Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 20 октября 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 5-й де́нь.
Слу́жба святи́телей Петра́, Алексíя, Іо́ны и Фили́ппа, митрополи́товъ Моско́вскихъ, и всея́ Россíи чудотво́рцевъ.

НА МАЛѢЙ ВЕЧЕРНИ,
На Го́споди воззва́хъ: стихи́ры [на 4], гла́съ 8. Подо́бенъ: О, пресла́внаго чудесе́!

Святи́теліе, отцы́ преблаже́нніи,* Пе́тре, Алексíе, Іо́но и Фили́ппе,* добродѣ́тельми вше́дше, я́ко на колесни́цу,* къ Бо́гу востеко́сте,* побѣ́дныя пріе́млюще по́чести,* я́ко ми́лоть на́мъ тѣлеса́ ва́ша,* положе́на во гро́бѣ, святи́теліе, оста́висте,* источа́ти исцѣле́нія* и прогони́ти ду́хи лука́выя,* тѣ́мже блажи́мъ ва́съ, прехва́льніи.

Лико́мъ святи́тельскимъ сочета́стеся,* по́стническимъ житіе́мъ украси́вшеся,* Пе́тре, Алексíе, Іо́но и Фили́ппе,* ны́нѣ въ небе́сныхъ живете́, веселя́щеся,* идѣ́же предстоите́ Христу́,* со а́нгелы ликовству́юще,* свѣ́томъ Боже́ственнымъ обожа́еми,* помина́йте вы́ну блажа́щихъ ва́съ на земли́* и пречестно́е ва́ше творя́щихъ пра́зднество.

Сла́ва, гла́съ 6:

Возсія́ солнцеобра́зно святи́телей Христо́выхъ па́мять, вѣ́рныхъ сердца́ разу́мно просвѣща́ющи, ю́же мы́, свѣ́тло соверша́юще дне́сь, моле́бно возопіе́мъ: ра́дуйтеся, па́стыріе и учи́теліе христоимени́тымъ лю́демъ Россíйскія земли́, ра́дуйтеся, церко́вное украше́ніе, архіере́евъ добро́та, мона́ховъ похвала́, святи́теліе Христо́вы Пе́тре, Алексíе, Іо́но и Фили́ппе, Христа́ Бо́га моли́те спасти́ся душа́мъ на́шимъ.

[И ны́нѣ, богоро́диченъ:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ духо́вный* поспѣше́ніемъ благода́ти* Пе́тръ яви́ся.* Тѣ́мже ны́нѣ соше́дшеся,* того́ воспои́мъ.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Святи́телемъ похвала́* и свяще́нникомъ сла́ва,* пра́вило мона́шествующимъ,* Алексíе свя́те,* ра́дуйся, Це́ркве утвержде́ніе.

Сти́хъ: Честна́ предъ Го́сподемъ* сме́рть преподо́бныхъ Его́.

Хра́мъ всесвѣ́телъ* Трисо́лнечныя зари́ сы́й,* озаря́еши ду́ши* пита́ющихся словесы́* твои́ми, Іо́но.

Сти́хъ: Уста́ пра́веднаго поуча́тся прему́дрости,* и язы́къ его́ возглаго́летъ су́дъ.

До́мъ Ду́ха Свята́го* бы́лъ еси́, благода́тію* испо́лненъ Боже́ственныхъ уче́ній,* и́миже напоя́еши мíръ,* прему́дре Фили́ппе.

Сла́ва, и ны́нѣ, богоро́диченъ:

Ра́дуйся, Богоро́дице Дѣ́во,* ра́дуйся, похвало́ все́й вселе́ннѣй,* ра́дуйся, Чи́стая Ма́ти,* Бо́гу Благослове́нная.

[Тропа́рь пи́санъ на вели́цѣй вече́рни. Сла́ва, и ны́нѣ, богоро́диченъ.]



НА ВЕЛИЦѢЙ ВЕЧЕРНИ,
Блаже́нъ му́жъ.., [1-й антифо́нъ.] На Го́споди воззва́хъ: стихи́ры [на 8], гла́съ 4. Подо́бенъ: Яко до́бля.

Яко звѣ́зды многосвѣ́тлыя,* утвержде́ни прехва́льніи,* мíръ украси́сте, всечестнíи,* и се́й луча́ми просвѣща́ете* догма́ты благовѣ́рія,* и е́реси тму́ отго́ните, святи́теліе.* Моли́теся отъ тли́ и бѣ́дъ изба́витися* вѣ́рою творя́щимъ* всечестну́ю па́мять ва́шу. [Два́жды.]

Сія́ніи духо́вными* просвѣти́вше вселе́нную,* свѣтода́тельная со́лнца яви́стеся,* я́ко лучи́ велѣ́ній* во вся́ концы́ простира́юще,* вѣ́рныхъ сердца́ просвѣща́ете, треблаже́нніи,* отгоня́ще тму́ ересе́й, богоно́сцы,* си́лою отъ Дѣ́вы Возсія́вшаго.

Апо́столомъ равнопроповѣ́дателіе,* святи́телемъ единому́дренніи,* по́стникомъ сподви́жницы,* па́стыріе су́ще избра́нніи,* ми́лости благоутро́бніи пода́теліе,* Россíйстіи первопресто́льницы,* досто́йно восхваля́емъ ва́съ, святи́теліе,* а́нгеломъ собесѣ́дницы* и моли́твенницы о душа́хъ на́шихъ.

Ины стихи́ры, гла́съ 6. Подо́бенъ: Все отло́жше.

Вои́стинну свяще́ннѣйшіи и богоно́сніи* я́вльшеся пома́заніе Боже́ственное, святíи,* Святы́мъ Ду́хомъ обложе́ни,* и свѣ́тло всегда́ входя́ще, сла́вніи,* во свята́я святы́хъ,* и свѣтлостьми́ Богонача́льными* облиста́еми благода́тію,* и поуча́ющеся спаси́тельнымъ та́йнамъ,* я́ко священнота́йныя су́ще первопресто́льницы Россíйстіи,* со дерзнове́ніемъ моли́теся* о душа́хъ на́шихъ. [Два́жды.]

Житіе́ ва́ше просія́* добродѣ́тельными блиста́ньми,* и вѣ́рныя просвѣти́сте,* пре́лести бу́рю развѣ́явше,* пои́стиннѣ яви́стеся свѣтоза́рное со́лнце,* священнонача́льницы всеблаже́нніи,* всели́стеся, идѣ́же Свѣ́тъ сія́етъ невече́рній,* сы́нове дне́ благода́тію Свята́го Ду́ха бы́вше.* Тѣ́мъ ва́шу па́мять боже́ственную* и свѣтоно́сный пра́здникъ соверша́емъ* и, веселя́щеся, ва́съ ублажа́емъ.

Но́щь потре́бльше ерети́ческую всю́,* священнонача́льницы всему́дріи,* Пе́тре, и Алексíе, и Іо́но, и Фили́ппе,* блиста́ньми духо́вными просвѣща́еми,* и вѣ́рнымъ всѣ́мъ, сла́вніи,* помышле́нія озари́вше благода́тію,* и Тро́ицу Несозда́нную сла́вити научи́вше.* Тѣ́мъ свѣтоза́рную ва́шу па́мять* соверша́юще ра́достно, про́симъ:* моли́теся Христу́, Преблаго́му Бо́гу,* неотсту́пно, всехва́льніи,* о душа́хъ на́шихъ.

Сла́ва, гла́съ 6:

Человѣ́цы Бо́жіи и вѣ́рніи раби́, служи́теліе Госпо́дни, му́жіе жела́ній, сосу́ди избра́нніи, столпи́ и утвержде́ніе Це́ркве, Ца́рствія наслѣ́дницы, не премолчи́те, е́же о на́съ вопи́ти ко Го́споду.

И ны́нѣ, [богоро́диченъ]:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́. Чте́нія три́ святи́тельскія.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На литíи стихи́ры, гла́съ 2:

Пріиди́те, вѣ́рныхъ собо́ри, псало́мски воспле́щемъ рука́ми печа́льнымъ утѣ́шителей, о грѣ́шныхъ ко Го́споду моли́твенники, и́же вси́ вездѣ́ те́плыхъ предста́телей воспѣва́юще, святи́телей Петра́, и Алексíя, и Іо́ну, и Фили́ппа, похвалу́ земли́ Россíйстѣй и всего́ свяще́нства украше́ніе, рѣ́ки ми́лости вои́стинну, Боже́ственнаго Христо́ва смире́нія ревни́телей, подаю́щего мíру ве́лію ми́лость.

Имѣ́юще дерзнове́ніе ко Го́споду, па́стыріе всесвяще́нніи и святи́теліе, вѣ́рнымъ утвержде́ніе, и́же любо́вію творя́щимъ всечестну́ю па́мять ва́шу, моли́те изба́витися вся́каго обстоя́нія и ва́рварскаго нахожде́нія ко Влады́цѣ ва́шими моли́твами.

Разу́мніи церко́вніи свѣти́льницы, Тро́ицѣ побо́рницы, Россíйстіи первопресто́льницы, мглу́ пре́лести отгна́вше и правосла́вія свѣ́томъ мíръ просвѣти́вше, тѣ́мже и сподо́бистеся Боже́ственнѣй сла́вѣ бы́ти прича́стницы, моли́теся Христу́ Бо́гу непреста́нно дарова́ти на́мъ ве́лію ми́лость.

Сла́ва, гла́съ 5:

Востру́бимъ трубо́ю пѣ́сней, взыгра́имъ пра́зднественная и ликовству́имъ, ра́дующеся, въ моле́бное торжество́ му́дрыхъ священнонача́льникъ. Ца́ріе и кня́зи да стеку́тся, и Це́ркве Христо́вы свѣти́льникомъ воспле́щутъ въ пѣ́снехъ. Па́стыріе и учи́теліе до́браго Па́стыря, си́хъ му́дрыхъ священнотаи́нникъ, соше́дшеся, восхва́лимъ, свѣти́льники свѣтоза́рныя, свѣтопріе́мныя свѣщи́, столпы́ церко́вныя, вѣ́ры крѣ́пкая основа́нія, ла́стовицы, боже́ственную ве́сну провозвѣща́ющія спасе́нія, трубы́, мусикíйски возглаша́ющія, пѣ́сньми боже́ственными восхваля́юще, си́це рце́мъ: святíи чудотво́рцы, Пе́тре, и Алексíе, и Іо́но, и Фили́ппе, ско́ро предвари́те, и изба́вите на́съ отъ нахожде́ній иноплеме́нныхъ и междоусо́бныя бра́ни, и спаси́те ста́до свое́ моли́твами ва́шими.

И ны́нѣ, богоро́диченъ:

Востру́бимъ трубо́ю пѣ́сней, прекло́ншися бо свы́ше, Всецари́ца Ма́ти Дѣ́ва благослове́ньми вѣнчава́етъ воспѣва́ющія Ю. Ца́ріе и кня́зи да стеку́тся, и Цари́цѣ да воспле́щутъ въ пѣ́снехъ, Царя́ ро́ждшей, и́же сме́ртію одержи́мыя пе́рвѣе разрѣши́ти человѣколю́бно Благоволи́вшаго. Па́стыріе и учи́теліе, до́браго Па́стыря, Пречи́стую Ма́терь, соше́дшеся, восхва́лимъ: свѣ́щникъ златоза́рный, свѣтоно́сный о́блакъ, небе́съ простра́ннѣйшую, одушевле́нный же киво́тъ, огнезра́чный Влады́чень престо́лъ, маннопріе́мную злату́ю ста́мну, заключе́нную Сло́ва две́рь, всѣ́хъ христіа́нъ прибѣ́жище, пѣ́сньми богогла́сными похваля́юще, си́це рце́мъ: пала́то Сло́ва, сподо́би смире́нныхъ на́съ небе́снаго Ца́рствія, ничто́же бо невозмо́жно хода́тайству Твоему́.

На стихо́внѣ стихи́ры, гла́съ 2:

Кíими пѣ́сненными добро́тами* воспое́мъ Христо́выхъ святи́телей?* Ева́нгелію проповѣ́дниковъ свѣтлѣ́йшихъ,* церко́вныхъ храни́телей* и засту́пниковъ земли́ Россíйстѣй,* наста́вниковъ ко свѣ́ту богоразу́мія,* Вѣ́рному Импера́тору побо́рниковъ,* и́хже моли́твами Христо́съ враго́въ шата́нія низложи́,* имѣ́яй ве́лію ми́лость.

Сти́хъ: Честна́ предъ Го́сподемъ* сме́рть преподо́бныхъ Его́.

Кíими бо́дренными устна́ми* похва́лимъ богому́дрыхъ святи́телей?* Христо́вѣ Це́ркви свѣ́тлое украше́ніе,* свяще́нства вѣнцы́, благоче́стія управле́ніе,* исто́чниковъ боже́ственныхъ исцѣле́ній неисчерпа́емыхъ,* проли́тіе дарова́ній духо́вныхъ,* рѣ́ки мно́гихъ чуде́съ,* зе́млю Россíйскую веселя́щія тече́ніемъ,* Петра́, и Алексíя, и Іо́ну, и Фили́ппа,* Благовѣ́рному Импера́тору те́плыя посо́бники,* и́хже ра́ди Христо́съ враго́въ шата́нія низложи́,* имѣ́яй ве́лію ми́лость.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Кíими украше́нными гла́сы* воспое́мъ святи́тели, ди́вныя въ чудесѣ́хъ,* Петра́, и Алексíя, и Іо́ну, и Фили́ппа?* Освяще́нныя отъ пеле́нъ, столпы́ Це́ркве неподви́жимыя,* безпло́тнымъ сожи́тели, пра́вды исправле́ніе,* оби́димымъ засту́пники, немощны́мъ врачи́ безме́здныя,* и́хже ра́ди дарова́ Христо́съ Це́рквамъ соедине́ніе,* ми́ръ и ве́лію ми́лость.

Сла́ва, гла́съ 3:

Святи́теліе всечестнíи, преблаже́нніи отцы́ и чудотво́рцы, уго́дницы Христо́вы, Россíйстіи первопресто́льницы, Пе́тре и Алексíе, Іо́но и Фили́ппе, и́же проро́ческимъ житіе́мъ просія́вше, апо́стольскихъ сподо́бистеся даро́въ, Спа́су служа́ще со а́нгелы непреста́нно, моли́те изба́витися на́мъ отъ вся́каго прегрѣше́нія, и душа́мъ на́шимъ пода́ти ми́ръ и ве́лію ми́лость.

И ны́нѣ, богоро́диченъ:

[Безъ сѣ́мене отъ Боже́ственнаго Ду́ха во́лею же Отчею зачала́ еси́ Сы́на Бо́жія, отъ Отца́ безъ ма́тере пре́жде вѣ́къ су́ща, на́съ же ра́ди, изъ Тебе́ безъ отца́ бы́вша, пло́тію родила́ еси́ и Младе́нца млеко́мъ пита́ла еси́. Тѣ́мже не преста́й моли́ти изба́витися отъ бѣ́дъ душа́мъ на́шимъ.

На благослове́ніи хлѣ́бовъ: Тропа́рь святи́телей, два́жды и Богоро́дице Дѣ́во.., еди́ножды.]

Тропа́рь святи́телей, гла́съ 4:

Первопресто́льницы Россíйстіи, и́стинніи храни́теліе апо́стольскихъ преда́ній, столпи́ непоколеби́міи, правосла́вія наста́вницы, Пе́тре и Алексíе, Іо́но и Фили́ппе, Влады́ку всѣ́хъ моли́те ми́ръ вселе́ннѣй дарова́ти и душа́мъ на́шимъ ве́лію ми́лость.


НА УТРЕНИ,
На Бо́гъ Госпо́дь: Тропа́рь то́йже, [два́жды. Сла́ва, и ны́нѣ, богоро́диченъ: Еже отъ вѣ́ка утае́нное...]

По 1-мъ стихосло́віи сѣда́ленъ, гла́съ 5. Подо́бенъ: Собезнача́льное Сло́во.

Яко ца́рское украше́ніе Це́ркве, святи́телей Госпо́днихъ восхва́лимъ, преда́ніемъ сокро́вище неоскудѣ́емо, си́ми бо тíи наказа́ша на́съ Тро́ицу чести́ Святу́ю, соедине́ну у́бо Существо́мъ, раздѣле́ну же Ѵпоста́сьми. [Два́жды.]

Сла́ва, и ны́нѣ, богоро́диченъ:

Пресвята́я Дѣ́во, поми́луй на́съ, прибѣга́ющихъ вѣ́рою къ Тебѣ́, Милосе́рдой и прося́щихъ те́плаго Твоего́ заступле́нія, мо́жеши бо я́ко Блага́ вся́ спасти́, я́ко су́щи Ма́ти Бо́га Вы́шняго, Ма́терними Твои́ми моли́твами при́сно объе́млющи, Богора́дованная.

По 2-мъ стихосло́віи сѣда́ленъ, гла́съ 3. Подо́бенъ: Боже́ственныя вѣ́ры.

Столпи́ бы́сте Це́ркве и бога́тство некра́домое благоче́стія, яви́лися есте́ богослове́сніи святи́теліе, въ безстра́стіи осія́ли есте́ житіе́ свое́ и Тро́ическая изъясни́сте уче́нія повелѣ́ній, отцы́ преподо́бніи, Христа́ Бо́га моли́те о спасе́ніи ду́шъ на́шихъ. [Два́жды.]

Сла́ва, и ны́нѣ, богоро́диченъ:

Боже́ственнаго естества́ не отлу́чься, пло́ть бы́въ во чре́вѣ Твое́мъ, но Бо́гъ вочеловѣ́чься и пребы́сть, Иже по рождествѣ́ Ма́терь Тя́ Дѣ́ву, я́ко пре́жде рождества́ сохрани́въ Всенепоро́чну, еди́нъ Госпо́дь, Того́ прилѣ́жно моли́ дарова́ти на́мъ ве́лію ми́лость.

По Хвали́те и́мя Госпо́дне.., припѣ́въ:

Велича́емъ ва́съ, святи́теліе Христо́вы, Пе́тре, Алексíе, Іо́но и Фили́ппе, и чте́мъ святу́ю па́мять ва́шу, вы́ бо мо́лите за на́съ Христа́ Бо́га на́шего.

Псало́мъ избра́нный: Услы́шите сія́ вси́ язы́цы...

По поліеле́и сѣда́ленъ, гла́съ 4:

Прему́дріи учи́теліе вселе́ннѣй, и́же Бо́га сла́вяще словесы́ и дѣ́лы на земли́, да возвели́чатся дне́сь, я́ко спасе́нія всѣ́мъ на́мъ пода́теліе. [Два́жды.]

Сла́ва, и ны́нѣ, богоро́диченъ:

Предста́тельнице нера́тная, Богороди́тельнице, и моли́твою гото́вая притека́ющимъ къ Тебѣ́, отъ бѣ́дъ мя́ изба́ви и не пре́зри мене́, всѣ́хъ заступле́ніе.

Та́же степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе Іоа́нна, зача́ло 36.

По 50-мъ псалмѣ́ стихи́ра, гла́съ 6:

Боже́ственная благода́ть осѣня́етъ всечестны́я ра́ки моще́й ва́шихъ, преблаже́нніи, тѣ́мже и въ воню́ мѵ́ра чуде́съ ва́шихъ притека́юще, неду́гомъ исцѣле́нія почерпа́емъ. Но, о святи́теліе Христо́вы, Пе́тре и Алексíе, Іо́но и Фили́ппе, Христа́ Бо́га моли́те о душа́хъ на́шихъ.

Кано́нъ Богоро́дицѣ со ирмосо́мъ на 6, и и святи́телей на 8, гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Мно́гими содержи́ми напа́стьми, къ ва́мъ прибѣга́емъ спасе́ніе получи́ти, о вели́ціи святи́теліе, Пе́тре и Алексíе, Іо́но и Фили́ппе! Отъ лю́тыя ну́жды и бѣ́дъ спаси́те на́съ.

Страсте́й прило́зи и мно́гія печа́ли и бѣды́ погубля́ютъ мою́ ду́шу; умири́те, святíи святи́теліе, къ Бо́гу ва́шими моли́твами, и отъ печа́ли на весе́ліе преложи́те.

Спа́са Христа́ моли́те, вели́ціи чудотво́рцы и избра́нніи, Пе́тре и Алексíе, Іо́но и Фили́ппе, изба́витися на́мъ отъ бѣ́дъ и скорбе́й и ва́рварскаго нахожде́нія ва́шими моли́твами.

Богоро́диченъ: Въ ско́рби ны́ и болѣ́зни су́ща, посѣще́нія Боже́ственнаго и промышле́нія е́же отъ Тебе́ сподо́би, о Богома́ти, Влады́чице.

Катава́сія: Отве́рзу уста́ моя́...

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Засту́пницы и покрови́теліе гра́ду Москвѣ́ вы́ есте́ по Бо́зѣ, Бо́жіи уго́дницы, напра́вите на́съ на приста́нище спасе́нія: вы́ бо есте́ вѣ́рнымъ огражде́ніе.

Мо́лимъ ва́съ, святíи чудотво́рцы, Пе́тре, Алексíе, Іо́но и Фили́ппе, душе́вное смуще́ніе и печа́ли бу́рю разори́ти на́мъ и тишину́ пода́ти къ Бо́гу ва́шими моли́твами.

Благоро́днѣйшіи и благи́мъ подража́теліе бы́вше, отъ Бо́га чудесы́ обогати́вшеся, всѣ́мъ помога́йте, моля́щеся Бо́гу, ва́съ прославля́ющему, Своя́ уго́дники.

Богоро́диченъ: Лю́тыми неду́ги и болѣ́зненными тя́жкими ва́рварскими нахо́ды истяза́емымъ, Дѣ́во Богоро́дице, Ты́ на́мъ помози́ и печа́ль на ра́дость преложи́.

Сѣда́ленъ, гла́съ 4:

Простри́те ва́ша дла́ни, святíи отцы́, ко всѣ́хъ Влады́цѣ, и́миже до́брѣ потруди́стеся, и Бо́гу угоди́сте, и тре́бующимъ неоску́дно пода́сте, и устнѣ́ ва́ша на моли́тву отве́рзите, и́миже Бо́га славосло́висте, и лю́ди на богоразу́міе наста́висте. Ускори́те у́бо на по́мощь на́шу, и отъ находя́щихъ на на́съ бѣ́дъ и зо́лъ и вся́кія ну́жды изба́вите на́съ ва́шими моли́твами къ Бо́гу. [Два́жды.]

Сла́ва, и ны́нѣ, богоро́диченъ:

Дѣ́во Всенепоро́чная, Яже Пресу́щнаго Бо́га ро́ждшая, со святи́тели Того́ непреста́нно моли́, оставле́ніе прегрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, Еди́на Всепѣ́тая.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Страсте́й мои́хъ смуще́ніе и мно́гихъ бѣ́дъ нахожде́нія бу́рю утиши́ти моли́теся, святíи отцы́, къ Бо́гу ва́шими моли́твами.

Милосе́рдія бе́здну простри́те на́мъ, святíи отцы́, призыва́ющимъ ва́съ на по́мощь, я́ко Милосе́рдаго Бо́га и́мате, послу́шающа ва́шихъ моли́твъ.

Наде́жду иму́ще ва́съ, святíи отцы́, Пе́тре и Алексíе, Іо́но и Фили́ппе, и я́ко стѣ́ну недви́жиму къ Бо́гу ва́ша моли́твы, зо́лъ и всѣ́хъ бѣ́дъ избавля́емся.

Богоро́диченъ: Исцѣли́, Чи́стая, душе́вныя на́ша не́мощи и стра́сти тѣле́сныя, поспѣши́, Госпоже́, здра́віе пода́ти моли́твами Твои́ми.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Испо́лните, святíи отцы́, весе́лія живо́тъ на́шъ, избавля́юще на́съ ва́рварскаго нахожде́нія и междоусо́бныя бра́ни.

Изба́вите на́съ отъ бѣ́дъ, святíи чудотво́рцы, я́ко предста́теліе те́пліи и моли́твенницы о душа́хъ на́шихъ.

Разруши́те мглу́ прегрѣше́ній мои́хъ и безмѣ́стныхъ дѣя́ній ва́шими къ Бо́гу моли́твами.

Богоро́диченъ: Яко стѣ́ну неруши́му и приста́нище стяжа́хомъ, и душа́мъ Тя́ соверше́нное спасе́ніе, и простра́нство въ ско́рбехъ, о Влады́чице, и ны́нѣ на́съ отъ страсте́й и бѣ́дъ спаси́.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Сме́рти и тли́, и ва́рварскаго плѣне́нія изба́вите, и о́гненнаго запале́нія сво́й гра́дъ сохрани́те къ Бо́гу ва́шими моли́твами.

Засту́пники ва́съ вѣ́мы и тве́рдыя храни́тели гра́ду на́шему, святи́теліе Госпо́дни, тѣ́мъ къ ва́мъ прибѣга́юще, ми́лость пріе́млемъ и бѣ́дъ избавля́емся.

Яко стѣ́ну и приста́нище стяжа́хомъ ва́съ, святíи чудотво́рцы, простра́нство въ ско́рбехъ подтвержде́ніе и спасе́ніе душа́мъ на́шимъ.

Богоро́диченъ: Засту́пницу Тя́ живота́ вѣ́мъ и Храни́тельницу тве́рду, Дѣви́це, напа́стей рѣша́щу молвы́ и нало́ги бѣсо́въ отгоня́ющу, и молю́ся всегда́ страсте́й мя́ изба́вити, Всенепоро́чная.

Конда́къ, гла́съ 3. Подо́бенъ: Дѣ́ва дне́сь.

Во святи́телехъ благоче́стно пожи́сте и лю́ди къ богоразу́мію наста́висте, и до́брѣ Бо́гу угоди́сте, сего́ ра́ди отъ Него́ нетлѣ́ніемъ и чудесы́ просла́вистеся, я́ко ученицы́ Бо́жія благода́ти.

Икосъ:

Первозва́ннаго намѣ́стницы и Россíйстіи первопресто́льницы, вели́ціи свѣти́льницы, Пе́тре, и Алексíе, и Іо́но, и Фили́ппе, Тро́ицѣ побо́рницы, правосла́вію наста́вницы, въ мíрѣ благоче́стно пожи́сте и уче́ніемъ свои́мъ вселе́нную просвѣти́сте, сего́ ра́ди Ца́рствію небе́сному наслѣ́дницы бы́вше, нетлѣ́ніемъ и чудесы́ просла́вистеся, я́ко ученицы́ Бо́жія благода́ти.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

На́ше спасе́ніе, я́коже восхотѣ́лъ еси́, Спа́се, устро́ити, прославля́еши Твоя́ уго́дники чудесы́, вопію́щія Ти́: оте́цъ на́шихъ Бо́же, благослове́нъ еси́.

Воли́теля ми́лости Христа́, Его́же роди́ Ма́ти Неискусому́жная, моли́те, святíи святи́теліе, Пе́тре, Алексíе, Іо́но и Фили́ппе, изба́вити на́съ отъ прегрѣше́ній, и бѣ́дъ, и зо́лъ, зову́щихъ: оте́цъ на́шихъ Бо́же, благослове́нъ еси́.

Сокро́вище спасе́нія и исто́чникъ исцѣле́нія, наста́вницы покая́нія вы́ есте́, Бо́жіи уго́дницы, вопію́щимъ: оте́цъ на́шихъ Бо́же, благослове́нъ еси́.

Богоро́диченъ: Сокро́вище спасе́нія, и исто́чникъ нетлѣ́нія, Тебе́ ро́ждшую и сто́лпъ утвержде́нія, и две́рь покая́нія вопію́щимъ показа́: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

По́мощи ва́шея тре́бующія не пре́зрите, святíи отцы́ и наста́вницы правосла́вія, пою́щія и превознося́щія Христа́ во вѣ́ки.

Неможе́ніе ду́шъ на́шихъ исцѣля́ете и отъ тѣле́сныхъ болѣ́зней возставля́ете вопію́щихъ и превознося́щихъ Христа́ во вѣ́ки.

Исцѣле́ній бога́тство источа́ете къ ва́мъ притека́ющимъ, Бо́жіимъ уго́дникомъ, и вѣ́рно пою́щимъ, и превознося́щимъ Христа́ во вѣ́ки.

Богоро́диченъ: Напа́стныя Ты́ прило́ги отгоня́еши и страстны́я нахо́ды, Дѣ́во, я́ко да Тя́ пое́мъ и превозно́симъ Чи́стую во вѣ́ки.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Точе́нія сле́зъ не пре́зрите, мо́лимъ ва́съ, святíи отцы́, Пе́тре, и Алексíе, и Іо́но, и Фили́ппе, и всѣ́мъ утѣше́ніе пода́ти, блажа́щимъ ва́съ.

Ра́дости сердца́ на́ша испо́лните ва́шими къ Бо́гу моли́твами, святíи отцы́ и засту́пницы те́пліи.

Свѣти́льницы пресвѣ́тліи, Тро́ицы побо́рницы, Пе́тре и Алексíе, Іо́но и Фили́ппе, труды́ и по́двиги ва́шими мра́къ невѣ́дѣнія отгоня́шеся, благовѣ́рно ва́съ ублажа́ющихъ.

Богоро́диченъ: Свѣ́та Твоего́ заря́ми просвѣти́, Дѣ́во, мра́къ невѣ́дѣнія отгоня́ющи и лю́тыхъ бѣ́дъ спаса́ющи, и́же благовѣ́рно Богоро́дицу Тя́ исповѣ́дающихъ.

Свѣти́ленъ:

Свѣтоза́рныя свѣти́льники па́че со́лнечныхъ лу́чь отъ Свѣтонача́льныя Тро́ицы и Трисо́лнечныя Еди́ницы па́че естества́ смѣ́шены, богоно́сныя восхва́лимъ отцы́. [Два́жды.]

[Сла́ва, и ны́нѣ,] богоро́диченъ:

Тебе́ пѣ́сньми немо́лчными ублажа́емъ, Дѣ́во, Яже отъ Тро́ицы Еди́наго во чре́вѣ пріе́мши, Богоро́дице, боже́ственными рука́ми Пресу́щное Сло́во носи́ла еси́, непрело́жно и неизмѣ́нно.

На хвали́техъ стихи́ры на [6], гла́съ 8. Подо́бенъ: О, пресла́внаго чудесе!

Имѣ́яй ду́шу ми́лостиву,* и чи́стъ по́мыслъ,* и се́рдце несмуще́нно,* и вѣ́ру непоро́чну,* и любо́вь нелицемѣ́рну,* учи́тельство изря́дно,* и святи́тельства досто́инство,* и ны́нѣ лико́мъ святи́телей сопричта́лся еси́ на небесѣ́хъ,* сего́ ра́ди почита́емъ тя́, святи́телю Пе́тре,* свяще́нными пѣ́сньми благоче́стно вси́ ублажа́емъ.

О, пречестны́й о́тче,* досточу́дне прему́дре Алексíе!* Ты́ и́ноческимъ житіе́мъ Бо́гу угоди́лъ еси́,* тя́ Бо́гъ пре́жде избра́ отъ ю́ности* па́стыря овца́мъ слове́снымъ и учи́теля вели́ка;* ты́ свяще́нникомъ наказа́тель яви́лся еси́* и все́й странѣ́ Россíйстѣй звѣзда́ пресвѣ́тлая,* осіява́ющи чудесы́ всѣ́хъ,* вѣ́рою припа́дающихъ къ ра́цѣ моще́й твои́хъ,* тѣ́мъ первосвяти́телей ли́къ тя́ воспрія́тъ,* съ ни́миже моли́ся, прося́ ста́ду твоему́ грѣхо́въ оставле́ніе.

Отче Іо́но, богому́дре святи́телю!* Ты́ измла́да Христа́ возлюби́въ,* и Того́ любви́ прилѣпи́лся еси́,* и отъ Него́ Пресвята́го Ду́ха* Боже́ственными заря́ми се́рдце твое́ просвѣти́въ,* свѣтови́денъ вои́стинну бы́лъ еси́,* тѣ́мже и́же ко хра́му твоему́ притека́ющія* проше́нія ко спасе́нію сподо́би* и моли́ Христа́ Бо́га* спасти́ся душа́мъ на́шимъ.

Тече́ніе соверши́лъ еси́* и вѣ́ру соблю́лъ еси́,* святи́телю блаже́нне Фили́ппе,* сего́ ра́ди Христо́съ тя́ вѣнча́ свѣ́тлымъ вѣнце́мъ пра́вды* и украси́ твое́ исповѣ́даніе, досточу́дне.* Тѣ́мъ небе́сное наслѣ́діе пріе́мъ,* Спа́су моли́ся о воспѣва́ющихъ па́мять твою́.

О, пречестнíи досточу́дніи отцы́,* Пе́тре, и Алексíе, и Іо́но, и Фили́ппе!* Поруче́нный ва́мъ тала́нтъ умно́живше,* ра́дости сподо́бистеся Го́спода своего́* и ны́нѣ предстоите́ съ ли́ки святи́телей,* укра́шени благода́тію Боже́ственнаго сія́нія,* тѣ́мже вѣ́рою и любо́вію* пресвѣ́тлую ва́шу па́мять восхваля́емъ,* Христа́ велича́юще,* просла́вльшаго Своя́ уго́дники. [Два́жды.]

Сла́ва, гла́съ 6:

До́бріи раби́, блазíи и вѣ́рніи, и до́бріи дѣ́латели виногра́да Христо́ва, вы́ тяготу́ дневну́ю понесли́ есте́, и да́нный ва́мъ тала́нтъ возрасти́вше, и по ва́съ прише́дшимъ не зави́дѣвше. Тѣ́мже и две́рь небе́сная ва́мъ отве́рзеся, вни́дите въ ра́дость Влады́ки Христа́, моля́щеся о на́съ, святíи учи́теліе.

И ны́нѣ, [богоро́диченъ]:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].


НА ЛИТУРГІИ,

Блаже́нна, пѣ́снь 3-я и 6-я. Проки́менъ, [гла́съ 7]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ ко Евре́омъ, зача́ло 335. Аллилу́ія, [гла́съ 2]: Свяще́нницы Твои́ облеку́тся въ пра́вду, и преподо́бніи Твои́ возра́дуются. Сти́хъ: Вни́демъ въ селе́нія Его́, [поклони́мся на мѣ́сто, идѣ́же стоя́стѣ но́зѣ Его́]. Ева́нгеліе Матѳе́я, зача́ло 11. Прича́стенъ: Ра́дуйтеся пра́ведніи [о Го́сподѣ, пра́вымъ подоба́етъ похвала́].

Источникъ: Слу́жба святи́телей Петра́, Алексíя, Іо́ны и Фили́ппа, Митрополи́товъ Моско́вскихъ, и всея́ Россíи чудотво́рцевъ. Соверша́ется Окто́врія 5-го дня́. — М.: Въ Сѵнодальной Тѵпографіи, 1875. — 20 л.

/ Къ оглавленію раздѣла /


Наверхъ / Къ титульной страницѣ

0