Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 6.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 22-й де́нь.
Свята́го равноапо́стольнаго Аве́ркія, епи́скопа Іерапо́льскаго, чудотво́рца. И святы́хъ седми́ отроко́въ, и́же во Ефе́сѣ.

[ВЕЧЕРЪ,]
На Го́споди воззва́хъ: стихи́ры святи́телю, гла́съ 2. Подо́бенъ: Егда́ отъ дре́ва.

Боже́ственныхъ уче́ній блиста́ньми разруши́лъ еси́ многобо́жную но́щь, о́тче Аве́ркіе, у́тро же возсія́въ, сы́ны дне́ соверши́лъ еси́, во мра́цѣ су́щія пре́жде, іера́рше, чудеса́ пресла́вная показа́въ, тѣ́мъ святу́ю твою́ па́мять вѣ́рою пра́зднуемъ вси́, пѣсносло́вяще тя́, богодухнове́нне.

Въ сосу́дѣ еди́нѣмъ чудодѣ́йствуя, вино́ бо и еле́й, о́тче, и ви́дъ другíй совокупи́лъ еси́, блюдо́ма внегда́ тре́бовати несмѣ́шена Боже́ственною благода́тію, те́плыхъ же во́дъ дарова́ніе моли́твою истещи́ сотвори́лъ еси́, неду́ги исцѣля́я вся́ческія, приходя́щихъ тебѣ́ вѣ́рою и блажа́щихъ тя́, Аве́ркіе.

Ве́сь прилѣжа́ Бо́гу, боже́ственныхъ испо́лнитель уче́ній яви́лся еси́, Аве́ркіе, благода́ть же пріе́мъ отъ высоты́, преподо́бне, неду́ги отгна́лъ еси́ разли́чныя человѣ́комъ, тре́бища и́дольская разори́лъ еси́, зна́ніе насади́лъ еси́ боже́ственное, невѣ́дѣніемъ окая́нно пре́жде бѣ́дствующимъ, блаже́нне.

Ины стихи́ры му́чениковъ, гла́съ 4. Подо́бенъ: Яко до́бля.

Пребеззако́нная велѣ́нія,* Бо́гу поко́ршеся,* о́троцы блаже́нніи небрего́ша* и, свя́зани бы́вше,* разрѣши́ша пре́лести соу́зъ,* и, са́нъ мірскíй отве́ргше,* прія́ша сла́ву,* я́же тѣ́хъ пресла́вно соверши́вшу* и го́рняго исхода́таившу* Ца́рствія наслажде́ніе.

Къ по́двигомъ себе́ страда́нія, святíи,* крѣ́пко обучи́вше,* скры́стеся въ верте́пѣ,* моле́ньми непреста́нными* ко Го́споду моля́щеся* крѣ́пость пода́ти и си́лу,* и́миже судьба́ми, Человѣколю́бецъ вѣ́сть,* усну́ти въ ми́рѣ всѣ́мъ ва́мъ* богонача́льно повелѣва́етъ.

Богосо́бранный по́лкъ,* ли́къ блаже́нный,* му́ченическое собра́ніе неудобопобори́мое,* Це́ркви боже́ственнѣй кра́сное торжество́,* нерасте́рзное совокупле́ніе,* во́инство непобѣди́мое,* незы́бленное благоче́стія основа́ніе,* пріиди́те вси́, воспои́мъ усе́рдно,* благоче́стія свидѣ́тели.

Сла́ва, гла́съ 3. Іоа́нна мона́ха:

Архіере́е преподо́бне, всеблаже́нне о́тче, чудотво́рче уго́дниче Христо́въ, Аве́ркіе, проро́ческимъ житіе́мъ возсія́вый и апо́стольскихъ сподо́бился еси́ даро́въ, Спа́су служа́ со а́нгелы непреста́нно, моли́ изба́витися отъ вся́каго преще́нія душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Ве́лія Креста́.

Ору́жіе се́рдце Твое́ про́йде, Пречи́стая, егда́ Сы́на Твоего́ на Крестѣ́ ви́дѣла еси́ и вопія́ла еси́: не безча́дну Мя́ покажи́, Сы́не Мо́й и Бо́же Мо́й, соблюды́й Мя́ по Рождествѣ́ Дѣ́ву.

Тропа́рь, гла́съ 4:

Пра́вило вѣ́ры и о́бразъ кро́тости, воздержа́нія учи́теля яви́ тя ста́ду твоему́ я́же веще́й и́стина, сего́ ра́ди стяжа́лъ еси́ смире́ніемъ высо́кая, нището́ю бога́тая, о́тче Аве́ркіе, моли́ Христа́ Бо́га спасти́ся душа́мъ на́шимъ.

И святы́хъ тропа́рь, гла́съ то́йже:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости. Тѣ́хъ моли́твами спаси́ ду́ши на́ша.


НА УТРЕНИ,
Кано́нъ окто́иха еди́нъ. И святи́теля кано́нъ на 4, его́же краегране́сіе: Аве́ркіеву воспою́ вели́кую сла́ву. Іо́сифъ. Гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Заре́ю свѣ́тлою Трисо́лнечнаго Божества́ озаре́нъ бы́въ, Аве́ркіе, свѣ́тъ бы́лъ еси́, су́щія во тмѣ́ просвѣща́я и все́ де́монское разруша́я омраче́ніе.

Житіе́ на земли́ имѣ́лъ еси́, преблаже́нне, небе́сное, съ пло́тію, я́ко безпло́тенъ, жи́тельствовавъ и стра́сти умертви́въ, и свяще́нства да́ръ пріе́мъ.

Имѣ́я въ тебѣ́, о́тче, Сло́во вѣща́ющо, безслове́сія разруши́лъ еси́ суему́дренныхъ, де́монскія хра́мы и куми́ры преле́стныя низложи́въ.

Богоро́диченъ: Витíйстіи язы́цы глаго́лати недоумѣ́ютъ Твоего́ па́че сло́ва зача́тія: Бо́га бо родила́ еси́ пло́тію, Всечи́стая, на́мъ уподо́бльшася за благосты́ню.

Инъ кано́нъ му́чениковъ. Гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Седми́чнымъ число́мъ честву́еми, святíи о́троцы се́дмь, свѣ́тліи звѣ́зды, на тве́рди церко́внѣй сія́юще, и́же свидѣ́тельствомъ на небе́сная все́льшеся, помяни́те вѣ́рою чту́щія ва́съ.

Седмосвѣ́тлымъ сія́ніемъ Ду́ха, вообража́юще златоза́рную свѣщу́, му́ченицы седмочи́сленніи, мра́къ ума́лили есте́ пре́лести и свѣ́томъ благоче́стія вся́ ны́нѣ седмеросугу́бно просвѣща́ете.

Богоро́диченъ: На Тя́, Дѣ́во, наде́жду полага́ю спасе́нія моего́, грѣхо́вныя ти́ны всего́ мя́ омы́й и чи́ста мя́ содѣ́лай, Сы́ну Твоему́ изя́щнѣ благоугожда́юща и дѣ́юща Того́ всесвяту́ю во́лю.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

И словесы́ свяще́нными и показа́ніи чуде́съ, Аве́ркіе, пресла́вно, пре́лести мо́ре пла́вающія, спасе́нія ко приста́нищу наста́вилъ еси́.

Цѣльбы́ содѣва́я, соверша́я изря́дная, де́моновъ отгоня́я мечта́нія, спасе́нія всѣ́мъ вино́вникъ, бога́тымъ предста́тель ты́ бы́лъ еси́.

Сло́во свяще́нное, житіе́ боже́ственное, нра́въ, чудесы́ сія́ющь, жи́знь твоя́, о́тче, сла́вна и сме́рть честна́ бы́сть.

Богоро́диченъ: Сы́й Бо́гъ, пре́жде неви́димый, ви́димь бы́сть, Дѣ́во, за благоутро́біе изъ чре́ва Твоего́ воплоща́емь: тѣ́мъ Тя́ вѣ́рою ублажа́емъ.

Инъ.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, Еди́не Человѣколю́бче.

Явльшеся на земли́, седмосвѣ́тліи, я́ко свѣти́льницы добродѣ́телей и по́двиговъ заре́ю, и чуде́съ блиста́ньми свѣ́тло просвѣти́вше, свѣ́тъ богозна́нія всему́ мíру просія́сте.

Отъ пеле́нъ ма́тернихъ возложи́вшеся Творцу́, Того́ ра́ди небрего́сте о сла́вѣ и че́сти ца́рской, и бога́тствѣ мимотеку́щемъ, отъ Него́же нетлѣ́нныхъ че́стей сла́ву получи́сте.

Богоро́диченъ: Умерщвле́нный мо́й у́мъ, Жи́зни дѣ́йствомъ, я́вльшіяся изъ Тебе́, мíру воздви́гни, я́звы и о́бразы потре́бльши грѣхо́вныя, еди́на Богороди́тельнице, Всенепоро́чная.

Конда́къ отроко́въ, гла́съ 4. Подо́бенъ: Вознесы́йся.

Просла́вивый на земли́ святы́я Твоя́, пре́жде втора́го и стра́шнаго прише́ствія Твоего́, Христе́, пресла́внымъ воста́ніемъ отроко́въ показа́лъ еси́ Воскресе́ніе невѣ́дящимъ е́, нетлѣ́нна одѣя́нія и тѣлеса́ яви́въ, и царя́ увѣ́рилъ еси́ вопи́ти: вои́стинну е́сть ме́ртвыхъ воста́ніе.

Икосъ:

Чу́дное и высо́кое отроко́въ воскресе́ніе ви́дѣвъ, іера́рхъ Ефе́сскій иногда́ удиви́вся ра́зумомъ, пи́шетъ со тща́ніемъ вѣ́рнѣйшему царю́ тѣ́хъ воста́ніе: пріити́ сподо́би держа́вѣ твое́й, влады́ко, здѣ́ да ви́диши Бо́га твоего́ си́лу, ю́же показа́ тебѣ́. — Абіе воста́въ вели́кій побѣдоно́сецъ, ше́ствіе творя́ще ра́дуяся, вторы́й яви́вся Илія́ колесни́чникъ, вопія́: вои́стинну е́сть ме́ртвыхъ воста́ніе.

Сѣда́ленъ святи́теля, гла́съ 8. Подо́бенъ: Прему́дрости.

Іера́рхъ яви́лся еси́, ма́стію честно́ю обложе́нъ, о́тче, богодѣ́тельно и вся́ соверша́я благода́тію свяще́ннѣйше, даро́въ же Боже́ственныхъ и чуде́съ свѣ́тлостію украша́емь, Святы́мъ и Боже́ственнымъ Ду́хомъ, всехва́льне, неду́ги исцѣля́я и де́моны попаля́я, и мно́жества прельща́емыхъ обраща́я, Аве́ркіе. Сего́ ра́ди вопіе́мъ ти́: моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

Сла́ва, отроко́въ, гла́съ 4. Подо́бенъ: Ско́ро предвари́.

Яко столпи́ су́ще Це́ркве Христо́вы, стѣ́ны разори́сте невѣ́рствія крѣ́пко, седмобра́тніи му́ченицы. Тѣ́мъ пре́жде сме́рти е́ллинскую я́рость и па́ки по сме́рти ерети́ческую бу́рю разруши́сте, моля́щеся о душа́хъ на́шихъ.

И ны́нѣ, богоро́диченъ:

Чи́стая, Всенепоро́чная и Неискусому́жная, Яже еди́на Безлѣ́тнаго Сы́на и Сло́ва Бо́жія въ лѣ́то ро́ждши, Сего́ со святы́ми и честны́ми патріа́рхи, и му́ченики, и проро́ки, и преподо́бными моли́ дарова́ти на́мъ очище́ніе и ве́лію ми́лость.

Крестобогоро́диченъ:

Дѣ́во Всенепоро́чная, Ма́ти Христа́ Бо́га, ору́жіе про́йде Твою́ пресвяту́ю ду́шу, егда́ распина́ема ви́дѣла еси́ во́лею Сы́на и Бо́га Твоего́. Его́же, Благослове́нная, моля́щи не преста́й, проще́ніе прегрѣше́ній на́мъ дарова́ти.

Пѣ́снь 4.

Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.

Вельми́ престо́лъ, преподо́бне, украси́лъ еси́, святи́телю, вели́кими бо чудесы́ прелѣ́потствовалъ еси́ и житіе́мъ свѣ́тлымъ. Сего́ ра́ди Превели́кій Бо́гъ на́шъ вельми́ тя́ просла́ви.

Ми́лости Воли́теля Го́спода вѣ́дый, богоно́се, те́плѣ Его́ умоли́лъ еси́ на исцѣле́ніе и спасе́ніе мно́гихъ, те́плыхъ во́дъ всечу́дное сотвори́ти истече́ніе.

Плодови́ты безча́дныя сотвори́лъ еси́ Бо́жіею благода́тію, соверши́лъ еси́ помышле́нія, вложи́въ бо тѣ́мъ, Аве́ркіе, сло́ва сѣ́мя я́вѣ, я́ко до́брый сѣ́ятель, пожа́лъ еси́ кла́сы стори́цею, блаже́нне.

Богоро́диченъ: Исцѣли́ла еси́ сокруше́ніе, Всенепоро́чная, и дре́внее окая́нство земноро́дныхъ, ро́ждши Го́спода и Царя́ Христа́, поне́сшаго неду́ги на́ша за благоутро́біе неизглаго́ланное, Богоневѣ́сто.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Бра́тскимъ совокупля́еми сою́зомъ и боже́ственнымъ жела́ніемъ распала́еми, согла́сіемъ и́стиннаго, му́ченицы Госпо́дни, исповѣ́данія и вѣ́ры, посрами́сте мучи́телей суему́дренный ра́зумъ и пре́лести многобо́жное уче́ніе.

За Христа́ и со Христо́мъ гони́ми, въ верте́пѣхъ, гора́хъ же и про́пастехъ земны́хъ скрыва́еми. Того́ ра́ди сно́мъ живоно́снымъ вмѣ́сто сме́рти усну́ли есте́ на лѣ́та должа́йшая, я́вственно утвержда́юще о́бщее земны́хъ Воскресе́ніе.

Богоро́диченъ: Да о́бразъ, засы́панный страстьми́, обнови́ши бога́тствомъ благосты́ни, въ дѣ́вственную всели́лся еси́ утро́бу, изъ нея́же Му́дрость хра́мъ Бо́жій созда́лъ еси́, е́юже съ человѣ́ки пожи́лъ еси́, Ще́дрый, и спа́слъ еси́ мíра концы́.

Пѣ́снь 5.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Поста́вивъ твоя́ но́ги на ка́мени се́рдца, богому́дре, па́дшія поги́белію и че́сти ка́менію подаю́щія, блаже́нне, боже́ственными словесы́ чествова́ти научи́лъ еси́ Ка́мень — Іису́са Христа́ и Бо́га на́шего.

Врача́ разли́чно неду́гующихъ, путевожда́ всѣ́хъ, прельще́нныхъ злосовѣ́тіемъ, мѵрополо́жницу честны́хъ дарова́ній, прія́телище Боже́ственнаго Ду́ха, священноучи́теля почти́мъ Аве́ркія.

Вино́ повелѣ́ніемъ твои́мъ въ еди́номъ сосу́дѣ со еле́емъ, ви́ды же другíя вложе́нныя, во вре́мя свое́ несмѣ́сно пресла́вно излива́ются, преизоби́лующую благода́ть твою́ явля́юще я́вѣ, свяще́нне.

Богоро́диченъ: Зако́ни въ Тебѣ́ пресла́вно, Дѣ́во, обновля́ются, ражда́еши бо безсѣ́менно Бо́га Спа́са и пребыва́еши дѣ́вствующи па́ки, — стра́нно чу́до! Тѣ́мъ Тя́, Ма́терь Емману́илеву, благоче́стно возвѣща́емъ.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Умертви́вшеся мíру, вся́ жите́йская кра́сная отри́нули есте́, живо́тъ Держа́щему живо́тъ сво́й преда́вше, живоно́сный со́нъ, на до́лга лѣ́та влеку́ще, о́бщаго воскресе́нія о́бразъ.

Страда́льцы житіе́мъ яви́стеся, до́лгая гоне́нія претерпѣ́вше, въ гла́дѣ и жа́жди, въ ра́зныхъ бѣда́хъ и ско́рбехъ, и злоиму́ществахъ за Христа́ терпя́ще, и богатя́щеся су́що воспокое́ніемъ.

Богоро́диченъ: Въ Тебѣ́, стѣнѣ́, обогаща́еміи и предста́тельствомъ Твои́мъ сохраня́еміи, Твое́ю боже́ственною сла́вою хва́лящеся, Тя́ ублажа́емъ: Ты́ бо, Пресвята́я, душа́мъ на́шимъ источа́еши весе́ліе и ра́дость.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Отъ восто́ка къ за́паду прише́лъ еси́, де́монскія и лю́тыя стра́сти цари́цу, преподо́бне, отрѣша́я си́лою Ду́ха.

Стра́ненъ мíра яви́лся еси́, свяще́ннѣйше, стра́нная и стра́шная соверша́я чудеса́, и ходя́ въ тѣлеси́, и отсю́ду отше́дъ, Аве́ркіе.

Молніезра́ченъ, о́тче, ви́димь, де́монскія побѣди́лъ еси́ полки́, терпѣ́ти не могу́щія твоего́, Аве́ркіе, преще́нія, богодухнове́нне.

Богоро́диченъ: Тобо́ю, Всесвята́я Богоневѣ́сто, умерщвле́нніи, жи́зни сподо́бихомся и, тлѣ́нію рабо́тающіи, нетлѣ́ніемъ я́вѣ обогати́хомся.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Любо́вію, я́же къ Бо́гу, Ефе́сскаго оте́чества, му́дріи, ро́дъ свѣ́тлый, бога́тство же пресвѣ́тлое и сла́ву пречестну́ю оста́вили есте́, наслѣ́діе небе́сное произбра́вше.

Седмочи́сленный страда́льцевъ ли́къ, боже́ственнѣ совокупля́емь, низложи́ враго́въ мно́жество многочи́сленное и сла́ву прія́ша исповѣ́данія, и вѣнцы́ страда́нія.

Богоро́диченъ: Возсія́ отъ Сіо́на Вы́шняго благолѣ́піе прія́тіемъ пло́ти, по соедине́нію неизрече́нному, изъ Тебе́, Неискусобра́чная, одѣ́янъ, и мíръ просвѣти́.

Конда́къ, гла́съ 8. Подо́бенъ: Яко нача́тки.

Яко свяще́нника превели́каго и апо́столовъ совсе́льника, Це́рковь почита́етъ тя́, вся́ вѣ́рныхъ, Аве́ркіе: ю́же твои́ми моли́твами соблюда́й, блаже́нне, непобѣди́му и необурева́ему отъ вся́кія е́реси, и нескве́рну, я́ко приснопа́мятный.

Икосъ:

Мíра всего́ суету́ помышля́я, мíра учуже́нный и, стра́сти Христо́вы подража́я, плотскíя стра́сти умертви́лъ еси́ и, кре́стъ тво́й взе́мъ, послѣ́довалъ еси́, блаже́нне, Творцу́ твоему́, и, пребыва́я съ Ни́мъ, ны́нѣ моли́ся за чту́щія тя́ и́стинно, я́ко приснопа́мятный.

Пѣ́снь 7.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Яко боже́ственный па́стырь, я́ко чуде́съ самотво́рецъ, слѣпы́мъ е́же зрѣ́ти моли́твою, о́тче, пода́лъ еси́, и слы́шати глухи́мъ, очище́ніе же прокаже́ннымъ, и благотече́ніе хромы́мъ, воспѣва́ющимъ: благослове́нъ еси́, Бо́же оте́цъ на́шихъ.

Проповѣ́даетъ твое́ чудодѣя́ніе, му́дре, во вѣ́къ те́плыхъ во́дъ искипѣ́ніе и сто́лпъ, у гро́ба твоего́ лежа́щій, его́же отъ Ри́ма, вели́каго гра́да, принесе́ лука́вый ду́хъ, изгна́нный тобо́ю, о́тче Аве́ркіе.

Лю́демъ смире́ннымъ во́ждь бы́лъ еси́, высо́къ въ видѣ́ніихъ, и дѣ́йствіяхъ же, и си́лахъ яви́вся, свяще́ннѣйше, и Высоча́йшаго Царя́ уго́дникъ, Ему́же взыва́емъ: благослове́нъ еси́, Бо́же оте́цъ на́шихъ.

Богоро́диченъ: Роди́ся изъ Тебе́, Его́же роди́ Оте́цъ пре́жде денни́цы, во двою́ существу́ и хотѣ́нію, я́ко Бо́гъ же и Человѣ́къ, Отрокови́це, зна́емь всѣ́мъ, вѣ́рою зову́щимъ: Благослове́нная, Бо́га пло́тію ро́ждшая.

Инъ.

Ирмо́съ: Бо́жія снисхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Бо́гу покаря́ющеся, Боже́ственнымъ зако́номъ наказу́еми о́троцы, ра́зумомъ пра́вымъ пребеззако́нная повелѣ́нія мучи́телей злы́хъ укори́ли есте́, сме́ртію жи́знь пріобрѣ́тше и нетлѣ́ніе, ме́ртвымъ обога́щшеся тѣ́ломъ.

Сме́ртную ча́шу за Творца́ пи́ти жела́юще вѣ́рно безсме́ртія ра́ди и нетлѣ́нія, погребе́ніе претерпѣ́сте тѣле́съ, изъясня́юще воста́ніе пресла́внымъ воста́ніемъ ва́шимъ, му́ченицы.

Богоро́диченъ: Яко у́тро возсія́ла еси́, пра́вды Со́лнце иму́щи, отъ тмы́ мíра невѣ́дѣнія изыма́ющаго боговѣ́дѣніемъ, Ему́же пое́мъ, Пречи́стая: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Пресла́вный па́стырь, неистощи́мый исто́чникъ исцѣле́ній, Це́ркве сто́лпъ, вѣ́рныхъ утвержде́ніе, вели́кій свѣти́льникъ, многосвѣ́тлый священноучи́тель да почти́тся Аве́ркій.

Ты́, я́коже фи́никсъ, псало́мски процвѣ́лъ еси́ во дво́рѣхъ Бо́га Жива́го; умно́жился еси́, я́ко ке́дръ и я́ко ма́слина, му́дре, показа́лся еси́, ма́стію дѣ́лъ твои́хъ всѣ́хъ умаща́я ли́ца вѣ́рою.

Горы́ верху́ дѣйстви́тельнымъ жи́тельствомъ я́вственнѣ, я́коже гра́дъ позна́лся еси́ стоя́щь, и погру́жшійся дре́вле пре́лестію гра́дъ тво́й, преподо́бне, Гра́да Вы́шняго явля́еши наслѣ́дника.

Богоро́диченъ: Се́ о́дръ Соломо́новъ, его́же обстоя́тъ си́льніи, Богодухнове́ннаго Писа́нія ны́нѣ прорица́нія, на не́мже Христо́съ Бо́гъ воплоще́ніемъ Боже́ственнымъ почи́лъ е́сть, Благослове́нная и Обра́дованная.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Седмери́чно облиста́ па́мять ва́ша дне́сь, со́лнечныхъ лу́чь обра́зно просвѣща́ющи, му́дріи, подсо́лнечную страда́льческими свѣ́тлостьми, чудодѣ́йственными же блиста́ньми и Боже́ственныхъ догма́товъ заря́ми, и́миже увѣря́ете всѣ́мъ воста́ніе тѣле́съ и ме́ртвыхъ нетлѣ́ніе.

Авимеле́хово пре́жде на селѣ́ сохране́ніе положи́ Бо́гъ, я́ко не ви́дѣти гра́да иногда́ запустѣ́нія. Ва́съ же соблюде́ лѣ́ты множа́йшими въ верте́пѣ спя́щія на увѣре́ніе всѣ́хъ воскресе́нія, о́троцы, вѣко́въ седмочи́сленныхъ равночи́сленніи свѣти́льницы.

Богоро́диченъ: Освяти́вшися Ду́хомъ, Богоро́дице Всенепоро́чная, и́стинно прія́ла еси́ во чре́вѣ Безнача́льнаго Сы́на и Присносу́щнаго, въ Тебѣ́, Чи́стая, воплоще́ннаго на благодѣя́ніе вѣ́рою вопію́щихъ: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Яко свѣтоза́рно твое́ житіе́, я́ко красны́ но́ги, я́ко зѣло́ чу́дно е́же къ Бо́гу маа́ніе же вку́пѣ и бли́жность, я́ко велича́йшая благода́ть, свы́ше да́нная тебѣ́, му́дре. Сего́ ра́ди вѣ́рою почита́емъ тя́, Аве́ркіе.

Тя́, сожи́тельника всѣ́хъ святы́хъ му́ченикъ и ревни́теля боже́ственныхъ учени́къ, патріа́рховъ равноче́стна, проро́ковъ и преподо́бныхъ, и небе́сныхъ слу́гъ собесѣ́дника вѣ́рою сла́вимъ, Аве́ркіе.

Пресвята́я твоя́ па́мять, простира́ющися въ мíрѣ, просвѣща́етъ человѣ́къ ду́ши свѣ́томъ, бога́тымъ въ благода́ти, ю́же соверша́юще любо́вію, страсте́й на́съ и тмы́ напа́стныя моли́твами твои́ми изба́ви, мо́лимся, Аве́ркіе.

Богоро́диченъ: Свѣ́тла Тя́ свѣти́льника проро́къ прови́дѣ, свѣщу́ боже́ственную и́стинно въ Себѣ́ нося́щую, Всесвята́я Дѣ́во, Еди́наго Пресу́щнаго Бо́га, за благоутро́біе ми́лости изъ Тебе́ вочеловѣ́чшася.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Удиви́ся о се́мъ вся́къ земноро́дный, почуди́ся же и вся́къ у́мъ, я́ко ме́ртвіи, по многовре́меннѣмъ погребе́ніи, въ верте́пѣ лежа́ще, а́ки въ ве́черъ усну́вше и у́трѣ обы́чно востаю́ще, яви́шася, увѣря́юще ме́ртвыхъ о́бщее воста́ніе.

Седмочи́сленніи му́чениковъ свѣ́тліи свѣти́льницы, ефе́сская свѣти́ла присносвѣ́тлая, мíра всего́ моли́твенницы и предста́теле те́пліи, о́бщаго воскресе́нія проповѣ́дницы и храни́теліе вѣ́рныхъ, испроси́те тишину́ на́мъ, и спасе́ніе, и ми́ръ всѣ́мъ конце́мъ.

Богоро́диченъ: Яко Ма́ти Пострада́вшаго о на́съ, душетлѣ́нныхъ мя́ страсте́й изба́ви; я́ко Милосе́рдая, разрѣши́ прегрѣше́ній у́зы; я́ко Блага́я, ублажи́ ны́нѣ озло́бленную мою́ ду́шу де́монскими прило́ги, Дѣ́во Богоро́дице, да пою́ Тя́, Всепѣ́тую.

Свѣти́ленъ. Подо́бенъ: Жены́, услы́шите.

Потещи́ тя пону́ди блазнодѣ́латель де́монъ къ Ри́му гра́ду, вше́дый въ царе́ву дще́рь лука́вно, изъ нея́же изгна́въ пса́, обремене́нна посла́лъ еси́ и сто́лпъ нося́ща во Іерапо́ль, Аве́ркіе богогла́се.

Сла́ва, му́чениковъ:

Ору́жіемъ Честна́го Твоего́ Креста́ огра́ждшеся, страстоте́рпцы Твои́, Сло́ве, проти́вныя си́лы крѣ́пко побѣди́ша и мучи́телей посрами́ша, и о Тебѣ́ пострада́ша, и Тебѣ́, Христе́ мо́й, Всецарю́, сца́рствуютъ ку́пно.

И ны́нѣ, богоро́диченъ:

О, та́инъ Твои́хъ! О, чуде́съ Твои́хъ! Ка́ко по рождествѣ́ Дѣ́ва пребыла́ еси́, я́ко пре́жде рождества́? Ка́ко Бо́га вмѣсти́ла еси́, нигдѣ́же вмѣсти́маго? Но вои́стинну несказа́нна су́ть Твоя́ вся́, Благослове́нная Марíе.


НА ЛИТУРГІИ,

Блаже́нна окто́иха на 4 и свята́го пѣ́снь 3-я на 4. Проки́менъ, гла́съ 1: Уста́ моя́ возглаго́лютъ прему́дрость и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, [внуши́те вси́ живу́щіи по вселе́ннѣй. Апо́столъ къ Евре́емъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, [и язы́къ eго́ возглаго́летъ су́дъ]. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Іоа́нна, зача́ло 36. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 181 об. – 188.

/ Къ оглавленію раздѣла /


Наверхъ / Къ титульной страницѣ

0