Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 26 сентября 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 4-й де́нь.
Па́мять свята́го и пра́веднаго кня́зя Стефа́на Щиля́новича.

НА МАЛѢЙ ВЕЧЕРНИ,
[На Го́споди воззва́хъ:] стихи́ры, гла́съ 1. Подо́бенъ: Всехва́льніи му́ченицы.

Стефа́не преподо́бне, все́ у́мное жела́ніе къ Бо́гу впери́въ и Тому́ любо́вію присво́ився, разу́мно жи́знь твою́ преше́лъ еси́, и по кончи́нѣ дѣла́ твоя́ уясни́лъ еси́, и цѣльбы́ мно́гія пода́лъ еси́, тѣ́мже моли́ся непреста́нно, дарова́ти душа́мъ на́шимъ ми́ръ и ве́лію ми́лость.

Стефа́не прехва́льне, Свѣ́томъ Трисо́лнечнымъ просвѣща́емь и ре́вностію Боже́ственною разжига́емь, вѣне́цъ исплѣ́лъ еси́ нищепита́ніемъ, и багряни́цу оброщи́въ житораздая́ніемъ, и ны́нѣ си́хъ пріе́мля мздовоздая́ніе, непреста́й моля́ся о на́съ ко Го́споду, е́же просвѣти́ти ду́ши на́ша.

Сла́ва, гла́съ 1:

Всесвято́е торжество́ па́мяти твоея́, преподо́бне, я́коже со́лнце ве́ліе возсія́вше свѣ́тло, озаря́етъ и просвѣща́етъ всѣ́хъ, благоче́стно соверша́ющихъ ю́, сего́ ра́ди припа́дающе, вопіе́мъ ти́, Стефа́не, я́ко имѣ́я дерзнове́ніе ко Спа́су Христу́, сохраня́й моли́твами твои́ми отъ безбо́жныхъ наси́лія и озлобле́нія, вѣ́рою къ тебѣ́ притека́ющія и любо́вію восхваля́ющія тя́.

И ны́нѣ, богоро́диченъ:

Свята́я Богоро́дице, спаси́ на́съ, Яже Пресвята́го ро́ждши пло́тію, уподо́битися Восхотѣ́вша человѣ́комъ: небе́снаго житія́ всѣ́хъ покажи́, Пречи́стая, прича́стники, моли́твами Твои́ми.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ ни́щимъ отверза́я, и отвсю́ду добродѣ́тель собира́я, Стефа́не, добро́то невѣ́домая.

Сти́хъ: Расточи́, даде́ убо́гимъ, пра́вда его́ пребыва́етъ [во вѣ́къ вѣ́ка].

Вла́сть земну́ю презира́я, у́мъ къ цѣлому́дрію собира́я, Стефа́не, Тро́ицы жили́ще.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ [восхо́щетъ зѣло́].

Жи́тницы расточа́я и жи́знь пріе́мля, нагíя одѣва́я и оде́жду нетлѣ́нія взыску́я, Стефа́не, свѣ́тлая похвало́.

Сла́ва, и ны́нѣ, богоро́диченъ:

Влады́чице всѣ́хъ вѣ́рныхъ и Засту́пнице, сомоле́бника пріи́мши Стефа́на, непреста́йте о на́съ моля́щеся.

Тропа́рь, гла́съ 4:

На земли́ въ прему́дрости сла́ву стяжа́лъ еси́, бога́тство Го́сподеви твоему́ вручи́лъ еси́, и То́й тя́ съ небе́сными водворя́етъ, тѣ́ло твое́ на земли́, свя́те, сохрани́ невреди́мо: ты́ бо въ цѣлому́дріи и чистотѣ́ житіе́ пра́ведно пожи́лъ еси́, тѣ́мъ со дерзнове́ніемъ моли́ спасти́ся на́мъ.

Сла́ва, и ны́нѣ, богоро́диченъ:

Еже отъ вѣ́ка утае́нное, [и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша].


НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. [На Го́споди воззва́хъ:] стихи́ры на 8, гла́съ 1. Подо́бенъ: Небе́сныхъ чино́въ.

Звѣзда́ свѣ́тлая яви́лся еси́, умиле́нія исто́чникъ и любве́ преиспо́лненъ, кро́токъ, ми́лостивъ и нищелюби́въ, сокро́вище благосты́ни неистощи́мое, житіе́ богоуго́дно и вѣ́ра непосты́дна, наде́жда честна́я и му́дрость правосла́вна. [Два́жды.]

Чу́дно пребыва́ніе имѣ́лъ еси́, Стефа́не преподо́бне, дре́внихъ и но́выхъ подража́я добродѣ́тльми: Авраа́ма страннолю́бію и Іо́сифа житораздая́нію, Іова ми́лостынямъ и Корни́лія моли́твамъ, тѣ́мже и по кончи́нѣ неутаи́шася твоя́ исправле́нія, Го́споду сохрани́вшу тя́ цѣ́ла, неруши́ма.

Умъ тво́й просвѣще́нъ Боже́ственнымъ разумѣ́ніемъ и се́рдце твое́ жили́ще Пресвята́го Ду́ха бы́сть, душе́вныя плоды́ усугуби́лъ еси́: вѣ́ру благочести́ву и любо́вь нелицемѣ́рну, сего́ ра́ди имѣ́я дерзнове́ніе ко Го́споду, лю́тыхъ обстоя́ній изба́ви на́съ моли́твами твои́ми.

Ины стихи́ры, гла́съ 2. Подо́бенъ: Егда́ отъ дре́ва.

Егда́ смотре́ніемъ Вы́шняго отъ чре́ва ма́терня роди́лся еси́, тогда́ добродѣ́телей вмѣсти́лище показа́лся еси́, благовѣ́рія млеко́мъ воспита́вся и ба́нею креще́нія просвѣти́вся, Ду́ха Свята́го благода́ть въ тя́ всели́ся и у́мъ тво́й луче́ю богоразу́мія уясни́ся. Сего́ стра́хомъ одержи́мь, вре́меннымъ жи́тельствомъ себе́ невреди́лъ еси́, Стефа́не достоблаже́нне. [Два́жды.]

Егда́ вла́сти вре́менныя са́нъ воспрія́лъ еси́, тогда́ о бу́дущихъ до́брѣ разумѣ́лъ еси́, скры́вшаго раба́ тала́нтъ изрече́нія убоя́вся, и тебѣ́ вруче́ный мно́жае Влады́цѣ твоему́ воздѣ́лалъ еси́, ни́щія любя́ и а́лчущія насыща́я, ми́лостынямъ внима́я и моли́твы умиле́ніе къ Бо́гу возсыла́я, сего́ ра́ди и въ черто́зѣ небе́снѣмъ съ пра́ведными водворя́ешися, Стефа́не, честна́я похвало́.

Егда́ во гро́бѣ честно́е твое́ тѣ́ло положи́ся, тогда́ манове́ніемъ Боже́ственнымъ невреди́мо соблюде́ся и луче́ю небе́сною облиста́емо яви́ся, и сего́ зрѣ́ніемъ мно́ги ужаси́. Отъ земли́ же износи́мо, я́ко сокро́вище многоцѣ́нно, благоуха́нія мѵ́ро сла́дкое подае́тъ, во хра́мѣ Богома́тере положе́нно бы́вшее, цѣльбы́ мно́ги показу́етъ и отъ человѣ́къ неду́ги отгоня́етъ, тѣ́мже па́мять твою́ ра́достію торжеству́емъ, Стефа́не, уго́дниче Христо́въ.

Сла́ва, гла́съ 4:

Пріиди́те вси́, цѣлому́дрія рачи́теліе, псалмы́ и пѣ́сньми Спа́су Христу́ воспои́мъ, да́вшему благода́ть и умиле́ніе Стефа́ну, цѣлому́дрія люби́телю, вре́менными вѣ́чная измѣни́ти, и плоды́ земны́ми вы́шнее Ца́рство воспрія́ти, тѣ́мже къ нему́ возопіе́мъ: Стефа́не, преподо́бныхъ удобре́ніе, и пра́ведныхъ похвало́ и украше́ніе, съ ни́миже непреста́й моля́ся Христу́ Бо́гу, о и́же вѣ́рою творя́щихъ всесвяту́ю па́мять твою́, успе́нія и пренесе́нія.

И ны́нѣ, богоро́диченъ:

Иже Тебе́ ра́ди богооте́цъ проро́къ Дави́дъ пѣ́сненно о Тебѣ́ провозгласи́, вели́чія тебѣ́ Сотво́ршему: предста́ Цари́ца одесну́ю Тебе́. Тя́ бо Ма́терь, Хода́таицу живота́ показа́, безъ отца́ изъ Тебе́ вочеловѣ́читися благоволи́вый Бо́гъ, да Сво́й па́ки обнови́тъ о́бразъ, истлѣ́вшій страстьми́, и заблу́ждшее горохи́щное обрѣ́тъ овча́, на ра́мо воспріи́мъ, къ Отцу́ принесе́тъ, и Своему́ хотѣ́нію, съ небе́сными соедини́тъ си́лами, и спасе́тъ, Богоро́дице, мíръ, Христо́съ имѣ́яй ве́лію и бога́тую ми́лость.

Вхо́дъ. Проки́менъ дне́ и чте́нія.

Втора́го зако́на чте́ніе. [Глава́ 10.]

Во дне́хъ о́нѣхъ рече́ Моисе́й къ сыно́мъ Изра́илевымъ: се́ Го́спода Бо́га твоего́ не́бо, и Не́бо небесе́, земля́ и вся́, ели́ка су́ть на не́й. Оба́че отцы́ ва́ша произво́ли Госпо́дь люби́ти я́ и избра́ сѣ́мя и́хъ по ни́хъ, ва́съ, па́че всѣ́хъ язы́къ, въ де́нь се́й. И обрѣ́жите жестосе́рдіе ва́ше и вы́и ва́шея не ожесточи́те ктому́. Ибо Госпо́дь Бо́гъ на́шъ, Се́й Бо́гъ бого́въ и Госпо́дь господе́й; Бо́гъ Вели́кій, и Крѣ́пкій, и Стра́шный, Иже не диви́тся лицу́, ниже́ взе́млетъ да́ръ. Творя́й су́дъ прише́льцу, и сиротѣ́, и вдовѣ́, и лю́битъ прише́льца, да́ти ему́ хлѣ́бъ и ри́зу. И возлюби́те прише́льца, прише́льцы бо бѣ́сте въ земли́ Еги́петстѣй. Го́спода Бо́га твоего́ да убои́шися, и Тому́ еди́ному послу́жиши, и къ Нему́ прилѣпи́шися, и и́менемъ Его́ клене́шися. То́й хвала́ твоя́, и То́й Бо́гъ тво́й, Иже сотвори́ тебѣ́ вели́кая и сла́вная сія́, я́же ви́дѣста о́чи твои́.

Прему́дрости Соломо́новы чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры самогла́сны, гла́съ 1:

Соста́вимъ ли́къ боже́ственный дне́сь, вѣ́рніи, и согла́сно, ра́дующеся, воспои́мъ Стефа́на пра́веднаго честну́ю па́мять, любо́вію прикаса́ющеся ковче́гу честна́го тѣ́ла, то́ки исцѣле́ній отъ него́ пріе́млюще и хвалу́ благода́рственную Го́сподеви возсыла́юще, таково́е сокро́вище на́мъ пода́вшу, цѣле́бныя мо́щи Своего́ уго́дника, Стефа́на преподо́бнаго.

Лю́ди, томи́мыя гла́домъ зѣ́льнымъ, препита́лъ еси́ отъ твои́хъ сокро́вищъ, преподо́бне, я́коже дре́вле Іо́сифъ во Еги́птѣ цѣлому́дрствовавъ, тѣ́мже о́нъ отъ сро́дникъ позна́нъ бы́сть, твоя́ же добродѣ́тели да́льнимъ и бли́жнимъ яви́шася: тѣ́ломъ бо цѣ́лъ и неруши́мъ въ земли́ лѣ́ты дово́льными пребы́лъ еси́, и ма́ніемъ Вседѣ́теля во гро́бѣ объявля́емь, присѣдя́щія бли́зъ гро́ба ага́ряни, ужаси́лъ еси́, и благоуха́ньми моще́й всѣ́хъ удиви́лъ еси́ и отъ человѣ́къ болѣ́зни отгна́лъ еси́, сего́ ра́ди па́мять твою́ торжеству́емъ и любо́вію вопіе́мъ: Стефа́не, преподо́бныхъ сожи́телю, съ ни́ми непреста́нно моли́ Христа́ Бо́га сохрани́ти па́ству, ю́же стяжа́.

Гла́съ 3:

Вла́сть и добродѣ́тель му́дре совокупи́въ, настоя́щая презира́я, къ бу́дущимъ у́мъ простира́я, жела́ніемъ прославля́еши Го́спода. Псалмопѣ́нія зѣло́ испыту́я и отъ Сего́ умиле́нія пріе́мля, пра́вду вельми́ взыску́я, непра́вду же, проро́чески, возненави́дѣлъ еси́, тѣ́мже и въ пра́ведныхъ кро́вѣхъ водворя́яся, Стефа́не преподо́бне и блаже́нне, непреста́нно моли́ся о на́съ ко Го́споду.

Гла́съ 4:

Во обрѣ́теніи честна́го тѣ́ла твоего́ стра́нно чу́до ви́дѣно бы́сть, свѣ́ту небе́сному свы́ше облиста́вшу, твоя́ мно́гія добродѣ́тели явля́ющу: быстроту́ у́мную и до́блесть душе́вную, се́рдце умиле́но и со́вѣсть боголюби́ву, нра́въ ми́лостивъ и нищепита́тельство, Стефа́не преподо́бне, служи́телю Святы́я Тро́ицы, Ейже непреста́нно моли́ся, низпосла́ти любо́вію хва́лящимъ тя́, грѣхо́въ оставле́ніе и печа́ли избавле́ніе.

Сла́ва, гла́съ 6:

Свѣ́тло дне́сь Се́рбская Це́рковь красу́ется, во псалмѣ́хъ и пѣ́снѣхъ Спа́су Христу́ вопію́ще: столпы́ незы́блемыя и подпо́ры крѣ́пкія своя́ восхваля́ющи, Симео́на преподо́бнаго и Са́вву свяще́ннаго, и́миже свобожде́нна отъ ерети́ческаго помраче́нія, просія́ луче́ю Правосла́вія, сего́ ра́ди почита́емъ своя́ пастыренача́льники, и съ ни́ми Стефа́на пра́веднаго па́мять моле́бную соверша́ющи, хва́лится, цѣле́бныя мо́щи его́ въ себѣ́ иму́щи, я́ко сокро́вище многоцѣ́нное и па́че ка́мене сапфи́ра.

И ны́нѣ, богоро́диченъ:

Преложе́ніе скорбя́щихъ, премѣне́ніе боля́щищихъ еси́, Богоро́дице Всепѣ́тая, спаси́ гра́дъ и лю́ди, бори́мыхъ умире́ніе, обурева́емымъ тишина́, еди́на Предста́тельнице вѣ́рныхъ.

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, Стефа́не преподо́бне, ра́достію неизглаго́ланною, ея́же сподо́бился еси́ отъ Вѣнцепода́теля Христа́ Го́спода, Его́же отъ ю́ности зѣло́ возлюби́лъ еси́, и жела́ніемъ вседу́шно присво́ился еси́, дѣ́лы добродѣ́тельными и моли́твою умиле́нною, руко́ю пода́тливою и нра́вомъ боголюби́вымъ. Тѣ́мже ны́нѣ водворя́яся съ ли́ки преподо́бныхъ, съ ни́миже моли́ся Го́сподеви, отъ напа́сти изба́витися на́мъ.

Сти́хъ: Расточи́, даде́ убо́гимъ, [пра́вда его́ пребыва́етъ во вѣ́къ вѣ́ка].

Ра́дуйся, Стефа́не му́дре, ра́дованія вѣнце́мъ украси́вся и богоразу́мія му́дростію обогати́вся, хра́бростію чу́денъ яви́лся еси́, иноплеме́нныя ди́вно побѣжда́я и непобѣди́мь отъ си́хъ пребыва́я. Не на ору́жіе бо когда́ упова́лъ еси́, но десни́цею Вы́шняго укрѣпля́емь, и моли́твы, я́ко щи́тъ, имѣ́я, ми́лостыни, я́ко хору́гвы, воздвиза́я, вѣ́ру же благочести́ву па́че си́хъ умножа́я, тѣ́мже моли́ся Го́сподеви, спасти́ся душа́мъ на́шимъ.

Сти́хъ: Блаже́нъ му́жъ, [боя́йся Го́спода, въ за́повѣдехъ Его́ восхо́щетъ зѣло́].

Ра́дуйся, Стефа́не, честна́я похвало́, вѣ́рою воспѣва́ющихъ святу́ю па́мять твою́ и любо́вію кла́няющихся ра́цѣ моще́й твои́хъ, цѣльбы́ неду́говъ отъ ни́хъ пріе́млюще и хвалу́ благода́рственную Христу́ Бо́гу возсыла́юще, такову́ю благода́ть на́мъ да́рующу, Ему́же съ весе́ліемъ предстоя́, непреста́й на́съ помина́я, во е́же спасти́ ду́ши на́ша.

Сла́ва, гла́съ 8:

Пра́здникъ ра́достенъ любо́вію соверша́емъ и пѣ́сньми доброхва́льными воспои́мъ, вѣ́рніи, — па́мять бо пра́веднаго съ похвала́ми и благослове́ніе Госпо́дне на главѣ́ его́, — пра́веднаго и треблаже́ннаго Стефа́на преподо́бнаго, е́же воспрія́ вѣ́рою и добродѣ́телію: ду́хомъ всѣ́мъ пра́веднымъ весе́ліемъ сликовству́етъ и тѣ́ломъ цѣ́лъ и неруши́мъ во хра́мѣ Богома́тере положи́ся, съ Не́юже непреста́нно мо́лится о всѣ́хъ на́съ.

И ны́нѣ, богоро́диченъ:

Небе́сная пою́тъ Тя́, Обра́дованная Ма́ти Безневѣ́стная, и мы́ славосло́вимъ неизслѣ́дованное Твое́ Рождество́, Богоро́дице: моли́ спасти́ся душа́мъ на́шимъ.

На благослове́ніи хлѣ́бовъ: Тропа́рь свята́го, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.



НА УТРЕНИ,
[На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ.]

По 1-й каѳи́смѣ сѣда́ленъ, гла́съ 1. Подо́бенъ: Ка́мени запеча́тану.

На ка́мени недви́жимомъ вѣ́ры, разу́мныя но́зѣ крѣ́пко утверди́въ, богому́дре, и бу́ря жите́йскаго волне́нія ника́коже поколеба́ твоего́ смышле́нія, но немо́кренно сію́ преше́лъ еси́, къ Бо́гу любо́вію присво́ився, Ему́же ны́нѣ предстоя́, ра́достно зове́ши: сла́ва благоутро́бію Твоему́, Спа́се, сла́ва ца́рствію Твоему́, сла́ва смотре́нію Твоему́, еди́не Человѣколю́бче. [Два́жды.]

Сла́ва, и ны́нѣ, богоро́диченъ:

Ру́цѣ Твои́ боже́ственніи, и́миже Зижди́теля носи́ла еси́, Дѣ́во Пречи́стая, воплоще́ннаго бла́гостію, просте́рши, моли́ Его́ изба́вити на́съ отъ напа́стей, страсте́й и бѣ́дъ, восхваля́юще Тя́: сла́ва Все́льшемуся въ Тя́, сла́ва Проше́дшему изъ Тебе́, сла́ва Свободи́вшему на́съ рождество́мъ Свои́мъ.

По 2-й стихоло́гіи сѣда́ленъ, гла́съ 3. Подо́бенъ: Красотѣ́ дѣ́вства.

Красота́ми боголѣ́пнаго житія́ и добро́тами твоего́ цѣлому́дрія, а́нгелы удиви́лъ еси́ и человѣ́ки возвесели́лъ еси́, сего́ ра́ди сме́рть яви́ся тебѣ́ поко́й, и на непреста́нное весе́ліе преше́лъ еси́, Стефа́не, въ не́мже испроси́ на́мъ отъ Христа́ ве́лію ми́лость. [Два́жды.]

Сла́ва, и ны́нѣ, богоро́диченъ:

Красотѣ́ дѣ́вства Твоего́, и пресвѣ́тлой чистотѣ́ Твое́й, Гавріи́лъ удиви́ся, вопія́ше Ти́, Богоро́дице: ку́ю Ти́ похвалу́ принесу́ досто́йную? Что́ же возымену́ю Тя́? Недоумѣва́ю и ужаса́юся. Тѣ́мже, я́ко повелѣ́нъ бы́хъ, вопію́ Ти́: ра́дуйся, Благода́тная.

По поліеле́и сѣда́ленъ, гла́съ 8. Подо́бенъ: Повелѣ́нное.

Повелѣ́нія Боже́ственнаго уче́нія, пріе́мь въ ра́зумѣ пе́рвѣе, стра́хъ Бо́жій всели́лъ еси́ въ тя́, и́мже окормля́емь, стезю́ пра́вую не погрѣши́лъ еси́, е́юже ше́ствуя, во оби́тели пра́ведныхъ вше́лъ еси́, съ ни́миже проси́ пою́щимъ тя́ смире́ніе, я́ко да благода́рно пое́мъ ти́, му́дре: ра́дуйся, Стефа́не пребога́те. [Два́жды.]

Сла́ва, и ны́нѣ, богоро́диченъ:

Повелѣ́нное та́йно пріе́мъ въ ра́зумѣ, въ кро́вѣ Іо́сифовѣ тща́ніемъ предста́ безпло́тный, глаго́ля Неискусобра́чнѣй: Приклони́вый схожде́ніемъ небеса́ вмѣща́ется неизмѣ́нно ве́сь въ Тя́. Его́же и ви́дя въ ложесна́хъ Твои́хъ, пріе́мша ра́бій зра́къ, ужаса́юся зва́ти Тебѣ́: ра́дуйся, Невѣ́сто неневѣ́стная.

Степе́нна, 1-й антифо́нъ 4-го гла́са. Проки́менъ гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе да хва́литъ Го́спода... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Иже благода́тію Пресвята́го Ду́ха, избра́нный ли́къ дне́сь соста́вльше, пѣ́снь но́вую воспои́мъ, празднолю́бцы, па́мять сотворя́юще преблаже́ннаго Стефа́на, въ не́йже соше́дшеся, Спа́са возвели́чимъ, и торжество́ весе́ло моле́бнику Его́ принесе́мъ, я́ко иму́щему дерзнове́ніе у Царя́ сла́вы, и моля́щуся изба́вити вре́да вся́каго отъ души́ сла́вящихъ того́.

Кано́ны три́: кано́нъ Богоро́дицы [со ирмосо́мъ] на 6, и свята́го два́ кано́на на 8.

Кано́нъ Богоро́дицы, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Мно́гими содержи́мь напа́стьми, къ Тебѣ́ прибѣга́ю спасе́нія искíй, о Ма́ти Сло́ва и Дѣ́во! отъ тя́жкихъ и лю́тыхъ мя спаси́.

Страсте́й мя смуща́ютъ прило́зи, мно́гаго уны́нія испо́лнити мою ду́шу: умири́, Отрокови́це, тишино́ю Сы́на и Бо́га Твоего́, Всенепоро́чная.

Спа́са ро́ждшую Тя и Бо́га, молю́, Дѣ́во, изба́витися ми лю́тыхъ: къ Тебѣ́ бо ны́нѣ прибѣга́я, простира́ю и ду́шу и помышле́ніе.

Неду́гующа тѣ́ломъ и душе́ю, посѣще́нія Боже́ственнаго, и промышле́нія отъ Тебе́ сподо́би, еди́на Богома́ти, я́ко Блага́я, Блага́го же Роди́тельнице.

Кано́нъ свята́го, гла́съ 2.
Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Глубину́ ути́шивъ моего́ помышле́нія, Христе́, низпосли́ се́рдцу моему́ свѣ́тъ Твоего́ богоразу́мія, я́ко да возмогу́ разу́мно воспѣ́ти Стефа́нова, я́же въ житіи́, исправле́нія.

Отъ младе́нства обрѣ́теся се́рдце твое́ Пресвята́го Ду́ха чи́стое жили́ще, Стефа́не преподо́бне, Имже укрѣпля́емь, возмо́глъ еси́ разу́мно преплы́ти жите́йское мо́ре, волна́ми непогружа́емь тщеста́вія.

Въ тишинѣ́ бы́въ жи́зни вѣ́чныя, Стефа́не преподо́бне, непреста́нно моли́ся Христу́ о ми́рѣ мíра, и о спасе́ніи ду́шъ, серде́чною любо́вію воспѣва́ющихъ Христу́ Бо́гу: Препросла́вленный Госпо́дь, я́ко просла́вися.

Богоро́диченъ: Младе́нца родила́ еси́, Отцу́ и Пресвято́му Ду́ху соприсносу́щна и сопресто́льна, Марíе Богоневѣ́сто, тѣ́мже дерзнове́ніе, я́ко Ма́ти, къ Нему́ иму́щи, утверди́ у́мъ мо́й въ тишинѣ́, воспѣва́ти Творца́ моего́: препросла́вленный Госпо́дь, я́ко просла́вися.

Другíй кано́нъ, пренесе́нію святы́хъ моще́й, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Отве́рзстѣй бы́вши честнѣ́й ра́цѣ преподо́бнаго твоего́ тѣ́ла, Стефа́не блаже́нне, мѵ́ры благово́нныя внуша́ютъ обстоя́щіи, и дивя́тся зря́ще тя́ цѣ́ла, неруши́ма, Христу́, сохрани́вшу тя́, воспѣва́юща Того́ со Отце́мъ и Ду́хомъ.

Христо́въ хра́мъ одушевле́нъ бы́сть се́рдце твое́, во хра́мѣ бо Богома́тере тѣ́ломъ че́стно положи́лся еси́, ду́хомъ же во оби́телехъ пра́ведныхъ, съ преподо́бными лику́я, съ ни́миже моли́ся о воспѣва́ющихъ тя́ вѣ́рою.

Исправле́ніе твоего́ жи́тельства Бо́гу объявля́ющу, въ нощи́ свѣтолу́чнѣй зарѣ́, я́ко мо́лніи, возсія́вшей надъ ра́кою цѣле́бнаго твоего́ тѣ́ла, Стефа́не, преподо́бныхъ сожи́телю.

Богоро́диченъ: Хра́мъ чистоты́ бы́вши и прія́телище Еди́наго отъ Тро́ицы Царя́ Христа́, Пречи́стая Влады́чице, тѣ́мже и мене́, во хра́мѣ Твое́мъ хва́лящаго Тя́, содѣ́лай чи́стое прія́телище Святы́я Тро́ицы.

Катава́сія: Отве́рзу уста́ моя́...

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Предста́телство и покро́въ жи́зни моея́ полага́ю Тя, Богороди́тельнице Дѣ́во, Ты мя окорми́ ко приста́нищу Твоему́, благи́хъ вино́вна, вѣ́рныхъ утвержде́ніе, еди́на Всепѣ́тая.

Молю́, Дѣ́во, душе́вное смуще́ніе, и печа́ли моея́ бу́рю разори́ти: Ты́ бо, Богоневѣ́стная, нача́льника тишины́ Христа́ родила́ еси́, еди́на Пречи́стая.

Благодѣ́теля ро́ждши, до́брыхъ вино́внаго, благодѣя́нія бога́тство всѣ́мъ источи́: вся́ бо мо́жеши, я́ко си́льнаго въ крѣ́пости Христа́ ро́ждши, Богоблаже́нная.

Лю́тыми неду́ги и болѣ́зненными страстьми́ истяза́ему, Дѣ́во, Ты́ ми помози́: исцѣле́ній бо неоску́дное Тя зна́ю сокро́вище, Пренепоро́чная, неиждива́емое.

Инъ.

Ирмо́съ: Процвѣла́ е́сть пусты́ня я́ко кри́нъ Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Цвѣту́щь у́мъ имѣ́лъ еси́, взира́ніемъ къ Бо́гу, Стефа́не блаже́нне, къ Нему́же ны́нѣ моли́ся, свободи́ти на́съ мы́сленнаго треволне́нія, я́ко да въ тишинѣ́ глубо́цѣ ра́достно воспѣва́емъ: нѣ́сть свя́тъ, я́ко Бо́гъ на́шъ, и нѣ́сть пра́веденъ, па́че Тебе́, Го́споди.

Глаго́ломъ живо́тнымъ внима́я, Стефа́не досточу́дне, и́же въ зако́нѣ и благода́ти пра́вдою просія́вшимъ благоче́стно ревну́я, вла́сть вре́менную презира́я, и къ бога́тству се́рдца неприлага́я, но любо́вію вопія́: нѣ́сть свя́тъ, я́ко Бо́гъ на́шъ.

Пра́ведна и непоро́чна, уста́ Боже́ственная именова́ша и́же въ зако́нѣ Іова: во благода́ти Стефа́нъ пра́вдою того́ и благоче́стіемъ подража́я, вѣ́рою же пра́вою и благоче́стіемъ и́стиннымъ па́че того́ ди́внѣйшій бы́сть, тѣ́мже съ ни́мъ воспѣва́емъ: нѣ́сть свя́тъ, я́ко Бо́гъ на́шъ.

Богоро́диченъ: Ты́ вели́кое дарова́ніе, еди́на Благослове́нная, сподо́билася еси́ бы́ти: вы́ше естества́ бо, Богоневѣ́сто, Невмѣсти́маго во чре́вѣ понесла́ еси́, Вопло́щшагося Сло́ва Бо́жія, тѣ́мже Ти́ зове́мъ: нѣ́сть непоро́чны, па́че Тебе́, Влады́чице.

Инъ.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Твои́хъ добродѣ́телей мно́жества не возмога́ю умо́мъ воспѣ́ти, Стефа́не пра́ведне, я́же по кончи́нѣ твое́й Человѣколю́бецъ Госпо́дь, исцѣле́ніемъ неду́гующихъ, прикоснове́ніемъ моще́й, просла́ви.

Дре́вле Іо́сифъ цѣлому́дрствовавъ, жи́тницами Еги́петъ препита́въ, и сро́дникамъ позна́нъ бы́сть. Стефа́нъ же въ послѣ́днія ро́ды, а́лчущія препита́въ, Ца́рю вся́ческихъ присво́ися.

Лю́діе Изра́ильстіи иногда́ прехо́дятъ Чермно́е мо́ре, ко́сти Іо́сифовы нося́ще: мы́ же во благода́ти, но́вый Изра́иль, лю́діе Бо́жіи, Стефа́новы мо́щи любо́вію цѣлу́юще, мо́ре мы́сленное житія́ сего́ прехо́димъ немо́кренно.

Богоро́диченъ: Волна́ обурева́етъ мя́ мы́сленная и печа́ли житія́ потопля́ютъ мо́й у́мъ во глубину́ уны́нія, тѣ́мже припа́даю Ти́, Влады́чице, озари́ мо́й у́мъ свѣ́томъ богоразу́мія и пода́ждь се́рдцу моему́ ча́стая воздыха́нія.

Сѣда́ленъ, гла́съ 4. Подо́бенъ: Удиви́ся Іо́сифъ.

Ми́лостивенъ нра́въ и вѣ́ру благочести́ву, любо́вь же нелицемѣ́рну и наде́жду тве́рду, имѣ́лъ еси́ отъ ю́ности ко Го́споду, Стефа́не, сего́ ра́ди восхваля́емъ твои́хъ добродѣ́телей умноже́нія, я́ко не возне́слся еси́ вла́стію скоро́ преходя́щею, Ца́рствія ра́ди непроходи́маго, и не повреди́лъ еси́ до́блести душе́вныя сла́стію житія́ кра́сною, жи́зни ра́ди бу́дущія. Тѣ́мже моли́ся Христу́ Бо́гу и на́мъ жи́телемъ бы́ти небе́снымъ.

Другíй сѣда́ленъ, гла́съ [4]. Подо́бенъ то́йже.

Сія́нія Боже́ственнаго вну́трь испо́лнився, со́лнечныхъ лу́чь мно́жайшею заре́ю, исцѣле́ніе отъ свята́го тѣ́ла просте́рлъ еси́, бѣ́сы отъ человѣ́къ отгна́лъ еси́ и неду́ги разли́чныя уврачева́лъ еси́. И ны́нѣ Царю́ си́лъ предстоя́, Стефа́не, небе́сныхъ бла́гъ на́мъ ниспосла́ти моли́ся, вѣ́рою почита́ющимъ свѣтоно́сный де́нь па́мяти твоея́.

Сла́ва, и ны́нѣ, богоро́диченъ:

Удиви́ся Іо́сифъ, е́же па́че естества́ зря́ и внима́ше мы́слію, и́же на руно́ до́ждь, въ безсѣ́менномъ зача́тіи Твое́мъ, Богоро́дице, купину́, огне́мъ неопали́мую, же́злъ Ааро́новъ прозя́бшій, и, свидѣ́тельствуя, обру́чникъ Тво́й и храни́тель свяще́нникомъ взыва́ше: Дѣ́ва ражда́етъ и по Рождествѣ́ па́ки Дѣ́ва пребыва́етъ.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Страсте́й мои́хъ смуще́ніе, ко́рмчію ро́ждшая Го́спода, и бу́рю утиши́ мои́хъ прегрѣше́ній, Богоневѣ́стная.

Милосе́рдія Твоего́ бе́здну призыва́ющу пода́ждь ми, Яже благосе́рдаго ро́ждшая, и Спа́са всѣхъ пою́щихъ Тя.

Наслажда́ющеся, Пречи́стая, Твои́хъ дарова́ній, благода́рственное воспѣва́емъ пѣ́ніе, вѣ́дуще Тя Богома́терь.

На одрѣ́ болѣ́зни моея́, и не́мощи низлежа́щу ми́, я́ко благолюби́ва, помози́, Богоро́дице, еди́на Приснодѣ́во.

Инъ.

Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.

Пою́ще свѣ́тло и воспѣва́юще ве́село, торжеству́емъ духо́вно въ па́мяти пра́веднаго Стефа́на, прославля́емъ Христа́ Бо́га немо́лчными пѣ́сньми, взыва́юще: сла́ва си́лѣ Твое́й, Го́споди.

Тала́нтъ, да́нный ти́, усугуби́лъ еси́, а́лчущія напита́въ, си́рыхъ и вдови́цъ предста́тель бы́въ, сего́ ра́ди ча́еши отъ Влады́ки Жизнода́вца воспрія́ти черто́гъ неразруши́мый съ ли́ки пра́ведныхъ, съ ни́ми же вопія́: сла́ва си́лѣ Твое́й, Го́споди.

Проповѣ́дникъ боже́ственный, дѣ́лы сло́во исполня́я, пло́дъ духо́вный въ се́рдцѣ мно́жайшій имѣ́я, бла́гость со благосты́нею, и милосе́рдіе съ кро́тостію, пѣ́ніе со благодаре́ніемъ, Стефа́не, вопіе́ши Христу́ Бо́гу: сла́ва си́лѣ Твое́й, Го́споди.

Богоро́диченъ: Безпло́тныхъ чи́нове, ли́къ боже́ственныхъ апо́столъ, про́роковъ сосло́віе, и му́ченичестіи собо́ри, преподо́бныхъ и пра́ведныхъ совокупле́нія, дивя́тся Рождеству́ Твоему́, Пречи́стая, съ ни́миже моли́ся умири́ти на́шу жи́знь.

Инъ.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Вопія́ху съ ра́достію прише́дшіи му́жіе благоговѣ́йніи, воспрія́ти многоцѣ́нный би́серъ, твою́ честну́ю ра́ку, ага́ряномъ нача́льнику: да́ждь на́мъ е́же обрѣ́лъ еси́, Бо́гомъ явле́нное сокро́вище, Стефа́на преподо́бнаго.

Свѣ́томъ небе́снымъ осія́нъ свы́ше бы́въ, арома́ты сладково́нныя пода́лъ еси, отве́рсту бы́вшу ковче́гу цѣле́бнаго твоего́ тѣ́ла, и болѣ́знію одержи́мыя человѣ́ки ди́вно уврачева́лъ еси́, сего́ ра́ди ве́село Христо́ви вопія́ху: сла́ва си́лѣ Твое́й, Го́споди.

Мо́лнія свѣтолу́чная отъ небе́съ низпосла́ся, зрѣ́ніемъ огнепа́льная явля́ется, и блиста́ніемъ показу́етъ лежа́щее въ земли́ тѣ́ло неруши́мо Стефа́на пра́веднаго.

Богоро́диченъ: Свѣтоно́сная ски́ніе Царя́ и Бо́га, Марíе Чи́стая, разжени́ о́блакъ моего́ уны́нія, и утиши́ волну́ стра́стнаго моего́ помышле́нія, я́ко да возмогу́ бо́дренно воспѣ́ти безсѣ́менное Твое́ Рождество́.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Испо́лни, Чи́стая, весе́лія се́рдце мое́, Твою́ нетлѣ́нную даю́щи ра́дость, весе́лія ро́ждшая вино́внаго.

Изба́ви на́съ отъ бѣ́дъ, Богоро́дице Чи́стая, вѣ́чное ро́ждши избавле́ніе, и миръ всякъ умъ преиму́щій.

Разрѣши́ мглу прегрѣше́ній моихъ, Богоневѣ́сто, просвѣще́ніемъ Твоея́ свѣ́тлости, Свѣтъ ро́ждшая Боже́ственный и превѣ́чный.

Исцѣли́, Чи́стая, души́ моея́ неможе́ніе, посѣще́нія Твоего́ сподо́бльшая, и здра́віе моли́твами Твои́ми пода́ждь ми.

Инъ.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Просвѣти́тельную зарю́ во умѣ́ пріе́мь, Стефа́нъ пречу́дный му́дрымъ дѣ́вамъ подо́бяся, и свою́ лампа́ду ми́лостивнымъ дѣ́ланіемъ уясни́, съ ни́ми вну́трь черто́га Христо́ва вни́ти сподо́бися.

Моли́твы ча́стыя и моле́нія множа́йша Царе́ви си́лъ возсыла́етъ Стефа́нъ блаже́нный, тѣ́мже стра́шенъ во бра́нѣхъ супроти́внымъ явля́ется.

Са́номъ міродержа́нія дарова́нъ бы́въ, смиренному́дріемъ же опоя́санъ, благоче́стіемъ одѣ́янъ и стра́хомъ Боже́ственнымъ огражде́нъ, Стефа́нъ вопія́ше: Христе́, Спа́се мо́й, просвѣти́ мя́ сія́ніемъ Твои́мъ, ино́го бо ра́звѣ Тебе́ Бо́га не зна́ю.

Богоро́диченъ: Дѣ́во Чи́стая, ро́ждшая Влады́ку и Бо́га моего́, Ему́же всегда́ моли́ся, низпосла́ти се́рдцу моему́ Боже́ственное умиле́ніе, и уму́ моему́ смиренному́дріе, во хра́мѣ Твое́мъ зову́щу: ра́звѣ Тебе́ Предста́тельницы тве́рдыя не зна́емъ.

Инъ.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Удиви́шася во́инства ага́рянская, зря́ще чу́дно видѣ́ніе: тѣ́ло твое́ неразруши́мо въ земли́ сохране́нно Боже́ственною си́лою. Ты́ бо непоро́чно и пра́ведно жи́знь твою́ сконча́лъ еси́, Стефа́не, цѣле́бниче неду́гующихъ.

Непотопле́нъ тщесла́віемъ преше́дъ пу́ть житія́, по кончи́нѣ сподо́бился еси́ жела́емаго тобо́ю наслажде́нія, ду́хомъ въ нѣ́дрѣхъ Авраа́млихъ обита́я, тѣ́ломъ же неду́говъ исцѣле́нія подава́я, Стефа́не приснопа́мятне.

Оби́тель Пресвята́го Ду́ха се́рдце твое́ бы́вши, и Сего́ Боже́ственнымъ ма́ніемъ невреди́мъ сохрани́лся еси́, тѣ́мже во хра́мѣ Богома́тере положи́вся, въ не́мъ благоуха́нія мѵ́ро излива́еши, я́звы омыва́ющее.

Богоро́диченъ: Потопля́етъ мо́й у́мъ волна́ належа́щая тя́жкаго уны́нія, и бу́ря скве́рныхъ помышле́ній приража́ется душе́внѣй мое́й хра́минѣ, просте́рши ру́ку по́мощи, Пречи́стая Влады́чице Богома́ти, ко приста́нищу вы́шняго Ца́рствія возведи́ мя.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Сме́рти и тли́ я́ко спа́слъ есть, Са́мъ Ся́ изда́въ сме́рти, тлѣ́ніемъ и сме́ртію мое́ естество́ я́то бы́вшее, Дѣ́во, моли́ Го́спода и Сы́на Твоего́, враго́въ злодѣ́йствія мя изба́вити.

Предста́тельницу Тя живота́ вѣмъ, и храни́тельницу тве́рду, Дѣ́во, и напа́стей рѣша́щу молвы́, и нало́ги бѣсо́въ отгоня́ющу: и молю́ся всегда́, отъ тли́ страсте́й мои́хъ изба́вити мя.

Яко стѣ́ну прибѣ́жища стяжа́хомъ, и душъ всесоверше́нное спасе́ніе, и простра́нство въ ско́рбехъ, Отрокови́це, и просвѣще́ніемъ Твоимъ при́сно ра́дуемся: о Влады́чице, и ны́нѣ насъ отъ страсте́й и бѣдъ спаси́.

На одрѣ́ ны́нѣ немощству́яй лежу́, и нѣсть исцѣле́нія пло́ти мое́й, но Бо́га и Спа́са мíру, и Изба́вителя неду́говъ ро́ждшая, Тебѣ́ молю́ся Благо́й: отъ тли неду́гъ возста́ви мя.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Непостижи́мую глубину́ Бо́жія смотре́нія умо́мъ взира́я, и ева́нгельскимъ глаго́ломъ до́брѣ внима́я, отцепре́данный уста́въ че́стно соблюда́еши, Стефа́не, рачи́телю цѣлому́дрія.

Му́дросте и Си́ло Вы́шняго, изба́ви на́съ мра́чнаго діа́воля нанесе́нія, и отъ человѣ́къ тлетво́рнаго лю́таго языковре́дія, моли́твами Твоего́ уго́дника Стефа́на.

Сокро́вища сѣ́менъ земнора́сленныхъ истощева́я, и сѣ́мя духо́вное въ се́рдце сокро́виществуя Стефа́нъ блаже́нный: алчу́щія пита́я, нагíя одѣва́я, жела́я согрѣ́янъ бы́ти въ ло́нѣхъ Авраа́млихъ.

Богоро́диченъ: Марíе, Госпоже́, Пречи́стая Влады́чице, на руку́ Твое́ю понесла́ еси́ Содержа́щаго го́рстію вся́ческая, и млеко́мъ пита́ла еси́, ма́нну Одожди́вшаго Изра́илю дре́вле въ пусты́ни, Того́ моли́, Богоро́дице, да ми́лостивъ ми́ бу́детъ въ де́нь су́дный, Іису́съ Человѣколю́бецъ.

Инъ.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Соверше́нъ ра́зумъ еще́ въ ю́ности о Бо́зѣ стяжа́въ, пра́вдою и благоче́стіемъ, и Боже́ственнаго зако́на испыта́ніемъ, подража́я вели́каго во царѣ́хъ Константи́на, и́же во христіа́нѣхъ первосія́вшаго.

Полцы́ и́ночестіи ра́достно лику́юще, честну́ю ра́ку усрѣта́ху, и съ весе́ліемъ рука́ми подыма́ху, сладково́ннаго мѵ́ра насыща́ющеся, достохва́льныя пѣ́сни пою́ще Христу́, Бо́гу на́шему, на́мъ тебе́ дарова́вшему, Стефа́не, красото́ на́ша.

Просія́въ дѣ́лы благи́ми и сконча́въ непоро́чно тече́ніе, ду́хомъ въ черто́зѣ пра́ведныхъ водвори́ся, тѣ́ломъ же во гро́бъ положе́нъ, ма́ніемъ Вседѣ́теля отъ гро́ба явля́ется, и я́ко да́ръ многоцѣ́ненъ Це́ркви дарова́ся, Стефа́нъ, уго́дникъ Христо́въ.

Богоро́диченъ: Черто́гъ и две́рь еси́, Богоро́дице Дѣ́во, тѣ́мже отве́рзи ми́ две́ри и́скренняго покая́нія, приводя́щи мя́ ко врато́мъ небе́снаго Ца́рствія, укроти́ сопроти́вныя вѣ́тры лю́таго моего́ уны́нія, да въ тишинѣ́ пою́ Творца́ моего́ и Го́спода.

Конда́къ, гла́съ 2. Подо́бенъ: Вы́шнихъ ища́.

Вы́шняго жела́ніемъ прославля́я, и То́й тя́ въ па́мяти, пра́ведне, прославля́етъ. Восхожде́ніемъ добродѣ́телей соверши́лъ еси́ ду́шу, прему́дре свя́те Стефа́не, на земли́ непоро́чно житіе́ соверши́въ, Зижди́телю всѣ́хъ благоугоди́лъ еси́: моли́ непреста́нно о всѣ́хъ на́съ.

Икосъ:

Язы́комъ проглаго́лати непостиза́ю, и умо́мъ недоумѣва́юся, невѣ́жда сы́й, но, Иже умудри́вый рыболо́вцы и невѣ́жды улови́ти мре́жею Боже́ственнаго проповѣ́данія вселе́нную, пода́ждь ми́ преподо́бнаго Твоего́ дѣя́нія чи́сто разумѣ́ти, и бо́дренно смотрѣ́ти, ра́достно же глаго́лати такова́я: ра́дуйся, о́трасле, прозя́бшая отъ ко́рене благовѣ́рна; ра́дуйся, вѣ́тве, имѣ́ющая цвѣ́тъ богоразу́мія; ра́дуйся, возраще́ніе цѣлому́дрія; ра́дуйся, благоче́стія ди́вный рачи́телю; ра́дуйся, вдо́въ и си́рыхъ чу́дный промысли́телю; ра́дуйся, а́лчущихъ сла́дкій пита́телю; ра́дуйся, во бра́нѣхъ непобѣди́мая хра́бросте; ра́дуйся, я́ко свы́ше осія́ніемъ яви́лся еси́; ра́дуйся, я́ко зрѣ́ніемъ мно́гія ужаси́лъ еси́; ра́дуйся, я́ко бѣ́сы отъ человѣ́къ отгна́лъ еси́; ра́дуйся, я́ко исцѣле́нія мно́гая пода́лъ еси́. Ра́дуйся, Стефа́не, я́ко Зижди́телю твоему́ благоугоди́лъ еси́: моли́ непреста́нно о всѣ́хъ на́съ.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

На́ше спасе́ніе я́коже восхотѣ́лъ еси́, Спа́се, устро́ити, во утро́бу Дѣ́выя всели́лся еси́, Юже мíру предста́тельницу показа́лъ еси́: отецъ на́шихъ Бо́же, благослове́нъ еси́.

Воли́теля ми́лости, Его́же родила́ еси́, Ма́ти Чи́стая, умоли́ изба́витися отъ прегрѣше́ній, и душе́вныхъ скве́рнъ, вѣ́рою зову́щимъ: отецъ на́шихъ, Бо́же, благослове́нъ еси́.

Сокро́вище спасе́нія, и исто́чникъ нетлѣ́нія, Тя ро́ждшую, и сто́лпъ утвержде́нія, и дверь покая́нія зову́щимъ показа́лъ еси́: отецъ на́шихъ Бо́же, благослове́нъ еси́.

Тѣле́сныя сла́бости и душе́вныя неду́ги, Богороди́тельнице, любо́вію приступа́ющихъ ко кро́ву Твоему́, Дѣ́во, исцѣли́ти сподо́би, Спа́са Христа́ намъ ро́ждшая.

Инъ.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Внима́я слы́шанію Боже́ственнаго гла́са и про́повѣди свяще́ннаго Ева́нгелія, препита́въ жи́тницами а́лчущія, подо́бно дре́внему Іо́сифу, и ри́зами одѣва́я нагíя, я́коже Іовъ Авситидíйскій, Стефа́нъ преподо́бный, съ ни́миже вопíя: благослове́нъ Бо́гъ оте́цъ на́шихъ.

Моли́твы и ми́лостыни къ Бо́гу ча́стѣ посыла́етъ Стефа́нъ, подража́я свяще́ннаго Корни́лія, и въ до́мъ пріе́мля му́жи, свяще́нствомъ и добродѣ́телію сія́ющія, и отъ ни́хъ науча́емь, вопія́ше Христу́: благослове́нъ Бо́гъ оте́цъ на́шихъ.

Якоже о́нъ, а́нгеловымъ увѣща́ніемъ, призыва́етъ верхо́внаго во апо́столѣхъ увѣ́дѣти и́стину, та́ко и Стефа́нъ серде́чнымъ жела́ніемъ, испыту́я стези́ пра́выя, глаго́лаше: благослове́нъ Бо́гъ оте́цъ на́шихъ.

Богоро́диченъ: Невеще́ственнаго Свѣ́та селе́ніе, Твоя́ утро́ба, Пречи́стая Госпоже́, бы́сть, свѣ́тлость мíру Бо́жія ра́зума подаде́, безбо́жіе прогна́вши, еди́на Богома́ти Влады́чице.

Инъ.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Несы́тною любо́вію свяще́нніи му́жіе ра́ку честну́ю подъе́млюще и рука́ми дви́жуще, благода́рственныя пѣ́сни Го́сподеви воспѣва́ху: препѣ́тый отце́въ Госпо́дь и Бо́гъ, благослове́нъ еси́.

Лю́демъ множа́йшимъ сумня́щимся о твое́мъ неруши́момъ тѣлеси́, ру́ку цѣле́бную отъе́млютъ, и съ не́ю постиза́ютъ ца́рствующій гра́дъ, и въ не́мъ тогда́ святи́тельствующій извѣ́стно увѣ́дѣвъ бы́вше Бо́жіе посѣще́ніе, душе́ю ра́довашеся, устна́ми лобыза́я, язы́комъ же глаго́лаше: препѣ́тый отце́въ Госпо́дь и Бо́гъ, благослове́нъ еси́.

Дивя́ся твоему́ кра́сному зрѣ́нію и благоуха́нію сла́дкому, святи́тель ма́тере градо́въ, хваля́ше во святы́хъ почива́ющаго Бо́га: ди́венъ еси́ во сла́вѣ Го́споди, — глаго́лаше, — и чу́дна дѣла́ Твоя́! И вопія́ше: препѣ́тый отце́въ Госпо́дь и Бо́гъ, благослове́нъ еси́.

Богоро́диченъ: Проро́ковъ исполне́ніе, и апо́столовъ ди́вное проповѣ́даніе, му́чениковъ незы́блемое утвержде́ніе, и святи́телей благолѣ́піе, и́ночествующихъ упова́ніе, и дѣ́вственниковъ цѣлому́дріе, Ты́ еси́ Влады́чице Богоро́дице, и мнѣ́ бу́ди, рабу́ Твоему́, по́мощь и засту́пница.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

По́мощи я́же отъ Тебе́ тре́бующія, не пре́зри, Дѣ́во, пою́щія и превознося́щія Тя во вѣ́ки.

Неможе́ніе души́ моея́ исцѣля́еши, и тѣле́сныя болѣ́зни, Дѣ́во, да Тя просла́влю, Чи́стая, во вѣ́ки.

Исцѣле́ній бога́тство излива́еши вѣ́рно пою́щимъ Тя, Дѣ́во, и превознося́щимъ неизрѣче́нное Твое́ рождество́.

Напа́стей Ты прило́ги отгоня́еши, и страсте́й нахо́ды, Дѣ́во: тѣ́мже Тя пое́мъ во вся вѣ́ки.

Инъ.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Ороша́емь свы́ше Ду́ха Пресвята́го росо́ю, и бразды́ серде́чныя плодоно́сны имѣ́я, духо́вная сѣ́мена и богодохнове́нная словеса́ объе́мь, жи́зни нестарѣ́ющіяся, и съ ликостоя́ніи пра́ведныхъ вопія́ Стефа́нъ: благослови́те, вся́ дѣла́ Госпо́дня, Го́спода, и превозноси́те во вся́ вѣ́ки.

Хра́мину душе́вную утверди́въ не на печцѣ́, но на тве́рдомъ ка́мени Христо́ва разумѣ́нія, вѣ́тромъ мы́сленнымъ и волна́мъ жите́йскимъ, прирази́вшимся е́й, соблю́лъ еси́ сію́ непоколеби́му. Ны́нѣ въ ра́дости лику́я, Стефа́не, зове́ши: благослови́те, вся́ дѣла́ Госпо́дня, Го́спода, и превозноси́те во вся́ вѣ́ки.

Зла́тникъ, его́же прія́лъ еси́ отъ Влады́чнія десни́цы, Стефа́не, умно́жилъ еси́, тѣ́мже ча́еши слы́шати отвѣ́тъ благíй отъ Судíи пра́веднаго, егда́ пріи́детъ во сла́вѣ Своего́ Ца́рствія, вопія́: благослови́те, вся́ дѣла́ [Госпо́дня], Го́спода, и превозноси́те во вся́ вѣ́ки.

Богоро́диченъ: Марíе, злата́я кади́льнице, Пресвята́я Влады́чице Богоро́дице, уста́ви мы́сли моея́ колеба́ніе, я́коже Сы́нъ Тво́й ути́шилъ е́сть во́лны морскíя, и исцѣли́ ума́ моего́ развраще́ніе, я́коже Онъ кровоточи́вую, да пою́ Ти́, Пречи́стая: благослове́нъ Пло́дъ Твоего́ чре́ва.

Инъ.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Содѣ́йствомъ Пресвята́го Ду́ха, мно́гая исцѣле́нія быва́ютъ отъ свята́го тѣ́ла, бѣ́сы отъ человѣ́къ отбѣга́ютъ, и я́звы разли́чныя исчеза́ютъ, не могу́ще терпѣ́ти твоего́ обоня́нія, зда́віе же получа́ющіи воспѣва́ютъ: Го́спода по́йте, дѣла́, и превозноси́ти Его́ во вся́ вѣ́ки.

Взе́мше мо́щи мѵроуха́нныя свяще́нніи му́жіе, теко́ша пу́ть сво́й съ ра́достію, псалмы́ и пѣ́сни боже́ственныя пою́ще, хвалу́ возсыла́ху Христу́ Бо́гу: сла́ва Тебѣ́, Іису́се, Сы́не и Сло́ве Отца́ Безнача́льнаго, я́ко да́лъ еси́ на́мъ прія́ти сокро́вище, би́сера дража́йшее.

Богоро́диченъ: Ру́цѣ прилѣ́жно воздѣва́ю и о́чи души́ моея́ къ Тебѣ́, Влады́чице, ве́сь содержи́мь разли́чными скорбьми́, те́плое заступле́ніе Твое́ молю́, тѣ́мже въ немощны́хъ покажи́, Богоро́дице, бога́тство человѣколю́бія Твоего́.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

То́ка слезъ мои́хъ не отврати́ся, Яже отъ вся́каго лица́ вся́ку сле́зу отъе́мшаго, Дѣ́во, Христа́ ро́ждшая.

Ра́дости мое́ се́рдце испо́лни, Дѣ́во, Яже ра́дости пріе́мшая исполне́ніе, грѣхо́вную печа́ль потребля́ющи.

Свѣ́та Твоего́ заря́ми просвѣти́, Дѣ́во, мракъ невѣ́дѣнія отгоня́щи, благовѣ́рно Богоро́дицу Тя исповѣ́дающихъ.

На мѣ́стѣ озлобле́нія не́мощи смири́вшагося, Дѣ́во, исцѣли́, изъ нездра́вія во здра́віе претворя́ющи.

Инъ.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу велича́емъ.

Отъ роди́тельнаго наказа́нія вкорени́лъ еси́ въ ду́шу ра́зумъ благовѣ́рія, и кни́жнымъ уче́ніемъ воспрія́лъ еси́ да́ръ Боже́ственнаго умиле́нія, Стефа́не преподо́бне, всегда́ моли́ спасти́ на́съ, твою́ па́мять велича́ющихъ.

О жи́зни настоя́щей небре́глъ еси́, разумѣва́я, я́ко прехо́дитъ, къ бу́дущей прите́клъ еси́, я́ко ко пребыва́ющей. Тѣ́мже въ не́й свѣ́тлость Боже́ственную созерца́я, моли́ся сію́ и на́мъ наслѣ́дити, Христа́ велича́ющи.

Недоумѣва́ющь, ка́ко соплету́ вѣне́цъ пѣ́нія, и возглашу́ Стефа́нова благодѣя́нія, и нѣ́сть ми́ разумѣ́ти, ка́цѣхъ потре́буетъ похва́лъ отъ мои́хъ скве́рныхъ усте́нъ. Но, я́же принесо́хъ ти́ со усе́рдіемъ, пріими́ со бла́гостію, предстоя́ Зижди́телю со дерзнове́ніемъ, помяни́ и на́съ, хва́лящихъ тя́.

Богоро́диченъ: Влады́чице мíра, блага́я Засту́пнице, пріими́ отъ на́съ приноси́мое Ти́ хвале́ніе, я́коже Сы́нъ Тво́й прія́тъ двѣ́ ле́птѣ вдови́чи, и пода́ждь на́мъ ми́рное житіе́ и единомы́сліе.

Инъ.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Земля́ не могу́щи утаи́ти сокро́вища безцѣ́ннаго, свѣ́ту свы́ше посыла́ему, и показу́ющу въ не́й лежа́щее тѣ́ло Стефа́ново, тлѣ́нія не вкуси́вшее, и повелѣ́ніемъ Царя́ и Влады́ки отъ бо́ку земна́го исходя́щее.

Слы́шавши супру́жница благовѣ́рія о твое́мъ обрѣ́теніи, Стефа́не преблаже́нне, тяготу́ ста́рости отложи́вши и благодаре́нія Бо́гу возда́вши, е́млется пу́тнаго ше́ствія и прихо́дитъ на согляда́ніе честна́го твоего́ тѣлесе́. Очи́ма же ви́дѣвши и устна́ма лобыза́вше, немо́лчно глаго́лаше: о се́мъ, Христе́, Спа́се мо́й, велича́ю Тя́.

Изнемога́етъ у́мъ мо́й стра́стный, мгло́ю покрове́нъ тя́жкаго уны́нія, принести́ Тебѣ́, Христе́ мо́й, гла́съ хвале́нія, но пода́ждь ми́ лучу́ у́мнаго осія́нія, да совершу́ пѣ́cнь благодаре́нія, велича́я Стефа́нова кра́сная повѣ́данія.

Богоро́диченъ: Пощади́ мя́, Христе́, Спа́се мо́й, егда́ ся́деши испыта́ти сокрове́нная моя́ дѣя́нія, и сподо́би мя́ тогда́ десна́го Твоего́ предстоя́нія, мо́литъ Тя́ Дѣ́ва, чи́сто ро́ждшая Тя́, а́нгельстіи чи́ни, и святы́хъ мно́жества.

Свѣти́ленъ. Подо́бенъ: Свѣ́те неизмѣ́нный.

Свѣ́тъ Трісія́нный въ се́рдцѣ пріе́мь, свѣ́томъ наставля́емь уче́ній Правосла́вія, свѣ́тъ и Ду́ха, благода́тію просвѣща́ющаго тя́, Стефа́не, свѣ́те прекра́сный.

Сла́ва, другíй. Подо́бенъ: Ду́хомъ во святи́лищи.

Це́рковь красу́ется и лику́етъ, ра́ку благоуха́нную въ себѣ́ иму́щи, я́ко невѣ́ста игра́етъ, и Жениху́ своему́, Христу́, хвале́нія пѣ́сни прино́ситъ, ра́достенъ пра́здникъ съ ча́ды свои́ми соверша́ющи.

И ны́нѣ, богоро́диченъ:

Совѣ́та вели́каго Ангела, Отца́ благоволе́ніемъ, и Свята́го Ду́ха наи́тіемъ, во утро́бѣ Твое́й понесла́ еси́, Богоро́дице, Того́ моли́ сохрани́ти достоя́ніе, е́же стяжа́, Пресвята́я Влады́чице.

На хвали́техъ стихи́ры на 4, гла́съ 4. Подо́бенъ: Зва́нный свы́ше.

Свы́ше пріе́мь духо́вное осія́ніе, егда́ прилѣ́жно испытова́ше Свяще́нное Писа́ніе, душе́вную лампа́ду уясни́лъ еси́ дѣ́лы благотворе́нія, и у́мную быстроту́ услади́лъ еси́ раче́ніемъ цѣлому́дрія, чу́вства просвѣти́лъ еси́ Боже́ственнымъ жела́ніемъ. И тогда́ разу́мно увѣ́дѣлъ еси́ Изве́дшаго свѣ́тъ изъ тмы́, Христа́, Бо́га на́шего, Его́же моли́ спасти́ и просвѣти́ти ду́ши на́ша. [Два́жды.]

Иже Свѣ́тъ Трисія́нный въ тя́ всели́ся, свы́ше умудри́ тя́ въ Того́ позна́ніе, егда́ управля́ше житія́ твоего́ строе́ніе, тогда́ о бу́дущихъ имѣ́лъ еси́ разумѣ́ніе, и дѣ́ланіемъ благи́мъ возжела́лъ еси́ прія́ти дерзнове́ніе, и ко Христу́ Бо́гу стяжа́ти присвое́ніе, Его́же ны́нѣ моли́ спасти́ и просвѣти́ти ду́ши на́ша.

Иже свѣ́тлая луча́ отъ небе́съ посыла́ема, надъ тобо́ю, сія́ющи, явля́шеся, егда́ земно́е покрыва́ло тѣ́ло твое́ содержа́ше, манове́ніемъ же Боже́ственнымъ свы́ше пока́зоваше, тогда́ увѣ́дѣхомъ вси́ твоего́ богоразу́мія постиже́ніе, и́мже позна́лъ еси́ Изве́дшаго свѣ́тъ изъ тмы́, Христа́, Бо́га на́шего, Его́же моли́ спасти́ и просвѣти́ти ду́ши на́ша.

Сла́ва, гла́съ 1:

Всѣ́хъ удивля́етъ твоего́ исправле́нія слы́шаніе, и вси́ прославля́ютъ Творца́ и Содѣ́теля, Иже тобо́ю, преподо́бне, такова́я содѣ́лавша, я́ко отъ ю́ности взыска́лъ еси́ ра́зумъ и́стинный, и прія́лъ еси́ соверше́нства позна́ніе Бо́жіяго благоволе́нія, тѣ́мже о судьба́хъ нелѣ́ностно у́треневалъ еси́, си́рымъ и вдови́цамъ засту́пникъ бы́въ: а́лчущія напита́лъ еси́, и къ ни́щимъ десни́цу просте́рту имѣ́лъ еси́, сего́ ра́ди, Стефа́не свя́те, жде́тъ тебе́ мздовоздая́ніе отъ Христа́ Бо́га, Судіи́ пра́веднаго, и вѣне́цъ небе́снаго Ца́рствія.

И ны́нѣ, богоро́диченъ:

Ра́дуйся, Влады́чице, сла́во земны́хъ, моля́щихся Тебѣ́, ра́дуйся, Дави́дова вну́ко, и Ма́ти пречи́стая, Бо́га Вы́шняго рабо́ и хода́таице, чистоты́ пречи́стое обита́лище, сла́ва му́чениковъ и утвержде́ніе, преподо́бныхъ и пра́ведныхъ наде́жда и упова́ніе, и человѣ́комъ всѣ́мъ спасе́ніе.

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на 1-го пѣ́снь 3-я на 4, и 2-го [кано́на пѣ́снь] 6-я на 4. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Кори́нѳяномъ, зача́ло 176: Бра́тіе, Бо́гъ ре́кій изъ тмы́ свѣ́ту возсія́ти... Аллилу́ія, гла́съ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́]. Сти́хъ: Си́льно на земли́ бу́детъ сѣ́мя его́. Ева́нгеліе отъ Матѳе́я, зача́ло 70: Рече́ Госпо́дь при́тчу сію́: уподо́бися Ца́рствіе небе́сное человѣ́ку домови́ту, и́же изы́де ку́пно у́тро ная́ти дѣ́латели въ виногра́дъ сво́й... Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Кни́га Се́рблякъ, содержа́щая въ себѣ́ богослуже́бная моле́бная пра́вила святы́мъ се́рбскаго ро́да. — Бѣ́лградъ, 1861. — Л. 16 – 23 об., 25 – 30 об.

/ Къ оглавленію раздѣла /


Наверхъ / Къ титульной страницѣ

0