Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 7.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 21-й де́нь.
Преподо́бнаго отца́ на́шего Иларіо́на Вели́каго.

[ВЕЧЕРЪ,]
На Го́споди воззва́хъ: стихи́ры на 6, гла́съ 4. Подо́бенъ: Зва́нный свы́ше.

Кро́токъ душе́ю и се́рдцемъ,* егда́ тя боже́ственное раче́ніе уязви́* и свяще́нными восхожде́ніи* отлучи́тися мірски́хъ смуще́ній покори́,* тогда́ вооружи́вся си́лою креста́,* на де́моны устреми́лся еси́,* всеблаже́нне, боре́ніемъ* и спле́лъ еси́ побѣ́ды діади́му.* И ны́нѣ водворя́ешися во свѣ́тлостехъ святы́хъ,* съ ни́миже и на́мъ испроси́* просвѣще́ніе, и ми́ръ,* и согрѣше́ній избавле́ніе. [Два́жды.]

Свѣтода́тельными заря́ми,* пресла́вно, о́тче достосла́вне,* исцѣле́ній твои́хъ* просвѣща́еши подсо́лнечную,* неду́говъ разрѣша́яй тму́ глубоча́йшую,* тѣ́мъ тя́ со́лнце ино́е познава́емъ* и мона́шествующихъ утвержде́ніе,* и наста́вника спаса́емыхъ Боже́ственнымъ Ду́хомъ.* И ны́нѣ па́мять соверша́емъ твою́* свѣ́тлую и спаси́тельную, Иларіо́не,* прегрѣше́ній тобо́ю разрѣше́ніе пріе́млюще. [Два́жды.]

Воздержа́ніемъ тѣле́сныя стра́сти, о́тче,* покори́лъ еси́ разу́мному души́,* и безстра́стія крилы́ укра́шенъ,* благода́ть прія́лъ еси́ цѣли́ти, преподо́бне,* человѣ́ковъ не́мощи,* и отгони́ти духо́въ лука́вствія,* и спаса́ти притека́ющія къ тебѣ́.* Тѣ́мже ли́цы тя́ блажа́тъ* мона́шествующихъ, достосла́вне,* и почита́етъ вся́ тва́рь,* Иларіо́не, по́двиги твоя́. [Два́жды.]

Сла́ва, гла́съ 2. Анато́лія:

Отъ ю́ности твоея́ нося́ соверше́нства му́дрость, возложи́въ на себе́, Иларіо́не, и́го Христо́во и житію́ поревнова́лъ еси́ боже́ственнаго Анто́нія, ра́вными мѣ́рами добродѣ́тели подо́бяся, изсуши́лъ еси́ пло́ть, ска́чущу, а́ки жребя́, я́ко до́лжно бѣ́ души́ покори́ти, по́стное тече́ніе соверши́въ. Но, о блаже́ннѣйше о́тче и чудодѣ́йственне богоно́се, па́мять твою́ любо́вію соверша́ющимъ, проси́ очище́нія и ве́лія ми́лости.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Дре́ву кре́стному Тя́, Іису́се, пригвожде́на зря́щи, Неискусобра́чная, пла́чущи, глаго́лаше: Ча́до сла́дкое, почто́ оста́вилъ еси́ Мене́, ро́ждшую Тя́, еди́ну? Свѣ́те непристу́пный пребезнача́льнаго Отца́, потщи́ся и просла́вися, я́ко да сла́ву получа́тъ Боже́ственную, и́же Боже́ственныя стра́сти Твоя́ сла́вящіи.

На стихо́внѣ окто́иха. Сла́ва, гла́съ 8. Самогла́сенъ:

Ду́ха Свята́го испо́лненъ бы́въ преподо́бный Иларіо́нъ, де́монскія ко́зни упраздни́, кресто́мъ бо вооружи́вся и въ не́мъ дерза́я, вся́ неду́ги сло́вомъ исцѣли́, душе́вныя у́бо стра́сти, тѣле́съ же вся́кую я́зю. Того́ моли́твами, Христе́, низпосли́ на́мъ ми́ръ, я́ко Человѣколю́бецъ.

И ны́нѣ, богоро́диченъ или́ крестобогоро́диченъ. Подо́бенъ: О, пресла́внаго чудесе́!

Юница нескве́рная,* Юнца ви́дящи на дре́вѣ* пригвожда́ема во́лею,* рыда́ющи жа́лостнѣ:* увы́ Мнѣ́, вопія́ше,* люби́мѣйшее Ча́до!* что́ Ти со́нмъ воздаде́* безблагода́тный евре́йскій,* хотя́ Мя́ обезча́дствовати отъ Тебе́, Вселюбе́зне?

Тропа́рь, гла́съ 8:

Сле́зъ твои́хъ тече́ньми пусты́ни безпло́дное воздѣ́лалъ еси́, и и́же изъ глубины́ воздыха́ньми, во сто́ трудо́въ уплодоноси́лъ еси́, и бы́лъ еси́ свѣти́льникъ вселе́ннѣй, сія́я чудесы́, Иларіо́не, о́тче на́шъ: моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, богоро́диченъ или́ крестобогоро́диченъ.



НА УТРЕНИ,
Оба кано́на окто́иха, безъ му́ченичновъ, и свята́го на 6, его́же краегране́сіе: Свѣ́тлость пою́, всеблаже́нне, твои́хъ чуде́съ. Ѳеофа́ново. Гла́съ 2.

Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Свѣтоно́сное и свѣтови́дное житіе́ твое́, блаже́нне, прера́достно благохвали́ти усе́рдствующа, твоея́ свѣ́тлости ти́хостію просвѣти́ мя, молю́ся, и грѣха́, о́тче, уны́ніе отжени́.

Всенра́вно, блаже́нне, къ Бо́гу, ра́дуяся, приступи́лъ еси́, внѣ́ пло́ти и мíра бы́въ, и у́мъ нему́тенъ, утвержде́нъ воздержа́ніемъ, соблю́лъ еси́, боже́ственнымъ безстра́стіемъ отсю́ду присвоя́яся.

Свѣ́тлыми ты́ заря́ми просвѣща́емь безнача́льнаго и несозда́ннаго Божества́, о́тча небре́глъ еси́ зловѣ́рія и многомяте́жнаго невѣ́жества того́ отврати́вся, Еди́нѣй Тро́ицѣ сочета́лся еси́.

Богоро́диченъ: Возсія́вый Со́лнце изъ Тебе́, Ма́ти Приснодѣ́во, изъ Отца́ пре́жде вѣ́къ Неви́димый, и ви́димымъ же пресла́вно опису́емь тѣ́ломъ, благоче́стія свѣ́томъ человѣ́ки просвѣти́лъ е́сть.

Пѣ́снь 3.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Ядови́тыхъ страсте́й воста́нія, лѣчбо́ю по́стничества обложе́нъ, изсуши́лъ еси́, приснопа́мятне, взыва́я: нѣ́сть свя́тъ, я́коже Бо́гъ на́шъ, и нѣ́сть пра́веденъ па́че Тебе́, Го́споди.

Ко́жныя ме́ртвенныя ри́зы острога́въ ноже́мъ воздержа́нія, истка́лъ еси́ ри́зу спасе́нія, вопія́ Творцу́ твоему́: Ты́ еси́ Бо́гъ на́шъ, и нѣ́сть свя́тъ па́че Тебе́, Го́споди.

Укрѣпля́емь наде́ждею вѣ́чныхъ, и Бо́гу приводи́мь, богоно́се, дла́ньми богому́драго Анто́нія, его́же подража́я, свѣти́льникъ бы́лъ еси́, пресла́вными чудесы́ свѣтя́ся, преподо́бне.

Богоро́диченъ: Иже вся́ вообрази́вый хотѣ́ніемъ Боже́ственнымъ, въ человѣ́ка вообрази́тися сподо́бися, созида́яся во утро́бѣ Твое́й, Богоро́дице. Ему́же ны́нѣ зове́мъ: Ты́ еси́ Бо́гъ на́шъ, и нѣ́сть пра́веденъ, па́че Тебе́, Го́споди.

Сѣда́ленъ, гла́съ 8. Подо́бенъ: Прему́дрости.

Анто́нія боже́ственнаго духо́внѣ добродѣ́тельному житію́ поревнова́въ, на ра́мена твоя́ взя́лъ еси́ кре́стъ Го́спода твоего́, оста́вивъ житія́ все́ попече́ніе и стра́сти умертви́въ, ду́хомъ пожи́лъ еси́. Тѣ́мъ и тва́рь пресла́вными испо́лнилъ еси́ чудесы́, преподо́бне, Ду́ха благода́тію, Иларіо́не, о́тче на́шъ, моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко Дѣ́ву и еди́ну въ жена́хъ Тя́, безъ сѣ́мене Ро́ждшую Бо́га пло́тію, вси́ ублажа́емъ ро́ди человѣ́честіи, о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ а́нгельскій и человѣ́ческій ро́дъ досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га, прегрѣше́ній оставле́ніе дарова́ти, покланя́ющимся вѣ́рою пресвято́му Рождеству́ Твоему́.

Крестобогоро́диченъ:

Агнца, и Па́стыря и Изба́вителя Агница зря́щи на Крестѣ́, восклица́ше, пла́чущи и го́рько рыда́ющи, вопія́ше: мíръ у́бо ра́дуется, пріе́мляй Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе, вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.

Умертви́въ пло́ти мудрова́ніе, пото́къ беззако́нія мяте́жи, преподо́бне, и де́монскихъ ко́зней избѣжа́въ, къ ти́хости Боже́ственнаго Ду́ха съ пра́ведными, о́тче, воспочи́лъ еси́.

Водны́ми сле́зъ тече́ніи напая́емь, преподо́бне, душе́вную ни́ву многопло́дну дѣ́ланіемъ я́вѣ Спа́совымъ, о́тче, показа́лъ еси́, по́стниковъ умно́живъ составле́нія.

Прича́стіемъ Свята́го Ду́ха укрѣпля́емь, богоно́се, лука́вствія ду́хи низложи́лъ еси́ и си́лою Христо́вою немощны́я исцѣля́еши, проро́ческою обогати́вся чистото́ю.

Богоро́диченъ: Хра́мъ Тя́ и черто́гъ одушевле́нный, и мы́сленную трапе́зу, и свѣти́льникъ, Богома́ти благослове́нная, разумѣ́емъ, изъ Нея́же су́щимъ во тмѣ́ Свѣ́тъ возсія́, Отча существа́ Сія́ніе.

Пѣ́снь 5.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Яко мо́лнія, чистото́ю житія́ и жи́тельствомъ безпло́тнымъ подо́бяся, просія́въ въ мíрѣ, тмы́ предста́теля отго́ниши, богоблаже́нне, благоче́стія свѣ́томъ просвѣща́емь.

Вся́ческими свѣтя́ся, богому́дре, чудодѣ́йствы и благода́тію Боже́ственною озаре́нъ, всѣ́мъ позна́лся еси́ сокро́вище исцѣле́ній лю́бящимъ, о́тче богопрія́тне, я́ко другíй нѣ́кій проро́къ Бо́жій познава́емь.

Свѣ́тлостію твои́хъ, о́тче, кро́ткихъ исправле́ній мра́чныя вра́жія си́лы прогна́лъ еси́, и отъ тѣ́хъ я́рости исхити́въ къ тебѣ́ прибѣга́ющія, боже́ственными твои́ми уче́ніи къ вѣ́рѣ просвѣти́лъ еси́.

Богоро́диченъ: Еди́ну на́мъ во дву́ существу́ ви́димую ѵпоста́сь, еди́на Благослове́нная, родила́ еси́ неизрече́нно Бо́жія Бо́га Сло́ва, вопло́щшася за ми́лость неизглаго́ланную. Сего́ у́бо моли́ сохрани́ти пою́щія Тя́.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Единонача́лію служа́ Божества́ безнача́льнаго, многонача́ліе обличи́лъ еси́, и́дольское нече́стіе упраздни́въ, богому́дре, благода́тію.

Прозя́бъ, о́тче, я́ко фи́никсъ процвѣ́лъ еси́ въ Це́ркви, всеблаже́нне богому́дре, плодо́въ сла́достію вѣ́рныхъ возвеселя́я исполне́ніе.

Низложи́тель яви́лся еси́ непобѣди́мь лука́выхъ духо́въ, всесла́вне, богатотво́рная дарова́нія отъ Христа́ получи́въ, блаже́нне.

Богоро́диченъ: Неискусому́жно, Дѣ́во, родила́ еси́ и вѣ́чнуеши Дѣ́ва, явля́ющи и́стиннаго Божества́, Сы́на и Бо́га Твоего́, о́бразы.

Конда́къ, гла́съ 3. Подо́бенъ: Дѣ́ва дне́сь.

Яко свѣти́льника незаходи́маго у́мнаго тя́ Со́лнца, соше́дшеся дне́сь, восхваля́емъ въ пѣ́снехъ, возсія́лъ бо еси́ су́щимъ во тмѣ́ невѣ́дѣнія, вся́ возводя́ къ Боже́ственнѣй высотѣ́, Иларіо́не. Тѣ́мже вопіе́мъ: ра́дуйся, о́тче, всѣ́хъ по́стниковъ основа́ніе.

Икосъ:

Возлюби́въ Христо́вы Боже́ственныя за́повѣди и возненави́дѣвъ всего́ мíра наслажде́ніе, прише́лъ еси́ усе́рдно къ Тому́ и бы́лъ еси́ свѣти́льникъ, просвѣща́я вся́ концы́ блиста́ніемъ Ду́ха. Тѣ́мъ, припа́дая, молю́ тя: просвѣти́ и моя́ о́чи душе́вныя, воспѣ́ти твоя́ по́двиги, я́же показа́лъ еси́ на земли́ ра́ди бу́дущія жи́зни. Ея́же ны́нѣ наслажда́яся, помина́й вопію́щихъ ти́: ра́дуйся, о́тче, всѣ́хъ по́стниковъ основа́ніе.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Глаго́лъ вѣща́ніе твое́ и чуде́съ благода́ть Боже́ственная во всю́ изы́де зе́млю, всеблаже́нне, богоче́стія заре́ю всѣ́мъ сія́я вѣ́рно исцѣле́ній тишину́.

Кресто́мъ огражда́емь Спа́совымъ, неврежде́нъ пребы́лъ еси́, безу́мно окуси́вшуся де́монскому свирѣ́пству о тебѣ́, всему́дре, вѣ́сть бо Вы́шній Бо́гъ соблюда́ти Своя́ уго́дники.

Яко сто́лпъ непоколе́бленъ небесовысо́кій, я́ко стѣна́ неподви́жима, яви́лся еси́ посто́мъ, просвѣща́я чудесы́ и дая́ исцѣле́нія, и источа́я Боже́ственныя догма́ты отъ исто́чника приснотеку́ща Богодухнове́нныхъ Писа́ній.

Богоро́диченъ: Облакъ Дѣ́ва Тя́, пра́вды Со́лнце, роди́ и Дѣ́ва пребы́вши, дебельству́ пло́ти приобщи́вшася, Человѣ́ка бы́вша за благоутро́біе и снизхожде́ніе: Его́же воспѣва́емъ, я́ко препросла́влена.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Престо́лъ и́стинно чу́вствія бы́лъ еси́, Боже́ственнымъ ра́зумомъ просвѣща́емь и Бо́жіимъ повелѣ́ніемъ богому́дренно наставля́емь, и добродѣ́телію свѣтя́ся, зовы́й: благослови́те вся́ дѣла́ Госпо́дня Го́спода.

Колесни́ца та́инственная, нося́щая и́мя Госпо́дне, яви́лся еси́, преподо́бне, свѣ́тлостію дѣ́лъ и чуде́съ явле́ніемъ, и чистото́ю житія́, взыва́я: благослови́те вся́ дѣла́ Госпо́дня Го́спода.

Сыноположе́нъ Боже́ственною благода́тію, снаслѣ́дникъ Христо́въ бы́лъ еси́ и бога́тство небе́сное, и Ца́рство непрее́мное прія́лъ еси́, богоглаго́ливе, зовя́: благослови́те вся́ дѣла́ Госпо́дня Го́спода.

Богоро́диченъ: Мѵ́ро у́мное истоще́нное, Дѣ́во, имену́ема Сы́на чревоноси́ла еси́, куре́ніемъ Божества́ земны́я благово́нствующа и отъ тли́ избавля́ющаго взыва́ющія: благослови́те вся́ дѣла́ Госпо́дня Го́спода.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Святы́хъ жили́ща проходи́ти сподо́бился еси́, житіе́ соверши́въ свя́то, преподо́бне, и, я́ко су́щу пра́ведну, тебѣ́ Трисвѣ́тлый возсія́ Свѣ́тъ, и Того́ сопру́гъ весе́ліе прія́ше.

Трудо́въ воздая́ніе отъ Христа́ пріе́мъ и жи́зни вѣ́чныя я́вѣ причасти́вся, и па́че ума́ благолѣ́пія добро́тами, о́тче, преизя́ществованъ, о пою́щихъ тя́ ко Влады́цѣ моли́ся.

Яко ке́дръ высокове́рхій добродѣ́телію возвыша́емь, во дво́рѣхъ, богоно́се, Бо́жіихъ насажде́нъ бы́лъ еси́, и я́ко заключе́нъ огра́дъ, я́ко благоцвѣты́й ра́й яви́лся еси́, и я́ко исто́чникъ кипя́щій исцѣле́ній дарова́нія.

Богоро́диченъ: Черто́гъ была́ еси́ па́че ума́ Воплоти́вшагося Сло́ва, Дѣ́во Богороди́тельнице, одѣ́яна сла́вою добродѣ́телей и укра́шена, тѣ́мъ Тя́, Всенепоро́чная, Богоро́дицу возвѣща́емъ.

Свѣти́ленъ. Подо́бенъ: Жены́, услы́шите.

Мірска́го пристра́стія, я́ко стра́стна, уклони́лся еси́, и безпи́щіемъ пло́ть увяди́въ, обновля́еши брозды́ держа́щихъ и сла́вою обогати́лся еси́, чудодѣ́йствуя изря́дная, пастыренача́льниковъ ве́рхъ, богопрія́тне Иларіо́не.

Богоро́диченъ:

Во дву́хъ хотѣ́ніихъ и естества́хъ, Всенепоро́чная, еди́нѣй же ѵпоста́си ражда́еши Бо́га неизрече́нно, на́съ ра́ди обнища́вшаго до Креста́ хотѣ́ніемъ и дарова́вшаго на́мъ Божества́ бога́тство, Богома́ти Дѣ́во.

На стихо́внѣ окто́иха. Сла́ва, гла́съ 2. Самогла́сенъ:

Ти́хое твое́, о́тче, и чи́стое житіе́ ви́дѣвъ Христо́съ, кро́ткое и молчали́вое, оби́тель сотвори́ въ тебѣ́, и бы́лъ еси́ жили́ще боже́ственное, и сего́ ра́ди со а́нгелы на небесѣ́хъ водворя́ешися, блаже́нне.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Егда́ нескве́рная Агница ви́дѣ Своего́ Агнца, на заколе́ніе, я́ко человѣ́ка, во́лею влеко́ма, пла́чущи, глаго́лаше: безча́дствовати Мя́ ны́нѣ тщи́шися, Христе́, Ро́ждшую Тя́, что́ сіе́ сотвори́лъ еси́, Изба́вителю вся́ческихъ? оба́че воспѣва́ю и сла́влю Твою́, ю́же па́че ума́ и сло́ва, кра́йнюю бла́гость, Человѣколю́бче.


НА ЛИТУРГІИ,

Блаже́нна окто́иха на 4 и свята́го пѣ́снь 3-я, на 4. Проки́менъ, гла́съ 7: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Кори́нѳяномъ, зача́ло 188. Аллилу́ія, гла́съ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе Луки́, зача́ло 24. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 171 – 175 об.

/ Къ оглавленію раздѣла /


Наверхъ / Къ титульной страницѣ

0