Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 21 августа 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

[Мѣсяца Октоврія въ 19-й день.]
Служба святаго и преподобнаго отца нашего Іоанна Кронштадтскаго.

ВЕЧЕРЪ,
Блаженъ мужъ. На Господи воззвахъ: стихиры, гласъ 1-й.

Отче Іоанне преблаженне, всѣхъ святыхъ подражатель былъ еси: святую вѣру патріарховъ стяжавъ, пророковъ и апостоловъ ревность, святителей же преподобіе и богомысліе, исповѣдниковъ дерзновеніе, безсребренниковъ безмездную помощь, преподобныхъ подвижниковъ непрестанную молитву, сего ради святую твою память свѣтлую празднуемъ.

Преподобный отче Іоанне, гласъ Евангелія Господня послушавъ и богатство и славу, яко прахъ, вмѣнивъ, ближнихъ твоихъ, яко отецъ истинный возлюбилъ еси, нищія и убогія питавый, всѣмъ же непрестанно вопія: возлюбите Господа и обрящете жизнь вѣчную, ничто же предпочтите паче любве Его, да егда пріидетъ во славѣ, обрящете радость со святыми, съ ними же и насъ поминай, молитвенниче нашъ неусыпный.

Отче нашъ Іоанне богомудре, страхомъ утвердився Божіимъ, начало премудрости разумѣлъ еси, паки же страхъ любовію изгналъ еси, яко страхъ муку имать, якоже апостолъ любве научилъ есть насъ, любовію же Христу сраспявся, свойственнѣйшій Ему бывъ; тѣмже отче нашъ, вѣрныхъ украшалъ еси разумы и Бога любити стадо твое научилъ еси. Христа Бога моли даровати и намъ благодать сію и велію милость.

Господь сила сердца моего, Господь мой свѣтъ ума моего, Господь покой мой и радость моя, моя вѣра, надежда и любовь, Сей есть пища моя и питіе мое, одежда моя и покровъ. Вразуми убо и насъ, отче святый, сія словеса твоя разумѣти и во Господѣ полагати спасеніе наше, подаждь и намъ духа твоего, якоже Илія Елисею, да будетъ во Господѣ надежда наша, все упованіе наше.

Слава, гласъ 8.

Жива будетъ душа моя, Господи, и восхвалитъ Тя, сице глагола Давидъ пророкъ. Такожде и ты, святе, от стражи утреннія до нощи пѣлъ еси. Научи убо и насъ, заблудшее твое стадо, познати тя, пастыря добраго, и вслѣдъ гласа твоего ходити и непрестанно купно съ тобою взывати: пою Богу моему, дондеже есмь.

И нынѣ: предпразднству [1] или богородиченъ.
Чтеніе 3 изъ Притчей, изъ общей Минеи.

Стихиры на литіи — храму: на Слава, гласъ 1-й.

Молящеся Духомъ Святымъ молимся, сего ради вся молитвы церковныя дыханіе Духа Святаго суть и вси христіане рожденіе Его есми. Пріиди убо и вселися въ ны, Душе Святый, помилуй и созижди вся ны, да будемъ едино Тѣло Христово. Такова бысть непрестанная молитва твоя, предивный Іоанне отче нашъ, и послуша тя Богъ и помаза тя елеемъ радости вѣчныя.

И нынѣ: предпразднству или Богородиченъ.

На стиховнѣ, стихиры гласъ 4-й.

Отъ пеленъ Господу присвоился еси, издѣтска смыслъ мужа совершенна стяжавъ и премудросте Божией возжелѣвъ весь Божія обитель былъ еси, отче нашъ Іоанне благодатне.

Стихъ: Честна предъ Господомъ смерть преподобныхъ Его.

Умомъ благодатію освященнымъ Святѣй Троицѣ предстоя, блаженнне Іоанне, отче нашъ, небесными зарями сущія во тмѣ грѣховней просвѣщалъ еси, освѣти и насъ свѣтомъ твоего боговѣдѣнія.

Стихъ: Блаженъ мужъ, бояйся Господа, въ заповѣдѣхъ Его восхощеть зѣло.

Непостижимый свѣтъ ночи въ тебѣ, преподобне отче, и свѣщу пресвѣтлу постави тя Господь среди тьмы грѣховныя. Тѣмже и мы тобою научени благодатную память твою поемъ, Іоанне.

Слава, гласъ 6-й.

Союзомъ любви апостолы Твоя связавый, Господи, и отца нашего Іоанна, яко новаго благовѣстника любве Твоея поставивый, утверди и нынѣ, Спасителю нашъ, союзъ любве церковныя, да совокуплени поемъ Тя и неизреченную Твою благостъ.

И нынѣ, предпразднству или Богородиченъ.

Тропарь:

Боже, отецъ нашихъ, или Въ тебѣ, отче, извѣстно, спасеся, еже по образу, и пр.

Или гласъ 8-й.

Любовію Христовою уязвися, преподобне Іоанне, многи чада церковныя, яко отецъ ко Христу привелъ еси, сего ради память твою совершающе Спасово утѣшеніе пріемлемъ и благодать Его исповѣдуемъ.


НА УТРЕНИ.
По 1-мъ стихословіи сѣдаленъ, гласъ 4-й.

Не презрѣлъ еси, отче Іоанне, ни странна, ни пришельца, но всѣмъ былъ еси благъ и милости глубина, сиротъ отецъ и вдовамъ защита, нагихъ одѣяніе и алчущихъ пища. Помяни и насъ, убогихъ чадъ твоихъ, и не отрини отъ благодатныя любви твоея.

Слава и нынѣ, предпразднству или Богородиченъ.

По 2-мъ стихословіи сѣдаленъ, гласъ 5-й.

Божественною силою укрѣпляемъ, побѣдилъ еси невидимыхъ враговъ искушенія и къ свѣту невечернему приближился еси. Уврачуй и душъ нашихъ страсти и совѣтомъ твоимъ облистай ны, яко врачъ и утѣшитель всѣмъ отъ Бога данъ еси, Іоанне отче нашъ.

Слава и нынѣ, предпразднству или Богородиченъ.

Сѣдаленъ по полиелеи, гласъ 8-й:

Слова Божія пламенный служителю, Іоанне богодухновенне, ты вмѣстилище вѣры Христовой былъ еси, сего ради Господь, якоже новаго Авраама отца многихъ постави тя. Моли убо, отче святый, всѣмъ намъ, чадомъ Божіимъ быти и душамъ нашимъ спастися.

Слава и нынѣ, предпразднству или Богородиченъ.

По 50-мъ псалмѣ самогласенъ, гласъ 6-й.

Преподобне отче Іоанне, во всю землю изыде вѣщаніе исправленій твоихъ, тѣмъ на небесѣхъ обрѣлъ еси мзду трудовъ твоихъ, демонскіе погубилъ еси полки и ангельскія достиглъ еси чины, ихже житію безъ порока и поревновалъ еси, дерзновеніе имѣя ко Христу Богу, миръ испроси душамъ нашимъ.

Канонъ Святаго — по Уставу, его же краестрочіе: Моя жизнь во Христѣ, Ему же пою во вся вѣки. Гласъ 4-й.

Пѣснь 1-я.

Ирмосъ: Моря Чермнаго пучину немокренными стопами древле шествовалъ Израиль крестообразно Моисеовыма рукама Амаликову силу въ пустыни побѣдилъ есть.

Моя чувствованія въ Тебѣ утверди, Спасителю мой, да возмогу достойне воспѣти молитвы и подвиги Тя возлюбльшаго и Тобою возлюбленнаго служителя Твоего, отца нашего Іоанна.

Отъ юности первозванному апостолу послѣдуя и Его свѣтосіяннымъ Крестомъ озарився, невѣдѣнія мглы избѣглъ еси, Христу хвалебную пѣснь воспѣва блаженне.

Якоже Илія колесницею огненною, тако и ты колесницею добродѣтелей на небо взошелъ еси. Отнюду же ниспослати и намъ житія исправленіе Господа умоли.

Богородиченъ: Жезлъ прорасте, Дѣво, корене Іессеова, цвѣтоносяй всеблаженный плодъ спасенія вѣрою воспѣвающимъ Тя.

Пѣснь 3-я.

Ирмосъ: Веселится о Тебе Церковь Твоя, Христе, зовущи, Ты ми крѣпость, Господи, и прибѣжище и утвержденіе.

И нравомъ причастникъ и житіемъ подражатель апостоламъ бывъ, богодуховенне, слово истины до конца исправилъ еси.

Зрительно царства небеснаго душевное око твое, яко чисто, имѣя жизнь твою святѣ управилъ еси, отче предивный, сего ради о Бозѣ тя прославляемъ.

Не трудящійся да не ястъ, сію апостольскую истину всей братіи твоей вѣщалъ еси и домъ трудолюбія нищимъ и болящимъ воздвиглъ еси, да ся питаютъ трудами рукъ своихъ аще и немощны суть.

Богородиченъ: Вся свѣтъ еси, Владычице, вся святыня, вся благость, вся премудрость, вся можеши, яко Мати всемогущаго, Едина и Та же Всесовершенная, яко Мати всесовершеннаго Царя славы.

Пѣснь 4-я.

Ирмосъ: Воздвижена Тя видѣши Церковь на Кресте солнца праведнаго ста въ чину своемъ, достойно взывающи, слава силѣ Твоей, Господи.

Основаніе твердо — Христа имѣя, второй Авраамъ былъ еси, пріемля отъ всѣхъ странъ приходящія къ тебѣ и тѣхъ ко Господу приводилъ еси и тѣми угодная Богу творилъ еси.

Храмъ Богу сердце твое хотяй устроити, въ дому Божіемъ непрестанно служити возжелѣлъ еси и тамо небесныя доброты зрѣлъ еси.

Росою подвиговъ твоихъ вся страсти тѣлесныя угасивъ, возжеглъ еси просвѣщеніе безстрастія и сынъ вѣчнаго дне былъ еси, отче блаженне.

Богородиченъ: И нам подаждь, Владычице, чистоту сердечную, сыновнюю довѣрчивость и любовь, яже къ Тебѣ, — всегда и нынѣ и присно и во вѣки.

Пѣснь 5-я.

Ирмосъ: Ты, Господи, ми свѣтъ, въ міръ пришелъ еси, Свѣтъ святый, обращаяй изъ мрачна невѣденія воспѣвающія Тя.

Сподобился еси вышнихъ дарованій, отче, Господу твоему непрестанно служа и апостольскіе труды присно подражая.

Тлѣнныя твоея плоти сладострастіе умертвивъ, душу нетлѣнную благочестіемъ оживалъ еси и сію домъ Духа Божественна сотворилъ еси.

Евангеліе Христово всѣмъ усердно проповѣдуя, трапезы Господней причастникъ повседневный былъ еси, самъ себе и паству твою, яко жертву живу, и святу Богови устрояя.

Богородиченъ: Едина отъ Троицы родила еси Пречистая, милосердія ради на земли явльшагося во двою естеству, Егоже непрестанно моли спасти души наша.

Пѣснь 6-я.

Ирмосъ: Пожру ти со гласомъ хваленія, Господи, Церковь вопіетъ Ти, отъ бѣсовскія крове очистившися милостію отъ реберъ истекшею Ти кровію.

Маслина плодовита въ дому Господа твоего былъ еси, Іоанне богоявленне, яко вѣдѣніе божественное Господь дарова ти и въ дѣланіи апостольстѣмъ укрѣпи тя.

Уди тѣла Христова есте вы, тако со апостоломъ проповѣдалъ еси и Христа единаго любити училъ еси, да вси едино будутъ.

Житіе твое свято, слово твое, богомудре, благодати Божіей исполнено, сердце твое молитвы благодатныя сосудъ бысть, сего ради вѣрою и любовію тя почитаемъ.

Богородиченъ: Единая благая Владычице, яви владычество твое на насъ, избавляющи насъ отъ всякія скверны лукавыхъ помышленій, от всякихъ бѣдъ и золъ и козней демонскихъ, яко благая Мати Божія.

Кондакъ, гласъ 3-й.

Божественныя вѣры проповѣданіемъ и любве Евангельскія исполненіемъ Церковь Христова тя отца нарече, преподобне Іоанне, яко истинный отецъ чадомъ, всѣмъ и нынѣ зовеши со апостоломъ: пріидите, обрѣтохомъ Желаемаго.

Пѣснь 7-я.

Ирмосъ: Въ пещи персидстѣй авраамстіи отроци любовію благовѣрія паче, нежели пламеніемъ опаляемы взываху: благословенъ еси въ Церкви славы Твоея, Господи.

Промысломъ Божіимъ свѣтъ благочестія среди тьмы тяжкія безбожія и невѣрія ты явился еси отче, вся призывая звати: благословенъ еси въ Церкви славы Твоея, Господи.

Образъ Божій человѣкъ есть, ты же, отче Іоанне, и зерцало любве Божіей пресвѣтло былъ еси и домъ Святыя Троицы, юже и мы грѣшніи прославляемъ.

Юже отъ Господа благодать пріялъ еси недуги и страсти исцѣляти человѣомъ, да вси съ тобою единомудренне поютъ: благословенъ еси, Господи Боже, во вѣки.

Богородиченъ: Владычице, спаси родъ Твой, спаси единокровныя Твоя, Спаси ны, Мати Живота и всего рода человѣча, аще и недостойни есмы Тя Матерь себѣ нарещи, освяти, утверди и спаси насъ молитвами Твоими.

Пѣснь 8-я.

Ирмосъ: Руцѣ распростеръ Даніилъ львова зіянія въ ровѣ затче огненную силу угасиша, добродѣтелію поясавшеся иже благочестія рачители отроци зовуще: благословите вся дѣла Господня Господа.

Очисти сердца и мысли наша молитвами твоими и, яко землю плодоносну покажи я, да добродѣтелію препоясавшеся, зовемъ: благословите вся дѣла Господня Господа.

Вѣнцемъ благодатныхъ даровъ вѣнчался еси, премудрость высшую почитая и присно зовый: благословите вся дѣла Господня Господа.

Троиченъ: Слава Тебѣ, всесвятый Животворящій Душе, отъ Отца исходяй и въ Сыне присно почиваяй, слава Тебѣ, Сыне Божій, Святымъ Духомъ освѣщаяй, укрѣпляяй и умудряяй насъ, слава Тебѣ, Отче, благоволяй о насъ присно Духомъ Святымъ, нераздѣльная Троице Единице, помилуй насъ.

Богородиченъ: Яже міру рождаши спасеніе, еяже ради отъ земли на высоту взяти быхомъ, радуйся благословенная, покрове и державо, стѣно и утвержденіе, поющимъ чистая: Господа воспѣвайте дѣла и превозносите Его во вѣки.

Пѣснь 9-я.

Ирмосъ: Камень нерукосѣчныя горы отъ несѣкомыя Тя, Дѣво, краеугольный отсѣчеся Христосъ, Иже совокупивъ расстояшаяся естества, тѣмъ веселящіеся Тя, Богородице, величаемъ.

Воистину свѣтъ міру явился еси, добродѣтелію украшенъ и пастырь изряденъ православныя Церкви былъ еси, Христа прославляя, тѣмъ веселящеся тя, отче святый, ублажаемъ.

Едино тѣло, Единъ Господь, едина вѣра, едино крещеніе, тѣмже истинствующе въ любви да возрастимъ въ Него всяческая, Иже есть глава Христосъ, яко же со апостоломъ преподобный отецъ нашъ заповѣда.

Князи людстіи и царіе воспѣша тя и восхвалиша тя, ты же славу земную всю презрѣлъ еси и токмо съ съ народомъ Божіимъ возжелалъ еси купно быти и прославляти Господа во вѣки.

Богородиченъ: Иже во утробу всельшася Дѣвыя и отъ Сея страшно и выше слова наздавша древняго Адама, Господи поемъ и славословимъ во вѣки.

Свѣтиленъ, гласъ 4-й.

Первозванному ученику Христову подражавъ, пастырь добрый воистину былъ еси и плодъ многъ вѣрныя Господу Твоему привелъ еси и до послѣдняго твоего издыханія взывалъ еси: моя жизнь во Христе есть.

Слава и нынѣ, предпразднству или Богородиченъ.

На хвалитѣхъ, стихиры, гласъ 6-й.

О, крѣпосте моя, Іисусе, Сыне Божій! О, свѣте ума моего и мире, и радосте сердца моего, слава Тебѣ, слава Тебѣ избавителю отъ невидимыхъ врагъ моихъ; тако, отче нашъ, вопіялъ еси ко Господу Твоему, тако и насъ вразуми воспѣти всѣмъ сердцемъ, Господи, Спасителю нашъ, слава Тебѣ.

Образъ Божій есте вы, сего ради храните великій образъ сей, образъ красоты Божіей, образъ безмѣрныя любве Его, да будете чада Отца нашего, Иже на небесѣхъ, да будете святы, якоже и Отецъ вашъ свять есть. Тако пастырю богомудрый, паству твою училъ еси, тако и самъ святѣ пожилъ еси.

Христосъ вочеловѣчися, призвавъ къ покаянію разбойники и блудницы, и ты, пастырю многомилостивый, заповѣдь Пастыреначальника исполняя, съ мытари ядяше и со грѣшники бесѣдоваше, вся къ покаянію призывая и вся научая молитися: Боже, милостивъ буди мнѣ, грѣшному, Боже милостиве, слава Тебѣ.

Якоже пророци святіи о пастырѣхъ израилевыхъ, тако и ты, отче нашъ, о пастырѣхъ слезы проливалъ еси, сице глаголя: пастыри и паства согрѣшиша предъ Тобою, Господи, всѣ уклонишася вкупѣ непотребни быша, и что сотвориши намъ, Господи? кровь завѣта Твоего вопіетъ отъ земли, обаче гласъ Твой не услышанъ есть, и что сотвориши намъ Господи? Прежде даже до конца не погибнемъ, спаси ны.

Слава, гласъ 7-й.

Поклоняяся иконамъ святымъ, воспѣваю Бога воплощеннаго, образъ славы Отчія, воспѣваю и Отца безначально Сына родившаго, прославляю богоподобіе человѣковъ, иже храмы Духа Святаго суть, такожде и въ чувствѣ имѣю силу Креста Животворящаго. Таково быстъ славное богословіе твое, отче святый, имже великимъ учителемъ древнимъ уподобился еси, образъ Бога воплотившагося восхваляя.

И нынѣ, предпразднству или Богородиченъ.
Славословіе великое. Отпустъ.

Примѣчаніе:
[1] Аще служба творится 20-го числа декабря.

Источникъ: Іеросхимонахъ Пахомій келейной обители Вознесенія Господня на Афонѣ. Опытъ акафиста и служба честному и славному іерею Божію о. Іоанну Кронштадтскому. — Перепечатка изъ книги И. К. Сурскаго «О. Іоанн Кронштадтскій», т. II. — Бѣлградъ, 1941. — С.18-27.

/ Къ оглавленію раздѣла /


Наверхъ / Къ титульной страницѣ

0