Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 1 мая 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 7-й де́нь.
Слу́жба преподо́бному отцу́ на́шему Се́ргію Ну́ромскому, Во́логодскому чудотво́рцу.

НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры [на 8], гла́съ 4. Подо́бенъ: Свы́ше зва́нъ бы́въ.

Егда́ любы́ Бо́жія воспали́ ду́шу твою́, прему́дре Се́ргіе, тогда́ мíра красоты́ отве́рглся еси́, пребога́те, и удали́вся въ пусты́ню да́льную, на высоту́ добродѣ́телей возше́лъ еси́, пресвѣ́тлое свѣти́ло показа́ся мíрови, вся́ озаря́я чуде́сными сія́ніи. Ны́нѣ моля́ся Христу́ Бо́гу, ста́до твое́ сохраня́й отъ напа́стныхъ нахожде́ній, во е́же спасти́ и просвѣти́ти ду́ши на́ша.

Егда́ Христо́вымъ жела́ніемъ уязви́лся еси́, преподо́бне Се́ргіе, тогда́ плотска́я мудрова́нія обузда́въ, Христу́ послѣ́довалъ еси́ невозвра́тнымъ по́мысломъ, и въ пусты́ни подвиза́вся, пло́ть твою́ покори́лъ еси́ ду́хови, и учени́къ ста́до собра́въ, Христу́ приве́лъ еси́, Его́же моли́ спасти́ и просвѣти́ти ду́ши на́ша.

Ины стихи́ры, гла́съ 2. Подо́бенъ: Кíими похва́льными вѣнцы́.

Кíими похва́льными пѣ́сньми восхва́лимъ преподо́бнаго, те́плаго рачи́теля, а́нгеломъ Бо́жіимъ собесѣ́дника, бѣсо́мъ прогони́теля, преподо́бнымъ и пра́веднымъ единокро́вника, и о на́съ моли́твенника и хода́тая ко Христу́ непреста́нна, Ему́же и мо́лится приле́жно, поми́ловати ду́ши на́ша. [Два́жды.]

Кíими похвала́ми ублажи́мъ преподо́бнаго Се́ргія, ублаже́ннаго Бо́гомъ и ди́внаго въ чудесѣ́хъ, исто́чника Боже́ственныхъ даро́въ неизрече́нныхъ, прехва́льнаго въ терпѣ́ніи, столпа́ непоколеби́маго, боже́ственнаго Христо́ва рачи́теля, моля́щася Ему́ дарова́ти душа́мъ на́шимъ ми́ръ и ве́лію ми́лость.

Кíими смире́нными устна́ми воскли́кнемъ свято́му, или́ ка́ко псало́мски воспле́щемъ духо́вными рука́ми подви́жнику, Христо́въ яре́мъ на ся́ возло́жшему и Того́ стопа́мъ послѣ́довавшему, похвалѣ́ земли́ на́шея Россíйскія, церко́вному украше́нію, и́нокомъ удобре́нію вку́пѣ и утвержде́нію, предста́телю су́щимъ въ бѣда́хъ и ско́рбехъ, сирота́мъ и оби́димымъ засту́пнику, больны́мъ врачу́ безме́здному, моля́щемуся Го́споду о душа́хъ на́шихъ.

Сла́ва, гла́съ 8:

Преподо́бне и богоблаже́нне о́тче Се́ргіе, вои́стину уподо́бился еси́ боже́ственнѣй жи́зни, посто́мъ и бдѣ́ніемъ изнуря́я пло́ть твою́, и благи́ми дѣ́лы о́бразъ бы́лъ еси́ и́нокомъ. Аще бо и тѣле́сный язы́къ тво́й умолче́, но чудеса́ твоя́ свидѣ́тельствуютъ, пусты́ня проповѣ́дающи, хва́лится, иму́щи въ себѣ́ мо́щи твоя́ святы́я я́коже неотъе́млемо сокро́вище, лю́діе же, зря́ще честну́ю ра́ку твою́ и чудеса́ быва́ема отъ святы́хъ моще́й твои́хъ, велегла́сно прославля́ютъ просла́вльшаго тя́ Го́спода, Ему́же моли́ся непреста́нно дарова́ти Благочести́вому Царю́ на́шему на враги́ одолѣ́ніе, ми́ръ вселе́ннѣй, и душа́мъ на́шимъ ве́лію ми́лость.

И ны́нѣ, богоро́диченъ:

[Ца́рь Небе́сный за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ.]

[Вхо́дъ.] Проки́менъ дне́. Чте́нія три́, преподо́бному.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 6, самогла́сны:

Блаже́нъ еси́ вои́стину, о́тче Се́ргіе, я́ко и́стиннымъ посто́мъ пло́ть твою́ умертви́лъ еси́, ду́шу же оживотвори́лъ еси́, съ весе́ліемъ и ра́достію по стопа́мъ Влады́ки Христа́ ше́ствовалъ еси́, пу́ть у́зкій и приско́рбный изво́ливъ. Тѣ́мже простра́нствія о́наго небе́снаго наслѣ́дникъ бы́лъ еси́, и со Христо́мъ ца́рствуя въ безконе́чныя вѣ́ки, со а́нгельскими ли́ки весели́шися, съ ни́миже о на́съ моли́ся приле́жно, спасти́ся душа́мъ на́шимъ.

Богоно́сне и преподо́бне Се́ргіе, любве́ ра́ди Христо́вы всю́ оста́вилъ еси́ красоту́ тлѣ́ющую, и бога́тство мíра сего́ ни во что́же вмѣни́въ, въ пусты́ню всели́лся еси́ безмо́лвную и многожела́нную, въ не́йже, подвиза́яся, безпло́тныя враги́ побѣди́лъ еси́, ника́коже устраша́яся тѣ́хъ кова́рства. Аще бо и мно́гажды на тя́ подвиза́хуся злонра́вныхъ человѣ́къ устремле́нія, хотѣ́вшихъ тя́ изгна́ти отъ свята́го твоего́ мѣ́ста, ты́ же моли́твами побѣди́лъ еси́ тѣ́хъ, Христу́ моля́ся о душа́хъ на́шихъ.

Вѣ́рою и любо́вію, о празднолю́бцы, соше́дшеся дне́сь, псалмы́ и пѣ́сньми восхва́лимъ Се́ргія, то́й бо, на земли́ сы́й, небе́сный человѣ́къ показа́ся и земны́й а́нгелъ, въ пусты́няхъ и гора́хъ со звѣрьми́ поживе́, взыска́я Го́спода своего́, Его́же обрѣ́тъ добродѣ́тельми свои́ми, освяще́нъ до́мъ Пресвята́го Ду́ха содѣ́яся, и отъ Него́ возсія́ я́ко пресвѣ́тлое со́лнце, чуде́сными сія́ніи просвѣща́я ве́сь мíръ. Къ тому́ у́бо возопіи́мъ: О, всенепоро́чная душе́, преблаже́нне Се́ргіе! Яко имѣ́яй дерзнове́ніе къ Бо́гу, моли́ спасти́ся душа́мъ на́шимъ.

Сла́ва, гла́съ 6:

Пріиди́те правовѣ́рныхъ собо́ри, и́ночествующихъ мно́жества, дне́сь благоче́стія подража́теля, Се́ргія, пѣ́сньми восхва́лимъ, глаго́люще: ра́дуйся, пресла́вне о́тче Се́ргіе, оте́честву твоему́ пресвѣ́тлый свѣти́льниче; ра́дуйся, я́ко чи́стѣ Чистѣ́йшему Свѣ́ту совокупля́ешися; ра́дуйся, я́ко Тро́ицѣ предстои́ши со а́нгелы, Ейже моли́ся непреста́нно дарова́ти Царю́ правосла́вному на враги́ побѣ́ду, и мíру ми́ръ, и душа́мъ на́шимъ ве́лію ми́лость.

И ны́нѣ, богоро́диченъ:

[Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.]

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Яко въ зерца́лѣ пресвѣ́тлѣ, душе́внымъ твои́мъ о́комъ взира́я къ Бо́гу Всевѣ́дущему, путе́мъ ско́рбнымъ и тѣ́снымъ ше́ствовалъ еси́, слеза́ми твои́ми зе́млю ороша́я, и я́ко фи́никсъ, процвѣ́лъ еси́ во дво́рѣхъ Боже́ственныхъ, тѣ́мже моли́ся Христу́ о творя́щихъ вѣ́рою святу́ю па́мять твою́.

Сти́хъ: Честна́ предъ Го́сподемъ сме́рть преподо́бныхъ Его́.

Къ Бо́гу все́ твое́ у́мное жела́ніе, преподо́бне, просте́рлъ еси́ и сего́ ра́ди не да́лъ еси́ сна́ очи́ма твои́ма, ни вѣ́ждома дрема́нія, тѣ́мже орга́нъ бы́лъ еси́ Свята́го Ду́ха, подава́я тобо́ю исцѣле́нія всѣ́мъ, приходя́щимъ ко гро́бу твоему́ съ вѣ́рою.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Ре́вностію духо́вною уязви́въ твою́ ду́шу, святы́хъ а́нгелъ житію́ на земли́ подража́лъ еси́ и на стра́сти тѣле́сныя подвиза́лся еси́ му́жественнѣ, покори́въ пло́ть твою́ ду́хови, сего́ ра́ди наста́вникъ бы́лъ еси́ и́нокомъ, преподо́бне Се́ргіе, моли́ Христа́ Бо́га спасти́ся душа́мъ на́шимъ.

Сла́ва, гла́съ 8:

Мона́ховъ мно́жества наста́вника тя́ почита́емъ, о́тче на́шъ Се́ргіе, твое́ю бо стезе́ю вои́стину пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче и преподо́бныхъ соприча́стниче и пра́ведныхъ, съ ни́миже моли́ся Го́сподеви, поми́ловатися душа́мъ на́шимъ.

И ны́нѣ, богоро́диченъ:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

Тропа́рь, гла́съ 8:

Жела́ніемъ духо́внымъ разгара́яся, преблаже́нне, сле́зъ твои́хъ тече́ніемъ ду́шу твою́ напои́лъ еси́, и я́же изъ глубины́ воздыха́ньми уязвля́я се́рдце твое́, бо́дренными моли́твами, и всено́щнымъ предстоя́ніемъ Влады́цѣ Христу́ многодобродѣ́теленъ пло́дъ прине́слъ еси́ са́мъ себе́. Сего́ ра́ди, я́ко Бо́жій уго́дникъ, свѣти́ло мíру показа́лся еси́, сія́я чудесы́. Се́ргіе преподо́бне о́тче на́шъ, те́плый моли́твенниче, Бо́га всегда́ моли́, да спасе́тъ ду́ши на́ша.

Сла́ва, и ны́нѣ, богоро́диченъ:

Иже на́съ ра́ди [рожде́йся отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя].


НА УТРЕНИ,
[На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ.]

По 1-мъ стихосло́віи сѣда́ленъ, гла́съ 1:

Наста́ дне́сь свѣтоно́сная па́мять преподо́бнаго Се́ргія, пріиди́те, вѣ́рніи, боже́ственными пѣ́сньми воспои́мъ блаже́ннаго, да пріи́мемъ отъ него́ нетлѣ́нныя да́ры, и́бо отъ свята́го своего́ гро́ба благоуха́етъ безсме́ртіе, душа́мъ источа́етъ нетлѣ́ніе, тѣлесе́мъ подае́тъ здра́віе, моля́ непреста́нно о душа́хъ на́шихъ. [Два́жды.]

Сла́ва, и ны́нѣ, богоро́диченъ:

Тя́ пѣ́сньми немо́лчными ублажа́емъ, Дѣ́во, я́ко отъ Тро́ицы Еди́наго родила́ еси́, Богоро́дице, и носи́ла еси́ на руку́ Твое́ю пребога́тое Сло́во непремѣ́нно и неизмѣ́нно, еди́на Благослове́нная.

По 2-мъ стихосло́віи сѣда́ленъ, гла́съ 4:

Преподо́бне о́тче Се́ргіе, отъ ю́ности возжелѣ́въ Бо́га, и сего́ ра́ди удали́вся, бѣ́гая, водвори́лся еси́ въ пусты́ню, въ не́йже основа́ніе добродѣ́телей на ка́мени вѣ́ры назда́лъ еси́, ду́шу же твою́ непоро́чную Христу́ предложи́лъ еси́, соверши́въ отъ Него́ заповѣ́данная, и сего́ ра́ди Ду́хомъ Госпо́днимъ направля́емь, учени́къ ста́до собра́лъ еси́, научи́въ и́хъ чти́ти Тро́ицу Единосу́щную. [Два́жды.]

Сла́ва, и ны́нѣ, богоро́диченъ:

Херуви́мъ и серафи́мъ превы́шши еси́, Богоро́дице, небесе́ и земли́ простра́ннѣйши, ви́димыя же тва́ри и неви́димыя преиму́щи яви́лася еси́ безъ сравне́нія. Его́же бо простра́нствія небеса́ не вмѣща́ютъ, во Твое́мъ чре́вѣ вмѣсти́ла еси́, Чи́стая. Того́ моли́ спасти́ся рабо́мъ Твои́мъ.

[Велича́ніе:

Ублажа́емъ тя́, преподо́бне о́тче Се́ргіе, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 8:

Возгнуша́вся маловре́менныя сла́вы и красоты́ мíра сего́, смире́ніемъ же и нището́ю Христу́ послѣ́довалъ еси́, мно́ги болѣ́зни, и ско́рби, и напа́сти во вну́тренней пусты́ни подъя́лъ еси́, и сего́ ра́ди вся́ку добродѣ́тель боже́ственную собра́лъ еси́ въ души́ твое́й, моли́твами же и поще́ніемъ прибли́зился еси́ Го́сподеви, Его́же благода́ть и по кончи́нѣ воспрія́лъ еси́: во гро́бѣ бо лежа́, я́ко жи́въ, чудеса́ твори́ши непрестае́ма. Моли́ Христа́ Бо́га согрѣше́ній оставле́ніе на́мъ дарова́ти. [Два́жды.]

Сла́ва, и ны́нѣ, богоро́диченъ:

Яко всенепоро́чная Невѣ́сто Творца́, я́ко неискусому́жная Ма́ти Изба́вителя, я́ко Вмѣсти́лище Вы́шняго су́щи, Всепѣ́тая, беззако́ній мя́ су́ща скве́рное жили́ще и въ ра́зумѣ бы́вша бѣсо́мъ игра́лище, потщи́ся и отъ си́хъ злодѣ́йствія мя́ изба́вити, свѣ́тлое жили́ще добродѣ́тельми содѣ́лавши, свѣтопріе́мнице нетлѣ́нная, отжени́ о́блакъ страсте́й, и сподо́би го́рнія свѣ́тлости и неле́стнаго осія́нія Свѣ́та невече́рняго Твоего́.

Степе́нна, 1-й антифо́нъ 4-го гла́са. Проки́менъ, [гласъ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Пріиди́те, празднолю́бцы, соше́дшеся дне́сь, пѣ́сньми и похвала́ми воспои́мъ блаже́ннаго, и́нокомъ наста́вника, отце́мъ похвалу́, исто́чника исцѣле́ній, вѣ́рнымъ засту́пника вели́каго, бѣсо́мъ прогони́теля, страсте́мъ искорени́теля, свѣти́льника пресвѣ́тлаго, чудотво́рца вели́каго. Къ нему́же возопіи́мъ: О, всечестны́й Се́ргіе преподо́бне! Не преста́й моля́ся ко Христу́ Бо́гу спасти́ся душа́мъ на́шимъ.

Кано́нъ Богоро́дицѣ со ирмосо́мъ на 6: Мно́гими содержи́мь... [И свято́му два́ кано́на на 8.]

Кано́нъ преподо́бному, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Во́ду страсте́й мои́хъ изсуши́, Бо́же, исто́чникъ безсме́ртія излія́въ души́ мое́й, и да́ждь ми́ пѣ́ти чи́стою душе́ю и устна́ми Твоего́ преподо́бнаго Се́ргія, я́ко да пою́ при́сно: Изба́вителю и Бо́гу на́шему пои́мъ, я́ко просла́вися.

Любо́вію Христо́вою уязви́вся, преподо́бне, вослѣ́дъ Того́ усе́рдно отъ души́ послѣ́довалъ еси́, воспріи́мъ житіе́ а́нгельское и поя́: Изба́вителю и Бо́гу на́шему пои́мъ, я́ко просла́вися.

Утверди́въ тво́й по́мыслъ Боже́ственными заповѣ́даніи, жите́йскихъ мо́лвъ отве́рглся еси́, и въ пусты́няхъ скита́яся, преподо́бному Па́влу собесѣ́дникъ, блаже́нне, бы́лъ еси́, съ ни́мже воспѣва́лъ еси́: Изба́вителю и Бо́гу на́шему пои́мъ, я́ко просла́вися.

Богоро́диченъ: Уста́ви непреста́нное смуще́ніе мои́хъ по́мысловъ, Богоро́дице Дѣ́во, и серде́чную болѣ́знь утоли́ воспѣва́ющихъ: Изба́вителю и Бо́гу на́шему пои́мъ, я́ко просла́вися.

Другíй кано́нъ, гла́съ 2.
Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Тлѣ́нная я́же на земли́ оста́вивъ, восте́клъ еси́ къ небе́снымъ оби́телемъ, и престо́лу всѣ́хъ Влады́ки предстои́ши, Ему́же о на́съ, преподо́бне Се́ргіе, моли́ся, восхваля́ющихъ при́сно па́мять твою́.

Отъ ю́ности Бо́гови освяти́лся еси́, преподо́бне, и къ Нему́ приближа́яся добродѣ́тельми, полки́ бѣсо́вскія потреби́лъ еси́, и ны́нѣ отгоняеши нечи́стыя ду́хи отъ человѣ́къ, моля́щихся тебѣ́ съ вѣ́рою.

Яко кри́нъ, въ пусты́ни Дави́дски процвѣ́лъ еси́, преподо́бне, оби́тель яви́вся Пресвято́му Ду́ху, Иже и показа́ тя сла́вна вселе́ннѣй, испроси́ на́мъ у Того́ оставле́ніе прегрѣше́ній на́шихъ, тя́, преподо́бне, восхваля́ющимъ.

Богоро́диченъ: Всесвята́я Богоро́дице, Содѣ́теля и Спа́са ро́ждшая всѣ́мъ пою́щимъ Тя́, спаси́ гра́дъ Тво́й и оби́тель Твою́, не преста́й моля́щи за ны́ Сы́на Твоего́ и Бо́га на́шего.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Зача́ло прему́дрости, преподо́бне, пріе́мъ, стра́хъ Бо́жій, сего́ положи́лъ еси́ въ души́ твое́й основа́ніе добродѣ́тели, и на се́мъ основа́ніи утверди́въ вся́ помышле́нія, Го́сподеви вопія́лъ еси́: пое́тъ Тя́ ду́хъ мо́й.

Мудрова́ніемъ до́льнимъ высоту́ смире́нія возлюби́лъ еси́, и на го́ру безстра́стія возше́лъ еси́, умертви́въ душетлѣ́нныя стра́сти.

Въ предстоя́ніи твое́мъ моли́твеннѣмъ бо́дро имѣ́я душе́вное твое́ о́ко, во е́же прозира́ти гряду́щая, ска́зовалъ еси́ и собесѣ́днику твоему́, преподо́бному Па́влу, хотя́щая ему́ по́слѣжде бы́ти.

Богоро́диченъ: Прему́дрость и Сло́во Отчее несказа́нно родила́ еси́, Богоро́дице, души́ моея́ я́зву исцѣли́, и серде́чную болѣ́знь утоли́.

Инъ.

Ирмо́съ: Процвѣла́ е́сть пусты́ня я́ко кри́нъ Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Яко фи́никсъ, процвѣ́лъ еси́ во юдо́ли плаче́внѣй, исто́чникъ сле́зъ пролива́я и возраста́я Ду́хомъ Святы́мъ, отъ Него́же незави́стная чудеса́ на́мъ подае́ши.

Не восхотѣ́лъ еси́ сла́вы сея́ тлѣ́нныя, взыску́я небе́сныя, сего́ ра́ди оста́вль вся́, въ пусты́ню всели́лся еси́, посто́мъ и моли́твами угожда́я Бо́гови, тѣ́мже и прія́лъ еси́ отъ Него́ нетлѣ́нную по́честь трудо́въ твои́хъ.

Тѣ́сный и приско́рбный пу́ть на земли́ ше́ствуя, богому́дре, простра́нствія о́наго небе́снаго дости́глъ еси́, отону́дуже съ вѣ́рою приходя́щимъ къ тебѣ́ источа́еши чудеса́ пресла́вная.

Богоро́диченъ: Спасе́ніе Тя́ на вся́ко вре́мя и мѣ́сто призыва́ю, не пре́зри мене́, Всенепоро́чная, безъ истлѣ́нія Бо́га ро́ждшая, Изба́вителя и Спа́са моего́.

Сѣда́ленъ, гла́съ 4:

Жите́йскихъ мо́лвъ, преподо́бне, отве́ргся, удали́ся еси́ въ пусты́ню, Го́спода, изба́вльшаго тя́ отъ лю́тыхъ при́сно ча́я, и Тому́ прилѣпи́вся, жи́знь а́нгельскую пожи́лъ еси́ съ пло́тію, сего́ ра́ди и прія́лъ еси́ нестарѣ́ющееся блаже́нство, въ не́мже ны́нѣ водворя́яся, помина́й на́съ, чту́щихъ пресвяту́ю па́мять твою́. [Два́жды.]

Сла́ва, и ны́нѣ, богоро́диченъ:

Пречи́стѣи ру́цѣ Твои́, Богоро́дице Дѣ́во Ма́ти, просте́рши, покры́й на́съ, упова́ющихъ на Тя́, Сы́на Твоего́ моля́щи изба́вити на́съ отъ вся́кихъ искуше́ній ви́димыхъ и неви́димыхъ вра́гъ, и пода́ти душа́мъ на́шимъ ми́ръ и ве́лію ми́лость.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Вмѣни́лъ еси́ въ се́рдцѣ твое́мъ, е́же при́сно прилѣпля́тися Бо́гови, и сего́ ра́ди на безмо́лвіе прише́лъ еси́, въ не́мже непреста́нно пребыва́я, къ Бо́гу вопіе́ши: си́лѣ Твое́й сла́ва, Человѣколю́бче.

Въ пусты́ннѣмъ озлобле́ніи и ско́рбехъ, зѣло́ обрѣта́ющихъ тя́, прибѣ́жище и си́лу имѣ́лъ еси́ Бо́га, тѣ́мже на Того́ возложи́въ упова́ніе, вся́ побѣди́лъ еси́ творя́щія тебѣ́ напа́сти, блаже́нне.

Жела́я всели́тися во дворы́ Госпо́дни, скончава́лъ еси́, преподо́бне, жи́знь твою́, де́нь и но́щь въ моли́твахъ и во бдѣ́ніихъ не дая́ поко́я тѣлеси́ твоему́, до́ндеже дости́глъ еси́ при́сно жела́емаго ти́ блаже́нства.

Богоро́диченъ: Просвѣти́ мя́, Влады́чице, заре́ю ми́лости Твоея́, во тмѣ́ прегрѣше́ній мои́хъ су́ща, Дѣви́це, и къ свѣ́ту покая́нія наста́ви мя́, молю́ся, и спасе́нія жи́зни.

Инъ.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Яко пти́ца обрѣ́лъ еси́ себѣ́ пусты́ню безмо́лвія, въ не́йже подвиза́вся, въ слеза́хъ и умиле́ніи провожда́лъ еси́ жи́знь твою́, тѣ́мже свѣ́та и ра́дости о́ныя бы́въ сы́нъ, моли́ о чту́щихъ тя́.

Яко жи́въ, сы́й съ на́ми водворя́лся еси́, та́ко и ны́нѣ, со преподо́бными Влады́цѣ предстоя́, моли́ изба́витися всѣ́мъ на́мъ отъ вся́каго гнѣ́ва, и преще́нія, и бу́дущаго грѣ́шныхъ томле́нія.

Ста́до, е́же стяжа́лъ еси́ труды́ твои́ми, о́тче, не оста́ви, но посѣща́й я́ко оте́цъ чадолюби́вый, всѣ́мъ же, притека́ющимъ къ чудотво́рному твоему́ гро́бу, пода́ждь согрѣше́ній разрѣше́ніе.

Богоро́диченъ: Евина кля́тва, Богома́ти, упраздни́ся Тобо́ю, Всенепоро́чная, Воплоще́нно бо Сло́во родила́ еси́ Присносу́щное, благослове́ньми мíръ вѣнча́вшее.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Въ моли́твахъ и бдѣ́ніихъ прилежа́ Бо́гови, сле́зными исто́чники тѣ́ло съ душе́ю въ чистотѣ́ предста́вилъ еси́, тѣ́мже и по сме́рти твое́й сподо́бился небе́сныхъ дарова́ній.

Обрѣ́тъ тя́ равноа́нгельный, преподо́бный Па́велъ, во вну́тренней пусты́ни кры́ющася, бы́сть дру́гъ тво́й и собесѣ́дникъ, преподо́бне Се́ргіе, тѣ́мже вку́пѣ и подвиза́лися есте́, и клевре́ти бы́сте бли́жніи.

Обле́кся во смире́ніе Христо́во, я́ко а́гня незло́биво прине́лъ еси́ себе́, сего́ ра́ди и зе́млю кро́ткихъ наслѣ́довалъ еси́, идѣ́же водворя́яся, сла́виши Го́спода.

Богоро́диченъ: Ду́шу мою́ огорче́нную я́домъ, сопроти́внаго угрызе́ніемъ, исцѣли́, Христе́, дѣ́йственнымъ врачева́ніемъ, моли́твами ро́ждшія Тя́ и преподо́бнаго Се́ргія.

Инъ.

Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо Влады́ко, къ свѣтонача́льнику Отцу́ Твоему́, отъ но́щи невѣ́дѣнія, приведе́ніе и́мамы.

Умъ тво́й къ Бо́гу впери́въ, вся́, на земли́ су́щая презрѣ́лъ еси́, сего́ ра́ди, водворя́яся ны́нѣ во оби́телехъ небе́сныхъ, подава́й на́мъ при́сно спасе́ніе и избавле́ніе, да вси́ тя́, блаже́нне, воспѣва́емъ непреста́нно.

Свѣ́тлость житія́ твоего́, преподо́бне Се́ргіе, всѣ́хъ просвѣща́етъ, слѣпы́мъ прозрѣ́ніе, хромы́мъ хожде́ніе да́руетъ, всѣ́мъ же, пра́зднующимъ святу́ю па́мять твою́, отъ грѣхо́въ разрѣше́ніе.

Пото́ки сле́зными угаси́лъ еси́ страстна́я разжже́нія, огне́мъ же любве́ Бо́жія совокупи́лся еси́ росѣ́ безстра́стія, Христу́ Бо́гу на́шему, Ему́же не преста́й о на́съ моли́тися, да пода́стъ на́мъ ве́лію ми́лость.

Богоро́диченъ: Се́ во чре́вѣ Твое́мъ, Пречи́стая, Христа́ Бо́га на́шего па́че сло́ва имѣ́ла еси́, я́коже Иса́ія предрече́, па́че естества́ Сего́ родила́ еси́.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Зва́нію Христо́ву послѣ́довавъ и, Того́ свято́е и́го на себе́ взе́мъ, въ вѣ́чный поко́й пости́глъ еси́, идѣ́же пра́зднующихъ гла́съ безконе́чный и непрестаю́щая ра́дость, я́же угото́ва Бо́гъ лю́бящимъ Его́ повелѣ́нія.

Го́рлица пустыннолю́бная бы́лъ еси́ въ жи́зни се́й, блаже́нне, безпреста́нныя сле́зы точа́, взыска́я Го́спода де́нь и но́щь, Его́же обрѣ́тъ ны́нѣ, отъ вся́каго вре́да лука́ваго избавля́й пою́щихъ тя́.

Гро́бъ тво́й, преподо́бне Се́ргіе, въ не́мже лежа́тъ честны́я мо́щи твоя́, благоуха́етъ арома́ты Боже́ственныхъ дарова́ній и источа́етъ вѣ́рнымъ исцѣле́нія.

Богоро́диченъ: Безъ сѣ́мени заче́нши Бо́га, Зижди́теля естеству́ нетлѣ́нно родила́ еси́, Того́ моли́, Богома́ти, спасти́ся на́мъ.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Отъ ю́ности, блаже́нне Се́ргіе, имѣ́лъ еси́ житіе́ твое́ чи́сто, сего́ ра́ди Пречи́стому Влады́цѣ ны́нѣ предстои́ши со а́нгельскими ли́ки, моля́ Его́ изба́вити на́съ отъ всѣ́хъ зо́лъ.

Отъ вся́каго навѣ́та вра́жія потщи́ся изба́вити на́съ, блаже́нне Се́ргіе, я́ко да свѣ́тло пра́зднуемъ пречестну́ю твою́ па́мять.

Въ пусты́ни безмо́лвія еди́нствующу ти́, богоно́сне, лука́вый вра́гъ злонра́вныя разбо́йники на тя́ вообража́етъ, хотя́ озло́бити боголюби́вую твою́ ду́шу, Бо́гъ же вня́тъ моли́твѣ твое́й, побѣди́ того́ и ловле́нія его́.

Богоро́диченъ: Иже во утро́бу Твою́ всели́ся Сло́во, Пренепоро́чная Влады́чице, все́ человѣ́ческое существо́ обожи́ и мно́жество преподо́бныхъ ли́къ привлече́.

Конда́къ, гла́съ 8. Подо́бенъ: Взбра́нной Воево́дѣ.

Яко звѣзда́ пресвѣ́тлая, отъ Святы́я горы́ провозше́дъ, добро́тами чуде́съ твои́хъ ве́сь мíръ просвѣти́лъ еси́: взе́мъ бо кре́стъ Христо́въ, послѣ́довалъ еси́ Ему́, и въ пусты́ннѣмъ озлобле́ніи, въ моли́твахъ и поще́ніихъ, во бдѣ́ніихъ и злострада́ніихъ изнури́лъ еси́ пло́ть твою́, тѣ́мже и Христо́съ да́ромъ чуде́съ обогати́ тебе́. Ему́же о на́съ моля́ся, посѣща́й ча́да твоя́, да зове́мъ ти́: ра́дуйся, Се́ргіе о́тче на́шъ, пусты́нный жи́телю.

Икосъ:

Зако́ну Бо́жію повину́яся, отъ младе́нства путе́мъ приско́рбнымъ, блаже́нне, ше́ствовалъ еси́, вся́, я́же въ мíрѣ сла́дкая и кра́сная, преоби́дѣвъ, всели́лся еси́ въ пусты́ню, въ не́йже кре́стъ сво́й взе́мъ, распя́лъ еси́ себе́ мíрови, и мíръ тебѣ́ ра́спятъ бы́сть. Тѣ́мже отъ всѣ́хъ слы́шише: ра́дуйся, я́ко презрѣ́лъ еси́ теку́щая и тлѣ́нная; ра́дуйся, я́ко, Бо́гомъ наставля́емь, пусты́ни дости́глъ еси́; ра́дуйся, я́ко, въ не́й подвиза́вся, Бо́гу угоди́лъ еси́, врага́ побѣди́въ; ра́дуйся, я́ко собра́лъ еси́ учени́къ ста́до, и́миже Бо́гъ просла́вися; ра́дуйся, пресвѣ́тлымъ житіе́мъ твои́мъ святы́я а́нгелы удиви́вый и человѣ́ки по́льзовавый; ра́дуйся, я́ко на небеси́ со а́нгелы ликовству́еши, Тро́ицѣ предстоя́, и о на́съ мо́лишися; ра́дуйся, исто́чниче чуде́съ неисчерпа́емый. Ра́дуйся, Се́ргіе о́тче на́шъ, пусты́нный жи́телю.

Пѣ́снь 7.

Ирмо́съ: Бо́жія снизхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Въ черто́зѣхъ небе́сныхъ водворя́яся, преподо́бне, и оде́жду свѣтови́дну нося́, мно́гими добродѣ́тельми преукраше́нъ сы́й, моли́ся обрѣсти́ на́мъ ми́лость, пою́щимъ: оте́цъ на́шихъ Бо́же, благослове́нъ еси́.

Лу́чшииъ по́мысломъ бы́въ внѣ́ пло́ти, преподо́бне, стра́сти удержа́въ, бѣсо́въ шата́нія разори́лъ еси́, и ны́нѣ, съ преподо́бными всѣ́ми въ небе́сныхъ селе́ніихъ живы́й, спаса́й вся́ пою́щія: благослове́нъ Бо́гъ оте́цъ на́шихъ.

На гора́хъ добродѣ́телей, я́ко еле́нь, пребыва́я, ко Христу́ Ка́мени неотто́рженѣ прилѣпи́лся еси́, у Него́же ро́су пріе́мъ во устуже́ніе духо́вныхъ твои́хъ жела́ній, ороша́емь зове́ши: благослове́нъ Бо́гъ оте́цъ на́шихъ. Богоро́диченъ: Тѣле́сныя сла́бости и душе́вныя неду́ги, Богороди́тельнице, любо́вію приступа́ющихъ къ кро́ву Твоему́, Дѣ́во, исцѣли́ти сподо́би, Спа́са Христа́ на́мъ ро́ждшая.

Инъ.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Се́рдце стяжа́въ чи́сто, вмѣсти́лище бы́лъ еси́ Свята́го Ду́ха, сего́ ра́ди многоцѣле́бныя твоя́ мо́щи струи́ исцѣле́ній источа́ютъ пою́щимъ: оте́цъ на́шихъ Бо́же, благослове́нъ еси́.

Моли́твенника Ти́ приво́димъ преподо́бнаго Се́ргія, тѣ́мъ прося́ще отъ грѣхо́въ свободи́тися и Твои́мъ всеору́жіемъ сохране́нымъ бы́ти на́мъ отъ навѣ́тъ вра́жіихъ, зову́щимъ: оте́цъ на́шихъ Бо́же, благослове́нъ еси́.

Плотско́е взыгра́ніе воздержа́ніемъ увяди́лъ еси́, блаже́нне, тѣ́мже па́стырь показа́лся еси́ боголюбе́знаго твоего́ ста́да, о не́мже не преста́й моля́ся ко Христу́ Бо́гу, зовы́й: оте́цъ на́шихъ Бо́же, благослове́нъ еси́.

Богоро́диченъ: Святы́хъ Свята́го, во святы́хъ Почива́ющаго, свя́то родила́ еси́, Дѣ́во Всенепоро́чная, за милосе́рдіе мно́гое Человѣ́ка бы́вшаго, изъ Тебе́ воплоще́нна, су́ща пре́жде Безпло́тнаго.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Любо́вію ко Христу́ распала́емь, усе́рдно вся́, я́же въ пусты́ни, ско́рбная ше́ствія претерпѣ́лъ еси́ и бѣсо́въ вся́ лю́тая устремле́нія побѣди́лъ еси́, тѣ́мже и досто́йнымъ вѣнце́мъ отъ Бо́га вѣнча́лся еси́, и съ преподо́бными ликовству́я, пое́ши: Го́сподеви по́йте и превозноси́те Его́ во вѣ́ки.

Плотско́е мудрова́ніе, о́тче Се́ргіе, умертви́лъ еси́ и сего́ ра́ди на небесѣ́хъ со а́нгелы жи́ти сподо́бился еси́, идѣ́же святы́хъ собо́ри ликовству́ютъ, непреста́нно пою́ще: Го́спода по́йте и превозноси́те Его́ во вѣ́ки.

Сле́зъ тече́ніемъ просвѣти́лъ еси́ ду́шу, очи́стивъ у́мъ тво́й отъ страстны́хъ приложе́ній. Пресвяты́я Тро́ицы до́мъ показа́лся еси́, и съ ли́ки святы́хъ пое́ши: Го́спода по́йте и превозноси́те Его́ во вѣ́ки.

Богоро́диченъ: Умертве́нія ми́ пло́дъ принесе́ дре́вле естество́мъ ра́й жи́зни: Ты́ же Пло́дъ, Боже́ственный ра́й, процвѣла́ еси́, Богоро́дице, и́мже пита́яся, не ктому́ сме́рти порабоще́нъ бу́ду.

Инъ.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Тве́рдымъ по́мысломъ на ра́мо кре́стъ взе́мъ, Христу́ послѣ́довалъ еси́, я́ко и́нокъ пребла́гъ, сего́ ра́ди отъ святы́хъ моще́й твои́хъ, блаже́нне Се́ргіе, излива́еши пресла́вная чудеса́ благоче́стно Христа́ славосло́вящимъ.

Утверди́вся крѣ́постію Ду́ха, врага́ крѣ́пкаго смири́лъ еси́, и побѣди́тель бы́въ, вѣ́рныхъ ду́ши просвѣща́еши Боже́ственными чудесы́ и зна́меньми.

По́двигомъ боже́ственнымъ, о́тче, въ пусты́ни подвиза́лся еси́, и сего́ ра́ди предлежи́тъ тебѣ́, преподо́бне, до́браго дѣ́ланія вѣне́цъ, тѣ́мъ Христу́ моля́ся не преста́й о вѣ́рою чту́щихъ тя́.

Богоро́диченъ: Уны́лъ и́мамъ по́мыслъ и ду́шу сластьми́ отягче́ну, но къ Тебѣ́ прибѣга́я, Богороди́тельнице Чи́стая, вопію́ Ти: воздви́гни и спаси́ мя, отча́яннаго и осужде́ннаго.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Взира́ніи непреста́нными къ Бо́гу, о́тче, умертви́лъ еси́ пло́ть, и врага́ побѣди́лъ еси́, и ны́нѣ преста́вился еси́ къ небе́снымъ оби́телемъ, идѣ́же со а́нгелы Бо́гови предстоя́, сла́виши Сего́ при́сно.

Стопа́мъ послѣ́дуя преподо́бнаго Се́ргія, въ Россíи я́ко со́лнце возсія́вшаго, отъ Бо́га спасе́ніе стяжа́лъ еси́, и ны́нѣ съ тѣ́мже Христу́ предстои́ши, пріе́мля бога́тыя да́ры.

Блаже́нства ра́йскаго вои́стину сподо́бился еси́, богому́дре, во́лею бо Обнища́вшему на́съ ра́ди послѣ́довалъ еси́, Его́же ра́ди вся́ су́щая въ мíрѣ презрѣ́лъ еси́, тѣ́мже и То́й просла́ви тя́ боже́ственными прославле́ньми.

Богоро́диченъ: Спаси́ мя, Ма́ти Бо́жія, мíрови Спасе́ніе ро́ждшая, отъ многообра́зныхъ ми́ нахожде́ній, на Тя́ бо наде́жду спасе́нія моего́ возложи́хъ вѣ́рно, ра́бъ Тво́й.

Инъ.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу велича́емъ.

На го́ры честны́хъ за́повѣдей восте́клъ еси́, я́коже дре́вле Моисе́й, тѣ́мъ Христа́ зри́ши ны́нѣ я́вѣ, я́коже въ купинѣ́ о́нъ, и источа́еши на́мъ, я́ко мѵ́ро благода́тное, животво́рныя во́ды исцѣле́нія.

Манове́ніемъ боже́ственнымъ управля́емь, Се́ргіе, стра́сти вся́кія пребы́лъ еси́ неприча́стенъ, и въ безстра́стіе, я́ко во оде́жду, обле́клся еси́, тѣ́мъ ны́нѣ Пречи́стому Свѣ́ту причаща́яся, помина́й на́съ, вѣ́рно ублажа́ющихъ тя́.

О, свяще́нный сосу́де Христа́ Бо́га на́шего, а́нгеломъ собѣсе́дниче и преподо́бнымъ единокро́вниче и пра́веднымъ! Пріими́ сіе́ отъ недосто́йныхъ у́стъ приноси́мое тебѣ́ хвале́ніе, и испроси́ ми отъ грѣхо́въ избавле́нія.

Богоро́диченъ: Свѣтоно́сну две́рь Тя́ предзря́ше Іезекіи́ль, Еюже про́йде Свѣ́тъ Истинный, Христо́съ Бо́гъ на́шъ, Того́ моли́ приле́жно, Чи́стая, покая́нія ми́ две́рь отве́рзти, молю́ся Ти́.

Свѣти́ленъ. Подо́бенъ: Жены́, услы́шите.

Мірска́го весе́лія, я́ко скве́рны, уклони́лся еси́, посто́мъ и моли́твами пло́ть увяди́въ, и ду́шу твою́ очи́стивъ, сла́вою обогати́лся еси́ небе́сною, сла́вне, тѣ́мже моля́ не преста́й о на́съ Го́спода. [Два́жды.]

[Сла́ва, и ны́нѣ,] богоро́диченъ:

Вои́стину Богоро́дицу Тя́ исповѣ́дуемъ, Тобо́ю спа́сшіися, Влады́чице, и́бо Бо́га неизрече́нно родила́ еси́, разо́ршаго Кресто́мъ сме́рть, къ Себѣ́ же привле́кшаго преподо́бныхъ собо́ры, съ ни́ми же Тя́ восхваля́емъ, Дѣ́во.

На хвали́техъ стихи́ры [на 4], гла́съ 8. Подо́бенъ: О, пресла́внаго чудесе́!

О, пресла́внаго чудесе́, преблаже́нне Се́ргіе! Яко отъ нетлѣ́нна исто́чника, отъ свята́го твоего́ гро́ба честны́я твоя́ мо́щи, я́ко жи́вы, источа́ютъ пресла́вная чудеса́ и исцѣле́нія приходя́щимъ къ тебѣ́ съ вѣ́рою человѣ́комъ, бѣ́сы прогоня́ютъ и разли́чныя неду́ги исцѣля́ютъ моли́твами твои́ми. Тѣ́мже, соше́дшеся, любо́вію па́мять твою́ почита́емъ. [Два́жды.]

О, пресла́внаго чудесе́! Мно́гими лѣ́ты земле́ю покрове́но бы́сть свято́е твое́ тѣ́ло, и забве́но бы́сть на до́лгое вре́мя неизрече́нными судьба́ми Бо́жіими, по си́хъ же вознесе́ тя Госпо́дь на свѣ́щникъ дарова́ній чуде́съ человѣ́ческому ро́ду. Тѣ́мже мо́лимъ тя́, преподо́бне Се́ргіе, посѣща́й на́съ, тя́ почита́ющихъ.

О, пресла́внаго чудесе́! По мно́зѣхъ лѣ́тѣхъ преставле́нія твоего́, я́ко жи́въ, вои́стину явля́ешися нѣ́коему и́ноку, повелѣва́еши ему́ возвѣсти́ти настоя́телю святы́я твоея́ оби́тели, да очи́ститъ мѣ́сто святы́хъ твои́хъ моще́й. Онъ же, презрѣ́въ твое́ повелѣ́ніе, наказа́ніе прія́тъ своего́ ослуша́нія. Ты́ же того́ па́ки поми́ловалъ еси́, тѣ́мже пра́зднуемъ святу́ю па́мять твою́.

Сла́ва, гла́съ 8:

Пусты́ня, я́же пре́жде имя́ши жили́ща де́монская, ны́нѣ же вселе́ніе бы́сть ста́ду учени́къ твои́хъ, веселя́щися, украша́ется: въ себѣ́ бо иму́щи честны́я мо́щи твоя́, освяща́ется разли́чными добро́тами чуде́съ твои́хъ, созыва́ющи вся́ вѣ́рныя ко славосло́вію Бо́жію. Тѣ́мже, соше́дшеся дне́сь въ па́мяти твое́й, уми́льно мо́лимся: Се́ргіе преподо́бне, Христу́ предстоя́, испроси́ Це́рквамъ единомы́сліе дарова́ти и Царю́ правосла́вному [и́мярекъ] на враги́ одолѣ́ніе, и мíру ми́ръ, и душа́мъ на́шимъ ве́лію ми́лость.

И ны́нѣ, богоро́диченъ:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.

Славосло́віе вели́кое. [Ектеніи́, и отпу́стъ.]



НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, [гла́съ 7]: Честна́ предъ Го́сподемъ* [сме́рть преподо́бныхъ его́]. Сти́хъ: Что́ возда́мъ Го́сподеви [о всѣ́хъ, я́же воздаде́ ми́?] Апо́столъ, къ Гала́томъ, зача́ло 213. [Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе отъ Луки́, зача́ло 24. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Слу́жба и Ака́ѳистъ преподо́бному отцу́ на́шему Се́ргію Ну́ромскому, Во́логодскому чудотво́рцу, его́же па́мять пра́зднуемъ мѣ́сяца Окто́врія въ 7-й де́нь. — СПб.: Сѵнода́льная Тѵпогра́фія, 1912. — С. 3-32, 62-73.

/ Къ оглавленію раздѣла /


Наверхъ / Къ титульной страницѣ

0