Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 26 iюня 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 9-й де́нь.
Преподо́бнаго отца́ на́шего Андрони́ка и жены́ его́ Аѳана́сіи.

[Зри́:] Преподо́бному Андрони́ку пое́мъ на повече́ріи.

Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Предочи́стивъ твою́ ду́шу, Андрони́че, до́блими добродѣ́тельми и Боже́ственныя любве́ разже́гся у́гльми, плотски́хъ уклони́лся еси́ распале́ній, ро́су бо Боже́ственную свы́ше имѣ́лъ еси́, тя́ ороша́ющую всегда́.

Влады́чнимъ повелѣ́ніемъ повину́яся, я́ко патріа́рхъ иногда́ Авраа́мъ, о́тче, твою́ зе́млю оста́вилъ еси́ и сро́дники небре́гъ; жены́ же и бога́тства дале́че бы́въ, и въ пусты́ню, блаже́нне, всели́лся еси́, уединя́емь.

Госпо́дню за́повѣдь испо́лнилъ еси́, вся́ прода́въ твоя́ и ни́щимъ разда́въ, и́миже ку́плю би́сера обрѣ́лъ еси́ честна́го, и се́й пріе́мъ, обогати́лся еси́ оби́льно бога́тнымъ мѵ́ровъ источе́ніемъ.

Богоро́диченъ: Созида́ется во́лею во утро́бѣ Твое́й Ада́мовъ Содѣ́тель и дла́нію нося́й, Богоро́дице, вся́ческая Твои́ми рука́ми но́сится, — о, стра́шнаго та́инства! — и Младе́нецъ явля́ется, всѣ́хъ святы́хъ Госпо́дь.

Пѣ́снь 3.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, Еди́не Человѣколю́бче.

Изгна́нъ отъ Еде́ма совѣ́томъ Евинымъ Ада́мъ, ты́ же, вѣ́ровавъ совѣ́ту сопру́жницы твоея́, му́дре, рая́ бы́лъ еси́ вну́трь и съ не́ю ра́дуешися всегда́, блаже́нне Андрони́че.

Иже та́йно и му́дрѣ устроя́я вся́ до́брѣ Сло́во и земны́я ко спасе́нію направля́я, отъ земли́ на небеса́ люби́мыя преставля́етъ дѣ́ти ва́ша два́, стезю́ пра́ву явля́я ва́мъ.

О маловре́меннѣй и тлѣ́ющей небре́гше любви́, на земли́ су́щимъ оста́вльше сію́, связа́стеся любо́вію духо́вною, блаже́нніи, тѣ́мже ны́нѣ водворя́етеся, идѣ́же пра́ведныхъ селе́нія.

Богоро́диченъ: Безсосужде́нно херуви́мъ и серафи́мъ пребо́льши, Яже Бо́га несказа́нно Ро́ждшая, и земны́мъ кля́тву на благослове́ніе преложи́вшая, пѣ́сньми всегда́ да почита́ется: Та́ бо на́ше упова́ніе.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

По́ты трудо́въ твои́хъ, отъ пло́ти твоея́ ка́плющіи, свяще́ннѣйше Андрони́че, въ воню́ мѵ́ра преложи́шася.

Якоже фи́никсъ высокора́сленный, ты́ въ пусты́няхъ, о́тче, процвѣ́лъ еси́ и Бо́гу плодоноси́лъ еси́ сладча́йшія болѣ́зни трудо́въ твои́хъ.

Сле́зными одожде́ніи пусты́нную зе́млю ороси́лъ еси́, плодоно́сну же яви́лъ еси́ ду́шу твою́ болѣ́зньми по́стническими.

Богоро́диченъ: Не истощи́въ Госпо́дь Оте́ческихъ нѣ́дръ, въ Твою́ всели́ся утро́бу, Отрокови́це, пречи́стую, и мíръ ве́сь обнови́.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ бо Тебе́, ино́го не вѣ́мы.

Воспои́мъ Андрони́ка пѣ́сньми, вси́ вѣ́рніи, и того́ сопру́жницу Аѳана́сію просла́вимъ.

Отню́дъ, я́коже е́сть пи́сано, не да́лъ еси́ сна́ твои́ма очи́ма, ни дрема́нія твои́ма вѣ́ждома, Андрони́че.

Просла́ви мѵ́ры тя́ Госпо́дь, блаже́нне, твоя́ труды́ воспріе́мый, я́ко же́ртву су́щнѣ благопрія́тну.

Богоро́диченъ: Еди́наго отъ Тро́ицы родила́ еси́, Отрокови́це, стра́шно и млеко́мъ пита́ла еси́ земны́хъ естество́ Пита́ющаго.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, Многоми́лостиве Христе́ Бо́же на́шъ.

Есте́ственная сла́бость ника́коже предложе́нія притупи́, е́же стяжа́ла еси́ къ болѣ́знемъ, о преподо́бная, страда́нія.

Премѣни́вши одѣя́ніе я́вѣ, естество́ утаи́ла еси́, тѣ́мъ несумнѣ́нно пу́ть спасе́нія соверши́ла еси́.

Увѣ́дѣвши супру́га твоего́ путьше́ствующа, ему́же и послѣ́дствовала еси́, ника́коже что́ къ нему́ бесѣ́довавши.

Богоро́диченъ: Гла́съ Гавріи́ловъ Тебѣ́, Отрокови́це, ны́нѣ прино́симъ, — ра́дуйся, Госпо́дь съ Тобо́ю, Благослове́нная, — вопію́ще Ти́.

Сѣда́ленъ, гла́съ 8. Подо́бенъ: Прему́дрости.

Иго Госпо́дне ле́гкое вседу́шно на ра́мена воспріе́мъ, Тому́ послѣ́довалъ еси́, богоно́се Андрони́че, и мірски́хъ мяте́жей до́брѣ возненави́дѣлъ еси́, въ пусты́ню, блаже́нне, усе́рдно все́лься, идѣ́же тече́ніе по́стническое, о́тче, безъ поро́ка соверши́лъ еси́, Бо́гу совокупля́лся. Сего́ ра́ди вопіе́мъ ти́: моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Дре́вле хва́лящагося безмѣ́рно злонача́льнаго одержа́ти всю́ тва́рь, я́ко пти́чицу ху́ду, низложи́лъ еси́, си́лою защити́вся Ду́ха и Креста́ всеору́жіемъ.

Нося́ на ра́мѣхъ кре́стъ тво́й, послѣ́довалъ еси́ Го́споду вседу́шно и сла́вы Его́ получи́лъ еси́ Боже́ственныя, я́ко испо́лнитель, Андрони́че, Того́ за́повѣдей.

Явля́етъ благода́ть мѵ́ровъ е́же ко Го́споду твое́ дерзнове́ніе, вода́мъ бо лія́нію подо́бится, на спасе́ніе всегда́ вѣ́рныхъ пролива́ема.

Богоро́диченъ: Да обожи́тъ мое́ естество́, Всесоверше́нный неизрече́нно младе́нствуетъ, изъ Тебе́, Чи́стыя, происхо́дитъ, Иже сло́вомъ приведы́й вся́ческая, и содержа́, и укрѣпля́я.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Сле́зными струя́ми напои́въ твою́ душе́вную ни́ву, пожа́лъ еси́ е́же отъ чудодѣя́ній воздая́ніе бога́тное.

Остру́пльшуюся ду́шу мою́ согрѣше́ньми моли́твъ твои́хъ Боже́ственнымъ врачева́ніемъ сію́ исцѣли́, уго́дниче Госпо́день.

Тро́иченъ: Пребезнача́льную, вѣ́рніи, воспои́мъ благоче́стно Тро́ицу Всесвяту́ю, изъ не су́щаго приве́дшую вся́ческая.

Богоро́диченъ: Даніи́лъ Тя́ прови́дѣ, го́ру, Отрокови́це, несѣко́мую, отъ нея́же отсѣче́ся Ка́мень, сокруши́вый хра́мы и́дольскія.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Источа́еши мѵ́ровъ благода́ть неистощи́мую и притека́ющимъ всѣ́мъ подае́ши вѣ́рно неду́говъ разрѣше́ніе, о́тче Андрони́че.

Преложи́лся еси́ отъ привре́менныхъ, ра́дуяся, къ вы́шнимъ и со отцы́ святы́ми всели́вся, на́съ, па́мять твою́ творя́щихъ, о́тче, помина́й всегда́.

Пріими́ мое́ пѣ́ніе, о дво́ице преподо́бныхъ, и отда́ніе ми́ пода́ждь твои́мъ къ Бо́гу моле́ніемъ, прегрѣше́ній изба́вити мя́.

Богоро́диченъ: Прописа́ Твою́ утро́бу дре́вле три́ о́троки не опали́вшая пе́щь, Отрокови́це Чи́стая, и́бо неопа́льно прія́ла еси́ Огнь Божества́.

Стихи́ры, гла́съ 6. Подо́бенъ: Все́ отло́жше.

Все́ отложи́вше* жите́йское томле́ніе* и бога́тство возненави́дѣвше,* и сла́дость теку́щую презрѣ́вше,* кре́стъ взя́сте,* я́ко и́го Боже́ственное,* и Христу́ послѣ́довасте* и къ небе́сному поко́ю чу́дно всели́стеся,* въ не́мже свеселя́щеся,* помина́йте на́съ, вѣ́рою помина́ющихъ вы́* и любо́вію соверша́ющихъ благоговѣ́йно* свяще́нную и честну́ю па́мять ва́шу, святíи.

Весьма́ возлю́бльшая* Тебе́, Влады́ку, отъ души́,* во слѣ́дъ Тебе́ потече́* дво́ица приснопа́мятная,* и единосопру́жная,* и вся́ кра́сная, и ю́зу нерѣши́мую,* я́ко паучи́ну, прето́рже,* тѣ́мъ и получи́ Ца́рствіе Твое́, Безсме́ртне.* Тѣ́хъ у́бо моли́твами* очище́ніе, Ще́дрый, пода́ждь на́мъ согрѣше́ній* и яви́ ны́ вы́шшія страсте́й,* смуща́ющихъ на́шу ду́шу, Влады́ко, всегда́.

Дѣте́й лише́ни бы́сте* любе́зныя дру́жбы,* по́двигомъ бо́льшимъ* въ житіи́ пребыва́юще неутѣ́шни,* гла́съ испуща́сте* до́блественнѣйшій Іовль, взыва́юще:* Госпо́дь даде́, Госпо́дь и па́ки взя́.* Тѣ́мъ и жела́емое ва́ми дѣ́ло* удо́бно соверши́сте* и къ любе́знѣйшимъ мѣ́стомъ святы́мъ,* ра́достно преходя́ще, яви́стеся,* сопру́же свяще́ннѣйшій.

Сла́ва, и ны́нѣ, богоро́диченъ:

Ра́дуйся, ко́реню лѣтора́сленный,* ра́дуйся, же́зле боже́ственный Ааро́новъ,* прозябы́й цвѣ́тъ неувяда́ющій,* благопло́дный раю́,* дре́во жи́зненное,* отъ ко́рене Іессе́ева, Чи́стая, процвѣ́тши, Отрокови́це,* и земны́я кормя́щи хлѣ́бомъ разу́мнымъ.* Ра́дуйся, багряни́це всечестна́я,* всѣ́хъ Царя́ Богоневѣ́сто,* увязе́ніе свѣ́тлое,* архіере́евъ благолѣ́піе.* Ра́дуйся, еди́на Пречи́стая.

Крестобогоро́диченъ. Подо́бенъ то́йже:

Агнца Своего́* Агница Нескве́рная дре́вле* и Непоро́чная Влады́чица* на Дре́вѣ Кре́стнѣмъ я́ко узрѣ́,* ма́терски восклица́ше* и, дивя́щися, вопія́ше:* Ча́до Сладча́йшее,* что́ зрѣ́ніе сіе́ но́вое и пресла́вное?* ка́ко со́нмъ безблагода́тный* суди́щу Пила́тову предаде́ Тя́* и осужда́етъ на сме́рть, Живота́ вся́ческихъ?* но воспѣва́ю Твое́ неизрече́нное, Сло́ве, снисхожде́ніе.

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 83 – 85 об.

/ Къ оглавленію раздѣла /


Наверхъ / Къ титульной страницѣ

0