Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 20-й де́нь.
Свята́го великому́ченика Арте́мія.

[ВЕЧЕРЪ,]
На Го́споди воззва́хъ: стихи́ры на 6, гла́съ 4. Подо́бенъ: Яко до́бля.

Многообра́зными му́ками лю́тыхъ ра́нъ,* преда́въ казни́ти многострада́льное* и терпѣли́вѣйшее тѣ́ло твое́,* богому́дре Арте́міе,* не отве́рглся еси́ Христа́,* ни куми́ромъ поже́рлъ еси́,* но терпѣ́лъ еси́, я́коже ино́му стра́ждущу,* ожида́я бу́дущихъ воздая́ній* и безсме́ртнаго благосла́вія. [Два́жды.]

Повѣ́шенъ, стру́жемь* и ка́меніемъ сдробля́емь,* и желѣ́зомъ отвсю́ду изнуря́емь,* и мече́мъ усѣка́емь,* непоколеби́мь пребы́лъ еси́,* на ка́мени мы́сленнѣмъ водрузи́въ души́ твоея́ стопы́, сла́вне.* Сея́ ра́ди побѣ́ды* а́нгеломъ и му́ченикомъ сочета́лся еси́,* Свѣ́та неизрече́ннаго исполня́емь. [Два́жды.]

Исцѣле́ній благода́ти* лю́бящимъ тя́ всегда́* источа́ютъ, сла́вне, твоя́ мо́щи,* и потопля́ютъ стра́сти* и неду́ги, Арте́міе,* и прого́нятъ лука́выхъ де́моновъ полки́,* напая́ютъ же вѣ́рныхъ сердца́,* прозяба́ющая добродѣ́телей плоды́ боже́ственныя* и благоче́стія зна́ніе. [Два́жды.]

Сла́ва, гла́съ 2. Студи́тово:

Разу́мнаго свѣти́льника вѣ́ры, Арте́мія почти́мъ, я́ко обличи́ царя́ ме́рзскаго, и кро́вію муче́нія его́ Це́рковь Бо́гъ обагри́. Тѣ́мъ и прія́тъ исцѣле́ній благода́ть незави́стную, исцѣля́ти неду́ги, вѣ́рно приходя́щихъ къ ра́цѣ моще́й его́.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Егда́ нескве́рная Агница ви́дѣ Своего́ Агнца, на заколе́ніе, я́ко человѣ́ка, во́лею влеко́ма, пла́чущи, глаго́лаше: безча́дствовати Мя́ ны́нѣ тщи́шися, Христе́, Ро́ждшую Тя́, что́ сіе́ сотвори́лъ еси́, Изба́вителю вся́ческихъ? оба́че воспѣва́ю и сла́влю Твою́, ю́же па́че ума́ и сло́ва, кра́йнюю бла́гость, Человѣколю́бче.

На стихо́внѣ окто́иха. Сла́ва, гла́съ 6:

За Христа́ зако́нно пострада́въ, Арте́міе, и съ чу́вственнымъ царе́мъ у́мнаго низложи́въ врага́, досто́йно прія́лъ еси́ отъ Страстополо́жника Спа́са вѣне́цъ, и ны́нѣ на небесѣ́хъ со а́нгельскими ра́дуешися чи́ны, вы́шняго светоли́тія наслажда́яся я́сно и Тріѵпоста́сному и Пе́рвому Свѣ́ту причаща́яся оби́льно. Тѣ́мже и мы́, благовѣ́рніи лю́діе и любому́ченицы, пѣ́сньми вопіе́мъ ти́: ра́дуйся, адама́нте непобѣди́мый душе́ю и крѣ́пкій ору́жниче Христо́въ; ра́дуйся, ле́сти и́дольскія потреби́телю и и́стины побо́рниче свѣ́тлый. Но моли́ся Го́споду, и на́мъ житіе́мъ боголюби́вымъ съ тобо́ю получи́ти стоя́ніе при престо́лѣ Вели́чествія Его́.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Ви́дящи Тя́ распина́ема, Христе́, Тебе́ Ро́ждшая вопія́ше: что́ стра́нное е́же ви́жу та́инство, Сы́не Мо́й? ка́ко на дре́вѣ умира́еши, пло́тію повѣ́шенъ, жи́зни Пода́телю?

Тропа́рь, гла́съ 4:

Му́ченикъ Тво́й, Го́споди, Арте́мій во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.

Сла́ва, и ны́нѣ, богоро́диченъ или́ крестобогоро́диченъ.



НА УТРЕНИ,
Оба кано́на окто́иха, безъ му́ченичновъ. И свята́го кано́нъ на 6, его́же краегране́сіе: Твою́ пода́ждь ми́ бога́тную благода́ть, блаже́нне. Іо́сифъ. Гла́съ 2.

Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

По́двигомъ, му́чениче, до́брымъ я́ко подвиза́вся и свѣ́тлыя вѣнцы́ пріи́мъ, Свѣ́ту предстои́ши, просвѣща́емь по прича́стію Невеще́ственному, тѣ́мъ мо́лимъ тя́: просвѣти́ на́съ моли́твами твои́ми.

Свѣ́тлый тво́й, му́чениче, пра́здникъ вся́ созва́ ра́достно на трапе́зу дне́сь, предложи́въ страда́ній твои́хъ боре́нія, му́жество и противле́ніе, и́миже насы́щшеся, вѣ́рою тя́ и любо́вію ублажа́емъ.

Умерщвле́на на Крестѣ́, преблаже́нне, Недомы́сленнаго пло́тію поразумѣ́лъ еси́ Го́спода, жи́зни Вино́вника, во́льную возлюби́лъ еси́ ме́ртвость, ю́же отъ страда́ній, тѣ́мъ безсме́ртную сла́ву получи́лъ еси́.

Богоро́диченъ: Воплоти́вся изъ Тебе́ боголѣ́пно Сло́во Безпло́тное премно́жествомъ человѣколю́бія, Пречи́стая, къ страсте́мъ прибли́жися и безстра́стіе человѣ́комъ источи́ Препросла́вленный Госпо́дь, сла́вно бо просла́вися.

Пѣ́снь 3.

Ирмо́съ: Процвѣла́ е́сть пусты́ня я́ко кри́нъ Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Му́ченическими украси́тися вѣнцы́, сла́вне, жела́я, я́звы поне́слъ еси́ и растерза́нія го́рькихъ болѣ́зней, Боже́ственною благода́тію.

Не потрясе́ столпа́ твоего́ се́рдца, всему́дре, лютѣ́йшее приложе́ніе му́къ, утверди́ся бо на Разу́мнѣмъ Ка́мени неподви́жнѣмъ.

На дре́вѣ повѣ́шенъ и ча́стыми отвсю́ду терза́ніи окружа́емь, твои́ми очесы́ къ Могу́щему спасти́ взира́лъ еси́, достосла́вне.

Богоро́диченъ: Вопло́щся хотѣ́ніемъ отъ крове́й, Влады́чице, Твои́хъ пречи́стыхъ Госпо́дь, спаса́етъ человѣ́чество и мно́жества му́чениковъ собра́.

Сѣда́ленъ, гла́съ 8. Подо́бенъ: Прему́дрости.

Царю́ вѣко́въ угожда́я, царя́ беззако́ннаго вся́кій совѣ́тъ отрази́лъ еси́, сла́вне, и истука́ннымъ не поже́рлъ, того́ ра́ди же́ртву тебе́ сама́го прине́слъ еси́ пожре́нному Сло́ву, пострада́въ крѣ́пко. Тѣ́мъ и чуде́съ источа́еши струи́, стра́сти исцѣля́я вѣ́рно приходя́щихъ къ тебѣ́, страстоте́рпче Арте́міе, моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Со́лнца о́блаче разу́мнаго, Боже́ственнаго Свѣ́та свѣти́льниче златокова́нный, Нескве́рная, Небла́зная, Всенепоро́чная Влады́чице, омраче́нную ду́шу мою́ ослѣпле́ніемъ страсте́й, безстра́стія заре́ю просвѣти́, молю́ся, и оскверне́нное мое́ се́рдце омы́й пото́ки умиле́нія, покая́нія же слеза́ми, и отъ тимѣ́нія мя́ очи́сти дѣ́лъ мои́хъ, да любо́вію зову́ Ти: Богоро́дице Приснодѣ́во, моли́ Христа́ Бо́га прегрѣше́ній оставле́ніе пода́ти ми́, Тебе́ бо имѣ́ю наде́жду, ра́бъ Тво́й.

Крестобогоро́диченъ:

Агнца, и Па́стыря и Изба́вителя, Агница зря́щи на Крестѣ́, восклица́ше, пла́чущи, и го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя Стра́сти Твоя́.

Пѣ́снь 4.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Уподобився Распятому на древѣ волею, возвысился еси, протязаемь и суровѣйше стружемь, совлачаяся кожныхъ ризъ умерщвленія.

Болѣзни твоя плотскія и лютыхъ простертіе неболѣзненный покой, мучениче, явѣ тебѣ исходатаиша, его́же ны́нѣ насыща́яся, вся́ку болѣ́знь облегча́еши отъ ду́шъ на́шихъ.

Равноа́нгельну бы́вшу тебѣ́ страда́ній свѣ́тлостьми, руко́ю а́нгеловою посыла́етъ теб ѣ́ пи́щу, небе́сный Хлѣ́бъ, Жи́знь на́ша, укрѣпля́ющую тя́, му́чениче достосла́вне.

Бога́тыми тя́ украси́ благода́ть Ду́ха дарова́ніи, всему́дре, тѣ́мъ вся́ческія неду́ги, му́чениче всече́стне, отго́ниши, вѣ́рою прибѣга́ющихъ ти́.

Богоро́диченъ: Дѣ́ву Тя́ по рождествѣ́, Нескве́рная, нетлѣ́нну Христо́съ соблюде́, благоволи́вый во утро́бѣ Твое́й, всего́ мя человѣ́ка воспрія́ти, кра́йнею бла́гостію.

Пѣ́снь 5.

Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо Влады́ко, къ свѣтонача́льнику Отцу́ Твоему́, отъ но́щи невѣ́дѣнія, приведе́ніе и́мамы.

Свѣща́ свѣтоза́рная ви́дѣнъ бы́лъ еси́ Ду́хомъ, Арте́міе, вѣ́рныя просвѣща́ющи и лука́вствія разгоня́ющи мра́чныхъ и тмы́ испо́лненныхъ духо́въ.

На Ка́мени Живо́тнѣмъ душе́вныя стопы́ водрузи́въ, ка́меніемъ сгнѣта́емь и болѣ́зньми окружа́емь, и́стинный страстоте́рпецъ непрекло́ненъ пребы́лъ еси́.

Ты́ честны́ми вооруже́нъ Ду́ха си́лами, трезу́бцевъ остроты́, му́чениче доблему́дренне, небре́глъ еси́, въ ни́хже спопра́въ жа́ла вра́жія.

Богоро́диченъ: Кре́стъ и погребе́ніе, изъ Тебе́ во́лею на́съ ра́ди Рожде́йся претерпѣ́въ, Влады́чице, свидѣ́теля крѣпча́йша Арте́мія Свои́хъ страда́ній, я́ко Крѣ́пкій, содѣ́лалъ е́сть.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Агнецъ и заколе́ніе всецѣ́лое, му́чениче, прине́слся еси́, Арте́міе, во́льное распя́тіе въ на́ше Пріи́мшему воззва́ніе.

Неосла́бными я́звами сокруша́емо тѣ́ло твое́, Арте́міе, терпѣли́вѣйшее, душе́вное благоро́діе соблю́лъ еси́, вѣ́рою неврежде́нное.

Неду́говъ на́съ изба́ви, му́чениче, искуше́ній и страсте́й же, и скорбе́й, къ тебѣ́ притека́ющія, подража́телю Спа́совъ, Арте́міе.

Богоро́диченъ: Обурева́емаго въ пучи́нѣ скорбе́й и потопля́ема наше́ствіями треволне́ній, спаси́, Богоро́дице Дѣ́во, раба́ Твоего́.

Конда́къ, гла́съ 2. Подо́бенъ: Тве́рдыя.

Благочести́ваго и вѣнцено́снаго му́ченика, на враги́ побѣ́ды взе́мшаго одолѣ́ніе, соше́дшеся, досто́йно пѣ́сньми восхва́лимъ Арте́мія, превели́каго въ му́ченицѣхъ, чуде́съ же да́теля пребога́таго, мо́лится бо Го́споду о всѣ́хъ на́съ.

Икосъ:

Кто́ по́двиги твоя́ довлѣ́етъ изглаго́лати, страстоте́рпче, или́ болѣ́зни твоя́, я́же му́жески претерпѣ́лъ еси́ за вѣ́ру Госпо́дню, и дарова́нія, и́хже сподо́бился еси́? Не довлѣ́ютъ уста́ человѣ́ческая повѣ́дати: му́дростію бо укра́шенъ и му́жествомъ, бога́тство возненави́дѣвъ и досто́инство привре́менное, во́инъ яви́лся еси́ и́скреннѣйшій, моля́ся у́бо Го́споду о всѣ́хъ на́съ.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Непобѣди́мь смы́слъ неруши́мою души́ тве́рдостію, Арте́міе, стяжа́въ, вра́жія кова́рства, му́чениче, упраздни́лъ еси́, поя́ изря́днѣйше: Сы́й благослове́нъ и препросла́вленъ.

Струя́ми крове́й твои́хъ возвы́шенный му́къ о́гнь угаси́лъ еси́, блаже́нне, и росо́ю Ду́ха облія́емь, ра́дуяся взыва́лъ еси́: Сы́й благослове́нъ и препросла́вленъ.

Исцѣле́ній дарова́нія источа́я, страсте́й разжже́нія угаша́еши Боже́ственною благода́тію, отгоня́еши же ду́хи присѣще́ніемъ твои́мъ, воспѣва́я, присносло́вый: Сы́й благослове́нъ и препросла́вленъ.

Богоро́диченъ: Ме́ртвымъ Источи́вшаго безсме́ртіе, Дѣ́во Всенепоро́чная, боголѣ́пно родила́ еси́. Того́ у́бо моли́ умертви́ти на́ша стра́сти тѣле́сныя, Чи́стая, и вѣ́чныя сподо́битися жи́зни.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Язвами лю́тыми тѣ́ло твое́, трезу́бцы же изнуря́емо, претерпѣ́лъ еси́, взира́яй на воздая́ніе бу́дущее, е́же подае́тъ тебѣ́ зову́щу, сла́вне, вся́ческихъ Бо́гъ, Влады́ка же и Госпо́дь.

Кровьми́ твои́ми земля́ освяти́ся, и врачевство́ яви́ся тѣ́ло твое́ многострада́льное, вся́кій неду́гъ, вся́ко озлобле́ніе и вся́кій де́монскій всегда́ вре́дъ отгоня́ отъ вѣ́рно прибѣга́ющихъ къ тебѣ́.

Украше́ніе страда́льцевъ яви́лся еси́, я́же въ мíрѣ благочестному́дренно отри́нувъ и па́че премíрная худѣ́йшимъ искупу́я честно́ю же, прехва́льне, кро́вію, воспѣва́я: благослови́те вся́ дѣла́ Госпо́дня Го́спода.

Богоро́диченъ: Исте́кшія ны́ го́рькимъ дре́ва вкуше́ніемъ и па́дшія поползнове́ніемъ возста́вила еси́, Пречи́стая, Содѣ́теля ро́ждши Сло́во Ѵпоста́сное, Чи́стая. Ему́же вопіе́мъ: благослови́те вся́ дѣла́ Госпо́дня Го́спода.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Ви́дѣти восхотѣ́въ добро́ты небе́сныя, ви́димыя добро́ты мíра прете́клъ еси́, и добротворе́ньми страда́льцевъ украси́вся, му́чениче доблему́дренне, до́брыхъ кра́йнѣйшее, веселя́ся, воспрія́лъ еси́.

Яко у́тро, я́ко со́лнце, па́мять твоя́, просвѣща́ющи вѣ́рныхъ сердца́, блаже́нне, возсія́, ты́ бо и Свѣ́та и Дне́ свѣтови́дный яви́лся еси́ наслѣ́дникъ, разоря́яй, Арте́міе, мглу́ ду́шъ на́шихъ.

Взыгра́имъ, человѣ́цы, духо́вно ликовству́юще, Арте́мія па́мять, боже́ственнаго му́ченика, пое́мъ Бо́гу съ похвало́ю, Чу́дному су́щу во святы́хъ и освяща́ющу вѣ́рою Того́ честву́ющія.

Ра́ка твоя́, точа́щи непреста́нно исцѣле́нія, вѣ́рныя созыва́етъ любо́вію почерпа́ти на тѣле́сное здра́віе и душе́вное и́стинно спасе́ніе, всеблаже́нне Арте́міе, моли́твенниче о благохва́лящихъ тя́.

Богоро́диченъ: Свѣ́томъ мя́ просвѣти́ лица́ Твоего́, Го́споди, уны́нія тмо́ю покрове́ннаго, имѣ́я моля́щую Тя́, Сло́ве, Истинную Чи́стую Ма́терь Твою́, и а́нгельскія си́лы, и пресла́внаго Арте́мія.

Свѣти́ленъ. Подо́бенъ: Свѣ́те неизмѣ́нный.

Свѣ́тъ въ се́рдцы твое́мъ возсія́въ, Арте́міе страстоте́рпче, горча́йшія му́ки претерпѣ́вшу му́жественно, и исцѣле́ній благода́ть прія́лъ еси́ свы́ше, немощны́я исцѣля́ти всегда́.

Богоро́диченъ:

Свѣ́тъ просія́вый безлѣ́тно изъ Отца́ пре́жде вѣко́въ, въ лѣ́то ны́нѣ напослѣ́докъ изъ Тебе́, Дѣ́во, прозябе́ на спасе́ніе мíра, къ Нему́же не оста́ви о мíрѣ моли́тися.

На стихо́внѣ окто́иха. Сла́ва, гла́съ 6:

Дне́сь вселе́нная вся́ страстоте́рпца просвѣща́ется заря́ми, и Бо́жія Це́рковь цвѣ́ты украша́ема, Арте́міе, вопіе́тъ ти́: уго́дниче Христо́въ и предста́телю те́плый, не преста́й моля́ся о рабѣ́хъ твои́хъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Ви́дящи Тя́ распина́ема, Христе́, Тебе́ Ро́ждшая вопія́ше: что́ стра́нное е́же ви́жу та́инство, Сы́не Мо́й? ка́ко на дре́вѣ умира́еши, пло́тію повѣ́шенъ, жи́зни Пода́телю?


НА ЛИТУРГІИ,

Блаже́нна, окто́иха на 4, и му́ченика пѣ́снь 3-я на 4. Проки́менъ, гла́съ 7: Возвесели́тся пра́ведникъ о Го́сподѣ и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́тимися къ Тебѣ́. Апо́столъ къ Тимоѳе́ю, зача́ло 292. Аллилу́ія, гла́съ 4: Пра́ведникъ, я́ко фи́никсъ, процвѣте́тъ, [я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни во дво́рѣхъ до́му Бо́га на́шего процвѣту́тъ]. Ева́нгеліе Іоа́нна, зача́ло 52. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 166 об. – 171.

/ Къ оглавленію раздѣла /


Наверхъ / Къ титульной страницѣ

0