Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 19 августа 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 13-й де́нь.
Па́мять святы́я великому́ченицы Зла́ты Ме́гленскія.

НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 1. Самогла́сны.

Якоже звѣзда́ свѣ́тлая свѣ́тло свѣ́тиши оте́честву твоему́, Зла́то всесла́вная, боже́ственнымъ вѣнце́мъ муче́нія увя́зана, и́бо терпѣли́вно подъя́ла еси́ свирѣ́пѣйшая муче́нія да́же до кро́ве, возлю́бленнаго ра́ди Христа́ твоего́, Иже тя́ счисли́ небе́снымъ а́нгеломъ, Ему́же ны́нѣ моли́ся, дарова́ти душа́мъ на́шимъ ми́ръ и ве́лію ми́лость.

Му́ченице Зла́то всечестна́я, Влады́ку Христа́ благоду́шно исповѣ́давшая, Его́же ра́ди отъ безбо́жныхъ и скве́рныхъ тяжа́йшая муче́нія и сме́рть претерпѣ́ла еси́, сего́ ра́ди побѣди́тельный вѣне́цъ сла́вы прія́ла еси́, отъ возлю́бленнаго ти́ Христа́ Бо́га на́шего, Его́же ны́нѣ моли́, дарова́ти душа́мъ на́шимъ ми́ръ и ве́лію ми́лость.

Ины стихи́ры, гла́съ 2:

Егда влады́чество ага́рянское, навѣ́ты вра́жіими всю́ страну́ Се́рбскую обдержа́ше, и служи́ма бя́ше пре́лесть безбо́жная, тогда́ ты́ Боже́ственнымъ манове́ніемъ, се́рдцемъ же усе́рднымъ и теплото́ю вѣ́ры, къ вышеесте́ственному по́двигу отлучи́лася еси́, оплева́вши ко́зни вра́жія, и де́рзостно исповѣ́давши Христа́ Го́спода. [Два́жды.]

Язвами, и ра́нами и скорбьми́ пріобрѣла́ еси́, благозва́нная великому́ченице, Ца́рство Христо́во, и́бо свяще́нными исповѣ́даніи ду́шу облагодати́вши, притупи́ла еси́ супоста́товъ свои́хъ зло́бу, забы́вши я́вѣ не́мощь же́нскую, и зако́нно пострада́вши, получи́ла еси́ сла́ву вѣ́чную.

Искуси́вшися терпѣли́вно въ му́кахъ, я́коже въ пещи́ о́гненнѣй, Зла́то страстоте́рпице, боже́ственно, па́че зла́та, вои́стинну облиста́ла еси́, и яви́лася еси́ о́бщница свяще́нныхъ Страсте́й, пло́ть Пріе́мшаго на́съ ра́ди, сего́ ра́ди вѣ́чно съ Ни́мъ ра́дуешися на небесѣ́хъ.

Сла́ва, гла́съ 6:

Пріиди́те, вси́ любострада́льцы, пѣ́сньми и пѣ́ніи воспои́мъ многострада́льную дѣви́цу Зла́ту, ю́же не прельсти́ша слове́съ ласка́нія, ни устраши́ша нечести́выхъ ту́рковъ суро́вая преще́нія, ниже́ косну́шася ея́ плаче́вная моле́нія роди́телей и се́стръ ея́, и́же глаго́лаху е́й отрещи́ся Христа́. Она́ же не отве́ржеся спаси́тельнаго и́мене Христа́, но глаго́летъ и́мъ: а́ще ва́шъ совѣ́тъ е́сть — отрещи́ся Христа́, и́стиннаго Бо́га — вы́ уже́ нѣ́сте роди́тели мои́, ни сестры́ моя́; а́зъ имѣ́ю Отца́ — Го́спода Іису́са Христа́, и Ма́терь — Богоро́дицу, бра́тію же и сестры́ — вся́ святы́я на небесѣ́хъ. Тѣ́мже и бы́сть самово́льное заколе́ніе, и же́ртва чи́ста и соверше́нна, и всели́ся въ Ца́рство небе́сное.

И ны́нѣ, богоро́диченъ, гла́съ то́йже:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́ и чте́нія три́.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 4.]

Пра́ведникъ а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть и живы́й посредѣ́ грѣ́шникъ преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая, и паре́ніе по́хоти премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше, и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма, и святы́я самогла́сны, гла́съ 6:

Златоза́рную дѣви́цу, страстоте́рпицу Христо́ву, достодо́лжно восхва́лимъ, глаго́люще: о, Зла́то богоблаже́нная! Зла́ту тезоимени́та, златоза́рную ду́шу имѣ́ла еси́, хра́борствомъ же твои́мъ вся́ позлати́ла еси́, и́бо за Христа́ и за Кре́стъ Его́ себе́ са́мую во́льно му́камъ предала́ еси́, и нра́вомъ до́блественнѣйшимъ вся́ неудоботе́рпныя тя́жести му́къ претерпѣ́ла еси́. Тѣ́мже дарова́вшаго ти́ сла́ву непрестаю́щую, Христа́ Бо́га на́шего, моли́ о спасе́ніи ду́шъ на́шихъ.

Дѣви́це преди́вная, Зла́то многострада́льная, ты́ вои́стинну вся́ вра́жія си́лы сло́вомъ и дѣ́ломъ крѣ́пко низложи́ла еси́, предъ злочести́выми ту́рки до́блественно Христа́ исповѣ́дала еси́, и вѣне́цъ нетлѣ́нный отъ руки́ Госпо́дни прія́ла еси́. Тѣ́мже и мы́, благоче́стно пра́зднующе честну́ю и святу́ю па́мять твою́, мо́лимъ тя́: моли́ Христа́ Бо́га о спасе́ніи ду́шъ на́шихъ.

Сла́ва, гла́съ 4:

Воздержа́тельными болѣ́зньми и страда́ньми му́ченическими укра́шенна, потща́лася еси́ благоугоди́ти Изба́вителю твоему́ и Рачи́телю вожделѣ́нному, Зла́то богому́драя, Ду́хомъ Святы́мъ укрѣпля́ема, низложи́ла еси́ мучи́телей свирѣ́пство, и возсія́ла еси́ я́ко звѣзда́ свѣтлѣ́йшая, позлаще́нна златови́дными блиста́ніи исповѣ́данія твоего́. Тѣ́мже тя́ ны́нѣ ублажа́емъ, и свято́е твое́ дне́сь посѣче́ніе пра́зднуемъ.

И ны́нѣ, богоро́диченъ, гла́съ то́йже:

Пресвята́я Влады́чице Богоро́дице, Твои́хъ рабо́въ моле́нія не пре́зри, но при́зри на лю́ди согрѣши́вшія, и пода́ждь утѣше́ніе всѣ́мъ тре́бующимъ, напа́стьми одержи́мымъ, и вся́ ва́рварская шата́нія низложи́, и на́съ, вѣ́рныхъ рабо́въ Твои́хъ, хва́лящихъ Тя́, спаси́.

На стихо́внѣ стихи́ры, гла́съ 3:

Кро́ткая Влады́ки голуби́це, дѣ́вства свѣ́тлостію позлаще́нна, му́ченическими страда́ньми укра́шенная, не забу́ди на́съ, чту́щихъ съ любо́вію святу́ю па́мять твою́.

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Неви́димою си́лою Христо́вою укрѣпля́ема, противоста́ла еси́ свирѣ́пѣйшимъ мучи́телемъ, и́хже вѣ́ру поруга́ла еси́, тѣ́мъ ны́нѣ въ небе́снѣмъ черто́зѣ водворя́ешися.

Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ.

О, несказа́ннаго и безчеловѣ́чнаго суровства́! Тѣ́ло твое́ лю́тѣ мечи́ отсѣца́ху, ты́ же терпѣливоду́шно вся́ подъя́ла еси́, и я́коже же́ртвенное заколе́ніе принесла́ся еси́ Христу́.

Сла́ва, гла́съ 1. Самогла́сенъ:

Егда́ мучи́тель безбо́жный бра́къ тебѣ́ пону́ди, ты́ же я́вственнѣ отвѣща́ла еси́: а́зъ во Христа́ вѣ́рую и Его́ еди́наго вѣ́мъ Жениха́ своего́; никогда́же отрещи́ся Его́ восхощу́, а́ще бы́сте вы́ да́же усѣкли́ и раздроби́ли все́ тѣ́ло мое́. Сего́ ра́ди вопіе́мъ ти́: страстоте́рпице свята́я, Зла́то богоблаже́нная, моли́ся вы́ну ко Го́споду, сохрани́ти оте́чество на́ше, душа́мъ же на́шимъ дарова́ти ми́ръ и ве́лію ми́лость.

И ны́нѣ, богоро́диченъ, гла́съ то́йже:

Се́ испо́лнися Иса́іино прорече́ніе: [Дѣ́ва бо родила́ еси́ и по рождествѣ́, я́ко пре́жде рождества́, пребыла́ еси́, Бо́гъ бо бѣ́ Рожде́йся, тѣ́мже и естества́ новопресѣче́. Но, о Богома́ти, моле́нія Твои́хъ рабо́въ, въ Твое́мъ хра́мѣ приноси́мая Тебѣ́, не пре́зри, но я́ко Благоутро́бнаго Твои́ма рука́ма нося́щи, на Твоя́ рабы́ умилосе́рдися, и моли́ спасти́ся душа́мъ на́шимъ].

На благослове́ніи хлѣ́бовъ: Тропа́рь, гла́съ 4:

До́блественнымъ твои́мъ терпѣ́ніемъ беззако́нныя мучи́тели ужаси́ла еси́, изво́ливши па́че усе́рдно за Христа́ умре́ти, не́жели сту́дно безъ креста́ жи́ти, великому́ченице Зла́то богоизбра́нная, сме́ртію же твое́ю вѣ́рныя свѣ́томъ озари́шася, мучи́тели же студо́мъ облеко́шася. Мы́ же вѣ́рно вопіе́мъ ти́: моли́ся Христу́ Бо́гу непреста́нно о всѣ́хъ на́съ. [Два́жды.]

И Богоро́дице Дѣ́во... [Еди́ножды.]



НА УТРЕНИ,
По шестопса́лміи, ектенія́ и посе́мъ: Бо́гъ Госпо́дь... Тропа́рь святы́я, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 1:

Воспита́на Бо́жіими словесы́, отъ ю́ности своея́ возлюби́ла еси́ Христа́, любы́ Исто́чника приснотеку́щаго, Его́же ра́ди муче́нія болѣ́зни претерпѣ́ла еси́, огне́мъ опаля́ема, мече́мъ усѣка́ема и раздробля́ема, Зла́то богоблаже́нная, дѣ́въ похвало́. [Два́жды.]

Сла́ва, и ны́нѣ, богоро́диченъ, гла́съ то́йже:

Роди́тельницу Тя́ Бо́жію, па́че сло́ва и ра́зума, я́ко держа́вно заступле́ніе всѣ́хъ оскорбля́емыхъ, Пренепоро́чная, непреста́нно сла́вимъ и ублажа́емъ.

По 2-мъ стихосло́віи сѣда́ленъ, гла́съ 3:

Препоя́савшися си́лою свы́ше, ду́шу твою́ чи́сту соблюла́ еси́, муче́нія болѣ́зни во́льно подъя́ла еси́, украси́лася еси́ порфи́рою изъ крове́й твои́хъ истка́нною, тѣ́мже тя́ Христо́съ, чи́сту до конца́ су́щу, Себѣ́ обручи́, Зла́то богому́драя, дѣви́це досточу́дная. [Два́жды.]

Сла́ва, и ны́нѣ, богоро́диченъ, гла́съ то́йже:

Съ дѣви́ческими ли́ки лику́еши, достохва́льная Зла́то блаже́нная, Богома́тери Дѣ́вѣ вопію́щи: благослове́нъ, Пречи́стая, Пло́дъ чре́ва Твоего́.

Поліеле́й.

Велича́ніе: Велича́емъ тя́, страстоте́рпице Христо́ва Зла́то, и чте́мъ честна́я страда́нія твоя́, я́же за Христа́ претерпѣ́ла еси́.

Псало́мъ избра́нный: Бо́гъ на́мъ прибѣ́жище и си́ла...

По поліеле́и, сѣда́ленъ, гла́съ 4:

Осія́вшися боже́ственнымъ свѣ́томъ добродѣ́телей и дѣ́вства кра́сными добро́тами, украси́лася еси́ вѣнце́мъ муче́нія, вѣ́рою же прилѣпи́вшися вои́стинну Влады́цѣ всѣ́хъ Христу́, и была́ еси́ Ему́ невѣ́ста изря́дная, великому́ченице Зла́то приснопа́мятная. [Два́жды.]

Сла́ва, и ны́нѣ, богоро́диченъ, гла́съ то́йже:

Помраче́ннаго мя́ лѣ́ностію, Всенепоро́чная, покая́нія свѣ́томъ просвѣти́, и уста́ моя́ отве́рзи, да пою́, и велича́ю и сла́влю Тя́, Приснодѣ́во, пренепоро́чную Влады́чицу.

Степе́нна, 1-й антифо́нъ 4-го гла́са. Проки́менъ, гла́съ 4: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Таже: Вся́кое дыха́ніе... Ева́нгеліе Матѳе́я, зача́ло 62.

По 50-мъ псалмѣ́ стихи́ра, гла́съ 6:

Уязвля́ема любо́вію Христо́вою, къ Нему́же, возжелѣ́вши усе́рдно, притекла́ еси́, Иже и подаде́ тебѣ́ крѣ́пость, свирѣ́пѣйшая муче́нія съ ле́гкостію претерпѣ́ти; тѣ́мъ тебе́ ни красота́ сла́дости, ни цвѣ́тъ добро́ты, ниже́ мольбы́ со слеза́ми роди́телей и сро́дниковъ твои́хъ, отъ Христа́ отлучи́ти возмого́ша; Его́же возлюби́ла еси́, и Ему́же уневѣ́стилася еси́, Того́ моли́, Зла́то великому́ченице, спасти́ ду́ши на́ша.

Кано́нъ Богоро́дицы со ирмосо́мъ на 6, и святы́я на 8.

Кано́нъ великому́ченицы, гла́съ 4, его́же краегране́сіе: Кро́ткую а́гницу Зла́ту воспою́. Въ богоро́дичнахъ же и въ сѣда́льнѣ: Про́та Ми́рко.

Пѣ́снь 1.

Ирмо́съ: Пои́мъ Го́сподеви, пресла́вно погрузи́вшему фарао́на въ мо́ри, пѣ́снь побѣ́дную, я́ко просла́вися.

Ка́пли му́дрости исто́чникъ благода́тно точа́щій, низпосли́ ми, Бо́же, да возмогу́ досто́йно воспѣ́ти страстоно́сицу Твою́ Зла́ту всезлату́ю.

Ра́йскія пи́щи изгна́на бы́сть прама́ти, хитростьми́ льсти́ваго прельсти́вшися пе́рвѣе, Зла́та поруга́вшися сему́, въ небе́снѣмъ черто́зѣ ны́нѣ водворя́ется.

Окая́нный мучи́тель предае́тъ на сме́рть Зла́ту достохва́льную, но Человѣколю́бецъ Христо́съ дарова́ е́й живо́тъ вѣ́чный и вѣне́цъ нетлѣ́нный.

Богоро́диченъ: По́мощь Твою́ пода́ждь ми́, недосто́йному рабу́ Твоему́, Дѣ́во Влады́чице, и вразуми́вши боже́ственное сіе́ начина́ніе, сотвори́ отъ недосто́йнаго досто́йная.

Катава́сія: Отве́рзу уста́ моя́...

Пѣ́снь 3.

Ирмо́съ: Утвержде́ніе на Тя́ надѣ́ющихся, утверди́, Го́споди, въ вѣ́рѣ Правосла́внѣй Твое́й, утверди́ на́съ, я́ко Человѣколю́бецъ.

Тве́рдымъ умо́мъ до́блественно ра́ны претерпѣ́ла еси́, сло́вомъ же богому́дрымъ безбо́жныхъ ле́сть изобличи́ла еси́, Зла́то свесла́вная.

Кресто́мъ Христо́вымъ вооруже́на, укрѣпи́лася еси́ ду́хомъ и низложи́ла еси́ свирѣ́пство мучи́тельское, Зла́то всехва́льная.

Украси́лася еси́ порфи́рою, изъ крове́й твои́хъ истка́нною, Зла́то многострада́льная, претерпѣ́вши сѣче́ніе и раздробле́ніе всего́ тѣ́ла.

Богоро́диченъ: Ро́ждши всѣ́хъ Созда́теля, Дѣ́во, а́нгеловъ честнѣ́йши яви́лася еси́, тѣ́мъ молю́ Тя, Чи́стая: освяти́ у́мъ мо́й и се́рдце просвѣти́, о́блакъ страсте́й отгоня́щи.

Сѣда́ленъ, гла́съ 2:

Облакъ страсте́й отри́нула еси́, тлѣ́нная же и вре́менная забве́ніемъ премину́ла еси́, страда́льчески льсти́ваго посрами́ла еси́, тѣ́мже и къ Зижди́телю возшла́ еси́ испещре́нна свѣ́тло, я́ко Того́ послу́шавши, Зла́то богому́драя, Его́же моли́, согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ, гла́съ то́йже:

Ты́ две́рь Свѣ́та всѣ́мъ яви́лася еси́, Всенепоро́чная, су́щимъ во тмѣ́ свѣ́тъ неопи́санный, опи́санъ пло́тію Христа́, Праведнаго Со́лнца, возблиста́вши, Его́же ны́нѣ луча́ми Зла́та украси́вшися, му́ченикъ сла́ву притяжа́.

Пѣ́снь 4.

Ирмо́съ: Услы́шахъ, Бо́же, слу́хъ Тво́й и убоя́хся, разумѣ́хъ дѣла́ Твоя́ и ужасо́хся, Го́споди, я́ко Твоего́ хвале́нія испо́лнь земля́.

Юностныя сла́дости не услади́ша тя́, Зла́то всечестна́я, ниже́ добро́ты цвѣ́тъ, Христу́ уневѣ́стившуюся, до́брая дѣ́во.

Агница Христо́ва была́ еси́, Его́ еди́наго возлюби́ла еси́, Ему́же и себе́ саму́ принесла́ еси́, я́ко же́ртву чи́стую.

Гото́ва е́смь вся́ му́ки сла́дцѣ подъя́ти за любо́вь Христа́ моего́, — взыва́ла еси́ къ мучи́телемъ, Зла́то всехва́льная.

Богоро́диченъ: Агнца, и Па́стыря и Изба́вителя ро́ждшая, Пречи́стая, Сего́ моли́ при́сно изба́вити отъ бѣ́дъ рабы́ Твоя́, вѣ́рою и́мя Твое́ призыва́ющія, ра́звѣ бо Тебе́, Влады́чице, ино́го заступле́нія не и́мамы.

Пѣ́снь 5.

Ирмо́съ: Стяжа́вый ны́, избра́нныя лю́ди, кро́вію Твое́ю, Го́споди, Тво́й ми́ръ да́ждь на́мъ, во единомы́сліи сохраня́я ста́до Твое́.

Наноша́ше ти́ мучи́тель кова́рный свирѣ́пѣйшая муче́нія, ты́ же, му́ченице, му́жественнѣ вся́ терпѣ́ла еси́ за любо́вь Христа́ твоего́.

Игра́етъ дне́сь село́ Сла́тина, торжеству́етъ и вся́ страна́ Ме́гленская, тебе́ воспита́вшая, и крася́тся па́мятію твое́ю честно́ю, Зла́то многострада́льная.

Царю́ си́лъ дне́сь свѣ́тло предстои́ши, одѣ́яна въ багряни́цу, отъ крове́й твои́хъ, Зла́то, обагре́нную, и счисля́ешися небе́снымъ а́нгеломъ; тѣ́мъ тя́ мо́лимъ, моли́ Бо́га о на́съ.

Богоро́диченъ: Мо́лимъ Тя́ прилѣ́жно, Всеми́лостивая Влады́чице, Ро́ждшагося изъ Тебе́ моли́, изба́вити ны́ лю́тыя ско́рби и ва́рварскаго преще́нія, и вся́каго навѣ́та вра́жія.

Пѣ́снь 6.

Ирмо́съ: Якоже проро́ка Іо́ну отъ ки́та изба́вилъ еси́, Христе́ Бо́же, и мене́ изъ глубины́ прегрѣше́ній возведи́ и спаси́ мя, еди́не Человѣколю́бче.

Утвержде́на на ка́мени за́повѣдей Христо́выхъ, ополче́ніе злочести́вое побѣди́ла еси́, вся́ хи́трости стропти́ваго попра́ла еси́, сего́ ра́ди ны́нѣ съ твои́мъ Женихо́мъ Христо́мъ ца́рствуеши свѣ́тло въ черто́зѣхъ неизрече́нныхъ.

Земны́я пи́щи наслажде́ніе презрѣ́вши, небе́сныя трапе́зы сподо́билася еси́, Зла́то всесла́вная, мече́мъ бо усѣче́нна бы́вши, возшла́ еси́ съ му́дрыми дѣ́вами къ Жениху́ Христу́.

Лише́нія удо́въ, огне́мъ опале́нія и вся́ болѣ́зни муче́нія до́блественно терпѣ́ла еси́, тѣ́мъ и мзду́ воспрія́ла еси́, Зла́то досточу́дная, му́ченикъ сла́вою обогати́вшися.

Богоро́диченъ: Иже свѣ́тлыми дѣ́вства заря́ми, свѣтови́дно я́ко кри́нъ сія́я, одушевле́нный Влады́ки черто́гъ, посредѣ́ терно́внаго смѣше́нія, Пречи́стая и Боголѣ́пная, Богоро́дица Дѣ́ва сла́вится.

Конда́къ, гла́съ 1:

Стра́шно и пресла́вно сопротивле́ніе твое́, и́мже вся́ удиви́ла еси́, и безчеловѣ́чныя мучи́тели побѣди́ла еси́, и я́ко боже́ственная Влады́ки голуби́ца, златови́дными кри́лы исповѣ́данія твоего́ Христу́ возлетѣ́ла еси́, Зла́то богому́драя.

Икосъ:

Блиста́ющи свѣтови́дными мо́лніями, зако́нно Христу́ уневѣ́стившися, муче́нія тече́ніе сконча́ла еси́, скве́рную вѣ́ру ага́рянскую презрѣ́ла еси́, укрѣпля́ема Боже́ственными уче́ніи упра́вилася еси́ я́ко избра́нна, тща́щися ко Влады́цѣ и Бо́гу, Ему́же и была́ еси́ же́ртва благово́нная, и окрили́вшися златови́дными кри́лы исповѣ́данія твоего́, Христу́ возлетѣ́ла еси́, Зла́то богому́драя.

Пѣ́снь 7.

Ирмо́съ: Въ пещи́ о́троки неопа́льны соблю́дшаго и о́гнь угаси́вшаго, воспое́мъ, глаго́люще: благослове́нъ еси́, Бо́же оте́цъ на́шихъ.

Ада́ма и Евы паде́ніе испра́вила еси́, врага́ низложи́вши си́лу, му́жескимъ ра́зумомъ Христа́ Бо́га всѣ́хъ я́сно исповѣ́дала еси́, и сопротивоборца́ тве́рдымъ сло́вомъ посрами́ла еси́, ра́достно пою́щи: благослове́нъ еси́, Бо́же оте́цъ на́шихъ.

Терпѣ́ніе боже́ственное показа́вши, му́ченице златоимени́тая, же́нскую же не́мощь превозше́дши усе́рдіемъ крѣ́пкимъ, мучи́телей де́рзости низложи́ла еси́, воспѣва́ющи: благослове́нъ еси́, Бо́же оте́цъ на́шихъ.

Укра́шена добро́тою твоего́ муче́нія, Зла́то всехва́льная, дѣ́вства же заре́ю сія́ющи, твоему́ Жениху́ Христу́ предстои́ши свѣ́тло, ве́село пою́щи: благослове́нъ еси́, Бо́же оте́цъ на́шихъ.

Богоро́диченъ: Ра́дость Тебѣ́ принося́ отъ небе́съ я́вѣ Гавріи́лъ, Чи́стая, благовѣсти́ ре́къ: Бо́гъ изъ Тебе́ съ пло́тію пріи́детъ, на спасе́ніе пою́щимъ Ти́ съ любо́вію: благослове́на Ты́ въ жена́хъ, и благослове́нъ Пло́дъ чре́ва Твоего́.

Пѣ́снь 8.

Ирмо́съ: Вся́ческая нося́й непристу́пною Твое́ю си́лою, Христе́, преподо́бныя Твоя́ о́троки въ пла́мени ороси́лъ еси́, зову́щія: благослови́те, вся́ дѣла́ Госпо́дня, Го́спода.

Ви́дя тя́ Бо́гъ всѣ́хъ Христо́съ, вѣ́ры ра́ди и пра́вды я́вѣ во́инствующу, мужеподо́бнымъ ра́зумомъ и крѣ́постію испо́лни тя́, и вѣнце́мъ побѣ́днымъ увязе́ тя, Зла́то, зову́щую: благослови́те, вся́ дѣла́ Госпо́дня, Го́спода.

Ору́жіемъ Креста́ огражда́ема, любо́вію же Христо́вою распаля́ема, принесла́ еси́ кро́вныя пото́ки Влады́цѣ Христу́, и возшла́ еси́ въ черто́гъ небе́сный, вопію́щи: благослови́те, вся́ дѣла́ Госпо́дня, Го́спода.

Соблюла́ еси́ вѣ́ру непоро́чную да́же до конца́, Зла́то всечестна́я, сего́ ра́ди изплете́ся верху́ твоему́ прекра́сенъ вѣне́цъ пра́вда; ты́ бо до конца́ взыва́ла еси́: благослови́те, вся́ дѣла́ Госпо́дня, Го́спода.

Богоро́диченъ: Кля́тву зако́на и сме́рти осужде́ніе разруши́ла еси́, Чи́стая, ро́ждши Христа́, разори́теля сме́рти, и источи́вшаго всѣ́мъ благослове́ніе.

Пѣ́снь 9.

Ирмо́съ: Тя́, пресла́вную Невѣ́сту и Всесвяту́ю Богоро́дицу, Зижди́теля ро́ждшую неви́димыхъ же и всѣ́хъ ви́димыхъ, пѣ́сньми велича́емъ.

Посрами́вши мучи́телей безбо́жное шата́ніе, крове́й же твои́хъ тече́ніемъ злонача́льнаго змíя потопи́ла еси́, и побѣдоно́сно къ небеси́ возлетѣ́ла еси́, Зла́то приснопа́мятная.

Оде́ждею отъ крове́й твои́хъ укра́шена, Влады́чнею багряни́цею одѣ́яна, возмогла́ еси́ разруши́ти вра́жіе свирѣ́пство, Зла́то прехва́льная, укрѣ́пльшися Кресто́мъ Влады́чнимъ и благода́тію.

Юность твою́ чи́сту и кро́вь твою́ че́стну, рука́ми пребеззако́нныхъ мучи́телей поже́рла еси́, и я́ко пло́дъ сладча́йшій Бо́гу принесла́ еси́.

Богоро́диченъ: Облакъ ле́гкій еси́, Богоро́дице Чи́стая, на не́мже сѣдя́, пріи́де во ме́гленскую Сла́тину Госпо́дь Вседержи́тель, и свѣти́льникъ терпѣливоду́шну Зла́ту содѣ́ла.

Свѣти́ленъ:

Свѣтови́дна яви́лася еси́, великому́ченице, омраче́ніе безбо́жныхъ мучи́телей отри́нула еси́, тѣ́мже по сконча́ніи вели́каго страда́нія твоего́, вели́кое наслѣ́діе прія́ла еси́ — сла́ву ника́коже мимоходя́щую, Зла́то пресла́вная. [Два́жды.]

Сла́ва, и ны́нѣ, богоро́диченъ:

Свѣ́тлыми дѣ́вства заря́ми свѣтови́дно сія́еши, я́ко кри́нъ посреди́ терно́внаго смуще́нія, Дѣ́во Ма́ти Всесвята́я, тѣ́мъ Тебѣ́, Благо́й, молю́ся: да́ждь ми́ согрѣше́ній проще́ніе, и душесла́дости испо́лни мя́.

На хвали́техъ стихи́ры на 4, гла́съ 4:

Сѣя́ющи дѣ́вства заре́ю, и любо́вію Христо́вою услади́вшися, востекла́ еси́ къ Нему́ же вожделѣ́ла еси́, Спа́су Христу́, Зижди́телю всѣ́хъ и Бо́гу, муче́нія добро́тою укра́шена, Зла́то великоимени́тая, тѣ́мъ ны́нѣ предстои́ши Ему́, я́ко Жениху́ твоему́.

Возненави́дѣвши злочести́выхъ ту́рковъ пре́лесть, презрѣ́ла еси́ ласка́нія и́хъ, еди́наго же Бо́га и Го́спода Іису́са Христа́ де́рзостно исповѣ́дала еси́, мучи́телей злоче́стіе низложи́ла еси́, показа́вши терпѣ́ніе боже́ственное, Зла́то всехва́льная.

Же́нскую не́мощь превозше́дши, крѣ́пкимъ свои́мъ усе́рдіемъ Бо́га имѣ́ла еси́ помо́щника во твои́хъ страда́ніихъ, и́миже яви́лася еси́ добродѣ́тели сто́лпъ непрекло́ненъ, жили́ще благоче́стія и му́жества, и прія́телище цѣлому́дрія, Зла́то всеблаже́нная.

Пострада́вши до́блѣ, Зла́то досточу́дная, мучи́телей де́рзость низложи́ла еси́, непобѣди́мое иму́щи посо́біе — Христа́ твоего́ си́лу содѣ́йствующу тебѣ́, Иже отве́рзъ две́ри небе́сныя, ду́шу твою́ прія́тъ всенепоро́чную, чи́стаго зла́та тезоимени́тая; тѣ́мже тя́ вси́ ублажа́емъ.

Сла́ва, гла́съ 5:

Пріиди́те дне́сь, вси́ христоно́сцы, похва́льными добро́тами воспои́мъ богому́друю Зла́ту Ме́гленскую, я́же ни копіе́, ни щи́тъ пріи́мши, но честны́й Кре́стъ Христо́въ, немумнѣ́нною вѣ́рою къ боре́ніемъ возше́дъ, зла́ты же крилѣ́ иму́щи, сія́ющія заре́ю Ду́ха, возлетѣ́ и въ небе́сныхъ Боже́ственныхъ жили́щахъ вои́стинну всели́ся. Тѣ́мже со умиле́ніемъ воскли́кнемъ: помина́й на́съ, страстоте́рпице всехва́льная, соверша́ющихъ вѣ́рою па́мять твою́ святу́ю.

И ны́нѣ, богоро́диченъ, гла́съ то́йже:

Притеце́мъ, вѣ́рніи, о́бразу Бо́жія Ма́тере, и вѣ́рно моля́щеся, возопіе́мъ е́й: поми́луй, Влады́чице, Твое́ достоя́ніе, и отъ всѣ́хъ вра́гъ изба́ви, уго́дницы Твоея́ Зла́ты моли́твами.

Славосло́віе вели́кое. Тропа́рь святы́я. Сла́ва, и ны́нѣ, богоро́диченъ: Еже отъ вѣ́ка... Ектеніи́ и отпу́стъ.



НА ЛИТУРГІИ,

Блаже́нна отъ кано́на святы́я, пѣ́снь 3-я и 6-я. Проки́менъ, гла́съ 4: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Кори́нѳяномъ, зача́ло 181. Аллилу́ія, гла́съ 1: Терпя́ потерпѣ́хъ Го́спода, и вня́тъ ми́ и услы́ша моли́тву мою́. [Сти́хъ: Поста́ви на ка́мени но́зѣ мои́ и испра́ви стопы́ моя́]. Ева́нгеліе отъ Ма́рка, зача́ло 21. Прича́стенъ: Ра́дуйтеся пра́ведніи о Го́сподѣ, пра́вымъ подоба́етъ похвала́.

Источникъ: Србљак. — Београд: Издаjе Свети Архиjереjски Синод Српске Православне Цркве, 1986. — С. 69-78.

/ Къ оглавленію раздѣла /


Наверхъ / Къ титульной страницѣ

0