Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 3-й де́нь.
Свята́го священному́ченика Діони́сія Ареопаги́та.

[ВЕЧЕРЪ,]
На Го́споди воззва́хъ: стихи́ры на 6, гла́съ 1. Подо́бенъ: Небе́сныхъ чино́въ.

Во вну́треннѣйшій мра́къ* непристу́пнаго Свѣ́та ты́ разу́мно вше́дъ,* навы́клъ еси́ Боже́ственная недоумѣ́нная Сло́ва,* учениче́ Христо́въ, свяще́нне Діони́сіе,* и а́нгельскія чи́ны на земли́* я́вственно изъясни́лъ еси́.

Трисія́нною заре́ю просвѣти́въ твою́ ду́шу* и огне́мъ веще́ственнымъ, изнуря́ющимъ тѣ́ло,* къ невеще́ственнѣй преста́вился еси́, о́тче, Свѣ́тлости,* со а́нгелы совокупи́лся еси́,* съ ни́миже моли́ся непреста́нно за на́съ* спасти́ ду́ши на́ша.

Па́стырски преизя́ществовавъ въ Це́ркви Бо́жіей,* се́рдце твое́, о́тче,* прія́тельно благода́ти Ду́ха содѣ́лалъ еси́.* Тѣ́мже и на́мъ источа́еши, я́ко во́ды,* отъ честны́я твоея́ ра́ки,* всегда́, Діони́сіе, исцѣле́нія.

Ины стихи́ры, гла́съ то́йже. Подо́бенъ: Всехва́льніи.

Удицею благода́ти, му́дре,* Па́велъ боже́ственный,* народовѣща́въ, улови́* священноявле́нна* и неизрече́нныхъ зри́теля содѣ́ла,* тя́, сосу́дъ избра́нный, ви́дѣвъ.* Съ ни́мже моли́,* благоглаго́ливе Діони́сіе* спасти́ любо́вію пою́щія тя́.

Ангеломъ равноче́стенъ у́мъ,* о́тче Діони́сіе,* добродѣ́тели ра́ди содѣ́лавъ,* премíрное священнонача́льства* благочи́ніе, всему́дре,* си́хъ священноповѣствова́лъ еси́,* и́миже учини́лъ еси́* церко́вная составле́нія,* небе́снымъ чино́мъ подо́бяся.

Любомудрѣ́йше Бо́гу,* блаже́нне Діони́сіе,* я́ко мо́щно подо́бяся,* именова́ній твое́ та́инственно Боже́ственныхъ* благоче́стно распросте́рлъ еси́* боже́ственное, богому́дре, сказа́ніе, едине́ніемъ лу́чшимъ,* навы́къ, я́же па́че мы́сли,* и научи́лъ еси́ мíра концы́.

Сла́ва, гла́съ 2. Андре́я Іерусали́мскаго:

Пріиди́те, вѣ́рніи, согла́сно лѣ́тнюю па́мять іера́рховъ похва́лимъ, Діони́сія же и Кипріа́на: о́въ бо оплева́въ сто́иковъ филосо́фовъ, и сосу́домъ избра́ннымъ научи́вся, неизрече́нныхъ та́инъ зна́тель бы́сть; о́въ же, до́брыя ра́ди дѣ́вы Іусти́ны, по́мыслъ просвѣти́въ, де́монскія пре́лести избѣже́, и волше́бныя кни́ги огне́мъ изже́гъ, ева́нгельскій проповѣ́дникъ бы́сть. Тѣ́мъ и мы́, грѣ́шніи, просла́вльшему сія́ Спа́су славосло́вяще, возопіи́мъ: Иже Твоя́ страстоте́рпцы сла́вою вѣнча́вый, Христе́ Бо́же, тѣ́хъ моли́твами спаси́ ду́ши на́ша.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Егда́ нескве́рная Агница ви́дѣ Своего́ Агнца, на заколе́ніе, я́ко человѣ́ка, во́лею влеко́ма, пла́чущи, глаго́лаше: безча́дствовати Мя́ ны́нѣ тщи́шися, Христе́, Ро́ждшую Тя́, что́ сіе́ сотвори́лъ еси́, Изба́вителю вся́ческихъ? Оба́че воспѣва́ю и сла́влю Твою́, ю́же па́че ума́ и сло́ва, кра́йнюю бла́гость, Человѣколю́бче.

На стихо́внѣ окто́иха. Сла́ва, гла́съ 4:

Небе́снаго зна́нія неви́димую глубину́ тебе́ нарече́мъ, свѣтлѣ́йшій му́чениче Христо́въ, я́ко бо ору́жника и тве́рда побо́рника Це́ркве воспѣва́емъ тя́, му́дре: огне́мъ бо чистѣ́йшимъ просія́лъ еси́, сподо́бився вку́пѣ съ вы́шними воинствосло́віи, свѣ́тлою оде́ждею облещи́ся Христа́, и озари́въ у́мъ свѣ́тлостію Ду́ха Свята́го, Діони́сіе. Тѣ́мъ твою́ всемíрную па́мять торжеству́имъ вѣ́рно, сла́вяще просла́вльшаго тя́ Го́спода.

И ны́нѣ, богоро́диченъ или́ крестобогоро́диченъ. Подо́бенъ: Яко до́бля.

Агнца и Па́стыря Тя́* на дре́вѣ я́ко ви́дѣ,* Агница ро́ждшая рыда́ше* и ма́терски Ти́ вѣща́ше:* Сы́не возжелѣ́нне,* ка́ко на дре́вѣ кре́стнѣмъ повѣ́шенъ еси́, Долготерпѣли́ве?* Ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?

Тропа́рь, гла́съ 4:

Бла́гости научи́вся и трезвя́ся во всѣ́хъ, благо́ю со́вѣстію священнолѣ́пно обо́лкся, поче́рплъ еси́ отъ сосу́да избра́ннаго неизрече́нная, и вѣ́ру соблю́дъ, ра́вное тече́ніе соверши́лъ еси́, священному́чениче Діони́сіе, моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, богоро́диченъ или́ крестобогоро́диченъ.



НА УТРЕНИ,
На Бо́гъ Госпо́дь: тропа́рь свята́го, два́жды. Сла́ва, и ны́нѣ, богоро́диченъ или́ крестобогоро́диченъ.

Оба кано́на окто́иха со ирмосо́мъ на 8 безъ му́ченичновъ, и свята́го на 6, его́же краегране́сіе: Умъ хвалю́ му́дрыхъ уче́ній. Ѳеофа́нъ. Гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Па́вломъ боже́ственнымъ науче́нъ, небе́сныхъ, Діони́сіе, ви́дцемъ, небе́сный таи́нникъ а́біе и боговѣща́тель бы́лъ еси́.

Иже благода́тію Бо́жіею озари́вся, просвѣти́, блаже́нне, пою́щихъ тя́ ду́ши твоя́ разумѣ́ти богодухнове́нная уче́нія, Діони́сіе.

Умо́мъ преочище́ннымъ и душе́ю, небе́сныхъ удобре́ній сія́нія увѣ́дѣти сподо́бился еси́, и тѣ́хъ ликостоя́нія, Діони́сіе.

Богоро́диченъ: Черто́гъ свѣтоно́сный, па́че ума́ воплоще́нія яви́лася еси́ всѣ́хъ Содѣ́теля: изъ Тебе́ бо пло́ть, Богома́ти, на́шу одѣ́ялъ е́сть.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Небе́сныхъ круго́въ превозше́дъ, о́тче, премíрныхъ чи́ны, и во́инства, и свѣ́тлости, высоковѣща́ньми слове́съ и всему́дрыми уче́ніи всѣ́мъ изъясни́лъ еси́.

Высо́каго видѣ́нія насы́щся, преподо́бне, име́нъ Боже́ственныхъ Боже́ственное разумѣ́ніе богосло́вилъ еси́, Тро́ичный богосло́въ бы́въ благода́тію, богоблаже́нне Діони́сіе.

Умертви́вся ны́нѣшнимъ жела́ніемъ, е́же къ Бо́гу, и любому́дрію крѣ́пко научи́вся, су́щимъ па́че ума́ животво́рнымъ дарова́ніемъ богоно́сный орга́нъ, о́тче, бы́лъ еси́.

Богоро́диченъ: Дѣя́ніемъ, Дѣ́во, Вседѣ́тельнаго Ду́ха, тѣ́ло Влады́цѣ всѣ́хъ плодоноси́ла еси́, въ Не́мже осуди́ся мíра грѣ́хъ и Жи́знь источи́ся вѣ́чнующая.

Сѣда́ленъ, гла́съ 8. Подо́бенъ: Прему́дрости.

Въ пучи́нѣ прему́дрости уча́, Ду́ха глубины́, Тро́ицы еди́но Божество́ проповѣ́далъ еси́, преподо́бне, списа́въ вся́ а́нгельскія чи́ны и та́йная тѣ́хъ сія́нія, богому́дре. Тѣ́мъ и ни́жнюю іера́рхію счиня́я, ко еди́ному вся́ возве́лъ еси́ еди́нству, іера́рше Діони́сіе. Моли́ Христа́ Бо́га прегрѣше́ній оставле́ніе дарова́ти честву́ющимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Со́лнца о́блаче разу́мнаго, Боже́ственнаго Свѣ́та свѣти́льниче златокова́нный, нескве́рная, небла́зная, всенепоро́чная Влады́чице, омраче́нную ду́шу мою́ ослѣпле́ніемъ страсте́й безстра́стія заре́ю просвѣти́, молю́ся. И оскверне́нное мое́ се́рдце омы́й пото́ки умиле́нія, покая́нія же слеза́ми, и отъ тимѣ́нія мя́ очи́сти дѣ́лъ мои́хъ, да любо́вію зову́ Ти: Богоро́дице Приснодѣ́во, моли́ Христа́ Бо́га, прегрѣше́ній оставле́ніе пода́ти ми́, Тебе́ бо имѣ́ю наде́жду, ра́бъ Тво́й.

Крестобогоро́диченъ:

Агнца, и Па́стыря, и Изба́вителя, Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мляй Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе, вѣ́рою пою́щимъ Боже́ственная Стра́сти Твоя́.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Церко́вное благочи́ніе украси́лъ еси́: въ ни́хъ бо, о́тче, живописа́лъ еси́ зра́чныя о́бразы я́вственно священнописа́ніемъ безобра́зныхъ си́лъ; и́миже тайново́дятся и просвѣща́ются вся́ вѣ́рныхъ, богому́дре, собо́ры.

Струи́ твоего́ богосло́вія, богопрія́тне, цвѣтники́ напая́ютъ слове́сныя, присноцвѣ́тущія зѣло́ и насажде́нныя на пра́вости богосло́вія: еди́нство бо Существа́ въ Тріе́хъ Ли́цѣхъ, честно́е Единонача́ліе проповѣ́далъ еси́.

Ангельскаго священнонача́льства си́льное, святи́телю, жела́ніе и раче́ніе, е́же къ Бо́гу, и неукло́нное ма́ніе къ высотѣ́ боже́ственнѣй и непостижи́мѣй, научи́лъ еси́ богому́дренно, вѣ́рою вопію́щія: си́лѣ Твое́й сла́ва, Человѣколю́бче.

Богоро́диченъ: Священнодѣ́йствитель спасе́нія бы́сть Сы́нъ Тво́й всѣ́мъ пою́щимъ Тя́, и наста́вникъ, и просвѣти́тель, и пра́вда, Дѣ́во, и избавле́ніе. Тѣ́мъ Тя́, Богоро́дицу, и́стинно и госпо́дьственно вѣ́рніи единому́дренно сла́вимъ.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Глаго́лъ твои́хъ вѣща́ніе, я́ко нѣ́кій небе́сный шу́мъ носи́мь, безбо́жныя ра́зумы огроми́ сло́вомъ благода́ти и велѣ́ній боже́ственныхъ заря́ми свѣтлѣ́йшими вѣ́рныхъ сердца́ просвѣти́.

Уподо́бился еси́ купцу́, и́щущему до́брыя би́серы, всебога́те, и обрѣ́лъ еси́ еди́нъ Би́серъ, и́стинно многоцѣ́ненъ, и, уди́влься его́ боготво́рну свѣтоверже́нію, святи́телю, Бо́га исповѣ́далъ еси́.

Исто́чникъ му́дрости, любому́дрѣйше о́тче, возлюби́лъ еси́, и, тоя́ раче́ніемъ и любо́вію одержи́мь, вели́къ бы́лъ еси́, и рѣ́ки боже́ственныхъ велѣ́ній всегда́ то́чиши, богогла́се.

Богоро́диченъ: Яко Обра́дованная, добротворя́щее прія́ла еси́ благолѣ́піе, вся́ еди́нѣмъ хотѣ́ніемъ Сотво́ршаго, и боже́ственною добро́тою и просвѣще́ніемъ благовѣ́рія, Богома́ти, на́съ Удобри́вшаго.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Зако́нно любому́дрствуя, му́дрости да́ръ получи́лъ еси́, боже́ственнѣ богосло́вя правосла́вныя догма́ты, всеблаже́нне, оста́вилъ еси́, и́хже наслажда́ющеся, вѣ́рніи, тя́ блажи́мъ.

Ра́зумомъ боголѣ́пнымъ, богому́дре, удобря́емь, боже́ственному учи́телю слу́хъ тво́й приклони́лъ еси́, и премíрную отъ него́ му́дрость навы́клъ еси́, Діони́сіе.

Житіе́ твое́ чу́дно, сло́во же ди́внѣйше, язы́къ тво́й свѣтоза́ренъ, уста́ огнедухнове́нна и духодви́жима, у́мъ же тво́й испы́тенъ, о́тче, богоблаже́нне.

Богоро́диченъ: Гла́съ Ти́ Гавріи́ловъ ра́достно, Дѣ́во, взыва́емъ вѣ́рніи, изъ Тебе́ бо неизрече́нно на́мъ живонача́льный Творе́цъ изше́лъ е́сть и примѣси́ся человѣ́комъ, Человѣколю́бецъ.

Конда́къ, гла́съ 8. Подо́бенъ: Взбра́нной.

Небе́сная врата́ проше́дъ ду́хомъ, я́ко учени́къ, до тре́тіяго небесе́ дости́гшаго апо́стола, Діони́сіе, неизрече́нныхъ обогати́лся еси́ вся́кимъ ра́зумомъ и озари́лъ еси́ во тмѣ́ невѣ́дѣнія сѣдя́щія. Тѣ́мже зове́мъ: ра́дуйся, о́тче всемíрный.

Икосъ:

Ангелъ отъ человѣ́ковъ, добродѣ́тельми бы́въ вели́кій Діони́сій, ве́сь, я́ко крила́тъ, навы́че умо́мъ небе́сныя ра́зумы. Тѣ́мъ пѣ́сньми, я́ко а́нгела, почти́мъ, вопію́ще къ нему́ такова́я: ра́дуйся, увѣ́дѣвый Христа́ Па́вломъ; ра́дуйся, мно́гія ко Христу́ обрати́вый; ра́дуйся, многобо́жія храмо́въ губи́телю; ра́дуйся, богоразу́мнаго совѣ́та смотре́ніе; ра́дуйся, кни́го богоначерта́нная та́йныхъ сокро́вищъ; ра́дуйся, скрижа́ль богозра́чная и зерца́ло небе́сное; ра́дуйся, я́ко Стра́сть Госпо́дню ви́дѣлъ еси́; ра́дуйся, я́ко усе́рдно Того́ ра́ди закала́ешися; ра́дуйся, исто́чниче, источа́я ра́зумъ; ра́дуйся, ка́пле, угаша́ющи безу́міе; ра́дуйся, стезе́ неле́стная спасе́нія; ра́дуйся, прегра́до нечести́выхъ прехо́да; ра́дуйся, о́тче всемíрный.

Пѣ́снь 7.

Ирмо́съ: Бо́жія снисхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Яко ту́ча небе́сная зе́млю жа́ждущую, твоя́ уче́нія вѣ́рныхъ сердца́ при́сно жела́ющая умаща́ютъ и несы́тно вопи́ти науча́тъ: оте́цъ на́шихъ Бо́же, благослове́нъ еси́.

Ра́зумомъ богому́дреннымъ безпло́тныя умы́ расписа́лъ еси́ и тѣ́хъ, преблаже́нне, пѣсносло́вія, боже́ственъ бы́въ, Це́рковь пѣ́ти наказа́лъ еси́: благослове́нъ Бо́гъ оте́цъ на́шихъ.

Прія́телище Ду́ха Всесвята́го яви́лся еси́ благоключи́мое, и Того́ вдохнове́нія и явле́нія проро́чески провозглаша́я, му́дре Діони́сіе, вопія́ше ве́село: благослове́нъ Бо́гъ оте́цъ на́шихъ.

Богоро́диченъ: Се́ ны́нѣ испо́лнися Иса́іи богоглаго́ливаго прорече́ніе: Дѣ́ва бо во чре́вѣ Бо́га Сло́ва имѣ́ и породила́ е́сть Жизнода́вца; Ему́же вси́ зове́мъ: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Свѣ́телъ, я́ко зерца́ло, бы́въ, Діони́сіе, и вмѣсти́теленъ чи́стыхъ явле́ній у́мъ содѣ́лавъ, добродѣ́телію, всебога́те, лучи́ па́че ума́ сія́нія пріе́мля, вопія́лъ еси́: свяще́нницы благослови́те, лю́діе превозноси́те во вся́ вѣ́ки.

Оби́льнѣйшая благода́ть излія́ся во устна́хъ твои́хъ, тѣ́мъ боже́ственная уче́нія предложи́лъ еси́, и тѣ́хъ ра́зумы па́че смы́сла на́мъ простира́я и яснѣ́е и свѣ́тло отверза́я, вѣ́рою пою́щимъ: свяще́нницы благослови́те, лю́діе превозноси́те во вся́ вѣ́ки.

Зна́емѣйша бы́сть тобо́ю, Діони́сіе, Аѳи́нская всесла́вная митропо́лія, Христу́ прине́сшая тя́ нача́токъ всесвяще́нный Всецарю́, всегда́ пою́щи: о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Богоро́диченъ: Ма́ти Бо́жія Всенепоро́чная, души́ моея́ стру́пы и грѣхо́вныя я́звы потреби́: Сы́на бо родила́ еси́, вла́сть иму́щаго свя́занныя плени́цами грѣхо́вными удо́бь осла́бити отъ у́зъ нерѣши́мыхъ, еди́наго Благодѣ́теля и еди́наго Жизнода́вца.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Святы́хъ апо́столъ сподо́бился еси́ ви́дитель бы́ти и сострада́лецъ, и соо́бщникъ бы́лъ еси́ сла́вы, и съ тѣ́ми на видѣ́ніе потща́лся еси́ тѣлесе́ и́стинно живонача́льныя еди́ныя Богоро́дицы и честнѣ́йшія, Юже досто́йно велича́емъ.

Боже́ственнаго Ца́рствія на небесѣ́хъ наслѣ́дникъ бы́лъ еси́, я́ко зако́ненъ архіере́й, о́тче, я́ко непобѣди́мь страда́лецъ, свяще́нства ма́стію кро́вь сраствори́лъ еси́ му́ченическую. Тѣ́мъ сугу́бымъ вѣнце́мъ сподо́бился еси́ досто́йно, священнотаи́нниче Діони́сіе.

Яко имѣ́я дерзнове́ніе ко Христу́, іера́рше, му́дре Діони́сіе, всегда́ моли́ изба́витися отъ искуше́нія благоче́стно пою́щимъ тя́, учениче́ неизрече́нныхъ видѣ́ній, я́ко тайноуче́нныя и богонача́льныя священноявле́нникъ бла́гости.

Богоро́диченъ: Побѣди́вшу е́реси хра́брски, честну́ю Це́рковь яви́, ю́же Христо́съ честно́ю Свое́ю кро́вію я́ко Бла́гъ стяжа́, Обра́дованная, Сы́нъ Тво́й и́стинно, и спаси́ отъ бѣ́дъ и отъ обстоя́нія, одержа́щаго на́съ, Влады́чице.

Свѣти́ленъ. Подо́бенъ: Ученико́мъ зря́щимъ.

Добродѣ́тельми восходя́, возвы́сився на небеса́, богопрія́тне, и позна́лъ еси́ а́нгеловъ чи́ны, и всѣ́хъ вы́шнихъ стоя́нія, и Трисо́лнечную Зарю́, навы́къ отъ Па́вла.

Богоро́диченъ:

Иже жи́зни боже́ственнѣй и блаже́ннѣй позави́дѣвъ ми́ дре́вле въ раи́, вра́гъ прелука́вый и злоко́зненный, и отъ Еде́ма изгна́въ мя́, умерщвля́ется Рождество́мъ Твои́мъ, Богоро́дице.

На стихо́внѣ окто́иха. Сла́ва, свята́го, гла́съ 8. Ге́рманово:

Во святи́телехъ и му́ченицѣхъ, преизя́ществовавъ, преподо́бне, вѣ́ренъ яви́лся еси́ па́стырь, и Христо́ву испи́въ ча́шу, тѣ́мъ во обои́хъ благоугоди́въ Тому́, моли́ся о всѣ́хъ на́съ, съ го́рними служи́тельми во Свѣ́тѣ ны́нѣ водворя́емый.

И ны́нѣ, богоро́диченъ или́ крестобогоро́диченъ. Подо́бенъ: Му́ченицы.

Юница Нескве́рная, Юнца́ ви́дящи на дре́вѣ пригвожда́ема во́лею, рыда́ющи жа́лостнѣ: увы́ Мнѣ́, — вопія́ше, — люби́мѣйшее Ча́до! Что́ Ти́ со́нмъ воздаде́ безблагода́тный евре́йскій, хотя́ Мя́ обезча́дствовати отъ Тебе́, Вселюбе́зне?


НА ЛИТУРГІИ,

Блаже́нна окто́иха на 4 и свята́го пѣ́снь 3-я на 4. Проки́менъ, гла́съ 8: Восхва́лятся преподо́бніи во сла́вѣ и возра́дуются на ло́жахъ свои́хъ. Сти́хъ: Воспо́йте Го́сподеви пѣ́снь но́ву, [воспо́йте Го́сподеви вся́ земля́]. Апо́столъ Дѣя́ній, зача́ло 40, отъ полу́. Аллилу́ія, гла́съ 2: Свяще́нницы Твои́ облеку́тся [въ пра́вду, и преподо́бніи Твои́ возра́дуются. Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ]. Ева́нгеліе Матѳе́я, зача́ло 55 отъ полу́. Прича́стенъ: Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 33 об. – 38.

/ Къ оглавленію раздѣла /


Наверхъ / Къ титульной страницѣ

0