Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 4-й де́нь.
Слу́жба обрѣ́тенію честны́хъ моще́й и́же во святы́хъ оте́цъ на́шихъ Гу́рія, пе́рваго архіепи́скопа новопросвѣще́ннаго гра́да Каза́ни, и Варсоно́фія, епи́скопа Тверска́го.

НА МАЛѢЙ ВЕЧЕРНИ,
[На Го́споди воззва́хъ:] стихи́ры [на 4], гла́съ 1. Подо́бенъ: Небе́сныхъ чино́въ.

Взя́сте на ра́мо кре́стъ Христо́въ* и распя́стеся мíру, преподо́бніи,* и послѣ́довасте стопа́мъ созда́вшаго отъ не су́щихъ вся́,* Бо́жія Сло́ва.* Его́же моли́те, да пріи́мемъ грѣхо́въ проще́ніе* и наслѣ́дницы бу́демъ жи́зни вѣ́чныя. [Два́жды.]

Яви́стеся сокро́вище добродѣ́телей* и презрѣ́сте вся́ я́же въ житіи́ кра́сная,* Христо́вою любо́вію распала́еми,* и́щуще я́же Бо́гу уго́дная.* И Того́ ра́ди бы́сте жи́теле Ца́рства небе́снаго* и о на́съ моли́те,* да бу́демъ и мы́ тому́ соприча́стницы.

Безстра́стія бы́вше кра́сніи сосу́ди, отцы́ преблаже́нніи,* и чуде́съ исто́чницы,* мона́шествующихъ столпи́ крѣ́пцыи, де́моновъ прогони́теліе* и страсте́й цѣли́теле,* да почту́тся пѣ́сньми* наста́вницы на́ши прему́дріи* и мо́лятъ Христа́ да спасе́тъ ду́ши на́ша.

Сла́ва, гла́съ 6:

Кто́ дово́ленъ похвали́ти таковы́я святи́тели, возсія́вшія напослѣ́докъ лѣ́тъ? Благода́тію бо Свята́го Ду́ха чуде́съ исцѣле́ній да́ръ пріе́мше отъ Бо́га и свои́хъ тѣле́съ нетлѣ́ніе, на́мъ же у Христа́ про́сятъ грѣхо́въ проще́нія и ве́лія ми́лости.

И ны́нѣ, богоро́диченъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ и жили́ще Ду́ха Пресвята́го* преподо́бніи отцы́ бы́ли есте́,* тѣ́мже и на́съ* до́мъ Того́ содѣ́лайте,* святу́ю ва́шу па́мять почита́ющихъ.

Сти́хъ: Честна́ предъ Го́сподемъ* сме́рть преподо́бныхъ Его́.

Не преста́йте моля́щеся, преподо́бніи,* о при́сныхъ рабѣ́хъ ва́шихъ,* и́хже нетлѣ́ніемъ тѣле́съ ва́шихъ возвесели́сте,* да вси́ честну́ю ва́шу па́мять,* веселя́щеся, почита́емъ.

Сти́хъ: Восхва́лятся преподо́бніи во сла́вѣ* и возра́дуются на ло́жахъ свои́хъ.

Моли́теся прилѣ́жно за ны́, наста́вницы на́ши,* и изба́вите ны́ отъ бѣ́дъ и скорбе́й,* я́же на ны́ нахо́дятъ,* ускори́те, святíи, на по́мощь на́шу,* да по до́лгу ва́съ ублажа́емъ.

Сла́ва, гла́съ 3. Самогла́сенъ:

Мно́гъ тру́дъ и тѣ́сенъ пу́ть въ житіи́ свое́мъ прешли́ есте́, отцы́ преподо́бніи, и тѣ́мъ дости́гли есте́ въ ти́хое приста́нище и ра́дость неизрече́нную, идѣ́же пра́ведныхъ веселя́тся ли́цы, явля́ющеся на́мъ, ча́домъ свои́мъ, я́ко мзду́ прія́ли есте́ трудо́въ свои́хъ.

И ны́нѣ, богоро́диченъ.

Тропа́рь о́бщій святы́хъ, гла́съ 3. Подо́бенъ: Да веселя́тся.

Пе́рвіе учи́теліе пре́жде те́мному, ны́нѣ же свѣ́тлому и новопросвѣще́нному гра́ду Каза́ни, пе́рвіи возвѣсти́теліе пути́ спаси́тельнаго, и́стинніи храни́теліе апо́стольскихъ преда́ній, столпи́ непоколеби́міи, благоче́стія учи́теліе и Правосла́вія наста́вницы, Гу́ріе и Варсоно́фіе, Влады́ку всѣ́хъ моли́те ми́ръ вселе́ннѣй дарова́ти и душа́мъ на́шимъ ве́лію ми́лость.

Сла́ва, и ны́нѣ, богоро́диченъ.



НА ВЕЛИЦѢЙ ВЕЧЕРНИ,
Блаже́нъ му́жъ.., [1-й антифо́нъ.] На Го́споди воззва́хъ: поста́вимъ стихо́въ 8 и пое́мъ стихи́ры святи́теля Гу́рія, гла́съ 5. Подо́бенъ: Ра́дуйся.

Преда́ніемъ прилѣжа́въ прилѣ́жно, я́же прія́лъ еси́ отъ Спа́са на́шего Христа́ Бо́га, и святы́хъ Его́ учени́къ, и вселе́нскихъ учи́телей, вѣ́рою и благопокоре́ніемъ къ наказа́телю своему́ и дости́глъ еси́ слове́сное наказа́ніе и соверше́нное позна́ніе Свяще́нныхъ Писа́ній. И того́ ра́ди избра́ннаго Христо́ва ста́да оте́цъ и учи́тель явля́ешися, святи́телю Гу́ріе, Христа́ Бо́га моли́ спасти́ся на́мъ, вѣ́рою приходя́щимъ къ ра́цѣ моще́й твои́хъ.

Къ три́десятемъ два́ лѣ́та земле́ю покрове́но бы́сть честно́е тѣ́ло твое́, святи́телю Гу́ріе, и обрѣ́теся ра́ка моще́й твои́хъ полна́ мѵ́ра благово́ннаго, гро́бъ же и погреба́льная но́ва бя́ху, крѣ́постію же но́выхъ крѣпча́йша; тѣ́ло же твое́ честно́е, а́ки гу́ба, верху́ мѵ́ра ноша́шеся; ча́сти же отъ чудотво́рнаго твоего́ тѣ́ла ни еди́нѣй погруже́ннѣй бы́вшей, цѣ́лости ра́ди. Тѣ́мже мо́лимъ тя́, святи́телю Гу́ріе: моли́ Христа́ Бо́га спасти́ся душа́мъ на́шимъ.

Мона́ха два́ подви́гшася къ Бо́гу до́брѣ, Іо́на и Некта́рій, еди́нъ еди́наго роди́вый, тебѣ́ же послужи́вша въ мíрѣ вѣ́рно, и по сме́рти твое́й вѣ́ру къ тебѣ́ держа́ста несумнѣ́нну и хра́мину ка́менну надъ гро́бомъ твои́мъ согради́ста: въ то́йже и са́ми бли́зъ тебе́ погребо́шася, святíи тíи, мно́гимъ нетлѣ́ніемъ отъ Бо́га почте́ни бы́вше. Моли́ съ ни́ми, святи́телю Гу́ріе, Христа́ Бо́га дарова́ти на́мъ ми́ръ и ве́лію ми́лость.

Егда́ обрѣто́шася мо́щи твоя́, святи́телю Гу́ріе, тогда́ испо́лнися ве́сь гра́дъ благоуха́нія, и стеко́шася всенаро́дное мно́жество, церко́внаго первопресто́льника и па́стыря своего́ зрѣ́ти жела́юще, ра́дости и сле́зъ испо́лнишася, вопію́ще и глаго́люще: О, пе́рвый учи́телю и наста́вниче гра́ду на́шему! Мо́лимъ тя́, моли́ Христа́ Бо́га, да пода́стъ ми́ръ мíру и душа́мъ на́шимъ ве́лію ми́лость.

Ины стихи́ры святи́теля Варсоно́фія, гла́съ 5. Подо́бенъ: Преподо́бне о́тче.

Святи́телю преди́вный Варсоно́фіе, споспѣшеству́й на́мъ, ча́домъ твои́мъ, на ви́димыя и неви́димыя враги́ на́ша: и́маши бо на сіе́ отъ Бо́га да́нную тебѣ́ си́лу, и́стинный Бо́жій уго́дниче, моли́ изба́витися на́мъ отъ вся́кихъ бѣ́дъ твои́ми, свя́те, моли́твами.

Восхотѣ́въ по Христѣ́ жи́ти, показа́лся еси́ цѣлому́дренъ, святи́телю Варсоно́фіе, и мно́гимъ пу́ть показа́въ ко спасе́нію, ко Христу́ приве́лъ еси́, твоему́ Влады́цѣ. Имѣ́я къ Нему́ дерзнове́ніе, за чту́щія тя́ моли́, да изба́вимся бѣ́дъ и печа́лей, да вси́ тебе́ велича́емъ.

Со усе́рдіемъ слове́съ Бо́жіихъ послу́шатель бы́въ и благоче́стно и пра́ведно, благоуго́дно житіе́ пожи́въ, святи́телю Варсоно́фіе, Христа́ любя́ и Христо́мъ люби́мь бы́въ, и вѣ́чныхъ бла́гъ наслѣ́дникъ бы́лъ еси́. Моли́ Христа́ Бо́га, преподо́бне, спасти́ и просвѣти́ти ду́ши на́ша.

Преподо́бныя твоя́ ру́ки просте́ръ моле́бно, Варсоно́фіе, о́тче преподо́бне, о держа́вномъ Импера́торѣ на́шемъ Христу́ моли́ся, о гра́дѣ и о святѣ́й се́й оби́тели, е́йже бы́лъ еси́ пе́рвый зда́тель и па́ствѣ нача́льникъ, въ не́йже трудолюбе́зно поще́ніемъ и моли́твою до́брѣ подви́гся, и многотру́дному твоему́ тѣ́лу положи́тися Бо́гъ въ то́й изво́ли; и пресла́вно обрѣто́шася честны́я твоя́ мо́щи нетлѣ́нны, подаю́тъ чудеса́ и исцѣле́нія. Моли́, преподо́бне, и на́мъ спасти́ся, твою́ па́мять почита́ющимъ.

Сла́ва, гла́съ 4:

Духо́вною благода́тію отъе́млете неду́ги и стра́сти, и отго́ните ду́хи лука́выя, и исцѣля́ете стра́сти неисцѣ́льныя, и просвѣща́ете вѣ́рныя, и невѣ́рныхъ въ вѣ́ру претворя́ете блиста́ніи чуде́съ ва́шихъ, отцы́ преподо́бніи. Тѣ́мже дне́сь гла́сы немо́лчными воспѣва́емъ ва́шу па́мять пресвѣ́тлую и мо́лимъ ва́съ: моли́те Христа́ Бо́га спасти́ся душа́мъ на́шимъ.

И ны́нѣ, богоро́диченъ.
Вхо́дъ. Проки́менъ дне́. И чте́нія три́ святи́тельскія.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На литíи стихи́ры, гла́съ 3. Самогла́сны:

Чи́стою со́вѣстію и благи́мъ нра́вомъ мона́хи и мірскíя мно́гія уче́ніемъ ва́шимъ ко Христу́ привели́ есте́ и сего́ ра́ди нетлѣ́ніемъ отъ Христа́ почте́ни есте́. Его́же моли́те спасти́ся душа́мъ на́шимъ.

Ра́ки ва́ша вопію́тъ къ Бо́гу моли́тву ва́шу и про́чія добродѣ́тели, послушеству́ютъ же Тому́ и ри́зы ва́ша погреба́льныя; свята́я же тѣлеса́ ва́ша вселе́нную удивля́ютъ и наро́дъ благочести́вый. Но моли́те Го́спода да спасе́тъ и просвѣти́тъ ду́ши на́ша.

Умилосе́рдися, Влады́ко, о на́съ, рабѣ́хъ Твои́хъ, и о новопросвѣще́нныхъ Твои́хъ лю́дехъ и не преда́ждь на́съ въ ру́ки пога́ныхъ за мно́жество на́шихъ беззако́ній, но моли́твами преподо́бныхъ Твои́хъ уго́дникъ, изба́ви ны́ отъ вся́кія ско́рби, и бѣ́дъ, и печа́лей.

Посто́мъ, и жесто́кимъ житіе́мъ, и худо́ю пи́щею, и просто́ю трапе́зою на кíйждо де́нь обуча́юще себе́, отцы́ преподо́бніи, многоцѣ́нная же вся́ко и тлѣ́нная презрѣ́сте и въ нетлѣ́нныхъ веселите́ся, и мо́лите спасти́ся душа́мъ на́шимъ.

Сла́ва, гла́съ 8:

Истинніи и нело́жніи учи́теліе есте́ бы́ли, заповѣ́данная бо Го́сподемъ пре́жде са́ми сотворя́юще, пото́мъ же уча́ще и наказу́юще ко благоче́стію приходя́щія лю́ди вѣ́рныя, невѣ́рныя же вразумля́юще позна́ти вѣ́ру и́стинну и просвѣща́юще и́хъ святы́мъ креще́ніемъ, пе́рвіи нача́льницы и учи́теліе на́ши неле́стніи и Бо́жіихъ за́повѣдей храни́теліе, спаси́те на́съ, ва́съ вѣ́рою на по́мощь призыва́ющихъ.

И ны́нѣ, богоро́диченъ.

На стихо́внѣ стихи́ры, гла́съ 3. Подо́бенъ: Ве́лія Креста́.

Христо́ву вѣ́ру, я́ко свѣ́тъ на свѣ́щницѣ, поста́висте, наста́вницы и просвѣти́теліе гра́да Каза́ни яви́стеся и мно́ги отъ невѣ́рія ко Христу́ приведо́сте, отцы́ преподо́бніи.

Сти́хъ: Свяще́нницы Твои́ облеку́тся въ пра́вду, и преподо́бніи Твои́ возра́дуются.

Красу́йся, гра́де Каза́не, имѣ́я въ себѣ́ мо́щи преподо́бныхъ святи́телей, Гу́рія и Варсоно́фія, отгна́вшихъ отъ тебе́ тму́ невѣ́рія и просвѣти́вшихъ тя́ свѣ́томъ богоразу́мія: и́же и мо́лятся Христу́ за вся́ лю́ди, въ тебѣ́ живу́щія.

Сти́хъ: Восхва́лятся преподо́бніи во сла́вѣ и возра́дуются на ло́жахъ свои́хъ.

Ве́ліе чу́до о ва́съ зри́тся, отцы́ преподо́бніи, и у́жаса испо́лнено, ка́ко по погребе́ніи во мно́га лѣ́та неруши́ма соблюдо́шася блаже́нная тѣлеса́ ва́ша, судьба́ми, и́миже вѣ́сть ва́съ Са́мъ прославля́яй.

Сла́ва, гла́съ 6:

Иже пре́жде те́мный, ны́нѣ же свѣ́тлый, гра́дъ Каза́нь красу́ется и весели́тся, имѣ́я въ себѣ́ нетлѣ́нныя мо́щи ва́ша, святíи чудотво́рцы: источа́ютъ бо на́мъ неоску́дна исцѣле́нія, съ вѣ́рою приходя́щимъ къ ра́цѣ моще́й ва́шихъ. Мы́ же, веселя́щеся, мо́лимъ и те́плѣ зове́мъ: моли́те, святíи, Христа́ Бо́га спасти́ся на́мъ, святу́ю па́мять ва́шу почита́ющимъ.

И ны́нѣ, богоро́диченъ: Богоро́дице, Ты́ еси́ лоза́ и́стинная...

Тропа́рь пи́санъ на ма́лѣй вече́рни.



На Бо́гъ Госпо́дь: Тропа́рь [святы́хъ], два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 3:

На́мъ, послѣ́днему ро́ду, яви́стеся, святи́теліе, тѣ́ломъ нетлѣ́нніи и показа́сте наде́жду, я́ко и по сме́рти неотсту́пно ду́хомъ на́съ посѣща́ете. Тѣ́мже и припа́даемъ ва́мъ, преподо́бніи: моли́те о на́съ, ва́шу па́мять любе́зно почита́ющихъ, да изба́вимся отъ всѣ́хъ зо́лъ ва́шими моли́твами. [Два́жды.]

Сла́ва, и ны́нѣ, богоро́диченъ:

Еди́на упова́ніе на́ше, еди́на наде́жда, еди́но прибѣ́жище вѣ́рующимъ пречи́стому Твоему́ Рождеству́, Пресвята́я Преблагослове́нная Богома́ти, покры́й, и соблюди́, и отъ вся́кихъ бѣ́дъ изба́ви любо́вію велича́ющихъ Тя́.

По 2-мъ стихосло́віи сѣда́ленъ, гла́съ 4:

Бо́гомъ науче́нная ва́ша уста́ мона́шескимъ душа́мъ сла́дость ра́йскую иска́паша, и всѣ́мъ о́бразъ бы́сте ко спасе́нію, о ди́вніи отцы́ на́ши, Гу́ріе и Варсоно́фіе! Сего́ ра́ди вопіе́мъ ва́мъ, прилѣ́жно моля́щеся: потщи́теся на по́мощь на́шу и умоли́те за ны́ сохра́ньшаго ва́съ Благодѣ́теля, Христа́ Бо́га. [Два́жды.]

Сла́ва, и ны́нѣ, богоро́диченъ:

Свѣтоно́сенъ Тя́ свѣ́щникъ позна́хомъ, Богоро́дице, Боже́ственное Сія́ніе во утро́бѣ носи́ла еси́. Тѣ́мже Тя́ мо́лимъ, Влады́чице: свѣ́томъ Твои́мъ озари́ ду́ши всѣ́хъ, пою́щихъ Тя́, да вѣ́рою и любо́вію почита́емъ Тя́, я́ко вои́стинну и́стинную су́щую Богоро́дицу.

По поліеле́и сѣда́ленъ, гла́съ 6:

Иже пре́жде невѣ́ріемъ помраче́нный, ны́нѣ же вѣ́рою ко Христу́ просвѣще́нный, преслову́щій гра́дъ Каза́нь ва́ми хва́лится, имѣ́я въ себѣ́ мо́щи ва́ша нетлѣ́нны, отцы́ преподо́бніи; и съ вѣ́рою приходя́щимъ источа́ете чудеса́ и подае́те неоску́дно исцѣле́ніе, любо́вію святу́ю ва́шу па́мять почита́ющимъ. [Два́жды.]

Сла́ва, и ны́нѣ, богоро́диченъ:

Вмѣсти́лище чи́стое Свѣ́та Пречи́стаго, проро́цы Тя́ прему́дро проповѣ́даша; ца́ріе и кня́зи покланя́ются, святи́тели проповѣ́даютъ, мона́си и простíи, бога́тіи и убо́зіи, и вся́къ во́зрастъ мо́лятъ: спаси́, Влады́чице, ду́ши на́ша.

Та́же степе́нна, 1-й антифо́нъ, 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе да хва́литъ Го́спода... Ева́нгеліе Луки́, зача́ло 24.

По 50-мъ псалмѣ́ стихи́ра, гла́съ 5:

Не своего́ то́чію смотря́ста, но е́же всѣ́мъ поле́знаго, и возненави́дѣста вся́ку ве́щь, на грѣ́хъ влеку́щую, непрело́женъ иму́ще по́мыслъ благоче́стія и соблю́дше себе́ мно́гою крѣ́постію въ добродѣ́телехъ. Сего́ ра́ди тве́рда и нетлѣ́нна соблюде́ Бо́гъ тѣлеса́ ва́ша, отцы́ преподо́бніи. Того́ моли́те спасти́ся на́мъ, ва́шу па́мять почита́ющимъ.

Кано́нъ Богоро́дицы на 6 и святы́хъ кано́на два на 8.

Кано́нъ святи́теля Гу́рія, гла́съ 8.
Пѣ́снь 1.

Ирмо́съ: Изра́иля отъ рабо́ты изба́вилъ еси́, Го́споди, десни́цею Твое́ю держа́вною, я́ко о́наго спа́слъ еси́, ны́нѣ на́съ спаси́.

Тро́ице Пресвята́я, пѣ́снь Тебѣ́ принести́ и досто́йными похвала́ми уго́дника Твоего́ святи́теля Гу́рія воспѣ́ти пода́ждь ми́, да, ра́дуяся, сла́влю Тя́ во вѣ́ки.

Повелѣ́ніемъ Самоде́ржца, Благочести́ваго Царя́ и Вели́каго Кня́зя, первопресто́льникъ церко́вный гра́ду новопросвеще́нному явля́ешися, и апо́стольски научи́лъ еси́ вѣ́ровати Тро́ицѣ во Еди́номъ Существѣ́.

Моли́твенный хра́мъ въ дому́ твое́мъ имѣ́я и въ то́мъ многотру́днѣ подвиза́ся, всено́щная стоя́нія и моли́твы принося́ вы́ну Бо́гу.

Богоро́диченъ: Бо́жія Ма́ти, ро́ждшая Еди́наго отъ Святы́я Тро́ицы, слове́сное ми́ недоумѣ́ніе разрѣши́ и сло́во ми́ пода́ждь, и́мже Тя́ просла́влю.

Кано́нъ святи́теля Варсоно́фія, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Иже пресла́вную па́мять пра́зднующихъ святи́теля Твоего́ Варсоно́фія, Сло́во Бо́жіе Единоро́дное, слове́сную же́ртву принести́ къ Тебѣ́ сподо́би на́съ и уго́дника Твоего́ вѣ́рно восхвали́ти пода́ждь на́мъ.

Святи́телю о́тче на́шъ Варсоно́фіе, моли́ся Христу́ Бо́гу, да по достоя́нію возмо́жемъ принести́ тебѣ́ пѣ́ніе во хвале́ніе и Христа́ просла́вимъ.

Неусы́пными моли́твами твои́ми, свя́те, стра́стныя на́ша неду́ги уврачу́й, душе́вныя на́ша болѣ́зни исцѣли́ и прегрѣше́ній оставле́ніе у Христа́ на́мъ испроси́.

Богоро́диченъ: Пріиди́те, дѣ́вы и ма́тери, воспо́йте Пречи́стѣй Бо́жіи Ма́тери гла́съ Гавріи́ла арха́нгела: ра́дуйся, Обра́дованная, ра́досте всего́ мíра, и ра́достію Твое́ю обра́дуй ду́ши всѣ́хъ, пою́щихъ Тя́.

Пѣ́снь 3.

Ирмо́съ: Утвержде́й Сло́вомъ небеса́ и зе́млю основа́вый на вода́хъ мно́гихъ, утверди́ мя къ пѣ́нію славосло́вія Твоего́, Го́споди.

Ада́ма дре́внѣйша, Агнца Непоро́чнаго, Бо́жіяго Сло́ва Соприсносу́щнаго, святи́телю Гу́ріе, моли́, да пода́стъ Благочести́вому Импера́тору на́шему здра́віе во благоде́нствѣ и на сопроти́вныхъ побѣ́ду.

Его́же измла́да возлюби́лъ еси́, и вся́ тлѣ́нная мíра сего́ въ ничто́же вмѣни́лъ еси́, преходя́щая презрѣ́въ, да въ бу́дущемъ утверди́шися сла́вити Го́спода.

Благовѣ́рныхъ зако́ну наказу́я благоче́стія, невѣ́рныя же науча́я позна́ти вѣ́ру благочести́ву и и́стинну и пѣ́ти съ на́ми при́сно пѣ́снь, а́нгелы пѣва́ему въ Тро́ицѣ Бо́гу: Свя́тъ еси́, Го́споди.

Богоро́диченъ: Подъ кро́въ Тво́й держа́вный съ вѣ́рою прибѣга́емъ, Богоро́дице: покры́й и соблюди́, Госпоже́, моли́твами Твои́ми, и спаси́ отъ бѣ́дъ и отъ клеветы́ злы́хъ человѣ́къ ра́бъ Твои́хъ, при́сно пою́щихъ Тя́.

Инъ.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Царе́вымъ повелѣ́ніемъ пе́рвую оби́тель прекра́сну въ новопросвѣще́нномъ гра́дѣ Каза́ни воздви́глъ еси́ и въ то́й многотру́днѣ подви́глся еси́, и мно́гихъ ду́ши ко Христу́ приве́лъ еси́.

Ви́дѣхомъ и почуди́хомся, па́че же стра́хомъ и ра́достію бы́хомъ одержи́ми, цѣ́лы бо и неразруши́мы обрѣто́шася честны́я твоя́ мо́щи, святи́телю Варсоно́фіе, и вси́ единогла́сно возопіе́мъ: сла́ва Христу́ Бо́гу.

Ча́емаго, е́же въ бу́дущемъ вѣ́цѣ, наслажде́нія, преподо́бне, дости́глъ еси́, и ны́нѣ во свѣ́тѣ Святы́я Тро́ицы лику́еши поя́ со а́нгелы: Свя́тъ еси́, Го́споди.

Богоро́диченъ: Ублажи́мъ Бо́жію Ма́терь боже́ственными пѣ́сньми: идѣ́же бо сла́вится Преблагослове́нная Богоро́дица, та́мо де́мономъ стра́шное исчезнове́ніе, христіа́номъ же крѣ́пость и утвержде́ніе.

Конда́къ Варсоно́фія, гла́съ 6:

Воздержа́ніемъ тѣ́ло ду́ху порабо́тивъ, ду́шу же равноа́нгельну сотвори́лъ еси́, сего́ ра́ди святи́тельства са́номъ поче́тся, чи́стѣ Чистѣ́йшему предстои́ши. Моли́ Христа́ Бо́га, святи́телю, спасти́ Импера́тора на́шего Вседержа́внаго, благоче́стія содержи́теля и лю́ди твоя́, свя́те, да вси́ вопіе́мъ ти́: ра́дуйся, о́тче преподо́бне Варсоно́фіе, гра́ду на́шему Каза́ни похвала́ и утвержде́ніе.

Икосъ:

Пе́рвый до́му духо́внаго соста́витель и пе́рвый мона́хомъ наста́вникъ бы́лъ еси́, пе́рвый трудополо́жникомъ о́бразъ и учи́тель бы́лъ еси́, въ новопросвѣще́нномъ гра́дѣ Каза́ни мона́хи наставля́я, и мірскíя поуча́я, и невѣ́рныя приводя́ во Христо́ву вѣ́ру, и всѣ́мъ бы́лъ еси́ са́мъ о́бразъ и учи́тель неле́стенъ. И сла́вному во градѣ́хъ Тфе́ри святи́тель поставля́ешися, уча́ и наказу́я пути́ Госпо́дню. Послѣди́ же манове́ніемъ Бо́жіимъ въ потружде́ніе свое́ во оби́тель Спа́сову вселя́ешися и труды́ къ трудо́мъ прилага́еши, до́ндеже вѣ́стникъ, съ небе́съ соше́дъ, пое́млетъ ду́шу твою́ во оби́тели Ца́рства небе́снаго, идѣ́же ны́нѣ весели́шися съ ли́ки святы́хъ. Мы́ же, лю́діе твои́, вопіе́мъ ти́: ра́дуйся, преподо́бне о́тче Варсоно́фіе, гра́ду на́шему Каза́ни похвала́ и утвержде́ніе.

Сѣда́ленъ, гла́съ 4. Подо́бенъ: Вознесы́йся.

Отъ земли́ Воззва́вый ва́съ къ вѣ́чнымъ оби́телемъ соблюда́етъ и по сме́рти тѣлеса́ ва́ша, отцы́ преподо́бніи: вы́ бо въ цѣлому́дріи и чистотѣ́ житіе́ по́жили есте́, Гу́ріе богому́дре и Варсоно́фіе преди́вне. Того́ ра́ди любо́вію почита́емъ святу́ю па́мять ва́шу и мо́лимъ: моли́те Христа́ Бо́га спасти́ся на́мъ. [Два́жды.]

Сла́ва, и ны́нѣ, богоро́диченъ:

Егда́ хощу́ предста́ти предъ лице́мъ Созда́теля моего́ въ де́нь пра́веднаго Суда́ Его́, тогда́, Влады́чице, предста́ни ми́ и му́ки изба́ви мя́ вѣ́чныя, моли́тву сотвори́вши о упова́ющемъ на Тя́, Свята́я Богоро́дице, да не сни́ду во а́дъ, но да спасу́ся Твои́мъ заступле́ніемъ.

Пѣ́снь 4.

Ирмо́съ: Изъ горы́ приосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися богови́дно усмотри́ и со стра́хомъ славосло́вяше си́лу Твою́.

Бла́гъ нра́въ и послуша́ніе къ твоему́ наста́внику имѣ́лъ еси́ и, во свѣ́тѣ Святы́я Тро́ицы свеселя́ся, съ ни́мъ пое́ши: сла́ва си́лѣ Твое́й, Го́споди.

Благослове́ніемъ кра́йняго святи́теля поставля́ешися па́стырь и учи́тель новопросвѣще́нному гра́ду Каза́ни, и́же пре́лестію врага́ омраче́нныя лю́ди свѣ́томъ богоразу́мія просвѣти́лъ еси́.

Іова пра́веднаго терпѣ́нію подража́лъ еси́, въ болѣ́зни слежа́, и на одрѣ́, тѣ́ломъ дручи́мь, изнемога́лъ еси́, поя́ Творцу́ твоему́ пѣ́ніе непреста́нно.

Богоро́диченъ: Богоневѣ́сто и Богома́ти, Плотоно́сца безъ болѣ́зни ро́ждши и по рождествѣ́ Дѣ́ва я́вльшися, Того́ моли́, Влады́чице, да изба́вимся бѣ́дъ и скорбе́й.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Патріа́рха Авраа́ма до́блесть воспріи́мъ, святи́телю Варсоно́фіе, а́лчныя кормя́ и жа́дныя напая́я, и не иму́щимъ неску́дна тре́бованія подава́я, душе́внымъ и тѣле́снымъ хлѣ́бомъ кормя́ вся́ приходя́щія и вруче́ное тебѣ́ ста́до.

Му́жественнѣ терпя́ отъ невѣ́рныхъ, въ плѣ́нѣ сы́й, и смире́нія ра́ди нра́ва въ кро́тость преложи́лъ еси́ невѣ́рныхъ, и сего́ ра́ди отъ Бо́га мзду́ воспріи́мъ, святи́телю Варсоно́фіе.

Пресла́вными чудотворе́ніи отъ Бо́га одарова́ни бы́ша святíи чудотво́рцы, исцѣля́юще неду́ги и отгоня́юще де́моны, моли́те изба́витися на́мъ отъ бѣ́дъ ва́шими моли́твами.

Богоро́диченъ: Къ Преблаже́ннѣй Дѣ́вѣ и Богоро́дицѣ, о преподо́бніи, припади́те и моли́твы простри́те, да умо́литъ Сы́на Своего́, Христа́ Бо́га на́шего, пода́ти Христолюби́вому Импера́тору на́шему здра́віе и на враги́ побѣ́ду.

Пѣ́снь 5.

Ирмо́съ: Мра́къ души́ моея́ разжени́, Свѣтода́вче Христе́ Бо́же, началоро́дную тму́ изгна́въ бе́здны, и да́руй ми́ свѣ́тъ повелѣ́ній Твои́хъ, Сло́ве, да у́тренюя, сла́влю Тя́.

Архіере́й сы́й, архіере́емъ на́шимъ въ моли́твахъ спосо́бствуй, да возмо́гутъ Импера́тору богом́дрому, благоче́стія содержи́телю, и всему́ христіа́нскому наро́ду испроси́ти у Христа́ ми́ра и ве́лія ми́лости.

Ны́нѣ, преблаже́нне Гу́ріе, душа́ твоя́ почива́етъ на небесѣ́хъ, предстоя́ престо́лу Христо́ву: честны́я же твоя́ мо́щи нетлѣ́ніемъ почте́ны, даю́тъ исцѣле́нія приходя́щимъ съ вѣ́рою.

Дре́вле помраче́нный змíевою пре́лестію, ны́нѣ же просвѣще́нный Христо́вою благода́тію гра́дъ Каза́нь, ви́дя въ себѣ́ нетлѣ́нны мо́щи твоя́, ра́дуется. Мы́ же, ча́да твоя́, чудесы́ обогаща́еми, весели́мся, Христа́ сла́вяще, зове́мъ: спаси́ на́съ, Го́споди.

Богоро́диченъ: Богоро́дице, всѣ́хъ Цари́це, благочести́вому Импера́тору на́шему на враги́ побѣ́ду да́руй и сопроти́вныхъ совѣ́ты разори́, и отъ междоусо́бный бра́ни изба́ви, и клеветнико́въ че́люсти сокруши́, Влады́чице, и отъ всѣ́хъ бѣ́дъ моли́твами Твои́ми спаси́ на́съ.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Му́драя уче́нія всѣ́мъ показа́лъ еси́ и душе́вное естество́ чи́сто стяжа́лъ еси́, презира́я пло́ть, прехо́дитъ бо: и сего́ ра́ди со а́нгелы престо́лу Влады́чню предстои́ши, святи́телю, моля́ Христа́ Бо́га спасти́ся на́мъ.

Воспѣва́ющихъ тя́ и при́сно блажа́щихъ, и па́мять твою́ вѣ́рно прославля́ющихъ, святи́телю Варсоно́фіе, освяти́ и просла́ви, и отъ напа́стей и бѣ́дъ изба́ви.

Боже́ственнымъ манове́ніемъ, о́тче, плотско́е жела́ніе отри́нувъ, и послѣ́довалъ еси́ любо́вію зову́щему тя́ Христу́, блаже́нне Варсоно́фіе, святи́телю всече́стне.

Богоро́диченъ: Правовѣ́рно чту́щаго Тя́ Самоде́ржца Импера́тора на́шего, и лю́ди ико́нѣ Твое́й святѣ́й любе́зно покланя́ющіяся, о Бо́жія Ма́ти, спаси́ и отъ клеветы́ злы́хъ человѣ́къ изба́ви.

Пѣ́снь 6.

Ирмо́съ: Яко во́ды морскíя, Человѣколю́бче, волна́ми жите́йскими обурева́юся, тѣ́мже, я́ко Іо́на, та́ко вопію́ Ти́: возведи́ отъ тли́ живо́тъ мо́й, благоутро́бне Го́споди.

Утѣша́я скорбя́щія, заступа́я оби́димыя, накормля́я а́лчущія и вся́ всѣ́мъ подава́я неоску́дно, Гу́ріе святи́телю, Христа́ Бо́га моли́ спасти́ся на́мъ.

Бо́жіимъ смотре́ніемъ и святи́тельскимъ благослове́ніемъ, и ца́рскимъ повелѣ́ніемъ, руко́ю мое́ю недосто́йною приноси́мое ва́шимъ трудо́мъ похвале́ніе, преподо́бніи чудотво́рцы, не отри́ните, но пріими́те и моли́те Христа́, да изба́витъ мя́ шу́іяго стоя́нія.

Тече́ніе воспрія́ и пу́ть соверши́, и зе́млю непло́дну моли́твами твои́ми добропло́дну показа́: и о мнѣ́, принося́щемъ тебѣ́ пѣ́ніе сіе́, святи́телю, моли́ Христа́, да принесу́ и а́зъ покая́нія пло́дъ, да изба́витъ мя́ вѣ́чнаго муче́нія.

Богоро́диченъ: Богоблаже́нная и отъ а́нгелъ покланя́емая, и отъ земны́хъ всегда́ славосло́вимая, Творца́ Твоего́ и Бо́га, Его́же родила́ еси́, Пресвята́я Дѣ́во, моли́ спасти́ся на́мъ.

Инъ.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Кíими похвала́ми возмо́жемъ тебе́ похвали́ти, преподо́бне святи́телю Варсоно́фіе? По преставле́ніи бо твое́мъ цѣ́лы и нетлѣ́нны обрѣто́шася цѣльбоно́сныя твоя́ мо́щи.

Вся́ сотво́ршаго, и всю́ вселе́нную кормя́щаго Сы́на Бо́жія и а́нгельскаго Царя́ Превѣ́чнаго, Спа́са Христа́ умоли́, святи́телю Варсоно́фіе, да пода́стъ Импера́тору на́шему и лю́демъ здра́віе, и земны́я плоды́ умно́житъ, и грѣхи́ отпу́ститъ.

Истиннаго всѣ́хъ Па́стыря Христа́, святи́телю Варсоно́фіе, моли́ со всѣ́ми освяще́нными ли́ки, да спасе́тъ Импера́тора и лю́ди по вели́цѣй Его́ ми́лости, и сохране́ни бу́демъ отъ діа́вольскихъ кова́рствъ, чту́щіи тя́.

Богоро́диченъ: Боже́ственнѣй Твое́й покланя́емся ико́нѣ, Богоро́дице, прося́ще отъ Тебе́ вели́кія ми́лости: да́руй, Влады́чице, согрѣше́ній оставле́ніе рабо́мъ Твои́мъ, еди́на Благослове́нная.

Конда́къ Гу́рію, гла́съ 4:

Чу́вственныя стра́сти побѣди́въ, чистото́ю, я́ко со́лнце, возсія́лъ еси́, чи́сто житіе́ до конца́ сохрани́въ, и отъ невѣ́рія въ вѣ́ру мно́гихъ ко Христу́ приве́лъ еси́, и Того́ ра́ди отъ Бо́га нетлѣ́ніемъ почте́нъ бы́лъ еси́ и чудесы́ удивля́емь. Мо́лимъ тя́, святи́телю Гу́ріе, моли́твами твои́ми отъ бѣ́дъ изба́ви на́съ, да зове́мъ ти́: ра́дуйся, о́тче преди́вный, гра́ду Каза́ни похвала́ и утвержде́ніе.

Икосъ:

Пе́рвый сѣ́ятель бы́лъ еси́ духо́вныхъ добродѣ́телей и пе́рвый па́стырь и Це́ркви нача́льникъ, пе́рвый архіере́й и учи́тель христіа́нскому зако́ну въ новопросвѣще́нномъ гра́дѣ Каза́ни, вѣ́рныя лю́ди кормя́ хлѣ́бомъ уче́нія благода́тнаго зако́на, напая́я пи́вомъ духо́вныя благода́ти, невѣ́рныя же уча́ позна́ти и́стину и крести́тися святы́мъ креще́ніемъ, и мно́жество наро́да отъ невѣ́рія въ вѣ́ру ко Христу́ приве́лъ еси́, и чи́стымъ житіе́мъ Бо́гу угоди́ти наста́вивъ и́хъ. Сего́ ра́ди Христо́съ свято́му и трудолюбе́зному твоему́ тѣ́лу дарова́ нетлѣ́ніе и да́ръ чудотворе́нія. Приходя́щіи бо съ вѣ́рою къ цѣльбоно́снымъ твои́мъ моще́мъ пріе́млютъ неоску́дная страсте́й премѣне́нія и болѣ́зней исцѣле́ніе, и грѣхо́въ проще́ніе твои́ми, свя́те, ко Христу́ моли́твами, да зове́мъ ти́: ра́дуйся, о́тче преди́вный, гра́ду Каза́ни похвала́ и утвержде́ніе.

Пѣ́снь 7.

Ирмо́съ: Отроцы богочести́віи въ Вавило́нѣ, о́бразу злато́му не поклони́шася, но посредѣ́ пе́щи о́гненныя, ороша́еми, пѣ́снь воспѣва́ху, глаго́люще: превозноси́мый отце́въ и на́шъ Бо́же, благослове́нъ еси́.

Не то́кмо у́бо тѣ́ло твое́ нетлѣ́ніемъ просла́вилъ е́сть Бо́гъ, святи́телю Гу́ріе, но и погреба́льная вся́ и до ны́нѣ пребыва́ютъ но́выхъ крѣпча́йше. Мы́ же, си́мъ дивя́щеся, зове́мъ: благослове́нъ Бо́гъ отце́въ на́шихъ.

По́двиговъ твои́хъ ра́ди и трудо́въ, преподо́бне, тѣ́ло твое́ нетлѣ́нно показа́ Бо́гъ: гро́бу бо и ри́замъ вмѣ́сто тлѣ́нія крѣ́пость дарова́, благослове́нъ Бо́гъ отце́въ на́шихъ.

Не еди́но у́бо тѣ́ло твое́, святи́телю, тлѣ́нію бы́сть неприча́стно, но и погре́бшихся съ вѣ́рою во еди́ной гробни́цѣ съ тобо́ю, моли́твами твои́ми дву́ мона́ховъ нетлѣ́ніемъ одари́ Бо́гъ, Ему́же зове́мъ: благослове́нъ еси́, Го́споди, Бо́же отце́въ на́шихъ.

Богоро́диченъ: О, Всепѣ́тая и Всенепоро́чная Влады́чице, моли́ Сы́на Твоего́, Христа́ Бо́га на́шего, да изба́витъ на́съ вѣ́чнаго муче́нія, да пое́мъ: благослове́нъ Бо́гъ отце́въ на́шихъ.

Инъ.

Ирмо́съ: Въ нача́лѣ зе́млю основа́вый, и небеса́ сло́вомъ утверди́вый, благослове́нъ еси́ во вѣ́ки, Го́споди, Бо́же оте́цъ на́шихъ.

Всѣ́хъ благи́хъ о́бразъ бы́лъ еси́, къ вы́шнему житію́ веду́щь смире́ніемъ и кро́тостію. Тѣ́мже и Христо́съ па́стыря тя́ лю́демъ Свои́мъ устроя́етъ, пою́щимъ: благослове́нъ Бо́гъ оте́цъ на́шихъ.

Не преста́й, Варсоно́фіе, моля́ся о духо́вныхъ твои́хъ ча́дѣхъ, и́хже духо́внымъ уче́ніемъ породи́лъ еси́, да пое́мъ: благослове́нъ Бо́гъ оте́цъ на́шихъ.

Иже твою́ пресла́вную па́мять пра́зднующимъ, святи́телю Варсоно́фіе, моли́ изба́витися всѣ́мъ отъ разли́чныхъ бѣ́дъ и напа́стей, да вси́ зове́мъ: благослове́нъ Бо́гъ оте́цъ на́шихъ.

Богоро́диченъ: Вопло́щся отъ пречи́стыхъ Твои́хъ ложе́снъ Бо́жіе Сло́во, Дѣ́во Пречи́стая, всѣ́хъ къ богоразу́мію наста́ви, да пое́мъ Ему́: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Покрыва́яй вода́ми превы́спренняя Своя́, полага́яй мо́рю предѣ́лъ песо́къ и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки.

Пречестна́я ра́ка, идѣ́же положено́ честно́е тѣ́ло твое́, святи́телю Гу́ріе, мѵ́ра благоуха́нна преиспо́лнена бы́сть. Иже съ вѣ́рою ма́жущіися неоску́дна исцѣле́нія пріе́млютъ, зову́ще: да благослови́тъ вся́ тва́рь Го́спода и превозно́ситъ Его́ во вѣ́ки.

Новопросвѣще́нному гра́ду Каза́ни первопресто́льникъ посыла́ешися и мно́жество невѣ́рныхъ къ твоему́ Влады́цѣ Христу́ приве́лъ еси́, пою́щихъ Ему́: благослови́те, по́йте и превозноси́те Го́спода во вѣ́ки.

Па́стырскій же́злъ пріе́мъ, святи́телю, но́вымъ лю́демъ учи́тель бы́лъ еси́, пресла́вне Гу́ріе, и мно́ги лю́ди ага́рянска язы́ка святы́мъ креще́ніемъ обнови́лъ еси́, да вси́ съ тобо́ю зове́мъ: благослови́те, по́йте и превозноси́те Го́спода во вѣ́ки.

Богоро́диченъ: Богоизбра́нная, еди́на Всенепоро́чная, Пречи́стая Богоневѣ́сто и Богома́ти, пріими́ мольбы́ вѣ́рою упова́ющихъ на Тя́ и сотвори́ моле́ніе ко Святѣ́й Тро́ицѣ изба́витися на́мъ отъ всѣ́хъ бѣ́дъ, Тя́ сла́вящимъ и превознося́щимъ Го́спода во вѣ́ки.

Инъ.

Ирмо́съ: На горѣ́ святѣ́й просла́вльшася, и въ купинѣ́ огне́мъ Приснодѣ́вы, Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Любому́дрства душе́внаго не премо́же тѣле́сная твоя́ болѣ́знь, о́тче: о Бо́зѣ бо ре́вность воспріи́мъ, въ ничто́же вмѣня́еши мимоходя́щую ско́рбь, Того́ ра́ди вѣ́чныя болѣ́зни избѣ́глъ еси́.

Болѣ́ у́бо болѣ́знію болѣ́зненнѣ, да мимотече́ши су́етныхъ болѣ́зней, и ны́нѣ на небесѣ́хъ со а́нгельскими ли́ки предстои́ши Святѣ́й Тро́ицѣ, зовы́й: вся́ дѣла́ Госпо́дня Го́спода по́йте и превозноси́те Его́ во вѣ́ки.

Яко бо ино́ю пи́щею пита́яся, зѣ́льнымъ поще́ніемъ и всено́щнымъ стоя́ніемъ изнуря́я пло́ть твою́, поя́ непреста́нно: вся́ дѣла́ Госпо́дня Го́спода по́йте и превозноси́те Его́ во вѣ́ки.

Богоро́диченъ: Пречи́стая Богоро́дице, пріими́ недосто́йную моли́тву мою́ и сохрани́ мя отъ клеветы́ злы́хъ человѣ́ковъ и отъ напра́сныя сме́рти, и да́руй мнѣ́ пре́жде конца́ покая́ніе.

Пѣ́снь 9.

Ирмо́съ: Снѣ́дію дре́ва ро́ду прибы́вшая сме́рть Кресто́мъ упраздни́ся дне́сь, и́бо прама́терняя всеро́дная кля́тва разруши́ся Прозябе́ніемъ Чи́стыя Богома́тере, Юже вся́ си́лы небе́сныя велича́ютъ.

Прія́лъ еси́ отъ Христа́ Боже́ственное Его́ дарова́ніе: отъ мно́гихъ бо лѣ́тъ сокрове́ны честны́я твоя́ мо́щи въ три́десять же второ́е лѣ́то обрѣто́шася невреди́мы ничи́мже, исцѣле́нія разли́чна подава́юща.

Па́мять обрѣ́тенія честны́хъ моще́й твои́хъ наста́ на́мъ свѣ́тло пра́зднество, пречу́дный святи́телю Христо́въ, прехва́льне Гу́ріе, въ ню́же чуде́съ благода́ть прія́лъ еси́ отъ всѣ́хъ Царя́ Христа́ Бо́га. Тѣ́мже зове́мъ: изба́ви на́съ отъ враго́въ на́шихъ.

Благода́рственныя пѣ́сни принесе́мъ Христу́ Бо́гу на́шему, такова́го на́мъ святи́теля дарова́вшему, Це́ркви Свое́й пречестно́е удобре́ніе и гра́ду Каза́ни вели́кое утвержде́ніе.

Богоро́диченъ: Умири́ мíръ, Христе́, мольба́ми Чи́стыя Богоотрокови́цы, и низложи́ вра́жія си́лы подъ но́зѣ Благовѣ́рному Импера́тору на́шему, и тишину́ неизглаго́ланну устро́й Ему́ и во вѣ́ки сохрани́.

Инъ.

Ирмо́съ: Проявле́нное на горѣ́ законополо́жнику во огни́ и купинѣ́, Рождество́ Приснодѣ́вы, въ на́ше вѣ́рныхъ спасе́ніе, пѣ́сньми немо́лчными велича́емъ.

Пра́зднующимъ свѣ́тло па́мять обрѣ́тенія честны́хъ моще́й твои́хъ, Импера́тору на́шему ми́ръ испроси́ и усо́бныя бра́ни укроти́, и изба́ви на́съ отъ нахожде́нія пога́ныхъ, и клеветнико́въ че́люсти сокруши́.

Свобо́денъ тво́й у́мъ отъ страсте́й соблю́дъ, и сосу́дъ освяще́нъ Ду́ху Пресвято́му бы́лъ еси́, и Христа́ пріи́мъ въ се́рдцы твое́мъ, и чудотво́рецъ яви́лся еси́, прогоня́я де́моны. Сего́ ра́ди мо́лимъ тя́ изба́витися на́мъ отъ сѣте́й и́хъ твои́ми, свя́те, моли́твами.

Царю́ си́лъ вы́шнихъ, Христе́, крѣ́постію десни́цы Твоея́ Правовѣ́рному и Благоразу́мному Импера́тору на́шему подъ но́зѣ покори́ враги́ нечести́выя, и лю́ди Твоя́ спаси́, и земны́я плоды́ умно́жи.

Богоро́диченъ: На моле́ніе мое́ умилосе́рдися и ра́дость ми́ въ печа́ли мѣ́сто да́руй, Влады́чице, и отъ клеветы́ злы́хъ человѣ́къ изба́ви мя́, да пою́ Ти: ра́дуйся, Обра́дованная, съ Тобо́ю Госпо́дь.

Свѣти́ленъ. Подо́бенъ: Посѣти́лъ ны́.

Егда́ у́бо честны́я ва́ша и святы́я мо́щи нетлѣ́нны обрѣто́шася, тогда́ благоуха́ніе отъ гробо́въ ва́шихъ изноша́шеся, исцѣля́ющее неду́ги и отгоня́ющее ду́хи лука́выя. [Два́жды.]

Сла́ва, и ны́нѣ, богоро́диченъ:

Вознеси́, Богоро́дице, ро́гъ Це́ркви, и Благовѣ́рному Импера́тору на́шему пода́ждь на враги́ одолѣ́ніе и крѣ́пость, и ца́рства Его́ ски́птры, Чи́стая, утверди́, и лю́ди Твоя́ поми́луй, да Тя́ вся́къ язы́къ христіа́нскій велича́етъ.

На хвали́техъ стихи́ры на 4, гла́съ 2. Подо́бенъ: Егда́ отъ дре́ва.

Тобо́ю освяти́лъ е́сть Госпо́дь, святи́телю Гу́ріе, гра́дъ вели́кій, невѣ́ріемъ погруже́нный. Тобо́ю наста́ви невѣ́рныя лю́ди позна́ти вѣ́ру и́стинну. Тобо́ю же приведо́шася ко Христу́ мно́жество невѣ́рныхъ. И неиму́щимъ неоску́дное подава́ніе, а́лчущимъ корми́тель и пита́тель, и въ бѣда́хъ помо́щникъ, и всѣ́мъ къ тебѣ́ прибѣга́ющимъ бога́тное пріобрѣ́теніе, Гу́ріе преподо́бне.

Тобо́ю, преподо́бне святи́телю Варсоно́фіе, пе́рвая и вели́кая оби́тель Спа́сова свята́го Преображе́нія въ новопросвѣще́нномъ гра́дѣ Каза́ни соста́вися. И тобо́ю, я́ко древеса́ добропло́дна, и я́ко са́дъ присноцвѣту́щій, и я́ко пло́дъ красе́нъ, мно́жество мона́ховъ твоему́ Влады́цѣ Христу́ принесо́шася: тобо́ю же мно́жество вѣ́рныхъ мона́шеская натрижне́нія и труды́ возлюби́ша, и мно́жество невѣ́рныхъ отъ тмы́ вознико́ша и къ Свѣ́ту, Христу́ Бо́гу, притеко́ша, и уче́ніемъ твои́мъ мно́зи спасо́шася.

Вы́ у́бо въ мíрѣ се́мъ на́ши нача́льницы и наста́вницы и учи́тели ко спасе́нію на́мъ яви́стеся: о́въ у́бо нача́льный па́стырь и святи́тель гра́ду Каза́ни бы́лъ е́сть, о́въ же о́бщему житію́ соста́витель и мона́хомъ учи́тель и па́стырь бы́сть; ку́пно же уча́ще и наказу́юще Бо́жія лю́ди пути́, вводя́щу въ Ца́рство небе́сное, вку́пѣ же и во еди́нъ ча́съ обрѣто́шася святы́я ва́ши мо́щи нетлѣ́нны и чуде́съ да́ръ прія́ли есте́ отъ Бо́га, исцѣле́ніе подава́ете неоску́дно приходя́щимъ къ ва́мъ съ вѣ́рою.

По достоя́нію у́бо не мо́жемъ ва́съ похвали́ти, отцы́ преподо́бніи: и по сме́рти у́бо, не я́ко во снѣ́, но на я́вѣ стра́ждущему отъ бѣсо́въ явля́етеся и мно́жество духо́въ злы́хъ отъ обурева́емаго отго́ните, и глаго́лати подае́те, отъ бѣсо́въ язы́ку отрѣ́заемому. Моли́те Христа́, преподо́бніи святи́теліе, и о на́съ, чи́сто чту́щихъ святу́ю ва́шу па́мять, да спасе́тъ ду́ши на́ша.

Сла́ва, гла́съ 8. Самогла́сенъ:

Яко звѣ́зды пресвѣ́тлыя, во страна́хъ Восто́ка яви́стеся: поне́же отъ ю́ности своея́ плотска́я мудрова́нія преоби́дѣсте вся́; впери́вше же у́мъ ва́шъ къ жела́емому Христу́ Бо́гу, и сконча́сте тече́ніе до́брое посто́мъ и моли́твою, и ми́лостынею, и бдѣ́ніемъ, и чистото́ю тѣле́сною. И отве́рзеся ва́мъ Ца́рство небе́сное, и ви́дите, я́же ви́дятъ а́нгели, и воздая́ніе трудо́въ пріе́млете: Бо́гъ бо вѣ́сть прославля́ти Своя́ уго́дники и подава́ти вѣнцы́ нетлѣ́нныя. Мы́ же мо́лимъ ва́съ: моли́те, святíи чудотво́рцы, и о на́съ непреста́нно Христа́ Бо́га спасти́ся душа́мъ на́шимъ.

И ны́нѣ, богоро́диченъ.
Славосло́віе вели́кое, [ектеніи́] и отпу́стъ.



НА ЛИТУРГІИ,

Блаже́нна отъ кано́на святы́хъ, пѣ́снь 3-я и 6-я, на 8. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ ко Евре́емъ, зача́ло 335. Аллилу́ія, гла́съ 2: Свяще́нницы Твои́ облеку́тся въ пра́вду, и преподо́бніи Твои́ возра́дуются. [Сти́хъ: Восхва́лятся преподо́бніи во сла́вѣ и возра́дуются на ло́жахъ свои́хъ.] Ева́нгеліе Матѳе́я, зача́ло 11. Прича́стенъ: Ра́дуйтеся пра́ведніи о Го́сподѣ, [пра́вымъ подоба́етъ похвала́].

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 42 об. – 53.

/ Къ оглавленію раздѣла /


Наверхъ / Къ титульной страницѣ

0