Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 23 iюля 2017 г. Сейчасъ на порталѣ посѣтителей - 22.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 11-й де́нь.
[Пое́мъ и́мъ въ недѣ́лю, ближа́йшую къ 11-му числу́.]
Па́мять святы́хъ оте́цъ, и́же на Седмо́мъ Вселе́нскомъ Собо́рѣ въ Нике́и собра́вшихся.

Зри́: Подоба́етъ вѣ́дати, я́ко по 11-мъ дни́ сего́ мѣ́сяца, въ пріиду́щую недѣ́лю па́мять соверша́емъ святы́хъ оте́цъ, и́же на Седмо́мъ Вселе́нскомъ Собо́рѣ въ Нике́и собра́вшихся второ́е, святы́хъ оте́цъ 365, на изверже́ніе и потребле́ніе безбо́жныхъ уче́ній христоненави́стныхъ и христіанооглаго́льниковъ иконобо́рцевъ, Копрони́ма, и съ ни́мъ му́дрствующихъ окая́нныхъ епи́скоповъ и несвяще́нныхъ архіере́евъ, и тѣ́хъ безбо́жнаго и скве́рнаго собо́рища.

И аще случи́тся 11-й де́нь настоя́щій въ недѣ́лю, пое́тся въ то́йже де́нь слу́жба святы́хъ оте́цъ Седма́го Собо́ра. Аще же въ сре́ду, пое́тся слу́жба и́хъ въ мимоше́дшую недѣ́лю; а́ще же въ четверто́къ, пое́тся слу́жба и́хъ въ пріиду́щую недѣ́лю.

Рядова́го же свята́го слу́жба оставля́ется и пое́тся, егда́ разсу́дитъ екклисіа́рхъ.


ВЪ СУББОТУ НА МАЛѢЙ ВЕЧЕРНИ,
Стихи́ры воскре́сны и Богоро́дицы, по обы́чаю.



НА ВЕЛИЦѢЙ ВЕЧЕРНИ,
На Го́споди воззва́хъ: стихи́ры окто́иха, воскре́сны 3 и восто́ченъ [Анато́ліевъ] еди́нъ, и святы́хъ отце́въ на 6, гла́съ 6. Подо́бенъ: Отча́янная.

Честны́я Собо́ры отце́въ* въ ра́зная времена́ соста́вивъ,* во еди́но собра́ еди́нѣмъ и тѣ́мже пра́виломъ* зѣло́ до́брѣ патріа́рхъ Ге́рманъ Но́вый,* пиша́ ку́пно же и держа́ догма́ты си́хъ,* и́же и моли́твенники бо́дрственныя сія́ спасе́нія* Го́споду предлага́етъ, и па́ствѣ съ па́стыри. [Два́жды.]

Зако́на писа́ніе дѣ́темъ евре́йскимъ положи́ честну́ю седми́цу,* сѣ́ни придержа́щимся и служа́щимъ се́й,* ю́же отцы́, сте́кшеся на седмо́мъ Собо́рѣ ма́ніемъ Бо́жіимъ,* въ шести́ дне́хъ все́ сіе́ соверши́вшаго,* и седмы́й благослови́вшаго,* честнѣ́йшую содѣ́лаша, предѣ́лъ вѣ́ры изложи́вше.

Тро́ицу, всѣ́мъ отъ веще́й* міробы́тія су́щую вину́,* я́сно преда́сте, треблаже́нніи отцы́:* три́ бо и четы́ре Собо́ры, та́инственнѣйшимъ сло́вомъ положи́вше,* и отмсти́теліе я́вльшеся правосла́внаго сло́ва,* стихíя четы́ре су́ща,* и Тро́ицу изъясни́сте,* созда́вшую сія́ и мíръ сотво́ршую.

Довля́ше и еди́ною жи́знь вдохну́ти* лежа́щему сы́ну служа́щія,* проро́ка Елиссе́я сляче́ніе зѣ́льно;* оба́че обрати́ся седми́жды и прекланя́шеся сему́,* провозвѣща́я я́ко прови́децъ ва́ша Собо́ры,* и́миже умерщвле́ніе Боже́ственнаго Сло́ва водуши́сте,* Арія умертви́вше, и его́ све́рстники.

Кто́ Твою́, Спа́се, ри́зу раздра́? —* Арій, Ты́ ре́клъ еси́,* и́же Тро́ицы пресѣче́ Единоче́стное Нача́ло въ раздѣле́нія;* се́й отве́рже Тя́ бы́ти Еди́наго отъ Тро́ицы,* се́й и Несто́рія учи́тъ Богоро́дицу не глаго́лати.* Но Собо́ръ, и́же въ Нике́и,* Сы́на Бо́жія Тя́ проповѣ́да, Го́споди,* Отцу́ и Ду́ху Сопресто́льна.

Сла́ва, гла́съ 6. Самогла́сенъ:

Та́инственный дне́сь Ду́ха трубы́ богоно́сныя отцы́ восхва́лимъ, пѣснопѣ́вшія посредѣ́ Це́ркве пѣ́снь сли́чную богосло́вія: Тро́ицу Еди́ну непремѣ́нную, Существо́ же и Божество́, низложи́тели Аріевы и правосла́вныхъ побо́рники, моля́щіяся всегда́ Го́споду поми́ловатися душа́мъ на́шимъ.

И ны́нѣ, богоро́диченъ пе́рвый гла́са.
По вхо́де проки́менъ дне́ и чте́нія три́.

Бытія́ чте́ніе. [Глава́ 14.]

Слы́шавъ Авра́мъ, я́ко плѣне́нъ бы́сть Ло́тъ, брата́ничь его́, сочте́ своя́ домоча́дцы, три́ста и осмьна́десять, и погна́ во слѣ́дъ и́хъ да́же до Да́на. И нападе́ на ня́ но́щію са́мъ и о́троцы его́ съ ни́мъ; и порази́ и́хъ, и гони́ и́хъ до Хова́ла, е́же е́сть ошу́юю Дама́ска. И возврати́ вся́каго коня́ содо́мскаго, и Ло́та, брата́нича своего́, возврати́, и вся имѣ́нія его́, и жены́, и лю́ди. Изы́де же ца́рь Содо́мскій въ срѣ́теніе ему́, повнегда́ возврати́тися ему́ отъ сѣ́ча Ходоллогомо́рскаго, и съ царьми́, и́же съ ни́мъ, во удо́ль Сави́ну; сіе́ же бя́ше по́ле царе́во. И Мелхиседе́къ, ца́рь Сали́мскій, изнесе́ хлѣ́бы и вино́, бя́ше же свяще́нникъ Бо́га Вы́шняго. И благослови́ Авра́ма, и рече́: благослове́нъ Авра́мъ Бо́гомъ Вы́шнимъ, Иже созда́ не́бо и зе́млю; и благослове́нъ Бо́гъ Вы́шній, Иже предаде́ враги́ твоя́ подъ ру́ки тебѣ́.

Втора́го зако́на чте́ніе. [Глава́ 1.]

Во дне́хъ о́нѣхъ, рече́ Моисе́й къ сыно́мъ Изра́илевымъ: ви́дите, преда́хъ предъ лице́мъ ва́шимъ зе́млю, вше́дше, наслѣ́дуйте зе́млю, ю́же кля́тся Госпо́дь отце́мъ ва́шимъ — Авраа́му, и Исаа́ку, и Іа́кову — да́ти и́мъ и сѣ́мени и́хъ по ни́хъ. И реко́хъ къ ва́мъ во вре́мя о́но, глаго́ля: не возмогу́ еди́нъ води́ти ва́съ. Госпо́дь Бо́гъ на́шъ умно́жилъ вы́ е́сть, и се́, есте́ дне́сь, я́ко звѣ́зды небе́сныя, мно́жествомъ. Госпо́дь Бо́гъ оте́цъ на́шихъ да приложи́тъ ва́мъ, я́ко да бу́дете ты́сящами сугу́бо, и да благослови́тъ ва́съ, я́коже глаго́ла ва́мъ. И взя́хъ отъ ва́съ му́жы му́дры, и свѣ́домы, и смы́сленны и поста́вихъ и́хъ владѣ́ти надъ ва́ми: тысященача́льники, и стонача́льники, и пятдесятонача́льники, и десятонача́льники, и писмовводи́тели судія́мъ ва́шимъ. И заповѣ́дахъ судія́мъ вашимъ во время оно, глаголя: разслушайте посредѣ братій ва́шихъ и суди́те пра́ведно посредѣ́ му́жа, и посредѣ́ бра́та его́, и посредѣ́ прише́льца его́. Да не позна́ете лица́ въ судѣ́, ма́лому и вели́кому су́диши, и не устыди́шися лица́ человѣ́ческа, я́ко су́дъ Бо́жій е́сть.

Втора́го зако́на чте́ніе. [Глава́ 10.]

Во дне́хъ о́нѣхъ рече́ Моисе́й къ сыно́мъ Изра́илевымъ: се́ Го́спода Бо́га твоего́ не́бо, и Не́бо небесе́, земля́ и вся́, ели́ка су́ть на не́й. Оба́че отцы́ ва́ша произво́ли Госпо́дь люби́ти я́ и избра́ сѣ́мя и́хъ по ни́хъ, ва́съ, па́че всѣ́хъ язы́къ, въ де́нь се́й. И обрѣ́жите жестосе́рдіе ва́ше и вы́и ва́шея не ожесточи́те ктому́. Ибо Госпо́дь Бо́гъ на́шъ, Се́й Бо́гъ бого́въ и Госпо́дь господе́й; Бо́гъ Вели́кій, и Крѣ́пкій, и Стра́шный, Иже не диви́тся лицу́, ниже́ взе́млетъ да́ръ. Творя́й су́дъ прише́льцу, и сиротѣ́, и вдовѣ́, и лю́битъ прише́льца, да́ти ему́ хлѣ́бъ и ри́зу. И возлюби́те прише́льца, прише́льцы бо бѣ́сте въ земли́ Еги́петстѣй. Го́спода Бо́га твоего́ да убои́шися, и Тому́ еди́ному послу́жиши, и къ Нему́ прилѣпи́шися, и и́менемъ Его́ клене́шися. То́й хвала́ твоя́, и То́й Бо́гъ тво́й, Иже сотвори́ тебѣ́ вели́кая и сла́вная сія́, я́же ви́дѣста о́чи твои́.

На литíи стихи́ра хра́ма. Сла́ва, гла́съ 3:

Апо́стольскихъ преда́ній извѣ́стніи храни́теліе бы́сте, святíи отцы́: Святы́я бо Тро́ицы Единосу́щное, правосла́вно научи́вше, Аріево хуле́ніе собо́рнѣ низложи́сте, съ ни́мже и Македо́нія духобо́рца обличи́вше, осуди́сте Несто́рія, Евти́хія и Діоско́ра, Саве́ллія же и Севи́ра безгла́внаго. Ихже пре́лести испроси́те изба́витися на́мъ, нескве́рну на́шему житію́ въ вѣ́рѣ сохрани́тися, мо́лимся.

И ны́нѣ, богоро́диченъ: Безъ сѣ́мене отъ Боже́ственнаго...

На стихо́внѣ окто́иха. Сла́ва, отце́въ, гла́съ 4:

Моле́бную па́мять дне́сь богоно́сныхъ отце́въ, отъ всея́ вселе́нныя собра́вшихся во свѣ́тлѣмъ гра́дѣ Нике́йстѣмъ, правосла́вныхъ собра́нія, благоче́ствующе, вѣ́рно пра́зднуемъ: сíи бо лю́таго Арія безбо́жное велѣ́ніе благочестному́дреннѣ низложи́ша, и отъ Каѳоли́ческія Це́ркве собо́рнѣ того́ изгна́ша, и я́сно Сы́на Бо́жія единосу́щна и соприсносу́щна, пре́жде вѣ́къ Су́ща, всѣ́хъ научи́ша исповѣ́дати во изображе́ніи вѣ́ры, извѣ́стно и благоче́стно сіе́ изложи́вше. Тѣ́мже и мы́, боже́ственнымъ и́хъ повелѣ́ніемъ послѣ́дствующе, извѣ́стно вѣ́рующе, слу́жимъ со Отце́мъ Сы́ну и Ду́ху Всесвято́му, во еди́номъ Божествѣ́, Тро́ицѣ единосу́щнѣй.

И ны́нѣ, богоро́диченъ: При́зри на моле́нія...

На благослове́ніи хлѣ́бовъ тропа́рь: Богоро́дице Дѣ́во.., два́жды.
И отце́въ, гла́съ 8:

Препросла́вленъ еси́, Христе́ Бо́же на́шъ, свѣти́ла на земли́ отцы́ на́ши основа́вый, и тѣ́ми ко и́стиннѣй вѣ́рѣ вся́ ны́ наста́вивый, Многоблагоутро́бне, сла́ва Тебе́.

Еди́ножды.



НА УТРЕНИ,
На Бо́гъ Госпо́дь: тропа́рь воскре́сенъ, два́жды. Сла́ва, отце́въ. И ны́нѣ, богоро́диченъ: Иже на́съ ра́ди...

Кано́нъ воскре́сенъ со ирмосо́мъ на 4, крестовоскре́сенъ на 2, и Богоро́дицы на 2, и святы́хъ на 6, его́же краегране́сіе: Пою́ блаже́нныхъ собра́ніе седмо́е. Ге́рманово. Гла́съ 8.

Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Пѣсносло́вити седмо́е собра́ніе жела́ющему ми́ ны́нѣ, седми́хъ дарова́ній собо́ръ да́ждь ми́ Паракли́та, Го́споди, умудри́вшаго се́й огненноязы́чнѣ и ху́льное все́ языковре́діе умолча́ти сотво́ршаго.

Бо́льшее изъ нача́ла чи́слъ седмо́е: и́бо созда́нія Боже́ственнаго всего́ первообра́зно бы́сть, всесоверше́нное преста́ніе въ седмы́й де́нь; и ны́нѣ всѣ́хъ ересе́й коне́цъ, въ Собо́рѣ равночи́сленномъ.

Побѣди́въ богобо́рнаго Арія въ Нике́и дре́вле па́стырскимъ жезло́мъ, правосла́вными ше́ствовати Це́рковь уче́ніи ли́къ отце́въ, и ны́нѣ о се́мъ посрами́лъ е́сть образобо́рцы я́ко побо́рникъ.

Богоро́диченъ: Якоже отцы́ благоче́стно научи́ша, исповѣ́дующе вѣ́рно Дѣви́ческую утро́бу, безболѣ́зненно ро́ждшую пло́тію Безпло́тнаго; покланя́емся же Сему́, столпопи́шуще изображе́ніе, и че́стнѣ облобыза́емъ.

Катава́сія: Отве́рзу уста́ моя́...

Пѣ́снь 3.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ па́че Тебе́, Еди́не Человѣколю́бче.

Не поколеба́тися Христо́вѣ неруши́мѣй Це́ркви, отъ Него́ тайнонауча́еми, боже́ственніи пастыренача́льницы, и́же сію́ поколеба́ти хотя́щія, я́коже анти́христовы ча́сти, отъ благочести́выхъ отри́нуша.

Очища́етъ му́тныя и ти́нныя пото́ки, отъ исто́чникъ спасе́нія поче́рпъ, и жа́ждущія лю́ди Христо́вы насыща́етъ уче́ній струя́ми отце́въ сосло́віе.

На ненави́дящихъ и́стинно и христіанооглаго́льниковъ собра́ніе христолю́бныхъ седмо́е въ свѣ́тлѣмъ гра́дѣ Нике́йстѣмъ бы́сть, его́же ца́ріе Ири́на и Константи́нъ защи́тницы.

Богоро́диченъ: Вся́къ да отсту́питъ нечести́вый, не почита́яй ико́ну честну́ю Богоро́дицы, и Сію́ не проповѣ́дуяй, Христа́ Богому́жно ро́ждшую, и во о́гнь да отшле́тся сгара́ти несожже́нно.

Конда́къ и и́косъ воскре́сенъ.
Та́же сѣда́ленъ отце́въ, гла́съ 4. Подо́бенъ: Ско́ро предвари́.

Свѣти́льницы пресвѣ́тліи и́стины Христо́вы мíру яви́стеся на земли́, вои́стинну блаже́ннѣйшій отцы́ боговѣща́нніи, изсуши́вше е́реси ху́льныхъ языкобо́лій и угаси́вше пламенови́дная злосла́вныхъ смуще́нія. Тѣ́мже я́ко іера́рси Христо́вы моли́теся спасти́ся на́мъ. [Два́жды.]

Сла́ва, и ны́нѣ, богоро́диченъ:

Ско́ро на́съ предвари́, Дѣ́во Ма́ти Чи́стая; отъ вра́гъ на́съ исхити́, ху́лящихъ на Тя́, сокруши́ языкобо́лія ересе́й вся́, разрѣши́ крѣ́постію Твое́ю стремле́нія тѣ́хъ, да разумѣ́ютъ, я́ко еди́на Богома́ти еси́, моли́твами Твои́ми правосла́вныхъ совокупле́ніе спаса́ющая.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Глаго́лъ Бо́жій иму́ще, стрѣлу́ и ме́чь, вся́ ку́пно ты́я закала́ютъ злоу́мныя о́бразомъ кре́стнымъ, не чту́щія ра́вно изображе́нія Христо́ва, Богоро́дицы и всѣ́хъ святы́хъ, отцы́ богови́днѣйшіи.

Якоже седмію́ труба́ми Іерихо́нскія стѣ́ны въ седмо́мъ обхожде́ніи падо́ша; та́ко си́ми седмію́ Собо́ры ве́сь со́нмъ, на Бо́га вознося́щійся, низведе́нъ въ бе́здну въ собра́ніи седмо́мъ благогла́сныхъ тру́бъ Ду́ха.

Юношеское настоя́ніе показу́я и боже́ственною ре́вностію распаля́емо, оте́ческое мно́жество, я́коже Илія́, сту́дныя свяще́нники умертви́ло е́сть. Тѣ́мъ со дерзнове́ніемъ Христо́вѣ ико́нѣ любе́зно покланя́тися научи́ло е́сть.

Богоро́диченъ: Ты́ моя́ наде́жда, Всечи́стая, Ты́ мое́ и пѣ́ніе, Ты́ мое́ приста́нище, Ты́ мое́ исправле́ніе, я́же Бо́га Сло́ва Отча Вопло́щшагося несочта́нно родила́ еси́. Тѣ́мже Твое́й несомнѣ́нно покланя́юся ико́нѣ, крѣ́постію Твое́ю укрѣпля́емь.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Высо́кою мы́слію сразсмотри́вше, ана́ѳемѣ образобо́рцевъ преда́ша, я́ко чужда́я си́хъ му́дрствовавшихъ, честнíи отцы́; и че́сть Христо́вѣ ико́нѣ, я́коже лѣ́по, воздая́ти повелѣ́ша.

Ны́нѣ вре́мя весе́лія, ны́нѣ де́нь спасе́нія яви́ся, возвесели́мся у́бо и Христу́ ра́достно возопіи́мъ: ми́ръ да́ждь на́мъ Тво́й моли́твами отце́въ Седма́го Собо́ра, Человѣколю́бче.

Богоро́диченъ: Благоутро́бія ра́ди ми́лости, отъ Дѣ́вы роди́ся Сы́нъ Бо́жій невра́щно, чу́ждее нося́, я́ко Свое́, и зра́комъ си́мъ опи́санный, зри́тся во́лею, по Существу́ Сы́й неопи́санъ.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Да ка́плютъ сла́дость го́ры и ра́дость: ерети́ческое бо мно́жество изгна́ся, го́рькій излива́ющее я́дъ, святы́хъ ико́нъ отверже́ніе.

Не́бо и земля́ согла́сно да пра́зднуютъ Дще́ре Бо́жія вели́чіе: и́бо велича́ется, отмета́ющи Сію́ умаля́ющія.

Богоро́диченъ: Ма́терній Сы́нъ, Иже Отчій пе́рвѣе безма́теренъ, безо́тчій же боголѣ́пно роди́вся и возроди́въ мя́; тѣ́мже Ро́ждшую съ Рожде́ннымъ образу́я, облобыза́ю.

Конда́къ, гла́съ 6. Подо́бенъ: Рукопи́саннаго.

Иже изъ Отца возсія́въ, Сы́нъ неизрече́нно изъ Жены́ роди́ся сугу́бъ естество́мъ, Его́же ви́дяще, не отмета́емся зра́ка изображе́нія, но, сіе́ благоче́стно начерта́юще, почита́емъ вѣ́рно. И сего́ ра́ди и́стинную вѣ́ру Це́рковь держа́щи, лобыза́етъ ико́ну вочеловѣ́ченія Христо́ва.

Икосъ:

Хотя́й Всеще́дрый Бо́гъ на́съ воздвиза́ти при́сно къ па́мяти соверше́ннѣй Своего́ вочеловѣ́ченія, подло́гъ се́й предаде́ человѣ́комъ, шародѣ́ланьми ико́нъ честны́й возобража́ти зра́къ; я́ко да сія́ во зрѣ́ніихъ ви́дяще, вѣ́руемъ, я́же сло́вомъ слы́шахомъ, разумѣ́юще я́вѣ дѣя́ніе и и́мя, начерта́ніе и страда́нія святы́хъ муже́й, и Христа́ Вѣнцода́вца, вѣнцы́ подаю́ща святы́мъ, страда́льцемъ же и му́ченикомъ. Ихже ра́ди яснѣ́йше и́стинную вѣ́ру держа́щи, Це́рковь лобыза́етъ ико́ну вочеловѣ́ченія Христо́ва.

Пѣ́снь 7.

Ирмо́съ: Бо́жія снисхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Побѣжда́ются догма́тами богоглаго́ливыхъ муже́й ересенача́льницы, образо́въ че́сть первообра́знымъ изобразу́ющихъ пра́во, я́коже рече́ Вели́кій Васи́лій; благослове́нъ Бо́гъ оте́цъ на́шихъ.

Хра́ми удобря́ются, свѣ́тлыми ико́нами украша́еміи дне́сь; сего́ ра́ди мíръ въ Це́рквахъ, па́че всѣ́хъ человѣ́къ краснѣ́йшему добро́тою, совоспѣва́етъ пою́щему: благослове́нъ Бо́гъ оте́цъ на́шихъ.

Свѣ́тъ облиста́, дале́че тма́, нечести́віи отгна́ны. Сего́ ра́ди вся́ческая свѣ́та испо́лнишася, Свѣтода́теля Христа́ съ весе́ліемъ пою́тъ и глаго́лютъ: благослове́нъ Бо́гъ оте́цъ на́шихъ.

Богоро́диченъ: Пречи́стая Влады́чица, еди́на всѣ́хъ спасе́нія наде́жда, я́же стра́шно ро́ждшая Царя́ царе́й Христа́, на рука́хъ Свои́хъ Сего́ Младе́нца нося́щи, спокланя́ема е́сть опи́саннѣ, я́коже отцы́ глаго́лютъ.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Законополага́етъ у́бо изя́щнѣйше отце́въ сосло́віе, богочести́вымъ имстви́тельное поклоне́ніе и возставле́ніе свяще́нныя ико́ны Христо́вы; любоблагочести́віи же лѣ́тнюю па́мять я́ко ча́да соверша́емъ благопослушли́вая о́ныхъ, и любо́вію о́бразъ Христо́въ лобыза́емъ.

Седмокра́тно преклоня́ху смире́нныхъ высокому́дренніи и любодобродѣ́тельныхъ стремле́нія пресѣца́ху, и́миже оглаго́ловаху боже́ственная дѣя́нія и́хъ; но и́же Седма́го Собо́ра соше́дшіися отцы́ въ Нике́и горды́ню о́ныхъ а́біе истерза́ша седмокра́тнѣйше.

Стрѣ́лы младе́нецъ быва́ютъ, псало́мски, старому́дрствующимъ младому́дренныхъ я́звы и ра́ны; Боже́ственною же си́лою изнемога́ютъ язы́цы мно́зи, хулы́ на высоту́ глаго́лющихъ; и вся́къ, кто́ Отца́ Сы́на и Ду́ха, Бо́га Еди́наго, не вѣ́сть, Всевино́внаго и Еди́наго.

Богоро́диченъ: Зи́ждется Младе́нецъ самово́льнѣ ми́лости ра́ди, Зижди́тель отъ чи́стыхъ крове́й Твои́хъ, соблюда́яй Тя́ по рождествѣ́ Преочище́нну всю́ Чи́стую и очища́яй оскверне́нный о́бразъ. Тѣ́мже на ико́нахъ соизобража́ется Тебѣ́, естество́мъ бы́въ Человѣ́къ, Бо́гъ Сы́й естество́мъ.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Ве́лій крѣ́постію и совѣ́томъ вся́ содержа́й, Непостижи́ме Еди́не Бо́же, держа́внѣйше Всенача́льниче, Всецарю́, Це́рковь утверди́, въ правосла́віи Твое́мъ соблюда́я, отце́въ всесла́вныхъ, изоблича́ющихъ злосла́віе, мольба́ми.

Вели́кихъ че́стей сподо́бистеся на земли́, небому́дреніи святíи, я́ко Христо́во изображе́ніе любе́зно почто́сте. И ны́нѣ сѣ́нь отложи́вше, и покрыва́ло пло́ти, самоли́чно Сего́ въ лице́ зрите́, и бо́льшихъ сподобля́еми.

Да нака́жемся всево́инствомъ ва́рварскаго безслове́сія, е́же попусти́лъ еси́ на ны́; тѣ́хъ стремле́ніе и де́рзость Са́мъ сокруши́ и Импера́тору спобо́рствуй, надѣ́ющемуся на Тя́, Вседѣ́телю, благодерзнове́нными моли́твами святы́хъ оте́цъ, и́хже соверша́емъ па́мять.

Богоро́диченъ: Разумѣ́ти та́йну стра́шнаго Твоего́ Рождества́ ника́коже мо́жетъ у́мъ человѣ́ческій, но ниже́ а́нгельскій высоко́мный, я́ко Бо́га Ты́ родила́ еси́ Воплоще́ннаго, па́че естества́. Тѣ́мъ Тя́, Богоро́дицу, вѣ́дуще и со Онѣмъ напису́юще, велича́емъ.

Свѣти́ленъ воскре́сенъ. Сла́ва, отце́въ. Подо́бенъ: Ду́хомъ во святи́лищи.

Отцы́ небому́дренніи, на Седмо́мъ Собо́рѣ собра́вшіися, моли́тву прилѣ́жну Тро́ицѣ принеси́те, е́же изба́витися отъ вся́кія е́реси и суда́ вѣ́чнаго, Ца́рствіе же получи́ти на́мъ небе́сное, ва́шъ Собо́ръ боже́ственный воспѣва́ющимъ.

И ны́нѣ, богоро́диченъ:

Мольба́ми, Преблагíй Го́споди, Ма́тере Твоея́ и и́же на седми́ Собо́рѣхъ собра́вшихся отце́въ Це́рковь утверди́ и вѣ́ру укрѣпи́, и Ца́рствія небе́снаго вся́ покажи́ прича́стники, егда́ пріи́деши на зе́млю суди́ти всю́ тва́рь.

Зри́: Воскре́снаго же свѣти́льна богоро́диченъ не глаго́лется, но отце́въ.

На хвали́техъ стихи́ры воскре́сны 4, и отце́въ 4, гла́съ 6: Подо́бенъ: Все́ отло́жше.

Все собра́вше* душе́вное худо́жество* и Боже́ственнымъ Ду́хомъ разсмотри́вше* небе́сный и честны́й Симво́лъ вѣ́ры,* честнíи отцы́ богопи́саннѣ начерта́ша;* въ не́мже я́вственнѣйше* Ро́ждшему Собезнача́льнаго Сло́ва науча́ютъ* и всеи́стинно Единосу́щнаго,* апо́стольскимъ послѣ́дующе проявле́нно уче́ніемъ,* благосла́вніи и пребога́тіи* и́стинно и богому́дріи. [Два́жды.] Сти́хъ: Благослове́нъ еси́, Го́споди, Бо́же оте́цъ на́шихъ,* и хва́льно, и просла́влено и́мя Твое́ во вѣ́ки.

Все́ пріе́мше* у́мное сія́ніе Свята́го Ду́ха,* преесте́ственнѣйшее благосло́віе* кра́ткими глаго́лы и мно́гимъ ра́зумомъ* богодохнове́нно провѣща́ша,* я́ко Христо́вы проповѣ́дницы,* ева́нгельскихъ предста́теліе* уче́ній, блаже́нніи,* и благочести́выхъ преда́ній,* свы́ше пріе́мше си́хъ открове́ніе я́вѣ,* и просвѣ́щшеся, изложи́ша* вѣ́ру Богонауче́нную. Сти́хъ: Собери́те Ему́ преподо́бныя Его́,* [завѣща́ющія завѣ́тъ Его́ о же́ртвахъ].

Все́ собра́вше* па́стырское иску́сство* и я́рость дви́гше ны́нѣ пра́веднѣйшую,* отмсти́тельнѣ тя́жкія отгна́ша и па́губныя во́лки,* пра́щею Ду́ха изве́ргше* отъ церко́внаго исполне́нія* па́дшія я́ко къ сме́рти,* и я́ко неисцѣ́льно неду́говавшія,* боже́ственніи па́стыріе,* я́ко раби́ и́стиннѣйшіи Христо́вы* и Боже́ственнаго проповѣ́данія* таи́нницы свяще́ннѣйшіи.

Сла́ва, гла́съ 8. Гео́ргія Никомидíйскаго:

Святы́хъ отце́въ ли́къ, отъ коне́цъ вселе́нныя сте́кшійся, Отца́ и Сы́на и Ду́ха Свята́го, Еди́но Существо́ научи́ша и Естество́, и та́йну богосло́вія я́сно преда́ша Це́ркви; и́хже, похваля́юще вѣ́рою, ублажи́мъ, глаго́люще: О, боже́ственный по́лче! богоглаго́ливіи ору́жницы ополче́нія Госпо́дня, звѣ́зды многосвѣ́тлыя мы́сленныя тве́рди, та́инственнаго Сіо́на необори́міи столпи́, мѵродохнове́нніи цвѣ́ти ра́йстіи, всезлата́я уста́ Сло́ва, Нике́йская похвало́, вселе́нныя украше́ніе, прилѣ́жно моли́теся о душа́хъ на́шихъ.

И ны́нѣ: Преблагослове́нна еси́, Богоро́дице Дѣ́во...
Славосло́віе вели́кое, и отпу́стъ.
И обы́чное исхожде́ніе въ притво́ръ. Сла́ва, и ны́нѣ, стихи́ра ева́нгельская.



НА ЛИТУРГІИ,

Блаже́нна воскре́сна на 6, и отце́въ пѣ́снь 3 на 4. По вхо́дѣ тропа́рь воскре́сенъ и отце́въ. Та́же конда́къ воскре́сенъ. Сла́ва, отце́въ. И ны́нѣ, Богоро́дицы. Проки́менъ пре́жде воскре́сенъ, та́же пѣ́снь отце́въ, гла́съ 4: Благослове́нъ еси́, Го́споди, Бо́же оте́цъ на́шихъ, и хва́льно и просла́влено и́мя Твое́ во вѣ́ки. Сти́хъ: Яко пра́веденъ еси́ о всѣ́хъ, я́же сотвори́лъ еси́ на́мъ. Апо́столъ дне́, и отце́въ, къ Евре́омъ зача́ло 334. Аллилу́ія гла́са и отце́въ, гла́съ 1: Бо́гъ бого́въ, Госпо́дь глаго́ла [и призва́ зе́млю отъ восто́къ со́лнца до за́падъ]. Сти́хъ: Собери́те Ему́ преподо́бныя Его́, [завѣща́ющія завѣ́тъ Его́ о же́ртвахъ]. Ева́нгеліе дне́ и отце́въ, Іоа́нна зача́ло 56. Прича́стенъ: Хвали́те Го́спода съ небе́съ, [хвали́те Его́ въ вы́шнихъ]. Другíй: Ра́дуйтеся [пра́ведніи о Го́сподѣ, пра́вымъ подоба́етъ похвала́.]

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 101-107.

/ Къ оглавленію раздѣла /


Наверхъ / Къ титульной страницѣ

0