Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 23.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 8-й де́нь.
Преподо́бныя ма́тере на́шея Пелагíи.

[ВЕЧЕРЪ,]
На Го́споди воззва́хъ: стихи́ры, гла́съ 8. Подо́бенъ: О, пресла́внаго чудесе́!

О, пресла́внаго чудесе́!* Вмужи́вшися, жена́ врага́ попра́* и стра́сти угаси́ тѣле́сныя* воздержа́ніемъ мно́гимъ,* и на ра́мѣхъ Госпо́день кре́стъ* воспріе́мши Пелагíя те́плѣ,* тя́гость отложи́* жите́йскаго имѣ́нія,* му́драго Но́на уче́ньми послѣ́дова Христу́.

Но́вая Ѳе́кла на́мъ яви́лася еси́,* я́коже бо ино́го Па́вла,* обрѣ́тши Но́на учи́теля,* и того́ поревнова́ла еси́ уче́ніемъ, сла́вная,* приложи́вшися покая́нію те́плѣ,* и совокупи́лася еси́ воздержа́ніемъ Христу́,* о, преблаже́нная Пелагíе всечестна́я!* Тѣ́мъ Христа́ не преста́й моля́щи* спасти́ся на́мъ.

Ра́дуйся, Пелагíе всечестна́я,* ты́ бо боже́ственною ре́вностію* разже́гшися всече́стнѣ,* блу́дную отве́ргла еси́ сла́сть, преблаже́нная,* и прите́кше къ Но́ну, взыва́ла еси́:* отвѣ́тъ возда́си о дѣя́ніихъ мои́хъ,* а́ще не зна́менаеши мя́ зна́меніемъ, сла́вне, Христо́вымъ,* креще́ніемъ одѣва́я мя́* чи́стыя оде́жды.

Сла́ва, гла́съ 4. Іоа́нна мона́ха:

Идѣ́же умно́жися грѣ́хъ, преизли́шествова благода́ть, я́коже учи́тъ апо́столъ; въ моли́твахъ бо и слеза́хъ, мно́гихъ согрѣше́ній, Пелагíе, пучи́ну изсуши́ла еси́, и наконе́цъ благопрія́тное покая́ніе Го́споду принесла́ еси́, и въ се́мъ мо́лишися о душа́хъ на́шихъ.

И ны́нѣ, богоро́диченъ или́ крестобогоро́диченъ. Подо́бенъ: Яко до́бля.

Агнца и Па́стыря Тя́* на дре́вѣ я́ко ви́дѣ,* Агница ро́ждшая рыда́ше* и ма́терски Ти́ вѣща́ше:* Сы́не Возжелѣ́нне,* ка́ко на дре́вѣ кре́стнѣмъ повѣ́шенъ еси́, Долготерпѣли́ве?* Ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?

На стихо́внѣ окто́иха.

Тропа́рь, гла́съ 8:

Въ тебѣ́, ма́ти, извѣ́стно спасе́ся, е́же по о́бразу: пріи́мши бо кре́стъ, послѣ́довала еси́ Христу́, и, дѣ́ющи, учи́ла еси́ презира́ти у́бо пло́ть, прехо́дитъ бо, прилѣжа́ти же о души́, ве́щи безсме́ртнѣй. Тѣ́мже и со а́нгелы сра́дуется, преподо́бная Пелагíе, ду́хъ тво́й.


НА УТРЕНИ,
Оба кано́на окто́иха и святы́я на 4, его́же краегране́сіе: Любо́вію честву́ю му́друю Пелагíю. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Предложи́вши я́ко многопи́ршественную дне́сь, боже́ственную па́мять свою́, вселе́ннѣй все́й та́инственно Пелагíя, повелѣва́етъ напита́тися всѣ́мъ снѣ́дей по́двиговъ ея́.

Жела́ніе, е́же па́че вся́каго хотѣ́нія всели́вшееся въ ду́шу твою́, честна́я, озари́ у́мъ и пла́мень Ду́ха, вже́гъ тебе́, просвѣти́ и страсте́й ти́ну попали́.

Мо́ря грѣхо́внаго волне́нія избѣ́гши, честна́я, къ ти́хому приста́нищу Христо́ву, Пелагíе, приста́ла еси́, тѣ́мъ покая́ніемъ твои́мъ наслѣ́довала еси́ кро́ткихъ зе́млю.

Богоро́диченъ: Тишина́ су́щихъ въ житіи́, Чи́стая, вла́ющихся земны́хъ, Ты́, тве́рдая и крѣ́пкая анки́ра, и приста́нище, и окормле́ніе еси́, всегда́ къ Тебѣ́ руководя́щи и спаса́ющи.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Возлетѣ́ла еси́ на небеса́, Христо́ва голуби́це, крила́ми воздержа́нія и болѣ́зньми мно́гими возвы́сившися.

Ти́ны стра́стныя ты́ злосмра́дное Христо́вою водо́ю омы́вши, честна́я, мѵ́ро, Пелагíе, яви́лася еси́ Ему́.

Ору́жіе врагу́ смертоно́сное и́стинно бы́сть, къ Бо́гу твоя́, честна́я, разжже́нная любо́вь и жела́ніе.

Богоро́диченъ: Яко роса́ у́тренняя, весе́ліе Твое́, Чи́стая, ка́плющи, страсте́й пе́щь Тебе́ пою́щимъ угаша́етъ всегда́.

Сѣда́ленъ, гла́съ 8. Подо́бенъ: Прему́дрости.

Покая́нія росо́ю страсте́й угаси́вши пла́мень, тво́й живо́тъ возложи́ла еси́ Христу́ и Спа́су твоему́, и Его́ ра́ди мíра избѣ́гши, уедини́лася еси́ въ пусты́ни, житіе́ а́нгельское доше́дши. Тѣ́мъ и кончи́ну со сла́вою вели́кою обрѣ́тши отъ Бо́га почита́ему, позна́лася еси́ конце́мъ, Пелагíе равноа́нгельная. Моли́ Христа́ Бо́га грѣхо́въ оставле́ніе пода́ти пра́зднующимъ любо́вію святу́ю па́мять твою́.

Сла́ва, и ны́нѣ, богоро́диченъ:

Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому заступле́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, изъ Тебе́ Воплоще́нному безсѣ́менно моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихтися, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти, воспѣва́ющимъ досто́йно сла́ву Твою́.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́ непра́ведно воздви́жена, пла́чущися го́рько, взыва́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости, Бо́же Преблагíй, Безгрѣ́шне Го́споди. Ейже вѣ́рно возопіи́мъ: благоутро́біе покажи́, Дѣ́во, на ны́, и согрѣше́ній оставле́ніе да́руй, покланя́ющимся Того́ страда́ніемъ.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Яко кади́ло пречестно́е, Пелагíе, воздержа́нія у́гліемъ всесожега́емо благово́ніе была́ еси́ Христу́, Бо́гу на́шему, въ воню́ те́кши мѵ́ра Его́.

Тѣле́сное благолѣ́піе, Пелагíе, грѣхо́вныя ти́ны пре́жде бы́вшее, все́ преложи́ла еси́ въ добро́ту нескве́рную, ея́же тво́й Жени́хъ восхотѣ́, Христо́съ.

Ду́ха все́льшаяся, Пелагíе, благода́ть въ души́ твое́й, я́ко и́скра Сло́ва, пла́мень высо́къ возжже́ вѣ́ры и грѣ́хъ извари́.

Богоро́диченъ: Же́злъ прозябла́ еси́, Богоро́дице, изъ Него́же цвѣ́тъ мы́сленный возрасте́, Боже́ственнаго благово́нія испо́лнивъ вся́ческая, Христо́съ Бо́гъ на́шъ — мѵ́ро сы́й неистоще́нное честно́е.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Вода́ми та́инственными умасти́вшися Ду́ха, процвѣла́ еси́ въ вѣ́рѣ добродѣ́телей благопло́діемъ и болѣ́зньми поще́нія.

Ты́, Го́споди, Свѣ́тъ во тмѣ́ лежа́щихъ человѣ́ковъ, Ты́ возсія́лъ еси́ въ се́рдцы преподо́бныя, свѣ́тлость боже́ственнаго разумѣ́нія.

Болѣ́зни твоя́, честна́я Пелагíе, со слеза́ми сѣ́емы, весе́ліемъ и ра́достію оби́лія на небесѣ́хъ собра́шася.

Богоро́диченъ: Удивле́на и́стинно благода́ть Твоя́ показа́ся, Пречи́стая, пресла́вно дѣ́йствующи си́лы и чудеса́ по все́й земли́.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Явльшейся невече́рнѣй зари́ Христа́ Бо́га на́шего въ души́ Пелагíи, тмы́ кня́зь отгна́нъ бы́сть, и всели́ся Ду́ха благода́ть и вѣ́ра Его́.

Дре́вле уловле́нная змíемъ, сѣ́ть ему́ показа́ся, си́лу его́ обдержа́щи и попира́ющи того́ лука́вствіе си́лою Бо́жіею.

Жениха́ Христа́ возлюби́вши и Бо́га, добродѣ́тельми украси́лася еси́, и упещре́на труды́ боже́ственными, Черто́га Его́, Пелагíе, сподо́билася еси́.

Богоро́диченъ: Ви́дѣти, Богоро́дице, сла́ву Твою́ неизрече́нную дре́вле возжелѣ́ша боже́ственніи проро́цы вси́, но напослѣ́докъ на́мъ яви́лася еси́, лю́бящимъ Тя́, всѣ́хъ пребо́льши.

Конда́къ, гла́съ 2. Подо́бенъ: Вы́шнихъ ища́.

Тѣ́ло твое́ поста́ми изнури́вши, бдѣ́нными моли́твами Творца́ умоли́ла еси́ о дѣя́ніихъ твои́хъ, я́ко да пріи́меши соверше́нное оставле́ніе, е́же и обрѣла́ еси́, ма́ти, я́вѣ, пу́ть покая́нія показа́вши.

Икосъ:

Ели́цы въ житіи́ во грѣсѣ́хъ оскверни́стеся, пріиди́те со мно́ю и, потща́вшеся, поревну́имъ покая́нію, слеза́мъ и подвиго́мъ преподо́бныя ма́тере на́шея Пелагíи, да вско́рѣ отъ Бо́га проще́ніе пріи́мемъ, я́коже блаже́нная, еще́ жива́ су́щи, скве́рну отмы́ грѣха́ и прія́тъ отъ Бо́га соверше́нное проще́ніе, пу́ть покая́нія показа́вши.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Пучи́на показа́лася еси́ боже́ственныхъ исправле́ній ты́ и́стинно, всю́ вра́жію погрузи́вши въ не́й крѣ́пость, тѣ́мъ воспѣва́ла еси́: благослове́нъ еси́ въ хра́мѣ сла́вы Твоея́, Го́споди.

Въ пещи́ воздержа́нія тѣ́ло и ду́шу боже́ственно, я́ко зла́то, чи́сто извари́вши, и пе́рвую добро́ту показа́ла еси́ свѣтлѣ́йшу, честна́я Пелагíе, кра́йнимъ воздержа́ніемъ.

Ба́нею боже́ственною совле́кшися, ты́ и́стинно пе́рваго одѣя́нія страсте́й и тлѣ́ющаго тя́ человѣ́ка, въ но́ваго же, сла́вная, одѣ́яся, Христу́ сообразу́ющися.

Богоро́диченъ: На престо́лѣ Оте́честѣмъ сѣдя́й Сло́во Бо́жіе, стра́нно въ Тя́ всели́ся и стра́шно, Богоро́дице, и возведе́ на́ше смѣше́ніе, въ Себѣ́ возвы́сивъ, я́ко Благоутро́бенъ.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Свѣ́тятся лучи́ свѣ́тло чуде́съ твои́хъ, я́коже со́лнце, и житія́ твоего́ всю́ явля́ютъ свѣ́тлость и сія́ющую въ тебѣ́ боже́ственную вѣ́ру, и вопію́тъ: вся́ дѣла́ Госпо́дня Го́спода по́йте и превозноси́те Его́ во вѣ́ки.

Неразрѣши́мымъ сою́зомъ ко Христу́ вѣ́рно привяза́вшися, прилѣпи́лася еси́ къ Нему́ и неотлу́чна пребыла́ еси́ едине́ніемъ любве́ Его́, Ему́же сочлени́лася еси́ мы́сленно, вѣ́рою Его́, Пелагíе, неразлу́чнѣ Тому́ пребы́вши.

Ра́зумъ пріе́мши и́стинный въ се́рдцы твое́мъ, я́вѣ ду́хомъ оста́вила еси́ всю́ жите́йскую суету́, тѣ́мъ удиви́ла еси́ земны́я внеза́пнымъ, честна́я, преложе́ніемъ и небеса́ весе́лія испо́лнила еси́.

Богоро́диченъ: Пою́тъ, Пречи́стая Дѣ́во, вели́чія Твоя́ у́мная во́инства, проповѣ́дуютъ вси́ патріа́рси и проро́цы я́сно со апо́столы, та́коже и му́ченикъ ли́цы и преподо́бныхъ все́ мно́жество: съ ни́миже покланя́емся Тебѣ́.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Ви́дѣти восхотѣ́ла еси́ и́стинно Рачи́теля Христа́ добро́ту, Его́же ра́ди распя́лася еси́ мíру, и кра́сный цвѣ́тъ тѣле́сный, преподо́бная, изсуши́ла еси́, и жите́йскую возненави́дѣла еси́ любо́вь.

Всю́ тѣле́сную тя́гость отло́жши, Пелагíе, воздержа́ніемъ и болѣ́зньми, къ небе́снымъ оби́телемъ востекла́ еси́, въ ни́хже люби́мыя тебѣ́ наслажда́ешися добро́ты, сла́вная.

Ны́нѣ тебе́ почита́ющихъ любо́вію всѣ́хъ, преподо́бная, назира́еши, и лѣ́тнюю соверша́ющихъ твою́ па́мять сію́, моли́ся Творцу́ и Созда́телю твоему́, прича́стникомъ бы́ти и на́мъ сла́вы Его́.

Богоро́диченъ: Пою́ Твою́ благода́ть, Дѣ́во, велича́ю сла́ву Твою́: Ты́ бо просвѣще́ніе души́ моея́ еси́ и́стинно, и утѣше́ніе, и ско́рая помо́щница, и спасе́ніе, и защище́ніе.

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 78 об. - 82.

/ Къ оглавленію раздѣла /


Наверхъ / Къ титульной страницѣ

0