Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 22 октября 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 5-й де́нь.
Святы́я му́ченицы Харити́ны.

[ВЕЧЕРЪ,]
На Го́споди воззва́хъ: стихи́ры, гла́съ 4. Подо́бенъ: Яко до́бля.

Ра́дости я́ко тезоимени́тая,* ра́достію пресели́лася еси́* въ черто́гъ, всечестна́я, небе́сный,* идѣ́же твое́ возлюби́ла еси́ стяжа́ти житіе́,* претерпѣ́вши огня́* болѣ́зненное и́стинно муче́ніе,* зубо́въ у́бо и ногте́й всѣ́хъ искорене́нія,* страстоте́рпице Харити́но,* дѣвому́ченице многострада́льная.

Льво́въ сломи́ла еси́ че́люсти, многострада́льная,* че́люстей терпя́щи сокруше́нія,* и ногте́й истерза́нія* до́блественно терпѣ́ла еси́,* искореня́ющи лю́тая пре́лести свирѣ́пства,* въ морскíя же вве́ржена глубины́,* зло́бу потопля́ему творя́щи* лука́ваго ратобо́рца.

По кончи́нѣ блаже́ннѣй,* въ мо́ре тя́ вве́ржену,* тво́й роди́тель, сла́вная,* прія́тъ тя́, вопія́ со у́жасомъ:* ка́ко ны́нѣ облагода́тствися,* свяще́ннѣйшее мое́ и люби́мое рожде́ніе,* му́ками честна́го страда́нія* и нарече́ніе и́стинное содѣ́лала еси́,* прообрази́вшее благода́тію?

Сла́ва, и ны́нѣ, богоро́диченъ:

Ту́чами Ду́ха Пресвята́го, Пречи́стая,* мою́ мы́сль ороси́,* Яже ка́плю ро́ждшая, Христа́,* неизче́тно безмѣ́рная беззако́нія человѣ́ковъ* щедро́тами измы́вшую;* изсуши́ исто́чникъ страсте́й мои́хъ* и пото́ка мя́ сподо́би* пи́щи живы́я при́сно* моли́твами Твои́ми.

Крестобогоро́диченъ, подо́бенъ то́йже:

Агнца и Па́стыря, Тя́* на дре́вѣ я́ко ви́дѣ,* Агница ро́ждшая рыда́ше* и ма́терски Ти́ вѣща́ше:* Сы́не возжелѣ́нне,* ка́ко на дре́вѣ кре́стнѣмъ повѣ́шенъ еси́, Долготерпѣли́ве?* Ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?

Тропа́рь, гла́съ 4:

Агница Твоя́, Іису́се, Харити́на, зове́тъ ве́ліимъ гла́сомъ: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нію Твоему́, и стражду́ Тебе́ ра́ди, я́ко да ца́рствую въ Тебѣ́, и умира́ю за Тя́, да и живу́ съ Тобо́ю; но, я́ко же́ртву непоро́чную, пріими́ мя, съ любо́вію поже́ршуюся Тебѣ́. Тоя́ моли́твами, я́ко Ми́лостивъ, спаси́ ду́ши на́ша.


НА УТРЕНИ,
Оба кано́на окто́иха и святы́я кано́нъ на 4, его́же краегране́сіе: Харити́ны благода́ть пою́ любо́вію. Іо́сифъ. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Твои́ми, о Харити́но, дарова́ніи у́мъ мо́й облагода́тельствуй, облагода́тившися страда́ньми свяще́нными, свяще́нно воспѣва́ти тя́ я́ко страстоно́сицу, и му́ченицу, и дѣ́вствомъ сія́ющую.

Благода́ть Пресвята́го Ду́ха тя́ одарова́вши, радостотво́рными украси́ плете́ньми и ра́дость вѣ́чнующую наслѣ́дити укрѣпи́, мужему́дренно пострада́вшую.

На Крестѣ́ Тя́ воздви́жена, Влады́ко, разумѣ́вши благосла́вная Твоя́ му́ченица, ра́ны терпи́тъ болѣ́зненныя, укрѣпля́ема си́лою Твое́ю, на́ше естество́ укрѣпи́вшаго.

Богоро́диченъ: Село́ вмѣсти́тельно была́ еси́ Боже́ственнаго Естества́, Богороди́тельнице Чи́стая. Тѣ́мъ Харити́на, лю́бящи Тя́, дѣ́вственно вслѣ́дствовавши Тебѣ́, Сы́ну Твоему́ приведе́ся.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Вже́гшее твою́ ду́шу жела́ніе боже́ственное плотска́я раче́нія и лю́тая врѣ́нія му́къ погаси́.

Разсѣ́дшася предъ нога́ми твои́ми му́ченическими врага́ зря́ще Христо́вою благода́тію, хвале́нія Ему́ прино́симъ.

Крѣ́постію Вседѣ́тельною вражде́бную главу́ сокруши́ла еси́, твоея́ главы́ претерпѣ́вши, му́ченице, крѣ́пко пожже́ніе.

Богоро́диченъ: Еди́ну въ жена́хъ, Благослове́нную Тя́, Чи́стая, лю́бящи, Твои́ми благи́ми благода́тьми му́ченица Харити́на просла́вися.

Сѣда́ленъ, гла́съ 4. Подо́бенъ: Удиви́ся Іо́сифъ.

Облагода́тствивши ду́шу твою́ богода́нными добродѣ́тельми, просвѣти́лася еси́ и́стинно муче́ніемъ твои́мъ, честна́я, и уневѣ́стилася еси́ Творцу́ твоему́, нетлѣ́нна чистото́ю пребы́вши, Харити́но, тѣ́мъ врага́ попра́ла еси́, многови́дная страда́нія же и болѣ́зни преодолѣ́нно претерпѣ́вши. Сего́ ра́ди вѣ́рою пресвяту́ю твою́ па́мять торжеству́емъ.

Сла́ва, и ны́нѣ, богоро́диченъ:

Удиви́ся Іо́сифъ, е́же па́че естества́ зря́ и внима́ше мы́слію, и́же на руно́ до́ждь, въ безсѣ́менномъ зача́тіи Твое́мъ, Богоро́дице, купину́, огне́мъ неопали́мую, же́злъ Ааро́новъ прозя́бшій, и, свидѣ́тельствуя, обру́чникъ Тво́й и храни́тель свяще́нникомъ взыва́ше: Дѣ́ва ражда́етъ и по Рождествѣ́ па́ки Дѣ́ва пребыва́етъ.

Крестобогоро́диченъ:

Дѣ́ва и Агница, ви́дѣвши на Крестѣ́, безъ сѣ́мене изъ Нея́ Агнца ро́ждшагося и копіе́мъ прободе́на, печа́ли уя́звлена стрѣла́ми, вопія́ше болѣ́зненно, восклица́ющи: что́ но́вое та́инство? Ка́ко умира́еши, Иже живота́ еди́нъ Госпо́дь? Тѣ́мже воскресни́, па́дшаго воздвиза́я пра́отца.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Же́ртву я́ко непоро́чну, къ заколе́нію тя́ изъ оте́ческихъ, му́ченице страстоно́сице, восхи́тиша ру́къ мучи́тели, Отца́ Небе́снаго зѣло́ возлюби́вшую.

Отрокови́цамъ му́дрымъ послѣ́довавши, душе́вную свѣщу́ твою́ бога́тно кровьми́ напои́ла еси́, всесла́вная, и боже́ственный наслѣ́довала еси́, му́ченице радостоимени́тая, черто́гъ.

Се́рдце твое́, раче́ніемъ Женихо́вымъ распаля́емо, у́гліе пре́лести, доблему́дренная, проли́тіемъ погаси́ кро́ве и мо́ре многобо́жія изсуши́.

Богоро́диченъ: Воплоще́ннаго родила́ еси́ Бо́жія Сло́ва, Богороди́тельнице Чи́стая; Его́же Харити́на, лю́бящи теплѣ́йше, огню́ противоополчи́ся и многови́днымъ му́камъ.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Главы́ остриже́ніемъ и у́глія разжже́ніемъ оскорбля́юще тя́, богому́драя, ра́зума твоего́ крѣ́пости ника́коже поколеба́ша.

Гво́здіе Твое́ и заколе́ніе прообразу́ющи, Го́споди, разжже́нныхъ рожно́въ терплю́ болѣ́знь, — му́ченица вопія́ше.

Отто́рженнымъ ру́къ твои́хъ и но́гъ, дѣ́во чи́стая, ногте́мъ, теку́щею честно́ю твое́ю кро́вію вѣ́рныя освяти́ла еси́ и де́монскія кро́ве мíръ христоподо́бно очи́стила еси́.

Богоро́диченъ: Умъ земны́й Твоего́ па́че естества́ зача́тія не мо́жетъ разумѣ́ти, Ма́ти Дѣ́во, Отрокови́це: Бо́га бо родила́ еси́.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Благода́тьми и зна́меніи Христо́съ вѣнча́ свяще́нную твою́ главу́, за Него́же пострада́ти изво́лила еси́, страстоте́рпице, ра́дости боже́ственныя тезоимени́тая.

Іо́ну изъ глубины́ Изба́вивый, и тебе́, въ морску́ю пучи́ну вве́рженную, спаса́етъ жи́ву, богому́драя, и глубино́ю крове́й твои́хъ врага́ погрузи́лъ е́сть.

Ору́жіемъ терпѣ́нія враги́ умертви́ла еси́ и, терпя́щи зубо́въ всеконе́чное истерза́ніе, сла́вная, льво́въ безпло́тныхъ че́люсти сломи́ла еси́.

Богоро́диченъ: Крѣ́пость Тя́ обрѣ́тши, Дѣ́во, и утвержде́ніе, Харити́на страстоте́рпица му́ки крѣ́пко терпи́тъ и, ра́дующися, во слѣ́дъ Тебе́, всѣ́хъ Влады́цѣ, приво́дится.

Конда́къ, гла́съ 2. Подо́бенъ: Вы́шнихъ ища́.

Крѣ́пкимъ ра́зумомъ, Харити́но, ду́шу утве́рждши вѣ́рою, бори́теля врага́ я́вѣ посрами́ла еси́, у Христа́ предста́, всеблаже́нная, червлени́цу отъ крове́й твои́хъ нося́щи, и при́сно со а́нгелы ра́дуешися, моли́ за ны́, страстоте́рпице.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Юныя три́ о́троки отъ пе́щи Изба́вивый спаса́етъ отъ колесе́ тя́, му́ченице, огневи́днаго, благода́рственно воспѣва́вшую: благослове́нъ еси́ въ хра́мѣ сла́вы Твоея́, Го́споди.

Съ дѣ́вами, свѣщено́сица, на небе́сная восхо́диши, о́гненныя свѣщи́ крѣ́пко, внегда́ пѣ́ти, терпѣ́ла еси́: благослове́нъ еси́ въ хра́мѣ сла́вы Твоея́, Го́споди.

Обличе́нъ терпѣ́ніемъ твои́мъ пребеззако́нный, ру́цѣ связу́етъ и но́зѣ, и во глубины́ вмета́етъ тя́, пою́щую: благослове́нъ еси́ въ хра́мѣ сла́вы Твоея́, Го́споди.

Сло́вомъ твои́мъ боже́ственнымъ безслове́сіе враго́въ обличи́ла еси́, страсте́й страстьми́, му́ченице, животво́рныхъ испо́лнила еси́ лише́ніе, — благослове́нъ еси́, — зову́щи, — Бо́же мо́й, Го́споди.

Богоро́диченъ: Дѣ́ву еди́ну, я́ко чи́сту Тя́ и нетлѣ́нну, Сло́во чи́стое возлюби́ и изъ Тебе́ возсозда́ Воплоща́емый, Отрокови́це, всего́ человѣ́ка, Харити́ну просла́вивъ чудесы́.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Красна́ добро́тами твои́хъ я́звъ была́ еси́ и причта́лася еси́, дѣ́во, нетлѣ́нна пребы́вши, кра́сному Сло́ву, всечестна́я, отъ Дѣ́вы на́съ ра́ди воплоще́нному Христу́, Ему́же вопіе́мъ: благослови́те вся́ дѣла́ Госпо́дня Го́спода.

Всѣ́ми бори́ма прило́ги му́чащихъ тя́, до́блественно претерпѣ́ла еси́ колесе́ паля́ща лю́тость, рожно́въ разжже́нія, въ глубину́ вверже́ніе и зубо́въ, честна́я, и ногте́й искорене́нія, Христа́ велича́ющи во вѣ́ки.

Но́зѣ твои́ добро́тами болѣ́зней, сла́вная, украси́стѣся, тѣ́мъ, на во́ды ступа́ющи, не омокри́стѣся, съ тобо́ю пребыва́ющимъ, дѣ́во му́ченице, сла́внымъ Бо́жіимъ а́нгеломъ, съ ни́миже вопія́ла еси́: благослови́те вся́ дѣла́ Госпо́дня Го́спода.

Чу́до, удивля́ющее вся́къ у́мъ по сконча́ніи, ка́ко роди́телю издаде́ мо́щи твоя́ глубина́ пріе́мшая, я́же погребе́ оте́чески, сокро́вищствуетъ благода́ть отъ тебе́, Харити́но, Ца́рство пріи́мъ небе́сное.

Богоро́диченъ: Яви́лася еси́ превы́шшая небе́съ, Бо́га небе́снаго поро́ждши, онебеси́вшаго земноро́дныхъ, Пречи́стая, все́ смѣше́ніе, и Харити́ны честну́ю па́мять просвѣти́вша, Ему́же пои́мъ: благослови́те вся́ дѣла́ Госпо́дня Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Да вѣнце́въ сла́вы, я́ко нетлѣ́нная, дѣ́во му́ченице, получи́ши, вся́кихъ муче́ній ви́дъ претерпѣ́ла еси́, веселя́щися ду́хомъ и ра́зума тве́рдостію.

Яко удобре́ная, и кра́сная, и богоуго́дная дѣ́ва, я́ко непобѣди́мая му́ченица и Влады́чня невѣ́ста непоро́чная, златови́дными крилы́ къ небе́снымъ возлетѣ́ла еси́.

Ты́, свѣтови́дная страстоте́рпице, возсія́ла еси́ луча́ми, мра́къ лука́вствія де́моновъ и страсте́й отго́ниши богода́нными ти́ всегда́ чудодѣ́йствы, досточу́дная.

Ра́достный тво́й де́нь, веселя́щися, лю́ди совокупля́етъ твоя́ до́блести воспѣ́ти, и по́двиги, и боре́нія, и му́жественное страда́ніе, великому́ченице радостотезоимени́тая.

Богоро́диченъ: Свѣ́тъ на́мъ возсія́ изъ утро́бы неискусобра́чныя Твоея́, Дѣ́во, Его́же сія́ньми озари́вшися боже́ственно, свѣ́тъ бы́сть ра́дости, тезоимени́тая, Богороди́тельнице Неискусобра́чная.

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 53 об. – 57.

/ Къ оглавленію раздѣла /


Наверхъ / Къ титульной страницѣ

0