Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 25 iюня 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 14-й де́нь.
Слу́жба преподо́бныя Параске́вы [Се́рбскія].

Ве́черъ, каѳи́сма обы́чная. На Го́споди воззва́хъ: стихи́ры на 6. И на у́трени, кано́нъ на 6. Аще ли настоя́тель изво́литъ или́ гдѣ́ прилучи́тся хра́мъ преподо́бныя Параске́вы, пое́мъ: Блаже́нъ му́жъ, и стихи́ры на 8, и стихо́вну. На у́трени пое́мъ, я́коже и про́чимъ святы́мъ, иму́щимъ поліеле́й.


[НА ВЕЛИЦѢЙ ВЕЧЕРНИ,
Блаже́нъ му́жъ, 1-й антифо́нъ. На Го́споди воззва́хъ:] стихи́ры, [на 8,] гла́съ 6. Подо́бенъ: Все́ отло́жше.

Возсія́ла еси́, Параске́во,* добродѣ́тельми и видѣ́ніемъ* на тве́рди я́ко по́стница вѣ́рна,* всесвѣ́тлыми и сла́вными заря́ми,* вся́ отгоня́еши* омраче́нія ерети́ческія* и просвѣща́еши вѣ́рою и любо́вію* прилѣжа́щія твои́мъ уче́ніемъ.* Тѣ́мже свѣтоно́сный тво́й пра́здникъ* соверша́емъ любо́вію,* Христу́ со дерзнове́ніемъ моли́ся* о душа́хъ на́шихъ. [Два́жды.]

Труды́ по́стническими* твою́ ду́шу вооружи́ла еси́,* и плотска́я увяди́ла еси́ взыгра́нія,* и у́мъ, сла́вная,* содѣ́лала еси́* Боже́ственныя Тро́ицы жили́ще;* и возвы́силася еси́, о Параске́во,* идѣ́же нетлѣ́ніе* и поко́й пра́ведныхъ,* съ ни́миже ны́нѣ ра́дуешися* и во сла́вѣ предстои́ши Христу́,* со дерзнове́ніемъ моля́ся* о душа́хъ на́шихъ.

Боже́ственныхъ сле́зъ твои́хъ тече́ніи, Параске́во,* все́ потопи́ла еси́* де́монское ополче́ніе,* я́ко не́мощно су́що,* твои́ми всегда́ къ Бо́гу манове́ніи* и си́льными восхожде́ніи;* и го́рдое возноше́ніе на зе́млю низве́ргла еси́,* и возвы́силася еси́ въ небе́сныя и благолѣ́пныя оби́тели,* въ ни́хже со а́нгелы водворя́ешися,* предстоя́щи Христу́,* со дерзнове́ніемъ моли́ся* о душа́хъ на́шихъ.

Ины стихи́ры, гла́съ и подо́бенъ то́йже:

Живу́щи по сме́рти,* Параске́во блаже́нная,* посѣща́еши вся́,* съ вѣ́рою притека́ющія къ ра́цѣ твое́й:* отъ лю́тыхъ страсте́й* покрыва́еши всегда́* и отъ бѣ́дъ избавля́еши,* подава́еши же исцѣле́нія моли́твами твои́ми* и спаса́еши отъ де́монскаго нахожде́нія* чту́щія святу́ю па́мять твою́,* прося́щи отъ Бо́га* дарова́ти проще́ніе прегрѣше́ній. [Два́жды.]

Ангелъ земны́й* на земли́ яви́лася еси́,* житіе́ безпло́тное въ земнѣ́мъ тѣ́лѣ показа́ла еси́,* отца́ бо и ма́тере дале́че отбѣ́гши,* причта́лася еси́ ко Христу́, Жениху́ твоему́,* въ черто́зѣ небе́снѣмъ,* богоневѣ́сто, живу́щи,* въ Калликра́тіи и́маши селе́ніе крѣ́пко,* идѣ́же исцѣле́нія подае́ши* съ вѣ́рою притека́ющимъ ти́,* и чуде́съ благода́ть* всѣ́мъ источа́еши.

Дре́вле у́бо одождя́ше Бо́гъ* изра́ильтяномъ ма́нну съ небесе́* дне́сь же иму́щимъ и́мя твое́ честно́е су́губа быва́ше пшени́ца* въ раздая́ніе тре́бующимъ,* и на́съ ны́нѣ въ твое́й па́мяти,* преподо́бная Параске́во,* Хлѣ́ба Небе́снаго сподо́би* прія́ти благода́ть* въ благодаре́ніе чуде́съ твои́хъ,* да ра́дость душа́мъ и спасе́ніе получи́мъ* во святѣ́й па́мяти твое́й.

Сла́ва, гла́съ 1:

Ты́ сле́зными излія́ніи плотски́хъ страсте́й ражже́нія угаси́вши и боже́ственнаго раче́нія о́гнь возгнѣ́щши, озари́лася еси́ Царя́ Христа́ безсме́ртіемъ и Тому́ сочта́лася еси́, до́брая дѣ́во, и съ Ни́мъ въ Черто́гъ разу́мный ны́нѣ возшла́ еси́, Параске́во, моли́ся о душа́хъ на́шихъ.

И ны́нѣ, богоро́диченъ по гла́су, или́ крестобогоро́диченъ. Подо́бенъ: Прехва́льніи му́ченицы.

Заколе́ніе Твое́ непра́ведное, Христе́,* Дѣ́ва зря́щи,* и пла́чущи, вопія́ше Ти́:* Ча́до Сладча́йшее, ка́ко безъ пра́вды умира́еши?* Ка́ко на Дре́вѣ ви́сиши,* Иже всю́ зе́млю повѣ́шей на вода́хъ?* Не оста́ви Мене́ еди́ну,* Благодѣ́телю Многоми́лостиве,* Ма́терь и рабу́ Твою́, молю́ся.

Аще же пое́ши поліеле́й, И ны́нѣ, богоро́диченъ: Всемíрную сла́ву...
Вхо́дъ. Проки́менъ дне́. Чте́нія три́ преподо́бническая.

Прему́дрости Соломо́новы чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 4. Подо́бенъ: Зва́нный свы́ше.

Уязви́вшися жела́ніемъ боже́ственнымъ,* преподо́бная ма́ти Параске́во,* вся́ су́етная преле́стнаго житія́ возненави́дѣвши,* Христу́ послѣ́довала еси́* горя́щимъ ду́ха жела́ніемъ,* мудрова́ніе плотско́е* умертви́вши воздержа́ніемъ,* и и́стиннымъ умиле́ніемъ,* и соверше́ннымъ смире́ніемъ,* и прія́ла еси́ отъ Бо́га да́ръ чудотворе́ній неизрече́нныхъ:* Его́же моли́* спасти́ и просвѣти́ти ду́ши на́ша.

Сти́хъ: Честна́ предъ Го́сподемъ* сме́рть преподо́бныхъ Его́.

Ангельское возжелѣ́вши житіе́,* преподо́бная ма́ти Параске́во,* мимотеку́щее сіе́ житіе́,* я́ко со́нъ, вмѣни́ла еси́,* подвиза́ющися воздержа́ніемъ,* и прилѣ́жными моли́твами,* и поще́ніемъ, и бдѣ́ніемъ, и низулега́ніемъ,* и чистото́ю;* сосу́дъ пречи́стъ яви́лася еси́ Ду́ха Боже́ственнаго* и свѣ́тлыхъ, и неизрече́нныхъ чуде́съ да́ръ отъ Бо́га прія́ла еси́.* Его́же, всеблаже́нная ма́ти, моли́* спасти́ и просвѣти́ти ду́ши на́ша.

Сти́хъ: Блаже́ни вси́, боя́щіися Го́спода,* ходя́щіи въ путе́хъ Его́.

Настоя́щего житія́ сего́,* преле́стнаго, и маловре́меннаго,* и ско́ро мимотеку́щаго,* вся́ отве́ргла еси́* и пла́мень огня́ стра́стнаго угаси́ла еси́.* Непреста́ннымъ умиле́ніемъ,* и соверше́ннымъ смире́ніемъ,* и прилѣ́жнымъ моле́ніемъ* безпло́тныхъ чи́ны дости́гла еси́* и зри́ши открове́ннымъ лице́мъ сла́ву Бо́жію,* Его́же, преподо́бная Параске́во, моли́* спасти́ и просвѣти́ти ду́ши на́ша.

Сла́ва, гла́съ 2:

Отъ ко́рене блага́го израсте́ ши́покъ, и́же отъ младе́нчества твоего́ возлюби́ла еси́ Христа́, Параске́во, благода́тію па́че, не́же млеко́мъ, воспита́на бы́вши, и на ка́мени стоя́щи, пло́ть твою́ изнури́ла еси́, и къ Бо́гу возвы́сившися ра́зумомъ, и Госпо́дне созда́лася еси́ добродѣ́тельми жили́ще, и съ небе́сными ликовству́еши, Христо́ва бы́вши оби́тель, моли́ спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Егда́ Нескве́рная Агница ви́дѣ Своего́ Агнца, на заколе́ніе, я́ко человѣ́ка, во́лею влеко́ма, пла́чущи, глаго́лаше: безча́дствовати Мя́ ны́нѣ тщи́шися, Христе́, ро́ждшую Тя́; что́ сіе́ сотвори́лъ еси́, Изба́вителю вся́ческихъ? Оба́че воспѣва́ю и сла́влю Твою́, ю́же па́че ума́ и сло́ва, кра́йнюю бла́гость, Человѣколю́бче.

Тропа́рь, гла́съ 4:

Пусты́нное и безмо́лвное житіе́ возлюби́вши, и во слѣ́дъ Христа́, Жениха́ твоего́, усе́рдно поте́кши, и Того́ благо́е и́го во ю́ности твое́й взе́мши, кре́стнымъ зна́меніемъ къ мы́сленнымъ враго́мъ му́жески вооружи́вшися, по́стническими по́двиги, посто́мъ, и моли́твами, и сле́зными ка́плями у́гліе страсте́й угаси́ла еси́, достосла́вная Параске́во: и ны́нѣ въ небе́снѣмъ черто́зѣ съ му́дрыми дѣ́вами предстоя́щи Христу́, моли́ о на́съ почита́ющихъ честну́ю па́мять твою́.

Сла́ва, и ны́нѣ, богоро́диченъ: Еже отъ вѣ́ка утае́ное...



НА УТРЕНИ,
На Бо́гъ Госпо́дь: тропа́рь святы́я два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 4. Подо́бенъ: Ско́ро предвари́.

Жениха́ возлюби́вши, Творца́ и Бо́га, жениха́ же тлѣ́ннаго оста́вила еси́, честна́я Параске́во, и ра́дующися, претерпѣ́ла еси́ по́стныя по́двиги. Тѣ́мже, и вѣнцы́ нося́щи, къ Боже́ственному черто́гу возшла́ еси́, испроша́ющи всѣ́мъ грѣхо́въ оставле́ніе. [Два́жды.]

Сла́ва, и ны́нѣ, богоро́диченъ:

Дѣ́во Всенепоро́чная, Яже Пресу́щнаго Бо́га ро́ждшая, со преподо́бною Того́ непреста́нно моли́, оставле́ніе прегрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, еди́на Всепѣ́тая.

По 2-мъ стихосло́віи сѣда́ленъ, гла́съ 1:

Непоро́чная а́гница честна́я Го́сподеви сочта́ся та́инственно въ чи́стѣмъ житіи́, добро́тою богода́нною себе́ украси́вши. Тѣ́мже и прія́тъ благода́ть исцѣле́нія, уврачу́ющи стра́сти притека́ющихъ къ не́й си́лою духо́вною. [Два́жды.]

Сла́ва, и ны́нѣ, богоро́диченъ:

Ма́терь Тя́ Бо́жію мо́лимъ вси́, Дѣ́ву вои́стинну и по Рождествѣ́ я́вльшуюся, любо́вію прибѣга́ющіи къ Твое́й бла́гости: Тебе́ бо и́мамы грѣ́шніи предста́тельницу, Тебе́ стяжа́хомъ въ напа́стехъ спасе́ніе, Еди́ну всенепоро́чную.

Посе́мъ, Хвали́те и́мя Госпо́дне... и припѣ́въ:

Ублажа́емъ тя́, преподо́бная ма́ти Параске́во, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный преподо́бническій: [Терпя́ потерпѣ́хъ Го́спода, и вня́тъ ми́ и услы́ша моли́тву мою́.]

По поліеле́и сѣда́ленъ, гла́съ 8:

Предъизбра́нная отъ Бо́га, преподо́бная ма́ти Параске́во, житія́ треволне́ній и мяте́жа мірска́го стра́стныхъ помышле́ній избѣ́гши, ко приста́нищу житія́ дости́гла еси́, и со а́нгелы пѣсносло́вящи Изба́вителя Христа́ Бо́га, моли́ непреста́нно о на́съ, да благода́ть и ми́лость да́руетъ на́мъ, чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Ра́дуйся, а́нгеломъ ра́дость мíра пріе́мшая, ра́дуйся, ро́ждшая Творца́ Твоего́ и Го́спода, ра́дуйся, сподо́бльшаяся бы́ти Ма́ти Бо́жія.

Та́же степе́нна, 1 антифо́нъ, 4-го гла́са. Проки́менъ [гла́съ 4]: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Вся́кое дыха́ніе... Ева́нгеліе Матѳе́я, зача́ло 104.

По 50-мъ псалмѣ́, стихи́ра, гла́съ 8:

Вся́къ язы́къ да подви́жится къ похвале́нію Христо́вы кра́сныя невѣ́сты, чи́стыя голуби́цы, позлаще́нныя Ду́хомъ Святы́мъ. Та́ бо возлюби́ пусты́нное житіе́, бы́сть а́нгеломъ собесѣ́дница, дѣ́вственная похвала́, ю́же а́нгели восхвали́ша, и человѣ́честіи ро́ди, блажа́ще, вопіе́мъ: ра́дуйся, засту́пнице су́щимъ въ бѣда́хъ и обурева́емымъ приста́нище, преблаже́нная Параске́во, ты́ бо послѣ́довала еси́ твоему́ Жениху́ Христу́, подаю́щему мíру ве́лію ми́лость.

Кано́нъ Богоро́дицы, со ирмосо́мъ на 6. И преподо́бныя два́ кано́на, на 8.

[Кано́нъ преподо́бныя], гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Моего́ ра́зума твои́ми моли́твами мра́къ отжени́, Параске́во преподо́бная, да воспою́ сла́вную твою́ па́мять, и свѣтоно́сную, и блаже́нную пѣ́сньми.

Яко рѣка́ устреми́ся отъ Сіо́на, сла́вная Параске́во, напои́ла еси́ зѣло́ боже́ственными струя́ми вѣ́рныхъ со́нмы, вопію́щи: Го́сподеви пои́мъ пѣ́снь но́вую.

Боже́ственными сія́ніи ду́шу твою́ озари́вши, Параске́во, сладостра́стіе пло́ти воздержа́нія попали́ла еси́ огне́мъ, пою́щи и́стинную пѣ́снь Христу́.

Богоро́диченъ: Свѣ́тлыми луча́ми Твоего́ Сы́на, Богоро́дице, просвѣти́ омраче́нную мою́ ду́шу и страсте́й смуще́ніе твои́ми, Чи́стая, укроти́ хода́тайствы.

Инъ [кано́нъ преподо́бныя, гла́съ 8.]
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Лику́ющи, ма́ти, на небесѣ́хъ и твоему́ Жениху́ Христу́, предстоя́щи при́сно со а́нгелы, и проро́ки, и со апо́столы, и со жена́ми преподо́бными, о на́съ моли́ся.

По́стъ возлюби́вши и чи́стое смире́ніе, дѣ́во, Бо́га Истиннаго возвесели́ла еси́; Тому́ непреста́нно о на́съ моли́ся.

Ра́достный ти́ Христо́въ гла́съ пріи́де, на земли́ мольбу́ дѣ́ющей, ма́ти честна́я, и ра́дости напо́лнилася еси́, Сего́ пѣ́сньми за ны́ моля́щи.

Богоро́диченъ: Чи́ни Тя́ а́нгельстіи и человѣ́честіи, Безневѣ́стная Дѣ́во, хва́лятъ непреста́нно: Зижди́теля бо и́хъ я́ко Младе́нца на руку́ Твое́ю понесла́ еси́.

Катава́сія: Отве́рзу уста́ моя́...

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Ты́ испо́лнилася еси́, му́драя ма́ти Параске́во, Боже́ственнаго Ду́ха и яви́лася еси́, пита́ющи бога́тно благоче́стія сла́достію, живо́тнымъ сло́вомъ зря́щія къ тебѣ́.

Отъ повелѣ́ній Боже́ственнаго сія́нія просвѣти́ла еси́ вся́, блаже́нная Параске́во, отгна́вши всю́ ерети́ческую зло́бу, Жизнода́вцу Христу́ воспѣва́ющи: свя́тъ еси́, Го́споди.

На го́ру Боже́ственныхъ добродѣ́телей востекла́ еси́, Параске́во, и во о́блакъ видѣ́ній прини́кши, сочета́лася еси́ съ Бо́гомъ, разу́мныя скрижа́ли пріи́мши зако́на благода́тнаго.

Богоро́диченъ: Се́ лѣ́ствица Іа́ковля, ю́же ви́дѣ иногда́ утвержде́ну, на не́йже утвержда́шеся Бо́гъ, свѣтоно́сна, Чи́стая, яви́ся дѣ́вствующи.

Инъ.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Испроси́, Параске́во, невѣ́сто Христо́ва сла́вная, грѣхо́въ проще́ніе пода́ти вѣ́рою хва́лящимъ тя.

Бѣ́гающи, удали́лася еси́ и всели́лася еси́ въ пусты́ни, и гора́хъ при́сно, и верте́пѣхъ, Бо́гу угожда́ющи.

Обрѣла́ еси́, его́же возлюби́ла еси́ отъ души́, пречестна́я Параске́во, въ широтѣ́ пусты́ни сокро́вище потае́ное.

Богоро́диченъ: Тебе́ вси́ стяжа́хомъ, прибѣ́жище и стѣ́ну на́шу, христіа́не, и Тя́ сла́вимъ немо́лчно, Ма́ти Безневѣ́стная.

Сѣда́ленъ, гла́съ 4:

Яви́лася еси́, преподо́бная Параске́во, Це́ркви, я́ко ино́е со́лнце, озаря́ющи сію́ мо́лніями чуде́съ твои́хъ и просвѣща́ющи вѣ́рою вопію́щія ти́: ра́дуйся, по́стницъ похвало́ и дѣ́въ удобре́ніе. [Два́жды.]

Сла́ва, и ны́нѣ, богоро́диченъ:

Пречи́стѣи ру́цѣ Твои́, Дѣ́во Ма́ти, просте́рши, покры́й упова́ющія на Тя́ и Сы́ну Твоему́ зову́щія: всѣ́мъ пода́ждь, Христе́, ми́лости твоя́.

Крестобогоро́диченъ:

На Дре́вѣ ви́дящи воздви́жена Сы́на Твоего́, Пречи́стая, утро́бою ма́тернею разтерза́ема, жа́лостно взыва́ла еси́: увы́ Мнѣ́, ка́ко заше́лъ еси́, Свѣ́те Мо́й безлѣ́тный.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Поще́ніемъ, преподо́бная Параске́во, себе́ очи́стивши, вся́ свѣ́та испо́лнилася еси́, и вся́ боговмѣ́стна показа́лася еси́, и вся́ яви́лася еси́ Ду́ху соприча́стна.

Гла́домъ уморя́ющи лю́тѣ зло́е ю́ности игра́ніе, Параске́во блаже́нная, и по́стническія терпи́ши болѣ́зни, отъ со́вѣсти чи́сты о Го́сподѣ веселя́щися.

Облиста́вши, сла́вная, житія́ исправле́ніи, обощрена́ яви́лася еси́, я́ко Христо́въ ме́чь, ссѣца́ющи де́монская ухищре́нія, Боже́ственнымъ Ду́хомъ укрѣпля́ема.

Богоро́диченъ: Свѣти́льникъ всесвѣ́тлый, Боже́ственная трапе́за, Бо́жіе селе́ніе, киво́тъ и же́злъ, процвѣ́тши въ мíрѣ Христа́, Ты́ яви́лася еси́, Ма́ти Дѣ́во.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Нескве́рно зерца́ло и свя́то по́мысломъ себе́ сотво́рши, я́ко свѣти́ло, при́сно сія́ющи посредѣ́ по́стницъ, сла́вная.

Въ тѣле́сномъ обнаже́ніи со́лнечнымъ попале́ніемъ сгара́ла еси́ за любо́вь Жениха́ твоего́, и мра́за студе́ность претерпѣ́ла еси́.

Всено́щнымъ бдѣ́ніемъ, и моли́твами крѣ́пкими, и стена́ньми, пло́ти увяди́ла еси́ движе́нія, преблаже́нная ма́ти.

Богоро́диченъ: Христа́, Его́же родила́ еси́, Пречи́стая Дѣ́во, Того́ умоли́ рабо́мъ Твои́мъ дарова́ти прегрѣше́ній оставле́ніе.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Свѣтопода́тельными твои́ми блиста́ньми, Параске́во, мра́чную тму́ потреби́ла еси́ ерети́ческую, и Богозна́нія свѣ́томъ озари́вшися, просвѣща́еши мíра концы́.

Тебе́ вси́, засту́пницу иму́ще, досто́йно сла́вимъ, Параске́во, ты́ бо яви́лася еси́ а́нгеловъ собесѣ́дница и дѣ́въ украше́ніе, ма́ти преподо́бная.

Яви́лася еси́, ма́ти Параске́во, свѣтоза́рна, заблу́ждшихъ путеводи́тельница, вла́ющихся прави́тельница, и коле́блющихся въ лю́тыхъ тве́рдость, и стѣна́ неруши́ма.

Богоро́диченъ: Добро́та Іа́ковля, ю́же возлюби́ Бо́гъ и всели́тися избра́, земны́хъ сла́ва и прибѣ́жище грѣша́щихъ, Богоро́дице, Ты́ яви́лася еси́.

Инъ.

Ирмо́съ: Утренююще вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ Тебе́, ино́го не вѣ́мы.

Дне́ и мíра сопроти́вная вѣ́дящи, жела́нія люботво́рца де́мона люби́ти не восхотѣ́ла еси́.

Мня́ преодолѣ́ти твое́й любви́ и чистотѣ́, но смѣ́хъ яви́ся козньми́ прелука́вый.

Погребо́ша твое́ тѣ́ло, я́коже нетлѣ́емо, ты́ бо я́ко безпло́тна пожила́ еси́, богоневѣ́стная.

Богоро́диченъ: Дѣ́ву по Рождествѣ́ пое́мъ Тя́, Богоро́дице, Ты́ бо Бо́га пло́тію мíру родила́ еси́.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Сія́еши, я́ко со́лнце, богоза́рны лучи́, преблаже́нная Параске́во, чуде́съ испуща́ющи похваля́ющимъ твоя́ по́стныя труды́ и ди́вныя по́двиги.

Пречи́стую Влады́чицу Богоро́дицу похваля́ющи че́стно, язы́комъ твои́мъ, богому́драя Параске́во, воспѣ́вши словеса́ свѣтоза́рная, вѣ́рныхъ со́нмища му́дрѣ сердца́ умаща́ющи.

Напи́санный всечестны́й и святы́й о́бразъ любе́зно лобыза́еши, безбо́жныхъ же писа́нія потребля́еши, и тѣ́хъ богоме́рзская и безбо́жная повелѣ́нія поплева́еши, и возвѣща́еши че́сть и поклоне́ніе о́браза Христо́ва.

Богоро́диченъ: Вся́ хотѣ́ніемъ Свои́мъ соста́вивый Бо́гъ и содержа́й вся́ческая, описа́ніемъ тѣлесе́ на Твои́хъ рука́хъ держи́тся, Пречи́стая, Иже Боже́ственнымъ Существо́мъ неопи́санный.

Инъ.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Мірскíя молвы́ попра́ла еси́, мíра Содѣ́телю предстои́ши, возлетѣ́вши кри́лы златоукра́шенными, ма́ти, отъ трудо́въ поще́нія и моли́твъ, богоблаже́нная.

Богоуго́днаго твоего́ ра́ди житія́, пречестна́я, я́ко да́ръ освяще́нъ, оте́честву подае́шися твоему́, Параске́во, къ за́паду прише́дши, всесла́вная.

Несказа́нно житіе́ измла́да возжелѣ́вши, неви́дима бо въ земли́ потаена́, восходя́щи, преподо́бная, на удивле́ніе бы́сть, Бо́гу я́вльшу тя́.

Богоро́диченъ: Да избу́демъ отъ лю́тыхъ прегрѣше́ній моли́твами Твои́ми, Богоро́дице Чи́стая, и да улучи́мъ Бо́жіе сія́ніе изъ Тебе́ неизрече́нно воплоще́ннаго Сы́на Бо́жія.

Конда́къ, гла́съ 6:

Святу́ю вси́ засту́пницу су́щимъ въ бѣда́хъ, благоче́стно воспои́мъ Параске́ву всечестну́ю: та́ бо, житіе́ оста́вльши тлѣ́нное и нетлѣ́емое прія́тъ бо вѣ́ки, сего́ ра́ди сла́ву обрѣ́те, чуде́съ благода́ть Бо́жіимъ велѣ́ніемъ.

Икосъ:

Пріиди́те, по́стническое сосло́віе, пріиди́те, чистоты́ рачи́теле, пріиди́те, празднолю́бцы вся́къ во́зрастъ, пѣ́сньми духо́вными похва́лимъ пустыннолю́бную го́рлицу, по́стниковъ похвалу́, дѣ́въ украше́ніе, молча́льниковъ удобре́ніе, печа́льныхъ утѣ́шительницу, боля́щихъ посѣти́тельницу и су́щимъ въ бѣда́хъ скоропослу́шную помо́щницу, богому́друю Параске́ву, точа́щую всѣ́мъ исцѣле́нія, обрѣ́те бо благода́ть чуде́съ Бо́жіимъ велѣ́ніемъ.

Пѣ́снь 7.

Ирмо́съ: Росода́тельну у́бо пе́щь содѣ́ла Ангелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Исправля́ющи ты́ сло́во Жениха́ Христа́, Тому́ невозвра́тнымъ жела́ніемъ послѣ́довала еси́, господоимени́тая Параске́во, вопію́щи: благослове́нъ Бо́гъ оте́цъ на́шихъ.

Добро́ты тлѣ́ющія, Параске́во преподо́бная, небрегла́ еси́, смотря́ющи та́мо су́щаго воздая́нія, и прія́ла еси́ сла́ву нестарѣ́ющуюся, Бо́жію красоту́ и весе́ліе.

Рѣ́ки твои́хъ слове́съ медото́чныхъ, Параске́во, человѣ́комъ ду́ши весе́лія Боже́ственнаго исполня́еши, хвалосло́вящимъ пѣ́сньми Бо́га препросла́вленнаго.

Богоро́диченъ: На Тебѣ́ содѣ́яся вели́кое, Дѣ́во Ма́ти, та́инство: Сы́нъ Бо́жій изъ чре́ва Твоего́ воплоти́ся и всѣ́мъ яви́ся, Ему́же, веселя́щеся, пое́мъ: отце́въ Бо́же, благослове́нъ еси́.

Инъ.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

За́йде, я́коже со́лнце, преподо́бная ма́ти, просвѣща́еши же чудесы́ вѣ́рою те́плою и любо́вію пою́щихъ: благослове́нъ Бо́гъ оте́цъ на́шихъ.

Испо́лнишася вся́ страны́ твоего́ благоуха́нія во обрѣ́теніе моще́й твои́хъ, и́мже вѣ́рою пѣ́ти повелѣва́еши, преподо́бная: благослове́нъ Бо́гъ оте́цъ на́шихъ.

Обрѣта́ешися, ма́ти, хромы́мъ исправле́ніе, и́бо ного́ю болѣ́вый, скака́я, вопія́ше, зовы́й немо́лчно: благослове́нъ Бо́гъ оте́цъ на́шихъ.

Богоро́диченъ: Се́, Юже прорече́, Дѣ́во, Ду́хомъ Святы́мъ вели́кій Иса́ія, во чре́вѣ Бо́га заче́нши, родила́ еси́: и благослове́нъ, Пречи́стая, Пло́дъ Твоего́ чре́ва.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

По зако́нѣ о́тчи, зако́нъ оте́ческій, всеблаже́нная, и́стинно нося́щи, де́монская ли́ца поплева́ла еси́, Госпо́дне воображе́ніе благоче́стно лобыза́ющи, е́же пріи́мъ въ мíрѣ, яви́вшася отъ Дѣ́вы Отрокови́цы: Его́же превозно́симъ во вѣ́ки.

Умъ Боже́ственъ и Ду́ха Пресвята́го гу́сль всесочета́нна, славíй добропѣ́снивый, вѣ́рныхъ похвала́ верхо́вная, Правосла́вія сто́лпе и утвержде́ніе му́дрое, церко́вное пра́вило, мона́хинь сла́ва и всѣ́хъ преподо́бныхъ удобре́ніе яви́лася еси́, пою́щи Христа́ во вѣ́ки.

Мѵрополо́жница Ду́ха Пресвята́го, ма́ти, показа́лася еси́ излія́ніемъ мѵ́ра благово́нныхъ твои́хъ и му́дрыхъ уче́ній, потребля́ющи пре́лести злосмра́дную тлю́ и благо́вонствуя нра́вомъ твои́мъ, Параске́во, Честну́ю Це́рковь, зову́щи непреста́нно: пѣ́сньми Тя́ превозно́симъ, Христе́, во вѣ́ки.

Богоро́диченъ: Бо́жія гора́ ту́чная, ея́же пра́отецъ Дави́дъ уясни́въ, дре́вле поя́ проро́чески, ты́ яви́лася еси́, Дѣ́во, отъ нея́же отсѣче́ся Ка́мыкъ краеуго́льный Христо́съ и сокруши́ крѣ́пость и́дольскую: Того́ непреста́нно пое́мъ и превозно́симъ во вѣ́ки.

Инъ.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Укрѣ́пльшися умо́мъ, безпло́тныхъ жела́ніемъ, вдала́ еси́ тѣ́ло посту́ и живе́ши во вѣ́ки.

Пребога́тая въ жена́хъ яви́ся, блаже́нная Параске́во, пою́щи Творцу́: Тя́ превозно́симъ во вѣ́ки.

Су́щу разсла́бленному въ лѣ́та мно́га, честна́я, исцѣле́нія подаде́ неду́га: тѣ́мъ тя́ воспѣва́ше, преподо́бная, во вѣ́ки.

Богоро́диченъ: Соше́дшаго съ небе́съ и въ ложесна́ дѣви́ческая все́льшася Го́спода, по́йте и превозноси́те Его́ во вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Посо́бствующу тя́ по Христо́вѣ Це́ркви, человѣкоубíйца зрѣ́ти не могíй, искуше́нія тебѣ́ простира́етъ: оба́че непрекло́нна пребы́вши, мы́сленнымъ враго́мъ проти́вилася еси́ до́блественно, покланя́ющися о́бразу Христо́ву, богому́драя Параске́во.

Укра́шена несказа́нною, богому́драя, до́блестію и упещре́на сія́ньми свѣтлѣ́йшими, ра́достно, преблаже́нная, предстои́ши Престо́лу Зижди́теля Бо́га, идѣ́же пра́зднующихъ гла́съ, богому́драя Параске́во.

Твои́хъ по́двиговъ досто́йную прія́ла еси́ по́честь, и вѣнцено́сица ны́нѣ на небесѣ́хъ со а́нгелы ликовству́ющи, идѣ́же проро́ческій со́нмъ, и апо́столъ, и му́ченикъ вои́стинну во́инства мно́га, идѣ́же патріа́рховъ ликостоя́нія, помина́й на́съ, преподо́бная ма́ти Параске́во.

Богоро́диченъ: Побо́рствующи царе́мъ вѣ́рнымъ во бранѣ́хъ, Импера́тору на́шему на сопроти́вныя да́ждь побѣ́ды, Богороди́тельнице, покрыва́ющи отъ вся́каго навѣ́та враго́въ, Ма́ти Бо́га Сло́ва Неискусобра́чная Чи́стая, да Твоего́ Сы́на пою́ще, Тя́ велича́емъ.

Инъ.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Не преста́й моля́щи Христа́, ма́ти преподо́бная, изба́вити ны́ отъ бѣ́дъ рабы́ твоя́, и́же отъ души́ пою́щія тя́ и велича́ющія.

Красота́ дѣ́въ яви́лася еси́, преподо́бная, я́ко а́нгельскому житію́ поревнова́ла еси́, не преста́й моля́щи о отече́ствѣ твое́мъ.

Сочета́лася еси́ со безпло́тными ликостоя́ніи и Влады́цѣ предстои́ши, ра́дующися, съ му́дрыми дѣ́вами, Сему́ моля́щися о мíрѣ.

Богоро́диченъ: Ра́дости испо́лни мя́ и весе́лія, Дѣ́во, я́ко пріи́мши вину́ ра́дости: Ты́ бо источи́ла еси́ всѣ́мъ ра́дованіе.

Свѣти́ленъ. Подо́бенъ: Жены́ услы́шите.

Яко Боже́ственный свѣ́тъ, Параске́во, пѣ́сненно Це́ркви яви́лася еси́, красото́ю сію́ озари́вши свѣ́томъ лица́ твоего́, предо́брая невѣ́сто Христо́ва: къ Нему́же непреста́нно моли́ся о всѣ́хъ на́съ. [Два́жды.]

Сла́ва, и ны́нѣ, богоро́диченъ:

Дре́вле дарова́нную ми́ ри́зу ба́нею креще́нія оскверни́въ стра́стнымъ блуже́ніемъ, ужаса́юся, окая́нный, ча́съ помышля́я вои́стинну Боже́ственнаго Суда́, Дѣ́во Всенепоро́чная, предста́ни тогда́ и изба́ви мя́ стра́шнаго преще́нія.

На хвали́техъ стихи́ры на 4, гла́съ 8. Подо́бенъ: О, пресла́внаго чудесе́!

Гряди́те вси́, богому́дріи,* отъ земли́ да́льнія,* ра́цѣ прикосну́вшеся преподо́бныя* и проше́нія своя́ отъ души́ принося́ще,* пріими́те избавле́ніе* отъ страсте́й разли́чныхъ:* инíи же грѣхо́въ разрѣше́ніе,* и къ Бо́гу присвое́ніе,* и вся́ку по́льзу на́мъ ко спасе́нію. [Два́жды.]

Поще́нія пу́ть воспріе́мши,* жите́йскія бу́ри избѣ́гши,* Параске́во сла́вная,* о́во у́бо съ му́дрыми дѣ́вами* свѣтоно́сна вошла́ еси́ во дворы́ Го́спода твоего́,* о́во же, уневѣ́стившися Ему́,* источа́еши исцѣле́нія притека́ющимъ къ тебѣ́,* и отъ душе́вныхъ неду́гъ избавля́еши,* и́же къ Бо́гу твои́ми моли́твами.

Наде́ждею Христо́вою и вѣ́рою возмо́гши,* стяжа́нія роди́телей отбѣ́гши,* и со безпло́тными лику́еши,* преподо́бная ма́ти Параске́во сла́вная.* Тѣ́мже исцѣле́ніе то́чиши по сме́рти:* твоя́ бо мо́щи показа́шася, вся́кимъ благоуха́ніемъ испо́лнены,* е́же Христо́съ тебѣ́ дарова́, Его́же возлюби́ла еси́,* Его́же возжелѣ́ла еси́,* и То́й тя́ просла́ви, преподо́бная.

Сла́ва, гла́съ 8:

Оте́чество, и сро́дство, и имѣ́ніе оста́вльши, Параске́во, и нече́стія вся́ мірска́я возненави́дѣвши, Бо́га Еди́наго возлюби́ла еси́, Ему́же и поще́ніемъ уневѣ́стилася еси́ и была́ еси́ Свята́го Ду́ха жили́ще, отъ Него́же свѣтоли́тіемъ просвѣти́вшися, Того́ моли́ спасти́ ду́ши на́ша.

И ны́нѣ, богоро́диченъ: Влады́чице, пріими́ моли́тву ра́бъ Твои́хъ...
Славосло́віе вели́кое. [Ектеніи́.] И отпу́стъ.

Аще ли не пое́мъ поліеле́я, тогда́ пое́мъ стихо́вну во окто́ихѣ.
Сла́ва, преподо́бнѣй, гла́съ 2:

Преподо́бная ма́ти Параске́во, измла́да себе́ саму́ю возложи́вши Христу́ Бо́гу и отъ Него́ укрѣпля́ема, плотскíя стра́сти покори́ла еси́, и ху́ждшее порабо́тила еси́ лу́чшему: тѣ́мже и вѣне́цъ триплете́нный прія́ла еси́, моли́ спасти́ ду́ши на́ша.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Егда́ Нескве́рная Агница ви́дѣ Своего́ Агнца, на заколе́ніе, я́ко человѣ́ка, во́лею влеко́ма, пла́чущи, глаго́лаше: безча́дствовати Мя́ ны́нѣ тщи́шися, Христе́, Ро́ждшую Тя́, что́ сіе́ сотвори́лъ еси́, Изба́вителю вся́ческихъ? Оба́че воспѣва́ю и сла́влю Твою́ па́че ума́ и сло́ва кра́йнюю бла́гость, Человѣколю́бче.


НА ЛИТУРГІИ,

Блаже́нна, отъ пе́рваго кано́на пѣ́снь 3-я и отъ втора́го пѣ́снь 6-я. Проки́менъ, гла́съ 4: Ди́венъ Бо́гъ во святы́хъ Свои́хъ, Бо́гъ Изра́илевъ. [Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ]. Апо́столъ къ Гала́томъ, зача́ло 208: Бра́тіе, пре́жде прише́ствія вѣ́ры... Аллилу́ія, [гла́съ 1]: Терпя́, потерпѣ́хъ Го́спода, и вня́тъ ми́ [и услы́ша моли́тву мою́. Сти́хъ: Поста́ви на ка́мени но́зѣ мои́ и испра́ви стопы́ моя́]. Ева́нгеліе Матѳе́я, зача́ло 104: Рече́ Госпо́дь при́тчу сію́: Уподо́бися Ца́рствіе небе́сное десяти́ дѣ́вамъ... Прича́стенъ: Ра́дуйтеся, пра́ведніи, о Го́сподѣ, [пра́вымъ подоба́етъ похвала́].

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 123-131.

/ Къ оглавленію раздѣла /


Наверхъ / Къ титульной страницѣ

0