Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 12 декабря 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 13-й де́нь.
Слу́жба Пресвятѣ́й Богоро́дицѣ, въ че́сть и па́мять явле́нія чудотво́рныя Ея́ ико́ны, нарица́емыя Иверскія, вку́пѣ и свято́му му́ченику діа́кону Веніами́ну.

[НА ВЕЛИЦѢЙ ВЕЧЕРНИ,
Блаженъ мужъ.., 1-й антифонъ.] На Го́споди, воззва́хъ: стихи́ры на 8, гла́съ 5:

Красу́йся, Аѳо́не,* [ра́дуйся и весели́ся, оби́тель Иверская:* се́ бо гряде́тъ чу́дная ико́на Богома́тере,* а́нгелы по мо́рю дориноси́ма,* свѣ́томъ неизрече́ннымъ сія́ющи,* мра́къ скорбе́й и печа́лей прогоня́ющи* и всѣ́хъ луча́ми своея́ ми́лости озаря́ющи.

Тебѣ́ припа́даютъ, Госпоже́,* и́ноковъ ли́цы и по́стниковъ сосло́вія,* и любе́зно взира́юще на святу́ю ико́ну Твою́, вопію́тъ Ти́:* пріиди́ къ на́мъ, Блага́я Ма́ти,* уще́дри чту́щія Тя́* и да́руй на́мъ святы́й о́бразъ Тво́й* въ зало́гъ ми́лости и спасе́нія.

О, пресла́внаго чудесе́!* Якоже бо Моисе́ю въ Сина́и купина́ яви́ся иногда́,* огне́мъ у́бо опаля́ема и невреди́ма пребы́вши,* си́це и Всенепоро́чныя Богороди́тельницы о́бразъ* огне́мъ одѣва́ется,* но неопали́мь пребыва́етъ,* просвѣща́я и на́съ, су́щихъ во мра́цѣ,* и невреди́мы въ пещи́ искуше́ній и бѣ́дъ сохраня́я.

Гряди́, Гавріи́ле,* сни́ди немо́кренными нога́ми въ мо́ре* и пріими́ во объя́тія ико́ну Богома́тере* на ра́дость Аѳо́ну,* на огражде́ніе оби́тели Иверскія* и всѣ́мъ христіа́номъ во утѣше́ніе].

И му́ченику 4, гла́съ 8. Подо́бенъ: [О, пресла́внаго чудесе́!]

Пріиди́те, о празднолю́бцы, архіере́евъ сосло́віе, и свяще́нниковъ бра́тство, и діа́коновъ во Христѣ́ честны́й ли́че! Просла́вимъ дне́сь лѣ́тнюю па́мять священному́ченика, діа́кона Веніами́на, досто́инъ бо сла́вно воспѣ́тъ бы́ти, я́ко за Христа́ Спа́са пріе́мый муче́нія и ны́нѣ на небесѣ́хъ прославля́емый.

Пріиди́, діа́конскій ли́че, возра́дуйся ны́нѣ, сла́вно священнодіа́кона па́мять велича́ющи, вои́стину Бо́жій слуга́ бы́сть и проповѣ́дникъ Ева́нгелія неустраши́мый, и святи́телю своему́ Авдѣ послѣ́дователю. Вѣ́дый бо, я́ко нѣ́сть бо́льши сея́ любве́, да кто́ ду́шу свою́ положи́тъ за Возлю́бленнаго, живо́тъ сво́й за Христа́ пре́далъ е́сть.

Пріиди́те, мона́си честнíи, вку́пѣ со всѣ́ми вѣ́рными, почти́мъ пѣснопѣ́ньми усе́рдно священному́ченика Веніами́на до́бляго, Кре́стъ на ра́мена во́льно подъя́вшаго, и жесто́кимъ му́камъ себе́ вда́вшаго любве́ ра́ди Христо́вы и Ева́нгелія, и въ науче́ніе вѣ́рѣ наро́да своего́.

Пріиди́те, блаже́нніи тезоиме́нницы, въ свѣ́тлый де́нь на́шего покрови́теля, восхва́лимъ его́ страда́нія и благовѣ́стіе вѣ́ры необори́мое, и служе́ніе Це́ркви да́же до кро́ве, моля́ще его́ благода́ть надъ на́ми испроси́ти, во е́же вѣ́рнымъ въ вѣ́рѣ бы́ти и душа́мъ на́шимъ спасти́ся.

Сла́ва, гла́съ 2:

Егда́ отъ Свята́го Ду́ха о́гнь благода́ти возгорѣ́ся въ се́рдцѣ твое́мъ, сла́достно [за] Ева́нгеліе Христо́во му́камъ жесто́кимъ преда́лся еси́, въ темни́цѣ надо́лзѣ томи́мый. Освобожде́нъ же сы́й, па́ки ко благовѣ́стію устреми́лся еси́, сего́ ра́ди лю́тымъ страсте́мъ вда́нъ бы́лъ еси́: въ пе́рсты ру́къ и но́гъ и въ неблагообра́зный у́дъ и́глъ о́стрыхъ вонзе́нія претерпѣ́вый, послѣди́ же на дре́во жесто́кое насажде́нный, я́ко свѣща́, му́ками пали́мая, Христу́, за на́съ распе́ншемуся, возже́глся еси́, сего́ ра́ди отъ Него́ блаже́ннаго гла́са ны́нѣ сподо́бился еси́: вни́ди, ра́бе Мо́й, въ ра́дость невече́рнюю.

И ны́нѣ, гла́съ 8:

О, Ма́ти Блага́я, [Госпоже́ Богоро́дице Дѣ́во! Не отри́ни на́съ, смире́нныхъ ра́бъ Твои́хъ, предъ пречи́стою Твое́ю ико́ною недосто́йныя моли́твы принося́щихъ, бу́ди те́плая хода́таица о на́съ, грѣ́шныхъ, къ Сы́ну Твоему́, изба́ви на́съ отъ всѣ́хъ бѣ́дъ и искуше́ній, да спаса́еми Тобо́ю, вы́ну вопіе́мъ Ти́: ра́дуйся, Блага́я Врата́рнице, две́ри ра́йскія на́мъ отверза́ющая].

Вхо́дъ. Проки́менъ дне́ и чте́нія.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Исхо́да чте́ніе. [Глава́ 3.]

Моисе́й бя́ше пасы́й о́вцы Іоѳо́ра, те́стя своего́, свяще́нника Мадіа́мска, и гна́ше о́вцы въ пусты́ню; и пріи́де въ го́ру Бо́жію Хори́въ. Яви́ся же ему́ Ангелъ Госпо́день въ пла́мени о́гненнѣ изъ купины́; и ви́дитъ, я́ко купина́ гори́тъ огне́мъ, купина́ же не сгара́ше. Рече́ же Мои́сей: мимоше́дъ, уви́жду видѣ́ніе вели́кое сіе́, я́ко не сгара́етъ купина́. Егда́ же ви́дѣ Госпо́дь, я́ко приступа́етъ ви́дѣти, воззва́ его́ Госпо́дь изъ купины́, глаго́ля: Моисе́е, Моисе́е. Онъ же рече́: что́ е́сть, Го́споди? Онъ же рече́: не приближа́йся сѣ́мо; изу́й сапоги́ отъ но́гъ твои́хъ: мѣ́сто бо, на не́мже ты́ стои́ши, земля́ свята́ е́сть.

Исхо́да чте́ніе. [Глава́ 13.]

Обведе́ Бо́гъ лю́ди путе́мъ, и́же въ пусты́ни, къ Чермно́му мо́рю: пя́таго же ро́да изыдо́ша сы́нове Изра́илевы отъ земли́ Еги́петскія. И взя́ Моисе́й ко́сти Іо́сифовы съ собо́ю, кля́твою бо закля́ Іо́сифъ сы́ны Изра́илевы, глаго́ля: присѣще́ніемъ присѣти́тъ ва́съ Госпо́дь, и изнесе́те отсю́ду ко́сти моя́ съ собо́ю. Воздви́гшеся же сы́нове Изра́илевы отъ Сокхо́ѳа, ополчи́шася во Оѳо́мѣ при пусты́ни. Бо́гъ же вожда́ше и́хъ: въ де́нь у́бо столпо́мъ о́блачнымъ показа́ти и́мъ пу́ть, но́щію же столпо́мъ о́гненнымъ свѣти́ти и́мъ. И не оскудѣ́ сто́лпъ о́блачный во дни́, и сто́лпъ о́гненный но́щію предъ всѣ́ми людьми́.

На литíи стихи́ры, гла́съ 8:

Пріиди́те, празднолю́бцы и по́стниковъ сосло́віе, [вѣ́рою соше́дшеся, хвале́бныя пѣ́сни принесе́мъ Марíи Приснодѣ́вѣ, дне́сь бо наста́ свѣ́тлое торжество́, явле́ніе честны́я Ея́ ико́ны Иверскія, ю́же обстоя́ще со стра́хомъ и любо́вію, воспои́мъ Богоро́дице: ра́дуйся, неисповѣди́мая ра́досте всѣ́мъ; ра́дуйся, о́бразомъ Твои́мъ святы́мъ на́съ просвѣща́ющая; ра́дуйся, всѣ́мъ похвало́ и утвержде́ніе; ра́дуйся, спасе́ніе ду́шъ на́шихъ.

Что́ Тя́ нарече́мъ, Богоро́дице Дѣ́во: сто́лпъ ли о́гненный, къ вѣ́чному наслѣ́дію на́съ веду́щій? Стѣ́ну ли крѣ́пкую, я́ко правосла́вный ро́дъ защища́еши? Стра́жа ли неусы́пна, я́ко оби́тель Твою́ охраня́еши и спаса́еши? Тѣ́мже отъ належа́щихъ бѣ́дъ избавля́еми, возопіи́мъ Влады́чицѣ: ра́дуйся, благи́хъ вино́вная, извѣ́стное христіа́нъ упова́ніе].

Сла́ва, гла́съ 5:

Честны́й страстоте́рпче Христо́въ, сла́вный благовѣ́стниче и му́чениче, въ же́ртву слове́сную Сло́ву себе́ принесы́й, и ны́нѣ на небесѣ́хъ славосло́вя Его́, принеси́ и отъ на́съ, безслове́сныхъ, моле́нія, да спасе́тъ тобо́ю ду́ши на́ша, я́ко Милосе́рдъ и Человѣколю́бецъ.

И ны́нѣ [Богородицы], гла́съ то́йже:

Ра́дуется Аѳо́нъ, [ликовству́етъ оби́тель Иверская, торжеству́етъ и вся́ страна́ Россíйская: Бо́жія бо Ма́терь чудотво́рнымъ Свои́мъ о́бразомъ ми́лостивно на́съ посѣти́ла е́сть, да́руетъ же на́мъ въ ну́ждахъ по́мощь, въ ско́рбехъ утѣше́ніе, въ болѣ́знехъ исцѣле́ніе, въ бѣда́хъ избавле́ніе и всѣ́мъ вѣ́рнымъ ве́лію ми́лость].

На стихо́внѣ стихи́ры, гла́съ 4:

Сла́вное ико́ны Твоея́ явле́ніе,* [Богоро́дице Пренепоро́чная, славосло́вимъ дне́сь* и Твое́ заступле́ніе на́мъ пра́зднуемъ,* я́ко бо Ма́ти су́щи Живота́,* мо́лиши о на́съ Христа́ Бо́га на́шего,* на Тя́ крѣ́пкую наде́жду возложи́вшихъ,* Путеводи́тельнице нело́жная на́шего спасе́нія.

Сти́хъ: Помяну́ и́мя Твое́* во вся́комъ ро́дѣ и ро́дѣ.

Отложи́мъ, вѣ́рніи, печа́ль:* се́ бо втора́я неопали́мая купина́, ико́на Богома́тере,* и́ноки аѳо́нскими зри́мая,* на очище́ніе грѣ́шныхъ явля́ется.

Сти́хъ: Слы́ши, Дщи́, и ви́ждь,* и приклони́ у́хо Твое́.

Назна́менующи во стра́нствіи жите́йстемъ Твое́ на́мъ води́тельство, явля́ешися, Богома́ти, въ столпѣ́ о́гненнѣ,* да на́съ, блужда́ющихъ,* путево́диши къ вѣ́чнымъ оби́телемъ].

Сла́ва му́ченику, гла́съ 6:

Іеремíи подо́бяся, не мо́глъ еси́ огня́ благода́ти носи́ти въ ду́сѣ свое́мъ вта́йнѣ, но апо́стольски ре́вностно Христа́ проповѣ́далъ еси́, сего́ ра́ди въ темни́цу вве́рженъ бы́лъ еси́; и освобожде́нъ сы́й ко благовѣ́стію а́біе вда́лся еси́, и пла́менемъ муче́ній ко Свѣ́ту Ти́хому возлетѣ́лъ еси́.

И ны́нѣ [Богородицы], гла́съ 5:

Пріиди́те, вси́ мона́си и мірстíи, [просла́вимъ Пречи́стую Дѣ́ву Богоро́дицу: дне́сь бо, ра́ди свяще́нныя ико́ны, въ мо́ри путіе́ Ея́ и стези́ Ея́ въ вода́хъ мно́гихъ, отъ Нике́и бо въ столпѣ́ о́гненнѣ по́нтъ морскíй ко Аѳо́ну прехо́дитъ и да́ръ прише́ствіемъ Свои́мъ вѣ́рнымъ подае́тъ. Мы́ же, просвѣща́еми луча́ми благода́ти, Хода́таицу спасе́нія на́шего ублажа́емъ].

Тропа́рь Богоро́дицѣ, гла́съ 1:

Де́рзость ненави́дящихъ [о́бразъ Госпо́день и держа́ва нечести́выхъ безбо́жно въ Нике́ю пріи́де, и по́сланніи безчеловѣ́чно вдови́цу, благоче́стно чту́щую ико́ну Богома́тере, истязу́ютъ. Но та́я но́щію съ сы́номъ ико́ну въ мо́ре пусти́, вопію́щи: сла́ва Тебѣ́, Чи́стая, я́ко непроходи́мое мо́ре плещи́ своя́ подаде́; сла́ва правоше́ствію Твоему́, еди́на Нетлѣ́нная]. [Два́жды.]

И му́ченику тропа́рь, гла́съ 4:

Ра́бе благíй и вѣ́рный, служи́тель Госпо́день тве́рдый, за благовѣ́стіе Ева́нгельское пострада́вый и вся́ до конца́ претерпѣ́вый, священному́чениче Веніами́не, моли́ Христа́ Бо́га спасти́ ду́ши на́ша.


НА УТРЕНИ,
[На Богъ Господь:] Тропарь Богородицы, гласъ 4: Отъ святы́я ико́ны Твоея́... Слава, мученика. И нынѣ, инъ тропарь Богородицы: Де́рзость ненави́дящихъ...

По 1-й каѳи́смѣ сѣда́ленъ му́ченика, гла́съ 1:

Яко ка́меніе тве́рдо, не убоя́стеся му́къ святíи му́ченицы, но я́ко въ чужды́хъ тѣлесе́хъ терпя́ще, благода́тію Христо́вою укрѣпля́хуся. Сего́ ра́ди и мы́ съ ва́ми вопіе́мъ Нача́льнику вѣ́ры: сла́ва Распя́тію Твоему́, Христе́; сла́ва му́ченикъ Твои́хъ страда́нію; сла́ва блаже́нству и́хъ во Ца́рствіи Твое́мъ. [Два́жды.]

Сла́ва, и ны́нѣ [Богородицы], гла́съ то́йже:

Пресвѣ́тлаго зра́ка Твоего́ явле́ніе ра́дость прино́ситъ всѣ́мъ вѣ́рующимъ и оби́тели Иверстѣй да́руетъ стра́жа неусы́пна и отъ бѣ́дъ избавле́ніе. Тѣ́мже пое́мъ Ти́, Пречи́стая: покрыва́й на́съ при́сно Покро́вомъ Твои́мъ.

По 2-й каѳи́смѣ [сѣда́ленъ] му́ченика, гла́съ 3:

Христо́вою любо́вію уязви́вся, да́же до сме́рти за Него́ пострада́лъ еси́. Служе́ніе же діа́конское пріе́мый, проповѣ́данію и ни́щимъ служи́лъ еси́, сего́ ра́ди отъ Талантода́теля услы́шалъ еси́: вни́ди въ ра́дость Го́спода твоего́ во вѣ́ки. [Два́жды.]

Сла́ва, и ны́нѣ [Богородицы], гла́съ то́йже:

Веселя́тся дне́сь свѣ́тло Аѳо́на па́ствы, пѣ́сней мно́жество слага́ютъ, любо́вію Непоро́чную почита́юще, вели́чествомъ благода́ти крася́щеся, ю́же прія́ша прише́ствіемъ ико́ны Всенопоро́чныя Отрокови́цы, заря́ми Боговѣ́дѣнія благоче́стно пою́щихъ озаря́ющія.

Велича́ніе:

Велича́емъ Тя́, Пресвята́я Дѣ́во, Богоизбра́нная Отрокови́це, и чте́мъ о́бразъ Тво́й святы́й, и́мже то́чиши исцѣле́нія всѣ́мъ, съ вѣ́рою притека́ющимъ.

Псало́мъ избра́нный: Помяни́, Го́споди, Дави́да и всю́ кро́тость его́...

[По поліеле́и] сѣда́ленъ му́ченику, гла́съ 8:

Сла́вная страда́нія твоя́, священнодіа́коне, ужаса́ютъ моя́ помышле́нія, и недоумѣва́етъ мо́й у́мъ, лю́тая твоя́ зря́ муче́нія. И сокраще́нная сія́ словеса́ показу́ютъ вели́кое терпѣ́ніе: въ темни́цѣ изнуря́емый, чле́номъ твои́мъ терза́емый и на о́стріи [1] сме́рть вкуси́вый, сія́ ни во что́же вмѣня́лъ еси́, Ца́рствія Христо́ва взыску́ющи. [Два́жды.]

Сла́ва, и ны́нѣ [Богородицы], гла́съ то́йже:

Вели́чіе Твое́ кто́ исповѣ́сть, Богоро́дице? Явле́ніемъ бо Твоея́ ико́ны удиви́ла еси́ вся́ правосла́вныя, мно́гія неду́ги врачу́ющи и болѣ́зни исцѣля́ющи. О, Всеми́лостивая Влады́чице, не лиши́ на́съ и ны́нѣ Твоего́ заступле́нія, но моли́твами Твои́ми защити́ и спаси́ правосла́внаго Импера́тора, и все́ христолюби́вое Его́ во́инство си́лою Твое́ю огради́, да Тобо́ю хва́лящеся и все́ упова́ніе на Тя́ возлага́юще, не постыди́мся во вѣ́ки.

[Степе́нна, 1-й антифо́нъ 4-го гла́са. Проки́менъ, гласъ 4: Помяну́ и́мя Твое́* во вся́комъ ро́дѣ и ро́дѣ. Сти́хъ: Отры́гну се́рдце мое́ сло́во бла́го, глаго́лю а́зъ дѣла́ моя́ Царе́ви. Вся́кое дыха́ніе... Ева́нгеліе Луки́, зача́ло 4.

По 50-мъ псалмѣ́ стихи́ра, гла́съ 6:

Егда́ явле́ніе чу́днаго Твоего́ о́браза приспѣ́, тогда́ аѳо́нстіи отцы́, сто́лпъ о́гненный на мо́ри зря́ще, стра́хомъ одержи́ми, недоумѣва́ху; Гавріи́лъ же, я́ко вторы́й Пе́тръ, по мо́рю ходя́, со слеза́ми вопія́ше Тебѣ́: О, Пресвята́я, пріиди́ и сохрани́ достоя́ніе Твое́ отъ вра́гъ ненавѣ́тно!]

Кано́нъ Пресвяты́я Богоро́дицы со ирмосо́мъ на 8. Гла́съ 8.
Пѣ́снь 1.

[Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Отъ скве́рныхъ усте́нъ хвале́ніе пріими́, Всенепоро́чная, я́коже пре́жде Сы́нъ Тво́й, Бо́гъ же мо́й и Госпо́дь, прія́тъ двѣ́ ле́пты вдови́цы, и разрѣше́ніе прегрѣше́ній мои́хъ пода́ждь, я́ко да по до́лгу велича́ю Тя́.

Ангельское пѣ́ніе подоба́ше Тебѣ́, Ма́тери Бо́жіей, Творца́ бо си́хъ родила́ еси́ стра́нно. Но и отъ на́съ пріими́, Влады́чице, смире́нныя сія́ моли́твы, да пое́мъ Го́сподеви: сла́вно просла́вися въ на́шей не́мощи.

Огустѣ́ша во́ды, огустѣ́ша и во́лны посредѣ́ мо́ря, нося́ща Твою́, Богома́ти, ико́ну. Утверди́ и мое́ подви́гшееся се́рдце на ка́мени за́повѣдей Христо́выхъ.

Помо́щница и Покрови́тельница была́ еси́, Дѣ́во, оби́тели Иверскія, во́евъ Ами́ры съ корабли́ и́хъ въ мо́ри погрузи́вши, но потопи́ въ пучи́нѣ милосе́рдія Сы́на Твоего́ вся́ моя́ душе́вныя стра́сти и безчи́сленная моя́ прегрѣше́нія.

Инъ кано́нъ му́ченика, на 6, гла́съ 5.]
Пѣ́снь 1.

Ирмо́съ: Спаси́телю Бо́гу, въ мо́ри лю́ди немо́крыми нога́ми наста́вльшему и фарао́на со всево́инствомъ пото́пльшему, Тому́ еди́ному пои́мъ, я́ко просла́вися.

Спасти́ся мнѣ́ хотя́щу, во грѣсѣ́хъ же валя́тися [2] не престаю́щу, тя́жко ми́ е́сть отве́рсти уста́ моя́ во хвале́ніе, оба́че, Утѣ́шителю Благíй, благода́ть сло́ва ми́ да́руй, да воспою́ му́ченика Твоего́.

Страда́нія твоя́, му́чениче, на хвалу́ подвиза́ютъ, а́ще и недосто́йная моя́ уста́, сего́ ра́ди воспѣ́ти тя́ дерза́ю, а́ще же и сла́вное и́мя твое́ нося́й: обои́хъ ра́ди прими́ да́ръ сло́въ отъ безслове́снаго умо́мъ.

За Христа́ пострада́въ, мо́ре жите́йское преплы́лъ еси́, священному́чениче. И мене́ въ приста́нище ти́хое доведи́ покая́ніемъ: сея́ бо ми́лости ища́й отъ тебе́, во смире́ніи ко хвале́нію твоему́ приступа́ю.

Богоро́диченъ: Вѣ́рная и благонаде́жная Засту́пнице, немощны́хъ покро́ве, ма́терски не гнуша́йся усте́нъ, а́ще и нечи́стыхъ, но благо́дать пода́ти мнѣ́ испроси́ съ му́ченикомъ, пѣ́ти начина́ющу сла́ву [Твою́].

Катава́сія: Отве́рзу уста́ моя́...

Пѣ́снь 3.

[Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ па́че Тебе́, Еди́не Человѣколю́бче.

Утверди́ се́рдце мое́ во упова́ніи на Тя́, Богома́ти, изми́ вся́кую горды́ню и превозноше́ніе изъ помраче́ннаго ума́ моего́, да вопію́: нѣ́сть свя́тъ, я́ко Госпо́дь, и нѣ́сть пра́веденъ, я́ко Бо́гъ на́шъ.

Ты́, о Богома́ти, немощству́ющія препоясу́еши си́лою, а́лчущія насыща́еши; посѣти́ и мою́ не́мощь и а́лчущаго и жа́ждущаго мене́ насы́ти Живо́тнаго Хлѣ́ба, чрезъ Твою́ дѣ́вственную утро́бу сше́дшаго съ небесе́ на зе́млю.

Возста́ви, Влады́чице, отъ земли́ мене́, убо́гаго, и отъ гно́ища грѣхо́внаго воздви́гни, ни́щаго, да́ждь моли́тву мнѣ́, моля́щемуся, да, велича́я, пою́ Твое́ заступле́ніе.

Непло́дствующій мо́й у́мъ плодоно́сенъ покажи́, Блага́я Дѣ́во, отъ непло́дове ро́ждшаяся: Ты́ бо плодоно́сіе всѣ́хъ бла́гъ явле́ніемъ ико́ны Твоея́ подае́ши.

Инъ.]

Ирмо́съ: Си́лою Креста́ Твоего́, Христе́, утверди́ мое́ помышле́ніе, во е́же пѣ́ти и сла́вити спаси́тельное Твое́ Вознесе́ніе.

Стезя́ крове́й твои́хъ приведя́ тя́ къ Распе́ншемуся за ны́: вонзе́нія бо въ пе́рсты ру́къ и но́гъ, и лю́тая муче́нія во у́дъ и на дре́вѣ сме́рть претерпѣ́лъ еси́.

Вѣ́ра твоя́ утверди́ тя́, му́чениче Веніами́не: у́мъ бо человѣ́ческій недомышля́ется, ка́ко мо́жетъ естество́ на́ше преесте́ственныя му́ки терпѣ́ти?

Страда́ніями терза́емый, па́че же огне́мъ любве́ къ Бо́гу пали́мый, вопія́лъ еси́ мучи́телемъ: за Христа́ и сме́рть прія́ти гото́въ е́смь.

Богоро́диченъ: Ученико́въ нача́льница была́ еси́, Дѣ́во Непоро́чная, егда́ ору́жіе ду́шу Ти́ про́йде, на Крестѣ́ распина́ема Сы́на и Бо́га Твоего́ зря́ща ужа́снѣ.

Конда́къ му́ченика, гла́съ 3:

Отъ до́браго исто́чника, епи́скопа своего́ Авды, напои́вся оби́льно, того́ стопа́мъ послѣ́довалъ еси́, во благовѣ́стіи, страда́ніяхъ и сме́рти. И ны́нѣ съ ни́мъ вку́пѣ лику́я, зове́ши и на́съ въ селе́нія го́рняя, да пое́мъ съ ва́ми: Аллилу́ія.

Сѣда́ленъ, гла́съ то́йже. Подо́бенъ: Ве́лія Креста́.

Ве́лія Креста́ Госпо́дня си́ла, то́читъ бо чудеса́ и на страда́нія подвиза́етъ, и яви́ немощны́хъ побѣди́тели и надъ де́моны власти́тели. Тѣ́мъ съ му́ченики свѣ́тло рце́мъ: благослове́нъ еси́ пло́тію Распны́йся и Воскресы́й. [Два́жды.]

Сла́ва, и ны́нѣ [Богородицы]:

Свѣ́тлое дне́сь Засту́пницы [на́шея наста́ торжество́. Да взыгра́ется тва́рь, да ликовству́ютъ человѣ́честіи собо́ри, созыва́етъ бо на́съ Свята́я Богоро́дица ви́дѣти огнено́сную ико́ну Свою́, луча́ми ми́лости вѣ́рныя просвѣща́ющую. Тѣ́мже, ра́дующеся, вопіе́мъ: спаси́, Госпоже́, отъ гла́да, огня́, меча́ и бѣ́дъ вся́ почита́ющія явле́ніе ико́ны Твоея́].

Пѣ́снь 4.

[Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Покры́ небеса́ добродѣ́тель Твоя́, Богома́ти, и хвалы́ Твоея́ испо́лнися земля́, но положи́ любо́вь держа́вную крѣ́пости Твоея́ и на мнѣ́, отча́янномъ.

Уготовля́ющи ше́ствіе чу́днѣй ико́нѣ Твое́й, даде́ бе́здна гла́съ сво́й, воздви́жеся со́лнце, и сія́ніе ея́ я́ко свѣ́тъ бы́сть, но Ты́ изшла́ еси́ на спасе́ніе люде́й, спасти́ Твое́ наслѣ́діе пришла́ еси́.

Услы́шавше слу́хъ прише́ствія Твоего́, и́ноцы убоя́шася; уразумѣ́вше же дѣла́ Твоя́, ужасо́шася, но внегда́ смути́тися души́ мое́й, ми́лость Твою́ помяни́, Влады́чице, да взыва́ю: сла́ва заступле́нію Твоему́, Богома́ти.

Ты́ еси́ моя́ крѣ́пость и си́ла, Богоро́дице, Тобо́ю почíю въ де́нь ско́рби моея́, и изъ страны́ прише́льствія взы́ду Тобо́ю въ небе́сное наслѣ́діе, и возра́дуюся о Го́сподѣ и Бо́зѣ, Спа́сѣ мое́мъ.

Инъ.]

Ирмо́съ: Услы́шахъ слу́хъ си́лы Креста́, я́ко ра́й отве́рзеся и́мъ, и возопи́хъ: сла́ва си́лѣ Твое́й, Го́споди.

Устраша́ютъ на́съ страда́нія твоя́ за благовѣ́стіе Ева́нгельское. Се́ бо вопія́лъ еси́: до конца́ претерпѣ́въ, спасу́ся!

Му́ки го́рькія прія́лъ еси́, егда́ на дре́во о́строе вонзе́нъ бы́лъ еси́, и возопи́: помяни́ мя, Го́споди, во Ца́рствіи Твое́мъ!

Нестерпи́мыя стра́сти терпя́, па́че сло́ва свидѣ́тельствовалъ еси́, взыва́я: ничто́же разлучи́тъ мене́ отъ любве́ Христо́вы.

Богоро́диченъ: Любо́вь на́шу пріе́млющи, пода́ждь на́мъ во страда́ніи крѣ́пость, си́ла бо Бо́жія въ не́мощехъ соверша́ется.

Пѣ́снь 5.

[Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Ви́ждь, Чи́стая, отъ но́щи у́тренюющія лю́ди па́ствы Твоея́, ико́ну Твою́ богохва́льную обстоя́щія, разрѣше́нія же грѣхо́въ прося́щія, и житія́ исправле́нія, и Боже́ственныя сла́вы прича́стія: не отри́ни у́бо на́съ отъ лица́ Твоего́, Свѣ́та незаходи́маго Ма́ти.

Все́ю душе́ю и мы́слію въ па́ствѣ Твое́й вси́ слику́юще, псалмы́, и пѣ́сньми духо́вными, и пѣ́ніемъ боже́ственнымъ ико́ну Твою́ почита́ютъ, проще́нія грѣхо́въ прося́ще и ду́шъ спасе́нія. Ты́ же, исцѣле́ніе на́ше су́щи, сія́ вся́ пода́ждь, Влады́чице Богоневѣ́сто.

Хра́мъ Тво́й, Дѣ́во, я́ко ра́й другíй показа́ся ны́нѣ, я́ко дре́во жи́зни имѣ́я ико́ну красоты́ Твоея́, ю́же вси́ усе́рдно со благоговѣ́ніемъ и любо́вію цѣлу́юще, взыва́емъ: Влады́чице, ми́ръ да́ждь на́мъ; Влады́чице, стяжи́ на́съ, ино́го бо ра́звѣ Тебе́ утѣше́нія не вѣ́мы.

Рѣку́ Тя́ сла́дкую и пото́къ насыще́нія, ма́нну небе́сную, изоби́ліе и благода́ть приснотеку́щую во оби́тели Твое́й живу́щіи стяжа́вше, пою́тъ Рождество́ Твое́, Отрокови́це.

Инъ.]

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ бо Тебе́ ино́го не зна́емъ.

Ко Христу́ любо́вію влеко́мь, вся́ Его́ ра́ди претерпѣ́лъ еси́, зовы́й: Ты́ еси́ Бо́гъ мо́й, ра́звѣ Тебе́ ина́го не зна́ю.

Ду́хомъ пламенѣ́я, вопія́лъ еси́ мучи́телемъ: никого́же хощу́ вѣ́дѣти, то́кмо Іису́са и Сего́ ра́спята по мнѣ́.

Жела́я ду́шу свою́ за Христа́ положи́ти, я́ко еле́нь на сла́дкія во́ды, къ му́камъ за Него́ устреми́лся еси́, Сладча́йшаго Іису́са искíй неудержи́мо.

Богоро́диченъ: Во все́мъ мíрѣ показу́ются чудеса́ Твоя́, Влады́чице, и мене́ болѣ́знующаго, не мимои́ди, Блага́я, стра́сти моя́ исцѣля́ющи.

Пѣ́снь 6.

[Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Въ ско́рби се́рдца вопію́ Ти, Влады́чице, жите́йскаго мо́ря потопля́емь бу́рею, къ Тебѣ́, я́ко ти́хому приста́нищу, прибѣга́ю: возведи́ отъ тли́ живо́тъ мо́й.

Бе́здна послѣ́дняя грѣхо́въ обы́де мя́, и исчеза́етъ ду́хъ мо́й, но простри́, Влады́чице, высо́кую Твою́ мы́шцу, и я́ко Гавріи́ла, и мене́, ко Твое́й ико́нѣ прибѣга́юща, невреди́ма сотвори́.

Не отри́ни мене́ до конца́ отъ лица́ Твоего́, Ма́ти незаходи́маго Свѣ́та, не попусти́ мнѣ́ погря́знути въ пучи́нѣ беззако́ній, но возведи́ мене́ отъ бла́та страсте́й, да взы́детъ изъ нетлѣ́нія живо́тъ мо́й, и пожру́ Тебѣ́ со гла́сомъ хвале́нія и исповѣ́данія.

Хра́мъ нося́й тѣле́сный ве́сь оскверне́нъ, Тебѣ́, пречи́стому хра́му Вѣ́чнаго Сло́ва, дерза́ю въ честнѣ́мъ хра́мѣ Твое́мъ, предъ Твое́ю свято́ю ико́ною приноси́ти смире́нныя моя́ моли́твы. Ты́ же, я́ко ми́лостивая, очи́сти мя́ Твои́мъ благоутро́біемъ.

Инъ.]

Ирмо́съ: Обы́де мя́ бе́здна, гро́бъ мнѣ́ ки́тъ бы́сть, а́зъ же возопи́хъ къ Тебѣ́, Человѣколю́бцу, и спасе́ мя десни́ца Твоя́, Го́споди.

Пре́жде Креста́ Твоего́, Го́споди, со у́жасомъ Отцу́ моли́лся еси́, не́мощь естества́ человѣ́ческаго показу́я. Му́ченикъ же Тво́й взыва́ше: вся́ могу́ о укрѣпля́ющемъ мя́ Іису́се!

Пе́рвѣе очи́стивъ ду́шу въ по́двизѣхъ, ко благовѣ́стію поте́клъ еси́, и му́ченическимъ вѣнце́мъ украси́лся еси́, страда́ти о Христѣ́ тебѣ́ дарова́ся.

Ины́хъ науча́я, себе́ сама́го о́бразъ показа́лъ еси́, да вся́къ по Христѣ́ иды́й, отве́ржется себе́ и взе́мь кре́стъ сво́й, гряде́тъ по Не́мъ неизмѣ́нно.

Богоро́диченъ: На Крестѣ́ ви́сяй, Сы́нъ Тво́й не забы́ Тебе́, Своея́ Ма́тере, возлю́бленному ученику́ вручи́ Тя. Не забу́ди и на́съ, немощны́хъ ча́дъ Твои́хъ.

Конда́къ [Богородицы], гла́съ 8:

Аще и въ мо́ре [вве́ржена бы́сть свята́я ико́на Твоя́, Богоро́дице, отъ вдови́цы, не могу́щія спасти́ сію́ отъ враго́въ, но яви́лася е́сть храни́тельница Аѳо́на и врата́рница оби́тели Иверскія, враги́ устраша́ющая и въ правосла́внѣй Россíйстѣй странѣ́ чту́щія Тя́ отъ всѣ́хъ бѣ́дъ и напа́стей избавля́ющая].

Икосъ:

Въ столпѣ́ о́гненнѣ [я́вльшуюся Богома́тере ико́ну ви́дѣвше, возопи́ша по́стниковъ и́верскихъ ли́цы: О, Влады́ко, сподо́би на́съ прія́ти ико́ну Ма́тере Твоея́ во утѣше́ніе стра́нствія на́шего; ты́ же, Гавріи́ле, дерза́й и вни́ди въ мо́ре, и пріими́ во объя́тія твоя́ сокро́вище, на́мъ явля́емое, да бу́детъ на́мъ стра́жъ неусы́пный, покро́въ же, и ра́дость всѣ́мъ христіа́номъ, и храни́тельница, отъ бѣ́дъ и напа́стей избавля́ющая].

Пѣ́снь 7.

[Ирмо́съ: Бо́жія снисхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Согрѣши́хомъ, беззако́нновахомъ, непра́вдовахомъ предъ Го́сподемъ, но, Влады́чице моя́ Богоро́дице, я́ко Блага́я угаси́ о́гнь Его́ пра́веднаго гнѣ́ва Твои́мъ те́плымъ хода́тайствомъ, да пое́мъ Ему́: оте́цъ на́шихъ Бо́же, благослове́нъ еси́.

Въ пещи́ искуше́ній и бѣ́дъ опаля́емыя ороси́, Богома́ти, струя́ми Твои́хъ щедро́тъ, да посра́мятся врази́ на́ши и да разумѣ́ютъ вси́, я́ко Ты́ еди́на еси́ Влады́чица Богоро́дица, по все́й вселе́ннѣй сла́вимая.

Престо́ле Царя́ Сла́вы, честнѣ́йшая херуви́мъ, одушевле́нный хра́ме, въ не́мже всели́ся Госпо́дь, тве́рдь небе́сная, на не́йже возсія́ Со́лнце пра́вды — Христо́съ, Тя́ пое́мъ, Богома́ти, и превозно́симъ во вся́ вѣ́ки.

Ты́ еси́ весе́ліе и въ пусты́нехъ живу́щимъ, Ты́ еси́ и ца́рствующаго гра́да утѣше́ніе и похвала́, Дѣ́во Марíе, препѣ́тая и превозноси́мая во вѣ́ки.

Инъ.]

Ирмо́съ: Въ пещи́ о́гненнѣй пѣсносло́вцы спасы́й о́троки, благослове́нъ Бо́гъ, оте́цъ на́шихъ.

Прехо́дятъ, я́ко князе́мъ во́ини, Христу́ Бо́гу — сла́вніи му́ченицы, сла́ва Тебѣ́, глаго́люще, му́чениковъ весе́ліе.

Беззако́нныхъ мучи́телей побѣди́вше и діа́вольскія де́рзости попра́вше, ны́нѣ въ Ца́рствіи сла́вы лику́ете, страда́льцы.

Стра́сти на́ша побѣди́ти и вра́жія искуше́нія одолѣ́ти, мо́лимъ ва́съ, святíи му́ченицы, Христо́вы спобо́рницы.

Богоро́диченъ: Грѣхо́въ рукописа́нія и неудобосмыва́емая заглажда́ются моли́твами Твои́ми, Пречи́стая. Сла́ва милосе́рдію Твоему́, Многоми́лостиве!

Пѣ́снь 8.

[Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Пою́тъ Тя́ а́нгельскія си́лы, превозно́ситъ человѣ́ческій ро́дъ, благослови́тъ Тя́ вся́ тва́рь, Пречи́стая Дѣ́во Богоро́дице. Пріими́ и отъ мене́, недосто́йнаго, приноси́мое Тебѣ́ хвале́ніе.

По́йте, и́ноцы Аѳо́на, благословля́й, земле́ Иверская, превозноси́, вся́ страно́ Россíйская, Благу́ю Влады́чицу, рѣ́ки чуде́съ отъ Своея́ чудотво́рныя ико́ны источа́ющую. Хва́лимъ, благослови́мъ, покланя́емся Ти́, Богоро́дице, пою́ще и превознося́ще во вся́ вѣ́ки.

Подо́біемъ ико́ны Иверскія не то́чію святы́й Аѳо́нъ просвѣща́ется, но и ца́рствуяй гра́дъ Москва́ украша́ется, отъ того́ чуде́сную по́мощь пріе́мля и исто́чникъ утѣше́нія въ не́мъ обрѣта́я.

Еще́ и страна́ Новгоро́дская и инíи гра́ды и ве́си подо́біемъ Иверскія ико́ны Твоея́, Влады́чице, освяти́шася и чудесы́ просвѣти́шася, вопію́ще: Го́спода по́йте и превозноси́те во вся́ ве́ки.

Инъ.]

Ирмо́съ: Изъ Отца́ пре́жде вѣ́къ рожде́ннаго Сы́на и Бо́га и въ послѣ́дняя лѣ́та воплоще́ннаго отъ Дѣ́вы Ма́тере, свяще́нницы, по́йте, лю́діе, превозноси́те во вся́ вѣ́ки.

Сла́дость а́нгеловъ, апо́столовъ похвало́, му́чениковъ весе́ліе, преподо́бныхъ умиле́ніе, немощны́хъ укрѣпле́ніе, грѣ́шниковъ спасе́ніе, Спа́се, — си́це взыва́етъ Ти́ Це́рковь Твоя́.

Креста́ ча́шу испи́лъ еси́, креще́ніемъ му́къ крести́лся еси́, діа́коне Веніами́не, сего́ ра́ди одесну́ю Сы́на Человѣ́ческаго сѣди́ши, сла́вѣ Тро́ичестѣй пріобща́яся.

Велича́етъ тя́, страстоте́рпче, Це́рковь Христо́ва, тобо́ю бо вѣ́ра укрѣпля́ется, бѣ́си изгоня́ются, кро́вію твое́ю Ева́нгеліе утвержда́ется, Христо́съ прославля́ется и мы́ тя́ восхваля́емъ.

Богоро́диченъ: Тобо́ю две́рь въ Ца́рствіе небе́сное открыва́ется и ра́йская селе́нія святы́ми восполня́ются, и вси́ со а́нгелы тя́ велича́емъ, Честнѣ́йшую херуви́мъ, Бо́га Сло́ва ро́ждшую.

Пѣ́снь 9.

[Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Та́йна глубины́ Рождества́ Твоего́ у́мъ а́нгельскій ужаса́етъ, Дѣ́во, и пречи́стая ико́на Твоя́ де́моны прогоня́етъ, не терпя́ще бо взира́ти на си́лу ея́, бѣ́гаютъ и исчеза́ютъ. Мы́ же то́й любе́зно покланя́емся и облобыза́емъ, и Тя́, Богоро́дицу, велича́емъ.

Пріиди́те вси́, поклони́мся, припаде́мъ и возвели́чимъ Бо́жію Ма́терь, призрѣ́вшую на на́съ, смире́нныхъ, а́лчущія исполня́ющую бла́гъ и положи́вшую съ на́ми завѣ́тъ ми́лости во явле́ніи Своея́ ди́вныя ико́ны.

Богоро́дице Дѣ́во, упова́ніе христіа́номъ, проба́ви и на́шему ро́ду ми́лости Твоя́, бы́вшія отце́мъ на́шимъ, покры́й и соблюди́ на́съ отъ вся́каго зла́.

О, Всеми́лостивая христіа́номъ Помо́щнице! Не мо́жетъ Тя́ воспѣ́ти досто́йно язы́къ человѣ́ческій и а́нгельскій, я́ко всея́ тва́ри честнѣ́йшую и земны́хъ сла́внѣйшую, но пріими́ ми́лостивно сіе́ приноси́мое Тебѣ́ отъ на́съ моле́ніе и спаса́й на́съ всегда́, на Тя́ бо упова́ніе возложи́хомъ.

Инъ.]

Ирмо́съ: Тя́ па́че ума́ и словесе́ Ма́терь Бо́жію, въ лѣ́то Безлѣ́тнаго неизрече́нно ро́ждшую, вѣ́рніи, единому́дренно велича́емъ.

Стыжду́ся недосто́йными усты́ восхваля́я тя́, па́че бо ума́ по́двиги твоя́ и страда́нія, оба́че вѣ́рою вопію́: ра́дуйся священному́чениче, діа́коновъ высо́кая похвало́.

Да бу́детъ прія́тенъ ти́ да́ръ сего́ пѣснопѣ́нія, ты́ же благода́ть въ де́нь тво́й мнѣ́ испроси́, да велича́ю тя́ ра́достно: ра́дуйся, му́чениче Веніами́не, страстоте́рпче прекрѣ́пкій.

Во́ля Госпо́дня на тебѣ́ соверши́ся и благода́ть Бо́жія дарова́ся ти́, е́же не то́кмо вѣ́ровати и благовѣствова́ти, но и страда́ти по Христѣ́ сподо́бился еси́. Сего́ ра́ди зову́: ра́дуйся Веніами́не, діа́коне, проповѣ́дниче и страда́льче.

Богоро́диченъ: Купина́ неопали́мая была́ еси́, Богоро́дице Дѣ́во, и Ма́терь Бо́жія яви́лася еси́ неизрече́нно. Оба́че вѣ́рою и любо́вію съ му́ченики хвалу́ Ти́ приношу́: ра́дуйся, Богоро́дице Дѣ́во, му́чениковъ сла́во!

Свѣти́ленъ му́ченику. Подо́бенъ: Кре́стъ — храни́тель.

Кре́стъ муче́нія подъя́лъ еси́, Ева́нгеліе страда́ньми исповѣ́далъ еси́, сла́ву Ца́рствія получи́лъ еси́, идѣ́же со всѣ́ми святы́ми лику́я, пое́ши Тро́ицу Пресвяту́ю. [Два́жды.]

Сла́ва, и ны́нѣ [Богородицы]:

Ико́ну Твою́ всечестну́ю [пріи́мъ Гавріи́лъ во объя́тія, вопія́ше Тебѣ́, Влады́чицѣ: О, сла́дкая Ма́ти Царя́ Христа́, бу́ди покро́въ Твое́й оби́тели, ра́дость же всѣ́мъ христіа́номъ и Спору́чница жи́зни вѣ́чныя].

На хвали́техъ стихи́ры на 6: Богоро́дицы 3, гла́съ 4:

О, несказа́нныя бла́гости!* [О, сла́внаго явле́нія ико́ны Богома́тере,* я́же сія́етъ чудесы́* и просвѣща́етъ благода́тію вѣ́рно приходя́щія!* Юже съ весе́ліемъ пріе́млюще,* Чи́стую Богоотрокови́цу* достодо́лжно пѣ́сньми почита́емъ и ублажа́емъ.

О, пресла́внаго Твоего́ о на́съ, Влады́чице, промышле́нія!* Чу́дную бо Твою́ ико́ну Аѳо́ну посыла́еши* и я́ко стра́жа на́мъ неусы́пна* ту́ю подае́ши ми́лостивно* и утѣше́ніе стра́нствію на́шему.* Тѣ́мже, позна́вше Твоя́ честна́я чудеса́,* пѣ́сньми Тя́ велича́емъ.

О, пресла́внаго чудесе́!* Ка́ко огнено́сная ико́на на волна́хъ морски́хъ,* я́ко на колесни́цѣ но́сится,* свѣ́тлыми луча́ми благода́ти умы́ просвѣща́ющи?* Ея́же торжество́ пѣ́сньми почита́юще ра́достно,* сла́ву возсыла́емъ Богороди́тельницѣ].

И му́ченика 3, гла́съ 8. Подо́бенъ: Что́ ва́съ нарече́мъ?

Что́ тя возъимену́ю, страстоте́рпче? Херуви́ма ли, я́ко Бо́га просла́вилъ еси́? Серафи́ма ли, [я́ко] пламенѣ́лъ еси́? Ангела ли, страда́лъ бо еси́, я́ко безпло́тенъ? Діа́кона ли, я́ко служи́лъ еси́ до кро́ве? Мно́гая твоя́ муче́нія, и па́че вы́сшая на небесѣ́хъ сла́ва! Моли́ спасти́ся чту́щимъ тя́.

Что́ бо ми́ е́сть на небеси́ и на земли́? То́чію е́же люби́ти Христа́! Кто́ бо и́нъ, я́ко Бо́гъ на́шъ Христо́съ, къ кому́ и́демъ? Се́й Еди́нъ е́сть Жи́знь! Кто́ и́нъ спаса́яй? То́кмо оставля́яй грѣси́! То́й е́сть Истина и Пу́ть, То́й е́сть Искупи́тель мо́й благíй! За Него́ а́зъ умира́ю, да и живу́ съ Ни́мъ!

Что́ прія́лъ еси́, му́чениче? Сла́ву ли, я́ко просла́вилъ еси́ Христа́? Блаже́нство ли, я́ко лю́тѣ страда́лъ еси́? Чуде́съ ли да́ръ, я́ко служи́тель Це́ркви бы́лъ еси́? Вели́кая твоя́ дарова́нія, неизрече́нная благода́ть и си́ла! Моли́ и на́мъ спасти́ся.

Сла́ва му́ченику, гла́съ 6:

На единоиме́нники твоя́ призира́я и, славосло́вяща тя́, заступа́я, помяни́ ны́, сла́вный му́чениче, Христу́ предстоя́щи: пѣснопѣ́ніе сіе́ соста́вльшему испроси́ грѣхо́въ проще́ніе и благода́ть исправле́нія; пою́щимъ тя́ — ве́лію ми́лость и спасе́ніе всѣ́мъ моля́щимся.

И ны́нѣ, гла́съ 4:

Тво́й глаго́лъ исполня́я, Богома́ти, преподо́бный Гавріи́лъ немо́кренно по водѣ́ морстѣ́й пѣшеше́ствова, и воспріи́мъ свяще́нную ико́ну Твою́, ли́къ пѣ́сненный соста́ви и торжество́ съ по́стники аѳо́нскими совокупи́. Тѣ́мже и мы́, удивля́ющеся, вопіе́мъ Первовино́вному: сла́ва Тебѣ́, сотво́ршему ди́вная, еди́ному Царю́ и Бо́гу, моли́твъ ра́ди Богоро́дицы! Сохрани́ Импера́тора на́шего, Его́же избра́лъ еси́ ца́рствовати надъ на́ми, и побѣ́ды Ему́ на враги́ да́руй, я́ко Всеси́ленъ.

Славосло́віе вели́кое. Тропа́рь му́ченика. Сла́ва, и ны́нѣ, тропа́рь Богоро́дицы: Отъ святы́я ико́ны Твоея́... [Ектеніи] и отпу́стъ.



НА ЛИТУРГІИ,

Блаже́нна отъ кано́на Богоро́дицы пѣ́снь 3-я, на 4, и свята́го пѣ́снь 6-я, на 4. Проки́менъ, пѣ́снь Богоро́дицы, гла́съ 3: Вели́читъ душа́ моя́ Го́спода, и возра́довася ду́хъ Мо́й о Бо́зѣ Спа́се Мое́мъ. Сти́хъ: Яко призрѣ́ на смире́ніе рабы́ Свое́я, се́ бо отъ ны́нѣ ублажа́тъ Мя́ вси́ ро́ди. И свята́го, гла́съ 7: Возвесели́тся пра́ведникъ о Го́сподѣ и упова́етъ на Него́. Апо́столъ Богоро́дицы, ко Филиппи́сіомъ зача́ло 240. И свята́го, къ Тимоѳе́ю зача́ло 292. Аллилу́ія Богоро́дицы, гла́съ 8: Слы́ши, Дщи́, и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. И свята́го, гла́съ 2: Пра́ведникъ, я́ко фи́никсъ процвѣте́тъ, я́ко ке́дръ, и́же въ Лива́нѣ, умно́жится. Ева́нгеліе Богоро́дицы, Луки́ зача́ло 54. И свята́го, Луки́ зача́ло 63. Прича́стенъ Богоро́дицы: Ча́шу спасе́нія пріиму́, и и́мя Госпо́дне призову́. И свята́го: Въ па́мять вѣ́чную бу́детъ пра́ведникъ, отъ слу́ха зла́ не убои́тся.


Моли́тва свято́му по моле́бнѣ.

О, святы́й страстоте́рпче діа́коне Веніами́не! Ты́ отъ святи́теля твоего́ Авды послуша́нію навы́клъ [еси́] и, проповѣ́данію отъ него́ научи́вся, му́ченическимъ стопа́мъ того́ послѣ́довалъ еси́, и за благовѣ́стіе Ева́нгельское лю́тыя страда́нія претерпѣ́лъ еси́, и на небеса́ со сла́вою возне́слся еси́. Идѣ́же бо, предстоя́ престо́лу Святы́я Тро́ицы, помяни́ и на́съ, недосто́йныхъ, да не отпаде́мъ и мы́ отъ Христо́вы вѣ́ры, но претерпи́мъ сего́ ра́ди вся́кія ско́рби и болѣ́зни, и тѣ́мъ очи́стившеся, благода́ть милосе́рдія получи́мъ и святы́ми твои́ми моли́твами сподо́бимся дости́гнути блаже́ннаго Ца́рствія со всѣ́ми святы́ми. Здѣ́сь же, въ мíрѣ се́мъ пребыва́юще, ве́сь живо́тъ на́шъ въ ру́цѣ Христа́ Бо́га предади́мъ, да спасе́тъ, я́коже Са́мъ вѣ́сть, ду́ши на́ша, Ему́же сла́ва подоба́етъ со Отце́мъ и Святы́мъ Ду́хомъ во вѣ́ки вѣко́въ. Ами́нь.

Примѣчанія:
[1] Въ текстѣ: «остаріи» (опечатка?). Въ слав. прологѣ: «ко́лъ о́стръ».
[2] Въ текстѣ ошибочно «налитися».

Источникъ: Служба на праздникъ иконы Иверской Божіей Матери и на память святаго мученика діакона Веніамина. // Митрополитъ Веніаминъ (Федченковъ). О богослуженіи Православной Церкви. — М.: СТСЛ; Изд-во «Отчій домъ», 2001. — С. 568-582.

Служба Богородицы: Минíя дополни́тельная. — СПб.: С.-Петербургская Сѵнодальная Типографія, 1909. — Л. 31 об. – 38 об.

/ Къ оглавленію раздѣла /


Наверхъ / Къ титульной страницѣ

0