Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 24.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія во 2-й де́нь.
Свята́го и блаже́ннаго Андре́я, Христа́ ра́ди юро́диваго.

Стихи́ры, гла́съ 8. Подо́бенъ: О, пресла́внаго чудесе́!

О, пресла́внаго чудесе́,* я́ко во изступле́ніи ума́* соверши́ся духо́вная му́дрость* въ тебѣ́, о́тче Андре́е.* Вся́ бо уме́ты вмѣни́лъ еси́,* да Христа́ пріобря́щеши,* и Ца́рство небе́сное возлюби́лъ еси́,* е́же и получи́лъ еси́,* ны́нѣ со а́нгелы стоя́, свя́те,* моли́ся о чту́щихъ прилѣ́жно па́мять твою́.

О, пресла́внаго чудесе́,* пло́тску се́рдцемъ* безпло́тныя показа́лъ еси́* и сокрове́нная откры́лъ еси́* уго́днику Твоему́, Андре́ю,* бы́вшему юро́ду Тебе́ ра́ди* и земны́я стра́сти претерпѣ́вшему,* кре́стъ взе́мшему и послѣ́довавшу Тебѣ́, Влады́цѣ и Бо́гу.* Его́же моли́твами, Христе́ Бо́же,* я́ко Ми́лостивъ, спаси́ ду́ши на́ша.

О, пресла́внаго чудесе́,* въ бре́ннѣмъ тѣ́лѣ ходя́ на земли́,* Тебе́ ра́ди, Го́споди, я́ко безпло́тенъ пребыва́я,* уго́дникъ Тво́й Андре́й ве́ліе нестяжа́ніе стяжа́,* обѣща́нныхъ Твои́хъ возжелѣ́въ,* его́же ни о́ко ви́дѣ, ни у́хо слы́ша,* ни на се́рдце человѣ́ка взы́де,* угото́ванныхъ лю́бящимъ Тебе́:* того́ моли́твами* спаси́ ду́ши на́ша, я́ко Ми́лостивъ.

Сла́ва, гла́съ 6:

До небесе́ восхище́нъ бы́лъ еси́ и, неизрече́нныя глаго́лы слы́шавъ, неви́димая же уви́дѣлъ еси́ и, честна́го Креста́ о́бразъ ви́дѣвъ, съ любо́вію того́ цѣлова́лъ еси́ и Боже́ственныя сла́дости испо́лнился еси́, и ра́йская блага́я открове́нна тебѣ́ бы́ша: отъ мо́лніи изтка́нною ри́зою обле́клся еси́, Христу́ послѣ́довавъ, свя́те Андре́е досточу́дне.

Тропа́рь, гла́съ 1:

Гла́съ апо́стола Твоего́ Па́вла услы́шавъ, глаго́лющь, — мы́ юро́ди Христа́ ра́ди, — ра́бъ Тво́й, Андре́й, юро́дъ бы́сть на земли́ Тебе́ ра́ди, Христе́ Бо́же. Тѣ́мже ны́нѣ па́мять его́ почита́юще, Тебѣ́ мо́лимся, Го́споди, спаси́ ду́ши на́ша.


Кано́нъ свято́му, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Отве́рзи мои́ устнѣ́, подви́гни мо́й язы́къ и испра́ви мо́й смы́слъ, вся́ умудря́яй, Бо́же, да похвалю́ уго́дника Твоего́ Андре́я, юро́да бы́вшаго на земли́ Тебе́ ра́ди.

Андре́е блаже́нне, ты́ измла́да Христа́ возлюби́лъ еси́ и къ Нему́ единоду́шно возжелѣ́лъ еси́: ка́ко же тя́ по достоя́нію похва́лимъ, на діа́вола вооружи́вшася и сего́ ко́зни побѣди́вша си́лою Христо́вою.

Моли́твами Бо́гу моля́ся и діа́волу досажда́я, и мно́гаго его́ толца́нія въ две́ри хи́жины твоея́ а́ще вма́лѣ и устраши́вся, но неподви́женъ умо́мъ пребы́лъ еси́, си́лою Христо́вою укрѣпля́емый.

Богоро́диченъ: О, Пресвята́я Госпоже́ Дѣ́во Богоро́дице, покры́й ны́ чу́днымъ Твои́мъ омофо́ромъ и сохраня́й гра́дъ Тво́й отъ бѣ́дъ и скорбе́й, я́коже Тя́ преблаже́нный ви́дѣ Андре́й, во Влахе́рнстѣй це́ркви моля́щуюся.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Со еѳіо́помъ бра́вся, побѣди́лъ еси́ того́, отъ Христа́ дерзнове́ніе пріи́мъ, мно́гу печа́ль де́мономъ сотвори́лъ еси́, святы́мъ же а́нгеломъ весе́ліе и ра́дость, съ ни́миже ны́нѣ водворя́ешися.

Во снѣ́ Христа́ пре́жде ви́дѣлъ еси́, на де́моны тя́ укрѣпля́юща и вѣне́цъ тебѣ́ подаю́ща, и со еѳіо́помъ бра́тися поуча́юща: ны́нѣ же не сновидѣ́ніемъ, но въ неизрече́ннѣмъ свѣ́тѣ сла́вы Его́ ви́дя, за ны́ моли́ся.

Христа́ послу́шалъ еси́, повелѣ́вшаго тебѣ́ юро́ду бы́ти и Ца́рство небе́сное обѣща́вша: Тому́ послѣ́довавъ, неизрече́нная блага́я Его́ воспрія́лъ еси́, Андре́е досточу́дне.

Богоро́диченъ: Пріиди́ ны́нѣ во сла́вѣ въ це́рковь Твою́, Богоро́дице, съ собо́ры святы́хъ, я́коже Тя́ ви́дѣ святы́й Андре́й на возду́сѣ свѣ́тлѣ, за христіа́ны моля́щуюся, и пода́ждь на́мъ, Госпоже́, ве́лію ми́лость.

Сѣда́ленъ, гла́съ 8:

Узы и желѣ́зы свя́занъ, въ це́ркви сѣдя́, Андре́е, мно́ги стра́хи отъ де́моновъ подъя́лъ еси́ и помо́щника себѣ́ обрѣ́лъ еси́ апо́стола Христо́ва, возлю́бленнаго Іоа́нна, и́же повелѣ́ тебѣ́ терпѣ́ти Христа́ ра́ди. Съ ни́мже ны́нѣ водворя́ешися, за ны́ моли́ся, чту́щія па́мять твою́.

Сла́ва, и ны́нѣ, богоро́диченъ:

Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому заступле́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, изъ Тебе́ Воплоще́нному безсѣ́менно моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихтися, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти, воспѣва́ющимъ досто́йно сла́ву Твою́.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя Стра́сти Твоя́.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Сѣдя́ща на престо́лѣ Христа́ Царя́ ви́дѣлъ еси́, го́рькія сея́ жи́зни о́бразъ разсмотри́лъ еси́, горча́йшь пелы́ни су́щій, пото́мъ же нетлѣ́нныя сла́дости вку́съ прія́лъ еси́.

Тогда́ во снѣ́ и въ восто́рзѣ Христа́ ви́дѣлъ еси́, ны́нѣ же, со безпло́тными си́лами водворя́яся, сла́ву Бо́жію ви́диши непостижи́мую и неизглаго́ланную: помина́й на́съ, Андре́е, чту́щихъ па́мять твою́.

Отъ видѣ́нія ра́зумовъ увѣ́рившагося Андре́я похва́лимъ, вѣ́рніи, на земли́ бы́вша юро́да Христа́ ра́ди, на небесѣ́хъ же ны́нѣ прему́дра духо́вною благода́тію, со а́нгелы предстоя́ща всѣ́хъ Бо́гу.

Богоро́диченъ: Кто́ изглаго́лати мо́жетъ Твоего́ Рождества́ та́инство? Или́ кто́ исповѣ́сть Твоея́ моли́твы си́лу? Аще не бы́ Сама́ Ты́ показа́ла еси́ Андре́ю юро́дивому въ це́ркви Влахе́рнстѣй честны́й Тво́й Покро́въ.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Удивле́ніе бы́сть всѣ́мъ ви́дящимъ Андре́ево житіе́: на сме́тьищи лега́ніе и посредѣ́ гра́да обнаже́ніе, и колесни́чное попра́ніе, но сія́ вся́ бы́сть ему́ пути́ правле́ніе въ небе́сное Ца́рствіе.

Удиви́шася вси́, ви́дящіи терпѣ́ніе твое́: му́ченицы бо во еди́но вре́мя стра́сть претерпѣ́ша, ты́ же вся́ дни́ живота́ твоего́ злы́я му́ки терпѣ́лъ еси́, въ небе́сное Ца́рство жела́я всели́тися, е́же получи́въ ны́нѣ, ра́дуешися безконе́чною ра́достію.

Сокрове́нная бы́ша тебѣ́ открове́на и вся́ безпло́тныя, а́ки плотскíя, ви́дѣлъ еси́: ничто́же бо земны́хъ возлюби́лъ еси́. Тѣ́мже и небе́сная врата́ отверзо́шася тебѣ́, въ неизглаго́ланную ра́дость Го́спода твоего́, блаже́нне, вше́лъ еси́.

Богоро́диченъ: Пою́тъ Тя́ чи́ни а́нгельстіи и сла́вятъ Тя́ земны́хъ ро́ди: Ты́ бо, небе́сная Цари́це, Андре́ю яви́лася еси́, покрыва́ющи лю́ди въ це́ркви нетлѣ́ннымъ Твои́мъ Покро́вомъ, за вся́ пою́щія Тя́ непреста́нно моля́щися.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Апо́стола Па́вла испо́лнися гла́съ на тебѣ́, о́тче: сло́во кре́стное погиба́ющимъ у́бо юро́дство вмѣни́ся, тебѣ́ же, спаса́ющемуся, си́ла Бо́жія бы́сть, Андре́е всехва́льне.

Христо́въ гла́съ испо́лнися на тебѣ́, рече́нный: блаже́ни ни́щіи ду́хомъ, я́ко тѣ́хъ е́сть Ца́рство небе́сное. Ты́ бо обнища́лъ еси́ ду́хомъ и Ца́рство небе́сное воспрія́лъ еси́.

Епифа́нія иногда́, ю́ношу су́ща, на пу́ть пра́вый наста́вилъ еси́, ему́же и проре́клъ еси́ архіере́ю бы́ти и лю́ди учи́ти: вся́ бо бу́дущая, я́ко предъ очесы́ су́щая, ви́дѣлъ еси́.

Богоро́диченъ: Припа́даемъ Тебѣ́, Богоро́дице, мы́, грѣ́шніи, да и на на́съ ны́нѣ простре́ши неви́димый Покро́въ Тво́й, къ Сы́ну Твоему́ и Бо́гу на́шему да принесе́ши моли́твы Твоя́ за ны́, я́коже Тя́ дре́вле Андре́й ви́дѣ.

Конда́къ, гла́съ 4. Подо́бенъ: Вознесы́йся.

Во юро́дство претвори́вся во́лею, мíра сего́ красоты́ отню́дъ возненави́дѣлъ еси́, плотска́я мудрова́нія увяди́лъ еси́ посто́мъ и жа́ждею, и зно́емъ, и сту́денію мра́за, отъ дождя́ и снѣ́га, и отъ про́чія возду́шныя тяготы́ никогда́же уклони́вся, очи́стилъ еси́ себе́, я́ко зла́то въ горни́лѣ, Андре́е блаже́нне.

Икосъ:

Пріиди́те, христолю́бцы, пріиди́те, нищелю́бцы, восхва́лимъ блаже́ннаго страда́льца, прему́драго Андре́я, бы́вша юро́да Христа́ ра́ди, во́лею мíръ и я́же въ не́мъ уме́ты вмѣни́вша, по апо́столу, и во слѣ́дъ Христа́ усе́рдно поте́кша, пло́ть же свою́ посто́мъ и жа́ждею, и зно́емъ, и дожде́мъ и снѣ́гомъ, возду́шною тя́гостію смири́вша, ду́шу же отъ страсте́й свобо́дну соблю́дша и свѣ́тлу добродѣ́тельми содѣ́лавша, и небе́сное житіе́ со всѣ́ми святы́ми вѣ́чно наслѣ́довавша, и моля́щася Христу́ Бо́гу о чту́щихъ Его́ вѣ́рою и любо́вію. Къ нему́же возопіи́мъ: ра́дуйся, уго́дниче Христо́въ, Андре́е блаже́нне.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Ничто́же изво́ливъ люби́ти на земли́ па́че Зижди́теля, но посредѣ́ храмо́въ скита́яся, блаже́нне Андре́е, ра́довался еси́, поя́: препѣ́тый отце́въ Госпо́дь и Бо́гъ, благослове́нъ еси́.

Не пощадѣ́ пло́ти своея́, но предаде́ ю́ на по́двиги и труды́, и ну́ждное пребыва́ніе. Тѣ́мъ ко́зни де́монскія му́жески попра́ блаже́нный Андре́й, поя́: препѣ́тый отце́въ Госпо́дь и Бо́гъ, благослове́нъ еси́.

Ничто́же земны́я сла́вы восхотѣ́лъ еси́, Христа́ же па́че возлюби́лъ еси́, блаже́нне Андре́е, и къ Нему́ восте́клъ еси́, ра́дуяся, болѣ́зней твои́хъ пріе́мля воздая́ніе и поя́ при́сно: благослове́нъ Бо́гъ отце́въ на́шихъ.

Богоро́диченъ: Блаже́нне Андре́е, моли́ся и ны́нѣ Цари́цѣ Богоро́дицѣ, Юже ви́дѣлъ еси́ за мíръ моля́щуюся, да на́съ покры́етъ непобѣди́мою Свое́ю ми́лостію: Тоя́ бо Покро́вомъ вси́ вѣ́рніи сохраня́емся.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Бога́таго уме́рша иногда́ ви́дѣлъ еси́, съ ви́димою че́стію провожда́ема, неви́димо же злѣ́ своди́ма во глубину́ а́дову, блаже́нне Андре́е, и о не́мъ пла́чася и моля́ся Го́споду.

Безпло́тнаго а́нгела, печа́лующаго о поги́бели души́ бога́таго, въ житіи́ се́мъ не пока́явшася, отъ печа́ли премѣни́лъ еси́, Андре́е блаже́нне, съ ни́мже пое́ши: Го́спода по́йте дѣла́ и превозноси́те Его́ во вся́ вѣ́ки.

Сребролю́бца мона́ха ви́дѣлъ еси́, отъ зла́го змíя стужа́ема, Андре́е блаже́нне, и того́, отъ сребролю́бнаго неду́га изба́вивъ, вразуми́лъ еси́ пѣ́ти и превозноси́ти Го́спода во вся́ вѣ́ки.

Богоро́диченъ: Отъ Андре́ева видѣ́нія Покро́въ Тво́й увѣ́дѣвше, Цари́це Богоро́дице, мо́лимся Тебѣ́ прилѣ́жно: покры́й ны́ ми́лостію Твое́ю пою́щія Сы́на Твоего́ и превознося́щія Его́ во вся́ вѣ́ки.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

По Христо́ву словеси́ за бію́щія тя́ моли́лся еси́, свя́те: тѣ́мже небе́сная врата́ отве́рзста и ду́ши пра́ведныхъ во о́бразѣ ла́стовицъ лета́ющія ви́дѣлъ еси́, съ ни́миже ны́нѣ водворя́ешися, Андре́е блаже́нне.

Христа́ Бо́га и́стинно возлюби́въ, тебе́ сама́го отве́рглся еси́ и Тому́ послѣ́довалъ еси́, я́коже Онъ рече́: любя́й ду́шу свою́ спасти́, погуби́тъ ю́. Тѣ́мже ду́шу твою́ въ жи́знь вѣ́чную соблю́лъ еси́, достохва́льне свя́те Андре́е.

Вели́кая и пресла́вная ны́нѣ сбы́шася тебѣ́ въ небе́снѣмъ Ца́рствіи, а́ще и юро́дъ бы́лъ еси́ мíру, но Христу́ му́дръ яви́лся еси́, достохва́льне: призира́й съ небе́снаго кру́га на ны́, почита́ющія па́мять твою́.

Богоро́диченъ: Вся́къ земноро́дный покрыва́ется Покро́вомъ Твои́мъ, пресла́вная Засту́пнице Богоро́дице, я́коже блаже́нный Андре́й Тя́ ви́дѣ, за мíръ моля́щуюся Несозда́нному Существу́, въ созда́нное естество́ отъ Тебе́ обле́кшемуся.

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 29 об. – 33 об.

/ Къ оглавленію раздѣла /


Наверхъ / Къ титульной страницѣ

0