Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 12-й де́нь.
Святы́хъ му́ченикъ Про́ва, Тара́ха и Андрони́ка и преподо́бнаго отца́ на́шего Космы́ Святогра́дца и творца́ кано́новъ, епи́скопа Маіу́мскаго.

[ВЕЧЕРЪ,]
На Го́споди воззва́хъ: стихи́ры му́чениковъ, гла́съ 4. Подо́бенъ: Да́лъ еси́ зна́меніе.

Въ лице́ сокруша́емь, и по вы́и ураня́емь,* и же́зліемъ раздробля́емь,* рука́ми же изжига́емь, и главу́, му́чениче,* и рожны́ пробода́емь лю́тѣ,* уши́ма и устна́ма обрѣ́зуемь,* и о́цтомъ напая́емь,* и звѣре́мъ поверга́емь,* и мече́мъ усѣка́емь, му́чениче,* весели́лся еси́, Тара́хе.

Терпѣ́лъ еси́, біе́мь, и рожны́ пробода́емь,* и лы́стомъ отрѣ́заемымъ, о́чію лиша́емь,* и звѣре́мъ, всеблаже́нне, въ снѣ́дь дава́емь,* и огню́ приближа́яйся,* и мече́мъ главоусѣка́емь,* му́чениковъ удобре́ніе* и Це́ркве утвержде́ніе,* страда́льче Про́ве сла́вный,* а́нгеломъ равноче́стне.

Огне́мъ сожига́емь,* и воло́выми жи́лами біе́мь,* струги́ стру́жемь,* по лы́стомъ крои́мь,* и богосло́вный урѣ́заемь язы́къ,* и зубы́, му́чениче, су́рово, Андрони́че, искореня́емь,* со звѣрьми́ же сплета́яся,* и скончава́емь мечи́,* по́двигъ соверши́лъ еси́ и вѣне́цъ прія́лъ еси́.

Ины стихи́ры преподо́бнаго, гла́съ 4. Подо́бенъ: Яко до́бля.

Яко му́дрости тя́ пита́теля* и чистоты́ корми́теля,* сокро́вище зна́нія, іера́рше Космо́,* богосло́вника извѣ́стнѣйшаго, учи́теля боже́ственна,* вѣ́рнымъ просвѣти́теля* похваля́емъ, блаже́нне,* моля́ще тобо́ю Влады́ку* отъ тли́ и бѣ́дъ и вся́каго вре́да* всѣ́мъ на́мъ изба́витися.

Воздержа́ніемъ пожи́лъ еси́,* бдѣ́ніемъ же и посто́мъ,* цѣлому́дріемъ и смире́ніемъ, сла́вне,* ра́зумомъ вся́чески обогати́лся еси́* ни́жнихъ и привре́менныхъ* и вы́шними свѣ́тлыми* и я́сно возгремѣ́лъ еси́ недоумѣ́нное,* стра́шное же и вели́кое, блаже́нне,* всѣ́хъ Царя́ строе́нія та́инство.

Смиренному́дръ и кро́токъ,* ти́хъ же и доброглаго́ливъ,* увѣ́тливъ и незло́бивъ,* цѣлому́дренъ и пра́веденъ,* препро́стъ и цѣ́лъ,* преподо́бне Космо́, ты́ бы́въ* іера́рхъ отъ Бо́га священноявле́нъ еси́* и упа́слъ еси́ на зла́цѣ во́дъ спаси́тельныхъ* ста́до твое́, богому́дре,* тѣ́мъ тя́ ны́нѣ ублажа́емъ.

Сла́ва, гла́съ 4. Анато́лія:

Во́инствовавше Христу́, я́же на земли́ кра́сная оста́висте и кре́стъ на ра́мена взе́мше, му́къ ра́ди многоплете́нныхъ Тому́ послѣ́довали есте́ и предъ цари́ и мучи́тели мно́гими не отверго́стеся Его́, а́нгели вѣнцы́ побѣ́дными главы́ ва́ша увязо́ша, дерзнове́нніи душе́ю свѣ́тло въ черто́гъ вели́кій внидо́сте, Про́ве, сла́во му́чениковъ, Тара́хе, де́моновъ губи́телю, и, Андрони́че, побѣ́да вѣ́рныхъ, дерзнове́ніе иму́ще ко Спа́су всѣ́хъ, моли́теся о душа́хъ на́шихъ.

И ны́нѣ, богоро́диченъ или́ крестобогоро́диченъ. Подо́бенъ: Яко до́бля.

Агнца и Па́стыря Тя́* на дре́вѣ я́ко ви́дѣ,* Агница ро́ждшая рыда́ше* и ма́терски Ти́ вѣща́ше:* Сы́не Возжелѣ́нне,* ка́ко на дре́вѣ кре́стнѣмъ повѣ́шенъ еси́, Долготерпѣли́ве?* Ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?

На стихо́внѣ окто́иха. Сла́ва, му́чениковъ, гла́съ 1. Андре́я Іерусали́млянина:

Трира́сленное собра́ніе, равночи́сленніи Святы́я Тро́ицы, я́коже звѣ́зды свѣ́тлыя, отъ восто́ка я́вльшеся, тва́рь созыва́ютъ къ свяще́нному торжеству́, Про́въ и Тара́хъ со Андрони́комъ му́дрымъ: пло́ти бо своя́ звѣре́мъ преда́ша и кро́вію зе́млю обагри́вше, вѣнцено́сцы на небесѣ́хъ со а́нгелы ликовству́ютъ, прося́ще о на́съ Человѣколюби́ваго Бо́га прегрѣше́ній оставле́ніе дарова́ти и ве́лію ми́лость.

И ны́нѣ, богоро́диченъ или́ крестобогоро́диченъ. Подо́бенъ: Всехва́льніи му́ченицы.

Заколе́ніе Твое́ непра́ведное, Христе́,* Дѣ́ва зря́щи,* пла́чущи, вопія́ше Ти́:* Ча́до Сладча́йшее, ка́ко безъ пра́вды умира́еши?* Ка́ко на Дре́вѣ ви́сиши,* Иже всю́ зе́млю повѣ́шей на вода́хъ?* Не оста́ви Мене́ еди́ну,* Благодѣ́телю Многоми́лостиве,* Ма́терь и рабу́ Твою́, молю́ся.

Тропа́рь му́чениковъ, гла́съ 5:

Святы́хъ му́ченикъ исправле́ніемъ небе́сныя си́лы преудиви́шася, я́ко въ тѣ́лѣ сме́ртнѣмъ, безтѣле́снаго врага́ си́лою Креста́, подвиза́вшеся до́брѣ, побѣди́ша неви́димо. И мо́лятся Го́споду поми́ловатися душа́мъ на́шимъ.

Сла́ва, тропа́рь преподо́бнаго, гла́съ 8:

Правосла́вія наста́вниче, благоче́стія учи́телю и чистоты́, вселе́нныя свѣти́льниче, архіере́овъ богодохнове́нное удобре́ніе, Космо́ прему́дре, уче́ньми твои́ми вся́ просвѣти́лъ еси́, цѣвни́це духо́вная, моли́ Христа́ Бо́га спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ.



НА УТРЕНИ,
[На Бо́гъ Госпо́дь: Тропа́рь му́чениковъ, два́жды. Сла́ва, преподо́бнаго. И ны́нѣ, богоро́диченъ или́ крестобогоро́диченъ.]

Кано́нъ окто́иха еди́нъ [на 6], и святы́хъ два́ [кано́на на 8].

Кано́нъ му́чениковъ, его́же краегране́сіе: Воспою́ му́ченикъ Твои́хъ, Спа́се, сла́ву. Іо́сифово. Гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Му́ченическими укра́шени благода́тьми, Вѣнцеда́телю Христу́ на небесѣ́хъ любо́вію, му́ченицы, предстоите́, свѣ́томъ озаря́еми Трисо́лнечнаго сія́нія, и вся́ просвѣща́ете вѣ́рою ва́съ блажа́щія.

Въ гоне́ніи нече́стія яви́стеся, всю́ прогоня́юще злочести́вую пре́лесть, му́ченицы непобѣди́міи, до́блественными по́двиги, я́ко до́бріи во́ини, я́ко Це́ркве утвержде́нія и я́ко и́стины держа́ва.

Смы́сленнымъ ра́зумомъ, всему́дріи, отрази́вше зло́бную бу́рю и свирѣ́пѣющееся мо́ре злоче́стія, ду́ха ти́хостію къ приста́нищемъ преидо́сте небе́снымъ, ра́дующеся.

Душа́мъ му́чениковъ ва́ши сра́дуются, му́ченицы, ду́си на небесѣ́хъ и́стинно, Про́ве, и Андрони́че, и Тара́хе, блаже́нніи: му́жески бо болѣ́зни муче́нія претерпѣ́сте, побѣ́дами Боже́ственными прославля́еми.

Богоро́диченъ: Иже Отцу́ и Ду́ху Свято́му Сло́во Собезнача́льное въ дѣ́вственную утро́бу, восхотѣ́въ, всели́ся, и пло́ть невра́щно бы́сть, и пострада́въ во́лею, му́ченическая боже́ственная во́инства вѣ́рою страда́ти устро́илъ е́сть.

Инъ кано́нъ преподо́бнаго, его́же краегране́сіе: Косму́ похва́лимъ пѣснотво́рца му́дренно. Гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Удобри́въ добродѣ́телей житіе́ твое́, о́тче Космо́, свѣ́томъ и блиста́ніи свѣтя́ся Свѣ́та Трисія́ннаго, Влады́цѣ твоему́ я́ко предстоя́, просвѣти́тися тя́ пою́щимъ моли́ся.

Нра́въ тво́й подо́бно явля́етъ тя́, имѣ́я нарече́ніе: архіере́евъ бо украше́ніе, му́дре, показа́лся еси́, и утвержде́ніе мона́шествующихъ, и му́дрости оби́тель бы́лъ еси́.

Му́дрости я́ко рачи́тель мудрѣ́йшъ, му́дрѣ, очи́стилъ еси́ твою́ ду́шу, всемíрный Космо́, мірска́го смуще́нія стра́сти отгна́въ, я́ко мглу́ омраче́нія.

Богоро́диченъ: Марíю непоро́чную и чи́стую Отрокови́цу воспои́мъ, я́ко Бо́жію Ма́терь благоговѣ́йно согла́сно прославля́юще: ра́дуйся, чи́стая Богоневѣ́сто, благослове́нная Ма́ти Дѣ́во.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Крѣ́пко гони́телю проти́вився, Тара́хе, и сокруше́ніе лица́ терпя́ крѣпча́йше, че́люсти сокруши́лъ еси́ мы́сленныхъ льво́въ, до́блественъ бы́въ си́лою Ду́ха.

Великому́дреннымъ ра́зумомъ ра́ны претерпѣ́лъ еси́, по хребту́ и чре́ву, му́чениче Про́ве, растяза́емь и поджига́емь, и рожны́ пе́рси, и богосла́вная твоя́ уста́ біе́ма.

Яко а́гнецъ, вознесе́нъ бы́въ, терпѣ́лъ еси́ болѣ́зни лютѣ́йшихъ ра́нъ, му́чениче Андрони́че, огня́ попале́нія и искорене́ніе зубо́въ, и богосло́внаго твоего́ язы́ка отъя́тіе.

Трисвѣ́тлы, я́ко звѣ́зды, разу́мныхъ сія́ній всю́, сла́вніи, тва́рь просвѣща́ете, тму́ отгоня́ще многобо́жія ле́сти, страстоте́рпцы, му́ченицы свѣтови́днѣйшіи.

Богоро́диченъ: Яко добру́, я́ко красну́ и я́ко избра́нну, Чи́стая, Сло́во, Иже вся́ осуществова́вшее Тя́ избра́въ, въ Твою́ непоро́чную и богопрія́тную утро́бу, восхотѣ́въ, всели́ся Пресу́щественный.

Инъ.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Пѣ́сньми кра́сными къ пѣсносло́вію Христо́ву возвесели́лъ еси́ невѣ́сту, я́сно изложи́въ Христо́вы Боже́ственныя та́йны.

Зако́ны ты́ воспита́вся Христо́выми, о́тче Космо́, пита́лъ еси́ ста́до, ввѣ́ренное тебѣ́, правосла́вными повелѣ́ньми.

Въ себѣ́ огне́мъ Боже́ственнаго рве́нія распаля́ему ду́шу, преподо́бне о́тче Космо́, стяжа́въ, вся́ е́реси отгна́лъ еси́.

Богоро́диченъ: Преидо́ша у́бо сѣ́ни, Христо́съ же Истина возсія́, пло́ть пріи́мъ, Ма́ти Бо́жія, отъ боку́ Твое́ю, и спасе́ ны.

Конда́къ преподо́бнаго, гла́съ 8. Подо́бенъ: Взбра́нной.

Укра́шенъ добродѣ́тельми, Космо́ богодухнове́нне, Це́ркве Христо́вы украше́ніе бы́лъ еси́: пѣ́сньми бо украси́лъ еси́ сію́, блаже́нне. Но моли́ся ко Го́споду изба́витися на́мъ отъ вся́кихъ ко́зней ра́тника, тебѣ́ зову́щимъ: ра́дуйся, о́тче требога́те.

Сѣда́ленъ му́ченикомъ, гла́съ 8. Подо́бенъ: Прему́дрости.

Святы́я Тро́ицы крѣ́пкою вооружи́вшеся вѣ́рою ю́ношески, Андрони́къ, Про́въ же и всему́дрый Тара́хъ многобо́жія ле́сти держа́ву потреби́ша и лю́ди къ Боже́ственнѣй любви́ привяза́ша. Тѣ́мъ побѣ́дныя пріи́мше по́чести, лико́мъ свеселя́тся си́лъ безпло́тныхъ, къ ни́мже вѣ́рою возопіи́мъ: моли́те Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять ва́шу.

Сла́ва, преподо́бнаго, гла́съ то́йже:

Благоче́стіемъ и вѣ́рою воспита́вся, и прему́дростію украси́въ у́мъ и ду́шу, всѣ́хъ избѣ́глъ еси́ земны́хъ попече́ній, осо́бь же пожи́въ и у́мъ въ неизрече́нныя вложи́въ, вели́кія сподо́бился еси́ благода́ти. Тѣ́мъ и Боже́ственную Христо́ву Це́рковь украси́лъ еси́ пѣ́сньми медото́чными и уче́ньми, святи́телю о́тче на́шъ Космо́, моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́.

И ны́нѣ, богоро́диченъ:

Прему́дрость и Сло́во въ Твое́мъ чре́вѣ заче́нши неопа́льно, Ма́ти Бо́жія, мíрови родила́ еси́ мíръ Содержа́щаго и во объя́тіихъ понесла́ еси́ вся́ Нося́щаго, Пита́теля всѣ́хъ и Творца́ тва́ри. Тѣ́мже молю́ Тя, Всесвята́я Дѣви́це, и вѣ́рно сла́влю Тя́, изба́витися ми́ отъ прегрѣше́ній, и въ де́нь Суда́, егда́ предста́ти и́мамъ предъ лице́мъ Созда́теля моего́, Влады́чице Дѣ́во Чи́стая, Твою́ по́мощь тогда́ пода́ждь ми́: вся́ бо мо́жеши, ели́ка хо́щеши, Всепѣ́тая.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мляй Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ боже́ственныя Стра́сти Твоя́.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Зако́нъ Тво́й соблюда́юще, Сло́ве, му́ченицы, беззако́нныхъ зако́ны возненави́дѣвше небрещи́ Тебе́ Творца́ повелѣва́ющія де́монскими ухищре́ньми, и все́ претерпѣ́вше треволне́ніе му́къ, небе́сную тишину́ получи́ша.

Любя́ Христо́во и́го носи́ти подвы́йное на вы́и твое́й, е́юже ра́дуешися, сокруша́емь, Кре́стъ же, же́злъ держа́вныя, Тара́хе всеблаже́нне, си́лы имы́й, па́личная умноже́нія терпи́ши, взыва́я: си́лѣ Твое́й сла́ва, Человѣколю́бче.

Яко си́ленъ Боже́ственнымъ бы́въ Ду́хомъ, лы́стовъ твои́хъ болѣ́зненное му́жественно, Про́ве, сокруше́ніе и оче́съ изъя́тіе претерпѣ́лъ еси́, просвѣща́емь зна́ніемъ Тро́ицы, соверше́ннѣйше, и съ вы́шними ли́ки, му́чениче, сочета́яся.

Юношески, му́чениче, предста́лъ еси́, Андрони́че, предъ суди́щемъ, противля́яся врагу́ крѣ́пко. Тѣ́мъ отрѣ́зая лы́сты твоя́, си́льнѣйша содѣва́ше тя́, главу́ его́ попира́юща и го́рнее тебѣ́ ше́ствіе сотворя́юща.

Богоро́диченъ: Еди́на Бо́га но́сиши во утро́бѣ воплоща́ема, е́же бы́ти всѣ́мъ подаю́щаго. Его́же на три́знищи непрекло́нно исповѣ́дающа, пострада́ша боже́ственніи му́ченицы, Дѣ́во Богоро́дице Препѣ́тая, а́нгеловъ чу́до и де́моновъ я́зва.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Предочи́стивъ о́ко твоего́ се́рдца стра́стнаго смуще́нія, Космо́ іера́рше, пѣ́ніе воспѣ́лъ еси́ кра́сное и спаси́тельное и Це́рковь просвѣти́лъ еси́.

Цѣле́ніе вся́каго уны́нія быва́ютъ твоя́, Космо́, всехва́льная лю́бящимъ пѣ́сненная наслажде́нія, догма́тами украша́емая и сладкогла́сія добро́тами.

Неду́гующую, всеблаже́нне, Це́рковь, ху́льными велѣ́ньми Копрони́мовыми и буесло́вными, исцѣли́лъ еси́ писа́ньми, и́миже сладкопѣ́сненно пѣснопѣ́лъ еси́.

Яко чу́дны твоя́ пѣ́сни и вся́каго, о́тче, испо́лнены ра́зума, и́миже я́вственно всѣ́мъ откры́лъ еси́ Христо́вы та́йны, стра́шныя и́стинно и пречу́дныя.

Богоро́диченъ: Пресвяту́ю воспои́мъ Богоро́дицу, воплоще́нное роди́вшую Бо́жіе Сло́во во дву́ естеству́, еди́нѣй же ѵпоста́си, я́коже Косма́ боже́ственный научи́.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Неукло́нніи путеше́ственницы стези́ у́зкія и жесто́кія бы́сте, напа́стей мно́жество, я́ко пѣ́ны морскíя отрѣва́юще, я́ко неразсѣ́дніи столпи́, сердца́, страстоте́рпцы, я́ко на ка́мени вѣ́ры утверди́вше.

Витíйствуя боже́ственная и богосло́вя спаси́тельная уче́нія, усте́нъ терпи́ши растерза́нія, ума́ крѣ́постію загражда́я уста́, на Бо́га, Тара́хе му́чениче, вредосло́віе глаго́лющая сотво́ршаго.

На че́тверо протяза́емь и ра́нъ я́звами одержи́мь, душе́вное показу́я до́блественно воста́ніе. Тѣ́мже вѣнцено́сецъ я́влься съ тождестрада́льники, Про́ве, Царю́ всѣ́хъ предстои́ши.

Богоро́диченъ: Бо́льши го́рнихъ си́лъ еси́, Сло́во поро́ждши Отчее, Дѣ́во, Собезнача́льное и Соприсносу́щное, Его́же свѣ́тлостьми страстоте́рпцы озари́вшеся, безбо́жія но́щь преидо́ша.

Инъ.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Вѣща́ніе твое́, му́дре, во вся́ концы́ протече́, пѣ́сньми возвеселя́я боже́ственными, Космо́, хва́лящихъ тя́.

Зако́нъ есте́ственныхъ па́че, — ре́клъ еси́, — ро́ждшую Пресвяту́ю Богоро́дицу Пребоже́ственное Сло́во. Тѣ́мъ тя́ ублажа́емъ.

Пѣ́сни ди́вныя сла́достно поя́, воспѣ́лъ еси́ неизрече́нное Влады́чне, е́же изъ Дѣ́вы Пречи́стыя Рождество́ свяще́ннѣйше.

Богоро́диченъ: Просвѣти́ша мо́лнія Твоего́ Рождества́, Всепѣ́тая, всю́ вселе́нную, и земля́ подви́жеся отъ пре́лести къ вѣ́рѣ Его́.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Ору́жіе Си́льнаго бы́вше вѣ́рою, сердца́ зловѣ́рныхъ му́жески уязви́сте, подви́гшеся на ня́ до́блественно, страстоте́рпцы великоимени́тіи.

Яко дре́вле Даніи́ла въ ро́вѣ звѣ́ріе устыдѣ́шася, та́ко и ны́нѣ крѣ́пкихъ ору́жниковъ вѣ́ры на три́знищи устраши́шася, укроти́вшеся честны́ми и́хъ страда́ніи.

Прободе́нымъ Твои́мъ ре́бромъ, Влады́ко, то́жде образу́я, Тара́хъ пріе́млетъ въ ре́бра прободе́ніе, и о́цтомъ напая́ется, и огне́мъ въ главу́ лю́тѣ попаля́ется.

Богоро́диченъ: Заче́нши безъ сѣ́мене во утро́бѣ Превѣ́чнаго, Чи́стая, и родила́ еси́ пло́тію естество́мъ Безпло́тнаго, и млеко́мъ пои́ла еси́ Пита́ющаго всѣ́хъ, Богома́ти Неискусобра́чная.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Словеса́ твоя́, я́ко со́тъ сла́дкій, яви́шася, благочести́выхъ сердца́ веселя́ща, пою́щихъ креще́ніе Спа́сово, срѣ́теніе же Симео́ново и отпуще́ніе.

Не словесы́, но вѣщми́ ты́ предста́вилъ еси́: воста́ніе, блаже́нне, Ла́зарево изъ ме́ртвыхъ, и дѣте́й хвале́ніе, и за́висть іуде́йскую, — въ пѣ́снехъ.

Возвыше́ніе Треблаже́ннаго Дре́ва украси́лъ еси́, воспѣ́въ пѣ́снь весе́лія вся́ческаго испо́лнену и ра́дости су́щія въ пѣ́ніи того́, всеблаже́нне.

Богоро́диченъ: Глаго́ломъ Твои́мъ богодохнове́ннымъ, Отрокови́це, послѣ́дующе, Тя́ блажи́мъ вси́ ро́ди, Дѣ́во, я́ко Бо́га блаже́ннаго блаже́нную бы́вшую Роди́тельницу.

Конда́къ му́чениковъ, гла́съ 2. Подо́бенъ: Вы́шнихъ ища́.

Тро́ицы на́мъ сла́ву яви́ша, до́бліи Христо́вы ору́жницы и му́ченицы, съ Тара́хомъ Про́въ же и Андрони́къ: обличи́ша бо все́ мучи́телей безбо́жіе, вѣ́рою до́блественнѣ страда́льчествовавше.

Икосъ:

Іису́совы стра́сти до́блественно подража́вше, ку́пно съ Тара́хомъ му́дрымъ Про́въ же и Андрони́къ, ра́дующеся, пострада́ша на три́знищи, беззако́нныхъ облича́юще безбо́жіе. Тѣ́мъ и мы́, любо́вію чту́ще па́мять и́хъ, въ пѣ́снехъ похва́лимъ и вѣ́рно по́двиги проповѣ́даемъ: я́ко ди́венъ бо Госпо́дь, свѣти́льники въ мíрѣ просла́вивъ сія́, вѣ́рою до́блественно страда́льчествовавшія.

Пѣ́снь 7.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.

Уше́съ отъя́тіе претерпѣ́лъ еси́, ра́дуяся, Тара́хе сла́вне, я́ко благопослушли́въ ра́бъ Прикло́ншаго тебѣ́ у́хо ми́лостивнѣйшее и моли́твы твоя́ Соверши́вшаго, зову́ща: благослове́нъ еси́, Бо́же оте́цъ на́шихъ.

Протяза́еми му́ченицы и му́ками ра́ними тве́рдымъ смы́сломъ пребеззако́ннующимъ сопроти́вистеся, и, побѣдоно́сцы бы́вше, пое́те: благослове́нъ еси́, Бо́же оте́цъ на́шихъ.

Испо́лнися ду́хъ тво́й Боже́ственныя росы́ и прохлажде́нія, егда́ ру́цѣ огне́мъ и главу́ попаля́ху ти́, и, я́коже дѣ́ти, взыва́лъ еси́, Тара́хе: благослове́нъ еси́, Бо́же оте́цъ на́шихъ.

Кропле́ніемъ, святíи, честны́хъ крове́й ва́шихъ пре́лести у́гліе погаси́сте, ро́су Боже́ственныя на́мъ источа́юще благода́ти и исцѣле́нія пролива́ете во́ды, хва́лящимъ ва́шу па́мять всегда́.

Богоро́диченъ: Истощева́ется во утро́бу Твою́, Оте́ческихъ нѣ́дръ не оста́вль, Соверше́ннѣйшее Сло́во, и пло́ть ви́дится, и Младе́нецъ ражда́ется, Ему́же пое́мъ, Дѣ́во, ра́дующеся: благослове́нъ еси́, Бо́же оте́цъ на́шихъ.

Инъ.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Весели́тся вся́ка душа́, пѣснопѣ́нія твоя́, богому́дре о́тче, прочита́ющи и вѣ́рою зову́щи: оте́цъ на́шихъ Бо́же, благослове́нъ еси́.

Вои́стинну язы́къ тво́й — тро́сть кни́жника скоропи́сца, о́тче, бы́сть Свята́го Ду́ха, писа́вшій вели́кая чудеса́ Сло́ва.

Зако́нъ побѣжда́ется о тебѣ́ похвале́ній, о́тче, ни бо́ и́мать, что́ хвале́нію досто́йно вѣща́ти, тебѣ́ Влады́чняя изре́кшу вели́чествія.

Богоро́диченъ: Кíй Тя́ язы́къ земны́хъ досто́йно ублажи́тъ, Бо́га ро́ждшую, Богоневѣ́сто? Тѣ́мъ вѣ́рою зове́мъ: ра́дуйся, Дѣ́во Чи́стая, ра́дуйся, Препросла́вленная.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Просвѣще́ни я́звами и кра́сными добро́тами добротво́рнаго и чу́днаго страда́нія Го́споду предстоите́, вѣнцено́сцы вси́, свѣ́та та́мо су́щаго, испуща́ема бога́тно, исполня́еми и любо́вію пою́ще непреста́нно: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Въ себѣ́ неи́стовяся пребезу́мный мучи́тель, я́ко побѣжде́нъ ва́шими противле́ніи, вско́рѣ повелѣва́етъ умори́ти мече́мъ ва́съ, Содѣ́телю и Изба́вителю пою́щія: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Тро́ицы побо́рницы, добропобѣ́дніи му́ченицы, и́же безбо́жія зи́му разо́рше теплото́ю вѣ́ры, вѣ́рныхъ предсто́лпіе, цвѣ́ти кра́сніи у́мнаго рая́, приста́нища су́щимъ въ бу́ри, непрекло́нніи столпи́, Андрони́къ, и Про́въ, и Тара́хъ почита́ются.

Богоро́диченъ: Со безпло́тными чи́нми, съ му́ченикъ во́инствы, со апо́столы и проро́ки, вси́ всѣ́ми влады́чествующую тва́рьми Влады́чицу я́ко херуви́мъ святѣ́йшу и еди́ну Бо́жію Чи́стую Ма́терь благоче́стно пое́мъ, Христа́ превознося́ще во вся́ вѣ́ки.

Инъ.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Жезло́мъ укрѣпля́еми твои́хъ догма́товъ, сла́вне, тя́ хва́лящіи, отвраща́емся вся́кихъ ерети́ческихъ зло́бъ и пѣснопое́мъ благоче́стно Христу́, зову́ще: благослови́те вся́ дѣла́ Госпо́дня Го́спода.

Всѣ́хъ я́ко вы́ше умо́мъ, Космо́, бы́въ, ве́черю написа́лъ еси́, въ не́йже пре́далъ е́сть Госпо́дь Живоно́сныя Та́йны и преда́ніе стра́шное, безчеловѣ́чіе же Іу́дино, его́же и бѣжа́ти на́съ научи́лъ еси́.

Свѣ́та Невеще́ственнаго заря́ми осія́емь, Космо́ всепреподо́бне, Стра́сти пречи́стыя написа́лъ еси́, и погребе́ніе, и Воста́ніе, и Преображе́ніе Христо́во, научи́въ вся́ воспѣва́ти: благослови́те вся́ дѣла́ Госпо́дня Го́спода.

Богоро́диченъ: Же́злъ изъ ко́рене Іессе́ева Ты́ израсти́ла еси́, Дѣ́во Пречи́стая, Цвѣ́тъ, Го́спода, ро́ждшая, на́съ благоуха́вшаго мѵродыха́тельными воня́ми Страсте́й Его́, тѣ́мъ вси́ Тя́ благослови́мъ, Марíе Богоневѣ́сто.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Возмого́ша тѣлесы́ тлѣ́нными нетлѣ́нныя по́двиги пристяжа́ти, до́блественніи, и, а́нгеломъ уподо́бишася, Ца́рство Бо́жіе пріе́мше недви́жимое, Про́въ, и Тара́хъ, и Андрони́къ, Христо́вы уго́дницы.

Яви́стеся у́гліе, Огне́мъ Невеще́ственнымъ та́инственнѣ вжига́еми, и пожго́сте веще́ственную ле́сть, великому́ченицы, и, возсія́вше, я́ко свѣ́тъ, тва́рь озаря́ете и спаса́ете отъ страсте́й и бѣ́дъ ду́ши на́ша.

Дне́сь прино́ситъ пра́зднство лѣ́тнее свѣ́тло и ра́достно Це́рковь Христо́ва, боже́ственное сіе́ ва́ше торжество́, и веселя́тся съ ва́ми проро́цы, апо́столи и вси́ му́ченицы, страстоно́сцы, побѣди́тели великоимени́тіи.

Взя́стеся въ свѣтови́дная ра́йская, страстоно́сцы, селе́нія, одѣ́явшеся свѣ́тлою ри́зою, ю́же истка́сте многови́дными му́ками, и престо́лу предстоите́ Вседержи́теля, о всѣ́хъ прилѣ́жно моля́щеся.

Богоро́диченъ: Пощади́ мя, Спа́се, рожде́йся и сохрани́вый Ро́ждшую Тя́ нетлѣ́нну по Рождествѣ́, егда́ ся́деши суди́ти вся́ дѣла́ моя́, беззако́нія и грѣхи́ моя́, пре́зри я́ко Безгрѣ́шенъ, Ми́лостивъ я́ко Бо́гъ и Человѣколю́бецъ.

Инъ.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Бога́тъ, благоро́денъ бы́въ, всеблаже́нне, добродѣ́тельными заря́ми сія́я и просвѣща́я вѣ́рныя, Космо́, тя́ хвала́ми почита́ющія и правосла́вно пою́щія: тя́ велича́емъ, трисвя́те.

Зако́ны сія́я Боже́ственными и тѣ́ми, блаже́нне, твое́ ста́до я́коже на па́жить живоно́сную наста́вивъ, я́ко подоба́ше, преподо́бне, къ небесе́мъ преста́вился еси́, плоды́ болѣ́зней твои́хъ пожина́я.

Показа́ся тебѣ́ незаходя́й Свѣ́тъ, ны́нѣ преста́вльшуся тебѣ́ отъ привре́менныхъ, я́ко очище́нному пра́ведно, яснѣ́е же и читѣ́е Его́же наслажда́яся, помяни́ тебе́ почита́ющія, достосла́вне.

Богоро́диченъ: Тя́, Пресвяту́ю Дѣ́ву и серафи́мъ сла́внѣйшу, ро́ждшую Христа́, Богоро́дице, пребезнача́льно возсія́вшаго отъ Отца́, я́коже пи́сано е́сть, славосло́вяще, ублажа́емъ.

Свѣти́ленъ окто́иха. И святы́хъ. Подо́бенъ: Ученико́мъ зря́щимъ.

Триплете́нный ли́къ страстоте́рпецъ, Тара́ха и Про́ва вси́ со Андрони́комъ, пѣ́сньми хва́льными увѣнча́емъ: строга́нія бо претерпѣ́ша, и лю́тыя ра́ны, и болѣ́зни и со Христо́мъ ца́рствуютъ.

Богоро́диченъ:

Херуви́мъ яви́лася еси́ сла́внѣйши и серафи́мъ показа́лася еси́ вы́шши, я́ко Бо́га Ро́ждшая воплоще́нна, земны́мъ же показа́вшаго стези́ пра́выя ше́ствовати, ко спасе́нію водя́щія.


НА ЛИТУРГІИ,

Проки́менъ, гла́съ 4: Святы́мъ, и́же су́ть на земли́ Его́, удиви́ Госпо́дь вся́ хотѣ́нія Своя́ въ ни́хъ. Сти́хъ: Предзрѣ́хъ Го́спода предо мно́ю вы́ну, [я́ко одесну́ю мене́ е́сть, да не подви́жуся]. Апо́столъ ко Ефесе́омъ, зача́ло 233. Аллилу́ія, гла́съ 4: Воззва́ша пра́ведніи и Госпо́дь услы́ша и́хъ, [и отъ всѣ́хъ скорбе́й и́хъ изба́ви и́хъ. Сти́хъ: Мно́ги ско́рби пра́веднымъ и отъ всѣ́хъ и́хъ изба́витъ я́ Госпо́дь]. Ева́нгеліе Луки́, зача́ло 106. Прича́стенъ: Ра́дуйтеся [пра́ведніи о Го́сподѣ, пра́вымъ подоба́етъ похвала́].

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 107 – 114 об.

/ Къ оглавленію раздѣла /


Наверхъ / Къ титульной страницѣ

0