Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 5-й де́нь.
Па́мять преподо́бныхъ оте́цъ на́шихъ Даміа́на пресви́тера, Матѳе́я и Іеремíи прозорли́выхъ.

ВЕЧЕРЪ,
На Го́споди воззва́хъ: стихи́ры на 6, гла́съ 4. Подо́бенъ: Яко до́бля.

Ду́ха Пресвята́го благода́тію* озари́въ свою́ ду́шу, Іеремíе прехва́льне,* прія́лъ еси́ да́ръ отъ Бо́га* бу́дущая, я́ко настоя́щая, провозвѣща́ти,* и дре́внему подо́бяся проро́ку,* нело́жнѣ вся́ предска́зовалъ еси́,* и прови́дѣлъ еси́ та́йны человѣ́ческаго се́рдца,* озаре́ніемъ твои́мъ и на́ша сердца́ просвѣти́* и испроси́ отъ Христа́ Бо́га ве́лію ми́лость. [Два́жды.]

Матѳе́ю, сло́ва Бо́жія провозвѣ́стнику, послѣ́довалъ еси́ чу́дне,* я́коже бо то́й еѳіо́пскія непокаря́ющіяся лю́ди* дерзнове́нно облича́ше,* та́ко и ты́, блаже́нне,* подзе́мныхъ лука́выхъ еѳіо́повъ посрами́лъ еси́ хитроплете́нныя ко́зни.* И ны́нѣ мо́лимъ тя́, о́тче,* мы́сленнѣ очерня́ющія у́мы на́ша* бѣсо́вскія полки́ прожени́,* и изба́ви отъ бѣ́дъ ду́ши на́ша. [Два́жды.]

Сла́ва, гла́съ 2:

Тро́ицу достоблаже́нныхъ оте́цъ, Тро́ицы предста́тели, Даміа́на, и Іеремíю, и Матѳе́я, пріиди́те, лю́діе, хвала́ми почти́мъ и принесе́мъ славосло́віе въ вы́шнихъ су́щему Бо́гу, да́вшему уго́дники Своя́ Россíйстѣй земли́ въ по́мощь, и моли́твенники о душа́хъ на́шихъ.

И ны́нѣ, богоро́диченъ.

На стихо́внѣ въ окто́ихѣ. Сла́ва, гла́съ 6:

Свѣ́тлая и свѣтоно́сная возсія́ дне́сь па́мять ва́ша, отцы́ на́ши всеблаже́нніи, свѣ́тло бо облиста́ете чуде́съ луча́ми, къ ва́мъ приходя́щихъ и прося́щихъ отъ ва́съ те́плаго заступле́нія. Тѣ́мъ у́бо и мы́ припа́даемъ къ моще́мъ ва́шимъ, усе́рдно ты́я лобыза́юще, и сла́вимъ Бо́га, да́вшаго ва́мъ толи́ка дарова́нія, и́миже и на́съ обогати́те и испроси́те отъ Христа́ ве́лію ми́лость.

И ны́нѣ, богоро́диченъ.

Тропа́рь, гла́съ 1:

Христо́выхъ повелѣ́ній свѣ́томъ сердца́ своя́ просвѣти́вше, стра́стный мра́къ прогна́сте, тѣ́мже Тро́ицы селе́ніе бы́сте тричи́сленніи отцы́, Даміа́не, Іеремíе съ Матѳе́емъ, отъ Нея́же благода́ть пріе́мше, неду́жныя исцѣля́ете, бу́дущая возвѣща́ете, и а́нгеломъ соприча́стницы су́ще, моли́теся Христу́ Бо́гу дарова́ти на́мъ прича́стіе святы́хъ.


[НА УТРЕНИ,
Кано́нъ [преподо́бнымъ отце́мъ], гла́съ 5.

Пѣ́снь 1.

Ирмо́съ: Спаси́телю Бо́гу, въ мо́ри лю́ди немо́крыми нога́ми наста́вльшему и фарао́на со всево́инствомъ пото́пльшему, Тому́ еди́ному пои́мъ, я́ко просла́вися.

Спаси́телю Бо́гу хвале́ніе принесе́мъ, славосло́вяще уго́дника Его́ преблаже́ннаго Даміа́на, неду́жнымъ му́драго врача́, и возопіи́мъ Да́вшему такова́я дарова́нія, я́ко просла́вися.

Наста́вника своего́ равноа́нгельному житію́ подража́лъ еси́ ре́вностію непреста́нною, отъ него́же наста́вленъ, украси́лся еси́ добродѣ́телію, немо́лчно во хвале́ніи по вся но́щи безъ сна́ пребыва́я и взыва́я Бо́гу, я́ко просла́вися.

Съ проро́ки предстоя́ ны́нѣ Спаси́телю Бо́гу, я́ко дерзнове́ніе имы́й, моли́ся благода́тію облиста́ти сердца́, вѣ́рою тя́, богодухнове́нне Іеремíе, блажа́щихъ и Спаси́телю вопію́щихъ, я́ко просла́вися.

Всеви́дящее о́ко Бо́жіе, ви́дя твое́ чи́стое се́рдце, блаже́нне Матѳе́е, даде́ тебѣ́ да́ръ та́йны человѣ́ческія вѣ́дати и открыва́ти на по́льзу всѣ́мъ, да тобо́ю наставля́еми пою́тъ Бо́гу, я́ко просла́вися.

Богоро́диченъ: Разу́мное со́лнце су́щи Дѣ́во Чи́стая, на́ша у́мы помраче́нныя страстьми́ и сластьми́ озари́, да Тобо́ю просвѣща́еми, пое́мъ Бо́гу, я́ко просла́вися.

Пѣ́снь 3.

Ирмо́съ: Си́лою Креста́ Твоего́, Христе́, утверди́ мое́ помышле́ніе, во е́же пѣ́ти и сла́вити спаси́тельное Твое́ вознесе́ніе.

Си́лою Бо́жіею укрѣпля́емъ, бы́лъ еси́, блаже́нне, кро́токъ и молчали́въ, къ Бо́гу бесѣ́дуя те́плыми моли́твами, и упражня́яся прилѣ́жнымъ чте́ніемъ Святы́хъ Писа́ній, и тѣ́мъ утвержда́яся о Го́сподѣ.

Бра́шно твое́ и питіе́ бы́сть сло́во Бо́жіе, и́мже пита́лъ еси́ ду́шу твою́, преподо́бне, тѣ́ло же твое́ хлѣ́бомъ то́кмо и водо́ю, и си́мъ пита́лся еси́ до дне́ сме́рти своея́, вся́ ду́ху покоря́я востаю́щія стра́сти.

Въ ста́рости масти́тѣ, испо́лнивъ лѣ́та своя́, Іеремíе, прія́лъ еси́ да́ръ прови́дѣти та́йны серде́чныя, и облича́лъ еси́ на еди́нѣ лука́вая человѣ́ческая помышле́нія, и наставля́лъ блюсти́ся отъ діа́воля совѣ́та.

Къ первонача́льнымъ отце́мъ Пече́рскимъ прише́дъ, всели́лся еси́ съ ни́ми, и и́ночествуя, вся́ по́хоти тѣле́сныя побѣди́лъ еси́, тѣ́мже прія́лъ еси́ отъ Бо́га дарова́ніе, я́вѣ зрѣ́ти ли́ца подзе́мныхъ еѳіо́повъ, Матѳе́е чу́дне.

Богоро́диченъ: Преобразу́ющіяся въ разли́чныя ви́ды лука́выя еѳіо́пы и дѣ́йствующимъ во удесѣ́хъ на́шихъ, Богоро́дице, посѣще́ніемъ лица́ Твоего́ устраши́ и прожени́, да безъ смуще́нія пое́мъ Твою́ спаси́тельную си́лу.

Сѣда́ленъ, гла́съ 8:

Яко сугу́бую пріе́мый бла́годать отъ Бо́га, сугу́быя исцѣля́еши стра́сти: душе́вныя прилѣ́жными моли́твами, тѣле́сныя же — пома́заніемъ свята́го еле́я; на́съ, стра́ждущихъ обои́ми неду́ги, уврачу́й, и отжени́ ураня́ющія ны́ стра́сти, и моли́ся Христу́ Бо́гу получи́ти вѣ́чный живо́тъ почита́ющимъ свято́е успе́ніе твое́. [Два́жды.]

Сла́ва, и ны́нѣ, богоро́диченъ:

Всенепоро́чная Невѣ́сто, простра́нное селе́ніе Бо́жія Сло́ва, страсте́й мя́, су́ща скве́рное селе́ніе, очи́сти и свѣ́тлое обита́лище добродѣ́телемъ покажи́, прожени́ тму́ беззако́ній и прича́стія сподо́би Свѣ́та невече́рняго, моли́твами Твои́ми, да пою́ Твою́ несказа́нную ми́лость.

Пѣ́снь 4.

Ирмо́съ: Услы́шахъ слу́хъ си́лы Креста́, я́ко ра́й отве́рзеся и́мъ, и возопи́хъ: сла́ва си́лѣ Твое́й, Го́споди.

Благово́нный гро́здъ виногра́да Бо́жія Ма́тере показа́лся еси́, напое́нъ росо́ю уче́ній преподо́бныхъ оте́цъ, и иска́палъ еси́ вино́ исцѣле́ній всѣ́мъ, къ тебѣ́ съ вѣ́рою притѣка́ющимъ, Даміа́не, Бо́жій служи́телю.

Ору́жіемъ вѣ́ры и любве́ пла́менемъ огражде́нъ бы́въ, блаже́нне, отгна́лъ еси́ враго́въ, вредя́щихъ неду́гами человѣ́ки; прилѣ́жная бо твоя́ моли́тва, о́блаки проходя́щи, прогоня́ше болѣ́зни, досточу́дне Даміа́не.

Яко прови́децъ человѣ́ческихъ помышле́ній, предзрѣ́лъ еси́ плещи́ даю́щихъ враго́мъ и хотя́щихъ изы́ти отъ святы́я сея́ огра́ды, растворе́ннымъ любве́ сло́вомъ нака́зовалъ еси́, Іеремíе, ста́ти къ боре́нію крѣ́пко и проти́ву враго́въ непоколеби́му бы́ти.

Открове́нными очи́ма я́вѣ узрѣ́лъ еси́ еди́ною въ це́рквѣ обходя́ща бѣ́са во о́бразѣ во́ина и мета́юща на бра́тію отъ воскри́лія ри́зъ, лѣпко́выя цвѣ́тцы, да исхо́дятъ пре́жде благослове́нія сно́мъ омраче́нны, тѣ́хъ, о́тче, нака́зовалъ еси́ стоя́ти нелѣ́ностно и кре́стнымъ ору́жіемъ себе́ огражда́ти.

Богоро́диченъ: Обстои́ма мя́ де́монскими полки́ и устрѣля́ема ласкосе́рдствующими страстьми́, Ма́ти Бо́жія, укрѣпи́ и пода́ждь ми́ благода́ть побѣди́ти тѣ́хъ ле́стныя ко́зни, да пребу́ду поя́ Твою́, Чи́стая, по́мощь.

Пѣ́снь 5.

Ирмо́съ: Утреннююще, вопіе́мъ Ти́: Го́споди, спаси́ ны́. Ты́ бо еси́ Бо́гъ на́шъ, ра́звѣ бо Тебе́ ино́го не зна́емъ.

О всѣ́хъ, въ болѣ́зни приходя́щихъ, блаже́нный тво́й наста́вникъ Ѳеодо́сій повелѣва́ше тебѣ́ моли́тву твори́ти, ты́ же смире́нъ сы́й и благопокори́въ недосто́йна себе́ вмѣня́лъ еси́ исцѣле́нія да́ра, но повелѣ́ніе творя́ отца́ своего́, моли́твою и еле́емъ подава́лъ еси́ здра́віе боля́щимъ.

Яко до́бръ пу́тникъ, до́брѣ ше́ствовалъ еси́ жи́зни сея́ пу́ть, подтвержда́я себе́ и́ноческими по́двиги, егда́ же доспѣ́лъ еси́ кончи́ны своея́, недоста́точное болѣ́знію наверши́въ, чи́стъ па́че зла́та отше́лъ еси́ въ поко́й безболѣ́зненный.

Прозрѣ́ніемъ отъ Бо́га тебѣ́ да́ннымъ, что́ либо ви́дѣлъ еси́, блаже́нне, нело́жно вся́кому ска́зовалъ еси́, и сбыва́шеся сло́во твое́ въ пра́вду; тѣ́мъ, я́ко проро́комъ сла́ву и преподо́бнымъ состоя́теля, досто́йно тя́ ублажа́емъ, Іеремíе.

Никогда́же изходи́лъ еси́ изъ це́ркве пре́жде оконча́нія пѣ́нія, но всегда́ послѣди́, несы́тное имѣ́я жела́ніе во славосло́віи Бо́жіи пребыва́ти, сего́ ра́ди Бо́гъ просла́вилъ тя́ предъ а́нгелы и человѣ́ки, богоно́се Матѳе́е.

Богоро́диченъ: Святу́ю го́ру Бо́жію и до́мъ Сла́вы Вы́шняго вѣ́дуще Тя́, Чи́стая Дѣ́во, во смире́ніи припа́дая, молю́ся: возведи́ мя на высоту́ добродѣ́тельнаго житія́ и сотвори́ мя́ чи́стый хра́мъ къ воспрія́тію Боже́ственныхъ дарова́ній.

Пѣ́снь 6.

Ирмо́съ: Обы́де мя́ бе́здна, гро́бъ мнѣ́ ки́тъ бы́сть, а́зъ же возопи́хъ къ Тебѣ́, Человѣколю́бцу, и спасе́ мя десни́ца Твоя́, Го́споди.

Ше́ствовавъ на земли́ пра́выя стези́, при кончи́нѣ моли́тву къ Вѣнцеда́вцу раствори́лъ еси́ слеза́ми, прося́ Того́ бла́гость, е́же не лиши́ти тя́ Ца́рствія небе́снаго и сожи́тія отца́ твоего́ преподо́бнаго Ѳеодо́сія.

Въ свѣ́тѣ непристу́пнѣмъ съ преподо́бными прича́стія не лиши́тися жела́я, со смире́ніемъ ко Христу́ возсыла́лъ еси́ мольбы́, и получи́лъ еси́, е́же проси́лъ: му́дрый бо Содѣ́тель извѣсти́ тебѣ́, извѣще́ніемъ чу́днымъ, я́ко да благонаде́жденъ оты́деши въ поко́й пра́ведныхъ почи́ти.

Въ ста́рости глубо́цѣ обнови́ся ю́ность твоя́ духо́внѣ, преподо́бне Іеремíе, оста́вль бо ве́тхій покро́въ тѣле́сный, въ но́вое отше́лъ еси́ душе́ю селе́ніе, къ дре́внимъ проро́комъ на зрѣ́ніе Сла́вы Бо́жія.

Сѣдя́й еди́ною подъ церко́внымъ би́ломъ, узрѣ́лъ еси́ вели́кую то́лпу мра́чныхъ бѣсо́въ, и вопроси́въ, увѣ́далъ еси́ и́хъ къ нѣ́коему бра́ту иду́щихъ, сего́ ра́ди мно́гихъ отъ бра́тіи любе́зно са́мъ нака́зовалъ еси́, ка́ко о́ныхъ блюсти́ся; научи́ у́бо и на́съ, блаже́нне, да не вни́дутъ въ две́ри серде́цъ на́шихъ.

Богоро́диченъ: Изба́ви мя́, Влады́чице, бѣсо́вскихъ страсте́й обстоя́ній, да не вни́дутъ въ до́мъ души́ моея́ тѣ́хъ лука́выя то́лпы, загради́ мы́сленныя две́ри се́рдца стра́хомъ и да́ждь ми бо́дрствовати и внима́ти спасе́нію моему́.

Конда́къ, гла́съ 2:

Якоже дре́вніи проро́цы благода́ть проро́чествія пріе́мше и нело́жнѣ ду́хомъ предзрѣ́вше, прореко́ша наити́ хотя́щая, та́ко и вы́ въ жи́зни на́шей зла́я, грѣхо́въ ра́ди на́шихъ на ны́ гряду́щая, предвозвѣсти́сте; и ны́нѣ да не пости́гнутъ ны́ зла́я, испроси́те отъ Христа́ Бо́га исправле́ніе дѣло́мъ на́шимъ и ве́лію ми́лость.

Икосъ:

Тезоимени́тымъ свои́мъ подража́вше и а́нгельски на земли́ пожи́вше, вели́кихъ дарова́ній сподо́бистеся Іеремíе и Матѳе́е, предвозвѣща́юще бо бу́дущая, мно́гихъ ко исправле́нію приведо́сте, бѣ́сы посрами́сте, человѣ́ки удиви́сте; и ны́нѣ по вре́менной жи́зни въ безконе́чной съ а́нгельскими ли́ки живу́ще, проси́те у Христа́ Бо́га исправле́нія дѣло́мъ на́шимъ и ве́лія ми́лости.

Пѣ́снь 7.

Ирмо́съ: Въ пещи́ о́гненнѣй пѣсносло́вцы спасы́й о́троки: благослове́нъ Бо́гъ оте́цъ на́шихъ.

Предста́ тебѣ́ а́нгелъ Бо́жій, свя́те Даміа́не, во о́бразѣ преподо́бнаго Ѳеодо́сія, и па́дъ на пе́рси твоя́, лобыза́ше любе́зно, я́ко люби́маго Бо́гу, человѣ́комъ же и а́нгеломъ, ты́ же воспѣ́лъ еси́: благослове́нъ Бо́гъ оте́цъ на́шихъ.

Явле́йся ре́клъ е́сть: се́ ча́до, о не́мже мо́лишися Го́сподеви, по́сланъ е́смь извѣсти́ти тебѣ́, я́ко по проше́нію твоему́ бу́детъ ти́, и водвори́шися въ Ца́рствіи Бо́жіи со святы́ми. Сія́ словеса́ слы́шавъ, ра́достно воспѣ́лъ еси́, Даміа́не: благослове́нъ Бо́гъ оте́цъ на́шихъ.

Что́ е́сть сладча́е и что́ е́сть бо́льшее, я́ко е́же жи́ти со святы́ми вку́пѣ? Идѣ́же живе́тъ Христо́съ, во свѣ́тѣ невече́рнѣмъ, та́мо и тебѣ́ угото́вася упокое́нія мѣ́сто, Даміа́не, е́же и на́мъ получи́ти, моли́ся, пою́щимъ: благослове́нъ Бо́гъ оте́цъ на́шихъ.

Въ ли́цѣ со святы́ми, въ че́сти съ проро́ки, въ стоя́ніи со а́нгелы сподо́бленъ еси́, учине́нъ, Іеремíе, бы́ти отъ Бо́га, Ему́же моли́ся предста́ти и на́мъ чи́стѣ пою́щимъ: благослове́нъ Бо́гъ оте́цъ на́шихъ.

Любо́вь имѣ́я ко бра́тіи при́сно, Матѳе́е, вся́ открове́нная тебѣ́ открыва́лъ еси́ на по́льзу всѣ́мъ и нака́зовалъ еси́ ке́лліи присѣдѣ́ти, пла́катися же о грѣсѣ́хъ свои́хъ и пѣ́ти: благослове́нъ Бо́гъ оте́цъ на́шихъ.

Богоро́диченъ: Изба́вленніи Тобо́ю, Пречи́стая, отъ всѣ́хъ бѣсо́вскихъ навѣ́товъ, непреста́нно Ро́ждшемуся изъ Тебе́ зове́мъ: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Изъ Отца́ пре́жде вѣ́къ рожде́ннаго Сы́на и Бо́га, и въ послѣ́дняя лѣ́та воплоще́ннаго отъ Дѣ́вы Ма́тере, свяще́нницы по́йте, лю́діе превозноси́те во вся́ вѣ́ки.

Явльшагося тебѣ́ отъ Отца́ свѣ́товъ по́сланна, разумѣ́лъ еси́ бы́ти наста́вника твоего́ Ѳеодо́сія богоно́снаго, его́же пригласи́въ, извѣсти́лъ еси́, что́ предста́вый глаго́лаше, и что́ тебѣ́ обѣща́, Даміа́не? То́йже повѣ́даемымъ удивля́шеся, и превознося́ше Го́спода во вѣ́ки.

Съ весе́ліемъ истя́зовалъ еси́ обѣща́нія отъ наста́вника твоего́ и отца́, глаго́лющи: бу́детъ ли, о́тче, е́же на проше́ніе мое́ обѣща́лъ ми́ еси́? То́й же отвѣща́: не вѣ́мъ, ча́до, о не́мже вопроша́еши мя́, а́нгелъ бо Бо́жій бы́сть, обѣща́вый тебѣ́, и то́й всели́тъ тя́ та́мо, идѣ́же пою́тъ святíи Го́сподеви во вѣ́ки.

Ра́достенъ и благонаде́жденъ сы́й отъ сицева́го извѣще́нія, отше́лъ еси́ въ свѣтоно́сная мѣ́ста свѣтоно́сными проводи́мь а́нгелы, съ ни́миже и пое́ши Го́спода во вѣ́ки.

Вся́кое твое́ вѣдѣ́ніе бя́ше спаса́ющимся въ наказа́ніе, преподо́біе Матѳе́е, ниже́ нача́льствующій отри́ну твое́ наказа́ніе, и́мже возбужде́нъ доспѣ́ скорѣ́е блаже́нства, идѣ́же святíи превозно́сятъ Го́спода во вѣ́ки.

По мно́гихъ открове́ніихъ отше́лъ еси́ въ ста́рости глубо́цѣ, Матѳе́е, открове́ннымъ лице́мъ престо́лу Бо́жію предстоя́ти: моли́ся же и о на́съ, свя́те, да съ тобо́ю сподо́бимся Го́спода ви́дѣти и превозноси́ти хвала́ми во вѣ́ки.

Богоро́диченъ: Еди́нъ Сы́й существо́мъ отъ Тро́ицы Бо́гъ Сло́во, въ Твою́, Чи́стая Дѣ́во, утро́бу всели́ся, и на́мъ соесте́ственъ пло́тію яви́ся, Его́же благословя́ще превозно́симъ во вѣ́ки.

Пѣ́снь 9.

Ирмо́съ: Тя́ па́че ума́ и словесе́ Ма́терь Бо́жію, въ лѣ́то Безлѣ́тнаго неизрече́нно ро́ждшую, вѣ́рніи единому́дренно велича́емъ.

Что́ тя нареку́, блаже́нное сіе́ мѣ́сто? Тве́рдь ли небе́сную, на не́йже тро́ица оте́цъ, а́ки звѣ́зды, чудесы́ сія́ютъ и озаря́ютъ честну́ю и́хъ па́мять пра́зднующихъ, и пѣ́сньми благоче́стно и́хъ ублажа́ющихъ.

Отъ вре́меннаго свѣ́та къ Вѣ́чному преста́вльшеся Свѣ́ту, свѣтоноше́ніи ва́шими на́ша сердца́ просвѣти́те и испроси́те моли́твами ва́шими, да въ свѣ́тѣ за́повѣдей Госпо́днихъ ходя́ще, у́зримъ съ ва́ми свѣ́тъ невече́рній.

Благода́ть исцѣле́ній отъ Бо́га святíи еще́ въ жи́зни се́й пріе́мше, на́съ страстьми́ одержи́мыхъ ско́ро исцѣли́те, вѣ́рно бо притѣка́емъ къ моще́мъ ва́шимъ и, моля́щеся, пѣ́сньми велича́емъ.

Просла́вимъ Бо́га, святы́хъ Свои́хъ Даміа́на, Іеремíю и Матѳе́я просла́вльшаго, и́же Его́ въ тѣлесе́хъ, а́ки а́нгелы пожи́вше, просла́виша, Его́же и мо́лимъ, да па́мять и́хъ дне́сь хвала́ми велича́ющихъ, не лиши́тъ на́съ съ ни́ми небе́сныя Своея́ сла́вы.

Богоро́диченъ: Помяну́хъ кончи́ну, егда́ пріи́детъ вре́мя разрѣши́тися мнѣ́ отъ соу́зъ плотски́хъ, трепе́щу, я́ко гряде́тъ де́нь Су́дный, отъ него́же кто́ мя́ изба́витъ, а́ще не Ты́, Чи́стая Дѣ́во? Тѣ́мже къ Тебѣ́ вы́ну во хвале́ніи прибѣга́ю.

Свѣти́ленъ:

Свя́то пожи́вше на земли́, свя́ти есте́ и на небеси́, и съ а́нгельскими ли́ки предста́сте Бо́гу; отъ Него́же пріе́мше возме́здіе трудо́мъ свои́мъ, на́съ не забу́дите, но, руководя́ще, наста́вите на пу́ть пра́въ, да тѣ́мъ ходя́ще, обря́щемъ ми́лость въ де́нь Су́дный.

Богоро́диченъ:

Свя́тъ хра́мъ Тво́й здѣ́ и ди́венъ въ пра́вду, Сама́ бо, су́щи хра́мъ Бо́жія сла́вы, Свои́мъ про́мысломъ создала́ еси́ и украси́ла еси́ оте́цъ святы́хъ равноа́нгельнымъ житіе́мъ на́шего ра́ди жи́тельства; злообра́зіе на́ше въ благолѣ́піе претвори́, да вожделѣ́етъ Ца́рь добро́ты ду́шъ на́шихъ, и изліе́тъ на ны́ вели́кую Свою́ ми́лость.

На хвали́техъ стихи́ры [на 4], гла́съ 4. Подо́бенъ: Да́лъ еси́ зна́меніе.

Свѣ́тлое прія́тіе бы́сте Ду́ха Пресвята́го,* отцы́ всеблаже́нніи,* и отъ Того́ просвѣща́еми богови́дно,* проро́чествія да́ромъ обогати́стеся,* и бу́дущихъ предуви́дѣніе* и ра́зумъ и́стинный стяжа́сте;* тѣ́мже мо́лимъ вы́:* моли́теся о на́съ Іису́су Человѣколю́бцу* и Спа́су ду́шъ на́шихъ. [Два́жды.]

Якоже и́стинніи проро́цы,* нело́жными указа́ніи вся́ предреко́сте наити́ хотя́щая* и провозвѣсти́сте, преподо́бніи отцы́:* Матѳе́е и Іеремíе съ Даміа́номъ досточу́днымъ,* вѣ́сть бо Ду́хъ Святы́й просвѣща́ти чи́стыя се́рдцемъ* и подая́ти благода́ть открове́нія;* сего́ ра́ди прославля́емъ* ва́съ просла́вльшаго Іису́са Человеколю́бца* и Спа́са ду́шъ на́шихъ.

Любо́вію Боже́ственною распала́еми* и жела́ніемъ бла́гъ гряду́щихъ,* любе́зно тѣ́сный пу́ть проидо́сте,* нивочто́же вмѣни́вше того́ ско́рби,* тѣ́мъ ны́нѣ въ прохла́днѣ мѣ́стѣ лику́юще,* любо́вію ва́съ почита́ющимъ* дади́те отъ дарова́ній ва́шихъ* и моли́те о на́съ,* Даміа́не и Іеремíе съ Матѳе́емъ,* Іису́са Человѣколю́бца* и Спа́са ду́шъ на́шихъ.

Сла́ва, гла́съ 6:

Тро́ицу преподо́бныхъ оте́цъ, вѣ́рніи, соше́дшеся, ублажи́мъ, о́ваго, я́ко исцѣле́нія да́ръ пріе́мшаго, о́ваго же, проро́чествія и́стиннаго испо́лненнаго, о́ваго же, неви́димая прозря́щаго, и́хже торжества́ де́нь, почита́юще, сла́вимъ Бо́га на́шего и мо́лимъ, е́же умири́ти мíръ и спасти́ ду́ши на́ша.

И ны́нѣ, богоро́диченъ: Богоро́дице, Ты́ еси́ Лоза́ и́стинная...



[НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилуія, гласъ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Луки́, зача́ло 24. Прича́стенъ: Ра́дуйтеся пра́ведніи о Го́сподѣ, пра́вымъ подоба́етъ похвала́.]

Источникъ: Слу́жбы Преподо́бнымъ отце́мъ Пече́рскимъ, и́хже мо́щы въ Бли́жной и Да́льной пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1785. — Л. 12 об. – 16 об.

/ Къ оглавленію раздѣла /


Наверхъ / Къ титульной страницѣ

0