище Ду́ха Свята́го яви́лся еси́, просвѣща́я къ тебѣ́ вѣ́рою притека́ющія, блаже́нне. Тѣ́мже моли́ Влады́ку и Го́спода просвѣти́ти ду́ши на́ша, воспѣва́ющихъ тя́, Іа́кове богоблаже́нне, о́тче на́шъ. [Два́жды.]

Сла́ва и ны́нѣ, богоро́диченъ:

Всѣ́хъ Творца́, и Го́спода и Зижди́теля, Всенепоро́чная, Чи́стая, Ду́хомъ Боже́ственнымъ въ ложесна́хъ заче́нши, безъ истлѣ́нія родила́ еси́, Его́же сла́вяще, Тя́ воспѣва́емъ, Дѣ́во, я́ко пала́ту всѣ́хъ Царя́ и мíрови спасе́ніе.

По Хвали́те и́мя Госпо́дне...

Припѣ́въ: Ублажа́емъ тя́, святы́й пра́ведный Іа́кове, и чте́мъ святу́ю па́мять твою́, ты́ бо мо́лиши за ны́ Христа́ Бо́га на́шего.

Псало́мъ [избра́нный]: Терпя́ потерпѣ́хъ Го́спода...

По поліеле́и сѣда́ленъ, гла́съ 8. Подо́бенъ: Прему́дрости.

Плотскíя стра́сти воздержа́ніемъ, о́тче, увяди́лъ еси́ и благода́ть духо́вную воспрія́лъ еси́, тѣ́мъ и сосу́дъ досто́инъ бы́лъ еси́, и по кончи́нѣ яви́лся еси́, стра́сти очища́я, о́тче Іа́кове, моли́ Христа́ Бо́га, грѣхо́въ оставле́ніе дарова́ти, честву́ющимъ любо́вію свято́е твое́ пренесе́ніе. [Два́жды.]

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи, о́гнь бо всели́ся въ Тя́ Божества́, и я́ко Младе́нца дои́ши Зижди́теля и Го́спода. Тѣ́мъ а́нгельскій и человѣ́ческій ро́дъ досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Та́же степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Пріиди́те, вси́ лю́діе, хвалу́ принесе́мъ блаже́нному, вопію́ще: ра́дуйся, пресвѣ́тлый сто́лпе, просвѣща́яй на́съ чуде́съ свѣтлостьми́; ра́дуйся, росоно́сный о́блаче, пла́мень погаша́ющь страсте́й и ороша́ющь вѣ́рныхъ мы́сли; ра́дуйся, вѣ́рному Импера́тору на́шему, моля́йся Христу́, е́же пода́ти побѣ́ды на [пога́ныя] враги́ и умири́ти мíръ, и спасти́ ду́ши на́ша.

Кано́нъ Богоро́дицы, со ирмосо́мъ на 6. И свята́го кано́нъ на 8, его́же краегране́сіе по алфави́ту до девя́тыя пѣ́сни. Соверше́нъ же списа́вшаго и́менемъ. Гла́съ 5.

Пѣ́снь 1.

Ирмо́съ: Спаси́телю Бо́гу, въ мо́ри лю́ди немо́крыми нога́ми наста́вльшему и фарао́на со всево́инствомъ пото́пльшему, Тому́ еди́ному пои́мъ, я́ко просла́вися.

Агнче Бо́жій, Сло́ве, да́ждь ми́ сло́во недосто́йному Твоему́ рабу́, да возмогу́ воспѣ́ти въ па́мять пренесе́нія моще́й блаже́ннаго Іа́кова торжество́, взыва́я: Тому́ еди́ному воспои́мъ, я́ко просла́вися.

Безвѣ́стная и та́йная послѣ́днему ро́ду явле́на бы́ша честны́я мо́щи твоя́, прему́дре Іа́кове, къ ни́мже прикаса́ющеся, освяще́ніе пріе́млемъ, Го́сподеви пою́ще: Того́ еди́наго воспои́мъ, я́ко просла́вися.

Всесвята́я твоя́ па́мять возсія́ мíрови, я́ко со́лнце, просвѣща́етъ ду́ши благоче́стно пою́щихъ тя́, въ не́йже моли́ся, блаже́нне, пода́ти очище́ніе грѣхо́въ Го́сподеви зову́щимъ: Того́ еди́наго воспои́мъ, я́ко просла́вися.

Богоро́диченъ: Господороди́тельнице Чи́стая, небе́сный вхо́де, горо́ несѣко́мая, две́рь непроходи́мая, апо́столомъ сла́ва, [му́ченикомъ весе́ліе,] преподо́бнымъ красота́, пріими́ моле́ніе на́ше, е́же Ти́ прино́симъ въ па́мять блаже́ннаго Іа́кова, Го́сподеви пою́ще: Того́ еди́наго воспои́мъ, я́ко просла́вися.

Катава́сія: Отве́рзу уста́ моя́...

Пѣ́снь 3.

Ирмо́съ: Водрузи́вый на ничесо́мже зе́млю повелѣ́ніемъ Твои́мъ, и повѣ́сивши неодержи́мо тяготѣ́ющую, на недви́жимѣмъ, Христе́, ка́мени за́повѣдей Твои́хъ, Це́рковь Твою́ утверди́, еди́не Бла́же и Человѣколю́бче.

Де́нь пра́зднственный дне́сь пра́зднуютъ наро́ди Вели́каго Нова́града, обрѣто́ша бо мо́щи блаже́ннаго Іа́кова, я́ко нѣ́кое сокро́вище бога́тно, непреста́нно Христу́ зову́ще: Це́рковь Твою́ утверди́, еди́не Бла́же и Человѣколю́бче.

Естество́ тлѣ́нное нивочто́же вмѣни́въ, житіе́ чи́стое на земли́ пожи́лъ еси́ и сего́ ра́ди наслѣ́довалъ еси́ небе́сное селе́ніе. Моли́ и на́мъ получи́ти та́мошнее блаже́нство, пра́зднующимъ твое́ пренесе́ніе, да непреста́нно Христу́ зове́мъ: Це́рковь Твою́ утверди́, еди́не Бла́же и Человѣколю́бче.

Житіе́ твое́, я́ко со́лнце, въ сердца́ вѣ́рныхъ возсія́, зарю́ чуде́съ испуща́я, тѣ́мже и на́съ невече́рнимъ Свѣ́томъ озари́, всечестно́е твое́ пренесе́ніе почита́ющихъ, да непреста́нно Христу́ зове́мъ: Це́рковь Твою́ утверди́, еди́не Бла́же и Человѣколю́бче.

Богоро́диченъ: Зѣло́ лю́тѣ погружа́емую ду́шу мою́ въ пучи́нѣ жите́йскихъ страсте́й и бу́рею одержи́мую безмѣ́рныхъ согрѣше́ній, спасе́нія ми́ простри́ ру́ку, Пречи́стая, и изведи́ изъ глубины́ зо́лъ мои́хъ, да, ра́дуяся, сла́влю Тя́, Всенепоро́чную.

Сѣда́ленъ, гла́съ 5:

Пресвѣ́тлая и свѣтоно́сная, о́тче богому́дре Іа́кове, приспѣ́ твоя́ па́мять, созыва́ющи вѣ́рныхъ мно́жество просла́вити и пѣ́ти твое́ честно́е пренесе́ніе, про́симъ отъ Христа́ прія́ти ве́лію ми́лость. [Два́жды.]

Сла́ва и ны́нѣ, богоро́диченъ:

Яви́лася еси́ вы́шши небе́сныхъ си́лъ, Влады́ку и Го́спода ро́ждши, Богоро́дице: земны́хъ естество́ возвела́ еси́, Богоневѣ́стная. Тѣ́мже Тя́, вои́стинну, Богороди́тельнице, се́рдцемъ и душе́ю вѣ́рніи сла́вимъ.

Пѣ́снь 4.

Ирмо́съ: Дѣла́ смотре́нія Твоего́, Го́споди, ужаси́ша проро́ка Авваку́ма: изше́лъ бо еси́ на спасе́ніе люде́й Твои́хъ, спасти́ пома́занныя Твоя́ прише́лъ еси́.

Зе́млени бо есмы́ и пе́рстни человѣ́цы, вѣ́рно припа́даемъ къ пречестны́мъ моще́мъ твои́мъ, блаже́нне Іа́кове, прося́ще отпуще́нія грѣхо́въ: моли́ся о вѣ́рно пра́зднующихъ твое́ честно́е пренесе́ніе.

Иже кре́стъ взе́мъ, блаже́нне, и жела́емаго ти́ оте́чества дости́гъ, Го́рняго Іерусали́ма, и въ не́мъ со а́нгелы лику́еши, Іа́кове прему́дре, моли́ся о чту́щихъ твое́ честно́е пренесе́ніе.

Ны́нѣ на небесѣ́хъ съ пра́ведными весели́шися, преблаже́нне Іа́кове, съ ни́миже моли́ся, Христу́ предстоя́, ми́ръ мíрови дарова́ти и благочести́вому Импера́тору на́шему здра́віе, и на враги́ побѣжде́ніе, и всѣ́мъ скорбя́щимъ утѣше́ніе.

Богоро́диченъ: Кто́ не удиви́тся или́ кто́ не почуди́тся человѣколю́бію Бо́жію? Сше́дъ бо съ небесе́ и воплоти́ся на́съ ра́ди изъ Тебе́ безъ отца́, еди́на Всепѣ́тая, Его́же моли́ изба́витися рабо́мъ Твои́мъ отъ вся́кія ско́рби.

Пѣ́снь 5.

Ирмо́съ: Окая́нную ду́шу мою́, нощеборю́щуюся со тмо́ю страсте́й, предвари́въ, уще́дри и возсія́й, мы́сленное Со́лнце, днесвѣ́тлыя звѣзды́ во мнѣ́, во е́же раздѣли́ти но́щь отъ свѣ́та.

Любо́вію чту́ще твое́ пренесе́ніе, прилѣ́жно тя́ мо́лимъ, прему́дре Іа́кове, не преста́й моля́ся Христу́ Бо́гу, да пріи́мемъ грѣхо́въ просты́ню и да озари́тъ на́съ въ нощи́ свѣ́тъ.

Мно́жество наро́да Вели́каго Нова́града, соше́дшеся дне́сь въ твое́ пренесе́ніе, блаже́нне Іа́кове, и прикаса́ющеся честны́мъ моще́мъ твои́мъ, отъ ни́хъ исцѣле́нія почерпа́емъ, непреста́нно зову́ще: да озари́тъ на́съ въ нощи́ свѣ́тъ.

Не то́кмо въ житіи́ сы́й, но и по сме́рти мно́га чудеса́ отъ честны́я ти́ ра́ки содѣва́ются приходя́щимъ съ вѣ́рою, всеблаже́нне Іа́кове, неду́ги прогоня́еши и отъ бѣ́дъ избавля́еши си́лою Христо́вою. Къ Нему́же непреста́нно зове́мъ: да озари́тъ на́съ въ нощи́ свѣ́тъ.

Богоро́диченъ: Онъ, вселука́вый, по вся́ дни́ къ го́ршимъ влече́тъ мя́, и въ ро́въ поги́бели влага́етъ, и во отча́яніе мя́ влече́тъ; но того́ мя́ ловле́нія, Чи́стая, исхити́, и твори́ти во́лю боже́ственную Сы́на Твоего́ и Бо́га на́шего наста́ви, и въ ча́съ стра́шнаго прише́ствія Его́ изба́ви мя́ вся́каго осужде́нія.

Пѣ́снь 6.

Ирмо́съ: Обы́де мя́ бе́здна, гро́бъ мнѣ́ ки́тъ бы́сть, а́зъ же возопи́хъ къ Тебѣ́, Человѣколю́бцу, и спасе́ мя десни́ца Твоя́, Го́споди.

Пріиди́те, собери́теся, Вели́каго Нова́града наро́ди, свѣ́тло пра́зднуемъ пренесе́ніе моще́й блаже́ннаго Іа́кова, мо́лится бо ко Влады́цѣ и Бо́гу на́шему, да изба́витъ на́съ отъ вся́каго озлобле́нія. Къ Нему́же, воспѣва́юще, глаго́лемъ: спасе́ на́съ десни́ца Твоя́, Го́споди.

Ра́ка моще́й твои́хъ, прему́дре Іа́кове, дража́йши сапфи́ра показа́ся: чудотвори́ва бо бѣ́, исцѣле́нія источа́ющи. Юже облобыза́юще, вѣ́рніи, ра́достно отъ души́ Христу́ зове́мъ: спасе́ на́съ десни́ца Твоя́, Го́споди.

Свѣ́тлыми сія́ніи обрѣто́шася на крѣ́ честны́я твоя́ мо́щи, Іа́кове пречу́дне, ны́нѣ, а́ки заря́ пресвѣ́тлая, просвѣща́ютъ и освяща́ютъ чту́щихъ тя́ вѣ́рно и ра́достно отъ души́ Христу́ зову́щихъ: спасе́ на́съ десни́ца Твоя́, Го́споди.

Богоро́диченъ: Тебе́, Чи́стую Дѣ́ву Нескве́рную, еди́ну и́мамъ стѣ́ну непреобори́му, прибѣ́жище и покро́въ крѣ́покъ и ору́жіе спасе́нія, да мя́ не пре́зриши окая́ннаго, наде́ждо ненаде́жнымъ, скорбя́щимъ ра́дость и заступле́ніе.

Конда́къ, гла́съ 8. Подо́бенъ: Взбра́нной.

Вѣ́рою и любо́вію твое́ честно́е пренесе́ніе пра́зднующихъ, блаже́нне, сохрани́ и соблюди́ отъ вся́кія зло́бы и собла́зна зміи́на, и́маши бо дерзнове́ніе ко Влады́цѣ всѣ́хъ, Христу́ Бо́гу. Его́же моли́ спасти́ Импера́тора правосла́внаго, и лю́ди моля́щія тя́, да вси́ вопіе́мъ ти́: ра́дуйся, о́тче Іа́кове, всея́ Россíйскія земли́ удобре́ніе.

Икосъ:

Ангелъ на земли́ житіе́мъ показа́вся, а́нгелы удиви́лъ еси́, бѣ́сы же устраши́лъ еси́, и человѣ́ки просвѣти́лъ еси́ заря́ми чуде́съ твои́хъ, богоно́се и преблаже́нне, о́тче на́шъ Іа́кове. И ны́нѣ на́съ вразуми́ воспѣва́ти пѣ́снь къ твоему́ хвале́нію, ра́достнымъ гла́сомъ си́це глаго́лющихъ: ра́дуйся, оста́вивый тлѣ́нное мудрова́ніе и пріе́мый нетлѣ́нный вѣне́цъ; ра́дуйся, терпѣли́вый душе́ю, злоко́зненнаго врага́ подъ нога́ма сте́рлъ еси́; ра́дуйся, ни́жнее мудрова́ніе оста́вль и вы́шняго Ца́рствія дости́гъ; ра́дуйся, цѣли́телю болѣ́зней и отгони́телю страсте́й. Ра́дуйся, о́тче Іа́кове, всея́ Россíйскія земли́ удобре́ніе.

Пѣ́снь 7.

Ирмо́съ: Огня́ гаси́лище, отроко́въ моли́тва, ороша́ющая пе́щь проповѣ́дница чудесе́, не опаля́ющи, ниже́ сожига́ющи пѣсносло́вцы Бо́га оте́цъ на́шихъ.

Уста́ви ны́нѣшнюю бу́рю, обдержа́щую на́съ, блаже́нне, и укроти́ моли́твами твои́ми, и ва́рварское нахожде́ніе низложи́, и на́съ на сопоста́ты укрѣпи́, вѣ́рному же Импера́тору на́шему на проти́вныя побѣ́ды да́руй, да, ра́дующеся, пое́мъ: Бо́же, благослове́нъ еси́.

Фарисе́йски не лицемѣ́руемъ, но, со смире́ніемъ и ра́достію прикаса́ющеся къ честнѣ́й ра́цѣ твое́й, прему́дре Іа́кове, про́симъ проще́нія грѣхо́въ, Христу́ отъ души́ вопію́ще: Бо́же, благослове́нъ еси́.

Храни́тель бу́ди вели́кія Россíи, христолюби́вому Импера́тору на́шему, богому́дре Іа́кове, сохраня́яй отъ пога́ныхъ наше́ствія и междоусо́бныя бра́ни, гла́да же и па́губы, да моли́твами твои́ми изба́вльшеся, ра́достно отъ души́ Христу́ зове́мъ: Бо́же, благослове́нъ еси́.

Богоро́диченъ: Отча́явшимся еси́ ве́ліе прибѣ́жище, обурева́емымъ ти́хое приста́нице еси́, Богоро́дице. Тѣ́мже и мы́, припа́дающіи, да не постыди́мся, Ма́ти и́стиннаго Живота́, Тебе́ благодаря́ще и пою́ще: благослове́нна Ты́ въ жена́хъ, Всенепоро́чная Влады́чице.

Пѣ́снь 8.

Ирмо́съ: Ороси́вшаго пе́щь и о́троки сохра́ншаго посредѣ́ горя́щаго пла́мене, о́троцы, славосло́вите, свяще́нницы, благослови́те, лю́діе, превозноси́те во вся́ вѣ́ки.

Импера́тору благочести́вому моли́твенника тя́ те́пла стяжа́вше и ско́раго помо́щника, и я́ко стѣ́ну тве́рду, и забра́ло недви́жимо и необурева́емо, не забу́ди моли́твенникъ твои́хъ, избавля́й на́съ отъ вся́кія ну́жды и печа́ли, да, ра́дующеся, Христу́ зове́мъ: лю́діе, превозноси́те Его́ во вѣ́ки.

Чуде́съ исто́чникъ ра́ка твоя́ яви́ся, Іа́кове преблаже́нне, отъ нея́же оби́льно вси́ притека́ющіи пріе́млютъ тѣлесе́мъ здра́віе и душа́мъ спасе́ніе твои́ми моли́твами, да, ра́дующеся, Христу́ зове́мъ: лю́діе, превозноси́те Его́ во вѣ́ки.

Ше́ствіе твое́ до́брѣ сконча́лъ еси́ и мірскíй мяте́жъ, а́ки безбу́рное приста́нище, преплы́лъ еси́, и а́нгельски на земли́ пожи́лъ еси́, пло́ть твою́ ду́хови повину́лъ еси́. И ны́нѣ на небесѣ́хъ предстоя́ всѣ́хъ Царю́ Христу́, помина́й чту́щихъ твое́ пренесе́ніе, Ему́же зове́мъ: лю́діе, превозноси́те Его́ во вѣ́ки.

Богоро́диченъ: Ще́драго и Человѣколюби́ваго Спа́са ро́ждши, Чи́стая, Того́ моли́ уще́дрити раба́ Твоего́ и къ покая́нію пути́ наста́ви, лука́ваго собла́зны отъ се́рдца моего́ отжени́, и того́ изба́ви ловле́нія, и огня́ вѣ́чнаго исхити́, я́ко да непреста́нно пою́ Тя́, Чи́стую, во вся́ вѣ́ки.

Пѣ́снь 9.

Ирмо́съ: Иса́іе, лику́й, Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ.

Исто́чникъ исцѣле́нія испуща́я, врачева́ніе же безме́здно, ковче́гъ свяще́нія твои́хъ моще́й ра́ка яви́ся, отъ нея́же почерпа́емъ здра́віе присноживо́тное, притека́ющіи вѣ́рно, блаже́нне Іа́кове, и тебе́ Дарова́вшаго въ пѣ́снехъ велича́емъ.

Возвели́чилъ еси́ на земли́ твоего́ Влады́ку, тѣ́мъ и въ твое́ пренесе́ніе глубину́ чуде́съ показа́ и струю́ неоскудѣва́ему, ра́ку моще́й твои́хъ, Іа́кове прему́дре: слѣпы́мъ е́же ви́дѣти дарова́ся, прокаже́ннымъ очище́ніе и одержи́мыя нечи́стыми ду́хи цѣлому́дренны твори́ши, тѣ́мже тя́ велича́емъ.

Недосто́йною мое́ю руко́ю принесо́хъ ти́ таково́е сло́ва изви́тіе, богому́дрый Іа́кове, не пре́зри, но пріими́ сіе́ съ любо́вію и моли́ за мя́ [Творца́, твоего́] Влады́ку и Го́спода та́мошняго мя́ изба́вити муче́нія и ми́лость обрѣсти́ въ де́нь стра́шнаго испыта́нія.

Богоро́диченъ: Влады́чице мíра, Богоро́дице, во глубинѣ́ зо́лъ поги́бели [мене́], погруже́ннаго злоу́мно сластьми́ плотски́ми, и пристра́стіемъ вещьми́ житія́, изведи́, Пресвята́я Дѣ́во, Твои́мъ милосе́рдіемъ, и́бо не и́мамъ наде́жды: ве́сь бо е́смь, Чи́стая, во отча́яніи, да Тя́ непреста́нно велича́ю.

Свѣти́ленъ. Подо́бенъ: Жены́, услы́шите.

Якоже со́лнце облиста́я, чудеса́ испуща́еши, просвѣща́я вѣ́рныхъ сердца́, твое́ сла́вное пренесе́ніе вѣ́рно пра́зднующія спаса́й, богому́дре Іа́кове, о́тче на́шъ. [Два́жды.]

Сла́ва, и ны́нѣ, богоро́диченъ:

Тя Предста́тельницу и́мамы грѣ́шніи, о Пресвята́я Дѣ́во! Ты́ благопремѣ́нна сотвори́ Сы́на Твоего́ и Бо́га на́шего Ма́терними Твои́ми моли́твами.

На хвали́техъ стихи́ры на 4, гла́съ 4. Подо́бенъ: Яко до́бля.

Пріиди́те, вѣ́рніи,* хвала́ми соше́дшеся,* ны́нѣ соста́вимъ торжество́,* въ честнѣ́мъ пра́здницѣ честна́го пренесе́нія блаже́ннаго Іа́кова* духо́вно пра́зднующе, къ нему́ возопіи́мъ:* моли́, мо́лимся,* вѣ́рному Импера́тору на́шему побѣди́тельная на враги́ дарова́ти,* тебе́ бо ко Влады́цѣ те́пла моли́твенника стяжа́хомъ,* подаю́щему мíру ве́лію ми́лость. [Два́жды.]

Возсія́ дне́сь пресвѣ́тлая па́мять твоя́,* богому́дре Іа́кове,* созыва́ющи ны́, празднолю́бцы,* къ похвале́нію и сла́вѣ Христа́ Бо́га на́шего.* Тѣ́мъ притека́юще къ ра́цѣ моще́й твои́хъ* исцѣле́нія да́ръ пріе́млемъ* и тебе́ просла́вльшаго* Спа́са Христа́ воспѣва́емъ во вѣ́ки,* непреста́нно сла́вяще.

Отче преблаже́нне Іа́кове,* дне́сь любо́вію соше́дшеся къ честнѣ́й и чудотво́рнѣй твое́й ра́цѣ,* свѣ́тло торжеству́юще,* гла́сы пѣ́сненными псало́мски вопію́ще, глаго́лемъ:* блаже́нъ му́жъ, боя́йся Го́спода,* непоро́чно бо въ за́повѣдехъ Госпо́днихъ ходи́лъ еси́.* Тѣ́мже ны́нѣ съ пра́ведными на небесѣ́хъ водворя́ешися;* съ ни́миже моли́ся Го́сподеви* спасти́ся душа́мъ на́шимъ.

Сла́ва, гла́съ 6:

Пріиди́те, вси́ Вели́каго Нова́града наро́ди, соше́дшеся, возвели́чимъ Христо́ва рачи́теля, се́й бо измла́да покори́ пло́ть ду́ху, и по Госпо́днимъ стопа́мъ изво́ли ходи́ти, на земли́ же́стоко житіе́ показа́: а́нгелы у́бо удиви́, де́моны же устраши́ и человѣ́ки просвѣти́. Къ нему́же си́це рце́мъ: ра́дуйся, терпѣли́вый душе́ю, и́же оста́вивъ тлѣ́нное мудрова́ніе и пріе́мъ нетлѣ́нный вѣне́цъ; ра́дуйся, свѣти́льниче многосвѣ́тлый и къ Бо́гу моли́твенниче те́плый, и́же злоко́зненнаго врага́ до конца́ подъ нога́ми сте́рлъ еси́; ра́дуйся, Іа́кове преди́вный, небе́сный человѣ́че, земны́й а́нгеле. И ны́нѣ на небесѣ́хъ у престо́ла предстои́ши Всецаря́ Христа́, къ Нему́же за ны́ моли́ся, вѣ́рою и любо́вію пра́зднующія твое́ честно́е пренесе́ніе, спасти́ся душа́мъ на́шимъ.

И ны́нѣ, богоро́диченъ:

Богоро́дице, Ты́ еси́ лоза́ [и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

Славосло́віе вели́кое. [Ектеніи́] и отпу́стъ.



НА ЛИТУРГІИ,

Слу́жба преподо́бническая: [Блаже́нна отъ кано́на свята́го, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилуія, гласъ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Примѣчаніе:
[1] Кра́ — то́нкій ле́дъ въ нача́лѣ за́морозковъ.

Источникъ: Слу́жба со Ака́ѳістомъ на пренесе́ніе моще́й свята́го Іа́кова Борови́чскаго, чудотво́рца. Мѣ́сяца Окто́врія въ 23 де́нь. — Тисне́ніе пе́рвое. — СПб.: Въ Сѵнода́льной Тѵпогра́фіи, 1885. — С. 3 – 31, 82 – 91.

/ Къ оглавленію раздѣла /


Наверхъ / Къ титульной страницѣ

0