Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 23 iюля 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 13-й де́нь.
Слу́жба Пресвятѣ́й Богоро́дицѣ, въ че́сть и па́мять явле́нія чудотво́рныя Ея́ ико́ны, нарица́емыя Иверскія.

НА МАЛѢЙ ВЕЧЕРНИ,
На Го́споди, воззва́хъ: стихи́ры [на 4], гла́съ 1:

Пріиди́те, вси́ лю́діе,* вѣ́рою соше́дшеся,* просла́вимъ Влады́чицу Богоро́дицу,* Засту́пницу ро́да на́шего,* и обстоя́ще честну́ю ико́ну,* любе́зно облобыза́имъ ю́, глаго́люще:* ра́дуйся, Пречи́стая Дѣ́во,* ра́дуйся, Ма́ти Го́спода Вы́шняго,* ра́дуйся, покро́ве и спасе́ніе ду́шъ на́шихъ.

Ра́дуйся, Аѳо́нская горо́,* сла́ва бо Госпо́дня на тебѣ́ возсія́.* Яко бо многосвѣ́тлая звѣзда́,* пріи́де отъ восто́ка къ за́паду,* въ столпѣ́ о́гненнѣ яви́ся* ико́на Богома́тере,* озаря́ющи Аѳо́нъ свои́мъ прише́ствіемъ.

Якоже Моисе́ю въ Сина́и купина́ яви́ся иногда́,* огне́мъ у́бо опаля́ема, и невреди́ма пребы́вши,* та́ко и Всенепоро́чныя свяще́нный о́бразъ* огне́мъ одѣва́ется и неопали́мь пребыва́етъ,* освяща́я взира́ющій съ вѣ́рою на него́.

Гряди́те ра́достно,* и́ноковъ аѳо́нскихъ ли́цы,* почерпи́те благода́ть неоску́дную* отъ ико́ны Богома́тере,* огне́мъ блиста́ющіяся,* и пріими́те ю́ съ вѣ́рою и любо́вію:* я́ко во стѣ́ну и огражде́ніе* оби́телемъ ва́шимъ пресла́вно да́руется,* да покры́етъ ва́съ* отъ всѣ́хъ вра́гъ ви́димыхъ и неви́димыхъ.

Сла́ва, и ны́нѣ, гла́съ 5:

Пріиди́те, лю́діе, чудотво́рному и всечестно́му поклони́мся Бо́жія Ма́тере о́бразу, его́же дарова́ оби́тели Иверстѣй я́ко стра́жа неусы́пна и необори́ма: огражда́етъ бо святу́ю оби́тель и вся́ живу́щія на Аѳо́нѣ свои́мъ покро́вомъ и да́руетъ оби́льныя да́ры исцѣле́ній отъ неистощи́маго исто́чника святы́я ико́ны всѣ́мъ, ту́ю почита́ющимъ. Тѣ́мже воспѣва́юще, воззове́мъ Первообра́знѣй: ра́дуйся, мíрови по́моще и утѣше́ніе ду́шъ на́шихъ.

Проки́менъ дне́.

На стихо́внѣ стихи́ры, гла́съ 2:

Вмѣсти́лище чи́стое Свѣ́та Пречи́стаго,* Богоро́дице,* сла́вимъ Тя́ и пое́мъ, раби́ Твои́,* я́ко явле́ніемъ пречестны́я Твоея́ ико́ны* на́съ освяща́еши.

Сти́хъ: Воскресни́, Го́споди, въ поко́й Тво́й,* Ты́ и киво́тъ святы́ни Твоея́.

Сла́ва Тебѣ́, Христе́ Царю́,* сла́ва мно́гому о на́съ милосе́рдію,* и́бо дарова́лъ еси́ ико́ну Твоея́ Пречи́стыя Ма́тере,* благода́ти то́ки на́мъ неоску́дно излива́ющую.

Сти́хъ: Кля́тся Госпо́дь Дави́ду и́стиною* и не отве́ржется ея́.

Дне́сь, благовѣ́рніи лю́діе,* свѣ́тло пра́зднуемъ,* осѣня́еми ико́ны Богома́тере прише́ствіемъ,* съ вѣ́рою пріе́млюще въ не́й стра́жа на́мъ неотсту́пна,* и возопіи́мъ Богоро́дицѣ:* покры́й на́съ отъ вся́каго зла́* и спаси́ ду́ши на́ша.

Сла́ва, и ны́нѣ, гла́съ 6:

Притеце́мъ къ ти́хому приста́нищу и Засту́пницѣ ро́да на́шего, Дѣ́вѣ Марíи, поклони́мся честно́му Ея́ а́нгелы почита́емому о́бразу, уми́льно зову́ще: при́зри, Благосе́рдая Ма́ти, на лю́тыя ско́рби, на́съ обдержа́щія, и исцѣли́ болѣ́зни ду́шъ на́шихъ.

Тропа́рь Богоро́дицѣ, гла́съ 1:

Де́рзость ненави́дящихъ о́бразъ Госпо́день и держа́ва нечести́выхъ безбо́жно въ Нике́ю пріи́де, и по́сланніи безчеловѣ́чно вдови́цу, благоче́стно чту́щую ико́ну Богома́тере, истязу́ютъ. Но та́я но́щію съ сы́номъ ико́ну въ мо́ре пусти́, вопію́щи: сла́ва Тебѣ́, Чи́стая, я́ко непроходи́мое мо́ре плещи́ своя́ подаде́; сла́ва правоше́ствію Твоему́, еди́на Нетлѣ́нная.

Сла́ва, и ны́нѣ, и́нъ тропа́рь, гла́съ то́йже:

Отъ святы́я ико́ны Твоея́, о Влады́чице Богоро́дице, исцѣле́нія и цѣльбы́ подаю́тся оби́льно, съ вѣ́рою и любо́вію приходя́щимъ къ не́й. Та́ко и мою́ не́мощь посѣти́ и ду́шу мою́ поми́луй, Блага́я, и тѣ́ло исцѣли́ благода́тію Твое́ю, Пречи́стая.

Ектенія́ и отпу́стъ.



НА ВЕЛИЦѢЙ ВЕЧЕРНИ,
На Го́споди, воззва́хъ: стихи́ры на 8, гла́съ 5:

Красу́йся, Аѳо́не,* ра́дуйся и весели́ся, оби́тель Иверская:* се́ бо гряде́тъ чу́дная ико́на Богома́тере,* а́нгелы по мо́рю дориноси́ма,* свѣ́томъ неизрече́ннымъ сія́ющи,* мра́къ скорбе́й и печа́лей прогоня́ющи* и всѣ́хъ луча́ми своея́ ми́лости озаря́ющи.

Тебѣ́ припа́даютъ, Госпоже́,* и́ноковъ ли́цы и по́стниковъ сосло́вія,* и любе́зно взира́юще на святу́ю ико́ну Твою́, вопію́тъ Ти́:* пріиди́ къ на́мъ, Блага́я Ма́ти,* уще́дри чту́щія Тя́* и да́руй на́мъ святы́й о́бразъ Тво́й* въ зало́гъ ми́лости и спасе́нія.

О, пресла́внаго чудесе́!* Якоже бо Моисе́ю въ Сина́и купина́ яви́ся иногда́,* огне́мъ у́бо опаля́ема и невреди́ма пребы́вши,* си́це и Всенепоро́чныя Богороди́тельницы о́бразъ* огне́мъ одѣва́ется,* но неопали́мь пребыва́етъ,* просвѣща́я и на́съ, су́щихъ во мра́цѣ,* и невреди́мы въ пещи́ искуше́ній и бѣ́дъ сохраня́я.

Гряди́, Гавріи́ле,* сни́ди немо́кренными нога́ми въ мо́ре* и пріими́ во объя́тія ико́ну Богома́тере* на ра́дость Аѳо́ну,* на огражде́ніе оби́тели Иверскія* и всѣ́мъ христіа́номъ во утѣше́ніе.

Богоро́дице Дѣ́во, держа́вная Помо́щнице,* ны́нѣ оби́тель Иверская о Тебѣ́ хва́лится и весели́тся,* иму́щи Тя́ Засту́пницу непосты́дную и стѣ́ну неруши́му,* основа́ніе непоколеби́мо, стра́жа неусы́пна.* Не преста́й, Госпоже́, Твои́ми моли́твами* и всегда́ избавля́ти оби́тель Твою́* и вся́ лю́ди отъ всѣ́хъ напа́стей.

Пода́ждь утѣше́ніе рабо́мъ Твои́мъ, Чи́стая,* напа́стьми одержи́мымъ,* и ро́гъ вѣ́рныхъ вознеси́, Богороди́тельнице,* спаси́ моли́твами Твои́ми оби́тель сію́* и гра́ды правосла́вныя,* укрѣпи́ на враги́ сла́вящаго Тя́ Импера́тора,* и вся́ вѣ́рныя рабы́,* хва́лящія Тя́, защити́.

Пречи́стая Твоя́ ико́на, Богоро́дице Дѣ́во,* врачевство́ духо́вное всего́ мíра яви́ся:* къ не́йже прибѣга́емъ, Тебѣ́ покланя́ющеся,* почита́емъ и лобыза́емъ ю́* и исцѣле́ній благода́ть получа́емъ,* неду́говъ душе́вныхъ и тѣле́сныхъ страсте́й* Твои́ми моли́твами свобожда́ющеся.

Яко порфи́рою ца́рскою и ви́ссомъ,* ико́ною Твое́ю и Твоего́ Сы́на, Богоро́дице,* оби́тель Иверская украси́вшися,* дне́сь сія́етъ чудесы́,* благода́тію Свята́го Ду́ха* па́че свѣ́та со́лнечнаго блиста́ющися:* въ то́й бо на боля́щихъ и неду́жныхъ* исцѣле́нія излива́ются* и всѣ́мъ да́руется бога́тая ми́лость.

Сла́ва, и ны́нѣ, гла́съ 8:

О, Ма́ти Блага́я, Госпоже́ Богоро́дице Дѣ́во! Не отри́ни на́съ, смире́нныхъ ра́бъ Твои́хъ, предъ пречи́стою Твое́ю ико́ною недосто́йныя моли́твы принося́щихъ, бу́ди те́плая хода́таица о на́съ, грѣ́шныхъ, къ Сы́ну Твоему́, изба́ви на́съ отъ всѣ́хъ бѣ́дъ и искуше́ній, да спаса́еми Тобо́ю, вы́ну вопіе́мъ Ти́: ра́дуйся, Блага́я Врата́рнице, две́ри ра́йскія на́мъ отверза́ющая.

Вхо́дъ. Проки́менъ дне́ и чте́нія.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Исхо́да чте́ніе. [Глава́ 3.]

Моисе́й бя́ше пасы́й о́вцы Іоѳо́ра, те́стя своего́, свяще́нника Мадіа́мска, и гна́ше о́вцы въ пусты́ню; и пріи́де въ го́ру Бо́жію Хори́въ. Яви́ся же ему́ Ангелъ Госпо́день въ пла́мени о́гненнѣ изъ купины́; и ви́дитъ, я́ко купина́ гори́тъ огне́мъ, купина́ же не сгара́ше. Рече́ же Мои́сей: мимоше́дъ, уви́жду видѣ́ніе вели́кое сіе́, я́ко не сгара́етъ купина́. Егда́ же ви́дѣ Госпо́дь, я́ко приступа́етъ ви́дѣти, воззва́ его́ Госпо́дь изъ купины́, глаго́ля: Моисе́е, Моисе́е. Онъ же рече́: что́ е́сть, Го́споди? Онъ же рече́: не приближа́йся сѣ́мо; изу́й сапоги́ отъ но́гъ твои́хъ: мѣ́сто бо, на не́мже ты́ стои́ши, земля́ свята́ е́сть.

Исхо́да чте́ніе. [Глава́ 13.]

Обведе́ Бо́гъ лю́ди путе́мъ, и́же въ пусты́ни, къ Чермно́му мо́рю: пя́таго же ро́да изыдо́ша сы́нове Изра́илевы отъ земли́ Еги́петскія. И взя́ Моисе́й ко́сти Іо́сифовы съ собо́ю, кля́твою бо закля́ Іо́сифъ сы́ны Изра́илевы, глаго́ля: присѣще́ніемъ присѣти́тъ ва́съ Госпо́дь, и изнесе́те отсю́ду ко́сти моя́ съ собо́ю. Воздви́гшеся же сы́нове Изра́илевы отъ Сокхо́ѳа, ополчи́шася во Оѳо́мѣ при пусты́ни. Бо́гъ же вожда́ше и́хъ: въ де́нь у́бо столпо́мъ о́блачнымъ показа́ти и́мъ пу́ть, но́щію же столпо́мъ о́гненнымъ свѣти́ти и́мъ. И не оскудѣ́ сто́лпъ о́блачный во дни́, и сто́лпъ о́гненный но́щію предъ всѣ́ми людьми́.

На литíи стихи́ры, гла́съ 8:

Пріиди́те, празднолю́бцы и по́стниковъ сосло́віе, вѣ́рою соше́дшеся, хвале́бныя пѣ́сни принесе́мъ Марíи Приснодѣ́вѣ, дне́сь бо наста́ свѣ́тлое торжество́, явле́ніе честны́я Ея́ ико́ны Иверскія, ю́же обстоя́ще со стра́хомъ и любо́вію, воспои́мъ Богоро́дице: ра́дуйся, неисповѣди́мая ра́досте всѣ́мъ; ра́дуйся, о́бразомъ Твои́мъ святы́мъ на́съ просвѣща́ющая; ра́дуйся, всѣ́мъ похвало́ и утвержде́ніе; ра́дуйся, спасе́ніе ду́шъ на́шихъ.

Что́ Тя́ нарече́мъ, Богоро́дице Дѣ́во: сто́лпъ ли о́гненный, къ вѣ́чному наслѣ́дію на́съ веду́щій? Стѣ́ну ли крѣ́пкую, я́ко правосла́вный ро́дъ защища́еши? Стра́жа ли неусы́пна, я́ко оби́тель Твою́ охраня́еши и спаса́еши? Тѣ́мже отъ належа́щихъ бѣ́дъ избавля́еми, возопіи́мъ Влады́чицѣ: ра́дуйся, благи́хъ вино́вная, извѣ́стное христіа́нъ упова́ніе.

Сла́ва, и ны́нѣ, гла́съ 5:

Ра́дуется Аѳо́нъ, ликовству́етъ оби́тель Иверская, торжеству́етъ и вся́ страна́ Россíйская: Бо́жія бо Ма́терь чудотво́рнымъ Свои́мъ о́бразомъ ми́лостивно на́съ посѣти́ла е́сть, да́руетъ же на́мъ въ ну́ждахъ по́мощь, въ ско́рбехъ утѣше́ніе, въ болѣ́знехъ исцѣле́ніе, въ бѣда́хъ избавле́ніе и всѣ́мъ вѣ́рнымъ ве́лію ми́лость.

На стихо́внѣ стихи́ры, гла́съ 4:

Сла́вное ико́ны Твоея́ явле́ніе,* Богоро́дице Пренепоро́чная, славосло́вимъ дне́сь* и Твое́ заступле́ніе на́мъ пра́зднуемъ,* я́ко бо Ма́ти су́щи Живота́,* мо́лиши о на́съ Христа́ Бо́га на́шего,* на Тя́ крѣ́пкую наде́жду возложи́вшихъ,* Путеводи́тельнице нело́жная на́шего спасе́нія.

Сти́хъ: Помяну́ и́мя Твое́* во вся́комъ ро́дѣ и ро́дѣ.

Отложи́мъ, вѣ́рніи, печа́ль:* се́ бо втора́я неопали́мая купина́, ико́на Богома́тере,* и́ноки аѳо́нскими зри́мая,* на очище́ніе грѣ́шныхъ явля́ется.

Сти́хъ: Слы́ши, Дщи́, и ви́ждь,* и приклони́ у́хо Твое́.

Назна́менующи во стра́нствіи жите́йстемъ Твое́ на́мъ води́тельство, явля́ешися, Богома́ти, въ столпѣ́ о́гненнѣ,* да на́съ, блужда́ющихъ,* путево́диши къ вѣ́чнымъ оби́телемъ.

Сла́ва, и ны́нѣ, гла́съ 5:

Пріиди́те, вси́ мона́си и мірстíи, просла́вимъ Пречи́стую Дѣ́ву Богоро́дицу: дне́сь бо, ра́ди свяще́нныя ико́ны, въ мо́ри путіе́ Ея́ и стези́ Ея́ въ вода́хъ мно́гихъ, отъ Нике́и бо въ столпѣ́ о́гненнѣ по́нтъ морскíй ко Аѳо́ну прехо́дитъ и да́ръ прише́ствіемъ Свои́мъ вѣ́рнымъ подае́тъ. Мы́ же, просвѣща́еми луча́ми благода́ти, Хода́таицу спасе́нія на́шего ублажа́емъ.


НА УТРЕНИ,
По 1-й каѳи́смѣ сѣда́ленъ, гла́съ 1:

Пресвѣ́тлаго зра́ка Твоего́ явле́ніе ра́дость прино́ситъ всѣ́мъ вѣ́рующимъ и оби́тели Иверстѣй да́руетъ стра́жа неусы́пна и отъ бѣ́дъ избавле́ніе. Тѣ́мже пое́мъ Ти́, Пречи́стая: покрыва́й на́съ при́сно Покро́вомъ Твои́мъ.

Сла́ва, и ны́нѣ, гла́съ 8:

Се́й де́нь Госпо́день, ра́дуйтеся, лю́діе, се́ бо свѣтоно́сный о́блакъ на возду́сѣ чу́дно простира́ется, и столпо́мъ о́гненнымъ предъ Аѳо́номъ явля́ется, Еди́на и Еди́наго на рука́хъ Ма́тернихъ держа́щи Христа́, Зижди́теля вселе́нныя, во спасе́ніе ду́шъ на́шихъ.

По 2-й каѳи́смѣ сѣда́ленъ, гла́съ 3:

Веселя́тся дне́сь свѣ́тло Аѳо́на па́ствы, пѣ́сней мно́жество слага́ютъ, любо́вію Непоро́чную почита́юще, вели́чествомъ благода́ти крася́щеся, ю́же прія́ша прише́ствіемъ ико́ны Всенопоро́чныя Отрокови́цы, заря́ми Боговѣ́дѣнія благоче́стно пою́щихъ озаря́ющія.

Сла́ва, и ны́нѣ, гла́съ 5:

Чу́до пресла́вное зри́тся дне́сь: въ вода́хъ бо огнено́сная Богоотрокови́цы ико́на показу́ется, и зна́менія лучи́ испуща́етъ, и пребыва́ніе по́стниковъ чу́домъ спаса́етъ. Сего́ ра́ди благода́рственно вопіе́мъ: ра́дуйся, Благода́тная.

Велича́ніе:

Велича́емъ Тя́, Пресвята́я Дѣ́во, Богоизбра́нная Отрокови́це, и чте́мъ о́бразъ Тво́й святы́й, и́мже то́чиши исцѣле́нія всѣ́мъ, съ вѣ́рою притека́ющимъ.

Псало́мъ избра́нный: Помяни́, Го́споди, Дави́да и всю́ кро́тость его́...

По поліеле́и сѣда́ленъ, гла́съ 8:

Вели́чіе Твое́ кто́ исповѣ́сть, Богоро́дице? Явле́ніемъ бо Твоея́ ико́ны удиви́ла еси́ вся́ правосла́вныя, мно́гія неду́ги врачу́ющи и болѣ́зни исцѣля́ющи. О, Всеми́лостивая Влады́чице, не лиши́ на́съ и ны́нѣ Твоего́ заступле́нія, но моли́твами Твои́ми защити́ и спаси́ правосла́внаго Импера́тора, и все́ христолюби́вое Его́ во́инство си́лою Твое́ю огради́, да Тобо́ю хва́лящеся и все́ упова́ніе на Тя́ возлага́юще, не постыди́мся во вѣ́ки.

Сла́ва, и ны́нѣ, то́йже.


[Степе́нна, 1-й антифо́нъ 4-го гла́са.] Проки́менъ, гласъ 4: Помяну́ и́мя Твое́* во вся́комъ ро́дѣ и ро́дѣ. Сти́хъ: Отры́гну се́рдце мое́ сло́во бла́го, [глаго́лю а́зъ дѣла́ моя́ Царе́ви]. Вся́кое дыха́ніе да хва́литъ Го́спода. Сти́хъ: Хвали́те Бо́га во святы́хъ Его́... Ева́нгеліе Луки́, зача́ло 4: Во дни́ о́ны, воста́вши, Маріа́мъ... По 50-мъ псалмѣ́, Сла́ва: Моли́твами Богоро́дицы, Ми́лостиве, очи́сти мно́жества согрѣше́ній на́шихъ. И ны́нѣ: то́йже. И посе́мъ: Поми́луй мя́, Бо́же...

И стихи́ра, гла́съ 6:

Егда́ явле́ніе чу́днаго Твоего́ о́браза приспѣ́, тогда́ аѳо́нстіи отцы́, сто́лпъ о́гненный на мо́ри зря́ще, стра́хомъ одержи́ми, недоумѣва́ху; Гавріи́лъ же, я́ко вторы́й Пе́тръ, по мо́рю ходя́, со слеза́ми вопія́ше Тебѣ́: О, Пресвята́я, пріиди́ и сохрани́ достоя́ніе Твое́ отъ вра́гъ ненавѣ́тно!

Кано́нъ [благода́ренъ] Пресвятѣ́й Богоро́дицѣ [со ирмосо́мъ на 6 и пра́здника, на 8.] Гла́съ 8.

Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Отъ скве́рныхъ усте́нъ хвале́ніе пріими́, Всенепоро́чная, я́коже пре́жде Сы́нъ Тво́й, Бо́гъ же мо́й и Госпо́дь, прія́тъ двѣ́ ле́пты вдови́цы, и разрѣше́ніе прегрѣше́ній мои́хъ пода́ждь, я́ко да по до́лгу велича́ю Тя́.

Ангельское пѣ́ніе подоба́ше Тебѣ́, Ма́тери Бо́жіей, Творца́ бо си́хъ родила́ еси́ стра́нно. Но и отъ на́съ пріими́, Влады́чице, смире́нныя сія́ моли́твы, да пое́мъ Го́сподеви: сла́вно просла́вися въ на́шей не́мощи.

Огустѣ́ша во́ды, огустѣ́ша и во́лны посредѣ́ мо́ря, нося́ща Твою́, Богома́ти, ико́ну. Утверди́ и мое́ подви́гшееся се́рдце на ка́мени за́повѣдей Христо́выхъ.

Помо́щница и Покрови́тельница была́ еси́, Дѣ́во, оби́тели Иверскія, во́евъ Ами́ры съ корабли́ и́хъ въ мо́ри погрузи́вши, но потопи́ въ пучи́нѣ милосе́рдія Сы́на Твоего́ вся́ моя́ душе́вныя стра́сти и безчи́сленная моя́ прегрѣше́нія.

Пѣ́снь 3.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ па́че Тебе́, Еди́не Человѣколю́бче.

Утверди́ се́рдце мое́ во упова́ніи на Тя́, Богома́ти, изми́ вся́кую горды́ню и превозноше́ніе изъ помраче́ннаго ума́ моего́, да вопію́: нѣ́сть свя́тъ, я́ко Госпо́дь, и нѣ́сть пра́веденъ, я́ко Бо́гъ на́шъ.

Ты́, о Богома́ти, немощству́ющія препоясу́еши си́лою, а́лчущія насыща́еши; посѣти́ и мою́ не́мощь и а́лчущаго и жа́ждущаго мене́ насы́ти Живо́тнаго Хлѣ́ба, чрезъ Твою́ дѣ́вственную утро́бу сше́дшаго съ небесе́ на зе́млю.

Возста́ви, Влады́чице, отъ земли́ мене́, убо́гаго, и отъ гно́ища грѣхо́внаго воздви́гни, ни́щаго, да́ждь моли́тву мнѣ́, моля́щемуся, да, велича́я, пою́ Твое́ заступле́ніе.

Непло́дствующій мо́й у́мъ плодоно́сенъ покажи́, Блага́я Дѣ́во, отъ непло́дове ро́ждшаяся: Ты́ бо плодоно́сіе всѣ́хъ бла́гъ явле́ніемъ ико́ны Твоея́ подае́ши.

Сѣда́ленъ:

Свѣ́тлое дне́сь Засту́пницы на́шея наста́ торжество́. Да взыгра́ется тва́рь, да ликовству́ютъ человѣ́честіи собо́ри, созыва́етъ бо на́съ Свята́я Богоро́дица ви́дѣти огнено́сную ико́ну Свою́, луча́ми ми́лости вѣ́рныя просвѣща́ющую. Тѣ́мже, ра́дующеся, вопіе́мъ: спаси́, Госпоже́, отъ гла́да, огня́, меча́ и бѣ́дъ вся́ почита́ющія явле́ніе ико́ны Твоея́.

Сла́ва, и ны́нѣ, то́йже.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Покры́ небеса́ добродѣ́тель Твоя́, Богома́ти, и хвалы́ Твоея́ испо́лнися земля́, но положи́ любо́вь держа́вную крѣ́пости Твоея́ и на мнѣ́, отча́янномъ.

Уготовля́ющи ше́ствіе чу́днѣй ико́нѣ Твое́й, даде́ бе́здна гла́съ сво́й, воздви́жеся со́лнце, и сія́ніе ея́ я́ко свѣ́тъ бы́сть, но Ты́ изшла́ еси́ на спасе́ніе люде́й, спасти́ Твое́ наслѣ́діе пришла́ еси́.

Услы́шавше слу́хъ прише́ствія Твоего́, и́ноцы убоя́шася; уразумѣ́вше же дѣла́ Твоя́, ужасо́шася, но внегда́ смути́тися души́ мое́й, ми́лость Твою́ помяни́, Влады́чице, да взыва́ю: сла́ва заступле́нію Твоему́, Богома́ти.

Ты́ еси́ моя́ крѣ́пость и си́ла, Богоро́дице, Тобо́ю почíю въ де́нь ско́рби моея́, и изъ страны́ прише́льствія взы́ду Тобо́ю въ небе́сное наслѣ́діе, и возра́дуюся о Го́сподѣ и Бо́зѣ, Спа́сѣ мое́мъ.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Ви́ждь, Чи́стая, отъ но́щи у́тренюющія лю́ди па́ствы Твоея́, ико́ну Твою́ богохва́льную обстоя́щія, разрѣше́нія же грѣхо́въ прося́щія, и житія́ исправле́нія, и Боже́ственныя сла́вы прича́стія: не отри́ни у́бо на́съ отъ лица́ Твоего́, Свѣ́та незаходи́маго Ма́ти.

Все́ю душе́ю и мы́слію въ па́ствѣ Твое́й вси́ слику́юще, псалмы́, и пѣ́сньми духо́вными, и пѣ́ніемъ боже́ственнымъ ико́ну Твою́ почита́ютъ, проще́нія грѣхо́въ прося́ще и ду́шъ спасе́нія. Ты́ же, исцѣле́ніе на́ше су́щи, сія́ вся́ пода́ждь, Влады́чице Богоневѣ́сто.

Хра́мъ Тво́й, Дѣ́во, я́ко ра́й другíй показа́ся ны́нѣ, я́ко дре́во жи́зни имѣ́я ико́ну красоты́ Твоея́, ю́же вси́ усе́рдно со благоговѣ́ніемъ и любо́вію цѣлу́юще, взыва́емъ: Влады́чице, ми́ръ да́ждь на́мъ; Влады́чице, стяжи́ на́съ, ино́го бо ра́звѣ Тебе́ утѣше́нія не вѣ́мы.

Рѣку́ Тя́ сла́дкую и пото́къ насыще́нія, ма́нну небе́сную, изоби́ліе и благода́ть приснотеку́щую во оби́тели Твое́й живу́щіи стяжа́вше, пою́тъ Рождество́ Твое́, Отрокови́це.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Въ ско́рби се́рдца вопію́ Ти, Влады́чице, жите́йскаго мо́ря потопля́емь бу́рею, къ Тебѣ́, я́ко ти́хому приста́нищу, прибѣга́ю: возведи́ отъ тли́ живо́тъ мо́й.

Бе́здна послѣ́дняя грѣхо́въ обы́де мя́, и исчеза́етъ ду́хъ мо́й, но простри́, Влады́чице, высо́кую Твою́ мы́шцу, и я́ко Гавріи́ла, и мене́, ко Твое́й ико́нѣ прибѣга́юща, невреди́ма сотвори́.

Не отри́ни мене́ до конца́ отъ лица́ Твоего́, Ма́ти незаходи́маго Свѣ́та, не попусти́ мнѣ́ погря́знути въ пучи́нѣ беззако́ній, но возведи́ мене́ отъ бла́та страсте́й, да взы́детъ изъ нетлѣ́нія живо́тъ мо́й, и пожру́ Тебѣ́ со гла́сомъ хвале́нія и исповѣ́данія.

Хра́мъ нося́й тѣле́сный ве́сь оскверне́нъ, Тебѣ́, пречи́стому хра́му Вѣ́чнаго Сло́ва, дерза́ю въ честнѣ́мъ хра́мѣ Твое́мъ, предъ Твое́ю свято́ю ико́ною приноси́ти смире́нныя моя́ моли́твы. Ты́ же, я́ко ми́лостивая, очи́сти мя́ Твои́мъ благоутро́біемъ.

Конда́къ, гла́съ 8:

Аще и въ мо́ре вве́ржена бы́сть свята́я ико́на Твоя́, Богоро́дице, отъ вдови́цы, не могу́щія спасти́ сію́ отъ враго́въ, но яви́лася е́сть храни́тельница Аѳо́на и врата́рница оби́тели Иверскія, враги́ устраша́ющая и въ правосла́внѣй Россíйстѣй странѣ́ чту́щія Тя́ отъ всѣ́хъ бѣ́дъ и напа́стей избавля́ющая.

Икосъ:

Въ столпѣ́ о́гненнѣ я́вльшуюся Богома́тере ико́ну ви́дѣвше, возопи́ша по́стниковъ и́верскихъ ли́цы: О, Влады́ко, сподо́би на́съ прія́ти ико́ну Ма́тере Твоея́ во утѣше́ніе стра́нствія на́шего; ты́ же, Гавріи́ле, дерза́й и вни́ди въ мо́ре, и пріими́ во объя́тія твоя́ сокро́вище, на́мъ явля́емое, да бу́детъ на́мъ стра́жъ неусы́пный, покро́въ же, и ра́дость всѣ́мъ христіа́номъ, и храни́тельница, отъ бѣ́дъ и напа́стей избавля́ющая.

Пѣ́снь 7.

Ирмо́съ: Бо́жія снисхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Согрѣши́хомъ, беззако́нновахомъ, непра́вдовахомъ предъ Го́сподемъ, но, Влады́чице моя́ Богоро́дице, я́ко Блага́я угаси́ о́гнь Его́ пра́веднаго гнѣ́ва Твои́мъ те́плымъ хода́тайствомъ, да пое́мъ Ему́: оте́цъ на́шихъ Бо́же, благослове́нъ еси́.

Въ пещи́ искуше́ній и бѣ́дъ опаля́емыя ороси́, Богома́ти, струя́ми Твои́хъ щедро́тъ, да посра́мятся врази́ на́ши и да разумѣ́ютъ вси́, я́ко Ты́ еди́на еси́ Влады́чица Богоро́дица, по все́й вселе́ннѣй сла́вимая.

Престо́ле Царя́ Сла́вы, честнѣ́йшая херуви́мъ, одушевле́нный хра́ме, въ не́мже всели́ся Госпо́дь, тве́рдь небе́сная, на не́йже возсія́ Со́лнце пра́вды — Христо́съ, Тя́ пое́мъ, Богома́ти, и превозно́симъ во вся́ вѣ́ки.

Ты́ еси́ весе́ліе и въ пусты́нехъ живу́щимъ, Ты́ еси́ и ца́рствующаго гра́да утѣше́ніе и похвала́, Дѣ́во Марíе, препѣ́тая и превозноси́мая во вѣ́ки.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Пою́тъ Тя́ а́нгельскія си́лы, превозно́ситъ человѣ́ческій ро́дъ, благослови́тъ Тя́ вся́ тва́рь, Пречи́стая Дѣ́во Богоро́дице. Пріими́ и отъ мене́, недосто́йнаго, приноси́мое Тебѣ́ хвале́ніе.

По́йте, и́ноцы Аѳо́на, благословля́й, земле́ Иверская, превозноси́, вся́ страно́ Россíйская, Благу́ю Влады́чицу, рѣ́ки чуде́съ отъ Своея́ чудотво́рныя ико́ны источа́ющую. Хва́лимъ, благослови́мъ, покланя́емся Ти́, Богоро́дице, пою́ще и превознося́ще во вся́ вѣ́ки.

Подо́біемъ ико́ны Иверскія не то́чію святы́й Аѳо́нъ просвѣща́ется, но и ца́рствуяй гра́дъ Москва́ украша́ется, отъ того́ чуде́сную по́мощь пріе́мля и исто́чникъ утѣше́нія въ не́мъ обрѣта́я.

Еще́ и страна́ Новгоро́дская и инíи гра́ды и ве́си подо́біемъ Иверскія ико́ны Твоея́, Влады́чице, освяти́шася и чудесы́ просвѣти́шася, вопію́ще: Го́спода по́йте и превозноси́те во вся́ ве́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Та́йна глубины́ Рождества́ Твоего́ у́мъ а́нгельскій ужаса́етъ, Дѣ́во, и пречи́стая ико́на Твоя́ де́моны прогоня́етъ, не терпя́ще бо взира́ти на си́лу ея́, бѣ́гаютъ и исчеза́ютъ. Мы́ же то́й любе́зно покланя́емся и облобыза́емъ, и Тя́, Богоро́дицу, велича́емъ.

Пріиди́те вси́, поклони́мся, припаде́мъ и возвели́чимъ Бо́жію Ма́терь, призрѣ́вшую на на́съ, смире́нныхъ, а́лчущія исполня́ющую бла́гъ и положи́вшую съ на́ми завѣ́тъ ми́лости во явле́ніи Своея́ ди́вныя ико́ны.

Богоро́дице Дѣ́во, упова́ніе христіа́номъ, проба́ви и на́шему ро́ду ми́лости Твоя́, бы́вшія отце́мъ на́шимъ, покры́й и соблюди́ на́съ отъ вся́каго зла́.

О, Всеми́лостивая христіа́номъ Помо́щнице! Не мо́жетъ Тя́ воспѣ́ти досто́йно язы́къ человѣ́ческій и а́нгельскій, я́ко всея́ тва́ри честнѣ́йшую и земны́хъ сла́внѣйшую, но пріими́ ми́лостивно сіе́ приноси́мое Тебѣ́ отъ на́съ моле́ніе и спаса́й на́съ всегда́, на Тя́ бо упова́ніе возложи́хомъ.

Ексапостила́рій:

Ико́ну Твою́ всечестну́ю пріи́мъ Гавріи́лъ во объя́тія, вопія́ше Тебѣ́, Влады́чицѣ: О, сла́дкая Ма́ти Царя́ Христа́, бу́ди покро́въ Твое́й оби́тели, ра́дость же всѣ́мъ христіа́номъ и Спору́чница жи́зни вѣ́чныя. [Три́жды.]

На хвали́техъ стихи́ры на 4, гла́съ 4:

О, несказа́нныя бла́гости!* О, сла́внаго явле́нія ико́ны Богома́тере,* я́же сія́етъ чудесы́* и просвѣща́етъ благода́тію вѣ́рно приходя́щія!* Юже съ весе́ліемъ пріе́млюще,* Чи́стую Богоотрокови́цу* достодо́лжно пѣ́сньми почита́емъ и ублажа́емъ. [Два́жды.]

О, пресла́внаго Твоего́ о на́съ, Влады́чице, промышле́нія!* Чу́дную бо Твою́ ико́ну Аѳо́ну посыла́еши* и я́ко стра́жа на́мъ неусы́пна* ту́ю подае́ши ми́лостивно* и утѣше́ніе стра́нствію на́шему.* Тѣ́мже, позна́вше Твоя́ честна́я чудеса́,* пѣ́сньми Тя́ велича́емъ.

О, пресла́внаго чудесе́!* Ка́ко огнено́сная ико́на на волна́хъ морски́хъ,* я́ко на колесни́цѣ но́сится,* свѣ́тлыми луча́ми благода́ти умы́ просвѣща́ющи?* Ея́же торжество́ пѣ́сньми почита́юще ра́достно,* сла́ву возсыла́емъ Богороди́тельницѣ.

Сла́ва, и ны́нѣ:

Тво́й глаго́лъ исполня́я, Богома́ти, преподо́бный Гавріи́лъ немо́кренно по водѣ́ морстѣ́й пѣшеше́ствова, и воспріи́мъ свяще́нную ико́ну Твою́, ли́къ пѣ́сненный соста́ви и торжество́ съ по́стники аѳо́нскими совокупи́. Тѣ́мже и мы́, удивля́ющеся, вопіе́мъ Первовино́вному: сла́ва Тебѣ́, сотво́ршему ди́вная, еди́ному Царю́ и Бо́гу, моли́твъ ра́ди Богоро́дицы! Сохрани́ Импера́тора на́шего, Его́же избра́лъ еси́ ца́рствовати надъ на́ми, и побѣ́ды Ему́ на враги́ да́руй, я́ко Всеси́ленъ.

Славосло́віе вели́кое и отпу́стъ.



НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, пѣ́снь Богоро́дицы, гла́съ 3: Вели́читъ душа́ Моя́ Го́спода,* и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отны́нѣ ублажа́тъ Мя́ вси́ ро́ди. Апо́столъ къ Филиппи́сіомъ, зача́ло 240. Аллилу́ія, гла́съ 8: Слы́ши, Дщи́, и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. Ева́нгеліе отъ Луки́, зача́ло 54. Прича́стенъ: Ча́шу спасе́нія пріиму́ и и́мя Госпо́дне призову́.


Зри́: Вѣ́домо бу́ди, я́ко пра́зднованіе Пресвятѣ́й Богоро́дицѣ святы́я ра́ди Ея́ ико́ны Иверскія твори́тся Окто́врія въ 13-й де́нь, Февруа́рія въ 12-й де́нь, въ ца́рствующемъ же гра́дѣ Москвѣ́ еще́ и во вто́рникъ Свѣ́тлыя седми́цы, по уста́ву свята́го Благовѣ́щенія.

Источникъ: Минíя дополни́тельная. — СПб.: С.-Петербургская Сѵнодальная Типографія, 1909. — Л. 31 об. – 38 об.

/ Къ оглавленію раздѣла /


Наверхъ / Къ титульной страницѣ

0