Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 25.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 16-й де́нь.
Свята́го му́ченика Ло́нгина со́тника, и́же при Крестѣ́ Госпо́дни.

[ВЕЧЕРЪ,]
На Го́споди воззва́хъ: стихи́ры, гла́съ 8. Подо́бенъ: О, пресла́внаго чудесе́!

Му́чениче Ло́нгине всехва́льне,* крове́й очервле́ніи* спаси́тельную себѣ́ ри́зу обагри́лъ еси́,* болѣ́зненными страда́ніи* обнажи́въ многоко́зненнаго.* И ны́нѣ въ вы́шнѣмъ живе́ши Ца́рствіи,* вѣнце́мъ неувя́днымъ увѣнча́вся,* я́ко побѣди́тель,* тѣ́мъ твою́ сла́вную па́мять почита́емъ.

Му́чениче Ло́нгине всехва́льне,* на Крестѣ́ Сы́на Бо́жія узрѣ́въ,* стра́ждуща во́лею* и сме́рти вкуша́юща,* егда́ и со́лнце ви́дѣлъ еси́,* свѣ́тъ сво́й омрачи́вшее,* и го́ры трепе́щущія,* тогда́ взыва́лъ еси́ іуде́йскому собо́рищу:* и́стинно Сы́нъ Бо́жій Сей е́сть* и Госпо́дь и Ца́рь всѣ́хъ.

Мече́мъ главу́ твою́ отсѣко́ша евре́йстіи лю́діе,* пребеззако́нный со́нмъ,* наро́дъ неблагода́рный,* въ гнои́ пове́ргше,* и у́бо жена́ неви́дящая прите́кши,* и сію́ взе́мши, свѣ́тъ пріе́млетъ.* О, всеблаже́нне Ло́нгине всехва́льне,* за ны́ моли́ся ко Го́споду,* е́же спасти́ся на́мъ.

Сла́ва, гла́съ 6. Іоа́нна мона́ха:

Въ стра́сти Твое́й, Христе́, хра́мъ узрѣ́въ разсѣ́дшся, Ло́нгинъ стонача́льникъ, Сы́на Бо́жія Тя бы́ти іуде́емъ проповѣ́даше. Тѣ́мъ лю́тіи боже́ственную главу́ его́ отсѣ́кше мече́мъ, въ гнои́ поверго́ша, жена́ же, сію́ обрѣ́тши, затворе́нныя зѣ́ницы оче́съ свои́хъ отве́рзе. Съ не́юже и мы́ вопіе́мъ Ти́: Иже сего́ вѣнча́вый, за Тя́ пострада́вша, того́ моли́твами и на́ша очеса́ серде́чная просвѣти́ сла́вити Тя́ Бо́га, на Крестѣ́ пригвожде́ннаго пло́тію, во е́же спасти́ на́съ.

И ны́нѣ, богоро́диченъ или́ крестобогоро́диченъ. Подо́бенъ: Все́ отло́жше.

Агнца Своего́* Агница нескве́рная дре́вле* и непоро́чная Влады́чица* на дре́вѣ кре́стнѣмъ я́ко узрѣ́,* ма́терски восклица́ше,* и дивя́щися, вопія́ше:* Ча́до Сладча́йшее,* что́ зрѣ́ніе сіе́ но́вое и пресла́вное?* ка́ко со́нмъ безблагода́тный* суди́щу Пила́тову предаде́ Тя* и осужда́етъ на сме́рть Живота́ вся́ческихъ?* но воспѣва́ю Твое́ неизрече́нное,* Сло́ве, снизхожде́ніе.

На стихо́внѣ окто́иха. Сла́ва му́ченика, гла́съ 6. Іоа́нна мона́ха.

При Крестѣ́ предстоя́ и быва́ющая смотря́я, распина́ема на дре́вѣ Бо́га и Человѣ́ка ви́дѣвъ, вопія́лъ еси́ къ Нему́: во Ца́рствіи Твоемъ помяни́ мя, Го́споди. Тѣ́мъ и Спа́съ приглаша́ше тебѣ́: блаже́нъ еси́, Ло́нгине, и па́мять твоя́ въ ро́дъ и ро́дъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Ви́дящи Тя́ распина́ема, Христе́, Тебе́ Ро́ждшая вопія́ше: что́ стра́нное е́же ви́жу та́инство, Сы́не Мо́й? ка́ко на дре́вѣ умира́еши пло́тію повѣ́шенъ, жи́зни Пода́телю?

Тропа́рь, гла́съ 4:

Му́ченикъ Тво́й, Го́споди, Ло́нгинъ, во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.


НА УТРЕНИ,
Оба кано́на окто́иха и свята́го кано́нъ, его́же краегране́сіе: Ло́нгинову вели́кую воспою́ сла́ву. Іо́сифъ. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Боже́ственными свѣтоли́тіи, сла́вне, просвѣща́емь и со а́нгельскими чи́нми Христу́ Богу предстоя́, свѣтоно́сную па́мять твою́ соверша́ющія просвѣти́.

Ничто́же тебе́ къ Бо́гу едине́нія, му́чениче, разлучи́, отлуче́на вся́кія плотскíя сла́сти вѣ́рою, и чи́сто жела́нія кра́йнѣйшаго наслажда́ешися.

Служа́ Бо́гу Живо́му, всему́дре, ума́ чистото́ю, ме́ртвымъ куми́ромъ, блаже́нне, ника́коже слу́жбы прине́слъ еси́. Тѣ́мъ къ безконе́чнѣй жи́зни, умерщвле́нъ, преше́лъ еси́.

Богоро́диченъ: Сло́во Отчее во утро́бѣ Твое́й сло́вомъ зачала́ еси́, безслове́сія изба́вити земны́я восхотѣ́въ благосты́нею, Дѣ́во Ма́ти Пречи́стая, Благослове́нная, Всенепоро́чная.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Позна́въ на Крестѣ́ Сы́на Бо́жія, и́стиннаго Го́спода, за ны́ стра́ждуща, въ Того́ вседу́шно вѣ́ровалъ еси́.

Земля́, я́коже напоена́, пріи́мши слове́сная сѣ́мена, твоя́ душа́ кла́съ, му́дре, зрѣ́лъ боже́ственнаго благоче́стія возрасти́ла е́сть.

Вѣ́триломъ Креста́ му́къ стра́стную преплы́въ пучи́ну, ти́хая приста́нища пости́глъ еси́, сла́вне, веселя́ся.

Богоро́диченъ: Неду́гующую мою́ ду́шу страсте́й нанесе́ньми исцѣли́, Ма́ти Бо́жія Пречи́стая, и ко спасе́нію напра́ви.

Сѣда́ленъ, гла́съ 8. Подо́бенъ: Прему́дрости.

Распина́ема ви́дѣлъ еси́ Изба́вителя, и Того́ заря́ми освѣти́вся, тмы́ избѣ́глъ еси́ неразу́мія глубоча́йшія и къ Боже́ственному ра́зуму себе́ сочета́лъ еси́, вѣ́ровавъ, я́ко е́сть Бо́гъ Ви́димый. Тѣ́мъ и пострада́въ, лико́мъ причи́слился еси́, Ло́нгине блаже́нне, му́ченическимъ, ра́дуяся. Съ ни́миже всегда́, сла́вне, моли́ся Христу́ Бо́гу, согрѣше́ній оставле́ніе пода́ти чту́щимъ любо́вію святу́ю па́мять твою́.

Сла́ва, и ны́нѣ, богоро́диченъ:

Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому заступле́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, изъ Тебе́ Воплоще́нному безсѣ́менно моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихтися, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти, воспѣва́ющимъ досто́йно сла́ву Твою́.

Крестобогоро́диченъ:

Агнца, и Па́стыря и Изба́вителя, Агница зря́щи на Крестѣ́, восклица́ше, пла́чущи, и го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе, вѣ́рою пою́щимъ Боже́ственныя Стра́сти Твоя́.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Крѣпча́йшій стяжа́въ въ вѣ́рѣ смы́слъ, блаже́нне, некрѣ́пкую пре́лести разруши́лъ еси́ тве́рдость, и ра́дуяся, взыва́лъ еси́: сла́ва си́лѣ Твое́й, Го́споди.

Возвыше́на и къ дре́ву пригвожде́на Безстра́стнаго зря́ Го́спода сла́вы, Того́ исповѣ́далъ еси́ Сы́на Бо́жія, сла́вне, стра́ждуща Свое́ю во́лею.

Увяда́ему сме́рть сме́ртію Безсме́ртнаго ви́дѣвъ, потща́лся еси́, Ло́нгине, Его́ ра́ди умре́ти и жи́ти по сме́рти со благосла́вно пострада́вшими.

Богоро́диченъ: Уедини́вшася по ѵпоста́си во чре́вѣ Твое́мъ и бы́вша Человѣ́ка, Пречи́стая, Сло́ва, па́че сло́ва, родила́ еси́, сугу́ба хотѣ́ньми и дѣ́йствы явля́емаго.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Земли́ вся́кія вои́стинну бы́въ пришле́цъ, въ я́звахъ страстоте́рпческихъ украси́лся еси́, Ло́нгине, и на земли́ кро́ткихъ всели́лся еси́.

Возмо́глъ еси́, Креста́ си́лою укрѣпля́емь, немощно́е мучи́телей, страстоте́рпче Ло́нгине, побѣди́ти безу́міе.

Поста́вивъ на тве́рдѣмъ основа́ніи се́рдце твое́, всехва́льне, колеба́нія искуше́ній волне́ніемъ неколе́бленъ пребы́лъ еси́.

Богоро́диченъ: Еди́ну, Бо́га Ро́ждшую неискусому́жно, воспои́мъ Дѣ́ву, Еюже спасе́ни бы́вше, и вѣ́рою ублажи́мъ.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Го́ры же и зе́млю колеба́вшуюся ви́дѣвъ въ Стра́сти де́нь, невѣ́рствіемъ стоя́нія поколеба́лся еси́ и вѣ́рою утверди́лся еси́, Ло́нгине, Стра́ждущаго.

Ра́зумъ и́стинный и соверше́нъ, и смы́сленъ воспрія́ти возмо́глъ еси́, ви́дя тва́рь измѣня́ющуся, и къ Боже́ственному измѣни́лся еси́, Ло́нгине, позна́нію.

Претерпѣ́лъ еси́ лю́тую му́ку, ра́дуяся, и вы́ю мечу́ несомнѣ́нною мы́слію преклони́лъ еси́, усѣка́я главы́ враго́въ вѣ́рою.

Богоро́диченъ: Изсуши́ и изъ ко́рене, Всенепоро́чная, исто́ргни терно́вныя по́мыслы се́рдца моего́, и плодоно́сно сіе́ покажи́ хода́тайствомъ Твои́мъ, Отрокови́це Всечи́стая.

Конда́къ, гла́съ 4. Подо́бенъ: Яви́лся еси́.

Ве́село возра́довася Це́рковь въ па́мяти дне́сь приснопа́мятнаго страда́льца Ло́нгина, взыва́ющи: Ты́ моя́ держа́ва, Христе́, и утвержде́ніе.

Икосъ:

Не́бо, тмо́ю мно́гою омрача́емо, и зе́млю трясу́щуся, и ка́меніе разсѣда́ющася, хра́ма же катапета́сму раздира́ющуся на дво́е ви́дѣвъ, въ Боже́ственнѣй Стра́сти Христо́вѣ Ло́нгинъ, Бо́жія Сы́на позна́, стра́ждуща Свои́мъ благоутро́біемъ, безстра́стна же су́ща Божество́мъ, и Сла́вою со Отце́мъ и Ду́хомъ Святы́мъ содержа́щаго все́ и объе́млюща, я́ко Бо́га и́стинна и Царя́. Тѣ́мъ ра́достно страда́лецъ зовя́ше: Ты́ моя́ держа́ва, Христе́, и утвержде́ніе.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Зако́нно пострада́въ, му́чениче, му́жескимъ нра́вомъ души́, вся́ беззако́ннующихъ посрами́лъ еси́ совѣ́ты и зако́нно вѣнча́лся еси́, благослове́нъ еси́, вопія́, въ хра́мѣ сла́вы Твоея́, Го́споди.

Боже́ственная благода́ть, наше́дши моще́мъ твои́мъ, вся́ку болѣ́знь рѣши́тъ благочести́во приходя́щихъ къ тебѣ́, блаже́нне, и проповѣ́дающихъ тя́, и́стины непобѣди́маго свидѣ́теля.

Пло́ти умира́ющія не пощади́лъ еси́, Ло́нгине, за Христа́, жре́ти отре́клся еси́ де́мономъ и тебе́ сама́го Бо́гу же́ртву непоро́чну, ра́дуяся, прине́слъ еси́, мече́мъ посѣ́ченъ, досточу́дне.

Богоро́диченъ: Яко Чи́стую Тя́, Чи́стое Сло́во обрѣ́тъ, всели́ся, Дѣ́во, Тобо́ю очи́стити скве́рны человѣ́ковъ изво́ливъ: благослове́нъ бо Пло́дъ чре́ва Твоего́.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Успи́въ пре́жде плотска́я двиза́нія, сла́вне, бдѣ́ньми, су́щими ко Го́споду, усну́лъ еси́ сла́дкимъ сно́мъ, блаже́нне, умертви́вся Христа́ ра́ди, на дре́вѣ кре́стнѣмъ сно́мъ Боже́ственнымъ, ме́ртвымъ жи́знь источи́вшаго.

Копіе́мъ прободе́на въ ре́бра, блаже́ннѣйше, я́ко ви́дѣлъ еси́, и кро́вь и во́ду источи́вша, Христа́ Человѣ́ка, за милосе́рдіе, бы́вша, и уя́звенъ бы́лъ еси́ Того́ сла́дкимъ жела́ніемъ, воспѣва́я: благослови́те вся́ дѣла́ Госпо́дня Го́спода.

Погаси́лъ еси́ огни́ще и́дольское крове́й тече́ньми, Ло́нгине всему́дре, и поже́глъ еси́ куми́ры, и нетве́рдая чти́лища, Боже́ственною ре́вностію ду́шу возпали́въ и взыва́я: благослови́те вся́ дѣла́ Госпо́дня Го́спода.

Очи серде́чныя просвѣти́въ Боже́ственными сія́ньми, омрачи́вшагося Со́лнца всесвѣ́тлое сія́ніе, мра́къ усе́рдно оста́вилъ еси́ злоче́стія и звѣзда́ яви́лся еси́, му́дре, просвѣща́ющая вопію́щія: благослови́те вся́ дѣла́ Госпо́дня Го́спода.

Богоро́диченъ: Усты́ и язы́комъ, и душе́ю проповѣ́даю Тя́, Богороди́тельницу, и молю́ Тя́, Пречи́стая: се́рдце мое́ озари́ свѣ́томъ Твои́мъ и лю́тыя мя́ тмы́ свободи́, вопію́ща: благослови́те вся́ дѣла́ Госпо́дня Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Крѣ́пость моя́ и пѣ́ніе — Сло́во, Иже на Крестѣ́ ру́цѣ распростры́й, — му́чениче, беззако́ннымъ вопія́лъ еси́, — Того́ стра́сть всеблаже́нную изобразу́я, сме́рть во́лею пріе́млю.

Яко предо́брый страстоте́рпецъ обда́рствованъ страстьми́ Боже́ственными, ве́сь краснѣ́йшъ яви́лся еси́ и кра́сному Сло́ву предстои́ши, воздая́нія болѣ́зней твои́хъ богатѣ́йше воспріе́мля.

Тя́, сія́ніемъ страсте́й со́лнце незаходи́мое я́вльшася и заря́ми исцѣле́ній вселе́нную всю́ просвѣти́вшаго, и мра́къ разгна́вша неразу́мія, ублажа́емъ.

Взя́лся еси́ ко оби́телемъ вѣ́чнымъ и лико́мъ сочи́слился еси́ всѣ́хъ святы́хъ му́чениковъ, съ ни́миже, му́чениче Ло́нгине, на́съ помина́й, благоче́стно па́мять твою́ пра́зднующихъ, всеблаже́нне.

Богоро́диченъ: Свѣ́та невече́рняго яви́лася еси́ жили́ще, Богоро́дице, Имже во тмѣ́ су́щіи и сѣ́ни грѣха́ свѣ́тъ узрѣ́ша: тѣ́мъ и моя́ просвѣти́ серде́чная чу́вствія.

Свѣти́ленъ:

На Крестѣ́ ви́сяща я́ко узрѣ́лъ еси́, вся́ Содержа́щаго ма́ніемъ и совѣ́томъ неизрече́ннымъ, удиви́лся еси́ чудеси́ и Сы́на нарица́лъ еси́ Бо́га небе́снаго: Его́же сла́вы досто́йно по подо́бію и́стинно прича́стникъ бы́лъ еси́.

Богоро́диченъ:

Да сла́влю, Пречи́стая, Твою́ нера́тную благода́ть, мно́гими прегрѣше́ньми впа́дшійся безу́мно: пости́гни ско́ростію Твое́ю и Твое́ю мя́ крѣ́постію исхити́ грѣхопаде́ній, я́ко спаса́еши, я́же хо́щеши, отъ вся́ческихъ скорбе́й си́лою Твое́ю непобори́мою.


НА ЛИТУРГІИ,

Проки́менъ, гла́съ 7: Возвесели́тся пра́ведникъ о Го́сподѣ, [и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́]. Апо́столъ къ Тимоѳе́ю, зача́ло 292. Аллилу́ія, гла́съ 4: Пра́ведникъ я́ко фи́никсъ [процвѣте́тъ, я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни во дво́рѣхъ до́му Бо́га на́шего процвѣту́тъ]. Ева́нгеліе Матѳе́я, зача́ло 113. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 138 об. – 142 об.

/ Къ оглавленію раздѣла /


Наверхъ / Къ титульной страницѣ

0