Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 11 декабря 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 19-й де́нь.
Пренесе́ніе моще́й преподо́бнаго и богоно́снаго отца́ на́шего Іоа́нна, пустынножи́теля Ры́льскаго, чудотво́рца.

НА МАЛѢЙ ВЕЧЕРНИ,
На Го́споди воззва́хъ.., поста́вимъ стихо́въ 4 и пое́мъ стихи́ры, гла́съ 8. Подо́бенъ: О, пресла́внаго чудесе́!

Любе́знѣ Влады́цѣ послѣ́довалъ еси́,* отъ млады́хъ ногте́й Того́ соверша́я повелѣ́нія,* и, благода́тію па́че* не́жели млеко́мъ воспита́нъ,* возра́слъ еси́ въ цѣлому́дріи и чистотѣ́,* и, въ до́мъ Бо́жій приходя́ и поуча́яся,* Христа́ обрѣ́лъ еси́,* Іоа́нне преблаже́нне,* Его́же моли́, да спасе́тъ ду́ши на́ша, я́ко Милосе́рдъ.

Поще́ніемъ и бдѣ́ніемъ* у́мъ сво́й очи́стивъ,* возше́лъ еси́ на высоту́ небе́сную* лѣ́ствицею добродѣ́телей,* и, въ сла́вѣ со а́нгелы при́сно водворя́яся,* на враги́ небе́сную побѣ́ду на́мъ испроси́* у Царя́ вѣко́въ, Христа́ Бо́га на́шего,* Іоа́нне преблаже́нне,* Его́же моли́, да спасе́тъ ду́ши на́ша, я́ко Милосе́рдъ.

Весели́ся, пусты́не Ры́льская,* пріе́мши въ себѣ́ свѣти́ло мы́сленное,* свѣтолу́чными сія́ніи ве́сь мíръ просвѣща́ющее* и чудесы́ лю́ди ко Христу́ приводя́щее,* исцѣле́ній бо оби́льно пото́ки излива́етъ* и болѣ́зни вся́ исцѣля́етъ.* Но моли́ся Христу́ Бо́гу,* Іоа́нне преблаже́нне,* да спасе́тъ ду́ши на́ша, я́ко Милосе́рдъ.

Сла́ва, гла́съ 6:

Гла́са послу́шавъ Влады́чня, преподо́бне Іоа́нне, Спа́су глаго́лющу: и́же хо́щетъ вслѣ́дъ Мене́ ити́, да отве́ржется себе́ и, кре́стъ сво́й взе́мъ, да послѣ́дуетъ Мнѣ́; оста́вилъ еси́ житіе́ тлѣ́нное и самаго́ себе́ сраспя́лъ еси́, я́ко па́стырю овца́, Христу́ послѣ́довалъ еси́ и въ Еде́мскую па́жить, ра́дуяся, всели́лся еси́.

И ны́нѣ, богоро́диченъ:

Не ввѣ́ри на́съ человѣ́ческому предста́тельству, Пресвята́я Влады́чице, но пріими́ моле́ніе рабо́въ Твои́хъ. Ско́рбь бо одержи́тъ ны́, терпѣ́ти не мо́жемъ де́монскаго стрѣля́нія, покро́ва не и́мамы, ниже́ гдѣ́ прибѣ́гнемъ, окая́нніи, всегда́ побѣжда́еми, и утѣше́нія не и́мамы, ра́звѣ Тебе́, Влады́чице мíра, упова́ніе и предста́тельство вѣ́рныхъ, не пре́зри моле́нія на́шего, но поле́зно сіе́ сотвори́.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Яви́лся еси́* отъ ма́тернихъ пеле́нъ* освяще́нъ сосу́дъ,* богоно́се Іоа́нне,* и до́мъ Пресвята́го Ду́ха.

Сти́хъ: Честна́ предъ Го́сподемъ* сме́рть преподо́бныхъ Его́.

Ле́сти лука́выхъ бѣсо́въ* посрами́лъ еси́* си́лою кре́стною* и уясни́лъ еси́ сла́ву Христо́ву,* о́тче Іоа́нне.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Взя́тъ бы́лъ еси́,* я́коже Илія́,* на колесни́цѣ добродѣ́телей* и преше́лъ еси́ нехода́тайственнѣ къ Тро́ицѣ,* Іоа́нне всему́дре.

Сла́ва и ны́нѣ, богоро́диченъ, гла́съ и подо́бенъ то́йже:

Горѣ́ Тя ли́цы* а́нгельстіи, Дѣ́во,* пою́тъ съ до́льними,* сла́вяще непреста́нно* Рождество́ Твое́ пречи́стое.

Тропа́рь преподо́бнаго, гла́съ 1:

Покая́нія основа́ніе,* прописа́ніе умиле́нія,* о́бразъ утѣше́нія,* духо́внаго соверше́нія* равноа́нгельное житіе́ твое́ бы́сть, преподо́бне.* Въ моли́твахъ у́бо и въ поще́ніихъ* и въ слеза́хъ пребыва́вый,* о́тче Іоа́нне,* моли́ Христа́ Бо́га* о душа́хъ на́шихъ.

Сла́ва и ны́нѣ, богоро́диченъ:

Гавріи́лу вѣща́вшу Тебѣ́, Дѣ́во, ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ.

И отпу́стъ.



НА ВЕЛИЦѢЙ ВЕЧЕРНИ,
Пе́рвыя каѳи́смы пе́рвый антифо́нъ: Блаже́нъ му́жъ... На Го́споди воззва́хъ.., поста́вимъ стихо́въ 8 и пое́мъ стихи́ры, гла́съ 1. Подо́бенъ: Небе́сныхъ чино́въ.

Въ по́стницѣхъ возсія́вшаго преобразова́ніе,* пусты́нное воспита́ніе,* Ры́льскаго свѣти́льника* словесы́ и пѣ́сньми,* вси́ вѣ́рніи, да восхва́лимъ,* зову́ще и глаго́люще:* ра́дуйся, вели́кая сла́во,* я́же въ на́ша дни́ яви́ся,* Іоа́нне преблаже́нне.

Всю́ наде́жду возложи́въ Творцу́ твоему́ и Бо́гу,* самаго́ себе́ приве́лъ еси́ Влады́цѣ,* Иже, нѣ́дра отве́рзъ, млеко́мъ тя́ воспита́* ду́шу пита́ющихъ писа́ній* и небе́снаго Ца́рствія наслѣ́дника тя́ сотвори́,* всѣ́ми вѣ́рными почита́ема,* Іоа́нне преблаже́нне. [Два́жды.]

Ра́дуешися, ви́дѣвъ соверше́ніе трудо́въ твои́хъ,* и́хже бо о́ко не ви́дѣ,* ни у́хо слы́ша,* добро́ты ра́йскія воспрія́лъ еси́,* свѣ́тлое воздая́ніе* подвиго́въ твои́хъ,* и ра́ка твоя́ на земли́* благода́ть источа́етъ,* тѣ́ло твое́ неруши́мо иму́щи,* Іоа́нне преблаже́нне.

Ины стихи́ры, гла́съ 4: Подо́бенъ: Свы́ше зва́нный.

Заря́ми Ду́ха просвѣти́вся,* егда́ тя́ Боже́ственное жела́ніе распали́* и ду́шу впери́* Того́ вожделѣ́ти любве́ вои́стину крѣпча́йше,* тогда́ преоби́дѣлъ еси́ пло́ть и кро́вь,* и внѣ́ мíра изше́лъ еси́,* мно́гимъ воздержа́ніемъ и безмо́лвіемъ Сему́ соединя́яся.* Тѣ́мже испо́лнился еси́ отту́ду благи́хъ,* я́коже проси́лъ еси́,* и просія́лъ еси́, я́ко звѣзда́,* озаря́я ду́ши на́ша, Іоа́нне. [Два́жды.]

Бѣсо́въ лука́выхъ стрѣ́лы сокруши́лъ еси́* благода́тію Боже́ственною* и ловле́нія и́хъ всѣ́мъ уясни́лъ еси́* уче́ньми твои́ми;* Ду́ха же сія́ньми облиста́емь,* мона́шествующихъ богоза́ренъ свѣти́льникъ яви́лся еси́,* и пусты́ни Ры́льскія пе́рвое украше́ніе,* и боля́щихъ иску́снѣйшій безме́здный вра́чь,* и добродѣ́тельнаго житія́* первообра́зное начерта́ніе, Іоа́нне.

Свѣтода́тельными заря́ми исцѣле́ній* ты́ пресла́вно просвѣща́еши подсо́лнечную,* неду́говъ отгоня́я тму́ глубо́кую;* тѣ́мже тя́ со́лнце друго́е познава́емъ,* и и́ноковъ утвержде́ніе,* и наста́вника спаса́емыхъ Боже́ственнымъ Ду́хомъ.* И ны́нѣ па́мять твою́ соверша́емъ* свѣ́тлую и спаси́тельную,* прегрѣше́ній разрѣше́ніе тобо́ю пріе́млюще, Іоа́нне.

Сла́ва, гла́съ 6:

Пріиди́те, правосла́вныхъ собо́ри, духо́внѣ возра́дуимся дне́сь, идѣ́же богому́дрый Іоа́ннъ, въ па́мять свою́ собра́лъ ны́ е́сть, къ нему́ вопію́щихъ: ра́дуйся, пусты́нная красото́ и а́нгеловъ совсе́льниче; ра́дуйся, Ры́льская похвало́ и бо́лгаромъ сограждани́не; не преста́й моля́ся Христу́ Бо́гу о и́же вѣ́рою и любо́вію почита́ющихъ присночестну́ю и всепра́зднственную па́мять твою́.

И ны́нѣ, богоро́диченъ, пе́рвый гла́са:

Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.

Вхо́дъ. Проки́менъ дне́ и паримíи три́ преподо́бнымъ.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры самогла́сны, гла́съ 2:

Воздержа́тельное обуче́ніе на земли́ собра́въ, преподо́бне о́тче Іоа́нне, и страсте́й прило́ги вся́ угаси́въ тече́ніемъ сле́зъ твои́хъ, лѣ́ствица боже́ственная и честна́я, на не́бо возводя́щая, всѣ́мъ яви́ся богопрія́тное житіе́ твое́; благоче́стія бо плоды́ показу́я, исцѣля́еши не́мощи страсте́й вѣ́рно тебѣ́ вопію́щихъ: ра́дуйся, восто́ка звѣздо́ свѣтоза́рная и мона́шествующихъ до́брый па́стырю; ра́дуйся, пресла́вное пусты́ннымъ овца́мъ крѣ́пкое огражде́ніе и Це́ркве честно́е утвержде́ніе; ра́дуйся, заблу́ждшимъ вели́кій наста́вниче и вселе́ннѣй свѣ́тлое ра́дованіе.

Земна́го а́нгела и небе́снаго человѣ́ка, мíрови благоукраше́ніе, сла́дость добродѣ́телей и наслажде́ніе благи́хъ, по́стниковъ похвалу́, Іоа́нна почти́мъ, насажде́нъ бо въ дому́ Бо́жіи пра́ведно, я́ко ке́дръ въ пусты́ни, умно́жи ста́до Христо́выхъ ове́цъ въ преподо́біи и пра́вдѣ.

Гла́съ 4:

Возсія́ дне́сь пресвѣ́тлая па́мять твоя́, богому́дре Іоа́нне, насъ созыва́ющи къ похвале́нію Христа́ Бо́га на́шего. Тѣ́мже притека́юще къ ра́цѣ моще́й твои́хъ и исцѣле́нія да́ры пріе́млюще, Спа́са, тя́ просла́вльшаго, воспѣва́емъ во вѣ́ки.

Чи́стый душе́ю и се́рдцемъ, а́нгеле земны́й и человѣ́че небе́сный, дѣ́вства учи́телю и воздержа́нія извѣ́стное мѣ́рило, Іоа́нне блаже́нне, живы́й съ Влады́кою твои́мъ и немо́лчное славосло́віе со а́нгелы и преподо́бными Тому́ принося́, творя́щія твою́ свяще́нную па́мять спаса́й непреста́нными моли́твами твои́ми.

Гла́съ 5:

Преподо́бне о́тче Іоа́нне, ты́ вои́стинну яви́лся еси́ по́стникомъ похвала́, крѣ́пость Правосла́вію и вселе́ннѣй свѣти́ло незаходи́мое, льсти́ваго врага́ не убоя́вся и устраше́ній его́ не смути́вся, но благода́тію Боже́ственною прему́дренно попра́лъ еси́ всю́ ле́сть его́, отъ нея́же и на́съ изба́ви, мо́лимъ тя́.

Сла́ва, гла́съ 5:

Ра́дуйся, пусты́нное украше́ніе, благоуха́нія вселе́нную исполня́ющее, и го́ру Ры́льскую пѣ́ніемъ оглаша́ющее, и Це́рковь Бо́лгарскую вѣнча́ющее, а́нгеломъ бо бы́лъ еси́ сожи́тель, полко́въ бѣсо́вскихъ прогони́тель, ересе́й же разори́тель и вся́кія ле́сти изъ ко́рене потреби́тель. Тѣ́мже въ вы́шнее всели́вся жили́ще, преподо́бне о́тче Іоа́нне, Христу́ Бо́гу моли́ся дарова́ти душа́мъ на́шимъ ми́ръ и ве́лію ми́лость.

И ны́нѣ, богоро́диченъ:

Хра́мъ и Две́рь еси́, Пала́та и Престо́лъ Царе́въ, Дѣ́во всечестна́я, Еюже Изба́витель мо́й, Христо́съ Госпо́дь, во тмѣ́ спя́щимъ яви́ся, Со́лнце сы́й пра́вды, просвѣти́ти хотя́, я́же созда́ по о́бразу Своему́ руко́ю Свое́ю. Тѣ́мже, Всепѣ́тая, я́ко Ма́терне дерзнове́ніе къ Нему́ стяжа́вшая, непреста́нно моли́, спасти́ся душа́мъ на́шимъ.

На стихо́внѣ стихи́ры, гла́съ 8. Подо́бенъ: О, пресла́внаго чудесе́!

Преподо́бне о́тче Іоа́нне,* ты́ я́же на земли́ су́етная оста́вивъ,* Христу́ Бо́гу твоему́ усе́рдно послѣ́довалъ еси́,* не предпоче́тъ тлѣ́нныхъ па́че пребыва́ющихъ;* въ пусты́ни же, я́коже во гра́дѣ, живы́й,* де́монскія полки́ побѣди́лъ еси́.* О, кто́ возмо́глъ бы изрещи́* твоея́ души́ вои́стину пламенѣ́ющую теплоту́* я́же ко Го́споду, присносла́вне?

Сти́хъ: Честна́ предъ Го́сподемъ* сме́рть преподо́бныхъ Его́.

Преподо́бне о́тче Іоа́нне,* ты́ вои́стину яви́лся еси́* пра́вило избра́нное мона́шествующихъ,* и правосла́вныхъ услажде́ніе,* и всея́ вселе́нныя свѣти́льникъ;* врага́ бо лука́ваго не ужаси́лся еси́ страхова́ній,* въ пеще́рѣ живы́й.* О, дарова́нія Ду́ха су́щаго въ тебѣ́,* и́мже вся́кое попра́лъ еси́ де́моновъ кова́рство, присноблаже́нне!

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Преподо́бне о́тче Іоа́нне,* ты́ вои́стину ко Го́споду Бо́гу твоему́* ду́шу твою́ крѣ́пцѣ впери́лъ еси́* и поще́ніемъ чу́вства очи́стилъ еси́,* и непреста́нными твои́ми моли́твами* безсме́ртныя жи́зни сподо́бился еси́.* О, удобре́нія по́стниковъ,* его́же Христо́съ, ра́дующася, прія́тъ преи́скреннѣ* въ невеще́ственныя оби́тели, богому́дре!

Сла́ва, гла́съ 4:

Пусты́нное возлюби́въ житіе́ и а́нгельское воспріи́мъ служе́ніе, мíра возненави́дѣлъ еси́ ле́сть вре́менную и яви́лся еси́ Це́ркве свѣти́ло пресвѣ́тлое, а́нгеломъ соприча́стникъ и пусты́ннымъ боже́ственное украше́ніе, скорбя́щимъ ра́дость, немощны́мъ исцѣле́ніе и всѣ́мъ вѣ́рнымъ спасе́ніе. Но моли́ся Христу́ Бо́гу, всеблаже́нне Іоа́нне, ми́ръ вселе́ннѣй дарова́ти и душа́мъ на́шимъ ве́лію ми́лость.

И ны́нѣ, богоро́диченъ:

При́зри на моле́нія Твои́хъ ра́бъ, Всенепоро́чная, утоля́ющи лю́тая на ны́ воста́нія, вся́кія ско́рби на́съ измѣня́ющи, Тя́ бо еди́ну тве́рдое и извѣ́стное утвержде́ніе и́мамы, и Твое́ предста́тельство стяжа́хомъ, да не постыди́мся, Влады́чице, Тя́ призыва́ющіи, потщи́ся на умоле́ніе Тебѣ́ вѣ́рно вопію́щихъ: ра́дуйся, Влады́чице, всѣ́хъ по́моще, ра́досте и покро́ве, и спасе́ніе ду́шъ на́шихъ.

На благослове́ніи хлѣ́бовъ: Тропа́рь преподо́бнаго, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь преподо́бнаго, два́жды. [Сла́ва, и ны́нѣ], богоро́диченъ.

По 1-мъ стихосло́віи сѣда́ленъ, гла́съ 4. Подо́бенъ: Вознесы́йся на кре́стъ.

Зва́нію Го́спода твоего́ послѣ́довавъ,* мíръ оста́вилъ еси́ и вся́ мíра прекра́сная,* преблаже́нне о́тче Іоа́нне,* претерпѣ́лъ же еси́ усе́рдно* озлобле́ніе пусты́нное* и му́жески отрази́лъ еси́* полки́ бѣсо́вскія.* Тѣ́мже при́сно твою́ па́мять* пѣ́сньми восхваля́емъ вѣ́рно. [Два́жды.]

Сла́ва и ны́нѣ, богоро́диченъ, гла́съ и подо́бенъ то́йже:

Обнови́ла еси́, Чи́стая, Боже́ственнымъ Рождество́мъ Твои́мъ истлѣ́вшее страстьми́ земноро́дныхъ ме́ртвенное существо́ и возвела́ еси́ вся́ отъ сме́рти къ жи́зни нетлѣ́ннѣй. Тѣ́мже Тя́ по до́лгу восхваля́емъ вси́, Дѣ́во Препросла́вленная, я́коже прорекла́ еси́.

По 2-мъ стихосло́віи сѣда́ленъ, гла́съ 5. Подо́бенъ: Собезнача́льное Сло́во.

Пресе́льникъ бы́въ отъ земли́ оте́чества твоего́* и любо́вь всю́ земну́ю оста́вивъ,* на го́ру возше́лъ еси́* и до небе́съ возвы́сился еси́ [я́ко] сто́лпъ,* человѣ́ки наставля́яй на пу́ть спасе́нія.* Тѣ́мже и всели́лся еси́ въ зе́млю кро́ткихъ,* Іоа́нне преподо́бне, о́тче на́шъ. [Два́жды.]

Сла́ва и ны́нѣ, богоро́диченъ, гла́съ и подо́бенъ то́йже:

Стра́нное Дѣ́вы та́инство мíрови яви́ся спасе́ніе, изъ Нея́же роди́ся Бо́гъ безъ сѣ́мене и пло́тію показа́ся кромѣ́ тлѣ́нія. Всѣ́хъ ра́досте, Го́споди, сла́ва Тебѣ́!

[Велича́ніе:

Ублажа́емъ тя́, преподо́бне о́тче Іоа́нне, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ. Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 8. Подо́бенъ: Прему́дрость и Сло́во.

Па́стырскую хи́трость воспри́мъ, разу́мнѣ упа́слъ еси́ ста́до твое́, преподо́бне, Христо́ва бо вседу́шно вожделѣ́лъ еси́ уче́нія, въ не́мже просвѣти́лся еси́ и къ ре́вности а́нгельскаго житія́ всѣ́хъ воздви́глъ еси́ единому́дренно прославля́ти Го́спода, богоно́се Іоа́нне, моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва и ны́нѣ, богоро́диченъ, гла́съ и подо́бенъ то́йже:

Пречи́стая Дѣ́во, Ма́ти Бо́жія, души́ моея́ стра́сти лю́тыя исцѣли́, молю́ся, и проще́ніе да́руй мои́хъ прегрѣше́ній, я́же безу́мнѣ содѣ́яхъ, ду́шу и тѣ́ло оскверни́хъ, окая́нный. Увы́ мнѣ́, что́ сотворю́ въ ча́съ о́нъ, внегда́ а́нгели ду́шу мою́ разлуча́тъ отъ стра́стнаго моего́ тѣлесе́? Тогда́ Помо́щница ми́ бу́ди и Предста́тельница теплѣ́йша, Тя́ бо и́мамъ наде́жду, ра́бъ Тво́й.

Та́же степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподомъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе отъ Матѳе́я, зача́ло 43: Вся́ Мнѣ́ предана́ су́ть... и бре́мя Мое́ легко́ е́сть.

По 50-мъ псалмѣ́ стихи́ра самогла́сна, гла́съ 6:

Возсія́ дне́сь пресвѣ́тлое торжество́ честны́я па́мяти твоея́, богому́дре о́тче Іоа́нне, и́же отъ младе́нства Бо́гу прилѣпи́вся и Того́ стопа́мъ послѣ́довавъ, мірскíй мяте́жъ, а́ки ну́ждное волне́ніе, преплы́лъ еси́ и въ Ца́рство небе́сное дости́глъ еси́. Тѣ́мже покланя́ющеся моще́мъ твои́мъ, вѣ́рно Христа́ славосло́вимъ, да́вшаго тя́ на́мъ те́пла о на́съ моли́твенника, чту́щихъ любо́вію честну́ю па́мять твою́.

Кано́нъ [Богоро́дицы, со ирмосо́мъ на 6 и] преподо́бному [на 8], гла́съ 8, его́же краегране́сіе: Ра́дуйся Іоа́нне, свѣти́льниче пресвѣ́тлый.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Разу́мный свѣ́тъ му́дрости возсія́й ми́ ны́нѣ, молю́ся ти́, преподо́бне о́тче, пѣ́ти начина́ющу ми́ твое́ честно́е житіе́, и Боже́ственныя благода́ти испо́лни уста́ моя́.

Ангелу подо́бяся вои́стину, удали́лся еси́ всѣ́хъ я́же въ мíрѣ и, бѣжа́въ тѣ́ломъ и душе́ю, водвори́лся еси́ въ пусты́ни, я́коже Моисе́й боговидѣ́нія, бога́тно наслажда́яся.

Дово́льно исто́чника пи́въ Ева́нгельскаго во́дъ оби́льныхъ, изъ чре́ва ны́нѣ рѣ́ки чуде́съ источа́еши, преподо́бне Іоа́нне, и напая́еши вѣ́рою къ тебѣ́ притека́ющія.

Богоро́диченъ: Утро́бу Твою́ обита́ Бо́гъ Сло́во, Дѣ́во Чи́стая, я́коже ка́пля соше́дъ, ка́плющая на зе́млю и естество́ человѣ́ческое, пла́менемъ зло́бы горѣ́вшее, обнови́ ороше́ніемъ.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Испо́лнь Ду́ха и у́мъ на не́бо просте́ръ, о тлѣ́ннѣй пи́щи не попе́клся еси́, но хлѣ́бомъ а́нгельскимъ пита́лся еси́.

Струя́ми сле́зъ твои́хъ зе́млю пусты́нную напои́лъ еси́ и пло́дъ приноси́ти тебѣ́ слану́тка неора́нно утучни́лъ еси́.

Яко птене́цъ, къ Бо́гу возлетѣ́ти жела́я, преподо́бне о́тче, гнѣздо́ себѣ́ въ дре́вѣ сотвори́лъ еси́, отъ земны́хъ облегчи́вся.

Богоро́диченъ: Іису́са, Сы́на Твоего́, ми́лостива мнѣ́ сотвори́, зло́е творя́щему, Пречи́стая, во е́же не ви́дѣти ми́ Того́ лице́ отвраща́юща.

Сѣда́ленъ, гла́съ 6. Подо́бенъ: Милосе́рдія две́ри.

По́стническія по́двиги поне́слъ еси́* и страда́льческимъ вѣнце́мъ увяза́лся еси́,* съ безпло́тными бо враги́ въ тѣлеси́ боря́ся* и во́инства и́хъ низлага́я,* удиви́лъ еси́ терпѣ́ніемъ твои́мъ а́нгелы,* и́хже житію́ во пло́ти поревнова́лъ еси́.* Но моли́ся Христу́ Бо́гу,* о́тче Іоа́нне, спасти́ся на́мъ. [Два́жды.]

Сла́ва и ны́нѣ, богоро́диченъ:

Милосе́рдія две́ри отве́рзи на́мъ, Благослове́нная Богоро́дице, надѣ́ющіися на Тя́ да не поги́бнемъ, но да изба́вимся Тобо́ю отъ бѣ́дъ, Ты́ бо еси́ спасе́ніе ро́да христіа́нскаго.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Обрѣ́лъ еси́ Бо́га утвержде́нна на версѣ́ боже́ственныя лѣ́ствицы добродѣ́телей, е́юже возше́дъ, почи́лъ еси́ отъ трудо́въ и болѣ́зней.

Агня́ тя́ до́браго Па́стыря, въ горѣ́ кры́ющееся, преподо́бне о́тче, яви́ша овча́та, отъ своея́ огра́ды убѣжа́вшая.

На тя́ наше́дшіи па́стыріе всѣ́мъ проповѣ́даша стра́нное терпѣ́ніе твое́ и Бо́гу въ вы́шнихъ сла́ву возсыла́ху.

Богоро́диченъ: Неневѣ́стная Ма́ти, Тобо́ю увѣ́дана бы́ша ше́ствія Бо́га на́шего, отъ Твои́хъ пречи́стыхъ крове́й пріи́мшаго человѣ́чество.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Ели́цы боголюби́віи, преподо́бне о́тче, глаго́ловъ послу́шающе па́стырскихъ, на видѣ́ніе твое́ въ пусты́ню прихожда́ху.

Сла́ва твоя́ дале́че су́щія къ тебѣ́ созыва́ше, я́коже гла́съ въ пусты́ни вопію́щаго всю́ду пронося́щися.

Въ дре́вѣ уедини́вся, я́коже пти́ца, преблаже́нне о́тче, оправда́нія Бо́жія дѣ́лая, не почива́лъ еси́, ниже́ Го́сподеви моля́ся.

Богоро́диченъ: Еди́наго въ Тебѣ́, я́коже въ глави́знѣ кни́жнѣй напи́саннаго, Бо́га поноси́вши, Чи́стая, въ пра́ведныхъ мя́ кни́зѣ напиши́.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Твори́ши дѣла́ Ѳесви́тянина Иліи́, преподо́бне о́тче: ма́лымъ бо хлѣ́бомъ мно́гихъ пита́еши и въ сы́тость чу́домъ корми́ши.

Изво́лиша мно́зи съ тобо́ю жи́ти, блаже́нне, мíра сего́ преоби́дѣвше сла́дость и твоему́ началообра́зному поревнова́вше житію́.

Лече́бную си́лу отъ Бо́га пріи́мъ, слѣпы́мъ свѣ́тъ дае́ши, глухи́мъ слы́шаніе, хромы́мъ хожде́ніе и всѣ́мъ вѣ́рою приходя́щимъ здра́віе.

На главу́ твою́ мѵ́ро сни́де и на браду́ твою́ ма́сло ра́дости, е́же свѣщу́ се́рдца твоего́ неугаси́му соблюде́, преподо́бне.

Богоро́диченъ: Избра́нная Агнице Чи́стая, Льва́ стра́шнаго ро́ждшая, и Агнецъ бы́вшаго, и на заколе́ніе безгла́сна приведе́ннаго, и беззако́нія моя́ на Ся́ воспріи́мшаго.

Конда́къ, гла́съ 8. Подо́бенъ: Взбра́нной Воево́дѣ.

Ангельскому житію́ поревнова́въ, преподо́бне,* вся́ земна́я оста́вивъ, ко Христу́ прите́клъ еси́* и, Того́ за́повѣдьми огражда́яся,* яви́лся еси́ сто́лпъ непоколеби́мь отъ вра́жіихъ нападе́ній.* Тѣ́мъ зове́мъ ти́:* ра́дуйся, о́тче Іоа́нне, свѣти́ло пресвѣ́тлое.

Икосъ:

Въ словесѣ́хъ и дѣ́лѣхъ на земли́ возсія́вшаго и Спа́сово уче́ніе соверши́вша, земна́го а́нгела и небе́снаго человѣ́ка, Іоа́нна сла́внаго, соше́дшеся, похва́лимъ, вси́ вѣ́рніи, си́це пою́ще и къ нему́ глаго́люще: ра́дуйся, Среде́чское прозябе́ніе; ра́дуйся, пусты́нное воспита́ніе; ра́дуйся, отъ ю́ности Бо́га возлюби́вый; ра́дуйся, вся́ всего́ мíра ни во что́же вмѣни́вый; ра́дуйся, и́же высо́кое житіе́ по́стническими труды́ показа́вый; ра́дуйся, злоко́зненнаго змíя копіе́мъ терпѣ́нія твоего́ низложи́вый; ра́дуйся, на гора́хъ, я́ко со́лнце, возсія́вый; ра́дуйся, го́ры и хо́лмы благоуха́нія испо́лнивый; ра́дуйся, гра́ды и ве́си просвѣти́вый чудесы́; ра́дуйся, вся́ стра́ны озари́вый добродѣ́тельми; ра́дуйся, ста́ду твоему́ тве́рдое огражде́ніе; ра́дуйся, благочести́вымъ побѣ́дное вѣнча́ніе. Ра́дуйся, о́тче Іоа́нне, свѣти́ло пресвѣ́тлое.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Честну́ю це́рковь воздви́глъ еси́, я́коже огра́ду овца́мъ, себе́ це́рковь жи́ву сотвори́въ, Го́сподеви поя́: отце́въ Бо́же, благослове́нъ еси́.

Еже мíру распя́тіе претерпѣ́въ и я́же на земли́ у́ды умертви́въ, нектому́ ты́ жи́лъ еси́, но Христо́съ въ тебѣ́, Ему́же взыва́лъ еси́: отце́въ Бо́же, благослове́нъ еси́.

Пра́вило души́ твоея́ разруши́ти не возмого́ша ни по́тове, ниже́ болѣ́зни, ни тѣле́сное изможде́ніе, ни ста́рость претружде́нная, но Влады́ки твоего́ жела́я, неуста́нно взыва́лъ еси́: отце́въ Бо́же, благослове́нъ еси́.

Богоро́диченъ: Руно́ ороше́нное, Дѣ́во, пла́мень грѣхо́въ мои́хъ угаси́, купино́ неопали́мая, страсте́й мои́хъ те́рніе попали́, подаю́щи ми́ на водѣ́ жи́ти упокое́нія и гее́нскаго мя́ огня́ свобожда́ющи.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Егда́, со́лнце пресвѣ́тлое, на за́падѣ жи́зни земны́я себе́ уразумѣ́лъ еси́, ученики́ наказа́въ и во стра́сѣ Бо́жіи утверди́въ, возвѣсти́лъ еси́ болѣ́зней твои́хъ возме́здіе и, ра́дуяся, ду́хъ тво́й Го́сподеви пре́далъ еси́.

Сме́рть не лиши́ тѣлесе́ твоего́ живу́щія въ тебѣ́ благода́ти Боже́ственныя, но, преше́дшимъ дне́мъ четы́редесятымъ, са́мъ явля́ешися, и въ зе́млю погребсти́ тя́ повелѣва́еши, и чуде́съ струи́ источа́еши.

Ви́дяще пучи́ну чуде́съ твои́хъ, хра́мъ тво́й сокро́вище проразумѣва́емъ многоцѣ́нное: вси́ бо, неду́гомъ одержи́міи, въ то́й притека́юще, ско́ро отъ гро́ба твоего́ здра́віе пріе́млютъ, тя́, просла́вльшаго Бо́га, сла́вяще.

Богоро́диченъ: Еще́ свѣтлѣ́е свѣ́та со́лнечнаго проразумѣва́емъ дѣ́вства Твоего́ свѣ́тлое сія́ніе, Пречи́стая: Свѣ́та бо безлѣ́тнаго и со́лнцу Творца́ во чре́вѣ Твое́мъ имѣ́ла еси́, изъ Тебе́ возсія́вшаго и тму́ пре́лести разгна́вшаго, и ве́сь мíръ свѣ́томъ богоразу́мія просвѣти́вшаго.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Тѣ́ло твое́ честно́е во гро́бѣ положе́нное — разрѣ́шшуся соу́зу есте́ственному и тебѣ́ Бо́гу ду́хъ преда́вшу — облагоуха́етъ вся́ приходя́щія и Бо́га прославля́етъ чудесы́, Іоа́нне преблаже́нне.

Ли́ку мона́шествующихъ и мно́жеству вѣ́рныхъ те́плый обрѣта́ешися засту́пникъ, и́же зло́бу разруша́яй и проше́нія исполня́яй. Бо́гъ бо возвели́чи тя́, при́снаго раба́ Своего́, человѣ́ки и скоты́ тобо́ю исцѣля́я.

Испо́лни се́рдца моего́ жела́ніе, чуде́съ исто́чниче: да́руй ми́ благода́ть твою́, отъ вся́каго искуше́нія мя́ избавля́я, на судѣ́ же гряду́щемъ во Еде́мстѣй мя́ всели́ па́жити моли́твами твои́ми, отъ горя́ща се́рдца тебѣ́ пѣ́снь прине́сшаго.

Богоро́диченъ: Изря́дно предочи́стившися во свята́я святы́хъ вселе́ніемъ и а́нгельскою руко́ю пита́ніемъ, человѣ́комъ Бо́га породила́ еси́, отъ Твои́хъ Пречи́стыхъ крове́й пло́ть пріи́мшаго и я́коже пре́жде рождества́ Дѣ́ву Тя́ соблю́дшаго.

Свѣти́ленъ, гла́съ 2. Подо́бенъ: Жены́ услы́шите.

Ра́дуйся, пусты́не Ры́льская, весели́ся, и́ноковъ сосло́віе. Пріиди́те, вси́ вѣ́рніи, ра́ку обступи́вше преподо́бнаго, то́ки пролива́ющую исцѣле́ній, пѣ́сненными похвала́ми воззове́мъ къ нему́, глаго́люще: ра́дуйся, Среде́чское прозябе́ніе и пусты́ни до́брое воспита́ніе. [Два́жды.]

Сла́ва и ны́нѣ, богоро́диченъ:

Непроходи́мую две́рь еди́ную, плодови́тую ма́слину, кади́льницу всезлату́ю, Боже́ственный о́гнь нося́щую, ста́мну небе́сныя ма́нны и свѣтоно́сный о́блакъ, Богоро́дицу святу́ю вси́ просла́вимъ.

На хвали́техъ сти́хиры [на 4], гла́съ 4. Подо́бенъ: Зва́нный свы́ше.

Ми́лости ра́ди мно́гія* и безмѣ́рнаго благоутро́бія* ро́дъ человѣ́ческій спасти́ восхотѣ́вшаго* глаго́лы послу́шалъ еси́, всеблаже́нне,* и о су́етныхъ небре́глъ еси́,* но вско́рѣ зе́млю оста́вилъ еси́ оте́чества твоего́,* и сро́дникъ сожи́тельство* и вре́менное наслажде́ніе,* и стопа́мъ послѣ́довалъ еси́ Христа́ Бо́га на́шего,* Его́же моли́ спасти́* и просвѣти́ти ду́ши на́ша.

Ничто́же возмо́же тя́ разлучи́ти* отъ любве́ Христо́вы, всеблаже́нне:* ни мірско́е украше́ніе,* ни оте́ческое стяжа́ніе,* ни бли́жнихъ пристра́стіе,* ни су́етная сла́ва,* но сія́ вся́ ни во что́же вмѣни́въ,* я́коже еле́нь, распали́лся еси́ жа́ждею* и поте́клъ еси́ на исто́чникъ воды́ живы́я Христа́ Бо́га на́шего,* Его́же моли́ спасти́* и просвѣти́ти ду́ши на́ша.

Избра́ тя́ Госпо́дь во святы́хъ изря́дна,* и въ по́стницѣхъ преподо́бна,* и въ рабѣ́хъ вѣ́рныхъ тала́нтъ возрасти́вша,* тѣ́мже ны́нѣ ду́хъ тво́й весели́тся* въ ра́дости Го́спода твоего́,* честно́е же тѣ́ло твое́ на́мъ предлежи́тъ,* воню́ благоуха́нія испуща́ющее* и цѣльбы́ подаю́щее благода́тію Христа́ Бо́га на́шего,* Его́же моли́ спасти́* и просвѣти́ти ду́ши на́ша.

Разу́мной души́ покори́лъ еси́* стра́сти тѣле́сныя воздержа́ніемъ* и, безстра́стія кри́лы укра́шенъ,* благода́ть прія́лъ еси́* человѣ́ковъ не́мощи цѣли́ти* и духо́въ лука́вствія прогоня́ти.* Тѣ́мже ли́цы блажа́ще тя́ и́ночествующихъ* и вѣ́рныхъ собо́ри, твою́ па́мять пра́зднующе,* воспѣва́емъ просла́вльшаго тя́ Христа́, Бо́га на́шего,* Его́же моли́ спасти́* и просвѣти́ти ду́ши на́ша.

Сла́ва, гла́съ 8:

Христо́во избра́нное ста́до, пріиди́те, стеце́мся къ честнѣ́й па́мяти преблаже́ннаго Іоа́нна, въ Ры́льстѣй пусты́ни просія́вшаго. Се́ предлежи́тъ на́мъ честно́е его́ тѣ́ло, вѣ́ры на́шея утвержде́ніе, преподо́бныхъ удобре́ніе, ерети́чествующихъ посрамле́ніе, не вѣ́рующихъ воскресе́нію: се́й бо по сме́рти слѣпы́мъ подае́тъ прозрѣ́ніе, хромы́мъ хожде́ніе, сля́ченныя исправля́етъ, разсла́бленныя стяза́етъ, бѣ́сы прогоня́етъ и благовѣ́рныхъ на сопроти́вныя укрѣпля́етъ. Ду́хомъ же предстоя́ престо́лу Влады́чню, мо́лится всегда́ ко Го́споду о и́же вѣ́рою и любо́вію пра́зднующихъ всечестну́ю па́мять его́.

И ны́нѣ, богоро́диченъ:

Влады́чице, пріими́ моли́твы ра́бовъ Твои́хъ и изба́ви на́съ отъ вся́кія ну́жды и печа́ли.

Славосло́віе вели́кое. [Ектеніи́] и отпу́стъ. И быва́етъ пома́заніе бра́тіи еле́емъ отъ лампа́ды преподо́бнаго.



НА ЛИТУРГІИ,

Блаже́нна отъ кано́на преподо́бнаго, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213: Пло́дъ духо́вный е́сть... и та́ко испо́лните зако́нъ Христо́въ. Аллилуія, гласъ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 24: Ста́ Іису́съ на мѣ́стѣ ра́внѣ... се́ бо мзда́ ва́ша мно́га на небесѣ́хъ. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.] Аллилу́ія.

Коне́цъ и Бо́гу сла́ва.

Источникъ: Богослужебная послѣдованія на все лѣто преподобному и богоносному отцу нашему Іоанну Рыльскому, съ приложеніемъ. † Левкійскій епископъ Парѳеній. — Софія: Синодально издательство, 1955. — Л. 110-126.

/ Къ оглавленію раздѣла /


Наверхъ / Къ титульной страницѣ

0