Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 6-й де́нь.
Свята́го и сла́внаго апо́стола Ѳомы́.

НА ВЕЧЕРНИ,
Пое́мъ: Блаже́нъ му́жъ, 1-й антифо́нъ. На Го́споди воззва́хъ: стихи́ры на 8, гла́съ 4. Подо́бенъ: Яко до́бля.

Ребру́ прикосну́вся,* всеблаже́нне, Влады́чню,* до́брыхъ пости́глъ еси́ кра́йнѣйшее:* я́ко бо гу́ба во́ды, отту́ду поче́рплъ еси́* исто́чникъ благи́хъ* и жи́знь вѣ́чную* и напои́лъ еси́ изсо́хшая сердца́ невѣ́дѣніемъ,* боже́ственнаго боговѣ́дѣнія* источа́я догма́ты. [Три́жды.]

Вѣ́рнымъ невѣ́рствіемъ твои́мъ* вѣ́рныхъ извѣсти́лъ еси́,* я́ко Бо́га и Го́спода всея́ тва́ри* наче́нъ богосло́вити,* пло́ть поне́сшаго на́съ ра́ди земны́хъ* и кре́стъ же, и сме́рть претерпѣ́вшаго,* и пронзе́ніе гвозде́й,* и копіе́мъ ре́бръ прободе́ніе,* отъ ни́хже жи́знь почерпа́емъ. [Три́жды.]

Ѳома́ чу́дный* исто́чникъ отве́рзе догма́товъ,* Влады́ко, богому́дрымъ:* ребру́ бо прикосну́вся Твоему́,* сугу́бу дѣ́йству,* существы́ сугу́быми подо́бно научи́вся и возопи́:* Ты́ Бо́гъ мо́й еси́ и Влады́ка,* Ты́ и Госпо́дь Сла́вы,* мене́ ра́ди пло́ть бы́въ. [Два́жды.]

Сла́ва, гла́съ 6. Студи́тово:

Яко слуга́ Сло́ва и неизрече́ннаго воплоще́нія Его́, глубину́ му́дрости поче́рплъ еси́, Ѳомо́ апо́столе: тро́стію бо креста́ возводя́ изъ глубины́ пре́лести, ду́ши улови́лъ еси́. Отню́дуже мре́жею твои́хъ догма́товъ всю́ просвѣти́лъ еси́ вселе́нную и свѣ́томъ зна́нія индíанъ помраче́нныя ду́ши просвѣти́лъ еси́. Тѣ́мъ сла́вы Христо́вы свѣ́тло наслажда́яся, Того́ моли́ поми́ловати ду́ши на́ша.

И ны́нѣ, богоро́диченъ: Кто́ Тебе́ не ублажи́тъ...
Вхо́дъ. Проки́менъ дне́. Чте́нія три́.

Отъ собо́рнаго посла́нія Іоа́ннова чте́ніе. [Глава́ 1.]

Еже бѣ́ испе́рва, е́же слы́шахомъ, е́же ви́дѣхомъ очи́ма на́шима, е́же узрѣ́хомъ, и ру́ки на́ша осяза́ша, о Словеси́ Живо́тнѣмъ. И Живо́тъ яви́ся, и ви́дѣхомъ, и свидѣ́тельствуемъ, и возвѣща́емъ ва́мъ Живо́тъ Вѣ́чный, Иже бѣ́ у Отца́ и яви́ся на́мъ. Еже ви́дѣхомъ и слы́шахомъ, повѣ́даемъ ва́мъ, да и вы́ обще́ніе и́мате съ на́ми: обще́ніе же на́ше со Отце́мъ и съ Сы́номъ Его́, Іису́сомъ Христо́мъ. И сія́ пи́шемъ ва́мъ, да ра́дость ва́ша бу́детъ испо́лнена. И сіе́ е́сть обѣтова́ніе, е́же слы́шахомъ отъ Него́ и повѣ́даемъ ва́мъ, я́ко Бо́гъ свѣ́тъ е́сть, и тмы́ въ Не́мъ нѣ́сть ни еди́ныя. Аще рече́мъ, я́ко обще́ніе и́мамы съ Ни́мъ, и во тмѣ́ хо́димъ, лже́мъ и не твори́мъ и́стины. Аще же во свѣ́тѣ хо́димъ, я́коже Са́мъ То́й е́сть во свѣ́тѣ, обще́ніе и́мамы дру́гъ ко дру́гу, и кро́вь Іису́са Христа́ Сы́на Его́ очища́етъ на́съ отъ вся́каго грѣха́.

Отъ собо́рнаго посла́нія Іа́ковля чте́ніе. [Глава́ 1.]

Іа́ковъ, Бо́гу и Го́споду Іису́су Христу́ ра́бъ, обѣмана́десяте колѣ́нома, и́же въ разсѣ́яніи, ра́доватися. Вся́ку ра́дость имѣ́йте, бра́тіе моя́, егда́ во искуше́нія впа́даете разли́чна, вѣ́дяще, я́ко искуше́ніе ва́шея вѣ́ры содѣ́ловаетъ терпѣ́ніе. Терпѣ́ніе же дѣ́ло соверше́нно да и́мать, я́ко да бу́дете соверше́ни и всецѣ́ли, ни въ че́мже лише́ни. Аще же кто́ отъ ва́съ лише́нъ е́сть прему́дрости, да про́ситъ отъ даю́щаго Бо́га всѣ́мъ нелицепріе́мнѣ и не поноша́ющаго, и да́стся ему́. Да про́ситъ же вѣ́рою, ничто́же сумня́ся: сумня́йся бо уподо́бися волне́нію морско́му, вѣ́тры возмета́ему и развѣва́ему. Да не мни́тъ бо человѣ́къ о́нъ, я́ко пріи́метъ что́ отъ Бо́га. Му́жъ двоеду́шенъ, неустро́енъ во всѣ́хъ путе́хъ свои́хъ. Да хва́лится же бра́тъ смире́нный въ высотѣ́ свое́й, бога́тый же во смире́ніи свое́мъ, зане́, я́коже цвѣ́тъ травны́й, мимои́детъ. Возсія́ бо со́лнце со зно́емъ и изсуши́ траву́, и цвѣ́тъ ея́ отпаде́, и благолѣ́піе лица́ ея́ поги́бе. Си́це и бога́тый въ хожде́ніи свое́мъ увяда́етъ. Блаже́нъ му́жъ, и́же претерпи́тъ искуше́ніе, зане́ иску́сенъ бы́въ, пріи́метъ вѣне́цъ жи́зни, его́же обѣща́ Бо́гъ лю́бящимъ Его́.

Отъ собо́рнаго посла́нія Іу́дина чте́ніе. [Глава́ 1.]

Іу́да, Іису́су Христу́ ра́бъ, бра́тъ же Іа́кову, су́щимъ о Бо́зѣ Отцѣ́ освяще́ннымъ, Іису́съ Христо́мъ соблюде́ннымъ зва́ннымъ. Ми́лость ва́мъ, и ми́ръ, и любы́ да умно́жится. Возлю́бленніи, вся́ко тща́ніе творя́ писа́ти ва́мъ о о́бщемъ спасе́ніи ва́шемъ, ну́жду возымѣ́хъ писа́ти ва́мъ, моля́ подвиза́тися о пре́даннѣй вѣ́рѣ святы́мъ еди́ною. Привнидо́ша бо нѣ́цыи человѣ́цы (дре́вле предуста́вленніи на сіе́ осужде́ніе) нечести́віи, Бо́га на́шего благода́ть прелага́ющіи въ скве́рну, и еди́наго Влады́ки Бо́га, и Го́спода на́шего Іису́са Христа́ отмета́ющіися. Воспомяну́ти же ва́мъ хощу́, вѣ́дущимъ и ва́мъ еди́ною сіе́, я́ко Госпо́дь лю́ди отъ земли́ Еги́петскія спасе́, послѣди́ невѣ́ровавшія погуби́. Ангелы же, не соблю́дшія своего́ нача́льства, но оста́вльшія свое́ жили́ще на су́дъ вели́каго дне́, у́зами вѣ́чными подъ мра́комъ соблюде́. Якоже Содо́ма и Гомо́рра, и окре́стныя и́хъ гра́ды, подо́бнымъ и́мъ о́бразомъ преблуди́вша и ходи́вша въ слѣ́дъ пло́ти ины́я, предлежа́тъ въ показа́ніе огня́ вѣ́чнаго, су́дъ подъе́мше. Вы́ же, возлю́бленніи, помина́йте глаго́лы преждерече́нныя отъ апо́столъ Го́спода на́шего Іису́са Христа́. Зане́ глаго́лаху ва́мъ, я́ко въ послѣ́днее вре́мя бу́дутъ руга́тели, по свои́хъ по́хотѣхъ ходя́ще и нече́стіихъ. Сіи су́ть отдѣля́юще себе́ (отъ еди́ности вѣ́ры и су́ть) тѣле́сни, Ду́ха не иму́ще. Вы́ же, возлю́бленніи, свято́ю ва́шею вѣ́рою назида́юще себе́ Ду́хомъ Святы́мъ, и моля́щеся, са́ми себе́ въ любви́ Бо́жіей соблюда́йте, жду́ще ми́лости Го́спода на́шего Іису́са Христа́ въ жи́знь вѣ́чную. И о́вѣхъ у́бо ми́луйте, разсужда́юще, о́вѣхъ же стра́хомъ спаса́йте, отъ огня́ восхища́юще. Облича́йте же съ боя́знію, ненави́дяще и я́же отъ пло́ти оскверне́ную ри́зу. Могу́щему же сохрани́ти вы́ безъ грѣха́ и безъ скве́рны и поста́вити предъ сла́вою свое́ю непоро́чныхъ въ ра́дости, еди́ному прему́дрому Бо́гу и Спа́су на́шему, (Іису́сомъ Христо́мъ, Го́сподемъ на́шимъ,) сла́ва и вели́чіе, держа́ва и вла́сть пре́жде всего́ вѣ́ка, и ны́нѣ, и во вся́ вѣ́ки. Ами́нь.

Аще настоя́тель изво́литъ пѣ́ти литíю,
стихи́ра хра́ма и апо́стола, гла́съ 4. Подо́бенъ: Яко до́бля.

Тро́стію благода́ти* отъ глубины́ су́етства* человѣ́ки извле́клъ еси́, досточу́дне,* Учи́теля ма́ніемъ* повину́вся, Ѳомо́,* просвѣ́щшаго по всему́ твое́ разумѣ́ніе,* и апо́стола, и че́стна богоглаго́льника,* тя́, всеблаже́нне, показа́вша* Того́ непостижи́маго Божества́.

Ду́ха сія́ніе на тя́ сни́де* во о́гненнѣ ви́дѣ,* и тя́, блаже́нне, Боже́ственное прія́телище содѣ́ла,* ско́ро отгоня́ща безбо́жія мглу́* и мíръ просвѣща́юща* сія́ніемъ всему́дрыхъ твои́хъ слове́съ,* тайноглаго́льниче,* апо́столовъ украше́ніе,* Христо́въ самови́дче, блаже́нне.

Мо́лніями проповѣ́данія* во тмѣ́ сѣдя́щія* невѣ́дѣнія, сла́вне, просвѣти́въ,* показа́лъ еси́ сы́ны* Влады́ки и Бо́га вѣ́ры ра́ди.* Его́же страсте́мъ ревнова́лъ еси́ и сме́рти* и сла́вы бы́лъ еси́ наслѣ́дникъ,* я́ко му́дръ и богоглаго́ливъ,* я́ко учени́къ Истины.

Сла́ва, гла́съ 2:

Оста́вивъ земна́я, послѣ́довалъ еси́ Христу́, и зна́менався дохнове́ніемъ Свята́го Ду́ха, по́сланъ бы́въ отъ Него́ въ язы́ки поги́бшія обраща́ти человѣ́ки во свѣ́тъ богозна́нія, апо́столе Ѳомо́, и, сконча́въ по́двиги боже́ственныя твоея́ стра́сти и му́къ разли́чныхъ, ду́шу твою́ Христу́ пре́далъ еси́; Того́ моли́, всеблаже́нне, дарова́ти на́мъ ве́лію ми́лость.

И ны́нѣ, богоро́диченъ:

Все́ упова́ніе мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ.

На стихо́внѣ стихи́ры, гла́съ 4. Подо́бенъ: Да́лъ еси́ зна́меніе.

Якоже би́сера тя́,* изъ пучи́ны изъя́тъ мірска́го смуще́нія* Христо́съ Человѣколю́бецъ,* тобо́ю обогати́въ обнища́вшія* и нището́ю лю́тыхъ одержи́мыя,* Ѳомо́ апо́столе.* Тѣ́мъ тя́ ублажа́емъ* и всепра́зднственную па́мять твою́ во хвале́ніи сла́вимъ,* благоче́стно тя́ почита́юще.

Сти́хъ: Во всю́ зе́млю изы́де вѣща́ніе и́хъ* и въ концы́ вселе́нныя глаго́лы и́хъ.

Индíйскую просвѣти́лъ еси́ всю́ зе́млю, свящѣ́ннейше* и богови́дче апо́столе:* просвѣти́въ бо вся́,* сы́ны содѣ́лалъ еси́ свѣ́та и дне́,* тѣ́ми въ ду́сѣ, му́дре.* Идольскія же хра́мы низложи́въ,* воздви́глъ же еси́ благода́тію* Бо́га въ сла́ву и хвалу́, це́ркви, блаже́нне,* моли́твенниче о душа́хъ на́шихъ.

Сти́хъ: Небеса́ повѣ́даютъ сла́ву Бо́жію,* творе́ніе же руку́ Его́ возвѣща́етъ тве́рдь.

Руко́ю любопы́тною* Боже́ственная ре́бра испыта́въ* и гвозде́й я́звы,* я́же Безсме́ртный на́съ ра́ди подъя́тъ,* и невѣ́ріе преложи́въ ра́достнѣ во благовѣ́ріе,* Ѳомо́, возопи́лъ еси́:* Ты́ еси́ Бо́гъ и Госпо́дь,* и Тя́ сла́влю, Человѣколю́бче,* страстьми́ источи́вшаго вѣ́рнымъ безстра́стіе.

Сла́ва, гла́съ 6. Анато́ліево:

Боже́ственныя ви́дя Христо́вы му́дрости, у́мный показа́лся еси́ крати́ръ та́инственно, Ѳомо́ апо́столе, въ не́мже вѣ́рныхъ ду́ши веселя́тся: Боже́ственною бо мре́жею Ду́ха лю́ди возвле́клъ еси́ изъ глубины́ отча́янія. Тѣ́мже отъ Сіо́на, я́ко рѣка́ благода́ти, изше́лъ еси́, твоя́ источа́ющая боже́ственныя догма́ты во всю́ тва́рь. Тѣ́мъ Христо́вымъ страсте́мъ подо́бяся, въ ре́бра прободе́нъ бы́лъ еси́, во мра́къ вше́дъ нетлѣ́нія. Того́ моли́ спасти́ся душа́мъ на́шимъ.

И ны́нѣ, богоро́диченъ: Богоро́дице, Ты́ еси́ лоза́...

Тропа́рь, гла́съ 3:

Апо́столе святый Ѳомо́, моли́ ми́лостиваго Бо́га, да прегрѣше́ній оставле́ніе пода́стъ душа́мъ на́шимъ.

Или се́й, гла́съ 2:

Учени́къ Христо́въ бы́въ, боже́ственнаго собо́ра апо́стольскаго соприча́стникъ, невѣ́рствіемъ бо Христо́во Воскресе́ніе извѣсти́въ и Того́ пречи́стую стра́сть осяза́ніемъ увѣ́ривъ, Ѳомо́ всехва́льне. И ны́нѣ на́мъ проси́ ми́ра и ве́лія ми́лости.

Сла́ва, и ны́нѣ, богоро́диченъ.



НА УТРЕНИ,
На Бо́гъ Госпо́дь: тропа́рь два́жды. Сла́ва, и ны́нѣ, богоро́диченъ воскре́сенъ.

По 1-й стихоло́гіи сѣда́ленъ, гла́съ 5. Подо́бенъ: Собезнача́льное Сло́во.

Апо́стола вси́ и ученика́ Христо́ва восхва́лимъ пѣ́сньми въ па́мять его́: боголѣ́пно бо на́ша помышле́нія, то́й я́звы гвозде́й осяза́въ, извѣ́стную вѣ́ру изыска́въ, утверди́ въ мíрѣ и мо́литъ Спа́са поми́ловатися душа́мъ на́шимъ. [Два́жды.]

Сла́ва, и ны́нѣ, богоро́диченъ:

Изъ Тебе́, воплоще́ннаго Бо́га и Го́спода, на́съ ра́ди, истлѣ́вшихъ согрѣше́ньми, Того́ моли́ при́сно уще́дрити ны́ и отврати́ти я́рость и гнѣ́въ Его́, Чи́стая, отъ вопію́щихъ вѣ́рою непреста́нно, вели́чія Твоя́, Благода́тная.

По 2-й стихоло́гіи сѣда́ленъ, гла́съ 4. Подо́бенъ: Вознесы́йся.

Осяза́въ ре́бра Спа́сова и поче́рпъ отъ ни́хъ Бо́жій ра́зумъ, сла́вне апо́столе, земны́я привле́клъ еси́ невѣ́ріемъ твои́мъ вѣ́рныя на вѣ́ру; ко́піями же бодо́мь по всему́ тѣ́лу, просвѣща́еши всѣ́хъ ду́ши, похваля́ющихъ свято́е успе́ніе твое́. [Два́жды.]

Сла́ва, и ны́нѣ, богоро́диченъ:

Наде́ждо непосты́дная надѣ́ющихся на Тя́, еди́на Ро́ждшая па́че естества́ пло́тію Христа́ Бо́га на́шего, Того́ со святы́ми апо́столы моли́ пода́ти вселе́ннѣй очище́ніе прегрѣше́ній и всѣ́мъ на́мъ пре́жде конца́ житія́ исправле́ніе.

По поліеле́и сѣда́ленъ, гла́съ 3. Подо́бенъ: Бо́жіей вѣ́рѣ.

Бо́жія Ду́ха свѣтозаре́ніемъ тму́ разруши́лъ еси́ многобо́жія и вѣ́рныхъ сердца́ просвѣти́лъ еси́, воспѣ́въ спасе́нная повелѣ́нія, апо́столе Ѳомо́ прему́дре, Христа́ Бо́га моли́ дарова́ти на́мъ ве́лію ми́лость. [Два́жды.]

Сла́ва, и ны́нѣ, богоро́диченъ:

Кíйждо, идѣ́же спаса́ется, та́мо пра́ведно и притека́етъ; и ко́е ино́е таково́е прибѣ́жище, я́ко Ты́, Богоро́дице, покрыва́ющее ду́ши на́ша?

Степе́нна, 1-й антифо́нъ 4-го гла́са. Проки́менъ, гла́съ 4: Во всю́ зе́млю [изы́де вѣща́ніе и́хъ,* и въ концы́ вселе́нныя глаго́лы и́хъ]. Сти́хъ: Небеса́ повѣ́даютъ [сла́ву Бо́жію, творе́ніе же руку́ Его́ возвѣща́етъ тве́рдь]. Вся́кое дыха́ніе... Ева́нгеліе Іоа́нна, зача́ло 67.

По 50-мъ псалмѣ́ стихи́ра, гла́съ 4:

Христо́съ — вели́кое Со́лнце, лучу́ тя́ многосвѣ́тлую, во Индíю посыла́етъ, мра́чную ле́сть, таи́нниче, вско́рѣ разгоня́юща, Ѳомо́ прему́дре апо́столе, и лю́ди просвѣща́юща, Тро́ицу почита́ти Боже́ственную, Еюже вси́ сохраня́емся.

Кано́нъ Богоро́дицы, со ирмосо́мъ на 6, и апо́стола на 8, его́же краегране́сіе: Чуде́съ по́лному Ѳомѣ́ дивлю́ся. Ѳеофа́ново. Гла́съ 4.

Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Безнача́льна Сы́на Бо́жія, Бо́га Сло́ва, я́вльшагося на земли́, зра́комъ Су́щимъ по на́мъ, Его́же ви́дѣлъ еси́, сла́вне, Его́же и ру́ки дла́нію, и ребро́ осяза́лъ еси́, умоли́ спасти́ па́ству твою́.

Зна́тель та́йныхъ, и утро́бы истязу́яй, и сердца́ испыту́я, Бо́гъ мо́й Іису́съ, тя́, Ѳомо́ всеблаже́нне, Своего́ Богоявле́нія служи́теля, и свидѣ́теля, и апо́стола боже́ственна прія́тъ.

Во́дъ та́инственныхъ рѣка́ ты́ показа́лся еси́, напая́ющая, Ѳомо́, лице́ земли́; церко́вный же со́нмъ струя́ми богозна́нія и шу́момъ Ду́ха многобо́жную пре́лесть отгна́лъ еси́.

Богоро́диченъ: Сме́рти и тли́ потреби́тельница су́щи, нетлѣ́нія исто́чникъ ро́ждшая, Христа́, Богоро́дице Всепѣ́тая, и безсме́ртія украси́вшаго благода́тію человѣ́ческое естество́, Пречи́стая.

Катава́сія: Отве́рзу уста́ моя́...

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́біе.

Добродѣ́тели добро́тою благолѣ́пенъ сы́й подо́бяся самови́дче, и чудесы́, индíовъ злови́дное свѣ́томъ Боже́ственнымъ озари́въ, и вѣ́рою просвѣти́лъ еси́ тѣ́хъ помраче́ніе.

Заре́ю разже́гся самодѣ́тельствомъ Ду́ха, я́ко стрѣла́ богосвѣ́тлая, по́сланъ бы́лъ еси́, богопрія́тне, и мíръ просвѣти́лъ еси́, Ѳомо́, чудесы́.

Тайнонауче́нъ Боже́ственныя му́дрости догма́томъ, я́коже ско́рость мо́лніи преходя́щія, апо́столе Ѳомо́, свѣ́томъ просвѣти́лъ еси́ мíра концы́.

Богоро́диченъ: Неискусобра́чная, Бо́га пло́тію ро́ждши, страсте́й прило́ги коле́блема мя́ утверди́: нѣ́сть бо, Пречи́стая, ра́звѣ Тебе́ помо́щницы.

Сѣда́ленъ, гла́съ 8. Подо́бенъ: Прему́дрости.

Мре́жею слове́съ боже́ственныхъ ры́бы улови́въ слове́сныя, сія́ прине́слъ еси́ нача́токъ Бо́гу на́шему, и въ Христо́вы я́звы жела́я облещи́ся, подо́бникъ стра́сти Его́ яви́лся еси́. Тѣ́мъ, соше́дшеся по до́лгу, чти́мъ, апо́столе сла́вне, всепра́зднственную па́мять твою́ и согла́сно вопіе́мъ ти́: моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене Ро́ждшую Бо́га пло́тію, вси́ ублажа́емъ ро́ди человѣ́честіи: о́гнь бо всели́ся въ Тя́ Божества́, и я́ко младе́нца, дои́ши Зижди́теля и Го́спода. Тѣ́мъ а́нгельскій и человѣ́ческій ро́дъ досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́, во о́блацѣ ле́гцѣ пріи́де Іису́съ Пребоже́ственный нетлѣ́нною дла́нію и спасе́ зову́щія: сла́ва, Христе́, си́лѣ Твое́й.

Велича́йшимъ чуде́съ явле́ніемъ наче́нъ и догма́товъ боже́ственныхъ сла́ву свѣ́тлѣ излага́я, вселе́нную объя́лъ еси́ проповѣ́даніемъ, взыва́ющу: сла́ва, Христе́, си́лѣ Твое́й.

Яко самови́дца тя́ Сло́ва и те́плаго служи́теля, и Того́ сла́вы и вели́чествія свидѣ́теля, и я́ко вѣ́рна строи́теля, и апо́стола восхваля́емъ тя́, блаже́нне Ѳомо́, всече́стне.

Якоже невѣ́стный черто́гъ и ски́нію небе́сную, основа́ніе на Ка́мени краеуго́льнѣмъ утверди́въ, назда́лъ еси́, блаже́нне всеприснопа́мятне, зову́щимъ: сла́ва, Христе́, си́лѣ Твое́й.

Богоро́диченъ: Зе́млю неора́нную, Кла́съ жи́зни воздѣ́лавшую, и о́блакъ ле́гкій, ту́чу, Жизнода́вца источи́вшую, Всесвяту́ю Дѣ́ву имену́емъ, зову́ще: сла́ва, Христе́, си́лѣ Твое́й.

Пѣ́снь 5.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы Сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Осія́нъ, апо́столе, сла́вою Христо́вою, и ребро́ животво́рное осяза́въ, поче́рплъ еси́ неизслѣ́димую богосло́вія пучи́ну и мíръ обогати́лъ еси́.

Не прише́дъ къ пе́рвому Твоему́ вхо́ду Ѳома́, не вѣ́руя же ученико́мъ, вѣ́ровавъ же послѣди́, ра́дуяся, возопи́, Тя́, Бо́га и Го́спода возвѣща́я, Многоми́лостиве.

Яко не́бо одушевле́нное, сла́ву Твою́, Христе́, гро́момъ духо́внымъ Ѳома́ возопи́, исповѣ́дуя и Бо́га, и Го́спода, Тя́ вѣ́рнымъ благовѣсти́.

Богоро́диченъ: Побѣди́теля покажи́, Всенепоро́чная, у́мъ страсте́й и помышле́ній стремле́нія покори́ си́хъ, Богоневѣ́сто, Бо́га Ро́ждшая, Спаси́теля ду́шъ на́шихъ.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Всѣ́хъ невѣ́ріе, Ѳомо́, душегу́бное, невѣ́рованіе твое́, блаже́нне, исцѣля́етъ: ты́ бо несумнѣ́нно гвозде́й же и копія́ я́звы испыта́лъ еси́.

Испусти́лъ еси́, я́ко си́ленъ, Христе́, апо́стола, я́ко стрѣ́лу изощре́ну, въ сердца́ вра́гъ Твои́хъ, Жизнода́вче, и коры́стей объя́тіе Тебѣ́ си́хъ приведе́.

Же́ртвы и́дольскія, Ще́дре, упраздни́лъ еси́, закла́нъ бы́въ на Дре́вѣ, и заколе́ніи святы́ми богоглаго́ливыхъ апо́столъ, подража́ющихъ Твоя́ страда́нія.

Богоро́диченъ: О чу́до, всѣ́хъ чуде́съ новѣ́йшее! Яко Дѣ́ва во утро́бѣ вся́ческая Содержа́щаго, неискусому́жно заче́нши, не тѣсновмѣсти́.

Конда́къ, гла́съ 4. Подо́бенъ: Яви́лся еси́ дне́сь.

Прему́дрости благода́ти испо́лненъ, Христо́въ апо́столъ и служи́тель и́стинный, въ покая́ніи вопія́ше Тебѣ́: Ты́ мо́й еси́ Бо́гъ же и Госпо́дь.

Икосъ:

Госпо́дню ученику́ и вели́кому тайноповѣ́дателю, Ѳомѣ́ богоглаго́ливому, Пе́тръ возопи́: ви́дѣхомъ Го́спода. Рече́ же то́й: а́ще не ви́жду а́зъ я́звы ру́къ Его́, не увѣ́рую, вопія́ше Близне́цъ. Тогда́ Влады́ка всѣ́хъ, я́коже ра́бъ пріи́де, хотя́ спасти́ вся́, и глаго́летъ Ѳомѣ́: осяжи́ ру́ки Моя́ и ре́бра и не не вѣ́руй: Азъ бо е́смь Госпо́дь и Бо́гъ тво́й. Онъ же съ покая́ніемъ возопи́: Ты́ мо́й еси́ Бо́гъ же и Госпо́дь.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Съ вы́шними ликостоя́ньми, я́ко апо́столъ, ра́дуяся, лику́еши, блаже́нне, на небесѣ́хъ, воспѣва́еши же, веселя́ся: благослове́нъ еси́ въ хра́мѣ сла́вы Твоея́, Го́споди.

Отъ коне́цъ до коне́цъ протече́ твое́ вѣща́ніе и глаго́лъ твои́хъ боже́ственныхъ предложе́ніе, зову́щія науча́ющее: благослове́нъ еси́ въ хра́мѣ сла́вы Твоея́, Го́споди.

Хра́мъ бы́лъ еси́ ты́ Тро́ицы, прехва́льне, тѣ́мже и хра́мы и́дольскія и куми́ры разруши́лъ еси́, апо́столе, хра́мы же воздви́гъ во сла́ву и хвалу́ Христа́ Бо́га.

Богоро́диченъ: Зако́нныя рабо́ты Твои́мъ Рождество́мъ изба́вихомся: Ты́ бо, Богоро́дице, Изба́вителя неискусому́жно на́мъ родила́ еси́. Благослове́нна Ты́ въ жена́хъ еси́, Всенепоро́чная Влады́чице.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте дѣла́ и превозноси́те Его́ во вся́ вѣ́ки.

Съ Бо́гомъ бесѣ́дуя вопло́щшимся, пло́ть забы́въ, яви́лся еси́, блаже́нне, премíрнымъ же обоже́ніемъ обогати́лся еси́, приближе́ніемъ къ Бо́гу боготвори́мь, и, Го́спода по́йте, зовя́, и превозноси́те Его́ во вся́ вѣ́ки.

Любо́вію Христу́ сочета́вся, сме́рть съ Ни́мъ, блаже́нне, возлюби́лъ еси́, и со апо́столомъ Твои́мъ и́демъ, вѣща́въ, и съ ни́мъ сме́рть пріи́мемъ: Го́спода по́йте, вопія́, и превозноси́те Его́ во вся́ вѣ́ки.

Ва́съ Христо́съ апо́столы, о́блаки во́льнаго дождя́ показа́, ту́чами наводня́ющія боже́ственнаго позна́нія Це́ркви, прему́дріи, и напая́ющія пою́щихъ: Го́спода по́йте дѣла́ и превозноси́те Его́ во вся́ вѣ́ки.

Богоро́диченъ: Поро́ковъ и скве́рнъ чиста́ и вся́кія святы́ни еси́ хра́мъ, Сло́во Всесвято́е, вся́ освяща́ющее, Отцу́ Собезнача́льное, породила́ еси́. Тѣ́мъ Тя́, Дѣ́во, пое́мъ и превозно́симъ во вся́ вѣ́ки.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Колесни́ца свѣтоно́сная яви́лся еси́ сѣдя́щаго Сло́ва, на благолѣ́пнѣйшей твое́й души́ и богоно́снѣй носи́ма, ко спасе́нію, сла́вне, направля́я пою́щихъ тя́.

Твою́ преблаже́нную па́мять соверша́юще, мо́лимъ вся́каго треволне́нія изба́витися хода́тайствомъ дерзнове́нія твоего́, е́же, я́ко Христо́въ апо́столъ, и́маши, богови́дче всече́стне.

Дне́сь па́мять твою́ вси́, Ѳомо́ апо́столе, соверша́емъ, освяти́ и просвѣти́ вѣ́рою искуше́ній, и обстоя́ній, и страсте́й вся́кихъ избавля́я моли́твами твои́ми.

Богоро́диченъ: Красе́нъ прозябе́ Кла́съ отъ земли́ дѣви́ческія, Бо́жіе Сло́во, Имже пита́емся вѣ́рніи, въ Не́мже и живе́мъ и составля́емся. Тѣ́мъ Тя́, Ро́ждшую, я́ко Богоро́дицу велича́емъ.

Свѣти́ленъ. Подо́бенъ: Жены́ услы́шите.

Самови́дче и апо́столе Христа́ Всеще́драго, ми́ръ дарова́ти все́й вселе́ннѣй и побѣ́ды Христолюби́вому Импера́тору на́шему, и прегрѣше́ній оставле́ніе, и спасе́ніе испроси́, тя́, Ѳомо́, восхваля́ющимъ я́ко ученика́ богоглаго́лива.

Сла́ва, другíй. Подо́бенъ: Ду́хомъ.

Яко со́лнце восто́ка, индíомъ посла́ся, Ѳомо́ апо́столе, пресвѣ́тлое, апо́столовъ сла́во, и тѣ́хъ омраче́ніе свѣ́томъ слове́съ твои́хъ и Тро́ическою вѣ́рою просвѣти́лъ еси́. Тѣ́мъ святу́ю твою́ и боже́ственную пра́зднуемъ па́мять.

И ны́нѣ, богоро́диченъ:

Моле́бницу Ти́ приво́димъ и те́плую засту́пницу, Пречи́стую Ма́терь Твою́, вѣ́рніи по до́лгу: сподо́би рабы́ Твоя́ причасти́тися сла́вы Твоея́, Христе́, и пра́ведныхъ наслѣ́дія, и пи́щи ра́йскія, и да́ждь Ца́рство небе́сное.

На хвали́техъ стихи́ры на 4, самогла́сны, гла́съ 1. Анато́ліево:

Христу́ послѣ́довалъ еси́, Ѳомо́ апо́столе, и мíра небре́глъ еси́, и Того́ уче́нія въ сокро́вищи твое́мъ сокры́въ, яви́лся еси́ апо́столъ. Тѣ́мъ бы́въ во язы́цѣхъ, и тѣ́хъ ле́стію и страстьми́ омраче́нныя ду́ши, за́повѣдьми Спа́совыми просвѣти́лъ еси́, вѣ́ровати въ Тро́ицу Единосу́щную. [Два́жды.]

Гла́съ 4:

Ра́зума Боже́ственнымъ огне́мъ ду́шу просвѣти́лъ еси́, во все́мъ Влады́цѣ подража́тель бы́лъ еси́, я́ко зако́ненъ учени́къ, Ѳомо́ апо́столе: кре́стною бо тро́стію изъ глубины́ невѣ́дѣнія нечести́выхъ ду́ши извле́клъ еси́. Тѣ́мъ и индíовъ омраче́нную со́вѣсть Боже́ственнаго Ду́ха у́дицею улови́лъ еси́. Христа́ Бо́га при́сно моли́ и на́мъ изба́витися отъ вра́жія помраче́ннаго ви́да и спасти́ся душа́мъ на́шимъ.

Лови́твенную глубину́ оста́вивъ, ко кре́стнѣй тро́сти вѣ́рою прите́клъ еси́ и тѣ́мъ вся́ улови́лъ еси́, Ѳомо́ апо́столе. Тѣ́мъ и пречи́стая ре́бра Сло́ва руко́ю осяза́въ, вонзе́ныхъ гвозди́нныхъ я́звъ пе́рстомъ ви́дѣти сподо́бился еси́. Христа́ Бо́га прилѣ́жно моли́ всегда́, спасти́ ду́ши на́ша.

Сла́ва, гла́съ 6:

На колесни́цѣ добродѣ́телей ѣ́здя, я́ко колесни́чникъ Илія́, показа́лся еси́, Боже́ственнаго Ду́ха огне́мъ разгара́емь, Ѳомо́ апо́столе: глубину́ бо разу́мнаго мо́ря изслѣ́дуя, ры́бы уловля́лъ еси́, преводя́ си́хъ отъ сме́рти къ животу́. Тѣ́мъ и вѣ́рныхъ ду́ши просвѣща́я, тро́стію кре́стною отъ смертоно́сныя пре́лести къ животу́ возве́лъ еси́; и со безпло́тными Христу́ предстоя́, прилѣ́жно Того́ моли́ о спасе́ніи ду́шъ на́шихъ.

И ны́нѣ, богоро́диченъ.
Славосло́віе вели́кое. [Ектеніи́.] И отпу́стъ.



НА ЛИТУРГІИ,

Блаже́нна, пѣ́снь 3-я и 6-я, на 8. Проки́менъ, гла́съ 8: Во всю́ зе́млю изы́де вѣща́ніе и́хъ, и въ концы́ вселе́нныя глаго́лы и́хъ. Сти́хъ: Небеса́ повѣ́даютъ сла́ву Бо́жію, [творе́ніе же руку́ Его́ возвѣща́етъ тве́рдь]. Апо́столъ къ Кори́нѳяномъ, зача́ло 131. Аллилу́ія, гласъ 1: Исповѣ́дятъ небеса́ чудеса́ Твоя́, Го́споди, [и́бо и́стину Твою́ въ це́ркви святы́хъ. Сти́хъ: Бо́гъ прославля́емь въ совѣ́тѣ святы́хъ]. Ева́нгеліе Іоа́нна, зача́ло 65. Прича́стенъ: Во всю́ зе́млю [изы́де вѣща́ніе и́хъ, и въ концы́ вселе́нныя глаго́лы и́хъ].

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 66-73.

/ Къ оглавленію раздѣла /


Наверхъ / Къ титульной страницѣ

0