Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 20 октября 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 17-й де́нь.
Свята́го проро́ка Осíи и преподобному́ченика Андре́я Кри́тскаго.

[ВЕЧЕРЪ,]
На Го́споди воззва́хъ: стихи́ры, гла́съ 1. Подо́бенъ: Всехва́льніи му́ченицы.

Ду́хъ Святы́й,* отъ Отца́ исходя́щій,* твои́мъ язы́комъ опредѣли́* Христо́во, хотя́щее* въ послѣ́дняя лѣ́та прише́ствіе бы́ти* на обновле́ніе тва́ри.* И ны́нѣ, сбытіе́* ви́дяще прорече́нныхъ,* твою́, проро́че, па́мять почита́емъ.

Во́лею блудя́щее пре́жде* отъ Тебе́, Человѣколю́бче,* естество́ на́ше обручи́въ,* оскверне́нія изба́вилъ еси́ сіе́,* Тебѣ́ Самому́ соедине́ніемъ* совокупи́въ па́че ума́ неразлу́чно.* И сего́ о́бразъ проро́къ Тво́й бы́въ,* пре́жде блудни́цы* цѣлому́дренно ввожда́ше.

Проро́че богоглаго́ливе,* твоя́ глаго́ланія ны́нѣ ви́дя,* испо́лнены благода́тію,* и предстоя́ Бо́гу всѣ́хъ,* о всѣ́хъ моли́ся,* соверша́ющихъ вѣ́рою па́мять твою́,* си́мъ испроша́я* грѣхо́въ проще́ніе* и ми́ръ и ве́лію ми́лость.

Ины стихи́ры преподо́бнаго, гла́съ 4. Подо́бенъ: Яко до́бля.

Прилѣпи́вся отъ ю́ности* Го́споду, блаже́нне,* да́же до конца́ тече́ніе соверши́лъ еси́:* кресто́мъ бо вооружи́вся,* ру́цѣ на ра́ло возложи́лъ еси́* за́повѣдей Госпо́днихъ,* я́коже е́сть пи́сано.* Его́же моли́ отъ тли́ и бѣ́дъ изба́витися* вѣ́рою творя́щимъ* всечестну́ю па́мять твою́.

Ка́мень ины́й прече́стенъ* бы́лъ еси́ вѣ́рою,* не пріе́мъ круше́нія,* и́бо біе́мь и на земли́ валя́яся,* вѣ́ры, сла́вне,* угла́дилъ еси́ пу́ть,* благонасту́пенъ положи́въ,* и возрази́лъ еси́ мнѣ́нія, о́тче,* Константи́нову злу́ю сла́ву,* я́коже гнило́е основа́ніе.

Апо́столовъ догма́ты* воспита́нъ, блаже́нне,* и отце́въ боже́ственныхъ уче́ньми,* Вопло́щшагося почествова́лъ еси́ Бо́га зри́мое* въ зна́меніихъ свяще́нныхъ* и честны́хъ изображе́ніихъ;* тѣ́мже, сла́вне, за сія́ пострада́въ,* благоче́стія показа́лся еси́ учи́тель* и му́чениковъ удобре́ніе.

Сла́ва, и ны́нѣ, богоро́диченъ. Подо́бенъ то́йже:

Яже Бо́га невмѣсти́маго* во чре́вѣ Твое́мъ вмѣсти́вшая,* человѣколю́бно Человѣ́ка бы́вша* и на́ше смѣше́ніе изъ Тебе́ пріи́мша* и обожи́вша я́вѣ,* не пре́зри мене́, Всечи́стая,* ны́нѣ скорбя́ща,* но уще́дри ско́ро* и разли́чный вражды́ же и вре́да лука́ваго свободи́.

Крестобогоро́диченъ. Подо́бенъ то́йже:

Агнца и Па́стыря Тя́ на дре́вѣ я́ко ви́дѣ,* Агница ро́ждшая рыда́ше* и ма́терски Ти́ вѣща́ше:* Сы́не Возжелѣ́нне,* ка́ко на дре́вѣ кре́стнѣмъ повѣ́шенъ еси́, Долготерпѣли́ве?* ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?

Тропа́рь, гла́съ 4:

По́стнически предподвиза́вся на горѣ́, у́мная враго́въ ополче́нія всеору́жіемъ Креста́ погуби́лъ еси́, всеблаже́нне. Па́ки же ко страда́льчеству му́жески обле́клся еси́, уби́въ Копрони́ма мече́мъ вѣ́ры, и обои́хъ ра́ди вѣнча́лся еси́ отъ Бо́га, преподобному́чениче Андре́е, приснопа́мятне.

Сла́ва, и ны́нѣ, богоро́диченъ или́ крестобогоро́диченъ.



НА УТРЕНИ,
Еди́нъ кано́нъ Окто́иха и святы́хъ два.

Проро́ка кано́нъ, его́же краегране́сіе: Осíева пою́ богодухнове́нная словеса́. Ѳеофа́ново. Гла́съ 1.
Пѣ́снь 1.

Ирмо́съ: Помо́гшему Бо́гу во Еги́птѣ Моисе́ови и тѣ́мъ фарао́на со всево́инствомъ погрузи́вшему, побѣ́дную пѣ́снь пои́мъ, я́ко просла́вися.

Яко богоглаго́льникъ вои́стинну, я́ко проро́къ, Осíе, Жизнода́телю предстоя́, прилѣ́жно моли́ся изба́вити искуше́ній вѣ́рно восхваля́ющія тя́.

Твоея́ души́ ви́дительное очи́стивъ отъ скве́рнъ, сподо́бился еси́ прозира́ти свѣ́тло бу́дущая и предглаго́лати нело́жно, сла́вне, сбыва́ющаяся.

Прозрѣ́нія исто́чникъ му́дрость Бо́жія боговѣща́ннаго Осíю проро́чества показа́ рѣку́ неоску́дну, кипя́щу боже́ственная уче́нія.

Богоро́диченъ: Явльшагося Христа́ отъ Дѣ́вы на́съ ра́ди отъ Еги́пта явле́нно Оте́цъ призва́, я́коже прорече́ Осíя дре́вле богови́дительнѣйшій.

Инъ кано́нъ преподо́бнаго, его́же краегране́сіе: Му́жества пою́ тезоимени́таго любо́вію. Іо́сифъ. Гла́съ 2.
Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Му́жески стра́сти плотскíя, о́тче, порабо́тивъ, по́мысломъ му́жества я́ко тезоимени́тъ, мучи́телей суровство́ пора́товалъ еси́ и зако́нно пострада́лъ еси́. Тѣ́мъ тя́ согла́сно, вѣ́рою соше́дшеся, ублажа́емъ.

Мы́сленно, я́ко у́гль, разже́гся теплото́ю Боже́ственнаго Ду́ха, ле́дъ страсте́й раста́илъ еси́, пото́ки же кро́вными о́гнь погаси́лъ еси́ злоче́стія чу́ждій, велича́йше Андре́е, исповѣ́дниче богоблаже́нне.

Связа́вся любо́вію Христа́, о́тче, отъ ю́ности кре́стъ тво́й воспріи́мъ, ра́дуяся, Тому́ послѣ́довалъ еси́, отре́кся себе́ сама́го по́стничествомъ, и исповѣ́даніемъ, и соверше́ннѣйшимъ страда́ніемъ.

Богоро́диченъ: Уны́нія сно́мъ ду́шу всегда́ отягчева́я, къ Твоему́, Дѣ́во Ма́ти Пречи́стая, притека́ю заступле́нію: къ бо́дрости покая́нія воздви́гни, вѣ́чнующаго тогда́ избавля́ющи мя́ муче́нія.

Пѣ́снь 3.

Ирмо́съ: Утверди́ мене́, Христе́, на недви́жимомъ ка́мени за́повѣдей Твои́хъ и просвѣти́ мя свѣ́томъ лица́ Твоего́: нѣ́сть бо свя́тъ па́че Тебе́, Человѣколю́бче.

Уче́ніемъ боголѣ́пнымъ науче́нъ Бо́жія изъявле́нія, язы́ковъ зва́ніе я́вѣ провозгласи́лъ еси́, проро́че, Ду́хомъ Святы́мъ вообража́емь.

Бу́дущая предзрѣ́ти я́ко настоя́щая, богому́дре, сподо́бился еси́, іуде́йское я́сно отпаде́ніе возвѣща́я и зако́нныхъ потребле́ніе.

Изба́витися Изра́илю не бра́нію, ни лу́комъ, ни всеору́жіемъ, но въ Го́сподѣ Бо́зѣ Вседержи́тели проре́клъ еси́, воплоще́ніе Сло́ва зна́менуя на́мъ.

Богоро́диченъ: Ра́дуйся, Дѣ́во Честна́я, заче́ншая Сло́во Воплоще́нное, Свое́ю ны́ изба́вльшаго отъ ле́сти кро́вію свято́ю и тѣ́ломъ.

Инъ.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Утверди́въ ра́зума твоего́ стопы́, о́тче, на ка́мени любве́ Христо́вы, отню́дъ дохнове́ніи не поколеба́лся еси́ проти́вными, вопія́ Творцу́ твоему́: Ты́ еси́ Бо́гъ на́шъ, и нѣ́сть пра́веденъ, па́че Тебе́, Го́споди.

Исцѣле́нія и пре́жде конца́ и по концѣ́ источа́я, помоществу́еши су́щимъ въ не́мощехъ и ду́хи нечи́стыя отго́ниши, Андре́е преподо́бне, вопія́ Созда́телю твоему́: Ты́ еси́ Бо́гъ на́шъ, и нѣ́сть пра́веденъ, па́че Тебе́, Го́споди.

По́стничества слеза́ми омове́нъ, кро́вію му́ченическою удобри́лся еси́, и ве́сь краснѣ́йшъ показа́вся, вопія́, восте́клъ еси́ къ жела́емому: Ты́ еси́ Бо́гъ на́шъ, и нѣ́сть пра́веденъ, па́че Тебе́, Го́споди.

Богоро́диченъ: Пло́ти подо́біемъ бы́вшаго, Отцу́ Единосу́щна Бо́га Сло́ва родила́ еси́, Всенепоро́чная, па́че естества́ Дѣ́ва пребы́вши и по рождествѣ́. Сего́ ра́ди вѣ́рою Тя́ ублажа́емъ.

Конда́къ [преподо́бному], гла́съ 3: Подо́бенъ: Дѣ́ва дне́сь.

Пра́зднуетъ дне́сь Ца́рствующій гра́дъ пра́здникъ пресвѣ́тлый свѣтоно́сныя Твоея́ па́мяти, вся́кій призыва́я гра́дъ и страну́, ра́дуется бо, я́ко имѣ́я сокро́вище ве́ліе, многострада́льное твое́ тѣ́ло, Андре́е му́чениче, Правосла́вія свѣти́льниче.

Та́же сѣда́ленъ, гла́съ 8. Подо́бенъ: Прему́дрости.

Чи́сто се́рдце отъ страсте́й, проро́че, стяжа́въ, я́ко и́стинно орга́нъ бы́лъ еси́ сли́чный Ду́ха, отъ Него́ бога́тно, му́дре, просвѣща́емь, и бу́дущихъ всѣ́хъ зна́ніе пріи́мъ. Тѣ́мъ, соше́дшеся, святу́ю твою́ па́мять вѣ́рно соверша́емъ, Спа́са сла́вяще, Осíе приснопа́мятне: моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

Сла́ва, преподо́бнаго, гла́съ 4. Подо́бенъ: Вознесы́йся.

Въ постѣ́ ди́внаго и страда́ніи восхва́лимъ, вѣ́рніи, по до́лгу, я́ко благоче́стія проповѣ́дника и побо́рника крѣ́пкаго; се́й бо безъ стра́ха гноеиме́нному противля́яся, чествова́тися проповѣ́да Христо́ву о́бразу, я́ко по́стниковъ всѣ́хъ удобре́ніе и му́чениковъ му́жества подо́біе.

И ны́нѣ, богоро́диченъ:

Иже на престо́лѣ херуви́мстѣмъ сѣдя́й и въ нѣ́дрѣхъ Отчихъ водворя́яся, я́ко на престо́лѣ святѣ́мъ сѣди́тъ Свое́мъ, Влады́чице, въ нѣ́дрѣхъ Твои́хъ; вопло́щся бо Бо́гъ вои́стинну, воцари́ся надъ всѣ́ми язы́ки, и разу́мно ны́нѣ пои́мъ Ему́, Его́же умоли́ спасти́ся рабо́мъ Твои́мъ.

Крестобогоро́диченъ:

Изъ Безнача́льнаго Отца́ рожде́ннаго, напослѣ́докъ Тя́ пло́тію Ро́ждшая, на Крестѣ́ ви́сяща, зря́щи, Христе́, — увы́ Мнѣ́, любе́знѣйшій Іису́се, — вопія́ше, — ка́ко сла́вимый я́ко Бо́гъ отъ а́нгелъ, отъ беззако́нныхъ ны́нѣ человѣ́къ, Сы́не, хотя́ распина́ешися? Пою́ Тя, долготерпѣли́ве.

Пѣ́снь 4.

Ирмо́съ: Разумѣ́хъ, Всеси́льне, Твое́ смотре́ніе и со стра́хомъ просла́вихъ Тя́, Спа́се.

Осíе, богови́днѣйшее о́ко церко́вное, бѣ́дъ изба́ви хва́лящія тя́.

Свѣтлѣ́йшее и твердѣ́йшее Ду́ха прія́телище, моли́ся спасти́ воспѣва́ющія тя́.

Судіи́ ты́ всѣ́хъ предстоя́, я́ко боже́ственъ проро́къ, страсте́й мя́ изба́ви моли́твами твои́ми.

Богоро́диченъ: Превозшла́ еси́, Приснодѣ́во, а́нгельскія чи́ны, Творца́ си́хъ чревоноси́вши.

Инъ.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Послушли́въ бы́въ Христо́выхъ за́повѣдей, Того́ подо́бію, о́тче, че́стно поклоня́лся еси́. Тѣ́мъ пребеззако́нный тя́ многообра́зными ра́нами умертви́.

Мѵродохнове́нъ добродѣ́телей благово́ніемъ бы́въ, во гро́бѣ лежа́ благово́нствиши ли́ца призыва́ющихъ тя́ несомнѣ́ннымъ се́рдцемъ, о́тче преподо́бне.

Неду́говавша Мамо́на всезлѣ́йшаго, преподо́бне, окая́нно е́ресію, со дерзнове́ніемъ обличи́лъ еси́, побо́рникъ бы́въ правосла́вныхъ, Андре́е досточу́дне.

Богоро́диченъ: Яко Благопло́дная возрасти́ла еси́ благода́тный Кла́съ, пита́ющій вся́, правосла́вно почита́ющія Тя́, Влады́чице Всепѣ́тая, и изъ Тебе́ вопло́щшагося Сло́ва, Всечи́стая.

Пѣ́снь 5.

Ирмо́съ: Отъ но́щи у́тренююще, воспѣва́емъ Тя́, Христе́ Бо́же, обнища́вшаго на́съ ра́ди, и кре́стъ и сме́рть пло́тію претерпѣ́вшаго.

Ми́лостивно дви́жимь, научи́лъ еси́ на́съ Бо́жію долготерпѣ́нію, благоутро́бію же и бла́гости, е́юже вся́ щади́тъ, проро́че богоглаго́ливе.

Умертви́въ сме́рть, воста́ Христо́съ, я́коже му́дрое твое́ прорече́ніе, богогла́се, провозвѣсти́, и жи́знь су́щимъ во а́дѣ душа́мъ дарова́.

Отъ глубины́ мя́ грѣхо́вныя, проро́че Осíе, твои́ми моли́твами исхи́ти, дерзнове́ніе беззазо́рное ко Христу́ имѣ́я, богому́дре пребога́те.

Богоро́диченъ: Всѣ́хъ Госпо́дь и всѣ́хъ Ца́рь, Отцу́ Собезнача́льный, подъ лѣ́томъ изъ Тебе́ бы́сть, Богоро́дице Дѣ́во, и пло́ть показа́ся.

Инъ.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Омраче́ніе возненави́дѣвъ, о́тче, грѣха́, ве́сь блиста́ніемъ безстра́стія свѣ́тъ яви́лся еси́, и просвѣща́еши вѣ́рныя, приходя́щія боже́ственному твоему́ гро́бу, цѣле́ній заря́ми, Бо́жіею благода́тію.

Ве́сь Бо́жіе прія́телище яви́лся еси́, до́брѣ пожи́въ и доблему́дренно пострада́въ, о́тче, и ны́нѣ, во гро́бѣ лежа́, пребыва́еши цѣ́лъ, блаже́нне, и неразруши́мь, всѣ́хъ вѣ́рныхъ разрѣша́я стра́сти.

Юношески до́блествовавъ, всеблаже́нне, на де́моны и на человѣ́ки ерети́чествующія, вѣ́чнующаго сподо́бился еси́ благосла́вія и вѣнце́въ, Андре́е преподо́бне, тѣ́мъ вѣ́рніи тя́ при́сно ублажа́емъ.

Богоро́диченъ: Но́сиши Христа́ на объя́тіяхъ, неизрече́нно роди́вши, объе́млющаго зло́бѣ прекло́ншіяся и лука́вому окая́нно порабоще́нныя, Отрокови́це Всенепоро́чная, тѣ́мъ Тя́ вѣ́рніи при́сно ублажа́емъ.

Пѣ́снь 6.

Ирмо́съ: Проро́ка спа́слъ еси́ отъ ки́та, Человѣколю́бче, и мене́ изъ глубины́ прегрѣше́ній возведи́, молю́ся.

Провозглаша́я бу́дущая, Осíе всеблаже́нне, е́же къ человѣ́комъ Сло́ва возвѣсти́лъ еси́ соше́ствіе.

Умерщвле́нныя грѣха́ми, Жи́знь Безсме́ртная, отъ а́довыхъ предѣ́лъ, я́коже проре́клъ еси́, возведе́.

Зако́нныхъ отъя́тіе, іуде́евъ отпаде́ніе и язы́ковъ введе́ніе, проро́че, яви́лъ еси́.

Богоро́диченъ: Изъ чре́ва Твоего́ возсія́ Бо́гъ Сло́во, Всенепоро́чная, пло́тію на́съ ра́ди неизрече́нно обло́жся я́ко Благоутро́бенъ.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Въ темни́цу тя́ беззако́нный вве́рже, Влады́кою, Андре́е, сохраня́ема и Того́ соблюда́юща непремѣ́нно Боже́ственное хотѣ́ніе.

Растерза́емо тѣ́ло небре́глъ еси́ и раздробля́емо ра́нами, блаже́нне, но я́коже ино́му стра́ждущу терпѣ́лъ еси́, Боже́ственно укрѣпля́емь.

Яко многоцѣ́нное бога́тство кры́емое, о́тче, явля́ешися, предлежа́ лице́мъ благочести́выхъ, и чудесы́ вся́ обогаща́еши, почита́ющія тя́.

Богоро́диченъ: Разу́мный Тя́ свѣ́щникъ прозря́ще дре́вле проро́къ, Боже́ственную Свѣщу́ — Христа́, Чи́стая, нося́щу, Имже вси́ мы́ просвѣти́хомся.

Конда́къ, гла́съ 8. Подо́бенъ: Взбра́нной.

Му́жества тезоимени́тому благодаре́ніе, я́ко благоче́стія тайноглаго́льнику, похва́льная воззове́мъ отъ любве́ тебѣ́, богоблаже́нне, но́ я́ко имѣ́я дерзнове́ніе ко Го́споду, отъ вся́кихъ лю́тыхъ ны́ спаси́, да пое́мъ: ра́дуйся, о́тче приснопа́мятне.

Икосъ:

Ангелъ и́стины отъ Кри́та яви́лся еси́, обличи́въ злоче́стія, о́тче, и съ богосло́внымъ гла́сомъ, ра́нима тя́ зря́, всему́дре, ужаса́юся стра́сти, зовя́ и вопія́ ти́ сицева́я: ра́дуйся, Бо́жій крѣ́пкій ору́жниче; ра́дуйся, Госпо́день вѣ́рный уго́дниче; ра́дуйся, ху́льныхъ враго́въ сопротивобо́рниче; ра́дуйся, злоглаго́ливыхъ человѣ́ковъ обузда́ніе; ра́дуйся, я́ко пострада́лъ еси́ за о́бразъ Христо́въ; ра́дуйся, я́ко восхласти́лъ еси́ сла́сти плотскíя; ра́дуйся, я́ко поще́ніемъ нача́ла тмы́ побѣди́лъ еси́; ра́дуйся, я́ко страда́ніемъ Копрони́му сопроти́вился еси́; ра́дуйся, исто́чниче чуде́съ приснотеку́щій; ра́дуйся, зе́млю уясни́вый страда́ньми твои́ми; ра́дуйся, вѣ́рныхъ жили́ще, о́тче; ра́дуйся, на́шъ предста́телю и изба́вителю; ра́дуйся, о́тче приснопа́мятне.

Пѣ́снь 7.

Ирмо́съ: Авраа́мстіи о́троцы въ пещи́ Тро́ицу прообрази́вше, о́гненный пла́мень на ро́су преложи́ша, и пою́ще, вопія́ху: благослове́нъ еси́, Бо́же оте́цъ на́шихъ.

Па́че естества́ просвѣще́ніемъ, Осíе, у́мъ просвѣти́въ тво́й, бу́дущихъ, блаже́нне, зна́ніемъ обогати́лся еси́, Влады́цѣ зовы́й: благослове́нъ еси́, Бо́же оте́цъ на́шихъ.

Ты́ въ рука́хъ проро́ковъ уподо́бився, умно́жилъ еси́, Безсме́ртне, видѣ́нія, Спа́се, разли́чно образу́емь, Тебѣ́ вѣ́рно вопію́щимъ: благослове́нъ еси́, Бо́же оте́цъ на́шихъ.

Изра́илевъ ты́ исто́чникъ, спасе́нія пролива́ющій во́ды, рѣку́ ми́рную — Христа́ проповѣ́дая, Осíе, Ему́же вопіе́мъ: благослове́нъ еси́, Бо́же оте́цъ на́шихъ.

Богоро́диченъ: Изъ Безнача́льнаго Отца́ возсія́въ, изъ Тебе́ воплоти́ся, Богома́ти Отрокови́це, за ми́лость неизрече́нную, Ему́же пою́ще, вопіе́мъ: благослове́нъ еси́, Бо́же оте́цъ на́шихъ.

Инъ.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Возвыша́емая волне́нія лука́вствія твоего́ ума́ не поколеба́ша, Андре́е сла́вне, на ка́мени зна́нія Христо́ва стоя́ща. Тѣ́мъ небу́рное приста́нище я́вѣ обурева́емымъ бы́лъ еси́.

Бу́ими взыска́ньми лукавому́дрый, умо́мъ омрача́емый, укра́сти окуша́шеся тя́, богосло́вія свѣтлостьми́ удобря́ема, но яви́ся смѣ́ха досто́инъ, му́дре, испо́лнився студа́ дерзнове́ніемъ твои́мъ.

Умъ тво́й манове́ньми Боже́ственнѣйшими украша́емь, Андре́е досточу́дне, звѣзда́ всесвѣ́тлая всѣ́мъ показа́ся, чудесы́ коего́ждо вѣ́рныя просвѣща́я, хва́лящія тя́.

Богоро́диченъ: Хра́мъ была́ еси́ Жива́го Бо́га, въ не́мже жили́ще неизглаго́ланно сотвори́, Дѣ́во Всепѣ́тая, на небесѣ́хъ обита́яй, и бла́гости ра́ди мно́гія Человѣ́къ бы́ти изво́ливъ.

Пѣ́снь 8.

Ирмо́съ: Въ пла́мени о́гненнѣ горя́щія пе́щи сохра́ншаго дѣ́ти, и во зра́цѣ а́нгела снизше́дшаго къ ни́мъ, по́йте Го́спода и превозноси́те Его́ во вѣ́ки.

Па́че постиже́нія проро́комъ да́нная отъ Боже́ственнаго да́ра предзна́тельное дѣ́йство и бу́дущихъ зна́ніе, пѣ́ти Го́спода и превозноша́ти Его́ во вѣ́ки.

Уста́ богодохнове́нная стяжа́въ и язы́къ богоглаго́ливъ, Осíе, богоче́стія свѣ́тъ просвѣща́ющь пое́ши: по́йте Го́спода и превозноси́те Его́ во вѣ́ки.

Словесы́ и дѣя́ньми проро́чествуя, облича́еши лю́ди блу́дствовавшія, обра́зно, пребога́те, науча́я пѣ́ти: по́йте Го́спода и превозноси́те Его́ во вѣ́ки.

Богоро́диченъ: Соприсносу́щное Бо́жіе Бо́гъ Сло́во, отъ Святы́я Дѣ́вы вопло́щся, яви́ся вѣ́рою вопію́щимъ: по́йте Го́спода и превозноси́те Его́ во вѣ́ки.

Инъ.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Стра́сти плотскíя, му́дре, предъумертви́въ по́стническими по́двиги, пострада́лъ еси́, крѣпча́йше, Спа́сово подо́біе и Приснодѣ́вы, преподо́бне, и святы́хъ чествова́тельно лобыза́я.

Яростно на Христа́ неи́стовствующе, я́ко звѣ́ріе свирѣ́піи, возложи́ша, о́тче, умертви́ти тя́. Тѣ́мъ влеку́ще и бію́ще, вверго́ша въ про́пасть, свидѣ́теля Истины тебе́ я́вственно содѣ́ловающе.

Чудесы́ вѣ́рныя, я́ко вода́ми, напая́еши, и отго́ниши, всеблаже́нне, лука́вствія ду́хи, и очища́еши неду́ги, благода́ть врачева́ній свы́ше пріе́мъ отъ Христа́ Бо́га на́шего.

Богоро́диченъ: Яви́лася еси́ небе́съ, Дѣ́во, простра́ннѣйши, Бо́га во утро́бѣ Твое́й вмѣсти́вшая, всѣ́ми Невмѣсти́маго, Его́же моли́ изба́вити утѣсне́нія, Чи́стая Влады́чице, душетлѣ́ннаго благоче́стно воспѣва́ющія Тя́.

Пѣ́снь 9.

Ирмо́съ: Ра́дуйся, дѣ́вственная похвало́, ра́дуйся, Ма́ти Пречи́стая, Юже вся́ тва́рь боже́ственными пѣ́сньми велича́емъ.

Че́сть, я́ко проро́къ, прія́лъ еси́, Осíе, пріе́мъ вѣне́цъ благолѣ́пія отъ Бо́га, всеблаже́нне.

Всѣ́мъ свѣ́томъ озаря́емь Христо́вымъ всеизря́дне, да́ждь твои́ми моли́твами Сего́ ми́лостива пою́щимъ тя́.

Хвала́ми съ чи́нми а́нгельскими, Осíе, предстои́ши, Влады́ку хваля́, пожи́въ житіе́ равноа́нгельное.

Богоро́диченъ: Спасти́ восхотѣ́въ человѣ́ка Спа́съ и Госпо́дь, отъ Пречи́стыя Дѣ́вы въ пло́ть на́шу одѣ́яся.

Инъ.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Се́, о́тче преподо́бне, тече́ніе твое́ соверши́въ, Правосла́вную вѣ́ру соблю́лъ еси́ непоро́чну, ея́же ра́ди пострада́въ зако́нно, вѣне́цъ же сугу́бъ прія́лъ еси́ свы́ше, я́ко му́ченикъ непобѣди́мь и по́стникъ непобо́ренъ.

Яко кри́нъ сладково́нный и я́ко шипо́къ, о́тче, процвѣ́лъ еси́ въ цвѣ́тницѣ боже́ственнаго я́вѣ поще́нія, и благово́нствуеши, я́ко ке́дръ, му́ченически просвѣще́нъ, Андре́е всехва́льне, мона́шествующихъ удобре́ніе.

Зна́меньми и чудесы́ я́вѣ украша́емь, невреди́мь еси́ всѣ́мъ на видѣ́ніе лежа́, всеблаже́нне Андре́е, и ду́ши просвѣща́я вѣ́рою те́плою приходя́щихъ тебѣ́, и всегда́ блажа́щихъ тя́.

Де́нь пра́зднственъ и весе́лія испо́лненъ, святу́ю твою́ па́мять творя́ще дне́сь, вѣ́рою вопіе́мъ тебѣ́, о́тче: къ Бо́гу святы́ми твои́ми моли́твами всѣ́хъ на́съ изба́ви жите́йскихъ обстоя́ній.

Богоро́диченъ: Свѣ́та селе́ніе утро́ба Твоя́ бы́сть, просвѣ́щшаго мíръ заря́ми Божества́ и невѣ́дѣнія тму́ отъ земли́, Всенепоро́чная Отрокови́це, соверше́нно отгна́вшаго, Того́ ра́ди Тя́ сла́вимъ.

Свѣти́ленъ. Подо́бенъ: Со ученики́ взы́демъ.

Андре́я добропобѣ́дника похва́лимъ вси́, боже́ственно пра́зднующе честну́ю его́ па́мять, я́ко да изба́вимся отъ неду́гъ; се́й бо Спа́сова честна́я воображе́нія и святы́хъ всѣ́хъ всеблагоче́стно чествова́ти проповѣ́да. Тѣ́мъ, вѣне́цъ на небесѣ́хъ пріе́мь, со а́нгелы ра́дуется.

Богоро́диченъ:

Го́ру Бо́жію пресвяту́ю, и свѣти́льникъ, и ста́мну, и трапе́зу, и мо́стъ, же́злъ же, и свѣщу́, и Боже́ственный престо́лъ, и две́рь, и хра́мъ, и черто́гъ воспои́мъ, богому́дріи, Чи́стую и Дѣ́ву, изъ Нея́же Бо́гъ, воплоти́вся невра́щно и па́че естества́, обожи́ прія́тіе неизрече́ннымъ едине́ніемъ.

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 143-149.

/ Къ оглавленію раздѣла /


Наверхъ / Къ титульной страницѣ

0