Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 20 октября 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 9-й де́нь.
Свята́го апо́стола Іа́кова Алфе́ева.

НА ВЕЧЕРНИ,
Пое́мъ Блаже́нъ му́жъ, 1-й антифо́нъ. На Го́споди воззва́хъ: стихи́ры апо́стола на 8, гла́съ 4. Подо́бенъ: Да́лъ еси́ зна́меніе.

Возсія́лъ еси́, апо́столе,* свѣтови́денъ, я́ко со́лнце,* заря́ми Ду́ха* и всю́ просвѣти́лъ еси́ вселе́нную, блаже́нне, богозна́ніемъ,* и отгна́лъ еси́ мра́къ многобо́жный* боже́ственнымъ проповѣ́даніемъ,* тѣ́мъ твое́ пресвѣ́тлое и достохва́льное дне́сь* соверша́юще торжество́,* благоче́стно тя́ сла́вимъ. [Три́жды.]

Возгремѣ́лъ еси́, прему́дре, вселе́ннѣй* уче́нія свяще́нная и спаси́тельная* и всю́ очи́стилъ еси́ идолонеи́стовства* тва́рь, богому́дре,* и просвѣти́лъ еси́ лю́ди* богозна́нія сія́ніемъ.* Идольская же тре́бища разоря́я благода́тію,* це́ркви на похвале́ніе Бо́га на́шего воздви́глъ еси́. [Три́жды.]

На высотѣ́ сѣдя́й* богозна́нія, Іа́кове,* прія́лъ еси́ Ду́ха благода́ть,* я́вльшуюся тебѣ́ о́гненнымъ ви́домъ,* и язы́комъ о́гненнымъ всю́ попали́лъ еси́ я́вѣ* злоче́стія ти́ну многобо́жную.* Тѣ́мъ тя́, я́ко апо́стола и богоглаго́льника, хва́лимъ,* свято́е твое дне́сь соверша́юще торжество́. [Два́жды.]

Сла́ва, гла́съ то́йже, самогла́сенъ. Ѳеофа́ново:

Боже́ственнаго Ду́ха я́вѣ благода́ть пріе́мъ, свяще́ннѣйшему ли́ку апо́стольскому причте́нъ, Іа́кове, бы́лъ еси́. Тѣ́мъ и съ небе́съ прише́ствіе иногда́ си́льное одохнове́ніе, о́гненнымъ язы́комъ просвѣти́въ тя́, язы́ческое отерновле́нное попали́лъ еси́ безбо́жіе. Христа́ Бо́га, богопроповѣ́дниче, моли́ спасти́ся душа́мъ на́шимъ.

И ны́нѣ, богоро́диченъ: Иже Тебе́ ра́ди...
Вхо́дъ, проки́менъ дне́, и чте́нія три́, и литія́, [ищи́ сего́ мѣ́сяца въ 6-й де́нь:]

[Отъ собо́рнаго посла́нія Іоа́ннова чте́ніе. [Глава́ 1.]

Еже бѣ́ испе́рва, е́же слы́шахомъ, е́же ви́дѣхомъ очи́ма на́шима, е́же узрѣ́хомъ, и ру́ки на́ша осяза́ша, о Словеси́ Живо́тнѣмъ. И Живо́тъ яви́ся, и ви́дѣхомъ, и свидѣ́тельствуемъ, и возвѣща́емъ ва́мъ Живо́тъ Вѣ́чный, Иже бѣ́ у Отца́ и яви́ся на́мъ. Еже ви́дѣхомъ и слы́шахомъ, повѣ́даемъ ва́мъ, да и вы́ обще́ніе и́мате съ на́ми: обще́ніе же на́ше со Отце́мъ и съ Сы́номъ Его́, Іису́сомъ Христо́мъ. И сія́ пи́шемъ ва́мъ, да ра́дость ва́ша бу́детъ испо́лнена. И сіе́ е́сть обѣтова́ніе, е́же слы́шахомъ отъ Него́ и повѣ́даемъ ва́мъ, я́ко Бо́гъ свѣ́тъ е́сть, и тмы́ въ Не́мъ нѣ́сть ни еди́ныя. Аще рече́мъ, я́ко обще́ніе и́мамы съ Ни́мъ, и во тмѣ́ хо́димъ, лже́мъ и не твори́мъ и́стины. Аще же во свѣ́тѣ хо́димъ, я́коже Са́мъ То́й е́сть во свѣ́тѣ, обще́ніе и́мамы дру́гъ ко дру́гу, и кро́вь Іису́са Христа́ Сы́на Его́ очища́етъ на́съ отъ вся́каго грѣха́.

Отъ собо́рнаго посла́нія Іа́ковля чте́ніе. [Глава́ 1.]

Іа́ковъ, Бо́гу и Го́споду Іису́су Христу́ ра́бъ, обѣмана́десяте колѣ́нома, и́же въ разсѣ́яніи, ра́доватися. Вся́ку ра́дость имѣ́йте, бра́тіе моя́, егда́ во искуше́нія впа́даете разли́чна, вѣ́дяще, я́ко искуше́ніе ва́шея вѣ́ры содѣ́ловаетъ терпѣ́ніе. Терпѣ́ніе же дѣ́ло соверше́нно да и́мать, я́ко да бу́дете соверше́ни и всецѣ́ли, ни въ че́мже лише́ни. Аще же кто́ отъ ва́съ лише́нъ е́сть прему́дрости, да про́ситъ отъ даю́щаго Бо́га всѣ́мъ нелицепріе́мнѣ и не поноша́ющаго, и да́стся ему́. Да про́ситъ же вѣ́рою, ничто́же сумня́ся: сумня́йся бо уподо́бися волне́нію морско́му, вѣ́тры возмета́ему и развѣва́ему. Да не мни́тъ бо человѣ́къ о́нъ, я́ко пріи́метъ что́ отъ Бо́га. Му́жъ двоеду́шенъ, неустро́енъ во всѣ́хъ путе́хъ свои́хъ. Да хва́лится же бра́тъ смире́нный въ высотѣ́ свое́й, бога́тый же во смире́ніи свое́мъ, зане́, я́коже цвѣ́тъ травны́й, мимои́детъ. Возсія́ бо со́лнце со зно́емъ и изсуши́ траву́, и цвѣ́тъ ея́ отпаде́, и благолѣ́піе лица́ ея́ поги́бе. Си́це и бога́тый въ хожде́ніи свое́мъ увяда́етъ. Блаже́нъ му́жъ, и́же претерпи́тъ искуше́ніе, зане́ иску́сенъ бы́въ, пріи́метъ вѣне́цъ жи́зни, его́же обѣща́ Бо́гъ лю́бящимъ Его́.

Отъ собо́рнаго посла́нія Іу́дина чте́ніе. [Глава́ 1.]

Іу́да, Іису́су Христу́ ра́бъ, бра́тъ же Іа́кову, су́щимъ о Бо́зѣ Отцѣ́ освяще́ннымъ, Іису́съ Христо́мъ соблюде́ннымъ зва́ннымъ. Ми́лость ва́мъ, и ми́ръ, и любы́ да умно́жится. Возлю́бленніи, вся́ко тща́ніе творя́ писа́ти ва́мъ о о́бщемъ спасе́ніи ва́шемъ, ну́жду возымѣ́хъ писа́ти ва́мъ, моля́ подвиза́тися о пре́даннѣй вѣ́рѣ святы́мъ еди́ною. Привнидо́ша бо нѣ́цыи человѣ́цы (дре́вле предуста́вленніи на сіе́ осужде́ніе) нечести́віи, Бо́га на́шего благода́ть прелага́ющіи въ скве́рну, и еди́наго Влады́ки Бо́га, и Го́спода на́шего Іису́са Христа́ отмета́ющіися. Воспомяну́ти же ва́мъ хощу́, вѣ́дущимъ и ва́мъ еди́ною сіе́, я́ко Госпо́дь лю́ди отъ земли́ Еги́петскія спасе́, послѣди́ невѣ́ровавшія погуби́. Ангелы же, не соблю́дшія своего́ нача́льства, но оста́вльшія свое́ жили́ще на су́дъ вели́каго дне́, у́зами вѣ́чными подъ мра́комъ соблюде́. Якоже Содо́ма и Гомо́рра, и окре́стныя и́хъ гра́ды, подо́бнымъ и́мъ о́бразомъ преблуди́вша и ходи́вша въ слѣ́дъ пло́ти ины́я, предлежа́тъ въ показа́ніе огня́ вѣ́чнаго, су́дъ подъе́мше. Вы́ же, возлю́бленніи, помина́йте глаго́лы преждерече́нныя отъ апо́столъ Го́спода на́шего Іису́са Христа́. Зане́ глаго́лаху ва́мъ, я́ко въ послѣ́днее вре́мя бу́дутъ руга́тели, по свои́хъ по́хотѣхъ ходя́ще и нече́стіихъ. Сіи су́ть отдѣля́юще себе́ (отъ еди́ности вѣ́ры и су́ть) тѣле́сни, Ду́ха не иму́ще. Вы́ же, возлю́бленніи, свято́ю ва́шею вѣ́рою назида́юще себе́ Ду́хомъ Святы́мъ, и моля́щеся, са́ми себе́ въ любви́ Бо́жіей соблюда́йте, жду́ще ми́лости Го́спода на́шего Іису́са Христа́ въ жи́знь вѣ́чную. И о́вѣхъ у́бо ми́луйте, разсужда́юще, о́вѣхъ же стра́хомъ спаса́йте, отъ огня́ восхища́юще. Облича́йте же съ боя́знію, ненави́дяще и я́же отъ пло́ти оскверне́ную ри́зу. Могу́щему же сохрани́ти вы́ безъ грѣха́ и безъ скве́рны и поста́вити предъ сла́вою свое́ю непоро́чныхъ въ ра́дости, еди́ному прему́дрому Бо́гу и Спа́су на́шему, (Іису́сомъ Христо́мъ, Го́сподемъ на́шимъ,) сла́ва и вели́чіе, держа́ва и вла́сть пре́жде всего́ вѣ́ка, и ны́нѣ, и во вся́ вѣ́ки. Ами́нь.

Аще настоя́тель изво́литъ пѣ́ти литíю,
стихи́ра хра́ма и апо́стола, гла́съ 4. Подо́бенъ: Яко до́бля.

Тро́стію благода́ти* отъ глубины́ су́етства* человѣ́ки извле́клъ еси́, досточу́дне,* Учи́теля ма́ніемъ* повину́вся, Іа́кове,* просвѣ́щшаго по всему́ твое́ разумѣ́ніе,* и апо́стола, и че́стна богоглаго́льника,* тя́, всеблаже́нне, показа́вша* Того́ непостижи́маго Божества́.

Ду́ха сія́ніе на тя́ сни́де* во о́гненнѣ ви́дѣ,* и тя́, блаже́нне, Боже́ственное прія́телище содѣ́ла,* ско́ро отгоня́ща безбо́жія мглу́* и мíръ просвѣща́юща* сія́ніемъ всему́дрыхъ твои́хъ слове́съ,* тайноглаго́льниче,* апо́столовъ украше́ніе,* Христо́въ самови́дче, блаже́нне.

Мо́лніями проповѣ́данія* во тмѣ́ сѣдя́щія* невѣ́дѣнія, сла́вне, просвѣти́въ,* показа́лъ еси́ сы́ны* Влады́ки и Бо́га вѣ́ры ра́ди.* Его́же страсте́мъ ревнова́лъ еси́ и сме́рти* и сла́вы бы́лъ еси́ наслѣ́дникъ,* я́ко му́дръ и богоглаго́ливъ,* я́ко учени́къ Истины.

Сла́ва, гла́съ 2:

Оста́вивъ земна́я, послѣ́довалъ еси́ Христу́, и зна́менався дохнове́ніемъ Свята́го Ду́ха, по́сланъ бы́въ отъ Него́ въ язы́ки поги́бшія обраща́ти человѣ́ки во свѣ́тъ богозна́нія, апо́столе Іа́кове, и, сконча́въ по́двиги боже́ственныя твоея́ стра́сти и му́къ разли́чныхъ, ду́шу твою́ Христу́ пре́далъ еси́; Того́ моли́, всеблаже́нне, дарова́ти на́мъ ве́лію ми́лость.

И ны́нѣ, богоро́диченъ:

Все́ упова́ніе мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ.]

На стихо́внѣ стихи́ры, гла́съ 4. Подо́бенъ: Да́лъ еси́ зна́меніе.

Прія́лъ еси́, апо́столе, надъ де́моны* непобѣди́мую вла́сть и си́лу* о и́мени Христо́вѣ* нача́ла тмы́ си́хъ отгони́ти;* и проше́лъ еси́ зе́млю,* просвѣща́я, я́коже со́лнце,* и вся́ страны́ научи́,* пе́рвое, сла́вне, Христо́во проповѣ́далъ еси́* спаси́тельное прише́ствіе.

Сти́хъ: Во всю́ зе́млю изы́де вѣща́ніе и́хъ* и въ концы́ вселе́нныя глаго́лы и́хъ.

Пе́рвѣй бла́гости* и есте́ственному, и пребоже́ственному* житію́ подо́бяся,* му́жъ бы́лъ еси́ бла́гъ, Іа́кове, по существу́* и благода́ти Боже́ственныя сы́нъ имену́емь,* нра́вовъ твои́хъ бла́гостію и ума́ чистото́ю* Христо́въ показа́лся еси́* учени́къ и́скренній.

Сти́хъ: Небеса́ повѣ́даютъ сла́ву Бо́жію,* творе́ніе же руку́ Его́ возвѣща́етъ тве́рдь.

Орга́нъ до́брѣ соста́вленъ* боже́ственнымъ окормле́ніемъ,* апо́столе Іа́кове, бы́въ,* язы́ковъ зва́нію ты́ ввѣ́рился еси́,* къ позна́нію Христо́ву наставля́я* словесы́ и дѣя́ніи,* и вся́ просвѣти́лъ еси́,* исповѣ́дати и́стинное Іису́сово Божество́,* Спа́са ду́шъ на́шихъ.

Сла́ва, гла́съ 5:

Вѣ́рно торжеству́емъ пречестны́й де́нь твоея́ па́мяти, Іа́кове сла́вне, не я́ко Алфе́ева тя́ сы́на, но я́ко апо́стола Христо́ва почита́юще, и проповѣ́дника Того́ неизрече́ннаго воплоще́нія. Тѣ́мъ Влады́чню престо́лу со безпло́тными всегда́ предстоя́, и апо́столъ и му́ченикъ ли́ки, прилѣ́жно моли́ся спасти́ ны Спаси́телю и Бо́гу на́шему.

И ны́нѣ, богоро́диченъ: Хра́мъ и две́рь еси́...

Тропа́рь, гла́съ 3:

Апо́столе святы́й Іа́кове, моли́ ми́лостиваго Бо́га, да прегрѣше́ній оставле́ніе пода́стъ душа́мъ на́шимъ.

Сла́ва, и ны́нѣ, богоро́диченъ воскре́сенъ.



НА УТРЕНИ,
На Бо́гъ Госпо́дь: тропа́рь апо́стола два́жды. Сла́ва и ны́нѣ, богоро́диченъ: Тя́ Хода́тайствовавшую...

По 1-й каѳи́смѣ сѣда́ленъ, гла́съ 2:

Улови́въ язы́ки апо́столъ сла́вный и научи́въ концы́ земны́я Тебѣ́ кла́нятися, со Отце́мъ и Ду́хомъ, Христе́ Бо́же. Того́ ра́ди утверди́ Це́рковь Твою́ и вѣ́рнымъ низпосли́ благослове́ніе Твое́, еди́не Ми́лостиве и Человѣколю́бче. [Два́жды.]

Сла́ва, и ны́нѣ, богоро́диченъ:

Боже́ственнаго бы́хомъ о́бщницы естества́ Тобо́ю, Богоро́дице Приснодѣ́во: Бо́га бо на́мъ Воплоти́вшагося родила́ еси́. Тѣ́мже по до́лгу Тя́ вси́ благоче́стно велича́емъ.

По 2-й каѳи́смѣ сѣда́ленъ, гла́съ 4. Подо́бенъ: Ско́ро предвари́.

Яко лучу́, Со́лнце пра́вды испусти́ тя Христо́съ, просвѣти́ти всю́ зе́млю, апо́столе сла́вный Іа́кове, боже́ственными твои́ми моли́твами озаря́еши, и боже́ственнымъ свѣ́томъ невече́рнимъ всѣ́хъ просвѣща́еши, вѣ́рою соверша́ющихъ святу́ю па́мять твою́. [Два́жды.]

Сла́ва, и ны́нѣ, богоро́диченъ:

Наде́ждо непосты́дная надѣ́ющихся на Тя́, еди́на ро́ждшая па́че естества́ пло́тію Христа́ Бо́га на́шего. Того́ со святы́ми апо́столы моли́ пода́ти вселе́ннѣй очище́ніе прегрѣше́ній, и всѣ́мъ на́мъ пре́жде конца́ житія́ исправле́ніе.

По поліеле́и сѣда́ленъ, гла́съ 8. Подо́бенъ: Прему́дрости.

Мре́жею слове́съ боже́ственныхъ ры́бы уловля́я слове́сныя, и сія́ прине́слъ еси́ нача́тки Бо́гу на́шему, и во Христо́вы я́звы жела́я облещи́ся, подо́бникъ страсте́мъ Его́ яви́лся еси́. Тѣ́мъ соше́дшеся по до́лгу, чти́мъ тя́, апо́столе сла́вне, и согла́сно вопіе́мъ ти́: моли́ Христа́ Бо́га, грѣхо́въ оставле́ніе пода́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Мы́сленная врата́ Жи́зни, Пречи́стая Богоро́дице, притека́ющія къ Тебѣ́ вѣ́рно изба́ви отъ бѣ́дъ, да сла́вимъ пресвято́е Рождество́ Твое́, во спасе́ніе ду́шъ на́шихъ.

Степе́нна, 1-й антифо́нъ 4-го гла́са. Проки́менъ, гла́съ 4: Во всю́ зе́млю [изы́де вѣща́ніе и́хъ,* и въ концы́ вселе́нныя глаго́лы и́хъ]. Сти́хъ: Небеса́ повѣ́даютъ [сла́ву Бо́жію, творе́ніе же руку́ Его́ возвѣща́етъ тве́рдь]. Вся́кое дыха́ніе... Ева́нгеліе Іоа́нна, зача́ло 67.

По 50-мъ псалмѣ́ стихи́ра, гла́съ 4: Подо́бенъ: Жены́, услы́шите.

Яко таи́нникъ, и апо́столъ, и служи́тель изря́дный Христа́, еди́наго Влады́ки, Іа́кове богопроповѣ́дниче, Сего́ моли́ пода́ти Импе́ратору побѣди́тельная и очище́ніе, всехва́льне, грѣхо́въ, соверша́ющимъ всесвяту́ю па́мять твою́.

Кано́нъ Богоро́дицы со ирмосо́мъ на 6, и апо́стола на 8, его́же краегране́сіе: Христо́ва ученика́ сы́на Алфе́ева почита́ю. Ѳеофа́ново. Гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Ру́ку ми́ да́ждь, богови́дче и учениче́ Христо́въ, Іа́кове, честны́й тво́й пра́здникъ похвали́ти устреми́вшуся, и свѣ́тъ се́рдцу моему́ твои́ми моли́твами возсія́й.

Струя́ми Боже́ственныя му́дрости напое́нъ, рѣка́ исте́клъ еси́ отъ рая́ сла́дости и земно́е лице́ тече́ньми благоче́стія и́стинно я́вѣ напои́лъ еси́.

Свяще́ннѣйшему ли́ку учени́къ Христо́выхъ счета́лся еси́, Іа́кове, исполня́я число́ двонадеся́тныхъ; съ ни́миже, Влады́цѣ предстоя́, на́съ помина́й.

Богоро́диченъ: Тя́, Пречи́стая Дѣ́во, не́бо простры́й Госпо́дь и зе́млю основа́вый, не́бо земно́е на́мъ яви́лъ е́сть, изъ Тебе́ проше́дъ пло́тію.

Катава́сія: Отве́рзу уста́ моя́...

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Боже́ственнаго Ду́ха я́вѣ пріе́мъ зарю́, во тмѣ́ су́щимъ, я́ко у́тро, показа́лся еси́ свѣ́тло, Со́лнца мы́сленнаго возвѣща́я всѣ́мъ явле́ніе.

Нога́ твоя́ ста́ я́вственно въ пра́вости, блаже́нне, у Царя́ Пра́ваго же и Блага́го, лику́ющи боголѣ́пно и ше́ствующи стезю́ небе́сную.

Сы́на безнача́льна Бо́жія, вся́ творя́щаго Боже́ственною вла́стію, неле́стна Тайноучи́теля, зна́нія и́стины тя́ науча́юща, имѣ́лъ еси́, Іа́кове.

Богоро́диченъ: Марíе, всѣ́хъ наде́ждо на Тя́ надѣ́ющихся, ро́ждши Сло́во, воплоще́нное на́съ ра́ди, разли́чныхъ мя́ напа́стей и бѣ́дъ, Пречи́стая, изба́ви.

Сѣда́ленъ, гла́съ 8. Подо́бенъ: Прему́дрости.

Му́дрость и́стинно учи́теля имѣ́въ, тя́ науча́ющую су́щимъ па́че ума́, му́дрость объюро́дилъ еси́ е́ллинскую, богодухнове́нне; и язы́комъ бы́лъ еси́ свѣти́льникъ боже́ственный, благоче́стія словесы́ направля́я безу́мныя. Тѣ́мъ изба́вленніи тобо́ю отъ пре́лести, досто́йно пое́мъ тя́ и вѣ́рно ублажа́емъ, богоглаго́ливе Іа́кове: моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Со́лнца о́блаче разу́мнаго, Боже́ственнаго Свѣ́та Свѣти́льниче златокова́нный, Нескве́рная, Небла́зная, Всенепоро́чная Влады́чице, омраче́нную ду́шу мою́ ослѣпле́ніемъ страсте́й, безстра́стія заре́ю просвѣти́, молю́ся; и оскверне́нное мое́ се́рдце омы́й пото́ки умиле́нія, покая́нія же слеза́ми, и отъ тимѣ́нія мя́ очи́сти дѣ́лъ мои́хъ, да любо́вію зову́ Ти: Богоро́дице Приснодѣ́во, моли́ Христа́ Бо́га прегрѣше́ній оставле́ніе пода́ти ми́, Тебе́ бо имѣ́ю наде́жду, ра́бъ Тво́й.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Са́мъ тя́ Госпо́дь, еди́нъ Святы́й, честно́му ли́ку ученико́въ, блаже́нне, сочета́, честно́е и свѣ́тлое житія́ твоего́ прови́дѣвый.

Чуде́съ испо́лненъ Боже́ственнаго Ду́ха бы́въ, богопроповѣ́дниче, чудотвори́ши бо, неду́ги отгоня́я, и лука́вства духо́въ человѣ́ки свободи́лъ еси́.

Боже́ственное сія́ніе, наше́дшее се́рдцу твоему́, блаже́нне, богосвѣ́тло сіе́ содѣ́ла и прія́тно па́че ума́ дарова́ній сотвори́.

Богоро́диченъ: Боже́ственнымъ Твои́мъ Рождество́мъ, Дѣ́во Всечи́стая, а́нгельстіи чи́ни и земны́хъ собо́ри совокупи́шася; миронача́льника бо Христа́ и Спа́са всѣ́хъ родила́ еси́.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Со́лнцу, блаже́нне, у́мному собесѣ́дникъ бы́въ, лучи́ ты́ отту́ду пріе́мля, е́же по существу́ пе́рвый То́й е́сть, вторы́й по благода́ти бы́лъ еси́, сла́вне.

Умъ чистѣ́йшій имѣ́въ, свѣ́тло же и чи́сто се́рдце ты́ стяжа́въ, вопло́щшагося Бо́га ви́дѣлъ еси́, непостижи́маго ра́зумомъ.

Уступа́етъ ти́, учениче́, вся́ко проро́чество, и вся́ко законоположе́ніе, пребога́те; тѣ́ми бо дре́вле Проповѣ́даемаго самови́дно сподо́бился еси́, блаже́нне, ви́дѣти.

Богоро́диченъ: Се́, Дѣ́во, проро́чески имѣ́ла еси́ во чре́вѣ Твое́мъ, Су́щаго надъ всѣ́ми Влады́ку и Го́спода, и неизрече́нно Сего́, Чи́стая, родила́ еси́, Дѣ́во, по рождествѣ́ нетлѣ́нна пребы́вши.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Но́ги твоя́ кра́сныя, ми́ръ неле́стно, я́ко благовѣству́юще, ми́ръ су́що преесте́ственный, и у́мъ преиму́щій, учениче́ Христо́въ всече́стне.

Разумѣ́ти та́инство и проповѣ́дати стра́шное Бо́жія воплоще́нія сподо́бился еси́, Іа́кове, перводѣ́льныя лучи́ пріе́мый отъ Самаго́ Высоча́йшаго, приснопа́мятне.

Неизрече́ннаго свѣ́та сія́я свѣ́тлостьми досто́йно, верхо́вный Христо́въ апо́столе, прилѣ́жно моли́ся о творя́щихъ па́мять твою́, сла́вне, пречестну́ю.

Богоро́диченъ: Всѣ́ми влады́чествующа тва́рьми я́ко Бо́га Блага́го ро́ждши, согрѣше́ній мои́хъ, Пречи́стая, стру́пы до конца́ потреби́, благоутро́бна содѣва́ющи Ро́ждшагося изъ Тебе́.

Конда́къ, гла́съ 2. Подо́бенъ: Тве́рдыя.

Тве́рдо му́дрости догма́ты въ ду́ши благочести́выхъ вложи́вшаго похвала́ми да ублажи́мъ, я́ко боговѣща́теля вси́ Іа́кова: Престо́лу бо сла́вы Влады́чню предстоя́ и со всѣ́ми а́нгелы ра́дуется, моля́ непреста́нно о всѣ́хъ на́съ.

Икосъ:

Яко учени́къ Христо́въ и дру́гъ невеще́ственнымъ лико́мъ спребыва́яй при́сно, и свѣ́томъ озаря́емь невече́рняго свѣтодая́нія, ума́ моего́ тму́ разрѣши́, всеблаже́нне, я́ко да твою́ свѣтоно́сную па́мять воспою́, ю́же пое́тъ вся́ тва́рь, благоче́стно пра́зднующи дне́сь; всѣ́хъ бо вѣ́рныхъ наста́вникъ и свѣти́льникъ бы́лъ еси́, Іа́кове, моля́ непреста́нно о всѣ́хъ на́съ.

Пѣ́снь 7.

Ирмо́съ: Отроцы въ Вавило́нѣ пе́щнаго пла́мене не убоя́шася, но, посредѣ́ пла́мене вве́ржени, ороша́еми, поя́ху: благослове́нъ еси́, Го́споди Бо́же оте́цъ на́шихъ.

Свѣ́тлостьми и сія́ньми Ду́ха просвѣще́ннаго, язы́къ мно́жество сѣ́мя боже́ственное тя́ имену́етъ, зову́щи: благослове́нъ еси́, Го́споди, Бо́же оте́цъ на́шихъ.

Му́дростію укра́шенъ богодарова́нною ти́ разори́лъ еси́ мірску́ю му́дрость, богому́дренно зовы́й, апо́столе: благослове́ъ еси́, Го́споди, Бо́же оте́цъ на́шихъ.

Во всю́ зе́млю изы́де вѣща́ніе твое́, апо́столе Іа́кове, е́же возвѣсти́лъ еси́, я́ко гро́мъ, всѣ́мъ страна́мъ, прему́дре, Воплоще́нное Сло́во досто́йно проповѣ́дая.

Богоро́диченъ: Святы́хъ святѣ́йши, Дѣ́во Ма́ти, Ты́ была́ еси́, я́ко ро́ждши Бо́га несказа́нно, Его́же воспѣва́юще, непреста́нно зове́мъ: благослове́нъ еси́, Го́споди, Бо́же оте́цъ на́шихъ.

Пѣ́снь 8.

Ирмо́съ: За зако́ны оте́ческія блаже́нніи въ Вавило́нѣ ю́ноши, предбѣ́дствующе, царю́ющаго оплева́ша повелѣ́ніе безу́мное, и совоку́плени, и́мже, не свари́шася огне́мъ, Держа́вствующему досто́йную воспѣва́ху пѣ́снь: Го́спода по́йте, дѣла́, и превозноси́те во вся́ вѣ́ки.

Священноучени́къ, небе́снымъ науче́нъ и́стинно, блаже́нне, та́инствомъ, проше́лъ еси́ всю́ вселе́нную, апо́столе, проповѣ́дая велегла́сно сло́во вѣ́ры Христо́вы и науча́я неизрече́нною благода́тію: Го́спода воспѣва́йте дѣла́ и превозноси́те во вся́ вѣ́ки.

Бога́тъ бы́лъ еси́ и блаже́нъ, сподо́бленъ вся́каго блаже́нства, я́ко собесѣ́дникъ и сообита́тель бы́въ Влады́цѣ, и коне́чное и́стинно жре́біемъ до́брѣ обога́щся, и Сло́ву, свеселя́ся, воспѣва́ше: Го́спода по́йте дѣла́ и превозноси́те во вся́ вѣ́ки.

За мíръ моли́твенникъ изя́щнѣйшій ко Спа́су ста́ни, блаже́нне апо́столе, прося́ свы́ше бога́тнаго ми́ра Це́рквамъ, и хва́лящимъ тя́ вѣ́рно прегрѣше́ній оставле́ніе, и душа́мъ спасе́ніе, вопію́щимъ: Го́спода по́йте дѣла́ и превозноси́те во вся́ вѣ́ки.

Богоро́диченъ: Ты́ спасе́нія всѣ́мъ Хода́таица, Богома́ти, яви́лася еси́, еди́на Всепѣ́тая, Спа́са ро́ждши Бо́жія, Бо́га Сло́ва, изба́вльшаго на́съ дре́внія кля́твы и благослове́ніе дарова́вшего, вѣ́рою зову́щимъ: Го́спода по́йте дѣла́ и превозноси́те во вся́ вѣ́ки.

Пѣ́снь 9.

Ирмо́съ: Не рыда́й Мене́, Ма́ти, зря́щи во гро́бѣ, Его́же во чре́вѣ безъ сѣ́мене зачала́ еси́ Сы́на: воста́ну бо, и просла́влюся, и вознесу́ со сла́вою, непреста́нно я́ко Бо́гъ, вѣ́рою и любо́вію Тя́ велича́ющія.

Яви́лся еси́ мíру, я́коже мо́лнія претека́я, во тмѣ́ дре́вле и сѣ́ни невѣ́дѣнія сѣдя́щія, влекíй ко свѣ́ту незаходи́мому Вопло́щшагося Единоро́днаго Сы́на, Его́же самови́децъ и дѣ́йственный слуга́ бы́лъ еси́, блаже́нне; Его́же велича́емъ.

Бу́рное, блаже́нне, отъ небесе́ носи́мое дыха́ніе пріе́мъ и язы́комъ огнедохнове́ннымъ обога́щся, пожига́еши, я́ко те́рніе, безбо́жную мірску́ю му́дрость, свѣща́тельными заря́ми проповѣ́данія Христо́ва сія́я, и мра́къ разоря́я, богоблаже́нне.

Пріими́, богогла́се апо́столе Іа́кове, моле́бную пѣ́снь, ю́же ти́ прино́симъ, твою́ пра́зднующе пречестну́ю и пресвѣ́тлую па́мять; изба́ви отъ грѣхо́въ рабы́ твоя́, верхо́вный Христо́въ апо́столе, прилѣ́жно моля́ся, да досто́йно тя́ велича́емъ.

Богоро́диченъ: Яко неискусому́жно во чре́вѣ Твое́мъ пріе́мши Сло́во, пребыла́ еси́ нетлѣ́нна, Пречи́стая Дѣ́во, и ро́ждши на́мъ Емману́ила, су́щаго вку́пѣ Бо́га и Человѣ́ка. Сего́ сугу́ба естество́мъ вѣ́дуще, Тя́ велича́емъ.

Свѣти́ленъ. Подо́бенъ: Ду́хомъ во святи́лищи.

Не я́ко сы́на Алфе́ева, но я́ко ученика́ Сло́ва, разумѣ́емъ тя́, Іа́кове, апо́столовъ сла́во: и́бо Боже́ственное сія́ніе я́вственно прія́лъ еси́, и благода́ть чуде́съ, отгоня́ти неду́ги отъ человѣ́къ, вѣ́рою соверша́ющихъ всесвяще́нную па́мять твою́. [Два́жды.]

Сла́ва, и ны́нѣ, богоро́диченъ:

Яко иму́щи благоутро́біе и ми́лость вели́кую, Богоро́дице Дѣ́во, при́зри, Пренепоро́чная, на мое́ смире́ніе и стра́стную бу́рю и печа́лей нахожде́нія разжени́, Чи́стая, и огня́ гее́нскаго изба́ви мя́ Твои́ми моли́твами.

На хвали́техъ стихи́ры на 4, гла́съ 4. Подо́бенъ: Яко до́бля.

Тро́стію благода́ти* отъ глубины́ су́етства* человѣ́ки извле́клъ еси́, досточу́дне,* Учи́теля ма́ніемъ* повину́вся, Іа́кове,* просвѣ́щшаго по всему́ твое́ разумѣ́ніе,* и апо́стола, и че́стна богоглаго́льника,* тя́, всеблаже́нне, показа́вша* Того́ непостижи́маго Божества́. [Два́жды.]

Ду́ха сія́ніе на тя́ сни́де* во о́гненнѣ ви́дѣ,* и тя́, блаже́нне, Боже́ственное прія́телище содѣ́ла,* ско́ро отгоня́ща безбо́жія мглу́* и мíръ просвѣща́юща* сія́ніемъ всему́дрыхъ твои́хъ слове́съ,* тайноглаго́льниче,* апо́столовъ украше́ніе,* Христо́въ самови́дче, блаже́нне.

Мо́лніями проповѣ́данія* во тмѣ́ сѣдя́щія* невѣ́дѣнія, сла́вне, просвѣти́въ,* показа́лъ еси́ сы́ны* Влады́ки и Бо́га вѣ́ры ра́ди.* Его́же страсте́мъ ревнова́лъ еси́ и сме́рти* и сла́вы бы́лъ еси́ наслѣ́дникъ,* я́ко му́дръ и богоглаго́ливъ,* я́ко учени́къ Истины.

Сла́ва, гла́съ 2:

Оста́вивъ земна́я, послѣ́довалъ еси́ Христу́, и зна́менався дохнове́ніемъ Свята́го Ду́ха, по́сланъ бы́въ отъ Него́ въ язы́ки поги́бшія обраща́ти человѣ́ки во свѣ́тъ богозна́нія, апо́столе Іа́кове, и, сконча́въ по́двиги боже́ственныя твоея́ стра́сти и му́къ разли́чныхъ, ду́шу твою́ Христу́ пре́далъ еси́; Того́ моли́, всеблаже́нне, дарова́ти на́мъ ве́лію ми́лость.

И ны́нѣ: Все́ упова́ніе мое́...
Славосло́віе вели́кое. [Ектеніи́.] И отпу́стъ.



НА ЛИТУРГІИ,

Блаже́нна апо́стола, пѣ́снь 3-я и 6-я, [на 8]. Проки́менъ, гла́съ 8: Во всю́ зе́млю изы́де вѣща́ніе и́хъ, и въ концы́ вселе́нныя глаго́лы и́хъ. Сти́хъ: Небеса́ повѣ́даютъ сла́ву Бо́жію, [творе́ніе же руку́ Его́ возвѣща́етъ тве́рдь]. Апо́столъ къ Кори́нѳяномъ, зача́ло 131. Аллилу́ія, гласъ 1: Исповѣ́дятъ небеса́ чудеса́ Твоя́, Го́споди, [и́бо и́стину Твою́ въ це́ркви святы́хъ. Сти́хъ: Бо́гъ прославля́емь въ совѣ́тѣ святы́хъ]. Ева́нгеліе Луки́, зача́ло 51. Прича́стенъ: Во всю́ зе́млю изы́де вѣща́ніе и́хъ, [и въ концы́ вселе́нныя глаго́лы и́хъ].

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 82 – 83, 85 об. – 90.

/ Къ оглавленію раздѣла /


Наверхъ / Къ титульной страницѣ

0