Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 23 октября 2017 г. Сейчасъ на порталѣ посѣтителей - 24.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія во 8-й де́нь.
Па́мять свята́го преподобному́ченика Игна́тія Старозаго́рскаго.

НА МАЛѢЙ ВЕЧЕРНИ,
На Го́споди воззва́хъ.., поста́вимъ стихо́въ 4 и пое́мъ стихи́ры, гла́съ 1. Подо́бенъ: Небе́сныхъ чино́въ.

Стра́шному повѣ́шенію, му́чениче Игна́тіе, неисповѣ́дающіи Христа́ Бога́ тя́ преда́ша, его́же ра́ди отъ земли́ небе́съ дости́глъ еси́, идѣ́же веселя́ся, не преста́й о на́съ моли́тися ко Го́споду.

Свяще́ннѣйшій Аѳо́нъ тя́ прозябе́, Константино́поль же вели́кій вои́стину обра́ тя́, я́ко гро́здъ мы́сленный и я́ко цвѣ́тъ всеблагоуха́нный, и Христу́ ны́нѣ принесе́, я́коже кади́ло свяще́ннѣйшее.

Сла́ва, гла́съ 4:

Воспле́щимъ дне́сь въ па́мять Игна́тія новому́ченика, подража́тель бо се́й бы́въ му́жествомъ священному́ченику Игна́тію, сонаслѣ́дникъ и небе́снаго Ца́рствія о́ному бы́сть, съ ни́мже и человѣколю́бца Христа́ Бо́га престо́лу со дерзнове́ніемъ предстоя́, дарова́нія богатотво́рная Боже́ственныхъ благода́тей на́мъ, восхваля́ющимъ его́, подае́тъ и мо́лится непреста́нно о душа́хъ на́шихъ.

И ны́нѣ, богоро́диченъ:

Отъ всѣ́хъ бѣ́дъ рабы́ Твоя́ сохраня́й, Благослове́нная Богоро́дице, да Тя́ сла́вимъ, Наде́жду ду́шъ на́шихъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Пріиди́, все́ мно́жество христоимени́тыхъ, пѣ́сньми почти́мъ досто́йно му́ченика но́ваго, его́же Христо́съ просла́ви.

Сти́хъ: Пра́ведникъ, я́ко фи́никсъ процвѣте́тъ, и я́ко ке́дръ, и́же въ Лива́нѣ, умно́жится.

Стра́хъ нечести́вымъ бы́лъ еси́, Игна́тіе, сконча́вся повѣ́шеніемъ за Христа́ же но́вый му́ченикъ, Ему́же о всѣ́хъ моли́ся.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Сла́ва подви́жниковъ, украше́ніе му́чениковъ, Игна́тіе, показа́лся еси́, вѣ́рныхъ боже́ственная похвала́, на́мъ же предста́тель неусы́пный.

Сла́ва, тро́иченъ, гла́съ и подо́бенъ то́йже:

Свѣ́те Пресвѣ́тлый, Отче, Сы́не и Ду́ше, моли́твами Игна́тія, Твоего́ вѣ́рнаго раба́, спаси́ ста́до Твое́.

И ны́нѣ, богоро́диченъ, гла́съ и подо́бенъ то́йже:

Ма́ти Іису́сова, со Игна́тіемъ, но́вымъ страда́льцемъ, на́мъ осужде́ннымъ, Твоего́ Зижди́теля уми́лостивите.

Тропа́рь, гла́съ 4:

Трегу́бымъ вѣнце́мъ я́вѣ увѣнча́ тя́ Христо́съ, по́стничества же, и му́ченичества, и боже́ственнаго дѣ́вства, е́же соблю́лъ еси́ до конца́, свя́те Игна́тіе сла́вне. Тѣ́мже и ра́ка моще́й твои́хъ прогоня́етъ страсте́й и болѣ́зней злы́хъ вся́ я́звы.

Сла́ва, и ны́нѣ, богоро́диченъ:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.


НА ВЕЛИЦѢЙ ВЕЧЕРНИ,
Пе́рвыя каѳи́смы, 1-й антифо́нъ: Блаже́нъ му́жъ... На Го́споди воззва́хъ.., поста́вимъ стихо́въ 6 и пое́мъ стихи́ры, повторя́юще я́, гла́съ 4. Подо́бенъ: Яко до́бля въ му́ченицѣхъ.

Христу́, по подража́нію теплѣ́йшему, на дре́вѣ убіе́нъ бы́лъ еси́, Его́ ра́ди, я́ко осужде́нникъ. Но вмѣ́сто сего́ взя́лся еси́ свѣ́телъ въ ра́й и дре́ва живо́тнаго насыща́ешися, о, Игна́тіе. Гро́бъ же тво́й не́мощи та́мо исцѣля́етъ и вся́кія неду́ги, тя́ чту́щихъ, прогоня́етъ. [Два́жды.]

Вѣ́чно свѣ́тъ въ тебѣ́ сія́етъ, Игна́тіе, не я́коже возду́шный, сокраща́емь обраще́ніемъ естества́, оскудѣва́ющій мно́гажды и омрача́ющій я́же на земли́. Но то́й, я́ко невеще́ственъ и боже́ственъ, безче́тно и безконе́чно сокраще́ніе же и вся́кую темноту́ и́стинами превосхо́дитъ. [Два́жды.]

Яко кра́сный и предо́брый хра́мъ се́й явля́ется, его́же вѣ́рою воздвиго́ша, му́чениче сла́вне, бра́тія твоя́ въ Ду́сѣ, во сла́ву и похвалу́ вся́ческихъ Творца́, вѣнца́ми сла́вы тя́ Вѣнча́вшаго, и́же ле́сть, му́жески, низложи́лъ еси́ ага́рянскую и главу́ веліа́ра сокруши́лъ еси́. [Два́жды.]

Сла́ва, гла́съ 6:

Дне́сь возсія́, я́коже звѣзда́ новоявле́нная на тве́рди церко́внѣй, преподобному́ченика Игна́тія честно́е торжество́, празднолю́бцевъ составле́нія осіява́ющее. Пріиди́те у́бо, духо́внѣ къ нему́ рце́мъ, глаго́люще: ра́дуйся, и́же въ послѣ́дняя времена́ за Христа́ му́ченикъ еси́ твердѣ́йшій; ра́дуйся, благочести́выя вѣ́ры возвыше́ніе и пре́лести ага́рянскія низпаде́ніе; ра́дуйся, правосла́вныхъ всѣ́хъ весе́ліе и на́ше изря́дное похвале́ніе. И ны́нѣ, на небесѣ́хъ престо́лу Влады́ки Христа́ предстоя́, моли́ся о душа́хъ на́шихъ.

И ны́нѣ, богоро́диченъ пе́рвый гла́са:

Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.

Та́же вече́рній вхо́дъ. Свѣ́тѣ Ти́хій... Проки́менъ дне́ и чте́нія три́, преподобно́мученическая.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 2:

Свѣ́тлаго избра́нника Христо́ва и новому́ченика Игна́тія ублажи́мъ, восхваля́юще его́ сокруше́нное покая́ніе, къ му́ченичеству вожделѣ́ніе и усе́рдіе, дерзнове́ніе исповѣ́данія и смѣ́лость, въ страда́ніихъ до́блесть и неустраши́мость, и чрезъ повѣ́шеніе блаже́нный коне́цъ. Тѣ́мже и му́ченичества пра́ведно воспрія́тъ вѣне́цъ отъ Христа́ Бо́га и Спа́са ду́шъ на́шихъ.

Гла́съ 4:

Воспле́щимъ дне́сь въ па́мять Игна́тія новому́ченика, подража́тель бо се́й бы́въ му́жествомъ священному́ченику Игна́тію, сонаслѣ́дникъ и небе́снаго Ца́рствія о́ному бы́сть, съ ни́мже и человѣколю́бца Христа́ Бо́га престо́лу со дерзнове́ніемъ предстоя́, дарова́нія богатотво́рная Боже́ственныхъ благода́тей на́мъ, восхваля́ющимъ его́, подае́тъ и мо́лится непреста́нно о душа́хъ на́шихъ.

Гла́съ 6:

Дне́сь духо́внѣ да возвесели́мся въ па́мять Игна́тія новому́ченика. Се́й бо въ Христо́ву вѣ́ру, я́ко во всеору́жную броню́ одѣ́янъ, къ бра́ни изы́де на ага́рянское нече́стіе и сіе́ му́жественнѣ посрами́въ, льва́ и змія́, враго́въ ви́димыхъ и неви́димыхъ си́лу попра́, благоче́стіе же со дерзнове́ніемъ проповѣ́давъ, повѣ́шеніемъ претерпѣ́ сме́рть, си́мъ по́льзовався я́коже лѣ́ствицею, ко Христу́ Бо́гу побѣдоно́сецъ взы́де, Ему́же и мо́лится непреста́нно спасти́ся душа́мъ на́шимъ.

Сла́ва, гла́съ 5:

До́блій му́чениче Христо́въ Игна́тіе, досто́йно восхваля́емъ па́мять твою́. Тя́ бо ни принужде́нія мучи́телей, ни ле́сти лука́выя, ни ра́нъ наноше́нія, ниже́ повѣ́шеніемъ сме́рть, ко Христу́ любве́ разлучи́ти возмо́же. И ны́нѣ, на небесѣ́хъ съ му́ченики веселя́ся, не преста́й моля́ся о душа́хъ на́шихъ.

И ны́нѣ, богоро́диченъ:

Блажи́мъ Тя́, Богоро́дице Дѣ́во, и сла́вимъ Тя́, вѣ́рніи, по до́лгу, гра́дъ непоколеби́мый, стѣ́ну необори́мую, тве́рдую предста́тельницу и прибѣ́жище ду́шъ на́шихъ.

На сихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, и́же Це́рковь Христо́ву облиста́вый честны́мъ му́ченичествомъ твои́мъ, ю́ бо въ е́реси укоря́ющимъ го́рцѣ, я́ко по раздѣле́ніи никто́же сы́нъ ея́ свя́тъ бы́сть, ты́, богопрія́тне, въ лице́ безбо́жныхъ Христа́ исповѣ́давъ Богочеловѣ́ка, въ послѣ́днихъ ны́нѣ яви́лся еси́ святы́й и́стинѣйшій, преподобному́чениче Игна́тіе, и свидѣ́тель свѣтлѣ́йшій домострои́тельства воплоще́нія Христа́, Его́же моли́ душа́мъ на́шимъ да́тися ве́ліей ми́лости.

Сти́хъ: Пра́ведникъ, я́ко фи́никсъ процвѣте́тъ, и я́ко ке́дръ, и́же въ Лива́нѣ, умно́жится.

Ра́дуйся, до́блій му́чениче Христо́въ, благоче́стія побо́рниче непобѣди́мый, пре́лести и нече́стію ага́рянъ мо́лніе, вѣ́рнымъ всѣ́мъ побѣжде́ніе и невѣ́рнымъ пораже́ніе, а́нгеловъ наслажде́ніе и де́моновъ вѣ́чное поноше́ніе, разорѣ́ніе сатаны́ и па́губа, и́же позо́ръ бы́вый сла́дкій же и любе́зный человѣ́комъ вку́пѣ и а́нгеломъ, до́блимъ по́двигомъ твои́мъ, Христа́ умоли́ душа́мъ на́шимъ да́тися ве́ліей ми́лости.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Ра́дуйся, до́блій му́чениче Христо́въ, горы́ Аѳо́нскія о́трасле богонасажде́нная, му́чениковъ и преподо́бныхъ боже́ственная сла́во я́вѣ, и правосла́вныхъ украше́ніе, душе́ преподобнострада́льческая до́бляя и прекра́сная, я́же въ страда́ніихъ необори́ма пребы́вшая и непрекло́нна, и пре́лестьми неодоли́ма, ка́меню, врѣ́занный Христо́вѣ діади́мѣ, вѣ́нче сла́вы, всѣ́мъ соверша́ющимъ па́мять твою́, са́мъ умоли́ Христа́ да́тися на́мъ ве́ліей ми́лости.

Сла́ва, гла́съ 8:

Пріиди́те, вси́ вѣ́рніи, во святѣ́мъ хра́мѣ, соше́дшеся, новому́ченика Игна́тія, боже́ственный гро́бъ его́ съ благоговѣ́ніемъ и любо́вію обы́мемъ, я́ко да отту́ду истека́ющую благода́ть и освяще́ніе почерпе́мъ. Му́чениковъ бо не то́кмо мо́щи, но и са́міи гро́би вся́кія испо́лнени су́ть святы́ни, и къ нему́ отъ души́ возопіи́мъ: свя́те Игна́тіе, похвало́ на́ша, предста́ни помо́щникъ на́мъ, и моли́ся непреста́нно со всѣ́ми святы́ми спасти́ся душа́мъ на́шимъ.

И ны́нѣ, богоро́диченъ:

Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.

На благослове́ніи хлѣ́бовъ: Тропа́рь свята́го, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 4. Подо́бенъ: Ско́ро предвари́.

Вѣ́дый тя́, Игна́тіе, разжже́нна я́вѣ любле́ніемъ Зижди́теля твоего́, и Его́ ра́ди муче́ніемъ вся́ческимъ тѣ́ло твое́ все́ отда́вша, преподобнострада́льче боже́ственне, вѣ́рою тя́ ублажа́ю, и предста́теля ми́ боже́ственна тя́ прошу́ бы́ти святѣ́йша. [Два́жды.]

Сла́ва, и ны́нѣ, богоро́диченъ:

Еди́на заче́ншая Творца́ всего́, еди́на украси́вшая человѣ́чество Рождество́мъ Твои́мъ, Непоро́чная, изба́ви мя́ отъ сѣ́тей лука́ваго веліа́ра, и поста́ви мя́ на ка́мени Христо́выхъ хотѣ́ній, Того́ моля́щи прилѣ́жно, Его́же воплоти́ла еси́.

По 2-мъ стихосло́віи сѣда́ленъ, гла́съ 5. Подо́бенъ: Собезнача́льное Сло́во.

Му́ченичества я́звами укра́шенъ, и спле́тъ отъ ни́хъ ве́рвь, богому́дре, е́ю возне́слся еси́ къ небе́снымъ, и оста́вилъ еси́ на́мъ я́ко сокро́вище многоцѣ́нное, Игна́тіе, ра́ку твою́, здра́віе да́рующую, отраже́ніе же вся́ческихъ зо́лъ. [Два́жды.]

Сла́ва, и ны́нѣ, бого́родиченъ:

Гавріи́лъ Тебѣ́, е́же ра́дуйся, небе́сное на земли́ пресла́вно принесе́, а́нгеловъ бо Творца́ въ Тебѣ́ воплоща́ема зря́, пѣ́ніе ра́дости воспѣва́емъ Ти́, Честна́я, и́мже человѣ́ки уча́, я́ко Ты́ Еди́на ра́дости вина́ всѣ́мъ человѣ́комъ яви́лася еси́.

[Велича́ніе:

Ублажа́емъ тя́, святы́й преподобному́чениче Игна́тіе, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Услы́шите сія́, вси́ язы́цы...]

По поліеле́и сѣда́ленъ, гла́съ 4. Подо́бенъ: Удиви́ся Іо́сифъ.

Безмо́лвія люби́теля и цѣлому́дрія блюсти́теля, храни́лище му́жества извѣ́стное, преподо́бныхъ добро́ту и му́чениковъ украше́ніе тя́ вѣ́дуще, любо́вію души́ тя́ восхваля́емъ: цвѣ́тъ благи́хъ бо пріобрѣто́хомъ, соше́дшеся дне́сь вѣ́рою, твои́хъ моще́й ра́ку, приходя́щимъ бо благода́тей то́ки источа́етъ незави́стно. [Два́жды.]

Сла́ва, и ны́нѣ, богоро́диченъ:

Гавріи́лъ съ небесе́, е́же ра́дуйся, вопіе́тъ Честнѣ́й, я́ко пріи́метъ во чре́вѣ Превѣ́чнаго Бо́га, тѣ́мже Маріа́мъ провѣща́: безму́жна е́смь, и ка́ко рожду́ Сы́на? безсѣ́менное рождество́ кто́ ви́дѣ? И, сказу́я, рече́ а́нгелъ Богоро́дицѣ Дѣ́вѣ: на́йдетъ на Тя́ Святы́й Ду́хъ и Си́ла Вы́шняго осѣни́тъ Тя́.

Та́же степе́нна, 1-й антифо́нъ 4-го гла́са. Проки́менъ, гла́съ 4 Пра́ведникъ, я́ко фи́никсъ, процвѣте́тъ,* и я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни во дво́рѣхъ до́му Бо́га на́шего процвѣту́тъ. Вся́кое дыха́ніе... Ева́нгеліе отъ Матѳе́я, зача́ло 36: Се Азъ посыла́ю вы́... Претерпѣ́вый же до конца́, то́й спасе́тся.

По 50-мъ псалмѣ́ стихи́ра, гла́съ 2:

Свѣ́тлый избра́нникъ Христо́въ и новому́ченикъ Игна́тій, и́же къ му́ченичеству жа́дный и усе́рдный, дерзнове́нный исповѣ́дникъ и хра́брый, и въ страда́ніихъ до́блій и неустраши́мый, и́же повѣ́шеніемъ за Христа́ блаже́нный коне́цъ пріе́мый и му́ченичества нетлѣ́нный вѣне́цъ отъ Него́ получи́вый, всегда́ мо́лится за на́съ ко Го́споду.

Кано́нъ [Пресвяты́я Богоро́дицы, со ирмосо́мъ на 6. И] свята́го преподобному́ченика [на 8], гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Ума́ моего́ помраче́ніе просвѣти́ боже́ственными твоими́ мольба́ми и сло́во ми́ да́руй, му́чениче Игна́тіе, я́ко да воспою́ твоя́ по́двиги до́блія и е́же превы́шше вѣроя́тія му́жество.

Трегу́быя же и велича́йшія подъя́лъ еси́, сла́вне, побѣ́ды на злодѣ́я дѣ́вствомъ и по́стничествомъ твои́мъ, страда́ніемъ же пресла́внымъ того́ обезси́лилъ еси́, му́чениче Игна́тіе.

Даде́ся, Игна́тіе, да́ръ вои́стинну треблаже́нный на́мъ, лю́бящимъ тя́: твое́ тѣ́ло, страда́льче, и возвесели́лъ еси́ на́ша мы́сли зна́меньми побѣ́ды твоея́ и добро́тами.

Богоро́диченъ: Разумѣ́ти не мо́жетъ человѣ́ческій у́мъ, Всенепоро́чная, ве́ліе та́инство Боже́ственнаго Рождества́ Твоего́: всю́ бо Нося́щаго тва́рь рука́ми носи́ла еси́. О, стра́шнаго слы́шанія!

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Досто́йно на земли́ и на небеси́ тя́, му́чениче, просла́ви Христо́съ, я́ко Того́ просла́вльша му́ченичествомъ твои́мъ: прославля́ющихъ бо Его́ воспрославля́ти обѣща́ся.

Се́ благоуха́ніе сладча́йшее, се́ благоуха́ніе та́инственное, се́ воня́ небе́сная отъ гро́ба ны́нѣ исхо́дитъ Игна́тія дне́сь. Пріиди́те, и́мъ его́ наслади́мся.

Де́нь сугу́быя ра́дости наста́ на́мъ, твои́мъ друго́мъ, страда́льче, тя́ нося́ основа́ніе и пучи́ну всечестну́ю. Сего́ ра́ди и мы́ ра́дуемся сугу́бо о не́мъ, Игна́тіе.

Богоро́диченъ: Безсѣ́менно зачала́ еси́, Дѣ́во, нетру́дно носи́ла еси́, Чи́стая, нетлѣ́нно же родила́ еси́ Бо́га Пресу́щественнаго. О, чуде́съ пресла́вныхъ! Кíй у́мъ человѣ́ческій не удиви́тся?

Сѣда́ленъ, гла́съ 3. Подо́бенъ: Красотѣ́ дѣ́вства Твоего́.

Крѣ́пость необори́мую Христо́ву имѣ́я, всехва́льне, посрами́лъ еси́ враго́въ безу́міе, ага́рянъ злочести́выхъ, Игна́тіе великоду́шне: по́прище соверши́лъ еси́ му́ченичества пресла́вное и Христа́ проповѣ́далъ еси́ Живода́вца всесоверше́нна. Сего́ ра́ди и неувяда́емыми вѣнцы́, ра́дуяся, отъ Него́ одѣ́ялся еси́. [Два́жды.]

Сла́ва, и ны́нѣ, богоро́диченъ, гла́съ и подо́бенъ то́йже:

Непроходи́мая две́ре и непристу́пная, е́юже про́йде Христо́съ и показа́ присту́пно человѣ́комъ не́бо, непристу́пную престу́пникомъ две́рь ми́ отве́рзи покая́нія, возводя́щую ко гра́ду небе́сному, и къ Боже́ственнымъ вводя́щую селе́ніемъ возлю́бленнымъ, идѣ́же ра́дость и весе́ліе.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Ми́лостива содѣ́лай къ на́мъ Го́спода твои́ми моли́твами, свя́те, я́ко да изба́вльшеся вѣ́чнующаго огня́, сла́вы сподо́бимся, и́же тя́ неизрече́нно возлюби́вшіи.

Крѣ́пость и противле́ніе твоея́ души́ нечести́віи не устраши́ша, и со у́жасомъ возопи́ша про́чее: О, кíя до́блести, ея́же ни у кого́же ви́дѣхомъ!

Якоже бога́тство непристу́пное твое́ тѣ́ло, му́чениче Христо́въ свяще́ннѣйше, тя́ лю́бящіи прія́хомъ я́вѣ, е́же и ны́нѣ содержа́ще, ра́дости неизрече́нныя исполня́емся.

Богоро́диченъ: Ка́ко Твою́ воспою́ добро́ту, Чи́стая, или́ ка́ко Тя́ просла́влю, Богоневѣ́сто, словесы́, су́щую Боже́ственныя сла́вы Сокро́вище? Тѣ́мже молча́ніемъ молю́ Тя́: Влады́чице моя́ Непоро́чная, спаси́ мя.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Ни цвѣ́тъ ю́ности, ни добро́та тѣлесе́, ниже́ даро́въ обѣща́нія отъ невѣ́рныхъ предлага́емая тебѣ́, возмого́ша души́ твоея́ тве́рдость поколеба́ти, непобѣди́мый му́чениче Христо́въ Игна́тіе.

Льва́ и змíя попра́лъ еси́, Игна́тіе, до́блимъ твои́мъ страда́ніемъ, я́коже ре́клъ еси́ пре́жде страда́нія, а́ки проро́чествуя вои́стину, си́лою опоя́санъ Христа́ непобѣди́мою.

Вы́ше ви́димыхъ у́мъ возне́съ, Игна́тіе, о всѣ́хъ вознеради́лъ еси́ здѣ́ су́щихъ. Тѣ́мже вопія́лъ еси́ му́чащимъ тя́ и да́ры обѣщава́ющимъ: вся́ сія́ суета́ е́сть, о беззако́нницы!

Богоро́диченъ: Сугу́бо показа́лася еси́ Ты́, Богоро́дице Пречи́стая: е́же по Ѵпоста́си роди́ти Бо́га Сло́ва, и е́же обожи́ти человѣ́ческое естество́, отъ Тебе́ воспрія́тое, Непоро́чная, отъ сама́го того́ еди́нства.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Хра́мъ Боже́ственный му́ченика я́ко ски́нія свидѣ́нія познава́ется, въ не́мже лежи́тъ, я́коже ковче́гъ, свяще́нныхъ его́ моще́й гро́бъ всесвяще́нный.

Разумѣ́ти у́мъ не мо́жетъ и язы́къ изрещи́, ю́же воспрія́лъ еси́ сла́ву: сонаслѣ́дникъ бо бы́лъ еси́ Христу́ и наслѣ́дникъ Бо́жій, я́коже писа́ся, сла́вне.

Кри́ни ти́ процвѣто́ша, му́чениче, и цвѣ́ти ча́шекъ послѣ́доваша небе́сніи. Уже́ наслажда́йся, Игна́тіе, съ боже́ственными страда́льцы твои́ми.

Богоро́диченъ: Ве́сь мíръ Сотво́ршаго, вели́кій мíръ въ ма́ломъ восхва́лимъ вси́, Богоро́дицу въ пѣ́снехъ, ди́вное на небеси́ и на земли́ чу́до.

Конда́къ, гла́съ 4. Подо́бенъ: Вознесы́йся.

На дре́вѣ тебе́ ра́ди Повѣ́шеннаго, подража́я Христу́, богоблаже́нне, на дре́во взя́лся еси́ повѣ́шенъ, тве́рдый. И обѣ́шенъ бы́въ, въ рука́хъ о́бразъ носи́лъ еси́ и кре́стъ Го́спода, Его́же моли́ о на́съ, тя́ почита́ющихъ, спасти́ся, свя́те Игна́тіе всесла́вне.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Ве́сь боже́ственъ бы́въ, Игна́тіе, претя́щимъ ти́ оѳома́номъ благодерзнове́нно вопія́лъ еси́: страда́нія, я́же ми́ предлага́ете, ме́чь, сме́рть, обѣ́шеніе, ни во что́же вмѣня́ю любве́ ра́ди Христа́ моего́.

Моли́твами твои́ми боже́ственными, му́чениче Игна́тіе, пѣвце́въ твои́хъ на́съ свободи́ отъ вся́каго озлобле́нія, въ не́мже ды́шемъ, и оскудѣва́ющихъ во оби́тели твоя́ пріими́, я́ко проше́ніе е́сть ве́ліе.

Да́ръ боже́ственный тя́, и ро́гъ спасе́нія, и блаже́нство неотъе́млемое, и извѣ́стное сокро́вище, и бога́тство неоскудѣва́емое, все́ добро́ и красно́ дарова́ Христо́съ лю́бящимъ тя́, о Игна́тіе треблаже́нне.

Богоро́диченъ: Твои́хъ Всепѣ́тая, хода́тайствъ кромѣ́, умо́въ человѣ́ческихъ ни еди́нъ же и́мать пріити́ къ Бо́гу. Ты́ бо еди́на была́ еси́ о́бщая межда́ сотворе́ннаго естества́ и несотворе́ннаго. О, веще́й пресла́вныхъ!

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Свѣ́тло къ страда́нію стремле́ніе твое́, свѣ́тло же и предстоя́ніе твое́, свѣ́тло и страда́ніе, свѣтла́ же бы́сть и побѣ́да, ю́же подъя́лъ еси́ на ра́тника, разли́чными о́бразы къ муче́нію твоему́ въ нога́хъ твои́хъ бы́вшаго, треблаже́нне.

Вси́ любодѣ́йцы, и вси́ плотстíи, и вси́ осуети́вшіися вои́стину пріиди́те, — невѣ́рнымъ глаго́лалъ еси́, сла́вне Игна́тіе, — и въ о́гнь вве́ржени бу́дете, а́ще не увѣ́руете во Христа́, и́стиннаго Бо́га Сло́ва и Творца́ мíра, оста́вльше пре́лесть.

Попра́въ зла́я кова́рства врага́ льстеца́ страда́ніемъ твои́мъ, взя́лся еси́ на пресла́вную высоту́, досточу́дне, и а́нгельскія дости́глъ еси́ высоты́, вопія́: Го́спода по́йте, дѣла́, и превозноси́те во вся́ вѣ́ки.

Богоро́диченъ: Ве́сь Гавріи́лъ боже́ственный сія́я сія́ніемъ арха́нгельскимъ, Богоневѣ́сто, Твои́мъ сверха́нгельскія чистоты́ сія́ніемъ противуосія́нъ, побѣжде́нъ бы́сть, Тя́ цѣлу́я, и бы́сть ма́ло что́, я́коже звѣзда́ скры́тная возсія́ніемъ восходя́щаго со́лнца.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Свяще́нніи ли́цы а́нгельстіи возвесели́шася восхо́домъ твои́мъ, чи́нове же му́чениковъ, свѣ́тло взыгра́юща, тя́ прія́ша въ своя́ селе́нія, я́ко пострада́вша души́ мы́слію му́жественною, Игна́тіе, и беззако́нныхъ ле́сть обличи́вша.

Утвержде́ніе вѣ́рныхъ, и сла́ва, и похвала́, му́чениче Игна́тіе, страда́ніемъ бо твои́мъ показа́лся еси́ о́бразъ и́мъ за вѣ́ру страда́ти твердѣ́йше, невѣ́рнымъ же посрамле́ніе вѣ́чное, его́же никогда́же ина́че пострада́ша.

Имаши вои́стину, и́маши ра́й ны́нѣ, его́же жа́ждалъ еси́, его́же ра́ди подвиза́лся еси́ по́стничествомъ и страда́ніемъ твои́мъ. Но и о на́съ моли́ся, лю́бящихъ тя́, рая́ бы́ти жи́теліе съ тобо́ю во вѣ́ки вся́.

Богоро́диченъ: Пѣ́сньми Тя́, Чи́стая, пою́ Всепѣ́тую, Юже мíрный и премíрный язы́къ и вся́кое дыха́ніе, я́ко Бо́га ро́ждшую Препѣ́таго, Его́же пою́тъ ты́сящи ты́сящъ, тмы́ же те́мъ а́нгеловъ.

Свѣти́ленъ, гла́съ 3. Подо́бенъ: Черто́гъ Тво́й ви́жду.

Обѣ́шеніе твое́ съ любо́вію цѣлу́ю, Христо́въ му́чениче, и́мже са́мъ у́бо возлетѣ́лъ еси́ на небеса́ со сла́вою, а́зъ же разрѣше́ніе пріе́млю неду́говъ мои́хъ всѣ́хъ.

Сла́ва, гла́съ 2. Подо́бенъ: Жены́, услы́шите.

Ра́дость на́мъ возсія́ боже́ственнаго весе́лія въ па́мяти твое́й, блаже́нне Игна́тіе богоно́се, пріобрѣ́тше бо гро́бъ тво́й, ра́достію и любо́вію зове́мъ: му́чениче, спаса́й ны́ отъ вся́кія ну́жды и вре́да чужда́го.

И ны́нѣ, богоро́диченъ, гла́съ и подо́бенъ то́йже:

Бо́га, Его́же воплоти́ Богоро́дица Влады́чица, нося́щи на рука́хъ, непреста́нно мо́литъ: уще́дри, Сладча́йшій, благоволи́лъ бо еси́ Ма́терь Твою́ бы́ти Мя́, рабу́ Твою́, и ко Мнѣ́ прибѣга́ющихъ Твоея́ сподо́би сла́вы.

На хвали́техъ поста́вимъ стихо́въ 4 и пое́мъ стихи́ры, гла́съ 1. Подо́бенъ: Небе́сныхъ чино́въ.

Нача́ло Свѣ́тлыя Тро́ицы, ны́нѣ осіява́емь боготво́рными дѣ́йствы, о Игна́тіе боже́ственне, моли́ся непреста́нно о на́съ, и́же съ любо́вію соверша́ющихъ твою́ всесла́вную па́мять и отъ души́ лю́бящихъ твое́ и́мя. [Два́жды.]

Тво́й святы́й о́бразъ ны́нѣ цѣлу́юще, Игна́тіе богоно́се, мучениколю́бцы вси́ вѣ́рою покланя́емся и че́сть на Са́мое Первообра́зное возво́димъ, я́ко свяще́нный и му́дрый глаго́летъ Васи́лій.

Объедине́нныя лучи́ мы́сленнаго Со́лнца, Боже́ственнымъ Ду́хомъ и на́съ осія́вшія, о́троковъ Христа́ моего́ и тве́рдыхъ во́иновъ вѣ́ры, воспои́мъ Игна́тія со всѣ́ми преподобному́ченики горы́ Аѳо́нскія.

Сла́ва, гла́съ 5:

Торжеству́етъ ликовству́ющи дне́сь вся́ Христо́ва Це́рковъ, въ Ду́сѣ восхваля́ющи тя́ вѣ́рою, тве́рдый Игна́тіе, и свяще́нный тво́й гро́бъ, врачевство́ стяжа́вши некра́домое вся́ческихъ неду́говъ, цѣлу́етъ се́й съ любо́вію, и проти́внымъ явля́ющи въ се́мъ му́ченическую боже́ственную сла́ву, хва́лящися, тобо́ю велича́ется. Сего́ ра́ди не преста́й моля́ся о на́съ ко Го́споду, приснопочита́емый му́чениче непобѣди́мый.

И ны́нѣ, богоро́диченъ:

Блажи́мъ Тя́, Богоро́дице Дѣ́во, и сла́вимъ Тя́, вѣ́рніи, по до́лгу, гра́дъ непоколеби́мый, стѣ́ну необори́мую, тве́рдую предста́тельницу и прибѣ́жище ду́шъ на́шихъ.

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на преподо́бнаго, пѣ́снь 3-я и 6-я. Проки́менъ, гла́съ 7: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Апо́столъ къ Тимоѳе́ю, зача́ло 292: Возмога́й о благода́ти... Со сла́вою вѣ́чною. Аллилу́ія, [гла́съ 4]: Святы́мъ, и́же су́ть на земли́ Его́, удиви́ Госпо́дь вся́ хотѣ́нія Своя́ въ ни́хъ. [Сти́хъ: Предзрѣ́хъ Го́спода предо мно́ю вы́ну, я́ко одесну́ю мене́ е́сть, да не подви́жуся]. Ева́нгеліе отъ Іоа́нна, зача́ло 52: Сія́ заповѣ́даю ва́мъ... Мни́тся слу́жбу приноси́ти Бо́гу. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Коне́цъ и Бо́гу сла́ва.

Источникъ: Служби на българските светии. — Света Гора, Атон: Славянобългарски манастир «Св. Вмчк Георги Зограф», 2007. — Л. 423-438.

/ Къ оглавленію раздѣла /


Наверхъ / Къ титульной страницѣ

0