Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 14-й де́нь.
Па́мять преподо́бнаго отца́ на́шего Нико́лы Свято́ши, кня́зя Черни́говскаго.

ВЕЧЕРЪ,
Блаже́нъ му́жъ, 1-й антифо́нъ. На Го́споди воззва́хъ: стихи́ры на 6, гла́съ 8. Подо́бенъ: О, пресла́внаго чудесе́!

Преподо́бне Нико́ло,* ты́ по и́мени твоему́ и житіе́ хотя́ стяжа́ти,* мíръ се́й побѣди́лъ еси́,* престо́лъ кня́жества оста́вилъ еси́,* бога́тство, сла́ву и влады́чество,* а́ки уме́ты, вмѣня́я,* во убо́гій о́бразъ и́ноческій обле́кся,* обнища́вшему на́съ ра́ди Христу́ послѣ́довалъ еси́,* Ему́же ны́нѣ предстоя́,* о на́съ прилѣ́жно моли́ся,* дарова́ти душа́мъ на́шимъ ми́ръ и ве́лію ми́лость. [Два́жды.]

Свя́те Нико́ло, о́тче блаже́ннѣйшій,* прови́дя у́мнымъ твои́мъ о́комъ,* я́ко ца́ріе и кня́зи сла́вы своея́ лиша́ются* и на́зи во гро́бъ отхо́дятъ,* отве́рглся еси́ подобосѣ́нныя вла́сти вѣ́ка сего́,* Христо́вымъ стопа́мъ послѣ́дуя,* Тому́ во смире́ніи рабо́талъ еси́,* тѣ́мже улучи́лъ еси́ нестарѣ́ющееся блаже́нство,* идѣ́же помяни́ и на́съ, чту́щихъ па́мять твою́. [Два́жды.]

Сла́ва, гла́съ 2:

Ца́рство Твое́, Христе́ Бо́же, и влады́чество Твое́ пребыва́ющее во вѣ́ки прови́дя, уго́дникъ Тво́й Нико́ла ски́петръ и діади́му отве́рже, и многопеча́лія удали́ся, къ безмяте́жному житію́ и́ночествующихъ прите́къ, бы́сть ра́бъ и́стиненъ и вѣ́ренъ, Тебѣ́ Спа́су своему́ послужи́въ, въ преподо́біи и пра́вдѣ.

И ны́нѣ, [богоро́диченъ] догма́тикъ: Пре́йде сѣ́нь зако́нная...
Та́же вхо́дъ, проки́менъ дне́. И чте́нія три́.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. У́зрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо въ себѣ́, ка́ющеся, и въ тѣснотѣ́ ду́ха воздо́хнутъ и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? У́бо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ.

На стихо́внахъ стихи́ры, гла́съ 1: Подо́бенъ: Небе́сныхъ чино́въ.

Боже́ственнымъ жела́ніемъ разжиза́емь,* преподо́бне о́тче Нико́ло,* мірску́ю сла́ву преоби́дѣлъ еси́,* и и́ноческое житіе́ возлюби́въ,* бы́лъ еси́ преподо́бнымъ отце́мъ единоревни́тель,* съ ни́миже ны́нѣ водворя́яся,* моли́ о чту́щихъ твое́ преставле́ніе.

Сти́хъ: Блаже́нъ му́жъ, боя́йся Го́спода,* [въ за́повѣдехъ Его́ восхо́щетъ зѣло́].

Христо́ви ве́сь порабо́тился еси́,* впери́въ все́ свое́ жела́ніе къ Нему́,* Его́же ра́ди любве́ мíра сего́ отре́клся еси́,* возлюби́въ Возлюби́вшаго ро́дъ человѣ́ческій;* сего́ ра́ди тя́ пѣ́сньми ублажа́емъ* и любо́вію кла́няемся ра́цѣ моще́й твои́хъ.

Сти́хъ: Блаже́ни вси́, боя́щіеся Го́спода,* [ходя́щіи въ путе́хъ Его́].

Отъ ро́да твоего́ всѣ́хъ ца́рствующихъ ны́нѣ,* и лю́ди тебе́ вѣ́дущія,* заступле́нія твоего́ не отщети́, о́тче,* но ели́ко мо́щно предста́тельствуй всѣ́мъ* и посо́бствуй въ бѣда́хъ и напа́стехъ,* поле́зная подая́ моли́твами твои́ми.

Сла́ва, гла́съ 5:

Преподо́бне о́тче, не да́лъ еси́ тѣ́лу твоему́ упокое́нія, до́ндеже стра́сти се́рдца твоего́ очи́стилъ еси́, Христо́ва повелѣ́нія исполня́я, до́мъ, сро́дники и дру́ги оста́вилъ еси́, къ ти́хому приста́нищу Бо́жія Ма́тере прите́къ, вели́чество и сла́ву свою́ всѣ́мъ подъ но́ги покори́лъ еси́, въ постѣ́ просія́въ, тѣ́ло умертви́лъ еси́, и Ду́хомъ Бо́жіимъ водя́ся при́сно, сы́нъ и наслѣ́дникъ Присносу́щнаго Свѣ́та показа́лся еси́, идѣ́же ны́нѣ живы́й, моли́ улучи́ти и на́мъ ми́лость въ де́нь Су́дный.

И ны́нѣ, богоро́диченъ:

Обра́дованная, хода́тайствуй Твои́ми моли́твами, и испроси́ душа́мъ на́шимъ мно́жество щедро́тъ и очище́ніе мно́гимъ согрѣше́ніемъ на́шимъ, мо́лимся.

Тропа́рь преподо́бному. Сла́ва, и ны́нѣ, богоро́диченъ.



НА УТРЕНИ,
Тропа́рь, гла́съ 2:

Оте́чество и сла́ву княже́нія твоего́ оста́вилъ, Кня́зю смире́нія — Христо́ви, усе́рдно послѣ́довалъ еси́, преподо́бне о́тче на́шъ Нико́ло; тѣ́мъ прія́лъ еси́ отъ Него́ вѣ́чное Ца́рство и сла́ву на небеси́, идѣ́же лику́я, помина́й на́съ чту́щихъ па́мять твою́ вѣ́рно. [Два́жды.]

Сла́ва, и ны́нѣ, богоро́диченъ: Вся́ па́че смы́сла...

По 1-й стихоло́гіи сѣда́ленъ, гла́съ 1. Подо́бенъ: Гро́бъ Тво́й.

Весе́лія исполня́ются Россíйстіи лю́діе и ра́достнѣ пою́тъ твою́ па́мять, блаже́нне, иму́ще тя́ ско́раго въ бѣда́хъ помо́щника и во всѣ́хъ болѣ́знехъ избавле́ніе: сего́ ра́ди, я́ко пріе́мый отъ Бо́га благода́ть сло́вомъ неду́ги прогоня́ти, не отступи́ и ны́нѣ, всѣ́мъ посо́бствуя, честно́е твое́ успе́ніе почита́ющимъ. [Два́жды.]

Сла́ва, и ны́нѣ, богоро́диченъ:

Исто́чникъ исцѣле́ній вѣ́дуще Тя́, Дѣ́во, въ теплотѣ́ се́рдца прибѣга́емъ, грѣ́шніи раби́ Твои́; Ты́ же сро́дное иму́щи о на́съ промышле́ніе, не забу́ди волну́емыхъ напа́стьми, но, просте́рши дла́ни, моли́ся Сы́ну Своему́, я́ко да пріи́мемъ тѣ́хъ ско́рое премѣне́ніе.

По 2-й стихоло́гіи сѣда́ленъ, гла́съ 4. Подо́бенъ: Яви́лся еси́.

Яже на земли́ въ суетѣ́ преходя́щая возненави́дѣвъ, блаже́нне, и я́же на небеси́ присносу́щная отъ се́рдца возлюби́въ, сія́ по мно́гихъ твои́хъ трудѣ́хъ и наслѣ́довалъ еси́, идѣ́же живы́й, о всѣ́хъ на́съ моли́ся Христу́, преподо́бне, въ пѣ́снехъ твою́ па́мять почита́ющихъ. [Два́жды.]

Сла́ва, и ны́нѣ, богоро́диченъ:

Обнови́ла еси́, Дѣ́во, святы́мъ Рождество́мъ Твои́мъ истлѣ́вшее страстьми́ земноро́дныхъ естество́ и возста́вила еси́ отъ сме́рти къ жи́зни нетлѣ́ннѣй. Тѣ́мъ Тя́ по до́лгу, Ма́ти Чи́стая, при́сно ублажа́емъ я́ко блажи́мую во вся́ вѣ́рныхъ ро́ди.

По поліеле́и сѣда́ленъ, гла́съ 8. Подо́бенъ: Повелѣ́нное та́йно.

Да ра́дуется дне́сь святы́й тво́й прароди́тель, на высотѣ́ престо́ла сѣды́й самодержа́вный Влади́міръ, я́ко отъ ко́рене его́, блага́я вѣ́твь, прозя́блъ еси́ ты́, преблаже́нне Нико́ло, нося́щи на себѣ́ пло́дъ духо́вный, во о́бразъ всѣ́мъ хотя́щимъ спасти́ся и Христу́ во смире́ніи послѣ́довати, я́коже ты́, преподо́бне о́тче, сотвори́лъ еси́; и ны́нѣ во сла́вѣ ра́дующуся ти́, пло́дъ и́ноческихъ трудо́въ твои́хъ пребыва́етъ во вѣ́ки. [Два́жды.]

Сла́ва, и ны́нѣ, богоро́диченъ:

Да ра́дуется дне́сь Дави́дъ пѣснопи́сецъ, я́ко отъ ко́рене его́ возрасте́ на́мъ мы́сленное дре́во — Дѣ́ва Марíя, нося́щая пло́дъ — Христа́ Бо́га на́шего, Имже пита́ются всего́ мíра концы́ и прича́стницы быва́ютъ вѣ́чныя жи́зни, тѣ́мъ, вси́ вѣ́рніи, я́ко Богоро́дицу благоче́стно ублажа́емъ.

[Степе́нна, 1-й антифо́нъ 4-го гла́са. Проки́менъ, гласъ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе Матѳе́я, зача́ло 43.]

Стихи́ра по Ева́нгеліи, гла́съ 6:

Ве́ліе смире́ніе житія́ твоего́, о́тче на́шъ, и́бо вся́ земна́я: ро́дъ и престо́лъ княже́нія своего́, оста́вивъ, Еди́наго Христа́ возлюби́лъ еси́, и Тому́ чи́стою со́вѣстію служа́, на земли́ а́нгельски пожи́лъ еси́, бѣсо́вскія полки́ прогна́лъ еси́, возше́дъ на высоту́ добродѣ́телей. Блаже́нъ еси́ та́ко Христу́ рабо́тавъ; и мы́ у́бо труды́ твоя́ позна́вше, любо́вію тя́ ублажа́емъ.

Кано́нъ [Богоро́дицы со ирмосо́мъ на 6, и] преподо́бному [на 8], гла́съ 4.

Пѣ́снь 1.

Ирмо́съ: Отве́рзу уста́ моя́ и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Отве́рзи мнѣ́ устнѣ́, Христе́ мо́й, посли́ Паракли́та, да Твоего́ уго́дника пѣ́ти возмо́гу стихосло́віи высоту́ добродѣ́телей, на ню́же въ чистотѣ́ се́рдца смире́ніемъ взы́де.

Въ пра́вду наре́клся еси́ Свято́ша: испо́лнь бо сы́й святы́ни, вся́каго непреподо́бнаго дѣ́йства удали́лся еси́, и къ богови́дѣнію у́мъ сво́й впери́въ, отту́ду позна́лъ еси́ вся́, я́же въ мíрѣ су́етная бы́ти.

Пре́жде тебе́ бы́вшихъ помяну́лъ еси́, отъ коли́кія сла́вы напра́сно отпадо́ша, и съ безче́стіемъ пожа́тъ се́рпъ сме́рти; сего́ ты́ да изба́вишися, престо́лъ на земли́ кня́жій оста́вилъ еси́, и прія́лъ еси́ на небеси́ престо́лъ, и́же пребыва́етъ вы́ну со святы́ми.

Блаже́нному Іоаса́фу Индíйскому поревнова́лъ еси́: я́коже бо то́й оста́ви ца́рство земно́е и взыска́ небе́сное, та́ко и ты́, блаже́нне, вре́менное княже́ніе оста́вль, прія́лъ еси́ вѣ́чное.

Богоро́диченъ: Вы́шняго Ца́рствія не лиши́ мя, небе́сными и земны́ми влады́чествующая Госпоже́, сего́ бо ища́, удаля́юся, облада́емь вою́ющими всегда́ на мя́ страстьми́, оба́че къ Тебѣ́ несумнѣ́нною наде́ждою прибѣга́ю.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный исто́чниче, ли́къ себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Ра́бъ Еди́ному Бо́гу да бу́деши, не восхотѣ́лъ еси́ рабо́тати мíру, отъ него́же изше́дъ, а́ки вторы́й Авраа́мъ, до́мъ и зе́млю свою́ оста́вилъ еси́ и прише́дъ, а́ки въ Харра́нь, въ пречестну́ю Бо́жія Ма́тере Пече́рскую оби́тель, ви́дѣлъ еси́ лѣ́ствицею дѣя́нія и ви́дѣнія блаже́нныхъ оте́цъ къ небеси́ восходя́щихъ.

Господи́нъ сы́й иногда́ княже́нію своему́, за любо́вь Го́спода своего́ сотвори́лся еси́ ра́бъ, служа́ рабо́мъ Христо́вымъ въ пова́рни, да бы́вшему на́съ ра́ди Послушли́ву до сме́рти послѣ́дуеши.

Порфи́рою одѣ́янъ и въ руцѣ́ имѣ́яй ски́петръ, не устыдѣ́лся еси́ на ра́менахъ дрова́ носи́ти и сѣщи́ рука́ма свои́ма; да вся́ у́ды въ порабоще́ніе преда́си Вы́шнему Влады́цѣ, отъ Него́же возме́здіе прія́лъ еси́ — живо́тъ вѣ́чный.

Мірстíи мірска́я му́дрствующе, бра́тія твоя́, блаже́нне, мня́ху дѣя́ніе твое́ въ пова́рнѣ безче́стно бы́ти, тѣ́мъ и развраща́ху тя́, да оста́виши сіе́. Но ты́, любя́ послуша́ніе сіе́, еще́ еди́но лѣ́то испроси́лъ еси́ себѣ́ въ то́мъ пребыва́ти.

Богоро́диченъ: За́повѣдемъ Го́спода моего́ не повину́ющася, ни храня́щаго послуша́нія уста́вы, убѣди́ мя, Влады́чице моя́, къ дѣ́ланію тѣ́хъ и укрѣпи́ въ про́чее вре́мя въ обои́хъ соверше́нно испра́витися, да не въ лѣ́ности сконча́вся, съ непотре́бными рабы́ ка́знь пріиму́ по дѣло́мъ.

Сѣда́ленъ, гла́съ 8:

Яко и́стиннаго послу́шателя ева́нгельскаго сло́ва, и и́ноковъ люби́теля, и ревни́теля преподо́бнымъ, пріиди́те, бра́тіе, пѣ́сненными хвала́ми воспое́мъ блаже́ннаго Нико́лу: то́й бо тѣ́ло свое́ порабо́ти Бо́гу, да ду́шу свободи́тъ отъ страсте́й, и а́ки со́лнце, возсія́въ луча́ми добродѣ́телей свои́хъ, всѣ́хъ на́съ озаря́етъ, пою́щихъ: сла́ва Бо́гу, призыва́ющему рабы́ Своя́ въ вѣ́чное спасе́ніе. [Два́жды.]

Сла́ва, и ны́нѣ, богоро́диченъ:

Вы́шняго мя́ граждани́на покажи́, Чи́стая Дѣ́во, прибѣга́ющего къ Твоему́ покро́ву и прося́щаго отъ Тебе́ те́плаго заступле́нія, я́ко, да Тобо́ю обрѣ́тъ благода́ть, воспою́: сла́ва Бо́гу, спаса́ющему ро́дъ человѣ́ческій.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́, во о́блацѣ ле́гцѣ пріи́де Іису́съ Пребоже́ственный нетлѣ́нною дла́нію и спасе́ зову́щія: сла́ва, Христе́, си́лѣ Твое́й.

Сѣдя́й во сла́вѣ пре́жде на престо́лѣ и вельмо́жамъ предстоя́щимъ ти́, не устыдѣ́лся еси́, блаже́нне, сѣдѣ́ти при вратѣ́хъ монасты́рскихъ три́ лѣ́та, я́ко вѣ́рно храня́й си́хъ вхо́дъ отъ бездѣ́льно влазя́щихъ.

Предсѣдя́щу ти́ пе́рвѣе на трапе́зѣ любопи́щнѣй и мно́гимъ рабо́мъ служа́щимъ я́ко влады́цѣ, не возгнуша́лся еси́ послѣди́, свя́те, ра́бъ бы́ти рабо́мъ Христо́вымъ, тѣ́мъ служа́ и представля́я бра́шна отъ Бо́жіяго дарова́нія.

Якоже степе́ньми на высоту́ мірскíя сла́вы возше́дши, и́мутъ упокое́ніе по трудѣ́хъ, та́ко и ты́, преподо́бне, совѣ́томъ игу́мена и бра́тіи вся́ послуша́нія чи́ны проше́дъ, принужде́нъ съ ми́ромъ въ ке́лліи безмо́лвствовати и внима́ти спасе́нію своему́.

Яко трудолюби́вый ра́бъ, умножа́я Влады́цѣ своему́ тала́нтъ, не да́лъ еси́ упокое́нія многотру́дному твоему́ тѣ́лу, но рука́ма свои́ма насади́лъ еси́ вертогра́дъ; и ви́дѣша бра́тія трудо́въ твои́хъ плоды́.

Богоро́диченъ: Лѣня́щася мя́, на добродѣ́тели пону́ди, Богоро́дице, и да́ждь ми́ вертогра́дъ душе́вный мы́сленными древесы́ насади́ти, слеза́ми умиле́нія напая́ти, и принести́ Влады́цѣ моему́ стори́чный пло́дъ, да и а́зъ съ вѣ́рными рабы́ Его́ пріиму́ отъ руку́ Его́ мзду́ трудо́въ мои́хъ.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й, Ты́ бо, Неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га и родила́ еси́ Безлѣ́тнаго Сы́на, всѣ́мъ воспѣва́ющимъ Тя́ ми́ръ подава́ющая.

Дивля́хуся вси́ трудолю́бію твоему́, блаже́нне, я́ко никогда́же ви́дѣнъ бы́лъ еси́ пра́зденъ, но въ рука́хъ дѣ́ло, въ устѣ́хъ же имѣ́лъ еси́ вы́ну моли́тву Іису́сову и сею́ отрази́лъ еси́ бѣ́са, празднолю́біемъ напа́дающаго.

Да пи́щи небе́сныя прича́стникъ бу́деши, сластолю́бія отве́рглся еси́: ничто́же бо и́но вкуси́лъ еси́, то́кмо ма́ло отъ о́бщія пи́щи монасты́рскія на трапе́зѣ, и та́ко соблю́лъ еси́ чистоту́ души́ и тѣ́ла.

По мно́гихъ твои́хъ по́стническихъ трудѣ́хъ прія́лъ еси́ отъ Бо́га да́ръ еди́нѣмъ сло́вомъ неду́ги исцѣля́ти и посо́бствовати въ ско́рбехъ. Молю́ся ти́, и мене́ отъ одержа́щаго неду́га въ здра́віе премѣни́ ско́ро.

Многоплете́нными сѣ́тьми тща́ся вра́гъ отврати́ти боголюби́вую ду́шу твою́ отъ до́браго трудолю́бія пути́, наусти́ нѣ́когда служа́щаго тебѣ́ врача́; ты́ же, свя́те, увѣща́ніемъ увѣща́лъ еси́ того́, я́ко да не тебѣ́, но своему́ спасе́нію внима́етъ.

Богоро́диченъ: Се́рдцемъ и душе́ю разврати́хся, и отве́ргшися да́нныя ми́ благода́ти, въ неподо́бныя хожду́ пути́, но, пре́жде да́же не впаду́ въ ру́цѣ враго́мъ, Ты́, Ма́ти Бо́жія, упра́ви мя́ на пе́рвое блаже́нство: овча́ бо е́смь спасе́нныя Твоея́ огра́ды.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те рука́ми воспле́щимъ, отъ Нея́ ро́ждшагося Бо́га сла́вимъ.

Боже́ственнымъ жела́ніемъ къ Бо́жіей любви́ устреми́вся, вся́ находя́щія ти́ ско́рби, блаже́нне, сла́дцѣ терпѣ́лъ еси́, разсужда́я рече́нное: я́ко недосто́йны су́ть стра́сти вѣ́ка сего́ къ хотя́щей яви́тися въ на́съ сла́вѣ.

Увѣщава́ющему тя́ Петру́ врачу́ отъ трудо́въ и́ноческихъ преста́ти, цѣлому́дренно отвѣща́лъ еси́ мно́гажды, свя́те: преста́ни, отвраща́я мя́ отъ сицева́го начина́нія, ни ско́рбь бо, ни гла́дъ, ни тѣснота́ отлучи́тъ мя́ отъ любве́ Христо́вы, ея́же ра́ди терплю́ вся́ находя́щая на мя́.

Да во Христѣ́ живо́тъ вѣ́чный обря́щеши, умертви́лъ еси́ тѣ́ло твое́ мно́гимъ воздержа́ніемъ и трудо́мъ и не лиши́лся еси́, его́же жела́лъ: се́ бо ны́нѣ живе́ши со святы́ми во дво́рѣхъ небе́сныхъ.

Еди́наго имѣ́я врача́ Христа́, никогда́же попусти́лъ еси́ себе́ въ болѣ́зни врачева́ти, но глаго́лалъ еси́ со апо́столомъ: мнѣ́ е́же жи́ти Христо́съ, а е́же умрѣ́ти приобрѣ́теніе; и си́мъ сло́вомъ са́мъ сво́й неду́гъ исцѣля́лъ еси́.

Богоро́диченъ: Изнемо́гшую мою́ ду́шу отъ грѣхо́въ мно́гихъ, посѣще́ніемъ Твои́мъ исцѣли́, Госпоже́, и водо́ю благода́ти Твоея́ напо́й мя́, да свобо́дь сы́й душе́вныхъ и тѣле́сныхъ неду́говъ, порабо́таю Тебѣ́, Влады́чицѣ мое́й, со усе́рдіемъ всегда́.

Конда́къ, гла́съ 8:

Вся́ кра́сная мíра сего́ и тлѣ́нное бога́тство нивочто́же вмѣни́въ, обогати́лся еси́ мно́гими чудесы́ и зна́меніи отъ Христа́ Бо́га, Ему́же въ весе́ліи предстоя́, помина́й на́съ, чту́щихъ любо́вію па́мять твою́, да зове́мъ ти́: ра́дуйся, Нико́ло пречу́дне.

Икосъ:

Ангельски на земли́ пожи́вша и со а́нгельскими чи́нми ны́нѣ свѣ́тло на небесѣ́хъ лику́юща, тя́, блаже́нне, си́ми ублажа́емъ пѣ́сньми: ра́дуйся, ро́да свѣ́тлость и княже́ніе презрѣ́вый; ра́дуйся, бога́тство и сла́ву тще́тную попра́вый; ра́дуйся, ни́щъ и убо́гъ, вся́ оста́вль, Го́сподеви послѣ́довавый; ра́дуйся, го́рдость низложи́вый и смире́нію прилѣжа́вый; ра́дуйся, вся́ послуша́нія монасты́рская проше́дый; ра́дуйся, въ тѣ́хъ со вся́кимъ смире́ніемъ пребы́вый; ра́дуйся, пова́рства и вра́тарства невозгнуша́выйся; ра́дуйся, бра́тій твои́хъ, князе́й, отве́ргійся сожи́тельства; ра́дуйся, са́мъ отъ не́мощи возмогíй и врача́ исцѣли́вый; ра́дуйся, спасе́ніе враче́ви моли́твами твои́ми исхода́тайствовавый и свою́, и о́наго сме́рть прозрѣ́вый; ра́дуйся, бра́ту твоему́ по уме́ртвіи твое́мъ исцѣле́ніе пода́вый; ра́дуйся, всѣ́мъ те́плѣ тя́ призыва́ющимъ чу́дный и ско́рый помо́щниче; ра́дуйся, Нико́ло пречу́дне.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Отъ коли́кія сла́вы преше́лъ еси́, кня́же, глаго́лаше ти́ Пе́тръ, и укоря́ше тя́, блаже́нне, я́ко всѣ́мъ рабо́таеши и смѣ́тищу присѣди́ши, но ты́ отвѣща́лъ еси́ ему́: не погуби́хъ че́сти моея́, па́че же си́мъ прославля́юся, послѣ́дуя всѣ́мъ прише́дшему послужи́ти Христу́, Ему́же и зову́: благослове́нъ Бо́гъ оте́цъ на́шихъ.

Тебе́ хотя́й въ болѣ́зни Пе́тръ уврачева́ти, са́мъ разболѣ́ся, его́же не зе́ліемъ, но моли́твою исцѣли́лъ еси́ и наказа́лъ того́ не надѣ́ятися на враче́бную хи́трость, но то́кмо на Бо́га упова́ти, зову́щи: препѣ́тый отце́въ Бо́же, благослове́нъ еси́.

Послуша́ніе твое́ у вра́тъ скончава́я, прови́дѣлъ еси́, свя́те, по тріе́хъ мѣ́сяцехъ и живота́ твоего́ кончи́ну, тѣ́мъ призва́лъ еси́ Петра́ и увѣщава́лъ еси́, да воспріи́метъ здѣ́ и́ноческій о́бразъ и вмѣ́сто тебе́ послу́житъ Бо́гу, Иже е́сть благослове́нный во вѣ́ки.

Измѣне́ніе жи́зни твоея́ слы́шавъ Пе́тръ, припаде́ со слеза́ми къ нога́мъ твои́мъ, преподо́бне, рыда́ющи, я́ко лиша́ется господи́на своего́; ты́ же воздви́гъ его́, утѣша́лъ и увѣщава́лъ еси́ не скорбѣ́ти о се́мъ, но зва́ти: благослове́нъ Бо́гъ оте́цъ на́шихъ.

Богоро́диченъ: Измѣне́нія жи́зни моея́ скве́рныхъ ра́ди дѣ́лъ не иму́ща, кто́ мя́ не воспла́четъ, отхожду́ бо въ пу́ть невѣ́домь. Отъ пути́ за́повѣдей Сы́на Твоего́ уклони́хся, тѣ́мже, слезя́, призыва́ю Тя́, Влады́чице, скажи́ мнѣ́ пу́ть, и пойду́ во и́стинѣ, поя́: Препѣ́тая еси́, Богоро́дице, и Благослове́нная отъ ро́да въ ро́дъ.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте дѣла́ и превозноси́те Его́ во вся́ вѣ́ки.

Благочестному́дреннѣ пожи́въ и при́сно прови́дя исхо́дъ сво́й, преподо́бне Нико́ло, са́мъ себѣ́ угото́валъ еси́ мѣ́сто во свято́й пеще́рѣ, е́же Петру́ на моле́ніе его́ дарова́лъ еси́, глаго́ля: бу́ди тебѣ́, а́ще хо́щеши и я́коже Госпо́дь восхо́щетъ, превозноси́мый во вѣ́ки.

Дерзнове́ніе имѣ́яй къ Бо́гу и упова́ніе по вѣ́рѣ непоколѣби́мо, прія́лъ еси́ прозрѣ́нія да́ръ, и́мже увѣ́давъ по тріе́хъ дне́хъ отше́ствіе Петро́во къ Бо́гу, повелѣ́лъ еси́ тому́ угото́витися къ сицево́му исхо́ду; о́нъ же по словеси́ твоему́ Свята́я святы́хъ пріе́мь, оты́де ра́дуяся и поя́: превозноси́мый Бо́гъ во вѣ́ки.

Три́десятъ лѣ́тъ по сме́рти врача́ свя́то пожи́въ и вѣ́рно Го́сподеви порабо́тавъ, стори́чныя израсти́лъ еси́ плоды́, съ ни́миже отше́лъ еси́, блаже́нне, ко святы́хъ Святѣ́йшему Го́споду Іису́су, поя́ и превознося́ Его́ во вѣ́ки.

Твое́ сла́вное и честно́е успе́ніе лю́діе слы́шаще, стеко́шася отъ всего́ гра́да, да́ти тебѣ́ послѣ́днее цѣлова́ніе и погребо́ша тя́ со слеза́ми, несе́ннаго съ ра́достію а́нгеловъ на ло́но Авраа́мле, да та́мо со всѣ́ми святы́ми предстои́ши Го́сподеви во вѣ́ки.

Богоро́диченъ: Жи́знь вре́менная скончава́ется, увы́ мнѣ́! ка́мо несе́нъ бу́ду, всѣ́хъ человѣ́къ окая́ннѣйшій: Судія́ жде́тъ, кни́ги разгну́шася и по дѣло́мъ мои́мъ злы́хъ ча́сть наслѣ́дити ми́ е́сть извѣ́стно; но пре́жде да́же не отыду́ отсю́ду со уго́дникомъ Твои́мъ Нико́лою, моли́ся, Госпоже́, Сы́ну Твоему́ благи́хъ ча́сти мнѣ́ наслѣ́дити.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Вся́къ отъ земноро́дныхъ да подража́етъ житію́ богохва́льнаго отца́, то́й бо сла́ву вре́менную на земли́ презрѣ́лъ, и во сла́ву вѣ́чную преше́дъ, ны́нѣ ра́дуется, имѣ́яй престо́лъ недви́жимь въ небе́сныхъ селе́ніихъ, идѣ́же и о на́съ мо́литъ, да бу́демъ наслѣ́дницы блаже́нныя жи́зни.

Вся́къ, любя́й Мя́, Мнѣ́ послѣ́дуетъ, да бу́детъ со Мно́ю. — Сія́ ева́нгельская внуши́въ словеса́, преблаже́нный Свято́ша, возлюби́въ Бо́га, Тому́ послѣ́дова и ничто́же па́че Того́ любве́ стяжа́ въ мíрѣ, тѣ́мже ны́нѣ живе́тъ со Христо́мъ въ Свѣ́тѣ непристу́пнѣмъ.

Рекíй: прославля́ющаго Мя́ просла́влю, испо́лни обѣща́ніе на тебѣ́, свя́те; не то́кмо бо тя́ просла́ви сама́го дароноше́ньми, но и кре́стъ тво́й, возгла́вница и власяни́ца сла́влятся отъ бра́та твоего́ и воспомина́ются да́же досе́лѣ, я́ко сла́вная отъ ни́хъ сотвори́шася.

Отъ ро́да въ ро́ды па́мять твоя́ сла́вится, преподо́бне о́тче: труды́ же и по́двиги твоя́ хва́литъ Це́рковь съ на́ми, но и мо́щи твоя́, содержа́щіяся во святѣ́й пеще́рѣ, явля́етъ ра́ка и созыва́етъ всѣ́хъ моли́ти тя́ ны́нѣ я́ко те́плаго предста́теля и засту́пника въ неможе́ніи на́шемъ.

Богоро́диченъ: Отъ всѣ́хъ племе́нъ сла́вимая и почте́нная отъ Тро́ицы Пресвяты́я, на́мъ, въ пѣ́снехъ хва́лящимъ Тя́, Чи́стая Дѣ́во, Предста́тельница бу́ди и Засту́пница ско́рая отъ вра́жіихъ навѣ́тъ, да вы́ну пое́мъ ти́: ра́дуйся, Богоро́дице Приснодѣ́во.

Свѣти́ленъ:

Хра́мъ Ду́ха Пресвята́го бы́лъ еси́, и, прише́дъ Оте́цъ съ Сы́номъ, оби́тель въ тебѣ́ сотвори́, и тѣ́мъ Боже́ственныхъ прича́стіемъ ра́йскаго тя́ граждани́на показа́; въ не́мже ны́нѣ отъ разу́мнаго дре́ва пита́яся и нетлѣ́нныя сла́вы наслажда́яся, помяни́ и на́съ, вѣ́рою кла́няющихся ра́цѣ моще́й твои́хъ, о́тче преподо́бне. [Два́жды.]

Сла́ва, и ны́нѣ, [богоро́диченъ]:

Хра́мъ пречи́стый вопло́щшемуся изъ Тебе́ Сло́ву была́ еси́, Дѣ́во; хра́мъ мя́ вся́каго беззако́нія су́ща, сотвори́ хра́мъ узаконе́нныхъ повелѣ́ній Сы́на Твоего́ предста́тельствомъ Твои́мъ, да селе́ніе Бо́жія благода́ти бы́въ, досто́йно воспою́ Тя, я́ко вся́ о Бо́зѣ могу́щую, Богоотрокови́це.

На хвали́техъ стихи́ры на 4, гла́съ 1. Подо́бенъ: Небе́сныхъ чино́въ.

Вели́кая исправле́нія по́стническихъ трудо́въ* вели́кихъ оте́цъ Пече́рскихъ* привлеко́ша тя́, Нико́ло блаже́нне,* къ по́стническому сосло́вію,* и́хже житію́ поревнова́лъ еси́ усе́рдно,* и ны́нѣ съ ни́ми на небеси́ живы́й,* моли́ о пою́щихъ тя́. [Два́жды.]

На горѣ́ святѣ́й,* идѣ́же Бо́жія Ма́ти положи́ Свое́ селе́ніе,* процвѣ́лъ еси́, я́ко фи́никсъ сѣнноли́ственный:* вѣ́твами у́бо твои́хъ трудо́въ покры́й отъ напа́сти всѣ́хъ,* призыва́ющихъ тя́ въ по́мощь,* и подава́й отъ плодо́въ твои́хъ исцѣле́ніе* благоче́стно чту́щимъ всечестну́ю твою́ па́мять,* Нико́ло всеблаже́нне.

Дне́сь въ па́мяти твое́й, преподо́бне,* ла́вра Пече́рская весели́тся,* и и́ночествующихъ собра́ніе честно́е,* ко гро́бу твоему́ прише́дшее,* духо́внѣ во псалмѣ́хъ ликовству́етъ,* похваля́ющи живу́щаго въ свѣ́тѣ непристу́пнѣмъ* и хвали́маго во святы́хъ Бо́га,* съ ни́миже и ты́ ны́нѣ живе́ши,* пріе́мля отъ Него́ по́честь.

Сла́ва, гла́съ 2:

Дре́во сы́й добровѣ́твенно, я́ко ке́дръ въ Лива́нѣ въ дому́ Бо́жія Ма́тере насажде́нъ бы́лъ еси́, блаже́ннѣйшій о́тче Нико́ло, и при вода́хъ живо́тныхъ напая́емь отъ уче́ній оте́цъ Пече́рскихъ: сѣ́нію у́бо твое́ю осѣни́ прибѣга́ющія къ тебѣ́ лю́ди, заступи́ отъ язы́ческихъ наше́ствій, низлага́я и́хъ воста́нія, поста́ви бо тя́ Госпо́дь кня́зя Россíйстѣй земли́. Тѣ́мъ, припа́дающе, мо́лимся, держа́ву Россíйскую въ ми́рѣ соблюди́ и оби́тель сію́ до́брѣ сохрани́ моли́твами твои́ми.

И ны́нѣ, [богоро́диченъ]:

Спаси́ отъ бѣ́дъ рабы́ Твоя́, Пресвята́я Богоро́дице Дѣ́во, я́ко вси́ усе́рдно по Бо́зѣ къ Тебѣ́ прибѣга́емъ, я́ко къ неруши́мой стѣнѣ́ и предста́тельству.

Славосло́віе вели́кое, [ектеніи́] и отпу́стъ.



НА ЛИТУРГІИ,

[Блаже́нна отъ кано́на преподо́бнаго, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.

Источникъ: Слу́жбы Преподо́бнымъ отце́мъ Пече́рскимъ, и́хже мо́щы въ Бли́жной и Да́льной пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1785. — Л. 17-22.

/ Къ оглавленію раздѣла /


Наверхъ / Къ титульной страницѣ

0