Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 23 мая 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 15-й де́нь.
Преподо́бнаго отца́ на́шего Евѳи́мія Но́ваго и свята́го преподобному́ченика Лукіа́на, пресви́тера Вели́кія Антіохíи.

[ВЕЧЕРЪ,]
На Го́споди воззва́хъ: стихи́ры преподо́бнаго, гла́съ 4. Подо́бенъ: Яко до́бля.

Тѣ́сный пу́ть ше́ствовалъ еси́,* нево́лненнымъ ду́хомъ* къ жи́зни веду́щимъ препла́вая,* по́стниковъ бо ты́ бы́лъ еси́ хвала́, Евѳи́міе,* терпѣли́вно низложи́въ* де́монская ловле́нія,* тѣ́мъ получи́лъ еси́* небе́снаго Ца́рствія наслѣ́дникъ бы́ти* и не престаю́щія наслажда́ешися красоты́.

Пресвѣ́тлое житіе́ твое́* а́нгелы удиви́* и де́монская свирѣ́пства я́вѣ устраши́,* вѣ́рныхъ же собра́нія свѣ́тло украси́,* къ небе́сному Христо́ву жили́щу* повелѣва́я ше́ствовати всегда́.* Его́же моли́ отъ тли́ и бѣ́дъ изба́витися* вѣ́рою творя́щимъ* всечестну́ю па́мять твою́.

Пѣснопѣ́ніе и хвалу́* Христу́ приноси́лъ еси́ на вся́къ де́нь, о́тче,* въ пусты́ни жи́тельствуя,* Еди́ному Бо́гу возложи́въ ду́шу и помышле́ніе,* я́ко вели́кій Моисе́й,* въ нехо́дная вше́лъ еси́,* тѣ́мъ побѣди́въ неви́димаго врага́,* и бы́лъ еси́ чи́стое прія́телище* и Боже́ственнаго Ду́ха орга́нъ.

Ины стихи́ры му́ченика, гла́съ то́йже. Подо́бенъ: Да́лъ еси́ зна́меніе.

Сло́вомъ Боже́ственнаго зна́нія,* обогатѣ́въ вѣ́рою,* вѣ́рныя утверди́лъ еси́* многоплете́нныя му́ки* и я́рость мучи́тельскую терпѣ́ти де́рзостно* бу́дущія ра́ди жи́зни* и нетлѣ́нныя ра́дости.* Тѣ́мъ тя́ ублажа́емъ, Лукіа́не достосла́вне,* и боже́ственное твое́ дне́сь соверша́емъ торжество́.

Темни́цу многовре́менную* и ну́жнѣйшую сме́рть претерпѣ́лъ еси́, преподо́бне,* у́зами связу́емь,* и о́стрыми чрепи́нами стрѣца́емь, блаже́нне,* и неяде́ніемъ лю́тымъ,* и долго́тною жа́ждею утомля́емь;* тѣ́мъ тя́ небе́сная пи́ща я́вѣ прія́ла е́сть,* я́ко непобѣди́ма му́ченика,* страстоте́рпче до́блій.

Нѣ́дро тя́ морско́е пріе́мъ, сла́вне,* по три́десятихъ дне́хъ су́ши предае́тъ,* я́коже Іо́ну дре́вле звѣре́й служе́ніемъ,* къ богоче́стному погребе́нію,* и исцѣле́ній боже́ственное источе́ніе,* му́чениковъ нача́льное избра́ніе,* Це́ркве утвержде́ніе,* моли́твенниче о душа́хъ на́шихъ,* богоно́сне пребога́те.

Сла́ва, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ; тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́, а́нгельскія же пости́глъ еси́ чи́ны, и́хже житію́ непоро́чно подража́лъ еси́, дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Ви́дящи Тя́ распина́ема, Христе́, Тебе́ Ро́ждшая вопія́ше: что́ стра́нное е́же ви́жу та́инство, Сы́не Мо́й? ка́ко на Дре́вѣ умира́еши, пло́тію повѣ́шенъ, Жи́зни Пода́телю?

На стихо́внѣ окто́иха. Сла́ва, гла́съ 5:

Преподо́бне о́тче, не да́лъ еси́ сна́ твои́мъ очесе́мъ, ни вѣ́ждомъ твои́мъ дрема́нія, до́ндеже ду́шу и тѣ́ло отъ страсте́й свободи́лъ еси́ и себе́ угото́валъ еси́ Ду́ха жили́ще; прише́дъ бо Христо́съ со Отце́мъ, оби́телище въ тебѣ́ сотвори́, и Единосу́щнѣй Тро́ицѣ уго́дникъ бы́лъ еси́, великопроповѣ́дниче Евѳи́міе, моли́ся о душа́хъ на́шихъ.

И ны́нѣ, богоро́диченъ или́ крестобогоро́диченъ. Подо́бенъ: Ра́дуйся.

Агнца Своего́ Агница иногда́ зря́щи, къ заколе́нію тща́щася, усе́рдно послѣ́доваше, сія́ вопію́щи Ему́: ка́мо и́деши, Ча́до Мое́ Сладча́йшее, Христе́? чесо́ ра́ди ско́рое тече́ніе сіе́, Долготерпели́ве, тече́ши нелѣ́ностно? Іису́се Возжелѣ́ннѣйшій Безгрѣ́шне, Многоми́лостиве Го́споди, да́ждь Ми́ сло́во, Рабѣ́ Твоей́, Сы́не Мо́й Вселюбе́знейшій, не пре́зри, Ще́дре, молча́, Тя́ стра́нно Ро́ждшую, Бо́же Всеще́дре, да́руяй мíрови ве́лію ми́лость.

Тропа́рь, гла́съ 8:

Въ тебѣ́, о́тче, извѣ́стно спасе́ся, е́же по о́бразу: пріи́мъ бо кре́стъ, послѣ́довалъ еси́ Христу́, и дѣ́ющи, учи́лъ еси́ презира́ти у́бо пло́ть, прехо́дитъ бо, прилѣжа́ти же о души́, ве́щи безсме́ртнѣй; тѣ́мже и со а́нгелы сра́дуется, преподо́бне Евѳи́міе, ду́хъ тво́й.

Сла́ва, му́ченика, гла́съ 4:

Му́ченикъ Тво́й, Го́споди, Лукіа́нъ во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.

И ны́нѣ, богоро́диченъ.



НА УТРЕНИ,
Кано́нъ окто́иха еди́нъ и святы́хъ два́.

Кано́нъ преподо́бнаго, его́же краегране́сіе: Ра́дуйся, боже́ственная мона́шествующихъ сла́во. Гла́съ 2.
Пѣ́снь 1.

Ирмо́съ: Гряди́те лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Ра́дуйся, исто́чниче, кипя́щій струю́ спаси́тельную, отъ нея́же почерпа́емъ вси́ цѣле́бную благода́ть прегрѣше́ній, любо́вію приходя́щимъ тебѣ́, приснопа́мятне.

Святы́ню пріе́мъ отъ Христа́ Бо́га, отъ утро́бы, сла́вне, и яви́лся еси́ избра́нный сосу́дъ, Ду́ха благода́ть всю́ пріе́мый, о́тче Евѳи́міе.

Да жи́зни прича́стникъ нетлѣ́нныя яви́шися, вре́менныя, о́тче прему́дре, небре́глъ еси́: и Бо́гу присту́пль, непреста́нно мо́лиши спасти́ся всѣ́мъ на́мъ.

Богоро́диченъ: Глаго́лу му́дрому Твои́хъ усте́нъ послѣ́дующе, ра́дующеся, Пренепоро́чная, Тя́ ублажа́емъ, бы́вшую на́мъ вину́ неизрече́ннаго блаже́нства.

Инъ кано́нъ му́ченика, его́же краегране́сіе: Твою́, Лукіа́не всеблаже́нне, пою́ сла́ву. Творе́ніе Іо́сифово. Гла́съ 4.
Пѣ́снь 1.

Ирмо́съ: Воспою́ Тебѣ́, Го́споди Бо́же мо́й, я́ко изве́лъ еси́ лю́ди изъ рабо́ты еги́петскія, покры́лъ же еси́ колесни́цы фарао́новы и си́лу.

Му́дростію, и благода́тію, и си́лою духо́вною, Лукіа́не, возсія́въ, просвѣти́лъ еси́ лю́ди, и къ позна́нію Христо́ву, му́чениче, наста́вилъ еси́.

Ору́жіемъ благовѣ́рія тя́ защити́въ, и́же не́мощь на́шу Понесы́й я́ко благоутро́бенъ, непобѣди́ма содѣ́я тя́, враго́въ, му́чениче, боре́ніемъ.

На высоту́ небе́сную во глубину́ зловѣ́рія, страда́льче, па́дшихъ возвле́клъ еси́ мре́жами боже́ственныхъ твои́хъ глаго́лъ, досточу́дне.

Богоро́диченъ: Сло́во Присносу́щное Отчее сло́вомъ, па́че вины́ и сло́ва, безъ сѣ́мене зачала́ еси́, Чи́стая, и родила́ еси въ на́ше избавле́ніе.

Пѣ́снь 3.

Ирмо́съ: На ка́мени мя́ вѣ́ры утверди́въ, разширилъ еси уста моя на враги моя, возвесели бо ся духъ мой, внегда пѣти: нѣсть святъ, якоже Богъ нашъ, и нѣсть праведенъ, паче Тебе, Господи.

Всесвѣ́тлый показа́лся еси́, богому́дре, сто́лпъ, наставля́я чи́ны мона́шествующихъ, о́блакъ же, осѣня́ющь жре́бій Бо́жій, ли́ца неви́димыхъ враго́въ помрача́ющь благода́тію Всецаря́.

Стои́ши предъ лице́мъ твоего́ Влады́ки, неосла́бнымъ манове́ніемъ моля́ся изба́витися ста́ду твоему́ отъ рабо́ты тмы́, преподо́бне, и мучи́тельства страсте́й, и твои́хъ моли́твъ послу́шаетъ Бо́гъ.

Пло́ти твоея́ двиза́нія умертви́въ крѣ́пкимъ поще́ніемъ, богоглаго́льниче, бы́лъ еси́ оби́телище Влады́ки. Его́же умоли́ изба́витися скорбе́й и страсте́й смуще́нія къ тебѣ́ прибѣга́ющимъ.

Богоро́диченъ: Сви́токъ Тя́ прови́дѣ Иса́ія, въ не́мже пло́тски Сло́во зна́менася, раздра́въ начерта́ніе первозда́ннаго, е́же преступле́ніемъ подписа́, и подаде́ оставле́ніе рабо́ты на́мъ.

Инъ.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

До́мъ добродѣ́телей свѣ́тлостію, му́чениче, ду́шу твою́ Бо́гу соверши́лъ еси́ и и́дольскія хра́мы моли́твою твое́ю разори́лъ еси́.

Воспѣва́лъ еси́, напа́стьми окружа́емь, му́чениче, и муче́ній болѣ́зньми оскорбля́емь, таковы́хъ я́ко Благодѣ́теля благи́хъ сподо́бльшаго тя́.

Тѣ́ло му́камъ преда́въ, му́чениче, ду́шу твою́ небла́зненно соблю́лъ еси́: же́ртву непоро́чну Влады́цѣ, тя́ сама́го, прине́слъ еси́, всече́стне.

Богоро́диченъ: Отъ Дѣ́вы Младе́нецъ ражда́ется, содѣ́тельствовавый вѣ́ки хотѣ́ніемъ, Юже воспѣва́емъ я́ко Богоро́дицу и пра́ведно ублажа́емъ.

Конда́къ му́ченика, гла́съ 2. Подо́бенъ: Въ моли́твахъ.

Въ поще́ніи пе́рвѣе просія́вшаго, и во страда́ніи второ́е свѣтя́ща, вси́, я́ко свѣти́ло пресвѣ́тлѣйшее, Лукіа́на пѣ́сньми сла́вно почти́мъ, моля́щаго непреста́нно о всѣ́хъ на́съ.

Сѣда́ленъ преподо́бнаго, гла́съ 8. Подо́бенъ: Прему́дрости.

Отре́кся пло́ти Христа́ ра́ди и духо́вный яви́вся народоводи́тель, услы́шалъ еси́ словеса́ та́йныхъ уче́ній; мона́ховъ же яви́лся еси́ пра́вило пра́вости и стра́сти вся́ крѣ́пко попра́лъ еси́. Тѣ́мъ и де́моновъ кова́рство до конца́ испепели́лъ еси́; къ Нему́ зря́ всегда́, богоно́се Евѳи́міе, моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́.

Сла́ва, сѣда́ленъ му́ченика, гла́съ то́йже:

Благода́ти сло́вомъ вѣ́рныхъ умаща́я сердца́, му́чениче Лукіа́не, страда́ти устро́илъ еси́ и побѣжда́ти мучи́теля, и до́брѣ соверши́въ тече́ніе боже́ственное, и по концѣ́ сла́вы му́чениковъ сподо́бился еси́. Тѣ́мъ соше́дшеся, свято́е твое́ вси́ почита́емъ сконча́ніе, Спа́са прославля́юще: страстоте́рпче прехва́льне, моли́ Христа́ Бо́га прегрѣше́ній оставле́ніе пода́ти, чту́щимъ любо́вію святу́ю па́мять твою́.

И ны́нѣ, богоро́диченъ:

Со́лнца о́блаче разу́мнаго, Боже́ственнаго Свѣ́та, свѣти́льниче златокова́нный, Нескве́рная, Небла́зная, Всенепоро́чная Влады́чице, омраче́нную ду́шу мою́ ослѣпле́ніемъ страсте́й, безстра́стія заре́ю просвѣти́, молю́ся, и оскверне́нное мое́ се́рдце омы́й пото́ки умиле́нія, покая́нія же слеза́ми и отъ тимѣ́нія мя́ очи́сти дѣ́лъ мои́хъ, да любо́вію зову́ Ти: Богоро́дице Приснодѣ́во, моли́ Христа́ Бо́га прегрѣше́ній оставле́ніе пода́ти ми́, Тебе́ бо имѣ́ю наде́жду, ра́бъ Тво́й.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и го́рько рыда́ющи, вопія́ше: мíръ у́бо ра́дуется, пріе́мляй Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе, вѣ́рою пою́щимъ Боже́ственныя Стра́сти Твоя́.

Пѣ́снь 4.

Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.

Жела́ніе боже́ственное тя́ распали́, разгрѣ́явъ твое́ се́рдце, и жела́нная пости́глъ еси́ до конца́, богому́дре о́тче, оста́вль земны́хъ пристра́стіе, единосе́льникъ вы́шнихъ бы́въ служи́телей.

Ласка́нія сопру́жницы, преподо́бне, попра́лъ еси́ всеобра́зно; вни́де бо раче́ніе Содѣ́теля въ тя́, богому́дре, те́плѣ, и содѣ́янныхъ мра́чная жела́нія до конца́ отри́ну.

На па́жить чи́сту возгна́лъ еси́ воздержа́нія ста́до твое́, о́тче, и ко исто́чнику приве́лъ еси́ то́е нему́тному безстра́стія, мы́сленныя звѣ́ри побѣжда́я, е́же и ны́нѣ моли́твами твои́ми спаса́й.

Богоро́диченъ: Се́ Тебе́ ро́ди сла́вятъ родо́въ, я́коже прорекла́ еси́, Отрокови́це. Созда́теля бо была́ еси́ пала́та и Боже́ственный хра́мъ, въ не́мже всели́ся Высоча́йшій, пло́тію обло́жся, да спасе́тъ на́съ.

Инъ.

Ирмо́съ: Сѣдя́й въ сла́вѣ на Престо́лѣ Божества́, во о́блацѣ ле́гцѣ пріи́де Іису́съ Пребоже́ственный нетлѣ́нною дла́нію и спасе́ зову́щія: сла́ва, Христе́, си́лѣ Твое́й.

Крѣ́покъ на пре́лесть яви́лся еси́, блаже́нне, и мно́гимъ обучи́тель къ боже́ственнымъ подвиго́мъ всегда́; терпѣ́ніемъ же му́къ некрѣ́пкую смири́лъ еси́, му́чениче, крѣ́пость го́рдаго.

Распросте́ртъ на дре́вѣ, и реме́ніемъ растяга́емь, и гла́домъ и жа́ждею многовре́менно умуча́емь, и то́нкими чрепи́нами настрѣка́емь, претерпѣ́лъ еси́, му́чениче Христо́въ достосла́вне.

Зако́нъ Боже́ственный проповѣ́дая, беззако́ннующихъ обрати́лъ еси́ и испи́ти усе́рдно ча́шу муче́нія показа́лъ еси́; съ ни́миже въ Боже́ственныя дво́ры всели́лся еси́, насыща́яся дре́ва жи́зни, всеприснопа́мятне.

Богоро́диченъ: Изъ утро́бы Твоея́ возсія́въ Боже́ственное Со́лнце, я́же во тмѣ́ многобо́жія, Отрокови́це, просвѣти́ и въ сѣ́ни сме́ртнѣй су́щія осія́. Ему́же взыва́емъ: сла́ва, Христе́, си́лѣ Твое́й.

Пѣ́снь 5.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Ве́сь Бо́гу прилѣжа́, о́тче, въ пусты́няхъ мра́зъ нощны́й претерпѣ́лъ еси́ до́блественнѣ, и дневны́й нося́ ва́ръ; и бы́лъ еси́ до́мъ му́дрости Бо́жія добродѣ́тельнымъ сія́ніемъ многообра́зно украша́емь.

Юношески наступи́въ на поще́ніе, чревонеи́стовства змíя не пріе́мь совѣ́тника, о́тче, но а́лчбою, и моли́твами непреста́нными, и чистото́ю соедини́вся Бо́гу, прича́стникъ бы́лъ еси́ сла́дости лу́чшія.

Добродѣ́телей возше́дъ на о́блаки, скрижа́ли прія́лъ еси́, блаже́нне, напи́санныя руко́ю Бо́жіею, и мона́шествующихъ мно́жества научи́лъ еси́ веще́ственныхъ всѣ́хъ оша́ятися, возводя́ на го́ру Боже́ственнаго позна́нія.

Богоро́диченъ: Яви́лася еси́, Чи́стая, богопра́отцу лѣ́ствица небесе́ высоча́е, иму́щи Созда́теля сѣдя́ща. Изъ Тебе́ бо Бо́гъ, вопло́щся, показа́ся и совокупи́ разстоя́щаяся пре́жде. Тѣ́мъ Тя́ Богоро́дицу вѣ́рніи сла́вимъ.

Инъ.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Поже́гъ, преподо́бне, те́рніе страсте́й по́томъ поще́ній, струя́ми погаси́лъ еси́ трудо́въ твои́хъ нече́стія пе́щь доблемы́сленнѣ, всеблаже́нне.

Непрекло́ненъ, облага́емь ча́стыми болѣ́зньми, пребы́лъ еси́, къ Бо́гу взира́я, свя́те, спасти́ могу́щему, Ему́же въ ру́цѣ преложи́лъ еси́ ду́ха твоего́, веселя́ся.

Удали́вшіяся Бо́га облича́лъ еси́ зловѣ́рныя, и до́лгими болѣ́зньми и лю́тыми, сла́вне, окружа́емь, Христу́ прибли́жился еси́, Его́же стра́сть изобрази́лъ еси́.

Богоро́диченъ: По рождествѣ́ нетлѣ́нна пребыла́ еси́, Чи́стая, и тлѣ́нія ро́дъ человѣ́ческій, я́ко Бо́га Ро́ждшая, свободи́ла еси́; сего́ ра́ди вѣ́рою Тя́ правосла́вно ублажа́емъ.

Пѣ́снь 6.

Ирмо́съ: Ко Го́споду отъ ки́та Іо́на возопи́: Ты́ мя возведи́ изъ глубины́ а́да, молю́ся, да я́ко Изба́вителю, во гла́сѣ хвале́нія, и́стины же ду́хомъ пожру́ Тебѣ́.

Пострѣка́емь Влады́чнею любо́вію, оста́вилъ еси́ вся́ чу́вственная и Тому́ послѣ́довалъ еси́, на ра́нена и́го ле́гкое взе́мъ му́жески благоду́шія, тезоимени́те.

Нака́занъ неизрече́нныхъ зна́нію, блаже́нне, научи́лъ еси́ твое́ ста́до небе́сная му́дрствовати и страсте́й наше́ствія отгоня́ твои́ми поуче́ньми.

Житіе́ твое́ подо́бно вы́шнихъ си́лъ, о́тче, бы́сть, дерзнове́ніе тебѣ́ даде́, е́же держа́лъ еси́ всегда́, страсте́й изба́вити твое́ ста́до Христа́ умоли́.

Богоро́диченъ: Разумѣ́въ Твое́ неизрече́нное, Чи́стая, та́инство, го́ру приосене́нную Авваку́мъ Тя́ провозвѣсти́; изъ Тебе́ бо Содѣ́тель за милосе́рдіе вопло́щся, дре́внее отъя́тъ изрече́ніе.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Немо́кренно муче́ній преше́лъ еси́ пучи́ну; Всеси́льною же десни́цею отъ глубины́ тѣ́ло твое́ спасе́но бы́сть, лю́бящими тя́, невре́дно, богоблаже́нне, ви́димо.

Отъ ки́това чре́ва Іо́ну Изба́вивый тридне́вновавша, спаса́етъ и тя́ глубины́ морскíя, служа́щимъ морски́мъ звѣре́мъ, по дне́хъ три́десятихъ.

Любо́вію Христо́вою распаля́емь, сла́вне, до сме́рти противоста́лъ еси́ мучи́телей, всему́дре; сего́ ра́ди Ца́рствія небе́снаго сподо́бился еси́, веселя́ся.

Богоро́диченъ: Чи́стую Тя́ голуби́цу и еди́ну нескве́рную, Пречи́стое обрѣ́те Сло́во и отъ Тебе́ роди́тися благоволи́, Пресвята́я Богома́ти, Всенепоро́чная Дѣ́во.

Конда́къ, гла́съ 2. Подо́бенъ: Вы́шнихъ ища́.

Волне́ній мно́жества невла́жно преходя́, безпло́тныя враги́ струя́ми сле́зъ твои́хъ крѣ́пко погрузи́лъ еси́, богому́дре Евѳи́міе преподо́бне, и чуде́съ да́ръ пріе́мъ, исцѣля́еши стра́сти вся́кія, моли́ непреста́нно о всѣ́хъ на́съ.

Икосъ:

Отве́рзи моя́ уста́, треблаже́нне, благопрія́тными твои́ми моли́твами предстоя́ Бо́гу, всесла́вне Евѳи́міе, да воспою́ боже́ственное твое́ житіе́ и возглаго́лю досто́йно добродѣ́тели твоя́, я́же на земли́ Христа́ ра́ди Бо́га соверши́лъ еси́ преподо́бно. Сто́лпъ бо яви́лся еси́ и пра́вило мона́ховъ свѣтлѣ́йшее, равноа́нгельное стяжа́въ житіе́, въ нехо́дная и́стинно всели́вся, моли́ непреста́нно о всѣ́хъ на́съ.

Пѣ́снь 7.

Ирмо́съ: Купина́ въ горѣ́ огненеопа́льная и росоно́сная пе́щь халде́йская, я́вѣ предписа́ Тя, Богоневѣ́сто, Боже́ственный бо невеще́ственный въ веще́ственнѣмъ чре́вѣ, Огнь неопа́льно прія́ла еси́. Тѣ́мже изъ Тебе́ Ро́ждшемуся пое́мъ: благослове́нъ еси́, Бо́же оте́цъ на́шихъ.

Авраа́мскій стяжа́въ нра́въ, прему́дре, отъ земли́ твоея́ пресе́льникъ бы́въ, и Бо́га узрѣ́лъ еси́, обѣщава́юща ти́ воздая́ніе бога́тно. Тѣ́мъ, веселя́ся, усе́рдно пѣ́лъ еси́: благослове́нъ еси́, Бо́же оте́цъ на́шихъ.

Распаля́емь ду́хомъ, преподо́бне, ко́зни вра́жія разори́лъ еси́ и побѣ́ды одолѣ́нія взя́лъ еси́, ору́жіемъ огражде́нъ на́съ ра́ди пригвозди́вшагося на Крестѣ́ Влады́ки. Тѣ́мъ, веселя́ся, усе́рдно пѣ́лъ еси́: благослове́нъ еси́, Бо́же оте́цъ на́шихъ.

Къ горѣ́ моли́твы приступи́лъ еси́, и вше́дъ во о́блакъ Ду́ха, Бо́жія за́дняя ви́дѣлъ еси́, и сла́ву пріе́мъ разсужде́нія, бы́въ, о́тче, сто́лпъ непоколеби́мь. Тѣ́мъ прилѣ́жно моли́ изба́витися искуше́нія вра́жія пою́щимъ тя́.

Богоро́диченъ: Зако́на Испо́лнителя родила́ еси́, пре́жде вѣ́къ Го́спода вся́ческихъ, Сы́на, Му́дрость же и Си́лу, напослѣ́докъ, Пречи́стая, преесте́ственно пло́тію на обновле́ніе земны́мъ. Тѣ́мъ благоче́стно, Дѣ́во Чи́стая, благослове́нъ, изъ Тебе́ Ро́ждшемуся зове́мъ, Бо́же оте́цъ на́шихъ.

Инъ.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Стремле́нія глаго́лъ твои́хъ му́дрыхъ, му́чениче, гони́тель, не терпя́, умерщвля́етъ тя́, и во глубину́ морску́ю помета́етъ, го́рнее хода́тайствуя тебѣ́, я́ко недоумѣва́я, Ца́рствіе, доблему́дре, и Боже́ственную сла́ву.

Не поклони́вся истука́ннымъ, колѣ́на же не поклони́въ и́доломъ, во о́гнь вве́рженъ скорбе́й, въ пе́щь мучи́тельную вше́лъ еси́, ороша́емь Ду́хомъ, росода́тельною си́лою, богому́дре му́чениче.

Умерщвле́нныя и во глубинѣ́ е́ллинскаго безбо́жія пожре́нныя лю́ди, живоно́сными твои́ми словесы́ извле́клъ еси́, пѣснопоя́, досточу́дне: препѣ́тый Го́споди, Бо́же оте́цъ на́шихъ, благослове́нъ еси́.

Богоро́диченъ: Благослове́нъ Пло́дъ благослове́ннаго чре́ва Твоего́, Его́же благословя́тъ небе́сныя си́лы и земны́хъ собо́ри, на́съ Изба́вльшаго кля́твы дре́внія, Благослове́нная.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго, и пла́мень въ ро́су прело́жшаго Бо́га, по́йте, дѣла́, я́ко Го́спода, и превозноси́те во вся́ вѣ́ки.

Сле́зъ твои́хъ тече́ньми огнепа́льныя сла́сти испепели́лъ еси́, гее́нскаго пла́мене стра́хъ отгна́лъ еси́, о́тче му́дре, соверше́нною любо́вію Созда́теля твоего́ сраствори́вся стра́хомъ, во вся́ вѣ́ки.

Якоже Ено́хъ къ Бо́гу преста́влься, отъ Него́ прія́тъ бы́лъ еси́, о́тче, и съ вы́шними ли́ки водворя́яся, пое́ши: вся́ дѣла́ Го́спода по́йте и превозноси́те во вся́ вѣ́ки.

Ны́нѣ нетлѣ́нныхъ даро́въ наслажда́яся и трисо́лнечныя свѣ́тлости исполня́яся, блаже́нне, пѣвцы́ твоя́ страсте́й и тмы́ моли́твами изба́ви, да досто́йно Христа́ славосло́вимъ.

Богоро́диченъ: Кля́тву разрѣши́ла еси́ дре́внюю, Пречи́стая, земны́хъ, неизрече́ннымъ сло́вомъ Бо́га заче́нши, воплоще́нна изъ Тебе́ за милосе́рдіе, Пренепоро́чная Влады́чице, Его́же превозно́симъ во вѣ́ки.

Инъ.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте дѣла́ и превозноси́те Его́ во вся́ вѣ́ки.

Гла́домъ мы́сленнымъ иста́явшія, хлѣ́бомъ слове́съ твои́хъ утверди́лъ еси́, Еди́наго чествова́ти Го́спода — Хлѣ́бъ жи́зни на́шея, наказа́въ, сла́вне. Ему́же вси́ пои́мъ: Го́спода воспѣва́йте дѣла́ и превозноси́те во вся́ вѣ́ки.

Попра́въ лю́тая кознодѣ́йства врага́ преле́стника страда́ніемъ твои́мъ, взя́лся еси́ на пресла́вную высоту́, достосла́вне, и а́нгельскія дости́глъ еси́ чи́ны, вопія́: Го́спода воспѣва́йте дѣла́ и превозноси́те Его́ во вся́ вѣ́ки.

О, стра́нныхъ веще́й соверши́вшихся на тебѣ́, Лукіа́не терпѣли́вейше! Нѣ́дро бо морско́е тѣ́ло твое́ свято́е на дово́льно пріе́мь, не вреди́ е́, су́ши же предае́тъ цѣ́ло, струи́ исцѣле́ній точа́ще лю́бящимъ тя́.

Богоро́диченъ: И язы́комъ, Дѣ́во, и се́рдцемъ Чи́стую Богоро́дицу Тя́ проповѣ́даемъ, Го́спода бо родила́ еси́, пло́тію обложе́на и во дву́ естеству́ разумѣва́ема; Его́же вся́ си́лы небе́сныя славосло́вятъ во вся́ вѣ́ки.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Просвѣще́нъ добро́тою по́стничества, о́тче, и одѣ́янъ ри́зою нетлѣ́нія, Евѳи́міе, и увязе́нъ вѣнце́мъ даро́въ па́че ума́, Влады́цѣ всѣ́хъ предстои́ши, ра́дуяся.

Въ пребыва́лища присноживу́щая всели́лся еси́, блаже́нне, идѣ́же апо́столъ собо́ръ и мно́жество му́ченикъ, преподо́бныхъ собра́ніе, проро́ковъ ли́цы, болѣ́зней воздая́нія отъ Бо́га пріе́мь досто́йно, богому́дре достосла́вне.

Всесвѣ́телъ, богоглаго́льниче, бы́лъ еси́, заря́ми Свѣ́та Трисо́лнечнаго свѣ́тло озаря́емь, испроси́ прегрѣше́ній разрѣше́ніе, лю́тыхъ избавле́ніе и злы́хъ отчужде́ніе всѣ́мъ, любо́вію къ тебѣ́ притека́ющимъ.

Богоро́диченъ: Воплоти́вся неизрече́нно Влады́ка всѣ́хъ изъ Тебе́, Богороди́тельнице Марíе, соверше́нъ бы́сть Человѣ́къ, и роди́вся, я́коже пре́жде рождества́ Дѣ́ву сохрани́ Тя чи́сту, Его́же моли́ спасти́ отъ бѣ́дъ ду́ши на́ша.

Инъ.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Свѣ́тится, му́дре, свяще́нная твоя́ па́мять, заря́ми Ду́ха о́блакъ страсте́й разгоня́щи, просвѣща́ющи же вѣ́рныхъ собра́нія и пожига́ющи де́монская во́инства; ю́же соверша́ющія ны́ сохраня́й.

Разрѣши́лся еси́ отъ тѣле́сныхъ у́зъ, блаже́нне, и къ высотѣ́ небе́снѣй, ра́дуяся, возлетѣ́лъ еси́, и яви́лся еси́ красе́нъ я́звъ удобре́ньми Бо́гу Творцу́; Ему́же предстои́ши съ му́ченики, веселя́ся.

Му́ченикъ на́съ Лукіа́нъ совокупи́ похвали́ти того́ стра́сти дне́сь, и свѣ́тлыя по́двиги, и е́же до конца́ до́блесть, чуде́съ же благода́ть оби́льную; Сего́ вси́ согла́сно ублажа́емъ.

Богоро́диченъ: Му́дрости вмѣсти́лище, па́че ума́ лу́чшія, яви́лася еси́, Отрокови́це Чи́стая, одушевле́нный престо́лъ же и две́рь; тѣ́мъ Тя́ человѣ́честіи собо́ри и а́нгельская сла́вятъ во́инства, Еди́на всѣ́хъ преиму́щая.

Свѣти́ленъ. Подо́бенъ: Жены́ услы́шите.

Мірска́го пристра́стія я́ко тру́дна избѣ́глъ еси́ и неяде́ніемъ пло́ть увяди́лъ еси́, обнови́въ же душе́вную крѣ́пость, преподо́бне, и сла́вою обогати́лся еси́ небе́сною, приснопа́мятне. Тѣ́мъ моля́ся не преста́й о на́съ ко Го́споду.

Сла́ва, и ны́нѣ, богоро́диченъ:

Ужа́сно Твое́ предста́тельство, Марíе Богоукра́шенная, и стра́шная Твоя́ сла́ва все́й земли́, Богоро́дице; въ Тебѣ́ бо ны́нѣ хва́лимся и Тя́ Хода́таицу иму́ще къ Сы́ну и Созда́телю Твоему́, неусы́пною Твое́ю моли́твою да спасе́мся вси́.

На стихо́внѣ окто́иха. Сла́ва, гла́съ 2:

Преподо́бне о́тче, изъ младе́нства добродѣ́тель прилѣ́жно испра́вивъ, орга́нъ бы́лъ еси́ Свята́го Ду́ха, и отъ Того́ пріе́мъ чуде́съ дѣ́йство, увѣща́лъ еси́ человѣ́ки преоби́дѣти сла́дкая; ны́нѣ же Боже́ственнымъ свѣ́томъ чистѣ́е облиста́емь, просвѣти́ и на́ша помышле́нія, о́тче Евѳи́міе.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Дре́ву кре́стному Тя́, Іису́се, пригвожде́на, зря́щи, Неискусобра́чная, пла́чущи, глаго́лаше: Ча́до Сла́дкое, почто́ оста́вилъ еси́ Мене́, Ро́ждшую Тя́, еди́ну, Свѣ́те непристу́пный Пребезнача́льнаго Отца́? Потщи́ся и просла́вися, я́ко да сла́ву получа́тъ Боже́ственную, и́же Боже́ственныя Стра́сти Твоя́ сла́вящіи.

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 131 – 138 об.

/ Къ оглавленію раздѣла /


Наверхъ / Къ титульной страницѣ

0