Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 14 декабря 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 12-й де́нь.
Слу́жба на пренесе́ніе честны́я руки́ свята́го Іоа́нна Предте́чи и Крести́теля Госпо́дня изъ Ма́льты въ Га́тчину 12 октября́ 1799 го́да.

НА МАЛѢЙ ВЕЧЕРНИ,
[На Го́споди воззва́хъ:] стихи́ры на 4, гла́съ 8:

Дне́сь возсія́ па́мять твоя́, Предте́че, я́ко свѣти́ло ве́ліе, лучи́ оби́льныя чуде́съ излива́ющи, благочести́выхъ сердца́ озаря́ющи, и утѣше́ніе подаю́щи всѣ́мъ съ вѣ́рою приходя́щимъ и покланя́ющимся тебѣ́, засту́пнику земли́ Россíйскія, и те́плому Благовѣ́рнаго Импера́тора на́шего побо́рнику, и моли́твеннику о душа́хъ на́шихъ.

Свѣ́тлое торжество́ духо́вное, устроя́етъ на́мъ рука́ твоя́, Предте́че, соводвори́тися бо съ на́ми, почита́ющими тя́ усе́рдно, прише́лъ еси́ ви́димымъ о́бразомъ, принося́щи да́ры Боже́ственныя благода́ти, сего́ ра́ди къ тебѣ́ взыва́емъ: бу́ди на́мъ помо́щникъ, и хода́тай, и руководи́тель, на спасе́нія стези́ наставля́ющій.

Дне́сь пала́та Ца́рствующаго просносвѣ́тла явля́ется, прише́ствіемъ тебе́, свѣти́льника невече́рняго Свѣ́та. Торжеству́етъ гра́дъ, его́же благословля́етъ десни́ца твоя́, Крести́телю. Свѣ́тло пра́зднуютъ благовѣ́рніи лю́діе, вхожде́ніемъ ея́ осѣня́еміи, и покланя́яся тебѣ́, глаго́лютъ: изба́ви моли́твами твои́ми отъ вся́кого зла́, находя́щаго за мно́жество прегрѣше́ній рабы́ твоя́.

Боже́ственное сокро́вище и бога́тство неистощи́мое дарова́ся Ца́рствующему гра́ду — десни́ца твоя́, Предте́че Госпо́день, и положи́ся че́стнѣ въ Боже́ственнѣмъ хра́мѣ, и бы́сть духо́внаго весе́лія вина́, те́плѣ лю́бящимъ тя́, проро́ковъ верхо́внѣйшій! Идѣ́же свяще́нно собра́вшеся, воспѣва́емъ тя́ благода́рнымъ се́рдцемъ, я́ко но́ваго Авраа́ма, пресе́льника къ на́мъ пресла́вна и моли́твенника о душа́хъ на́шихъ.

Сла́ва, гла́съ 6:

Кре́стъ Тво́й, Го́споди, ору́жіе на враги́ ви́димыя и неви́димыя на́мъ дарова́ся, да бу́детъ у́бо неви́димая си́ла его́ — о́гнь, попаля́яй ли́ца сопроти́вныхъ, хотя́щихъ бра́ни непра́ведно.

И ны́нѣ, гла́съ то́йже:

Просте́рши боже́ственныя ру́цѣ Твои́, и́миже Созда́теля воплоти́вшагося носи́ла еси́, умоли́ Его́, Всеблага́я Влады́чице, изба́вити отъ искуше́ній, и страсте́й, и бѣ́дъ, любо́вію чту́щихъ святу́ю ико́ну Твою́, Приснодѣ́во.

На стихо́внѣ стихи́ры, гла́съ 2:

Идѣ́же осѣня́етъ рука́ твоя́, Христо́въ Предте́че, та́мо струи́ благода́ти, отъ Бо́га тебѣ́ да́нныя, излива́ются оби́льно, стра́хомъ отбѣга́ютъ де́мони, разли́чныя человѣ́ковъ исцѣля́ются стра́сти и неду́ги, плоды́ духо́вныхъ дѣ́лъ процвѣта́ютъ, благоче́стіе утвержда́ется, и вси́ проходя́щіи и прикаса́ющіися ея́, заре́ю Боже́ственнаго свѣ́та просвѣща́ются, и спаса́ются моли́твами твои́ми.

Сти́хъ: Благослове́нъ Госпо́дь Бо́гъ Изра́илевъ, я́ко посѣти́ и сотвори́ избавле́ніе лю́демъ Свои́мъ.

Свѣти́льникъ горя́ и свѣтя́, отъ Богочеловѣ́ка нарече́нъ бы́лъ еси́, Крести́телю! Мы́ же возра́довахомся въ де́нь срѣ́тенія твоего́, егда́ десни́цею твое́ю Оте́чество на́ше озари́ти восхотѣ́лъ еси́, къ не́й же съ любо́вію притека́юще, воспомина́емъ боже́ственное уче́ніе и а́нгельское на земли́ житіе́ твое́, ему́же подража́ти сподо́би сла́вящихъ тя́.

Сти́хъ: И ты́ проро́къ Вы́шняго нарече́шися.

Зря́ще тѣле́сныма очи́ма святу́ю твою́ ру́ку, у́мными очесы́ зри́мъ тебе́, а́нгела, его́же посла́ въ мíръ Вели́каго Совѣ́та Ангелъ, предъ лице́мъ Свои́мъ угото́вати пути́ Его́, креще́ніемъ покая́нія во оставле́ніе грѣхо́въ, провозвѣ́стниче, испра́ви стези́ заблужде́нія моли́твами твои́ми.

Сла́ва и ны́нѣ:

Преклони́вшися свы́ше Всецари́ца Ма́ти и Дѣ́ва, благослове́ньми вѣнча́етъ воспѣва́ющихъ Ю, и си́це моля́щихся: Наде́ждо христіа́нъ, сподо́би смире́нныхъ на́съ небе́снаго Ца́рствія, ничто́же бо не возмо́жно хода́тайству Твоему́.

Тропа́рь Предте́чи [пи́санъ на вели́цѣй вече́рни]. Сла́ва и ны́нѣ, богоро́диченъ.



НА ВЕЛИЦѢЙ ВЕЧЕРИ,
По обы́чномъ псалмѣ́ пое́мъ: Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 5:

Ру́ку твою́, прикосну́вшуюся пречи́стому верху́ Влады́чню, съ не́ю же и пе́рстомъ Того́ на́мъ показа́лъ еси́, воздѣжи́ о на́съ къ Нему́, Крести́телю, я́ко дерзнове́ніе имѣ́я мно́го, и́бо бо́лій проро́ковъ всѣ́хъ отъ Него́ свидѣ́тельствованъ еси́. Очи же твои́ па́ки Всесвята́го Ду́ха ви́дѣвшія, я́ко въ ви́дѣ голуби́нѣ соше́дша, воздви́гни къ Нему́, Крести́телю, и ми́лостива на́мъ содѣ́лай, и пріиди́, ста́ни съ на́ми, запеча́таяй пѣ́ніе и предначина́яй торжество́.

Пе́рвѣе къ антіохíйскому наро́ду рука́ твоя́ благода́тная я́ко да́ръ боже́ственный Луко́ю евангели́стомъ пренесе́ся, та́же восто́чнымъ царе́мъ Багряноро́днымъ дарова́ся. Ны́нѣ же отъ за́пада прихо́дитъ благослови́ти Ца́рствующій До́мъ Россíйскаго Благочести́вѣйшаго Самоде́ржца, излива́я струи́ Боже́ственныя благода́ти. Крести́телю Христо́въ, всѣ́хъ на́съ помяни́, да изба́вимся отъ бѣ́дъ и скорбе́й; тебѣ́ бо даде́ся благода́ть моли́тися за ны́.

Да устро́иши пути́ Госпо́дни, и стези́ пра́вы сотвори́ши Бо́гу въ человѣ́цѣхъ, да угото́виши Го́сподеви лю́ди россíйскія соверше́нны; пре́жде прише́ствія твоего́ посыла́еши къ ни́мъ свяще́нные да́ры твоя́, благослове́ніемъ твои́мъ учрежда́я въ ни́хъ держа́вный чи́нъ свята́го и́мени твоего́, послѣди́ же, а́ки са́мъ съ небесе́ я́вѣ приходя́ посѣти́ти избра́нный тобо́ю христіа́нскій наро́дъ, десни́цу твою́ боже́ственную, нетлѣ́ніемъ просла́вленную, подае́ши на́мъ, Крести́телю, во е́же просвѣти́ти и озари́ти мы́сли вѣ́рныхъ и укрѣпи́ти въ благоче́стіи. Тѣ́мже духо́вными пѣ́сньми вси́ согла́сно тебѣ́ вопіе́мъ: проро́че и проповѣ́дниче Истины! моли́ спасти́ся Импера́тору на́шему и гра́ду, и всѣ́мъ лю́демъ Держа́вы Его́.

Дне́сь возсія́ въ концѣ́хъ сѣ́верныхъ, я́ко свѣтоно́сное со́лнце, рука́ твоя́ честна́я, Крести́телю! Агнца Бо́жія пло́тію яви́вшагося, всѣ́мъ показа́вшая, и покая́нія спаси́тельныя пути́; ю́же, я́ко сокро́вище Боже́ственныхъ даро́въ, вѣ́рою пріе́млюще и со стра́хомъ прикаса́ющеся, и покланя́ющеся любо́вію духо́вною, пріе́млемъ отъ тебе́, Христо́въ Предте́че, исто́чникъ исцѣле́ній, просвѣще́ніе ду́шъ, благода́ть утѣше́нія и ве́лію ми́лость.

Торжеству́етъ духо́вно лику́ющи Христо́ва Це́рковь въ приня́тіи моще́й твои́хъ, Предте́че, Ца́рствующій До́мъ и гра́дъ освяща́ется скипетродержа́вный, и наслѣ́діе Его́ весели́тся, и со всѣ́ми людьми́ вопіе́тъ: Крести́телю Христо́въ! Ты́ моя́ крѣ́пость и утвержде́ніе, ты́ моя́ добро́та и тобо́ю хвалю́ся, моли́ Христа́ Бо́га спасти́ любо́вію тя́ сла́вящія.

Іису́съ одолѣва́ше и побѣжда́ше Амали́ка, егда́ ру́цѣ Моисе́евы просте́ртыя въ моли́твѣ ко Го́споду поддержа́ста Ааро́нъ и Оръ; та́ко сотвори́ Госпо́дь россíйскому во́инству побѣжда́ти всегда́ и одолѣва́ти враги́, егда́ Благочести́вѣйшіе Па́велъ и Марíя твою́ пречи́стую ру́ку пріе́мше, держа́ху, и усе́рднѣ лобыза́ху, прося́ще съ вѣ́рою по́мощи во бране́хъ и побѣ́ды на сопроти́вныя.

Бе́здна неисчерпа́емыя Бо́жія бла́гости, за приня́тіе съ вѣ́рою и благоговѣ́ніемъ десни́цы проро́ка, мзду́ проро́чу вско́рѣ воздае́тъ Самоде́ржцу, благослове́ніемъ и сопряже́ніемъ десни́цъ Благовѣ́рныхъ Его́ дще́рей, Ихъ же да сохрани́тъ, си́це благоволи́вый Бо́гъ, моли́твами твои́ми, Предте́че.

Ефре́ма и Манассíю цѣлому́дренный Іо́сифъ приво́дитъ къ патріа́рху Іа́кову, да благослове́ніемъ и возложе́ніемъ ру́къ свята́го Изра́иля сни́детъ вседѣ́йствующее Бо́жіе благослове́ніе на сыны́ его́; Высокодержа́вный же восто́чнаго Правосла́вія Защи́тникъ, напу́тствуя Дще́ри Своя́, приво́дитъ Ку́юждо во святы́й хра́мъ поста́вити предъ Го́сподемъ, и подклоня́я и́хъ подъ твою́, всеблаже́нне, многомо́щную десни́цу, мо́литъ тя́ со слеза́ми, Крести́телю, да твои́хъ ра́ди заслу́гъ сни́детъ на Ни́хъ всеси́льное благослове́ніе Всевы́шняго.

Сла́ва, гла́съ то́йже:

Ве́лія сла́ва твоя́, достохва́льне Предте́че, десни́цѣ твое́й главу́ Свою́ преклони́ Іису́съ, Госпо́дь госпо́дствующихъ и Влады́ка владѣ́ющихъ. Ве́ліе человѣколю́біе Свое́ Всеблагíй Бо́гъ показа́ на на́съ, егда́ благоизво́ли сію́ дарова́ти на́мъ, я́ко богосвѣ́тлое украше́ніе и утвержде́ніе, за благоче́стіе Христолюби́ваго Пома́занника и Супру́ги Его́, тѣ́мже ра́достно воспое́мъ Промысли́телю на́шему сію́ хвале́нія пѣ́снь: ве́лій еси́, Го́споди, и чу́дна дѣла́ Твоя́.

И ны́нѣ, богоро́диченъ, гла́съ 8:

Пе́рвѣе написа́вшейся Твое́й ико́нѣ ева́нгельскихъ та́инъ благовѣ́стникомъ и къ Тебѣ́, Цари́цѣ, принесе́ннѣй, да усво́иши ту́ и си́льну содѣ́лаеши спасти́ честву́ющія Тя́. И пора́довалася еси́, я́ко су́щи ми́лостива спасе́нія на́шего Содѣ́тельница, и, на ту́ зря́щи, глаго́лала еси́ со вла́стію: съ си́мъ о́бразомъ благода́ть Моя́ и си́ла. И мы́ и́стинно вѣ́руемъ, я́ко се́ рекла́ еси́, Госпоже́. Си́мъ о́бразомъ съ на́ми пребу́ди, ему́же благоговѣ́йно предстоя́ще, покланя́емся Тебѣ́, раби́ Твои́, посѣти́ ны́ ма́терними Твои́ми щедро́тами.

Вхо́дъ. Проки́менъ дне́, и чте́нія три́.

Исхо́да чте́ніе. [Глава́ 14.]

Рече́ Госпо́дь къ Моисе́ю: возми́ же́злъ тво́й и простри́ ру́ку твою́ на мо́ре, и расто́ргни е́. Простре́ же Моисе́й ру́ку на мо́ре, и разступи́ся вода́. И внидо́ша сы́нове Изра́илевы посредѣ́ мо́ря по су́ху; и вода́ и́мъ бы́сть стѣна́ одесну́ю и стѣна́ ошу́юю. Погна́ша же еги́птяне, и внидо́ша въ слѣ́дъ и́хъ вся́къ ко́нь фарао́новъ, и колесни́цы, и вса́дники посредѣ́ мо́ря. И простре́ Моисе́й ру́ку на мо́ре, и устро́ися вода́ ко дню́ на мѣ́сто; еги́птяне же бѣжа́ша подъ водо́ю. И, обрати́вшися, вода́ покры́ колесни́цы, и вса́дники, и всю́ си́лу фарао́нову, вше́дшихъ въ слѣ́дъ и́хъ въ мо́ре, и не оста́ отъ ни́хъ ни еди́нъ. Сы́нове же Изра́илевы проидо́ша по су́ху посредѣ́ мо́ря.

Ца́рствъ тре́тіихъ чте́ніе. [Глава́ 8.]

Ста́ Соломо́нъ предъ лице́мъ же́ртвенника Госпо́дня, предъ всѣ́мъ собо́ромъ Изра́илевымъ. И воздѣ́въ ру́цѣ свои́ на не́бо, рече́: Го́споди Бо́же Изра́илевъ! нѣ́сть Бо́гъ, я́коже Ты́, на небеси́ горѣ́ и на земли́ ни́зу. Аще не́бо, и не́бо небесе́ не довлѣ́ютъ Тебѣ́, кольми́ па́че хра́мъ се́й, его́же созда́хъ и́мени Твоему́? И да при́зриши на моли́тву мою́, Го́споди Бо́же Изра́илевъ, е́юже мо́лится ра́бъ Тво́й предъ Тобо́ю къ Тебѣ́ дне́сь. Да бу́дутъ о́чи Твои́ отве́рсты на хра́мъ се́й де́нь и но́щь, на мѣ́сто сіе́, о не́мже ре́клъ еси́: бу́детъ и́мя Мое́ та́мо, е́же услы́шати моли́тву, е́юже мо́лится ра́бъ Тво́й на мѣ́стѣ се́мъ, во дни́ и но́щи. И услы́шиши мольбу́ раба́ Твоего́ и люде́й Твои́хъ Изра́иля, о ни́хъ же помо́лятся на мѣ́стѣ се́мъ, и Ты́ услы́шиши на мѣ́стѣ обита́лища Твоего́ на небеси́; и сотвори́ши, и ми́лостивъ и́мъ бу́деши.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. Узрятъ бо кончи́ну пра́веднаго и не разумѣ́ютъ, что́ совѣ́това о не́мъ, и во что́ утверди́ его́ Госпо́дь: пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ проти́ву беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ, и ужа́снутся о пресла́вномъ спасе́ніи его́. И реку́тъ бо въ себѣ́, ка́ющеся: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? Убо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ.

На литíи стихи́ры, гла́съ 1:

Гла́съ сы́й Вопію́щаго въ пусты́ни, проро́къ и учи́тель, обличи́лъ еси́ велехва́льныя фарисе́и, глаго́ля къ ни́мъ: порожде́нія ехи́днина, сотвори́те плоды́ досто́йны покая́нія. Ны́нѣ боже́ственною десни́цею твое́ю, правосла́вными россія́нами любе́знѣ почита́емою, показу́еши я́сно пе́рстъ Бо́жій, наказу́ющій нече́стіе презри́телей вѣ́ры, отве́ргшихъ тя́, отягоща́ющи надъ ни́ми ру́ку благочести́ваго Импера́тора, и расточа́ющи и́хъ я́ко о́вцы, неиму́щія па́стыря, — пока́йтеся, — вопія́, да не когда́ во вѣ́ки прогнѣ́вается Госпо́дь, и поги́бнете отъ пути́ пра́веднаго.

Богоотсту́пный Іуліа́нъ, лютѣ́йшій зло́бою Ирода, тща́шися истреби́ти въ правовѣ́рныхъ всю́ святы́ню, иска́ше сожещи́ ру́ку твою́, Предте́че; но вотще́ шата́яся вско́рѣ поги́бе съ шу́момъ нечести́вый. Побо́рникъ же благоче́стія Россíйскій Самоде́ржецъ, благоговѣ́йно сію́ почита́я, я́ко свѣти́льникъ на свѣ́щницѣ, во святѣ́мъ хра́мѣ Ца́рствующаго До́му Своего́ поставля́етъ ю́, и храни́тъ святолѣ́пно; тѣ́мже утверди́ти Ца́рство Его́ въ ми́рѣ, и сохрани́ти наслѣ́діе и вся́ лю́ди Его́ моли́ся, Предте́че, те́плый предста́телю на́шъ ко Го́споду.

Любо́вію угото́вавшаго тебѣ́ златокова́нный ковче́гъ благолѣ́пнѣйшій, въ не́мъ же свята́я десни́ца твоя́ че́стнѣ положи́ся, воздая́ бога́тно приноше́нія, хра́мъ Ду́ха Боже́ственнаго сотвори́ хода́тайствы твои́ми, Крести́телю, заре́ю Бо́жія прему́дрости освѣща́я во вся́ дни́, во е́же суди́ти вруче́нныя Ему́ лю́ди непоползнове́нно.

Ко́ль бла́гъ Бо́гъ Изра́илевъ пра́вымъ се́рдцемъ, пре́жде е́же роди́тися прови́дящій изъ дале́че досто́йныхъ Того́ благода́ти, чудодѣ́йствующую бо въ да́льнихъ страна́хъ десни́цу пра́ведника, взима́я отъ лица́ непра́вды и ущедря́я, Его́ же восхотѣ́ уще́дрити, вруча́етъ напослѣ́докъ дне́й многобога́тый да́ръ се́й Боговѣнча́нному Царю́, Благочести́вѣйшему па́че царе́й земны́хъ, та́йно вѣща́я: пріими́ зало́гъ Моея́ благода́ти, благода́ти Тезоимени́таго. Се́ да́хъ его́ стра́жа До́му Твоему́, ви́ждь, я́ко рука́ Моя́ сотвори́ сія́ вся́.

Сла́ва, гла́съ 8:

Да́ждь сла́ву Бо́гу твоему́, Россíе! Яко Просла́вивый тебе́ досе́лѣ мно́жествомъ святы́хъ, не оставля́етъ прославля́ти и ны́нѣ. Се́ бо многоцѣ́нное сокро́вище, въ разли́чныхъ страна́хъ досе́лѣ сокрыва́емое, благоизво́ли дарова́ти тебѣ́ многочуде́сную ру́ку Предте́чеву, ору́жіе ми́рно, утвержде́ніе держа́вно, стѣ́ну необори́му и невреди́мое сопроти́вными огражде́ніе Ца́рствующему но́вому Сіо́ну.

И ны́нѣ, гла́съ 2:

Предстоя́ предъ Твои́мъ, Всечи́стая, о́бразомъ ца́ріе и кня́зи и все́ христоимени́тое люде́й мно́жество, досто́йно блажа́тъ Тя́, Ма́терь Бо́жію, и прославля́ютъ раболѣ́пно, и честву́ютъ и мо́лятся Тебѣ́ по Бо́зѣ, да мíръ умири́ши въ правосла́віи, и ца́рствія ски́птры утверди́ши, и спасе́ши отъ всѣ́хъ зо́лъ Твоя́ рабы́, еди́на Благослове́нная.

На стихо́внѣ стихи́ры, гла́съ 2:

Дѣ́йствуяй вся́ во всѣ́хъ, Бо́же, неизрече́нную ми́лость Твою́ яви́лъ еси́ на́мъ, подая́ благослове́ніе руко́ю проро́ковъ верхо́внѣйшаго, о всѣ́хъ дѣ́лѣхъ Твои́хъ благодаре́ніе Тебѣ́ прино́симъ.

Сти́хъ: Благослове́нъ Госпо́дь Бо́гъ Изра́илевъ, я́ко посѣти́ и сотвори́ избавле́ніе лю́демъ Свои́мъ.

Ве́сь богоно́сенъ яви́лся еси́, Крести́телю, егда́ руко́ю твое́ю прикосну́лся еси́ верху́ Влады́чню, слу́хомъ же Роди́телевъ гла́съ слы́ша и очи́ма соше́ствіе Свята́го Ду́ха узрѣ́лъ еси́, тѣ́мъ же и на́съ, почита́ющихъ богоно́снаго тѣ́ла твоего́ оста́нки, сотвори́ сосу́ды че́стны къ прія́тію даро́въ Боже́ственныя благода́ти.

Сти́хъ: И ты́ проро́къ Вы́шняго нарече́шися.

Пе́рстомъ десни́цы твоея́ дре́вле показа́лъ еси́ лю́демъ гряду́щаго къ тебѣ́ крести́тися Агнца Бо́жія, взе́млющаго грѣхи́ всего́ мíра; ны́нѣ же предлежа́щими пе́рсты, нетлѣ́ніемъ сія́ющими, и благоче́стно отъ всѣ́хъ почита́емыми, загла́дивъ невѣ́дѣнія начерта́ніе, напиши́ на скрижа́лехъ серде́цъ на́шихъ боговѣ́дѣніе покланя́емыя Тро́ицы.

Сла́ва, гла́съ 8:

Неизче́тный въ ми́лости, Бо́же на́шъ! Пра́ведныхъ ра́ди обѣща́вый не погуби́ти грѣ́шныя на земли́, повелѣ́лъ еси́ ты́я въ моли́тву призыва́ти, и ны́нѣ, моля́щеся Тебѣ́, Благоутро́бне, приво́димъ въ моли́тву честна́го проро́ка Твоего́ уго́дника, да его́ ра́ди пощади́ши на́съ, избавля́я отъ всѣ́хъ искуше́ній и бѣ́дъ, и спесе́ши ду́ши на́ша.

И ны́нѣ, гла́съ то́йже:

Крѣ́пкое заступле́ніе и стѣ́ну неруши́му стяжа́вше, всечестну́ю и чудотво́рную ико́ну Твою́, Богома́ти, мо́лимъ Тя́, побѣ́ды на враги́ правовѣ́рному Импера́тору на́шему дарова́ти и спасти́ достоя́ніе Твое́.

На благослове́ніи хлѣ́бовъ, Тропа́рь гла́съ 2:

Па́мять пра́веднаго съ [похвала́ми, тебѣ́ же довлѣ́етъ свидѣ́тельство Госпо́дне, Предте́че: показа́лъ бо ся еси́ вои́стинну и проро́ковъ честнѣ́йшій, я́ко и въ струя́хъ крести́ти сподо́бился еси́ Проповѣ́даннаго. Тѣ́мже за и́стину пострада́въ, ра́дуяся, благовѣсти́лъ еси́ и су́щимъ во а́дѣ Бо́га, я́вльшагося пло́тію, взе́млющаго грѣ́хъ мíра и подаю́щаго на́мъ ве́лію ми́лость].

Или се́й, гла́съ 4:

Отъ за́пада возсія́вши Предте́чева рука́, лучи́ испуща́етъ нетлѣ́нія вѣ́рнымъ исцѣле́ній, свы́ше собира́етъ мно́жество а́нгелъ, до́лѣ же созыва́етъ человѣ́ческій ро́дъ, единогла́сно возсыла́ти сла́ву Христу́ Бо́гу. [Два́жды.]

И Богоро́дице Дѣ́во... [Еди́ножды.]



НА УТРЕНИ,
На Бо́гъ Госпо́дь: Тропа́рь Предте́чи, два́жды. Сла́ва и ны́нѣ, богоро́диченъ воскре́сенъ по гла́су тропаря́.

По 1-й каѳи́смѣ сѣда́ленъ, гла́съ 4:

Вои́стину проро́ковъ бо́льшій наре́клся еси́, Іоа́нне: они́ бо по рождествѣ́ свое́мъ проро́чествоваша, ты́ же, Крести́телю, еще́ сы́й во чре́вѣ ма́тере, сподо́бился еси́ такова́го да́ра, и бы́лъ еси́ пе́рвѣйшій благовѣ́стникъ воплоти́вшагося Изба́вителя, устна́ми бо ма́тере твоея́, богоизбра́ннѣй Открокови́цѣ вѣща́лъ еси́: отку́ду мнѣ́ сіе́, да пріи́де Ма́ти Го́спода моего́ ко мнѣ́? Сего́ ра́ди вопіе́мъ тебѣ́: ра́дуйся, зерца́ло, та́йны Бо́жія на́мъ явля́ющее. [Два́жды.]

Сла́ва, и ны́нѣ, богоро́диченъ:

Тебѣ́ вси́ ро́ди человѣ́честіи хва́льныя да́ры прино́сятъ, Влады́чице, и мо́лятся я́ко Цари́цѣ и Ма́тери Бо́жіей: покры́й и соблюди́, Госпоже́, моли́твами Твои́ми, и спаси́ отъ бѣ́дъ ду́ши на́ша.

По 2-й каѳи́смѣ сѣда́ленъ, гла́съ 8:

Похвали́ Бо́га твоего́, гра́де Петро́въ, и да возвесели́тся се́рдце Пома́занника Бо́жія; я́ко благоизво́ли Вы́шній въ благополу́чное Ца́рство Его́ дарова́ти на́мъ десни́цу покая́нія проповѣ́дника, въ рожде́нныхъ жена́ми бо́льшаго, Іоа́нна, покрыва́ющаго и защища́ющаго гра́дъ и лю́ди, его́же почита́юще, возвели́чимъ Бо́га на́шего, да́вшаго на́мъ свяще́нный зало́гъ ми́лости Своея́. [Два́жды.]

Сла́ва, и ны́нѣ, богоро́диченъ:

Покланя́ющеся о́бразу Твоему́, Богома́ти, вѣ́рніи раби́ Твои́, мо́лимъ Тя́, въ де́нь Су́дный изба́вити на́съ, и сподо́бити Ца́рствія небе́снаго, Марíе благослове́нная, правосла́вныхъ похвало́.

Та́же поліеле́йные псалмы́, по се́мъ велича́ніе:

Велича́емъ тя́, Крести́телю Спа́совъ Іоа́нне, и почита́емъ вси́ честны́я твоея́ руки́ пренесе́ніе.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Сти́хъ: Напра́вити но́ги на́ша на пу́ть ми́ренъ.

По поліеле́и сѣда́ленъ, гла́съ 8:

Зако́на гла́си нея́сни бы́ша и косноглаго́ланіе Моисе́ево словеса́ благода́ти въ гада́ніихъ изъяви́; ты́ же нача́ло Ева́нгелія сы́й, свѣ́тлый гла́съ Вопію́щаго наре́клся еси́, я́ко бо возвѣсти́лъ еси́ прише́дшаго въ мíръ Спаси́теля, Его́же моли́ о на́съ, Предте́че. [Два́жды.]

Сла́ва, и ны́нѣ, богоро́диченъ:

Приступи́те съ весе́ліемъ, богоизбра́нніи и христолюби́віи лю́діе, и честны́й о́бразъ Богома́тере любе́зно пріими́те; се́ бо щедро́тъ мо́ре неизчерпа́емое, исто́чникъ сла́дкій излива́етъ благода́ти, отъ него́ вси́ спасе́ніе почерпа́емъ.

Та́же степе́нна, 1-й антифо́нъ 4-го гла́са. Проки́менъ, [гла́съ 4]: Та́мо возращу́ ро́гъ Дави́дови,* угото́вахъ свѣти́льникъ пома́занному Моему́. Сти́хъ: Враги́ Его́ облеку́ студо́мъ, на Не́мже процвѣте́тъ святы́ня Моя́. Ева́нгеліе отъ Луки́, зача́ло 31.

По 50-мъ псалмѣ́ стихи́ра самогла́сна, гла́съ 6:

Плотска́го прише́ствія Христо́ва нача́ло, проро́ковъ коне́цъ и гла́съ Сло́ва сы́й, взыва́лъ еси́: пока́йтеся, прибли́жися бо Ца́рство небе́сное; тѣ́мже угото́вавый пути́ Госпо́дни, благода́ти предше́ственникъ яви́лся еси́, Крести́телю и Апо́столе, моли́ Христа́ Бо́га, прегрѣше́ній оставле́ніе дарова́ти пра́зднующимъ любо́вію па́мять твою́.

Кано́нъ Предте́чи со ирмосо́мъ на 8, гла́съ 1.

Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяномъ пу́ть глубины́ новосодѣ́лавшая.

Устнѣ́ нечи́сты, и се́рдце, и гла́съ недосто́йный дви́жу къ тебѣ́ на моле́ніе, Крести́телю Христо́въ, но ты́ гла́съ Сло́ва и орга́нъ Ду́ха Бо́жія сы́й, потщи́ся на по́мощь, се́рдце просвѣти́, у́мъ мо́й озари́ свѣ́томъ богоразу́мія, и сло́во ми́ вдохни́, да возмогу́ воспѣ́ти съ любо́вію вели́чія твоя́.

Въ моли́твахъ Го́сподеви предстоя́, я́коже звѣзда́ Со́лнцу предтекíй, ра́дости небе́снаго рая́ неизрече́нныя исполня́яся, Безсме́ртному Царю́, въ безконе́чныя вѣ́ки отъ а́нгелъ безпреста́нно хва́лимому, присносу́щное съ ни́ми возсыла́я словосло́віе, помяни́ на́съ на земли́ призыва́ющихъ тя́, Крести́телю.

Дру́гъ и́скренній Влады́ки бы́въ, Крести́телю всеблаже́нне, укрѣпи́ на́съ люби́ти Его́ нра́вомъ пра́вымъ и страсте́й тлѣтво́рныхъ возгнуша́тися, порѣва́ющихъ къ поги́бели.

Сла́ва: Вино́вное спасе́нія на́шего всечестно́е дре́во Креста́, предлежа́щее ви́дяще, вѣ́рніи почти́мъ и ра́достно облобыза́емъ, источа́ющее на́мъ освяще́ніе, и жи́знь, и лю́тыхъ избавле́ніе.

И ны́нѣ, богоро́диченъ: Якоже родство́мъ есте́ственнымъ совоку́плени, та́ко и моли́твеннымъ согла́сіемъ, вы́ еди́но су́ще, Ма́ти всѣ́хъ Царя́ и боже́ственный Предте́че, мольбу́ сотвори́те вку́пѣ къ благоувѣ́тливому Влады́кѣ, да ва́шими хода́тайствы прекло́нься, уще́дритъ и спасе́тъ лю́ди Своя́.

Пѣ́снь 3.

Ирмо́съ: Еди́не, вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й, одушевле́нный хра́ме неизрече́нныя сла́вы Твоея́, Человѣколю́бче.

По́двигомъ до́брѣ подвиза́вся, тече́ніе сконча́въ ме́чнымъ усѣкнове́ніемъ, во свѣ́тлости Небе́снаго Іерусали́ма вни́ти и ликовствова́ти съ безпло́тными сподо́бился еси́; и ны́нѣ съ небе́съ простира́я къ на́мъ оте́ческія объя́тія, руко́ю твое́ю привлещи́ всѣ́хъ въ огра́ду Христо́ву потщи́ся, Крести́телю, наставля́я на пу́ть покая́нія тебе́ велича́ющія.

Свы́ше на́съ ны́нѣ назира́я, всеблаже́нне, твои́ми моли́твами отъ тли́ и бѣ́дъ сохрани́, боже́ственному проповѣ́данію твоему́ вѣ́рно послѣ́дующихъ, и пребыва́ющихъ во уче́ніи спаси́тельныхъ твои́хъ догма́товъ.

Бо́лій въ рожде́нныхъ жена́ми, имену́емый отъ Прему́дрости Вѣ́чныя, бу́ди на́мъ прему́дрости и смы́сла хода́тай; да сподо́бимся съ му́дрыми дѣ́вами вни́ти въ черто́гъ вѣ́чныя Боже́ственныя Сла́вы.

Сла́ва: Жезло́мъ чуде́снымъ, Креста́ зна́меніемъ отъ ка́мене непло́дна во́ду лю́демъ Твои́мъ источи́вый, Бо́же, отъ непло́дныя Елисаве́ты покая́нія проповѣ́дателя мíру дарова́въ, десни́цею его́ на́съ обогати́лъ еси́, вся́ пресла́вна Твоя́, всеси́льный Влады́ко.

И ны́нѣ, богоро́диченъ: Яко вѣнце́мъ пресвѣ́тлымъ благоукраша́ется гра́дъ на́шъ, Богороди́тельнице, о́бразомъ Твои́мъ честны́мъ, па́че лу́чь со́лнечныхъ сія́ющимъ и просвѣща́ющимъ хва́лящія Тя́.

Пѣ́снь 4.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Съ во́инствы небе́сными водворя́яся, богому́дре, Христа́ умоли́ съ ни́ми спасти́ на́съ на земли́ су́щихъ, почита́ющихъ тя́ въ честнѣ́мъ хра́мѣ се́мъ, Госпо́день Предте́че.

Свѣти́льниче Свѣ́та невече́рняго, уга́сшій благи́хъ дѣ́лъ свѣти́льникъ возжги́ въ душа́хъ на́шихъ, огне́мъ твои́хъ моли́твъ, да я́сно узрѣ́вше свѣ́тъ повелѣ́ній Созда́вшаго, стопы́ на́ша напра́вимъ по словеси́ Его́.

Бе́здну милосе́рдія въ струя́хъ Іорда́нскихъ погрузи́вый руко́ю твое́ю, Крести́телю, исто́чники сле́зъ пода́ждь, разже́нія сласте́й погаша́ющія, и грѣхи́ очища́ющія.

Сла́ва: Непови́нно закла́нъ бы́лъ еси́, я́ко а́гнецъ незло́бивъ, боже́ственный Предте́че, непоро́чная и свяще́нная же́ртва Творцу́ прине́слся еси́, тѣ́мже вѣ́рою тя́ мо́лимъ, и на́съ возноси́ти же́ртвы духо́вныя Бо́гу наста́ви.

И ны́нѣ, богоро́диченъ: Не отри́ни моле́ній на́шихъ, Влады́чице Чи́стая, но посѣти́ ми́лостію рабы́ Твоя́, покланя́ющіяся о́бразу Твоему́, упова́ніе христіа́нъ, въ ми́рѣ житіе́ на́ше соблюди́ и пода́ждь спасе́ніе необори́мое.

Пѣ́снь 5.

Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый Кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія, правосла́вно пою́щихъ Тя́.

Ди́венъ Бо́гъ во святы́хъ Свои́хъ творя́й чудеса́: ко́сти бо ме́ртвыя Елисѣ́евы ме́ртваго воскреси́ша, рука́ми Па́вловыми мно́ги отъ неду́гъ и духо́въ злы́хъ исцѣлева́хуся, рука́ же Крести́телева бо́льшая источа́етъ чудеса́, и подае́тъ исцѣле́нія вѣ́рою почита́ющімъ ю́ и благоговѣ́йно лобыза́ющимъ.

Прибли́жився Свѣ́ту кра́йнему, свѣ́тъ вторы́й по Боже́ственному причаще́нію бы́лъ еси́ вои́стину, тѣ́мже ра́дующеся свѣ́тлую и благонаро́читую па́мать твою́ соверша́емъ, и мо́лимъ тя́, Крести́телю: просвѣти́ ду́ши на́ша дарова́ніями Вседѣ́тельнаго Ду́ха.

Не хода́тай, ни а́нгелъ, но Са́мъ Госпо́дь спасе́ на́съ, прише́дый въ мíръ, Ему́же пра́выя пути́ по́сланъ бы́лъ еси́ угото́вати, блаже́нне. Того́ ны́нѣ умоли́, Крести́телю, показа́ти и на́мъ стезю́, къ Ца́рствію небе́сному наставля́ющую.

Сла́ва: Го́ресть во́дъ дре́вле услажда́я Моисе́й, дре́вомъ сохрани́ евре́йскія лю́ди, о́бразъ Креста́ проначерта́я, сему́ вѣ́рніи покланя́ющеся, го́рести и ско́рби вся́кія избавля́емся.

И ны́нѣ, богоро́диченъ: Се́ прихо́дитъ Дѣ́ва, всѣ́хъ проро́ковъ превы́шши, честны́мъ о́бразомъ Свои́мъ, Зижди́теля мíру ро́ждшая, гра́дъ Сво́й сохрани́ти и спасти́ достоя́ніе Свое́.

Пѣ́снь 6.

Ирмо́съ: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ нетлѣ́нія, Ро́ждшую сохрани́ неврежде́нну.

Гла́съ вопію́щаго Бо́га нарече́нъ бы́лъ еси́, Предте́че Госпо́день; тѣ́мже я́ко уста́ Бо́жія, кто́ не восхва́литъ тя́?

Вѣ́ру благочести́вую въ Сы́на Бо́жія, запустѣ́вшимъ сердца́мъ проповѣ́далъ еси́, проро́че благода́ти; непло́діе ду́шъ на́шихъ, отъ тли́ грѣхо́вныя изсыха́емыхъ на вся́къ де́нь, отрѣби́ руко́ю твое́ю пречи́стою, да бу́демъ древеса́ принося́щая пло́дъ живы́я вѣ́ры, Вседержи́телю.

Волна́ми жите́йскими обурева́еми, и въ страсте́хъ разли́чныхъ погружа́еми, подъ кро́въ тво́й прибѣга́емъ, вели́кій Іоа́нне, потщи́ся помощи́ рабо́мъ твои́мъ, и къ спасе́нія благооти́шному приста́нищу наста́ви.

Сла́ва: Пріими́ отъ души́ моля́щихся тебѣ́, Христе́, и да́ждь на́мъ по́мощь Твою́ свы́ше, я́коже иногда́ ученико́мъ Твои́мъ на мо́ри, и отъ бѣ́дъ изба́ви на́съ, моле́ніемъ Твоего́ Предте́чи.

И ны́нѣ, богоро́диченъ: Предъ о́бразомъ Твои́мъ, Богома́ти, пролива́емъ серде́чная моле́нія на́ша недосто́йніи, помози́, Влады́чице, усе́рдно моля́щимся Тебѣ́, и изба́ви отъ всѣ́хъ бѣ́дъ и зо́лъ сла́вящихъ Тя́; кто́ бо, Всеми́лостивая, съ вѣ́рою призыва́яй Тя́, посра́мленъ и неуслы́шанъ отъ Тебе́ изы́де?

Конда́къ, гла́съ 6:

Умнаго Со́лнца свѣти́льникъ боже́ственный Предте́ча, показа́вый въ концѣ́хъ свѣтоно́сную свою́ десни́цу, ны́нѣ на сѣ́верѣ озаря́етъ е́ю блаже́нное Оте́чество на́ше, и просвѣща́я и освя́щая вѣ́рно покланя́ющихся, и Христу́ вопію́щихъ: спаси́ на́съ моли́твами проро́ка Твоего́, Царю́ Вы́шній.

Икосъ:

Но́вый ра́й явля́ется Боже́ственный хра́мъ се́й, въ о́ньже съ вѣ́рою и благоговѣ́ніемъ вхо́дитъ бесѣ́довати съ Созда́телемъ свои́мъ пе́рвый человѣ́къ. Рѣка́ бо даро́въ Боже́ственныя благода́ти, раздѣля́ющаяся въ четы́ре нача́ла, исхо́дитъ изъ Еде́ма небе́снаго напая́ти его́: исто́чникъ жи́зни, нетлѣ́нія и спасе́нія излива́етъ всѣ́мъ нерукотворе́нное начерта́ніе Спаси́теля на́шего; пото́къ ми́лостей и щедро́тъ, и сро́днаго о христіа́нѣхъ промышле́нія исхо́дитъ отъ святы́я Богома́тере ико́ны; дре́во Креста́, на не́мже спасе́ніе соверши́ся, источа́етъ во́ду, услажда́ющую го́ресть вкуше́нія заповѣ́даннаго; струи́ же те́плыхъ моли́твъ теку́тъ оби́льно отъ Предте́чевы десни́цы, во струя́хъ Іорда́нскихъ сподо́бившіяся крести́ти Просвѣти́теля на́шего. Вся́ земля́ Россíйская да покло́нится Тебѣ́ и да пое́тъ Тебѣ́, Царю́ Вы́шній.

Пѣ́снь 7.

Ирмо́съ: Тебе́, у́мную, Богоро́дице, пе́щь, разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Прославля́яй Госпо́дь Того́ сла́вящія, нетлѣ́ніемъ просла́вленную десни́цу твою́, подаде́ вѣ́рнымъ прибѣ́жище благонаде́жно, ю́же просте́рши, пода́ждь на́мъ по́мощь отъ Свята́го, и да́ждь безбѣ́дно во благоче́стіи жи́знь соверши́ти сла́вящимъ тя́.

Твои́ми моли́твами немощнíи врачу́ются, де́мони отгоня́ются, и вся́ ско́рби рѣша́тся, сего́ ра́ди тя́ почита́емъ, Предте́че Госпо́день, Россíи похвало́, крѣ́пость, и огражде́ніе, и утвержде́ніе.

Пригвожде́нъ у́мъ къ земны́мъ веще́мъ имѣ́я, что́ сотвори́мъ, и къ кому́ прибѣ́гнемъ и́щущіи по́мощи? Ра́звѣ къ тебѣ́, святы́й Іоа́нне, благода́ти тезоимени́те, не отри́ни на́съ отъ твоего́ заступле́нія, но возста́ви и обнови́ покая́ніемъ, и пону́ди со избра́нными вни́ти, а́може ничто́же скве́рно вхо́дитъ, въ Ца́рство небе́сное.

Сла́ва: Умири́ мíръ, Христе́, мольба́ми Предте́чи Твоего́, низлага́я враго́въ си́лу подъ но́ги вѣ́рнаго Импера́тора на́шего, и тишину́ неизглаго́ланную устроя́я Ца́рству Его́, во вѣ́ки сохрани́.

И ны́нѣ, богоро́диченъ: Образу Твоему́ покланя́ющимся и призыва́ющимъ Тя́ во обстоя́ніихъ лю́тыхъ, помози́, Влады́чице, упова́ніе и спасе́ніе всѣ́хъ человѣ́ковъ; ины́я бо предста́тельницы ра́звѣ Тебе́, по Бо́зѣ не и́мамы.

Пѣ́снь 8.

Ирмо́съ: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Присносу́щныя и неизрече́нныя Сла́вы и Свѣ́та невече́рняго наслажда́яся, идѣ́же неизглаго́ланное е́сть весе́ліе и ра́дость непреста́нная, простира́ющихъ къ тебѣ́ моле́ній гла́сы услы́ши, Крести́телю, и сподо́би моли́твами твои́ми прича́стниками бы́ти вѣ́чныя Боже́ственныя Сла́вы.

Ду́хомъ и си́лою Иліино́ю предходя́ Христу́, бы́лъ еси́, прему́дре, не тро́сть проти́вными вѣ́тры коле́блема, но сто́лпъ и на́ше Боже́ственное вѣ́ры утвержде́ніе, и непоколеби́мое Це́ркве укрѣпле́ніе, ю́же твои́мъ хода́тайствомъ во единомы́сліи соблюди́ непрекло́нну и недви́жиму, утоля́я вся́кія собла́зны.

Авраа́мъ, я́ко дру́гъ Бо́жій, сподо́бився ду́хомъ прови́дѣти де́нь Зижди́теля своего́, ра́дости неизрече́нныя исполня́шеся; ты́ же, Предте́че, не въ гада́ніихъ и сѣ́нехъ, но лице́мъ къ лицу́ зря́ воплоти́вшагося Го́спода, и отъ руки́ твоея́ креще́ніе пріе́мша, досто́йно взыва́лъ еси́: сія́ у́бо ра́дость моя́ испо́лнися. Сего́ ра́ди, я́ко дру́га Христо́ва и те́плаго о на́съ предста́теля пра́востію ума́ чту́ще, ублажа́емъ.

Сла́ва, тро́иченъ: Тро́ицу Нераздѣ́льную, треми́ ли́цы раздѣля́емую, соединя́емую же существо́мъ и естество́мъ, всѣ́ми держа́вно влады́чествующую и вся́ соблюда́ющую, вѣ́рніи благоче́стнѣ исповѣ́дающе, возвели́чимъ.

И ны́нѣ, богоро́диченъ: Пріими́ моле́нія рабо́въ Твои́хъ, Пресвята́я Влады́чице, я́же Тебѣ́ прино́симъ; помози́ и отъ бѣ́дъ изба́ви покланя́ющихся о́бразу Твоему́; Ты́ бо, Спа́са ро́ждшая, и́маши дерзнове́ніе, я́ко Того́ Ма́ти су́щи, не преста́й моля́щи о чту́щихъ Тя́, е́же спасти́ся на́мъ.

Пѣ́снь 9.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Ста́лъ еси́ посредѣ́ зако́на и благода́ти, прему́дре, тѣ́мже взыва́емъ къ тебѣ́: побѣжда́емыхъ на́съ зако́номъ грѣхо́внымъ, вою́ющимъ проти́ву ума́ во у́дѣхъ на́шихъ, уще́дри, Крести́телю, и благода́ти да́ръ испроси́, твори́ти Боже́ственная хотѣ́нія.

Утро́бы непло́дныя израще́ніе плодови́тое сы́й, непло́діе серде́цъ въ благопло́діе претвори́ моли́твами твои́ми, и ка́пли покая́нія спаси́тельнаго одожди́ въ сердца́хъ пою́щихъ тя́.

Источа́я всегда́ исцѣле́нія притека́ющимъ къ моще́мъ твои́мъ, чу́дный Предте́че, исцѣли́ стра́сти серде́чныя, востаю́щія отъ невнима́нія, дѣ́тельною твои́хъ боже́ственныхъ моли́твъ цѣльбо́ю.

Сла́ва: Витíйствующихъ язы́къ не мо́жетъ досто́йно восхвали́ти тя́, Предте́че прише́ствія Христо́ва; но я́коже Христо́съ вдови́цы прія́ два́ ле́пта, не возгнуша́йся, Крести́телю, ма́лаго сего́ приноше́нія; бла́гости же подража́ніемъ, пріими́ и пѣ́снь, я́ко досто́йную и дерзну́вшаго отъ усе́рдія повѣ́дати вели́чія твоя́.

И ны́нѣ, богоро́диченъ: Взира́ти на Твою́ всечестну́ю, Пречи́стая Богома́ти, ико́ну, я́ко на Тебе́ Саму́ю, на небесѣ́хъ Сы́ну соца́рствующую, съ вѣ́рою къ не́й припа́даемъ, благоче́стно почита́емъ, и со стра́хомъ лобыза́емъ, и сла́вимъ ро́ждшагося отъ Тебе́ Христа́ Бо́га на́шего, Его́же моли́ спасти́ рабы́ Твоя́.

Свѣти́ленъ:

Предстоя́ при́сно стра́шному престо́лу и свѣ́тлыми заря́ми Трисо́лнечнаго Божества́ осіява́емь, свѣти́льниче мíра, просвѣти́ ду́ши вѣ́рою приступа́ющихъ къ Тебѣ́, грѣхо́вный мра́къ отгоня́я и приводя́ ты́я къ Свѣ́ту незаходи́мому. [Два́жды.]

[Сла́ва, и ны́нѣ,] богоро́диченъ:

Ско́рая въ бѣда́хъ Помо́щнице, гото́вое обурева́емыхъ Приста́нище, неискусобра́чная Невѣ́сто, ро́ждшая пло́тію Спаси́теля мíру, сохрани́ на́съ, покланя́ющихся о́бразу Твоему́ честно́му и си́це Тебѣ́ взыва́ющихъ: ра́дуйся, Предста́тельнице Твои́хъ рабо́въ.

На хвали́техъ стихи́ры на 4, гла́съ 1:

Па́мять пра́веднаго съ похвала́ми, хвала́ бо его́ сла́дость вѣ́рнымъ, блаже́нъ вои́стину, его́же избра́ и прія́тъ Госпо́дь; тѣ́мже и мы́ дне́сь, веселя́щеся, почита́емъ па́мять твою́, Предте́че, прося́ще тя́, иму́щаго дерзнове́ніе ко Го́споду, моли́тися о благополу́чной держа́вѣ Благовѣ́рнаго Импера́тора на́шего, о побѣ́дѣ на язы́ки проти́вныя, е́же низложи́ти непра́ведно хотя́щія бра́ни, дарова́ти же ми́ръ мíрови, Це́рквамъ единомы́сліе, и душа́мъ на́шимъ ве́лію ми́лость.

Отъ за́пада прине́сшая благода́ть исцѣле́ній рука́ твоя́, Крести́телю, созыва́етъ вѣ́рныхъ къ тоя́ прише́ствію. Вхо́ду ея́ кротча́йшій Самоде́ржецъ мно́жае не́же багряни́цѣ ра́дуется, свяще́нныхъ сосло́віе благоговѣ́етъ и торжеству́етъ свѣ́тло; собра́вшееся вѣ́рныхъ мно́жество усе́рдно покланя́ется, весе́лія духо́внаго исполня́яся. Ты́ же, хода́тай Но́ваго и Ве́тхаго бы́въ свяще́ннѣйшій, обнови́ обветша́ніе, обновле́ніе соверша́ющихъ но́ваго явле́нія десни́цы твоея́, моля́ Человѣколю́бца, дарова́ти всѣ́мъ спасе́ніе и ве́лію ми́лость.

Дави́ду кро́ткому и благочести́вому уподобля́ется богоизбра́нный Ца́рь, ра́достно пренося́щій въ до́мъ Сво́й, я́коже дре́вле въ Сіо́нъ, но́вый киво́тъ дре́вняго пречестнѣ́йшій: та́мо бѣ́ ста́мна, ма́нну нося́щая, здѣ́ же о́бразъ во чре́вѣ Носи́вшія Христа́; та́мо же́злъ, здѣ́ же Кре́стъ Христо́въ, вселе́нныя храни́тель; та́мо скрижа́ли ка́менни Ве́тхаго Завѣ́та, здѣ́ же рука́, предначерта́ющая Но́вый Завѣ́тъ, возвѣща́ющій мíру спасе́ніе и ве́лію ми́лость.

Богови́децъ преди́вный Илія́, пове́рже ми́лоть свою́ на Елиссе́я, и а́біе се́й оста́ви волы́, и́миже дѣ́лаше зе́млю, идя́ше въ слѣ́дъ его́ и служа́ше Бо́гу; ты́ же, Крести́телю, не ри́зу, но ру́ку твою́ святу́ю ниспосла́лъ еси́ на́мъ, рабо́мъ твои́мъ, е́юже да изліе́тся на на́съ благода́ть Ду́ха Боже́ственнаго, во е́же не земны́мъ и су́етнымъ рабо́тати, но Бо́гу Жи́ву служи́ти преподо́біемъ и пра́вдою вся́ дни́ живота́ на́шего, подаю́щему мíру ве́лію ми́лость.

Сла́ва, гла́съ 8:

Вси́ совоку́пльшеся единоду́шно во святѣ́мъ хра́мѣ Спа́са на́шего, и зря́ще въ не́мъ свѣ́тлый Богома́тере о́бразъ, Живоно́сное дре́во Креста́, и твою́, Предте́че, пречестну́ю ру́ку, ру́цѣ и сердца́ горѣ́ воздви́гнемъ къ Тріѵпоста́сному Божеству́, ра́дующеся о вели́кихъ Его́ дарова́ніихъ, и моля́щеся прилѣ́жно, да предста́тельствомъ Всенепоро́чныя, си́лою Честна́го и Животворя́щаго Креста́, и твои́ми, всеблаже́нне, моли́твами, посѣти́тъ на́съ ми́лостію и щедро́тами Всеблагíй Бо́гъ, подаю́щій мíру ве́лію ми́лость.

И ны́нѣ, богоро́диченъ, гла́съ 8:

Со всѣ́ми проро́ки, со апо́столы и му́ченики, преподо́бными, и пра́ведными, и всѣ́хъ христіа́нъ наде́ждою — Богоро́дицею, моли́ Преблага́го Бо́га, Предте́че, дарова́ти соверша́ющимъ свѣтоно́сную и боже́ственную па́мять твою́, разрѣше́ніе грѣхо́въ, очище́ніе прегрѣше́ній и ве́лію ми́лость.

Славосло́віе вели́кое, [ектеніи́] и отпу́стъ.



НА ЛИТУРГІИ,

Блаже́нна, пѣ́снь 3-я и 6-я. Проки́менъ, гла́съ 7: Возвесели́тся пра́ведникъ о Го́сподѣ,* [и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́]. Апо́столъ къ Кори́нѳяномъ, зача́ло 106. Аллилу́ія, гла́съ 4: Пра́ведникъ я́ко фи́никсъ процвѣте́тъ, [я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни во дво́рѣхъ до́му Бо́га на́шего процвѣту́тъ]. Ева́нгеліе Матѳе́я, зача́ло 40. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся]. На моле́бнѣ: Ева́нгеліе отъ Ма́рка, зача́ло 1.

Источникъ: Служба на пренесеніе честныя руки святаго Іоанна Предтечи и Крестителя Господня изъ Мальты въ Гатчину 12 октября 1799 года. — СПб.: Типографія духовнаго журнала «Странникъ», 1876. — 68 с.

/ Къ оглавленію раздѣла /


Наверхъ / Къ титульной страницѣ

0