Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 24 мая 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 11-й де́нь.
Свята́го апо́стола Фили́ппа, еди́наго отъ седми́ діа́коновъ, и преподо́бнаго отца́ на́шего Ѳеофа́на Исповѣ́дника, епи́скопа Никíйскаго.

[ВЕЧЕРЪ,]
На Го́споди воззва́хъ: стихи́ры апо́стола, гла́съ 4. Подо́бенъ: Зва́нный свы́ше.

Иже седми́ діа́кономъ причте́нъ,* я́ко по́лнъ му́дрости же* и Боже́ственныя благода́ти,* служи́ти, блаже́нне Фили́ппе, святы́хъ* ку́пно со Стефа́номъ потре́бамъ избра́лся еси́.* Тѣ́мъ и убива́ема сего́ ви́дѣвъ,* къ Самарíи восте́клъ еси́,* повелѣ́ніемъ Боже́ственнымъ.* Бо́жіе Сло́во проповѣ́дая, сла́вне,* и просвѣща́я су́щія во тмѣ́ пре́жде,* я́же соверши́лъ еси́ Ду́хомъ Боже́ственнымъ* дне́ сы́ны, всему́дре.

Богозна́менія, руко́ю твое́ю соверша́емая,* лю́діе ви́дяще,* слѣпы́хъ прозрѣ́ніе,* и разсла́бленныхъ исправле́ніе,* и нечи́стыхъ духо́въ, идѣ́же живя́ху, отгна́ніе,* дивля́хуся, Фили́ппе,* и прихожда́ху къ спаси́тельному очище́нію,* отъ невѣ́рія къ вѣ́рѣ внеза́пу направля́еми.* Тѣ́мъ боже́ственный я́ко услы́ша* апо́стольскій ли́къ веселя́шеся,* я́ко и Самарíи мно́жество* Бо́гу приведе́ся.

Колесни́ца Сло́ва сы́й, богоглаго́ливе,* на колесни́цѣ узрѣ́въ ѣ́здяща,* и вопроше́нія творя́щаго,* и недомы́слящася, пости́глъ еси́ Канда́кина досточу́днаго* и тому́ сказа́ніе и явле́ніе* жела́емыхъ, блаже́нне, показа́лъ еси́:* вѣ́ровавъ бо, про́ситъ Боже́ственнаго очище́нія,* его́же пріе́мша,* Боже́ственнаго проповѣ́дника Вседѣ́тель* содѣ́ла всея́ Еѳіо́піи* и му́чениковъ нача́льника.

Ины стихи́ры преподо́бного, гла́съ 6. Подо́бенъ: Все́ отло́жше.

Возсія́лъ еси́, Ѳеофа́не,* добродѣ́телей ви́ды,* я́ко звѣзда́ свѣтлѣ́йша* на тве́рди вѣ́ры* свѣ́тло сла́вне,* заря́ми вся́ отгоня́я* омраче́нія ерети́ческая* и просвѣща́я вѣ́рою тебѣ́ и любо́вію прилѣжа́щія* и твои́мъ Боже́ственнымъ уче́ніемъ.* Тѣ́мъ свѣтоно́сный соверша́емъ* тво́й пра́здникъ любо́вію,* со дерзнове́ніемъ моли́ся* о душа́хъ на́шихъ.

Труды́ по́стническими* твою́ ду́шу вооружи́въ,* плотска́я увяди́лъ еси́,* о́тче свяще́ннѣйше, игра́нія* и у́мъ, сла́вне, содѣ́ла* Боже́ственныя Тро́ицы жили́ще.* И возвы́сился еси́,* идѣ́же му́ченическая во́инства,* и добро́та недомы́сленная, и іера́рховъ собо́ръ.* Съ ни́миже ны́нѣ ра́дуешися,* во сла́вѣ предстоя́ Христу́,* со дерзнове́ніемъ моля́ся* о душа́хъ на́шихъ.

Боже́ственными сле́зъ твои́хъ тече́ньми, іера́рше,* все́ потопи́лъ еси́* де́монское ополче́ніе,* я́ко не́мощно.* Твои́ми же всегда́ къ Бо́гу манове́ніи* и си́льными восхожде́ніи* го́рдое возвыше́ніе на зе́млю низве́рглъ еси́,* и возне́слся еси́ на небе́сная* и боголѣ́пная селе́нія,* въ ни́хже со а́нгелы водворя́ешися,* предстоя́ Христу́,* со дерзнове́ніемъ моля́ся* о душа́хъ на́шихъ.

Сла́ва, и ны́нѣ, богоро́диченъ, гла́съ и подо́бенъ то́йже:

Нра́вомъ злы́мъ поползо́хся* и порабоще́нъ ле́стію лука́вною, Богоневѣ́стная,* къ пречу́дному Твоему́ милосе́рдію* и те́плому заступле́нію,* Пресвята́я Отрокови́це,* прибѣга́ю, окая́нный,* сою́зъ мя́ изба́ви напа́стей и печа́лей* и спаси́ мя, Пренепоро́чная, де́монскихъ прило́говъ,* да прославля́ю Тя́, и любо́вію пою́,* и покланя́юся,* и велича́ю Тя́, Влады́чице,* Присноблаже́нную.

Крестобогоро́диченъ, подо́бенъ то́йже:

Агнца своего́* Агница нескве́рная дре́вле* и непоро́чная Влады́чица* на дре́вѣ кре́стнѣмъ я́ко узрѣ́,* ма́терски восклица́ше* и, дивя́щися, вопія́ше:* Ча́до сладча́йшее,* что́ зрѣ́ніе сіе́* но́вое и пресла́вное?* Ка́ко со́нмъ безблагода́тный* суди́щу Пила́тову предаде́ Тя* и осужда́етъ на сме́рть Жи́знь вся́ческихъ?* Но воспѣва́ю Твое́ неизрече́нное, Сло́ве, снизхожде́ніе.

Тропа́рь апо́стола, гла́съ 3:

Апо́столе святы́й Фили́ппе, моли́ ми́лостиваго Бо́га, да прегрѣше́ній оставле́ніе пода́стъ душа́мъ на́шимъ.

Сла́ва, тропа́рь преподо́бнаго, гла́съ 8:

Правосла́вія наста́вниче, благоче́стія учи́телю и чистоты́, вселе́нныя свѣти́льниче, археере́овъ богодохнове́нное удобре́ніе, Ѳеофа́не прему́дре, уче́ньми твои́ми вся́ просвѣти́лъ еси́, цѣвни́це духо́вная, моли́ Христа́ Бо́га спасти́ся душа́мъ на́шимъ.

[И ны́нѣ, богоро́диченъ или́ крестобогоро́диченъ.]



НА УТРЕНИ,
[На Бо́гъ Госпо́дь: Тропа́рь апо́стола, два́жды. Сла́ва, преподо́бнаго. И ны́нѣ, богоро́диченъ или́ крестобогоро́диченъ.]

Кано́нъ окто́иха еди́нъ [на 6], и святы́хъ два́ [кано́на на 8].

Апо́стола кано́нъ, его́же краегране́сіе: Фили́ппову боже́ственную воспою́ сла́ву. Іо́сифъ. Гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Пресвѣ́тлыми сія́ніи Христо́выми озари́вся, по прича́стію Божества́, му́дре, свѣ́тъ яви́лся еси́ вторы́й, вѣ́рныя свяще́нно свѣтоводя́, сла́вне Фили́ппе.

Пресу́щественное Сло́во, все́ на́ше осуществова́въ, свяще́нна тя́ ученика́ свяще́нно предлага́етъ, му́дре, несвяще́ннаго омраче́нія язы́ки избавля́юща.

Ру́къ возложе́ніемъ свяще́нныхъ ученико́въ, избра́нъ бы́лъ еси́ со Стефа́номъ и про́чими, свяще́нный діа́конъ, я́ко сы́й по́лнъ Ду́ха Бо́жія, всему́дре Фили́ппе.

Богоро́диченъ: Иже изъ не су́щихъ вся́ содѣ́тельствуя, я́ко вину́ Тя́ имѣ́яше воплоще́нія Своего́, Богома́ти Чи́стая, тѣ́мъ по до́лгу вѣ́рніи Тя́ ублажа́емъ.

Инъ кано́нъ преподо́бнаго, гла́съ и ирмо́съ то́йже.

Моего́ ра́зума твои́ми моли́твами мра́къ отжени́, іера́рше Христо́въ, я́ко да воспою́, сла́вне, твою́ свяще́нную и свѣтоза́рную па́мять пѣ́сньми.

Яко рѣка́, устреми́лся еси́ отъ Сіо́на, іера́рше сла́вне, и напои́лъ еси́ зѣло́ Боже́ственными струя́ми вѣ́рныхъ собо́ры, — Бо́гу побѣ́дную пѣ́снь пои́мъ, — вопія́ше.

Боже́ственными сія́ніи твою́ ду́шу озари́въ, Ѳеофа́не, сла́сти страсте́й воздержа́нія попали́лъ еси́ огне́мъ, пѣснопоя́ и́стинно: воспои́мъ пѣ́снь Христу́.

Богоро́диченъ: Свѣтлѣ́йшими луча́ми Твоего́ Сы́на, Богоро́дице, просвѣти́ омраче́нную мою́ ду́шу и страсте́й смуще́ніе Твои́мъ, Чи́стая, укроти́ хода́тайствомъ.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Сы́ны соверши́лъ еси́ Свѣ́та, во тмѣ́ невѣ́дѣнія су́щія, блаже́нне, въ зна́меніихъ стра́шныхъ, я́ко не́бо высо́кое, Сло́ва сла́ву повѣ́дая.

Отъ пле́мене Іу́дова Христа́ возсія́вша, блаже́нне, свяще́нно возвѣща́я, благода́ти свѣ́томъ показа́лъ еси́, Его́же Моисе́й дре́вле и проро́цы провозвѣсти́ша.

Яда душетлѣ́ннаго отбѣжа́ти и спаси́тельную благода́ть воспрія́ти, покаря́еши медото́чными глаго́лы, отринове́нныя дале́че неразу́міемъ, Фили́ппе богодухнове́нне.

Богоро́диченъ: Свѣти́льникъ яви́лася еси́ та́инственный, Свѣщу́, Отрокови́це, нося́щи и́стинно, просвѣ́щшую въ нощи́ невѣ́дѣнія пре́жде одержи́мыя, кра́йнею бла́гостію.

Инъ. Ирмосъ тойже.

Сы́й испо́лненъ, му́дре, Боже́ственнаго Ду́ха яви́лся еси́, пита́я бога́тно благоче́стія сла́достію сло́вомъ живи́тельнымъ сердца́ зря́щихъ къ тебѣ́.

Повелѣ́ніи Боже́ственнаго сія́нія изблиста́я, всеблаже́нне, отгна́лъ еси́ всю́ ерети́ческую мглу́, Жизнода́вцу Христу́ воспѣва́я: свя́тъ еси́, Го́споди.

На го́ру Боже́ственныхъ добродѣ́телей возше́дъ, іера́рше, и во мра́къ вше́дъ, сочта́лся еси́ съ Бо́гомъ, и ра́зума скрижа́ль прія́лъ еси́, зако́нъ благода́ти.

Богоро́диченъ: Се́ лѣ́ствица Іа́ковля, ю́же ви́дѣ иногда́ утвержде́ну, на не́йже утвержда́шеся Бо́гъ, Свѣтоно́сная Чи́стая яви́ся дѣ́вствующи Богоро́дица.

Конда́къ Ѳеофа́на, гла́съ 2. Подо́бенъ: Вы́шнихъ ища́.

Возгремѣ́въ Христо́во Боже́ственное воплоще́ніе, безпло́тныя враги́ до конца́ обличи́лъ еси́, чу́дне Ѳеофа́не. Сего́ ра́ди вси́ вѣ́рно и благоче́стно вопіе́мъ ти́: моли́ непреста́нно о всѣ́хъ на́съ.

Сѣда́ленъ апо́стола, гла́съ 8. Подо́бенъ: Прему́дрости.

Прогони́тель де́моновъ яви́вся и, я́ко свѣти́льникъ, су́щія во тмѣ́ просвѣти́въ, яви́лъ еси́ Со́лнца, отъ Дѣ́вы возсія́вшаго, и, хра́мы и́дольскія сокруши́въ, возста́вилъ еси́ Це́ркви, блаже́нне, въ сла́ву Бо́га на́шего. Тѣ́мъ тя́ почита́емъ и боже́ственную твою́ па́мять свѣ́тло пра́зднуемъ, и согла́сно вопіе́мъ ти́: апо́столе Фили́ппе, моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

Сла́ва, преподо́бнаго, гла́съ 4. Подо́бенъ: Яви́лся еси́ дне́сь.

Яви́лся еси́, преподо́бне, Це́ркви, я́коже друго́е со́лнце, озаря́я сію́ мо́лніями боже́ственныхъ слове́съ твои́хъ, я́ко учени́къ Госпо́день, Ѳеофа́не.

И ны́нѣ, богоро́диченъ:

Пречи́стыя ру́ки Твоя́, Дѣ́во Ма́ти, просте́рши, покры́й упова́ющія на Тя́ и Сы́ну Твоему́ зову́щія: всѣ́мъ пода́ждь, Христе́, ми́лости Твоя́.

Крестобогоро́диченъ:

На дре́вѣ ви́дящи воздви́жена Сы́на Твоего́, Пречи́стая, утро́бою ма́тернею растерза́ема, жа́лостно взыва́ше: увы́ Мнѣ́, ка́ко за́йде, Свѣ́те Мо́й Безлѣ́тный?

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Ви́дѣвъ тя́ Си́монъ содѣва́юща чудеса́ и зна́менія ве́лія, лицемѣ́рствовавъ, Фили́ппе, креща́ется, не зло́бы бѣжа́въ, но поги́бели предае́тся.

Мно́ги тя́ си́лы содѣва́юща ви́дяще живу́щіи во гра́дѣ Самарíйстѣмъ, проповѣ́дниче Христо́въ Фили́ппе, позна́нія свѣ́тъ, веселя́щеся, пріима́ху.

Иди́, глаго́ла тебѣ́ Госпо́день а́нгелъ, пу́ть направля́я свяще́ннаго, Фили́ппе, му́рина, е́же позна́ти тому́ стезю́ Сло́ва воплоще́нія.

Свяще́ннѣйшій Канда́кій ви́дѣвъ тя́, вразумля́юща того́, твое́ю руко́ю, Фили́ппе, креща́ется, и по́лнъ Ду́ха Свята́го я́влься, проповѣ́дникъ Боже́ственный бы́сть.

Богоро́диченъ: Сы́ны соверши́ Бо́жія, Всенепоро́чная, сы́ны человѣ́ческія Тво́й Сы́нъ, отъ чи́стыхъ крове́й Твои́хъ вопло́щся и ро́ждся, сего́ ра́ди сла́вимъ Тя́.

Инъ. Ирмосъ тойже.

Поще́ніемъ, всему́дре о́тче Ѳеофа́не, себе́ очи́стивъ, ве́сь свѣ́та испо́лненъ бы́лъ еси́, ве́сь Бо́га вмѣсти́теленъ, ве́сь Ду́ха Свята́го соприча́стенъ.

Гла́домъ та́емь, въ лю́тая влага́емь заточе́нія, стражда́, всеблаже́нне, му́ченически терпѣ́лъ еси́, отъ со́вѣсти чи́сты въ Го́сподѣ веселя́ся.

Облиста́въ, сла́вне, исправле́ніи обощре́нъ яви́лся еси́, я́ко Христо́въ ме́чь, ссѣца́ющь ерети́ческая ухищре́нія, Боже́ственнымъ Ду́хомъ укрѣпля́емь.

Богоро́диченъ: Свѣти́льникъ всесвѣ́тлый Ты́ яви́лася еси́, Боже́ственная трапе́за, Бо́жіе селе́ніе, киво́тъ и же́злъ, процвѣ́тши Цвѣ́тъ въ мíрѣ, Христа́, Ма́ти Дѣ́во.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Ярости беззако́нныхъ не убоя́вся, среди́ волко́въ, я́ко а́гнецъ и́стинно, Фили́ппе, ходи́лъ еси́, ты́я претворя́я къ благоче́стію благода́ти сло́вомъ, блаже́ннѣйше.

На заколе́нія веде́ся, я́ко Агнецъ, Емману́илъ, я́коже глаго́летъ Иса́ія сла́вный, Его́же разумѣ́ти не могíй, Фили́ппе, свяще́нный Канда́кій отъ тебе́ науча́ется.

Священносло́вна тя́ ученика́, еди́наго діа́коновъ седми́ избра́нна, увѣ́дѣхомъ и Це́ркве Боже́ственное основа́ніе и всѣ́хъ су́щихъ во тмѣ́ свѣти́льника, Фили́ппе.

Богоро́диченъ: Богоро́дицу Тя́ и́стинно отъ души́ исповѣ́дающе, искуше́ній и неудо́бствъ избавля́емся Твои́ми ко всѣ́хъ Бо́гу и Го́споду, Дѣ́во, хода́тайствы, Богоблагода́тная.

Инъ. Ирмосъ тойже.

Свѣтода́тельными твои́ми блиста́ніи, о́тче свяще́ннѣйше, мра́чную тму́ потреби́лъ еси́ ерети́чествующихъ, богозна́нія свѣ́томъ озаря́я и просвѣща́я мíра концы́.

Злочести́выхъ защи́тницы тебе́, досточу́дна су́щаго, лю́тыми ра́нами уязви́ша, его́же а́нгельстіи чи́ни объима́ху, я́ко Христо́ва іера́рха и боже́ственнаго му́ченика.

Бы́лъ еси́, о́тче, свѣтови́дный заблу́ждшимъ путево́ждь, пла́вающимъ ко́рмчій, коле́блемымъ приложе́ньми лю́тыхъ тве́рдость и стѣна́ недви́жима.

Богоро́диченъ: Добро́та Іа́ковля, ю́же Бо́гъ возлюби́ и всели́тися избра́, земны́хъ сла́ва и прибѣ́жище согрѣша́ющихъ, Богоро́дице, Ты́ яви́лася еси́.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Во́дъ духо́вныхъ испо́лнився, я́ко рѣка́ Боже́ственнаго Еде́ма, изше́лъ еси́, наводня́я волно́ю ти́хою земны́я концы́ и напая́я сердца́ вѣ́рныхъ, досточу́дне.

Отве́рзъ, испо́лнилъ еси́ твоя́ уста́, учениче́, духо́внаго ра́зума, и разве́рзъ горта́нь лука́ваго, поглоще́нныхъ исто́рглъ еси́ безчи́сленная мно́жества, и спа́слъ еси́, апо́столе.

Крѣ́пость низве́ржеся неви́димаго врага́ и отню́дъ поги́бе, тебѣ́, крѣ́постію Ду́ха Христа́ проповѣ́дающу, Фили́ппе, распе́ншагося и язы́ки призыва́ющаго.

Богоро́диченъ: Зако́новъ Тя́ есте́ственныхъ кромѣ́, роди́, Христе́, Содѣ́теля тва́ри, и па́че естества́ пребы́сть и́стинно Дѣ́ва Нескве́рна свята́я Ма́ти Твоя́, Пресвяты́й.

Инъ. Ирмосъ тойже.

Сы́й я́ко со́лнце, богоза́рныя лучи́, преблаже́нне, испусти́лъ еси́, похваля́я му́ченическія стра́сти, вяза́нія, и ра́ны, и ди́вныя по́двиги, іера́рше Христо́въ.

Пречи́стую Влады́чицу похваля́я чи́стѣ язы́комъ твои́мъ, богому́дре, воспѣ́лъ еси́ словеса́ свѣтоза́рная, вѣ́рныхъ собо́ры и му́дрыхъ сердца́ умаща́ющая.

Писа́ніемъ твоего́ всечестна́го и чи́стаго, му́дре, лица́ безбо́жныхъ писа́нія измазу́еши и тѣ́хъ богоме́рзская и безбо́жная повелѣ́нія, возвѣща́я чествова́ти ико́ну Христо́ву.

Богоро́диченъ: Вся́ хотѣ́ніемъ соста́вивый Бо́гъ и содержа́й, Пречи́стая, описа́ніемъ тѣлесе́ на Твои́хъ объя́тіихъ но́сится, Боже́ственнымъ существо́мъ Неопи́санный.

Конда́къ апо́стола, гла́съ 4. Подо́бенъ: Вознесы́йся.

Язы́ковъ лове́цъ пречу́дный и ученико́въ Христо́выхъ собесѣ́дникъ, апо́столовъ предъизбра́нный, Фили́ппъ дне́сь мíру исцѣле́ній подае́тъ бога́тство, покрыва́етъ отъ обстоя́ній того́ хва́лящія. Тѣ́мъ согла́сно зове́мъ ему́: спаса́й вся́ моли́твами твои́ми, апо́столе.

Икосъ:

Яко не́бо сла́ву Бо́жію, самови́дче, исповѣ́давъ, язы́ки да́льнія привлече́ къ вѣ́рѣ бли́зъ бы́ти Бо́га. Тѣ́мъ, я́коже Моисе́й законополо́жникъ, обогаща́еши, прехва́льне, ста́до твое́: о́нъ дре́вле мо́ре пресѣче́ и преве́дъ лю́ди, пото́мъ въ пусты́ни препита́ хлѣ́бомъ небе́снымъ; ты́ же сла́наго лю́таго невѣ́рствія изба́вивъ во Христѣ́ всю́ тва́рь, горѣ́ къ пребыва́ніемъ небе́снымъ возве́лъ еси́ вопію́щія: спаса́й вся́ моли́твами твои́ми, апо́столе.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Наведе́ тя́, я́ко коня́, Пребоже́ственный, возмуща́юща язы́ческое мо́ре, Фили́ппе, главы́ сокруша́юща вра́жія, и пою́ща Ему́ пѣ́сненно: благослове́нъ еси́, Бо́же оте́цъ на́шихъ.

Сказу́я пре́жде всѣ́хъ вѣко́въ сокрове́нную Та́йну, тайноглаго́льникъ же бы́въ, Фили́ппе му́дре, научи́лъ еси́ страны́ и лю́ди и отъ та́инъ ме́рзскихъ очи́стилъ еси́.

Яви́лся еси́ велича́йшая звѣзда́, Фили́ппе сла́вный, и Траллíи удобре́ніе, въ не́йже тѣ́ло твое́ честно́е лежи́тъ, содѣва́я чуде́съ пресла́вная, му́дре, на просвѣще́ніе благочести́вно блажа́щихъ тя́.

Богоро́диченъ: Богороди́тельницу Тя́, Дѣ́во, имену́емъ, Марíе Пречи́стая, спаса́еміи Тобо́ю де́нь и но́щь отъ вра́жіихъ приложе́ній вре́дныхъ, и искуше́ній вся́ческихъ, и душе́вныхъ скве́рнъ.

Инъ.

Ирмо́съ: Отроцы въ Вавило́нѣ пе́щнаго пла́мене не убоя́шася, но, посредѣ́ пла́мене вве́ржени, ороша́еми, поя́ху: благослове́нъ еси́, Го́споди, Бо́же оте́цъ на́шихъ.

Исправля́я ты́ и́стины сло́во, ра́нъ искуше́нія претерпѣ́лъ еси́ и, во изгна́ніе вложе́нъ, іера́рше Ѳеофа́не, пѣ́лъ еси́: благослове́нъ еси́, Го́споди, Бо́же оте́цъ на́шихъ.

Твои́хъ догма́товъ струи́ нечести́выхъ потопи́ша моря́, му́дре, не вопію́щихъ Христу́, Бо́гу на́шему: благослове́нъ еси́, Го́споди, Бо́же оте́цъ на́шихъ.

Рѣ́ки твои́хъ слове́съ медото́чныхъ, Ѳеофа́не, человѣ́ковъ ду́ши весе́лія боже́ственнаго испо́лниша, пѣсносло́вящихъ пѣ́сньми Бо́га Препросла́вленнаго.

Богоро́диченъ: На Тебѣ́ вели́кое содѣ́яся, Дѣ́во Ма́ти, та́инство: Сы́нъ Бо́жій, изъ чре́ва Твоего́ вопло́щся, ны́нѣ яви́ся, Ему́же, веселя́щеся, пое́мъ: отце́въ Бо́же, благослове́нъ еси́.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Сло́вомъ боже́ственнымъ, всеблаже́нне, я́коже со́лію, раствори́въ, пре́лести очи́стилъ еси́ смра́дъ лю́тый, и человѣ́ческая сердца́ исцѣли́лъ еси́, чести́ и сла́вити Тро́ицу во вѣ́ки.

Утверди́шася но́ги хромы́хъ сло́вомъ твои́мъ, му́дре, ду́си же ме́рзцыи и нечи́стіи рыда́ху, терпѣ́ти не могу́ще да́нныя тебѣ́ благода́ти.

Въ Самарíи дре́вле живу́щіи, Фили́ппе, благода́ти зарю́ отъ тебе́ пріе́млютъ, ви́дяще мно́гая содѣва́юща тя́ чудеса́ си́лою Ду́ха, Исто́чника благода́тнаго.

Богоро́диченъ: Коле́блющуюся зло́бою ратобо́рца ду́шу мою́, Дѣ́во Чи́стая, укрѣпи́, боже́ственнымъ призира́ніемъ Дви́жущаго вся́ческая пріе́мши и неподви́жущися.

Инъ.

Ирмо́съ: За зако́ны оте́ческія блаже́нніи въ Вавило́нѣ ю́ноши, предбѣ́дствующе, царю́ющаго оплева́ша повелѣ́ніе безу́мное, и совоку́плени, и́мже, не свари́шася огне́мъ, Держа́вствующему досто́йную воспѣва́ху пѣ́снь: Го́спода по́йте, дѣла́, и превозноси́те во вся́ вѣ́ки.

Зако́нъ оте́ческій, всеблаже́нне, и́стинно нося́, пребеззако́ннѣйшаго ца́рствующаго поплева́лъ еси́ повелѣ́ніе несмы́сленное, погубля́юща, о́тче, Госпо́дне воображе́ніе благоче́стно лобза́ющихъ, е́же пріе́мь, въ мíрѣ яви́ся отъ Дѣ́вы Отрокови́цы, Его́же превозно́симъ во вѣ́ки.

Умъ боже́ственъ, Ду́ха Пресвята́го гу́сль всесли́чная, славíй добропѣ́снивый, вѣ́рныхъ ве́рхъ, Правосла́вія сто́лпъ и утвержде́ніе, му́дре, Це́ркве тве́рдь, мона́ховъ хвала́, Ѳеофа́не, отце́въ сла́ва и крѣ́пость яви́лся еси́, воспѣва́я Христа́ во вѣ́ки.

Мѵрополо́жница Ду́ха Пресвята́го, о́тче, ты́ показа́лся еси́ излива́ніемъ мѵродохнове́нныхъ твои́хъ и му́дрыхъ уче́ній, потребля́я пре́лести злосмра́днѣйшую тлю́, и благово́нствуеши нра́вомъ твои́мъ Честну́ю Це́рковь, зовя́ непреста́нно: пѣ́сньми тя́ превозно́симъ, Христе́, во вѣ́ки.

Богоро́диченъ: Бо́жія гора́ ту́чнѣйшая, ю́же пра́отецъ Дави́дъ предписа́ дре́вле, пѣснопоя́ проро́чески, Ты́ яви́лася еси́, Дѣ́во, отъ нея́же отсѣче́ся Ка́мень краеуго́льный, Христо́съ, и сокруши́ крѣ́пость всю́ и́дольскую. Того́ непреста́нно пое́мъ и превозно́симъ во вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Ви́дѣвъ дре́вле тебѣ́ ча́емая и боже́ственную пріе́мъ вла́сть непоколеби́му, о не́йже человѣ́ки научи́лъ еси́, Фили́ппе богоглаго́ливе, красу́йся и лику́й, Боже́ственнаго наслажда́яся просвѣще́нія и утѣше́нія.

Яко свѣ́тъ, я́ко звѣзда́, я́ко вели́кое со́лнце, свѣща́тельными заря́ми обте́клъ еси́ вселе́нную, возвѣща́я Боже́ственное проповѣ́даніе: во Траллíю же, Асíйскій гра́дъ, прише́дъ, ему́же во́ждь бы́въ, блаже́нне, въ не́мъ усну́лъ еси́.

Кре́стъ, и сме́рть, и воскресе́ніе Изба́вителя бли́жнимъ и да́льнимъ возвѣсти́лъ еси́, не́бо озвѣзде́нное бы́въ, Боже́ственными свѣтлостьми́ блиста́ющося, Фили́ппе, апо́столе Христо́въ досточу́дне.

Земля́ тѣ́ло твое́ многострада́льное, сія́ніе испуща́ющее исцѣле́ній, покры́, не́бо же ду́хъ тво́й святы́й со апо́столы и́мать веселя́щейся, съ ни́миже и на́съ помяни́, му́дре, хва́лящихъ тя́.

Богоро́диченъ: Гла́съ прино́ситъ Ти́ благода́рственный вся́кое дыха́ніе, вопію́щій ве́село и глаго́лющій: ра́дуйся, престо́ле Вы́шняго огнеобра́зный; ра́дуйся, Бо́жіе село́ простра́ннѣйшее; ра́дуйся, апо́столовъ благолѣ́пное, Чи́стая, вѣнча́ніе.

Инъ.

Ирмо́съ: Безсѣ́меннаго зача́тія рождество́ несказа́нное, Ма́тере Безму́жныя нетлѣ́ненъ Пло́дъ: Бо́жіе бо рожде́ніе обновля́етъ естества́. Тѣ́мже Тя́ вси́ ро́ди, я́ко Богоневѣ́стную Ма́терь, правосла́вно велича́емъ.

Побо́рствующа тя́ по Христо́вѣ Це́ркви человѣкоубíйца зрѣ́ти не могíй, искуше́нія тебѣ́ простира́етъ: оба́че непрекло́ненъ пребы́лъ еси́, мужему́дренно къ царе́мъ нечести́вымъ противля́яся до́блественно, увѣща́я ты́я покланя́тися о́бразу Христо́ву, Ѳеофа́не.

Укра́шенъ несказа́нною, богому́дре, добро́тою Тро́ицы и упещре́нъ сія́ніи, свѣ́тиши и ра́достно, пребога́те, обстои́ши престо́лъ и́стинно Зижди́теля и Бо́га, идѣ́же пра́зднующихъ гла́съ, о́тче богоно́се Ѳеофа́не.

Твои́хъ подвиго́въ досто́йно прія́лъ еси́ че́сти и, вѣнцено́сецъ, ны́нѣ на небесѣ́хъ со а́нгелы свесели́шися, идѣ́же проро́ковъ собо́ръ, и апо́столовъ, и му́чениковъ и́стинно во́инства мно́гая, идѣ́же патріа́рховъ ли́ки, помина́й на́съ, о́тче Ѳеофа́не.

Богоро́диченъ: Побо́рствующи царе́мъ вѣ́рнымъ во бранѣ́хъ на ва́рвары, да́ждь побѣди́тельная, Дѣ́во Богороди́тельнице, Благослове́нная и Препросла́вленная, Ма́ти Неискусобра́чная Чи́стая, покрыва́ющи отъ вся́каго вре́да вра́жія, да Твоего́ Сы́на пою́ще, Тя́ велича́емъ.

Свѣти́ленъ. Подо́бенъ: Не́бо звѣзда́ми.

Апо́столе Христо́въ, во всю́ вселе́нную протече́ твое́ вѣща́ніе, Бо́га проповѣ́далъ еси́ на́мъ, Его́же о на́съ моли́ свѣ́тъ у́мный на́мъ возсія́ти.

Сла́ва, преподо́бнаго. Подо́бенъ: Жены́, услы́шите.

Яко Боже́ственный свѣ́тъ, Ѳеофа́не, Це́ркви яви́лся еси́, пѣ́сней твои́хъ сія́ніемъ сію́ озари́въ, и свѣ́томъ лица́ твоего́, на не́мже Христо́вы я́звы носи́въ, удобря́емъ, къ Нему́же не преста́й моля́ся о ста́дѣ твое́мъ, о́тче.

И ны́нѣ, богоро́диченъ:

Дре́вле дарова́нную мнѣ́ ри́зу купѣ́лію креще́нія, оскверни́хъ стра́стными блуды́, и ужаса́юся, окая́нный, ча́съ помышля́я Боже́ственнаго и́стинно стра́шнаго суда́, Дѣ́во Всенепоро́чная, предста́ни тогда́ и изба́ви мя́ стра́шнаго преще́нія.


НА ЛИТУРГІИ,

Проки́менъ апо́стола, [гла́съ 8]: Во всю́ зе́млю изы́де вѣща́ніе и́хъ, и въ концы́ вселе́нныя глаго́лы и́хъ. Сти́хъ: Небеса́ повѣ́даютъ сла́ву Бо́жію, [творе́ніе же руку́ Его́ возвѣща́етъ тве́рдь]. Апо́столъ, Дѣя́ній, зача́ло 20. Аллилу́ія, гласъ 1: Исповѣ́дятъ небеса́ чудеса́ Твоя́, Го́споди, [и́бо и́стину Твою́ въ це́ркви святы́хъ. Сти́хъ: Бо́гъ прославля́емь въ совѣ́тѣ святы́хъ]. Ева́нгеліе Луки́, зача́ло 50. Прича́стенъ: Во всю́ зе́млю [изы́де вѣща́ніе и́хъ, и въ концы́ вселе́нныя глаго́лы и́хъ].

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 94 – 100 об.

/ Къ оглавленію раздѣла /


Наверхъ / Къ титульной страницѣ

0