Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

[Мѣсяца Октоврія въ 19-й день.]
Слу́жба свято́му пра́ведному отцу́ на́шему Іоа́нну Кроншта́дтскому чудотво́рцу.

НА МАЛѢЙ ВЕЧЕРНИ.
На Го́споди воззва́хъ, стихи́ры на 4, гла́съ 2:

О, крѣ́посте моя́, Іису́се, Сы́не Бо́жій; о, свѣ́те ума́ моего́ и ми́ре и ра́досте се́рдца моего́, сла́ва Тебѣ́! Сла́ва Тебѣ́ Изба́вителю отъ неви́димыхъ вра́гъ мои́хъ! — си́це взыва́лъ еси́. Та́ко и на́съ вразуми́ Го́спода воспѣва́ти всѣ́мъ се́рдцемъ, Іоа́нне пра́ведне, служи́телю Христо́въ. [Два́жды.]

Христо́съ вочеловѣ́чився, призва́ къ покая́нію разбо́йники и блудни́цы, и ты́, па́стырю милосе́рдый, за́повѣдь Пастыренача́льника исполня́я, съ мытари́ ядя́ше и со грѣ́шники бесѣ́доваше, вся́ къ покая́нію призыва́я и вся́ науча́я моли́тися: Бо́же, ми́лостивъ бу́ди мнѣ́, грѣ́шному; Бо́же ми́лостиве, сла́ва Тебѣ́!

Образъ Бо́жій есте́ вы́, сего́ ра́ди храни́те вели́кій о́бразъ се́й, о́бразъ красоты́ Бо́жія, о́бразъ безмѣ́рныя любве́ Его́, да бу́дете ча́да Отца́ на́шего, Иже на Небесѣ́хъ, да бу́дете свя́ти, я́коже и Оте́цъ ва́шъ Свя́тъ е́сть! — Та́ко, па́стырю богому́дрый, па́ству твою́ учи́лъ еси́, та́ко и са́мъ свя́то пожи́лъ еси́.

Сла́ва, гла́съ 8:

Николи́же отпа́даетъ любы́ твоя́, о Кроншта́дтскій Іоа́нне ми́лостиве; ты́ еси́ наде́жда исправле́нія жи́зни на́шея, всеору́жіе па́стырства, широта́ благотворе́нія, Іоа́нне пра́ведне, упова́ніе на́ше.

И ны́нѣ, богоро́диченъ, гла́съ 8:

Влады́чице, пріими́ моли́тву ра́бъ Твои́хъ, и изба́ви на́съ отъ вся́кія ну́жды и печа́ли.

Или́ предпра́зднства: гла́съ 2, самоподо́бенъ:

До́ме Евфра́ѳовъ,* гра́де святы́й,* проро́ковъ сла́во;* украси́ до́мъ,* въ не́мже Боже́ственный ражда́ется.

На стихо́внѣ стихи́ры, гласъ 4:

Отъ пеле́нъ Го́споду присво́ился еси́, издѣ́тска смы́слъ му́жа соверше́нна стяжа́въ и прему́дрости Бо́жіей возжелѣ́въ, ве́сь Бо́жія оби́тель бы́лъ еси́, о́тче на́шъ, Іоа́нне благода́тне.

Сти́хъ: Расточи́, даде́ убо́гимъ, пра́вда его́ пребыва́етъ во вѣ́къ.

Умо́мъ, благода́тію освяще́ннымъ, Святѣ́й Тро́ицѣ предстоя́, блаже́нне Іоа́нне, небе́сными заря́ми су́щія во тьмѣ́ грѣхо́внѣй просвѣща́лъ еси́: освѣти́ и на́съ свѣ́томъ твоего́ боговѣ́дѣнія.

Сти́хъ: Гото́во се́рдце его́ упова́ти на Го́спода.

Непостижи́мый свѣ́тъ почи́ въ тебѣ́, пра́ведный о́тче, и свѣщу́ пресвѣ́тлу поста́ви тя́ Госпо́дь среди́ тьмы́ грѣхо́ныя; тѣ́мже и мы́, тобо́ю науче́ни, благода́тную па́мять твою́ пое́мъ, Іоа́нне.

Сла́ва, гла́съ 6:

Сою́зомъ любве́ апо́столы Твоя́ связа́вый, Го́споди, и отца́ на́шего Іоа́нна, я́ко но́ваго благовѣ́стника любве́ Твоея́ поста́вивый, утверди́ и ны́нѣ, Спаси́телю на́шъ, сою́зъ любве́ церко́вныя, да совоку́плени пое́мъ Тя́ и неизрече́нную Твою́ бла́гость.

И ны́нѣ, богоро́диченъ, гла́съ то́йже:

Никто́же притека́яй къ Тебѣ́ посра́мленъ отъ Тебе́ исхо́дитъ, Пречи́стая Богоро́дице Дѣ́во, но про́ситъ благода́ти и пріе́млетъ дарова́ніе къ поле́зному проше́нію.

Или́ предпра́зднства, гла́съ то́йже:

По́йте Го́споду, ро́ждшемуся отъ Дѣ́вы; воспо́йте пѣ́снь, во́инства небе́сная, земнíи восплещи́те рука́ми: Бо́гъ бо въ человѣ́цѣхъ, Человѣ́къ Бо́гъ воздая́ніемъ. Се́ та́инство соверша́ется на́мъ дне́сь, Ца́рь Изра́илевъ, Христо́съ прихо́дитъ.

Тропа́рь, гла́съ 4:

Со апо́столы изы́де вѣща́ніе твое́ въ концы́ вселе́нныя, съ исповѣ́дники страда́нія за Христа́ претерпѣ́лъ еси́, святи́телемъ уподо́бился еси́ сло́ва проповѣ́даніемъ, съ преподо́бными во благода́ти Бо́жіей просія́лъ еси́. Сего́ ра́ди вознесе́ Госпо́дь бе́здну смире́нія твоего́ превы́ше небе́съ, и дарова́ на́мъ и́мя твое́ во исто́чникъ преди́вныхъ чуде́съ. Тѣ́мже во Христѣ́ во вѣ́ки живы́й, чудотво́рче, любо́вію ми́луяй су́щія въ бѣда́хъ, слы́ши ча́да твоя́, вѣ́рою тя призыва́ющія, Іоа́нне пра́ведне, возлю́бленный па́стырю на́шъ.

Сла́ва, и ны́нѣ, богоро́диченъ, гла́съ то́йже:

Еже отъ вѣ́ка утае́нное, и а́нгеломъ несвѣ́домое та́инство, Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и Кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.

Или́ предпра́зднства, гла́съ то́йже:

Гото́вися Виѳлее́ме, отве́рзися всѣ́мъ, Еде́ме, красу́йся Евфра́ѳо, я́ко дре́во живота́ въ верте́пѣ процвѣте́ отъ Дѣ́вы: ра́й бо Оноя чре́во яви́ся мы́сленный, въ не́мже боже́ственный са́дъ: отъ него́же я́дше, жи́ви бу́демъ, не я́коже Ада́мъ у́мремъ; Христо́съ ражда́ется пре́жде па́дшій возста́вити о́бразъ.

Ектенія́, и отпу́стъ.



НА ВЕЛИЦѢЙ ВЕЧЕРНИ,
Пое́мъ Блаже́нъ му́жъ, 1-й антифо́нъ. На Го́споди воззва́хъ: поста́вимъ стихо́въ 8, и пое́мъ стихи́ры, гла́съ 6: Подо́бенъ: Все́ отло́жше.

Вся́ жите́йская отло́жше,* еди́нѣми усты́ восхва́лимъ* чу́днаго свѣти́льника земли́ Россíйскія и всея́ вселе́нныя,* па́стыря до́бляго, пресви́тера Іоа́нна,* свѣ́тлый о́бразъ жи́зни во Христѣ́ на́мъ я́вльшаго,* ду́хомъ моли́твы на земли́ пламенѣ́вшаго,* да́ръ исцѣле́ній сугу́бъ отъ Го́спода прія́вшаго;* его́же моли́твами* Христо́съ во благоче́стіи на́съ да утверди́тъ* и ча́да непоколе́блема Це́ркве на́съ яви́тъ,* во спасе́ніе ду́шъ на́шихъ. [Два́жды.]

Всѣ́мъ се́рдцемъ и умо́мъ, блаже́нне Іоа́нне,* житіе́ во Христѣ́ возлюби́лъ еси́,* вся́ богоугожде́нію и му́дрствуя и дѣ́я,* труды́ твоя́ бога́тно свяще́нства благода́тію уплодоноси́лъ еси́,* на ве́чери Госпо́дней, я́ко на небеси́,* восхище́ннымъ ду́хомъ со умиле́нными слеза́ми* олтарю́ Госпо́дню де́нь отъ дне́ предстоя́лъ еси́;* и ны́нѣ, въ вы́шнихъ предстоя́й Святѣ́й Тро́ицѣ,* моли́твы вознеси́,* да мíръ умири́тъ и спасе́тъ ду́ши на́ша.

Путе́мъ трезве́нія духо́внаго, благоговѣ́нія,* та́инъ Бо́жіихъ созерца́нія,* исправле́нія душе́внаго и поко́я въ Бо́зѣ* черто́га небе́снаго дости́глъ еси́;* дѣя́ньми милосе́рдія и чуде́съ твои́хъ Це́рковь украша́ется,* чистото́ю житія́ твоего́ нече́стіе посрамля́ется,* словесы́ твои́хъ писа́ній вѣ́ра утвержда́ется;* тѣ́мже мо́лимъ тя́, всече́стне Іоа́нне:* путево́ждь на́мъ бу́ди въ на́шихъ обстоя́ніихъ,* да тобо́ю наставля́еми и заступа́еми,* Ца́рствія небе́снаго сподо́бимся.

Ины стихи́ры, гла́съ и подо́бенъ то́йже:

Всѣ́мъ се́рдцемъ болѣ́знуя о тьмѣ́ язы́ковъ,* мы́слилъ еси́ пе́рвѣе ити́ въ восто́чныя страны́,* зря́ же па́че ги́блемь бли́зъ сы́й Кроншта́дтъ,* повину́лся еси́ свы́ше зо́ву,* видѣ́ніемъ хра́ма нѣ́когда во снѣ́,* Іоа́нне пра́ведне.*— Зна́ю, ре́клъ еси́, свяще́нства высоту́,* упова́ю же на Бо́га,* вѣ́мъ бо я́ко То́й е́сть крѣ́пость моя́.*— О, любве́ Боже́ственная си́ла,* ко Христу́ влеку́щая и утвержда́ющая! [Два́жды.]

Всѣ́хъ вмѣсти́вый въ се́рдцѣ па́стырскомъ,* обязу́я стру́пы нищеты́,* зва́лъ еси́ усты́ твои́ми и писа́ньми* къ созида́нію жили́ща трудолю́бія,* да прибѣ́жище обря́щутъ въ не́мъ убо́зіи.* О, учи́телю благи́хъ отъ вѣ́ры дѣ́лъ!* О, пита́телю ду́шъ и тѣле́съ убо́гихъ,* Іоа́нне, ра́досте отча́явшихся пре́жде!* Попече́ніе о си́хъ здѣ́ на земли́,* о́бразъ бы́сть твоего́ заступле́нія,* е́же ны́нѣ на небеси́.

Всѣ́мъ отве́рстымъ се́рдцемъ и состра́стія испо́лненнымъ,* дерзнове́нную стяжа́въ моли́тву,* и по сме́рти не престае́ши сію́ сверша́я,* и любо́вію во вѣ́ки богатѣ́я,* источа́еши цѣльбы́ и утѣше́нія всегда́,* Іоа́нне ра́достный и ско́рый помо́щниче:* возложе́ніемъ руки́ цѣли́вый,* пре́жде сло́ва вѣ́дый ну́жды тя́ проси́вшихъ,* ны́нѣ на́мъ неви́димо предста́ни,* во Христѣ́ жива́го тя́ пою́щимъ,* ча́ющимъ твоея́ по́мощи и заступле́нія.

Сла́ва, гла́съ 8:

Се́рдцемъ вѣ́ровалъ еси́ въ пра́вду, свяще́нниче Бо́жій, усты́ же глаго́лалъ еси́ во спасе́ніе: Госпо́дь бытіе́ мое́, Госпо́дь избавле́ніе отъ вѣ́чныя сме́рти, Госпо́дь вѣ́чный живо́тъ мо́й, Госпо́дь очище́ніе, избавле́ніе и освяще́ніе мое́, Госпо́дь си́ла въ не́мощи, простра́нство въ тѣснотѣ́ мое́й, свѣ́тъ во тьмѣ́, ми́ръ въ смяте́ніи мое́мъ. Сла́ва Тебѣ́, Спаси́телю мо́й, си́ло всемогу́щая; сла́ва Тебѣ́, Спаси́телю, си́ло вездѣсу́щая; сла́ва Тебѣ́, утро́бо преблагосе́рдая; сла́ва Тебѣ́, си́ло присноотверза́ющаяся къ моли́твамъ мои́мъ; сла́ва Тебѣ́, о́ко свѣтлѣ́йшее, вы́ну на мя́ зря́щее и вся́ сокрове́нная моя́ ви́дящее. — Тѣ́мже свя́те Іоа́нне, во слѣ́дъ тебѣ́ и мы́ ко Го́споду возопіи́мъ: сла́ва Тебѣ́, Бо́же на́шъ, ди́венъ еси́ во святы́хъ Твои́хъ, ди́венъ еси́ въ науче́ніихъ и́хъ, сла́ва Тебѣ́!

И ны́нѣ, богоро́диченъ догма́тикъ, гла́съ то́йже:

Ца́рь Небе́сный за человѣколю́біе на земли́ яви́ся и съ человѣ́ки поживе́, отъ Дѣ́вы бо Чи́стыя пло́ть пріе́мый, и изъ Нея́ проше́дый съ воспрія́тіемъ, Еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ.

Или́ предпра́зднства, гла́съ то́йже:

Воспріими́, Виѳлее́ме, Бо́жію митропо́лію, Свѣ́тъ бо незаходи́мый въ тебѣ́ роди́тися прихо́дитъ; а́нгели, удиви́теся на небеси́, человѣ́цы, просла́вите на земли́, волсви́, отъ Перси́ды пресла́вный да́ръ принеси́те, па́стыріе, свиря́юще, трисвято́е пѣ́ніе сла́дцѣ воспо́йте: вся́кое дыха́ніе да хва́литъ Вседѣ́теля.

По вхо́дѣ проки́менъ дне́, и чте́нія три.

Проро́чества Іо́илева чте́ніе:

Та́ко глаго́летъ Госпо́дь: обрати́теся ко Мнѣ́ всѣ́мъ се́рдцемъ ва́шимъ въ постѣ́ и въ пла́чи, и въ рыда́ніи, и расто́ргните сердца́ ва́ша, а не ри́зы ва́ша, и обрати́теся ко Го́споду Бо́гу ва́шему, я́ко ми́лостивъ и ще́дръ е́сть, долготерпѣли́въ и многоми́лостивъ, и раскаява́яйся о зло́бахъ. Кто́ вѣ́сть, обрати́тся ли, и раска́ется, и оста́витъ за собо́ю благослове́ніе, и же́ртву, и возлія́ніе Го́споду Бо́гу ва́шему? Воструби́те трубо́ю въ Сіо́нѣ, освяти́те по́стъ, проповѣ́дите цѣльбу́; собери́те лю́ди, освяти́те це́рковь, избери́те старѣ́йшины, совокупи́те младе́нцы ссу́щія сосцы́: да изы́детъ жени́хъ отъ ло́жа своего́ и невѣ́ста отъ черто́га своего́. Между́ степе́ньми же́ртвенника воспла́чутся жерцы́ служа́щіи Го́споду, и реку́тъ: пощади́, Го́споди, лю́ди Твоя́, и не да́ждь достоя́нія Твоего́ на укори́зну, да не облада́ютъ и́ми язы́цы, да не реку́тъ во язы́цѣхъ: гдѣ́ е́сть Бо́гъ и́хъ? И возревнова́ Госпо́дь о земли́ Свое́й, и пощадѣ́ лю́ди Своя́. И отвѣща́ Госпо́дь лю́демъ Свои́мъ, и рече́: се́, А́зъ ва́мъ послю́ пшени́цу, и вино́, и ма́сло древя́ное, и насы́титеся и́хъ, и не да́мъ ва́съ къ сему́ на поруга́ніе во язы́цѣхъ, и су́щаго отъ сѣ́вера отжену́ отъ ва́съ, и отри́ну его́ на зе́млю безво́дную, и погублю́ лице́ его́ въ мо́ри пе́рвемъ, и за́дняя его́ въ мо́ри послѣ́днемъ: и взы́детъ гни́лость его́, и взы́детъ смра́дъ его́, я́ко возвели́чи дѣла́ своя́. Дерза́й, земле́, ра́дуйся и весели́ся, я́ко возвели́чи Госпо́дь, е́же сотвори́ти. Дерза́йте ско́ти польстíи, я́ко прозя́бнуша поля́ пусты́ни, я́ко дре́во принесе́ пло́дъ сво́й, виногра́дъ и смо́кви да́ша си́лу свою́. И ча́да Сіо́ня ра́дуйтеся, и весели́теся о Го́сподѣ Бо́зѣ ва́шемъ, я́ко даде́ ва́мъ пи́щу въ пра́вду, и одожди́тъ ва́мъ до́ждь ра́нній и по́здный, я́коже и пре́жде. И напо́лнятся гу́мна ва́ша пшени́цы, и преизлію́тся точи́ла вино́мъ и еле́емъ. И возда́мъ ва́мъ вмѣ́сто лѣ́тъ, въ ня́же поядо́ша пру́зи и мши́ца, и си́плеве, и гу́сеницы, си́ла Моя́ вели́кая, ю́же посла́хъ на вы́. И снѣ́сте яду́ще и насы́титеся, и похвали́те и́мя Го́спода Бо́га ва́шего, я́же сотвори́ съ ва́ми чудеса́: и не посра́мятся лю́діе Мои́ во вѣ́къ.

Проро́чества Іо́илева чте́ніе:

Та́ко глаго́летъ Госпо́дь: увѣ́дите, я́ко посредѣ́ Изра́иля А́зъ е́смь, и А́зъ Госпо́дь Бо́гъ ва́шъ, и нѣ́сть ино́го, ра́звѣ Мене́, и не посра́мятся ктому́ лю́діе Мои́ во вѣ́къ. И бу́детъ по си́хъ, излію́ отъ Ду́ха Моего́ на вся́ку пло́ть, и прореку́тъ сы́нове ва́ши и дще́ри ва́ша, и ста́рцы ва́ши со́нія у́зрятъ, и ю́ноты ва́ши видѣ́нія уви́дятъ: и́бо на рабы́ Моя́ и на рабы́ни Моя́ во дни́ о́ны излію́ отъ Ду́ха Моего́ и да́мъ чудеса́ на небеси́ и на земли́: кро́вь и о́гнь и куре́ніе ды́ма; со́лнце обрати́тся во тьму́ и луна́ въ кро́вь, пре́жде не́же пріити́ дню́ Госпо́дню вели́кому и просвѣще́нному. И бу́детъ, вся́къ, и́же призове́тъ и́мя Госпо́дне, спасе́тся.

Собо́рнаго посла́нія Іоа́ннова чте́ніе:

Возлю́бленніи, а́ще кто́ рече́тъ, я́ко люблю́ Бо́га, а бра́та своего́ ненави́дитъ, ло́жь е́сть, и́бо не любя́й бра́та своего́, его́же ви́дѣ, Бо́га, Его́же не ви́дѣ, ка́ко мо́жетъ люби́ти? И сію́ за́повѣдь и́мамы отъ Него́, да любя́й Бо́га лю́битъ и бра́та своего́. Вся́къ вѣ́руяй, я́ко Іису́съ е́сть Христо́съ, отъ Бо́га рожде́нъ е́сть; и вся́къ любя́й Ро́ждшаго лю́битъ и Рожде́ннаго отъ Него́. О се́мъ вѣ́мы, я́ко лю́бимъ ча́да Бо́жія, егда́ Бо́га лю́бимъ и за́повѣди Его́ соблюда́емъ. Сія́ бо е́сть любы́ Бо́жія, да за́повѣди Его́ соблюда́емъ, и за́повѣди Его́ тя́жки не су́ть. Я́ко вся́къ рожде́нный отъ Бо́га побѣжда́етъ мíръ, и сія́ е́сть побѣ́да, побѣди́вшая мíръ, вѣ́ра на́ша. Кто́ е́сть побѣжда́яй мíръ? то́кмо вѣ́руяй, я́ко Іису́съ е́сть Сы́нъ Бо́жій.

Стихи́ры на литíи, гла́съ 2:

О, Крѣ́посте моя́, Іису́се, Сы́не Бо́жій! О, Свѣ́те ума́ моего́, и Ми́ре и Ра́досте се́рдца моего́, сла́ва Тебѣ́! Сла́ва Тебѣ́, Изба́вителю, отъ неви́димыхъ вра́гъ мои́хъ! — си́це взыва́лъ еси́. Та́ко и на́съ вразуми́ воспѣ́ти всѣ́мъ се́рдцемъ, Го́сподеви, Іоа́нне пра́ведне, служи́телю Христо́въ.

Христо́съ вочеловѣ́чився, призва́ къ покая́нію разбо́йники и блудни́цы, и ты́, па́стырю милосе́рдный, за́повѣдь Пастыренача́льника исполня́я, съ мытари́ ядя́ше и со грѣ́шники бесѣ́доваше, вся́ къ покая́нію призыва́я и вся́ науча́я моли́тися: Бо́же, ми́лостивъ бу́ди мнѣ́, грѣ́шному, Бо́же Ми́лостиве, сла́ва Тебѣ́!

Образъ Бо́жій есте́ вы́, сего́ ра́ди храни́те вели́кій о́бразъ се́й, о́бразъ красоты́ Бо́жія, о́бразъ безмѣ́рныя любве́ Его́, да бу́дете ча́да Отца́ на́шего, Иже на небесѣ́хъ, да бу́дете свя́ти, я́коже и Оте́цъ ва́шъ Свя́тъ е́сть! — та́ко, па́стырю богому́дрый, па́ству твою́ учи́лъ еси́, та́ко и са́мъ свя́то пожи́лъ еси́.

Сла́ва, гла́съ 1:

Моля́щеся, Ду́хомъ Святы́мъ мо́лимся, сего́ ра́ди вся́ моли́твы церко́вныя дыха́ніе Ду́ха Свята́го су́ть и вси́ христіа́не рожде́ніе Его́ есмы́. Пріиди́ у́бо и всели́ся въ ны́, Ду́ше Святы́й, поми́луй и сози́жди вся́ ны́, да бу́демъ еди́но тѣ́ло Христо́во. — Такова́ бы́сть непреста́нная моли́тва твоя́, преди́вный Іоа́нне, о́тче на́шъ, и послу́ша тя́ Бо́гъ и пома́за тя́ еле́емъ ра́дости вѣ́чныя.

И ны́нѣ, богоро́диченъ, гла́съ то́йже:

Утро свѣтоза́рное, Свѣ́та невече́рняго, зри́мъ Тя́, Дѣ́во. Изъ Тебе́ бо произы́де, Иже тьму́ грѣхо́вную разгна́, Ду́ха теплото́ю сердца́ оживи́въ. Того́ прилѣ́жно моля́щи не преста́й о на́съ, Тебѣ́ мо́лимся, и́же и́стинную Богоро́дицу исповѣ́дающіи Тя́.

Или́ предпра́зднства, гла́съ то́йже:

Пріими́те, я́сли, Его́же въ купинѣ́ Моисе́й законополо́жникъ прови́дѣ въ Хори́вѣ, ны́нѣ ражда́ема отъ Дѣ́вы Ду́хомъ Боже́ственнымъ. Та́ е́сть, Яже въ зако́нѣ рече́нная, Та́ е́сть проро́ческая печа́ть, Яже Бо́га пло́тію тлѣ́ннымъ явля́ющи, Ему́же поклони́мся.

На стихо́внѣ стихи́ры, гла́съ 6:

Отче Іоа́нне преблаже́нне, всѣ́хъ святы́хъ подража́тель бы́въ, святу́ю вѣ́ру патріа́рховъ стяжа́лъ еси́, проро́ковъ и апо́столовъ ре́вность, святи́телей же преподо́біе и богомы́сліе, исповѣ́дниковъ дерзнове́ніе, безсре́бренниковъ безме́здную по́мощь, преподо́бныхъ подви́жниковъ непреста́нную моли́тву, сего́ ра́ди святу́ю твою́ па́мять свѣ́тло пра́зднуемъ.

Сти́хъ: Расточи́, даде́ убо́гимъ, пра́вда его́ пребыва́етъ во вѣ́къ.

Отче на́шъ Іоа́нне богому́дре, стра́хомъ наче́нъ Бо́жіимъ, высоты́ прему́дрости разумѣ́лъ еси́: любо́вію же Христу́ сраспя́вся и сво́йственнѣйшій Ему́ бы́въ, послѣди́ стра́хъ любо́вію изгна́лъ еси́, и́мать бо му́ку стра́хъ, я́коже апо́столъ любве́ научи́лъ е́сть на́съ; тѣ́мже, о́тче, вѣ́рныхъ украша́лъ еси́ ра́зумы и Бо́га люби́ти ста́до твое́ научи́лъ еси́. О, Іоа́нне, Христа́ Бо́га моли́ дарова́ти и на́мъ благода́ть сію́ и ве́лію ми́лость.

Сти́хъ: Гото́во се́рдце его́ упова́ти на Го́спода.

Госпо́дь си́ла се́рдца моего́, Госпо́дь свѣ́тъ ума́ моего́, Госпо́дь поко́й мо́й и ра́дость моя́, моя́ вѣ́ра, наде́жда и любы́; Се́й е́сть пи́ща моя́ и питіе́ мое́, оде́жда моя́ и покро́въ. — Вразуми́ у́бо и на́съ, о́тче святы́й, сія́ словеса́ твоя́ разумѣ́ти и въ Го́сподѣ полага́ти спасе́ніе на́ше, пода́ждь на́мъ отъ благосты́ни твоея́, я́коже Илія́ Елиссе́еви, да бу́детъ въ Го́сподѣ вся́ на́ша наде́жда и утвержде́ніе.

Сла́ва, гла́съ 8:

Не отцы́ на́ши возвѣсти́ша на́мъ, ниже́ ста́рцы повѣ́даша на́мъ, са́ми бо ви́дѣхомъ тобо́ю быва́емая чудеса́, са́ми испыта́хомъ благода́ть отъ тебе́ излива́емую: бли́жніи на́ши исцѣля́хуся, при кончи́нѣ су́щіи здра́ви отъ одра́ возстава́ху, вся́кая проше́нія на́ша моли́твою твое́ю исполня́хуся; тѣ́мже почита́емъ тя́, я́ко уго́дника Бо́жія и предста́теля за на́съ предъ Го́сподемъ.

И ны́не, богоро́диченъ, гла́съ то́йже:

Па́че всѣ́хъ тва́рей возвы́силася еси́, Богоро́дице Дѣ́во, зане́ избра́ Тя́ въ жили́ще Себѣ́, Иже въ Вы́шнихъ Живы́й, да возведе́тъ па́дшее естество́ на́ше; тѣ́мъ Ти́ припа́даемъ, я́ко къ Ма́тери Спа́са на́шего: Ты́ еси́ на́ша наде́жда, Ты́ еси́ на́ше упова́ніе, не отри́ни на́съ, и́щущихъ Твоея́ по́мощи.

Или́ предпра́зднства, гла́съ то́йже:

Го́споди, въ Виѳлее́мъ прише́дъ, въ верте́пъ всели́лся еси́, Не́бо престо́лъ имѣ́я, въ я́слехъ восклони́лся еси́, Его́же во́инства окружа́ютъ а́нгелъ, па́стыремъ снизше́лъ еси́, да спасе́ши, я́ко Благоутро́бенъ, ро́дъ на́шъ, сла́ва Тебѣ́.

Тропа́рь, гла́съ 4:

Со апо́столы изы́де вѣща́ніе твое́ въ концы́ вселе́нныя, съ исповѣ́дники страда́нія за Христа́ претерпѣ́лъ еси́, святи́телемъ уподо́бился еси́ сло́ва проповѣ́даніемъ, съ преподо́бными во благода́ти Бо́жіей просія́лъ еси́. Сего́ ра́ди вознесе́ Госпо́дь бе́здну смире́нія твоего́ превы́ше небе́съ, и дарова́ на́мъ и́мя твое́ во исто́чникъ преди́вныхъ чуде́съ. Тѣ́мже во Христѣ́ во вѣ́ки живы́й, чудотво́рче, любо́вію ми́луяй су́щія въ бѣда́хъ, слы́ши ча́да твоя́, вѣ́рою тя призыва́ющія, Іоа́нне пра́ведне, возлю́бленный па́стырю на́шъ.

А́ще бдѣ́ніе: тропа́рь свято́му Іоа́нну дважды и Богоро́дице Дѣ́во, единожды.
А́ще же ни́, по тропарѣ́, Сла́ва, и ны́нѣ, богоро́диченъ, гла́съ то́йже:

Еже отъ вѣ́ка утае́нное, и а́нгеломъ несвѣ́домое та́инство, Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и Кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.

Или́ предпра́зднства, гла́съ то́йже:

Гото́вися Виѳлее́ме, отве́рзися всѣ́мъ, Еде́ме, красу́йся Евфра́ѳо, я́ко дре́во живота́ въ верте́пѣ процвѣте́ отъ Дѣ́вы: ра́й бо Оноя чре́во яви́ся мы́сленный, въ не́мже Боже́ственный са́дъ: отъ него́же я́дше, жи́ви бу́демъ, не я́коже Ада́мъ у́мремъ; Христо́съ ражда́ется пре́жде па́дшій возста́вити о́бразъ.


НА УТРЕНИ.
По 1-й каѳи́смѣ сѣда́ленъ, гла́съ 4.

Не презрѣ́лъ еси́, о́тче Іоа́нне, ни стра́нна, ни прише́льца, но всѣ́мъ бы́лъ еси́ бла́гъ и ми́лостивъ и ще́дръ, сиро́тъ оте́цъ и вдова́мъ защи́та, наги́хъ одѣя́ніе и а́лчущихъ пи́ща. Помяни́ и на́съ, убо́гихъ ча́дъ твои́хъ, и не отри́ни отъ благода́тныя любве́ твоея́. [Два́жды.]

Сла́ва, и ны́нѣ, богоро́диченъ, гла́съ то́йже. Самоподо́бенъ:

Удиви́ся Іо́сифъ, е́же па́че естества́ зря́, и внима́ше мы́слію и́же на руно́ до́ждь, въ безсѣ́меннемъ зача́тіи Твое́мъ Богоро́дице, купину́ огне́мъ неопали́мую, же́злъ Ааро́новъ прозя́бшій, и свидѣ́тельствуя обру́чникъ Тво́й и храни́тель, свяще́нникомъ взыва́ше: Дѣ́ва ражда́етъ, и по рождествѣ́ па́ки Дѣ́ва пребыва́етъ.

Или́ предпра́зднству, гла́съ 1:

Приклони́вый небеса́, и въ Дѣ́ву Всели́выйся, происхо́дитъ пло́тію въ Виѳлее́мстемъ верте́пѣ роди́тися, я́коже писа́ся, ви́дѣтися же Младе́нецъ, мла́денцы оживля́яй во утро́бѣ. Сего́, ра́дующеся ны́нѣ, сря́щемъ вси́ се́рдца пра́востію.

По 2-й каѳи́смѣ сѣда́ленъ, гла́съ 5.

Боже́ственною си́лою укрѣпля́емь, побѣди́лъ еси́ неви́димыхъ враго́въ искуше́нія и къ свѣ́ту невече́рнему преста́вился еси́. Уврачу́й и ду́шъ на́шихъ стра́сти и совѣ́томъ твои́мъ наста́ви ны́, ты́ бо вра́чъ и утѣ́шитель всѣ́мъ отъ Бо́га да́нъ бы́лъ еси́, Іоа́нне о́тче на́шъ. [Два́жды.]

Сла́ва, и ны́нѣ, богоро́диченъ:

Неискусобра́чная Невѣ́сто, Богороди́тельнице, я́же Евину печа́ль радостотвори́вшая, воспѣва́емъ Тя́ вѣ́рніи, и покланя́емся Тебѣ́, я́ко изба́вила еси́ на́съ отъ дре́внія кля́твы; и ны́нѣ моли́ся за ны́ непреста́нно, всепѣ́тая, во е́же спасти́ся на́мъ.

Или́ предпра́зднству, гла́съ 4:

Ра́дуйся Сіо́не, Виѳлее́ме украси́ся, всѣ́хъ Содержи́тель звѣзду́ предпосла́въ, возвѣсти́ безмѣ́рное Свое́ схожде́ніе: Его́же трепе́щутъ небе́сныя си́лы, вои́стинну ражда́ется отъ Дѣ́вы непрело́жно еди́нъ Человѣколю́бецъ.

Поліеле́й и велича́ніе:

Велича́емъ тя́, святы́й пра́ведный о́тче Іоа́нне, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный: Блаже́нъ му́жъ боя́йся Го́спода, въ за́повѣдехъ Его́ восхо́щетъ зѣло́...

Сѣда́ленъ по поліеле́и, гла́съ 8:

Сло́ва Бо́жія пла́менный служи́тель, Іоа́нне богодухнове́нне, и вмѣсти́лище вѣ́ры Христо́вой ты́ бы́лъ еси́, сего́ ра́ди Госпо́дь, я́коже но́ваго Авраа́ма, отца́ мно́гихъ поста́ви тя́. Моли́ у́бо, о́тче святы́й, е́же всѣ́мъ на́мъ, ча́домъ Бо́жіимъ бы́ти и душа́мъ на́шимъ спасти́ся. [Два́жды.]

Сла́ва, и ны́нѣ, богоро́диченъ:

Небе́сную две́рь и киво́тъ, всесвяту́ю го́ру, свѣтоза́рный о́блакъ нарица́емъ Тя́, Дѣ́во, и небе́сную лѣ́ствицу, слове́сный ра́й, Евино избавле́ніе, вселе́нныя всея́ вели́кое сокро́вище, я́ко спасе́ніе въ Тебѣ́ содѣ́лася мíрови и оставле́ніе дре́внихъ согрѣше́ній. Сего́ ра́ди вопіе́мъ Ти́: моли́ Сы́на Твоего́ и Бо́га прегрѣше́ній оставле́ніе дарова́ти, благоче́стно покланя́ющимся пресвято́му Рождеству́ Твоему́.

Или́ предпра́зднства, гла́съ 6. Подо́бенъ: Ангельскія си́лы.

Свирѣ́лей па́стырскихъ представля́юще пѣ́сни, во́инство а́нгельское возгласи́, къ ни́мъ глаго́ля: преста́ните свиря́юще, и́же надъ чреда́ми пасо́мыхъ старѣ́йшины, возопíйте пою́ще: я́ко роди́ся Христо́съ Госпо́дь, благоволи́вый спасти́ я́ко Бо́гъ ро́дъ человѣ́ческій.

Проки́менъ, гла́съ 4:

Свяще́нницы Твои́ облеку́тся въ пра́вду* и преподо́бніи Твои́ возра́дуются.

Сти́хъ: Помяни́, Го́споди, Дави́да и всю́ кро́тость его́...

Отъ Луки́ свята́го Ева́нгелія чте́ніе. [Зач. 24.]

Во вре́мя о́но, ста́ Іису́съ на мѣ́стѣ ра́внѣ: и наро́дъ учени́къ Его́, и мно́жество мно́го люде́й отъ всея́ Іуде́и и Іерусали́ма и помо́рія Ти́рска и Сидо́нска, и́же пріидо́ша послу́шати Его́ и исцѣли́тися отъ неду́гъ свои́хъ, и стра́ждущіи отъ ду́хъ нечи́стыхъ: и исцѣля́хуся. И ве́сь наро́дъ иска́ше прикаса́тися Ему́: я́ко си́ла отъ Него́ исхожда́ше и исцѣля́ше вся́. И То́й возве́дъ о́чи Свои́ на ученики́ Своя́, глаго́лаше: Блаже́ни ни́щіи ду́хомъ, я́ко ва́ше е́сть Ца́рствіе Бо́жіе. Блаже́ни а́лчущіи ны́нѣ, я́ко насы́титеся. Блаже́ни пла́чущіи ны́нѣ, я́ко возсмѣе́теся. Блаже́ни бу́дете, егда́ возненави́дятъ ва́съ человѣ́цы, и егда́ разлуча́тъ вы́, и поно́сятъ, и пронесу́тъ и́мя ва́ше я́ко зло́, Сы́на Человѣ́ческаго ра́ди. Возра́дуйтеся въ то́й де́нь и взыгра́йте: се́ бо мзда́ ва́ша мно́га на небеси́.

По 50-мъ псалмѣ́ стихи́ра, гла́съ 6:

Ангеле земны́й, дру́же человѣ́ковъ, орга́не Утѣ́шителя Ду́ха, носи́телю любве́ Христо́вы, печа́льниче о все́мъ мíрѣ и уста́ всѣ́хъ вѣ́рныхъ, утѣше́ніе печа́льныхъ и скорбя́щихъ, засту́пниче гони́мыхъ, врачу́ ду́шъ и тѣле́съ, о́тче и моли́твенниче, святы́й пра́ведный Іоа́нне, пріиди́ и ста́ни съ на́ми, да вознесе́мъ вку́пѣ съ тобо́ю хвалу́ и благодаре́ніе Спаси́телю Бо́гу, сла́вное соверша́я сіе́ торжество́.

Кано́нъ Пресвяты́я Богоро́дицы или́ предпра́зднства на 6 со ирмосо́мъ и свята́го на 8, его́ же краестро́чіе: Моя́ жи́знь во Христѣ́, Ему́же пою́ во вся́ вѣ́ки. Гласъ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зныма Моисе́овыма рука́ма Амали́кову си́лу въ пусты́ни побѣди́лъ е́сть.

Моя́ чу́вства и у́мъ утверди́, Спаси́телю мо́й, да возмогу́ досто́йнѣ воспѣ́ти моли́твы и по́двиги возлю́бльшаго Тя́ и Тобо́ю возлю́бленнаго служи́теля Твоего́, отца́ на́шего Іоа́нна.

Отъ ю́ности Первозва́нному Апо́столу во святѣ́мъ хра́мѣ его́ пѣ́ти предъизбра́нный, свѣ́тлостію Креста́ озаря́емь, грѣхо́вныя мглы́ избѣ́глъ еси́, Спаси́телю Бо́гу моли́твы и пѣ́ніе вознося́ непреста́нно, блаже́нне.

Я́коже Илія́ колесни́цею о́гненною, та́ко и ты́ колесни́цею добродѣ́телей на не́бо возше́лъ еси́, отону́дуже низпосла́ти и на́мъ житія́ исправле́ніе Го́спода умоли́.

Богоро́диченъ: Жи́знь вѣ́чную Тобо́ю, Богоро́дице Дѣ́во, прія́хомъ, и́же жи́зни ра́йскія нѣ́когда лиши́вшіися, зане́ родила́ еси́ еди́наго Безнача́льнаго и вся́ Оживотворя́ющаго.

Катава́сія по уста́ву.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище и утвержде́ніе.

И нра́вомъ прича́стникъ и житіе́мъ подража́тель апо́столомъ бы́въ, богодухнове́нне, сло́во и́стины до конца́ испра́вилъ еси́.

Зри́тельно Ца́рствія небе́снаго бѣ́ душе́вное о́ко твое́, поне́же чи́сто бы́сть, сего́ ра́ди житіе́ свѣ́тлѣ упра́вилъ еси́, е́же чту́ще о Бо́зѣ, тя́ прославля́емъ.

Не трудя́йся да не я́стъ, — словеса́ апо́стола бра́тіи твое́й вѣща́лъ еси́, тѣ́мже и до́мъ трудолю́бія убо́гихъ ра́ди воздви́глъ еси́, въ не́мже ни́щіи и немощнíи возмо́гутъ удовле́ни бы́ти, пита́ющеся отъ дѣ́лъ ру́къ свои́хъ.

Богоро́диченъ: Вся́ свѣ́тъ еси́, Влады́чице, вся́ святы́ня, вся́ бла́гость, вся́ прему́дрость, вся́ мо́жеши, я́ко Ма́ти Всемогу́щаго, еди́на и та́ же всесоверше́нна, я́ко Ма́ти всесоверше́ннаго Царя́ сла́вы.

Сѣда́ленъ, гла́съ 8.

Пла́чь мно́зѣхъ о грѣсѣ́хъ къ Престо́лу вы́шнему вознося́, Небе́съ приклоне́ніе во святѣ́й Литургíи ду́хомъ созерца́я, дѣя́ніе и проповѣ́даніе наразры́вны имы́й, твои́ми дѣ́лы и чудесы́ вели́кихъ отце́въ наслѣ́дникъ досто́йный яви́лся еси́, Іоа́нне блаже́нне, мíру Кро́нштадтскій свѣти́льниче, моли́ся о душа́хъ на́шихъ. [Два́жды.]

Сла́ва, и ны́нѣ, богоро́диченъ, гла́съ то́йже.

Недви́жимое утвержде́ніе вѣ́ры и Боже́ственное дарова́ніе душа́мъ на́шимъ — Ты́ еси́, Пречи́стая, тѣ́мъ къ Тебѣ́ припа́дающе, ку́пно съ арха́нгеломъ вопіе́мъ Ти́: ра́дуйся, роди́вшая Спа́са на́шего, ра́дуйся Засту́пнице и Хода́таице ро́да христіа́нскаго.

Или́ предпра́зднства, гла́съ то́йже.

Изъ чре́ва пре́жде вѣ́къ отъ Отца́ возсія́въ неслія́ннѣ, Сло́во Бо́жіе безсѣ́менно предгряде́тъ отъ Твоея́ утро́бы, Пречи́стая, вре́менми послѣди́, вознося́й и́же дре́вле лю́тѣ попо́лзшагося, и къ дре́внѣй добро́тѣ возводя́, я́ко Милосе́рдъ. Его́же Рождеству́ во́инства безпло́тныхъ предъи́дутъ, и человѣ́комъ побѣ́дная та́йно возсыла́ютъ: Сла́ва, — взыва́юще, — Бо́гу, дарова́вшему на́мъ ми́ръ, разруши́вшему средостѣ́ніе вражды́, я́коже изво́ли.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́юще: сла́ва си́лѣ Твое́й, Го́споди.

Основа́ніе тве́рдо — Христа́ имѣ́я, во страннолю́біи Авраа́му дре́внему уподо́бился еси́, отъ всѣ́хъ стра́нъ къ тебѣ́ приходя́щія пріе́мля, и ко Го́споду тѣ́хъ приводя́, и та́ко уго́дная Бо́гу твори́лъ еси́.

Хра́мъ Бо́гу се́рдце твое́ хотя́ устро́ити, въ дому́ Бо́жіемъ непреста́нно служи́ти возжелѣ́лъ еси́, украша́я ду́шу твою́ небе́сными добро́тами.

Росо́ю по́двиговъ твои́хъ вся́ стра́сти тѣле́сныя угаси́въ, возже́глъ еси́ просвѣще́ніе безстра́стія, тѣ́мже и сы́нъ вѣ́чнаго дне́ яви́лся еси́, о́тче блаже́нне.

Богоро́диченъ: Іезекíиль боже́ственный, Пречи́стая, Врата́ заключе́нна пронарече́ Тя́, и́миже про́йде нерастворе́нно, еди́ный Превѣ́чный, ми́ръ Сво́й да́въ на́мъ.

Пѣ́снь 5.

Ирмо́съ: Ты́ Го́споди мо́й, Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Сподо́бился еси́ вы́шнихъ дарова́ній, о́тче, Го́споду твоему́ непреста́нно служа́ и апо́стольскія труды́ при́сно подража́я.

Тлѣ́нныя твоея́ пло́ти сладостра́стіе умертви́въ, ду́шу нетлѣ́нную благоче́стіемъ оживи́лъ eси́, и сію́ до́мъ Ду́ха Боже́ственнаго сотвори́лъ еси́.

Ева́нгеліе Христо́во всѣ́мъ усе́рдно проповѣ́дуя, трапе́зы Госпо́дней прича́стникъ повседне́вный бы́лъ еси́, са́мъ себе́ и па́ству твою́, я́ко же́ртву жи́ву, и свя́ту Бо́гови устроя́я.

Богоро́диченъ: Еди́наго отъ Тро́ицы родила́ еси́, Пречи́стая, милосе́рдія ра́ди на земли́ Явльшагося во двою́ естеству́, Его́же непреста́нно моли́ спасти́ ду́ши на́ша.

Пѣ́снь 6.

Ирмо́съ: Пожру́ Ти́ со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею Кро́вію.

Ма́слина плодови́та въ дому́ Го́спода твоего́ бы́лъ еси́, Іоа́нне богоявле́нне, зане́ вѣ́дѣніе Боже́ственное Госпо́дь дарова́ ти и въ дѣ́ланіи апо́стольстемъ укрѣпи́ тя.

Уди тѣ́ла Христо́ва есте́ вы́, — та́ко со апо́столомъ проповѣ́далъ еси́ и Христа́ еди́наго люби́ти учи́лъ еси́, да вси́ еди́но бу́дутъ.

Житіе́ твое́ свя́то, сло́во твое́, богому́дре, благода́ти Бо́жія испо́лнено, се́рдце твое́ моли́твы благода́тныя сосу́дъ бы́сть, сего́ ра́ди вѣ́рою и любо́вію тя́ почита́емъ.

Богоро́диченъ: Естество́ а́нгельское удиви́ся е́же въ Тебѣ́ чу́ду неизрече́нному, Пресвята́я Дѣ́во, ка́ко у́бо пло́ть воспрія́тъ отъ Тебе́, Иже безпло́тенъ Сы́й и вся́ Содержа́й.

Конда́къ, гла́съ 4:

Отъ младе́нства Бо́гомъ избра́нный, и во о́трочествѣ да́ръ уче́нія чуде́сно отъ Него́ пріе́мый, и къ пресви́терству въ со́нномъ видѣ́ніи пресла́вно призва́нъ бы́въ, па́стырь ди́вный Це́ркве Христо́вы яви́лся еси́, о́тче Іоа́нне, благода́ти тезоимени́те; моли́ Христа́ Бо́га всѣ́мъ на́мъ съ тобо́ю въ Ца́рствіи Бо́жіемъ бы́ти.

Икосъ.

Ду́хъ Святы́й во проро́цѣхъ глаго́лавый и апо́столы всю́ вселе́нную просвѣти́вый, му́ченикомъ крѣ́пость дарова́вый и чре́зъ святи́тели вѣ́ру правосла́вную уясни́вый, благода́ть Свою́ излія́ оби́льно на тя́, о́тче Іоа́нне, вѣ́ру бо Христо́ву сло́вомъ, дѣ́лы и всѣ́мъ житіе́мъ твои́мъ возвѣща́лъ еси́. Тѣ́мже въ селе́нія Своя́ призва́ тя Госпо́дь, и ны́нѣ у Престо́ла сла́вы Его́ предстоя́, моли́ся, всѣ́мъ чту́щимъ тя́ съ тобо́ю въ Ца́рствіи Бо́жіемъ бы́ти.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми взыва́ху: благослове́нъ еси́ въ хра́мѣ сла́вы Твоея́, Го́споди.

Про́мысломъ Бо́жіимъ свѣ́тъ благоче́стія среди́ тя́жкія тьмы́ безбо́жія и невѣ́рія ты́ яви́лся еси́, о́тче, вся́ призыва́я зва́ти: благослове́нъ еси́ въ це́ркви сла́вы Твоея́, Го́споди.

Образъ Бо́жій человѣ́къ е́сть, ты́ же, о́тче Іоа́нне, зерца́ло любве́ Бо́жіей пресвѣ́тло бы́лъ еси́ и до́мъ Святы́я Тро́ицы, Юже и мы́ грѣ́шніи прославля́емъ.

Юже отъ Го́спода благода́ть прія́лъ еси́, во е́же неду́ги и стра́сти исцѣля́ти человѣ́комъ, то́ю и на́съ при́сно посѣща́й, да вси́ съ тобо́ю единому́дренно пое́мъ: благослове́нъ еси́, Го́споди Бо́же, во вѣ́ки.

Богоро́диченъ: Влады́чице, спаси́ ро́дъ Тво́й, спаси́ единокро́вныя Твоя́. Спаси́ ны, Ма́ти Живота́ и всего́ ро́да человѣ́ча, а́ще и недосто́йни есмы́ Тя́ Ма́терь себѣ́ нарещи́, освяти́, утверди́ и спаси́ на́съ моли́твами Твои́ми.

Пѣ́снь 8.

Ирмо́съ: Ру́цѣ распросте́ръ Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троци, взыва́юще: благослови́те, вся́ дѣла́ Госпо́дня, Го́спода.

Очи́сти сердца́ и мы́сли на́ша моли́твами твои́ми, и я́ко зе́млю плодоно́сну, покажи́ ны́, да добродѣ́телію препоя́савшеся, зове́мъ: благослови́те вся́ дѣла́ Госпо́дня Го́спода.

Вѣнце́мъ благода́тныхъ даро́въ вѣнча́лся еси́, прему́дрость вы́сшую созерца́я и при́сно зовы́й: благослови́те вся́ дѣла́ Госпо́дня Го́спода.

Тро́иченъ: Сла́ва Тебѣ́, Всесвяты́й животворя́щій Ду́ше, отъ Отца́ исходя́й и въ Сы́нѣ при́сно почива́яй; сла́ва Тебѣ́, Сы́не Бо́жій, Святы́мъ Ду́хомъ освяща́яй, укрѣпля́яй и умудря́яй на́съ; сла́ва Тебѣ́, О́тче, благоволя́й о на́съ при́сно Ду́хомъ Святы́мъ: нераздѣ́льная Тро́ице Еди́нице, поми́луй на́съ.

Богоро́диченъ: Я́же мíру ро́ждшая спасе́ніе, ра́дуйся, Тобо́ю бо отъ земли́ на высоту́ взя́ти бы́хомъ; ра́дуйся, Благослове́нная, покро́ве и держа́во, стѣно́ и утвержде́ніе, пою́щимъ: Го́спода воспѣва́йте дѣла́ и превозноси́те Его́ во вѣ́ки.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Вои́стину свѣ́тъ мíру бы́лъ еси́, о́тче святы́й, Боже́ственными бо дѣ́тельми ду́шу удобри́въ, па́стырь изря́денъ правосла́вныя Це́ркве яви́лся еси́, всѣ́мъ вѣ́рнымъ о́бразъ бы́въ сло́вомъ и житіе́мъ, сего́ ра́ди тя́ ублажа́емъ.

Еди́наго Содѣ́теля, Имже и о Не́мже вся́ческая во всѣ́хъ, вы́ну предзря́ предъ умо́мъ свои́мъ. Тому́ чи́стымъ се́рдцемъ и небла́зненною душе́ю всѣ́мъ житіе́мъ твои́мъ порабо́талъ еси́, я́ко Го́споду своему́, рабо́тою маммо́нѣ ника́коже прирази́вся.

Кня́зи восхвали́ша и наро́дъ мно́гъ просла́ви тя́, ты́ же сла́ву земну́ю презрѣ́въ, въ вѣ́чныхъ оби́телехъ Бо́жіихъ возжела́лъ еси́ бы́ти и та́мо прославля́ти Го́спода во вѣ́ки.

Богоро́диченъ: Иже Превѣ́ченъ Сы́й сни́де во утро́бу Твою́, Пресвята́я Дѣ́во, и неизрече́нно, па́че ума́ и сло́ва, роди́ся отъ Тебе́, да обнови́тъ дре́вняго Ада́ма, тѣ́мъ Тя́, я́ко Вино́вницу на́шего обновле́нія, при́сно велича́емъ.

Свѣти́ленъ:

Въ хра́мѣ Первозва́ннаго ученика́ Христо́ва священнодѣ́йствуя, и того́ апо́стольское служе́ніе вѣ́ры ре́вностно подража́я, дѣ́латель до́брый са́да Христо́ва бы́лъ еси́, и я́ко пло́дъ мно́гъ вѣ́рныя ко Го́споду твоему́ приве́лъ еси́, чрезъ все́ житіе́ вы́ну вѣща́я: моя́ жи́знь во Христѣ́ е́сть.

Сла́ва, и ны́нѣ, богоро́диченъ:

Иже отъ Тебе́ рожде́йся, Пресвята́я Дѣ́во, и отъ Ду́ха Своего́ излія́вый на вся́ку пло́ть, освяти́, просла́ви и прія́тъ въ селе́нія Своя́ вѣ́рнаго служи́теля Своего́, моли́твенника, проповѣ́дника, еще́ же и проро́ка, съ ни́мже не преста́й моля́щи за чту́щія Тя́.

Или́ предпра́зднства:

Украси́ся, Виѳлее́ме, но́вое жили́ще, я́сли и верте́пъ, па́стырей со́нмища, волсви́ отъ восто́ковъ въ него́ предвари́те, звѣзды́ свѣ́тлостію; Дѣ́ва бо уже́ Всесоверше́ннаго, я́ко Младе́нца въ то́мъ ражда́етъ.

На хвали́техъ стихи́ры, гла́съ 8. Подо́бенъ: О, пресла́внаго чудесе́!

О, прера́достныя по́вѣсти:* Бо́га мо́литъ о́трокъ Іоа́ннъ,* Бо́жія про́ситъ ми́лости,* е́же просвѣти́ти ему́ смы́слъ,* ни́цъ просте́рся предъ ико́ною,* ско́рбь души́ предъ Бо́гомъ исповѣ́дуя.* И се́ пелена́ отъ о́чію ума́ о́троча снима́ется,* и свѣ́томъ Христо́вымъ о́трокъ озаря́ется,* да ве́лія сотвори́тъ и мно́ги научи́тъ. [Два́жды.]

О, чуде́съ преизоби́ліе!* О, любве́ живо́е облиста́ніе!* Кто́ не подиви́тся твоему́ благотворе́нію* и е́же къ убо́гимъ милосе́рдію?* Сла́вному Ликíйскихъ Мѵ́ръ святи́телю* неисче́тностію чуде́съ подо́бился еси́.* Тѣ́мже гра́ды и ве́си земли́ Ру́сскія,* Іоа́нне пра́ведне,* ви́дѣша тобо́ю свѣ́тъ Христо́въ.

Якоже свѣ́тъ и теплота́* со́лнцу неразлу́чни,* та́ко и тебѣ́ свя́тость и учи́тельство,* любы́ и милосе́рдіе прису́щи бы́ша,* Іоа́нне свяще́ннѣйшій,* лю́демъ богодарова́нне.* Тѣ́мже, о па́стырю,* бу́ди согрѣва́я и просвѣща́я на́съ,* бу́ди, я́коже со́лнце, душа́мъ на́шимъ.

Сла́ва, гла́съ 7:

Покланя́яся святы́мъ ико́намъ, сла́влю Христа́ Бо́га воплоще́нна, Образъ сла́вы Отчія; исповѣ́дую Отца́, безнача́льно Сы́на роди́вшаго; прославля́ю богоподо́біе человѣ́ковъ, и́же хра́мы Свята́го Ду́ха су́ть; зря́ же креста́ о́бразъ, въ чу́вствѣ и́мамъ си́лу Креста́ Животворя́щаго, — се́ е́сть богосло́віе твое́, о́тче святы́й, и́мже вели́кимъ учи́телемъ Це́ркве уподо́бился еси́, о́бразы иконопи́сніи во сла́ву первообра́зныхъ почита́я.

И ны́нѣ, богоро́диченъ, гла́съ то́йже:

Роди́лся еси́ отъ Дѣ́вы несказа́нно, Христе́, и просвѣти́лъ еси́ су́щія во тьмѣ́, вопію́щія: Го́споди, сла́ва Тебѣ́.

Или́ предпра́зднства, гла́съ 2, подо́бенъ: До́ме Евфра́ѳовъ.

Пріиди́те, земноро́дніи,* согла́сно Дѣ́ву* Богоро́дицу Марíю* воспое́мъ непреста́нно,* изъ Нея́же Христо́съ ражда́ется.

Славосло́віе вели́кое. И отпу́стъ.



НА ЛИТУРГІИ:

Блаже́нна отъ кано́на свята́го, пѣ́снь 3-я и 6-я. Аще 20-го Деке́мврія: предпра́зднства пѣ́cнь 3-я и свята́го Іоа́нна пѣ́снь 6-я. Проки́менъ, гласъ 7: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́тимися къ Тебѣ́.

Собо́рнаго посла́нія Іоа́ннова чте́ніе. [Зач. 73, 1 Іоан. 4, 7-11.]

Возлю́бленніи, возлю́бимъ дру́гъ дру́га, я́ко любы́ отъ Бо́га е́сть, и вся́къ любя́й, отъ Бо́га рожде́нъ е́сть, и зна́етъ Бо́га. А не любя́й, не позна́ Бо́га, я́ко Бо́гъ любы́ е́сть. О се́мъ яви́ся любы́ Бо́жія въ на́съ, я́ко Сы́на Своего́ Единоро́днаго посла́ Бо́гъ въ мíръ, да жи́ви бу́демъ Имъ. О се́мъ е́сть любы́, не я́ко мы́ возлюби́хомъ Бо́га, но я́ко То́й возлюби́ на́съ, и посла́ Сы́на Своего́ очище́ніе о грѣсѣ́хъ на́шихъ. Возлю́бленніи, а́ще си́це возлюби́лъ е́сть на́съ Бо́гъ, и мы́ до́лжни есмы́ дру́гъ дру́га люби́ти.

Аллилу́ія, гла́съ 4: Гото́во се́рдце его́ упова́ти на Го́спода. Сти́хъ: Бла́гъ му́жъ ще́дря и дая́.

Отъ Луки́ свята́го Ева́нгелія чте́ніе. [Зач. 26.]

Рече́ Госпо́дь: я́коже хо́щете да творя́тъ ва́мъ человѣ́цы, и вы́ твори́те и́мъ та́кожде. И а́ще лю́бите лю́бящія вы́, ка́я ва́мъ благода́ть е́сть? и́бо и грѣ́шницы лю́бящія и́хъ лю́бятъ. И а́ще благотворите́ благотворя́щимъ ва́мъ, ка́я ва́мъ благода́ть е́сть? и́бо и грѣ́шницы то́жде творя́тъ. И а́ще взаи́мъ даете́, отъ ни́хже ча́ете воспрія́ти, ка́я ва́мъ благода́ть е́сть? и́бо и грѣ́шницы грѣ́шникомъ взаи́мъ дава́ютъ, да воспріи́мутъ ра́вная. Оба́че люби́те враги́ ва́ша, и благотвори́те, и взаи́мъ да́йте, ничесо́же ча́юще; и бу́детъ мзда́ ва́ша мно́га, и бу́дете сы́нове Вы́шняго; я́ко То́й бла́гъ е́сть на безблагода́тныя и злы́я. Бу́дите убо милосе́рди, я́коже и Оте́цъ ва́шъ милосе́рдъ е́сть.

Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.

На отпу́стѣ помина́емъ свята́го пра́веднаго отца́ на́шего Іоа́нна, Кроншта́дтскаго чудотво́рца.


УСТАВЪ О ПРАЗДНИЦѢ
свята́го пра́веднаго Іоа́нна Кроншта́дтскаго.

Па́мять свята́го пра́веднаго Іоа́нна Кроншта́дтскаго соверша́ется 19-го Окто́врія, егда́ и па́мять небе́снаго его́ покрови́теля, преподо́бнаго Іоа́нна Ры́льскаго, и 20-го Деке́мврія въ де́нь его́ преставле́нія.

19-го Окто́врія соверша́емъ па́мять его́, соединя́я слу́жбу его́ со слу́жбою свята́го проро́ка Іо́иля, его́же прее́мникъ по ду́ху въ Россíйстѣй земли́ бы́сть святы́й пра́ведный Іоа́ннъ, или́ со слу́жбою преподо́бнаго Іоа́нна Ры́льскаго, или́ же твори́мъ бдѣ́ніе еди́ному пра́ведному Іоа́нну [что́ въ Ру́сской Це́ркви прили́чно е́сть].

[На вели́цѣй вече́рни:] На Го́споди воззва́хъ: пое́мъ стихи́ры проро́ка 3 и Іоа́нна Кроншта́дтскаго 3 [или́ еди́ному Іоа́нну Кроншта́дтскому на 8]. На литíи и стихо́внѣ стихи́ры пра́ведному. Тропа́рь пра́веднаго Іоа́нна, а́ще бдѣ́ніе, 2-жды и Богоро́дице Дѣ́во 1-жды. А́ще нѣ́сть бдѣ́нія, Сла́ва, и ны́нѣ: Еже отъ вѣ́ка утае́нное.

На у́трени: тропа́рь 2-жды. Сла́ва, и ны́нѣ: Еже отъ вѣ́ка утае́нное. Сѣда́льны пра́веднаго. Сла́ва, и ны́нѣ: Богоро́диченъ. Кано́нъ Богоро́дицы пара́клисисъ и свята́го [или́ святы́хъ]. Катава́сія: Отве́рзу уста́ моя́. Свѣти́ленъ пра́веднаго. Сла́ва, и ны́нѣ: Богоро́диченъ. Хвали́тны на 4. Сла́ва: пра́веднаго. И ны́нѣ: Богоро́диченъ. Славосло́віе вели́кое.

20-го Деке́мврія соединя́емъ слу́жбу свята́го пра́веднаго Іоа́нна со слу́жбою предпра́зднства Рождества́ Христо́ва и [а́ще хра́мъ или́ пра́здникъ его́ твори́тся] священному́ченика Игна́тія Богоно́сца, на него́же Христо́съ указа́въ рече́: А́ще не бу́дете, я́ко отроча́ сіе́, не вни́дите въ Ца́рствіе небе́сное.

[На вели́цѣй вече́рни:] На Го́споди воззва́хъ, стихи́ры на 10: предпра́зднства 3, священному́ченика Игна́тія 3 и пра́веднаго Іоа́нна 4. Чте́нія свята́го пра́веднаго Іоа́нна. На литíи: свята́го Іоа́нна. Стихо́вны: свята́го пра́веднаго Іоа́нна. Сла́ва: Игна́тія. И ны́нѣ: предпра́зднства. На благослове́ніи хлѣ́бовъ: пра́веднаго 2-жды, предпра́зднства 1-жды.

На у́трени: тропа́рь предпра́зднства, Игна́тія. Сла́ва: пра́веднаго. И ны́нѣ: предпра́зднства. Кано́нъ предпра́зднства, Игна́тія и Іоа́нна. Катава́сія: Христо́съ ражда́ется. Свѣти́льны: Игна́тія, Іоа́нна и предпра́зднства. Хвали́тны: предпра́зднства 4, Іоа́нна 4. Сла́ва: Игна́тія. И ны́нѣ: предпра́зднства. Славосло́віе вели́кое. Тропа́рь свята́го пра́веднаго Іоа́нна. Сла́ва, и ны́нѣ: предпра́зднства.

На литургíи: блаже́нна предпра́зднства пѣ́cнь 3 и пра́веднаго Іоа́нна пѣ́снь 6.

20-го Деке́мврія, а́ще недѣ́ля, или́ а́ще изво́литъ настоя́тель, соверша́ется слу́жба то́кмо предпра́зднства и свята́го пра́веднаго Іоа́нна со слу́жбою воскре́сною по главѣ́ слу́жбы свята́го Петра́ Митрополи́та 21-го Деке́мврія. Слу́жба же священному́ченика Игна́тія соверша́ется 19-го Деке́мврія со слу́жбою свята́го му́ченика Вонифа́тія.

Та́кожде 19-го Окто́врія мо́жетъ соверша́тися слу́жба то́кмо свята́го пра́веднаго Іоа́нна по главѣ́ свята́го Апо́стола Іоа́нна Богосло́ва 26-го Септе́мврія, я́коже и па́мять преподо́бнаго Се́ргія Ра́донежскаго 25-го Септе́мврія соверша́ется, а святы́хъ ины́хъ пѣ́ти слу́жбы, егда́ настоя́тель изво́литъ. Оба́че а́ще хра́мъ е́сть преподо́бнаго Іоа́нна Ры́льскаго, не до́лжно слу́жбу его́ оставля́ти или́ на ины́й де́нь преноси́ти, но обои́мъ святы́мъ, я́ко духо́вно еди́нымъ пѣ́ти слу́жбы до́лжно е́сть.

Источникъ: Слу́жба и Ака́ѳистъ Свято́му Отцу́ на́шему Іоа́нну Кроншта́дтскому чудотво́рцу. — Jordanville: Типогра́фія преп. Іова Поча́евскаго, 1966. — Л. 3-15.

/ Къ оглавленію раздѣла /


Наверхъ / Къ титульной страницѣ

0