Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 26 сентября 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 19-й де́нь.
Слу́жба свята́го и преподо́бнаго отца́ на́шего Іоа́нна Ры́льскаго.

ВЕЧЕРЪ,
Блаже́нъ му́жъ, [1-й антифо́нъ]. На Го́споди воззва́хъ: стихи́ры [на 8], гла́съ 1: Подо́бенъ: О, ди́внаго чудесе́!

Въ по́стницѣхъ возсія́вшему прообразова́ніе, пусты́нное воспита́ніе, Сре́дческаго свѣти́льника, словесы́ пѣ́сненными, вси́ вѣ́рніи, похва́лимъ, зову́ще: ра́дуйся, вели́кая сла́ва, я́же въ на́ша дни́ яви́ся, преблаже́нне. [Два́жды.]

Посреди́ двою́ животу́, разу́мнѣ богоуго́дно мѣ́рило поста́вилъ еси́, о́тче, и́бо тлѣ́ющая оста́вилъ еси́, разумѣ́въ же при́сно пребыва́юща Христа́ Бо́га, и Тому́ пра́вило души́ твоея́ усе́рдно, блаже́нне Іоа́нне, прилѣпи́лъ еси́.

Ра́дуешися ви́дѣвъ соверше́ніе трудо́въ твои́хъ, и́хже о́ко не ви́дѣ, ни у́хо слы́ша, но добро́ты ра́йскія имѣ́я свѣтовозда́ніе по́двигъ твои́хъ, источа́етъ благода́ть тво́й гро́бъ, и тѣ́ло имѣ́яй неразруши́мо.

Ины стихи́ры, гла́съ 8. Подо́бенъ: О, пресла́внаго чудесе́!

Ихже о́ко не ви́дѣ,* ни у́хо слы́ша,* ни на се́рдце человѣ́ка взыдо́ша,* я́же угото́вана Бо́гомъ, Того́ возлю́бльшимъ,* си́хъ ты́ возжелѣ́лъ еси́, Іоа́нне богодохнове́нне.* Возненави́дѣлъ еси́ мірско́е смѣше́ніе,* къ Бо́гу еди́ному прите́клъ еси́,* и Того́ благода́ти при́сно насыща́яся,* моли́ся Ему́ прилѣ́жно, спасти́ся душа́мъ на́шимъ. [Два́жды.]

Ра́зума свѣ́тлостію украси́вся,* за́повѣдьми Боже́ственными* просвѣти́лъ еси́ ду́шу твою́,* но и о тлѣ́ющихъ мимоходя́щихъ небре́глъ еси́,* земна́я вся́ оста́вивъ,* въ пусты́няхъ жи́ти изво́лилъ еси́.* Христо́вы за́повѣди соблю́лъ еси́,* Іоа́нне преподо́бне,* Его́же моли́, да спасе́тъ ду́ши на́ша.

Любе́зно Влады́цѣ вожделѣ́лъ еси́,* отъ млады́хъ ногте́й Того́ соверша́я повелѣ́нія,* благода́тію па́че, не́жели млеко́мъ воспита́нъ бы́лъ еси́,* и тѣ́ло твое́ украси́лъ еси́* цѣлому́дріемъ и чистото́ю,* и су́ща въ дому́ Бо́жіи при́сно жела́я,* Христа́ обрѣ́лъ еси́,* Того́, преблаже́нне, умоли́,* да спасе́тъ ду́ши на́ша.

Сла́ва, гла́съ 8:

Бо́жій Ду́хъ излія́ся, я́коже святы́й Іо́иль прорече́, отъ Него́же дви́жимь, на́мъ, вѣ́рующимъ, та́йны Бо́жія явле́нно открыва́етъ, и́же дѣ́тель Его́ пріе́мый. Тѣ́мже Бо́жіимъ свѣ́томъ просвѣти́ на́съ и благода́тію.

И ны́нѣ, богоро́диченъ:

Ца́рь Небе́сный [за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ].

Вхо́дъ. Проки́менъ дне́. Чте́нія три́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 1. Подо́бенъ: Всехва́льніи му́ченицы.

Зри́тель бы́сть умо́мъ* мы́сленныхъ си́лъ,* я́ко дѣ́латель Боже́ственныхъ слове́съ* полага́я во твое́мъ се́рдцѣ.* Въ не́мже восхожде́нія,* я́ко лѣ́ствицу утверди́лъ еси́,* Іоа́нне преподо́бне о́тче на́шъ,* моли́ся дарова́ти на́мъ ми́ръ* и ве́лію ми́лость.

Сти́хъ: Честна́ предъ Го́сподемъ* сме́рть преподо́бныхъ Его́.

Іоа́нне преподо́бне,* твою́ отъ дѣ́тска возложи́лъ еси́ жи́знь* Христу́ Бо́гу на́шему,* Имже укрѣпля́емь,* плотскíя стра́сти* по́мыслу повину́лъ еси́,* ху́ждшее покори́въ лу́чшему.* Тѣ́мже моли́,* спасти́ся душа́мъ на́шимъ.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Богому́дре о́тче на́шъ Іоа́нне,* свѣти́льникъ яви́лся еси́ вели́къ,* просвѣща́я подсо́лнечную* чуде́съ сія́ньми,* боже́ственными дѣ́лы,* тѣ́мже по успе́ніи* незаходи́мый Свѣ́тъ прія́.* Сего́ ра́ди моли́* спасти́ся душа́мъ на́шимъ.

Сла́ва, гла́съ 8:

Христо́во избра́нное ста́до, вѣ́рныхъ собо́ри, новосвяще́нніи лю́діе, пріиди́те, стеце́мся вси́ къ честнѣ́й па́мяти преблаже́ннаго отца́ на́шего Іоа́нна, въ Средцѣ́ возсія́вшаго, къ на́мъ прише́дша. Се́ предлежи́тъ на́мъ свяще́нное его́ тѣ́ло, вѣ́ры на́шея честно́е утвержде́ніе, преподо́бныхъ, я́ко вои́стинну, украше́ніе. Да посра́мятся ерети́ческая собо́рища, не вѣ́рующая воскресе́нію: се́й бо по сме́рти зра́къ дае́тъ, хромы́мъ хожде́ніе, слѣпы́мъ прозрѣ́ніе, разсла́бленныя стяза́етъ, и Правовѣ́рнаго Импера́тора на́шего [и́мярекъ] укрѣпля́етъ на враги́ проти́вныя. Ду́хомъ же предстоя́ у престо́ла Влады́чня, мо́литъ спасти́ся душа́мъ на́шимъ.

И ны́нѣ, богоро́диченъ:

[Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.]

Тропа́рь, гла́съ 1:

Покая́нія основа́ніе, прописа́ніе умиле́нія, о́бразъ утѣше́нія, духо́внаго соверше́нія, ра́вно а́нгеломъ житіе́ твое́ бы́сть, преподо́бне, въ моли́твахъ у́бо и поще́ніихъ, и въ слеза́хъ пребыва́я, о́тче Іоа́нне, моли́ Христа́ Бо́га о душа́хъ на́шихъ.

[Сла́ва, и ны́нѣ, богоро́диченъ:

Гавріи́лу вѣща́вшу Тебѣ́, Дѣ́во, ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ.]


НА УТРЕНИ,
[На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ.]

По 1-мъ стихосло́віи сѣда́ленъ, гла́съ 4. Подо́бенъ: Ско́ро предвари́.

Воздержа́ніемъ увяди́лъ еси́ плотскíя стра́сти, ми́лости возда́ніемъ, благода́ть вели́кую, о́тче, духо́вную воспрія́лъ еси́. Тѣ́мъ благоугоди́лъ еси́ Бо́гу, досто́инъ сосу́дъ чуде́съ и по кончи́нѣ яви́лся еси́, отъ страсте́й очища́я на́съ, Іоа́нне преподо́бне, моли́ Христа́ Бо́га грѣхо́въ оставле́ніе дарова́ти, честву́ющимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Обнови́ла еси́, Чи́стая, Боже́ственнымъ Рождество́мъ Твои́мъ истлѣ́вшее во страсте́хъ земноро́дныхъ ме́ртвенное существо́ и воздви́гла еси́ вся́ отъ сме́рти къ животу́ нетлѣ́нія. Тѣ́мже Тя́ по до́лгу блажи́мъ вси́, Дѣ́во препросла́вленная, я́коже прорекла́ еси́.

По 2-мъ стихосло́віи сѣда́ленъ, гла́съ 5. Подо́бенъ: Собезнача́льное.

По́стника Госпо́дня пѣ́сньми почти́мъ, я́ко умертви́вшаго прило́ги страсте́й воздержа́ніемъ тве́рдымъ, и терпѣ́ніемъ вои́стинну посрами́вша сопроти́внаго врага́ и всю́ его́ горды́ню низложи́вша, и ны́нѣ моля́щася, поми́ловатися душа́мъ на́шимъ. [Два́жды.]

Сла́ва, и ны́нѣ, богоро́диченъ:

Ужа́сно чу́до зача́тія и несказа́ненъ о́бразъ Рождества́ въ Тебѣ́ позна́ся, Приснодѣ́во Чи́стая, ужаса́етъ мо́й у́мъ и удивля́етъ помышле́ніе, сла́ва Твоя́, Богоро́дице, во всѣ́хъ простре́ся, ко спасе́нію ду́шъ на́шихъ.

[Велича́ніе:

Ублажа́емъ тя́, преподо́бне о́тче Іоа́нне, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 8. Подо́бенъ: Прему́дрости.

Па́стырскую хи́трость воспріи́мъ, мона́шествующихъ сто́лпъ и основа́ніе, разу́мнѣ упа́слъ еси́ ста́до твое́: Христо́ва бо вожделѣ́въ Боже́ственная уче́нія, въ ни́хже просвѣти́лся еси́, преподо́бне. Тѣ́мже къ ре́вности а́нгельскаго житія́ воздви́глъ еси́ всѣ́хъ единому́дренно сла́вити Бо́га, богоно́се Іоа́нне, моли́ Христа́ Бо́га, грѣхо́въ оставле́ніе пода́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Пречи́стая Дѣ́во, Ма́ти Бо́жія, души́ моея́ стра́сти лю́тыя исцѣли́, молю́ся, и проще́ніе да́руй мнѣ́ мои́хъ прегрѣше́ній, я́же безу́мнѣ содѣ́яхъ, ду́шу и тѣ́ло оскверни́хъ, окая́нный. Увы́ мнѣ́, что́ сотворю́ въ ча́съ о́нъ, внегда́ а́нгели ду́шу мою́ разлуча́тъ отъ стра́стнаго моего́ тѣлесе́? Тогда́ Помо́щница мнѣ́ бу́ди и Предста́тельница теплѣ́йшая: Тя́ бо и́мамъ наде́жду, ра́бъ Тво́й.

Та́же, степе́нна, 1-й антифо́нъ, 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Ева́нгеліе преподобническое [Матѳе́я, зача́ло 43].

По 50-мъ псалмѣ́ стихи́ра, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія полки́ разруши́лъ еси́ и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Кано́нъ Богоро́дицы со ирмосо́мъ на 6, и свята́го на 8, его́же краегране́сіе: Святи́телю, пою́ твоя́, всеблаже́нне, чудеса́. Гла́съ 4.

Пѣ́снь 1.

Ирмо́съ: Ли́цы изра́ильтестіи, невла́жными стопа́ми по́нтъ Чермны́й и вла́жную глубину́ прогна́вше, вса́дники триста́ты враги́ ви́дяще въ не́й погруже́ны, съ весе́ліемъ поя́ху: пои́мъ Бо́гу на́шему, я́ко просла́вися.

Боже́ственнымъ свѣ́томъ осія́нъ и со а́нгелы, о́тче, ны́нѣ водворя́ешися, моли́твами твои́ми спаса́й творя́щія всегда́ свяще́нную твою́ па́мять, въ ра́дости пою́щія: пои́мъ Бо́гу на́шему, я́ко просла́вися.

Пу́ть, и́же къ жи́зни возводя́щій неукло́нно, преблаже́нне, ше́ствовалъ еси́, избѣ́гъ мяте́жей мірски́хъ, и де́монская смуще́нія разори́лъ еси́, ра́достно взыва́я, о́тче Іоа́нне: пои́мъ Бо́гу на́шему, я́ко просла́вися.

Умертви́въ плотско́е мудрова́ніе, твои́ми по́стными боре́ньми, Боже́ственному Ду́ху покори́лъ еси́, окормле́ніемъ Боже́ственныя си́лы, ра́достно вопія́лъ еси́: пои́мъ Бо́гу на́шему, я́ко просла́вися.

Вся́ кра́сная оста́вилъ еси́, непреста́нную, о́тче, возлюби́лъ еси́ красоту́, въ дому́ Госпо́дни, идѣ́же шу́мъ пра́зднующихъ, ра́достно пою́щихъ: пои́мъ Бо́гу на́шему, я́ко просла́вися.

Богоро́диченъ: Безлѣ́тна Сы́на изъ Безнача́льна Отца́, пло́ть на́съ ра́ди въ человѣ́цехъ бы́вша, во утро́бѣ заче́нши, подъ лѣ́томъ сего́ родила́ еси́ несказа́нно, Ему́же ра́дующеся, вопіе́мъ: пои́мъ Бо́гу на́шему, я́ко просла́вися.

Катава́сія: Отве́рзу уста́ моя́...

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Зако́ну повину́лся еси́ Ду́ха, его́же всѣ́мъ, преподо́бне, предложи́лъ еси́. Грѣха́ же зако́ну изволе́ніемъ не повину́лся еси́.

Горѣ́ къ Бо́гу мудрова́ніе имѣ́я, о́тче, я́же на земли́ оста́вилъ еси́, болѣ́зньми воздержа́нія непреста́нно облегча́емь.

Растерза́въ ю́зы естества́, преесте́ственнымъ чи́стымъ житіе́мъ, богоно́сне Іоа́нне, вышеесте́ственныхъ прія́лъ еси́ дѣ́йство.

Да Бо́гу, блаже́нне, безъ смуще́нія бесѣ́дуеши, въ пусты́ни жи́ти, о́тче, изво́лилъ еси́, отъ молвы́ удаля́яся.

Богоро́диченъ: Спасти́ восхотѣ́въ человѣ́ка на поле́зное, я́ко Благодѣ́тель и Человѣколю́бецъ, въ Твою́ утро́бу неопи́санно, Богома́ти, всели́ся.

Сѣда́ленъ, гла́съ 1. Подо́бенъ: Гро́бъ Тво́й.

Воздержа́нія огне́мъ, я́ко зла́то въ пещи́, му́дре, искуси́вся, свѣтлѣ́йшій яви́лся еси́, Іоа́нне преподо́бне, тѣ́мже къ небе́сному преста́вился еси́ Ца́рствію. Сего́ ра́ди вѣ́рою тя́ восхваля́юще, вопіе́мъ: благода́ть, и ми́лость и очище́ніе согрѣше́ній на́шихъ, о́тче, испроси́. [Два́жды.]

Сла́ва, и ны́нѣ, богоро́диченъ:

Наста́ви мя́ на пу́ть покая́нія, преблага́го прогнѣ́вавша Го́спода, неискусобра́чная благослове́нная Марíе, прибѣ́жище отча́янныхъ человѣ́ковъ, Бо́жіе вмѣсти́лище.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Обветша́вшаго человѣ́ка а́біе совле́кся, о́тче, со грѣхо́вными страстьми́, воздержа́ніемъ незави́стнымъ обле́клся еси́ въ но́ваго по Христу́, всече́стне.

Свѣ́тлое твое́ житіе́, я́ко пра́вило извѣ́стно, въ тебѣ́, о́тче, боже́ственныя добродѣ́тели показа́ся, въ моли́твахъ и поще́ніихъ, во бдѣ́ніихъ же и мольба́хъ, я́же ко Христу́ Человѣколю́бцу.

Дрема́нія твои́мъ очесе́мъ не да́лъ еси́, преподо́бне, до́ндеже, о́тче, хра́мъ себе́ сотвори́лъ еси́ прекра́сенъ всеви́дящему Влады́цѣ, къ Нему́же взыва́еши: сла́ва си́лѣ Твое́й, Го́споди.

Богоро́диченъ: Умерщвле́нныя, Пречи́стая, человѣ́ки оживи́ла еси́, Жизнода́вца ро́ждши избавля́ющаго отъ тли́, взыва́ющія Ему́: сла́ва си́лѣ Твое́й, Го́споди.

Пѣ́снь 5.

Ирмо́съ: Просвѣще́ніе Твое́, Го́споди, низпосли́ на́мъ и отъ мглы́ прегрѣше́ній разрѣши́ ны, Бла́же, Тво́й ми́ръ да́руяй.

Въ ю́ности му́дрость, въ ста́рости ра́зумъ, во все́мъ житіи́ пожда́ніе и долготерпѣ́ніе, и е́же ко всѣ́мъ любо́вь показа́лъ еси́, блаже́нне.

Впери́въ, сла́вне, душе́вный ра́зумъ, и чу́вства, му́дре, окорми́въ, бы́лъ еси́ хра́мъ освяще́нъ Бо́гу че́стенъ.

Украси́лъ еси́, преподо́бне, души́ тричи́сленное, и влады́ку у́мъ поста́вивъ, имѣ́юща Христа́, наставля́юща тя́ къ ше́ствію небе́сному.

Богоро́диченъ: Дѣ́ва роди́ Пречи́стаго Бо́га, зако́нъ полага́юща, всѣ́мъ человѣ́комъ Спаси́теля, благоче́стіе су́щимъ на земли́ возвѣща́юща.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Въ пусты́ни жи́ти усе́рдно возлюби́лъ еси́, богоно́сне, въ не́йже Бо́га пріе́мля избавля́ющаго тя́, и соблюда́ющаго твоя́ стопы́.

Непрекло́ненъ въ пусты́ни, богому́дре, претерпѣ́лъ еси́, да́же и до кончи́ны храня́ сіе́ опасе́ніемъ, и́мже нетлѣ́нному сподо́бился еси́ наслажде́нію.

Равноа́нгельно на земли́ пожи́лъ еси́, равноа́нгельную че́сть досто́йно получи́лъ еси́, со а́нгелы всѣ́ми Бо́гу предстоя́.

Богоро́диченъ: Зачала́ еси́ во утро́бѣ, Богома́ти, безнача́льнаго Бо́га Сло́ва, на́съ ра́ди въ человѣ́цѣхъ бы́вшаго, по на́мъ непрело́жна, во дву́ зна́ема естеству́.

Конда́къ, гла́съ 8. Подо́бенъ: Взбра́нной.

Ангельскому житію́ поревнова́въ, преподо́бне, вся́ земна́я оста́вивъ, ко Христу́ прите́клъ еси́, и Того́ за́повѣдьми огражда́яся, яви́лся еси́ сто́лпъ непоколеби́мь отъ вра́жіихъ нападе́ній. Тѣ́мъ зове́мъ ти́: ра́дуйся, о́тче Іоа́нне, свѣти́ло пресвѣ́тлое.

Икосъ:

Въ ме́ртвеннѣмъ тѣ́лѣ, а́нгельскому уподо́бльшася житію́ па́че естества́, и съ тѣ́ми на небесѣ́хъ лику́юща, пріиди́те, вси́ вѣ́рніи, воспое́мъ преподо́бнаго Іоа́нна: то́й бо я́ко уме́ты вмѣни́ мірска́я вся́ кра́сная, я́ко да небе́сныхъ получи́тъ, вше́дъ на го́ру я́коже дре́вле Моисе́й вели́кій и Илія́, посто́мъ очи́щся, сподо́бися ви́дѣти Тро́ическую Свѣ́тлость, ни во мра́цѣ, ни въ ви́хрѣ, но во свѣ́тѣ благода́ти Бо́жія. Тѣ́мъ и чуде́съ лучи́ испуща́я свѣ́тло, исцѣле́нія рѣ́ки источа́я вѣ́рнымъ отъ гро́ба, я́ко жи́въ неду́говъ исцѣли́тель, сего́ ра́ди зове́мъ ему́: ра́дуйся о́тче Іоа́нне, свѣти́ло пресвѣ́тлое.

Пѣ́снь 7.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Вы́шнею си́лою Бо́жія по́мощи, враги́ низложи́лъ еси́, побѣдоно́сецъ бы́лъ еси́, зовы́й: препѣ́тый Го́споди, Бо́же оте́цъ на́шихъ, благослове́нъ еси́.

Очи́стивъ мглу́ отъ стра́сти бы́вшую, безстра́стіемъ просвѣще́нія озари́вся, зовы́й преподо́бне: препѣ́тый Го́споди, Бо́же оте́цъ на́шихъ, благослове́нъ еси́.

Уязви́въ ду́шу добродѣ́тельными лѣ́потами, красе́нъ добро́тою бы́лъ еси́, Го́споду пое́ши, ра́дуяся: препѣ́тый Го́споди, Бо́же оте́цъ на́шихъ, благослове́нъ еси́.

Богоро́диченъ: Призыва́я ны́ плѣне́нныя, Дѣ́во, во е́же бѣ́хомъ въ нача́лѣ, во чре́во Твое́ всели́выйся, вопло́щся Человеколю́бецъ Госпо́дь.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Глаго́лы жи́зни вѣ́чныя, преблаже́нне, въ се́рдцы твое́мъ пріи́мъ, пло́ть увяди́лъ еси́, мíру же умертви́ся, живоно́снымъ умерщвле́ніемъ одѣ́явся. Го́спода по́йте, и превозноси́те Его́ во вся́ вѣ́ки.

Ми́лостива бы́ти, богоно́сне, Еди́наго Благодѣ́теля моли́, твою́ пречестну́ю па́мять пра́зднующимъ, согрѣше́ній оставле́ніе си́мъ дарова́ти.

Воззрѣ́ніемъ къ Бо́гу непреста́нно внима́я, отону́дуже нѣ́коего сія́нія зарю́ пріи́мъ, свѣ́тъ неугаси́мый, я́ко зерца́ло, посыла́еши, пою́щимъ: Го́спода по́йте, дѣла́, и превозноси́те Его́ во вся́ вѣ́ки.

На лѣ́ствицу, къ небеси́ просте́ртую, на не́йже утвержде́нъ Госпо́дь яви́ся, о́тче, вше́лъ еси́, боже́ственными восхожде́ніи преспѣва́я, преподо́бне, до́ндеже дости́глъ еси́ соверше́ніе жела́емыхъ, поя́: Го́спода по́йте, дѣла́, и превозноси́те Его́ во вся́ вѣ́ки.

Богоро́диченъ: Пое́мъ Тя́, Обра́дованная, Бо́га бо воплоще́нна на́мъ родила́ еси́. Тѣ́мже Тя́ Богоро́дицу вси́ имену́емъ, богопрія́тную утро́бу, добро́ту Іа́ковлю, Го́спода воспѣва́юще, и превознося́ще Его́ во вся́ вѣ́ки.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Слеза́ми по́стническими бразду́ напои́лъ еси́, ра́дуешися, о́тче богоно́сне, ны́нѣ ра́достію рукоя́ти собира́я по́двиговъ по́чести, тѣ́мже тя́ вси́ ублажа́емъ.

Незаходи́мый возсія́ тебѣ́ Свѣ́тъ, присносу́щее весе́ліе воспрія́, идѣ́же лику́я со а́нгелы окру́гъ Царя́ и Го́спода, вѣ́рою творя́щихъ па́мять твою́ помина́й, о́тче всеблаже́нне.

Возмо́гъ де́моновъ убѣжа́ти стрѣля́ній и кова́рствъ лука́выхъ, спа́слся еси́, блаже́нне. Отону́дуже душа́ твоя́ свята́, чиста́ и нескве́рна, наслажде́нія небе́снаго сподо́бися. Помина́й чту́щія тя́.

Зако́номъ, о́тче, страда́льческимъ подвиза́яся, и побѣди́лъ еси́ де́монскія полки́. Тѣ́мже тя́ сла́вою вѣнча́етъ, я́ко Еди́нъ Благодѣ́тель по́честей, и Боже́ственнаго свѣтоявле́нія сподо́би, боже́ственнымъ наслажде́ніемъ.

Богоро́диченъ: Яко всѣ́хъ тва́рей Творца́ ро́ждши, Богома́ти, превозшла́ еси́ всю́ тва́рь боже́ственною сла́вою, свя́тостію и благода́тію, и вся́кія добродѣ́тели бо́льши, тѣ́мже Тя́ вси́ велича́емъ.

Свѣти́ленъ. Подо́бенъ: Не́бо звѣзда́ми.

Ангельскаго житія́ жела́я, удали́лъ еси́ себе́ въ пусты́няхъ, и стра́сти покори́въ плотскíя, ра́венъ а́нгеломъ яви́лся еси́, о́тче на́шъ Іоа́нне богоно́сне. [Два́жды.]

[Сла́ва, и ны́нѣ,] богоро́диченъ:

Держа́внымъ Твои́мъ покро́вомъ, отъ вра́гъ навѣ́та, Чи́стая, Твоя́ рабы́ соблюди́ ны́ вся́ невре́дны, Тя́ бо и́мамы Еди́ну прибѣ́жище въ жена́хъ.

На хвали́техъ стихи́ры на 4, гла́съ 8. Подо́бенъ: О, пресла́внаго чудесе́!

Преподо́бне о́тче Іоа́нне,* ты́ и́го Христо́во на ра́мо взе́мъ,* до́блественнѣ наи́тіе* вра́жіе попра́лъ еси́.* Тѣ́мже тя́ вѣ́рою вси́ почита́емъ,* о, преблаже́нне, мона́шествующихъ похвало́!* Тѣ́мже Христа́* непреста́нно моли́,* спасти́ ду́ши на́ша. [Два́жды.]

Вѣ́рою соше́дшеся вси́,* я́ко по́стника тя́ Христо́ва честву́емъ, Іоа́нне.* Ра́дуяся у́бо ше́ствовалъ еси́* въ пусты́ни непрохо́днѣй, му́дре,* наста́вникъ бы́въ че́стенъ.* Тѣ́мже тебѣ́ мы́ вѣ́рою взыва́емъ, блаже́нне:* по́стниковъ похвало́,* о на́съ моли́ся ко Го́споду,* поми́ловатися душа́мъ на́шимъ.

Преподо́бне о́тче на́шъ, Іоа́нне,* бу́дущія ра́ди жи́зни,* въ ка́менныхъ про́пастехъ* и въ дре́вѣ заключи́лся еси́,* ника́коже боя́ся неви́димыхъ вра́гъ,* мно́гащи толца́нія творя́щихъ къ тебѣ́.* Ты́ же моли́твами твои́ми си́хъ безъ вѣ́сти сотворя́лъ еси́,* о, терпѣли́вый душе́ю!* Въ пусты́ни Ры́льстѣй, чу́дное овча́,* Христа́ Агнца Па́стыря имѣ́я.* Тѣ́мже вѣ́рою вси́ тя́ чти́мъ и ублажа́емъ.

Сла́ва, гла́съ то́йже:

На не́бо теку́щую вше́дъ колесни́цу, чу́дне, добродѣ́телей, дости́глъ еси́ кра́йнее житіе́ воздержа́ніемъ. Въ пусты́ни живы́й, смотря́я вы́шняго Іерусали́ма красоту́, и болѣ́зни по́двиговъ досто́йно по́чести пріи́мъ, съ небе́сными ра́дуешися чинонача́ліи, преблаже́нне, вѣ́чныхъ бла́гъ наслѣ́дникъ, Ца́рствія жи́тель бы́въ. Но моли́ся, богоно́сне Іоа́нне, Спа́су всѣ́хъ, умири́ти мíръ и спасти́ ду́ши на́ша.

И ны́нѣ, богоро́диченъ:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.

Славосло́віе вели́кое. [Ектеніи́], и отпу́стъ.



НА ЛИТУРГІИ,

Блаже́нна отъ кано́на свята́го, пѣ́снь 3-я и 6-я. И прочая служба преподобническая. [Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 161 – 166 об.

/ Къ оглавленію раздѣла /


Наверхъ / Къ титульной страницѣ

0