Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 26 iюня 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 19-й де́нь.
Свята́го проро́ка Іо́иля и свята́го му́ченика Уа́ра.

[ВЕЧЕРЪ,]
Стихи́ры проро́ка, гла́съ 8. Подо́бенъ: О, пресла́внаго чудесе́!

Боже́ственный Ду́хъ излія́ся,* я́ко честны́й Іо́иль, проро́чествуя, сказа́,* отъ Него́ дви́жимь,* на ны́, вѣ́рующія,* и та́йнамъ Боже́ственнымъ явле́ніе открыва́етъ,* и проро́чествуютъ,* и́же дѣ́йство Его́ пріе́мшіи,* и Боже́ственною заре́ю просвѣща́еми,* и Боже́ственною благода́тію.

Боговѣща́нія испо́лненъ* ди́вный Іо́иль,* я́ко исто́чникъ, исхо́дитъ, ду́ши напая́ющій,* отъ до́му Твоего́, Влады́ко,* и сла́дость на́мъ иска́па,* помышле́нія ослажда́ющую,* ве́сь высо́къ бы́въ ду́хомъ,* добродѣ́телію возноси́мь* къ Боже́ственнѣй высотѣ́.

Проро́ческимъ дерзнове́ніемъ твои́мъ* и разу́мнымъ къ Бо́гу,* Іо́иле, приближе́ніемъ,* и́мже небе́сная зри́ши видѣ́нія,* о на́съ Того́ уми́лостиви,* соверша́ющихъ вѣ́рою па́мять твою́,* разрѣше́нія прося́ прегрѣше́ній, сла́вне,* и прича́стія Боже́ственныхъ наслажде́ній,* и ве́лія ми́лости.

Ины стихи́ры, му́ченика, гла́съ 6. Подо́бенъ: Все́ отло́жше.

Страда́нія ви́дѣвъ* добропобѣ́дныхъ му́чениковъ,* дерзнове́нія боже́ственнаго испо́лненъ бы́въ,* вше́лъ еси́ на три́знище* и Христа́, Уа́ре, на́съ ра́ди Человѣ́ка бы́вша,* проповѣ́далъ еси́,* не устраши́вся сме́рти,* ниже́ предлежа́щихъ муче́ній.* Тѣ́мъ уязвля́емь* и неми́лостивно раздробля́емь,* ра́довался еси́ соверше́ннымъ ра́зумомъ,* смотря́я, му́дре, пребыва́ющее добросла́віе* Бо́га возлюби́вшимъ.

Пло́ти съ кровьми́,* па́дающія ви́дя,* и я́ко ино́му стра́ждущу,* страда́льче, пребыва́лъ еси́ до́блественнѣйше:* привя́занъ бо ко дре́ву,* терза́нія терпѣ́лъ еси́ беззако́нныхъ пожда́ннѣйше.* Бо́гу же въ ру́ки ду́хъ тво́й пре́далъ еси́,* ужаси́въ ви́дящія тя́* непрекло́нными противле́ніи.* Тѣ́мъ тя́ почита́емъ,* вельми́ му́жествовавша, му́дре,* и низложи́вша мучи́теля,* Уа́ре, болѣ́зньми твои́ми.

Помазу́ющи мѵ́ры тя́,* чу́дная Клеопа́тра* подъ зе́млю положи́* и хра́мъ тебѣ́ святы́й возсозда́,* пра́здникъ творя́щи, ди́вне Уа́ре,* и вѣ́рно тя́ моля́щи.* Ея́же дѣ́тище у́мному во́инству причета́лъ еси́* и сла́вою удобри́лъ еси́,* и лико́мъ святы́хъ сочета́лъ еси́.* Его́же ча́сти сподо́би ны́,* твое́ соверша́ющія* благоче́стно торжество́,* му́чениче досточу́дне.

Сла́ва, и ны́нѣ, богоро́диченъ. Подо́бенъ то́йже:

Ра́дуйся, ко́рене ро́сный,* ра́дуйся, же́зле Ааро́новъ,* прозябы́й Цвѣ́тъ неувяда́ющій и присноживы́й,* благопло́дный раю́, Жи́зни дре́во,* изъ Іессе́ева ко́рене, Чи́стая,* просія́вши, Отрокови́це,* и земны́хъ пита́ющи Хлѣ́бомъ разу́мнымъ.* Ра́дуйся, багряни́це всечестна́я,* всѣ́хъ Царя́, Богоневѣ́сто,* вѣ́нче всесвѣ́тлый,* архіере́евъ благолѣ́піе,* ра́дуйся, еди́на Пречи́стая.

Крестобогоро́диченъ. Подо́бенъ то́йже:

Агнца Своего́* Агница нескве́рная дре́вле* и непоро́чная Влады́чица* на дре́вѣ кре́стнѣмъ я́ко узрѣ́,* ма́терски восклица́ше,* и дивя́щися, вопія́ше:* Ча́до сладча́йшее,* что́ зрѣ́ніе сіе́ но́вое и пресла́вное?* ка́ко со́нмъ безблагода́тный* суди́щу Пила́тову предаде́ Тя* и осужда́етъ на сме́рть Живота́ вся́ческихъ?* но воспѣва́ю Твое́ неизрече́нное,* Сло́ве, снизхожде́ніе.

Тропа́рь, гла́съ 4:

Му́ченикъ Тво́й, Го́споди, Уа́ръ во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.

Сла́ва, и ны́нѣ, богоро́диченъ или́ крестобогоро́диченъ.



НА УТРЕНИ,
Кано́нъ окто́иха еди́нъ, и святы́хъ два́.

Кано́нъ проро́ка, его́же краегране́сіе: Проро́чествомъ Іо́иля проро́ка дивлю́ся. Творе́ніе Ѳеофа́ново. Гла́съ 2.
Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Ли́къ на́мъ проро́ческій свесели́тся, похваля́ему тебѣ́ небому́дренну, Іо́иле богогла́се, съ ни́миже спасти́ся на́мъ моли́, блаже́нне.

Глаго́лы Бо́жія предвозвѣща́я, богодухнове́нне, лю́тый проре́клъ еси́ гнѣ́въ и пра́ведный, и́же отъ нече́стія прибы́вшій лю́демъ твои́мъ суему́дреннымъ.

Чу́дное, и свѣтоно́сное Ду́ха, и животворя́щее вдохнове́ніе тебе́ присѣни́ и бу́дущихъ зна́ніе вдохне́, проро́че блаже́ннѣйше.

Богоро́диченъ: Тя́ ски́нія свидѣ́тельства прописа́, многови́дно образу́ема, явля́ющи отъ Тебе́ вопло́щшагося неизмѣ́нно, Богома́ти, пречи́стая Влады́чице.

Инъ кано́нъ му́ченика, его́же краегране́сіе: Стра́сти похваля́ю Уа́ра, сла́ву вели́кую. Іо́сифово. Гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Яви́лся еси́ на высотѣ́ Христо́вы Це́ркве, Уа́ре, я́коже со́лнце свѣ́тлое, блиста́ньми просвѣща́я твои́хъ боре́ній, блаже́нне, земна́я исполне́нія.

Боже́ственныя любве́, всеблаже́нне, объя́тъ сла́дкимъ раче́ніемъ, отве́рглся еси́ себе́ и ко вся́кой му́цѣ пло́тстѣй устреми́лся еси́, крѣ́пко подвиза́вся.

Смы́сленно боже́ственныхъ подви́жникъ ю́зами связа́въ себе́, страстоте́рпче, и ле́стныя разори́лъ еси́ у́зы крѣ́пкимъ терпѣ́ніемъ мно́гихъ му́къ.

Богоро́диченъ: Пресу́щественное Сло́во во Твое́мъ чре́вѣ па́че сло́ва всели́ся, и роди́вся боголѣ́пно, му́ченическія ли́ки, Чи́стая, приведе́, съ ни́миже пѣсносло́вимъ Тя́.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Учи́ми твои́ми му́дрыми догма́ты, по́стъ, проро́че, и служе́ніе благоче́стно проповѣ́дуемъ, въ до́мъ Госпо́день ходя́ще.

Твои́мъ уче́ніемъ послѣ́дующе отъ всего́ се́рдца и помышле́нія, пла́чемъ же и моли́твами Бо́га взыску́емъ, достохва́льне.

Изъяви́въ на́мъ Всеще́драго Влады́ки, проро́че, долготерпѣ́ніе, и Боже́ственную же благосты́ню изъясни́лъ еси́ Того́, и благода́ть.

Богоро́диченъ: Зачала́ еси́, Пречи́стая, Бо́га и родила́ еси́ Сло́во, неизрече́нно вопло́щшееся, во проро́цѣхъ глаго́лавшее и испо́лнившее тѣ́хъ проповѣ́данія.

Инъ.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Вше́лъ еси́ ра́зумомъ крѣ́пкимъ въ му́жественныя по́двиги, утверди́вся наде́ждами бу́дущихъ благи́хъ и му́чениковъ Христо́выхъ всему́дрыми, блаже́нне, поуче́ніи.

Во́инство святы́хъ страстоте́рпецъ, стра́ждущихъ зако́ннѣ зря́, о́нѣхъ показа́лъ еси́ му́жескую крѣ́пость, примѣша́яся многообра́знымъ, Уа́ре, му́камъ.

Въ полцѣ́ свяще́ннѣмъ, Уа́ре, я́ко до́блій во́инъ, обрѣ́лся еси́, и ссе́къ мно́жество му́жества мече́мъ, му́дре, ра́тнымъ, побѣ́дами сла́вимь.

Богоро́диченъ: Дѣ́во Ма́ти Бо́жія, моего́ уны́нія глубоча́йшую тму́ и о́блаки страсте́й просвѣще́ніемъ, е́же въ Тебѣ́, молю́ Тя, благода́ти, отжени́.

Сѣда́ленъ проро́ка, гла́съ 2. Подо́бенъ: Страстоте́рпцы Госпо́дни.

Богоглаго́ливе проро́че, вдохнове́ніемъ испо́лнився Утѣ́шителевымъ, изъясни́лъ еси́ въ послѣ́дняя времена́ бы́вшее язы́комъ осія́ніе. Сего́ ра́ди ны́нѣ благоче́стно тя́ похваля́емъ, и твою́ па́мять соверша́юще, вопіе́мъ ти́: Христа́ Бо́га моли́ о душа́хъ на́шихъ.

Сла́ва, му́ченика, гла́съ 1. Подо́бенъ: Гро́бъ Тво́й.

Стра́сти честны́хъ ви́дѣвъ му́чениковъ и тѣ́хъ лобза́въ у́зы любо́вію, на высоту́ восте́клъ еси́ свидѣ́тельства, всечу́дне, на дре́вѣ бо повѣ́шенъ, ра́ны претерпѣ́лъ еси́, до́ндеже въ ру́ки Госпо́дни ду́ха пре́далъ еси́.

И ны́нѣ, богоро́диченъ:

Упова́ніе христіа́нъ, Пресвята́я Дѣ́во, Его́же родила́ еси́ Бо́га, па́че ума́ и сло́ва, непреста́нно моли́ о воспѣва́ющихъ Тя́, пода́ти оставле́ніе грѣхо́въ на́шихъ всѣ́хъ и исправле́ніе житія́, вѣ́рою и любо́вію при́сно сла́вящимъ Тя́.

Крестобогоро́диченъ:

Зря́щи Тя́, Христе́, Всенепоро́чная Ма́ти, ме́ртва на Крестѣ́ просте́рта, вопія́ше: Сы́не Мо́й, Собезнача́льне Отцу́ и Ду́ху, что́ неизрече́нное Твое́ сіе́ смотре́ніе, и́мже спа́слъ еси́ пречи́стыхъ ру́къ Твои́хъ, Ще́дре, созда́ніе?

Пѣ́снь 4.

Ирмо́съ: Услы́шахъ, Го́споди, слу́хъ Твоего́ смотре́нія, и просла́вихъ Тя́, Еди́не Человѣколю́бче.

Ми́лостивъ бу́ди, Го́споди, чи́сто къ Тебѣ́ ка́ющимся, я́ко еди́нъ Ще́дръ и Многоми́лостивъ.

Якоже провозвѣсти́лъ еси́, сла́вне, отъ Бо́га излія́ся Ду́хъ на вся́ку пло́ть вѣ́ровавшихъ.

Сни́тіе Ду́ха, ученики́ Госпо́дни умудри́вшее, Твоя́ Богоглаго́ливая словеса́ испо́лни.

Богоро́диченъ: Изба́вльшеся, Пречи́стая, изъ мра́чныхъ а́довыхъ боко́въ, Боже́ственнымъ Твои́мъ Рождество́мъ, Тя́ ублажа́емъ.

Инъ.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Святы́ми я́звами удобря́емь, краснѣ́йшій яви́лся еси́, и Бо́гу, Уа́ре, возлю́бленъ, Вѣнча́вшему тво́й ве́рхъ, досточу́дне.

На крестѣ́, сла́вне, растяза́емь и на земли́ простира́емь, лю́тыя болѣ́зни претерпѣ́лъ еси́. Тѣ́мъ неболѣ́зненную жи́знь наслѣ́довалъ еси́, веселя́ся.

Зако́нно ви́дяще боже́ственніи му́ченицы стра́ждуща тя́, блаже́нне, терпѣ́нія словесы́ укрѣпля́ху, съ ни́миже стра́сти до́лгія соверши́въ, ублажи́лся еси́.

Хвала́ми вѣнча́емъ боже́ственныя му́ченики, я́же вѣнча́ благода́ть Боже́ственная Боже́ственными увязе́ніи, низло́жшихъ вра́жія высо́кая мудрова́нія.

Богоро́диченъ: Отъ ти́ны страсте́й, Влады́чице, возведи́, и стра́стныхъ помышле́ній, отчужда́ющихъ мя́ Бо́га Еди́наго Чи́стаго, да вѣ́рою ублажа́ю Тя́.

Пѣ́снь 5.

Ирмо́съ: Но́щи преше́дшей, прибли́жися де́нь, и Свѣ́тъ мíру возсія́, сего́ ра́ди хва́лятъ Тя́ а́нгельстіи чи́ни и славосло́вятъ Тя́ вся́ческая.

Христо́во прише́ствіе Іо́иль боже́ственный я́вственно всѣ́мъ прорече́, я́ко пріи́детъ и спасе́тъ ро́дъ человѣ́ческій отъ и́дольскаго льще́нія.

Ве́сь ты́ возни́кнувъ, проро́че сла́вне, на преу́мный же и вы́ше по́мысла Свѣ́тъ, проро́чествія благода́ть извле́клъ еси́ отту́ду и пра́вду проповѣ́далъ еси́.

О пою́щихъ тя́ моли́ся спасти́ отъ вся́каго озлобле́нія, пребога́те Іо́иле, и Боже́ственныя благода́ти и зари́ сподо́битися, умоли́.

Богоро́диченъ: Пресвята́я Дѣ́во, Влады́чице мíра, Тя́, Богоро́дицу, исповѣ́дающимъ отъ безчи́сленныхъ грѣхо́въ моли́ спасти́ся, и жите́йскихъ обстоя́ній.

Инъ.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Укрѣпля́ешися манове́ньми Боже́ственными и неосла́бная терза́нія терпи́ши до́блимъ смы́сломъ, Уа́ре, растерза́я го́рдаго се́рдце, зло́бу содѣ́лавшаго.

Сла́вный му́ченикъ, ви́дя отпа́дающія на зе́млю своя́ пло́ти, ра́довашеся, вѣ́чнующая ума́ свѣ́тлостію и Боже́ственная возда́нія предпрозира́я.

Пою́ Тя́, Го́споди Бо́же, и славосло́влю, и покланя́юся, благи́хъ сподобля́яся, угото́ванныхъ Тебе́ возлю́бльшимъ, — му́ченикъ въ страда́ніи те́плѣ зовя́ше.

Богоро́диченъ: Явльшися херуви́мъ и серафи́мъ я́ко вои́стинну святѣ́йши, Всенепоро́чная, вся́, вѣ́рно Тя́ ны́нѣ освяща́ющія, освяти́ и спаси́ хода́тайствомъ Твои́мъ.

Пѣ́снь 6.

Ирмо́съ: Бе́здна мя́ мно́га грѣхо́вная окружа́етъ, и вопію́ Ти, проро́ка подража́яй: отъ тли́ мя́, Го́споди, возведи́.

Ка́плютъ твои́хъ глаго́лъ исто́чницы, боговѣща́нія и душепи́щную сла́дость точа́ще, сла́вне, напая́ющую вѣ́рно приходя́щія.

Го́ру тя́ проро́чества, сла́дость источа́ющую, и богоче́стія, Іо́иле, проповѣ́дника всему́дра зна́емъ, богоглаго́ливе проро́че.

Богоро́диченъ: Просвѣти́, Свѣ́тъ Ро́ждшая незаходя́щій, сердца́ славосло́вящихъ Тя́ вѣ́рно, Пречи́стая Влады́чице, и изъ Тебе́ Ро́ждшагося неизрече́нно.

Инъ.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Глаго́ловъ небре́глъ еси́ пребеззако́ннаго врага́ и пла́мень претерпѣ́лъ еси́ нестерпи́мыхъ болѣ́зней терпѣли́вно, многострада́льне Уа́ре, моле́бниче о хва́лящихъ тя́ вѣ́рою.

Не преста́ше мучи́тель пребезу́мный, ра́нами неми́лостивно сдробля́я тя́, до́ндеже въ ру́ки Бо́жія свяще́нную твою́ ду́шу преда́лъ еси́, добро́тами просвѣ́щшуся по́двигъ твои́хъ.

Возвы́сился еси́, подо́бяся на дре́вѣ Христу́, и на то́мъ ви́ся, твою́ ду́шу пре́далъ еси́ Бо́гу, тя́ вѣнчава́ющу, страстоте́рпче, зако́нно до́блествовавша.

Богоро́диченъ: Упра́ви, Влады́чице, въ пучи́нѣ лю́тыхъ, обурева́емую всегда́ смире́нную ду́шу мою́, и къ ти́хому приста́нищу напра́ви, несомнѣ́ннымъ ра́зумомъ Тя́ блажа́щую.

Конда́къ му́ченику, гла́съ 4:

Христу́ послѣ́дуя, му́чениче Уа́ре, Того́ испи́въ ча́шу, и муче́нія вѣнце́мъ увязе́ся, и со а́нгелы ликовству́еши: моли́ непреста́нно за ду́ши на́ша.

Пѣ́снь 7.

Ирмо́съ: Пе́щь дре́вле всегремя́щую угаси́вый и о́троки ту́чею духо́вною ороси́вый, благослове́нъ еси́, Бо́же оте́цъ на́шихъ.

Исходя́щій отъ до́му Госпо́дня и напая́ющій исто́чникъ, я́коже проре́клъ еси́, произы́де, проро́че всече́стне.

Пото́къ сито́вный шпеницоно́сенъ содѣ́лалъ еси́ пи́щный исто́чникъ, я́коже Іо́иль прорече́: благослове́нъ еси́, Бо́же оте́цъ на́шихъ.

Богоро́диченъ: Иже вся́ Сотвори́вый ро́ждся отъ Дѣ́вы, спасе́ мíръ, благоче́стно пою́щій: благослове́нъ еси́, Бо́же оте́цъ на́шихъ.

Инъ.

Ирмо́съ: Росода́тельну у́бо пе́щь содѣ́ла Ангелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Просвѣще́на тя́ подвиго́въ приложе́ньми, предо́брая Клеопа́тра, Уа́ре, ску́тала е́сть, обрѣ́тши сла́ву тобо́ю, вѣ́ры досто́йну я́вѣ, ю́же показа́ те́плѣ въ твое́ сконча́ніе.

Излива́ющи на тя́ сле́зы, и мѵ́ры тя́ честны́ми помазу́ющи, сокрыва́етъ тя́ подъ земле́ю всечестна́я жена́, погре́бшаго пре́лесть лука́вую и изъ гро́ба блиста́ньми просвѣща́юща на́съ.

Не престая́ше, преподо́бне, угожда́ющи тебѣ́ Христо́ву уго́днику, приснопа́мятная, до́ндеже яви́лся еси́ хода́тай е́й, му́дре, Ца́рствія небе́снаго, его́же сподо́бися тобо́ю съ любе́знѣйшимъ сы́номъ.

Богоро́диченъ: Сокруше́на мя́ безчи́сленными согрѣше́ніи, Дѣ́во, хода́тайствомъ Твои́мъ обнови́, уврачу́ющи мою́ ду́шу и сло́во подаю́щи, вопи́ти: благослове́на, Яже Бо́га пло́тію ро́ждшая.

Пѣ́снь 8.

Ирмо́съ: Дре́вле ороси́вшаго евре́йскія о́троки въ пла́мени, и опали́вшаго, Го́спода, халде́и пресла́вно въ не́й, воспое́мъ, глаго́люще: благослови́те и превозноси́те Его́ во вѣ́ки.

Показа́лъ еси́, сла́вне, покая́нія о́бразы я́вѣ благоутро́бнаго Го́спода, пріе́млюща вѣ́рою къ Нему́ приходя́щія и пою́щія: благослови́те дѣла́ Госпо́дня Го́спода.

Служи́тель бы́въ ты́ Госпо́день, проро́че Іо́иле, Того́ та́йны вручи́лся еси́ прорица́ти лю́демъ, хва́лящимъ и пою́щимъ: благослови́те дѣла́ Госпо́дня Го́спода.

Оставле́ніе источа́ютъ Іу́дови чуде́съ рѣ́ки, я́же су́ть апо́столи пресла́вніи Госпо́дни, я́коже проро́чествова Іо́иль, вопію́щихъ напая́юще: благослови́те вся́ дѣла́ Госпо́дня Го́спода.

Богоро́диченъ: Ѵпоста́сь, сло́жну во двою́ существу́, Христа́, Всенепоро́чная, родила́ еси́, пребы́вши Дѣ́ва Чи́стая, Ему́же пою́ще, зове́мъ: благослови́те дѣла́ Госпо́дня Го́спода.

Инъ.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Ма́тернихъ послу́шавъ, му́чениче, моле́бъ, небе́сному во́инству свѣ́тло во́инствуя, о́трока честна́го и твоего́ неотсту́пна показа́лъ еси́ благосла́вія неизрече́ннымъ милосе́рдіемъ.

Отъ Еги́пта тя́ бога́тство я́коже многоцѣ́нное принесе́, му́чениче, разбогатя́щи многоцѣ́нными дарми́, Клеопа́тра, цѣле́ніи всю́ Палести́ну, любо́вію тя́ почита́ющую.

Веселя́ся, по́двиги твоя́ соверши́лъ еси́, во́ине до́блій Вседержи́теля, и я́ко побѣди́тель отъ Него́ вѣнча́лся еси́, Уа́ре всеблаже́нне, му́чениковъ вели́кая сла́во.

Богоро́диченъ: Грѣхи́ прилага́ю ко грѣхо́мъ и бу́дущаго не бою́ся Стра́шнаго Суда́: побѣди́, Чи́стая, души́ моея́ ослѣпле́ніе, и мольбо́ю Твое́ю обрати́вши, мя́ спаси́.

Пѣ́снь 9.

Ирмо́съ: На небесѣ́хъ благослове́нная и на земли́ славосло́вимая, ра́дуйся, Невѣ́сто Неневѣ́стная.

Со проро́ки, я́ко проро́къ, ра́достно ны́нѣ въ небе́сныхъ весели́шися оби́телехъ.

Свы́ше ны́ назира́еши ны́нѣ, благоговѣ́йно тя́ славосло́вящія, богоглаго́ливе всебога́те.

Сокраще́нъ пу́ть спасе́нія Іо́иль покая́ніемъ богому́дренно показа́.

Богоро́диченъ: Возвела́ еси́ ны́, па́дшія, Ма́ти Бо́жія, благоутро́бнаго Влады́ку и Спа́са ро́ждши.

Инъ.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Крѣ́пость низложи́лъ еси́ ратобо́рца, Боже́ственною я́вѣ си́лою препоя́сався, страда́льче до́блій Уа́ре. Тѣ́мъ тя́ хва́лимъ, врачева́ніе оби́льное отъ твои́хъ моще́й, вѣ́рніи, почерпа́юще.

Яко свѣ́тъ, я́ко у́тро, я́ко вели́кое со́лнце въ земны́я простре́ся па́мять твоя́ концы́, свѣтоно́сными просвѣща́ющи сія́ньми твои́хъ честны́хъ по́двигъ вся́, прехва́льне, и мра́къ серде́цъ отгоня́щи.

Съ тобо́ю сія́юща ви́дѣвши сла́вою мно́гою своего́ сы́на чадолюби́вая, всѣ́хъ Бо́га велича́ше; тебе́ же и́скреннѣйше, му́чениче, сла́вяше, велича́йшаго предста́теля, я́вственно обогати́вшися.

Земля́, на не́йже терпѣли́вѣйшее тѣ́ло твое́, му́дре, лежи́тъ, боже́ственнѣ освяти́ся, но да́ждь моли́твами твои́ми на́мъ разрѣше́ніе грѣхо́въ, житія́ исправле́ніе, Уа́ре, и всѣ́хъ неудо́бныхъ избавле́ніе.

Богоро́диченъ: Явлься, Дѣ́во, изъ Тебе́ Госпо́дь, свѣ́тлаго о́блака, еги́петскія куми́ры вся́ческой па́губѣ предаде́; мно́жество же страстоте́рпцевъ Сего́ носи́ти сподо́би, Сего́ подража́тели честны́мъ Его́ страда́ніемъ.

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 155 – 160 об.

/ Къ оглавленію раздѣла /


Наверхъ / Къ титульной страницѣ

0