Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 27 iюня 2017 г. Сейчасъ на порталѣ посѣтителей - 23.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 4-й де́нь.
Свята́го священному́ченика Іероѳе́я, епи́скопа Аѳи́нскаго.

ВЕЧЕРЪ,
На Го́споди воззва́хъ: стихи́ры, гла́съ 4. Подо́бенъ: Да́лъ еси́ зна́меніе.

Благода́ть пріе́мь* Всесвята́го, всесла́вне Іероѳе́е, Ду́ха,* всю́ проше́лъ еси́ ны́нѣ вселе́нную,* уча́ Еди́ницу въ Тре́хъ Ѵпоста́сѣхъ чести́:* Отца́ Безнача́льна,* нача́ло Божества́,* съ Ни́мже Сы́на я́ко Сопресто́льна Отцу́ и Единосу́щна,* отъ Дѣ́вы ражда́ема* плотоно́сца я́ко Человѣ́ка.

Да́ръ священнобоже́ственный, твою́ ду́шу,* я́ко благопрія́тенъ, прине́слъ еси́* и тѣ́ло пре́далъ еси́ свяще́нно я́ко боже́ственное* и священнодѣ́йствующее ду́ши* вѣ́рующихъ Вседержи́телю Бо́гу,* спасе́ніе вѣ́рнымъ источа́ющее.* Тѣ́мъ твою́ па́мять и погребе́ніе ублажа́емъ,* и чудеса́ лю́бимъ,* и словеса́ проповѣ́дуемъ.

Ты́ двоенадеся́тное число́* апо́столовъ ви́дѣлъ еси́* на Успе́ніи Пресла́вныя* Приснодѣ́вы же Пречи́стыя Богоро́дицы, Ма́тере Госпо́дни,* и Діони́сій съ тобо́ю,* и́же боже́ственныя списа́въ чи́ны,* съ ни́миже твое́ всепра́зднственное* и пресвято́е торжество́,* вѣ́рніи, ублажа́емъ, Іероѳе́е сла́вне.

Сла́ва, гла́съ 2:

Предста́въ Успе́нію боже́ственному, богоповѣ́стниче, Богома́тере, вѣща́ніи боже́ственными возвесели́лъ еси́ сердца́, блаже́нне, вѣ́рныхъ и свяще́нное сосло́віе богопроповѣ́дателей апо́столовъ услади́въ, изступле́ніемъ боже́ственнѣйшимъ воспѣва́я Бо́жія та́йны. Тѣ́мъ дерзнове́ніе ко Христу́ пріе́мъ, іера́рше Іероѳе́е, моли́ся о душа́хъ на́шихъ.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Егда́ нескве́рная Агница ви́дѣ Своего́ Агнца на заколе́ніе, я́ко человѣ́ка, во́лею влеко́ма, пла́чущи, глаго́лаше: безча́дствовати Мя́ ны́нѣ тщи́шися, Христе́, Ро́ждшую Тя́. Что́ сіе́ сотвори́лъ еси́, Изба́вителю вся́ческихъ? Оба́че воспѣва́ю и сла́влю Твою́, ю́же па́че ума́ и сло́ва, кра́йнюю бла́гость, Человѣколю́бче.

Тропа́рь, гла́съ 4:

Бла́гости научи́вся и трезвя́ся во всѣ́хъ благо́ю со́вѣстію священнолѣ́пно обо́лкся, поче́рплъ еси́ отъ сосу́да избра́ннаго неизрече́нная, и вѣ́ру соблю́дъ, ра́вное тече́ніе соверши́лъ еси́, священному́чениче Іероѳе́е. Моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, богоро́диченъ или́ крестобогоро́диченъ.



НА УТРЕНИ,
Оба кано́на окто́иха, и свята́го кано́нъ на 4, его́же краегране́сіе: Свѣтоно́сную твою́, всеблаже́нне, па́мять почита́емъ. Творе́ніе Ѳеофа́ново. Гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Небе́снаго ученика́, тайноводи́теля, богопрія́тне, Па́вла, мірска́го ловца́, учи́теля имѣ́я, видѣ́нія го́рнѣйшаго учени́къ бы́лъ еси́.

Духодви́жный я́вственно Па́вловъ тя́ язы́къ, вѣща́ющъ Бо́жія та́йны, блаже́нне, объя́ше, и боговѣща́теля содѣ́я.

Унзе́нъ любо́вію духо́вною и боже́ственными словесы́ въ ра́зумѣ бесѣ́дуя всѣ́хъ Влады́цѣ, всесвяще́нне, свяще́нная словеса́ возложи́лъ еси́.

Богоро́диченъ: Свѣ́та присносу́щнаго прія́телище боголѣ́пное бы́вши, Дѣ́во Чи́стая, скве́рнъ мя́ вся́каго грѣха́ и тимѣ́ній измы́й, Влады́чице.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Яко священносло́вяща свяще́нная пи́смена и благоче́стія сло́во проповѣ́дающа, вси́ почита́емъ тя́, ве́село соше́дшеся, и твою́ свяще́нную па́мять сла́вимъ.

Крѣ́постію, и ма́ніемъ, и боже́ственнымъ раче́ніемъ къ Благодѣ́телю всѣ́хъ возпростира́яся, у́мъ тво́й озари́лъ еси́ луча́ми та́мошними и ду́шу просвѣти́лъ еси́, преблаже́нне.

Тезоиме́ннѣ наре́клся еси́ свяще́нное Боже́ственное и свято́е богому́дрое яви́лся еси́ возложе́ніе Вседержи́телю и Творцу́ вѣко́въ, и хра́мъ украси́лъ еси́ небе́сный.

Богоро́диченъ: Не́бо простры́й и земны́й, Чи́стая, содержа́й кру́гъ, и по всему́ естество́мъ Божества́ во обя́тіихъ Твои́хъ пло́тски содержа́ся, и вѣ́рнымъ Тя́ утвержде́ніе всѣ́мъ показа́.

Конда́къ, гла́съ 8. Подо́бенъ: Взбра́нной.

Священнонача́льника Аѳи́нскаго восхваля́емъ тя́, я́ко тайноучи́вшеся тобо́ю стра́ннымъ и неизрече́ннымъ: яви́лся бо еси́ богопрія́тный пѣсносло́вецъ. Но моли́, всеблаже́нне Іероѳе́е, отъ вся́кихъ на́мъ грѣхопаде́ній изба́витися, да зове́мъ: ра́дуйся, о́тче богому́дре.

Та́же сѣда́ленъ, гла́съ 5. Подо́бенъ: Собезнача́льное Сло́во.

Апо́стольскимъ вѣща́ніемъ огласи́въ тво́й у́мъ и упа́съ, преподо́бне, вѣ́рныхъ составле́нія, же́ртву чи́сту прине́слъ еси́ Царю́ и Творцу́, вопло́щшемуся за ны́ отъ Дѣ́вы Богоро́дицы и воскре́сша со сла́вою, исповѣ́давъ Его́, Іероѳе́е.

Сла́ва, и ны́нѣ, богоро́диченъ:

Те́плая предста́тельнице и непобѣди́мая, упова́ніе извѣ́стное и непосты́дное, стѣно́, и покро́ве, и приста́нище прибѣга́ющимъ къ Тебѣ́, Приснодѣ́во Чи́стая, Сы́на Твоего́ и Бо́га моли́ со а́нгелы, умире́ніе да́ти мíру, и спасе́ніе, и ве́лію ми́лость.

Крестобогоро́диченъ:

На Крестѣ́ зря́щи Тя́, Христе́, Ма́ти Твоя́, во́лею посредѣ́ разбо́йниковъ ви́сяща, растерза́ющися утро́бою ма́терски, глаго́лаше: Безгрѣ́шный Сы́не, ка́ко непра́ведно на Крестѣ́, я́коже злодѣ́й, пригвожде́нъ еси́, человѣ́ческій ро́дъ хотя́ оживи́ти, я́ко Благоутро́бенъ?

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Витíйскими боговѣща́ньми украси́лъ еси́ ликостоя́нія, блаже́нне Іероѳе́е, вѣ́рныхъ и свяще́нный собо́ръ, богому́дре, возвесели́лъ еси́ апо́стольскій, удивле́ніемъ боже́ственнымъ дѣ́йствуя, и поя́: си́лѣ Твое́й сла́ва, Человѣколю́бче.

Ве́сь Бо́гу освяще́нъ бы́лъ еси́ всеобра́зно, блаже́нне, изступа́я къ Нему́ богосло́вными священносло́віи, священноявле́нъ, богопрія́тне, и боже́ственъ пѣсносло́вецъ, и му́дръ боговѣща́тель, прису́щимъ смы́сленно суди́мь.

Ны́нѣ ви́дя, о́тче, боже́ственная яснѣ́йше мимоше́дшихъ всѣ́хъ свяще́ннѣйше гада́ній и сѣ́ній, су́щихъ на земли́, и́стиннѣйшая боговидѣ́нія сія́ній, моли́ спасти́ся вѣ́рно пою́щимъ: си́лѣ Твое́й сла́ва, Человѣколю́бче.

Богоро́диченъ: Ты́ Бо́га невмѣсти́маго, вмѣ́щшагося во чре́во Твое́, Пречи́стая, родила́ еси́, я́ко Чи́стая дѣ́вственными укра́шена свѣтлостьми́, Всеблаже́нная. Тѣ́мъ Тя́, Богоро́дицу, и́стинно благохва́лимъ и Рождество́ Твое́ вси́ сла́вимъ.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Купножи́тель, о́тче, апо́стольскому сы́й собра́нію, съ ни́миже предста́лъ еси́ на Успе́ніе боже́ственное, богогла́се, Жизнода́вца пло́тію на́мъ ро́ждшія, Пресвяты́я и Чи́стыя Богома́тере.

Преесте́ственно разумѣ́въ и ста́рчески, я́же па́че словесе́, видѣ́нія, исповѣ́да всѣ́мъ пріе́млющимъ вѣ́рно сія́ніе и твоя́, всеблаже́нне, созри́тельная богосло́вія, разумѣ́ти лю́бящимъ, вседо́блественнѣйше.

Пребога́тными луча́ми па́че естества́ свѣтозаре́ніемъ свѣтя́ся, извѣствова́ніемъ боже́ственныхъ открове́ній и чистото́ю, мно́гихъ одержа́лъ еси́ вре́меннымъ испыта́ніемъ, и видѣ́ніемъ, мудрѣ́йшая боже́ственная науча́емь.

Богоро́диченъ: Неискусому́жно, Дѣ́во, непредѣ́льнаго естество́мъ Божества́, вмужи́вшагося Сло́ва на́съ ра́ди, человѣ́ковъ, зачала́ еси́ отъ крове́й, Отрокови́це, дѣ́вственныхъ, воображе́на па́че сло́ва, и зако́на, и естества́.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Навыче́ніемъ боголѣ́пнымъ боже́ственному зна́нію науча́емь, словеса́, о́тче, твоя́, я́ко втора́я словеса́ оста́вилъ еси́ я́вѣ священнозна́нія, ду́ши на́ша просвѣща́ющая.

Блаже́нъ и́стинно бы́лъ еси́, богоблаже́нне, очище́нною душе́ю и су́щее блаже́нство, и еди́но жела́емое возлюби́лъ еси́, добро́ты Спа́совы, Іероѳе́е.

На пречи́стыя лучи́ взира́я, богопрія́тне, разу́мными блиста́ньми Боже́ственныхъ свѣ́тлостей, тѣ́хъ наслажде́нія и свѣтодая́нія о́бщникъ яви́лся еси́, блаже́нне.

Богоро́диченъ: Госпо́дьственно и и́стинно Тя́, Богоро́дице, сла́вимъ, су́що бо Су́щаго Бо́га неизрече́нно родила́ еси́, пло́тію по Ѵпоста́си совоку́пльшася, Пресвята́я Ма́ти Дѣ́во.

Конда́къ, гла́съ 4. Подо́бенъ: Вознесы́йся.

Якоже сто́лпъ непоколеби́мь, Іероѳе́е, преще́нія враго́въ не устраши́ся, но пре́лести разруши́лъ еси́ тверды́ню, я́ко ка́мень че́стенъ валя́яся, о́тче. Тѣ́мъ Влады́ка тя́, хра́брствовавша, вѣнча́етъ живонача́льною и Боже́ственною десни́цею. Его́же о всѣ́хъ на́съ умоли́.

Икосъ:

Зако́ну покаря́ющеся Твоему́, Христе́, ученицы́ Твои́ и и́же отъ язы́къ всѣ́мъ проповѣ́дающе сло́во Боже́ственнаго Твоего́ прише́ствія, Це́рквамъ всѣ́мъ рукополага́ютъ вѣ́рныя, па́стыри же и проповѣ́датели. Па́стыря у́бо и сего́ положи́ша, его́же избра́лъ еси́ отъ младе́нства, и просвѣти́въ, я́ко непоро́чна, Тебѣ́, и произво́ли на сіе́ того́ возве́дъ, и ста́до Твое́ вручи́въ, свидѣ́теля яви́лъ еси́ Твоего́ Ца́рствія, моля́щася о всѣ́хъ на́съ.

Пѣ́снь 7.

Ирмо́съ: Бо́жія снисхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Святы́хъ свята́я тща́ся ви́дѣти, богоблаже́нне, чистото́ю житія́ и зрѣ́нія Боже́ственнаго высо́кое, му́дрѣ, стяжа́лъ еси́, и, поя́, взыва́лъ еси́: благослове́нъ Бо́гъ оте́цъ на́шихъ.

Глаго́лъ вѣща́ніе твои́хъ и списа́ній доброслове́сіе возвеселя́етъ любо́вію честву́ющія и поуща́етъ къ пѣснопѣ́нію, зва́ти науча́я: благослове́нъ еси́, Бо́же оте́цъ на́шихъ.

Еди́ницу, Божество́мъ зна́емую, благосло́вилъ еси́, въ Ли́цѣхъ Тро́ицу и пое́му во Ѵпоста́сехъ Тре́хъ, богому́дре, и, поя́, взыва́лъ еси́: благослове́нъ Бо́гъ оте́цъ на́шихъ.

Богоро́диченъ: Зако́нныхъ есте́ствъ, Дѣ́во Ма́ти, кромѣ́ родила́ еси́ Влады́чествующаго всѣ́ми ви́димыми и разу́мными, Чи́стая, Его́же пое́мъ, согла́сно зову́ще: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Всеси́льное Ду́ха Свята́го дѣ́йство въ чистѣ́йшую твою́ ду́шу все́льшися, богопрія́тна проповѣ́дника и богоглаго́льника показа́, священнолѣ́пно Изба́вителя пою́ща и вѣ́рою хва́ляща: свяще́нницы воспо́йте, лю́діе превозноси́те во вся́ вѣ́ки.

Съ благоче́стнымъ взыска́ніемъ испыта́въ неизрече́нная строе́нія Христо́выхъ та́инъ, я́сно изъяви́лъ еси́, высокослове́сіемъ дѣ́йствуя и сладча́йшимъ твои́хъ вѣща́ній сложе́ніемъ, вопія́ непреста́нно: свяще́нницы воспо́йте, лю́діе превозноси́те во вся́ вѣ́ки.

Всебога́тая тя́ благода́ть Боже́ственнѣйшимъ вдохнове́ніемъ и богосло́віемъ испы́тнымъ испо́лнила е́сть: отсю́ду источи́лъ еси́, я́ко рѣ́ки, уче́нія, апо́стольская возвеселя́ща ликостоя́нія, съ ни́миже ны́нѣ воспѣва́еши: свяще́нницы воспо́йте, лю́діе превозноси́те во вся́ вѣ́ки.

Богоро́диченъ: Умерщвле́ну, Пречи́стая, ду́шу мою́ грѣхми́, и озло́блену ядови́тымъ угрызе́ніемъ, Бо́га, могу́щаго животвори́ти вся́ческая, неискусобра́чно па́че естества́ ро́ждши, возста́ви вопію́щую: дѣ́ти благослови́те, свяще́нницы воспо́йте, лю́діе превозноси́те во вся́ вѣ́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Му́дрости прему́драго я́ко рачи́тель бы́въ, благода́тный вѣне́цъ благолѣ́пный, ра́дуяся, прія́лъ еси́ ны́нѣ отъ нея́; и лико́вникъ небе́сный у вся́ческихъ Содѣ́теля бы́въ, моли́ спасти́ся отъ бѣ́дъ хва́лящимъ тя́, Іероѳе́е.

Всели́лся еси́ въ вы́шнія Боже́ственныя дворы́, и оби́тели вѣ́чныя наслѣ́дивъ, съ во́инствы а́нгельскими ны́нѣ пра́зднуеши и съ апо́стольскими чи́нми, и́мже свесели́шися ра́достнѣ, съ ни́миже и соводворя́яся, вѣ́рою честву́ющимъ тя́ Боже́ственнаго ми́ра проси́.

Извѣ́стная воздая́нія воспріе́мъ, и́же на земли́ явле́нія стяжа́лъ еси́, при́сною любо́вію взира́я къ Бо́гу, ны́нѣ прилѣ́жно моли́, о́тче Іероѳе́е, ми́лость и очище́ніе пода́ти вѣ́рою па́мять твою́ соверша́ющимъ, свѣтоно́сную и всесвяще́нную.

Богоро́диченъ: Яко Ма́ти всѣ́хъ Содѣ́теля, ма́тернимъ Твои́мъ дерзнове́ніемъ умоли́ Твоего́ Сы́на спасти́ отъ наси́лія мучи́тельскаго плѣне́нныя рабы́ Твоя́, и клеветы́ человѣ́къ лука́выхъ упраздни́ти, ми́ръ же пода́ти и спасе́ніе пою́щимъ Тя́.

Свѣти́ленъ. Подо́бенъ: Жены́, услы́шите.

Ху́ждшее покори́лъ еси́ лу́чшему, богопрія́тне, у́мъ страсте́й вожда́ предвчини́въ всему́дро, отвсю́ду, Іероѳе́е, богосло́вія бы́лъ еси́ орга́нъ и апо́столъ Христо́въ, му́дре іера́рше, о мíрѣ моли́ся.

Богоро́диченъ:

Успе́нію Твоему́ пречи́стому прише́дъ Іероѳе́й съ про́чими апо́столы, пѣ́снь пое́тъ Тебѣ́, Отрокови́цѣ, стра́нную и неизрече́нную, боже́ственно изступа́я, я́ко и́стинно богопрія́тенъ; ему́же подо́бники и на́съ покажи́, Богома́ти Дѣви́це.

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 38 об. – 42 об.

/ Къ оглавленію раздѣла /


Наверхъ / Къ титульной страницѣ

0