Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 27 апрѣля 2017 г. Сейчасъ на порталѣ посѣтителей - 5.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 15-й де́нь.
Слу́жба и́же во святы́хъ отцу́ на́шему Іоа́нну епи́скопу, Су́ждальскому чудотво́рцу.

НА МАЛѢЙ ВЕЧЕРНИ,
[На Го́споди воззва́хъ:] стихи́ры [на 4], гла́съ 1. Подо́бенъ: Прехва́льніи му́ченицы.

Святи́телю о́тче Іоа́нне, до́брая исправле́нія житія́ твоего́ помина́ющихъ на́съ, и та́ хвале́бно воспѣва́ющихъ не пре́зри, егда́ взыва́емъ ти́: Христа́ моли́ дарова́ти душа́мъ на́шимъ ми́ръ и ве́лію ми́лость.

Святи́телю о́тче Іоа́нне, смире́ніемъ стяжа́въ высо́кая, и въ небе́сныхъ вселя́яся оби́телехъ, пріими́ на́ше усе́рдное тебѣ́ чествова́ніе, и Христа́ Бо́га умоли́ дарова́ти душа́мъ на́шимъ ми́ръ и ве́лію ми́лость.

Сла́ва, гла́съ 8:

Образъ благоче́стія въ житіи́ твое́мъ яви́лъ еси́ на́мъ, по преставле́ніи же исто́чникъ исцѣле́нія въ честны́хъ моща́хъ твои́хъ откры́лъ еси́ на́мъ, преблаже́нне святи́телю Іоа́нне. Тѣ́мже житію́ твоему́ подража́ти ревну́юще, мо́лимъ тя́: Христа́ Бо́га моли́ спасти́ ду́ши на́ша.

[И ны́нѣ, богоро́диченъ, гла́съ то́йже:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.]

На стихо́внѣ стихи́ры, гла́съ 4:

Презира́тель до́льнихъ и рачи́тель го́рнихъ, земны́й а́нгелъ и небе́сный граждани́нъ, Іоа́ннъ богому́дрый всѣ́хъ на́съ пра́здновати призыва́етъ спаси́тельный де́нь къ Бо́гу отше́ствія своего́.

Сти́хъ: Уста́ моя́ возглаго́лютъ [прему́дрость и поуче́ніе се́рдца моего́ ра́зумъ].

Боже́ственнаго Ду́ха испо́лненъ, ева́нгельски возлюби́лъ еси́ лю́ди своя́, ми́лость и благоутро́біе всѣ́мъ скорбя́щимъ отверза́я, и ни́щимъ засту́пникъ быва́я; тѣ́мъ мо́лимся ти́, о́тче Іоа́нне, моли́ Христа́ Бо́га спасти́ся душа́мъ на́шимъ.

Сти́хъ: Свяще́нницы Твои́ облеку́тся въ пра́вду и преподо́бніи Твои́ возра́дуются.

Премíрнаго возжела́въ живота́, житіе́ благоче́стно на земли́ соверши́лъ еси́, его́же ра́ди и Гра́да Небе́снаго граждани́нъ содѣ́лался еси́; въ не́мъ же помяни́, святи́телю Іоа́нне, и на́съ, соверша́ющихъ па́мять твою́.

Сла́ва, гла́съ 6:

Человѣ́че Бо́жій и вѣ́рный слуго́ Госпо́день, сосу́де избра́нный и Ца́рствія наслѣ́дниче, не премолчи́ вопія́ за ны́ ко Го́споду.

И ны́нѣ, богоро́диченъ, [гла́съ то́йже:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

Тропа́рь святи́теля [пи́санъ на вели́цѣй вече́рни]. Сла́ва, и ны́нѣ, богоро́диченъ.



НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры [на 8], гла́съ 6:

Дне́сь свѣ́тло красу́ется благовѣ́рный гра́дъ Су́ждаль, воспріе́мши чудотво́рныя мо́щи твоя́, святи́телю Іоа́нне; тѣ́мже пречестну́ю твою́ ра́ку любе́зно лобыза́емъ, и тя́ пѣ́сненно восхваля́емъ, ча́юще ско́рое спасе́ніе улучи́ти твои́ми къ Бо́гу моли́твами. [Два́жды.]

Ева́нгельски Бо́га возлюби́въ, и Тому́ вся́чески добродѣ́тельми благоугоди́ти возревнова́въ, безконе́чныя жи́зни сподо́бился еси́, блаже́нне. Тѣ́мже съ небе́сными ны́нѣ веселя́ся, святи́телю Іоа́нне, моли́ся Спа́су всѣ́хъ изба́вити на́съ отъ вся́каго обстоя́нія, вѣ́рою соверша́ющихъ присночестну́ю и святу́ю па́мять твою́. [Два́жды.]

Смире́нъ, незло́бивъ, кро́токъ, ми́лостивъ и чи́стъ въ житіи́ твое́мъ бы́лъ еси́, блаже́нне; тѣ́мже сосу́дъ избра́нъ яви́лся еси́ по достоя́нію, и вели́кихъ дарова́ній отъ щедрода́вца Бо́га сподо́бился еси́, и́миже и на́съ обогати́, па́мять твою́ че́стно соверша́ющихъ. [Два́жды.]

Дне́сь любо́вію соше́дшеся духо́вная ча́да твоя́, святи́телю Іоа́нне, пресла́вную па́мять твою́ свѣ́тло торжеству́емъ; просія́лъ бо еси́ я́ко со́лнце свѣ́тло, свѣ́томъ твоего́ житія́, и ско́рый на́мъ помо́щникъ яви́лся еси́, избавля́я на́съ отъ бѣ́дъ и скорбе́й моли́твами твои́ми. [Два́жды.]

Сла́ва, гла́съ 8:

Це́ркве Христо́вы бы́лъ еси́ украше́ніе, пречу́дне, уче́ніемъ и житіе́мъ; ны́нѣ же съ го́рними си́лами ра́достно лику́я и дерзнове́ніе стяжа́въ ко Го́споду, Того́ прилѣ́жно моли́ спасти́ся душа́мъ на́шимъ.

И ны́нѣ, богоро́диченъ:

[Ца́рь Небе́сный за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ.]

Та́же вхо́дъ. Проки́менъ дню́. Пареміи́ святи́тельскія.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На литíи стихи́ры, гла́съ 5:

Святи́телю Іоа́нне, пресла́вное житіе́ твое́ и уче́ніе, апо́стольскаго ду́ха испо́лненное, благоче́стіе те́плое, кро́тость же и милосе́рдіе сла́внымъ содѣ́яша тя́ на земли́ и небе́снаго сподо́биша прославле́нія; сего́ ра́ди почита́емъ тя́ и свѣтоно́сную па́мять твою́ пра́зднуемъ благолѣ́пно.

Гла́съ 4:

Іоа́нне пресла́вне, па́стырю на́шъ до́брый, утѣше́ніе скорбя́щихъ и неду́жныхъ вра́чь, не отвраща́йся отъ на́съ, но моли́ся за ны́, пою́щія тя́.

Гла́съ 5:

Житіе́ соверши́въ непоро́чно, о́тче Іоа́нне, и ны́нѣ престо́лу Госпо́дню предстоя́ со дерзнове́ніемъ, ду́ши вѣ́рныхъ, приходя́щихъ ко свято́му твоему́ гро́бу, просвѣща́й, и проси́ у Го́спода дарова́ти на́мъ ве́лію ми́лость.

Сла́ва, гла́съ 8:

Образъ благоче́стія въ житіи́ твое́мъ яви́лъ еси́, по преставле́ніи же, исто́чникъ исцѣле́ній въ честны́хъ моща́хъ твои́хъ откры́лъ еси́ на́мъ, преблаже́нне святи́телю Іоа́нне. Тѣ́мже житію́ твоему́ подража́ти ревну́юще, мо́лимъ тя́: моли́ Христа́ Бо́га спасти́ ду́ши на́ша.

И ны́нѣ, богоро́диченъ:

[Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.]

На стихо́внѣ стихи́ры, гла́съ 5:

Ра́дуйся, святи́телю Іоа́нне, свѣти́льниче многосвѣ́тлый гра́ду Су́ждалю, и все́й странѣ́ Россíйстѣй похвало́ и утвержде́ніе! Святу́ю па́мять твою́ ны́нѣ пра́зднующе, пречестну́ю ра́ку твою́ любе́зно лобыза́емъ, и оставле́нія грѣхо́въ про́симъ получи́ти, твои́ми къ Бо́гу моли́твами.

Сти́хъ: Уста́ моя́ возглаго́лютъ прему́дрость [и поуче́ніе се́рдца моего́ ра́зумъ].

Ра́дуйся, святи́телю Іоа́нне, красото́ церко́вная и благоче́стія о́бразе! Въ незло́біи и кро́тости, милосе́рдіи и чистотѣ́ житіе́ твое́ сконча́въ сла́вно, на небеса́ восте́клъ еси́ ра́дуяся; идѣ́же лику́я со а́нгелы въ свѣ́тѣ невече́рнѣмъ, моли́ Христа́ Бо́га, ми́ръ мíру дарова́ти, и душа́мъ на́шимъ ве́лію ми́лость.

Сти́хъ: Свяще́нницы Твои́ облеку́тся въ пра́вду, [и преподо́бніи Твои́ возра́дуются].

Ра́дуйся, му́дре Іоа́нне, святи́телей украше́ніе, и́ноковъ похвала́, оби́димыхъ защище́ніе, си́рыхъ оте́цъ, скорбя́щихъ утѣше́ніе! Свѣтоно́сную па́мять твою́ ны́нѣ пра́зднующе, мо́лимся тебѣ́: моли́ Христа́ Бо́га ми́ръ мíру дарова́ти и душа́мъ на́шимъ ве́лію ми́лость.

Сла́ва, гла́съ 6:

Сра́дуйтеся ны́нѣ благовѣ́рному гра́ду на́шему вся́къ гра́дъ и страна́; се́ бо на́шъ преди́вный вра́чь и засту́пникъ, Іоа́ннъ великоимени́тый, небе́снаго врачества́ цѣльбы́ предлага́етъ всѣ́мъ, душе́вное и тѣле́сное исцѣле́ніе подава́я па́че естества́: его́же пріе́млюще, сла́вимъ Христа́ Бо́га на́шего, подаю́щаго его́ ра́ди на́мъ ве́лію ми́лость.

И ны́нѣ, богоро́диченъ:

[Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.]

[На благослове́ніи хлѣ́бовъ: тропа́рь святи́теля, два́жды, и Богоро́дице, Дѣ́во.., еди́ножды.]

Тропа́рь [святи́теля], гла́съ 8:

Правосла́вія наста́вниче, благоче́стія учи́телю и чистоты́, Су́ждалю пресвѣ́тлый свѣти́льниче, святи́телемъ богодухнове́нное удобре́ніе, Іоа́нне прему́дре, уче́ніемъ твои́мъ па́ству твою́ просвѣти́лъ еси́; святи́телю блаже́нне, моли́ Христа́ Бо́га спасти́ся душа́мъ на́шимъ.


НА УТРЕНИ,
На Бо́гъ Госпо́дь: Тропа́рь свято́му, [два́жды]. Сла́ва, и ны́нѣ, богоро́диченъ.

По 1-мъ стихосло́віи, сѣда́ленъ, гла́съ 8:

Прему́дростію Сло́ва обогатѣ́въ, источи́лъ еси́ уче́нія рѣ́ки спаси́тельнаго, и тѣ́мъ благочести́выхъ ду́ши напои́лъ еси́; па́лицею же боже́ственнаго ра́зума упа́слъ еси́ ста́до твое́. Тѣ́мже, я́ко па́стыря и учи́теля вели́ка, восхваля́емъ тя́, Іоа́нне; моли́ Христа́ Бо́га, грѣхо́въ оставле́ніе пода́ти чту́щимъ святу́ю па́мять твою́. [Два́жды.]

Сла́ва, и ны́нѣ, богоро́диченъ:

О, Пречу́дная Дѣ́во Богоро́дице! Огнь Божества́ во чре́вѣ Твое́мъ прія́ла еси́, и я́ко Младе́нца млеко́мъ пита́ла еси́ Зижди́теля и Го́спода. Тѣ́мъ досто́йно сла́вимъ пречи́стое Рождество́ Твое́, и согла́сно вопіе́мъ Ти́: моли́ Христа́ Бо́га грѣхо́въ оставле́ніе дарова́ти, воспѣва́ющимъ досто́йно сла́ву Твою́.

По 2-мъ стихосло́віи, сѣда́ленъ, гла́съ 5:

Плоды́ богоразу́мія воздѣ́лавъ труды́ свои́ми, Іоа́нне блаже́нне, услы́шалъ еси́ словеса́ та́йныхъ уче́ній, и́нокомъ же и міря́номъ о́бразъ житія́ яви́лся еси́ и, стра́сти вся́ крѣ́пко попра́въ, ко Го́споду преста́вился еси́; Его́же моли́ дарова́ти на́мъ ве́лію ми́лость. [Два́жды.]

Сла́ва, и ны́нѣ, богоро́диченъ:

Же́злъ изъ ко́рене Іессе́ова возрасти́ла еси́, Дѣ́во, Христа́ Бо́га; Его́же моли́, Пречи́стая, съ блаже́ннымъ святи́телемъ Іоа́нномъ, дарова́ти спасе́ніе душа́мъ на́шимъ и ве́лію ми́лость.

По поліеле́и, сѣда́ленъ, гла́съ 4:

Посто́мъ и моли́твою, кро́тостію и смире́ніемъ, терпѣ́ніемъ и благотворе́ніемъ небе́сная обѣтова́нія улучи́лъ еси́, Іоа́нне святи́телю блаже́нне. Тѣ́мъ тво́й святы́й и свѣтоно́сный де́нь вѣ́рою соверша́юще, благоче́стно вопіе́мъ: я́ко имѣ́я дерзнове́ніе ко Го́споду, моли́ спасти́ся на́мъ. [Два́жды.]

Сла́ва, и ны́нѣ, богоро́диченъ:

Обнови́ла еси́, Пречи́стая, боже́ственнымъ Рождество́мъ Твои́мъ растлѣ́вшее страстьми́ естество́ на́ше и всѣ́мъ пу́ть къ блаже́нному безстра́стію и чистотѣ́ откры́ла еси́; тѣ́мже вси́ по до́лгу Тя́ ублажа́емъ, Дѣ́во Пресла́вная.

Степе́нна 4-го гла́са, антифо́нъ 1-й. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое ды́ханіе... Ева́нгеліе Луки́, зача́ло 24.

По 50-мъ псалмѣ́ стихи́ра, гла́съ 6:

Дне́сь любо́вію соше́дшеся [духо́вная ча́да твоя́, святи́телю Іоа́нне, пресла́вную па́мять твою́ свѣ́тло торжеству́емъ; просія́лъ бо еси́ я́ко со́лнце свѣ́тло, свѣ́томъ твоего́ житія́, и ско́рый на́мъ помо́щникъ яви́лся еси́, избавля́я на́съ отъ бѣ́дъ и скорбе́й моли́твами твои́ми].

Кано́нъ Богоро́дицы съ ирмосо́мъ, на 6, 8-го гла́са: Мно́гими содержи́мь напа́стьми... И святи́телю на 8, ему́же краегране́сіе: Тя́, богому́драго святи́теля, моле́бно пою́.

Кано́нъ святи́телю, гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Твою́ свяще́нную творя́щимъ па́мять, святи́телю Іоа́нне, дарова́ти согрѣше́ній оставле́ніе, житія́ исправле́ніе и небе́снаго Ца́рствія наслѣ́діе, не преста́й моли́ти Христа́ Бо́га.

Яко оте́цъ милосе́рдъ къ си́рымъ бы́лъ еси́, вдови́цъ же пита́тель, скорбя́щимъ утѣ́шитель, оби́димымъ засту́пникъ, гра́ду Су́ждалю па́стырь и храни́тель, святи́телю Іоа́нне. Тѣ́мже и ны́нѣ прилѣ́жно моли́ся Влады́цѣ Христу́ о чту́щихъ па́мять твою́.

Боже́ственнымъ осія́емь свѣ́томъ и со а́нгелы ны́нѣ на небесѣ́хъ водворя́яся, помина́й вѣ́рою чту́щихъ па́мять твою́, святи́телю Іоа́нне приснопа́мятне.

Богоро́диченъ: Око се́рдца моего́ устремля́ю къ Тебѣ́, Чи́стая, не пре́зри те́плое къ Тебѣ́ воздыха́ніе, и бу́ди ми́ покро́въ и помо́щница.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Го́рько стеня́ припада́емъ ти́, святи́телю, грѣ́шніи раби́ твои́: моли́ся о на́съ ко Христу́ Бо́гу поми́ловати рабы́ твоя́, да не хва́лится вра́гъ, ви́дя на́съ погиба́ющихъ.

Образъ Бо́жій сохраня́я невреди́мымъ, преподо́бне, чистото́ю и смиренному́дріемъ украси́лся еси́, житіе́ же нескве́рно и нра́въ ми́лостивенъ стяжа́лъ еси́, досточу́дне.

Му́дростію и добродѣ́телію украси́въ житіе́ свое́, вели́кое дерзнове́ніе стяжа́лъ еси́ ко Го́споду; тѣ́мже моли́твами твои́ми сохраня́й гра́дъ и лю́ди отъ вся́кія бѣды́ и ну́жды.

Богоро́диченъ: Умная вся́ чинонача́лія превозшла́ еси́, Пречи́стая, я́ко Еди́наго отъ Пресвяты́я Тро́ицы родила́ еси́ на́мъ Спаси́теля и Го́спода, Его́же моли́, Приснодѣ́во, спасти́ся душа́мъ на́шимъ.

Сѣда́ленъ, гла́съ 1:

Прему́дростію Сло́ва обогатѣ́въ, источи́лъ еси́ уче́нія рѣ́ки живо́тны, и тѣ́мъ благочести́выхъ ду́ши напои́лъ еси́, па́лицею же боже́ственнаго ра́зума упа́слъ еси́ ста́до твое́; тѣ́мже, я́ко па́стыря и учи́теля вели́ка, восхваля́емъ тя́, Іоа́нне, святи́телю блаже́нне, моли́ Христа́ Бо́га грѣхо́въ оставле́ніе дарова́ти чту́щимъ святу́ю па́мять твою́. [Два́жды.]

Сла́ва, и ны́нѣ, богоро́диченъ:

О, Пречу́дная Дѣ́во Богоро́дице! Огнь Божества́ во чре́вѣ Твое́мъ прія́ла еси́, и я́ко Младе́нца млеко́мъ пита́ла еси́ Зижди́теля и Го́спода. Тѣ́мже досто́йно сла́вимъ пречестно́е Рождество́ Твое́, и согла́сно вопіе́мъ Ти́: моли́ Христа́ Бо́га, согрѣше́ній оставле́ніе дарова́ти воспѣва́ющимъ досто́йно сла́ву Твою́.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Ду́хомъ уны́нія одержи́мь, къ тебѣ́ о́чи се́рдца моего́ возвожу́, Іоа́нне святи́телю, и вопію́ ти прилѣ́жно: моли́твами твои́ми спаси́ ду́шу мою́ погиба́ющую, и научи́ мя ко Христу́ взыва́ти: сла́ва си́лѣ Твое́й, Го́споди.

Разсла́бленъ е́смь во́лею, слѣпотству́ю же ра́зумомъ; тѣ́мже, святи́телю, моли́ся ко Христу́, поми́ловати ду́шу мою́, злы́ми неду́гами си́ми лю́тѣ уя́звленну.

Азъ, я́ко кровоточи́вая, то́ки нечи́стыхъ помышле́ній источа́ю непреста́нно, я́ко ханане́я же, къ тебѣ́ взыва́ю: святи́телю, моли́твами твои́ми помози́ ми, и исцѣли́ неду́ги души́ моея́, моля́ся ко Христу́ Человѣколю́бцу.

Богоро́диченъ: Го́спода Милосе́рдаго на́мъ ро́ждшая, Пречи́стая, не преда́ждь на́съ враго́мъ на́шимъ, на́ша засту́пнице и на́ша наде́ждо, но покры́й на́съ ри́зою Свое́ю.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

О Тебѣ́ ра́дуется и весели́тся гра́дъ Су́ждаль, святи́телю Іоа́нне, весели́тся и ра́дуется и хра́мъ Бо́жія Ма́тере, имѣ́я въ себѣ́ честны́я мо́щи твоя́, па́стырю на́шъ преизя́щный.

Свѣти́ло неугаси́мое, преподо́бне, уго́дниче Христо́въ всече́стне, Су́ждалю сла́ва и всея́ Россíи похвала́; моли́ спасти́ся гра́ду твоему́ отъ вся́кихъ бѣ́дъ и скорбе́й.

Возсія́въ, я́ко со́лнце, въ странѣ́ на́шей, лю́ди твоя́ уче́нми твои́ми просвѣти́лъ еси́, блаже́нне; тѣ́мже тя́ почита́емъ я́ко боже́ственнаго наста́вника и богому́драго учи́теля.

Богоро́диченъ: Яко грѣ́шнѣйшій всѣ́хъ, на не́бо взира́ти не смѣ́я, къ Тебѣ́ прибѣга́ю и вопію́: Ма́ти Бо́жія Пречи́стая, умилосе́рдися на мя́ и изба́ви мя́ вѣ́чнаго осужде́нія.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Тя́ иму́ще те́пла засту́пника раби́ твои́, да не бу́демъ посра́млени отъ навѣ́товъ вра́жіихъ, но да побѣжда́емъ и́хъ, моли́твами твои́ми укрѣпля́еми.

Изба́ви отъ напра́сныя сме́рти лю́ди твоя́, блаже́нне Іоа́нне, стра́сти угаси́, бѣ́ды отврати́, и вся́кую ско́рбь и лише́ніе отжени́ моли́твами твои́ми.

Терпѣ́ніе тве́рдое, и благоду́шіе невозмуще́нное яви́лъ еси́, блаже́нне Іоа́нне, клевето́ю и зло́бою изгна́нъ бы́въ изъ гра́да; я́же отврати́ отъ на́съ моли́твами твои́ми, да ра́достно воспѣва́емъ тя́.

Богоро́диченъ: Еди́но предста́тельство вѣ́рныхъ, и обурева́емыхъ оти́шіе, Дѣ́во Богоро́дице, страсте́й мои́хъ непостоя́нную бу́рю утиши́, и изъ бе́здны грѣхо́вной исхити́ мя, моли́твами Твои́ми, Пречи́стая.

Конда́къ, гла́съ 8:

Богому́дрымъ уче́ніемъ и святы́мъ житіе́мъ, я́ко свѣти́льникъ, сія́лъ еси́ въ Це́ркви Бо́жіей; тѣ́мже Боже́ственнаго заступле́нія сподо́бился еси́, внегда́ ослѣ́пнути очесе́мъ злоумы́шленныхъ клеветнико́въ твои́хъ, и́хже прозрѣ́ти сотвори́въ моли́твою твое́ю, вспя́ть возврати́лся еси́ во гра́дъ тво́й, и до́брѣ упа́слъ еси́ ста́до слове́сныхъ ове́цъ; и́хже ча́домъ помога́й и на́мъ, моли́твами твои́ми, святи́телю Христо́въ Іоа́нне.

Икосъ:

Преподо́бне всеблаже́нне святи́телю Іоа́нне, кто́, слы́ша му́дрыя рѣ́чи твоя́, не умили́ся отъ сла́дости слове́съ твои́хъ? Или́ кто́, зря́ свѣтолѣ́пное лице́ твое́, благоговѣ́нія не испо́лнися? Или́ кто́, ви́дя свято́е житіе́ твое́, не пока́ялся? Или́ кто́, сребролюби́въ сы́й, ви́дя нищету́ твою́, Христа́ ра́ди обнища́ти не возжела́? Или́ кто́, го́рдостію превознося́ся, ви́дя смире́ніе твое́, ни́щъ ду́хомъ не содѣ́лася? Или́ кто́, гнѣвли́въ и напра́сливъ сы́й, ти́хостію нра́ва твоего́ на кро́тость не преложи́ся? Тѣ́мже свяще́нную па́мять твою́ пра́зднующе, мо́лимся тебѣ́: за́повѣди Бо́жія испо́лнити на́мъ помоги́, и въ Ца́рствіе вѣ́чное приведи́ моли́твами твои́ми.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Любо́вію влеко́ми, взыва́емъ ти́, святи́телю Христо́въ: бу́ди на́мъ ско́рый помо́щникъ, изба́ви на́съ отъ вся́каго зла́, и отъ вся́кихъ бѣ́дъ соблюди́.

Яко ско́ро послу́шнаго предста́теля на́шего мо́лимъ тя́, святи́телю Христо́въ, отъ вся́кія бра́ни страсте́й, воста́нія пло́ти и всѣ́хъ навѣ́товъ вра́жескихъ свободи́ на́съ, вопію́щихъ ти́: ра́дуйся, о́тче треблаже́нне.

Моли́, святи́телю Іоа́нне, отъ бѣ́дъ изба́витися, любо́вію тя́ почита́ющимъ, и научи́ вопи́ти: благослове́нъ Бо́гъ оте́цъ на́шихъ.

Богоро́диченъ: Огражде́ніе напа́ствуемыхъ, утѣше́ніе скорбя́щихъ, спасе́ніе бѣ́дствующихъ, Богоро́дице всехва́льная, моли́ Сы́на Твоего́ и Бо́га, изба́витися на́мъ отъ бѣ́дъ и зо́лъ.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Лю́демъ твои́мъ, прибѣга́ющимъ къ покро́ву твоему́, Іоа́нне всехва́льне, моли́ спасти́ся отъ искуше́ній моли́твами твои́ми.

Еже ко Го́споду восхожде́ніе въ се́рдцѣ твое́мъ полага́я, о душе́, возопíй къ Человѣколю́бцу: Спа́се, поми́луй мя́ окая́ннаго, моли́твами святи́теля Твоего́.

Бою́ся суда́ Стра́шнаго и огня́ гее́нскаго; но ви́ждь сокруше́ніе се́рдца моего́, святи́телю, и испроси́ мнѣ́ проще́ніе безмѣ́рныхъ мои́хъ прегрѣше́ній.

Богоро́диченъ: Но́щь грѣхо́вная покры́ла мя́ е́сть, но озари́ мя, Человѣколю́бче, моли́твами Пречи́стыя Твоея́ Ма́тере, и спаси́ мя.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Отцу́, и Сы́ну, и Свято́му Ду́ху до́брѣ послужи́въ во пло́ти, святи́телю Іоа́нне, Пресу́щныя Тро́ицы предстоя́ти престо́лу съ безпло́тными сподо́бился еси́; идѣ́же Христа́ Бо́га моли́, просвѣти́ти ду́ши на́ша омраче́нныя.

Пое́мъ твою́ свяще́нную па́мять, святи́телю Іоа́нне, и, благонаде́жно къ тебѣ́ прибѣга́я, вопіе́мъ: спаси́ на́съ заступле́ніемъ твои́мъ.

О, пречу́дный святи́телю Христо́въ Іоа́нне! святи́тельскимъ житіе́мъ украси́лся еси́; и ны́нѣ на небесѣ́хъ всели́лся еси́, идѣ́же лику́ютъ а́нгели, свѣ́томъ Боже́ственнымъ осіява́еми.

Богоро́диченъ: Юже иногда́ Іа́ковъ ви́дѣ чу́дную лѣ́ствицу, отъ земли́ просте́рту къ небе́сной высотѣ́, исповѣ́дуемъ Тя́, Пречи́стая Богоро́дице: Тобо́ю бо небе́сная земны́мъ, и земна́я небе́снымъ совокупи́шася.

Свѣти́ленъ, гла́съ 2:

На небесѣ́хъ ны́нѣ со а́нгелы водворя́яся, во свѣ́тѣ Присносу́щныя Тро́ицы, святи́телю о́тче Іоа́нне, о на́съ моли́ся Человѣколю́бцу Бо́гу, сохрани́тися на́мъ отъ сѣ́ти лука́ваго. [Два́жды.]

Сла́ва, и ны́нѣ, богоро́диченъ:

Сподо́би, на́съ, Пречи́стая, Твои́ми моли́твами изба́витися отъ всѣ́хъ напа́стей, я́ко къ Тебѣ́ прибѣга́емъ, и а́нгельски вопіе́мъ Ти́: ра́дуйся, Богоблагода́тная Пречи́стая.

На хвали́техъ стихи́ры, гла́съ 1. [Пи́саны на ма́лѣй вече́рни.]
Сла́ва, гла́съ 8: Образъ благоче́стія... [Пи́санъ на ма́лѣй вече́рни.]



НА ЛИТУРГІИ:

Блаже́нна отъ кано́на, пѣ́снь 3 и 6. Проки́менъ, [гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй]. Апо́столъ [ко Евре́омъ], зача́ло 318. [Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́]. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.

Источникъ: Слу́жба святи́телямъ Христо́вымъ и чудотво́рцамъ Ѳео́дору и Іоа́нну, Епи́скопамъ Су́ждальскимъ, послѣ́дованіе молѣ́бнаго и́мъ пѣ́нія и кра́ткія о си́хъ святи́теляхъ свѣ́дѣнія. — М.: Въ Сѵнода́льной Тѵпогра́фіи, 1870. — Л. 7 об. – 15.

/ Къ оглавленію раздѣла /


Наверхъ / Къ титульной страницѣ

0