Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 26 iюня 2017 г. Сейчасъ на порталѣ посѣтителей - 25.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

СКАЗАНІЕ О ПРАЗДНИКѢ

Повѣсть о нашествіи папистовъ на Святую гору Аѳонскую.

Святые преподобномученики ЗографскиеОдинъ добродѣтельный старецъ жилъ въ виноградникѣ болгарской обители св. Великомученика Георгія, именуемой Зографъ на разстояніи получаса ходу отъ нея, по направленію къ юго-западу. Этотъ старецъ имѣлъ у себя для келейныхъ молитвъ икону Пресвятыя Богородицы, предъ которою, совершая ежедневное кажденіе, читалъ акаѳистъ. И вотъ, когда богомерзкіе римляне напали на Святую гору съ злодѣйскою цѣлію и уже вышли изъ кораблей на берегъ, — этотъ богоугодный старецъ, стоя на обычной молитвѣ предъ иконою Пресвятыя Богородицы и произнося: «радуйся», услышалъ отъ святой иконы слѣдующее: «радуйся и ты, старче! поскорѣе бѣги отсюда, чтобы не постигло тебя несчастіе. Возвѣсти братіямъ обители, чтобы заперлись, потому что богопротивные римляне напали на это Мною избранное мѣсто и уже находятся близко». Старецъ же, упавъ предъ иконою Богоматери на землю, сказалъ Ей: «какъ я могу, Владычице, оставить здѣсь Тебя мою Заступницу?» На это голосъ отъ иконы отвѣчалъ ему: «не заботься обо Мнѣ, но иди поскорѣй». Когда онъ пошелъ къ монастырю возвѣстить слышанное имъ, тотчасъ двинулась съ своего мѣста неисповѣдимою силою и неизвѣстнымъ образомъ св. икона и, обогнавъ старца, прежде пришла въ монастырь и стала надъ монастырскими воротами. далѣе>>

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 10-й де́нь.
Слу́жба святѣ́й чудотво́рнѣй Зогра́фстѣй ико́нѣ Ака́ѳистнѣй Пресвяты́я Богоро́дицы, нарица́емѣй Предвозвѣсти́тельницы и святы́мъ 26-ти преподобному́ченикомъ Зогра́фскимъ.

НА МАЛѢЙ ВЕЧЕРНИ,
[На Го́споди воззва́хъ:] стихи́ры [Богоро́дицы] на 4, гла́съ 2. Самогла́сны:

Пріиди́те, лю́діе, просла́вимъ Богоро́дицу Марíю, наше́ствіе враго́въ на́шихъ на́мъ предвозвѣща́ющую, и о спасе́ніи на́шемъ Христа́ моля́щую.

Пріиди́те, Правосла́вія рачи́теліе, просла́вимъ Ма́терь Христа́ Бо́га на́шего, латиному́дрствующихъ врага́ми Сы́на Своего́ нарица́ющую, на́съ же, я́ко и́стинныхъ ча́дъ Свои́хъ лю́бящую, и отъ всѣ́хъ бѣ́дъ избавля́ющую.

Пріиди́те, вси́ ча́да Восто́чныя Це́ркви, просла́вимъ Цари́цу небесе́ и земли́, съ высоты́ небе́сныя на́съ назира́ющую, и на по́двигъ укрѣпля́ющую, востаю́щія же на ны́ ерети́чествующихъ шата́нія низлага́ющую, и вспя́ть обраща́ющую.

Пріиди́те, вси́ насе́льницы горы́ Аѳо́нскія, въ Правосла́віи неподви́жно пребыва́ющіи, просла́вимъ чу́дную на́шу покрови́тельницу и учи́тельницу, Приснодѣ́ву Богоро́дицу, о спасе́ніи на́шемъ всегда́ пеку́щуюся, и въ душепа́губныя е́реси впа́сти на́съ не попуща́ющую.

Сла́ва, [преподобному́чениковъ], гла́съ 4. Самогла́сна:

Яко жи́знь ва́ша блаже́нна, и сме́рть честна́ показа́ся вои́стинну, по благоче́стіи бо ду́ши ва́ша презрѣ́вше, я́коже бо тріе́ о́троцы веще́ственному огню́ пріобщи́стеся, и ны́нѣ со святы́ми жре́бій ва́шъ е́сть, идѣ́же и всели́стеся въ жили́ще неконча́емое, и моли́теся о душа́хъ на́шихъ.

И ны́нѣ, [Богоро́дицы,] гла́съ то́йже:

Пріиди́те, вѣ́рніи, поклони́мся чудотво́рному и всечестно́му Бо́жія Ма́тере о́бразу, отъ него́же иногда́ гла́съ чу́дный услы́шася, наше́ствіе лати́нъ предвозвѣща́ющь, и́нокомъ же Зогра́фскимъ затвори́тися во оби́тели повелѣва́ющь.

На стихо́внѣ стихи́ры [Богоро́дицы], гла́съ 5. Подо́бенъ: Ра́дуйся, по́стническихъ. [1]

Ра́дуйся, Госпоже́ Всеми́лостивая, Предвозвѣсти́тельнице Всеблага́я; ра́дуйся, Аѳо́на тве́рдое огражде́ніе, мона́ховъ наста́внице и засту́пнице; ра́дуйся оби́тели на́шей защи́тнице, и всемíрная покрови́тельнице; ра́дуйся, всѣ́хъ по́моще, и спасе́ніе ду́шъ на́шихъ.

Сти́хъ: Помяну́ и́мя Твое́, во вся́комъ ро́дѣ и ро́дѣ.

Ра́дуйся, высото́ неудобовосходи́мая, го́ру Аѳо́нскую въ жре́бій Себѣ́ избра́вшая, и мно́жествомъ и́нокъ насе́льшая; ра́дуйся, Правосла́віе въ не́й всецѣ́ло соблюда́ющая, ерети́чествующихъ же вся́ воста́нія всемо́щною Твое́ю си́лою отрева́ющая.

Сти́хъ: Слы́ши, Дщи́, и ви́ждь, и приклони́ у́хо Твое́.

Ра́дуйся, Богоро́дице Дѣ́во, вѣ́чныя на́мъ ра́дости хода́таице; ра́дуйся, живота́ на́шего храни́тельнице, и ко спасе́нію руководи́тельнице, пре́лѣсть лати́нъ, и су́етнаго царя́ Византíйскаго Михаи́ла, съ ни́миже и Ве́кка безу́мнаго посра́мльшая.

Сла́ва, [преподобному́чениковъ], гла́съ 4. Самогла́сенъ:

Пѣ́сньми Боже́ственными да почита́ются ны́нѣ досто́йно Ѳома́ игу́менъ, и Парѳе́ній, и сла́вный Варсану́фій, Кири́ллъ, Си́монъ, Михе́й, Са́вва, Іовъ, Іа́ковъ, Косма́ и Иларіо́нъ, Кипріа́нъ и Мина́, Іо́сифъ и Іа́ковъ, Па́велъ же и Се́ргій, ку́пно со Анто́ніемъ, Іоанни́кій боже́ственный, и Евѳи́мій сла́вный, Мартиніа́нъ же и Дометіа́нъ, ку́пно съ четы́рми иными, и́хже па́мять ны́нѣ почита́емъ.

И ны́нѣ, [гла́съ то́йже.] Подо́бенъ:

Тро́ице неисчетноси́льная, Еди́нице Тріѵпоста́сная, моли́твами тве́рдыхъ Твои́хъ страда́льцевъ, и Приснодѣ́вы еди́ныя Богоро́дицы, спаси́ ны́, воспѣва́ющія Тя́.

Тропа́рь [преподобному́чениковъ], гла́съ 1:

Преподобнострада́льный богоизбра́нный по́лкъ два́десять и шести́ боже́ственныхъ, оби́тели Зогра́фскія отце́въ, изобличи́вшихъ лати́нское заблужде́ніе, и ну́жную сме́рть огне́мъ на столпѣ́ претерпѣ́вшихъ: Ѳому́ пастыренача́льника, и свяще́ннаго Варсану́фія, со сла́внымъ Парѳе́ніемъ и про́чіихъ сострада́льцевъ, вси́ въ то́йже оби́тели живу́щіи, собра́вшеся пѣ́сньми почти́мъ; сíи бо Тро́ицѣ о на́съ мо́лятся.

[Инъ тропа́рь отце́въ], гла́съ то́йже:

До́блихъ страстоте́рпцевъ и тве́рдыхъ адама́нтовъ, сквозѣ́ о́гнь проше́дшихъ и пре́лесть испепели́вшихъ, два́десять и ше́сть отце́въ съ преподо́бнымъ Космо́ю, оби́тели защи́тниковъ и блюсти́телей, благохва́ляще согла́сно отъ души́ воззове́мъ: сла́ва Укрѣ́пльшему ва́съ, сла́ва Уди́вльшему вы́, сла́ва Да́рующему ва́ми всѣ́мъ исцѣле́нія.

Сла́ва, и ны́нѣ, [тропа́рь Богоро́дицы], гла́съ то́йже:

Якоже иногда́ ста́рцу и́ноку, предъ свято́ю Твое́ю ико́ною похва́льная Тебѣ́ воспѣва́вшему, взаи́мно ра́доватися рекла́ еси́, и враго́въ прише́ствіе предвозвѣсти́ла еси́, Богоро́дице, та́ко и ны́нѣ услы́ши на́ша мольбы́, и наше́ствіе враго́въ ви́димыхъ и неви́димыхъ прожени́ отъ на́съ, да вси́ благода́рственно вопіе́мъ Ти́: ра́дуйся, безневѣ́стная Ма́ти, кова́рства вра́жія запина́ющая, и отъ всѣ́хъ зо́лъ на́съ избавля́ющая.


НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди возва́хъ: стихи́ры [Богоро́дицы] на 10, гла́съ 1. Подо́бенъ: О, ди́вное чу́до!

О, ди́вное чу́до! Ико́на Богома́тери, и́же во Аѳо́нѣ, я́ко жива́ су́щи, гла́съ провѣщева́етъ, наше́ствіе враго́въ предвозвѣща́етъ. Тѣ́мже у́бо весели́теся, и́ноцы Аѳо́нстіи, и всю́ тва́рь созыва́йте вопи́ти Преблагослове́ннѣй: Благода́тная, ра́дуйся, съ Тобо́ю Госпо́дь, подая́й мíрови Тобо́ю ве́лію ми́лость.

О, вели́кое Твое́, Богома́ти, благоволе́нія къ насе́льникомъ земна́го жре́бія Твоего́! Ты́ бо и́ноку Зогра́фскому, предъ ико́ною Твоею́, — ра́дуйся, — Тебѣ́ воспѣва́вшему, взаи́мъ ра́доватися рекла́ еси́, и наше́ствіе [суему́дрыхъ и духобо́рныхъ] лати́нъ предвозвѣсти́ла еси́. Тѣ́мже и мы́ Тебѣ́ вопіе́мъ: Благода́тная, ра́дуйся, съ Тобо́ю Госпо́дь, подая́й мíрови Тобо́ю ве́лію ми́лость.

О, ди́вное вспоможе́ніе всѣ́мъ вѣ́рнымъ еси́, Богоро́дице Чи́стая, горѣ́ же Аѳо́нстѣй и живу́щимъ въ не́й и́нокомъ преди́вный покро́въ и заступле́ніе! Тѣ́мже у́бо свѣ́тло сотворя́юще па́мять бы́вшаго отъ ико́ны Твоея́ пресла́внаго чудесе́, хвале́бно Тебѣ́ вопіе́мъ: Благода́тная, ра́дуйся, съ Тобо́ю Госпо́дь, подая́й мíрови Тобо́ю ве́лію ми́лость.

Ди́вная дѣла́ показа́лъ еси́, Го́споди, въ Пречи́стѣй Ма́тери Твое́й: Ту́ бо еди́ну досто́йну обрѣ́лъ еси́ послужи́ти [вели́кому] та́инству Твоего́ воплоще́нія, [и Сію́ дарова́лъ еси́ христіа́нскому ро́ду Храни́тельницу и Засту́пницу], и не то́кмо Ей Самѣ́й, но и о́бразу подо́бія Ея́ дарова́лъ еси́ си́лу чудотворе́нія. Сего́ ра́ди хвале́бно Ей вопіе́мъ: Благода́тная, ра́дуйся, съ Тобо́ю Госпо́дь, подая́й мíрови Тобо́ю ве́лію ми́лость.

Стихи́ры святы́мъ, гла́съ 4-й. Подо́бенъ: Яко до́бля.

Празднолю́бцевъ собо́ры, мона́шествующихъ сосло́віе, веселя́щеся, пра́здникъ соста́вимъ преподобнострада́льцевъ, и пѣ́сни Христу́ возсле́мъ, укрѣпи́вшему и́хъ, изобличи́ти безу́міе лю́таго царя́ Михаи́ла и Ве́кка патріа́рха, вознеи́ствовавшія злосла́вно, на ста́до Ма́тере Бо́жія.

Всечестны́я уго́дники Пречи́стыя Богома́тере, оби́тели же Зогра́фскія свѣтлопло́дная древеса́, и шипцы́ бсеблагоуха́нныя, и честны́я храни́тели, два́десять и ше́сть су́щія число́мъ, почти́мъ боже́ственными пѣ́сньми, обличи́вшія пре́лесть злосла́вныхъ, и огне́мъ искуше́нныя, я́ко зла́то чистѣ́йшее.

Ѳома́ пресла́вный, и боже́ственный Парѳе́ній, Си́монъ, Варсану́фій, Іовъ, Кири́ллъ, Михе́й, Са́вва, Іа́ковъ, Косма́, Иларіо́нъ же и Дометіа́нъ, Мина́, Па́велъ, и Се́ргій, и Анто́ній, Мартиніа́нъ же со Іоани́кіемъ, и с про́чіею осмери́цею, пѣ́сньми по до́лгу да восхва́лятся.

Ины стихи́ры святы́хъ, гла́съ 2. Подо́бенъ: Кíими похва́льными.

Кíими похва́льными пѣ́сньми восхва́лимъ благочестному́дренно, преподобному́ченики дне́сь, и исповѣ́дники два́десять и ше́сть, я́ко благоче́стія побо́рники: о́выя у́бо, я́ко оби́тели Зогра́фскія преднача́льники, о́выя же, я́ко ку́пно со инѣ́ми потруди́вшіяся въ сло́вѣ вѣ́ры и въ по́стническихъ трудѣ́хъ, и пострада́вшія съ ни́ми, я́же вѣнча́ Госпо́дь, имѣ́яй ве́лію ми́лость.

Кíими духо́вными словесы́, похва́лимъ богоно́сныя и преподобнострада́льныя два́десять и ше́сть, му́ченическою кончи́ною заше́дшія, на столпѣ́ испепеле́нныя: Ѳому́, Зогра́фской оби́тели предсѣда́тельствовавшаго, Іова, Варсану́фія, Іа́кова, Са́вву, Парѳе́нія и Косму́, съ про́чими, обличи́вшія пре́лесть папослужи́телей, и вѣнцы́ небе́сныя досто́йно пріи́мшія отъ руки́ Бо́жія.

Кíими весе́лыми пѣ́сньми, воспои́мъ ли́къ преподо́бныхъ, собра́вшіяся благода́тію, во еди́но согла́сіе вѣ́ры, тве́рдыя вѣ́ры предогражде́нія, Тро́ицы побо́рники и служи́тели, свѣти́льники, вселе́нную просвѣща́ющія, церко́вныя столпы́, я́же вѣнцы́ сла́вы вѣнча́ Тро́ица, я́ко Ду́ха проповѣ́дники, и духобо́рцевъ обличи́тели.

Сла́ва, [преподобному́чениковъ], гла́съ 6: [2]

Пріиди́те дне́сь, ли́къ духо́вный соста́вльше, во оби́тели Зогра́фстѣй, благоче́стно торжеству́емъ, и сла́вныхъ преподобнострада́льныхъ отце́въ, два́десять и ше́сть число́мъ су́щихъ, честно́е торжество́, сла́вно почти́мъ, глаго́люще: ра́дуйся, по́лче богосо́бранный, шумя́щаго огня́ не убоя́вшійся, и злосла́вныхъ бро́вь низложи́вшій; ра́дуйтеся, посредѣ́ огня́, я́коже въ Вавило́нѣ о́троцы, па́пскій о́бразъ поплева́вшіи, и равноче́стно Тро́ицу проповѣ́давшіи; ра́дуйтеся, Боже́ственнаго Ду́ха свѣ́тліи изъясни́тели, и чи́стаго Правосла́вія рачи́теліе. Ангели бѣлонося́ще, главы́ ва́ша вѣнча́ша, и вѣ́рніи возвесели́шая, утвержда́еми на основа́ніи и́стины. Но, о до́бліи ору́жницы Христо́вы, предста́тели Зогра́фскія оби́тели, и бо́дріи храни́теліе, моли́теся о на́съ, соверша́ющихъ ва́шу па́мять!

И ны́нѣ [Богоро́дицы], гла́съ то́йже:

Егда́ богоме́рзціи лати́ны, я́ко во́лцы во о́вчей оде́ждѣ, на жре́бій Тво́й, Влады́чице, наидо́ша, тогда́ еди́нъ преподо́бный ста́рецъ, предъ ико́ною Твое́ю во уедине́ніи моля́щійся, гла́съ Тво́й, Богоро́дице, услы́ша, [си́це] вѣща́ющь: Гряди́ ско́ро во свою́ оби́тель и возвѣсти́ бра́тіи, я́ко приближа́ются врази́ Мои́ и Сы́на Моего́! То́йже а́біе те́къ, узрѣ́ ико́ну Твою́, отъ нея́же гла́съ слы́ша, надъ враты́ монасты́рскими стоя́щу, и си́мъ чу́домъ во и́стинѣ гла́са извѣсти́ся. Тѣ́мже сотворя́юще дне́сь лѣ́тнюю па́мять сему́ чудеси́, прославля́емъ Тя́, Засту́пницу ро́да христіа́нскаго, и благода́рно Тебѣ́ вопіе́мъ: ра́дуйся, Рождество́мъ Твои́мъ ро́дъ человѣ́чь отъ ле́сти діа́воли изба́вльшая и отъ пре́лести ерети́ческія при́сно на́съ избавля́ющая.

Вхо́дъ. Свѣ́те Ти́хій... Проки́менъ дне́ и чте́нія.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи, стихи́ры [Богоро́дицы] самогла́сны, гла́съ 1:

Якоже дре́вле прообразова́вшая Тя́ купина́, огне́мъ объя́та бы́вши, не сгара́ше, си́це и свята́я ико́на Твоя́ Предвозвѣсти́тельница, со святы́ми страстоте́рпцы Зогра́фскими, въ пла́мени бы́вши, не сгорѣ́, но цѣла́ обрѣ́теся, и доны́нѣ неврежде́нна пребыва́етъ, прису́тствіемъ же свои́мъ си́лу о́гненную угаша́етъ, и неоску́дную благода́ть источа́етъ, съ вѣ́рою предъ не́ю, Тебѣ́, Богома́ти, покланя́ющимся и моля́щимся.

Вску́ю, лати́няне, я́коже дре́вле фарисе́и, обходи́те мо́ре и су́шу, и тщи́теся научи́ти заблужде́нію своему́ про́чія лю́ди, да по глаго́лу Христо́ву, содѣ́лаете и́хъ сы́ны гее́ны го́ршія ва́съ? Довлѣ́етъ бо своя́ па́губа, ю́же неизбѣ́жно наслѣ́дите, а́ще заблужде́нія ва́шего не оста́вите, и съ на́ми ны́нѣ чу́дная дѣла́ Богома́тере, чрезъ ико́ну Ея́ Предвозвѣсти́тельницу явле́нная, не просла́вите.

[Ины стихи́ры святы́хъ, гла́съ то́йже:]

Весели́тся дне́сь Це́рковь Христо́ва, свѣтя́щися благода́тію, и вѣ́рно торжеству́етъ имени́тая оби́тель Зогра́фская, въ сла́вной па́мяти два́десять и шести́ преподобнострада́льныхъ отце́въ: сíи бо терпѣливоду́шніи, своя́ ду́ши за благоче́стіе положи́ша, тѣлесы́ огне́мъ всесожже́гшеся, да отцепре́данную вѣ́ру сохраня́тъ. Тѣ́мже, злѣ́йшую пре́лесть папослужи́телей озобличи́вше, оби́тели утѣ́шители досто́йнѣйши бы́ша, вѣ́рныя утверди́вше пребыва́ти во благоче́стіи, и сію́ оби́тель на́шу освѣща́юще, мо́лятся о душа́хъ на́шихъ.

Преподо́бніи отцы́, а́нгельскія вожделѣ́вше жи́зни, въ горѣ́ Аѳо́нстѣй по́стничествомъ просія́сте па́че человѣ́ка, въ свяще́нную сію́ оби́тель Зогра́фскую всели́вшеся, пѣ́сни безпреста́нно Влады́цѣ приноша́сте. Но, зави́дяй до́брымъ сопроти́вникъ, царя́ злосла́вна и ско́пища латиному́дренныхъ духобо́рцевъ на ва́съ воздви́же, крѣ́пость ва́шу мня́ осла́бити. Но, му́жественно сопроти́вльшеся, пре́лести не поклони́стеся, сме́рть огне́мъ прія́вше. Христо́съ же болѣ́зни ва́ша пріи́мъ, въ небе́сныхъ селе́ніихъ ва́съ упоко́и. Помина́йте у́бо и на́съ, я́ко иму́щіи дерзнове́ніе, вѣ́рою и любо́вію ва́шу па́мять соверша́ющихъ.

Гла́съ 2:

Кто́ не просла́витъ, и кто́ досто́йно не похва́литъ сопротивле́нія до́блихъ преподобнострада́льцевъ нововведе́нію? Кто́ же ли не ублажи́тъ подража́телей страстоте́рпцемъ, и единонра́вныхъ отце́мъ кореносѣ́чцевъ злосла́вія и насади́телей благоче́стія, наста́вникомъ заблужда́ющимъ и предста́телей на́шихъ и храни́телей? Иже на небесѣ́хъ воздая́ніе по́двиговъ досто́йно воспріе́млюще, я́ко страда́вшіи Христу́, прославля́ются, веселя́щеся, у Бо́га лику́юще ликова́ніемъ безконе́чнымъ, оставле́нія грѣхо́въ прося́ще, любо́вію пра́зднующимъ свяще́нное и́хъ страда́ніе.

Гла́съ 3:

Ангельское житіе́ на земли́ имѣ́вше, отцы́ треблаже́нніи, я́коже со́лнце въ концѣ́хъ просія́сте: у́мъ бо возвы́сивше отъ пристра́стія, воскрили́стеся Боже́ственнымъ раче́ніемъ, я́коже мѵ́ра по́ты по́стническія, принесо́сте Христу́ пре́жде, огне́мъ же по́слѣ нововводи́тельми искуше́ни бы́вше, вся́каго зла́та чистѣ́йшіи яви́стеся, я́ко ревни́тели благоче́стія, и злосла́вныхъ противобо́рцы. Помина́йте у́бо и на́съ, любо́вію соверша́ющихъ честно́е ва́ше торжество́.

Сла́ва [преподобному́чениковъ], гла́съ 4:

Пріиди́те, вси́ мона́шествующихъ ли́цы, въ па́мяти стеце́мся чу́дныхъ отце́въ, си́хъ бо свѣ́тлыя добродѣ́тели и му́ченическая сме́рть, я́ко со́лнце облиста́ша на небеси́ и на земли́: идѣ́же сія́ютъ приснопа́мятніи, я́ко оте́ческія догма́ты утверди́вшіи неустраши́мымъ сопротивле́ніемъ свои́мъ, огне́мъ же тлѣ́нія совле́кшеся, къ Бо́гу возлетѣ́ша, воспріи́мше воздая́нія страда́ній свои́хъ, и ны́нѣ со безпло́тными, непристу́пному престо́лу предстоя́ще, безконе́чно пѣ́снь Тро́ицѣ возсыла́ютъ, непреста́нно моля́щеся о душа́хъ на́шихъ.

И ны́нѣ [Богоро́дицы], гла́съ то́йже:

Мно́гая Твоя́ къ на́мъ благодѣя́нія, кто́ исповѣ́сть Богоро́дице? Или́ кíй язы́къ просла́витъ неисчерпа́емое мо́ре милосе́рдія Твоего́? Яко не то́кмо всегда́ мо́лиши о на́съ Сы́на Твоего́ и Бо́га на́шего, и всѣ́мъ на́мъ твори́ши спасти́ся, но и враги́ на́ша, ви́димыя и неви́димыя запина́еши, и вре́дъ душепа́губныхъ ересе́й извѣща́еши, наипа́че же латиному́дрствующихъ изобличи́ла еси́, чрезъ чу́дную Твою́ ико́ну. Ейже ны́нѣ покланя́ющеся, Всечи́стая, Тя́ ублажа́емъ.

На стихо́внѣ стихи́ры [святы́хъ], гла́съ 5. Подо́бенъ: Ра́дуйся, по́стническихъ.

Ра́дуйся, Зогра́фскія оби́тели по́лче боже́ственный, побѣдоно́сное ополче́ніе, столпы́ благоче́стія, и ратобо́рцы на враги́ непримири́мыя, тве́рдіи и неустраши́міи, пре́лесть лати́нъ дерзнове́ннѣйше обличи́вшіи, и Михаи́ла су́етнаго царя́ Византíйскаго, и съ ни́мже и Ве́кка безу́мнаго, и́же преда́ша ста́до Христо́во льво́мъ, посрами́вшіи, на столпѣ́ стоя́ще, и зѣло́ ты́я укоря́юще; тѣ́мже моли́теся Спа́су да́ти на́мъ ве́лію ми́лость.

Сти́хъ: Честна́ предъ Го́сподемъ, сме́рть преподо́бныхъ Его́.

Ра́дуйтеся, побѣдоно́сное мно́жество, въ свяще́нной бра́ни до́блествовавшіи, и вѣне́цъ отъ Го́спода ра́достно прія́вшіи, и блаже́нныхъ неизрече́нную сла́ву зря́щіи, и прича́стіемъ Бо́га обожа́еміи, пѣ́сни невеще́ственныхъ серафи́мъ подража́ющіи, и непосре́дственное о мíрѣ моле́ніе творя́щіи, и содѣ́лавшіяся хра́мы Свята́го Ду́ха, и та́инъ высо́каго Бо́жія ра́зума, самозри́тели су́ще, Христа́ проси́те, низпосла́ти душа́мъ на́шимъ ве́лію ми́лость.

Сти́хъ: Воспо́йте Го́сподеви пѣ́снь но́ву, хвале́ніе Его́ въ це́ркви преподо́бныхъ.

Ра́дуйся, Ѳомо́, па́стырю честны́я оби́тели Зогра́фскія, Варсану́фіе, Кири́лле, Михе́е, Си́моне и Са́вво, Иларіо́не и Іове, Мартиніа́не же и Іа́кове, Космо́ и Анто́ніе, Іо́сифе и Евѳи́міе, Ми́но и Па́вле, Іоани́кіе и Се́ргіе, Дометіа́не, Парѳе́ніе и Кипріа́не, и другíй Іа́кове съ четы́рми ины́ми. Два́десять и ше́сть до́бліи и сла́вніи преподобному́ченицы, ва́съ по до́лгу похваля́юще мо́лимъ, моли́теся о на́съ.

Сла́ва, гла́съ 5:

Весели́тся дне́сь Христо́ва Це́рковь, крася́щися до́брыми хра́брствами преподобному́чениковъ, и созыва́етъ всѣ́хъ, въ безмо́лвіи и въ общежи́тіи подвиза́ющихся: пріиди́те, глаго́люще, сра́дуйтеся мнѣ́, ве́сь избра́нный Изра́илю, просвѣти́ бо Госпо́дь сла́ву мою́, обнажи́въ хулу́ злосла́вныхъ на Пресвята́го Ду́ха, ю́же преподо́бніи сíи страда́льцы, на высотѣ́ стоя́ще, дерзнове́нно обличи́ша. Имже и мы́ благода́рно прирце́мъ: не преста́йте, святíи, я́ко дерзнове́ніе иму́ще ко Христу́, ва́съ просла́вльшему, моли́тися о оби́тели се́й на́шей, въ не́йже по́стническія по́двиги ва́ша, и муче́нія по́прище соверши́сте, е́же умири́ти мíръ, и спасти́ ду́ши на́ша.

И ны́нѣ [Богоро́дицы], гла́съ то́йже:

Дне́сь Це́рковь Христо́ва свѣ́тло красу́ется, и вся́ правосла́вная ча́да своя́ созыва́етъ на весе́ліе духо́вное, е́же угото́ва на́мъ Пречи́стая Богоро́дица. Пріиди́те у́бо, празднолю́бцы, наслади́мся сего́ свѣ́тлаго торжества́, и мы́сленно у́зримъ, ка́ко чу́дная Ея́ ико́на по возду́ху ше́ствіе сотворя́етъ, а́нгеломъ дориноси́ма, и я́ко жива́ су́щи, гла́съ ста́рцу вѣща́етъ, и наше́ствіе лати́нъ предвозвѣща́етъ.

На благослове́ніи хлѣ́бовъ: Тропа́рь святы́мъ, два́жды. И Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь святы́мъ, два́жды. Сла́ва, и ны́нѣ, ико́ны Богоро́дицы. [Пи́саны на ма́лѣй вече́рни.]

По 1-й стихо́логіи сѣда́ленъ, гла́съ 1. Подо́бенъ: Гро́бъ Тво́й, Спа́се.

Му́ченики Христо́вы и преподо́бныя отцы́, че́стно почти́мъ, я́ко храни́тели на́ша, предста́тели же неусы́пныя и блюсти́тели су́щія; сíи бо пре́лесть латиному́дренныхъ му́жественно обличи́вше, огне́мъ боже́ственныя кончи́ны до́брѣ сподо́бишася.

Сла́ва: Свѣ́тлы звѣ́зды Христо́вы Це́ркве яви́стеся, му́дріи, уче́нія луча́ми и страда́ніи свѣтлостьми́ сію́ озаря́юще, отце́въ бо изъясни́сте уче́нія. Тѣ́мже дне́сь свяще́нную ва́шу па́мять вѣ́рно пра́зднуемъ.

И ны́нѣ: Облакъ Тя́ Свѣ́та присносу́щнаго, Дѣ́во, проро́къ именова́: изъ Тебе́ бо, я́ко до́ждь на руно́, сше́дъ Сло́во Отчее, и изъ Тебе́ возсія́вшій Свѣ́тъ, мíръ просвѣти́, пре́лесть упраздни́, Христо́съ Бо́гъ на́шъ. Того́ прилѣ́жно моли́ о спасе́ніи ду́шъ на́шихъ. [3]

По 2-мъ стихосло́віи сѣда́ленъ, гла́съ 4. Подо́бенъ: Удиви́ся Іо́сифъ.

Удиви́ся, вои́стинну, а́нгельское во́инство, му́жеству му́дрыхъ преподобнострада́льныхъ отце́въ, ка́ко на столпѣ́ стоя́ще, беззако́ннующа царя́ обличи́ша, и Ве́кка лю́таго, и кардина́лы, испепели́вшеся, претерпѣ́ша до́блественно, я́коже ино́му нѣ́коему стра́ждущу! Тѣ́мже вѣнцы́ неувяда́емыми Христо́съ си́хъ вѣнча́.

Сла́ва: Удивля́етъ вся́къ у́мъ тве́рдость му́жества ва́шего, преподобнострада́льцы Христо́вы, оби́тели Зогра́фскія добро́то, я́ко доблему́дренно, побѣди́вшіи папослужи́телей, и поплева́вшіи го́рдость и су́етныя и́хъ совѣ́ты, соверши́вшіи до́брѣ боже́ственное по́прище. Сего́ ра́ди, свяще́нную ва́шу па́мять соверша́юще, те́плыхъ предста́телей ва́съ, всехва́льніи, и́мамы.

И ны́нѣ: Якоже иногда́ святы́я преподобному́ченики Зогра́фскія, въ пи́ргѣ отъ лати́нъ сожига́еміи, сподо́била еси́, Влады́чице, услы́шати гла́съ съ небесе́, ра́доватися и́мъ повелѣва́ющь, [и мзду́ мно́гу на небеси́ обѣщава́ющь], та́ко сподо́би, Богома́ти, и на́съ при кончи́нѣ на́шей, въ ру́цѣ Сы́на Твоего́ ду́ши на́ша съ ра́достію преда́ти, и наслѣ́діе вѣ́чнаго блаже́нства отъ Него́ прія́ти. [4]

По поліеле́и велича́ніе святы́мъ: [5]

Ублажа́емъ ва́съ, святíи преподобному́ченицы, и чте́мъ святу́ю па́мять ва́шу, наста́вницы мона́ховъ, и собесѣ́дницы а́нгеломъ.

Псало́мъ избра́нный: Бо́гъ на́мъ прибѣ́жище и си́ла...

По поліеле́и сѣда́ленъ, гла́съ 4. Подо́бенъ: Яви́лся еси́.

Свѣ́тліи адама́нты Правосла́вія, во огни́ вре́менномъ искуше́нніи терпѣли́вно, да похва́лятся дне́сь, я́ко Тро́ицы бы́вше проповѣ́дницы.

Сла́ва: Пра́зднуетъ дне́сь оби́тель Зогра́фская, честно́е торжество́ преподобнострада́льцевъ свои́хъ, сíи бо проповѣ́даша Правосла́вія боже́ственныя догма́ты.

И ны́нѣ: Богоро́дице Дѣ́во, упова́ніе христіа́нъ, проба́ви ми́лости Твоя́, бы́вшія отце́мъ на́шимъ, покры́й и соблюди́ на́съ отъ вся́каго зла́, да Тя́, наде́жду на́шу, непреста́нно велича́емъ.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Ева́нгеліе отъ Луки́, зача́ло 64: Вся́къ, и́же а́ще исповѣ́сть... Яже подоба́етъ рещи́. Сла́ва: Моли́твами преподобному́чениковъ Твои́хъ, Ми́лостиве, очи́сти... И ны́нѣ: Моли́твами Богоро́дицы... Сти́хъ: Поми́луй мя́, Бо́же...

По 50-мъ псалмѣ стихи́ра самогла́сна, гла́съ 2:

Вмѣ́сто тлѣ́нныхъ и преходя́щихъ, нетлѣ́нная и пребыва́ющая возлюби́вше, и вмѣ́сто земны́хъ небе́сная предпоче́тше, преподобнострада́льніи отцы́, чту́ще ва́съ, отъ ва́рварскихъ нахожде́ній, и разбо́йническихъ нападе́ній и наше́ствій изба́вите, мо́лимся, да при́сно почита́емъ па́мять ва́шу всечестну́ю.

Кано́нъ Пресвяты́я Богоро́дицы со ирмосо́мъ на 6 и святы́хъ два́ на 8.

[Кано́нъ Богоро́дицы, гла́съ 4.]
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Отве́рзи, Влады́чице, уста́ моя́, и ду́хъ прему́дрости и стра́ха Бо́жія пода́ждь ми́, да во гла́сѣ хвале́нія воспою́ вели́чія и ми́лости Твоя́, я́же на́мъ, Богома́ти, яви́ла еси́.

Отку́ду начну́, и о чесо́мъ пе́рвѣе просла́влю Тя́, Богома́ти? О о́номъ ли, я́ко Рождество́мъ Твои́мъ естество́ на́ше отъ а́да и сме́рти вѣ́чныя изба́вила еси́, или́ я́ко и ны́нѣ избавля́еши ны́ отъ всѣ́хъ зо́лъ и лю́тыхъ обстоя́ній?

Во глубину́ пре́лести діа́воли па́дшее человѣ́чество, на го́ру и́стиннаго богопозна́нія возвела́ еси́, Влады́чице. Ны́нѣ же въ заблужде́нія ерети́ческая впа́сти на́съ непопусти́ла еси́.

Всеблаже́нная Отрокови́це, Чи́стая Голуби́це, житіе́ чи́стое проводи́ти укрѣпи́ на́съ, и блаже́нства вѣ́чнаго сподо́би моли́твами Твои́ми, да всегда́ прославля́емъ Тя́, вино́вницу спасе́нія на́шего.

Кано́нъ святы́мъ пе́рвый, его́же краегране́сіе: По́лкъ кра́сный преподо́бныхъ похвалю́. Іа́ковъ. Гла́съ 1.
Пѣ́снь 1.

Ирмо́съ: Христо́съ ражда́ется — сла́вите! Христо́съ съ небе́съ — сря́щите! Христо́съ на земли́ — возноси́теся! По́йте Го́сподеви, вся́ земля́, и весе́ліемъ воспо́йте, лю́діе, я́ко просла́вися.

Честны́хъ преподобному́чениковъ торжество́, ра́дующеся дне́сь, Зогра́фскія оби́тели мона́шествующіи, соверши́мъ и Го́споду прилѣ́жно помо́лимся, я́ко да моли́твами си́хъ, небе́сныя ра́дости сподо́бимся.

Сы́нове Бо́жіи по прича́стію бы́сте, тве́рдіи преподобнострада́льцы, лати́нъ же гнилу́ю пре́лесть злосла́вія изобличи́вше, и огне́мъ испепели́вшеся, сугу́бымъ вѣнце́мъ отъ Христа́ вѣнча́стеся.

Ума́ тве́рдостію, сла́вніи, Ду́ха отъ Отца́ исходя́ща, я́коже Спа́съ рече́, та́ко исповѣ́давше, папи́сты я́ко нововводя́щія, изобличи́сте, му́дріи, и посрами́сте.

Богоро́диченъ: Бо́жію го́ру, отъ нея́же отсѣче́ся ка́мень краеуго́льный, въ соедине́ніи приводя́й неизрече́нное, пре́жде разстоя́щая, и́стинную Бо́жію Ма́терь, я́ко вино́вную на́шего исправле́нія, почти́мъ.

Инъ кано́нъ святы́хъ, гла́съ 4:
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Скве́рными устна́ми восхвали́ти произво́ливъ боже́ственное собра́ніе преподобнострада́льцевъ Христо́выхъ, молю́ Тя́, Спа́се, да́ти ми́ сло́во и благода́ть, соплести́ тѣ́мъ похвалу́.

Похва́лимъ дне́сь преподобнострада́льцевъ сочета́ніе, два́десять и ше́сть, тве́рдыхъ адама́нтовъ, обличи́вшихъ злоче́стіе лати́нъ и сме́рть непра́ведную претерпѣ́вшихъ.

Па́стырь изря́днѣйшій Ѳома́ досто́йно да почти́тся дне́сь, и боже́ственный Іа́ковъ, и Варсану́фій, Си́монъ, Кири́ллъ, Мина́ и Кипріа́нъ, со всѣ́ми ины́ми да возвеселя́тся.

Богоро́диченъ: Свѣ́та невече́рняго исто́чникъ, вѣ́дуще Тя́, Всепѣ́тая, мра́къ ду́шъ и тѣле́съ разрѣши́ луча́ми Твои́ми, и зрѣ́ти сподо́би Того́, Влады́чице, мо́лимся.

Катава́сія: Отве́рзу уста́ моя́...

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Твоя́ пѣсносло́вцы, и́стинную Богоро́дицу Тя́ зна́ющія и Сы́на Твоего́ Главу́ Це́ркве нарица́ющія, Ма́терняго Твоего́ благоволе́нія не лиши́, проти́вно же сему́ вѣ́рующія вразуми́, и единомы́сленны съ на́ми сотвори́, Влады́чице.

Истинный Жени́хъ Це́ркве — Сы́нъ Тво́й, Богоро́дице, мы́ же то́кмо по́званніи на пи́ръ вѣ́ры. Сего́ ра́ди, Влады́чице, ненави́диши латиному́дрія папослужи́тели, жениха́ми Це́ркве себе́ нарица́ющія, и си́мъ Христа́ посрамля́ющія.

Истинный Жени́хъ, Христо́съ, и ученицы́, дру́зи Его́, не стрижа́ху власы́ главы́ своея́; ло́жніи же лати́нстіи жениси́ законоположи́ша себѣ́ стрищи́ власы́, и си́мъ, Влады́чице, проти́вни Сы́ну Твоему́ сотвори́шася.

Сы́нъ Тво́й, Богоро́дице, еди́ножды принесе́ себе́ въ же́ртву Бо́гу Отцу́; безу́мніи же лати́ны, неразумѣ́юще сего́, на еди́номъ же́ртвенницѣ во еди́нъ де́нь нѣ́колико кра́тно же́ртву сію́ прино́сятъ, и я́ко бы втори́чно Христа́ распина́ютъ, и та́йну искупле́нія недѣ́йственну сотворя́ютъ.

Инъ.

Ирмо́съ: Пре́жде вѣ́къ отъ Отца́ рожде́нному нетлѣ́нно Сы́ну и въ послѣ́дняя отъ Дѣ́вы воплоще́нному безсѣ́менно, Христу́ Бо́гу возопіи́мъ: вознесы́й ро́гъ на́шъ, Свя́тъ еси́, Го́споди.

Пѣ́сньми боже́ственными да похва́лится боже́ственное сосло́віе, свяще́нныхъ преподобному́чениковъ оби́тели Зогра́фскія, сугу́бымъ бо вѣнце́мъ вѣнча́шася, я́ко по́стницы и тве́рдіи страда́льцы су́ще, треблаже́нніи.

Ра́зумомъ твердѣ́йшимъ Михе́й и Си́монъ до́блествоваша, со Иларіо́номъ и Кири́лломъ, Евѳи́міемъ и всѣ́ми два́десять и шестьми́, и́хже дне́сь восхваля́юще въ ра́достныхъ пѣ́снехъ, Го́спода сла́вимъ.

Единотерпѣ́ніе во мно́зѣхъ тѣлесе́хъ показа́вше преподобнострада́льніи отцы́ оби́тели Зогра́фскія, лати́ны лю́тыя посрами́ша, и вѣнцы́ побѣ́дными главы́ и́хъ вѣнча́шася.

Богоро́диченъ: Неизрече́нный о́бразъ зача́тія и рожде́нія Твоего́, Дѣ́во Богоро́дице, необыме́ннаго бо всѣ́ми Сы́на Бо́жія зачала́ еси́, и безъ сѣ́мене ро́ждши, Чи́стая, пребыва́еши Приснодѣ́ва.

Инъ.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Ангелы удиви́ боже́ственный ли́къ преподо́бныхъ, претерпѣ́въ о́гненное на столпѣ́ сожже́ніе, де́моны же посрами́шася, вѣ́рніи же до́блести и́хъ ра́достно похвали́ша.

Вельми́ просла́ви ва́съ Христо́съ, отцы́ всечестнíи, и на небеси́ и на земли́, я́ко по́стничествовавшихъ пре́жде, послѣди́ же пострада́вшихъ, тѣ́мже почита́емъ дне́сь благознамени́тую па́мять ва́шу.

Да воспое́тся Па́велъ и Са́вва, Мартиніа́нъ же тве́рдый, и Се́ргій съ Си́мономъ, и Дометіа́нъ ку́пно со всѣ́ми, я́ко обличи́вшіи лати́нское безу́міе.

Богоро́диченъ: Ви́дѣти свѣ́та Твоего́ лучи́, сподо́би, Влады́чице Чи́стая, любо́вію къ Тебѣ́ припа́дающія, воздержа́ніемъ и прилѣ́жнымъ моле́ніемъ, разрѣши́вши мра́къ страсте́й глубоча́йшій.

По 3-й пѣ́сни, конда́къ ико́нѣ Богоро́дицы, гла́съ 8. Подо́бенъ: Взбра́нной.

Оби́тель Зогра́фская и вся́ гора́ Аѳо́нская, отъ наше́ствія ерети́чествующихъ и кровожа́дныхъ лати́нъ изба́вльшеся, благода́рно вопію́тъ Ти́, Богоро́дице: ра́дуйся, покро́ве, ши́ршій о́блака, отъ зно́я гнѣ́ва Бо́жія на́съ защища́ющій и отъ всѣ́хъ бѣ́дъ избавля́ющій.

Икосъ:

Ви́дѣвше и́ноцы Зогра́фстіи ико́ну Богома́тере, чу́дно къ ни́мъ прише́дшую, и во огни́ не сгорѣ́вшую, съ любо́вію облобыза́юща ю́, и во хра́мѣ Успе́нія намѣ́стною поста́виша, ра́достно вопію́ще: ра́дуйся, Влады́чице, оби́тели на́шея покро́ве и огражде́ніе, отъ огня́ же и всѣ́хъ бѣ́дъ избавля́ющи.

Сѣда́ленъ святы́хъ, гла́съ 8. Подо́бенъ: Прему́дрости Сло́во.

Кре́стъ Христо́въ на ра́мо взе́мше, блаже́нніи отцы́ два́десять и ше́сть, по́стничествомъ къ нему́ прилѣпи́стеся, но вра́гъ, зави́дяй добродѣ́тельному житію́ ва́шему, воздви́же на вы́ суро́выя лати́ны, мня́ осла́бити по́стничества ва́шего тве́рдость, но обличи́ся того́ ухищре́ніе, я́ко изря́днѣйше пострада́вше. Моли́теся Христу́ Бо́гу прегрѣше́ній оставле́нію дарова́тися, пра́зднующимъ любо́вію святу́ю па́мять ва́шу.

Сла́ва, то́йже. И ны́нѣ, богоро́диченъ:

Солнцезра́чная колесни́це Дави́дова, порфиропо́сланный о́дръ Соломо́новъ, сви́токъ богоначерта́нный Иса́іинъ, и одушевле́нная ски́нія Моисе́ева, и стѣна́ адама́нтская Аммо́сова, Ты́ была́ еси́, свѣти́льникъ златокова́нный Заха́ріевъ, Даніи́лова же гора́, дщи́ца желтобѣ́лая Авваку́мова, и превосхо́дное проро́ковъ оглаше́ніе. Моли́ся Сы́ну Твоему́ и Бо́гу прегрѣше́ній оставле́ніе дарова́ти, благоговѣ́йно покланя́ющимся боже́ственному о́бразу Твоему́.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Злы́й совѣ́тъ лати́новъ на жре́бій Тво́й, наше́дшихъ иногда́, разруши́ла еси́, Богоро́дице, и со студо́мъ во своя́ си возврати́тся и́мъ сотвори́ла еси́, благоче́стія же ра́ди пострада́вшія отъ ни́хъ рабы́ Твоя́, вѣнце́въ сла́вы сподо́била еси́.

Оби́тель Зогра́фская дне́сь свѣ́тло торжеству́етъ, и пра́зднество сотворя́етъ честнѣ́й ико́нѣ Твое́й, е́юже, Богома́ти, заблужде́ніе лати́нъ изобличи́ла еси́, и наше́ствіе и́хъ предвозвѣсти́ла еси́.

Не то́кмо оби́тель Зогра́фская, но и вся́ гора́ Аѳо́нская прославля́етъ Тя́, Богома́ти, я́ко не попусти́ла еси́ латиному́дрствующимъ вознести́ на ню́ ро́гъ сво́й, и Правосла́віе въ не́й до ны́нѣ неврежде́нно сохрани́ла еси́. [6]

Якоже корабле́цъ въ пучи́нѣ, та́ко и Це́рковь Сы́на Твоего́, Влады́чице, коле́блема е́сть бу́рею разли́чныхъ ересе́й, но въ ти́хое приста́нище вѣ́чнаго спасе́нія упра́ви ю́, многомо́щными Твои́ми къ Бо́гу моли́твами.

Инъ.

Ирмо́съ: Же́злъ изъ ко́рене Іессе́ева и цвѣ́тъ отъ него́, Христе́, отъ Дѣ́вы прозя́блъ еси́, изъ горы́, Хва́льный, приосѣне́нныя ча́щи прише́лъ еси́, вопло́щся отъ Неискусому́жныя, Невеще́ственный и Бо́же, сла́ва си́лѣ Твое́й, Го́споди.

Веду́щею стезе́ю къ жи́зни по́стнически ше́ствовавше, страда́льческое благосла́віе улучи́ша, два́десять и ше́сть Зогра́фскія оби́тели отцы́, обличи́вше му́жественно пре́лесть Михаи́ла безбо́жнаго.

Тлѣ́нную сла́ву и пи́щу, отцы́, оста́вльше, во оби́тели Зогра́фстѣй подвиза́стеся и лати́номъ тве́рдо сопротивля́ющеся, чти́ти принужда́ющимъ ри́мскаго бо́га, и же́ртвы огне́мъ соверше́нныя Бо́гу принесо́стеся.

Глаго́лы свяще́нными, пѣ́тъ бу́ди Ѳома́ свяще́ннѣйшій, оби́тели Зогра́фскія игу́менъ, и вси́ и́же съ ни́мъ, на высотѣ́ столпа́ посрами́вшіи латиному́дренныя враги́, и Ве́кка злочести́ваго, я́ко нововводя́щія злоупотребле́нія.

Богоро́диченъ: Врата́, ши́ршая небе́съ и престо́лъ вѣ́мы Тя́, серафи́мъ превы́сшую, Всечи́стая, Его́же бо вся́ческая не вмѣща́ютъ я́ко Бо́га, вмѣсти́ла еси́ и но́сиши на объя́тіихъ я́ко Младе́нца, на престо́лѣ Отчемъ естество́ на́ше Посади́вшаго.

Инъ.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ, усмотря́я, зовя́ше: сла́ва си́лѣ Твое́й, Го́споди.

Возвесели́мся духо́вно, па́мять соверша́юще благознамени́тую преподобнострада́льцевъ и честны́хъ наста́вниковъ оби́тели на́шея, моли́твами тѣ́хъ отъ лю́тыхъ избавля́еми.

Красу́йся ны́нѣ, боже́ственная оби́тель Зогра́фская, свяще́нными твои́ми о́трасльми, преподобнострада́льцами два́десять и шестьми́, папослужи́телей злочести́выхъ, съ высоты́ столпа́ посрами́вшими.

Му́жествомъ и благода́тію укрѣпи́вся по́лкъ преподо́бныхъ, упраздни́ кова́рства безпло́тныхъ враго́въ, и папи́стовъ низложи́ блядосло́віе, нече́стія испо́лненное.

Богоро́диченъ: Чи́стая безневѣ́стная, Ма́ти Бо́жія, спаса́й Твое́ ста́до безвре́дно отъ вся́каго зла́ и лю́тыхъ наведе́нія, Тя́ бо во обстоя́ніихъ и́мамы рабы́ Твои́ избавле́ніе.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Ужасо́шася папослужи́теліе, егда́ услы́шаша гла́съ съ небесе́, укрѣпля́ющь страстоте́рпцы Зогра́фскія, и мзду́ на небеси́ и́мъ обѣщава́ющь, оба́че не пока́яшася, но а́ки а́спиды глусíи, неиспра́влены пребы́ша въ заблужде́ніи свое́мъ.

Не вѣ́сте ко́его ду́ха есте́ вы́, лати́не! Аще бо Ева́нгеліе Христо́во проповѣ́дуете, то почто́ неслу́шающія ва́съ, слуги́ Богома́тере, убива́ете и огне́мъ сожига́ете? Христо́съ бо не повелѣ́ ученико́мъ Свои́мъ та́ко твори́ти.

Слы́шите, лати́не, и устыди́теся! Аще бы́ уче́ніе ва́ше было́ пра́во, и ре́вность ва́ша по вѣ́рѣ Христо́вѣ Бо́гу уго́дна, не бы́ Цари́ца Небе́сная, чрезъ ико́ну Свою́, врага́ми Сы́на Своего́ нарекла́ ва́съ.

Припа́дающе ко святѣ́й ико́нѣ Твое́й, Дѣ́во, вопіе́мъ Ти́ отъ се́рдца сокруше́нна: не попусти́ на́мъ впа́сти въ сѣ́ти ерети́ческія, Госпоже́ Всеми́лостивая, но въ Правосла́віи до кончи́ны живота́ на́шего пребы́ти укрѣпи́ на́съ.

Инъ.

Ирмо́съ: Бо́гъ Сы́й ми́ра, Оте́цъ щедро́тъ, вели́каго Совѣ́та Твоего́ Ангела, ми́ръ подава́юща, посла́лъ еси́ на́мъ; тѣ́мъ, богоразу́мія къ свѣ́ту наста́вльшеся, отъ но́щи у́тренююще, славосло́вимъ Тя́, Человѣколю́бче.

Си́лою догма́товъ, му́дріи, лати́нъ злосла́віе, пе́рвѣе отрази́сте, та́же огне́мъ отъ ни́хъ сожже́ни бы́сте, и же́ртвы Го́сподеви, принесо́стеся усе́рдно, со а́нгельскими ли́ки ны́нѣ лику́юще, приснопа́мятніи.

Преподо́бно ста́до твое́ упа́слъ еси́, Ѳомо́, Зогра́фскія оби́тели па́стырю изря́днѣйшій, и пострада́лъ еси́ съ боже́ственными, блаже́нне, ученики́ твои́ми отъ латиному́дренныхъ, огне́мъ искуше́ни бы́вше, я́ко зла́то въ пещи́, и со а́нгелы ны́нѣ ликовству́ете.

Ревни́теліе Госпо́дни я́вльшеся, прему́дріи, глаго́лющія на высоту́ непра́ведная обличи́сте, всепреподо́бніи, загради́вше тѣ́хъ уста́ прему́дро изъясне́ніемъ Писа́ній, тѣ́мже вси́ дне́сь па́мять ва́шу пра́зднуемъ.

Богоро́диченъ: Сло́во Бо́жіе, Дѣ́во, су́щее со Отце́мъ, па́че ума́, отъ чи́стыхъ крове́й Твои́хъ воплоти́ся неизмѣ́нно, я́коже благоволи́, Его́же во еди́ну ѵпоста́сь, въ дву́хъ естества́хъ, и дѣ́йствахъ, и хотѣ́ніяхъ, правосла́вно му́дрствуемъ.

Инъ.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Тлѣ́нную и удобоувяда́емую житія́ красоту́, преподо́бніи отцы́, позна́вше, Христо́вою любо́вію уязви́стеся, ны́нѣ же неизрече́нныя ра́дости въ Боже́ственныхъ селе́ніихъ наслажда́етеся, блаже́нніи.

Истинно ны́нѣ возсія́ свѣ́тъ Боже́ственныя благода́ти, и́стинно дне́сь нетлѣ́нная пи́ща, жизното́чная ма́нна, предлага́ется на́мъ, свѣ́тлая па́мять боже́ственныхъ предста́телей на́шихъ; жела́ющіи наслади́теся.

Безсме́ртное благосла́віе купи́сте, сла́вніи, кончи́ною привре́меннаго огня́, ма́лая на вели́кая измѣни́вше. О, ку́пли прему́дрыя! Тѣ́мже ны́нѣ ра́дуетеся съ преподо́бными и му́ченики.

Богоро́диченъ: Свѣти́льниче свѣ́тлый Свѣ́та пе́рваго! Просвѣти́ ду́шу мою́ несвѣ́тлую свѣ́томъ Твои́мъ, да па́ки Свѣ́тъ узрю́ пе́рвѣйшій, Иже отъ Тебе́ просвѣти́ на́съ, и Тебе́, мою́ Просвѣти́тельницу, сіе́ бо свѣ́та сво́йство.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Арха́нгелъ Гавріи́лъ возвѣсти́ Тебѣ́ та́йну, отъ вѣ́ка сокрове́нную: ны́нѣ же Ты́, Богома́ти, прія́ла еси́ отъ Бо́га да́ръ, враго́въ наше́ствіе предвозвѣща́ти, и отъ лю́тости тѣ́хъ вѣ́рныя рабы́ Твоя́ защища́ти.

Смире́нно молю́ся Тебѣ́, Всеблаго́й Предвозвѣсти́тельницѣ: возвѣща́й ми́ при́сно неизбѣ́жный ча́съ сме́ртный и стра́шный су́дъ Сы́на Твоего́, да поне́ та́ко удержу́ся отъ дѣ́лъ грѣхо́вныхъ, и́хже обы́чаемъ всегда́ прельще́нъ е́смь.

Ра́дуйся, Преблагослове́нная Дѣ́во, жре́бій Сво́й земны́й въ жили́ще и́нокомъ дарова́вшая; ра́дуйся, любо́вь Свою́ къ мѣ́сту сему́, я́сно возвѣсти́вшая; ра́дуйся, защища́ти подвиза́ющихся въ Горѣ́ се́й обѣща́вшая; ра́дуйся, отъ обѣща́нія Своего́ никогда́ же отступа́ющая.

Ра́дуйся, вся́кихъ даро́въ рабо́мъ Твои́мъ всеще́драя пода́тельнице; ра́дуйся, во бранѣ́хъ, въ болѣ́знехъ и трудѣ́хъ и́хъ премилосе́рдая утѣ́шительнице; ра́дуйся, благоде́нственное житіе́ здѣ́, и всеблаже́нное та́мо въ вѣ́чности и́мъ устроя́ющая.

Инъ.

Ирмо́съ: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ истлѣ́нія, Ро́ждшую сохрани́ неврежде́нну.

Дне́сь на́мъ ра́достный де́нь наста́, свѣ́тло освѣща́ющь — благознамени́тый пра́здникъ два́десяти и шести́ преподо́бныхъ, и весели́тъ мы́сленно ду́ши же и сердца́ всѣ́хъ благода́тію Ду́ха, Его́же въ пѣ́снехъ достодо́лжныхъ почита́емъ.

Да живо́тъ вѣ́чный, прему́дріи, на небесѣ́хъ получите́, преда́сте огню́ вре́менному тѣлеса́, изобличи́вше злосла́віе лати́нъ. Тѣ́мже дне́сь ра́дующеся, торжество́ ва́ше соверша́емъ.

О, ли́че честны́хъ преподо́бныхъ приснопа́мятный! Вѣ́рно почита́емъ ва́съ и воспѣва́емъ вѣ́рою, зову́ще: почита́ющія ва́съ изба́вите ны́нѣ отъ вся́кія ско́рби, бѣ́дъ и озлобле́ній, да благоговѣ́йно въ пѣ́снехъ торжество́ ва́ше соверша́емъ.

Богоро́диченъ: Умо́въ ли́цы и всѣ́хъ святы́хъ собо́ръ чту́тъ Тя́, Влады́чице: безпло́тнаго бо Бо́га Сло́ва, Его́же ужаса́ются а́нгелы, воплоти́ла еси́ и была́ еси́ Ма́терь Бо́жія, пре́жднія вражды́ средостѣ́ніе Рождество́мъ Твои́мъ еди́на разто́ргшая.

Инъ.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

По́чести трудо́въ, всепреподо́бніи отцы́ два́десять и ше́сть, прія́сте, пострада́вше, и благода́тными дарова́ньми ва́съ вѣнцеда́вецъ Христо́съ украси́.

Ихже о́ко не возмо́же ви́дѣти, и у́хо слы́шати, всесла́вніи, и у́мъ человѣ́ческій разумѣ́ти, я́коже писа́ся, си́хъ на небесѣ́хъ въ жре́біи сподо́бистеся.

Оби́тели Зогра́фскія храни́тели, предста́тели и покрови́тели, дне́сь восхва́лимъ преподобнострада́льныя два́десять и ше́сть, пра́зднественное составля́юще торжество́.

Па́мять ва́шу благознамени́тую соверша́юще, преподобнострада́льніи, дне́сь, мо́лимъ оби́тель сію́ и и́ночествующія соблюди́те и отъ скорбе́й изба́вите.

Богоро́диченъ: Разли́чная дарова́нія иму́ще, отцы́, разли́чныхъ напа́стей на́съ изба́вите, и сомоли́твенники Влады́чицу и Косму́ пріи́мше, па́ству ва́шу соблюди́те.

Конда́къ [святы́хъ], гла́съ 8. Подо́бенъ: Взбра́нной.

Оби́тели на́шея предста́тели и храни́тели, свяще́нныя преподобнострада́льцы два́десять и ше́сть, лати́нскую горды́ню низложи́вшія, и о́гненное сожже́ніе претерпѣ́вшія, и вѣнча́нныя досто́йно, восхва́лимъ, вопію́ще: ра́дуйтеся, преподобнострада́льніи.

Икосъ:

Ангелы удиви́шася, съ небесе́ зря́ще безбо́жное стремле́ніе лати́нъ, ка́ко преподо́бныя во огни́ испепеля́ху благоче́стія ра́ди; и́же и умре́ти благоче́стно изво́лиша, и мучи́телеву бро́вь низложи́вше, слы́шатъ отъ на́съ такова́я: ра́дуйся, ли́че преподобнострада́льныхъ; ра́дуйся, тве́рдое ополче́ніе многострада́льныхъ; ра́дуйся, двадеся́тице съ шестери́цею преподо́бныхъ; ра́дуйся, Ѳомо́, съ про́чими му́ченики; ра́дуйся, боже́ственный Варсану́фіе съ Михе́емъ тве́рдымъ; ра́дуйся, Дометіа́не, Ми́но съ Па́вломъ свѣ́тлымъ; ра́дуйся, со Анто́ніемъ Евѳи́міе и Иларіо́не; ра́дуйся, съ Парѳе́ніемъ, Си́моне и Іо́сифе; ра́дуйся, дво́ице Іа́кововъ ку́пно съ Іоанни́кіемъ; ра́дуйся, Мартиніа́не, ку́пно съ Космо́ю и Се́ргіемъ; ра́дуйся, Кипріа́не, Кири́лле, Іове и Са́вво сла́вніи; ра́дуйся, четвери́це сла́вная свѣ́тлыхъ страстоте́рпцевъ; ра́дуйтеся, преподобнострада́льніи.

Мѣ́сяца Окто́врія въ 10-й де́нь.

Па́мять соверша́емъ два́десять и шести́ преподобному́чениковъ, въ [на́шей] свяще́нной оби́тели Зогра́фской, пострада́вшихъ отъ злосла́вныхъ латиному́дренныхъ, Михаи́ла злому́дреннаго изъ Палеоло́говъ, и Ве́кка патріа́рха, и ско́пища и́хъ.

Ди́вная Богороди́тельница, я́ко Ма́ти-Храни́тельница, гла́сомъ предвозвѣща́етъ наше́ствіе враго́въ Сы́на Своего́ и Ея́, и, я́ко оре́лъ птенцы́ своя́, ико́ною Свое́ю, обрѣ́тшіяся чу́днымъ нѣ́кіимъ о́бразомъ у монасты́рскихъ вра́тъ, покрыва́етъ благода́тію святы́я исповѣ́дники, исполня́я уста́ и́хъ ду́хомъ прему́дрости и ра́зума, сердца́ же — му́жествомъ и крѣ́постію, и мече́мъ сло́ва Бо́жія посѣка́ется дре́во непло́дное. Ду́ши же до́блихъ страда́льцевъ огне́мъ, я́ко лѣ́ствицею, восхо́дятъ въ ра́дость Го́спода своего́, возноси́мыя рука́ми Пречи́стыя Богома́тере.

Стихи́:

Яко же́ртвы Го́сподеви огнесожже́нныя,
два́десять и ше́сть въ лѣ́поту яви́шася.
Яко приноше́нія Тебѣ́, Спа́се, испече́нныя,
два́десять и ше́сть на столпѣ́ предложи́шася.
Преподо́бніи въ деся́тый де́нь
на столпѣ́ огне́мъ просвѣти́шася.

Всеси́льными моли́твами Пречи́стыя Влады́чицы на́шея Богоро́дицы и Приснодѣ́вы Марíи, и святы́хъ два́десять и шести́ преподобному́чениковъ и исповѣ́дниковъ Зогра́фскихъ, Го́споди Іису́се Христе́, Сы́не Бо́жій, поми́луй и спаси́ на́съ. Ами́нь.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Въ пещи́ искуше́ній и бѣ́дъ опаля́емыхъ ороси́, о, Богома́ти, струя́ми Твои́хъ щедро́тъ, да посра́мятся врази́ на́ши, и да разумѣ́ютъ, я́ко мы́ — рабы́ Твои́ есмы́, и вѣ́ра на́ша — чиста́ и непоро́чна е́сть.

Якоже гора́ Аѳо́нская и вся́ Це́рковь Восто́чная, отъ ле́сти и наси́лія папослужи́телей, Тобо́ю, Богома́ти изба́вльшеся, благода́рно Тебѣ́ вопію́тъ: Благослове́нна Ты́ въ жена́хъ, еди́на Всенепоро́чная Влады́чице. [7]

Правосла́вніи, собери́теся лю́діе, дне́сь, и торжество́ соста́вите Пречи́тѣй Богома́тери, прославля́юще святу́ю Ея́ ико́ну, е́юже нахожде́ніе вра́жіе предвозвѣща́етъ, и отъ всѣ́хъ зо́лъ избавля́етъ вопію́щія: Благослове́нъ Бо́гъ оте́цъ на́шихъ.

Тво́рче и Спаси́телю на́шъ, Христе́ Бо́же, пріими́ Пречи́стыя Твоея́ ма́тере моли́тву, ю́же Тебѣ́ за ны́, грѣ́шныя, прино́ситъ, и изба́ви на́съ отъ всѣ́хъ бѣ́дъ и навѣ́товъ вра́жіихъ, да Тебѣ́ ра́достно зове́мъ: Благослове́нъ Бо́гъ оте́цъ на́шихъ.

Инъ.

Ирмо́съ: Отроцы, благоче́стію совоспита́ни, злочести́ваго велѣ́нія небре́гше, о́гненнаго преще́нія не убоя́шася, но, посреди́ пла́мене стоя́ще, поя́ху: отце́въ Бо́же, благослове́нъ еси́.

Наста́ ны́нѣ боже́ственная и ра́достная па́мять ва́ша, преподобнострада́льніи, веселя́щая и освяща́ющая всѣ́хъ, чту́щихъ по́двиги и страда́нія ва́ша, и пою́щихъ: оте́цъ на́шихъ Бо́же, благослове́нъ еси́.

Огню́ пріобща́ющеся, попали́сте пре́лесть противобо́жную, преподобному́ченицы Христо́вы, изоблича́юще лю́тое лати́нъ о Ду́сѣ приложе́ніе, и пою́ще: оте́цъ на́шихъ Бо́же, благослове́нъ еси́.

Вся́, я́же въ мíрѣ, и тѣлеса́ и бога́тство презрѣ́ша, бу́дущія ра́ди жи́зни, до́бліи преподобнострада́льцы, и уме́рше со Христо́мъ, ны́нѣ ца́рствуютъ въ непристу́пномъ свѣ́тѣ и невече́рнѣмъ.

Богоро́диченъ: Моле́бную на́шу пѣ́снь ны́нѣ, Богоро́дице, всѣ́хъ, воспѣва́ющихъ, Приснодѣ́во, лю́тыхъ измѣня́ющи, съ любо́вію ко Го́споду вопію́щихъ: оте́цъ на́шихъ Бо́же, благослове́нъ еси́.

Инъ.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Возлюби́вше Бо́га я́коже мо́щно, преподо́бніи, и поучи́вшеся въ Боже́ственномъ Его́ зако́нѣ, и се́й испо́лнивше страда́ніемъ, явля́юще любо́вь ко Го́споду, досто́йно ны́нѣ почита́етеся.

Да совоспле́щутъ ны́нѣ съ земны́ми небе́сная, да возвесели́тся со а́нгелы естество́ человѣ́ческое. Человѣ́цы бо небе́сніи, а́нгелы земнíи, небому́дренніи отцы́, пострада́вше до́блественно, пра́зднуеми су́ть.

Ублажа́ются, отцы́, по́двиги ва́ши и боре́нія, и́миже честна́я прія́телища Ду́ха яви́стеся, я́коже а́нгелы пострада́вше за пра́вое мудрова́ніе и почита́етеся во вѣ́ки.

Богоро́диченъ: Благоче́стно воспѣва́ющихъ Тя́, Богоро́дицу, Госпоже́ Влады́чице, грѣхо́внаго лю́таго мра́ка ско́ро премени́, мо́лимся, ча́сти же и ра́дости Тобо́ю просвѣще́нныхъ, сподо́би.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

По́йте, и́ноцы Аѳо́нстіи, благословля́й, оби́тель Зогра́фская, Благу́ю Влады́чицу, Засту́пницу Всеми́лостивую, покро́вомъ Свои́мъ правосла́вныя лю́ди покрыва́ющую, ерети́ческихъ же вся́ за́мыслы разруша́ющую. [8]

Хотя́ху иногда́ папослужи́теліе всю́ го́ру Аѳо́нскую мече́мъ плѣни́ти, и вся́ и́ноки во свою́ па́губную е́ресь обрати́ти, но заступле́ніемъ Твои́мъ, Влады́чице, Госпо́дь сотрѣ́ горды́ню и́хъ, тѣ́мже превозно́симъ Тя́ во вѣ́ки. [9]

Вседержи́тель Госпо́дь, всели́выйся во утро́бу Твою́, сто́лпъ утвержде́нія вѣ́рнымъ Тя́ показа́, къ нему́же прибѣга́юще, напа́стей свобожда́емся, искуше́ній ересе́й, и всѣ́хъ бѣ́дъ избавля́емся, тѣ́мже согла́сно пое́мъ, и превозно́симъ Тя́, Чи́стая, во вѣ́ки.

Страстоте́рпцы Зогра́фскія оби́тели, пострада́ти за благоче́стіе укрѣпи́ла еси́, Влады́чице, съ ни́ми у́бо моли́ Христа́ Бо́га о спасе́ніи ду́шъ на́шихъ, да благослови́мъ и превозно́симъ Тя́ во вся́ вѣ́ки.

Инъ.

Ирмо́съ: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Ны́нѣ свяще́нная оби́тель Зогра́фская хва́лится, богоно́сніи, и, крася́щися, чуде́съ ва́шихъ наслажда́ется, и велича́ется страда́ньми и по́двигами ва́шими: папослужи́телей бо посрами́сте, правосла́вными сопротивля́ющеся и́мъ догма́тами, и пѣсносло́вяще Христа́ во вѣ́ки.

Пѣ́сньми да воспое́тся свяще́нный Ѳома́, игу́менъ оби́тели Зогра́фскія, Варсану́фій, и Иларіо́нъ, и Косма́, и Се́ргій, и Евѳи́мій, и Мина́, и Іа́ковъ, Іовъ, Іоанни́кій, съ ни́ми же и про́чее честно́е собра́ніе, два́десять и шести́, пою́ще Го́спода и превознося́ще Его́ во вѣ́ки.

Спаса́й рабы́ Твоя́, Великодержа́вный Царю́ Бо́же, еди́не Ще́дре, мно́гими моле́ньми преподо́бныхъ Твои́хъ срада́льцевъ, два́десять и шести́, преклоня́емъ ны́нѣ. Съ ни́ми же и на́съ пріими́, вопію́щихъ: да благослови́тъ вся́ тва́рь Го́спода и превозно́ситъ во вся́ вѣ́ки.

Богоро́диченъ: Яко трапе́за Хлѣ́бъ жи́зни вмѣсти́ла еси́, всѣ́хъ пита́ющій, Отрокови́це, вседѣ́тельнымъ осѣне́ніемъ, и Сего́ дои́ши сосцы́, я́ко Младе́нца, Его́же пою́ще, я́ко Бо́га, Тебе́ госпо́дственно, Богоро́дицу, возвѣща́емъ: да благослови́тъ вся́ тва́рь Го́спода и превозно́ситъ во вся́ вѣ́ки.

Инъ.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Сосу́ды избра́нніи, чеснíи, я́вльшеся, свѣ́тло го́рнѣе сія́ніе прія́сте, и къ селе́ніемъ и́стинно небе́снымъ ра́достно потеко́сте, облиста́еми благода́тію Боже́ственныя Тро́ицы, Юже пѣ́сньми пое́те во вся́ вѣ́ки.

Ра́вное соверши́вше тече́ніе, отцы́ преподобнострада́льніи, и ра́вная пра́веднымъ вѣнцы́ отъ Христа́ прія́сте на небесѣ́хъ, блаже́нніи, Ѳомо́ со всѣ́ми, сра́дующеся а́нгельскимъ лико́мъ, па́мять у́бо твори́те о благохва́лящихъ ва́съ.

Тро́иченъ: Со всѣ́ми го́рними во́инствы, Отца́ и Сы́на и Ду́ха Свята́го, трисвѣ́тлое, нераздѣ́льное, несозда́нное Божество́, еди́ное власти́тельное, нача́льство и ца́рство пѣсносло́вяще: Свя́тъ, Свя́тъ, Свя́тъ, вопіе́мъ неусы́пною любо́вію.

Богоро́диченъ: Словесы́ и догма́ты, Дѣ́во, Чи́стую Богоро́дицу Тя́ проповѣ́давшіи, Бо́га во пло́ти неизрече́нно роди́вшую; и человѣ́ческое Обожи́вшаго естество́ въ ложесна́хъ Твои́хъ, пѣ́сньми да чту́тся досто́йно съ Тобо́ю, Богоро́дице, два́десять и ше́сть отце́въ.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Пріиди́те, Правосла́вія пито́мцы, духо́вно возвесели́мся, дне́сь бо наста́ свѣ́тлый пра́здникъ чу́дныя, Пречи́стыя Богома́тере ико́ны, е́юже Правосла́віе утвержда́ется, заблужде́ніе же латиному́дрствующихъ я́вѣ изоблича́ется.

Совѣ́тъ зо́лъ совѣща́ша на ны́ богобо́рцы лати́ны, я́коже Ахитофе́лъ на Дави́да, но моли́твами Твои́ми, Богоро́дице, се́й разори́ла еси́, и крѣ́пость и́хъ низложи́ла еси́.

Отча́явшихся ве́ліе прибѣ́жище, обурева́емыхъ ти́хое приста́нище — Ты́ еси́, Богоро́дице, тѣ́мже заступи́ и на́съ отъ всѣ́хъ зо́лъ и лю́тыхъ обстоя́ній, да покланя́ющеся святѣ́й ико́нѣ Твое́й, усе́рдно Тя́ велича́емъ.

Пріими́, Отрокови́це Пречи́стая, приноси́мую Тебѣ́ пѣ́снь сію́, воздаю́щи благода́ть на Тя́ надѣ́ющимся, испроси́ у Сы́на Твоего́ ми́ръ це́рквамъ, правосла́внымъ христіа́номъ пода́ждь побѣ́ду на богопроти́вныя, да Тя́ вся́къ язы́къ правосла́вно велича́етъ.

Инъ.

Ирмо́съ: Свѣтоно́сный о́блакъ, въ о́ньже всѣ́хъ Влады́ка, я́ко до́ждь съ небесе́ на руно́, сни́де и воплоти́ся на́съ ра́ди, бы́въ Человѣ́къ, Безнача́льный, велича́емъ вси́ я́ко Ма́терь Бо́га на́шего Чи́стую.

Послѣ́дующе, отцы́, благоговѣ́йно и преподо́бно пожи́вшимъ на земли́, во оби́тели Зогра́фстѣй по́стнически, лука́ваго тве́рдо побѣди́сте, и пострада́сте за благоче́стіе, сего́ ра́ди ны́нѣ ва́съ восхваля́емъ.

Отъ усте́нъ нечи́стыхъ, ны́нѣ убо́гое пріе́мше пѣ́ніе, о на́съ ко еди́ному Влады́цѣ па́мять твори́те прилѣ́жно, тве́рдіи преподобнострада́льцы, я́ко да обря́щемъ прегрѣше́ній разрѣше́ніе, и почита́емъ па́мять ва́шу свѣ́тло.

Якоже со́лнце вели́кое свяще́нная ва́ша па́мять, просія́вши я́сно, озаря́етъ мíръ, ю́же соверша́юще благоговѣ́йно, почита́емъ ва́съ, отцы́ преподобнострада́льніи, я́ко предста́телей, храни́телей же и блюсти́телей оби́тели на́шея.

Яко благоуха́нніи шипцы́, я́ко чистѣ́йшія кри́ны, я́ко древеса́ присноцвѣту́щая и ды́шущая мѵ́ра, отъ честны́я ва́шея ра́ки источа́ете безчи́сленная исцѣле́нія, всепреподо́бніи, прогоня́юще злосмра́дное неду́говъ, съ вѣ́рою и благоговѣ́ніемъ приступа́ющимъ къ ва́мъ.

Богоро́диченъ: Купина́ прообразова́ше, Дѣ́во, Твое́ пресла́вное чу́до: Ты́ бо прія́ла еси́ во утро́бѣ Огнь нестерпи́мый вои́стинну, чревоноси́вшая Христа́, пра́вды Со́лнца су́щаго, неопали́ма пребы́вши, тѣ́мже Тя́ при́сно блажи́мъ.

Инъ.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Во свѣ́тѣ мы́сленнѣмъ, му́дріи, водворя́ющеся, пѣ́снь пріими́те, ю́же ва́мъ прино́симъ, мно́гаго ра́ди до́лга, и́мже до́лжни есмы́, и воздая́нія про́симъ прегрѣше́ній оставле́нію дарова́тися, ва́шими моли́твами, досто́йно ва́съ почита́ющимъ.

Положи́ ва́съ Бо́гъ, преподобнострада́льніи, я́ко незы́блемая оби́тели се́й предсто́лпія, въ послѣ́дняя времена́, на непримири́мыя враги́. Ко́сти же ва́ша всечестны́я, я́ко ка́мень претыка́нія сопроти́внымъ даде́, вѣ́ру Правосла́вную при́сно укрѣпля́я, сла́вніи.

Утоли́те бу́рю лю́тыхъ ва́рваръ, воздвиза́емую на на́съ, всепреподо́бніи, уста́вите церко́вныя раздо́ры, пѣвце́мъ да́руйте прегрѣше́ній оставле́ніе, оби́тель же невреди́му сохрани́те отъ вся́каго лю́таго обстоя́нія.

Тро́иченъ: Всевы́шній Бо́же, Отче, Сы́не, и Ду́ше, Тро́ице равноче́стная, моли́твами преподо́бныхъ Твои́хъ, сохраня́й свяще́нную оби́тель на́шу отъ вся́каго озлобле́нія, па́ствѣ же Твое́й непоколеби́мое, непрекло́нное и ми́рное пода́ждь состоя́ніе.

Богоро́диченъ: Тя́, я́ко вои́стинну, прія́телище Ду́ха яви́лася еси́, Влады́чице: Бо́га бо, Его́же не́бо и земля́ вмѣсти́ти отню́дъ не мо́жетъ, во чре́вѣ Твое́мъ вмѣсти́ла еси́. Сего́ уми́лостиви, преподо́бныхъ и Твои́ми моли́твами, о всѣ́хъ на́съ, воспѣва́ющихъ Тя́.

Свѣти́ленъ. Подо́бенъ: Жены́, услы́шите.

Оби́тели на́шея предста́тели, дне́сь свѣ́тло восхва́лимъ преподобнострада́льныя отцы́, низложи́тели пре́лести лати́нъ и проповѣ́дники вѣ́ры правосла́вныя, и́же огне́мъ испепели́вшеся, всесожже́нія боже́ственная принесо́стеся Тро́ицѣ.

Сла́ва: Предста́телей ва́съ, прему́дріи, стяжа́хомъ и храни́телей свяще́нныя оби́тели на́шея, тѣ́мже свѣ́тло соверша́емъ па́мять ва́шу благознамени́тую, пѣ́сньми ва́съ почита́юще: вы́ бо, Го́спода просла́вльше, ны́нѣ досто́йно со а́нгелы почита́еми есте́.

И ны́нѣ: Горды́ню низложи́, Влады́чице, латиному́дрствующихъ, да посра́мятся и уразумѣ́ютъ, я́ко нѣ́сть во уче́ніи и́хъ и́стины, но пре́лесть го́рдаго сатаны́, и́же хотя́ на небеси́ поста́вити престо́лъ сво́й, и бы́ти подо́бенъ Вы́шнему, до а́да низве́ржеся и въ преиспо́днюю всели́ся.

На хвали́техъ стихи́ры на 8, гла́съ 1. Подо́бенъ: Небе́сныхъ чино́въ.

Пречи́стая Богоро́дице Дѣ́во, дре́внюю ле́сть зміи́ну Рождество́мъ Твои́мъ упраздни́вшая, Ты́ и ны́нѣ, смире́нно мо́лимъ Тя́, изба́ви правосла́вныя лю́ди отъ ле́сти и кова́рства латиному́дрыхъ ерети́къ, и́же вся́ догма́ты святы́хъ оте́цъ изврати́ша, и вмѣ́сто о́ныхъ, своя́ суему́драя уче́нія, я́ко му́тное и вредоно́сное питіе́, мíру предложи́ша.

Земны́й жре́бій Тво́й, Богома́ти, опло́тъ Правосла́вія яви́ся, вся́ ересе́й шата́нія при́сно отрѣва́й и изоблича́й. Тѣ́мже, Влады́чице, благоволе́ніе Твое́ къ нему́ всегда́ явля́еши, и насе́льникомъ его́ во вре́мя искуше́ній помога́еши, востаю́щія же на ни́хъ, я́ко пра́хъ отъ вѣ́тра развѣва́еши.

Пріиди́, преподо́бный ста́рче, воспо́й съ на́ми ра́достную пѣ́снь предъ чу́дную ико́ну Богома́тери, я́коже иногда́ воспѣ́лъ еси́: ра́дуйся, Невѣ́сто неневѣ́стная! Да тебѣ́ и на́мъ рече́тъ Влады́чица: ра́дуйтеся, вѣ́рніи рабы́ Сы́на Моего́, и Ца́рствія небе́снаго наслѣ́дницы.

Благодари́мъ Тя́, Пресвята́я Дѣ́во, при́сное промышле́ніе иму́щую о земно́мъ жре́біи Твое́мъ, и я́ко всю́ду благоче́стно и пра́ведно живу́щія безбѣ́дно храни́ши, грѣ́шныя же ми́луеши, и въ коне́чное развраще́ніе впа́сти и́мъ не попуща́еши, но въ пу́ть покая́нія и́хъ наставля́еши, ма́терними Твои́ми къ Бо́гу моли́твами.

Ины стихи́ры святы́хъ. Гла́съ и подо́бенъ то́йже.

Пріиди́те, вѣ́рніи, и безсупру́жныхъ ли́цы, соше́дшеся, до́блія Христо́вы ору́жники, и свѣти́льники Правосла́вія, тве́рдыя преподобнострада́льцы два́десять и ше́сть, восхва́лимъ пѣ́сньми, си́мъ съ вѣ́рою вопію́ще: о на́съ Спа́са моли́те.

Земна́я попече́нія оттря́сше, во оби́тели Зогра́фстѣй подвиза́ющеся, отцы́, пострада́сте до́блественно отъ лю́тыхъ злому́дренныхъ, я́ко храни́теліе оте́ческихъ преда́ній, и сугу́быя вѣнцы́ прія́сте.

Сти́хъ: Честна́ предъ Го́сподемъ сме́рть преподо́бныхъ Его́.

Съ ра́достнымъ се́рдцемъ и тве́рдымъ по́мысломъ на столпѣ́ стоя́ще, изобличи́сте пре́лесть лю́тыхъ латиному́дренныхъ, и огне́мъ сожже́ни бы́вше, принесо́стеся преподо́бніи, я́ко прія́тныя всесожже́нія Влады́цѣ, велича́еми.

Сти́хъ: Проидо́хомъ сквозѣ́ о́гнь и во́ду, и изве́лъ ны́ еси́ въ поко́й.

Вѣ́рою соверша́ющыя па́мять ва́шу, два́десять и ше́сть, до́бліи Христо́вы во́ины, сохраня́йте отъ вся́каго вре́да и враго́въ ви́димыхъ же и неви́димыхъ, преподо́бніи, и небе́снаго Ца́рствія сподо́бите.

Сла́ва [святы́хъ], гла́съ 1:

Кíими глаго́лы пѣ́ніе ва́мъ принесе́мъ, отцы́ преподобнострада́льніи? Или́ кíими похва́льными пѣ́сньми восхва́лимъ ва́съ? Мно́жество бо усте́нъ недовлѣ́етъ къ сему́, мно́го же па́че еди́нъ и неиску́сный, но а́ще же и не по достоя́нію, оба́че отъ на́съ услы́шите сія́: ра́дуйтеся, Правосла́вія побо́рницы, прія́телища добродѣ́тели, мона́шествующихъ утвержде́ніе, и основа́ніе ва́шея оби́тели; ра́дуйтеся, де́моновъ прогони́теліе, злосла́вныхъ противобо́рницы, наста́вницы заблужда́ющихъ извѣ́стніи, Тро́ицы всечестна́я селе́нія; ра́дуйтеся, многотеку́щіи окри́ны мѵ́ра благово́ннаго, арама́товъ приснотеку́щія рѣ́ки, Святы́я Горы́ предсто́лпія, вѣ́чныхъ бла́гъ наслѣ́дницы, моли́теся о на́съ, любо́вію соверша́ющихъ всечестну́ю па́мять ва́шу.

И ны́нѣ [Богоро́дицы], гла́съ то́йже.

Ди́вное чу́до си́лы Твоея́ яви́ла еси́, Богоро́дице, во оби́тели Зогра́фстѣй, егда́ изъ пла́мене о́гненнаго исхити́ла еси́ еди́наго преподо́бнаго страда́льца, да объяви́тъ всѣ́мъ, ка́ко свяще́нный Ѳома́ со ученики́ свои́ми обличи́ заблужде́ніе кровожа́дныхъ лати́нъ, и ка́ко услы́ша гла́съ съ небесе́, въ поко́й вѣ́чный и́хъ призыва́ющій, и мзду́ мно́гу и́мъ обѣщава́ющій.

Славосло́віе вели́кое, [ектеніи́] и отпу́стъ.



НА ЛИТУРГІИ:

Блаже́нна на 12: отъ кано́на Богоро́дичнаго пѣ́снь 1-я на 4, и святы́мъ пе́рваго кано́на пѣ́снь 3-я и втора́го 6-я. Проки́менъ, гла́съ 7: Восхва́лятся преподо́бніи во сла́вѣ и возра́дуются на ло́жахъ свои́хъ. Сти́хъ: Воспо́йте Го́сподеви пѣ́снь но́ву, хвале́ніе Его́ въ це́ркви преподо́бныхъ. И Богоро́дичный: [Проки́менъ, гла́съ 3, пѣ́снь Богоро́дицы: Вели́читъ душа́ Моя́ Го́спода, и возра́довася ду́хъ Мо́й о Бо́зѣ, Спа́сѣ Мое́мъ.] Апо́столъ ко Евре́емъ, зача́ло 334. И Богоро́диченъ, зача́ло 320. Аллилу́ія, гла́съ 4: Воззва́ша пра́ведніи и Госпо́дь услы́ша и́хъ, и отъ всѣ́хъ скорбе́й и́хъ изба́ви и́хъ. Сти́хъ: Мно́ги ско́рби пра́веднымъ и отъ всѣ́хъ и́хъ изба́витъ я́ Госпо́дь. [И Богоро́дицѣ, Аллилу́ія, гла́съ 8: Слы́ши Дщи́ и ви́ждь, и приклони́ у́хо Твое́.] Ева́нгеліе Іоа́нна, зача́ло 35 отъ полу́. И Богоро́дично, отъ Луки́, зачало 54. Прича́стенъ: Ра́дуйтеся пра́ведніи о Го́сподѣ, пра́вымъ подоба́етъ похвала́. И Богоро́диченъ: [Ча́шу спасе́нія пріиму́, и и́мя Госпо́дне призову́.]

Примѣчанія:
[1] Иныя стихиры на стиховнѣ малой вечерни:

На стиховнѣ стихиры, гласъ 7: Слава Тебѣ, Христе Царю, слава многому Твоему о насъ милосердію! Яко иконою Пречистыя Твоея Матере извѣстилъ еси истинну быти вѣру нашу, латиномудрствующихъ же прелесть обличилъ еси.

Стихъ: Воскресни, Господи, въ покой Твой, Ты и кивотъ святыни Твоея.

Слава Тебѣ, Царице небесная, Мати благословенная! Яко радость Тебѣ приносящимъ, взаимно радоватися вѣщаеши и радости вѣчныя тѣхъ сподобляеши.

Стихъ: Клятся Господъ Давиду истиною, и не отвержется Ея.

Дивна дѣла Твоя, Богородице! Множествомъ бо чудотворныхъ иконъ Твоихъ, яко пресвѣтлыми звѣздами, въ Церкви Христовой сіяеши и тѣми мракъ заблужденій отъ сердецъ нашихъ отгоняеши.
[2] Иныя пѣснопѣнія на стиховнѣ великой вечерни:

Слава, гласъ 6: Духъ Святый отъ Единаго Отца исходитъ, Сынъ Твой рече, и святіи Вселенстіи Соборы научиша. Духоборные же латине «и отъ Сына» исхожденіе Его причитаютъ и тѣмъ Святаго Духа уничижаютъ, и неравенство Святыя Троицы содѣваютъ. Сего ради, Владычице, врагами Божіими тѣхъ нарицаеши и въ прелесть оныхъ впасти намъ не попущаеши.

И нынѣ, гласъ 7: Боже, пріидоша языцы въ достояніе Пречистыя Матере Твоея, и оскверниша святыя храмы Твоя, положиша трупіе рабовъ Твоихъ, брашно птицамъ небеснымъ плоти преподобныхъ Твоихъ, звѣремъ земнымъ и рыбамъ морскимъ. Но пролей, Господи, гнѣвъ Твой, на люди и царства, хулящія Тя, и на отступившія отъ Православныя вѣры Твоея, да разумѣютъ, яко мы — людіе Твои, и овцы пажити Твоея, и истинно есть сповѣданіе вѣры нашея.
[3] По первой каѳисмѣ иной сѣдаленъ, гласъ 6: Единый токмо Христосъ дѣйствомъ Святаго Духа безсѣменно отъ Тебе, Богомати, родися. Ты же, Пречистая, отъ неплодове родилася еси, но не безсѣменно и непорочно, якоже учатъ суемудріи латине, ихже врагами Твоими, Госпоже, нарицаеши и душепагубную ересь ихъ изобличаеши.
[4] По второй каѳисмѣ иной сѣдаленъ, гласъ 6: Азъ есмь Хлѣбъ животный, сшедый съ небесе, — Сынъ Твой, Богомати, рече и на Тайнѣй Вечери подъ видомъ хлѣба плоть Свою въ снѣдь вѣрнымъ преподаде. Богопротивніи же латины завѣтъ сей оскверниша и вмѣсто хлѣба іудейскіе опрѣсноки на великое сіе таинство предложиша. Но слава Тебѣ, Богомати, яко святою иконою Твоею заблужденіе ихъ обличила еси, насъ же во Православіи утвердила еси.
[5] Иное величаніе и сѣдальны Божіей Матери:

Величаніе: Величаемъ Тя, Пречистая Богородице Дѣво, и чтемъ образъ Твой святый, имже заблужденіе латинъ изобличила еси, насъ же во Православіи утвердила еси.

По поліелеи сѣдаленъ, гласъ 4: Глава Церкве Сынъ Твой, Богородице: Онъ бо искупи ю честною Своею кровію отъ власти діаволи и нынѣ чрезъ пастыри Своя ею управляетъ. Гордіи же епископи римстіи отъяша у Христа власть сію и себѣ ю присвоиша. Сего ради, яко Арій безумный, отвержени суть отъ Святыя Церкве и часть ихъ съ предателемъ и вопившими: возьми, возьми и распни Его.

Слава, гласъ 4: Всѣмъ извѣствуя вѣчную славу преподобномучениковъ Зографскихъ, отъ латинъ пострадавшихъ, свѣтъ небесный яко вѣнецъ пресвѣтлый надъ Церковію, и памятникомъ ихъ явилъ еси, Господи, да слышаще сіе православніи, въ Православіи утвердятся, латине же въ заблужденіи своемъ посрамятся.

И нынѣ, гласъ тойже: Многая Твоя намъ благодѣянія кто исповѣсть, Богородице? Или кій языкъ прославить неисчерпаемое море милосердія Твоего? Яко не токмо всегда молиши о насъ Сына Твоего и Бога нашего и всѣмъ намъ твориши спастися, но и враги наша видимыя и невидимыя запинаеши и вредъ душепагубныхъ ересей извѣщаеши, наипаче же латиномудрствующихъ изобличила еси чрезъ чудную Твою икону, Ейже нынѣ покланяющеся Тя, Всечистая, ублажаемъ.
[6] Не токмо гора Аѳонская, но и великая Россія прославляетъ Тя, Богомати, яко не попустила еси латиномудрствующимъ вознести на ню рогъ свой и Православіе въ ней донынѣ неврежденно сохранила еси.
[7] Великая и Малая Россія, якоже гора Аѳонская и вся Восточная Церковь, отъ лести и насилія папослужителей Тобою, Богомати, избавльшеся, благодарно Тебѣ вопіютъ: Благословенна Ты въ женахъ едина, Всенепорочная Владычице.
[8] Пойте, иноцы Аѳонстіи, благословляй, страно Россійская, благую Владычицу, Заступницу всемилостивую, покровомъ Своимъ православныя люди покрывающую, еретическихъ же вся замыслы разрушающую.
[9] Хотяху иногда папослужителіе всю землю Россійскую мечемъ плѣнити и вся православныя христіаны во свою пагубную ересь обратити, но заступленіемъ Твоимъ, Владычице, Господь сотре гордыню ихъ, тѣмже превозносимъ Тя во вѣки.

Источникъ: Слу́жба святѣ́й чудотво́рнѣй Зогра́фстѣй ико́нѣ Ака́ѳистнѣй Пресвяты́я Богоро́дицы, нарица́емѣй Предвозвѣсти́тельницы и святы́мъ 26-ти преподобному́ченикомъ Зогра́фскимъ. — Пренапи́сана бы́сть слу́жба сія́, всемогу́щею Бо́жіею по́мощію, съ рукопи́сный оригина́лъ... во святѣ́й Зогра́фстѣй оби́тели. — См. на сайтѣ Зографскаго іеродіакона Іустина.

Свѣрено съ изданіями:

Служби на българските светии. — Света Гора, Атон: Славянобългарски манастир «Св. Вмчк Георги Зограф», 2007. — Л. 439-459.

Избранныя пѣснопѣнія изъ службы Зографской иконы Пресвятой Богородицы. // Святогорецъ-инокъ Денасій Пантелеимоновскій. Аѳонская икона Пресвятыя Богородицы Акаѳистная-Предвозвѣстительница, или борьба Аѳонцевъ за св. Православіе Восточной Церкви и страданія ихъ за несогласіе на унію съ Римомъ и подчиненіе папѣ. — Шамордино: Типографія Казанской Амвросіевской женской Пустыни, 1913. — С. 22-24.

Служба «Акаѳистной» иконѣ Божіей Матери и 26-ти новомученикамъ Зографскимъ. // Путь къ святости: Преподобный Алексій Карпаторусскій. — Успенско-Казанскій монастырь, 2009. — С. 419-430.

/ Къ оглавленію раздѣла /


Наверхъ / Къ титульной страницѣ

0