Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 29 апрѣля 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 10-й де́нь.
Святы́хъ му́ченикъ Евла́мпія и Евлампíи.

[ВЕЧЕРЪ,]
На Го́споди воззва́хъ: стихи́ры, гла́съ 4. Подо́бенъ: Яко до́бля.

Просвѣ́щшеся Ду́хомъ Святы́мъ,* прехва́льніи му́ченицы,* къ ко́знемъ міродержи́теля ополчи́стеся* и, сего́ му́жески побѣ́ждше,* Боже́ственнымъ посо́біемъ* на него́ до́блествовасте.* Тѣ́мъ дне́сь свѣ́тлую ва́шу па́мять соверша́юще,* по до́лгу хвала́ми ва́ша почита́емъ* страда́нія, преслову́щіи.

И огню́ смѣси́вшеся,* и му́камъ, святíи,* непрекло́нни мудрова́ніемъ пребы́сте,* и, я́ко свѣщи́, вже́гшеся* теплото́ю Ду́ха,* просвѣти́ли есте́ вѣ́рныхъ сердца́ благода́тію.* Тѣ́мъ вся́къ во́зрастъ и ро́дъ* пра́зднуетъ святу́ю ва́шу па́мять,* пѣсносло́вяще Го́спода.

Богому́дрый Евла́мпій* и Евлампíя всечестна́я,* дво́ица боже́ственная,* возсія́вше, я́ко звѣ́зды многосвѣ́тлы,* тва́рь просвѣща́ютъ* по́двигъ сія́ньми и чуде́съ свѣтлостьми́.* Си́хъ дне́сь всесвяще́нную па́мять соверша́юще,* съ весе́ліемъ покланя́емся* ра́цѣ моще́й ва́шихъ.

Сла́ва, гла́съ 4. Іоа́нна мона́ха:

Братолю́бію единоиме́ніе сраство́ршееся и чистота́, безстра́стію сочета́вшися, безъ вре́да сохрани́сте нра́вное благосе́рдіе, идѣ́же бо Бо́гъ жела́емь, мíръ ве́сь небреже́тся. О, чудесе́! змíй умертви́ся, и на высоту́ непра́вду глаго́лавый подзе́мный, самобра́тныхъ муче́ніемъ низпаде́, Евла́мпія му́драго и Евлампíи. Къ ни́мже духо́вными пѣ́сньми возопіи́мъ: и́же до́брѣ тече́ніе о Христѣ́ соверши́вшіи, проси́те ми́ра мíру и душа́мъ на́шимъ ве́лія ми́лости.

И ны́нѣ, богоро́диченъ или́ крестобогоро́диченъ. Подо́бенъ: Яко до́бля.

Агнца и Па́стыря, Тя́* на дре́вѣ я́ко ви́дѣ,* Агница ро́ждшая рыда́ше* и ма́терски Ти́ вѣща́ше:* Сы́не возжелѣ́нне,* ка́ко на дре́вѣ кре́стнѣмъ повѣ́шенъ еси́, Долготерпѣли́ве?* Ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?

На стихо́внѣ окто́иха. Сла́ва, му́чениковъ, гла́съ 4. Самогла́сенъ:

Тро́ичнымъ свѣ́томъ самобра́тній сопру́гъ просвѣ́щся, мучи́телей суровство́ низложи́. Тѣ́мъ и пла́мень попра́вше, ликовствова́ху, пою́ще, — се́ ны́нѣ что́ добро́ или́ что́ красно́, но е́же жи́ти бра́тіи вку́пѣ, — и, къ Боже́ственнѣй сла́вѣ зря́ще, небе́сныя сла́вы сподо́бишася, Христа́ Бо́га о на́съ всегда́ моля́ще спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Яко до́бля.

На Крестѣ́ Тя я́ко узрѣ́* пригвожде́на, Го́споди,* Агница и Ма́ти Твоя́ дивля́шеся,* и — что́ видѣ́ніе сіе́, — взыва́ше, —* Сы́не вожделѣ́нне?* Сія́ Ти невѣ́рный собо́ръ воздаде́ беззако́нный,* мно́гихъ Твои́хъ чуде́съ наслади́выйся.* Но сла́ва неизглаго́ланному* соше́ствію Твоему́, Влады́ко.

Тропа́рь, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости. Тѣ́хъ моли́твами спаси́ ду́ши на́ша.


НА УТРЕНИ,
Оба кано́на окто́иха и святы́хъ кано́нъ на 4, его́же краегране́сіе: Самобра́тное пою́ сопряже́ніе. Ѳеофа́ново. Гласъ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Любо́вію Христо́вою распаля́емь, му́чениче Евла́мпіе, мірско́е отве́рглъ еси́ омраче́ніе; небе́сному же, прему́дре, прибли́жился еси́ те́плѣ Свѣ́ту невеще́ственному, всеблаже́нне.

Раче́ніе е́же къ Бо́гу твое́, прему́дре му́чениче Евла́мпіе, муче́ній преврати́ стремле́ніе, воздержа́ніемъ же и стоя́ніемъ де́монская попали́ ополче́нія и́стинно, многохва́льне.

Укрѣпи́въ богоглаго́ливымъ твои́мъ язы́комъ во́инство му́ченическое, приве́лъ еси́ ко Христу́ совокупле́ніе боже́ственное, многобога́тное уловле́ніе и пріе́мля съ ни́ми вѣнцы́ нетлѣ́нныя, пребога́те.

Богоро́диченъ: Съ высоты́ во чре́во Твое́, Пречи́стая, прише́дъ Бо́гъ, пло́ть бы́въ, произы́де я́вственно, па́дшія возвыша́я къ Себѣ́, сынополага́я благода́тію земны́я, Всепѣ́тая Дѣ́во Чи́стая.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Возвы́сити вра́гъ пре́лести лука́вное писа́ніе душетлѣ́нно хотя́ще, но того́ въ про́пасть низве́рглъ еси́. [Два́жды.]

Любо́вію бра́тнею распала́ема, ко Христо́вѣ добро́тѣ, отрокови́це, притекла́ еси́ я́вѣ, му́ченице Евлампíе приснослову́щая.

Богоро́диченъ: Безсѣ́менно Бо́жіе Сло́во, Отрокови́це, во чре́вѣ Твое́мъ пріе́мши неслія́нно, па́че ума́, Пречи́стая, на́мъ родила́ еси́.

Сѣда́ленъ, гла́съ 8. Подо́бенъ: Прему́дрости.

Муче́ній о́блаки те́мныя, страда́льцы, преше́дше терпѣли́вно, я́ко со́лнце, благода́тію Спа́совою возсія́сте; бра́тскою же любо́вію Боже́ственнѣ связа́еми, подо́бными болѣ́зньми свѣ́тло украси́стеся. Тѣ́мъ по кончи́нѣ безконе́чную благода́ть отъ высоты́ прія́сте исцѣля́ти неду́ги, Госпо́дни уго́дницы; моли́те Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять ва́шу.

Сла́ва, и ны́нѣ, богоро́диченъ:

Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому заступле́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, изъ Тебе́ Воплоще́нному безсѣ́менно моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихтися, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти, воспѣва́ющимъ досто́йно сла́ву Твою́.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя Стра́сти Твоя́.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Любве́ ра́ди Зижди́теля, о страстоте́рпцы, всю́ мірску́ю ле́сть и́стинно презрѣ́вше, Еди́наго возжелѣ́сте Христа́, взыва́юще: сла́ва си́лѣ Твое́й, Го́споди.

Наступи́вше на пе́щный пла́мень и попра́вше сего́, му́ченицы, росо́ю съ небе́съ боже́ственно обогати́стеся, Христу́ взыва́юще: сла́ва си́лѣ Твое́й, Го́споди.

Просвѣ́щшеся Тро́ичнымъ сія́ніемъ, му́чениковъ до́бляя верста́ и́дольское разруши́ омраче́ніе, Христу́ взыва́юще: сла́ва си́лѣ Твое́й, Го́споди.

Богоро́диченъ: Носи́мое сме́ртное стремле́ніе, Дѣ́во, Ты́, Христа́ ро́ждши нетлѣ́нно, Марíе, уста́вила еси́, сочета́вши безпло́тнымъ чино́мъ ро́ды земны́хъ, Пренепоро́чная.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Не преврати́ша ва́съ приложе́нія муче́ній, тве́рдіи, на ка́мени бо Спа́совѣ душе́вныя ва́ша но́ги я́вѣ утверди́сте. [Два́жды.]

Побѣ́ждше крѣ́пко ле́сти первонача́льнаго, упраздни́сте и́дольскія кро́вныя же́ртвы крове́й ва́шихъ лія́ніемъ, сла́вніи.

Богоро́диченъ: Отъя́ла еси́ кля́тву, я́ко Ра́дость ро́ждши, обожи́вшую земны́я, Бо́га Твои́ми рука́ми носи́вши, Ма́ти Богоневѣ́сто.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Цѣле́ніе душетлѣ́нныхъ страсте́й яви́шася ва́ша кро́ви всѣ́мъ, страстоте́рпцы, вѣ́рою притека́ющимъ къ боже́ственнѣй и всесвѣ́тлѣй ра́цѣ, преблаже́нніи. [Два́жды.]

Зако́нно за Христа́ пострада́вше, сла́вніи, обогати́стеся вѣнце́мъ нетлѣ́ннымъ и́стинно, преблаже́нніи, и Ца́рство небе́сное, и Боже́ственное наслажде́ніе прія́сте.

Богоро́диченъ: Обрѣ́тъ Тя́ посредѣ́ те́рнія, Пренепоро́чная, я́ко пречи́стый кри́нъ и юдо́льный цвѣ́тъ, о Богома́ти, Жени́хъ во чре́вѣ Твое́мъ пло́ть бы́сть.

Конда́къ, гла́съ 3. Подо́бенъ: Дѣ́ва дне́сь.

До́блія му́ченики и бра́тію по пло́ти, му́драго Евла́мпія и Евлампíю, почти́мъ: тíи бо пребеззако́нныхъ кознодѣ́йства посрами́ша сило́ю Распе́ншагося: сего́ ра́ди яви́шася му́чениковъ сла́ва, ку́пно и похвала́.

Икосъ:

Дво́ицу, вѣ́рніи, страстоте́рпцевъ дне́сь въ пѣ́снехъ свяще́нныхъ и пѣ́ніихъ похва́лимъ, я́ко ле́сть и́дольскую низложи́ша, многобо́жія о́гнь испепели́ша и де́моны посрами́ша; мучи́телей же я́рости не устраши́шася, меча́ у́бо и огня́ не убоя́шася, ниже́ звѣре́й стремле́нія, до́блественно подвиза́вшеся до́брѣ, Евла́мпій сла́вный съ честно́ю Евлампíею и со страда́льцы, я́вльшеся му́чениковъ сла́ва, ку́пно и похвала́.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Ра́зумомъ Боже́ственнымъ обогаще́нъ, му́чениче приснопа́мятне, все́ томле́ніе укори́лъ еси́ и́стинно злочести́выхъ, Евла́мпіе, поя́: благослове́нъ еси́ въ хра́мѣ сла́вы Твоея́, Го́споди. [Два́жды.]

Яко поте́кше къ любви́ и́стинно Созда́вшаго, боже́ственно сочета́стеся, о страда́льцы, я́коже пло́тію и ду́хомъ, пою́ще: благослове́нъ еси́ въ хра́мѣ сла́вы Твоея́, Го́споди.

Богоро́диченъ: Страннолѣ́пно Ты́ Отчее, Дѣ́во, зачала́ еси́ Сло́во во чре́вѣ Твое́мъ, Пречи́стая, и пло́тію родила́ еси́ зову́щимъ: благослове́на Ты́ въ жена́хъ еси́, Всенепоро́чная Влады́чице.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Ва́съ, страда́льцы сла́вніи, не возмого́ша разлучи́ти отъ любве́ Христо́вы му́къ умноже́нія: ни о́гнь, ни ра́ны, прему́дріи, ни коно́бная врѣ́нія, ни острота́ меча́, но побѣди́сте, вопію́ще: благослови́те вся́ дѣла́ Госпо́дня Го́спода. [Два́жды.]

Ны́нѣ вмѣ́сто болѣ́зней благовре́менно вы́ Ца́рствомъ Бо́жіимъ обогати́стеся, сла́вніи страда́льцы, приснослову́щій Евла́мпіе съ Евлампíею, честно́ю дѣ́вою му́ченицею, вопію́ще: благослови́те вся́ дѣла́ Госпо́дня Го́спода.

Богоро́диченъ: Яко Еди́на ро́ждши Бо́га, Ма́ти Безневѣ́стная, безсѣ́меннымъ рождество́мъ, Чи́стая, Сего́ ми́лостива сотвори́, Влады́чице, сохрани́тися ста́ду Твоему́ отъ искуше́нія враго́въ, вопію́щу Христу́: благослови́те вся́ дѣла́ Госпо́дня Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Тече́ніемъ крове́й пре́лесть и́дольскую, страстоте́рпцы му́ченицы, разруши́сте, муче́нія ва́шего воспріе́мше мзду́, небе́сное жили́ще и пребыва́ющій поко́й.

Се́ вмѣ́сто тмы́, ю́зъ же, и огня́, и ра́нъ, страстоте́рпцы, Свѣ́тъ присносія́нный ва́мъ, простра́нство и восхлажде́ніе ра́достное, поле́зныя благода́ти удо́бно подаде́ся, му́ченицы сла́вніи пребога́тіи.

Тече́ніе соверши́вше боже́ственное ва́шего честна́го страда́нія, въ свѣ́тлостехъ Бо́жіихъ водворя́етеся, идѣ́же ли́цы а́нгельскихъ чино́въ, и мно́жества пра́ведныхъ, и му́ченикъ собо́ри, о приснопа́мятніи.

Богоро́диченъ: Проро́ческая ны́нѣ прорече́нія коне́цъ прія́ша, Дѣ́во, Отрокови́це, плотоно́снаго Бо́га на́мъ ро́ждши Ты́, Всечи́стая. Тѣ́мъ, е́же ра́дуйся, Влады́чице, со а́нгеломъ зове́мъ Ти́.

Свѣти́ленъ. Подо́бенъ: Жены́, услы́шите.

Въ лѣ́поту самобра́тное страстоте́рпцевъ сдохнове́ніе, Евла́мпій богому́дрый и честна́я Евлампíя, зва́ніемъ обога́щшеся отъ Боже́ственнаго предзна́нія: тва́рь бо просвѣща́ютъ му́ченическими заря́ми и исцѣле́ній сія́ньми.

Богоро́диченъ: Изъ Тебе́ Пресу́щественный Бо́гъ, Чи́стая, въ смѣше́ніе человѣ́ческаго существа́ мно́гимъ милосе́рдіемъ одѣ́яся, не смѣси́въ увѣ́дѣнія обои́хъ, Отрокови́це, есте́ствъ, но Еди́нъ Сы́нъ бы́въ по обоему́, и по Рождествѣ́.

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 90 – 93 об.

/ Къ оглавленію раздѣла /


Наверхъ / Къ титульной страницѣ

0