Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

[Мѣ́сяца Окто́врія въ 18-й де́нь.]
Слу́жба преподо́бному отцу́ на́шему Іо́сифу, игу́мену Волоцко́му, чудотво́рцу.

НА МАЛѢЙ ВЕЧЕРНИ,
[На Го́споди воззва́хъ:] стихи́ры на 4, гла́съ 1. Подо́бенъ: Небе́сныхъ чино́въ.

Кре́стъ Госпо́день взе́мъ, преподо́бне Іо́сифе,* и́стинно послѣ́довалъ еси́ Христу́,* на́съ ра́ди на Крестѣ́ распе́ншемуся,* и Его́ ра́ди любве́ вся́ оста́вилъ еси́* и Того́ Еди́наго возлюби́лъ еси́.* Его́же моли́ спасти́ся на́мъ.

Яко пріе́мь, о́тче, небе́сное сѣ́мя въ се́рдце,* пло́дъ стори́чествующь добродѣ́тели прине́слъ еси́,* пита́я благоче́стно* гла́домъ добродѣ́тели та́ющихъ ду́ши.* Но, я́ко имѣ́я дерзнове́ніе ко Влады́цѣ Христу́,* моли́ о творя́щихъ вѣ́рою и любо́вію па́мять твою́.

Сла́ва, гла́съ 4:

Свѣ́тлый дне́сь возсія́ на́мъ и всепра́зднственный де́нь, я́коже второ́е со́лнце, просвѣща́я и наставля́я, и отгоня́я мглу́ помраче́нія на́шего, вселе́нную созыва́етъ, любо́вію къ честнѣ́й ра́цѣ припа́дающихъ и любе́зно облобыза́ющихъ. Моли́, мо́лимся, о́тче, мíру ми́ръ дарова́ти и душа́мъ на́шимъ ве́лію ми́лость.

[И ны́нѣ, богоро́диченъ, гла́съ то́йже:

Богоро́дице, всѣ́хъ Цари́це, правосла́вныхъ похвало́, ерети́чествующихъ шата́нія разори́, и ли́ца и́хъ посрами́, не кла́няющихся, ниже́ чту́щихъ, Пречи́стая, честны́й Тво́й о́бразъ.]

На стихо́внѣ стихи́ры преподо́бнаго, гла́съ 2. Подо́бенъ: До́ме Евфра́ѳовъ.

До́мъ Ду́ха Свята́го* бы́лъ еси́, преподо́бне,* просвѣща́я и наставля́я* вѣ́рою и любо́вію* притека́ющія къ тебѣ́.

Сти́хъ: Что́ возда́мъ Го́сподеви о всѣ́хъ,* я́же воздаде́ ми́?

Блаже́нъ вои́стинну* и преблаже́нъ яви́лся еси́,* прему́дре Іо́сифе,* мона́шествующихъ наста́вниче* и благоче́стія побо́рниче.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Пріиди́те, вѣ́рніи,* стеце́мся усе́рдно,* восхва́лимъ отца́ на́шего,* и́стины сказа́теля* и нече́стія обличи́теля.

Сла́ва, самогла́сенъ, гла́съ то́йже:

Пріиди́те, ли́цы мона́шестіи, дне́сь ра́достно воспои́мъ, ублажа́юще и прославля́юще нача́льника на́шего, Христо́ва уго́дника и Того́ Пречи́стыя Ма́тере, преподо́бныхъ сожи́теля и собесѣ́дника а́нгеловъ, моля́щася Го́споду поми́ловатися душа́мъ на́шимъ.

[И ны́нѣ, богоро́диченъ, гла́съ то́йже:

Все́ упова́ніе мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ.]

Тропа́рь преподо́бнаго Іо́сифа, гла́съ 5:

Яко по́стниковъ удобре́ніе и отце́въ красоту́, ми́лости пода́теля, разсужде́нія свѣти́льника, вси́ вѣ́рніи, соше́дшеся, восхва́лимъ кро́тости учи́теля и ересе́й посрами́теля прему́драго Іо́сифа, россíйскую звѣзду́, моля́щася Го́споду поми́ловатися душа́мъ на́шимъ.

[Сла́ва, и ны́нѣ, богоро́диченъ, гла́съ то́йже:

Ра́дуйся, две́ре Госпо́дня непроходи́мая; ра́дуйся, стѣно́ и покро́ве притека́ющихъ къ Тебѣ́; ра́дуйся, необурева́емое приста́нище и неискусобра́чная, ро́ждшая пло́тію Творца́ Твоего́ и Бо́га, моля́щи не оскудѣва́й о воспѣва́ющихъ и кла́няющихся Рождеству́ Твоему́.]


НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры [свята́го] на 8, гла́съ 5:

Преподо́бне о́тче, блаже́нне Іо́сифе,* вельми́ подвиза́лся еси́ на враги́ безпло́тныя,* пѣ́сньми, посто́мъ и моли́твою бы́въ о́бразъ твои́мъ ученико́мъ* и нелѣ́ностно Христу́ рабо́тая.* Ны́нѣ, преподо́бне, на небесѣ́хъ лику́еши,* со а́нгелы славосло́вя Тро́ицу Единосу́щную,* преклоня́я на человѣколю́біе Христа́ Бо́га на́шего,* да спасе́тъ естество́ человѣ́ческое.* Того́ у́бо моли́, Тому́ помоли́ся, преподо́бне,* дарова́ти вселе́ннѣй единомышле́ніе* и ча́домъ твои́мъ ми́ръ и ве́лію ми́лость. [Три́жды.]

Преподо́бне о́тче Іо́сифе,* вельми́ подвиза́лся еси́ на враги́ Креста́ Христо́ва* и на отмета́ющіяся о́браза Спа́сова* и Его́ Пречи́стыя Богома́тере,* и посрами́лъ еси́ ересенача́льники.* Ны́нѣ у́бо, преподо́бне,* всѣ́хъ на́съ ко Христу́ помина́й* и моли́ся о творя́щихъ вѣ́рно святу́ю па́мять твою́,* презрѣ́ти на́ша согрѣше́нія* и возвести́ на́съ на пе́рвое достоя́ніе.* Того́ у́бо моли́, Тому́ помоли́ся, преподо́бне,* дарова́ти вселе́ннѣй единомышле́ніе,* и Импера́тору на́шему на враги́ одолѣ́ніе,* и ми́ръ, и ве́лію ми́лость. [Три́жды.]

Преподо́бне о́тче Іо́сифе,* вельми́ тя́ Христо́съ просла́ви* и дарова́ тебѣ́ сло́во боже́ственнаго ра́зума,* и́мже отсѣ́клъ еси́ лжу́ отъ и́стины,* и исто́рглъ еси́ пле́велы невѣ́рія,* и научи́лъ еси́ сла́вити Тро́ицу Единосу́щную,* покланя́емаго въ Тре́хъ Ѵпоста́сехъ Еди́наго Бо́га.* Того́ у́бо моли́, Тому́ помоли́ся, преподо́бне,* дарова́ти прося́щимъ исцѣле́ніе,* ми́ръ и ве́лію ми́лость. [Два́жды.]

Сла́ва, гла́съ 6:

Ра́дуйся и весели́ся, це́рковь Бо́жія Ма́тере, со свяще́нники же, и съ цари́ благочести́выми, и со благоро́дными и христоимени́тыми, мона́хи же и просты́ми, блаже́ннаго Іо́сифа, отца́ на́шего, дне́сь па́мять почита́юще, духо́внѣ соше́дшеся, пра́зднуемъ, и, честны́й гро́бъ его́ обстоя́ще, глаго́лемъ: ра́дуйся, о́тче на́шъ Іо́сифе, свѣти́льниче пресвѣ́тлый, врачу́ боля́щихъ и моли́твенниче ко Спа́су Христу́ Бо́гу на́шему о вѣ́рою и любо́вію притека́ющихъ къ ра́цѣ моще́й твои́хъ, моли́ спасти́ся душа́мъ на́шимъ.

И ны́нѣ, [богоро́диченъ, гла́съ то́йже:

Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.]

Вхо́дъ. Проки́менъ дне́, и чте́нія.

Прему́дрости Соломо́новы чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 5. Подо́бенъ: Ра́дуйся.

Ра́дуйся, свяще́нная главо́, преподо́бне о́тче на́шъ Іо́сифе, а́нгельскихъ лико́въ собесѣ́дниче въ вы́шнихъ. На земли́ бо добродѣ́тельно пожи́лъ еси́ и яви́лся еси́ пречи́сто и нескве́рно зерца́ло, Ду́ха Свята́го заря́ми блиста́яся, пребога́те, и озаря́емъ прозрѣ́лъ еси́ бу́дущая. Тѣ́мже Христа́ Бо́га моли́ ми́ръ дарова́ти душа́мъ на́шимъ и ве́лію ми́лость.

Ра́дуйся, свяще́нная главо́, по́стниковъ непоколеби́мый сто́лпе, мона́шествующихъ исправле́ніе, и ересе́й новоявле́нныхъ богодохнове́нными твои́ми писа́ньми злочести́вая и́хъ уста́ загради́лъ еси́ и де́моновъ стремле́нія погуби́лъ еси́, Креста́ ору́жіемъ вся́ кознодѣ́йства отгоня́я. И по преставле́ніи твое́мъ жи́въ Святѣ́й Тро́ицѣ предстои́ши, о на́съ моля́ся, ча́дѣхъ твои́хъ, дарова́ти душа́мъ на́шимъ ми́ръ и ве́лію ми́лость.

Ра́дуйся, свяще́нная главо́, умо́мъ просвѣще́ннымъ ду́шу твою́, о́тче, просвѣти́лъ еси́ и отъ земны́хъ преста́вился еси́ во Христо́во Ца́рствіе, Іо́сифе преблаже́нне, въ по́стницѣхъ ты́ свѣ́телъ яви́лся еси́, сла́дости нестарѣ́емыя ны́нѣ насыща́яся. О на́съ, рабѣ́хъ твои́хъ, Христу́ Бо́гу моли́ся, пода́ти на́мъ оставле́ніе грѣхо́въ и ве́лію ми́лость.

Сла́ва, гла́съ 6:

Преподо́бне о́тче, сохрани́лъ еси́ добро́ту е́же по о́бразу Бо́жію, пло́ть покори́лъ еси́ ду́ху, сего́ ра́ди всели́ся въ тя́ Пресвяты́й Ду́хъ, Его́же дѣ́йствіемъ свѣ́тло укра́шенъ, прія́лъ еси́ да́ръ исцѣле́ній притека́ющимъ съ вѣ́рою ко гро́бу моще́й твои́хъ. Моли́ся Христу́ Бо́гу дарова́ти Импера́тору на́шему на враги́ побѣ́ду и мíру ми́ръ, и це́рквамъ единомы́сліе, и душа́мъ на́шимъ ве́лію ми́лость.

[И ны́нѣ, богоро́диченъ, гла́съ то́йже:

Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.]

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Пріиди́те, ублажи́мъ* преподо́бнаго Іо́сифа,* по́стника и возде́ржника,* и мона́ховъ нача́льника,* Христо́ва уго́дника.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Дне́сь, вѣ́рніи, ублажи́мъ* преподо́бнаго Іо́сифа,* и́стины сло́ва сказа́теля,* и по Христо́вѣ ико́нѣ побо́рника,* и нече́стія обличи́теля.

Сти́хъ: Что́ возда́мъ Го́сподеви о всѣ́хъ,* я́же воздаде́ ми?

Блаже́нъ еси́, Іо́сифе,* Христо́въ уго́дниче* и Пречи́стыя Богома́тере,* пусты́нный жи́телю* и мона́шествующихъ наста́вниче.

Сла́ва, гла́съ 2:

Пріиди́те дне́сь, ли́цы мона́шестіи, притеце́мъ ко гро́бу преподо́бнаго Іо́сифа, моля́щеся Христу́ Бо́гу на́шему, прося́ще грѣхо́въ проще́нія, и Импера́тору на́шему на враги́ побѣ́ды, и плѣне́нымъ свобожде́нія, и мíру устрое́нія, и це́рквамъ соедине́нія, и душа́мъ на́шимъ ве́лія ми́лости.

[И ны́нѣ, богоро́диченъ, гла́съ то́йже:

О, чудесе́ но́ваго, всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша.]

На благослове́ніи хлѣ́бовъ: Тропа́рь свята́го, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.



НА УТРЕНИ,
[На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ.]

По 1-й каѳи́смѣ сѣда́ленъ, гла́съ 1. Подо́бенъ: Ско́ро предвари́.

Досто́йно ублажа́емъ тя́, преподо́бне Іо́сифе, я́ко дерзнове́ніе иму́ща ко Го́споду. О на́съ при́сно моли́ся изба́витися враго́въ належа́щія напа́сти и дарова́ти Импера́тору на́шему на сы́ны ага́рянскія одолѣ́ніе, и плѣне́ннымъ свобожде́ніе, и на́мъ, соверша́ющимъ святу́ю па́мять твою́, ве́лію ми́лость. [Два́жды.]

Сла́ва, и ны́нѣ, богоро́диченъ:

Умъ человѣ́ческій по достоя́нію пѣ́ти Тя́, Влады́чице Пречи́стая Богоро́дице, недоумѣ́етъ, но мы́ зове́мъ Ти́, я́же арха́нгелъ Гавріи́лъ провѣща́: ра́дуйся, Ада́мово свобожде́ніе; ра́дуйся, прама́тере Евы оправда́ніе; ра́дуйся, мíра спасе́ніе; ра́дуйся, Ма́ти Христа́ Бо́га.

По 2-й каѳи́смѣ сѣда́ленъ, гла́съ 8. Подо́бенъ: Взбра́нной Воево́дѣ.

Соше́дшеся, вѣ́рніи, въ па́мять преподо́бнаго Іо́сифа, духо́вно пра́зднуемъ, восхваля́юще Христа́ Бо́га на́шего, прославля́юща Своего́ уго́дника и да́ромъ чуде́съ обогати́вшаго. Притеце́мъ вѣ́рно ко гро́бу моще́й его́ и почерпе́мъ тѣлесе́мъ здра́віе, ку́пно и душа́мъ спасе́ніе, и торжеству́емъ свѣ́тло во святу́ю па́мять его́. [Два́жды.]

Сла́ва, и ны́нѣ, богоро́диченъ:

Взбра́нной Воево́дѣ и Засту́пницѣ на́шей, къ Тебѣ́ прибѣга́емъ, Пречи́стая Богоро́дице, побори́, Чи́стая, плѣня́ющаго ны́ діа́вола и сводя́ща въ стра́сти безче́стія. Тѣ́мже припа́даемъ къ Твоему́, Пречи́стая, о́бразу, прося́ще изба́витися вся́кія му́ки и огня́ вѣ́чнаго, заступи́ ны́, Ма́ти Христа́ Царя́ Небе́снаго, да зове́мъ Ти́: ра́дуйся, Невѣ́сто неискусобра́чная.

[Велича́ніе:

Ублажа́емъ тя́, преподо́бне о́тче Іо́сифе, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 5. Подо́бенъ: Ра́дуйся.

Ра́дуйся, преподо́бне, принесы́й себе́ Христу́ же́ртву жи́ву, и, отъ ю́ности усе́рдно рабо́тая Христу́ Бо́гу пѣ́сньми, посто́мъ и воздержа́ніемъ, водвори́лся еси́ въ пусты́ни, еди́нъ Еди́ному бесѣ́дуя. Тѣ́мъ, ви́дѣвъ Госпо́дь твое́ до́брое изволе́ніе, со всѣ́ми учини́ тя преподо́бными и пра́ведными водворя́тися въ небе́снѣмъ Ца́рствіи и со а́нгелы Христу́ пѣ́ти пѣ́снь немо́лчную. Но, я́ко и́маши дерзнове́ніе къ Нему́, моли́, мо́лимся, спасти́ся душа́мъ на́шимъ. [Два́жды.]

Сла́ва, и ны́нѣ, богоро́диченъ:

Къ Богоро́дицѣ возопіи́мъ лю́бовію: ра́дуйся, гра́де Госпо́день; ра́дуйся, ски́птре Дави́довъ; ра́дуйся, пала́то одушевле́нная; ра́дуйся, ста́мно боже́ственныя ма́нны; ра́дуйся, неопали́мая купино́; ра́дуйся, свѣще́ пресвѣ́тлая и свѣти́льниче златы́й; ра́дуйся, горо́ Бо́жія пріосѣне́нная; ра́дуйся, огнено́сный престо́ле; ра́дуйся, лѣ́ствице и две́ре небе́сная; ра́дуйся, же́зле, невла́жно прозябы́й; ра́дуйся, вся́ спаса́ющи отъ вся́кихъ бѣ́дъ и скорбе́й; ра́дуйся, Влады́чице, мíра спасе́ніе.

Степе́нна, 1-й антифо́нъ 4-го гла́са. Проки́менъ, гласъ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Преподо́бне о́тче Іо́сифе, очи́стилъ еси́ у́мное существо́, и сохрани́лъ еси́ добро́ту е́же по о́бразу Бо́жію, и пло́ть покори́лъ еси́ ду́ху. Того́ ра́ди въ тя́ всели́ся си́ла Бо́жія, и прія́лъ еси́ да́ръ исцѣле́ній. Идѣ́же бо любо́вь и согла́сіе, та́мо добродѣ́тели позна́ніе, а идѣ́же за́висть и рве́ніе, та́мо зло́бы явле́ніе. Но у́бо мы́ бѣ́гаемъ сего́ убíйственнаго по́мысла, отъ него́же да изба́витъ ны́ Христо́съ Бо́гъ, моли́твами твои́ми, преподо́бне Іо́сифе, и пода́стъ душа́мъ на́шимъ ми́ръ и ве́лію ми́лость.

[Кано́нъ Богоро́дицы со ирмосо́мъ на 6, и преподо́бнаго два́ кано́на на 8.]

Кано́нъ преподо́бнаго Іо́сифа, гла́съ 2.
Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Тебѣ́ твоего́, блаже́нне, уче́нія до́лгъ принося́ще, воздая́нія простира́емъ, вѣне́цъ похва́льный плету́ще. Ты́ же, любо́вію увязе́нъ, пребога́те, твои́ми святы́ми моли́твами благода́ть на́мъ пода́ждь духо́вную.

Всегуби́тельное стремле́ніе страсте́й, о́тче, увяди́лъ еси́, слове́снымъ объя́тъ богому́дріемъ, благопребы́тенъ бы́лъ еси́ и благогла́сенъ, кро́токъ же и смире́нъ, сло́вомъ же прему́дрости, преподо́бне о́тче Іо́сифе, и ра́зумомъ вѣнча́нъ.

Свяще́нно украси́лъ еси́ себе́, преподо́бне о́тче, дѣ́тельнымъ ра́зумомъ благода́ти, богоглаго́ливе Іо́сифе, жела́я вѣнца́ сла́вы Христо́вы, и своея́ наде́жды изря́дно, блаже́нне, не погрѣши́лъ еси́.

Цѣлому́дріе удержа́лъ еси́ я́вѣ, кра́йнюю же кро́тость и высокогла́сное смире́ніе, и́миже возвыша́емь, трудо́въ твои́хъ дѣ́йствомъ и видѣ́ніемъ, ра́дуяся, принесе́ся, вѣне́цъ неувяда́емый пріи́мъ трудо́въ твои́хъ воздая́нія.

Богоро́диченъ: Тва́рей яви́лася еси́, Чи́стая, всѣ́хъ ви́димыхъ и неви́димыхъ превы́шши, Всенепоро́чная, Зижди́теля бо родила́ еси́, я́коже изво́ли воплоти́тися во утро́бѣ Твое́й. Его́же со дерзнове́ніемъ моли́ спасти́ пою́щія Тя́.

Ины́й кано́нъ преподо́бнаго Іо́сифа чудотво́рца, гла́съ 6.
Пѣ́снь 1.

Ирмо́съ: Волно́ю морско́ю скры́вшаго дре́вле, гони́теля мучи́теля — подъ земле́ю скры́ша спасе́нныхъ о́троцы; но мы́ я́ко отрокови́цы, Го́сподеви пои́мъ, сла́вно бо просла́вися.

О, Бо́жій Сло́ве, ми́лостиве Христе́ Царю́! Пре́зри моя́ мно́гая согрѣше́нія, и отве́рзи ми́ косноязы́чныя уста́, и ду́хъ пра́въ обнови́ во утро́бѣ мое́й, и да́ждь ми́, Христе́, сло́во ра́зума, да воспою́ Твоего́ уго́дника, преподо́бнаго Іо́сифа.

Повину́лся еси́, преподо́бне, вседу́шно твоему́ отцу́, преподо́бному Пафну́тію, и бы́лъ еси́ я́ко другíй Исаа́къ, ра́ди кра́йняго послуша́нія. Тѣ́мже, преподо́бне, въ тя́ всели́ся Пресвяты́й Ду́хъ, Его́же дѣ́йствіемъ свѣ́тло украша́емый, и ны́нѣ предстои́ши Святѣ́й Тро́ицѣ, ра́дуяся.

Уподо́бился еси́, преподо́бне Іо́сифе, дре́внему Іа́кову, послу́шавшу своея́ ма́тере, о́тчее благослове́ніе пріе́мшему: ты́ же преподо́бному Пафну́тію повину́лся еси́ и, отъ него́ благослове́ніе пріи́мъ, устроя́ешися па́стырь Христо́ва ста́да въ то́йже оби́тели, Бо́гу та́ко изво́льшу.

Богоро́диченъ: Къ Тебѣ́ прибѣга́емъ, Богоро́дице Всепѣ́тая, и, Тебѣ́ припа́дающе, мо́лимся, Твои́мъ хода́тайствомъ, Влады́чице, и моли́твами Твоего́ уго́дника, преподо́бнаго Іо́сифа, ми́лостива на́мъ сотвори́ Его́же пречи́сто и недовѣ́домо родила́ еси́, Христа́ Бо́га на́шего.

[Катава́сія: Отве́рзу уста́ моя́...]

Пѣ́снь 3.

Ирмо́съ: Процвѣла́ е́сть пусты́ня я́ко кри́нъ Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Да́ждь, Христе́ Спа́се, проще́ніе мно́гихъ на́шихъ согрѣше́ній, я́ко да и мы́ почита́емъ па́мять Твоего́ уго́дника, преподо́бнаго Іо́сифа, его́же моли́твами спаси́ ны.

Твои́ми моли́твами ми́лостиваго умоля́й Бо́га, преподо́бне о́тче на́шъ Іо́сифе, и грѣхо́вный мра́къ печа́ли на́шея разори́, и благоду́шія утѣше́ніе низпосли́.

Отъ младе́нства ты́, блаже́нне Іо́сифе, позна́нъ бы́лъ еси́ Бо́гомъ и на Того́ надѣ́ялся еси́, наставля́емь на спаси́тельная Его́ повелѣ́нія. Ему́же ны́нѣ предстоя́, со дерзнове́ніемъ о на́съ моли́ся.

Богоро́диченъ: Еди́наго Святы́я Тро́ицы, Сло́ва Сы́на родила́ еси́, Дѣ́во Пречи́стая, Его́же съ преподо́бнымъ Іо́сифомъ о рабѣ́хъ Твои́хъ моли́, вѣ́рою прося́щихъ грѣхо́въ проще́нія.

Инъ.

Ирмо́съ: Тобо́ю, Христе́, небеса́ утвержда́ема вся́, Сло́во Бо́жіе и Си́ла, исповѣ́дуютъ сла́ву неизрече́нну, и вседѣ́тельныя руки́ Твоея́ сотворе́ніе: нѣ́сть бо пресвя́тъ, ра́звѣ Тебе́, Го́споди.

Не преда́ждь, Влады́ко, Твоего́ достоя́нія враго́мъ, хва́лящимся на ны́, мо́лимъ Тя́, Ми́лостиве, спаси́ правосла́внаго Импера́тора на́шего и на́мъ бу́ди ми́лостивъ Твои́мъ рабо́мъ, и изба́ви ны́, Христе́ Царю́, муче́нія и огня́ негаси́маго, и сподо́би ны́ десна́го предстоя́нія, моли́твами преподо́бнаго Іо́сифа.

Напо́лнися се́рдце твое́, преподо́бне, благода́ти Христо́вы и пра́ваго уче́нія, бы́лъ еси́ о́бразъ мона́шествующихъ, вся́кими добро́тами духо́вными: не да́лъ бо еси́ сна́ твои́мъ очесе́мъ, ни вѣ́ждамъ дрема́нія, но, я́ко стяжа́лъ еси́ дерзнове́ніе ко Го́споду, моли́ о на́съ, мо́лимъ тя́, да бу́детъ на́мъ ми́лостивъ въ де́нь су́дный.

Яко ле́въ стра́шенъ изъ пусты́ни устреми́вся, устраши́лъ еси́ безбо́жныя еретики́, имѣ́я, преподо́бне, ме́чь духо́вный, и́же е́сть глаго́лъ Бо́жій, посѣ́клъ еси́ изни́кшая нече́стія и изъ ко́рене исто́рглъ еси́ злосла́вныхъ уче́нія, собра́лъ еси́, я́ко трудолюби́ва пчела́, отъ всѣ́хъ писа́ній Боже́ственная словеса́ и си́ми уста́ скве́рная безбо́жныхъ загради́лъ еси́, преподо́бне Іо́сифе.

Богоро́диченъ: Дивя́тся, Ма́ти Бо́жія, небе́сніи чи́ни красотѣ́ души́ Твоея́ и чистотѣ́ дѣ́вства Твоего́. Мы́ же, земнíи, недоумѣ́емъ глаго́лати несказа́ннаго рождества́ Твоего́, ему́же та́йно науча́ющеся, позна́хомъ Тя́, ро́ждшую Христа́ Бо́га на́шего, Его́же ми́лостива на́мъ сотвори́ въ де́нь су́дный, стра́шнаго прише́ствія Его́.

Сѣда́ленъ преподо́бнаго, гла́съ 3. Подо́бенъ: Красотѣ́ дѣ́вства.

Христо́ва уго́дника, ева́нгельскаго уче́нія послу́шника свѣ́тло пра́зднуемъ преподо́бнаго Іо́сифа па́мять. Пріиди́те, ублажи́мъ страннопріи́мца су́ща, сирота́мъ и вдова́мъ засту́пника те́пла и ни́щимъ да́теля неску́дна, цѣлому́дрія храни́теля, и добродѣ́телей дѣ́лателя, и ересе́й обличи́теля непосты́дна, и свѣти́льника Ру́сскаго, его́же ра́ди прося́ще отъ Христа́ душа́мъ на́шимъ спасе́нія и мíру ве́лія ми́лости. [Два́жды.]

Сла́ва, и ны́нѣ, [богоро́диченъ]:

Земноро́дніи Тобо́ю спасе́ни бы́хомъ, Пречи́стая Богоро́дице, пре́жде вѣ́къ бо изъ Отца́ ро́ждшагося Сы́на Бо́жія породила́ еси, за милосе́рдіе мно́гое благоволи́вшаго изъ Тебе́ роди́тися, Иже спасе́ Ада́ма пра́отца и рая́ сотвори́ жи́теля. Его́же моли́, Ма́ти Преблагослове́нная, спасти́ся на́мъ, вѣ́рно пою́щимъ Тя́.

Пѣ́снь 4.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Ты́, преподо́бне Іо́сифе, мона́шествующихъ бы́лъ еси́ вѣне́цъ, не ка́меніемъ многоцѣ́ннымъ укра́шенъ, но добродѣ́тельми обложе́нъ, и яви́лся еси́, блаже́нне, благодарова́нное вои́стину украше́ніе.

Боже́ственную, богому́дре, почти́лъ еси́ Му́дрость, я́же тя́ дарова́ніи благи́ми обогати́, сла́ву вѣ́чную тебѣ́ исхода́тайствовавши, преподо́бне о́тче, Іо́сифе всече́стне.

Свѣ́тлостію нра́вовъ твои́хъ и о́бразы благода́ти, преподо́бне о́тче Іо́сифе, подо́бнѣ пожи́лъ еси́; тѣ́мже благопристу́пенъ ты́ всѣ́мъ бы́лъ еси́, всеблаже́нне досточу́дне.

Богоро́диченъ: Умерщвле́ніе плодо́мъ мнѣ́ Ева принесе́, Ты́ же, Жи́знь ро́ждши Ѵпоста́сную, Пречи́стая, а́біе испра́вила еси́. Тѣ́мже зове́мъ Ти́: сла́ва си́лѣ Твое́й.

Инъ.

Ирмо́съ: Удиви́ся Тво́й ра́зумъ отъ мене́, услы́шавшу пресла́вная велѣ́нія смотре́нія Твоего́, укрѣпи́ся же возлюбле́ніемъ Твоего́ схожде́нія: Ты́ бо моея́ нищеты́ не отве́рглся еси́.

Якоже дре́вле Іо́сифу Прекра́сному зави́дѣвше, бра́тія совѣ́тъ лука́въ умы́слиша, та́ко и на тя́, преподо́бне Іо́сифе, совѣ́товаша лука́вое умышле́ніе. Ты́ же, любо́вію ко Христу́ вперя́емь, си́хъ негодова́нія въ ничто́же вмѣни́въ, непреста́нно моли́ся о на́съ Го́споду.

Изше́лъ еси́, преподо́бне, отъ идѣ́же пре́жде нача́льствуя, Христу́ Царю́ Небе́сному моля́ся и Пречи́стѣй Богоро́дицѣ, ше́ствуя на мѣ́сто, Бо́гомъ тебѣ́ пока́занное, и та́мо пусты́ню населя́еши Христа́ ра́ди, въ не́йже зарю́ свѣ́тлу узрѣ́ти сподо́бился еси́ благода́ти духо́вныя, блаже́нне Іо́сифе.

Преподо́бне о́тче, уподо́бился еси́ Іо́сифу Прекра́сному: не покори́лся бо еси́ сладостра́стію, и зѣло́ тща́лся еси́ о цѣлому́дріи, мы́сленнаго змíя побѣди́лъ еси́, и со́ннаго житія́ небре́глъ еси́, изъ темни́цы тѣ́ла изше́лъ еси́, и ца́рь не Еги́пта, но страсте́й бы́лъ еси́, и добродѣ́тели пшени́цу собра́лъ еси́, е́юже ны́, ча́да твоя́, пита́еши.

Богоро́диченъ: Пречи́стая Богоро́дице, вѣ́мы Тя́, христіа́не, тве́рдую Защи́тницу, и ско́рую Помо́щницу, и въ бѣда́хъ избавле́ніе. Тѣ́мже мо́лимъ Тя́: испроси́ на́мъ у Христа́ мно́жеству согрѣше́ній проще́ніе и вѣ́чныя му́ки избавле́ніе.

Пѣ́снь 5.

Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо Влады́ко, къ свѣтонача́льнику Отцу́ Твоему́, отъ но́щи невѣ́дѣнія, приведе́ніе и́мамы.

Умо́мъ чи́стымъ Писа́ніемъ Боже́ственнымъ бесѣ́довалъ еси́, богоглаго́ливе Іо́сифе, и видѣ́нія и дѣя́нія собра́въ бога́тство, о́тче преподо́бне.

Прему́дрости глубину́ испыта́въ, му́дре Іо́сифе, дости́глъ еси́ обрѣсти́, ели́ко благопотре́бно, и би́серъ многоцѣ́нный болѣ́зньми стяжа́лъ еси́, преблаже́нне, ра́зума.

Аще земно́е оте́чество, блаже́нне Іо́сифе, оста́вилъ еси́, вся́чески благоимени́тну Бо́жіи Ма́тери оби́тель созда́лъ еси́ и мно́жество мона́шествующихъ въ не́й собра́лъ еси́, сего́ ра́ди пе́рвое оте́чество небе́сное прія́лъ еси́. Со дерзнове́ніемъ, о́тче, за ны́ моли́ся Христу́ Бо́гу, рабы́ твоя́.

Богоро́диченъ: Се́ во чре́вѣ, Богоро́дице Пречи́стая, Христа́ Бо́га па́че сло́ва имѣ́ла еси́, я́коже Иса́ія провозгласи́, и вы́ше естества́ Сего́, Богороди́тельнице, родила́ еси́.

Инъ.

Ирмо́съ: Ми́ръ мно́гъ лю́бящимъ Тя́, Христе́, и но́щь просвѣще́нія въ пи́щи слове́съ Твои́хъ: сего́ ра́ди отъ но́щи у́тренююще, про́симъ ми́лости отъ Тебе́, Человѣколю́бче.

Вся́къ пи́сменникъ, научи́вся Боже́ственному Писа́нію, подо́бенъ е́сть Ца́рствію небе́сному; ты́ же, преподо́бне, поревнова́въ ева́нгельскому уче́нію, и отъ сего́ прія́лъ еси́ крѣ́пость духо́вную, Сха́рія евре́ина посрами́лъ еси́ и его́ прокля́тыя ученики́, та́яжде му́дрствующія, и ана́ѳемѣ пре́далъ еси́.

Преподо́бне о́тче, дарова́ тебѣ́ Бо́гъ му́дрость и сло́во ра́зума, ты́ же проповѣ́далъ еси́ въ Тріе́хъ Ли́цѣхъ Еди́наго Бо́га и сему́ свидѣ́тельство приве́лъ еси́ отъ Боже́ственныхъ Писа́ній, науча́я покланя́тися въ Тро́ицѣ Еди́ному Бо́гу.

Преподо́бне о́тче Іо́сифе, безу́мныя еретики́, глаго́лющія, я́ко еще́ Христо́съ не роди́ся, обличи́въ я́сно, сказа́лъ еси́, я́ко роди́ся Христо́съ на́шего ра́ди спасе́нія отъ Пречи́стыя Дѣ́вы Марíи, и на́съ ра́ди пострада́ во́лею распя́тіе, и воскре́се тридне́вно, и па́ки гряде́тъ со святы́ми а́нгелы суди́ти ве́сь мíръ.

Богоро́диченъ: О, безу́мніи еретицы́ и отсту́пницы, и непокори́віи евре́е! Его́же вы́ ча́ете, то́й нѣ́сть Христо́съ, но анти́христъ е́сть, я́коже свидѣ́тельствуютъ Боже́ственная Писа́нія. Мы́ же исповѣ́дуемъ Христа́ Бо́га на́шего, ро́ждшагося неискусому́жно отъ Дѣ́вы Чи́стыя Марíи. Ея́же моли́твами изба́ви на́съ, Христе́, отъ таковы́я пре́лести и спаси́ ду́ши на́ша.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Вселе́ннѣй свѣ́тило пресвѣ́тлое, о́тче, яви́лся еси́, Іо́сифе, словесы́ духо́вными просвѣща́я вѣ́рою и любо́вію къ тебѣ́ притека́ющія.

Блаже́нное житіе́, о́тче, преше́лъ еси́, назда́въ у́бо чу́вства, внѣ́ бы́лъ еси́ мірска́го мяте́жа и Бо́гу прибли́жился еси́, преподо́бне Іо́сифе.

Зѣло́ ми́лостива и страннопріи́мца показа́ тя Спа́съ на́шъ мíру, о́тче, и врача́ боля́щимъ, Іо́сифе, сирота́мъ и убо́гимъ засту́пника любе́зна.

Богоро́диченъ: Па́че естества́, Дѣ́во, родила́ еси́ и вѣ́чнуеши Дѣ́ва, я́вльшися и́стиннаго Сы́на и Бо́га Твоего́ Ма́ти Чи́стая.

Инъ.

Ирмо́съ: Бе́здна послѣ́дняя грѣхо́въ обы́де мя́, и, волне́нія не ктому́ терпя́, я́ко Іо́на Влады́цѣ, вопію́ Ти: отъ тли́ мя возведи́.

Яко свяще́нникъ сы́й пои́стиннѣ, приноси́лъ еси́ Христу́ Бо́гу Же́ртву безкро́вну, та́йно возложе́нную и отъ а́нгелъ сла́вимую, отъ Бо́га Отца́ пріе́млему и Святы́мъ Ду́хомъ осѣня́ему, и на́мъ на спасе́ніе да́руему.

О, безу́мніи еретицы́! Что́ поощря́ете язы́ки богоху́льныя, глаго́люще: не можа́ше ли Бо́гъ не роди́вся спасти́ мíръ ина́ко? Ты́ же, преподо́бне Іо́сифе, си́хъ уста́ загради́лъ еси́, науча́я сла́вити Христа́ Бо́га на́шего.

Преподо́бне о́тче Іо́сифе, еретико́въ уста́ загради́лъ еси́, приводя́ свидѣ́тельства отъ Боже́ственныхъ Писа́ній: пыта́йте, рече́, безу́мніи, Писа́нія, я́ко яви́лася е́сть Свята́я Тро́ица Авраа́му въ Тре́хъ Ли́цахъ, во Еди́номъ Божествѣ́.

Богоро́диченъ: Припа́даемъ Тебѣ́, Пречи́стая Богоро́дице, со умиле́ніемъ глаго́люще: изба́ви ны́, Ма́ти Христа́ Бо́га, вся́кія пре́лести, разлуча́ющія отъ Бо́га, и сподо́би въ де́нь су́дный получи́ти отъ Христа́ ми́лость и не отпа́сти десна́го предстоя́нія.

Конда́къ, гла́съ 8. Подо́бенъ: Взбра́нной.

Житія́ треволне́нія, и мяте́жъ мірскíй, и стра́стная взыгра́нія въ ничто́же вмѣни́въ, пусты́нный граждани́нъ показа́лся еси́, мно́гихъ бы́въ наста́вникъ, Іо́сифе преподо́бне, мона́ховъ собра́тель и моле́бникъ вѣ́ренъ, чистоты́ рачи́тель. Моли́ Христа́ Бо́га спасти́ся душа́мъ на́шимъ.

Икосъ:

Боже́ственными добродѣ́тельми твои́ми себе́, му́дре, украси́лъ еси́ и Спа́са Христа́ жили́ще содѣ́лалъ еси́, о́тче, му́жественнѣ, я́коже зла́то искуси́вся вѣ́рою къ Бо́гу и наде́ждею, и любо́вію, обѣ́ты полага́я: воздержа́ніемъ пости́вся, я́ко безпло́тенъ, въ цѣлому́дріи и въ смире́ніи возвы́сился еси́. Тѣ́мже и мы́, моли́твами твои́ми просвѣ́щшеся, преподо́бне Іо́сифе, вопіе́мъ ти́: ра́дуйся, я́ко измла́да Бо́гу послужи́лъ еси́; ра́дуйся, я́ко притека́ющихъ къ тебѣ́ ко спасе́нію хода́тай бы́лъ еси́; ра́дуйся, Христолюби́вому Импера́тору похвала́; ра́дуйся, я́ко твои́ми моли́твами проти́вніи побѣжда́ются; ра́дуйся, я́ко всѣ́мъ прося́щимъ дае́ши да́ръ, отъ Го́спода дарова́нный тебѣ́; ра́дуйся, я́ко чудесы́ тя́ Бо́гъ прославля́етъ и всѣ́хъ зва́ти тебѣ́ науча́етъ; ра́дуйся, преподо́бне о́тче Іо́сифе, по́стниковъ удобре́ніе, моли́ Христа́ Бо́га спасти́ся душа́мъ на́шимъ.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Благоуха́ютъ, преподо́бне Іо́сифе, твои́хъ уче́ній сла́дкая словеса́ лю́бящимъ та́я, устраша́ютъ же еретико́въ мудрова́нія. Благода́тію бо Свята́го Ду́ха глаго́лалъ еси́, Божество́ Еди́но проповѣ́дуя въ Тре́хъ Ли́цѣхъ. Сло́ва же воплоще́ніе поя́, благоуха́еши на́съ, пребога́те.

Ри́зъ ху́дость имѣ́лъ еси́, преподо́бне Іо́сифе, въ зимѣ́ же и лѣ́тѣ не премѣня́я, болѣ́зненно претерпѣва́лъ еси́, Бо́га ра́ди соверше́нно, тѣ́мже и небе́снаго прія́тія сподо́бился еси́ наслѣ́дникъ бы́ти.

Сло́во твое́ со́лію растворе́но, о́тче, и житіе́ твое́ благода́тію, преблаже́нне, сія́я, яви́ся, пречу́дне, тѣ́мже и въ вы́шнія оби́тели, ра́дуяся, всели́лся еси́, Христу́ со дерзнове́ніемъ ны́нѣ предстои́ши, о на́съ моляся.

Богоро́диченъ: Управля́ющи, Пречи́стая, на́ше житіе́, къ Твоему́ всети́хому приста́нищу напра́ви: Бо́га бо родила́ еси́, благи́хъ Исто́чника, всѣ́мъ подаю́щи вѣ́рнымъ нетлѣ́нія благода́ти.

Инъ.

Ирмо́съ: Отроцы въ Вавило́нѣ пе́щнаго пла́мене не убоя́шася, но, посредѣ́ пла́мене вве́ржени, ороша́еми, поя́ху: благослове́нъ еси́, Го́споди, Бо́же оте́цъ на́шихъ.

Сказу́я, преподо́бне, отъ Боже́ственныхъ Писа́ній, ка́ко и ко́ея ра́ди вины́ подоба́етъ христіа́номъ покланя́тися и почита́ти святы́я ико́ны, и честны́й кре́стъ Христо́въ, и про́чая свяще́нная воображе́нія, си́мъ прія́лъ еси́ отъ Христа́ дарова́нія, поя́: благослове́нъ еси́, Го́споди Бо́же оте́цъ на́шихъ.

Изъ Еги́пта страсте́й изше́лъ еси́, преподо́бне, и преше́лъ еси́ мо́ре жите́йское безъ истопле́нія, и дости́глъ еси́ го́ру небе́сную, мно́гія грѣ́шныхъ ду́ши приводя́ Христу́ покая́ніемъ и поя́: благослове́нъ еси́, Го́споди Бо́же оте́цъ на́шихъ.

Потопи́лъ еси́, преподо́бне, фарао́на мы́сленнаго въ вода́хъ сле́зъ твои́хъ, и его́ колесни́цы, и́же су́ть лука́выя де́моны, и ко́ни и вса́дники, злоу́мныя еретики́ и безбо́жныя, и, ра́дуяся, пѣ́снь побѣ́дную воспѣ́лъ еси́: благослове́нъ еси́, Го́споди Бо́же оте́цъ на́шихъ.

Богоро́диченъ: Азъ, Дѣ́во Чи́стая, къ Тебѣ́ прибѣга́ю, окая́нный, искíй Тобо́ю обрѣсти́ спасе́ніе, вѣ́мъ бо, Пречи́стая Влады́чице, я́ко мо́жеши, ели́ка хо́щеши. Христа́, Его́же родила́ еси́, Пречи́стая, моли́, да бу́детъ на́мъ ми́лостивъ въ де́нь испыта́нія, пою́щимъ: благослове́нъ еси́, Го́споди Бо́же оте́цъ на́шихъ.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Вѣне́цъ благолѣ́пенъ Христо́съ Жизнода́вецъ на ве́рхъ тво́й положи́, тезоиме́нне Іо́сифе. Дѣя́ньми бо просія́лъ еси́ и видѣ́ніи, зовы́й: благослови́те, вся́ дѣла́ Госпо́дня, Го́спода.

Вся́ преше́дъ чу́вственная, преблаже́нне, Уму́ Пе́рвому прибли́жился еси́ души́ твоея́ чистото́ю, житія́ же свѣ́тлостію, вѣнчено́сче Іо́сифе, зовы́й: благослови́те, вся́ дѣла́ Госпо́дня, Го́спода.

Въ души́ твое́й боже́ственное бога́тство Ду́ха Свята́го собра́въ, непоро́чную моли́тву и чистоту́ краснолѣ́пную, бдѣ́ніе и воздержа́ніе, сего́ ра́ди жили́ще Святы́я Тро́ицы яви́лся еси́, преподо́бне Іо́сифе.

Богоро́диченъ: Влады́чице Пречи́стая, грѣ́шниковъ спасе́ніе, пріими́ мольбу́ сію́ и изба́ви мя́ отъ грѣхо́въ мои́хъ, Твоему́ Сы́ну прибѣга́ющаго, моли́твами уго́дника Твоего́, преподо́бнаго Іо́сифа.

Инъ.

Ирмо́съ: Ужасни́ся, боя́йся, не́бо, и да подви́жатся основа́нія земли́: се́ бо въ мертвецѣ́хъ вмѣня́ется въ Вы́шнихъ Живы́й, и во гро́бъ ма́лъ страннопріе́млется. Его́же о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Что́, безу́мніи еретицы́, всу́е мяте́теся, глаго́люще, я́ко уже́ се́дмь ты́сящь лѣ́тъ сконча́шася, Христо́во же прише́ствіе еще́ нѣ́сть? Сія́ глаго́лющихъ де́рзостнѣ обличи́лъ еси́, сказу́я: бли́зъ е́сть, при две́рехъ, прише́ствіе, я́ко глаго́лютъ проро́цы и апо́столи, и́мже сказа́ Святы́й Ду́хъ, и науча́я пѣ́ти: Его́же, дѣ́ти, благослови́те, свяще́нницы, по́йте и превозноси́те во вся́ вѣ́ки.

Стра́шно е́сть впа́сти въ ру́цѣ Бо́га Жи́ва, безу́мніи, не льсти́теся, не крести́тъ Христо́съ по сме́рти спасе́ннымъ креще́ніемъ непра́вѣ о Не́мъ му́дрствующихъ, но во огни́ негаса́ющемъ му́читъ; мы́ же, вѣ́рніи, у Христа́ про́симъ вре́мя покая́нія, да бу́детъ на́мъ ми́лостивъ въ де́нь стра́шнаго Его́ прише́ствія. Сія́, преподо́бне, глаго́лалъ еси́ и на́съ учи́лъ еси́ пѣ́ти: Го́спода, дѣ́ти, благослови́те, свяще́нницы, по́йте и превозноси́те Его́ во вѣ́ки.

Моисе́й вели́кій въ пусты́ни повелѣ́ Изра́илю вы́спрь на мѣ́дный змíй взира́ти, и та́ко угрызе́нія зміи́на избавля́хуся. Ты́ же, преподо́бне, нечести́выя науча́я покланя́тися Кресту́ Животворя́щему, и сла́вити Святу́ю Тро́ицу во Еди́номъ Божествѣ́, и си́мъ избавля́тися пре́лести змíя мы́сленнаго — діа́вола, и на́съ уча́ пѣ́ти: дѣ́ти, благослови́те Го́спода, свяще́нницы, по́йте и превозноси́те Его́ во вѣ́ки.

Богоро́диченъ: Тобо́ю, Пречи́стая Богоро́дице, отъ вся́кія напа́сти избавля́емся, изба́ви ны́, Ма́ти Бо́жія, вѣ́чнаго осужде́нія, да зове́мъ Ти́ немо́лчно: ра́дуйся, купино́ неопали́мая; ра́дуйся, горо́ присѣ́нная; ра́дуйся, запеча́танный исто́чниче; ра́дуйся, Дѣ́во чи́стая, Госпо́дь съ Тобо́ю. Его́же благослови́тъ вся́ тва́рь и превозно́ситъ во вся́ вѣ́ки.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Пречестны́й о́тче Іо́сифе, ны́нѣ чи́сто услажда́ешися пи́щею па́че у́мною, идѣ́же собо́ри святы́хъ о́крестъ Го́спода лику́ютъ, блаже́нне. Иже ны́нѣ чту́щія тя́, хода́тайствуя, къ себѣ́ привлецы́.

Преше́лъ еси́, ра́дуяся, къ жела́ніемъ рая́, ко еди́ному и́стинно я́вѣ блаже́нству, къ пребо́льшей добро́тѣ и къ жи́зни и́стинно нестарѣ́ющейся, и къ Свѣ́ту невече́рнему, богоно́се о́тче Іо́сифе.

Якоже со́лнце, просія́лъ еси́ въ мона́шескихъ собо́рѣхъ, отъ млады́хъ бо ногте́й освяще́нъ бы́лъ еси́, я́коже зарю́, испуща́я добродѣ́тели своего́ житія́, преподо́бне Іо́сифе, богоно́се о́тче пребога́те.

Богоро́диченъ: Разумѣ́вше издале́ча прозорли́выми очесы́, проро́цы Тя́ я́вѣ провозвѣсти́ша, хотя́щую Ма́терь бы́ти Вседѣ́теля и Влады́ки всѣ́хъ. Тѣ́мъ Тя́, Всепѣ́тая, Богоро́дицу исповѣ́дуемъ.

Инъ.

Ирмо́съ: Не рыда́й Мене́, Ма́ти, зря́щи во гро́бѣ, Его́же во чре́вѣ безъ сѣ́мене зачала́ еси́ Сы́на: воста́ну бо, и просла́влюся, и вознесу́ со сла́вою, непреста́нно я́ко Бо́гъ, вѣ́рою и любо́вію Тя́ велича́ющія.

Преподо́бне о́тче Іо́сифе, помина́й на́съ, ча́да твоя́, ко Христу́ Бо́гу на́шему, да спасе́тъ отъ вся́кихъ бѣ́дъ и скорбе́й и сподо́битъ ми́лости и десна́го предстоя́нія въ де́нь су́дный, сла́вити Свое́ Божество́, вѣ́рою и любо́вію Того́ велича́ющія.

Преподо́бне о́тче Іо́сифе, мона́шеское житіе́ возлюби́лъ еси́ и ху́лящихъ то́е уста́ загради́лъ еси́, апо́стола Па́вла я́же къ Тимоѳе́ю словеса́ возвѣща́я, я́ко мона́шеское житіе́ Бо́гу прія́тно е́сть, Ему́же и ты́ си́мъ благоугоди́лъ еси́, сего́ ра́ди тя́ ублажа́емъ.

Яко Іису́съ Нави́нъ подвиза́ся на Іерихо́няны, та́ко ты́, блаже́нне, словесы́ твои́ми безбо́жныхъ уста́ загради́лъ еси́ отсту́пниковъ и мно́гая невѣ́рія укроти́лъ еси́, науча́я сла́вити Святу́ю Тро́ицу, сего́ ра́ди тя́ ублажа́емъ.

Богоро́диченъ: О, Пресвята́я Влады́чице Богоро́дице! Не и́мамы по́мощи ины́я, ра́звѣ Тебе́, моли́ся Сы́ну Твоему́ и Бо́гу на́шему, съ преподо́бнымъ Іо́сифомъ, да соблюде́тъ Импера́тора Правосла́внаго и сохрани́тъ ца́рство Его́ неруши́мо, и да спасе́тъ ны́, вѣ́рою и любо́вію Тя́ велича́ющія.

Свѣти́ленъ преподо́бнаго:

Мірска́го пристра́стія, я́ко скве́рны, уклони́лся еси́, и а́лчбою пло́ть твою́ увяди́лъ еси́, о́тче, и небе́сною сла́вою со а́нгелы обогати́лся еси́. Тѣ́мже непреста́нно моли́ Христа́ Бо́га, преподо́бне Іо́сифе. [Два́жды.]

[Сла́ва, и ны́нѣ, богоро́диченъ: [1]

Вои́стинну Богоро́дицу Тя́ исповѣ́дуемъ, Влады́чице, спа́сшіися Тобо́ю, Бо́га бо неизрече́нно родила́ еси́, разо́ршаго Кресто́мъ сме́рть, къ Себѣ́ же приве́дша преподо́бныхъ собо́ры, съ ни́миже Тя́ восхваля́емъ, Дѣ́во.]

На хвали́техъ стихи́ры на 4, гла́съ 5. Подо́бенъ: Преподо́бне о́тче.

Преподо́бне о́тче,* ду́шу твою́ съ тѣ́ломъ очи́стилъ еси́* и Свята́го Ду́ха прекра́сная оби́тель яви́лся еси́,* и сла́вна тя́ конце́мъ, преблаже́нне Іо́сифе, содѣ́ла,* въ чудесѣ́хъ же вели́ка свѣти́льника,* просвѣти́вшаго су́щія во мра́цѣ невѣ́дѣнія.* Яко наста́вника мно́гихъ мона́ховъ,* соше́дшеся, велему́дренно ублажи́мъ. [Два́жды.]

Яви́лся еси́, богоблаже́нне, му́драя плени́ца,* связу́ющая мно́гая враго́въ ополче́нія,* тѣ́мже и вѣнце́мъ вѣнча́лся еси́ неувяда́емымъ,* весе́ліе и ра́дость вѣ́чную воспрія́лъ еси́,* богому́дре Іо́сифе.* Моли́ дарова́ти ми́ръ мíру* и душа́мъ на́шимъ ве́лію ми́лость.

Преподо́бне о́тче,* тѣле́сныя стра́сти зѣ́льнымъ воздержа́ніемъ* и по́стническими моли́твами же и труды́ успи́лъ еси́,* сле́зными же пото́ки и по́ты у́гліе сладостра́стія погаси́лъ еси́.* Того́ ра́ди въ чудесѣ́хъ сла́вна тя́ показа́ Госпо́дь Россíйскимъ лю́демъ,* Іо́сифе блаже́нне,* и украси́ тя вы́шними дарова́ніи.* Ему́же слу́жиши съ небе́сными си́лами,* Іису́су Человѣколю́бцу и Спа́су ду́шъ на́шихъ.

Сла́ва, гла́съ 6:

Пріиди́те, празднолю́бцы и по́стниковъ сосло́віе, вѣ́рою соше́дшеся, и́стиннаго по́стника дне́сь почти́мъ, ра́достно ше́ствовавшаго по стопа́мъ Влады́ки Христа́, у́зкій пу́ть и безстра́стное житіе́. Якоже дре́вле Авраа́мъ пра́ведный, преподо́бне о́тче Іо́сифе, страннолю́біе притяжа́лъ еси́, та́кожде пресели́лся еси́ отъ оте́чества твоего́ до мѣ́ста, идѣ́же ны́нѣ лежи́тъ честно́е тѣ́ло твое́. Тѣ́мже вси́ притека́юще, вопіе́мъ ти́: о, всеблаже́нне и преподо́бне Іо́сифе, по́стниковъ похвало́ и собѣсе́дниче безпло́тныхъ, Благочести́вому же Импера́тору на́шему [и́мярекъ] на пога́ныя спосо́бниче, и наста́вниче мона́ховъ, и о на́съ моли́ся, рабѣ́хъ твои́хъ, Христу́ Бо́гу на́шему, спасти́ся душа́мъ на́шимъ.

[И ны́нѣ, богоро́диченъ, гла́съ то́йже:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.]


НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, [гла́съ 7]: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́]. Сти́хъ: Си́льно на земли́ бу́детъ сѣ́мя его́. Ева́нгеліе отъ Матѳе́я, зача́ло 43. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.

Примѣчаніе:
[1] См. свѣтиленъ въ службѣ преп. Григорію Пельшемскому.

Источникъ: Слу́жба преподо́бному отцу́ на́шему Іо́сифу, игу́мену Волоцко́му, но́вому чудотво́рцу. — М.: Сѵнода́льная Тѵпогра́фія, 1915. — С. 79-89.

/ Къ оглавленію раздѣла /


Наверхъ / Къ титульной страницѣ

0