Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 20 октября 2017 г. Сейчасъ на порталѣ посѣтителей - 6.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 14-й де́нь.
Святы́хъ му́ченикъ Наза́рія, Герва́сія, Прота́сія и Келсíя.

[ВЕЧЕРЪ,]
На Го́споди воззва́хъ: стихи́ры святы́хъ, гла́съ 4. Подо́бенъ: Яко до́бля.

Иже вѣ́ры свидѣ́теле, по́двигъ соверши́вше,* побѣ́ды вѣне́цъ прія́ша* доблему́дренный Наза́рій* и вели́кій Прота́сій* съ Келсіе́мъ му́дрымъ,* богому́дрый Герва́сій.* Ихже воспои́мъ, я́ко до́блія ору́жники,* я́ко вы́шняго Ца́рствія наслѣ́дники* и я́ко самово́льная заколе́нія.

Просвѣти́вся смы́сломъ свѣтозаре́нія Ду́ха,* свяще́нный Наза́ріе,* па́че со́лнца, во тмѣ́ су́щимъ, возсія́лъ еси́ душа́мъ,* Боже́ственною благода́тію* поуча́я, просвѣща́я, наставля́я свѣтлѣ́йше* Еди́наго Го́спода и вѣ́ровати и чти́ти,* воплоще́нна отъ Дѣ́вы пресла́вно* и земны́я осія́вшаго.

Съ Наза́ріемъ возсія́* приснопа́мятный Келсíй,* и сла́вный Прота́сій, и Герва́сій,* доблему́дренно пострада́вше* и вся́ полки́ де́монскія* му́жески на земли́ побѣди́вше.* Тѣ́мъ то́чатъ исцѣле́ній струи́* и сердца́ напая́ютъ бога́тно благочести́выхъ* Боже́ственною благода́тію.

Да восхва́лится Наза́рій,* и да почти́тся Прота́сій,* и боже́ственный Келсíй, и Герва́сій,* и́же благосла́вно пострада́вше* и ле́сть ума́ливше,* и а́нгельскимъ лико́мъ свя́щенно причита́еми,* и обожа́еми по прича́стію Боже́ственному,* и побѣ́ды вѣнцы́* отъ дла́ни Живонача́льныя пріе́мше.

Яко тече́ніе соверши́вше* и вѣ́ру соблю́дше,* страда́нія вѣнцы́ увязо́стеся* и а́нгеломъ сочета́стеся,* свѣ́тло хра́брствовавше* и льсти́ваго врага́ о Христѣ́ попра́вше,* боже́ственніи му́ченицы.* Сего́ ра́ди, согла́сно соше́дшеся,* свѣтоно́сную ва́шу па́мять* соверша́емъ, веселя́щеся.

Богому́дрый Наза́рій* боже́ственнымъ проповѣ́даніемъ* гра́ды проходя́, просвѣти́,* его́же подража́въ, Келсíй* сла́ву стяжа́ боже́ственныхъ страда́лецъ,* попра́въ льсти́ваго.* Сія́ вси́ похвала́ми почти́мъ,* я́ко звѣ́зды и свѣти́ла су́щимъ во тмѣ́* и врачи́ ду́шъ на́шихъ.

Сла́ва, гла́съ 8:

Же́ртвы слове́сныя, Наза́рія, Герва́сія, Прота́сія и Келсíя похва́лимъ, я́ко все́ мучи́телей неи́стовство со и́долы упраздни́ша. Тѣ́мъ моли́твами и́хъ, Христе́ Бо́же, ми́ръ мíру да́руй и душа́мъ на́шимъ ве́лію ми́лость.

И ны́нѣ, богоро́диченъ или́ крестобогоро́диченъ. Подо́бенъ: Му́ченицы Госпо́дни.

Не терплю́, Ча́до, ви́дящи Тя́, на дре́вѣ усну́вша, бо́дрость всѣ́мъ подаю́щаго, я́ко да дре́вле преступле́нія плодо́мъ, сно́мъ поги́бельнымъ усну́вшимъ боже́ственную и спаси́тельную бо́дрость пода́си, — Дѣ́ва глаго́лаше, пла́чущися, Юже велича́емъ.

На стихо́внѣ окто́иха.

Тропа́рь, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости. Тѣ́хъ моли́твами спаси́ ду́ши на́ша.

Сла́ва, и ны́нѣ, богоро́диченъ. Аще среда́ или́ пято́къ, крестобогоро́диченъ.



НА УТРЕНИ,
[На Бо́гъ Госпо́дь: Тропа́рь святы́хъ, два́жды. Сла́ва, и ны́нѣ, богоро́диченъ или́ крестобогоро́диченъ.]

Оба кано́на окто́иха и святы́хъ кано́нъ на 4, его́же краегране́сіе: Вѣ́рно воспою́ му́ченики вѣнцено́сныя. Іо́сифово. Гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Вѣ́рно пострада́вше и по́двигъ сконча́вше, побѣ́ды вѣнце́мъ увязо́стеся, боже́ственніи му́ченицы. Боже́ственную ва́шу па́мять тѣ́мъ пра́зднуемъ, веселя́щеся.

Вѣ́триломъ вперя́еми Ду́ха Боже́ственнаго, пучи́ну немо́кренно преидо́сте, му́ченицы сла́вніи, муче́ній и ны́нѣ къ Боже́ственному приста́нищу вы́шнія свѣ́тлости всели́стеся.

Кресто́мъ, я́коже броня́ми, одѣ́яни, блаже́нніи, врага́ безпло́тнаго пора́товасте въ тѣ́лѣ, томле́нія многоплете́нная и сме́рть непра́ведную претерпѣ́вше.

Богоро́диченъ: Еди́ну, вмѣсти́вшую Превѣ́чнаго Го́спода во утро́бѣ, Всенепоро́чную Отрокови́цу воспои́мъ, я́ко бы́сть небе́съ простра́ннѣйши, Бо́га воплоти́вши бла́гости ра́ди.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Яко гро́здіе боже́ственніи бы́сте Виногра́да Боже́ственнаго и́стинно, страда́нія излива́юще вино́ на́мъ, му́ченицы, духо́вно веселя́щее всѣ́хъ сердца́ благода́тію.

Крѣ́пко проти́вился еси́ гони́телю, Наза́ріе, му́чениче Христо́въ, повелѣва́ющу ме́рзскимъ тебѣ́ бого́мъ жре́ти, пребога́те, я́ко а́гня заколе́нію гото́въ бы́лъ еси́, сла́вне.

Хвале́нія вси́ согла́сіе воспои́мъ дне́сь вѣ́рно Наза́рію, Герва́сію, Прота́сію и Келсíю, и́стины свидѣ́телемъ, бы́вшимъ въ Ду́сѣ.

Богоро́диченъ: Зако́на прообразова́ше ски́нія Тя́ бы́ти хотя́щую, Чи́стая, Бо́жіе свяще́нное жили́ще, изъ него́же Очище́ніе на́ше, святы́ню да́руяй всѣ́мъ на́мъ, пріи́детъ.

Сѣда́ленъ, гла́съ 8. Подо́бенъ: Прему́дрости.

Наза́ріевы стра́сти и гоне́нія, Прота́сіевы болѣ́зни и ра́ны чту́ще, Герва́сія хва́лимъ и Келсíя, Святы́я Тро́ицы сосу́ды честны́я, свѣ́тлыя звѣ́зды, вѣ́рныхъ предсто́лпія, нече́стія и́стинніи потреби́теле, и столпи́ вѣ́ры, и утвержде́ніе непоколеби́мо. Имже вѣ́рою возопіи́мъ: моли́те Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять ва́шу.

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца дои́ши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Крестобогоро́диченъ:

Агнца и Па́стыря и Изба́вителя, Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мляй Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе, вѣ́рою пою́щимъ Боже́ственныя Стра́сти Твоя́.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Па́че смы́сла святы́хъ му́ченикъ Твои́хъ любо́вь превосхо́дитъ вся́ помышле́нія, Сло́ве, боре́нія, и му́жественныя по́двиги, и натрижне́нія, я́же пода́лъ еси́ зако́нно и́мъ, пострада́вшимъ.

Еди́нъ ра́зумъ, въ ра́зныхъ ураня́еми тѣлесѣ́хъ, Христо́вы ору́жницы преизли́шно показа́ша, Еди́наго Бо́га въ три́знищи исповѣ́даша и многобо́жія ле́сть я́вѣ погуби́ша.

Наза́рія, Прота́сія, Герва́сія и Келсíя, честны́хъ му́чениковъ, а́нгели боре́нію подиви́шася, ка́ко въ пло́ти безпло́тному сплета́ющеся, низложи́ша сего́ на зе́млю му́жественнѣйше.

Яко до́бліи во́ини, я́ко непобѣди́міи му́ченицы, я́ко Христо́вы ору́жницы и я́ко благоче́стія побо́рницы небе́сная селе́нія наслѣ́довасте и лико́мъ а́нгельскимъ всегда́ свеселя́щеся.

Богоро́диченъ: Не истощи́въ Оте́ческихъ, Пребоже́ственный, Пречи́стая Богоро́дице, нѣ́дръ, въ нѣ́дрѣхъ Твои́хъ пречи́стыхъ сѣди́тъ, Боже́ственное сѣда́лище всѣ́мъ благосты́нею готовля́я и сла́ву, при́сно пребыва́ющую.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Ра́намъ тѣ́ло твое́, Наза́ріе, пріобщи́ся, у́замъ многообра́зныхъ му́къ, мѵ́ро благово́нное тѣ́мъ источа́етъ на́мъ, облагово́нствующее ду́ши вѣ́рою несомнѣ́нною тя́ почита́ющихъ, всехва́льне.

Кропле́ньми крове́й твои́хъ погаси́лъ еси́ у́гліе многобо́жія, страстоте́рпче, боже́ственныхъ чуде́съ огне́мъ же, всему́дре, ти́ну страсте́й лю́тыхъ пожига́еши, Бо́жіею благода́тію Спа́совою, Наза́ріе.

Цвѣ́ты, дыха́ющіи воню́ Бо́жія зна́нія, богозна́нія зла́чники, ра́йская древеса́ благопло́дная, предо́брыя и свѣтоза́рныя, почти́мъ му́ченики и вѣ́рно ублажи́мъ.

Да пое́тся Наза́рій, да велича́ется Келсíй, ку́пно съ Прота́сіемъ до́блій да похва́лится вѣ́рою Герва́сій, Це́ркве непрекло́нніи столпи́ и основа́нія неруши́мая бы́вшіи.

Богоро́диченъ: Ору́жіе, дре́вле Еде́мъ стрегу́щее, плещи́ вѣ́рнымъ подае́тъ, Чи́стая, зна́менаннымъ честно́ю Кро́вію, пре́жде источи́вшеюся отъ ре́бръ копія́ прободе́ніемъ, изъ Тебе́ Возсія́вшаго.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Твоя́ ше́ствія на вода́хъ бы́ша, всеблаже́нне Наза́ріе, и не позна́шася си́мъ слѣды́ твоя́ въ Ду́сѣ, Его́же си́лою вся́ враги́ посрами́лъ еси́.

Тѣле́съ стра́сти неисцѣ́льныя Бо́жіею благода́тію исцѣли́лъ еси́, му́чениче Наза́ріе, мѵ́ро благово́нное источа́еши же твои́мъ честны́мъ моще́мъ приближа́ющимся.

Явѣ боже́ственный Прота́сій, вели́кій же съ ни́мъ Герва́сій, бога́тство привре́менное и могу́тство попра́вше, вѣ́чныя сла́вы сподо́бишася.

Богоро́диченъ: Зако́ны еди́на обнови́ла еси́ естества́, Дѣ́во, ро́ждши Бо́га безсме́ртнаго, въ пло́ть ме́ртвенную одѣ́явшася, да ме́ртвыя оживи́тъ бла́гостію.

Конда́къ, гла́съ 2. Подо́бенъ: Вы́шнихъ ища́.

Свѣти́льницы свѣ́тліи я́вльшеся, боже́ственніи му́ченицы, тва́рь свѣ́томъ чуде́съ озаря́ете, неду́говъ разрѣша́юще глубо́кую но́щь всегда́ и Христу́ еди́ному Бо́гу моля́щеся непреста́нно о всѣ́хъ на́съ.

Икосъ:

Яко свѣтоза́рніи и боже́ственніи свѣти́льницы, Свѣ́ту Вели́кому предстоя́ще при́сно, богоблаже́нніи му́ченицы, и отту́ду испуща́емыми невече́рняго Божества́ сія́ніи всегда́ просвѣща́еми и обожа́еми, вѣ́рою па́мять ва́шу соверша́ющія боже́ственную просвѣти́те, и омраче́нія, и страсте́й, и бѣ́дъ, и зло́бы изба́вите, моля́щеся непреста́нно о всѣ́хъ на́съ.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

На ка́мени боже́ственнаго зна́нія утверди́вше стопы́, сла́вніи, серде́цъ ва́шихъ вра́жіими ухищре́ньми не преврати́сте, воспѣва́юще: препѣ́тый отце́въ Госпо́дь и Бо́гъ, благослове́нъ еси́.

Свѣ́тъ невече́рній страда́вшимъ кро́вію ва́мъ возсія́, и весе́ліе я́вѣ ва́съ прія́тъ, великому́ченицы, воспѣва́ющихъ: препѣ́тый отце́въ Госпо́дь и Бо́гъ, благослове́нъ еси́.

Освяти́сте преусе́рдно проходя́ще гра́ды, блаже́нніи, исповѣ́дающе Христа́ предъ мучи́тели и всѣ́мъ исцѣле́нія подаю́ще тре́бующимъ благода́тію Ду́ха Всесвята́го.

Богоро́диченъ: Свѣтлѣ́йшую пала́ту обрѣ́тъ Бо́гъ утро́бу Твою́, въ сію́ всели́ся, сы́ны содѣ́ловая свѣ́та, Всенепоро́чная, зову́щія: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Утренююще къ возсія́вшему изъ Дѣ́вы пресла́вно вели́кому Со́лнцу, му́ченицы непобѣди́міи свѣ́тъ бы́сте и пре́лести тму́ благода́тію разори́сте: Го́спода по́йте, вопію́ще, дѣла́ и превозноси́те Его́ во вся́ вѣ́ки.

Ри́мъ дре́вле по́двиги твоя́ проповѣ́даетъ, Наза́ріе многострада́льне, Константиногра́дъ пое́тъ чудеса́, свяще́нныя твоя́ мо́щи вѣ́рою содержа́я, Го́спода по́йте, вопію́щій, дѣла́ и превозноси́те Его́ во вся́ вѣ́ки.

Боже́ственный Наза́рій, источа́я мѵ́ра благода́ти, повелѣва́етъ всѣ́мъ притека́ющимъ вѣ́рою почерпа́ти на просвѣще́ніе и очище́ніе, взыва́ющимъ: Го́спода по́йте дѣла́ и превозноси́те Его́ во вся́ вѣ́ки.

Ва́съ, до́блія страстоте́рпцы, Наза́рія, Келсíя, Прота́сія, па́ки же Герва́сія, моле́бники ко Го́споду крѣпча́йшія иму́ще, любо́вію зове́мъ: Го́спода по́йте дѣла́ и превозноси́те Его́ во вся́ вѣ́ки.

Богоро́диченъ: Пло́тію соедини́вся Тебѣ́ по существу́, всѣ́мъ, е́же бы́ти, Подая́й, всего́ мя́ обнови́, всего́ назда́, обвѣтша́вшаго, Пречи́стая, преступле́ньми. Тѣ́мъ Тя́, Дѣ́ву, пое́мъ и превозно́симъ во вся́ вѣ́ки.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Крѣ́постію вжиля́еми Христа́, разо́ршаго зло́бу губи́теля, преклони́вше сему́ вы́ю, коне́цъ мече́мъ прія́сте, разрѣ́шшеся отъ пло́ти, великоимени́тіи, тѣ́мъ досто́йно блажи́ми есте́.

Красни́ я́звами плотски́ми бы́сте и а́нгеломъ уподо́бистеся, ны́нѣ же предстоите́ всѣ́хъ, ра́дующеся, при́сно Красотѣ́, прича́стіемъ я́вѣ удобря́еми, краснѣ́йше, всечестнíи.

Зна́меньми и чудесы́ ва́съ украси́ и пре́жде конца́, всеприснопа́мятніи, и по концѣ́ Влады́ка, Наза́ріе, Прота́сіе, Келсíе, Герва́сіе, непобѣди́міи му́ченицы, тѣ́мъ досто́йно ублажа́етеся.

Освяти́шася любо́вію ва́шею вся́ческая, соверша́ющи па́мять дне́сь: ра́дуются му́ченицы и вси́ проро́цы съ на́ми пра́зднуютъ, съ ни́миже о на́съ моли́теся Благодѣ́телю, всеблаже́нніи.

Богоро́диченъ: Гла́съ Ти́ боже́ственнаго Гавріи́ла прино́симъ, веселя́щеся, Отрокови́це Пречи́стая: ра́дуйся, Обра́дованная, му́чениковъ, апо́столовъ похвало́ и всѣ́хъ вѣ́рныхъ спасе́ніе, Дѣ́во Ма́ти Неискусобра́чная.

Свѣти́ленъ. Подо́бенъ: Ду́хомъ во святи́лищи.

Претерпѣ́лъ еси́, я́ко безпло́тенъ, нестерпи́мыя му́ки, Наза́ріе блаже́нне, му́чениковъ сла́ва, съ Герва́сіемъ му́дрымъ, Прота́сіемъ же ку́пно и боже́ственнымъ Келсíемъ. Тѣ́мъ вѣ́рою чти́мъ всепра́зднетвенную ва́шу и честну́ю па́мять.

Богоро́диченъ:

Па́че ума́ Рождества́ Твоего́ пресла́вное чу́до удивля́етъ вся́къ смы́слъ, и земны́хъ, и а́нгелъ: Дѣ́ва бо су́щи родила́ еси́, и Дѣ́ва пребыла́ еси́, я́ко пре́жде рождества́, Дѣ́во. О, стра́шнаго та́инства! О, рождества́ ди́внаго! О, чревоноше́нія пресла́внаго!

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 118 об. – 122 об.

/ Къ оглавленію раздѣла /


Наверхъ / Къ титульной страницѣ

0