Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 24.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 13-й де́нь.
Святы́хъ му́ченикъ Ка́рпа, Папи́лы, [Агаѳодо́ра и святы́я му́ченицы Агаѳони́ки].

[ВЕЧЕРЪ,]
На Го́споди воззва́хъ: стихи́ры, гла́съ 4. Подо́бенъ: Яко до́бля.

Вери́гами связу́еми* и въ темни́цѣ заключа́еми,* и звѣре́мъ во снѣ́дь издава́еми,* повѣ́шени и стру́жеми,* во о́гнь же вмета́еми,* и Боже́ственную по́мощь съ небесе́ пріе́млюще,* непоколеби́ми пребы́сте* любо́вію Влады́ки, Спа́са всѣ́хъ,* Ка́рпе и Папи́ле прему́дріи.

На ка́мени вѣ́ры* утверди́въ твое́ помышле́ніе,* неукло́нный мудрова́ніемъ, му́чениче Папи́ле,* каменобіе́мь, ра́довался еси́,* боже́ственному подо́бяся* му́чениковъ нача́льнику архидіа́кону Стефа́ну,* я́ко служи́тель и я́ко Бо́жіихъ та́инъ слуга́,* я́ко сочисле́нъ му́ченикомъ* и а́нгеломъ собесѣ́дникъ.

На пути́ ше́ствующе* свидѣ́тельства неукло́нно,* желѣ́знымъ обу́щамъ пригвожда́еми,* врага́ и губи́теля жа́ла, всехва́льніи,* сокруши́сте тве́рдѣ* и побѣ́дами вѣнча́стеся.* Тѣ́мъ вся́ Христо́ва Це́рковь* пра́зднуетъ святу́ю ва́шу па́мять,* свѣтоно́сную и благознамени́тую.

Сла́ва, гла́съ 6:

Яко досто́инъ въ богови́дцѣхъ, небеса́ ты́ ви́дѣлъ еси́, преподо́бне, отве́рзена и Го́спода, на престо́лѣ сѣдя́ща, и херуви́ми и серафи́ми о́крестъ Его́, и отъ тебе́ па́ки мы́ просвѣ́щшеся, свяще́нное твое́ ста́до, Ка́рпе, вопіе́тъ тебѣ́: проси́ ми́ра мíру и душа́мъ на́шимъ ве́лія ми́лости.

И ны́нѣ, богоро́диченъ или́ крестобогоро́диченъ: Подо́бенъ: Тридне́венъ.

На дре́вѣ Живо́тъ на́шъ зря́щи, Всенепоро́чная Богоро́дице, ви́сящь, ма́терски рыда́ющи, вопія́ла еси́: Сы́не Мо́й и Бо́же Мо́й, спаси́ любо́вію пою́щія Тя́.

На стихо́внѣ окто́иха.

Тропа́рь, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости. Тѣ́хъ моли́твами спаси́ ду́ши на́ша.

Сла́ва, и ны́нѣ, богоро́диченъ [или́ крестобогоро́диченъ].



НА УТРЕНИ,
[На Бо́гъ Госпо́дь: Тропа́рь святы́хъ, два́жды. Сла́ва, и ны́нѣ, богоро́диченъ или́ крестобогоро́диченъ.]

Оба кано́на окто́иха и му́чениковъ кано́нъ на 4, его́же краегране́сіе: Ка́рпа и Папи́лу пѣ́сньми вѣнчава́ю. Іо́сифово. Гла́съ 1.

Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяномъ пу́ть глубины́ новосодѣ́лавшая.

Ка́рпа и Папи́лы, крѣ́пкихъ и́стины свидѣ́телей, похваля́юще па́мять всесвяще́нную, побѣди́тели ты́я содѣ́лавшаго Го́спода сла́вы боголѣ́пно воспои́мъ.

По́стническимъ пре́жде огне́мъ искуси́вшеся, страда́ніемъ же второ́е, му́ченицы, яви́сте и́стинно душе́вное искуше́ніе и па́че зла́та боже́ственными нра́вы возсія́сте.

Си́лою Боже́ственною къ ра́намъ, къ повѣ́шенію, ко огню́ и къ сме́рти, сла́вніи, устреми́вшеся, гони́телей крѣ́пость побѣди́сте и нетлѣ́нными вѣнцы́ увязо́стеся.

Богоро́диченъ: Две́ре Свѣ́та, отъ Твоея́ нерастлѣ́нныя утро́бы возсія́вшаго, возсія́й ми́ покая́нія просвѣти́тельныя лучи́ и отжени́ грѣхо́въ мои́хъ мра́къ, Богора́дованная.

Пѣ́снь 3.

Ирмо́съ: Еди́не, вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й, одушевле́нный хра́ме неизрече́нныя сла́вы Твоея́, Человѣколю́бче.

Пло́дъ прине́слъ еси́ Христу́ прія́тенъ и свяще́ннѣйшій, свяще́ннаго съ тобо́ю Агаѳодо́ра, ра́ны и я́звы претерпѣ́вшаго и одолѣ́вша съ пло́тію врагу́ безпло́тному зна́нія крѣ́постію.

Непра́ведно сокруша́емь, му́дре, повелѣ́ніемъ судя́щаго, и по ре́бромъ стру́жемь терпѣ́лъ еси́. Огне́мъ же па́ки подпаля́емь, струя́ми кро́вными пре́лести у́гли погаси́лъ еси́, Ка́рпе многострада́льне.

Ви́дѣти жела́я Христа́, ви́ся высоко́, и огне́мъ пе́рси поджига́емь, до́блественно терпи́ши, богому́дре Папи́ле, росо́ю Ду́ха я́вѣ ороша́емь и Боже́ственными наде́ждами укрѣпля́емь.

Богоро́диченъ: Черто́гъ нескве́рный Бо́жій, и го́ру несѣко́мую, и киво́тъ святы́й, и трапе́зу вѣ́рніи Тя́ вси́, Чи́стая, проповѣ́даемъ, и кади́льницу невеще́ственнаго Угля, Пресвята́я Дѣ́во Всенепоро́чная.

Сѣда́ленъ, гла́съ 1. Подо́бенъ: Ка́мени запеча́тану.

Плоды́ богозна́нія воздѣ́лавъ труды́ твои́ми, изъ ко́рене безбо́жія исто́рглъ еси́ остны́; и ма́стію пома́зався богодѣ́тельною, упа́слъ еси́ лю́ди, свяще́нниче; и, зако́нно пострада́въ, сугу́быхъ по́честей, Ка́рпе, сподо́бился еси́. Сла́ва Да́вшему ти́ крѣ́пость; сла́ва Вѣнча́вшему тя́; сла́ва Дѣ́йствующему тобо́ю всѣ́мъ исцѣле́нія.

Сла́ва, и ны́нѣ, богоро́диченъ:

Ру́цѣ Твои́ боже́ственніи, и́миже Созда́теля понесла́ еси́, Дѣ́во Пресвята́я, вопло́щшагося бла́гостію, просте́рши, умоли́ Его́ изба́вити на́съ отъ искуше́ній, и страсте́й, и бѣ́дъ, хва́лящихъ Тя́ любо́вію и вопію́щихъ: сла́ва Все́льшемуся въ Тя́, сла́ва Проше́дшему изъ Тебе́, сла́ва Изба́вльшему на́съ Рождество́мъ Твои́мъ.

Крестобогоро́диченъ:

Агнца на Крестѣ́ Агница зря́щи, съ разбо́йникома распина́ема Тя́, долготерпѣли́ве Сло́ве, и копіе́мъ въ ре́бра пробода́ема, восклица́ше, вопію́щи ма́терски: Что́ стра́нное и ужа́сное, Іису́се Мо́й, та́инство, несказа́нно соверша́емое? Ка́ко покрыва́ешися гро́бомъ, Неопи́санный Бо́же? Да Мя́, ро́ждшую Тя́, не оста́виши, Сы́не Мо́й Сладча́йшій.

Пѣ́снь 4.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Нерѣши́мою свя́занъ любо́вію Созда́вшаго, каменобіе́мь я́вѣ, Папи́ле, му́чениче Христо́въ, побѣди́лъ еси́ мета́ющія терпѣ́ніемъ богодарова́ннымъ ти́, всехва́льне, мужеу́мно съ за́вистію боря́ся.

Ко вся́кому ви́ду болѣ́зней, до́блественнѣйшіи, ополчи́стеся, къ звѣре́мъ вве́ржени бы́вше, ку́пно ты́я побѣди́сте, я́коже Даніи́лъ, боже́ственными о́бразы вѣ́ры, Ка́рпе и Папи́ле, му́ченицы сла́вніи.

Сы́й зло́бы обрѣта́тель вселука́вый, Христо́вы уго́дники неми́лостивно пожже́нію негаси́мому предае́тъ, осла́бити и́хъ си́лу мнѣ́въ, но испепели́шася того́ кова́рствія.

Богоро́диченъ: Приста́нище спасе́нія, Дѣ́во, Тя́ и́мамы, и́же въ пучи́нѣ лю́тыхъ обурева́еміи всегда́: къ Тебѣ́ прибѣга́емъ и на Тя́ упова́емъ, да не убои́мся неви́димыхъ враго́въ навѣ́та.

Пѣ́снь 5.

Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый Кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія, правосла́вно пою́щихъ Тя́.

Ни бѣ́дъ гоне́нія, ни гла́дъ, ниже́ сме́рть разлучи́ отъ любве́ Христо́вы богому́дрыхъ, но усе́рднѣйше возда́нія предзря́ще, неудо́бныхъ неради́ша.

Вжиля́еми Боже́ственною си́лою, претерпѣ́сте лютѣ́йшая провертѣ́нія сто́пъ, всехва́льніи, пу́ть ше́ствующе свидѣ́тельства и жа́ла безбо́жія сокруша́юще.

Неугаси́мый свѣти́льникъ страда́нія нося́ще, претеко́сте невѣ́жества но́щь, му́ченицы, и Свѣ́ту прибли́жишася невече́рнему, я́ко дне́ и́стинно сы́нове вѣ́рою.

Богоро́диченъ: Зачала́ еси́ неискусому́жно Бо́га Невмѣсти́маго, родила́ еси́ Преесте́ственнаго Созда́теля естества́. Ве́ліе та́инство, недомы́сленное чу́до, Дѣ́во еди́на Пренепоро́чная!

Пѣ́снь 6.

Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Благоуха́ютъ ва́ша добродѣ́тельства человѣ́ческимъ со́нмомъ, злосмра́діе отгоня́ще я́вѣ многобо́жія, достосла́вніи, и́бо Бо́жіе ны́нѣ благово́ніе яви́стеся, му́ченицы.

Возгара́емый пла́мень росо́ю вѣ́ры погаси́сте, блаже́нніи, и возжго́сте жела́ніе те́плѣ, Агаѳони́кѣ су́щей съ ва́ми благосла́вными, съ не́юже му́жественнѣ стра́сти соверши́сте.

Обощря́еми болѣ́зней приложе́ньми, Ка́рпе и Папи́ле, до́бліи страда́льцы, мечи́ и́стинно небокова́нніи яви́стеся, вра́жія ополче́нія сѣку́ще.

Богоро́диченъ: Отъ ти́ны страсте́й и отъ ро́ва паде́ній воздви́гни мя́ и упра́ви раба́ Твоего́, Чи́стая, исповѣ́дающаго Тя́, Богоро́дицу: Ты́ бо еси́ при́сно па́дающихъ исправле́ніе.

Конда́къ, гла́съ 4. Подо́бенъ: Вознесы́йся.

Яко сокро́вище многоцѣ́нное, Влады́ка, и исто́чникъ, источа́ющь то́ки исцѣле́ній, су́щимъ на земли́ подаде́ мо́щи ва́ша, неду́ги у́бо отъе́млющія страсте́й разли́чныя, благода́ть же даю́щія душа́мъ непреста́нно. Тѣ́мже согла́сно любо́вію ва́ше, му́ченицы боже́ственніи, соверша́емъ торжество́.

Пѣ́снь 7.

Ирмо́съ: Тебе́, у́мную, Богоро́дице, пе́щь, разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Юношески страсте́й пе́щь воздержа́нія росо́ю погаси́вше, о́гнь же кровьми́ страда́нія, второ́е, му́ченицы, и́дольское огни́ще испепели́сте, хва́льнаго воспѣва́юще Бо́га и препросла́вленнаго.

Ста́немъ, се́ отве́рзеся три́знище, не ослабѣ́емъ, свы́ше Христо́съ вѣнцы́ терпѣ́нія муче́ній ра́ди я́вѣ подае́тъ живонача́льною руко́ю, — взыва́ху страда́льцы усе́рдною душе́ю, Ка́рпъ и Папи́ла.

Иже къ Бо́гу всеобра́знымъ, святíи, манове́ніемъ обожа́еми я́вѣ, безбо́жныхъ ра́ны удо́бь претерпѣ́сте, я́коже ино́му стра́ждущу и́стинно са́ми пребыва́юще, хва́льнаго воспѣва́юще Бо́га и препросла́вленнаго.

Богоро́диченъ: Евы, Чи́стая, на́шея прама́тере, прокля́тство разрѣши́ла еси́ я́вѣ, благослове́нія Нача́токъ ро́ждши, Всенепоро́чная Отрокови́це Браконеиску́сная, Его́же благословя́тъ чи́ни небе́сніи, хва́льнаго отце́въ Бо́га и препросла́вленнаго.

Пѣ́снь 8.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Свѣтоно́сная дне́сь на́мъ па́мять му́ченикъ, свѣ́томъ цѣле́ній озаря́ющи на́съ, вопію́щихъ, возсія́: благослови́те вся́ дѣла́ Госпо́дня Го́спода, по́йте и превозноси́те во вся́ вѣ́ки.

Украси́лся еси́, я́ко архіере́й, я́ко Боже́ственный проро́къ, я́ко свидѣ́тель Страсте́й, всеблаже́нне, Христо́выхъ, я́ко Боже́ственное зна́меніе, воспѣва́я, Ка́рпе всеблаже́нне: Го́спода по́йте, дѣла́, и превозноси́те Его́ во вѣ́ки.

То́ки твои́хъ страда́льческихъ крове́й, пото́ки коне́чно безбо́жія пото́пльше, исто́чникъ цѣле́ній яви́шася вопію́щимъ, Папи́ле му́чениче: Го́спода по́йте, дѣла́, и превозноси́те Его́ во вѣ́ки.

Богоро́диченъ: Свяще́нный Тя́ Боже́ственныхъ проро́къ ли́къ проповѣ́даетъ Ма́терь бы́вшую, Всенепоро́чная, Бо́жію, Ему́же вси́ зове́мъ: благослови́те вся́ дѣла́, Госпо́дня, Го́спода и превозноси́те Его́ во вѣ́ки.

Пѣ́снь 9.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Якоже приноше́нія всецѣ́лая, я́ко же́ртвы соверше́нныя и непоро́чныя, принесо́стеся Творцу́, всеблаже́нніи, мече́мъ кончи́ну пріе́мше, и ны́нѣ, вѣнцено́сцы, на небесѣ́хъ жи́тельствуете.

Столпи́ необори́міи яви́стеся Це́ркве, му́ченицы, и забра́ла, исто́чницы, во́ды исцѣле́ній пролива́ющіи, и свѣти́ла свѣтоза́рная и всесвѣ́тлая, но́щи изъ грѣха́ благочести́выя избавля́ющая.

Уже́ къ самѣ́мъ всели́вшеся свѣтоза́рнымъ селе́ніемъ и небе́снымъ, и свѣтлостьми́ Боже́ственными просвѣща́еми, и ра́дости присносу́щныя исполня́еми, о Папи́ле и Ка́рпе, за ны́ моли́теся.

Богоро́диченъ: Но́сиши на объя́тіихъ, Пречи́стая, херуви́мски я́ко престо́лъ вся́ Нося́щаго, пло́тію на́съ ра́ди по на́мъ обложи́вшагося и сугу́ба про́ста ви́димаго, Его́же всегда́ моли́ о на́съ, воспѣва́ющихъ Тя́.

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 114 об. – 118.

/ Къ оглавленію раздѣла /


Наверхъ / Къ титульной страницѣ

0